| ᠰ᠊ · ᠡᠷᠬᠢᠮᠪᠠᠶᠠᠷ | ᠵᠤᠨ | ᠪᠤᠷᠤᠭᠠᠨ ᠤ ᠲᠤᠰᠤᠯ ᠠᠩᠭᠠᠭᠰᠠᠨ ᠬᠦᠷᠦᠰᠦᠨ ᠳᠤ ᠴᠤᠬᠤᠷᠳᠠᠭᠠᠳ | ᠪᠤᠳᠠᠷᠠᠵᠦ ᠦᠰᠦᠷᠦᠨ ᠬᠦᠷᠦᠰᠦ ᠶᠢ ᠱᠠᠯ ᠲᠡᠪᠳᠦᠬᠡᠭᠡᠳ | ᠪᠤᠴᠠᠯᠵᠦ ᠪᠠᠶᠢᠭᠠ ᠰᠢᠭ᠋ ᠲᠤᠨᠤᠭᠰᠡᠨ ᠤᠰᠤ ᠵᠢᠩᠰᠡᠷᠡᠭᠡᠳ | ᠪᠤᠳᠤᠯ ᠨᠤᠷᠳᠠᠯᠠ ᠱᠠᠭᠢᠨ ᠱᠠᠭᠢᠨ ᠱᠠᠪᠰᠢᠪᠠ | ᠭᠠᠩᠳᠠᠵᠦ ᠪᠠᠶᠢᠭᠰᠠᠨ ᠲᠠᠯᠠ ᠭᠠᠯ ᠨᠤᠴᠤᠮᠠᠷ ᠪᠠᠶᠢᠭᠰᠠᠨ ᠴᠦ | ᠭᠠᠭᠴᠠᠬᠠᠨ ᠰᠦᠨᠢ ᠶᠢᠨ ᠪᠤᠷᠤᠭᠠᠨ ᠳᠤ ᠴᠡᠯ ᠨᠤᠭᠤᠭᠠᠨ ᠪᠤᠯᠪᠠ | ᠴᠡᠯ ᠨᠤᠭᠤᠭᠠᠨ ᠲᠠᠯᠠ ᠳᠤ ᠭᠠᠯ ᠤᠯᠠᠭᠠᠨ ᠰᠠᠷᠠᠨᠠ | ᠨᠢᠯᠬᠢᠳᠡᠯᠡ ᠲᠡᠯᠭᠡᠷᠡᠵᠦ ᠨᠢᠭᠡᠨ ᠵᠤᠨ ᠢᠷᠡᠪᠡ | ᠪᠤᠷᠤᠭᠠᠨ ᠤᠷᠤᠭᠠᠳ ᠯᠡ | ᠪᠤᠯᠵᠤᠮᠤᠷ᠂ ᠴᠠᠷᠴᠠᠬᠠᠢ ᠵᠠᠭᠤᠵᠦ ᠡᠭᠦᠷ ᠵᠦᠭ ᠢᠶᠠᠨ ᠨᠢᠰᠦᠭᠡᠳ | ᠪᠤᠳᠠᠩ ᠮᠠᠨᠠᠨ ᠪᠤᠭᠤ ᠶᠢᠨ ᠡᠪᠡᠷ ᠲᠠᠢ ᠤᠷᠢᠶᠠᠴᠠᠯᠳᠤᠭᠠᠳ | ᠪᠤᠯᠤᠷ ᠲᠤᠩᠭᠠᠯᠠᠭ ᠠᠩᠬᠠᠨ ᠤ ᠬᠠᠶᠢᠷᠠ ᠮᠡᠳᠦ ᠠᠷᠢᠭᠤᠬᠠᠨ ᠰᠢᠭᠦᠳᠡᠷᠢ | ᠨᠠᠪᠴᠢᠨ ᠤ ᠠᠯᠠᠭᠠᠨ ᠠᠴᠠ ᠲᠠᠰᠤᠷᠠᠮᠠᠷ ᠲᠠᠰᠤᠷᠠᠮᠠᠷ ᠴᠡᠴᠡᠷᠡᠭᠡᠳ | ᠬᠠᠴᠠᠷ ᠤᠨ ᠬᠢᠨᠢ ᠬᠤᠩᠬᠤᠷᠬᠠᠢ ᠮᠡᠳᠦ ᠬᠤᠨᠳᠠᠭᠠᠨ ᠴᠡᠴᠡᠭ | ᠶᠠᠭᠠᠨ ᠲᠤᠶᠠᠭᠠ ᠠᠰᠠᠭᠠᠨ ᠳᠡᠯᠭᠡᠷᠡᠭᠡᠳ | ᠪᠤᠯᠠᠭ ᠤᠨ ᠤᠰᠤᠨ ᠤ ᠬᠠᠪ ᠬᠠᠷᠠ ᠲᠤᠯᠢᠶᠠᠨ ᠳᠡᠭᠡᠷᠡ | ᠨᠠᠷᠠ ᠲᠠᠢ ᠪᠤᠷᠤᠭᠠᠨ ᠤ ᠲᠤᠰᠤᠯ ᠲᠤᠰᠤᠭᠠᠳ | ᠨᠠᠷᠠ ᠲᠤᠰᠤᠯᠤᠭᠠᠳ | ᠪᠤᠳᠤᠬᠤ ᠳᠤ ᠰᠢᠳᠦ ᠬᠠᠪᠤᠮᠠᠷ ᠵᠡᠷᠯᠢᠭ ᠭᠦᠢᠯᠡᠰᠦ ᠪᠠᠭᠰᠢᠷᠠᠨ ᠰᠠᠭᠤᠭᠰᠠᠨ | ᠬᠦᠬᠡ ᠬᠠᠷᠭᠠᠨᠠ ᠶᠢᠨ ᠨᠠᠮᠠᠭᠠᠨᠠ | ᠰᠠᠷᠠᠨᠠ ᠶᠢᠨ ᠤᠯᠠᠭᠠᠨ ᠲᠤᠭᠤᠰᠦ ᠪᠠᠷ ᠡᠩᠰᠡᠭᠡᠳᠡᠭᠰᠡᠨ ᠴᠠᠭᠠᠨ ᠡᠷᠪᠡᠬᠡᠢ ᠰᠠᠭᠤᠭᠠᠳ | ᠵᠠᠷᠠᠭᠠ ᠮᠦᠭᠡᠷᠡᠭᠡᠳ | ᠵᠠᠪᠵᠢᠨ ᠳᠠᠭᠠᠨ ᠭᠦᠢᠯᠡᠰᠦᠨᠴᠦ᠋ᠮᠡ ᠲᠦᠭᠳᠦᠶᠢᠯᠭᠡᠭᠰᠡᠨ ᠴᠦᠷᠬᠦᠪᠴᠢ | ᠬᠠᠳᠠ ᠪᠤᠳᠠ ᠳᠠᠮᠵᠢᠨ ᠭᠦᠶᠦᠭᠡᠳ | ᠴᠠᠪ ᠴᠠᠭᠠᠨ ᠬᠤᠨᠢᠳ ᠨᠤᠭᠤᠭᠠᠨ ᠲᠠᠯᠠ ᠶᠢ ᠴᠢᠮᠡᠭᠯᠡᠨ ᠪᠡᠯᠴᠢᠭᠡᠳ | ᠴᠠᠳᠬᠤᠯᠠᠩ ᠦᠬᠡᠷ ᠤᠳ ᠠᠮᠤᠷ ᠠᠮᠤᠭᠤᠯᠠᠩ ᠶᠢ ᠬᠡᠪᠢᠵᠦ | ᠪᠦᠳᠦᠭᠦᠨ ᠪᠦᠳᠦᠭᠦᠨ ᠠᠮᠢᠰᠬᠤᠭᠠᠳ | ᠰᠤᠯᠤᠩᠭᠠ ᠲᠠᠳᠠᠭᠠᠳ | ᠰᠤᠯᠤᠩᠭᠠ ᠰᠦᠪᠡᠯᠡᠵᠦ ᠰᠢᠪᠠᠭᠤ ᠨᠢᠰᠦᠭᠡᠳ | ᠰᠣᠪᠤᠳ ᠮᠡᠳᠦ ᠰᠢᠭᠦᠳᠡᠷᠢ ᠬᠤᠨᠳᠠᠭᠠᠨ ᠴᠡᠴᠡᠭ ᠤᠨ ᠳᠡᠯᠪᠢᠨ ᠳᠤ ᠲᠤᠭᠳᠠᠭᠠᠳ | ᠰᠤᠯᠤᠩᠭᠠ᠂ ᠰᠢᠪᠠᠭᠤ᠂ ᠡᠭᠦᠯᠡᠰ ᠰᠢᠭᠦᠳᠡᠷᠢ ᠶᠢᠨ ᠲᠤᠰᠤᠯ ᠳᠤ ᠪᠠᠭᠳᠠᠭᠠᠳ | ᠡᠷᠪᠡᠬᠡᠢ ᠨᠢᠰᠦᠭᠡᠳ | ᠡᠷᠪᠡᠬᠡᠢ ᠡᠯᠳᠡᠬᠦ ᠨᠢᠴᠦᠭᠦᠨ ᠬᠦᠦ ᠶᠢᠨ ᠬᠠᠴᠠᠷ ᠲᠤ | ᠡᠭᠡᠵᠡᠭᠡᠢ ᠶᠢᠨ ᠬᠡᠮᠬᠡᠳᠡᠭ ᠨᠠᠭᠠᠯᠳᠤᠭᠠᠳ | ᠬᠤᠳᠤ ᠨᠢ ᠤᠨᠵᠠᠶᠢᠬᠤ ᠬᠤᠶᠠᠷ ᠬᠦᠯ ᠤᠨ ᠬᠢᠨᠢ ᠬᠤᠭᠤᠷᠤᠨᠳᠤᠭᠤᠷ | ᠬᠤᠳᠠ ᠠᠶᠢᠯ ᠤᠨ ᠭᠠᠳᠠᠨᠠ ᠭᠡᠶᠢᠴᠢᠨ ᠢᠷᠡᠭᠦ ᠬᠠᠷᠠᠭᠳᠠᠭᠠᠳ | ᠬᠤᠷᠭᠤᠭᠠᠵᠦ ᠪᠠᠶᠢᠭᠰᠠᠨ ᠬᠠᠯᠳᠠᠷ ᠵᠠᠯᠬᠠᠵᠦ ᠬᠤᠶᠠᠷ ᠨᠢᠭᠡ ᠬᠤᠴᠠᠨ ᠪᠠᠶᠢᠬᠤ ᠳᠤ | ᠬᠦᠮᠦᠷᠢᠵᠦ ᠲᠠᠯᠪᠢᠭᠰᠠᠨ ᠬᠠᠭᠤᠴᠢᠨ ᠴᠠᠶᠢᠷ ᠤᠨ ᠠᠷᠤᠭ ᠳᠡᠭᠡᠷᠡ | ᠬᠦᠬᠡ ᠴᠠᠭᠠᠨ ᠬᠤᠶᠠᠷ ᠢᠰᠢᠭᠡ ᠭᠠᠷᠴᠦ ᠪᠠᠭᠤᠨ ᠪᠠᠶᠢᠬᠤ ᠳᠤ | ᠰᠠᠭᠠᠬᠠᠯᠳᠠ ᠠᠶᠢᠯ ᠤᠨ ᠪᠦᠰᠡᠭᠦᠢ ᠰᠠᠭᠰᠤ ᠪᠠᠷᠢᠨ ᠭᠤᠩᠬᠠᠵᠦ | ᠰᠠᠶ᠋ᠢᠬᠠᠨ ᠬᠤᠷᠢᠶᠠᠭᠰᠠᠨ ᠠᠭᠠᠷᠤᠤᠯ ᠢᠶᠠᠨ ᠳᠡᠯᠭᠡᠵᠦ ᠪᠠᠶᠢᠭᠠ ᠨᠢ ᠦᠵᠡᠭᠳᠡᠨᠡ | ᠴᠠᠭ ᠤᠨ ᠰᠠᠶᠢᠬᠠᠨ ᠵᠤᠨ | ᠮᠢᠨᠦ ᠨᠤᠳᠤᠭ ᠲᠤ ᠢᠷᠡᠬᠦ ᠳᠤ | ᠴᠡᠴᠡᠭ᠂ ᠨᠠᠪᠴᠢ᠂ ᠴᠡᠩᠬᠡᠯᠳᠦ ᠢᠨᠢᠶᠡᠳᠦ᠂ ᠴᠡᠩᠬᠡᠷ ᠮᠠᠨᠠᠨ ᠁ |