| ᠵᠡᠭᠦᠨᠭᠠᠷ ᠪᠤᠶᠠᠨᠪᠠᠲᠤ | | | ᠪᠢ | | | ︵ᠨᠠᠶᠢᠷᠠᠭᠯᠠᠯ︶ | | | ᠪᠢ ᠪᠤᠯ ︽ᠪᠢ︾ ᠪᠢᠰᠢ᠂ ᠬᠠᠷᠢᠨ ᠲᠠᠨᠢᠬᠤ ᠥᠭᠡᠢ ᠭᠥᠮᠥᠨ ᠤ ᠲᠠᠩᠨᠠᠭᠴᠢ ᠶᠤᠮ᠃ | │ ᠠᠮᠧᠷᠢᠺᠡ ᠶᠢᠨ ᠢᠷᠠᠭᠤ ᠨᠠᠶᠢᠷᠴᠭᠴᠢ᠂ ᠵᠤᠭᠢᠶᠠᠯᠴᠢ᠂ ᠵᠧᠺ᠂ ᠺᠷᠦ᠋ᠶᠡᠺᠧ | ᠡᠶᠢᠨ ᠭᠦ ᠭᠡᠯᠡᠭᠰᠡᠨ ᠠᠵᠢᠶᠠᠮ᠃ | ᠭᠥᠮᠥᠨ ᠥᠪᠡᠷ ᠢ ᠪᠠᠨ ᠭᠡᠷᠭᠢᠨ ᠲᠠᠨᠢᠨᠠ︖ ᠲᠠᠪᠠᠨᠠ︖ ᠢᠯᠠᠨᠠ︖ ᠡᠨᠡ ᠲᠤᠬᠠᠢ ᠲᠠᠯᠠᠭᠡᠢ ᠶᠢᠨ | ᠭᠥᠮᠥᠰ ᠲᠠᠷᠢᠭᠢ ᠪᠠᠨ ᠭᠡᠮᠡᠯᠢᠭᠰᠡᠭᠡᠷ ᠠᠪᠠᠢ᠃ ᠡᠨᠡ ᠭᠦ ᠲᠠᠯᠠᠢ ᠶᠢᠨ ᠴᠢᠨᠡᠭᠡᠨ ᠠᠰᠠᠭᠤᠯᠳᠠ ᠳᠤ ᠱᠠᠯᠪᠠᠭ ᠤᠨ ᠴᠢᠨᠡᠭᠡ | ᠬᠠᠷᠢᠭᠤᠯᠳᠠ ᠥᠭᠭᠦ ᠲᠡᠳᠥᠶᠢᠭᠡᠨ ᠢᠶᠠᠷ ᠶᠡᠭᠡ ᠪᠠᠭᠠ ᠶᠢᠨ ᠭᠢᠵᠠᠭᠠᠷ ᠥᠭᠡᠢ ᠤᠷᠤᠨ ᠵᠠᠢ ᠳᠤ ᠴᠠᠭ ᠤᠨ ᠲᠠᠭᠦᠵᠢᠩ | ᠰᠢᠭ ᠰᠠᠵᠢᠯᠠᠨ ᠬᠤᠯᠭᠢᠭᠰᠠᠭᠠᠷ ᠡᠳᠥᠭᠡ ᠶᠢ ᠲᠤᠭᠤᠯᠵᠤ ᠢᠷᠡᠭᠡᠳᠥᠢ ᠳᠤ ᠭᠡᠪ ᠢᠶᠠᠷ ᠭᠥᠷᠥᠨᠡᠮ ᠪᠥᠯᠥᠭᠡ᠃ | ᠪᠢ ᠪᠤᠯ ︽ᠪᠢ︾ ᠮᠥᠨ ᠤᠤ︖ | ᠪᠢ ᠪᠤᠯ ︽ᠴᠢ︾ ᠮᠥᠨ ᠤᠤ︖ | ᠪᠢ ᠪᠤᠯ ︽ᠭᠥᠮᠥᠨ︾ ᠮᠥᠨ︖ ᠭᠥᠮᠥᠨ ᠮᠢᠨᠢ ᠡ︕ ᠲᠠᠨᠠᠷ ᠥᠪᠡᠷ ᠠᠴᠠ ᠪᠠᠨ ᠲᠠᠩᠳᠠ ᠢᠩᠭᠢᠵᠥ ᠠᠰᠠᠭᠤᠵᠤ | ᠪᠠᠶᠢᠭᠳᠤᠨ︕ | │ ᠵᠤᠭᠢᠶᠠᠭᠴᠢ ᠪᠢ ᠪᠠᠷ ᠡᠶᠢᠨ ᠭᠦ ᠰᠠᠨᠠᠭᠤᠯᠤᠨᠠᠮ᠃ | | 1 | ᠪᠢ ᠭᠡᠮᠡᠭᠴᠢ ᠪᠠᠷ ᠁ ᠮᠣᠩᠭᠤᠯ᠂ ᠤᠶᠢᠷᠠᠳ᠂ ᠵᠡᠭᠦᠨᠭᠠᠷ ᠤᠪᠤᠭ | ᠪᠠᠶᠠᠨᠬᠤᠳᠠ᠂ X ᠬᠤᠷᠤᠭᠠᠯᠠᠯ᠂ ᠤᠳᠠᠰᠤᠨ ᠤ ᠳ᠋ᠤᠭᠠᠷ᠂ ᠢᠷᠭᠡᠨ ᠤ ᠥᠨᠡᠮᠯᠡᠭᠦ ᠁ | ᠪᠠᠰᠠ ᠠᠯᠪᠠᠨ ᠬᠠᠭᠠᠭᠴᠢ᠂ ᠠᠯᠳᠠᠭᠠ ᠭᠠᠷᠭᠠᠭᠴᠢ᠂ ᠭᠠᠪᠢᠶᠠ ᠲᠡᠮᠳᠡᠭᠯᠡᠭᠴᠢ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ | ᠲᠠᠩᠭᠠᠷᠢᠭ ᠠᠯᠳᠠᠵᠤ ᠨᠢᠭᠦᠯ ᠠᠴᠠ ᠠᠰᠬᠠᠷᠠᠭᠰᠠᠨ | ᠪᠠᠳᠠᠢ ᠶᠢᠨ ᠵᠢᠷᠠᠨ ᠤ ᠡᠯᠡᠰᠥᠨ ᠤ ᠨᠢᠭᠡᠨ ᠰᠢᠷᠭᠡᠭ | ᠲᠠᠪᠤᠨ ᠲᠢᠪ ᠠᠴᠠ ᠮᠠᠷᠳᠠᠭᠳᠠᠬᠤ ᠲᠥᠭᠦᠭᠰᠡᠨ | ᠪᠠᠷᠯᠤᠭ ᠠᠷᠠᠳ ᠤᠨ ᠴᠢᠰᠤᠨ ᠤ ᠨᠢᠭᠡᠨ ᠲᠡᠮᠳᠡᠭᠯᠡᠯ | ᠪᠠᠶᠢᠭᠠ ᠪᠠᠷ ᠢᠶᠠᠨ ᠪᠠᠶᠢᠵᠤ ᠪᠠᠶᠢᠭᠠ ᠨᠢ | ᠪᠠᠶᠢᠬᠤ ᠥᠭᠡᠢ ᠪᠤᠯ ᠬᠠᠶᠢᠵᠤ ᠪᠠᠶᠢᠭᠠ ᠨᠢ | ᠪᠠᠶᠢᠯᠭᠠᠬᠤ ᠭᠡᠵᠥ ᠲᠡᠮᠡᠴᠡᠵᠥ ᠪᠠᠶᠢᠭᠠ ᠨᠢ | ᠪᠠᠶᠢᠭᠰᠠᠨ ᠢᠶᠠᠨ ᠪᠠᠷᠠᠵᠤ ᠪᠠᠶᠢᠭᠠ ᠨᠢ ᠁ | ᠬᠤᠳᠠ ᠶᠢᠨ ᠤᠳᠤᠷᠴᠢᠨ᠂ ᠤᠳᠬᠠ ᠶᠢᠨ ᠭᠤᠶᠢᠯᠭᠠᠴᠢᠨ | ᠬᠤᠯᠠ ᠶᠢᠨ ᠮᠥᠷᠥᠭᠡᠳᠥᠭᠴᠢ᠂ ᠤᠶᠢᠷᠠ ᠶᠢᠨ ᠪᠥᠳᠥᠭᠡᠭᠴᠢ | ᠨᠤᠮᠤᠬᠠᠨ ᠴᠢᠷᠠᠶᠢᠳᠤ᠂ ᠨᠡᠷᠡᠯᠭᠡᠭ ᠵᠠᠩᠳᠤ | ᠨᠤᠶᠢᠷ ᠮᠠᠭᠤᠳᠤ᠂ ᠬᠤᠭᠤᠯᠠ ᠰᠠᠶᠢᠳᠤ | ᠪᠠᠴᠢᠮ ᠠᠭᠤᠷᠳᠤ᠂ ᠤᠭᠵᠤᠮ ᠲᠠᠶᠢᠪᠤᠰᠢᠷᠠᠭᠴᠢ | ᠪᠠᠯ ᠢᠳᠡᠭᠴᠢ᠂ ᠲᠠᠮᠠᠭᠢ ᠲᠠᠳᠠᠭᠴᠢ | ᠤᠷᠤᠯᠳᠤᠭᠠᠨ ᠳᠤ ᠲᠡᠮᠡᠴᠡᠭᠴᠢ᠂ ᠤᠷᠤᠭᠤ ᠴᠢᠷᠠᠶᠢᠯᠠᠭᠴᠢ | ᠤᠶᠠᠩᠭᠠᠯᠠᠭᠴᠢ᠂ ᠲᠠᠭᠤᠯᠠᠭᠴᠢ᠂ ᠵᠢᠷᠥᠭᠡ ᠲᠡᠯᠡᠰᠥᠭᠴᠢ | ᠠᠶᠤᠮᠠᠬᠠᠢ᠂ ᠭᠢᠮᠡᠭᠡᠢ᠂ ᠭᠢᠴᠢᠶᠡᠮᠡᠳᠡᠭᠡᠢ᠂ ᠪᠥᠷᠢᠯᠭᠡᠮᠡᠳᠡᠭᠡᠢ | ᠬᠠᠷᠢᠮᠠᠳᠠᠭᠠᠢ᠂ ᠲᠤᠷᠠᠯᠠᠮᠠᠳᠠᠭᠠᠢ᠂ ᠡᠮᠵᠡᠭᠯᠠᠮᠠᠳᠡᠭᠡᠢ᠂ ᠮᠡᠳᠡᠷᠡᠮᠡᠳᠡᠭᠡᠢ | ᠨᠤᠶᠠᠨ ᠰᠠᠭᠤᠬᠤ ᠲᠤᠷᠠ ᠥᠭᠡᠢ ᠴᠦ ᠤᠯᠤᠰ ᠲᠥᠷᠥ ᠳᠤ ᠲᠤᠷᠠᠳᠠᠢ | ᠨᠤᠬᠠᠢ ᠲᠡᠵᠢᠭᠡᠭᠦ ᠲᠤᠷᠠ ᠥᠭᠡᠢ ᠴᠦ ᠨᠤᠬᠠᠢ ᠳᠤ ᠥᠷᠥᠪᠴᠢᠭᠡᠨ | ᠬᠠᠭᠤᠷᠮᠠᠭ ᠠᠭᠠᠰᠢᠯᠠᠬᠤ ᠲᠤᠷᠠ ᠥᠭᠡᠢ ᠴᠦ ᠬᠤᠳᠠᠯ ᠵᠠᠷᠢᠮ ᠳᠠᠭᠠᠨ ᠱᠤᠤᠭᠢᠭᠤᠯᠳᠠᠭ | ᠠᠶᠢᠯ ᠤᠨ ᠠᠪᠠᠭᠠᠢ ᠳᠤ ᠲᠤᠷᠠᠯᠠᠭᠴᠢ᠂ ᠠᠪᠠᠭᠠᠢ ᠠᠴᠠ ᠪᠠᠨ ᠠᠶᠤᠭᠴᠢ | ᠠᠷᠢᠭᠢ ᠨᠠᠶᠢᠷ ᠲᠤ ᠶᠠᠪᠤᠭᠴᠢ᠂ ᠰᠢᠷᠠᠳᠠᠬᠤ ᠠᠴᠠ ᠪᠠᠨ ᠵᠤᠪᠠᠭᠴᠢ | ᠨᠠᠶᠢᠳᠠᠪᠤᠷᠢ ᠲᠠᠢ ᠨᠢᠭᠤᠴᠠ ᠠᠮᠠᠷᠠᠭ᠂ ᠨᠢᠯᠪᠤᠰᠤ ᠪᠠᠨ ᠲᠤᠳᠤᠭᠰᠢ ᠪᠠᠨ ᠵᠠᠯᠭᠢᠭᠴᠢ | ᠨᠠᠶᠢᠵᠠᠷᠬᠠᠵᠤ ᠰᠥᠢᠳ ᠪᠤᠯᠤᠯᠠ ᠴᠦ ᠵᠢᠩᠭᠢᠨᠢ ᠢᠳᠡᠭᠡᠳᠡᠭ ᠨᠢ ᠴᠥᠭᠡᠨ | ᠤᠨᠢᠰᠤᠭᠠ ᠰᠢᠭ᠋ ᠶᠠᠪᠤᠬᠤ ᠲᠤᠷᠠᠲᠠᠢ ᠴᠦ | ᠤᠶᠢᠯᠠᠭᠠᠬᠤ ᠥᠭᠡᠢ ᠭᠥᠮᠥᠰ ᠲᠤ ᠭᠤᠮᠤᠳᠠᠳᠠᠭ | ᠤᠶᠢᠳᠬᠠᠷᠯᠠᠬᠤ ᠠᠴᠠ ᠪᠠᠨ ᠵᠤᠪᠠᠳᠠᠭ ᠴᠦ | ᠤᠯᠠᠭᠤᠯᠠ ᠥᠢᠮᠡᠭᠦ ᠳᠤ ᠪᠠᠰᠠ ᠲᠤᠷᠠ ᠥᠭᠡᠢ | ᠲᠡᠥᠭᠡ ᠶᠢᠨ ᠯᠧᠺᠼᠢ ᠤᠩᠰᠢᠭᠴᠢ᠂ ᠲᠡᠭᠦᠨ ᠢᠶᠠᠷ ᠢᠶᠠᠨ ᠠᠮᠢ ᠵᠢᠭᠤᠭᠴᠢ | ᠳ᠋ᠥᠩᠨᠡᠯᠳᠡ ᠪᠢᠴᠢᠭᠴᠢ᠂ ᠭᠥᠰᠥᠨᠥᠭ ᠲᠠᠭᠯᠠᠭᠴᠢ᠂ ᠲᠠᠮᠠᠭᠠᠨ ᠲᠤᠤᠷᠠ ᠲᠡᠯᠴᠢᠯᠡᠭᠴᠢ | ᠭᠤᠳᠤᠷᠠᠩᠭᠤᠢ ᠪᠤᠯᠪᠠᠴᠤ ᠢᠳᠡᠭᠡᠯ ᠲᠠᠢ ᠶᠤᠮ ᠰᠢᠭ ᠨᠠᠮᠵᠤᠷᠳᠠᠬᠤ | ᠭᠤᠨᠢᠭᠯᠠᠩᠭᠤᠢ ᠪᠤᠯᠪᠠᠴᠤ ᠪᠠᠶᠠᠰᠤᠩᠭᠤᠢ ᠶᠤᠮ ᠰᠢᠭ᠋ ᠴᠢᠷᠠᠶᠢᠯᠠᠬᠤ | ᠭᠥᠯᠥᠰᠥᠨ ᠤ ᠮᠠᠰᠢᠨ ᠳᠤ ᠰᠠᠭᠤᠭᠴᠢ᠂ ᠭᠡᠥᠭᠡᠳ ︽ᠮᠠᠯᠯᠠᠭᠴᠢ︾ | ᠬᠤᠳᠠᠯ ᠢᠨᠢᠶᠡᠭᠴᠢ᠂ ᠲᠠᠷᠤᠤ ᠠᠪᠤᠷᠢᠯᠠᠭᠴᠢ᠂ ᠲᠠᠯᠳᠠᠭᠤᠷ ᠬᠤᠷᠤᠰᠤᠭᠴᠢ | ᠡᠭᠦᠳᠡᠨ ᠤ ᠱᠠᠭᠠᠶᠢᠪᠤᠷᠢ ᠪᠠᠷ ᠭᠠᠳᠠᠭᠰᠢ ᠪᠠᠨ ᠱᠠᠭᠠᠶᠢᠭᠴᠢ | ᠥᠯᠢᠭᠡᠷ ᠡᠭᠦᠰᠭᠡᠭᠴᠢ᠂ ᠨᠤᠮ ᠤᠩᠰᠢᠭᠴᠢ | ᠴᠠᠢ ᠴᠢᠨᠠᠭᠴᠢ᠂ ᠴᠠᠯᠢᠩ ᠲᠥᠰᠢᠭᠴᠢ᠂ ᠴᠠᠭᠠ ᠤᠤᠭᠤᠭᠴᠢ | ᠴᠠᠭ ᠤᠨ ᠠᠶᠠᠰ ᠢᠶᠠᠷ ᠭᠤᠶᠤᠯᠠᠭᠴᠢ᠂ ᠷᠤᠺ ᠰᠤᠨᠤᠰᠤᠭᠴᠢ᠂ ᠳ᠋ᠢᠰᠺᠦ ᠬᠠᠳᠠᠷᠢᠭᠴᠢ | ᠱᠥᠭᠦᠷᠮᠡᠭ ᠭᠥᠯᠭᠦᠭᠴᠢ᠂ ᠶᠠᠰᠤ ᠮᠥᠯᠵᠢᠭᠴᠢ᠂ ᠰᠢᠳᠤ ᠪᠠᠨ ᠰᠢᠭᠢᠴᠢᠯᠡᠭᠴᠢ᠂ ᠰᠢᠯᠥᠰᠥ ᠪᠠᠨ ᠵᠠᠯᠭᠢᠭᠴᠢ | ᠴᠢᠩᠭᠢᠰ ᠰᠢᠳᠥᠭᠴᠢ᠂ ᠴᠢᠨ᠋ᠸᠠ ᠪᠢᠰᠢᠷᠡᠭᠴᠢ᠂ ᠲᠤᠯᠤᠭᠠᠨ ᠪᠤᠷᠬᠠᠨ ᠳᠤ ᠰᠥᠵᠢᠭᠯᠡᠭᠴᠢ | ᠴᠢᠮᠡᠭᠡ ᠥᠭᠡᠢ ᠶᠢᠨ ᠲᠤᠮᠳᠠ ᠠᠶᠢᠳᠠᠰ ᠭᠥᠷᠥᠭᠴᠢ᠂ ᠠᠨᠢᠷ ᠥᠷᠭᠦᠭᠡᠭᠴᠢ ᠁ ᠪᠠᠰᠠ ᠁ | | | 2 | ᠪᠢ ᠁ ᠴᠠᠭ ᠠᠴᠠ ᠪᠠᠨ ᠥᠩᠭᠡᠷᠡᠥ ᠡᠷᠳᠡᠯᠡᠵᠥ ᠡᠰᠡᠭᠦᠯᠡ ᠲᠡᠩᠳᠡᠭᠦᠥ ᠬᠤᠵᠢᠮᠳᠠᠵᠤ ᠲᠥᠷᠥᠭᠰᠡᠨ | ᠪᠢᠳᠡᠭᠦᠥ ᠭᠤᠨᠢᠭ ᠪᠥᠭᠯᠡᠭᠦᠥ ᠰᠢᠨᠠᠯᠤᠯ ᠲᠠᠢ ᠴᠠᠭ ᠤᠨ ᠭᠡᠯᠭᠢᠶᠡᠰᠥ ᠶᠤᠮ | ᠬᠠᠮᠢᠭᠠ ᠴᠦ ᠶᠠᠪᠤᠬᠤ ᠥᠭᠡᠢ ᠶᠠᠭᠤ ᠴᠦ ᠮᠡᠳᠡᠭᠦ ᠥᠭᠡᠢ | ᠬᠠᠷᠠᠩᠭᠤᠢ ᠪᠥᠳᠥᠭᠦᠯᠢᠭ ᠴᠢᠯᠠᠭᠤᠨ ᠵᠡᠪᠰᠡᠭ ᠤᠨ ᠥᠶᠡ ᠶᠢᠨ ᠭᠥᠮᠥᠨ ᠯᠡ ᠪᠠᠶᠢᠬᠤ ᠶᠤᠰᠤᠲᠠᠢ ᠪᠠᠶᠢᠭᠰᠠᠨ ᠶᠤᠮ | ︽ᠲᠡᠭᠡ︕︾ ᠭᠡᠭᠦ ᠵᠠᠭᠢᠶᠠᠰᠤ ᠥᠭᠡᠢ | ︽ᠲᠡᠷᠡ ᠁︾ ᠭᠡᠭᠦ ᠭᠥᠯᠢᠶᠡᠰᠥ ᠥᠭᠡᠢ | ᠲᠡᠶᠢᠮᠥ ᠯᠡ ᠨᠢᠭᠡ ᠴᠠᠭ ᠲᠤᠭᠠᠯᠠᠯ ᠤᠨ ᠪᠠᠷᠢᠮᠵᠢᠶᠠ ᠲᠠᠢ | ᠲᠡᠭᠡᠭᠡᠳ ᠪᠥᠷ ᠭᠥᠮᠥᠨ ᠭᠡᠳᠡᠭ ᠢᠶᠠᠨ ᠤᠬᠠᠭᠠᠷᠠᠭᠠ ᠥᠭᠡᠢ ᠠᠮᠢᠳᠠᠨ ᠪᠠᠶᠢᠬᠤ ᠪᠠᠶᠢᠭᠰᠠᠨ ᠶᠤᠮ | ᠠᠷᠢᠶᠠᠳᠠᠨ ᠲᠠᠢ ᠲᠤᠯᠤᠯᠳᠤᠵᠤ᠂ ᠠᠭᠤᠢ ᠳᠤ ᠨᠥᠮᠥᠷᠢᠳᠡᠵᠥ | ᠠᠪᠠᠭᠠᠢ ᠥᠭᠢᠨ ᠤ ᠨᠢᠭᠤᠴᠠ ᠪᠥᠭᠦᠨ ᠢ ᠴᠤᠴᠠᠯᠢ ᠶᠢᠨ ᠭᠡᠷᠡᠯ ᠳᠤ ᠬᠠᠷᠠᠵᠤ᠂ ᠪᠠᠰᠠ ᠠᠮᠳᠠᠯᠠᠵᠤ | ᠬᠠᠳᠠᠨ ᠲᠡᠭᠡᠷᠡ ᠲᠠᠷᠢᠭᠢᠨ ᠳᠤ ᠠᠰᠬᠠᠷᠠᠭᠰᠠᠨ ᠢᠶᠠᠨ ᠴᠠᠭᠢᠭᠤᠷ ᠢᠶᠠᠷ ︽ᠪᠠᠭᠤᠯᠭᠠᠵᠤ︾ | ᠬᠠᠷᠠ ᠤᠬᠠᠭᠠᠨ ᠢᠶᠠᠷ ᠢᠶᠠᠨ ᠴᠢᠯᠠᠭᠤ ᠴᠤᠭᠤᠯᠳᠠᠨ ᠪᠢᠯᠡᠭᠦᠳᠡᠵᠥ | ᠭᠡᠶᠢᠰᠪᠥᠷᠢ ᠪᠠᠷᠠᠭᠠᠨ ᠤᠷᠴᠢᠯᠠᠩ ᠳᠤ ᠤᠨᠢᠰᠤᠭᠠ ᠪᠤᠯᠭᠠᠨ ᠥᠪᠯᠡᠵᠥ | ᠭᠡᠷᠡᠭ ᠲᠤ ᠲᠤᠷᠠᠲᠠᠢ ᠥᠨᠥ ᠶᠢᠨ ᠭᠥᠮᠥᠰ ᠤᠨ ᠲᠠᠷᠢᠭᠢ ᠶᠢ ᠭᠠᠰᠢᠯᠭᠠᠵᠤ ᠴᠢᠳᠠᠭᠰᠠᠨ ᠳᠠᠭᠠᠨ | ᠭᠡᠩᠭᠡᠷᠭᠡ ᠰᠢᠭ ᠭᠡᠳᠡᠰᠥ ᠪᠠᠨ ᠠᠯᠠᠭᠠᠳᠠᠨ ᠠᠭᠤᠯᠠᠰ ᠴᠠᠭᠤᠷᠳᠠᠯᠠ ᠬᠠᠳᠠᠭᠠᠨᠠᠬᠤ ᠪᠠᠶᠢᠭᠰᠠᠨ ᠶᠤᠮ ᠳ᠋ᠠ | ᠡᠰᠡᠭᠦᠯᠡ ᠪᠢ ᠴᠢᠩᠭᠢᠰ ᠤᠨ ᠪᠤᠱᠤᠭᠠᠨ ᠤ ᠪᠤᠭᠤᠯ ᠪᠤᠯᠵᠤ | ᠮᠤᠷᠢᠨ ᠤ ᠭᠢᠨᠢ ᠭᠥᠯᠥᠰᠥ ᠶᠢ ᠰᠡᠪᠡᠷᠡᠭᠡᠨ᠂ ᠲᠠᠶᠢᠨ ᠤ ᠠᠮᠳᠠ ᠶᠢ ᠮᠡᠳᠡᠷᠡᠵᠥ | ᠮᠤᠳᠤᠨ ᠲᠠᠭᠱᠠᠨ ᠳᠤ ᠨᠢ ᠠᠶᠢᠷᠠᠭ ᠮᠡᠯᠮᠡᠯᠵᠡᠭᠦᠯᠥᠨ ᠰᠥᠭᠦᠷᠡᠵᠥ | ᠭᠥᠷᠡᠯ ᠲᠤᠯᠭᠠᠨ ᠳᠤ ᠨᠢ ᠲᠥᠯᠡᠭᠡ ᠨᠡᠮᠡᠵᠥ ᠢᠰᠡᠭᠡᠢ ᠭᠤᠳᠤᠯ ᠢ ᠨᠢ ᠲᠠᠶᠢᠯᠵᠤ | ᠭᠥᠭᠡᠷᠥᠭᠦᠨ ᠬᠠᠳᠤᠨ ᠲᠠᠢ ᠪᠠᠨ ᠤᠨᠳᠠᠬᠤ ᠳᠤᠨᠢ ᠨᠡᠭᠡᠢ ᠭᠥᠨᠵᠢᠯᠡ ᠶᠢ ᠨᠢ ᠢᠪᠡᠵᠥ | ᠭᠥᠴᠥᠳᠥ ᠠᠷᠮᠢ ᠶᠢᠨ ᠭᠢᠨᠢ ᠲᠤᠭᠤᠰᠤ ᠪᠠᠷ ᠨᠢᠭᠦᠯ ᠢᠶᠠᠨ ᠠᠷᠴᠢᠬᠤ ᠶᠤᠰᠤᠲᠠᠢ ᠪᠠᠶᠢᠭᠰᠠᠨ ᠶᠤᠮ | ᠡᠰᠡᠭᠦᠯᠡ ᠴᠢᠩᠭᠦᠨᠵᠠᠪ ᠤᠨ ᠰᠢᠳᠠᠷ ᠬᠤᠶᠠᠭ ᠪᠤᠯᠵᠤ | ᠡᠵᠡᠷᠭᠡᠭ ᠮᠠᠨᠵᠤ ᠶᠢᠨ ᠡᠰᠡᠷᠭᠦ ᠲᠠᠩᠭᠠᠷᠢᠭ ᠡᠷᠭᠦᠵᠥ ᠴᠢᠰᠤ ᠪᠠᠨ ᠠᠰᠬᠠᠵᠤ | ᠡᠴᠥᠰ ᠰᠡᠭᠦᠯ ᠳᠤᠨᠢ ᠪᠠᠷᠢᠭᠳᠠᠵᠤ᠂ ᠲᠠᠮᠤᠯᠠᠭᠤᠯᠵᠤ᠂ ︽ᠵᠤᠭᠤᠰᠳᠠᠭᠤᠯᠤᠨ︾ ᠥᠭᠦᠵᠥ | ︽ᠡᠭᠡ ᠤᠷᠤᠨ ᠤ ᠲᠥᠯᠥᠭᠡ︾ ᠨᠠᠮᠳᠠᠷ ᠲᠤ ᠨᠠᠷᠠ ᠪᠠᠨ ᠪᠥᠷᠢᠳᠭᠡᠭᠦᠯᠭᠦ ᠤᠴᠢᠷᠲᠠᠢ ᠪᠠᠶᠢᠭᠰᠠᠨ ᠶᠤᠮ | ᠡᠰᠡᠭᠦᠯᠡ ᠢᠷᠡᠭᠡ ᠥᠭᠡᠢ ᠵᠠᠭᠤᠨ ᠤ ᠮᠠᠩᠯᠠᠢ ᠳᠤ | ᠲᠡᠭᠷᠢ ᠶᠢᠨ ᠤᠳᠤᠳ ᠢ ᠠᠳᠤᠭᠤ ᠰᠢᠭ᠋ ᠬᠤᠷᠢᠶᠠᠵᠤ | ᠰᠠᠨᠰᠠᠷ ᠤᠨ ᠭᠥᠯᠥᠭ ᠢ ᠲᠡᠮᠡᠭᠡ ᠰᠢᠭ ᠵᠠᠶᠢᠳᠠᠯᠠᠵᠤ | ᠰᠠᠭᠠᠯᠢ ᠶᠢᠨ ᠠᠷᠢᠭᠢ ᠶᠢ ᠡᠷᠭᠡᠰ ᠤᠨ ᠵᠡᠯᠡᠨ ᠲᠡᠭᠡᠷᠡ ᠵᠠᠯᠭᠢᠯᠠᠵᠤ᠂ ᠰᠤᠭᠳᠤᠵᠤ ᠤᠨᠠᠬᠤ ᠪᠠᠶᠢᠭᠰᠠᠨ ᠶᠤᠮ | ᠪᠢ ᠁ ᠴᠠᠭ ᠢᠶᠠᠨ ᠤᠯᠵᠤ ᠲᠥᠷᠥᠭᠡ ᠥᠭᠡᠢ ᠶᠤᠮ᠃ | | | 3 | ᠪᠢ ᠪᠤᠯ ︽ᠪᠢ︾ ᠪᠢᠰᠢ ᠁ ︽ᠪᠢ︾ ᠮᠥᠨ ᠁ | ᠪᠡᠶᠡ ᠰᠡᠳᠭᠢᠯ ᠠᠴᠠ ᠲᠥᠷᠪᠡᠵᠥ ᠪᠠᠰᠠ ᠪᠤᠴᠠᠵᠤ ᠪᠠᠶᠢᠳᠠᠭ ᠲᠤᠯᠤᠭᠠᠳᠡᠭᠢ ᠰᠡᠷᠡᠯ | ᠪᠢᠴᠢᠭ ᠮᠡᠳᠡᠳᠡᠭ ᠥᠭᠡᠢ ᠭᠥᠮᠥᠨ ᠤ | ᠪᠢᠴᠢᠭ ᠤᠩᠰᠢᠶᠠ ᠭᠡᠰᠡᠨ ︽ᠴᠠᠭᠠᠨ ᠰᠤᠯᠢᠶᠠ︾ | | | ᠪᠢ ᠪᠤᠯ | ᠨᠢᠭᠡ ᠭᠠᠷᠠᠭ ᠤᠨ ᠨᠠᠢᠮᠠᠳᠠᠭᠢ ᠡᠳᠥᠷ | ᠨᠢᠭᠡ ᠶᠢ ᠤᠯᠬᠤ ᠭᠡᠳ ᠵᠠᠭᠤ ᠶᠢ ᠠᠯᠳᠠᠭᠰᠠᠨ ᠭᠢᠰᠠᠯᠠᠩ | ᠨᠡᠶᠢᠳᠡ ᠶᠢᠨ ᠮᠠᠰᠢᠨ ᠲᠡᠷᠭᠡᠨ ᠤ ᠬᠠᠮᠤᠭ ᠰᠡᠭᠦᠯᠴᠢ ᠶᠢᠨ ᠠᠶᠠᠨᠴᠢᠨ | ᠨᠢᠰᠴᠤ ᠶᠠᠪᠤᠭᠠ ᠲᠥᠷᠥᠭᠦᠴᠢ ᠶᠢᠨ ᠰᠢᠪᠠᠭᠤᠨ ᠤ ᠭᠠᠵᠠᠷ ᠲᠤ ᠴᠢᠯᠠᠭᠤᠵᠢᠭᠰᠠᠨ ᠲᠠᠭᠤ ᠶᠤᠮ | | | ᠪᠢ ᠪᠤᠯ | ᠪᠥᠮᠪᠥᠷᠴᠡᠭ ᠤᠨ ᠬᠠᠭᠤᠴᠢᠨ ᠬᠠᠯᠠᠭᠠᠰᠤᠨ ᠳᠤ ᠰᠢᠩᠭᠡᠭᠰᠡᠨ ᠰᠢᠨᠡ ᠤᠶᠤᠭᠠᠰᠤ | ᠪᠥᠳᠥᠭᠦᠨ ᠭᠥᠷᠥᠨ ᠨᠦᠭᠦᠳ ᠤᠨ ᠬᠤᠭᠤᠯᠠᠢ ᠳᠤ ᠲᠡᠭᠡᠭᠯᠡᠭᠰᠡᠨ ᠠᠮᠳᠠᠳᠤ ᠪᠥᠯᠡᠭᠡ | ᠪᠥᠷᠭᠦᠳ ᠰᠢᠭ ᠴᠤᠶᠢᠯᠤᠶᠠ ᠭᠡᠳ ᠪᠤᠰᠴᠤ ᠴᠢᠳᠠᠭᠠ ᠥᠭᠡᠢ ᠪᠠᠶᠢᠭᠠ ︽ᠬᠤᠷᠢᠭᠠᠲᠠᠢ ᠰᠢᠪᠠᠭᠤᠬᠠᠢ︾ | ᠪᠤᠰᠤᠳ ᠤᠨ ᠰᠢᠪᠬᠠᠷᠤᠤ ᠲᠤᠯᠢᠶᠠᠵᠤ ᠴᠠᠳᠤᠭᠰᠠᠨ ︽ᠪᠤᠶᠠᠨᠲᠠᠢ ᠮᠠᠨᠣᠣᠬᠠᠢ︾ | | | ᠪᠢ ᠲᠡᠭᠡᠭᠡᠳ | ᠲᠤᠮᠤᠴᠤᠤᠯ ᠤᠨ ᠰᠡᠭᠦᠳᠡᠷ ᠠᠴᠠ ᠵᠢᠭᠤᠳᠠᠭᠠᠳ ᠵᠢᠭᠤᠳᠠᠭᠠᠳ ᠭᠠᠷᠴᠤ ᠴᠢᠳᠠᠬᠤ ᠪᠢᠰᠢ | ᠲᠤᠮᠢᠶᠠᠯᠠᠭᠰᠠᠨ ᠰᠡᠳᠭᠢᠭᠦᠢ ᠠᠴᠠ ᠪᠠᠨ ᠵᠤᠯᠠᠷᠠᠭᠠᠳ ᠵᠤᠯᠠᠷᠠᠭᠠᠳ ᠰᠠᠯᠵᠤ ᠴᠢᠳᠠᠬᠤ ᠪᠢᠰᠢ | ᠲᠥᠭᠡᠷᠢᠭ ᠵᠠᠶᠠᠭᠠ ᠲᠠᠢ ᠪᠠᠨ ᠲᠡᠮᠡᠴᠡᠭᠡᠳ ᠲᠡᠮᠡᠴᠡᠭᠡᠳ ᠢᠯᠠᠵᠤ ᠴᠢᠳᠠᠬᠤ ᠪᠢᠰᠢ | ᠲᠥᠭᠡᠷᠢᠭᠰᠡᠨ ᠲᠥᠷᠥᠯ ᠲᠠᠢ ᠪᠠᠨ ᠵᠥᠷᠢᠭᠡᠳ ᠵᠥᠷᠢᠭᠡᠳ ᠤᠴᠠᠷᠠᠵᠤ ᠴᠢᠳᠠᠬᠤ ᠪᠢᠰᠢ | | | ᠪᠢ | ᠥᠯᠥᠭᠡᠢ ᠠᠴᠠ ᠠᠪᠰᠠ ᠤᠷᠤᠭᠤ ᠮᠥᠯᠭᠦᠭᠰᠡᠨ ᠪᠠᠯᠴᠢᠷ | ᠥᠷᠢ ᠠᠴᠠ ᠥᠷᠢ ᠤᠷᠤᠭᠤ ᠬᠠᠷᠠᠶᠢᠭᠰᠠᠨ ᠥᠭᠭᠢᠶᠡᠮᠥᠷ | ᠭᠠᠩᠭᠠᠷ ᠱᠠᠭᠠᠵᠠᠩ ᠤᠨ ᠡᠮᠳᠡᠷᠭᠡᠢ | ᠭᠠᠯᠵᠠᠭᠤ ᠨᠤᠬᠠᠢ ᠶᠢᠨ ᠰᠤᠶᠤᠭᠠ | ᠤᠯᠤᠰ ᠲᠥᠷᠥ ᠶᠢᠨ ᠵᠤᠯᠪᠤᠳᠠᠰᠤ | ᠤᠯᠠᠭᠠᠨ ᠰᠤᠬᠠᠢ ᠶᠢᠨ ᠵᠤᠷᠭᠤᠳᠠᠰᠤ | ᠤᠶᠠᠬᠠᠨ ᠭᠥᠮᠥᠨ ᠤ ᠨᠢᠯᠪᠤᠰᠤ | ᠤᠶᠢᠳᠤᠭᠰᠠᠨ ᠭᠥᠮᠥᠨ ᠤ ᠰᠡᠭᠦᠷᠡᠰᠥ | ᠲᠠᠮᠤ ᠳ᠋ᠧᠪᠠᠵᠢᠨ ᠬᠤᠶᠠᠷ ᠤᠨ ᠬᠤᠭᠤᠷᠤᠨᠳᠡᠭᠢ ᠵᠠᠢ | ᠲᠠᠩᠰᠤᠭ ᠬᠤᠭᠤᠰᠤᠨ ᠬᠤᠶᠠᠷ ᠤᠨ ᠵᠠᠪᠰᠠᠷ ᠲᠠᠬᠢ ᠯᠠᠢ | ᠭᠠᠩᠭᠠᠩ ᠭᠥᠮᠥᠨ ᠤ ᠵᠠᠷᠤᠳᠠᠰᠤ | ᠭᠠᠳᠠᠭᠠ ᠮᠤᠷᠢᠨ ᠤ ᠤᠶᠠᠭᠠᠰᠤ | ᠪᠢ ᠨᠤᠶᠠᠨ ᠰᠢᠭ᠋ ᠠᠮᠢᠳᠤᠷᠠᠵᠤ ᠨᠤᠬᠠᠢ ᠰᠢᠭ᠋ ᠥᠭᠦᠨᠡ | ᠪᠢ ᠬᠤᠨᠢ ᠰᠢᠭ᠋ ᠬᠤᠭᠤᠯᠠᠯᠠᠵᠤ ᠬᠤᠷᠤᠬᠠᠢ ᠰᠢᠭ᠋ ᠲᠡᠨᠥᠨᠡ | ᠪᠢ ᠪᠠᠶᠢᠯᠠ ᠭᠡᠳ ᠲᠡᠯᠡᠭᠡᠢ ᠶᠢᠨ ᠵᠢᠩ ᠨᠡᠮᠡᠭᠳᠡᠭᠦ ᠥᠭᠡᠢ | ᠪᠢ ᠪᠠᠶᠢᠬᠤ ᠦᠭᠡᠢ ᠭᠡᠳ ᠲᠡᠯᠡᠭᠡᠢ ᠶᠢᠨ ᠵᠢᠩ ᠬᠠᠰᠤᠭᠳᠠᠬᠤ ᠥᠭᠡᠢ | ᠪᠢ ᠥᠢᠯᠡ ᠥᠭᠡ᠂ ᠰᠤᠯᠠ ᠥᠭᠡ᠂ ᠲᠥᠯᠥᠭᠡᠨ ᠤ ᠥᠭᠡ | ᠡᠰᠡᠭᠦᠯᠡ ᠲᠡᠶᠢᠨ ᠢᠯᠭᠠᠯ᠂ ᠡᠰᠡᠭᠦᠯᠡ ᠠᠳᠠᠯᠢᠳᠬᠠᠯ᠂ ᠵᠥᠢᠷᠯᠡᠯ᠂ ᠲᠠᠪᠠᠭᠤᠯᠤᠯ | ᠡᠰᠡᠭᠦᠯᠡ ᠶᠠᠭᠤ ᠴᠦ ᠪᠢᠰᠢ ᠁ | | | | ᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦ | ᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷ | ᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ |