ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠢᠯᠡ ᠵᠠᠰᠠᠭ
ᠰᠣᠨᠢᠨ ᠮᠡᠳᠡᠭᠡ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
﹇ᠤᠷᠠᠨ ᠵᠣᠬᠢᠶᠠᠯ﹈ ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶ᠎ᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/12/26
          ᠪᠠ᠊᠆ · ᠤᠷᠲᠤᠨᠠᠰᠤᠲᠤ                 — ᠪᠠᠷᠢᠮᠲᠠᠲᠤ ᠨᠠᠶᠢᠷᠠᠭᠤᠯᠤᠯ       ᠳᠠᠷᠠᠰᠤ ᠬᠤᠯᠤᠰᠤᠨ ᠤ ᠳᠤᠮᠳᠠᠭᠤᠷ ᠤᠭᠠᠯᠵᠠᠯᠠᠨ ᠤᠷᠤᠰᠤᠭᠰᠠᠨ ᠤᠷᠤᠰᠬᠠᠯ ᠲᠤᠩᠭᠠᠯᠠᠭ ᠤᠶᠠᠬᠠᠨ ᠪᠠᠯᠭᠠᠷ ᠤᠨ ᠵᠡᠭᠦᠨ ᠭᠥᠪᠡᠭᠡ ᠶᠢ ᠲᠠᠭᠠᠵᠤ᠂ ᠡᠮᠦᠨ᠎ᠡ ᠠᠴᠠ ᠬᠤᠶᠢᠰᠢ ᠪᠠᠨ ᠴᠤᠪᠤᠷᠠᠨ ᠦᠷᠭᠦᠯᠵᠢᠯᠡᠭᠰᠡᠨ ᠨᠠᠮᠬᠠᠨ ᠪᠣᠷᠣ ᠲᠣᠯᠣᠭᠠᠳ ᠤᠨ ᠳᠤᠮᠳᠠ ᠬᠡᠰᠡᠭ ᠤᠨ ᠡᠭᠡᠪᠦᠷ ᠳᠤᠯᠠᠭᠠᠨ ᠡᠩᠭᠡᠷ ᠲᠤ ᠡᠬᠡᠯ ᠵᠢᠷ ᠤᠨ ᠨᠢᠭᠡ ᠵᠢᠵᠢᠭᠬᠡᠨ ᠡᠪᠦᠯᠵᠢᠶ᠎ᠡ ᠪᠠᠶᠢᠳᠠᠭ ᠰᠠᠨ᠃ ᠭᠤᠣᠯ ᠤᠨ ᠭᠥᠪᠡᠭᠡ ᠶᠢ ᠳᠠᠭᠠᠬᠰᠠᠨ ᠡᠪᠦᠳᠦᠭ ᠴᠢᠨᠡᠭᠡᠨ ᠥᠳᠬᠡᠨ ᠰᠠᠬᠤᠯᠢᠭ ᠵᠦᠯᠭᠡᠨ ᠳᠤᠨᠢ ᠵᠦᠢᠯ ᠤᠨ ᠴᠡᠴᠡᠭ ᠬᠤᠸᠠᠷ ᠠᠯᠠᠭᠯᠠᠨ᠂ ᠵᠥᠭᠡᠢ ᠡᠷᠪᠡᠬᠡᠢ ᠰᠦᠯᠵᠢᠯᠳᠦᠵᠦ᠂ ᠡᠷᠢᠶᠡᠨ ᠠᠯᠠᠭ ᠴᠡᠭᠴᠡᠦᠬᠡᠢ ᠰᠢᠪᠠᠭᠤ ᠪᠣᠰᠣᠨ ᠰᠠᠭᠤᠨ ᠵᠢᠷᠭᠢᠨ᠎ᠡ᠃ ᠪᠣᠳᠠ ᠪᠤᠲᠠᠨ ᠤ ᠬᠢᠨᠢ ᠭᠥᠪᠡᠭᠡ ᠤᠭ ᠢᠶᠠᠷ ᠤᠯᠠᠭᠠᠨ᠂ ᠴᠠᠭᠠᠨ ᠮᠥᠬᠦ ᠠᠶᠠᠭ᠎ᠠ ᠬᠥᠮᠥᠷᠢᠭᠰᠡᠨ ᠰᠢᠭ ᠪᠥᠮᠪᠥᠶᠢᠨ ᠣᠷᠭᠤᠵᠤ᠂ ᠰᠣᠳᠣᠨ ᠰᠠᠶᠢᠬᠠᠨ ᠠᠩᠬᠢᠯᠤᠮ᠎ᠠ ᠦᠨᠦᠷ ᠬᠤᠯᠠ ᠠᠴᠠ ᠰᠠᠩ ᠲᠠᠲᠠᠨ᠎ᠠ᠃ ᠮᠠᠯ ᠤᠨ ᠬᠠᠰᠢᠶ᠎ᠠ ᠰᠠᠷᠠᠪᠴᠢᠨ ᠤ ᠬᠢᠨᠢ ᠬᠤᠶᠢᠭᠤᠷ ᠤᠷᠳᠤᠭᠤᠷ ᠮᠣᠷᠢᠨ ᠰᠢᠷᠠᠯᠵᠢ᠂ ᠡᠷᠮ᠎ᠡ ᠨᠣᠶᠢᠯ ᠪᠠᠭᠰᠢᠷᠠᠨ ᠤᠷᠭᠤᠭᠠᠳ᠂ ᠡ᠊ᠨᠳᠡ ᠲᠡᠨᠳᠡ ᠦᠭᠡᠢ ᠰᠢᠷ᠎ᠠ ᠴᠠᠷᠴᠠᠬᠠᠢ ᠰᠠᠷ ᠰᠠᠷ ᠨᠢᠰᠴᠦ᠂ ᠨᠣᠭᠤᠭᠠᠨ ᠭᠤᠯᠢᠶ᠎ᠠ ᠵᠢᠷ ᠵᠢᠷ ᠳᠤᠤᠭᠠᠷᠤᠨ᠎ᠠ᠃ ᠵᠣᠨ ᠤ ᠳᠤᠮᠳᠠ ᠰᠠᠷ᠎ᠠ ᠪᠣᠯᠬᠤ ᠲᠠᠢ ᠵᠡᠷᠭᠡ ᠳᠠᠭᠠᠨ᠎ᠠ᠂ ᠮᠠᠩᠭᠢᠷ᠂ ᠭᠤᠭᠤᠳ ᠤᠨ ᠦᠨᠦᠷ ᠬᠠᠩᠬᠤᠯᠵᠤ᠂ ᠣᠷᠣᠢ ᠬᠤᠨᠢ ᠦᠬᠡᠷ ᠢᠶᠠᠨ ᠬᠤᠲᠠᠯᠠᠬᠤ ᠦᠶᠡᠰ ᠮᠠᠯ ᠤᠨ ᠠᠮᠢᠰᠬᠤᠯ ᠢᠶᠠᠷ ᠡᠬᠡᠭᠦᠨ ᠦᠨᠦᠷ ᠬᠠᠮᠠᠷ ᠴᠣᠷᠭᠢᠳᠠᠭ ᠪᠠᠶᠢᠯ᠎ᠠ᠃ ᠰᠣᠷᠢᠰᠤᠨ ᠲᠣᠯᠣᠭᠠᠢ ᠬᠥᠨᠳᠡᠢ ᠵᠢᠯᠠᠭ᠎ᠠ ᠪᠠᠷ ᠴᠠᠭᠠᠨ ᠳᠠᠪᠤᠤ ᠳᠡᠯᠭᠡᠴᠢᠬᠡᠭᠰᠡᠨ ᠰᠢᠭ ᠨᠡᠶᠢᠳᠡᠮ ᠴᠠᠶᠢᠷᠠᠵᠤ᠂ ᠣᠲᠣᠷ ᠤᠨ ᠠᠶᠢᠯ᠂ ᠵᠠᠮ ᠤᠨ ᠠᠶᠠᠨᠴᠢᠳ ᠳᠡᠪᠢᠭᠦᠷ ᠳᠡᠪᠢᠭᠦᠷ ᠢᠶᠠᠷ ᠲᠡᠭᠦᠳᠡᠭ᠃ ᠭᠠᠭᠴᠠ ᠨᠢᠭᠡ ᠬᠡᠴᠡᠭᠦᠦ ᠨᠢ ᠵᠣᠨ ᠨᠠᠮᠤᠷ ᠲᠠᠭᠠᠨ ᠢᠯᠠᠭ᠎ᠠ ᠰᠢᠮᠠᠭᠤᠯ ᠶᠡᠭᠡ᠂ ᠬᠥᠬᠡ ᠳᠦᠷᠦᠭᠦᠦ᠂ ᠨᠣᠭᠤᠭᠠᠨ ᠲᠣᠯᠣᠭᠠᠶᠢᠲᠤ᠂ ᠰᠢᠷ᠎ᠠ ᠢᠯᠠᠭ᠎ᠠ᠂ ᠬᠠᠷ᠎ᠠ ᠪᠠᠲᠠᠭᠠᠨ᠎ᠠ ᠨᠢᠳᠦ ᠨᠢᠭᠤᠷ ᠦᠭᠡᠢ ᠪᠡᠳᠡᠵᠦ᠂ ᠬᠦᠵᠦᠭᠦᠦ ᠲᠣᠯᠣᠭᠠᠢ ᠶᠢ ᠴᠢᠯᠦᠭᠡ ᠵᠠᠪ ᠦᠭᠡᠢ ᠬᠠᠳᠬᠤᠨ᠎ᠠ᠃ ᠨᠡᠩ ᠴᠦ ᠤᠶᠠᠭ᠎ᠠ ᠲᠠᠢ ᠮᠣᠷᠢ ᠦᠬᠡᠷ ᠢ ᠪᠣᠯ ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠭᠠᠳ ᠢᠳᠡᠴᠢᠬᠡᠨ᠎ᠡ ᠭᠡᠰᠡᠨ ᠦᠭᠡ᠃ ᠣᠨᠣᠭᠰᠠᠨ ᠮᠣᠷᠢᠨ ᠤ ᠪᠠᠨ ᠬᠦᠵᠦᠭᠦᠦ ᠰᠡᠭᠡᠷ ᠢ ᠭᠠᠷ ᠢᠶᠠᠷ ᠢᠶᠠᠨ ᠢᠯᠢᠬᠦ ᠳᠤ ᠭᠠᠷ ᠤᠨ ᠠᠯᠠᠭ᠎ᠠ ᠨᠢᠯ ᠤᠯᠠᠶᠢᠭᠠᠳ ᠭᠠᠷᠴᠢᠬᠠᠳᠠᠭ᠃ ᠬᠠᠷᠢᠨ ᠡᠪᠦᠯ ᠳᠡᠭᠡᠨ ᠪᠣᠯ ᠬᠡᠳᠦᠢ ᠶᠡᠭᠡ ᠴᠠᠰᠤ ᠣᠷᠣᠯ᠎ᠠ ᠴᠦ ᠭᠡᠰᠡᠨ ᠰᠢᠭᠤᠷᠭ᠎ᠠ ᠭᠦᠶᠦᠵᠦ᠂ ᠰᠠᠯᠬᠢ ᠴᠣᠬᠢᠳᠠᠭ ᠦᠭᠡᠢ ᠨᠦᠮᠵᠦᠭ ᠳᠤᠯᠠᠭᠠᠬᠠᠨ ᠪᠠᠶᠢᠳᠠᠭ ᠨᠢ ᠠᠶᠠᠲᠠᠢ᠃ ᠰᠢᠯᠢ ᠵᠣ ᠪᠠᠷ ᠶᠠᠪᠠᠭᠠᠨ ᠰᠢᠭᠤᠷᠭ᠎ᠠ ᠨᠢᠳᠦ ᠨᠢᠭᠤᠷ ᠦᠭᠡᠢ ᠭᠤᠶᠠᠳᠠᠵᠤ ᠪᠠᠶᠢᠬᠤ ᠳᠤ ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶᠡᠨ ᠳᠤ ᠦᠬᠡᠷ ᠮᠠᠯ ᠤᠳ ᠪᠤᠲᠠᠨ ᠤ ᠡᠩᠭᠡᠷ ᠠᠮᠤᠷ ᠳᠠᠶᠢᠪᠤᠡᠭ ᠬᠡᠪᠲᠡᠴᠢᠬᠡᠭᠰᠡᠨ᠂ ᠵᠣ ᠨᠢᠷᠤᠭᠤ ᠪᠠᠨ ᠨᠡᠷᠡᠨ ᠳᠤ ᠡᠭᠡᠭᠡᠳ ᠲᠠᠭᠠᠲᠠᠢ ᠬᠡᠪᠢᠳᠡᠭ ᠪᠠᠶᠢᠯ᠎ᠠ᠃       ᠵᠢᠯ ᠪᠣᠯᠭᠠᠨ ᠤ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠲᠠᠪᠤᠨ ᠰᠠᠷ᠎ᠠ ᠶᠢᠨ ᠠᠷᠪᠠ ᠶᠢᠰᠦᠨ ᠳᠤ ᠬᠤᠯᠠ ᠣᠶᠢᠷ᠎ᠠ ᠶᠢᠨ ᠬᠡᠳᠦᠨ ᠬᠤᠰᠢᠭᠤ ᠪᠠᠷ ᠢᠶᠠᠨ ᠬᠦᠷᠦᠯᠴᠡᠨ ᠢᠷᠠᠵᠤ ᠲᠠᠬᠢᠳᠠᠭ ᠠᠷᠢᠭᠤᠨ ᠰᠢᠲᠦᠭᠡᠨᠲᠦ ᠪᠠᠶᠠᠨᠬᠤᠰᠢᠭᠤ ᠣᠪᠣᠭ᠎ᠠ ᠡᠨᠡᠬᠦ ᠰᠠᠶᠢᠬᠠᠨ ᠨᠤᠲᠤᠭ ᠤᠨ ᠢᠶᠠᠨ ᠰᠦᠯᠳᠡ ᠬᠡᠶᠢᠮᠣᠷᠢ ᠨᠢ ᠪᠣᠯᠵᠤ᠂ ᠠᠰ ᠡᠮᠦᠨᠡᠲᠡᠢ ᠨᠢ ᠪᠠᠶᠢᠷᠢᠯᠠᠵᠤ ᠪᠠᠶᠢᠳᠠᠭ ᠢᠶᠠᠷ ᠤᠯᠠᠨ ᠢᠶᠠᠷ ᠢᠶᠠᠨ ᠡᠨᠡᠬᠦ ᠡᠪᠦᠯᠵᠢᠶ᠎ᠡ ᠶᠢ ︽ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶ᠎ᠡ︾ ᠭᠡᠳᠡᠭ ᠶᠤᠮ᠃       ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶ᠎ᠡ ᠭᠡᠬᠦᠯᠡᠷ ᠨᠠᠳᠠᠳᠤ ᠳᠤᠯᠠᠭᠠᠬᠠᠨ ᠮᠥᠷᠲᠡᠭᠡᠨ ᠳᠤᠷᠠᠳᠬᠠᠯ ᠲᠠᠢ ᠰᠠᠨᠠᠭᠳᠠᠵᠤ᠂ ᠥᠪᠡᠷ ᠤᠨ ᠡᠷᠬᠡ ᠦᠭᠡᠢ ᠤᠯᠠᠨ ᠶᠠᠭᠤᠮ᠎ᠠ ᠶᠢ ᠬᠤᠯᠪᠣᠨ ᠪᠤᠳᠤᠬᠳᠠᠭᠤᠯᠳᠠᠭ ᠰᠠᠨ᠃       ᠠᠯᠢ ᠡᠷᠲᠡ ᠨᠠᠮᠠᠶᠢ ᠲᠠᠪᠤ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠪᠠᠶᠢᠬᠤ ᠳᠤ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠬᠢ ᠭᠡᠳᠡᠭ ᠨᠢᠭᠡᠯᠬᠡᠨ ᠭᠡᠷ ᠡ᠊ᠨᠳᠡ ᠰᠠᠭᠤᠷᠢᠰᠢᠵᠤ ᠪᠠᠶᠢᠭᠰᠠᠨ ᠶᠤᠮ᠃ ᠪᠣᠷᠣ ᠪᠦᠷᠢᠶᠡᠰᠦ ᠲᠠᠢ ᠵᠢᠵᠢᠭᠬᠡᠨ ᠮᠣᠩᠭᠤᠯ ᠭᠡᠷ᠂ ᠨᠢᠭᠡ ᠲᠠᠰᠤᠯᠭ᠎ᠠ ᠬᠠᠭᠠᠰ ᠰᠢᠪᠠᠷ ᠪᠠᠶᠢᠰᠢᠩ ᠨᠢ ᠥᠨᠳᠥᠷ ᠳᠠᠷᠠᠰᠤ᠂ ᠡᠪᠡᠰᠦ ᠨᠣᠶᠢᠯ ᠤᠨ ᠳᠤᠮᠳᠠ ᠦᠵᠡᠭᠳᠡᠬᠦ ᠲᠠᠢ ᠦᠭᠡᠢ ᠲᠠᠢ ᠤᠳᠤᠭ᠎ᠠ ᠭᠠᠷᠴᠤ ᠯᠠ ᠪᠠᠶᠢᠳᠠᠭ᠃ ᠡᠪᠦᠭᠡᠨ ᠬᠥᠭᠰᠢᠨ ᠬᠤᠶᠠᠭᠤᠯᠠ ᠪᠠᠨ ᠦᠷ᠎ᠡ ᠬᠡᠦᠬᠡᠳ ᠭᠡᠵᠦ ᠪᠠᠶᠢᠬᠤ ᠦᠭᠡᠢ᠂ ᠨᠠᠶᠢᠳᠠ ᠶᠢᠨ ᠨᠢᠭᠡ ᠰᠦᠷᠦᠭ ᠦᠬᠡᠷ ᠢ ᠬᠠᠷᠢᠭᠤᠯᠵᠤ᠂ ᠡᠪᠦᠯ ᠵᠣᠨ ᠦᠭᠡᠢ ᠡᠨᠡ ᠣᠷᠴᠢᠮ ᠠᠴᠠ ᠰᠠᠯᠬᠤ ᠦᠭᠡᠢ᠂ ᠬᠡᠳᠦᠨ ᠠᠷᠭᠠᠮᠵᠢᠶ᠎ᠠ ᠭᠠᠵᠠᠷ ᠲᠣᠪᠤ ᠳᠣᠪᠣᠷᠴᠠᠭ ᠤᠨ ᠣᠷᠣᠢ ᠲᠣᠯᠣᠭᠠᠢ ᠳᠠᠮᠵᠢᠨ ᠬᠤᠶᠢᠰᠢ ᠤᠷᠤᠭᠰᠢ ᠪᠠᠨ ᠨᠡᠭᠦᠵᠦ ᠪᠠᠭᠤᠵᠤ ᠯᠠ ᠪᠠᠶᠢᠳᠠᠭ᠃ ᠬᠥᠭᠰᠢᠨ ᠢ ᠨᠢ ᠤᠯᠠᠨ ᠢᠶᠠᠷ ᠢᠶᠠᠨ ︽ᠤᠩᠭᠤ ᠡᠵᠢ︾ ᠭᠡᠳᠡᠭ᠃ ᠡᠭᠦᠳᠡᠨ ᠰᠢᠳᠦ ᠨᠢ ᠤᠩᠭᠤᠷᠬᠠᠢ᠂ ᠶᠠᠭᠤᠮ᠎ᠠ ᠪᠣᠯᠭᠠᠨ ᠳᠤ ᠯᠠ ︽ᠤᠳᠤᠭ ᠠ᠋᠂ ᠪᠤᠳᠤᠭ ᠠ᠋︾ ᠭᠡᠵᠦ ᠳᠡᠭᠡᠷ᠎ᠡ ᠲᠠᠭᠤ ᠪᠠᠷ ᠪᠡᠯᠡᠩᠳᠡᠴᠢᠬᠡᠭᠰᠡᠨ᠂ ᠪᠣᠭᠵᠣᠭᠤᠷ ᠵᠢᠵᠢᠭᠬᠡᠨ ᠪᠡᠶ᠎ᠡ ᠲᠠᠢ᠂ ᠪᠠᠷᠬᠢᠷᠠᠭ᠎ᠠ ᠬᠥᠭᠰᠢᠨ᠃ ᠥᠷᠯᠥᠭᠡ ᠣᠷᠣᠢ ᠳᠠᠭᠠᠨ ᠤᠯᠠᠨ ᠦᠨᠢᠶ᠎ᠡ ᠰᠠᠭᠠᠵᠤ᠂ ᠡᠭᠡᠵᠡᠭᠡᠢ ᠬᠤᠷᠤᠳ ᠢ ᠪᠣᠷᠣ ᠭᠡᠷ ᠤᠨ ᠢᠶᠠᠨ ᠳᠡᠭᠡᠪᠦᠷ ᠳᠡᠭᠡᠭᠦᠷ ᠴᠠᠶᠢᠲᠠᠯ᠎ᠠ ᠳᠡᠯᠭᠡᠴᠢᠬᠡᠳᠡᠭ ᠰᠠᠭᠠᠯᠢ ᠰᠦᠨ ᠳᠤ ᠭᠠᠷ ᠥᠭᠡᠳᠡ ᠲᠠᠢ ᠬᠥᠮᠥᠨ ᠪᠠᠶᠢᠯ᠎ᠠ᠃ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢ ᠬᠥᠮᠥᠰ ᠥᠪᠥᠷ ᠵᠦᠭ ᠤᠨ ᠬᠥᠮᠥᠨ ᠭᠡᠬᠦ ᠪᠤᠶᠤ ᠳᠠᠪᠠᠭᠠᠨ ᠡᠩᠭᠡᠷ ᠤᠨ ᠬᠥᠮᠥᠨ ᠴᠦ ᠭᠡᠳᠡᠭ᠃ ᠴᠣᠬᠤᠮ ᠠᠯᠢ ᠨᠤᠲᠤᠭ ᠤᠨ ᠬᠥᠮᠥᠨ᠂ ᠬᠡᠵᠢᠶ᠎ᠡ ᠡ᠊ᠨᠳᠡ ᠢᠷᠡᠭᠰᠡᠨ ᠢ ᠨᠢ ᠠᠰᠠᠭᠤᠳᠠᠭ ᠬᠥᠮᠥᠨ ᠴᠦ ᠪᠠᠶᠢᠬᠤ ᠦᠭᠡᠢ᠂ ᠮᠡᠳᠡᠬᠦ ᠬᠥᠮᠥᠨ ᠴᠦ ᠪᠠᠶᠢᠬᠤ ᠦᠭᠡᠢ᠃ ᠦᠭᠡ ᠲᠠᠭᠤ ᠴᠥᠭᠡᠨ᠂ ᠬᠤᠪᠢ ᠪᠠᠨ ᠬᠥᠭᠡᠭᠡᠭᠰᠡᠨ ᠳᠦᠩᠰᠦᠭᠡᠷ ᠬᠥᠬᠡ ᠡᠪᠦᠭᠡᠨ ᠤᠷᠳᠦ ᠴᠠᠭᠠᠨ ᠰᠢᠯᠪᠢ ᠲᠠᠢ ᠭᠠᠩᠰᠠ ᠪᠠᠨ ᠰᠣᠷᠣᠵᠤ᠂ ᠴᠠᠢ ᠲᠠᠮᠰᠢᠶᠠᠯᠠᠵᠤ ᠰᠠᠭᠤᠬᠤ ᠦᠭᠡᠢ ᠪᠣᠯ ᠬᠠᠱᠠᠩ ᠪᠣᠷᠣ ᠮᠣᠷᠢ ᠪᠠᠨ ᠳᠡᠪᠠᠷᠡᠵᠦ᠂ ᠬᠤᠶᠠᠷ ᠨᠣᠬᠠᠢ ᠪᠠᠨ ᠳᠠᠭᠠᠭᠤᠯᠤᠭᠠᠳ ᠳᠠᠷᠠᠰᠤ ᠬᠤᠯᠤᠰᠤ ᠪᠠᠷ ᠦᠨᠡᠭᠡ᠂ ᠮᠠᠩᠭᠢᠰᠤ ᠠᠩᠨᠠᠵᠤ᠂ ᠰᠠᠯ ᠰᠠᠯ ᠳᠤᠩᠰᠢᠭᠤᠯᠤᠨ᠎ᠠ᠃ ᠬᠡᠲᠦ ᠬᠤᠨᠣᠬᠤ ᠦᠭᠡᠢ ᠨᠢᠭᠡ ᠦᠨᠡᠭᠡ ᠪᠤᠶᠤ ᠱᠠᠬᠠᠷ ᠠᠪᠴᠢᠬᠠᠭᠠᠳ ᠠᠷᠠᠰᠤᠨ ᠳᠤᠨᠢ ᠡᠪᠡᠰᠦ ᠴᠢᠬᠢᠴᠢᠬᠡᠭᠡᠳ ᠥᠨᠳᠥᠷ ᠮᠣᠳᠣᠨ ᠠᠴᠠ ᠳᠡᠭᠦᠵᠢᠯᠡᠨ ᠰᠠᠯᠬᠢᠨ ᠳᠤ ᠬᠡᠶᠢᠰᠬᠡᠵᠦ ᠪᠠᠶᠢᠬᠤ ᠬᠠᠷᠠᠭᠳᠠᠳᠠᠭ᠂ ᠬᠠᠶᠠ ᠵᠠᠷᠢᠮ ᠳᠠᠭᠠᠨ ᠮᠠᠩᠭᠢᠰᠤ᠂ ᠲᠠᠷᠪᠠᠭ᠎ᠠ᠂ ᠡᠯᠪᠡᠩᠬᠦ ᠮᠡᠲᠦ ᠶᠢᠨ ᠶᠠᠭᠤᠮ᠎ᠠ ᠠᠯᠠᠵᠤ᠂ ᠲᠠᠷᠭᠤᠨ ᠮᠢᠬ᠎ᠠ ᠶᠢ ᠨᠢ ᠲᠠᠪᠠᠭᠯᠠᠵᠤ ᠲᠠᠯᠪᠢᠴᠢᠬᠠᠭᠠᠳ᠂ ᠢᠷᠡᠭᠰᠡᠨ ᠬᠥᠮᠥᠨ ᠪᠣᠯᠭᠠᠨ ᠢ ︽ᠢᠳᠡ ᠢᠳᠡ︾ ᠭᠡᠵᠦ ᠶᠠᠩᠨᠠᠨ᠂ ᠲᠣᠰᠣᠨ ᠠᠴᠠ ᠨᠢ ᠵᠢᠵᠢᠭ ᠯᠣᠩᠬᠤ ᠰᠠᠪᠠᠨ ᠳᠤ ᠬᠢᠵᠦ ︽ᠬᠠᠯᠠᠭᠠᠭᠰᠠᠨ ᠰᠢᠷᠬᠠᠨ ᠳᠤ ᠰᠠᠶᠢᠨ ᠶᠤᠮ᠂ ᠮᠠᠢ ᠬᠡᠦᠬᠡ︕︾ ᠭᠡᠵᠦ ᠪᠡᠯᠡᠭ ᠥᠭᠭᠦᠨ᠎ᠡ᠃ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠪᠣᠷᠣ ᠮᠣᠷᠢ ᠭᠡᠵᠢ ᠡᠪᠦᠯ ᠵᠣᠨ ᠦᠭᠡᠢ ᠲᠠᠪ ᠲᠠᠷᠭᠤᠨ ᠂ ᠬᠡᠦᠬᠡᠳ ᠰᠢᠤᠬᠠᠳ ᠬᠠᠵᠠᠭᠤᠳᠠ ᠨᠢ ᠣᠶᠢᠷᠠᠲᠤᠪᠠᠯ ᠴᠢᠬᠢ ᠪᠠᠨ ᠬᠤᠯᠠᠮᠠᠶᠢᠵᠦ᠂ ᠮᠠᠭᠤᠬᠠᠢ ᠬᠠᠷᠠᠨ᠎ᠠ᠂ ᠵᠠᠷᠢᠮ ᠳᠠᠭᠠᠨ ᠪᠥᠭᠰᠡ ᠪᠠᠨ ᠮᠤᠷᠤᠶᠢᠯᠭᠠᠵᠤ ᠢᠰᠬᠦᠯᠬᠦ ᠪᠠᠷ ᠢᠶᠠᠨ ᠠᠶᠤᠯᠭᠠᠨ᠎ᠠ᠃ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠬᠢ ᠶᠠᠭ ᠵᠠᠮ ᠤᠨ ᠬᠠᠵᠠᠭᠤᠳᠠ ᠪᠠᠶᠢᠳᠠᠭ ᠪᠣᠯᠬᠤᠷ ᠮᠠᠨ ᠤ ᠪᠠᠶᠠᠨᠴᠠᠭᠠᠨ ᠤ ᠠᠶᠢᠯ ᠤᠳ ᠮᠠᠶᠢᠮᠠᠢ ᠱᠣᠣᠮᠠᠢ ᠬᠢᠬᠦ ᠪᠤᠶᠤ ᠪᠤᠳᠠᠭ᠎ᠠ ᠭᠤᠯᠢᠷ ᠢᠶᠠᠨ ᠠᠪᠬᠤ ᠪᠠᠷ ᠶᠠᠪᠤᠪᠠᠯ ᠠᠯᠪᠠ ᠲᠠᠢ ᠶᠤᠮ ᠰᠢᠭ᠋ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠳᠤ ᠵᠠᠪᠠᠯ ᠨᠢᠭᠡ ᠪᠠᠭᠤᠵᠤ᠂ ᠬᠤᠷᠤᠳ᠂ ᠰᠢᠷ᠎ᠠ ᠲᠣᠰᠣ ᠲᠠᠢ ᠴᠠᠢ ᠶᠢ ᠨᠢ ᠬᠥᠯᠥᠰᠦ ᠪᠠᠨ ᠭᠠᠷᠳᠠᠯ᠎ᠠ ᠤᠤᠭᠤᠳᠠᠭ᠃ ᠬᠠᠶᠠ ᠵᠠᠷᠢᠮ ᠨᠢᠭᠡ ᠨᠢ ᠶᠠᠭᠠᠷᠠᠵᠤ ᠰᠠᠨᠳᠤᠷᠤᠭᠠᠳ ᠪᠠᠭᠤᠬᠤ ᠦᠭᠡᠢ ᠭᠠᠷᠴᠢᠬᠠᠪᠠᠯ ︽ᠤᠩᠭᠤ ᠡᠵᠢ︾ ᠠᠯᠢ ᠬᠡᠳᠦᠶᠢᠨ ᠣᠯᠵᠤ ᠦᠵᠡᠴᠢᠬᠡᠭᠡᠳ ︽ᠠᠶᠢᠯ ᠤᠨ ᠬᠠᠶᠠᠭ᠎ᠠ ᠬᠠᠨᠳᠤᠷᠠᠯ᠎ᠠ︾ ᠭᠡᠵᠦ ᠳᠤᠨᠳᠤᠬᠴᠢᠨ ᠵᠠᠩᠨᠠᠨ᠎ᠠ᠃ ᠲᠡᠷᠡ ᠮᠥᠷᠲᠡᠭᠡᠨ ᠣᠨᠣᠭᠰᠠᠨ ᠮᠣᠷᠢ᠂ ᠬᠥᠯᠥᠭᠰᠡᠨ ᠦᠬᠡᠷ ᠢ ᠨᠢ ᠴᠦ ᠠᠨᠳᠠᠬᠤ ᠦᠭᠡᠢ ᠲᠠᠨᠢᠵᠤ᠂ ᠬᠡᠨ ᠬᠡᠨ ᠭᠡᠵᠦ ᠨᠡᠷ᠎ᠡ ᠶᠢ ᠨᠢ ᠬᠡᠯᠡᠨ᠎ᠡ᠃ ᠬᠥᠮᠥᠨ ᠪᠠᠭᠤᠪᠠᠯ ᠬᠦᠦ ᠨᠢ ᠢᠷᠡᠭᠰᠡᠨ ᠰᠢᠭ ᠪᠠᠶᠠᠷᠯᠠᠵᠤ᠂ ᠠᠯᠢ ᠪᠠᠶᠢᠬᠤ ᠪᠠᠨ ᠲᠡᠮᠲᠡᠷᠢᠨ ᠳᠤᠯᠤᠭᠠᠨ ᠪᠤᠯᠴᠢᠷᠬᠠᠢ ᠪᠠᠨ ᠲᠣᠭᠠᠴᠢᠨ᠎ᠠ᠃ ᠷᠠᠳᠢᠣ᠋᠂ ᠰᠣᠨᠢᠨ ᠬᠤᠪᠣᠷ ᠪᠠᠶᠢᠭᠰᠠᠨ ᠲᠡᠷᠡ ᠦᠶ᠎ᠡ ᠳᠤ ︽ᠤᠩᠭᠤ ᠡᠵᠢ︾ ᠪᠣᠯ ᠬᠤᠯᠠ ᠣᠶᠢᠷ᠎ᠠ ᠶᠢᠨ ᠰᠣᠨᠢᠨ ᠮᠡᠳᠡᠭᠡ ᠳᠠᠮᠵᠢᠭᠤᠯᠤᠭᠴᠢ ᠭᠡᠵᠦ ᠮᠡᠳᠡ᠃ ᠶᠠᠭᠤᠮ᠎ᠠ ᠪᠣᠯᠭᠠᠨ ᠢ ᠲᠡᠷᠡ ᠯᠠ ᠤᠷᠢᠳᠠᠪᠠᠷ ᠰᠣᠨᠣᠰᠴᠢᠬᠠᠭᠰᠠᠨ ︽ᠡᠶᠢᠮᠦ ᠭᠡᠨ᠎ᠡ ᠰᠢᠤ᠂ ᠬᠡᠦᠬᠡ︕︾ ︽ᠲᠡᠶᠢᠮᠦ ᠭᠡᠨ᠎ᠡ ᠰᠢᠤ᠂ ᠠᠶᠤᠮᠠᠷ ᠠ᠋᠂ ᠠᠯᠮᠠᠷ ᠮᠢᠨᠢ︾ ᠭᠡᠵᠦ ᠦᠵᠡᠭᠰᠡᠨ ᠰᠤᠨᠤᠰᠤᠬᠰᠠᠨ ᠢᠶᠠᠨ ᠳᠠᠪᠤᠰᠤ ᠬᠤᠵᠢᠷ ᠨᠡᠮᠡᠵᠦ᠂ ᠠᠮᠠ ᠰᠤᠯᠠ ᠦᠭᠡᠢ ᠶᠠᠷᠢᠨ᠎ᠠ᠃       1967ᠣᠨ ᠤ ᠨᠠᠮᠤᠷ ᠮᠠᠨ ᠤ ᠬᠢ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠭᠡᠷ ᠤᠨ ᠪᠠᠷᠠᠭᠤᠨᠲᠠᠢ ᠬᠤᠶᠠᠷ ᠲᠠᠰᠤᠯᠭ᠎ᠠ ᠵᠢᠵᠢᠭ ᠰᠢᠪᠠᠷ ᠪᠠᠶᠢᠰᠢᠩ ᠪᠠᠷᠢᠪᠠ᠃ ᠠᠪᠤ ᠶᠡᠭᠡ ᠠᠬ᠎ᠠ ᠬᠤᠶᠠᠭᠤᠯᠠ ᠡᠳᠦᠷᠵᠢᠨ ᠤᠰᠤ ᠰᠢᠪᠠᠷ ᠲᠡᠭᠡᠭᠡᠵᠦ ᠭᠡᠷ ᠪᠠᠷᠢᠨ᠎ᠠ᠃ ᠳᠡᠭᠦᠦ ᠪᠢᠳᠡ ᠬᠤᠶᠠᠷ ᠬᠠᠵᠠᠭᠤᠳᠠ ᠨᠢ ᠱᠣᠪᠣᠶᠢᠵᠤ ᠰᠠᠭᠤᠴᠢᠬᠠᠭᠠᠳ᠂ ᠰᠢᠪᠠᠷ ᠢᠶᠠᠷ ᠨᠢ ᠡᠯᠳᠡᠪ ᠶᠠᠭᠤᠮ᠎ᠠ ᠪᠠᠷᠢᠵᠤ᠂ ᠢᠯᠠᠭ᠎ᠠ ᠰᠢᠮᠠᠭᠤᠯ ᠳᠤ ᠬᠠᠵᠠᠭᠳᠠᠵᠤ ᠪᠠᠶᠢᠭᠰᠠᠨ ᠴᠦ ᠡᠳᠦᠷᠵᠢᠨ ᠨᠠᠭᠠᠳᠤᠨ᠎ᠠ᠃       ᠨᠠᠮᠤᠷ ᠤᠨ ᠰᠡᠭᠦᠯᠴᠢ ᠶᠢᠨ ᠨᠢᠭᠡ ᠡᠳᠦᠷ ︽ᠤᠩᠭᠤ ᠡᠵᠢ︾ ᠮᠠᠨ ᠤ ᠳᠤ ᠣᠷᠣᠵᠤ ᠢᠷᠡᠭᠡᠳ ᠠᠶ᠋ᠢ ᠶᠢᠨ ᠴᠢᠬᠢᠨ ᠳᠤ ︵ᠪᠢᠳᠡ ᠡᠵᠢ ᠪᠠᠨ ᠠᠶ᠋ᠢ ᠭᠡᠵᠦ ᠳᠠᠭᠤᠳᠠᠳᠠᠭ︶ ᠣᠶᠢᠷᠠᠲᠤᠵᠤ ︽ᠤᠯᠠᠨ ᠪᠠᠭᠠᠴᠤᠤᠯ ᠠᠡᠭ ᠳᠤ ᠶᠠᠪᠤᠵᠤ ᠪᠠᠶᠢᠭᠠᠳ ᠪᠠᠶᠠᠨᠬᠤᠰᠢᠭᠤ ᠣᠪᠣᠭ᠎ᠠ ᠶᠢ ᠮᠠᠯᠲᠠᠵᠤ ᠭᠡᠨ᠎ᠡ ᠰᠢᠤ᠃ ᠠᠯᠮᠡᠷ ᠠ᠋᠂ ᠳᠣᠲᠣᠷ᠎ᠠ ᠠᠴᠠ ᠨᠢ ᠬᠡᠲᠦ ᠬᠡᠳᠦᠨ ᠪᠣᠲᠤᠩ ᠲᠠᠢ ᠶᠠᠭᠤᠮ᠎ᠠ ᠭᠠᠷᠴᠤ ᠭᠡᠨ᠎ᠡ᠃ ᠪᠠᠰᠠ ᠨᠢᠭᠡ ᠨᠣᠭᠤᠭᠠᠨ ᠡᠷᠢᠶᠡᠨ ᠮᠡᠯᠡᠬᠡᠢ ᠭᠠᠷᠴᠤ ᠢᠷᠡᠭᠡᠳ ᠳᠡᠭᠡᠷ᠎ᠡ ᠳᠡᠭᠡᠷ᠎ᠡ ᠦᠰᠦᠷᠴᠦ ᠪᠠᠶᠢᠭᠰᠠᠭᠠᠷ ᠭᠡᠨᠡᠳᠲᠡ ᠠᠯᠠᠭ᠎ᠠ ᠪᠣᠯᠴᠢᠬᠠᠵᠠᠢ ᠭᠡᠨ᠎ᠡ ᠰᠢᠤ᠃ ᠪᠠᠷᠤᠭ ᠨᠠᠪᠳᠠᠭ ᠰᠠᠪᠳᠠᠭ ᠨᠢ ᠮᠥᠨ ᠪᠠ᠃ ᠪᠤᠷᠬᠠᠨ ᠮᠢᠨᠢ᠂ ᠴᠠᠭᠠᠰᠢ ᠪᠠᠨ ᠲᠠᠭᠤ ᠦᠭᠡᠢ ᠪᠠᠢ ᠳ᠋ᠠ᠃ ᠶᠠᠮᠠᠷ ᠴᠠᠭ ᠪᠣᠯᠬᠤ ᠶᠢ ᠮᠡᠳᠡᠬᠦ ᠦᠭᠡᠢ︾ ᠭᠡᠵᠦ ᠰᠢᠪᠡᠨᠡᠨ ᠬᠡᠯᠡᠭᠡᠳ ᠵᠠᠯᠪᠠᠷᠢᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠬᠤᠶᠠᠭᠤᠯᠠ ᠪᠠᠨ ᠠᠶᠠᠭ᠎ᠠ ᠲᠠᠢ ᠶᠠᠭᠤᠮ᠎ᠠ ᠠᠪᠴᠤ ᠭᠠᠷᠤᠭᠠᠳ ᠣᠪᠣᠭᠠᠨ ᠵᠦᠭ ᠡᠷᠭᠦᠵᠦ ᠪᠠᠶᠢᠯ᠎ᠠ᠃       ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠭᠦᠩᠱᠧ ︵ᠰᠤᠮᠤ︶ ᠎ ᠶᠢᠨ ᠰᠤᠷᠭᠠᠭᠤᠯᠢ ᠤᠷᠢᠳᠴᠢᠯᠠᠨ ᠴᠢᠯᠦᠭᠡ ᠲᠠᠯᠪᠢᠵᠤ᠂ ᠬᠤᠶᠠᠳᠤᠭᠠᠷ ᠠᠬ᠎ᠠ ᠠᠶᠢᠯ ᠤᠨ ᠦᠬᠡᠷ ᠲᠡᠷᠭᠡ ᠶᠢ ᠲᠠᠭᠠᠵᠤ᠂ ᠭᠡᠷ ᠲᠡᠭᠡᠨ ᠭᠦᠶᠦᠵᠦ ᠢᠷᠠᠯ᠎ᠠ᠃ ᠠᠶ᠋ᠢ ᠬᠤᠶᠠᠳᠤᠭᠠᠷ ᠠᠬ᠎ᠠ ᠶᠢ ᠢᠳᠡᠭᠦᠯᠵᠦ ᠤᠤᠭᠤᠯᠭᠠᠭᠠᠳ᠂ ᠪᠥᠭᠡᠰᠦ ᠲᠠᠢ ᠬᠠᠨᠲᠠᠭᠠᠰᠤ ᠥᠮᠥᠳᠦ ᠶᠢ ᠨᠢ ᠪᠤᠴᠠᠯᠤᠭᠰᠠᠨ ᠤᠰᠤ ᠪᠠᠷ ᠰᠢᠯᠵᠠᠯᠵᠤ ᠤᠬᠢᠶᠠᠭᠠᠳ᠂ ᠬᠡᠵᠢᠭᠡ ᠶᠢ ᠨᠢ ᠪᠦᠲᠦᠨ ᠨᠠᠷᠢᠨ ᠱᠦᠭᠦᠷ ᠢᠶᠠᠷ ᠡᠭᠡᠯᠵᠢᠯᠡᠨ ᠰᠠᠮᠨᠠᠵᠤ ᠥᠭᠪᠡ᠃ ᠮᠠᠷᠭᠠᠰᠢ ᠠᠴᠠ ᠨᠢ ᠡᠬᠢᠯᠡᠵᠦ᠂ ᠪᠢ ᠳᠡᠭᠦᠦ ᠲᠠᠢ ᠪᠠᠨ ᠨᠠᠭᠠᠳᠬᠤ ᠳᠤᠷ᠎ᠠ ᠦᠭᠡᠢ ᠪᠣᠯᠵᠤ᠂ ᠬᠤᠶᠠᠳᠤᠭᠠᠷ ᠠᠬ᠎ᠠ ᠶᠢ ᠲᠠᠭᠠᠵᠤ᠂ ᠠᠭᠤᠯᠠ ᠳᠣᠪᠣᠷᠴᠠᠭ ᠤᠨ ᠣᠷᠣᠢ᠂ ᠭᠤᠣ ᠰᠤᠵᠠᠭ ᠢᠶᠠᠷ ᠭᠦᠶᠦᠳᠡᠭ ᠪᠣᠯᠣᠯ᠎ᠠ᠃ ᠡᠨᠡ ᠨᠢ ᠨᠠᠳᠠᠳᠤ ᠤᠬᠢᠯᠠᠩᠬᠠᠢ ᠮᠥᠷᠲᠡᠭᠡᠨ ᠡᠪᠦᠷᠢᠴᠢ ᠳᠡᠭᠦᠦ ᠲᠠᠢ ᠪᠠᠨ ᠬᠠᠷ᠎ᠠ ᠠᠯᠪᠠ ᠪᠠᠷ ᠡᠳᠦᠷ ᠥᠩᠭᠡᠷᠡᠭᠡᠭᠰᠡᠨ ᠠᠴᠠ ᠬᠤᠯᠠ ᠰᠠᠶᠢᠬᠠᠨ ᠪᠠᠶᠢᠯ᠎ᠠ᠃       ᠬᠤᠶᠠᠳᠤᠭᠠᠷ ᠠᠬ᠎ᠠ ᠲᠠᠤᠯᠠᠢ ᠠᠯᠠᠨ᠎ᠠ ᠭᠡᠲᠡᠯ᠎ᠡ ᠢᠳᠤᠭᠤ ᠠᠯᠠᠨ᠎ᠠ ᠭᠡᠳ ᠬᠠᠯᠲᠠᠷ ᠬᠥᠯᠥᠭᠡ ᠪᠢᠳᠡ ᠬᠤᠶᠠᠷ ᠢ ᠳᠠᠭᠠᠭᠤᠯᠵᠤ᠂ ᠮᠣᠳᠣ ᠴᠢᠯᠠᠭᠤ ᠪᠠᠷᠢᠭᠠᠳ ᠡᠳᠦᠷᠵᠢᠨ ᠠᠪᠠ ᠳᠤ ᠭᠦᠶᠦᠳᠡᠭ ᠴᠦ ︽ᠡᠰᠡᠯᠡ ᠠᠯᠠᠴᠢᠬᠠᠯ᠎ᠠ ᠰᠢᠳᠡ︾ ᠭᠡᠳ ᠭᠠᠨᠵᠤᠭ᠎ᠠ ᠬᠤᠭᠤᠰᠤᠨ ᠢᠷᠡᠳᠡᠭ ᠠᠴᠠ ᠪᠢᠰᠢ᠂ ᠡᠳᠦᠷ ᠪᠣᠯᠭᠠᠨ ᠣᠯᠣᠭᠰᠠᠨ ᠶᠠᠭᠤᠮ᠎ᠠ ᠭᠡᠵᠦ ᠶᠠᠭᠤ ᠴᠦ ᠦᠭᠡᠢ ᠪᠠᠶᠢᠵᠤ ᠪᠢᠯᠡ᠃       ᠲᠡᠷᠡ ᠡᠪᠦᠯ ᠴᠠᠭᠠᠨ ᠵᠤᠳ ᠪᠣᠯᠵᠤ᠂ ᠣᠯᠠᠩᠬᠢ ᠠᠶᠢᠯ ᠤᠳ ᠨᠢ ᠮᠠᠯ ᠢᠶᠠᠨ ᠠᠪᠤᠭᠠᠳ ᠣᠲᠣᠷ ᠨᠡᠭᠦᠴᠢᠬᠡᠯ᠎ᠡ ᠃ ᠠᠪᠤ ᠰᠤᠪᠳᠠᠭ ᠣᠲᠣᠷ ᠢᠶᠠᠷ ᠶᠠᠪᠤᠵᠤ᠂ ᠠᠶ᠋ᠢ ᠪᠢᠳᠡ ᠬᠡᠳᠦᠭᠦᠯᠡ ᠪᠠᠨ ᠰᠢᠨ᠎ᠡ ᠪᠠᠶᠢᠰᠢᠩ ᠳᠠᠭᠠᠨ ᠦᠯᠡᠳᠡᠯ᠎ᠡ᠃ ᠨᠢᠭᠡ ᠣᠷᠣᠢ ᠬᠠᠷᠠᠩᠭᠤᠢ ᠪᠤᠯᠤᠬᠰᠠᠨ ᠬᠤᠶᠢᠨ᠎ᠠ ︽ᠦᠬᠡᠷ ᠤᠨ ᠠᠪᠤ︾ ᠣᠷᠣᠵᠤ ᠢᠷᠡᠭᠡᠳ ︽ᠬᠡᠦᠬᠡ ᠠ᠋᠂ ᠬᠠᠯᠲᠠᠷ ᠬᠥᠯᠥᠭᠡ ᠴᠢᠨᠢ ᠮᠢᠨᠤ ᠬᠠᠪᠬᠠᠨ ᠳᠤ ᠣᠷᠣᠴᠢᠬᠠᠵᠠᠢ᠃ ᠪᠠᠷᠠᠭᠤᠨ ᠬᠤᠯᠤᠰᠤᠨ ᠳᠤ ᠪᠠᠶᠢᠨ᠎ᠠ᠃ ᠬᠤᠷᠳᠤᠬᠠᠨ ᠣᠴᠢᠭᠠᠳ ᠭᠠᠷᠭᠠᠭᠠᠳ ᠠᠪᠤᠭᠠᠳᠠᠭ᠋᠎ᠠ ᠳ᠋ᠠ︾ ᠭᠡᠪᠡ᠃ ᠠᠶ᠋ᠢ ᠰᠣᠨᠣᠰᠤᠩᠭᠤᠲᠠ ᠪᠠᠨ ︽ᠲᠠᠨ ᠤ ᠬᠤᠶᠠᠭᠤᠯᠠ ᠳᠡᠭᠦᠦ ᠪᠠᠨ ᠬᠠᠷᠠᠭᠠᠳ ᠰᠠᠶᠢᠬᠠᠨ ᠰᠠᠭᠤᠵᠤ ᠪᠠᠢ︾ ᠭᠡᠵᠦ ᠬᠡᠯᠡᠩᠭᠦᠲᠡ ᠪᠠᠨ ᠶᠠᠭᠠᠷᠠᠨ ᠭᠠᠷᠴᠤ ᠶᠠᠪᠤᠯ᠎ᠠ᠃ ᠨᠡᠯᠢᠶᠡᠳ ᠤᠳᠠᠭᠠᠳ ᠠᠶ᠋ᠢ ᠬᠠᠯᠲᠠᠷ ᠬᠥᠯᠥᠭᠡ ᠬᠤᠶᠠᠭᠤᠯᠠ ᠴᠠᠭᠠᠨ ᠴᠠᠩ ᠲᠠᠲᠠᠭᠤᠯᠤᠭᠰᠠᠭᠠᠷ ᠣᠷᠣᠵᠤ ᠢᠷᠡᠪᠡ᠃ ᠬᠠᠯᠲᠠᠷ ᠬᠥᠯᠥᠭᠡ ᠡᠮᠦᠨ᠎ᠡ ᠲᠠᠯ᠎ᠠ ᠶᠢᠨ ᠨᠢᠭᠡ ᠬᠥᠯ ᠢᠶᠠᠨ ᠮᠤᠶᠢᠳᠠᠶᠢᠯᠭᠠᠭᠠᠳ ᠳᠡᠭᠡᠷ᠎ᠡ ᠡᠷᠭᠦᠴᠢᠬᠡᠵᠡᠢ᠃ ᠠᠶ᠋ᠢ ︽ᠭᠥᠯᠥᠭᠡᠨ ᠤ ᠮᠢᠨᠢ ᠬᠥᠯ ᠢ ᠡᠰᠡᠯᠡ ᠮᠤᠬᠤᠷ ᠪᠣᠯᠭᠠᠴᠢᠬᠠᠵᠠᠢ︾ ᠭᠡᠳ ᠨᠡᠬᠡᠢ ᠣᠶᠢᠮᠤᠰᠤ ᠣᠶᠣᠵᠤ᠂ ᠭᠥᠯᠥᠭᠡᠨ ᠤ ᠪᠠᠨ ᠬᠥᠯ ᠳᠤ ᠤᠭᠯᠠᠵᠤ ᠥᠭᠪᠡ᠃ ᠪᠢᠳᠡ ᠬᠡᠳᠦᠭᠦᠯᠡ ᠦᠵᠡᠭᠡᠳ ᠶᠡᠭᠡ ᠯᠠ ᠢᠨᠢᠶᠡᠵᠦ ᠪᠠᠶᠢᠯ᠎ᠠ᠃ ᠬᠠᠯᠲᠠᠷ ᠬᠥᠯᠥᠭᠡ ᠡᠯᠡᠭᠯᠡᠵᠦ ᠪᠠᠶᠢᠭ᠎ᠠ ᠶᠢ ᠨᠢ ᠮᠡᠳᠡᠭᠰᠡᠨ ᠶᠤᠮ ᠰᠢᠭ᠂ ᠡᠰᠡᠬᠦᠯ᠎ᠡ ᠡᠪᠡᠳᠦᠭᠡᠳ ᠲᠡᠰᠬᠦ ᠠᠯᠳᠠᠬᠤ ᠳᠠᠭᠠᠨ ᠢᠩᠭᠢᠵᠦ ᠪᠠᠶᠢᠭ᠎ᠠ ᠴᠦ ᠶᠤᠮ ᠰᠢᠭ᠋ ︽ᠭᠤᠩ ᠭᠠᠩ︾ ᠭᠡᠵᠦ ᠬᠠᠮᠠᠷ ᠢᠶᠠᠨ ᠭᠤᠩᠭᠠᠨᠠᠵᠦ ᠪᠢᠳᠠᠨ ᠤ ᠭᠠᠷ ᠢ ᠡᠭᠡᠯᠵᠢᠯᠡᠨ ᠳᠣᠯᠢᠶᠠᠵᠤ ᠪᠠᠶᠢᠯ᠎ᠠ ᠃       ᠴᠠᠭᠠᠨ ᠰᠠᠷ᠎ᠠ ᠠᠴᠠ ᠨᠡᠯᠢᠶᠡᠳ ᠰᠡᠭᠦᠯᠡᠷ ᠨᠢᠭᠡ ᠡᠳᠦᠷ ᠬᠠᠷ᠎ᠠ ᠦᠬᠡᠷ ᠬᠥᠯᠥᠭᠰᠡᠨ ᠴᠠᠭᠠᠨ ᠰᠠᠬᠠᠯ ᠲᠠᠢ ᠡᠪᠦᠭᠡᠨ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠳᠤ ᠢᠷᠡᠪᠡ᠃ ᠬᠡᠴᠢᠨᠡᠨ ᠬᠤᠨᠤᠭ ᠬᠥᠮᠥᠨ ᠠᠮᠢᠳᠠᠨ ᠤ ᠪᠠᠷ᠎ᠠ ᠦᠵᠡᠭᠳᠡᠭᠰᠡᠨ ᠦᠭᠡᠢ ᠡᠨᠡ ᠭᠠᠵᠠᠷ ᠭᠡᠨᠡᠳᠲᠡ ᠨᠢᠭᠡ ᠦᠬᠡᠷ ᠲᠡᠷᠭᠡ ᠲᠠᠢ ᠡᠪᠦᠭᠡᠨ ᠭᠦᠷᠦᠭᠡᠳ ᠢᠷᠡᠬᠦᠯᠡᠷ ᠪᠢᠳᠡ ᠬᠡᠳᠦᠭᠦᠯᠡ ︽ᠨᠠᠭ᠎ᠠ ᠠᠪᠤ︾ ᠎ ᠪᠠᠨ ᠢᠷᠡᠭᠰᠡᠨ ᠰᠢᠭ ᠭᠦᠶᠦᠯᠳᠦᠨ ᠭᠠᠷᠤᠯ᠎ᠠ᠃ ᠦᠭᠡ ᠠᠶᠠᠯᠭᠤ ᠨᠢ ᠰᠣᠨᠢᠬᠠᠨ᠂ ᠬᠠᠷᠠᠴᠠ ᠨᠢ ᠰᠢᠷᠦᠭᠦᠨ᠂ ᠴᠠᠭᠠᠨ ᠠᠷᠠᠰᠤᠨ ᠳᠠᠪᠠᠯ ᠢ ᠳᠣᠷᠣᠭᠰᠢ ᠪᠠᠨ ᠳᠠᠷᠤᠭᠠᠳ ᠪᠦᠰᠡᠯᠡᠴᠢᠬᠡᠭᠰᠡᠨ᠂ ᠬᠥᠩᠭᠡᠨ ᠰᠢᠩᠭᠡᠨ ᠠᠯᠬᠤᠳᠠᠯ ᠲᠠᠢ᠂ ᠡᠮᠰᠢᠭᠡᠷ ᠰᠢᠷ᠎ᠠ ᠡᠪᠦᠭᠡᠨ ᠪᠠᠶᠢᠯ᠎ᠠ᠃ ︽ᠦᠬᠡᠷ ᠤᠨ ᠠᠪᠤ︾ ︽ᠤᠩᠭᠤ ᠡᠵᠢ︾ ᠬᠤᠶᠠᠷ ᠤᠨ ᠬᠥᠯ ᠨᠢ ᠭᠠᠵᠠᠷ ᠬᠦᠷᠬᠦ ᠦᠭᠡᠢ ᠪᠠᠶᠠᠷᠯᠠᠴᠢᠬᠠᠵᠠᠢ᠃ ᠲᠡᠷᠡ ᠡᠪᠦᠭᠡᠨ ᠦᠭᠡ ᠶᠢ ᠳᠡᠭᠡᠷ᠎ᠡ ᠲᠠᠭᠤ ᠪᠠᠷ ᠶᠠᠷᠢᠳᠠᠭ ᠵᠠᠩ ᠲᠠᠢ ᠶᠤᠮ ᠪᠠᠶᠢᠨ᠎ᠠ᠃ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠳᠤ ᠣᠷᠣᠭᠠᠳ ᠦᠭᠡ ᠶᠠᠷᠢᠵᠤ ᠪᠠᠶᠢᠬᠤ ᠨᠢ ᠮᠠᠨ ᠤ ᠭᠡᠷ ᠤᠨ ᠭᠠᠳᠠᠨ᠎ᠠ ᠲᠣᠪ ᠲᠣᠳᠣ ᠰᠣᠨᠣᠰᠳᠠᠵᠤ ᠪᠠᠶᠢᠯ᠎ᠠ᠃ ᠬᠤᠶᠠᠳᠤᠭᠠᠷ ᠠᠬ᠎ᠠ ᠪᠢᠳᠡ ᠬᠤᠶᠠᠷ ᠡᠪᠦᠭᠡᠨ ᠤ ᠲᠡᠷᠭᠡᠨ ᠤ ᠬᠠᠵᠠᠭᠤᠳᠠ ᠰᠡᠮᠡᠭᠡᠷᠬᠡᠨ ᠭᠦᠷᠪᠡᠯ ᠬᠡᠳᠦᠨ ᠪᠣᠷᠣ ᠰᠠᠭᠰᠤ ᠲᠠᠢ ᠶᠠᠭᠤᠮ᠎ᠠ᠂ ᠳᠡᠭᠡᠰᠦ᠂ ᠬᠦᠷᠵᠡ᠂ ᠬᠠᠳᠤᠭᠤᠷ ᠮᠡᠲᠦ ᠶᠢᠨ ᠶᠠᠭᠤᠮ᠎ᠠ ᠦᠵᠡᠭᠳᠡᠵᠦ ᠪᠠᠶᠢᠯ᠎ᠠ᠃ ᠠᠶ᠋ᠢ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠳᠤ ᠣᠷᠣᠵᠤ᠂ ᠳᠡᠮᠡᠢ ᠤᠳᠠᠯ ᠦᠭᠡᠢ ᠭᠠᠷᠴᠤ ᠢᠷᠡᠭᠡᠳ ︽ᠡᠪᠦᠭᠡᠨ ᠮᠠᠮᠠ ᠥᠭᠴᠡᠢ︾ ᠭᠡᠳ ᠬᠡᠳᠦᠨ ᠬᠥᠯᠳᠡᠭᠦᠦ ᠰᠣᠩᠭᠢᠨ᠎ᠠ ᠬᠤᠷᠮᠣᠶᠢᠯᠠᠭᠰᠠᠭᠠᠷ ᠭᠡᠷ ᠲᠡᠭᠡᠨ ᠣᠷᠣᠪᠠ᠃       ᠬᠡᠲᠦ ᠬᠤᠨᠤᠭ ᠤᠨ ᠳᠠᠷᠠᠭ᠎ᠠ ᠠᠪᠤ ᠣᠲᠣᠷ ᠠᠴᠠ ᠢᠷᠠᠵᠤ᠂ ᠮᠠᠨᠤᠰ ᠬᠠᠪᠤᠷᠵᠢᠶᠠᠨ ᠳᠠᠭᠠᠨ ᠨᠡᠭᠦᠵᠦ ᠪᠠᠭᠤᠯ᠎ᠠ ᠃ ᠲᠥᠯ ᠲᠣᠰᠬᠤ ᠬᠠᠮᠵᠢᠶᠠᠨ ᠤ ᠠᠶᠢᠯ ᠭᠡᠳ ︽ᠪᠡᠶᠡᠨ ᠮᠠᠯᠴᠢᠨ︾ ᠨᠡᠷ᠎ᠡ ᠲᠠᠢ ᠪᠤᠶᠠᠨᠲᠤ ᠶᠢᠨ ᠭᠡᠳᠡᠭ ᠨᠢᠭᠡ ᠠᠶᠢᠯ ᠢ ᠮᠠᠨ ᠤ ᠭᠡᠷ ᠤᠨ ᠬᠠᠵᠠᠭᠤᠳᠠ ᠪᠠᠭᠤᠯᠭᠠᠵᠠᠢ᠃ ᠪᠠᠰᠠ ᠨᠢᠭᠡ ᠴᠢᠮᠡᠳ ᠭᠡᠳᠡᠭ ᠭᠠᠭᠴᠠ ᠪᠡᠶ᠎ᠡ ᠬᠥᠮᠥᠨ ᠢ ᠮᠠᠨ ᠤ ᠳᠤ ᠰᠠᠭᠤᠬᠤ ᠪᠠᠷ ᠲᠣᠬᠢᠷᠠᠭᠤᠯᠤᠭᠰᠠᠨ ᠪᠠᠶᠢᠯ᠎ᠠ᠃ ᠦᠨᠡᠨᠳᠡᠭᠡᠨ ᠡᠨᠡ ᠠᠶᠢᠯ ᠨᠢ ᠬᠡᠦᠬᠡᠳ ᠢᠶᠠᠷ ᠪᠡᠶᠡᠨ ᠪᠣᠯᠬᠤ ᠠᠴᠠ ᠪᠢᠰᠢ᠂ ᠶᠠᠭᠤᠮ᠎ᠠ ᠪᠠᠷ ᠪᠡᠶᠡᠨ ᠪᠢᠰᠢ᠂ ᠶᠠᠭᠤ ᠴᠦ ᠦᠭᠡᠢ ᠶᠠᠳᠠᠭᠤ ᠬᠤᠭᠤᠰᠤᠨ ᠠᠶᠢᠯ ᠪᠠᠶᠢᠯ᠎ᠠ᠃ ᠬᠡᠦᠬᠡᠳ ᠤᠳ ᠨᠢ ᠮᠠᠨᠤᠰ ᠲᠠᠢ ᠨᠠᠰᠤ ᠪᠠᠷᠤᠭ ᠪᠣᠯᠬᠤᠷ ᠪᠢᠳᠡ ᠡᠳᠦᠷᠵᠢᠨ ᠬᠠᠮᠲᠤ ᠨᠠᠭᠠᠳᠤᠨ᠎ᠠ᠃ ᠲᠡᠷᠡ ᠭᠠᠭᠴᠠ ᠪᠡᠶ᠎ᠡ ᠬᠥᠮᠥᠨ ᠨᠢ ᠬᠤᠭᠤᠯᠠ ᠪᠤᠳᠠᠭ᠎ᠠ ᠶᠢ ᠰᠠᠶᠢᠬᠠᠨ ᠬᠢᠳᠡᠭ ᠴᠦ ᠪᠠᠭ᠎ᠠ ᠯᠠ ᠡᠪ ᠦᠭᠡᠢ ᠪᠣᠯᠣᠭᠰᠠᠭᠠᠷ ᠮᠠᠨᠠᠷᠠᠴᠢᠬᠠᠳᠠᠭ ᠬᠡᠮ ᠲᠠᠢ᠃ ᠵᠥᠪ ᠵᠦᠭᠡᠷ ᠬᠡᠯᠡᠯᠴᠡᠵᠦ ᠪᠠᠶᠢᠭᠰᠠᠭᠠᠷ ᠶᠠᠭᠤ ᠨᠢ ᠪᠣᠯᠵᠤ ᠶᠠᠳᠠᠳᠠᠭ ᠢ ᠮᠡᠳᠡᠬᠦ ᠦᠭᠡᠢ᠂ ᠤᠬᠠᠭ᠎ᠠ ᠠᠯᠳᠠᠵᠤ ᠮᠠᠨᠠᠷᠠᠴᠢᠬᠠᠭᠠᠳ ᠮᠠᠨᠤᠰ ᠢ ᠪᠠᠶᠢᠨ ᠪᠠᠶᠢᠨ ᠠᠶᠤᠯᠭᠠᠳᠠᠭ᠃ ᠲᠡᠷᠡ ᠬᠠᠪᠤᠷ ᠰᠤᠷᠭᠠᠭᠤᠯᠢ ᠴᠤᠭᠯᠠᠷᠠᠭᠰᠠᠨ ᠦᠭᠡᠢ ᠪᠣᠯᠬᠤᠷ ᠬᠤᠶᠠᠳᠤᠭᠠᠷ ᠠᠬ᠎ᠠ ᠪᠢᠳᠡ ᠬᠤᠶᠠᠭᠤᠯᠠ ᠨᠢᠯᠬ᠎ᠠ ᠰᠠᠬ᠎ᠠ ᠬᠠᠷᠢᠭᠤᠯᠳᠠᠭ ᠪᠣᠯᠣᠯ᠎ᠠ᠃ ᠨᠢᠭᠡ ᠡᠳᠦᠷ ᠪᠢᠳᠡ ᠬᠤᠶᠠᠷ ᠰᠣᠨᠢᠭᠤᠴᠢ ᠬᠥᠳᠡᠯᠵᠦ᠂ ᠪᠠᠶᠠᠨᠬᠤᠰᠢᠭᠤ ᠣᠪᠣᠭᠠᠨ ᠳᠤ ᠭᠠᠷᠤᠭᠰᠠᠨ ᠶᠤᠮ᠃ ᠳᠡᠭᠡᠷ᠎ᠡ ᠎ ᠨᠢ ᠠᠷᠤᠭ ᠬᠥᠮᠥᠷᠢᠭᠰᠡᠨ ᠰᠢᠭ ᠵᠢᠵᠢᠭᠬᠡᠨ ᠴᠢᠯᠠᠭᠤᠨ ᠣᠪᠣᠭ᠎ᠠ ᠨᠡᠯᠢᠶᠡᠳ ᠬᠡᠲᠦ ᠪᠠᠶᠢᠵᠤ᠂ ᠭᠤᠣᠯ ᠤᠨ ᠲᠣᠮᠣ ᠣᠪᠣᠭ᠎ᠠ ᠶᠢ ᠨᠢ ᠮᠠᠯᠲᠠᠭᠠᠳ ᠬᠤᠩᠬᠤᠶᠢᠯᠭᠠᠴᠢᠬᠠᠭᠰᠠᠨ ᠪᠠᠶᠢᠯ᠎ᠠ᠃ ᠬᠠᠵᠠᠭᠤᠳᠠ ᠨᠢ ᠭᠤᠣᠯ ᠳᠠᠭᠠᠨ ᠨᠦᠬᠡ ᠲᠠᠢ᠂ ᠫᠢᠯᠠ ᠠᠳᠠᠯᠢ ᠲᠥᠭᠦᠷᠢᠭ ᠬᠠᠪᠲᠠᠭᠠᠢ ᠬᠥᠬᠡ ᠴᠢᠯᠠᠭᠤ ᠪᠠᠶᠢᠪᠠ᠃ ᠬᠤᠶᠠᠳᠤᠭᠠᠷ ᠠᠬ᠎ᠠ ᠪᠢᠳᠡ ᠬᠤᠶᠠᠷ ᠤᠤᠯ ᠨᠢ ᠡᠶᠢᠮᠦ ᠶᠠᠭᠤᠮ᠎ᠠ ᠶᠢ ᠶᠡᠷᠦ ᠦᠵᠡᠵᠦ ᠪᠠᠶᠢᠭᠰᠠᠨ ᠦᠭᠡᠢ ᠪᠣᠯᠬᠤᠷ ᠶᠡᠭᠡ ᠯᠠ ᠰᠣᠨᠢᠷᠬᠠᠵᠤ᠂ ᠠᠭᠤᠯᠠ ᠤᠷᠤᠭᠤ ᠪᠥᠮᠪᠥᠷᠢᠭᠦᠯᠦᠨ ᠨᠠᠭᠠᠳᠴᠤ ᠪᠠᠶᠢᠭᠰᠠᠭᠠᠷ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠳᠠᠭᠠᠨ ᠬᠠᠶᠠᠴᠢᠬᠠᠭᠠᠳ ᠶᠠᠪᠤᠭᠰᠠᠨ ᠶᠤᠮ᠃       ᠨᠢᠭᠡ ᠮᠡᠳᠡᠬᠦ ᠳᠤ ᠯᠠ ᠬᠠᠪᠤᠷ ᠵᠣᠨ ᠥᠩᠭᠡᠷᠡᠵᠦ᠂ ᠨᠠᠮᠤᠷ ᠤᠨ ᠠᠭᠤᠷ ᠣᠷᠣᠭᠠᠳ ᠨᠣᠭᠤᠭᠠᠨ ᠡᠷᠢᠶᠡᠨ ᠭᠤᠯᠢᠶ᠎ᠠ ᠲᠠᠷᠭᠤᠨ ᠭᠡᠳᠡᠰᠦ ᠪᠠᠨ ᠴᠣᠷᠳᠣᠶᠢᠯᠭᠠᠨ᠂ ᠰᠢᠷᠠᠯᠵᠢᠨ ᠨᠠᠮᠠᠭᠠᠨ ᠳᠡᠭᠡᠷ᠎ᠡ ᠠᠶᠢᠵᠠᠮ ᠲᠠᠢ ᠵᠢᠷᠭᠢᠵᠦ ᠪᠠᠶᠢᠯ᠎ᠠ᠃ ᠨᠢᠭᠡ ᠡᠳᠦᠷ ᠠᠶ᠋ᠢ ᠳᠡᠭᠦᠦ ᠪᠢᠳᠡ ᠬᠤᠶᠠᠷ ᠢ ᠲᠡᠭᠡᠭᠡᠵᠦ᠂ ᠣᠪᠣᠭᠠᠨ ᠠᠷᠤ ᠶᠢᠨ ᠪᠠᠶᠢᠰᠢᠩ ᠠᠴᠠ ᠪᠠᠨ ᠪᠠᠭ᠎ᠠ ᠰᠠᠭ᠎ᠠ ᠶᠠᠭᠤᠮ᠎ᠠ ᠠᠪᠬᠤ ᠪᠠᠷ ᠦᠬᠡᠷ ᠲᠡᠷᠭᠡ ᠪᠠᠷ ᠶᠠᠪᠤᠪᠠ᠃ ᠥᠨᠥᠬᠢ ᠡᠪᠦᠭᠡᠨ ᠮᠠᠮᠠ ᠭᠡᠳᠡᠭ ᠡᠪᠦᠭᠡᠨ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠭᠡᠷ ᠤᠨ ᠵᠡᠭᠦᠨᠲᠡᠢ᠂ ᠨᠢᠭᠡ ᠵᠠᠩ ᠰᠢᠪᠠᠷ ᠭᠡᠷ ᠪᠠᠷᠢᠴᠢᠬᠠᠭᠠᠳ᠂ ᠭᠡᠷ ᠤᠨ ᠢᠶᠠᠨ ᠬᠠᠵᠠᠭᠤ ᠪᠠᠷ ᠳᠥᠷᠪᠡᠯᠵᠢᠨ ᠭᠤᠣ ᠮᠠᠯᠲᠠᠵᠤ᠂ ᠳᠣᠲᠣᠷ᠎ᠠ ᠨᠢ ᠤᠯᠠᠨ ᠲᠠᠨᠢᠬᠤ ᠦᠭᠡᠢ ᠨᠣᠭᠤᠭ᠎ᠠ ᠲᠠᠷᠢᠴᠢᠬᠠᠭᠰᠠᠨ ᠪᠠᠶᠢᠯ᠎ᠠ᠃ ᠡᠨᠡ ᠨᠢ ᠢᠯᠢᠮ ᠵᠢᠯᠢᠮᠬᠡᠨ ᠪᠠᠶᠢᠳᠠᠭ ᠮᠠᠨ ᠤ ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶᠡᠨ ᠳᠤ ᠨᠢᠭᠡᠨ ᠰᠢᠨ᠎ᠡ ᠰᠣᠨᠢᠨ ᠵᠦᠢᠯ ᠪᠤᠯᠤᠬᠰᠠᠨ ᠪᠠᠶᠢᠯ᠎ᠠ ᠃ ᠡᠪᠦᠭᠡᠨ ᠮᠠᠮᠠ ᠮᠠᠨ ᠤ ᠠᠶ᠋ᠢ ᠶᠢᠨ ᠥᠭᠭᠦᠭᠰᠡᠨ ᠬᠡᠳᠦᠨ ᠬᠡᠰᠡᠭ ᠬᠤᠷᠤᠳ ᠢ ᠠᠪᠳᠠᠷ᠎ᠠ ᠳᠡᠭᠡᠷ᠎ᠡ ᠪᠠᠨ ᠲᠠᠯᠪᠢᠴᠢᠬᠠᠭᠠᠳ ᠬᠦᠷᠵᠡ ᠪᠠᠨ ᠠᠪᠴᠤ᠂ ᠡᠨᠡ ᠨᠢ ᠤᠯᠠᠭᠠᠨ ᠯᠤᠤᠪᠠᠩ᠂ ᠲᠡᠷᠡ ᠨᠢ ᠤᠰᠤᠨ ᠯᠤᠤᠪᠠᠩ ᠭᠡᠳ ᠨᠢᠭᠡ ᠤᠯᠠᠨ ᠯᠤᠤᠪᠠᠩ ᠤᠨ ᠨᠡᠷ᠎ᠡ ᠬᠡᠯᠡᠵᠦ᠂ ᠨᠣᠭᠤᠭ᠎ᠠ ᠪᠠᠨ ᠶᠠᠭᠤ ᠶᠠᠭᠤᠨ ᠳᠤ ᠰᠠᠶᠢᠨ ᠭᠡᠵᠦ ᠳᠡᠭᠡᠷ᠎ᠡ ᠳᠡᠭᠡᠷ᠎ᠡ ᠨᠢ ᠮᠠᠭᠲᠠᠵᠤ ᠪᠠᠷᠬᠢᠷᠠᠭᠰᠠᠭᠠᠷ ᠨᠡᠯᠢᠶᠡᠳ ᠤᠯᠠᠨ ᠨᠣᠭᠤᠭ᠎ᠠ ᠤᠯᠠᠯᠠᠵᠤ ᠥᠭᠪᠡ᠃ ᠠᠶ᠋ᠢ ᠶᠢᠨ ᠬᠠᠴᠠᠷ ᠶᠠᠭᠠᠷᠠᠨ ᠤᠯᠠᠶᠢᠵᠤ᠂ ᠲᠠᠭᠤ ᠦᠭᠡᠢ ᠢᠨᠢᠶᠡᠮᠰᠦᠭᠯᠡᠵᠦ ᠵᠣᠭᠰᠣᠬᠤ ᠨᠢ ᠪᠠᠶᠠᠷᠯᠠᠵᠤ ᠪᠠᠶᠢᠭ᠎ᠠ ᠶᠢᠨ ᠰᠢᠨᠵᠢ ᠮᠡᠳᠡᠭᠳᠡᠵᠦ ᠪᠠᠶᠢᠯ᠎ᠠ᠃ ᠳᠡᠭᠦᠦ ᠪᠢᠳᠡ ᠬᠤᠶᠠᠭᠤᠯᠠ ᠰᠠᠶ᠋ᠢᠬᠠᠨ ᠰᠢᠷᠤᠶᠢᠨ ᠠᠴᠠ ᠭᠠᠷᠤᠭᠰᠠᠨ ᠤᠯᠠᠭᠠᠨ ᠯᠤᠤᠪᠠᠩ ᠠᠴᠠ ᠨᠢᠭᠡ ᠨᠢᠭᠡ ᠶᠢ ᠰᠢᠭᠦᠷᠦᠨ ᠠᠪᠴᠤ᠂ ᠰᠢᠷᠣᠢ ᠶᠢ ᠨᠢ ᠭᠠᠷ ᠢᠶᠠᠷ  ᠢᠶᠠᠨ ᠬᠡᠲᠦ ᠰᠢᠪᠳᠤᠷᠴᠦ ᠡᠩᠭᠡᠷ ᠲᠡᠭᠡᠨ ᠨᠢᠭᠡ ᠵᠦᠯᠭᠦᠭᠰᠡᠨ ᠢᠶᠠᠨ ᠢᠳᠡᠵᠦ ᠡᠬᠢᠯᠡᠪᠡ᠃ ᠲᠡᠷᠡ ᠯᠤᠤᠪᠠᠩ ᠤᠨ ᠠᠮᠲᠠ ᠭᠡᠵᠦ ᠦᠨᠡᠬᠡᠷ ᠬᠡᠯᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ᠃ ︽ᠺᠧᠷᠳᠠ ᠺᠧᠷᠳᠠ︾ ᠭᠡᠳ ᠶᠠᠭ ᠯᠠ ᠰᠢᠬᠢᠷ ᠭᠡᠵᠦ ᠮᠡᠳᠡ᠃ ᠪᠢᠳᠡ ᠬᠤᠶᠠᠷ ᠠᠷᠤ ᠠᠷᠤ ᠠᠴᠠ ᠨᠢ ᠬᠡᠲᠦ ᠬᠡᠲᠦ ᠶᠢ ᠢᠳᠡᠵᠦ ᠠᠮᠵᠢᠪᠠ᠃ ᠬᠠᠮᠢᠭ᠎ᠠ ᠨᠢ ᠪᠠᠶᠢᠭᠰᠠᠨ ᠢ ᠮᠡᠳᠡᠬᠦ ᠦᠭᠡᠢ᠂ ᠭᠡᠨᠡᠳᠲᠡ ᠨᠢᠭᠡ ᠵᠢᠭᠠᠬᠠᠨ ᠬᠠᠷ᠎ᠠ ᠠᠯᠠᠭ ᠮᠤᠤᠷ ᠭᠠᠷᠴᠤ ᠢᠷᠡᠭᠡᠳ ︽ᠮᠠᠢ︾ ᠭᠡᠳ ᠰᠡᠬᠦᠯ ᠢᠶᠠᠨ ᠠᠰ ᠳᠡᠭᠡᠭᠰᠢ ᠪᠠᠨ ᠭᠤᠵᠣᠶᠢᠯᠭᠠᠵᠤ᠂ ᠨᠢᠳᠦ ᠪᠠᠨ ᠪᠦᠯᠳᠦᠶᠢᠨ ᠳᠤᠤᠭᠠᠷᠬᠤ ᠎ ᠳᠤᠨᠢ ᠳᠡᠭᠦᠦ ᠮᠠᠨ ᠤ ᠬᠤᠶᠠᠭᠤᠯᠠ ᠵᠡᠷᠭᠡᠪᠡᠷ ᠤᠷᠤᠭᠰᠢ ᠳᠡᠪᠰᠢᠵᠦ᠂ ᠪᠠᠷᠢᠭᠠᠳ ᠠᠪᠤᠶ᠎ᠠ ᠭᠡᠰᠡᠨ ᠴᠢᠨᠢ ᠪᠠᠷᠢᠭᠳᠠᠬᠤ ᠶᠠᠭᠤᠮ᠎ᠠ ᠪᠢᠰᠢ᠂ ᠬᠢᠯᠠᠰ ᠭᠡᠳ ᠠᠯᠠᠭ᠎ᠠ ᠪᠤᠯᠴᠢᠬᠠᠪᠠ᠃ ︽ᠪᠠᠶᠢᠭ ᠠ᠋︕ ᠮᠢᠨᠤ ᠮᠤᠤᠷ ᠢ᠂ ᠮᠠᠭᠠᠵᠢᠨ᠎ᠠ ᠰᠢᠤ︾ ᠭᠡᠵᠦ ᠡᠪᠦᠭᠡᠨ ᠮᠠᠮᠠ ᠬᠦᠷᠵᠡ ᠪᠠᠨ ᠲᠤᠯᠤᠭᠰᠠᠭᠠᠷ ᠬᠡᠯᠡᠨ᠎ᠡ᠃ ᠪᠢ ᠲᠡᠷᠡ ᠮᠤᠤᠷ ᠢ ᠦᠵᠡᠭᠡᠳ ᠳᠤᠷᠠᠯᠠᠭᠰᠠᠨ ᠭᠡᠳᠡᠭ ᠪᠣᠯ ᠪᠡᠷᠬᠡ᠃ ᠤᠤᠯ ᠨᠢ ᠤᠯᠠᠭᠠᠨ ᠬᠠᠭᠠᠯᠭ᠎ᠠ ᠰᠦᠮ᠎ᠡ ᠳᠤ ᠠᠶ᠋ᠢ ᠲᠠᠢ ᠪᠠᠨ ᠬᠦᠷᠴᠦ ᠪᠠᠶᠢᠬᠤ ᠳᠠᠭᠠᠨ ᠯᠠᠮᠠ ᠨᠠᠷ ᠤᠨ ᠮᠤᠤᠷ ᠢ ᠬᠤᠯᠠ ᠠᠴᠠ ᠪᠠᠷ᠎ᠠ ᠶᠢ ᠨᠢ ᠬᠠᠷᠠᠵᠤ ᠪᠠᠶᠢᠭᠰᠠᠨ ᠠᠴᠠ ᠪᠢᠰᠢ ᠡᠳᠦᠢ ᠣᠶᠢᠷᠠᠬᠠᠨ ᠠᠴᠠ ᠶᠡᠷᠦ ᠦᠵᠡᠵᠦ ᠥᠩᠭᠡᠷᠡᠭᠡ ᠦᠭᠡᠢ ᠶᠤᠮ᠃       ᠪᠢᠳᠡ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠳᠤ ᠪᠠᠭᠤᠵᠤ ᠴᠠᠢ ᠤᠤᠭᠤᠭᠠᠳ ᠰᠡᠷᠢᠭᠦᠦ ᠣᠷᠣᠭᠤᠯᠤᠭᠠᠳ ᠭᠡᠷ ᠵᠦᠭ ᠢᠶᠠᠨ ᠪᠤᠴᠠᠬᠤ ᠪᠠᠷ ᠪᠣᠯᠪᠠ᠃ ︽ᠤᠩᠭᠤ ᠡᠵᠢ︾ ᠮᠥᠨ ᠯᠠ ᠠᠶ᠋ᠢ ᠶᠢᠨ ᠴᠢᠬᠢᠨ ᠳᠤ ᠣᠶᠢᠷᠠᠲᠤᠵᠤ ︽ᠯᠤᠤ ᠲᠠᠢ ᠠᠶᠠᠭᠠᠨ ᠳᠤ ᠪᠠᠰᠠ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠨ᠎ᠡ ᠰᠢᠤ︾ ᠭᠡᠲᠡᠯ᠎ᠡ ︽ᠣᠲᠣ ᠡᠷᠲᠡᠨ ᠤ ᠵᠢᠷᠤᠭ ᠬᠤᠸᠠᠷ ᠲᠠᠢ ᠠᠪᠳᠠᠷ᠎ᠠ ᠲᠠᠯᠪᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠨ᠎ᠡ᠃ ᠵᠠᠪᠠᠯ ᠪᠦᠷ ᠢ ᠤᠯᠠᠭᠠᠨ ᠢᠶᠠᠷ ᠪᠣᠳᠣᠬᠤ ᠭᠡᠷᠡᠭᠳᠠᠢ ᠭᠡᠨ᠎ᠡ ᠃︾᠂ ︽ᠤᠳᠠᠬᠤ ᠦᠭᠡᠢ ᠪᠡᠭᠡᠵᠢᠩ ᠠᠴᠠ ᠮᠠᠤ ᠵᠦᠰᠢ ᠶᠢᠨ ᠲᠣᠮᠢᠯᠠᠭᠰᠠᠨ ᠤᠯᠠᠨ ᠰᠡᠬᠡᠭᠡᠲᠡᠨ ᠢᠷᠡᠨ᠎ᠡ ᠭᠡᠨ᠎ᠡ ᠰᠢᠤ︾ ᠭᠡᠵᠦ ᠤᠬᠠᠭᠠᠨ ᠬᠥᠯ ᠢ ᠨᠢ ᠣᠯᠬᠤ ᠦᠭᠡᠢ᠂ ᠤᠯᠠᠨ ᠶᠠᠭᠤᠮ᠎ᠠ ᠶᠠᠷᠢᠵᠤ ᠪᠠᠶᠢᠪᠠ᠃ ︽ᠦᠬᠡᠷ ᠤᠨ ᠠᠪᠤ︾ ᠰᠤᠨᠤᠰᠤᠬᠰᠠᠨ ᠴᠦ ᠦᠭᠡᠢ ᠶᠤᠮ ᠰᠢᠭ ᠦᠯᠶᠢᠵᠦ ᠰᠠᠭᠤᠭᠠᠳ᠂ ᠭᠠᠩᠰᠠ ᠪᠠᠨ ᠲᠠᠲᠠᠵᠤ ᠪᠠᠶᠢᠪᠠ᠃       ᠲᠡᠷᠡ ᠤᠳᠠᠭ᠎ᠠ ᠠᠴᠠ ᠬᠤᠶᠢᠰᠢ ᠪᠢ ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶ᠎ᠡ ᠶᠢ ᠪᠣᠳᠣᠬᠤ ᠲᠠᠢ ᠵᠡᠷᠭᠡ ᠡᠪᠦᠭᠡᠨ ᠮᠠᠮᠠ ᠶᠢᠨ ᠤᠯᠠᠭᠠᠨ ᠯᠤᠤᠪᠠᠩ ᠤᠨ ᠰᠢᠬᠢᠷᠯᠢᠭ ᠠᠮᠲᠠ ᠠᠮᠲᠠᠭᠳᠠᠬᠤ ᠰᠢᠭ᠋ ᠪᠣᠯᠵᠤ᠂ ᠠᠷᠠᠭᠠᠨ ᠰᠢᠯᠦᠰᠦ ᠠᠶᠠᠨᠳᠠᠭᠠᠨ ᠬᠤᠷᠠᠳᠠᠭ ᠪᠣᠯᠵᠤ ᠪᠢᠯᠡ᠃       ᠦᠨᠡᠬᠡᠷ ︽ᠤᠩᠭᠤ ᠡᠵᠢ︾ ᠎ ᠶᠢᠨ ᠬᠡᠯᠡᠭᠰᠡᠨ ᠦᠭᠡ ᠣᠷᠣ ᠲᠠᠢ ᠪᠠᠶᠢᠵᠠᠢ᠃ ᠨᠢᠭᠡ ᠡᠳᠦᠷ ᠳᠥᠷᠪᠡ ᠬᠥᠯᠥᠭᠰᠡᠨ ᠬᠤᠶᠠᠷ ᠮᠣᠷᠢᠨ ᠳᠡᠭᠡᠷ᠎ᠡ ᠠᠷᠵᠠᠶᠢᠲᠠᠯ᠎ᠠ ᠬᠥᠮᠥᠨ ᠰᠠᠭᠤᠵᠤ᠂ ᠤᠯᠠᠭᠠᠨ ᠲᠤᠭ ᠨᠠᠮᠢᠷᠠᠭᠤᠯᠤᠨ᠂ ᠤᠷᠳᠦ ᠬᠤᠯᠤᠰᠤᠨ ᠲᠠᠰᠢᠭᠤᠷ ᠢᠶᠠᠨ ︽ᠲᠡᠱ ᠨᠢᠱ︾ ᠳᠤᠤᠭᠠᠷᠭᠠᠵᠤ ︽ᠢᠦᠢ ᠢᠦᠢ᠂ ᠸᠧ ᠸᠧ︾ ᠭᠡᠭᠰᠡᠭᠡᠷ ᠮᠠᠨ ᠤ ᠭᠠᠳᠠᠨ᠎ᠠ ᠬᠦᠷᠴᠦ ᠢᠷᠠᠯ᠎ᠠ᠃ ᠲᠡᠷᠭᠡᠨ ᠤ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠮᠠᠨ ᠤ ᠪᠠᠶᠠᠨᠴᠠᠭᠠᠨ ᠤ ᠤᠯᠠᠨ ᠵᠠᠯᠠᠭᠤᠴᠤᠳ ᠮᠣᠷᠢᠨ ᠤ ᠪᠠᠨ ᠠᠮᠠ ᠶᠢ ᠠᠩᠭᠠᠯᠵᠠᠭᠤᠯᠤᠨ ᠲᠠᠲᠠᠵᠤ ︽ᠪᠡᠭᠡᠵᠢᠩ ᠰᠡᠬᠡᠭᠡᠲᠡᠨ ᠢᠶᠠᠨ ᠪᠠᠶᠠᠷᠯᠠᠨ ᠤᠭᠲᠤᠶ᠎ᠠ︕︾ ᠭᠡᠵᠦ ᠬᠠᠰᠬᠢᠷᠴᠤ ᠪᠠᠶᠢᠯ᠎ᠠ᠃ ᠠᠶ᠋ᠢ ᠮᠠᠨ ᠤ ᠬᠡᠳᠦᠭᠦᠯᠡ ᠠᠷᠤ ᠠᠷᠤ ᠠᠴᠠ ᠪᠠᠨ ᠭᠦᠶᠦᠯᠳᠦᠨ ᠭᠠᠷᠤᠯ᠎ᠠ᠃ ᠰᠣᠨᠢᠬᠠᠨ ᠬᠤᠪᠴᠠᠰᠤ ᠲᠠᠢ ᠦᠯᠦ ᠲᠠᠨᠢᠬᠤ ᠡᠷᠡᠭᠲᠡᠢ ᠡᠮᠡᠭᠲᠡᠶᠢᠴᠦᠳ ᠲᠡᠷᠭᠡ ᠵᠣᠭᠰᠣᠮᠠᠭᠴᠠ ᠵᠦᠭ ᠵᠦᠭ ᠲᠡᠭᠡᠨ ᠦᠰᠦᠷᠴᠦ ᠪᠠᠭᠤᠭᠠᠳ ︽᠎ ᠨᠢ ᠬᠤᠤ︖︾ ᠭᠡᠵᠦ ᠠᠶ᠋ᠢ ᠲᠠᠢ ᠭᠠᠷ ᠠᠳᠬᠤᠯᠴᠠᠨ᠎ᠠ᠃ ᠨᠢᠭᠡ ᠡᠮᠡᠭᠲᠡᠢ ᠰᠡᠬᠡᠭᠡᠲᠡᠨ ᠮᠢᠨᠤ ᠲᠣᠯᠣᠭᠠᠢ ᠶᠢ ᠦᠭᠦᠭᠡᠷᠳᠤᠨ ᠢᠯᠪᠢᠭᠰᠡᠨ ᠢᠶᠠᠨ ᠬᠢᠮᠤᠰᠤᠨ ᠲᠣᠯᠢᠨ ᠴᠢᠨᠡᠭᠡ ᠵᠢᠵᠢᠭᠬᠡᠨ᠂ ᠮᠥᠩᠭᠦ‍ ᠰᠢᠭ ᠭᠢᠯᠲᠤᠭᠠᠨᠠᠭᠰᠠᠨ ᠥᠩᠭᠡᠲᠡᠢ ᠮᠠᠤ ᠵᠦᠰᠢ ᠶᠢᠨ ᠵᠡᠭᠦᠮᠡᠯ ᠭᠦᠷᠦᠭ ᠢ ᠮᠢᠨᠤ ᠬᠠᠨᠲᠠᠭᠠᠰᠤᠨ ᠤ ᠡᠩᠭᠡᠷ ᠲᠤ ᠵᠡᠭᠦᠯᠭᠡᠵᠦ ᠥᠭᠪᠡ᠃ ᠪᠢ ᠥᠩᠭᠡᠷᠡᠭᠰᠡᠨ ᠳᠤ ᠬᠥᠮᠥᠨ ᠠᠴᠠ ᠪᠡᠯᠡᠭ ᠲᠣᠰᠴᠤ ᠪᠠᠶᠢᠭᠰᠠᠨ ᠦᠭᠡᠢ ᠮᠥᠷᠲᠡᠭᠡᠨ ᠮᠠᠤ ᠵᠦᠰᠢ ᠶᠢᠨ ᠭᠦᠷᠦᠭ ᠢ ᠠᠩᠬ᠎ᠠ ᠤᠳᠠᠭ᠎ᠠ ᠡᠩᠭᠡᠷ ᠲᠡᠭᠡᠨ ᠵᠡᠭᠦᠵᠦ ᠪᠠᠶᠢᠭ᠎ᠠ ᠪᠣᠯᠬᠤᠷ ᠪᠠᠶᠠᠷᠯᠠᠭᠰᠠᠨ ᠭᠡᠳᠡᠭ ᠬᠡᠷᠡᠭ᠃ ᠨᠠᠳᠠᠳᠤ ᠮᠠᠰᠢ ᠵᠣᠯ ᠵᠢᠷᠭᠠᠯ ᠲᠠᠢ ᠰᠠᠨᠠᠭᠳᠠᠵᠤ ᠪᠠᠶᠢᠯ᠎ᠠ᠃ ᠲᠡᠷᠡ ᠡᠮᠡᠭᠲᠡᠢ ᠰᠡᠬᠡᠭᠡᠲᠡᠨ ᠮᠢᠨᠤ ᠡᠮᠦᠨ᠎ᠡ ᠶᠠᠪᠠᠭᠠᠨ ᠰᠠᠭᠤᠵᠤ᠂ ᠴᠡᠭᠡᠵᠢᠨ ᠵᠦᠭ ᠢᠶᠠᠨ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠪᠠᠨ ᠮᠤᠷᠤᠶᠢᠯᠭᠠᠨ ᠵᠢᠭᠠᠵᠤ ︽ᠵᠧ ᠵᠧ︾ ᠭᠡᠵᠦ ᠳᠠᠭᠤᠳᠠ ᠭᠡᠰᠡᠨ ᠤᠬᠠᠭᠠᠨ ᠲᠠᠢ ᠦᠭᠡ ᠬᠡᠯᠡᠵᠦ ᠪᠠᠶᠢᠬᠤ ᠶᠢ ᠨᠢ ᠪᠢ ᠣᠶᠢᠯᠠᠭᠠᠵᠤ᠂ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠪᠠ᠃ ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠪᠢ ᠲᠡᠭᠦᠨ ᠢ ︽ᠵᠧ ᠵᠧ︾ ᠭᠡᠵᠦ ᠳᠠᠭᠤᠳᠠᠳᠠᠭ ᠪᠤᠯᠤᠬᠰᠠᠨ ᠶᠤᠮ᠃ ᠰᠡᠭᠦᠯᠡᠷ ᠨᠢ ︽ᠵᠧ ᠵᠧ︾ ᠨᠠᠳᠠᠳᠤ ︽ᠮᠠᠤ ᠵᠦᠰᠢ ᠲᠦᠮᠡᠨ ᠨᠠᠰᠤᠯᠠᠲᠤᠭᠠᠢ︕︾ ᠭᠡᠰᠡᠨ ᠬᠢᠲᠠᠳ ᠦᠰᠦᠭ ᠢ ᠶᠠᠭᠠᠬᠢᠵᠤ ᠪᠢᠴᠢᠬᠦ ᠶᠢ ᠵᠢᠭᠠᠵᠤ ᠥᠭᠪᠡ᠃       ᠲᠡᠷᠡ ᠡᠪᠦᠯ ᠨᠢ ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶᠡᠨ ᠳᠤ ᠤᠯᠠᠨ ᠠᠶᠢᠯ ᠡᠷᠦᠭᠡ ᠪᠠᠭᠤᠵᠤ ︽ᠳᠠᠶᠢᠨ ᠤ ᠪᠡᠯᠡᠳᠬᠡᠯ ᠬᠢᠨ᠎ᠡ︾ ᠭᠡᠳ ᠨᠦᠬᠡᠨ ᠵᠠᠮ ᠮᠠᠯᠲᠠᠵᠤ ᠡᠬᠢᠯᠡᠪᠡ᠃ ᠨᠡᠯᠢᠶᠡᠳ ᠬᠡᠳᠦᠨ ᠠᠶᠢᠯ ᠳᠠᠪᠠᠭᠠᠨ ᠡᠩᠭᠡᠷ ᠠᠴᠠ ᠢᠷᠡᠭᠰᠡᠨ ᠬᠢᠲᠠᠳ ᠳᠠᠪᠤᠰᠤᠨ ᠠᠶᠠᠨᠴᠢᠳ ᠲᠠᠢ ᠬᠡᠯᠡᠯᠴᠡᠵᠦ ᠪᠠᠶᠢᠭᠠᠳ ᠬᠤᠶᠠᠷ ᠬᠤᠶᠠᠷ ᠵᠠᠩ ᠪᠠᠶᠢᠰᠢᠩ ᠪᠠᠷᠢᠭᠤᠯᠵᠤ ᠠᠪᠤᠭᠰᠠᠨ ᠢᠶᠠᠷ ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶ᠎ᠡ ᠨᠢᠭᠡ ᠯᠠ ᠳᠣᠣᠷ᠎ᠠ ᠬᠥᠮᠥᠨ ᠠᠮᠠ ᠣᠯᠠᠰᠢᠷᠠᠵᠤ᠂ ᠠᠶᠢᠯ ᠡᠷᠦᠭᠡ ᠨᠡᠮᠡᠭᠳᠡᠭᠡᠳ᠂ ᠵᠢᠵᠢᠭ ᠲᠣᠰᠬᠤᠨ ᠰᠢᠭ᠋ ᠬᠥᠷ ᠬᠥᠭᠵᠢᠶᠡᠨ ᠲᠠᠢ ᠪᠣᠯᠴᠢᠬᠠᠯ᠎ᠠ᠃ ᠰᠠᠶᠢᠨ ᠡᠭᠦᠯᠳᠡᠷ ᠤᠨ ᠬᠤᠴᠠ ᠬᠠᠷᠢᠭᠤᠯᠳᠠᠭ ᠰᠡᠷᠡᠩ ᠠᠮ᠎ᠠ᠂ ᠮᠤᠵᠢᠶᠠᠩ ᠬᠢᠳᠡᠭ ᠷᠠᠰᠢ ᠠᠪᠤ ᠶᠢᠨ ᠬᠢ᠂ ᠪᠠᠰᠠ ᠨᠡᠯᠢᠶᠡᠳ ᠬᠡᠳᠦᠨ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠰᠡᠬᠡᠭᠡᠲᠡᠨ ᠢᠷᠠᠵᠠᠢ᠃ ᠮᠢᠨᠤ ︽ᠵᠧ ᠵᠧ︾ ᠶᠠᠭᠠᠬᠢᠭᠠᠳ ᠢᠷᠡᠭᠰᠡᠨ ᠦᠭᠡᠢ ᠪᠠᠶᠢᠬᠤ ᠶᠢ ᠮᠡᠳᠡᠬᠦ ᠦᠭᠡᠢ᠃       ᠮᠠᠨ ᠤ ᠪᠠᠶᠠᠨᠴᠠᠭᠠᠨ ᠤ ᠣᠯᠠᠩᠬᠢ ᠬᠥᠮᠥᠰ ᠨᠢ ᠡᠲᠡᠭᠡᠷ ᠰᠡᠬᠡᠭᠡᠲᠡᠨ ᠤ ᠬᠡᠯᠡᠵᠦ ᠶᠠᠷᠢᠬᠤ ᠶᠢ ᠣᠶᠢᠯᠠᠭᠠᠬᠤ ᠦᠭᠡᠢ᠂ ᠵᠢᠭᠠᠵᠤ ᠳᠣᠬᠢᠭᠠᠳ ᠡᠪᠯᠡᠭᠦᠯᠵᠦ ᠪᠠᠶᠢᠬᠤ ᠳᠤ ᠡᠪᠦᠭᠡᠨ ᠮᠠᠮᠠ᠂ ︽ᠦᠬᠡᠷ ᠤᠨ ᠠᠪᠤ︾ ᠬᠤᠶᠠᠷ ᠬᠠᠷᠢᠨ ᠲᠡᠳᠡᠨ ᠲᠠᠢ ᠬᠢᠲᠠᠳ ᠢᠶᠠᠷ ᠲᠣᠷᠤᠭ᠎ᠠ ᠦᠭᠡᠢ ᠰᠠᠶᠢᠬᠠᠨ ᠶᠠᠷᠢᠳᠠᠭ ᠪᠠᠶᠢᠯ᠎ᠠ᠃ ᠮᠠᠨᠠᠶᠢᠬᠢᠨ ᠲᠠᠲᠠ ᠬᠤᠶᠠᠷ ᠤᠨ ᠬᠢᠲᠠᠳ ᠦᠭᠡ ᠶᠢ ᠲᠡᠶᠢᠮᠦ ᠰᠠᠶᠢᠬᠠᠨ ᠤᠷᠤᠰᠤᠮ᠎ᠠ ᠶᠠᠷᠢᠬᠤ ᠶᠢ ᠨᠢ ᠰᠣᠨᠣᠰᠤᠭᠠᠳ ᠭᠠᠶᠢᠬᠠᠨ ᠪᠢᠰᠢᠷᠡᠵᠡᠭᠡᠨ᠎ᠡ᠃ ᠰᠡᠭᠦᠯᠡᠷ ᠨᠢ ᠣᠷᠣᠢ ᠳᠠᠭᠠᠨ ᠤᠯᠠᠨ ᠤ ᠬᠤᠷᠠᠯ ᠰᠤᠷᠤᠯᠴᠠᠯᠭ᠎ᠠ ᠪᠣᠯᠪᠠᠯ ᠴᠥᠮ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠳᠤ ᠴᠤᠭᠯᠠᠷᠠᠳᠠᠭ ᠪᠣᠯᠬᠤᠷ ᠲᠠᠲᠠ ᠬᠤᠶᠠᠷ ᠨᠡᠷ᠎ᠡ ᠦᠭᠡᠢ ᠲᠤᠰᠬᠠᠢ ᠣᠷᠴᠢᠭᠤᠯᠤᠭᠴᠢ ᠪᠣᠯᠵᠤ᠂ ᠡᠶᠢᠮᠦ ᠲᠡᠶᠢᠮᠦ ᠭᠡᠵᠦ ᠲᠠᠶᠢᠯᠪᠤᠷᠢᠯᠠᠵᠤ ᠥᠭᠭᠦᠨ᠎ᠡ᠃ ︽ᠤᠩᠭᠤ ᠡᠵᠢ︾ ᠬᠤᠷᠤᠳ ᠲᠠᠢ ᠴᠠᠢ ᠪᠠᠷ ᠢᠶᠠᠨ ᠤᠯᠠᠨ ᠢ ᠳᠠᠶᠢᠯᠠᠵᠤ᠂ ᠬᠥᠯᠥᠰᠦ ᠪᠠᠨ ᠵᠦᠯᠭᠦᠨ ᠭᠠᠯ ᠲᠣᠭᠤᠭᠠᠨ ᠳᠠᠭᠠᠨ ᠶᠠᠭᠠᠷᠠᠨ᠎ᠠ᠃       ᠠᠶᠢᠯ ᠪᠣᠯᠭᠠᠨ ᠤ ᠭᠡᠷ ᠳᠣᠲᠣᠷ᠎ᠠ ᠨᠣᠭᠤᠭᠠᠨ ᠤ ᠵᠣᠭᠤᠷᠢ ᠰᠢᠭ᠋ ᠳᠥᠷᠪᠡᠯᠵᠢᠨ ᠠᠮᠠᠰᠠᠷ ᠲᠠᠢ ᠨᠦᠬᠡ ᠮᠠᠯᠲᠠᠵᠤ᠂ ᠭᠡᠷ ᠪᠣᠯᠭᠠᠨ ᠢ ᠬᠤᠭᠤᠷᠣᠨᠳᠤ ᠨᠢ ᠨᠦᠬᠡᠨ ᠵᠠᠮ ᠢᠶᠠᠷ ᠬᠤᠯᠪᠣᠵᠤ᠂ ᠨᠢᠭᠡ ᠡᠪᠦᠯ ᠭᠠᠷ ᠢᠶᠠᠨ ᠤᠰᠤᠳᠠᠳᠠᠯ᠎ᠠ ᠬᠠᠲᠠᠭᠤᠵᠢᠯᠲᠠᠢ ᠠᠵᠢᠯᠯᠠᠵᠠᠭᠠᠪᠠ᠃ ᠭᠠᠷᠭᠠᠭᠰᠠᠨ ᠰᠢᠷᠣᠢ ᠨᠢ ᠭᠡᠷ ᠤᠨ ᠡᠭᠦᠳᠡᠨ ᠳᠤ ᠠᠭᠤᠯᠠ ᠳᠣᠪᠣᠷᠴᠠᠭ ᠰᠢᠭ᠋ ᠣᠪᠣᠶᠢᠵᠤ᠂ ᠬᠡᠦᠬᠡᠳ ᠮᠠᠨᠤᠰ ᠤᠨ ᠨᠠᠭᠠᠳᠤᠮ ᠤᠨ ᠲᠠᠯᠠᠪᠤᠷ ᠪᠣᠯᠵᠤ ᠪᠠᠶᠢᠯ᠎ᠠ᠃       ᠰᠦᠷ ᠳᠠᠯᠠᠶᠢᠴᠠᠲᠠᠢ ᠡᠬᠢᠯᠡᠭᠰᠡᠨ ᠡᠨᠡᠬᠦ ᠬᠥᠳᠡᠯᠭᠡᠭᠡᠨ ᠬᠠᠪᠤᠷ ᠨᠢ ᠪᠣᠯᠬᠤ ᠳᠤ ᠳᠠᠶᠢᠨ ᠪᠠᠶᠢᠯᠳᠤᠭᠠᠨ ᠵᠣᠭᠰᠣᠭᠰᠠᠨ ᠶᠤᠮ ᠰᠢᠭ᠋ ᠨᠠᠮ ᠵᠢᠮ ᠪᠣᠯᠵᠤ᠂ ᠠᠶᠢᠯ ᠪᠣᠯᠭᠠᠨ ᠵᠦᠭ ᠵᠦᠭ ᠲᠡᠭᠡᠨ ᠲᠥᠯ ᠲᠣᠰᠬᠤ ᠪᠠᠷ ᠶᠠᠭᠠᠷᠠᠨ ᠨᠡᠭᠦᠵᠡᠭᠡᠯ᠎ᠡ᠃       ᠭᠤᠷᠪᠠᠨ ᠰᠠᠷ᠎ᠠ ᠶᠢᠨ ᠨᠢᠭᠡᠨ ᠳᠤ ᠰᠤᠷᠭᠠᠭᠤᠯᠢ ᠴᠤᠭᠯᠠᠨ᠎ᠠ ᠭᠡᠰᠡᠨ ᠮᠡᠳᠡᠭᠳᠡᠯ ᠢᠷᠠᠯ᠎ᠠ᠃ ᠠᠪᠤ ᠨᠠᠮᠠᠶᠢ ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠯᠭᠠᠬᠤ ᠪᠠᠷ ᠨᠡᠷ᠎ᠡ ᠮᠡᠳᠡᠭᠦᠯᠪᠡ᠃ ︽ᠮᠠᠤ ᠵᠦᠰᠢ ᠲᠦᠮᠡᠨ ᠨᠠᠰᠤᠯᠠᠲᠤᠭᠠᠢ︕︾ ᠭᠡᠰᠡᠨ ᠦᠭᠡ ᠶᠢ ᠬᠢᠲᠠᠳ ᠢᠶᠠᠷ ᠪᠢᠴᠢᠵᠦ᠂ ᠬᠡᠯᠡᠵᠦ ᠴᠢᠳᠠᠬᠤ ᠪᠤᠯᠤᠬᠰᠠᠨ ᠳᠠᠭᠠᠨ ᠪᠢ ᠳᠤᠩ ᠣᠮᠣᠭᠰᠢᠵᠤ᠂ ᠬᠤᠶᠠᠳᠤᠭᠠᠷ ᠠᠬ᠎ᠠ ᠪᠠᠨ ᠲᠠᠭᠠᠵᠤ ᠰᠤᠷᠭᠠᠭᠤᠯᠢ ᠳᠤ ᠶᠠᠪᠤᠯ᠎ᠠ᠃       ᠭᠦᠩᠱᠧ  ᠶᠢᠨ ᠰᠤᠷᠭᠠᠭᠤᠯᠢ ᠨᠢ ᠲᠡᠷᠡ ᠦᠶ᠎ᠡ ᠳᠤ ᠬᠤᠶᠠᠷ ᠮᠥᠷ ᠰᠢᠪᠠᠷ ᠪᠠᠶᠢᠰᠢᠩ᠂ ᠠᠷᠪᠠᠭᠠᠳ ᠲᠠᠰᠤᠯᠭ᠎ᠠ ᠭᠡᠷ ᠲᠠᠢ᠂ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠤᠶᠠᠷᠬᠠᠨ ᠪᠠᠭᠰᠢ ᠲᠠᠢ᠂ ᠭᠤᠴᠢᠨ ᠬᠡᠳᠦᠨ ᠰᠤᠷᠤᠭᠴᠢ ᠲᠠᠢ ᠪᠠᠶᠢᠯ᠎ᠠ᠃       ᠠᠩᠬ᠎ᠠ ᠬᠢᠴᠢᠶᠡᠯ ᠡᠬᠢᠯᠡᠬᠦ ᠳᠤ ᠳᠤᠮᠳᠠ ᠶᠢᠨ ᠪᠡᠶ᠎ᠡ ᠲᠠᠢ᠂ ᠴᠡᠪᠡᠷ ᠲᠡᠭᠰᠢ ᠬᠤᠪᠴᠠᠰᠤ ᠲᠠᠢ᠂ ᠶᠠᠭ ᠮᠢᠨᠤ ︽ᠵᠧ ᠵᠧ︾ ᠰᠢᠭ ᠲᠠᠭᠠᠷᠢᠮᠠᠯ ᠬᠡᠵᠢᠭᠡ ᠲᠠᠢ ᠨᠢᠭᠡ ᠡᠮᠡᠭᠲᠡᠢ ᠪᠠᠭᠰᠢ ᠣᠷᠣᠵᠤ ᠢᠷᠡᠭᠡᠳ᠂ ᠮᠠᠨ ᠤ ᠰᠤᠷᠤᠭᠴᠢ ᠪᠥᠬᠦᠨ ᠳᠤ ᠨᠢᠭᠡ ᠨᠢᠭᠡ ᠰᠢᠨ᠎ᠡ ᠨᠣᠮ ᠲᠠᠷᠬᠠᠭᠠᠵᠤ ᠥᠭᠪᠡ᠃ ᠬᠠᠪᠲᠠᠰᠤ ᠶᠢ ᠨᠢ ᠰᠡᠬᠦᠬᠦ ᠳᠤ ᠲᠢᠶᠠᠨ ᠠᠨ ᠮᠧᠨ ᠠᠰᠠᠷ ᠠᠴᠠ ᠭᠡᠷᠡᠯ ᠰᠠᠴᠤᠷᠠᠵᠤ ᠪᠠᠶᠢᠭ᠎ᠠ ᠭᠤᠶᠤ ᠰᠠᠶᠢᠬᠠᠨ ᠵᠢᠷᠤᠭ ᠲᠠᠢ ᠪᠠᠶᠢᠵᠤ᠂ ᠲᠣᠰᠣᠨ ᠪᠠᠷ ᠤᠨ ᠦᠨᠦᠷ ᠨᠢ ᠮᠠᠰᠢ ᠰᠤᠳᠤᠬᠠᠨ ᠬᠠᠩᠬᠤᠯᠵᠤ ᠪᠠᠶᠢᠯ᠎ᠠ᠃       ᠪᠠᠭᠰᠢ ᠰᠠᠮᠪᠠᠷ᠎ᠠ ᠳᠡᠭᠡᠷ᠎ᠡ ᠣ ᠶᠢᠨ ᠪᠢᠷ ᠢᠶᠠᠷ ᠲᠣᠳᠣ ᠲᠣᠮᠣᠷᠠᠭᠤᠨ ᠬᠡᠳᠦᠨ ᠦᠰᠦᠭ ᠪᠢᠴᠢᠴᠢᠬᠡᠭᠡᠳ ᠨᠢᠭᠡ ᠨᠠᠷᠢᠬᠠᠨ ᠮᠣᠳᠣ ᠪᠠᠷ ᠲᠡᠭᠦᠨ ᠢᠶᠠᠨ ᠨᠢᠭᠡ ᠨᠢᠭᠡ ᠦᠰᠦᠭ ᠢᠶᠠᠷ ᠵᠢᠭᠠᠵᠤ ︽ᠮᠠᠤ ᠵᠦᠰᠢ ᠲᠦᠮᠡᠨ ᠨᠠᠰᠤᠯᠠᠲᠤᠭᠠᠢ︕ ᠲᠦᠮᠡᠨ ᠨᠠᠰᠤᠯᠠᠲᠤᠭᠠᠢ︕ ᠲᠦᠮᠡᠨ ᠲᠦᠮᠡᠨ ᠨᠠᠰᠤᠯᠠᠲᠤᠭᠠᠢ︕︾ ᠭᠡᠵᠦ ᠮᠠᠨᠤᠰ ᠢ ᠬᠡᠲᠦ ᠤᠳᠠᠭ᠎ᠠ ᠳᠠᠭᠠᠭᠤᠯᠤᠨ ᠤᠩᠰᠢᠯ᠎ᠠ᠃ ᠪᠢ ᠲᠡᠰᠬᠦ ᠠᠯᠳᠠᠷᠠᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠪᠡᠶ᠎ᠡ ᠪᠠᠨ ᠪᠠᠷᠢᠵᠤ ᠳᠡᠶᠢᠯᠬᠦ ᠦᠭᠡᠢ ᠭᠠᠷ ᠢᠶᠠᠨ ᠳᠡᠭᠡᠷ᠎ᠡ ᠡᠷᠭᠦᠵᠦ ︽ᠪᠠᠭᠰᠢ ᠠ᠋᠂ ᠪᠢ ᠬᠢᠲᠠᠳ ᠢᠶᠠᠷ ᠮᠠᠤ ᠵᠦᠰᠢ ᠲᠦᠮᠡᠨ ᠨᠠᠰᠤᠯᠠᠲᠤᠭᠠᠢ︕ ᠭᠡᠵᠦ ᠪᠢᠴᠢᠵᠦ ᠴᠢᠳᠠᠨ᠎ᠠ᠂ ᠪᠠᠰᠠ ᠬᠡᠯᠡᠵᠦ ᠴᠢᠳᠠᠨ᠎ᠠ︾ ᠭᠡᠪᠡ᠃ ᠤᠯᠠᠨ ᠢᠶᠠᠷ ᠢᠶᠠᠨ ᠪᠦᠷ ᠨᠠᠳᠠ ᠵᠦᠭ ᠭᠠᠶᠢᠬᠠᠨ ᠬᠠᠷᠠᠵᠠᠭᠠᠯ᠎ᠠ᠃ ᠪᠠᠭᠰᠢ ︽ᠬᠥᠶ᠋ᠢ᠂ ᠲᠡᠶᠢᠮᠦ ᠦᠦ ᠳ᠋ᠠ᠂ ᠬᠡᠨ ᠴᠢᠮ᠎ᠠ ᠳᠤ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠶᠤᠮ︖︾ ᠭᠡᠪᠡ᠃ ᠪᠢ ︽ᠵᠧ ᠵᠧ ᠨᠠᠳᠠᠳᠤ ᠵᠢᠭᠠᠵᠤ ᠥᠭᠴᠡᠢ︾ ᠭᠡᠪᠡ᠃ ᠪᠠᠭᠰᠢ ︽ᠳᠡᠭᠡᠪᠡᠯ ᠴᠢ ᠬᠢᠲᠠᠳ ᠢᠶᠠᠷ ᠨᠢᠭᠡ ᠤᠩᠰᠢ ᠳ᠋ᠠ᠂ ᠪᠢᠳᠡ ᠰᠣᠨᠣᠰᠤᠶ᠎ᠠ︾ ᠭᠡᠯ᠎ᠡ᠃ ᠮᠢᠨᠤ ᠴᠢᠷᠠᠢ ᠭᠠᠯ ᠤᠯᠠᠶᠢᠵᠤ᠂ ᠳᠣᠣᠷ᠎ᠠ ᠲᠠᠭᠤ ᠪᠠᠷ ︽ᠮᠠᠤ ᠵᠦᠰᠢ ᠸᠠᠨ ᠰᠦᠢ︕︾ ᠭᠡᠵᠦ ᠤᠩᠰᠢᠪᠠ᠃ ᠤᠯᠠᠨ ᠢᠶᠠᠷ ᠢᠶᠠᠨ ᠠᠯᠠᠭ᠎ᠠ ᠲᠠᠰᠢᠨ᠎ᠠ᠃ ᠪᠠᠭᠰᠢ ᠨᠠᠮᠠᠶᠢ ︽ᠰᠠᠶᠢᠨ᠂ ᠰᠠᠶᠢᠨ᠃ ᠰᠠᠶᠢᠬᠠᠨ ᠤᠩᠰᠢᠵᠤ ᠪᠠᠶᠢᠨ᠎ᠠ᠂ ᠰᠠᠭᠤ︾ ᠭᠡᠪᠡ᠃       ᠬᠢᠴᠢᠶᠡᠯ ᠪᠠᠭᠤᠭᠰᠠᠨ ᠤ ᠰᠡᠭᠦᠯᠡᠷ ᠮᠠᠨ ᠤ ᠬᠠᠮᠲᠤ ᠰᠤᠷᠤᠭᠴᠢᠳ ᠣᠯᠠᠩᠬᠢ ᠨᠢ ᠨᠠᠮᠠᠶᠢ ᠲᠠᠭᠠᠨ ᠰᠠᠶᠢᠮᠰᠤᠷᠬᠠᠵᠤ᠂ ᠵᠠᠷᠢᠮ ᠨᠢ ᠪᠠᠰᠠ ᠠᠮᠠᠨ ᠳᠠᠭᠠᠨ ︽ᠮᠠᠤ ᠵᠦᠰᠢ ᠸᠠᠨ ᠰᠦᠢ︕︾ ᠭᠡᠵᠦ ᠤᠩᠰᠢᠵᠤ ᠪᠠᠶᠢᠯ᠎ᠠ᠃       ᠢᠩᠭᠢᠭᠡᠳ ᠪᠢ ᠳᠡᠮᠡᠢ ᠤᠳᠠᠯ ᠦᠭᠡᠢ ᠠᠩᠭᠢ ᠶᠢᠨ ᠢᠶᠠᠨ ︽ᠰᠤᠷᠤᠯᠭ᠎ᠠ ᠶᠢᠨ ᠳᠠᠷᠤᠭ᠎ᠠ︾ ᠪᠣᠯᠵᠤ᠂ ᠵᠡᠷᠭᠡ ᠳᠠᠪᠰᠢᠬᠰᠠᠨ ᠶᠤᠮ᠃       ᠵᠣᠨ ᠤ ᠰᠤᠷᠤᠯᠭ᠎ᠠ ᠶᠢᠨ ᠬᠤᠭᠤᠴᠠᠭᠠᠨ ᠤ ᠲᠠᠷᠬᠠᠯᠲᠠ ᠪᠠᠷ ᠬᠤᠶᠠᠳᠤᠭᠠᠷ ᠠᠬ᠎ᠠ ᠪᠢᠳᠡ ᠬᠤᠶᠠᠭᠤᠯᠠ ᠬᠤᠨᠢᠨ ᠳᠤ ᠤᠨᠤᠳᠠᠭ ᠬᠤᠸᠠ ᠰᠠᠭᠠᠷᠠᠯ ᠮᠣᠷᠢᠨ ᠳᠠᠭᠠᠨ ᠰᠤᠨᠳᠠᠯᠠᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠵᠠᠮ ᠵᠠᠭᠤᠷ᠎ᠠ ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶ᠎ᠡ ᠪᠠᠷ ᠢᠶᠠᠨ ᠳᠠᠮᠵᠢᠵᠤ ᠭᠠᠷᠤᠯ᠎ᠠ᠃ ︽ᠦᠬᠡᠷ ᠤᠨ ᠠᠪᠤ︾ ᠪᠤᠷᠬᠠᠨ ᠪᠣᠯᠴᠢᠬᠠᠭᠠᠳ ︽ᠤᠩᠭᠤ ᠡᠵᠢ︾ ᠳᠦᠷᠦᠯ ᠰᠠᠳᠤᠨ ᠢᠶᠠᠨ ᠲᠦᠰᠢᠭᠡᠳ ᠥᠭᠡᠷ᠎ᠡ ᠨᠤᠲᠤᠭ ᠲᠤ ᠨᠡᠭᠦᠭᠡᠳ ᠶᠠᠪᠤᠴᠢᠬᠠᠭᠰᠠᠨ ᠪᠠᠶᠢᠵᠠᠢ ᠃ ᠠᠶᠢᠯ ᠪᠣᠯᠭᠠᠨ ᠤ ᠡᠭᠦᠳᠡ ᠴᠣᠩᠬᠤ ᠶᠢ ᠨᠢ ᠢᠰᠡᠭᠡᠢ ᠪᠠᠷ ᠬᠠᠰᠢ ᠶᠠᠰᠢ ᠳᠠᠷᠤᠭᠰᠠᠨ ᠬᠠᠷᠠᠭᠳᠠᠵᠤ᠂ ᠬᠠᠷᠢᠶᠠᠴᠠᠢ ᠪᠣᠯᠵᠣᠮᠣᠷ ᠣᠷᠣᠨ ᠭᠠᠷᠤᠨ ᠨᠢᠰᠦᠨ᠎ᠡ᠃ ᠮᠢᠨᠤ ᠨᠢᠳᠦᠨ ᠳᠤ ᠥᠪᠡᠷ ᠤᠨ ᠡᠷᠬᠡ ᠦᠭᠡᠢ ᠵᠠᠶᠢᠷ ᠭᠦᠶᠦᠵᠦ᠂ ᠴᠢᠨᠡᠭᠡ ᠪᠠᠷ ᠢᠶᠠᠨ ᠬᠠᠰᠬᠢᠷᠤᠶ᠎ᠠ᠂ ᠬᠠᠮᠢᠭᠠᠰᠢ ᠪᠠᠨ ᠪᠣᠯ ᠲᠡᠶᠢᠰᠢ ᠪᠠᠨ ᠬᠠᠷ᠎ᠠ ᠢᠳᠡ ᠪᠠᠷ ᠢᠶᠠᠨ ᠭᠦᠶᠦᠴᠢᠬᠡᠶ᠎ᠡ ᠭᠡᠰᠡᠨ ᠪᠤᠳᠤᠯ ᠣᠷᠣᠪᠠ᠃ ᠬᠥᠷ ᠬᠥᠭᠵᠢᠶᠡᠨ ᠢᠶᠠᠷ ᠪᠢᠯᠬᠠᠵᠤ ᠪᠠᠶᠢᠭᠰᠠᠨ ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶ᠎ᠡ ᠨᠢᠭᠡ ᠯᠠ ᠳᠣᠣᠷ᠎ᠠ ᠨᠠᠮ ᠵᠢᠮ ᠪᠣᠯᠴᠢᠬᠠᠭᠰᠠᠨ ᠮᠥᠷᠲᠡᠭᠡᠨ ᠤᠩᠭᠤ ᠡᠵᠢ᠂ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠳᠦᠷᠢ ᠲᠥᠷᠬᠦ ᠨᠢᠳᠦᠨ ᠳᠤ ᠲᠣᠳᠣᠷᠠᠵᠤ᠂ ᠲᠠᠭᠤ ᠨᠢ ᠰᠣᠨᠣᠰᠳᠠᠵᠤ ᠪᠠᠶᠢᠬᠤ ᠰᠢᠤᠬᠠᠨ ᠰᠠᠨᠠᠭᠳᠠᠨ᠎ᠠ᠃ ︽ᠦᠬᠡᠷ ᠤᠨ ᠠᠪᠤ︾ ᠎ ᠶᠢᠨ ᠵᠢᠭᠠᠬᠠᠨ ᠪᠠᠶᠢᠰᠢᠩ ᠳᠤ ᠬᠤᠴᠠ ᠬᠠᠷᠢᠭᠤᠯᠳᠠᠭ ᠰᠡᠷᠡᠩ ᠠᠮ᠎ᠠ ᠣᠷᠣᠭᠠᠳ ᠰᠠᠭᠤᠴᠢᠬᠠᠭᠰᠠᠨ ᠭᠡᠷ ᠤᠨ ᠢᠶᠠᠨ ᠡᠭᠦᠳᠡᠨ ᠳᠤ ᠮᠠᠨ ᠢ ᠰᠠᠷᠠᠪᠴᠢᠯᠠᠨ ᠵᠣᠭᠰᠣᠵᠤ ᠪᠠᠶᠢᠯ᠎ᠠ᠃ ᠭᠠᠭᠴᠠ ᠡᠪᠦᠭᠡᠨ ᠮᠠᠮᠠ ᠯᠠ ᠶᠠᠭᠤ ᠴᠦ ᠪᠣᠯᠤᠭ᠎ᠠ ᠦᠭᠡᠢ ᠶᠤᠮ ᠰᠢᠭ ᠲᠥᠪᠡᠳ ᠨᠣᠮ ᠢᠶᠠᠨ ᠠᠶᠠᠯᠠᠭᠤᠯᠤᠨ ᠤᠩᠰᠢᠴᠢᠬᠠᠭᠰᠠᠨ᠂ ᠨᠣᠭᠤᠭ᠎ᠠ ᠶᠢᠨ ᠬᠠᠰᠢᠶᠠᠨ ᠳᠣᠲᠣᠷ᠎ᠠ ᠪᠠᠨ ᠣᠶᠢᠰᠢᠶᠠᠮᠵᠢ ᠦᠭᠡᠶᠢᠬᠡᠨ ᠵᠣᠭᠰᠣᠵᠤ ᠪᠠᠶᠢᠪᠠ᠃ ᠡᠨᠡ ᠬᠤᠶᠠᠷ ᠪᠤᠭᠤᠷᠤᠯ ᠡᠪᠦᠭᠡᠨ ᠠᠴᠠ ᠥᠭᠡᠷ᠎ᠡ ᠡ᠊ᠨᠳᠡ ᠬᠥᠮᠥᠨ ᠠᠮᠢᠳᠠᠨ ᠤ ᠪᠠᠷ᠎ᠠ ᠦᠭᠡᠢ ᠳᠦᠯᠡᠢ ᠲᠥᠮᠪᠥᠭᠡᠷ᠂ ᠠᠯᠠᠭ ᠮᠤᠤᠷ ᠨᠢ ᠴᠦ ᠦᠵᠡᠭᠳᠡᠬᠦ ᠦᠭᠡᠢ᠃ ᠰᠢᠭᠡᠭ ᠪᠠᠭᠠᠰᠤᠨ ᠳᠠᠭᠠᠨ ᠰᠢᠷᠠᠯᠠᠵᠤ ᠬᠠᠯᠲᠠᠷᠰᠢᠭᠰᠠᠨ ᠤᠭᠠᠯᠵᠠᠨ ᠡᠪᠡᠷᠲᠡᠢ ᠬᠡᠳᠦᠨ ᠲᠣᠮᠣ ᠬᠤᠴᠠ ᠵᠡᠭᠦᠨ ᠳᠣᠪᠣᠴᠠᠭ ᠤᠨ ᠣᠷᠣᠢ ᠳᠡᠭᠡᠷ᠎ᠡ ᠨᠣᠶᠢᠷᠮᠣᠭᠯᠠᠨ ᠬᠡᠪᠲᠡᠵᠡᠭᠡᠨ᠎ᠡ᠃       ᠡᠵᠡᠨ ᠢᠶᠠᠨ ᠦᠭᠡᠶᠢᠯᠡᠵᠦ᠂ ᠥᠨᠥᠴᠢᠷᠡᠯ ᠭᠠᠩᠰᠠᠷᠠᠯ ᠳᠤ ᠤᠨᠠᠴᠢᠬᠠᠭᠰᠠᠨ ᠡᠪᠦᠯᠵᠢᠶ᠎ᠡ ᠰᠠᠭᠤᠷᠢᠨ ᠭᠤᠨᠢᠭ ᠲᠠᠢ ᠮᠥᠷᠲᠡᠭᠡᠨ ᠤᠶᠢᠳᠬᠠᠷ ᠲᠠᠢ ᠰᠠᠨᠠᠭᠳᠠᠬᠤ ᠳᠤ ᠬᠤᠶᠠᠳᠤᠭᠠᠷ ᠠᠬ᠎ᠠ ᠪᠢᠳᠡ ᠬᠤᠶᠠᠷ ᠥᠪᠡᠷ ᠤᠨ ᠮᠠᠭᠤ ᠪᠠᠶᠢᠰᠢᠩ ᠳᠠᠭᠠᠨ ᠴᠦ ᠣᠷᠣᠯ ᠦᠭᠡᠢ ᠬᠤᠸᠠ ᠰᠠᠭᠠᠷᠠᠯ ᠮᠣᠷᠢᠨ ᠤ ᠪᠠᠨ ᠲᠠᠷᠭᠤᠨ ᠲᠠᠰᠢᠶᠠᠨ ᠳᠤ ︽ᠫᠡᠰ︾ ᠭᠡᠲᠡᠯ᠎ᠡ ᠲᠠᠰᠢᠭᠤᠷ ᠲᠠᠯᠪᠢᠪᠠ᠃       ᠡᠪᠦᠭᠡᠨ ᠮᠠᠮᠠ ᠶᠢᠨ ᠤᠯᠠᠭᠠᠨ ᠯᠤᠤᠪᠠᠩ ᠤᠨ ᠠᠮᠲᠠ ᠳᠠᠬᠢᠵᠤ ᠠᠮᠲᠠᠭᠳᠠᠬᠤ ᠪᠠᠨ ᠪᠣᠯᠢᠵᠤ᠂ ᠠᠮᠠ ᠭᠠᠰᠢᠭᠤ ᠣᠷᠬᠢᠬᠤ ᠳᠤ ︽ᠤᠩᠭᠤ ᠡᠵᠢ︾ ᠎ ᠶᠢᠨ ᠮᠢᠨᠢ ᠬᠤᠷᠤᠳ ᠲᠠᠢ ᠴᠠᠢ ᠦᠨᠦᠷᠳᠡᠭᠦ ᠰᠢᠤᠬᠠᠨ ᠪᠣᠯᠪᠠ ᠁       ᠣᠨ ᠵᠢᠯ ᠤᠷᠤᠰᠤᠨ ᠥᠩᠭᠡᠷᠡᠭᠰᠡᠭᠡᠷ᠂ ᠤᠨᠠᠭᠠᠨ ᠪᠠᠭ᠎ᠠ ᠶᠢᠨ ᠤᠯᠠᠨ ᠳᠤᠷᠠᠳᠬᠠᠯ ᠭᠦᠪᠦᠷᠡᠭᠰᠡᠭᠡᠷ᠂ ᠨᠢᠭᠡ ᠮᠡᠳᠡᠬᠦ ᠳᠤ ᠨᠠᠶᠠᠭᠠᠳ ᠣᠨ ᠡᠬᠢᠯᠡᠯ᠎ᠡ᠃ ᠨᠠᠮ ᠵᠠᠰᠠᠭ ᠤᠨ ᠰᠢᠨ᠎ᠡ ᠰᠠᠶᠢᠬᠠᠨ ᠲᠥᠷᠥ ᠶᠢᠨ ᠪᠣᠳᠣᠯᠭ᠎ᠠ ᠨᠠᠶᠢᠳᠠᠪᠤᠷᠢᠵᠢᠭᠤᠯᠤᠭᠳᠠᠵᠤ᠂ ᠮᠠᠯ ᠰᠦᠷᠦᠭ ᠢ ᠡᠷᠦᠭᠡ ᠳᠤ ᠳᠠᠭᠠᠭᠠᠴᠢᠯᠠᠭᠤᠯᠵᠤ᠂ ᠨᠤᠲᠤᠭ ᠪᠡᠯᠴᠢᠭᠡᠷ  ᠢ ᠬᠤᠪᠢᠶᠠᠵᠤ ᠡᠬᠢᠯᠡᠯ᠎ᠡ᠃       ᠪᠠᠶᠠᠷᠯᠠᠭᠰᠠᠨ ᠮᠠᠯᠴᠢᠳ ᠤᠨ ᠪᠠᠶᠠᠷ ᠤᠨ ᠮᠠᠩᠨᠠᠢ ᠲᠡᠨᠢᠢᠵᠦ᠂ ᠪᠠᠶᠠᠨᠬᠤᠰᠢᠭᠤ ᠣᠪᠣᠭ᠎ᠠ ᠪᠠᠨ ᠰᠡᠷᠭᠦᠭᠡᠨ ᠳᠠᠭᠢᠭᠠᠳ᠂ ᠣᠶᠤᠨ ᠰᠠᠨᠠᠭᠠᠨ ᠤ ᠬᠦᠨᠳᠦ ᠳᠠᠷᠤᠭᠠᠰᠤᠨ ᠠᠴᠠ ᠪᠦᠷᠢᠮᠦᠰᠦᠨ ᠠᠩᠭᠢᠵᠢᠷᠠᠵᠤ᠂ ᠨᠠᠶᠢᠷ ᠨᠠᠭᠠᠳᠤᠮ ᠢᠶᠠᠨ ᠡᠷᠭᠢᠯᠡᠭᠡᠳ ᠬᠤᠪᠢ ᠬᠤᠪᠢᠨ ᠳᠠᠭᠠᠨ ᠶᠠᠭᠠᠷᠠᠯᠳᠤᠨ᠎ᠠ᠃ ᠪᠢ ᠬᠡᠦᠬᠡᠳ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠠᠶᠢᠯ ᠡᠷᠦᠭᠡ ᠶᠢᠨ ᠡᠵᠡᠨ ᠪᠣᠯᠵᠤ᠂ ᠥᠭᠡᠷ᠎ᠡ ᠭᠠᠵᠠᠷ ᠪᠡᠯᠴᠢᠭᠡᠷ ᠨᠤᠲᠤᠭ ᠬᠤᠪᠢᠳᠠᠵᠤ ᠣᠯᠣᠭᠠᠳ ᠢᠳᠡᠭᠡᠰᠢᠵᠦ ᠳᠠᠰᠤᠭᠰᠠᠨ ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶᠡᠨ ᠠᠴᠠ ᠪᠠᠨ ᠨᠡᠭᠦᠵᠦ ᠶᠠᠪᠤᠬᠤ ᠪᠠᠷ ᠪᠣᠯᠣᠯ᠎ᠠ᠃ ᠬᠤᠪᠢᠳᠠᠵᠤ ᠣᠯᠣᠭᠰᠠᠨ ᠨᠤᠲᠤᠭ ᠪᠡᠯᠴᠢᠭᠡᠷ ᠮᠢᠨᠢ ᠡ᠊ᠨᠳᠡ ᠠᠴᠠ ᠲᠡᠶᠢᠮᠦ ᠴᠦ ᠬᠤᠯᠠ ᠪᠢᠰᠢ ᠪᠠᠶᠢᠲᠠᠯ᠎ᠠ ᠪᠠᠨ ᠮᠢᠨᠤ ᠳᠣᠲᠣᠷ᠎ᠠ ᠶᠠᠭ ᠯᠠ ᠠᠯᠤᠰ ᠬᠤᠯᠠ ᠬᠠᠷᠢ ᠭᠦᠷᠦᠨ ᠳᠤ ᠨᠡᠭᠦᠭᠡᠳ ᠶᠠᠪᠤᠴᠢᠬᠠᠬᠤ ᠶᠤᠮ ᠰᠢᠭ᠋ ᠭᠠᠩᠰᠠᠷᠠᠯᠳᠠᠢ ᠰᠠᠨᠠᠭᠳᠠᠵᠤ᠂ ᠬᠡᠯᠡᠵᠦ ᠭᠠᠷᠤᠰᠢ ᠦᠭᠡᠢ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮ᠎ᠠ ᠬᠤᠷᠮᠣᠢ ᠠᠴᠠ ᠴᠢᠩᠭᠠᠭᠠᠵᠤ ᠪᠠᠶᠢᠬᠤ ᠰᠢᠭ᠋ ᠰᠣᠨᠢᠬᠠᠨ ᠪᠠᠶᠢᠯ᠎ᠠ᠃       ᠤᠨᠠᠭᠠᠨ ᠨᠠᠰᠤ ᠶᠢ ᠮᠢᠨᠢ ᠪᠦᠪᠡᠶᠢᠯᠡᠭᠰᠡᠨ ᠣᠪᠣᠭᠠᠨ ᠠᠷᠤ ᠶᠢᠨ ᠡᠪᠦᠯᠵᠢᠶ᠎ᠡ ᠮᠢᠨᠢ᠂ ᠥᠰᠬᠦ ᠠᠴᠠ ᠥᠨᠥ ᠪᠤᠯᠲᠠᠯ᠎ᠠ ᠰᠡᠳᠬᠢᠯ ᠵᠢᠷᠦᠬᠡᠨ ᠳᠡᠭᠡᠨ ᠰᠦᠰᠦᠭᠯᠡᠵᠦ ᠵᠠᠯᠪᠠᠷᠢᠵᠤ ᠶᠠᠪᠤᠭᠰᠠᠨ ᠪᠠᠶᠠᠨᠬᠤᠰᠢᠭᠤ ᠣᠪᠣᠭ᠎ᠠ ᠮᠢᠨᠢ᠂ ᠬᠡᠵᠢᠶ᠎ᠡ ᠡᠭᠦᠷᠢᠳᠡ ᠮᠢᠨᠤ ᠰᠡᠳᠬᠢᠯ ᠳᠤ ᠳᠤᠯᠠᠭᠠᠬᠠᠨ ᠮᠥᠷᠲᠡᠭᠡᠨ ᠳᠤᠷᠠᠳᠬᠠᠯ ᠲᠠᠢ ᠰᠠᠨᠠᠭᠳᠠᠨ᠎ᠠ᠃       ᠬᠡᠦᠬᠡᠳ ᠨᠠᠰᠤ ᠮᠢᠨᠢ ᠠᠯᠢ ᠬᠡᠳᠦᠶᠢᠨᠡᠢ ᠥᠩᠭᠡᠷᠡᠨ ᠤᠳᠤᠬᠰᠠᠨ ᠴᠦ ᠬᠠᠷᠠᠬᠠᠨ ᠪᠠᠭ᠎ᠠ ᠶᠢᠨ ᠤᠢ ᠤᠬᠠᠭᠠᠨ ᠳᠤ ᠬᠠᠳᠠᠩᠰᠢᠨ ᠦᠯᠡᠳᠡᠭᠰᠡᠨ ᠬᠥᠭᠡᠷᠦᠬᠦᠨ ᠳᠤᠷᠠᠳᠬᠠᠯ ᠤᠳ ᠬᠠᠷᠠᠵᠠᠨ ᠤ ᠤᠰᠤ ᠰᠢᠭ᠋ ᠰᠢᠷᠭᠢᠰᠢ ᠦᠭᠡᠢ ᠤᠨᠳᠤᠷᠤᠬᠰᠠᠭᠠᠷ᠁      
 
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号