ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠢᠯᠡ ᠵᠠᠰᠠᠭ
ᠰᠣᠨᠢᠨ ᠮᠡᠳᠡᠭᠡ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠢᠯᠢᠵᠦ ᠨᠤᠬᠤᠯᠠᠬᠤ ᠮᠡᠷᠭᠡᠵᠢᠯ ᠢᠶᠠᠷ ᠠᠮᠢᠳᠤᠷᠠᠯ ᠢᠶᠠᠨ ᠴᠣᠭᠴᠠᠯᠠᠵᠤ ᠶᠠᠪᠤᠭ᠎ᠠ ᠮᠠᠯᠴᠢᠨ ᠪᠦᠰᠡᠭᠦᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/12/31
                       ᠰᠤᠷᠪᠤᠯᠵᠢᠯᠠᠬᠴᠢ ᠰᠡᠴᠡᠨ᠂ ᠡᠷᠳᠡᠨᠢᠬᠦᠦ       ᠪᠠᠶᠠᠨᠬᠤᠲᠠ ᠶᠢᠨ ᠪᠠᠷᠠᠭᠤᠨ ᠬᠤᠲᠠ ᠲᠣᠭᠤᠷᠢᠭ ᠤᠨ ᠢᠦᠢ ᠯᠤ᠋ ᠬᠤᠸᠠ ᠶᠤᠸᠠᠨ ᠬᠤᠷᠢᠶᠠᠯᠠᠯ ᠤᠨ ᠠᠷᠤ ᠡᠭᠦᠳᠡᠨ᠎ᠡ ᠪᠠᠶᠢᠷᠢᠯᠠᠭ᠎ᠠ ᠪᠠᠳᠮᠠᠨᠢᠩᠪᠦ ᠠᠮᠢᠳᠤᠷᠠᠯ ᠤᠨ ᠥᠷᠥᠭᠡᠨ ᠳᠤ ᠣᠷᠣᠵᠤ ᠣᠴᠢᠬᠤ ᠳᠤ ᠤᠯᠠᠨ ᠬᠥᠮᠥᠰ ᠬᠦᠵᠦᠭᠦᠦ ᠨᠢᠷᠤᠭᠤ ᠪᠠᠨ ᠪᠠᠷᠢᠭᠤᠯᠬᠤ ᠪᠠᠷ᠂ ᠲᠣᠯᠣᠭᠠᠢ ᠪᠥᠭᠡᠷ᠎ᠡ ᠪᠠᠨ ᠳᠣᠮᠨᠣᠭᠤᠯᠬᠤ ᠪᠠᠷ ᠬᠦᠯᠢᠶᠡᠵᠦ ᠰᠠᠭᠤᠯᠴᠠᠨ᠎ᠠ ᠃ ᠤᠯᠠᠨ ᠬᠥᠮᠥᠰ ᠤᠨ ᠳᠤᠮᠳᠠ ᠲᠤᠷᠠᠩᠬᠠᠢ ᠪᠣᠷᠣ ᠪᠦᠰᠡᠭᠦᠢ ᠱᠠᠯᠠᠮᠠᠭᠠᠢ ᠭᠡᠭᠴᠢ ᠪᠠᠷ ᠬᠥᠮᠥᠨ ᠤ ᠬᠦᠵᠦᠭᠦᠦ ᠨᠢᠷᠤᠭᠤ ᠶᠢ ᠰᠢᠷ᠎ᠠ ᠲᠣᠰᠣ ᠪᠠᠷ ᠢᠯᠪᠢᠨ ᠲᠠᠭᠤᠵᠤ᠂ ᠲᠡᠳᠦᠢ ᠤᠳᠠᠯ ᠦᠭᠡᠢ ᠨᠢᠷᠤᠭᠤᠨ ᠳᠡᠭᠡᠷ᠎ᠡ ᠨᠢ ᠰᠣᠷᠣᠭᠤᠯ ᠪᠤᠮᠪᠠ ᠭᠡᠳᠡᠭ ᠢ ︽ᠲᠣᠪ᠂ ᠲᠣᠪ︾ ᠬᠢᠯᠭᠡᠲᠡᠯ᠎ᠡ ᠰᠠᠭᠤᠯᠭᠠᠭᠠᠳ ᠠᠮᠵᠢᠯ᠎ᠠ᠃ ᠡᠨᠡ ᠢᠯᠢᠵᠦ ᠨᠤᠬᠤᠯᠠᠬᠤ᠂ ᠵᠠᠰᠠᠬᠤ ᠳᠣᠮᠨᠣᠬᠤ ᠤᠯᠠᠨ ᠮᠡᠷᠭᠡᠵᠢᠯ ᠲᠠᠢ ᠪᠦᠰᠡᠭᠦᠢ ᠶᠢ ᠠᠯᠲᠠᠨᠴᠢᠮᠡᠭ ᠭᠡᠳᠡᠭ᠃ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠠᠯᠳ᠋ᠬᠠᠤᠪᠤᠭ᠎ᠠ ᠪᠠᠯᠭᠠᠰᠤᠨ ᠤ ᠵᠡᠯᠡᠪᠦ᠋ᠭᠡᠷᠢᠭ ᠭᠠᠴᠠᠭᠠᠨ ᠤ ᠮᠠᠯᠴᠢᠨ᠃       ᠡᠬᠡᠯ ᠵᠢᠷ ᠤᠨ ᠮᠠᠯᠴᠢᠨ ᠬᠥᠮᠥᠨ ᠬᠤᠲᠠ ᠣᠷᠣᠵᠤ ᠲᠤᠬᠠᠶᠢᠯᠠᠭᠰᠠᠨ ᠮᠡᠷᠭᠡᠵᠢᠯ ᠰᠤᠷᠤᠯᠴᠠᠵᠦ᠂ ᠥᠪᠡᠷ ᠤᠨ ᠭᠡᠰᠡᠨ ᠦᠢᠯᠡᠰ ᠲᠡᠮᠡᠴᠡᠯ ᠲᠠᠢ ᠶᠠᠪᠤᠭ᠎ᠠ ᠳᠤ ᠰᠣᠷᠪᠤᠯᠵᠢᠯᠠᠭ᠎ᠠ ᠠᠪᠴᠤ ᠥᠯᠢᠭᠡᠷ ᠤᠴᠢᠷ ᠢ ᠬᠥᠮᠥᠰ ᠲᠤ ᠲᠤᠭᠤᠯᠭᠠᠬᠤ ᠪᠠᠷ ᠪᠣᠯᠣᠯ᠎ᠠ᠃ ᠠᠯᠲᠠᠨᠴᠢᠮᠡᠭ ᠤᠨ ᠬᠤᠪᠢ ᠳᠤ ᠬᠤᠪᠢ ᠲᠠᠪᠢᠯᠠᠩ ᠭᠡᠭᠴᠢ ᠲᠡᠭᠰᠢ ᠪᠤᠰᠤ᠃ ᠭᠡᠬᠦ ᠳᠤ ᠲᠡᠭᠦᠨ ᠤ ᠠᠮᠢᠳᠤᠷᠠᠯ ᠤᠨ ᠵᠠᠮ ᠳᠤ ᠳᠠᠩᠳᠠ ᠪᠤᠷᠬᠠᠨ ᠠᠳᠠᠯᠢ ᠬᠥᠮᠥᠰ ᠤᠴᠠᠷᠠᠨ ᠵᠣᠯᠭᠠᠵᠤ ᠢᠷᠡᠭᠡᠳᠦᠢ ᠶᠢᠨ ᠵᠠᠮ ᠢ ᠎ ᠨᠢ ᠭᠡᠷᠡᠯᠳᠦᠭᠦᠯᠵᠦ ᠪᠠᠶᠢᠳᠠᠭ ᠢᠶᠠᠷ ᠬᠡᠵᠢᠶᠡᠳᠡ ᠯᠠ ᠴᠢᠷᠠᠢ ᠳᠠᠭᠠᠨ ᠢᠨᠢᠶᠡᠳᠦ ᠲᠣᠳᠣᠷᠠᠭᠤᠯᠴᠢᠬᠠᠭᠰᠠᠨ ᠶᠠᠪᠤᠳᠠᠭ ᠤᠨ ᠨᠢᠭᠡᠨ᠃ ᠠᠯᠲᠠᠨᠴᠢᠮᠡᠭ ᠢ ᠳᠥᠩᠭᠡᠵᠢ ᠤᠬᠠᠭ᠎ᠠ ᠣᠷᠣᠬᠤ ᠳᠤ ᠡᠵᠢ ᠠᠪᠤ ᠨᠢ ᠪᠤᠰᠤᠳ ᠬᠥᠮᠥᠨ ᠤ ᠡᠵᠢ ᠠᠪᠤ ᠠᠴᠠ ᠥᠲᠡᠯᠦᠭᠰᠡᠨ ᠬᠠᠷᠠᠭᠳᠠᠬᠤ ᠳᠤ ᠭᠠᠶᠢᠬᠠᠭᠠᠳ ᠯᠠ ᠥᠩᠭᠡᠷᠡᠳᠡᠭ ᠪᠠᠶᠢᠵᠠᠢ᠃ ᠲᠤᠯᠤᠭᠠᠨ ᠨᠠᠰᠤ ᠲᠠᠢ ᠲᠡᠷᠡ ᠵᠢᠯ᠂ ᠠᠪᠤ ᠨᠢ ᠭᠡᠨᠡᠳᠲᠡ ᠲᠡᠭᠦᠨ ᠢ ᠳᠡᠷᠭᠡᠳᠡ ᠪᠠᠨ ᠰᠠᠭᠤᠯᠭᠠᠴᠢᠬᠠᠭᠠᠳ ︽ᠲᠦᠷᠦᠭᠰᠡᠨ ᠡᠵᠢ ᠴᠢᠨᠢ ᠪᠢᠳᠡ ᠬᠤᠶᠠᠭᠤᠯᠠ ᠶᠢᠨ ᠠᠴᠢ ᠬᠡᠦᠬᠡᠨ᠂ ᠭᠠᠩᠴᠡᠴᠡᠭ ᠭᠡᠳᠡᠭ ᠬᠥᠮᠥᠨ ᠪᠠᠶᠢᠭᠰᠠᠨ᠃ ᠠᠶᠢᠯ ᠭᠡᠷ ᠪᠣᠯᠣᠭᠠᠳ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠴᠢᠮᠠᠶᠢ ᠣᠯᠳᠠᠵᠤ᠂ ᠰᠡᠭᠦᠯᠡᠷ ᠨᠢ ᠴᠢᠮᠠᠶᠢ ᠲᠦᠷᠦᠭᠰᠡᠨ ᠭᠤᠷᠪᠠᠨ ᠬᠤᠨᠤᠭ ᠳᠡᠭᠡᠷ᠎ᠡ ᠦᠭᠡᠢ ᠪᠣᠯᠴᠢᠬᠠᠭᠰᠠᠨ᠃ ᠲᠡᠷᠡ ᠦᠶᠡᠰ ᠮᠠᠨᠠᠶᠢᠬᠢᠨ ᠢᠩᠭᠡ ᠰᠠᠭᠠᠵᠤ ᠪᠠᠶᠢᠭᠰᠠᠨ ᠪᠣᠯᠬᠤᠷ ᠴᠢᠮᠠᠶᠢ ᠥᠬᠢᠨ ᠦᠷ᠎ᠡ ᠪᠠᠨ ᠪᠣᠯᠭᠠᠶ᠎ᠠ ᠭᠡᠵᠦ ᠡ᠊ᠨᠳᠡ ᠦᠷᠡᠴᠢᠯᠡᠵᠦ ᠠᠪᠴᠢᠷᠠᠭᠰᠠᠨ ᠶᠤᠮ᠃ ᠣᠲᠣ ᠴᠢ ᠴᠢᠨᠢ ᠮᠠᠨ ᠤ ᠥᠬᠢᠨ ᠰᠢᠤ᠂ ᠲᠡᠭᠡᠪᠡᠴᠦ ᠬᠥᠮᠥᠨ ᠵᠠᠪᠠᠯ ᠳᠦᠷᠦᠯ ᠭᠠᠷᠤᠯ ᠢᠶᠠᠨ ᠮᠡᠳᠡᠬᠦ ᠭᠡᠷᠡᠭᠳᠡᠢ︾ ᠭᠡᠵᠦ ᠬᠡᠯᠡᠵᠦ ᠥᠭᠴᠡᠢ᠃       ᠲᠡᠭᠡᠭᠡᠳ ᠠᠯᠲᠠᠨᠴᠢᠮᠡᠭ ᠰᠠᠶ᠋ᠢ ᠥᠪᠡᠷ ᠤᠨ ᠠᠪᠠᠭ᠎ᠠ ᠡᠪᠦᠭᠡ ᠡᠮᠡᠭᠡ ᠳᠡᠭᠡᠨ ᠦᠷᠡᠴᠢᠯᠡᠭᠳᠡᠵᠦ ᠢᠷᠡᠭᠰᠡᠨ ᠢᠶᠠᠨ ᠮᠡᠳᠡᠯ᠎ᠡ᠃ ᠠᠰᠠᠷᠠᠭᠰᠠᠨ ᠠᠪᠤ ᠡᠵᠢ ᠨᠢ ᠬᠡᠳᠦᠶᠢᠪᠡᠷ ᠬᠤᠶᠠᠷ ᠬᠦᠦ ᠲᠠᠢ ᠪᠣᠯᠪᠠᠴᠤ ᠥᠬᠢᠨ ᠦᠷ᠎ᠡ ᠵᠠᠶᠠᠭᠠᠭᠰᠠᠨ ᠦᠭᠡᠢ ᠪᠣᠯᠬᠤᠷ ᠲᠡᠭᠦᠨ ᠢ ᠲᠦᠷᠦᠭᠰᠡᠨ ᠦᠷ᠎ᠡ ᠲᠠᠢ ᠠᠳᠠᠯᠢ ᠡᠩᠬᠦᠷᠡᠶᠢᠯᠡᠨ ᠥᠰᠬᠡᠵᠡᠢ᠃ ᠣᠲᠣ ᠴᠤ ᠲᠡᠭᠦᠨ ᠳᠤ ᠡᠪᠦᠭᠡ ᠨᠢ ᠬᠤᠳᠳᠤᠭ ᠤᠰᠤ ᠬᠠᠮᠢᠭ᠎ᠠ ᠶᠠᠪᠤᠭᠰᠠᠨ ᠴᠤ ᠥᠬᠢᠨ ᠢᠶᠠᠨ ᠡᠭᠦᠷᠦᠭᠡᠳ ᠶᠠᠪᠤᠳᠠᠭ ᠪᠠᠶᠢᠭᠰᠠᠨ ᠎ ᠨᠢ ᠲᠣᠳᠣᠬᠠᠨ ᠰᠠᠨᠠᠭᠳᠠᠵᠤ ᠪᠠᠶᠢᠨ᠎ᠠ᠃ ᠲᠡᠶᠢᠮᠦ ᠪᠣᠯᠬᠤᠷ ᠠᠯᠲᠠᠨᠴᠢᠮᠡᠭ ᠴᠤ ᠠᠰᠠᠷᠠᠭᠰᠠᠨ ᠠᠪᠤ ᠡᠵᠢ ᠪᠠᠨ ᠲᠦᠷᠦᠭᠰᠡᠨ ᠡᠵᠢ ᠠᠪᠤ ᠪᠠᠨ ᠠᠳᠠᠯᠢ ᠪᠤᠳᠤᠵᠤ ᠠᠴᠢᠯᠠᠵᠤ ᠬᠦᠨᠳᠦᠯᠡᠵᠦ ᠶᠠᠪᠤᠳᠠᠭ᠃ ᠠᠩᠬ᠎ᠠ ᠳᠤᠮᠳᠠᠳᠤ ᠳᠤ ᠰᠤᠷᠤᠯᠴᠠᠵᠦ ᠪᠠᠶᠢᠬᠤ ᠳᠤ ᠠᠪᠤ ᠡᠵᠢ ᠨᠢ ᠨᠠᠰᠤ ᠠᠭᠰᠢᠷᠠᠵᠤ ᠬᠥᠳᠡᠭᠡᠨ ᠤ ᠠᠵᠢᠯ ᠳᠠᠭᠠᠨ ᠡᠭᠦᠷᠳᠡᠵᠦ ᠪᠠᠶᠢᠭ᠎ᠠ ᠶᠢ ᠬᠠᠷᠠᠭᠠᠳ ᠠᠪᠤ ᠡᠵᠢ ᠳᠡᠭᠡᠨ ᠳᠠᠮ ᠪᠣᠯᠬᠤ ᠪᠠᠷ ᠰᠤᠷᠭᠠᠭᠤᠯᠢ ᠠᠴᠠ ᠪᠠᠨ ᠭᠠᠷᠴᠤ ᠨᠡᠷᠡᠨ ᠤ ᠪᠣᠷᠣ ᠮᠠᠯᠴᠢᠨ ᠪᠣᠯᠵᠠᠢ᠃ ᠪᠠᠰᠠ ᠰᠡᠭᠦᠯᠡᠷ ᠨᠢ ᠮᠠᠯᠵᠢᠬᠤ ᠶᠢ ᠵᠣᠭᠰᠣᠭᠠᠭᠰᠠᠨ ᠠᠴᠠ ᠬᠥᠳᠡᠭᠡ ᠪᠠᠨ ᠬᠤᠭᠤᠯᠠᠨ ᠭᠡᠷ ᠤᠨ ᠦᠢᠯᠡᠴᠢᠯᠡᠭᠴᠢ ᠮᠡᠲᠦ ᠶᠢᠨ ᠬᠥᠯᠥᠰᠦᠨ ᠠᠵᠢᠯ ᠬᠢᠵᠦ ᠪᠠᠶᠢᠭᠠᠳ ᠬᠤᠲᠠ ᠣᠷᠣᠵᠤ ᠥᠪᠡᠷ ᠤᠨ ᠪᠡᠶ᠎ᠡ ᠪᠠᠨ ᠳᠠᠭᠠᠭᠠᠭᠰᠠᠨ ᠮᠡᠷᠭᠡᠵᠢᠯ ᠰᠤᠷᠤᠯᠴᠠᠬᠤ ᠪᠤᠳᠤᠯ ᠣᠷᠣᠵᠠᠢ᠃       ︽ᠬᠠᠮᠤᠭ ᠠᠩᠬ᠎ᠠ ᠢᠯᠪᠢᠨ ᠵᠠᠰᠠᠬᠤ ᠮᠡᠷᠭᠡᠵᠢᠯ ᠰᠤᠷᠤᠯᠴᠠᠬᠰᠠᠨ ᠨᠢ ᠬᠥᠭᠰᠢᠨ ᠡᠵᠢ ᠶᠢᠨ ᠮᠢᠨᠢ ᠪᠡᠶ᠎ᠡ ᠨᠢ ᠲᠠᠭ᠎ᠠ ᠦᠭᠡᠢ ᠪᠣᠯᠬᠤᠷ ᠬᠠᠶᠠ ᠬᠦᠵᠦᠭᠦᠦ ᠨᠢᠷᠤᠭᠤ ᠶᠢ ᠨᠢ ᠪᠠᠷᠢᠵᠤ ᠨᠤᠬᠤᠯᠠᠵᠤ ᠥᠭᠲᠡᠭ ᠪᠠᠶᠢᠭᠰᠠᠨ᠃ ᠬᠤᠵᠢᠮ ᠎ ᠨᠢ ᠨᠢᠭᠡᠨ ᠤᠳᠠᠭᠠᠨ ᠤ ᠲᠤᠭᠢᠶᠠᠯ ᠢᠶᠠᠷ ᠪᠠᠶᠠᠨᠨᠠᠭᠤᠷ ᠨᠤᠲᠤᠭ ᠲᠠᠢ ᠬᠤᠪᠢᠰᠬᠠᠯᠲᠤ ᠪᠠᠭᠰᠢ ᠲᠠᠢ ᠲᠠᠨᠢᠯᠴᠠᠵᠤ᠂ ᠲᠡᠭᠦᠨ ᠠᠴᠠ ᠲᠣᠯᠣᠭᠠᠢ᠂ ᠭᠤᠣᠯ᠂ ᠰᠠᠪᠠ᠂ ᠪᠥᠭᠡᠷ᠎ᠡ ᠳᠣᠮᠨᠣᠬᠤ ᠡᠷᠳᠡᠮ ᠢ ᠰᠤᠷᠤᠯᠴᠠᠵᠦ ᠠᠪᠤᠭᠰᠠᠨ ᠶᠤᠮ᠃ ᠡᠬᠢᠯᠡᠭᠡᠳ ᠮᠥᠨ ᠯᠠ ᠡᠵᠢ ᠶᠢᠨ ᠢᠶᠠᠨ ᠠᠷᠬᠠᠭ ᠬᠡᠮ ᠢ ᠥᠪᠡᠷ ᠢᠶᠠᠨ ᠵᠠᠰᠠᠴᠢᠬᠠᠬᠤ ᠪᠠᠷ ᠵᠢᠭᠠᠬᠠᠨ ᠡᠷᠳᠡᠮ ᠰᠤᠷᠤᠶ᠎ᠠ ᠭᠡᠰᠡᠨ ᠪᠤᠳᠤᠯ ᠢᠶᠠᠷ ᠰᠤᠷᠤᠯᠴᠠᠬᠰᠠᠨ ᠶᠤᠮ᠃ ᠰᠤᠷᠤᠯᠴᠠᠭᠠᠳ᠂ ᠭᠠᠷᠰᠢᠭᠠᠳ ᠠᠪᠴᠢᠬᠤᠯᠠᠷ ᠣᠶᠢᠷ᠎ᠠ ᠵᠠᠭᠤᠷ᠎ᠠ ᠪᠠᠶᠢᠭ᠎ᠠ ᠬᠥᠮᠥᠰ ᠡᠷᠢᠵᠦ ᠵᠠᠰᠠᠵᠤ ᠳᠣᠮᠨᠣᠭᠤᠯᠤᠭᠰᠠᠭᠠᠷ ᠪᠠᠶᠢᠲᠠᠯ᠎ᠠ ︿ᠡᠨᠡ ᠡᠷᠳᠡᠮ ᠢᠶᠠᠨ ᠲᠤᠶᠢᠯᠪᠤᠷᠢᠲᠠᠢ ᠰᠤᠷᠤᠭᠠᠳ ᠠᠪᠴᠢᠬᠠᠬᠤ ᠶᠤᠮ ᠪᠣᠯ ᠥᠪᠡᠷ ᠤᠨ ᠭᠡᠳᠡᠰᠦ ᠪᠠᠨ ᠲᠡᠵᠢᠭᠡᠴᠢᠬᠡᠬᠦ ᠶᠤᠮ ᠪᠠᠶᠢᠨ᠎ᠠ﹀ ᠭᠡᠰᠡᠨ ᠪᠤᠳᠤᠯ ᠣᠷᠣᠵᠤ᠂ ᠤᠯᠠᠮ ᠰᠢᠮᠳᠠᠵᠤ ᠰᠤᠷᠤᠯᠴᠠᠬᠤ ᠪᠤᠯᠤᠬᠰᠠᠨ︾ ᠭᠡᠵᠦ ᠠᠯᠲᠠᠨᠴᠢᠮᠡᠭ ᠬᠠᠮᠤᠭ ᠠᠩᠬ᠎ᠠ ᠪᠠᠭᠰᠢ ᠪᠠᠷᠢᠵᠤ ᠡᠷᠳᠡᠮ ᠰᠤᠷᠤᠬᠰᠠᠨ ᠥᠩᠭᠡᠷᠡᠯᠲᠡ ᠪᠠᠨ ᠶᠠᠷᠢᠯ᠎ᠠ᠃       ᠬᠥᠮᠥᠨ ᠤ ᠬᠤᠪᠢ ᠵᠠᠶᠠᠭ᠎ᠠ᠂ ᠠᠮᠢᠳᠤᠷᠠᠯ ᠤᠨ ᠵᠠᠮ ᠤᠨ ᠰᠣᠩᠭᠤᠯᠲᠠ ᠭᠡᠵᠦ ᠮᠥᠨ ᠡᠶᠢᠮᠦᠷᠬᠦᠦ ᠠᠵᠠ ᠲᠤᠭᠢᠶᠠᠯ ᠤᠨ ᠳᠤᠮᠳᠠ ᠵᠠᠮ ᠮᠥᠷ ᠢᠶᠠᠨ ᠣᠯᠳᠠᠭ ᠠᠵᠢ᠃ ᠲᠡᠭᠦᠨ ᠢ ᠠᠵᠤ ᠠᠮᠢᠳᠤᠷᠠᠯ ᠢᠶᠠᠨ ᠶᠠᠭᠠᠬᠢᠵᠤ ᠠᠪᠴᠤ ᠶᠠᠪᠤᠳᠠᠭ ᠪᠢᠯᠡ ᠬᠡᠮᠡᠨ ᠰᠠᠨᠠᠵᠤ ᠶᠠᠪᠤᠲᠠᠯ᠎ᠠ ᠡᠷᠳᠡᠮ ᠮᠡᠳᠡᠯᠭᠡ ᠪᠠᠨ ᠬᠠᠷᠠᠮ ᠦᠭᠡᠢ ᠵᠢᠭᠠᠵᠤ ᠥᠭᠲᠡᠭ ᠠᠴᠢᠲᠠᠢ ᠪᠠᠭᠰᠢ ᠲᠠᠭᠠᠷᠠᠬᠰᠠᠨ ᠢᠶᠠᠷ ᠢᠯᠪᠢᠨ ᠵᠠᠰᠠᠬᠤ᠂ ᠡᠮᠴᠢᠯᠡᠵᠦ ᠳᠣᠮᠨᠣᠬᠤ ᠮᠡᠷᠭᠡᠵᠢᠯ ᠳᠤ ᠭᠠᠷ ᠲᠥᠷᠥᠵᠦ ᠥᠪᠡᠷ ᠤᠨ ᠲᠤᠬᠠᠶᠢᠯᠠᠭᠰᠠᠨ ᠮᠡᠷᠭᠡᠵᠢᠯ ᠲᠠᠢ ᠪᠣᠯᠣᠯ᠎ᠠ᠃ ᠬᠥᠮᠥᠨ ᠤ ᠪᠡᠶ᠎ᠡ ᠳᠤ ᠡᠷᠳᠡᠮ ᠢᠯᠡᠭᠦᠳᠡᠬᠦ ᠦᠭᠡᠢ ᠭᠡᠳᠡᠭ ᠤᠨ ᠤᠴᠢᠷ᠃ 2020 ᠣᠨ ᠳᠤ ᠠᠯᠲᠠᠨᠴᠢᠮᠡᠭ ᠭᠠᠨᠰᠤ ᠮᠤᠵᠢ ᠶᠢᠨ ᠰᠦᠨᠠᠨ ᠨᠤᠲᠤᠭ ᠲᠠᠢ ᠳᠠᠸᠠ ᠪᠠᠭᠰᠢ ᠲᠠᠢ ᠲᠠᠨᠢᠯᠴᠠᠵᠤ᠂ ᠲᠡᠭᠦᠨ ᠤ ᠳᠡᠷᠭᠡᠳᠡ 3 ᠵᠢᠯ ᠤᠨ ᠬᠤᠭᠤᠴᠠᠭ᠎ᠠ ᠲᠠᠢ ᠢᠯᠪᠢᠨ ᠵᠠᠰᠠᠬᠤ ᠮᠡᠷᠭᠡᠵᠢᠯ ᠢ ᠰᠤᠷᠤᠯᠴᠠᠯ᠎ᠠ᠃ ᠳᠠᠸᠠ ᠪᠠᠭᠰᠢ ᠶᠢᠨ ᠢᠯᠪᠢᠨ ᠵᠠᠰᠠᠬᠤ ᠭᠠᠵᠠᠷ ᠠᠵᠢᠯᠯᠠᠵᠤ ᠡᠬᠢᠯᠡᠬᠦ ᠳᠤ ᠡᠳᠦᠷ ᠪᠦᠷᠢ ᠳᠥᠷᠪᠡ ᠲᠠᠪᠤᠨ ᠬᠥᠮᠥᠨ ᠤ ᠬᠦᠵᠦᠭᠦᠦ ᠨᠢᠷᠤᠭᠤ ᠶᠢ ᠢᠯᠢᠵᠦ ᠨᠤᠬᠤᠯᠠᠳᠠᠭ ᠪᠠᠶᠢᠪᠠ᠃ ᠢᠯᠢᠵᠦ ᠨᠤᠬᠤᠯᠠᠬᠤ ᠭᠠᠵᠠᠷ ᠣᠴᠢᠵᠤ ᠵᠠᠰᠠᠭᠤᠯᠳᠠᠭ ᠬᠥᠮᠥᠰ ᠨᠢ ᠪᠦᠷ ᠬᠤᠶᠠᠩ ᠰᠢᠷ᠎ᠠ ᠤᠰᠤ ᠬᠤᠷᠠᠭᠠᠳ ᠡᠪᠡᠳᠴᠢᠨ ᠬᠠᠭᠤᠴᠢ ᠳᠤ ᠪᠠᠷᠢᠭᠳᠠᠭᠰᠠᠨ ᠤᠯᠤᠰ᠃ ᠨᠢᠭᠡ ᠬᠥᠮᠥᠨ  ᠢ ᠪᠠᠷᠢᠵᠤ ᠲᠠᠭᠤᠰᠬᠠᠬᠤ ᠳᠤ ᠬᠤᠶᠠᠷ ᠭᠠᠷ ᠨᠢ ᠤᠨᠲᠠᠷᠠᠵᠤ᠂ ᠪᠥᠬᠦ ᠪᠡᠶ᠎ᠡ ᠨᠢ ᠴᠢᠳᠠᠯ ᠦᠭᠡᠢ ᠪᠣᠯᠴᠢᠬᠠᠳᠠᠭ᠃ ᠵᠠᠯᠭᠠᠭᠠᠳ ᠳᠠᠷᠠᠭ᠎ᠠ ᠶᠢᠨ ᠬᠥᠮᠥᠨ ᠢᠶᠠᠨ ᠪᠠᠷᠢᠵᠤ ᠡᠬᠢᠯᠡᠬᠦ ᠳᠤ ᠭᠠᠷ ᠨᠢ ᠦᠶ᠎ᠡ ᠭᠡᠰᠢᠭᠦᠦ ᠪᠠᠷ ᠢᠶᠠᠨ ᠡᠪᠡᠳᠴᠦ ᠤᠨᠲᠠᠷᠠᠨ᠂ ᠰᠠᠷ᠎ᠠ ᠬᠢᠷᠢᠲᠡᠢ ᠬᠢᠮᠡᠭᠴᠡ ᠪᠠᠨ ︽ᠡᠨᠡ ᠴᠢᠨᠢ ᠬᠥᠮᠥᠨ ᠬᠢᠳᠡᠭ ᠠᠵᠢᠯ ᠪᠢᠰᠢ ᠪᠠᠶᠢᠨ᠎ᠠ︾ ᠭᠡᠵᠦ ᠵᠣᠷᠢᠭ ᠬᠤᠭᠤᠷᠠᠵᠤ ᠪᠠᠶᠢᠪᠠ᠃ ᠪᠠᠭ᠎ᠠ ᠠᠴᠠ ᠪᠠᠨ ᠬᠥᠭᠰᠢᠨ ᠡᠵᠢ ᠠᠪᠤ ᠶᠢᠨ ᠢᠶᠠᠨ ᠳᠡᠷᠭᠡᠳᠡ ᠡᠷᠬᠡ ᠲᠠᠩᠬᠢ ᠥᠰᠦᠭᠰᠡᠨ ᠠᠯᠲᠠᠨᠴᠢᠮᠡᠭ ᠪᠠᠷᠤᠭ ᠤᠨ ᠶᠠᠭᠤᠮᠠᠨ ᠠᠴᠠ ᠰᠣᠴᠢᠳᠠᠭ ᠦᠭᠡᠢ᠂ ᠬᠥᠮᠥᠨ ᠢᠶᠠᠷ ᠳᠤᠲᠠᠭᠤ ᠪᠠᠨ ᠬᠡᠯᠡᠭᠦᠯᠬᠦ ᠳᠤᠷ᠎ᠠ ᠦᠭᠡᠢ᠂ ᠬᠥᠮᠥᠨ ᠳᠤ ᠴᠢᠳᠠᠬᠳᠠᠪᠠᠯ ᠬᠤᠷᠣ ᠨᠢ ᠪᠤᠴᠠᠯᠤᠭᠠᠳ ᠤᠭᠢᠯᠠᠴᠢᠬᠠᠳᠠᠭ᠂ ᠬᠤᠷᠣ ᠰᠢᠷ᠎ᠠ ᠲᠠᠢ᠂ ᠵᠥᠷᠢᠭᠦᠦ ᠠᠭᠠᠰᠢ ᠲᠠᠢ ᠪᠣᠯᠬᠤᠷ ︽ᠬᠥᠮᠥᠨ ᠬᠢᠵᠦ ᠪᠤᠯᠤᠬᠰᠠᠨ ᠠᠵᠢᠯ ᠢ ᠪᠢ ᠶᠠᠭᠠᠬᠢᠭᠠᠳ ᠬᠢᠵᠦ ᠪᠣᠯᠳᠠᠭ ᠦᠭᠡᠢ ᠶᠤᠮ︾ ᠭᠡᠰᠡᠨ ᠵᠣᠷᠢᠭ ᠢᠶᠠᠷ ᠴᠢᠷᠮᠠᠶᠢᠭᠰᠠᠭᠠᠷ ᠪᠠᠶᠢᠲᠠᠯ᠎ᠠ ᠬᠡᠳᠦᠨ ᠰᠠᠷ᠎ᠠ ᠥᠩᠭᠡᠷᠡᠪᠡ᠃ ᠳᠡᠭᠡᠬᠦ ᠳᠤ ᠠᠯᠢᠪᠠ ᠲᠠᠭ᠎ᠠ ᠪᠠᠶᠢᠭᠰᠠᠨ ᠪᠠᠶᠢᠳᠠᠯ ᠨᠢ ᠪᠦᠷ ᠵᠦᠭ ᠲᠡᠭᠡᠨ ᠣᠷᠣᠵᠤ᠂ ᠵᠠᠯᠭᠠᠭ᠎ᠠ ᠪᠠᠷ ᠬᠤᠶᠠᠷ ᠭᠤᠷᠪᠠᠨ ᠬᠥᠮᠥᠨ ᠢ ᠢᠯᠢᠵᠦ ᠨᠤᠬᠤᠯᠠᠵᠤ ᠲᠠᠭᠤᠰᠬᠠᠬᠤ ᠳᠤ ᠴᠤ ᠭᠠᠷ ᠨᠢ ᠤᠨᠲᠠᠷᠠᠬᠤ ᠪᠠᠨ ᠪᠣᠯᠢᠯ᠎ᠠ᠃ ᠢᠩᠭᠢᠵᠦ ᠯᠠ ᠬᠠᠯᠠ ᠦᠵᠡᠵᠦ ᠪᠠᠶᠢᠵᠤ ᠢᠯᠢᠵᠦ ᠨᠤᠬᠤᠯᠠᠬᠤ ᠮᠡᠷᠭᠡᠵᠢᠯ ᠢ ᠡᠵᠡᠮᠰᠢᠵᠦ ᠠᠪᠴᠠᠢ᠃       ᠬᠡᠳᠦᠶᠢᠪᠡᠷ ᠪᠠᠭᠰᠢ ᠠᠴᠠ ᠪᠠᠨ ᠬᠥᠮᠥᠨ ᠤ ᠪᠡᠶ᠎ᠡ ᠶᠢᠨ ᠪᠡᠯᠴᠢᠷ ᠬᠠᠮᠢᠭ᠎ᠠ ᠬᠠᠮᠢᠭᠠᠭᠤᠷ ᠪᠠᠶᠢᠳᠠᠭ᠂ ᠶᠠᠭᠠᠬᠢᠵᠤ ᠢᠯᠢᠵᠦ ᠨᠤᠬᠤᠯᠠᠪᠠᠯ ᠡᠪᠡᠳᠴᠢᠨ ᠠᠷᠬᠠᠭ ᠢ ᠡᠳᠡᠭᠡᠳᠡᠭ ᠲᠤᠬᠠᠢ ᠨᠡᠯᠢᠶᠡᠳ ᠰᠤᠷᠴᠤ ᠡᠵᠡᠮᠰᠢᠭᠰᠡᠨ ᠪᠣᠯᠪᠠᠴᠤ᠂ ᠡᠮᠴᠢᠯᠡᠭᠡᠨ ᠤ ᠮᠡᠷᠭᠡᠵᠢᠯ ᠴᠢᠨᠢ ᠤᠳᠠᠭᠠᠨ ᠡᠳᠦᠷ ᠵᠤᠵᠠᠭᠠᠨ ᠬᠤᠨᠤᠭ ᠢᠶᠠᠷ ᠪᠣᠯᠪᠠᠰᠤᠷᠠᠵᠤ ᠪᠠᠶᠢᠮᠠᠨᠵᠢᠨ ᠡᠷᠳᠡᠮ ᠣᠷᠣᠳᠠᠭ ᠶᠣᠰᠣ ᠲᠠᠢ᠃ ᠡᠶᠢᠮᠦ ᠠᠴᠠ ᠭᠤᠷᠪᠠᠨ ᠵᠢᠯ ᠤᠨ ᠬᠤᠭᠤᠴᠠᠭ᠎ᠠ ᠲᠠᠢ ᠪᠠᠭᠰᠢ ᠶᠢᠨ ᠢᠶᠠᠨ ᠳᠡᠷᠭᠡᠳᠡ ᠪᠣᠯᠪᠠᠰᠤᠷᠠᠵᠤ᠂ ᠪᠠᠰᠠ ᠲᠡᠨᠳᠡ ᠰᠤᠷᠤᠯᠴᠠᠵᠦ ᠪᠠᠶᠢᠬᠤ ᠳᠠᠭᠠᠨ ᠤᠯᠠᠨ ᠡᠪᠡᠳᠴᠢᠲᠡᠨ ᠲᠠᠨᠢᠵᠤ᠂ ᠣᠲᠣ ᠵᠠᠷᠢᠮ ᠬᠥᠮᠥᠰ ᠨᠢ ᠲᠤᠰᠬᠠᠢ ᠲᠡᠭᠦᠨ ᠢ ᠡᠷᠢᠵᠦ ᠢᠷᠠᠵᠤ ᠪᠠᠷᠢᠭᠤᠯᠬᠤ ᠪᠣᠯᠪᠠ᠃ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠳ᠋ᠦᠩᠹᠧᠩ ᠪᠠᠯᠭᠠᠰᠤᠨ ᠤ ᠭᠤᠷᠤᠨᠠᠢ ᠭᠠᠴᠠᠭᠠᠨ ᠳᠤ ᠨᠤᠲᠤᠭᠲᠠᠢ ᠮᠥᠩᠬᠡᠪᠠᠭᠠᠲᠤᠷ ᠠᠯᠲᠠᠨᠴᠢᠮᠡᠭ ᠢᠶᠠᠷ ᠬᠥᠯ ᠤᠨ ᠠᠷᠬᠠᠭ ᠢᠶᠠᠨ ᠡᠮᠴᠢᠯᠡᠭᠦᠯᠵᠦ ᠪᠠᠶᠢᠭᠰᠠᠨ ᠢᠶᠠᠨ ᠣᠲᠣ ᠴᠤ ᠠᠯᠲᠠᠨᠴᠢᠮᠡᠭ ᠢ ᠡᠷᠢᠵᠦ ᠢᠷᠠᠵᠤ ᠪᠠᠷᠢᠭᠤᠯᠳᠠᠭ ᠪᠣᠯᠪᠠ᠃ ︽ᠲᠠᠨᠢᠯᠴᠠᠭᠠᠳ ᠤᠳᠠᠭᠰᠠᠨ ᠪᠣᠯᠬᠤᠷ ᠮᠡᠷᠭᠡᠵᠢᠯ᠂ ᠭᠠᠷ ᠤᠨ ᠡᠷᠳᠡᠮ ᠢ ᠨᠢ ᠢᠲᠡᠭᠡᠭᠡᠳ ᠡ᠊ᠨᠳᠡ ᠢᠷᠠᠵᠤ ᠪᠠᠷᠢᠭᠤᠯᠵᠤ ᠪᠠᠶᠢᠭ᠎ᠠ ᠶᠤᠮ᠃ ᠠᠯᠲᠠᠨᠴᠢᠮᠡᠭ ᠶᠡᠭᠡ ᠴᠢᠷᠮᠠᠶᠢᠯᠲᠠ ᠲᠠᠢ ᠬᠥᠮᠥᠨ᠂ ᠨᠢᠭᠡ ᠮᠠᠯᠴᠢᠨ ᠪᠦᠰᠡᠭᠦᠢ ᠪᠡᠶ᠎ᠡ ᠪᠠᠨ ᠳᠠᠭᠠᠭᠠᠨ ᠦᠢᠯᠡᠰ ᠪᠣᠰᠬᠠᠵᠤ ᠪᠠᠶᠢᠬᠤ ᠳᠤ ᠪᠢᠳᠡᠨᠡᠷ ᠳᠡᠮᠵᠢᠬᠦ ᠦᠭᠡᠢ ᠶᠠᠭᠠᠬᠢᠨ᠎ᠠ︾ ᠭᠡᠵᠦ ᠶᠠᠭ ᠬᠥᠯ ᠢᠶᠠᠨ ᠨᠤᠬᠤᠯᠠᠭᠤᠯᠵᠤ ᠰᠠᠭᠤᠬᠤ ᠵᠠᠭᠤᠷ᠎ᠠ ᠶᠠᠷᠢᠯ᠎ᠠ᠃       ᠬᠤᠲᠠ ᠭᠠᠵᠠᠷ ᠰᠠᠭᠤᠭ᠎ᠠ ᠬᠥᠮᠥᠰ ᠡᠳᠦᠷᠵᠢᠨ ᠠᠵᠢᠯ ᠶᠠᠪᠤᠳᠠᠯ ᠭᠡᠵᠦ ᠶᠠᠭᠠᠷᠠᠭᠠᠳ ᠪᠡᠶ᠎ᠡ ᠮᠠᠬᠠᠪᠤᠳ ᠢᠶᠠᠨ ᠳᠠᠪᠲᠠᠨ ᠪᠤᠯᠪᠠᠰᠤᠷᠠᠭᠤᠯᠬᠤ ᠵᠠᠪ ᠴᠢᠯᠦᠭᠡ ᠦᠭᠡᠢ᠃ ᠢᠯᠠᠩᠭᠤᠶ᠎ᠠ ᠡᠳᠦᠷᠵᠢᠨ ᠠᠯᠪᠠᠨ ᠭᠡᠷ ᠲᠤ ᠠᠵᠢᠯᠯᠠᠨ ᠤᠳᠠᠭᠠᠨ ᠰᠠᠭᠤᠳᠠᠭ ᠬᠥᠮᠥᠰ ᠬᠦᠵᠦᠭᠦᠦ ᠨᠢᠷᠤᠭᠤ ᠬᠥᠰᠢᠬᠦ ᠠᠷᠬᠠᠭ ᠲᠤ ᠪᠠᠷᠢᠭᠳᠠᠨ ᠪᠡᠶ᠎ᠡ ᠨᠢ ᠲᠠᠭ᠎ᠠ ᠦᠭᠡᠢ ᠪᠣᠯᠬᠤ ᠤᠴᠢᠷ ᠵᠥᠩᠳᠡᠭᠡᠨ᠃ ᠲᠣᠭᠲᠠᠭᠰᠠᠨ ᠬᠤᠭᠤᠴᠠᠭ᠎ᠠ ᠲᠠᠢ ᠢᠯᠢᠵᠦ ᠨᠤᠬᠤᠯᠠᠭᠤᠯᠵᠤ ᠪᠠᠶᠢᠪᠠᠯ ᠪᠠᠭ᠎ᠠ ᠰᠠᠭ᠎ᠠ ᠠᠷᠬᠠᠭ ᠢ ᠳᠡᠮᠡᠢ ᠴᠤ ᠤᠳᠠᠯ ᠦᠭᠡᠢ ᠵᠠᠰᠠᠵᠤ ᠴᠢᠳᠠᠳᠠᠭ ᠢᠶᠠᠷ ᠠᠯᠲᠠᠨᠴᠢᠮᠡᠭ ᠤᠨ ᠳᠡᠷᠭᠡᠳᠡ ᠪᠡᠶ᠎ᠡ ᠶᠢᠨ ᠬᠠᠭᠤᠴᠢ ᠡᠪᠡᠳᠴᠢᠨ ᠢᠶᠠᠨ ᠡᠳᠡᠭᠡᠵᠦ ᠠᠪᠤᠭᠰᠠᠨ ᠬᠥᠮᠥᠨ ᠴᠤ ᠤᠯᠠᠨ ᠪᠤᠢ᠃ ᠲᠡᠷᠡ ᠳᠡᠯᠭᠡᠭᠦᠷ ᠢᠶᠠᠨ ︽ᠪᠠᠳᠮᠠᠨᠢᠩᠪᠦ︾ ᠠᠮᠢᠳᠤᠷᠠᠯ ᠤᠨ ᠦᠷᠦᠭᠡ ᠭᠡᠵᠦ᠂ ᠳᠥᠷᠪᠡᠨ ᠦᠶ᠎ᠡ ᠳᠠᠮᠵᠢᠭᠰᠠᠨ ᠪᠠᠳᠮᠠᠨᠢᠩᠪᠦ ᠡᠷᠢᠬᠡ ᠪᠠᠷ ᠢᠶᠠᠨ ᠨᠡᠷ᠎ᠡ ᠠᠪᠴᠤ᠂ ᠡᠷᠳᠡᠮᠲᠦ ᠪᠠᠭᠰᠢ ᠶᠢᠨ ᠢᠶᠠᠨ ᠤᠯᠠᠮᠵᠢᠯᠠᠯᠳᠤ ᠡᠮᠨᠡᠵᠦ ᠳᠣᠮᠨᠣᠬᠤ᠂ ᠢᠯᠪᠢᠵᠦ ᠵᠠᠰᠠᠬᠤ ᠡᠷᠳᠡᠮ ᠢ ᠤᠯᠠᠮᠵᠢᠯᠠᠭᠰᠠᠨ ᠢᠶᠠᠷ ᠡᠶᠢᠨᠬᠦ ᠠᠮᠢᠳᠤᠷᠠᠯ ᠦᠢᠯᠡᠰ ᠢᠶᠠᠨ ᠪᠣᠰᠬᠠᠵᠤ ᠶᠠᠪᠤᠨ᠎ᠠ᠃       ︽ᠤᠤᠯ ᠳᠠᠭᠠᠨ ᠬᠤᠭᠤᠯᠠᠨ ᠭᠡᠷ ᠤᠨ ᠦᠢᠯᠡᠴᠢᠯᠡᠭᠴᠢ᠂ ᠪᠠᠭᠤᠳᠠᠯ ᠤᠨ ᠦᠢᠯᠡᠴᠢᠯᠡᠭᠴᠢ ᠮᠡᠲᠦ ᠶᠢᠨ ᠬᠥᠯᠥᠰᠦᠨ ᠠᠵᠢᠯ ᠬᠢᠵᠦ᠂ ᠪᠠᠰᠠ ᠥᠪᠡᠷ ᠲᠡᠭᠡᠨ ᠬᠤᠭᠤᠯᠠᠨ ᠭᠡᠷ ᠴᠤ ᠡᠵᠡᠩᠨᠡᠵᠦ ᠥᠩᠭᠡᠷᠡᠯ᠎ᠡ᠃ ᠬᠥᠮᠥᠨ ᠵᠠᠪᠠᠯ ᠥᠪᠡᠷ ᠤᠨ ᠪᠡᠶ᠎ᠡ ᠳᠡᠭᠡᠨ ᠲᠣᠬᠢᠷᠠᠭᠰᠠᠨ᠂ ᠥᠪᠡᠷ ᠢᠶᠠᠨ ᠳᠤᠷ᠎ᠠ ᠰᠣᠨᠢᠷᠬᠠᠯ ᠲᠠᠢ ᠠᠵᠢᠯ ᠮᠡᠷᠭᠡᠵᠢᠯ ᠢ ᠰᠣᠩᠭᠤᠵᠤ ᠬᠢᠪᠡᠯ ᠰᠠᠶ᠋ᠢ ᠬᠡᠵᠢᠶᠡᠳᠡ ᠲᠡᠭᠦᠨ ᠢᠶᠠᠨ ᠬᠢᠵᠦ ᠶᠠᠪᠤᠶ᠎ᠠ ᠭᠡᠰᠡᠨ ᠪᠤᠳᠤᠯ ᠲᠠᠢ ᠪᠣᠯᠵᠤ᠂ ᠮᠥᠨ ᠡᠨᠡ ᠲᠠᠯ᠎ᠠ ᠪᠠᠷ ᠥᠪᠡᠷ ᠤᠨ ᠮᠡᠷᠭᠡᠵᠢᠯ ᠡᠷᠳᠡᠮ ᠢᠶᠠᠨ ᠲᠡᠭᠡᠭᠰᠢᠯᠡᠭᠦᠯᠵᠦ ᠶᠠᠪᠤᠶ᠎ᠠ ᠭᠡᠰᠡᠨ ᠰᠣᠨᠢᠷᠬᠠᠯ ᠲᠠᠢ ᠪᠣᠯᠳᠠᠭ ᠶᠤᠮ ᠪᠠᠶᠢᠨ᠎ᠠ᠃ ᠢᠯᠢᠵᠦ ᠨᠤᠬᠤᠯᠠᠬᠤ ᠪᠠ ᠤᠯᠠᠮᠵᠢᠯᠠᠯᠳᠤ ᠳᠣᠮᠨᠣᠬᠤ ᠡᠷᠳᠡᠮ ᠢ ᠰᠤᠷᠤᠯᠴᠠᠬᠰᠠᠨ ᠠᠴᠠ ᠨᠠᠭᠠᠰᠢ ᠨᠡᠯᠢᠶᠡᠳ ᠤᠯᠠᠨ ᠬᠥᠮᠥᠨ ᠤ ᠡᠪᠡᠳᠴᠢᠨ ᠠᠷᠬᠠᠭ ᠢ ᠡᠳᠡᠭᠡᠵᠦ ᠴᠢᠳᠠᠭᠰᠠᠨ ᠳᠠᠭᠠᠨ ᠤᠯᠠᠮ ᠤᠷᠮᠠᠰᠢᠵᠤ᠂ ᠬᠤᠵᠢᠮ ᠥᠪᠡᠷ ᠤᠨ ᠡᠷᠳᠡᠮ ᠢᠶᠠᠨ ᠤᠯᠠᠮ ᠲᠡᠭᠡᠭᠰᠢᠯᠡᠭᠦᠯᠵᠦ᠂ ᠨᠡᠩ ᠤᠯᠠᠨ ᠬᠥᠮᠥᠰ ᠲᠤ ᠦᠢᠯᠡᠴᠢᠯᠡᠨ᠂ ᠬᠤᠶᠠᠷ ᠡᠷᠳᠡᠮᠲᠦ ᠪᠠᠭᠰᠢ ᠶᠢᠨ ᠢᠶᠠᠨ ᠨᠡᠷ᠎ᠡ ᠠᠯᠳᠠᠷ ᠢ ᠨᠢ ᠪᠠᠳᠠᠷᠠᠭᠤᠯᠵᠤ ᠶᠠᠪᠤᠶ᠎ᠠ ᠭᠡᠵᠦ ᠪᠤᠳᠤᠵᠤ ᠪᠠᠶᠢᠨ᠎ᠠ︾ ᠭᠡᠵᠦ ᠠᠭᠠᠭᠢᠮ᠎ᠠ ᠬᠠᠯᠠᠭᠤᠨ ᠵᠣᠨ ᠤ ᠡᠳᠦᠷ ᠤᠯᠠᠨ ᠬᠥᠮᠥᠰ ᠲᠤ ᠵᠠᠰᠠᠯ ᠬᠢᠵᠦ ᠲᠣᠯᠣᠭᠠᠢ ᠳᠦᠭᠦᠷᠡᠩ ᠬᠥᠯᠥᠰᠦ ᠠᠰᠬᠠᠷᠠᠭᠤᠯᠤᠭᠰᠠᠨ ᠠᠯᠲᠠᠨᠴᠢᠮᠡᠭ ᠶᠠᠷᠢᠯ᠎ᠠ᠃ ᠣᠲᠣ ᠠᠯᠲᠠᠨᠴᠢᠮᠡᠭ ᠮᠠᠨᠢ ᠶᠠᠭᠠᠷᠠᠤ ᠴᠠᠭ ᠲᠠᠭᠠᠨ ᠡᠳᠦᠷ ᠪᠦᠷᠢ ᠠᠷᠪᠠᠭᠠᠳ ᠬᠥᠮᠥᠨ ᠳᠤ ᠢᠯᠢᠵᠦ ᠨᠤᠬᠤᠯᠠᠬᠤ᠂ ᠳᠣᠮᠨᠣᠬᠤ ᠵᠠᠰᠠᠬᠤ ᠦᠢᠯᠡᠴᠢᠯᠡᠭᠡ ᠬᠢᠵᠦ᠂ ᠬᠠᠮᠤᠭ ᠶᠠᠭᠠᠷᠠᠤ ᠦᠶ᠎ᠡ ᠳᠡᠭᠡᠨ ᠠᠷᠪᠠᠨ ᠳᠥᠷᠪᠡᠨ ᠬᠥᠮᠥᠨ ᠳᠤ ᠦᠢᠯᠡᠴᠢᠯᠡᠵᠦ ᠥᠩᠭᠡᠷᠡᠭᠰᠡᠨ ᠭᠡᠨ᠎ᠡ᠃ ᠨᠢᠭᠡ ᠡᠳᠦᠷ ᠶᠠᠭᠠᠷᠠᠵᠤ ᠪᠠᠷᠠᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠣᠴᠢᠭᠰᠠᠨ ᠤ ᠳᠠᠷᠠᠭ᠎ᠠ ᠬᠥᠭᠰᠢᠨ ᠡᠵᠢ ᠳᠡᠭᠡᠨ ᠪᠠᠰᠠ ᠪᠡᠶ᠎ᠡ ᠶᠢᠨ ᠬᠢᠨᠢ ᠴᠢᠯᠡᠭᠡ ᠶᠢ ᠨᠢ ᠭᠠᠷᠭᠠᠬᠤ ᠭᠡᠵᠦ ᠢᠯᠢᠵᠦ ᠨᠤᠬᠤᠯᠠᠵᠤ ᠥᠭᠭᠦᠨ᠎ᠡ᠃ ᠬᠥᠭᠰᠢᠨ ᠠᠪᠤ ᠨᠢ ᠨᠢᠭᠡᠨᠲᠡ ᠶᠢᠷᠲᠢᠨᠴᠦ ᠶᠢᠨ ᠮᠥᠩᠬᠡ ᠪᠤᠰᠤ ᠶᠢ ᠦᠵᠡᠭᠰᠡᠨ ᠪᠣᠯᠬᠤᠷ ᠠᠯᠲᠠᠨᠴᠢᠮᠡᠭ ᠮᠠᠨᠢ ᠭᠠᠵᠠᠷ ᠳᠡᠭᠡᠷ᠎ᠡ ᠭᠠᠭᠴᠠ ᠪᠠᠶᠢᠭ᠎ᠠ ᠡᠵᠢ ᠪᠠᠨ ᠠᠰᠠᠷᠠᠵᠤ ᠬᠠᠷᠠᠭᠠᠯᠵᠠᠬᠤ ᠶᠢᠨ ᠳᠠᠭᠠᠤ ᠠᠵᠤ ᠠᠮᠢᠳᠤᠷᠠᠯ ᠳᠠᠭᠠᠨ ᠰᠢᠮᠳᠠᠵᠤ ᠶᠠᠪᠤᠨ᠎ᠠ᠃       ᠥᠪᠡᠷ ᠤᠨ ᠬᠥᠳᠡᠯᠮᠦᠷᠢ ᠳᠡᠭᠡᠨ ᠲᠦᠰᠢᠭᠯᠡᠨ ᠠᠵᠤ ᠠᠮᠢᠳᠤᠷᠠᠯ ᠢᠶᠠᠨ ᠴᠣᠭᠴᠠᠯᠠᠵᠤ ᠪᠠᠶᠢᠭ᠎ᠠ ᠮᠠᠯᠴᠢᠨ ᠪᠦᠰᠡᠭᠦᠢ ᠶᠡᠭᠡ ᠯᠠ ᠦᠵᠡᠰᠬᠦᠯᠡᠩᠲᠡᠢ ᠬᠠᠷᠠᠭᠳᠠᠨ᠎ᠠ᠃ ᠰᠢᠨᠠ ᠲᠠᠭᠠᠨ ᠤᠷᠤᠰᠬᠤ ᠬᠥᠳᠡᠯᠮᠦᠷᠢ ᠶᠢᠨ ᠬᠥᠯᠥᠰᠦ ᠨᠢ ᠲᠡᠭᠦᠨ ᠳᠤ ᠠᠵᠠ ᠵᠢᠷᠭᠠᠯ ᠤᠨ ᠴᠡᠴᠡᠭ ᠪᠣᠯᠣᠨ ᠳᠡᠯᠭᠡᠷᠡᠨ᠎ᠡ᠃ ᠥᠪᠡᠷ ᠤᠨ ᠭᠡᠰᠡᠨ ᠠᠵᠢᠯ ᠦᠢᠯᠡᠰ ᠲᠠᠢ ᠪᠤᠯᠤᠬᠰᠠᠨ ᠠᠴᠠ ᠠᠵᠤ ᠠᠮᠢᠳᠤᠷᠠᠯ ᠨᠢ ᠴᠤ ᠥᠭᠡᠳᠡ ᠲᠠᠢ ᠥᠩᠭᠡ ᠲᠠᠢ ᠪᠣᠯᠵᠤ᠂ ᠡᠷ᠎ᠡ ᠨᠥᠬᠦᠷ ᠲᠦᠮᠡᠨᠨᠠᠰᠤᠨ ᠨᠢ ᠴᠤ ᠥᠪᠡᠷ ᠤᠨ ᠭᠡᠰᠡᠨ ᠠᠵᠢᠯ ᠳᠠᠭᠠᠨ ᠰᠢᠮᠳᠠᠨ᠂ ᠵᠢᠵᠢᠭᠬᠡᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠲᠥᠯᠥᠭᠡ ᠥᠪᠡᠷ ᠥᠪᠡᠷ ᠤᠨ ᠬᠦᠴᠦᠨ ᠴᠢᠳᠠᠯ ᠢᠶᠠᠨ ᠡᠷᠭᠦᠵᠦ ᠶᠠᠪᠤᠵᠠᠭᠠᠨ᠎ᠠ᠃
 
ᠢᠷᠡᠯᠲᠡ᠄ ᠠᠯᠠᠱᠠ ᠶᠢᠨ ᠡᠳᠦᠷ ᠤᠨ ᠰᠣᠨᠢᠨ᠂ ᠠᠯᠠᠱᠠ ᠵᠡᠭᠦᠨ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠮᠣᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号