ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
﹇ᠤᠷᠠᠨ ᠵᠣᠬᠢᠶᠠᠯ﹈ ᠪᠣᠲᠣᠭᠤᠨ ᠪᠣᠶᠢᠯᠠᠭᠠᠨ ᠳᠤ ᠪᠣᠷᠤᠭ᠎ᠠ ᠰᠢᠪᠡᠷᠡᠨ᠎ᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/26
 ᠭᠦ᠊᠆ · ᠺᠦᠶᠧ                          ᠬᠤᠮ ᠲᠣᠨᠳᠠᠷᠭ᠎ᠠ ᠦᠭᠡᠢ ᠴᠡᠯᠡᠶᠢᠭᠰᠡᠨ ᠲᠠᠷᠭᠤᠨ ᠢᠩᠭᠡᠨ ᠤ ᠲᠠᠯᠠᠩ ᠬᠥᠬᠦ ᠨᠢ ᠴᠠᠪᠢ ᠪᠠᠨ ᠳᠦᠭᠦᠷᠭᠡᠵᠦ᠂ ᠢᠩᠭᠡ ᠪᠣᠲᠣᠭᠤ ᠪᠤᠶᠢᠯᠠᠯᠳᠤᠭᠰᠠᠨ ᠬᠠᠪᠤᠷ ᠤᠨ ᠡᠬᠢ ᠪᠠᠷ᠂ ︽ᠲᠠᠪᠤᠨ ᠵᠠᠭᠤᠨ ᠲᠡᠮᠡᠭᠡ ᠲᠠᠢ ᠲᠠᠪᠤᠱᠠᠢ ᠶᠢᠨ ᠵᠤᠵᠠᠢ︾ ᠭᠡᠳᠡᠭ ᠰᠠᠶᠢᠬᠠᠨ ᠬᠤᠴᠢ ᠲᠠᠢ ᠨᠤᠲᠤᠭ ᠤᠨ ᠳᠡᠭᠦᠦ ᠵᠤᠵᠠᠢ ᠶᠢᠨ ᠭᠡᠳᠦ ᠬᠡᠳᠦᠨ ᠤᠳᠠᠭ᠎ᠠ ᠶᠢᠨ ᠢᠩᠭᠡᠨ ᠦᠰᠦ᠋ ᠤᠤᠭᠤᠬᠤ ᠳᠤ ᠵᠠᠯᠠᠭᠰᠠᠨ ᠤᠲᠠᠰᠤ ᠶᠢ ᠲᠣᠰᠴᠦ᠂ ᠬᠠᠪᠤᠷ ᠤᠨ ᠨᠢᠭᠡᠨ ᠲᠤᠩᠭᠠᠯᠠᠭ ᠥᠷᠯᠥᠭᠡ ᠬᠦᠢᠰᠦ ᠶᠢᠨ ᠴᠢᠰᠤ ᠪᠠᠨ ᠰᠢᠩᠭᠡᠭᠡᠵᠦ ᠬᠥᠯ ᠤᠨ ᠮᠥᠷ ᠢᠶᠠᠨ ᠦᠯᠡᠳᠡᠭᠡᠵᠦ᠂ ᠠᠭᠤᠯᠠ ᠨᠢ ᠬᠠᠩᠭᠢᠨᠠᠲᠠᠯ᠎ᠠ ᠳᠠᠭᠤᠯᠠᠵᠤ᠂ ᠤᠰᠤ ᠨᠢ ᠴᠠᠯᠭᠢᠯᠠᠲᠠᠯ᠎ᠠ ᠲᠣᠭᠯᠠᠵᠤ ᠥᠰᠦᠭᠰᠡᠨ ᠪᠣᠷᠣᠭᠠᠲᠤ ᠶᠢᠨ ᠠᠭᠤᠯᠠ ᠶᠢᠨ ᠤᠳᠠᠨ ᠳᠠᠬᠢ ᠬᠠᠪᠤᠷᠵᠢᠩ ᠳᠠᠭᠠᠨ ᠬᠠᠪᠤᠷᠵᠢᠵᠤ ᠪᠠᠶᠢᠬᠤ ᠵᠤᠵᠠᠢ ᠶᠢᠨ ᠳᠤ ᠬᠦᠷᠬᠦ ᠪᠠᠷ ᠠᠶᠠᠨ ᠤ ᠵᠠᠮ ᠳᠠᠭᠠᠨ ᠭᠠᠷᠤᠯ᠎ᠠ᠃              ᠮᠢᠨᠤ ᠰᠠᠭᠤᠭᠰᠠᠨ ᠮᠠᠰᠢᠨ ᠲᠡᠷᠭᠡ ᠬᠤᠱᠣᠳ - ᠺᠤᠷᠯᠠ ᠶᠢᠨ ᠬᠤᠷᠳᠤᠨ ᠪ᠊ ᠵᠠᠮ ᠢᠶᠠᠷ ᠵᠠᠭᠤᠨ ᠬᠤᠷᠢᠨ ᠺᠢᠯᠣᠮᠧᠲᠷ ᠴᠠᠭ ᠤᠨ ᠬᠤᠷᠳᠤᠴᠠ ᠪᠠᠷ ᠠᠶᠠᠯᠠᠵᠤ ᠪᠠᠶᠢᠭᠰᠠᠨ ᠢᠶᠠᠨ᠂ ᠬᠤᠱᠣᠳ ᠰᠢᠶᠠᠨ ᠤ ᠣᠰᠢᠲᠠᠯ᠎ᠠ ᠰᠤᠮᠤᠨ ᠳᠤ ᠬᠦᠷᠴᠦ ᠬᠤᠷᠳᠤᠨ ᠪ᠊ ᠵᠠᠮ ᠠᠴᠠ ᠪᠠᠭᠤᠵᠤ᠂ ᠬᠡᠭᠡᠷ᠎ᠡ ᠶᠢᠨ ᠰᠢᠪᠠᠭᠤ ᠨᠢᠰᠦᠭᠡᠳ ᠥᠩᠭᠡᠷᠡᠬᠦ ᠳᠡᠭᠡᠨ ᠣᠶᠠᠳᠠᠮᠠᠷ ᠬᠥᠳᠡᠭᠡ ᠱᠠᠯᠠ ᠶᠢ ᠡᠪᠬᠡᠨ᠎ᠡ᠃ ᠥᠩᠭᠡᠷᠡᠭᠰᠡᠨ ᠤ ᠴᠠᠭᠠᠨ ᠲᠣᠭᠤᠰᠣ ᠳᠡᠭᠳᠡᠭᠰᠡᠨ ᠬᠠᠶᠢᠷ ᠴᠢᠯᠠᠭᠤ ᠲᠠᠢ ᠡ᠊ᠩᠭᠦᠯ ᠳᠤᠩᠬᠤᠯ ᠪᠠᠶᠢᠭᠠᠯᠢᠯᠢᠭ ᠬᠠᠭᠠᠯᠭ᠎ᠠ ︵ᠵᠠᠮ︶᠎ ᠨᠢ ᠣᠳᠣ ᠬᠡᠭᠡᠨᠴᠢᠷ ᠬᠡᠦᠬᠡᠨ ᠵᠢᠰᠦ ᠪᠠᠨ ᠭᠡᠷᠳᠡᠮᠡᠭᠡᠷ ︵ᠲᠣᠯᠢᠳᠠᠮᠠᠷ︶ ᠨᠢᠭᠤᠷ ᠤᠨ ᠭᠡᠷ ︵ᠵᠢᠰᠦ ᠲᠣᠯᠢᠳᠠᠬᠤ ᠲᠣᠯᠢ︶ ᠰᠢᠭ ᠲᠡᠭᠰᠢᠬᠡᠨ ᠴᠠᠷᠳᠠᠮᠠᠯ ᠬᠠᠭᠠᠯᠭ᠎ᠠ ᠪᠣᠯᠵᠤ᠂ ᠮᠠᠰᠢᠨ ᠲᠡᠷᠭᠡ ᠨᠢᠭᠡ ᠯᠡ ᠭᠡᠮ ᠢᠶᠠᠷ ᠳᠠᠪᠬᠢᠬᠤ ᠳᠤ ᠬᠠᠪᠤᠷ ᠤᠨ ᠵᠡᠷᠭᠡᠯᠭᠡᠨ ᠳᠤᠮᠳᠠ ᠪᠥᠷᠲᠥᠯᠵᠡᠬᠦ ᠬᠥᠳᠡᠭᠡ ᠲᠠᠯ᠎ᠠ᠂ ᠬᠤᠯᠠ ᠶᠢᠨ ᠬᠤᠯᠠ ᠳᠤ ᠤᠨᠢᠶᠠᠷᠲᠤᠬᠤ ᠠᠭᠤᠯᠠ ᠬᠠᠶᠢᠷᠬᠠᠨ᠂ ᠬᠠᠶᠠ ᠲᠦᠰᠦᠭᠡᠴᠡᠷ ᠬᠠᠷᠠᠭᠳᠠᠬᠤ ᠮᠠᠯᠴᠢᠳ ᠤᠨ ᠲᠣᠭᠤᠰᠭ᠋᠎ᠠ ᠪᠦᠲᠦᠴᠡ ᠲᠠᠢ ᠰᠢᠨ᠎ᠡ ᠰᠠᠭᠤᠷᠢᠰᠢᠯ ᠤᠨ ᠭᠡᠷ ᠪᠠᠶᠢᠰᠢᠩ᠂ ᠬᠠᠰᠢᠶ᠎ᠠ ᠬᠤᠷᠤᠭ᠎ᠠ᠂ ᠪᠡᠯᠴᠢᠭᠡᠷ ᠲᠡᠭᠡᠨ ᠢᠳᠡᠰᠢᠯᠡᠬᠦ ᠮᠠᠯ ᠰᠦᠷᠦᠭ ᠮᠢᠨᠤ ᠤᠷᠢᠳᠤ ᠬᠠᠷᠠᠭᠳᠠᠭ᠎ᠠ ᠦᠭᠡᠢ ᠲᠠᠩᠰᠤᠭ ᠭᠤᠶᠣ ᠦᠵᠡᠮᠵᠢ ᠪᠣᠯᠵᠤ ᠮᠠᠰᠢ ᠭᠤᠶᠣᠬᠠᠨ ᠬᠠᠷᠠᠭᠳᠠᠨ᠎ᠠ᠃ ᠪᠢ ᠲᠦᠷᠦᠭᠰᠡᠨ ᠨᠤᠲᠤᠭ ᠤᠨ ᠢᠶᠠᠨ ᠬᠤᠪᠢᠷᠠᠯ ᠬᠥᠭᠵᠢᠯ ᠳᠤ ᠰᠡᠳᠬᠢᠯ ᠭᠦᠪᠰᠦᠨ᠂ ᠰᠣᠯᠣᠭᠠᠢ ᠬᠤᠭᠤᠯᠠᠢ ᠲᠠᠢ ᠪᠠᠨ ᠮᠠᠷᠲᠠᠵᠤ ᠨᠤᠲᠤᠭ ᠤᠨ ᠲᠤᠬᠠᠢ ᠮᠠᠭᠲᠠᠭᠠᠯ ᠳᠠᠭᠤᠤ ᠭᠢᠩᠰᠢᠵᠦ᠂ ᠴᠢᠷᠠᠢ ᠳᠠᠭᠠᠨ ᠪᠠᠶᠠᠷ ᠤᠨ ᠢᠨᠢᠶᠡᠳᠦ ᠲᠣᠳᠣᠷᠠᠭᠤᠯᠤᠨ᠂ ᠰᠠᠭᠤᠳᠠᠯ ᠳᠡᠭᠡᠷ᠎ᠡ ᠪᠠᠨ ᠪᠠᠶᠢᠨ ᠪᠠᠶᠢᠨ ᠥᠨᠳᠡᠯᠵᠡᠨ ᠠᠯᠤᠰ ᠢ ᠬᠠᠯᠢᠶᠠᠵᠤ᠂ ︽ᠥᠩᠭᠡᠷᠡᠭᠰᠡᠨ ᠢ ᠪᠤᠳᠣᠪᠠᠯ ᠡ᠊ᠨᠳᠡ ᠦᠨᠡᠬᠡᠷ ᠶᠡᠭᠡ ᠬᠤᠪᠢᠷᠠᠯᠲᠠ ᠭᠠᠷᠴᠠᠢ︾ ᠭᠡᠵᠦ ᠪᠤᠳᠣᠵᠤ ᠶᠠᠪᠤᠯ᠎ᠠ᠃              ᠠᠯᠤᠰ ᠤᠨ ᠠᠯᠤᠰ ᠲᠠᠬᠢ ᠪᠣᠷᠣᠭᠠᠲᠤ ᠶᠢᠨ ᠠᠭᠤᠯᠠ ᠥᠷᠯᠥᠭᠡ ᠶᠢᠨ ᠣᠷᠭᠤᠬᠤ ᠨᠠᠷᠠᠨ ᠤ ᠲᠤᠶᠠᠭᠠᠨ ᠳᠤ ᠪᠣᠰᠣᠭᠰᠠᠨ ᠬᠠᠪᠤᠷ ᠤᠨ ᠵᠡᠷᠭᠡᠯᠭᠡᠨ ᠤ ᠴᠡᠩᠬᠡᠷ ᠮᠠᠨᠠᠨ ᠳᠤᠮᠳᠠ ᠪᠥᠷᠲᠥᠯᠵᠡᠨ ᠬᠠᠷᠠᠭᠳᠠᠨ᠎ᠠ᠃ ᠪᠣᠷᠣᠭᠠᠲᠤ ᠭᠡᠵᠦ ᠭᠤᠷᠪᠠᠨ ᠪᠡᠶ᠎ᠡ ᠪᠠᠷ ᠢᠶᠠᠨ ᠠᠭᠤᠯᠠ ᠬᠠᠶᠢᠷᠬᠠᠨ ᠳᠤ ᠪᠦᠰᠡᠯᠡᠭᠳᠡᠵᠦ᠂ ᠵᠡᠭᠦᠨ ᠡᠮᠦᠨ᠎ᠡ ᠪᠡᠶ᠎ᠡ ᠪᠠᠷ ᠢᠶᠠᠨ ᠠᠭᠤᠳᠠᠮ ᠲᠡᠨᠢᠭᠡᠷ ᠡᠯᠡᠰᠦᠷᠬᠡᠭ ᠬᠥᠳᠡᠭᠡ ᠲᠠᠢ ᠵᠠᠯᠭᠠᠯᠳᠤᠭᠰᠠᠨ ᠬᠤᠳᠣᠭᠤᠷᠴᠢᠷ ᠭᠠᠵᠠᠷ ᠪᠠᠶᠢᠵᠤ᠂ ᠡᠷᠭᠢᠨ ᠲᠣᠭᠤᠷᠢᠨ ᠤ ᠠᠭᠤᠯᠠ ᠬᠠᠶᠢᠷᠬᠠᠨ ᠢ ᠨᠢ ᠪᠣᠷᠣᠭᠠᠲᠤ ᠶᠢᠨ ᠠᠭᠤᠯᠠ ᠭᠡᠵᠦ᠂ ᠵᠡᠭᠦᠨ ᠡᠮᠦᠨ᠎ᠡ ᠪᠡᠶ᠎ᠡ ᠳᠠᠬᠢ ᠠᠭᠤᠳᠠᠮ ᠲᠡᠨᠢᠭᠡᠷ ᠡᠯᠡᠰᠦᠷᠬᠡᠭ ᠬᠥᠳᠡᠭᠡ ᠶᠢ ᠨᠢ ᠪᠣᠷᠣᠭᠠᠲᠤ ᠶᠢᠨ ᠬᠥᠳᠡᠭᠡ ᠭᠡᠵᠦ᠂ ᠪᠣᠷᠣᠭᠠᠲᠤ ᠠᠴᠠ ᠪᠣᠷᠣᠭᠠᠲᠤ ᠶᠢᠨ ᠠᠭᠤᠯᠠ ᠬᠦᠷᠬᠦ ᠬᠠᠪᠴᠢᠭ ᠢ ᠪᠣᠷᠣᠭᠠᠲᠤ ᠶᠢᠨ ᠬᠠᠪᠴᠢᠭ ᠭᠡᠳᠡᠭ᠃ ᠲᠡᠦᠬᠡ ᠰᠤᠳᠤᠷ ᠤᠨ ᠲᠡᠮᠳᠡᠭᠯᠡᠯ ᠠᠴᠠ ᠦᠵᠡᠪᠡᠯ᠂ ᠪᠣᠷᠣᠭᠠᠲᠤ ᠭᠡᠳᠡᠭ ᠨᠡᠷ᠎ᠡ ᠨᠢ ︽ᠬᠤᠷ᠎ᠠ ᠪᠣᠷᠤᠭ᠎ᠠ ᠶᠡᠬᠡᠲᠡᠢ︾ ᠭᠡᠳᠡᠭ ᠤᠳᠬ᠎ᠠ ᠲᠠᠢ ᠨᠡᠷ᠎ᠡ ᠭᠡᠨ᠎ᠡ᠃ ᠤᠳᠤ ᠠᠴᠠ ᠵᠠᠭᠤ ᠲᠠᠪᠢᠭᠠᠳ ᠵᠢᠯ ᠤᠨ ᠡᠮᠦᠨ᠎ᠡ ︽ᠲᠠᠤᠯᠠᠢ ᠵᠢᠯ ᠤᠨ ᠦᠶᠡᠷ︾ ᠭᠡᠵᠦ ᠡᠨᠡ ᠨᠤᠲᠤᠭ ᠲᠤ ᠰᠦᠷᠡᠬᠡᠢ ᠨᠢᠭᠡ ᠦᠶᠡᠷ ᠪᠣᠯᠤᠭᠰᠠᠨ ᠭᠡᠨ᠎ᠡ᠃ ᠲᠡᠷᠡ ᠵᠢᠯ ᠤᠨ ᠵᠤᠨ ᠪᠣᠷᠣᠭᠠᠲᠤ ᠶᠢᠨ ᠠᠭᠤᠯᠠ ᠳᠤ ᠰᠠᠷ᠎ᠠ ᠭᠠᠷᠤᠢ ᠬᠤᠷ᠎ᠠ ᠪᠣᠷᠤᠭ᠎ᠠ ᠣᠷᠣᠵᠤ᠂ ᠣᠯᠠᠨ ᠠᠭᠤᠯᠠ ᠳᠠᠪᠠᠭᠠᠨ ᠠᠴᠠ ᠨᠤᠷᠠᠭ ᠨᠡᠭᠦᠵᠦ᠂ ᠤᠷᠭᠤᠭ᠎ᠠ ᠮᠣᠳᠣ ᠦᠨᠳᠦᠰᠦ ᠪᠠᠷ ᠢᠶᠠᠨ ᠪᠤᠯᠭᠤᠷᠠᠨ ᠭᠤᠣᠯ ᠤᠨ ᠦᠶᠡᠷ ᠲᠤ ᠤᠷᠤᠰᠴᠤ᠂ ᠪᠣᠷᠣᠭᠠᠲᠤ ᠶᠢᠨ ᠬᠠᠪᠴᠢᠭ ᠤᠨ ᠲᠡᠮᠡᠭᠡ ᠰᠢᠷᠭᠤᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠪᠢᠲᠡᠭᠦᠦ ᠣᠢ ᠮᠣᠳᠣ ᠦᠶᠡᠷ ᠲᠤ ᠬᠠᠮᠤᠷᠤᠭᠳᠠᠵᠤ᠂ ᠪᠣᠷᠣᠭᠠᠲᠤ ᠶᠢᠨ ᠬᠠᠪᠴᠢᠭ ᠵᠠᠳᠠᠭᠠᠶᠢᠷᠠᠨ ᠵᠠᠮ ᠭᠠᠷᠤᠭᠰᠠᠨ ᠭᠡᠳᠡᠭ᠃ ᠰᠢᠳᠠᠷ ᠭᠦᠷᠳᠡᠯ᠎ᠡ ᠪᠣᠷᠣᠭᠠᠲᠤ ᠶᠢᠨ ᠬᠥᠳᠡᠭᠡ ᠳᠤ ᠪᠣᠷᠣᠭᠠᠲᠤ ᠶᠢᠨ ᠠᠭᠤᠯᠠ ᠶᠢᠨ ᠦᠶᠡᠷ ᠲᠤ ᠦᠨᠳᠦᠰᠦ ᠪᠠᠷ ᠢᠶᠠᠨ ᠪᠤᠯᠭᠤᠷᠠᠨ ᠤᠷᠤᠰᠴᠤ ᠢᠷᠡᠭᠰᠡᠨ ᠬᠠᠷᠭᠠᠢ ︵ᠨᠠᠷᠠᠰᠤ              ᠂ ᠵᠥᠭᠦᠨ ︵ᠬᠠᠶᠢᠯᠠᠰᠤ︶ ᠪᠠᠶᠢᠭᠰᠠᠨ ᠢ ᠪᠣᠷᠣᠭᠠᠲᠤ ᠶᠢᠨ ᠮᠠᠯᠴᠢᠳ ᠠᠪᠴᠤ ᠲᠦᠯᠡᠰᠢ ᠬᠢᠵᠦ ᠪᠠᠶᠢᠭᠰᠠᠨ ᠪᠢᠯᠡ ᠭᠡᠵᠦ ᠨᠠᠮᠠᠶᠢ ᠪᠠᠭ᠎ᠠ ᠳᠤ ᠪᠣᠷᠣᠭᠠᠲᠤ ᠶᠢᠨ ᠨᠠᠰᠤᠲᠠᠶᠢᠴᠤᠤᠯ ᠬᠠᠭᠤᠴᠢᠯᠠᠳᠠᠭ ᠪᠠᠶᠢᠭᠰᠠᠨ ᠶᠤᠮ᠃              ᠪᠢ ᠪᠣᠷᠣᠭᠠᠲᠤ ᠶᠢᠨ ᠴᠢᠭᠤᠯᠭᠠᠨ ︵ᠪᠣᠷᠣᠭᠠᠲᠤ ᠲᠣᠰᠬᠤᠨ︶᠎ ᠳᠤ ᠬᠦᠷᠬᠦ ᠳᠤ ᠵᠣᠵᠠᠢ ᠭᠡᠷ ᠤᠨ ᠬᠥᠮᠥᠨ ᠱᠢᠷᠦ ᠲᠠᠢ ᠪᠠᠨ ᠫᠢᠺᠡ ᠮᠠᠰᠢᠨ ᠢᠶᠠᠷ ᠢᠷᠡᠵᠤ ᠪᠢᠳᠡᠨ ᠢ ᠲᠤᠰᠴᠣ ᠠᠪᠤᠯ᠎ᠠ᠃ ᠪᠢᠳᠠᠨ ᠬᠠᠮᠲᠤ ᠪᠠᠷ ᠪᠣᠷᠣᠭᠠᠲᠤ ᠶᠢᠨ ᠴᠢᠭᠤᠯᠭᠠᠨ ᠠᠴᠠ ᠠᠷᠪᠠᠨ ᠺᠢᠯᠣᠮᠧᠲᠷ ᠵᠡᠭᠦᠨᠲᠡᠢ ᠪᠠᠶᠢᠬᠤ ᠵᠣᠵᠠᠢ ᠶᠢᠨ ᠬᠠᠪᠤᠷᠵᠢᠩ ᠤᠳᠠᠨ ᠳᠤ ᠬᠦᠷᠬᠦ ᠳᠤ᠂ ᠡ᠊ᠨᠳᠡᠭᠢ ᠶᠢᠨ ᠡᠪᠡᠰᠦ ᠤᠷᠭᠤᠮᠠᠯ ᠬᠥᠬᠡᠷᠡᠭᠡᠳ ᠦᠭᠡᠢ ᠪᠠᠶᠢᠲᠠᠯ᠎ᠠ᠂ ᠬᠤᠱᠣᠳ ᠰᠢᠶᠠᠨ ᠤ ᠣᠢ ᠰᠢᠭᠤᠢ ᠨᠤᠲᠤᠭ ᠪᠡᠯᠴᠢᠭᠡᠷ ᠤᠨ ᠲᠣᠪᠴᠢᠶ᠎ᠠ ᠠᠴᠠ 2021 ᠣᠨ ᠤ 9 ᠰᠠᠷ᠎ᠠ ᠳᠤ ︽ᠤᠯᠤᠰ ᠤᠨ ᠭᠤᠷᠪᠠᠳᠤᠭᠠᠷ ᠵᠡᠷᠭᠡ ᠶᠢᠨ ᠡᠷᠲᠡᠨ ᠤ ᠮᠣᠳᠣ᠂ ᠳ᠋ᠤᠭᠠᠷᠯᠠᠯ ᠨᠢ 652828-0047᠃ ᠤᠳᠠ ᠤᠯᠢᠶᠠᠰᠤ ᠶᠢᠨ ᠢᠵᠠᠭᠤᠷ᠂ 380 ᠨᠠᠰᠤᠲᠠᠢ᠂ ᠤᠯᠢᠶᠠᠰᠤ ᠳᠤ ᠬᠠᠷᠢᠶᠠᠳᠠᠨ᠎ᠠ︾ ᠬᠡᠮᠡᠨ ᠲᠣᠳᠣᠯᠠᠨ ᠲᠣᠭᠲᠠᠭᠠᠵᠤ᠂ ᠬᠠᠯᠠᠭ᠎ᠠ ᠬᠠᠪᠲᠠᠰᠤ ︵ᠨᠢᠮᠭᠡᠨ ᠲᠡᠮᠦᠷ ᠬᠠᠪᠲᠠᠰᠤ︶᠎ ᠳᠤ ᠬᠢᠲᠠᠳ᠂ ᠠᠩᠭ᠍ᠯᠢ ᠦᠰᠦᠭ ᠢᠶᠠᠷ ᠪᠢᠴᠢᠵᠦ ᠬᠠᠲᠠᠭᠰᠠᠨ ᠦᠨᠳᠦᠰᠦ ᠰᠠᠭᠤᠷᠢ ᠎ ᠨᠢ ᠵᠠᠭᠤᠨ ᠥᠩᠭᠡᠷᠡᠦ ᠬᠠᠪᠲᠠᠭᠠᠢ ᠳᠥᠷᠪᠡᠯᠵᠢᠨ ᠮᠧᠲᠷ ᠲᠠᠯᠠᠪᠠᠢ ᠶᠢ ᠡᠵᠡᠯᠡᠭᠰᠡᠨ ᠨᠢᠭᠡ ᠬᠥᠭᠰᠢᠨ ᠤᠳᠠᠨ ᠮᠣᠳᠣᠨ ᠬᠠᠷᠢᠨ ᠰᠠᠭᠰᠠᠶᠢᠨ ᠬᠥᠬᠡᠷᠡᠵᠦ ᠠᠮᠢᠯᠠᠯ ᠤᠨ ᠥᠩᠭᠡ ᠪᠠᠷ ᠪᠢᠯᠬᠠᠵᠤ ᠬᠠᠷᠠᠭᠳᠠᠨ᠎ᠠ᠃ ᠤᠳᠠᠨ ᠮᠣᠳᠣᠨ ᠤ ᠳᠡᠭᠡᠳᠦ ᠲᠠᠯ᠎ᠠ ᠶᠢᠨ ᠨᠢᠭᠡᠨ ᠪᠤᠯᠠᠭ ᠠᠴᠠ ᠴᠡᠭᠡᠨ ᠲᠤᠩᠭᠠᠯᠠᠭ ᠤᠰᠤ ᠭᠤᠷᠴᠢᠭᠢᠨᠠᠨ ᠤᠷᠤᠰᠴᠤ᠂ ᠪᠤᠯᠠᠭ ᠤᠨ ᠡᠬᠢᠨ ᠤ ᠲᠣᠪᠤᠩ ᠳᠡᠭᠡᠷ᠎ᠡ ᠬᠡᠶᠢᠮᠣᠷᠢ᠂ ᠳᠠᠷᠴᠤᠭ᠂ ᠵᠠᠯᠮ᠎ᠠ ᠤᠶᠠᠵᠤ ᠬᠡᠶᠢᠰᠬᠡᠭᠰᠡᠨ ᠨᠢᠭᠡ ᠵᠢᠵᠢᠭ ᠳᠠᠬᠢᠯᠭᠠᠨ ᠬᠠᠷᠠᠭᠳᠠᠵᠤ᠂ ᠲᠣᠰ ᠠᠶᠢᠯ ᠤᠨᠠᠭᠰᠠᠨ ᠰᠢᠷᠣᠢ ᠤᠤᠭᠤᠭᠰᠠᠨ ᠤᠰᠤ ᠪᠠᠨ ᠥᠪᠡᠷ ᠤᠨ ᠠᠮᠢᠨ ᠲᠠᠢ ᠪᠠᠨ ᠠᠳᠠᠯᠢᠬᠠᠨ ᠳᠡᠭᠡᠳᠦᠯᠡᠨ ᠲᠠᠭᠢᠳᠠᠭ ᠰᠦᠵᠢᠭ ᠪᠢᠰᠢᠷᠡᠯ ᠲᠠᠢ ᠠᠶᠢᠯ ᠪᠠᠶᠢᠨ᠎ᠠ ᠭᠡᠳᠡᠭ ᠢ ᠭᠡᠷᠡᠴᠢᠯᠡᠨ᠎ᠡ᠃ ᠲᠡᠮᠡᠭᠡ ᠶᠢᠨ ᠬᠤᠲᠠᠨ ᠳᠤ ᠭᠤᠴᠢᠭᠠᠳ ᠪᠣᠲᠣᠭᠤ ᠤᠶᠠᠭᠠᠨ ᠳᠠᠭᠠᠨ ᠪᠠᠶᠢᠵᠤ᠂ ᠵᠤᠵᠠᠢ ᠶᠢᠨ ︽ᠡᠨᠡ ᠵᠢᠯ ᠲᠦᠷᠦᠭᠦ ᠢᠩᠭᠡ ᠣᠳᠣ ᠲᠦᠷᠦᠭᠡᠳ ᠬᠠᠭᠠᠰᠯᠠᠪᠠ︾ ᠭᠡᠬᠦ ᠶᠠᠷᠢᠶᠠᠨ ᠠᠴᠠ ᠨᠢ ᠦᠵᠡᠬᠦ ᠳᠤ ᠡᠨᠡ ᠵᠢᠯ ᠵᠢᠷᠠᠭᠠᠳ ᠢᠩᠭᠡ ᠲᠦᠷᠦᠭᠦ ᠪᠠᠶᠢᠵᠤ᠂ ᠲᠥᠰᠥᠭᠡᠯᠡᠨ ᠪᠤᠳᠣᠪᠠᠯ ᠵᠠᠭᠤ ᠬᠤᠷᠢ ᠭᠤᠴᠢᠨ ᠲᠦᠷᠦᠭᠦ ᠢᠩᠭᠡ ᠲᠠᠢ ᠠᠶᠢᠯ ᠶᠤᠮ ᠪᠠᠶᠢᠨ᠎ᠠ᠃              ᠪᠢᠳᠡᠨ ᠵᠣᠵᠠᠢ ᠶᠢᠨ ᠲᠣᠭᠤᠰᠭ᠋᠎ᠠ ᠪᠦᠲᠦᠴᠡ ᠲᠠᠢ ᠬᠤᠶᠠᠷ ᠲᠠᠰᠤᠯᠭ᠎ᠠ ᠭᠡᠷ ᠲᠤ ᠣᠷᠣᠬᠤ ᠳᠤ ᠪᠠᠭ᠎ᠠ ᠶᠢᠨ ᠦᠶ᠎ᠡ ᠳᠡᠭᠡᠨ ᠢᠳᠡᠵᠦ ᠤᠤᠭᠤᠵᠤ ᠵᠠᠩᠰᠢᠭᠰᠠᠨ ᠬᠤᠨᠢᠨ ᠤ ᠪᠤᠷᠴᠡ ᠶᠢᠨ ᠠᠩᠬᠢᠯᠤᠮ᠎ᠠ ᠦᠨᠦᠷ ᠬᠠᠮᠠᠷ ᠤᠷᠤᠭᠤ ᠴᠣᠷᠭᠢᠵᠤ ᠰᠢᠯᠦᠰᠦ ᠭᠤᠭᠤᠵᠢᠭᠤᠯᠤᠨ᠎ᠠ᠃ ᠴᠠᠢ ᠶᠢᠨ ᠳᠠᠷᠠᠭ᠎ᠠ ᠲᠠᠪᠠᠭ ᠲᠠᠢ ᠰᠢᠭᠦᠰᠦ ᠰᠢᠷᠡᠭᠡ ᠳᠡᠭᠡᠷ᠎ᠡ ᠤᠷᠢᠭᠳᠠᠵᠤ᠂ ᠳᠠᠭᠠᠯᠳᠤᠭᠤᠯᠤᠨ ︽ᠢᠳᠡᠭᠡ ᠴᠡᠭᠡ ᠶᠢᠨ ᠳᠡᠭᠡᠵᠢ︾ ᠭᠡᠵᠦ ᠬᠤᠶᠠᠷ ᠯᠣᠩᠬᠤ ᠠᠷᠢᠬᠢ ᠭᠠᠷᠭᠠᠯ᠎ᠠ᠃ ᠪᠢ ᠬᠠᠨᠢᠶᠠᠯᠭᠠᠭᠠᠳ ᠬᠤᠶᠠᠷ ᠰᠠᠷ᠎ᠠ ᠭᠠᠷᠤᠢ ᠠᠷᠢᠬᠢ ᠤᠤᠭᠤᠭᠰᠠᠨ ᠦᠭᠡᠢ ᠪᠤᠯᠪᠠᠴᠣ ᠡᠨᠡ ᠣᠷᠣᠢ ᠨᠤᠲᠤᠭ ᠤᠨ ᠳᠡᠭᠦᠦ ᠶᠢᠨ ᠨᠤᠲᠤᠭ ᠤᠨ ᠰᠡᠳᠬᠢᠯ ᠰᠢᠩᠭᠡᠭᠰᠡᠨ ᠠᠷᠢᠬᠢ ᠬᠠᠷᠢᠨ ᠬᠠᠯᠠᠭᠤ ᠣᠷᠭᠢᠨ ᠬᠤᠷᠭᠤ ᠰᠢᠭ᠋ ᠬᠤᠳᠣᠭᠤᠳᠤ ᠭᠡᠳᠡᠰᠦ ᠳᠤ ᠭᠤᠯᠭᠤᠨ ᠣᠷᠣᠵᠤ ᠪᠠᠶᠢᠯ᠎ᠠ᠃              ᠪᠢᠳᠡᠨ ᠨᠢᠭᠡ ᠲᠠᠯ᠎ᠠ ᠪᠠᠷ ᠠᠷᠢᠬᠢ ᠪᠠᠨ ᠪᠠᠯᠭᠤᠵᠤ ᠨᠢᠭᠡ ᠲᠠᠯ᠎ᠠ ᠪᠠᠷ ᠵᠣᠭᠤᠭ ᠳᠡᠯᠭᠡᠵᠦ ᠰᠠᠭᠤᠲᠠᠯ᠎ᠠ ᠵᠤᠵᠠᠢ ᠮᠠᠨᠢ ᠭᠡᠷ ᠤᠨ ᠬᠥᠮᠥᠨ ᠱᠢᠷᠦ ᠳᠡᠭᠡᠨ᠄               - ᠠᠯᠠᠱᠠ ᠶᠢᠨ ᠠᠶᠠᠰ ᠤᠯᠠᠭᠠᠨ ᠢᠩᠭᠡ ᠥᠨᠥ ᠮᠠᠩᠭᠠᠳᠣᠷ ᠲᠦᠷᠦᠮᠡᠷ ᠪᠠᠶᠢᠨ᠎ᠠ ᠭᠡᠬᠦ ᠶᠢ ᠰᠣᠨᠣᠰᠤᠭᠠᠳ ᠪᠢ ᠤᠬᠤᠴᠢᠯᠠᠨ᠄               - ᠲᠠᠨᠠᠶᠢᠬᠢᠨ ᠠᠯᠠᠱᠠ ᠠᠴᠠ ᠪᠠᠰᠠ ᠲᠡᠮᠡᠭᠡ ᠣᠷᠣᠭᠤᠯᠤᠭᠰᠠᠨ ᠶᠤᠮ ᠤᠤ︖ ᠭᠡᠬᠦ ᠳᠤ ᠵᠣᠵᠠᠢ᠄               - ᠲᠡᠶᠢᠮᠤ᠃ ᠮᠠᠨᠠᠶᠢᠬᠢᠨ 2009 ᠣᠨ ᠳᠤ ᠥᠪᠥᠷ ᠮᠣᠩᠭᠤᠯ ᠤᠨ ᠠᠯᠠᠱᠠ ᠠᠶᠢᠮᠠᠭ ᠠᠴᠠ ᠬᠤᠷᠢᠨ ᠨᠠᠢᠮᠠᠨ ᠢᠩᠭᠡ᠂ ᠬᠤᠶᠠᠷ ᠪᠤᠤᠷ᠎ᠠ ᠣᠷᠣᠭᠤᠯᠤᠯ᠎ᠠ᠃ ᠠᠯᠠᠱᠠ ᠲᠡᠮᠡᠭᠡ ᠮᠠᠨ ᠤ ᠡ᠊ᠨᠳᠡᠭᠢ ᠶᠢᠨ ᠬᠤᠱᠣᠳ ᠤᠨ ᠲᠡᠮᠡᠭᠡ ᠲᠠᠢ ᠠᠳᠠᠯᠢᠬᠠᠨ ᠪᠡᠶ᠎ᠡ ᠭᠠᠳᠠᠷ ᠶᠡᠬᠡᠲᠡᠢ᠂ ᠴᠢᠳᠠᠯ ᠲᠡᠩᠬᠡᠭᠡ ᠰᠠᠶᠢᠨ ᠢᠶᠠᠷ ᠢᠶᠠᠨ ᠡᠯᠡᠰᠦᠨ ᠪᠠᠯᠠᠷ ᠭᠠᠵᠠᠷ᠂ ᠬᠠᠭᠰᠠᠭᠤ ᠬᠠᠭᠤᠷᠠᠢ ᠭᠠᠵᠠᠷ ᠲᠤ ᠮᠠᠯᠵᠢᠬᠤ ᠪᠠ ᠬᠡᠷᠡᠭᠯᠡᠬᠦ ᠳᠤ ᠵᠣᠬᠢᠮᠵᠢᠲᠠᠢ᠂ ᠥᠩᠭᠡ ᠵᠢᠰᠦᠮ ᠨᠢ ᠰᠢᠷ᠎ᠠ᠂ ᠬᠦᠷᠡᠩ ᠂ ᠪᠣᠷᠣ ᠭᠤᠣᠯᠳᠠᠭᠤ᠂ ᠵᠣᠭᠳᠣᠷ ᠤᠨ ᠰᠣᠷ ᠬᠢᠯᠭᠠᠰᠤ ᠨᠢ ᠨᠠᠷᠢᠯᠢᠭ ᠣᠷᠳᠣ᠂ ᠨᠣᠣᠯᠣᠭᠤᠷ ᠨᠢ ᠨᠢᠭᠲᠠ ᠵᠥᠭᠡᠯᠡᠨ᠂ ᠤᠶᠠᠨ ᠬᠠᠷᠢᠮᠠᠬᠠᠢ ᠪᠥᠭᠡᠳ ᠪᠠᠲᠤ᠂ ᠭᠠᠷᠤᠯᠲᠠ ᠶᠢᠨ ᠬᠡᠮᠵᠢᠶ᠎ᠡ ᠳᠡᠭᠡᠷ᠎ᠡ ᠪᠠᠶᠢᠳᠠᠭ᠃ ᠳᠤᠮᠳᠠ ᠠᠴᠠ ᠳᠡᠭᠡᠭᠰᠢ ᠲᠠᠷᠭᠤ ᠬᠦᠴᠦ ᠲᠠᠢ ᠲᠡᠮᠡᠭᠡᠨ ᠠᠴᠠ ᠬᠠᠮᠤᠭ ᠠᠷᠪᠢᠨ ᠳᠠᠭᠠᠨ 960 ᠵᠢᠩ ᠴᠣᠯ ᠮᠢᠬ᠎ᠠ᠂ 165 ᠵᠢᠩ ᠥᠭᠡᠬᠦ ᠭᠠᠷᠴᠤ᠂ ᠬᠠᠮᠤᠭ ᠪᠠᠭ᠎ᠠ ᠳᠠᠭᠠᠨ 276 ᠵᠢᠩ ᠴᠣᠯ ᠮᠢᠬ᠎ᠠ᠂ 38 ᠵᠢᠩ ᠥᠭᠡᠬᠦ ᠭᠠᠷᠳᠠᠭ ᠁ ᠭᠡᠵᠦ ᠲᠠᠨᠢᠯᠴᠠᠭᠤᠯᠤᠯ᠎ᠠ᠃ ᠯᠣᠩᠬᠤ ᠳᠠᠬᠢ ᠠᠭᠠᠭ ᠤᠨ ᠬᠦᠦ ᠳᠣᠷᠣᠭᠰᠢᠯᠠᠬᠤ ᠶᠢ ᠳᠠᠭᠠᠯᠳᠤᠨ᠂ ᠠᠪᠤ ᠶᠢᠨ ᠬᠦᠦ ᠶᠢᠨ ᠦᠭᠡ ᠣᠯᠠᠰᠢᠷᠠᠨ ᠲᠠᠭᠤ ᠳᠡᠭᠡᠭᠰᠢᠯᠡᠨ᠎ᠡ᠃ ᠵᠤᠵᠠᠢ᠄               - ᠲᠡᠮᠡᠭᠡ ᠭᠡᠳᠡᠭ ᠶᠡᠭᠡ ᠪᠤᠶᠠᠨ ᠲᠠᠢ ᠠᠮᠢᠳᠠᠨ᠂ ᠲᠡᠮᠡᠭᠡ ᠭᠠᠭᠴᠠ ᠪᠡᠶ᠎ᠡ ᠳᠡᠭᠡᠨ ᠠᠷᠪᠠᠨ ᠬᠤᠶᠠᠷ ᠵᠢᠯ ᠤᠨ ᠰᠢᠨᠵᠢ ᠶᠢ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠠᠮᠢᠳᠠᠨ ᠭᠡᠵᠦ ᠤᠷᠮ᠎ᠠ ᠪᠠᠭ᠋ᠠᠲᠠᠢ ᠪᠤᠷᠠᠬᠤ ᠳᠤ ᠪᠢ ᠠᠯᠠᠩᠳᠤᠷᠠᠨ᠄               - ᠶᠠᠮᠠᠷ ᠤᠴᠢᠷ ᠪᠣᠯᠴᠢᠬᠠᠪᠠ︖ ᠲᠡᠮᠡᠭᠡᠨ ᠭᠠᠭᠴᠠ ᠪᠡᠶ᠎ᠡ ᠳᠡᠭᠡᠨ ᠠᠷᠪᠠᠨ ᠬᠤᠶᠠᠷ ᠵᠢᠯ ᠤᠨ ᠰᠢᠨᠵᠢ ᠶᠢ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠠᠮᠢᠳᠠᠨ ᠭᠡᠨ᠎ᠡ ᠤᠤ︖ ᠬᠡᠯᠡᠭᠡᠳ ᠥᠭᠭᠦᠨ᠎ᠡ ᠤᠤ︖ ᠭᠡᠬᠦ ᠳᠤ ᠵᠣᠵᠠᠢ ᠡᠮᠦᠨᠡᠬᠢ ᠬᠤᠨᠳᠠᠭ᠎ᠠ ᠲᠠᠢ ᠠᠷᠢᠬᠢ ᠪᠠᠨ ᠪᠢᠳᠡᠨ ᠳᠤ ᠪᠠᠷᠢᠭᠰᠠᠨ ᠢᠶᠠᠨ᠄               - ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ ᠠᠮᠢᠳᠠᠨ ᠤ ᠵᠠᠶᠠᠭᠠᠴᠢ ᠠᠷᠪᠠᠨ ᠬᠤᠶᠠᠷ ᠵᠢᠯ ᠳᠤ ᠠᠳᠤᠭᠤᠰᠤᠨ ᠠᠮᠢᠳᠠᠨ ᠢ ᠣᠷᠣᠭᠤᠯᠬᠤ ᠪᠤᠯᠬᠤ ᠳᠠᠭᠠᠨ ᠲᠡᠮᠡᠭᠡ ᠬᠤᠯᠤᠭᠠᠨ᠎ᠠ ᠬᠤᠶᠠᠷ ᠤᠨ ᠨᠢᠭᠡ ᠶᠢ ᠰᠣᠩᠭᠤᠬᠤ ᠪᠠᠷ ᠲᠣᠭᠲᠠᠬᠤ ᠳᠤ ᠲᠡᠮᠡᠭᠡ᠄               -ᠲᠡᠭᠷᠢ ᠶᠢᠨ ᠴᠢᠨᠡᠭᠡᠨ ᠪᠡᠶ᠎ᠡ ᠲᠠᠢ ᠪᠢ ᠪᠠᠶᠢᠵᠤ ᠪᠠᠶᠢᠲᠠᠯ᠎ᠠ ᠳᠡᠪᠡᠨᠡ ᠶᠢᠨ ᠴᠢᠨᠡᠭᠡᠨ ᠪᠡᠶ᠎ᠡ ᠲᠠᠢ ᠬᠤᠯᠤᠭᠠᠨ᠎ᠠ ᠶᠠᠭᠤ ᠪᠤᠢ︖ ᠭᠡᠬᠦ ᠳᠤ ᠬᠤᠯᠤᠭᠠᠨ᠎ᠠ᠄               -ᠪᠢ ᠳᠠᠪᠠᠨᠠ ᠶᠢᠨ ᠴᠢᠨᠡᠭᠡᠨ ᠪᠡᠶ᠎ᠡ ᠲᠠᠢ ᠴᠣ᠋ ᠲᠡᠭᠷᠢ ᠶᠢᠨ ᠴᠢᠨᠡᠭᠡᠨ ᠪᠡᠶ᠎ᠡ ᠲᠠᠢ ᠲᠡᠮᠡᠭᠡᠨ ᠳᠡᠭᠡᠷ᠎ᠡ ᠭᠠᠷᠴᠤ ᠴᠢᠳᠠᠨ᠎ᠠ︕ ᠭᠡᠳ ᠲᠡᠮᠡᠭᠡᠨ ᠤ ᠪᠦᠭᠦᠨ ᠳᠡᠭᠡᠷ᠎ᠡ ᠭᠠᠷᠴᠤ ᠰᠠᠭᠤᠵᠤ ᠭᠡᠨ᠎ᠡ᠃ ᠠᠮᠢᠳᠠᠨ ᠤ ᠵᠠᠶᠠᠭᠠᠴᠢ ᠲᠡᠮᠡᠭᠡ ᠬᠤᠯᠤᠭᠠᠨ᠎ᠠ ᠬᠤᠶᠠᠷ ᠤᠨ ᠵᠠᠷᠭᠤ ᠶᠢ ᠨᠢ ᠬᠢᠵᠦ ᠡᠰᠡ ᠴᠢᠳᠠᠬᠤ ᠳᠠᠭᠠᠨ᠄               - ᠮᠠᠩᠭᠠᠳᠣᠷ ᠦᠷᠦᠭᠦᠨ ᠲᠠᠨ ᠤ ᠬᠤᠶᠠᠷ ᠤᠨ ᠬᠡᠨ ᠲᠦᠷᠦᠭᠦᠯᠵᠤ ᠨᠠᠷᠠ ᠦᠵᠡᠪᠡᠯ ᠬᠡᠨ ᠨᠢ ᠠᠷᠪᠠᠨ ᠬᠤᠶᠠᠷ ᠵᠢᠯ ᠳᠤ ᠣᠷᠣᠲᠤᠭᠠᠢ︕ ᠭᠡᠬᠦ ᠳᠤ᠂ ᠲᠡᠮᠡᠭᠡ ᠪᠠᠶᠠᠷᠯᠠᠨ ᠬᠤᠯᠤᠭᠠᠨ᠎ᠠ ᠶᠢ ᠪᠠᠰᠤᠭᠠᠳ᠂ ᠳᠡᠪᠡᠨᠠ ᠶᠢᠨ ᠴᠢᠨᠡᠭᠡᠨ ᠪᠡᠶ᠎ᠡ ᠲᠠᠢ ᠬᠤᠯᠤᠭᠠᠨ᠎ᠠ ᠶᠢᠨ ᠬᠠᠵᠠᠭᠤ ᠳᠤ ᠲᠡᠭᠷᠢ ᠶᠢᠨ ᠴᠢᠨᠡᠭᠡᠨ ᠪᠡᠶ᠎ᠡ ᠲᠠᠢ ᠪᠢ ᠥᠨᠳᠥᠷ ᠪᠣᠯᠬᠤᠷ ᠶᠠᠭᠠᠬᠢᠪᠠᠴᠤ ᠪᠢ ᠲᠦᠷᠦᠭᠦᠯᠵᠤ ᠨᠠᠷᠠ ᠶᠢ ᠦᠵᠡᠨ᠎ᠡ ᠭᠡᠵᠦ ᠪᠤᠳᠣᠭᠠᠳ ᠡᠮᠦᠨ᠎ᠡ ᠵᠦᠭ ᠲᠤ ᠬᠠᠯᠢᠶᠠᠵᠣ ᠬᠡᠪᠲᠡᠬᠦᠯ᠎ᠡ᠂ ᠬᠤᠯᠤᠭᠠᠨ᠎ᠠ ᠬᠠᠷᠢᠨ ᠨᠢᠭᠡ ᠮᠡᠷᠭᠡᠨ ᠠᠷᠭ᠎ᠠ ᠪᠤᠳᠣᠵᠤ ᠲᠡᠮᠡᠭᠡᠨ ᠤ ᠪᠦᠭᠦᠨ ᠳᠡᠭᠡᠷ᠎ᠡ ᠭᠠᠷᠴᠤ ᠠᠷᠤ ᠶᠢᠨ ᠠᠭᠤᠯᠠ ᠶᠢᠨ ᠣᠷᠣᠢ ᠶᠢ ᠬᠠᠯᠢᠶᠠᠭᠠᠳ ᠰᠠᠭᠤᠵᠤ ᠭᠡᠨ᠎ᠡ᠃ ᠦᠦᠷ ᠡᠮᠦᠨ᠎ᠡ ᠠᠴᠠ ᠪᠠᠨ ᠴᠠᠶᠢᠵᠤ ᠨᠠᠷᠠᠨ ᠭᠠᠷᠬᠤ ᠴᠠᠭ ᠪᠣᠯᠣᠭᠠᠳ ᠨᠠᠷᠠᠨ ᠤ ᠭᠡᠷᠡᠯ ᠠᠷᠤ ᠠᠭᠤᠯᠠ ᠶᠢᠨ ᠣᠷᠣᠢ ᠳᠤ ᠳᠣᠰᠬᠤ ᠳᠤ ᠬᠤᠯᠤᠭᠠᠨ᠎ᠠ ᠲᠡᠮᠡᠭᠡᠨ ᠳᠤ᠄               -ᠬᠥᠶ᠋ᠢ᠂ ᠪᠢ ᠨᠠᠷᠠ ᠶᠢ ᠦᠵᠡᠪᠡ᠃ ᠨᠠᠷᠨ ᠠᠷᠤ ᠠᠭᠤᠯᠠ ᠶᠢᠨ ᠣᠷᠣᠢ ᠠᠴᠠ ᠭᠠᠷᠴᠤ ᠪᠠᠶᠢᠨ᠎ᠠ ᠭᠡᠬᠦ ᠳᠤ ᠲᠡᠮᠡᠭᠡ ᠰᠠᠨᠳᠤᠷᠤᠨ ᠡᠮᠦᠨ᠎ᠡ ᠵᠦᠭ ᠬᠠᠯᠢᠶᠠᠵᠤ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠬᠤᠶᠢᠷ᠎ᠠ ᠡᠷᠭᠢᠭᠡᠳ ᠠᠷᠤ ᠠᠭᠤᠯᠠ ᠶᠢᠨ ᠣᠷᠣᠢ ᠳᠤ ᠳᠤᠰᠤᠭᠰᠠᠨ ᠨᠠᠷᠠᠨ ᠤ ᠤᠯᠠᠪᠤᠷ ᠲᠤᠶᠠᠭ᠎ᠠ ᠶᠢ ᠦᠵᠡᠭᠡᠳ᠂ ᠨᠠᠷᠨ ᠬᠠᠮᠢᠭ᠎ᠠ ᠠᠴᠠ ᠨᠢ ᠭᠠᠷᠴᠤ ᠪᠠᠶᠢᠬᠤ ᠪᠣᠯᠪᠠ︖ ᠭᠡᠳ ᠬᠠᠯᠢᠶᠠᠵᠤ ᠪᠠᠶᠢᠲᠠᠯ᠎ᠠ ᠪᠦᠭᠦᠨ ᠳᠡᠭᠡᠷ᠎ᠡ ᠨᠢ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠬᠤᠯᠤᠭᠠᠨ᠎ᠠ ᠡᠮᠦᠨ᠎ᠡ ᠠᠴᠠ ᠭᠠᠷᠤᠭᠰᠠᠨ ᠨᠠᠷᠠ ᠶᠢ ᠲᠦᠷᠦᠭᠦᠯᠵᠤ ᠦᠵᠡᠭᠰᠡᠨ ᠭᠡᠨ᠎ᠡ᠃ ᠢᠩᠭᠢᠭᠡᠳ ᠲᠡᠮᠡᠭᠡ ᠱᠦᠭᠦᠭᠳᠡᠵᠦ ᠠᠷᠪᠠᠨ ᠬᠤᠶᠠᠷ ᠵᠢᠯ ᠳᠤ ᠣᠷᠣᠵᠤ ᠴᠢᠳᠠᠯ ᠦᠭᠡᠢ ᠬᠤᠴᠣᠬᠰᠠᠨ ᠶᠤᠮ ᠭᠡᠨ᠎ᠡ᠃ ᠲᠡᠭᠡᠭᠡᠳ ᠲᠡᠮᠡᠭᠡ ᠠᠷᠪᠠᠨ ᠬᠤᠶᠠᠷ ᠵᠢᠯ ᠳᠤ ᠣᠷᠣᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠳᠡᠭᠡᠨ ᠶᠡᠭᠡᠯᠡ ᠵᠣᠪᠠᠵᠠᠢ᠃ ᠵᠠᠶᠠᠭᠠᠴᠢ ᠲᠡᠮᠡᠭᠡᠨ ᠳᠤ ᠰᠠᠨᠠᠭ᠎ᠠ ᠵᠣᠪᠠᠭᠠᠳ᠄               - ᠲᠡᠮᠡᠭᠡ ᠴᠢ ᠪᠢᠴᠡᠭᠡᠢ ᠮᠠᠭᠤ ᠰᠠᠨᠠ︕ ᠴᠢᠨᠦ ᠪᠡᠶ᠎ᠡ ᠳᠤ ᠠᠷᠪᠠᠨ ᠬᠤᠶᠠᠷ ᠵᠢᠯ ᠤᠨ ᠰᠢᠨᠵᠢ ᠪᠦᠷᠢᠨ ᠪᠠᠶᠢᠨ᠎ᠠ︕ ᠭᠡᠬᠦᠯ᠎ᠡ ᠲᠡᠮᠡᠭᠡ᠄               - ᠨᠠᠳᠠᠳᠤ ᠶᠠᠮᠠᠷ ᠠᠷᠪᠠᠨ ᠬᠤᠶᠠᠷ ᠵᠢᠯ ᠤᠨ ᠰᠢᠨᠵᠢ ᠪᠦᠷᠢᠨ ᠪᠠᠶᠢᠨ᠎ᠠ︖ ᠪᠢ ᠲᠡᠭᠷᠢ ᠶᠢᠨ ᠴᠢᠨᠡᠭᠡᠨ ᠶᠡᠭᠡ ᠴᠣᠭᠴᠠ ᠲᠠᠢ ᠪᠠᠶᠢᠵᠤ ᠪᠠᠶᠢᠭᠠᠳ ᠲᠡᠪᠡᠨᠡ ᠶᠢᠨ ᠴᠢᠨᠡᠭᠡᠨ ᠬᠤᠯᠤᠭᠠᠨ᠎ᠠ ᠠᠴᠠ ᠳᠣᠣᠷᠠᠳᠠᠬᠤ ᠶᠠᠭᠤ ᠪᠠᠶᠢᠨ᠎ᠠ︖ ᠭᠡᠬᠦᠯ᠎ᠡ ᠵᠠᠶᠠᠭᠠᠴᠢ᠄               - ᠴᠢᠮ᠎ᠠ ᠳᠤ ᠪᠠᠶᠢᠬᠤ ᠠᠷᠪᠠᠨ ᠬᠤᠶᠠᠷ ᠵᠢᠯ ᠤᠨ ᠰᠢᠨᠵᠢ ᠶᠢ ᠬᠡᠯᠡᠪᠡᠰᠦ᠂ ᠠᠷᠪᠠᠢ ᠬᠦᠨᠡᠰᠦ ᠬᠥᠮᠥᠷᠭᠡᠯᠡᠭᠴᠢ ᠬᠤᠯᠤᠭᠠᠨ᠎ᠠ ᠡᠷᠳᠡᠨᠢ ᠶᠢᠨ ᠴᠢᠬᠢ ᠲᠠᠢ᠂ ᠠᠵᠢᠯ ᠠᠮᠢᠳᠤᠷᠠᠯ ᠳᠤ ᠵᠢᠳᠬᠦᠭᠴᠢ ᠦᠬᠡᠷ ᠡᠷᠳᠡᠨᠢ ᠶᠢᠨ ᠰᠡᠭᠡᠷ ᠲᠠᠢ᠂ ᠠᠷᠤ ᠠᠭᠤᠯᠠᠨ ᠳᠤ ᠲᠣᠭᠯᠠᠭᠴᠢ ᠪᠠᠷᠰ ᠡᠷᠳᠡᠨᠢ ᠶᠢᠨ ᠲᠠᠪᠠᠭ ᠲᠠᠢ᠂ ᠠᠷᠭ᠎ᠠ ᠤᠬᠠᠭᠠᠨ ᠰᠡᠳᠦᠭᠴᠢ ᠲᠠᠤᠯᠠᠢ ᠡᠷᠳᠡᠨᠢ ᠶᠢᠨ ᠣᠷᠣᠭᠤᠯ ᠲᠠᠢ᠂ ᠠᠭᠠᠷ ᠲᠡᠭᠷᠢ ᠳᠤ ᠬᠦᠷᠬᠢᠷᠡᠭᠴᠢ ᠯᠣᠣ ᠡᠷᠳᠡᠨᠢ ᠶᠢᠨ ᠬᠦᠵᠦᠭᠦᠦ ᠲᠠᠢ᠂ ᠠᠰᠬ᠎ᠠ ᠬᠠᠳᠠ ᠶᠢ ᠨᠡᠪᠲᠡᠯᠦᠭᠴᠢ ᠮᠣᠭᠠᠢ ᠶᠢᠨ ᠡᠷᠳᠡᠨᠢ ᠨᠢᠳᠦ ᠲᠠᠢ᠂ ᠠᠯᠤᠰ ᠬᠤᠯᠠ ᠶᠢ ᠣᠶᠢᠷᠠᠲᠤᠭᠤᠯᠤᠭᠴᠢ ᠮᠣᠷᠢᠨ ᠡᠷᠳᠡᠨᠢ ᠶᠢᠨ ᠳᠡᠯ ᠲᠠᠢ᠂ ᠠᠮᠤᠷ ᠲᠦᠪᠰᠢᠨ ᠢ ᠵᠥᠩᠨᠡᠭᠴᠢ ᠬᠤᠨᠢ ᠡᠷᠳᠡᠨᠢ ᠶᠢᠨ ᠡᠪᠴᠢᠭᠦᠦ ᠲᠠᠢ᠂ ᠠᠭᠯᠠᠭ ᠣᠢ ᠳᠤ ᠰᠦᠯᠵᠢᠭᠴᠢ ᠮᠡᠴᠢᠨ ᠡᠷᠳᠡᠨᠢ ᠶᠢᠨ ᠭᠤᠶ᠎ᠠ ᠲᠠᠢ᠂ ᠠᠯᠳᠠᠨ ᠨᠠᠷᠠᠨ ᠢ ᠤᠭᠲᠤᠭᠴᠢ ᠲᠠᠭᠢᠶ᠎ᠠ ᠶᠢᠨ ᠡᠷᠳᠡᠨᠢ ᠶᠢᠨ ᠰᠠᠩᠮᠠᠢ ᠲᠠᠢ᠂ ᠠᠲᠠᠭᠠᠲᠠᠨ ᠳᠠᠶᠢᠰᠤᠨ ᠢ ᠰᠡᠷᠭᠡᠶᠢᠯᠡᠭᠴᠢ ᠨᠣᠬᠠᠢ ᠡᠷᠳᠡᠨᠢ ᠶᠢᠨ ᠪᠣᠷᠪᠢ ᠲᠠᠢ᠂ ᠠᠷᠰᠢ ᠳᠡᠯᠡᠬᠡᠢ ᠶᠢ ᠰᠡᠨᠳᠡᠶᠢᠯᠡᠭᠴᠢ ᠭᠠᠭ᠋ᠠᠢ ᠡᠷᠳᠡᠨᠢ ᠶᠢᠨ ᠰᠠᠭᠦᠯ ᠲᠠᠢ᠂ ᠠᠷᠪᠠᠨ ᠬᠤᠶᠠᠷ ᠵᠢᠯ ᠢ ᠭᠠᠭᠴᠠ ᠪᠡᠶ᠎ᠡ ᠳᠡᠭᠡᠨ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠠᠷᠤ ᠭᠤᠪᠢ ᠶᠢᠨ ᠭᠠᠶᠢᠬᠠᠮᠰᠢᠭ ᠪᠢᠯᠡ ᠴᠢ︕ ᠭᠡᠬᠦᠯ᠎ᠡ ᠲᠡᠮᠡᠭᠡ ᠣᠢ ᠭᠤᠮᠣᠳᠠᠯ ᠦᠭᠡᠢ ᠪᠣᠯᠤᠭᠰᠠᠨ ᠭᠡᠨ᠎ᠡ ᠁ ᠬᠡᠮᠡᠭᠡᠳ ᠡᠮᠦᠨᠡᠬᠢ ᠬᠤᠨᠳᠠᠭ᠎ᠠ ᠪᠠᠨ ᠪᠢᠳᠡᠨ ᠳᠤ ᠳᠡᠭᠢᠨ ᠪᠠᠷᠢᠬᠤ ᠳᠤ᠂ ᠪᠢᠳᠡᠨ ᠳᠦᠷᠪᠡᠨ ᠬᠥᠮᠥᠨ ᠤ ᠳᠤᠮᠳᠠᠬᠢ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠬᠤᠶᠠᠷ ᠯᠣᠩᠬᠤ ᠬᠤᠭᠤᠰᠤᠷᠠᠭᠰᠠᠨ ᠬᠠᠷᠠᠭᠳᠠᠯ᠎ᠠ᠃ ᠵᠤᠵᠠᠢ ᠡᠮᠦᠨᠡᠬᠢ ᠬᠤᠭᠤᠰᠤᠨ ᠯᠣᠩᠬᠤ ᠪᠠᠨ ᠬᠠᠷᠠᠵᠤ᠄               - ᠳᠠᠭᠢᠭᠠᠳ ᠨᠢᠭᠡ ᠯᠣᠩᠬᠤ ᠲᠠᠲᠠᠶ᠎ᠠ᠃ ᠭᠡᠬᠦ ᠳᠤ ᠪᠢᠳᠡᠨ᠄               - ᠠᠭᠠᠭ ᠤᠨ ᠬᠦᠦ ᠳᠤ ᠠᠪᠤ ᠶᠢᠨ ᠬᠦᠦ ᠢᠯᠠᠭᠳᠠᠨ᠎ᠠ ᠭᠡᠳᠡᠭ ᠪᠢᠯᠡ᠂ ᠣᠳᠣ ᠪᠣᠯᠢᠶ᠎ᠠ︕ ᠭᠡᠵᠦ ᠡᠨᠡ ᠣᠷᠣᠢ ᠶᠢᠨ ᠨᠠᠶᠢᠷ ᠢᠶᠠᠨ ᠥᠨᠳᠥᠷᠯᠡᠭᠦᠯᠦᠯ᠎ᠡ᠃              ᠮᠠᠩᠭᠠᠳᠣᠷ ᠦᠷᠦᠭᠦᠨ ᠨᠢ ᠠᠷᠢᠬᠢ ᠳᠠᠭᠠᠨ ᠮᠠᠩᠭᠠᠷᠯᠠᠭᠰᠠᠨ ᠪᠢ ᠨᠣᠶᠢᠷ ᠤᠨ ᠭᠦᠨ ᠳᠡᠭᠡᠨ ᠮᠠᠩᠰᠢᠭᠤᠷᠠᠵᠤ ᠪᠠᠶᠢᠲᠠᠯ᠎ᠠ᠂ ᠱᠢᠷᠦ ᠠᠶᠠᠭᠠᠨ ᠳᠤ ᠢᠩᠭᠡᠨ ᠤ ᠰᠢᠨ᠎ᠡ ᠰᠠᠭᠠᠮ᠎ᠠ ᠠᠪᠴᠢᠷᠠᠵᠤ ᠦᠭᠭᠦᠯ᠎ᠡ᠃ ᠣᠷᠣᠨ ᠳᠣᠲᠣᠷ᠎ᠠ ᠦᠰᠦ᠋ ᠪᠠᠨ ᠤᠤᠭᠤᠵᠤ ᠪᠣᠯᠣᠭᠠᠳ ᠭᠠᠷᠬᠤ ᠳᠤ ᠭᠠᠵᠠᠭ᠎ᠠ ᠪᠣᠲᠣᠭᠤ ᠪᠤᠶᠢᠯᠠᠯᠳᠤᠨ ᠰᠢᠪᠡᠷ ᠰᠢᠪᠡᠷ ᠪᠣᠷᠤᠭ᠎ᠠ ᠣᠷᠣᠵᠤ᠂ ᠰᠡᠷ ᠰᠡᠷ ᠰᠠᠯᠬᠢ ᠰᠠᠯᠬᠢᠯᠠᠵᠤ᠂ ᠠᠷᠤ ᠪᠤᠮᠪᠠ ᠶᠢᠨ ᠣᠷᠣᠨ ᠢ ᠠᠷᠭ᠎ᠠ ᠦᠭᠡᠢ ᠪᠤᠳᠤᠬᠳᠠᠭᠤᠯᠤᠨ᠎ᠠ᠃              ᠪᠣᠷᠣᠭᠠᠨ ᠳᠤ ᠨᠣᠷᠬᠤ ᠰᠠᠶᠢᠬᠠᠨ᠃ ᠲᠥᠷᠥᠯᠬᠢ ᠨᠤᠲᠤᠭ ᠤᠨ ᠢᠶᠠᠨ ᠪᠣᠷᠣᠭᠠᠨ ᠳᠤ ᠱᠠᠪᠰᠢᠭᠤᠯᠵᠤ᠂ ᠴᠡᠪᠡᠷ ᠲᠤᠩᠭᠠᠯᠠᠭ ᠠᠭᠠᠷ ᠢ ᠴᠡᠭᠡᠵᠢ ᠠᠭᠤᠵᠢᠷᠠᠲᠠᠯ᠎ᠠ ᠠᠮᠢᠰᠬᠤᠵᠤ᠂ ᠲᠣᠷᠭᠠᠨ ᠰᠠᠯᠬᠢᠨ ᠳᠤᠨᠢ ᠴᠢᠷᠠᠢ ᠪᠠᠨ ᠤᠯᠠᠶᠢᠲᠠᠯ᠎ᠠ ᠦᠨᠦᠰᠦᠭᠦᠯᠵᠦ᠂ ᠨᠤᠲᠤᠭ ᠤᠨ ᠢᠶᠠᠨ ᠲᠤᠬᠠᠢ ᠡᠪᠦᠭᠡ ᠳᠡᠭᠡᠳᠦᠰ ᠤᠨ ᠦᠯᠡᠳᠡᠭᠡᠭᠰᠡᠨ ᠲᠡᠦᠬᠡ ᠳᠣᠮᠤᠭ ᠢ ᠴᠢᠩᠨᠠᠵᠤ᠂ ᠮᠥᠨ ᠴᠦ ᠨᠣᠭᠤᠭᠠᠨ ᠠᠯᠴᠢᠭᠤᠷ ᠢᠶᠠᠨ ᠪᠡᠯᠡᠭᠯᠡᠵᠦ ᠪᠠᠶᠢᠭᠰᠠᠨ ᠨᠣᠶᠠᠬᠠᠨ ︵ᠥᠬᠢᠨ︶᠎ ᠎ ᠢᠶᠠᠨ ᠳᠤᠷᠠᠰᠴᠤ ᠵᠣᠬᠰᠣᠬᠤ ᠨᠢ ᠨᠡᠩ ᠰᠠᠶᠢᠬᠠᠨ᠃ ᠴᠡᠭᠡᠵᠢ ᠣᠩᠭᠤᠶᠢᠵᠤ ᠰᠡᠳᠬᠢᠯ ᠰᠠᠷᠠᠭᠤᠯᠵᠢᠨ᠂ ᠬᠤᠶᠠᠷ ᠰᠠᠷ᠎ᠠ ᠭᠠᠷᠤᠢ ᠬᠠᠨᠢᠶᠠᠯᠭᠠᠭᠰᠠᠨ ᠬᠠᠨᠢᠶᠠᠳᠤ ᠡᠳᠡᠭᠡᠭᠰᠡᠨ ᠰᠢᠭ ᠪᠤᠯᠬᠤ ᠳᠤ᠂ ᠺᠤᠷᠯᠠ ᠠᠴᠠ ᠭᠠᠷᠬᠤ ᠶᠢᠨ ᠡᠮᠦᠨ᠎ᠡ ᠣᠷᠣᠢ ᠨᠠᠭᠠᠴᠤ ᠯᠢᠵᠠᠢ ᠶᠢᠨ ᠴᠠᠶᠢᠯᠠᠯᠭ᠎ᠠ ᠳᠤ ᠠᠷᠢᠬᠢᠨ ᠳᠤ ᠰᠢᠬᠠᠭᠳᠠᠨ ᠤᠤᠭᠤᠬᠤ ᠦᠭᠡᠢ ᠪᠠᠶᠢᠬᠤ ᠳᠤ᠂ ᠬᠠᠵᠠᠭᠤ ᠳᠤ ᠮᠢᠨᠢ ᠰᠠᠭᠤᠭᠰᠠᠨ ᠨᠤᠲᠤᠭ ᠤᠨ ᠳᠡᠭᠦᠦ ᠴᠡᠪᠡᠢ ᠶᠢᠨ᠄ ︽ᠠᠬ᠎ᠠ ᠠ᠋︕ ᠲᠠᠨ ᠤ ᠡᠨᠡ ᠬᠠᠨᠢᠶᠠᠳᠤ ᠮᠠᠩᠭᠠᠳᠣᠷ ᠨᠤᠲᠤᠭ ᠤᠨ ᠢᠶᠠᠨ ᠴᠡᠪᠡᠷ ᠲᠤᠩᠭᠠᠯᠠᠭ ᠠᠭᠠᠷ ᠠᠮᠢᠰᠬᠤᠵᠤ᠂ ᠲᠣᠷᠭᠠᠨ ᠰᠠᠯᠬᠢᠨ ᠳᠤᠨᠢ ᠦᠯᠢᠶᠡᠯᠭᠡᠪᠡᠯ ᠡᠳᠡᠭᠡᠵᠦ ᠣᠷᠭᠢᠨ᠎ᠠ︕︾ ᠭᠡᠵᠦ ᠬᠡᠯᠡᠵᠦ ᠪᠠᠶᠢᠭᠰᠠᠨ ᠨᠢ ᠠᠶᠠᠨᠳᠠᠭᠠᠨ ᠪᠤᠳᠣᠬᠳᠠᠯ᠎ᠠ᠃              ᠰᠢᠪᠡᠷᠡᠨ ᠣᠷᠣᠬᠤ ᠪᠣᠷᠤᠭ᠎ᠠ ᠰᠡᠷᠴᠢᠭᠢᠨᠡᠨ ᠦᠯᠢᠶᠡᠬᠦ ᠰᠠᠯᠬᠢᠨ ᠳᠤᠮᠳᠠᠭᠤᠷ ᠭᠡᠷ ᠠᠴᠠ ᠵᠠᠭᠤᠭᠠᠳ ᠠᠯᠬᠤᠮ ᠵᠠᠶᠢᠲᠠᠢ ᠮᠠᠯ ᠤᠨ ᠤᠰᠤ ᠤᠤᠭᠤᠬᠤ ᠣᠩᠭᠤᠴᠠᠨ ᠠᠴᠠ ᠢᠷᠡᠵᠤ ᠤᠰᠤ ᠤᠤᠭᠤᠭᠰᠠᠨ ᠬᠡᠳᠦᠨ ᠵᠡᠭᠡᠷ᠎ᠡ ᠨᠠᠮᠠᠶᠢ ᠰᠣᠷᠲᠣᠯᠵᠠᠨ ᠬᠠᠯᠢᠶᠠᠬᠤ ᠨᠢ ᠪᠢ ᠲᠡᠭᠦᠨ ᠳᠤ ᠢᠵᠢᠯᠢ ᠳᠠᠰᠤᠯ ᠪᠢᠰᠢ ᠰᠠᠨᠠᠭᠳᠠᠵᠤ ᠪᠠᠶᠢᠬᠤ ᠶᠤᠮ ᠤᠤ᠂ ᠡᠰᠡᠬᠦᠯ᠎ᠡ ᠨᠤᠲᠤᠭ ᠨᠢᠭᠡᠲᠡᠢ ᠨᠠᠮᠠᠶᠢ ᠲᠠᠨᠢᠵᠤ᠂ ︽ᠡᠨᠡ ᠭᠡᠷ ᠢᠶᠠᠨ ᠭᠡᠭᠡᠭᠰᠡᠨ ᠭᠡᠰᠡᠷ ᠪᠣᠭᠳᠠ ᠬᠡᠵᠢᠶ᠎ᠡ ᠢᠷᠡᠴᠢᠬᠡᠪᠡ︖︾ ᠭᠡᠵᠦ ᠭᠠᠶᠢᠬᠠᠵᠤ ᠪᠠᠶᠢᠬᠤ ᠴᠣ᠋ ᠶᠤᠮ ᠤᠤ︖ ᠨᠠᠮᠠᠶᠢ ᠬᠠᠯᠢᠶᠠᠬᠤ ᠪᠠᠷ ᠢᠶᠠᠨ ᠬᠠᠯᠢᠶᠠᠵᠤ᠂ ᠤᠰᠤ ᠪᠠᠨ ᠤᠤᠭᠤᠬᠤ ᠪᠠᠷ ᠢᠶᠠᠨ ᠤᠤᠭᠤᠨ᠎ᠠ᠃ ᠬᠠᠷᠢᠨ ᠪᠤᠯᠠᠭ ᠤᠨ ᠲᠣᠭᠲᠠᠭᠠᠯ ᠳᠤ ᠡᠷᠭᠢᠴᠡᠭᠰᠡᠨ ᠨᠢᠭᠡ ᠵᠤᠯᠵᠠᠭ᠎ᠠ ᠲᠠᠢ ᠲᠣᠭᠤᠷᠤᠤ ᠨᠢ ᠮᠢᠨᠤ ᠲᠠᠪᠤᠨ ᠨᠠᠰᠤᠲᠠᠢ ᠠᠴᠢ ᠶᠢᠨ ᠮᠠᠨᠢ ᠬᠥᠭᠡᠭᠡᠴᠡᠯᠳᠦᠨ ᠨᠠᠭᠠᠳᠬᠤ ︽ᠲᠣᠭᠯᠠᠭᠠᠮ︾ ᠪᠣᠯᠵᠤ᠂ ᠠᠴᠢ ᠮᠢᠨᠢ ᠴᠦ ᠡᠪᠦᠭᠡ᠂ ᠠᠪᠤ ᠡᠵᠢ ᠪᠠᠨ ︽ᠴᠢᠯᠦᠭᠡᠯᠡᠭᠰᠡᠨ︾᠎ ᠨᠢ ᠪᠠᠰᠠ ᠠᠵᠠ ᠲᠠᠢ ᠶᠠᠪᠤᠳᠠᠯ ᠪᠣᠯᠣᠭᠠᠳ ᠬᠥᠮᠥᠨ ᠬᠢᠭᠡᠳ ᠠᠭᠤᠷᠠᠰᠣᠨ ᠠᠮᠢᠳᠠᠨ ᠡᠪ ᠵᠣᠬᠢᠴᠠᠯ ᠲᠠᠢ ᠬᠠᠮᠲᠤ ᠣᠷᠣᠰᠢᠬᠤ ᠰᠠᠶᠢᠬᠠᠨ ᠣᠷᠴᠢᠨ ᠠᠬᠤᠢ ᠶᠢᠨ ᠵᠢᠷᠤᠭ ᠨᠢᠳᠦᠨ᠎ᠡ ᠲᠣᠳᠣᠷᠠᠨ᠎ᠠ᠃              ᠭᠠᠯ ᠦᠳᠡ ᠶᠢᠨ ᠦᠶ᠎ᠡ ᠪᠠᠷ᠂ ᠪᠡᠯᠴᠢᠭᠡᠷ ᠠᠴᠠ ᠪᠠᠨ ᠴᠤᠪᠤᠷᠠᠯᠳᠤᠨ ᠢᠷᠡᠵᠤ ᠣᠩᠭᠤᠴᠠᠨ ᠠᠴᠠ ᠤᠰᠤ ᠤᠤᠭᠤᠭᠰᠠᠨ ᠲᠡᠮᠡᠭᠡᠳ ᠣᠷᠣᠭᠤᠯ ᠢᠶᠠᠨ ᠰᠠᠵᠢᠨ ᠳᠡᠭᠡᠭᠰᠢ ᠠᠭᠤᠯᠠ ᠶᠢᠨ ᠣᠷᠣᠢ ᠥᠭᠡᠳᠡ ᠬᠠᠯᠢᠶᠠᠬᠤ ᠶᠢ ᠦᠵᠡᠭᠡᠳ᠂ ︽ᠡᠨᠡ ᠲᠡᠮᠡᠭᠡᠳ ᠶᠠᠭᠤ ᠬᠠᠯᠢᠶᠠᠵᠤ ᠪᠠᠶᠢᠬᠤ ᠪᠣᠯᠪᠠ︖︾ ᠭᠡᠵᠦ ᠪᠤᠳᠤᠭᠠᠳ ᠠᠭᠤᠯᠠ ᠶᠢᠨ ᠣᠷᠣᠢ ᠥᠭᠡᠳᠡ ᠬᠠᠯᠢᠶᠠᠭᠠᠳ᠂ ᠰᠣᠨᠢᠨ ᠬᠠᠴᠢᠨ ᠶᠠᠭᠤᠮ᠎ᠠ ᠣᠯᠵᠤ ᠦᠵᠡᠵᠦ ᠡᠰᠡ ᠴᠢᠳᠠᠭᠠᠳ ᠵᠤᠵᠠᠢ ᠠᠴᠠ᠄               - ᠡᠨᠡ ᠲᠡᠮᠡᠭᠡᠳ ᠠᠭᠤᠯᠠ ᠶᠢᠨ ᠣᠷᠣᠢ ᠤᠷᠤᠭᠤ ᠶᠠᠭᠤ ᠬᠠᠯᠢᠶᠠᠵᠤ ᠪᠠᠶᠢᠬᠤ ᠪᠤᠢ︖ ᠭᠡᠬᠦ ᠳᠤ ᠵᠣᠵᠠᠢ ᠢᠨᠢᠶᠡᠮᠰᠦᠭᠯᠡᠨ᠄               - ᠡᠪᠡᠷ ᠢ ᠨᠢ ᠵᠢᠭᠡᠯᠡᠭᠰᠡᠨ ᠪᠤᠭᠤ ᠢᠷᠡᠵᠤ ᠡᠪᠡᠷ ᠢ ᠨᠢ ᠪᠤᠴᠠᠭᠠᠬᠤ ᠶᠢ ᠬᠠᠷᠠᠨ ᠬᠦᠯᠢᠶᠡᠵᠦ ᠪᠠᠶᠢᠨ᠎ᠠ ᠭᠡᠯ᠎ᠡ᠃ ᠪᠢ ᠠᠯᠠᠩᠳᠤᠷᠠᠨ᠄               - ᠶᠠᠭᠤ ᠭᠡᠨ᠎ᠡ︖ ᠡᠪᠡᠷ ᠢ ᠨᠢ ᠵᠢᠭᠡᠯᠡᠭᠰᠡᠨ ᠪᠤᠭᠤ ᠢᠷᠡᠵᠤ ᠪᠤᠴᠠᠭᠠᠬᠤ ᠶᠢ ᠨᠢ ᠬᠠᠷᠠᠨ ᠬᠦᠯᠢᠶᠡᠵᠦ ᠪᠠᠶᠢᠨ᠎ᠠ ᠭᠡᠨ᠎ᠡ︖ ᠭᠡᠬᠦ ᠳᠤ ᠵᠣᠵᠠᠢ᠄               - ᠲᠡᠶᠢᠮᠤ᠃ ᠪᠢ ᠲᠠᠨ ᠳᠤ ᠡᠨᠡ ᠲᠤᠬᠠᠢ ᠨᠢᠭᠡ ᠰᠠᠶᠢᠬᠠᠨ ᠠᠷᠠᠳ ᠤᠨ ᠠᠮᠠᠨ ᠦᠯᠢᠭᠡᠷ ᠶᠠᠷᠢᠵᠤ ᠦᠭᠭᠦᠶ᠎ᠡ ᠭᠡᠳ ᠨᠢᠭᠡ ᠲᠠᠮᠠᠬᠢ ᠠᠰᠠᠭᠠᠵᠤ ᠰᠣᠷᠣᠬᠰᠠᠨ ᠢᠶᠠᠨ᠄               - ᠬᠡᠵᠢᠶᠡᠨᠡᠢ ︵ᠡᠷᠲᠡ ᠤᠷᠢᠳᠤ ᠶᠢᠨ ᠴᠠᠭ ᠲᠤ︶ ᠲᠡᠮᠡᠭᠡᠨ ᠤ ᠡᠪᠦᠭᠡ ᠨᠢ ᠲᠣᠯᠣᠭᠠᠢ ᠳᠠᠭᠠᠨ ᠠᠷᠪᠠᠨ ᠬᠤᠶᠠᠷ ᠰᠠᠯᠠᠭ᠎ᠠ ᠲᠠᠢ ᠡᠪᠡᠷ ᠲᠠᠢ ᠪᠠᠶᠢᠵᠠᠢ᠃ ᠲᠡᠭᠡᠭᠡᠳ ᠡᠨᠡ ᠲᠡᠮᠡᠭᠡᠨ ᠤ ᠡᠪᠦᠭᠡ ᠡᠯᠡᠰᠦᠨ ᠭᠤᠪᠢ ᠳᠤ ᠢᠳᠡᠰᠢᠯᠡᠵᠦ ᠪᠣᠯᠣᠭᠠᠳ᠂ ᠬᠠᠷᠠᠵᠠ ᠪᠤᠯᠠᠭ ᠤᠨ ᠣᠰᠣᠨ ᠠᠴᠠ ᠬᠠᠨᠲᠠᠯ᠎ᠠ ᠪᠠᠨ ᠤᠤᠭᠤᠵᠤ ᠠᠪᠤᠭᠠᠳ ᠡᠷᠭᠢᠭᠡᠳ ᠭᠤᠪᠢ ᠳᠠᠭᠠᠨ ᠢᠷᠡᠳᠡᠭ ᠪᠠᠶᠢᠵᠠᠢ᠃ ᠲᠡᠷᠡ ᠤᠰᠤ ᠤᠤᠭᠤᠬᠤ ᠪᠣᠯᠭᠠᠨ ᠠᠭᠤᠯᠠ ᠶᠢᠨ ᠥᠳᠬᠡᠨ ᠣᠢ ᠠᠴᠠ ᠨᠢᠭᠡ ᠪᠤᠭᠤ ᠭᠠᠷᠴᠤ ᠢᠷᠡᠭᠡᠳ ᠡᠳᠦᠷ ᠪᠦᠷᠢ ᠬᠠᠮᠲᠤ ᠤᠰᠤ ᠤᠤᠭᠤᠭᠰᠠᠭᠠᠷ ᠪᠠᠶᠢᠵᠤ ᠲᠠᠨᠢᠯᠳᠠᠨ ᠰᠠᠶᠢᠨ ᠠᠬ᠎ᠠ ᠳᠡᠭᠦᠦ ᠪᠣᠯᠣᠯᠴᠠᠵᠤ ᠭᠡᠨ᠎ᠡ᠃              ᠨᠢᠭᠡ ᠡᠳᠦᠷ ᠪᠤᠭᠤ ᠤᠰᠤ ᠤᠤᠭᠤᠬᠤ ᠪᠠᠷ ᠢᠷᠡᠭᠡᠳ ᠲᠡᠮᠡᠭᠡ ᠠᠴᠠ ᠶᠠᠮᠠᠷ ᠨᠢᠭᠡ ᠶᠠᠭᠤᠮ᠎ᠠ ᠰᠤᠷᠠᠬᠤ ᠭᠡᠳ ᠰᠤᠷᠠᠵᠤ ᠡᠰᠡ ᠴᠢᠳᠠᠭᠠᠳ ᠶᠡᠭᠡ ᠦᠷᠦᠪᠳᠦᠮᠡᠷ ᠳᠦᠷᠢ ᠭᠠᠷᠭᠠᠨ ᠲᠠᠲᠠᠭᠠᠯᠵᠠᠵᠤ ᠪᠠᠶᠢᠬᠤ ᠶᠢ ᠲᠡᠮᠡᠭᠡ ᠠᠵᠢᠭᠯᠠᠨ ᠮᠡᠳᠡᠵᠤ᠄               -ᠶᠠᠮᠠᠷ ᠤᠴᠢᠷ ᠪᠣᠯᠪᠠ ᠳᠡᠭᠦᠦ ᠮᠢᠨᠢ︖ ᠲᠠᠲᠠᠭᠠᠯᠵᠠᠭᠰᠠᠨ ᠤ ᠬᠡᠷᠡᠭ ᠦᠭᠡᠢ᠂ ᠠᠬ᠎ᠠ ᠳᠠᠭᠠᠨ ᠭᠡᠯᠡ︕ ᠭᠡᠬᠦ ᠳᠤ ᠪᠤᠭᠤ᠄               - ᠠᠬ᠎ᠠ ᠠ᠋᠂ ᠦᠳᠡ ᠶᠢᠨ ᠬᠤᠶᠢᠨ᠎ᠠ ᠨᠢᠭᠡ ᠬᠤᠷᠢᠮ ᠳᠤ ᠣᠳᠬᠤ ᠪᠣᠯᠤᠭᠰᠠᠨ ᠪᠢᠯᠡ ᠪᠢ᠂ ᠲᠠ ᠮᠠᠭᠤ ᠳᠡᠭᠦᠦ ᠳᠡᠭᠡᠨ ᠠᠷᠪᠠᠨ ᠰᠠᠯᠠᠭ᠎ᠠ ᠲᠠᠢ ᠡᠪᠡᠷ ᠢᠶᠠᠨ ᠵᠢᠭᠡᠯᠡᠭᠡᠳ ᠥᠭᠴᠦ ᠪᠠᠶᠢᠭᠲᠤᠨ︕ ᠮᠠᠩᠭᠠᠳᠤᠷ ᠡ᠊ᠨᠳᠡ ᠤᠰᠤ ᠤᠤᠭᠤᠬᠤ ᠪᠠᠷ ᠢᠷᠡᠬᠦ ᠦᠶ᠎ᠡ ᠳᠡᠭᠡᠨ ᠲᠠᠨ ᠳᠤ ᠬᠠᠷᠢᠭᠤᠯᠤᠭᠠᠳ ᠦᠭᠭᠦᠶ᠎ᠡ︕ ᠭᠡᠬᠦ ᠳᠤ ᠲᠡᠮᠡᠭᠡ᠄               - ᠵᠠ ᠪᠣᠯᠣᠨ᠎ᠠ ᠭᠡᠵᠦ ᠡᠪᠡᠷ ᠢᠶᠠᠨ ᠥᠭᠴᠦ ᠶᠠᠪᠤᠭᠤᠯᠤᠭᠰᠠᠨ ᠭᠡᠨ᠎ᠡ᠃ ᠪᠤᠭᠤ ᠲᠡᠮᠡᠭᠡᠨ ᠤ ᠠᠷᠪᠠᠨ ᠰᠠᠯᠠᠭ᠎ᠠ ᠲᠠᠢ ᠡᠪᠡᠷ ᠢ ᠵᠡᠭᠦᠵᠦ ᠠᠪᠤᠭᠠᠳ ᠬᠤᠷᠢᠮ ᠳᠤ ᠣᠲᠣᠭᠰᠠᠨ ᠳᠤ ᠬᠤᠷᠢᠮ ᠳᠤ ᠢᠷᠡᠭᠰᠡᠨ ᠠᠮᠢᠲᠠᠳ ᠲᠡᠭᠦᠨ ᠤ ᠠᠷᠪᠠᠨ ᠰᠠᠯᠠᠭ᠎ᠠ ᠲᠠᠢ ᠡᠪᠡᠷ ᠢ ᠱᠠᠭᠰᠢᠨ ᠮᠠᠭᠲᠠᠵᠤ᠂ ᠰᠣᠨᠢᠷᠬᠠᠨ ᠭᠠᠶᠢᠬᠠᠭᠰᠠᠨ ᠳᠤ ᠪᠤᠭᠤ ᠵᠡᠭᠦᠭᠰᠡᠨ ᠡᠪᠡᠷ ᠲᠡᠭᠡᠨ ᠵᠢᠯᠪᠢᠳᠠᠵᠤ᠂ ᠲᠡᠷᠡ ᠡᠪᠡᠷ ᠢ ᠲᠡᠮᠡᠭᠡᠨ ᠳᠤ ᠡᠷᠭᠢᠭᠦᠯᠵᠦ ᠥᠭᠬᠦ ᠳᠤᠷ᠎ᠠ ᠦᠭᠡᠢ ᠪᠣᠯᠣᠭᠠᠳ ᠲᠡᠮᠡᠭᠡᠨ ᠠᠴᠠ ᠵᠣᠯᠠᠭᠠᠳ ᠠᠭᠤᠯᠠᠨ ᠳᠤ ᠭᠠᠷᠴᠤ ᠣᠢ ᠳᠤ ᠰᠢᠷᠭᠤᠨ ᠣᠷᠣᠵᠤ ᠭᠡᠨ᠎ᠡ᠃ ᠳᠡᠭᠡᠭᠡᠳ ᠲᠡᠮᠡᠭᠡ ᠤᠰᠤ ᠤᠤᠭᠤᠬᠤ ᠳᠠᠭᠠᠨ ︽ᠪᠤᠭᠤ ᠡᠪᠡᠷ ᠢ ᠮᠢᠨᠢ ᠠᠪᠴᠤ ᠢᠷᠡᠵᠤ ᠪᠠᠶᠢᠬᠤ ᠪᠣᠯᠪᠠᠤ︖︾ ᠭᠡᠳ ᠨᠢᠭᠡ ᠪᠠᠯᠭᠤ ᠤᠰᠤ ᠤᠤᠭᠤᠭᠠᠳ ᠨᠢᠭᠡ ᠤᠳᠠᠭ᠎ᠠ ᠠᠯᠤᠰ ᠤᠨ ᠠᠭᠤᠯᠠᠨ ᠤ ᠣᠷᠣᠢ ᠶᠢ ᠤᠳᠠᠲᠠᠯ᠎ᠠ ᠬᠠᠯᠢᠶᠠᠳᠠᠭ ᠪᠣᠯᠵᠤ ᠭᠡᠨ᠎ᠡ ᠁ ᠭᠡᠳ ᠡᠵᠡᠨ ᠳᠡᠭᠡᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠲᠡᠮᠡᠭᠡ ᠦᠰᠦ ᠨᠣᠣᠰᠣ ᠨᠢ ᠴᠠᠶᠢᠭᠰᠠᠨ ᠬᠤᠯᠵᠢᠨ ᠦᠨᠡᠭᠡᠨ ᠳᠤ ᠪᠢᠰᠢ᠂ ᠬᠠᠷᠢᠨ ᠣᠶᠢᠷ᠎ᠠ ᠳᠣᠲᠣᠨᠣ ᠠᠬ᠎ᠠ ᠳᠡᠭᠦᠦ ᠥᠯ ᠬᠠᠯᠵᠠᠨ ᠪᠤᠭᠤ ᠳᠤ ᠮᠡᠬᠡᠯᠡᠭᠳᠡᠭᠰᠡᠨ ᠢᠨᠢᠶᠡᠳᠦᠮ ᠲᠠᠢ ᠦᠯᠢᠭᠡᠷ ᠢ ᠶᠠᠷᠢᠵᠤ ᠦᠭᠭᠦᠯ᠎ᠡ᠃              ᠲᠡᠮᠡᠭᠡ ᠡᠵᠡᠨ ᠳᠡᠭᠡᠨ ᠣᠨᠴᠠ ᠳᠠᠰᠳᠠᠭ ᠤᠶᠠᠨ ᠰᠡᠳᠬᠢᠯ ᠲᠠᠢ ᠠᠮᠢᠳᠠᠨ ᠭᠡᠳᠡᠭ ᠨᠢ ᠠᠷᠭ᠎ᠠ ᠦᠭᠡᠢ᠃ ᠲᠤᠰ ᠡᠳᠦᠷ ᠵᠤᠵᠠᠢ ᠶᠢᠨ ᠬᠠᠷᠢᠴᠠᠭᠰᠠᠨ ᠬᠡᠳᠦᠨ ᠤᠶᠢᠭᠤᠷ ᠮᠠᠶᠢᠮᠠᠶᠢᠴᠢᠨ ᠢᠷᠡᠵᠤ᠂ ᠵᠤᠵᠠᠢ ᠶᠢᠨ ᠬᠢ ᠠᠴᠠ ᠠᠷᠪᠠᠨ ᠲᠡᠮᠡᠭᠡ ᠠᠪᠬᠤ ᠳᠤ᠂ ᠶᠢᠰᠦᠨ ᠲᠡᠮᠡᠭᠡ ᠨᠢ ᠤᠶᠢᠭᠤᠷ ᠮᠠᠶᠢᠮᠠᠶᠢᠴᠢᠨ ᠤ ᠠᠯᠪᠠᠳᠠᠯᠭ᠎ᠠ ᠪᠠᠷ ᠮᠠᠰᠢᠨ ᠳᠤ ᠭᠠᠷᠤᠭᠰᠠᠨ ᠴᠣ᠋᠂ ᠨᠢᠭᠡ ᠬᠥᠭᠰᠢᠨ ᠲᠡᠮᠡᠭᠡ ᠨᠢ ᠤᠶᠢᠭᠤᠷ ᠮᠠᠶᠢᠮᠠᠶᠢᠴᠢᠳ ᠶᠠᠭᠠᠬᠢᠵᠤ ᠠᠯᠪᠠᠳᠠᠵᠤ ᠡᠷᠡᠭᠦᠳᠡᠭᠰᠡᠨ ᠴᠣ᠋ ᠬᠦᠷᠬᠢᠷᠡᠨ᠂ ᠬᠡᠪᠲᠡᠭᠰᠡᠨ ᠪᠠᠶᠢᠷᠢ ᠠᠴᠠ ᠪᠠᠨ ᠪᠤᠰᠬᠤ ᠦᠭᠡᠢ ᠪᠠᠶᠢᠵᠤ᠂ ᠡᠴᠦᠰ ᠲᠡᠭᠡᠨ ︽ᠢᠯᠠᠯᠲᠠ︾ ᠣᠯᠵᠤ᠂ ᠰᠦᠷᠦᠭ ᠲᠡᠭᠡᠨ ᠬᠤᠴᠣᠷᠬᠤ ᠡᠷᠬᠡ ᠣᠯᠣᠯ᠎ᠠ᠃ ᠲᠡᠮᠡᠭᠡ ᠠᠴᠢᠭᠰᠠᠨ ᠮᠠᠰᠢᠨ ᠬᠥᠳᠡᠯᠬᠦ ᠠᠴᠠ ᠡᠮᠦᠨ᠎ᠡ ᠵᠣᠵᠠᠢ ᠱᠢᠷᠦ ᠲᠠᠢ ᠪᠠᠨ ᠢᠷᠡᠵᠤ᠂ ᠮᠠᠰᠢᠨ ᠳᠤ ᠠᠴᠢᠭᠰᠠᠨ ᠲᠡᠮᠡᠭᠡᠨ ᠤ ᠰᠠᠩᠮᠠᠢ ᠠᠴᠠ ᠨᠢ ᠬᠠᠶᠢᠴᠢᠯᠠᠨ ᠠᠪᠴᠤ᠂ ᠴᠠᠭᠠᠨ ᠬᠠᠳᠠᠭ ᠲᠤ ᠪᠣᠭᠤᠵᠤ ᠠᠪᠤᠭᠠᠳ ᠰᠠᠩᠮᠠᠢ ᠳᠤᠨᠢ ᠦᠰᠦ᠋ ᠲᠦᠷᠭᠢᠭᠦ ᠳᠤ᠂ ᠲᠡᠮᠡᠭᠡᠳ ᠤᠨ ᠨᠢᠳᠦᠨ ᠠᠴᠠ ᠬᠡᠯᠬᠢᠶ᠎ᠡ ᠲᠠᠢ ᠰᠤᠪᠤᠳ ᠰᠢᠭ᠋ ᠲᠣᠮᠣ ᠲᠣᠮᠣ ᠨᠢᠯᠪᠤᠰᠤ ᠳᠣᠰᠣᠯᠠᠵᠤ ᠪᠤᠶᠢᠯᠠᠬᠤ ᠳᠤ ᠵᠤᠵᠠᠢ ᠱᠢᠷᠦ ᠬᠤᠶᠠᠭᠤᠯᠠ ᠴᠣ᠋ ᠨᠢᠯᠪᠤᠰᠤ ᠤᠨᠠᠭᠠᠨ ᠭᠡᠷ ᠲᠡᠭᠡᠨ ᠣᠷᠣᠯ᠎ᠠ᠃ ᠵᠤᠵᠠᠢ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠨ᠄               - ᠲᠡᠮᠡᠭᠡ ᠭᠡᠳᠡᠭ ᠰᠦᠷᠡᠬᠡᠢ ᠨᠤᠲᠤᠭᠰᠠᠭ ᠳᠡᠭᠡᠷ᠎ᠡ ᠪᠠᠨ ᠤᠶᠠᠨ ᠰᠡᠳᠬᠢᠯ ᠲᠠᠢ ᠠᠮᠢᠳᠠᠨ᠃ ᠪᠢ 2009 ᠣᠨ ᠳᠤ ᠠᠯᠠᠱᠠ ᠠᠴᠠ ᠠᠪᠴᠤ ᠢᠷᠡᠭᠰᠡᠨ ᠲᠡᠮᠡᠭᠡ ᠪᠠᠨ ᠭᠡᠳᠦ ᠤᠳᠠᠭ᠎ᠠ ᠠᠯᠳᠠᠵᠤ ᠭᠡᠭᠡᠭᠡᠳ᠂ ᠲᠦᠷᠫᠠᠨ ᠤ ᠬᠢᠯᠢ ᠳᠤ ᠣᠷᠣᠵᠤ ᠪᠠᠶᠢᠬᠤ ᠳᠤᠨᠢ ᠭᠦᠢᠴᠡᠭᠡᠳ ᠠᠪᠴᠢᠷᠠᠯ᠎ᠠ᠃ ᠲᠦᠷᠫᠠᠨ ᠥᠩᠭᠡᠷᠡᠨ ᠬᠠᠮᠢᠯ ᠳᠤ ᠣᠷᠣᠪᠠᠯ ᠠᠯᠠᠱᠠ ᠶᠢᠨ ᠡᠵᠡᠨ᠎ᠡ ᠬᠤᠰᠢᠭᠤᠨ ᠳᠤ ᠬᠦᠷᠴᠢᠬᠡᠬᠦ ᠨᠢ ᠲᠠᠷᠠ᠃ ᠲᠡᠳᠡᠭᠡᠷ ᠲᠡᠮᠡᠭᠡᠳ ᠢ ᠠᠪᠴᠤ ᠢᠷᠡᠭᠡᠳ ᠤᠶᠠᠭᠠᠨ ᠳᠤ ᠤᠶᠠᠬᠤ ᠳᠤ ᠲᠡᠷᠡ ᠲᠡᠮᠡᠭᠡᠳ ᠴᠥᠮ ᠳᠡᠭᠡᠨ ᠠᠯᠠᠱᠠ ᠵᠦᠭ ᠬᠠᠯᠢᠶᠠᠵᠤ ᠬᠡᠪᠲᠡᠳᠡᠭ ᠪᠠᠶᠢᠭᠰᠠᠨ ᠨᠢ ᠶᠡᠭᠡ ᠭᠤᠨᠢᠷᠬᠠᠯ ᠲᠠᠢ ᠰᠠᠨᠠᠭᠳᠠᠳᠠᠭ ᠪᠠᠶᠢᠭᠰᠠᠨ ᠶᠤᠮ᠃ ᠪᠣᠲᠣᠭᠤ ᠪᠠᠨ ᠭᠤᠯᠣᠭᠰᠠᠨ ᠢᠩᠭᠡᠨ ᠳᠤ ᠣᠷᠳᠣ ᠶᠢᠨ ᠳᠠᠭᠤᠤ ᠳᠠᠭᠤᠯᠠᠬᠤ᠂ ᠬᠤᠭᠤᠷ ᠬᠥᠭᠵᠢᠮ ᠲᠠᠲᠠᠬᠤ ᠳᠤ ᠤᠬᠢᠯᠠᠵᠤ ᠪᠤᠶᠢᠯᠠᠭᠠᠳ ᠪᠣᠲᠣᠭᠤ ᠪᠠᠨ ᠠᠪᠳᠠᠭ ᠶᠤᠮ ᠭᠡᠯ᠎ᠡ ᠃              ᠬᠥᠮᠥᠰ᠂ ︽ᠲᠡᠮᠡᠭᠡ ᠲᠡᠷᠡ ᠪᠡᠶ᠎ᠡ ᠪᠠᠷ ᠢᠶᠠᠨ ᠡᠷᠳᠡᠨᠢ︾ ᠭᠡᠳᠡᠭ ᠨᠢ ᠦᠨᠡᠨ ᠪᠤᠯᠣᠯᠳᠠᠢ᠃ ᠲᠡᠮᠡᠭᠡᠨ ᠤ ᠨᠣᠣᠰᠣᠨ ᠡᠳ᠋ᠯᠡᠯ ᠨᠢ ᠵᠥᠭᠡᠯᠡᠨ᠂ ᠬᠥᠩᠭᠡᠨ᠂ ᠳᠤᠯᠠᠭᠠᠨ᠂ ᠪᠠᠲᠤ ᠪᠥᠭᠡᠳ ᠡᠳ᠋ᠯᠡᠵᠦ ᠡᠮᠦᠰᠬᠦ ᠳᠤ ᠲᠠᠭᠠᠯᠠᠮᠵᠢᠲᠠᠢ ᠪᠠᠶᠢᠳᠠᠭ᠃ ᠲᠡᠮᠡᠭᠡᠨ ᠤ ᠵᠣᠭᠳᠣᠷ ᠢᠶᠠᠷ ᠠᠷᠭᠠᠮᠵᠢ ᠳᠡᠭᠡᠰᠦ ᠲᠠᠮᠤᠬᠤ᠂ ᠤᠲᠠᠰᠤ ᠡᠭᠡᠷᠡᠬᠦ᠂ ᠭᠡᠷ ᠤᠨ ᠣᠭᠤᠰᠣᠷ ᠪᠦᠰᠡᠯᠡᠭᠦᠷ ᠬᠢᠬᠦ᠂ ᠤᠶᠠᠭ᠎ᠠ ᠲᠠᠲᠠᠯᠠᠭ᠎ᠠ᠂ ᠪᠤᠷᠠᠨᠲᠠᠭ᠂ ᠨᠣᠭᠲᠣ᠂ ᠴᠤᠯᠪᠤᠭᠤᠷ᠂ ᠣᠯᠣᠩ᠂ ᠭᠠᠨᠵᠤᠭ᠎ᠠ᠂ ᠴᠢᠳᠦᠷ᠂ ᠲᠤᠰᠢᠶ᠎ᠠ ᠵᠡᠷᠭᠡ ᠶᠢ ᠬᠢᠬᠦ ᠳᠤ ᠲᠣᠩ ᠰᠠᠶᠢᠨ ᠪᠠᠶᠢᠵᠤ᠂ ᠵᠣᠭᠳᠣᠷ ᠢᠶᠠᠷ ᠬᠢᠭᠰᠡᠨ ᠡᠳ᠋ᠯᠡᠯ ᠨᠢ ᠤᠳᠠᠭᠠᠨ ᠵᠢᠯ ᠡᠯᠡᠭᠳᠡᠵᠦ ᠲᠠᠰᠤᠷᠠᠬᠤ ᠦᠭᠡᠢ ᠪᠠᠲᠤ ᠮᠥᠷᠲᠡᠭᠡᠨ ᠬᠥᠯᠥᠰᠦ ᠤᠰᠤ᠂ ᠪᠣᠷᠣᠭᠠᠨ ᠬᠤᠷ᠎ᠠ ᠳᠤ ᠨᠣᠷᠴᠤ ᠳᠡᠪᠲᠦᠭᠰᠡᠨ ᠴᠣ᠋ ᠬᠤᠵᠠᠶᠢᠵᠦ ᠬᠠᠲᠠᠭᠤᠷᠠᠬᠤ ᠦᠭᠡᠢ᠂ ᠪᠠᠷᠤᠭᠲᠠᠢ ᠳᠤ ᠦᠵᠢᠷᠡᠵᠦ ᠥᠭᠢᠷᠡᠬᠦ ᠦᠭᠡᠢ ᠶᠤᠮ᠃              ᠢᠩᠭᠡᠨ ᠤ ᠦᠰᠦ᠋ ᠶᠢ ᠰᠠᠭᠠᠮᠠᠭᠴᠠ ᠤᠤᠭᠤᠵᠤ ᠪᠣᠯᠣᠨ᠎ᠠ᠃ ᠢᠩᠭᠡᠨ ᠤ ᠦᠰᠦ᠋ ᠰᠢᠮ᠎ᠡ ᠲᠡᠵᠢᠭᠡᠯ ᠢᠶᠠᠷ ᠥᠨᠳᠥᠷ᠂ ᠬᠥᠮᠥᠨ ᠮᠠᠯ ᠤᠨ ᠪᠡᠶ᠎ᠡ ᠳᠤ ᠲᠡᠵᠢᠭᠡᠯ ᠨᠥᠬᠦᠪᠦᠷᠢᠯᠡᠬᠦ ᠣᠭᠢ ᠢᠳᠡᠭᠡᠨ ᠪᠣᠯᠣᠨ᠎ᠠ᠃ ᠢᠩᠭᠡ ᠪᠣᠲᠣᠭᠤ ᠪᠠᠨ ᠴᠠᠳᠲᠠᠯ᠎ᠠ ᠬᠥᠬᠦᠭᠦᠯᠬᠦ ᠠᠴᠠ ᠭᠠᠵᠠᠭ᠎ᠠ ᠡᠳᠦᠷ ᠲᠤ ᠬᠠᠮᠤᠭ ᠤᠨ ᠪᠠᠭ᠎ᠠ ᠳᠠᠭᠠᠨ 2 ᠵᠢᠩ ᠦᠰᠦ᠋ ᠭᠠᠷᠴᠤ᠂ ᠳᠤᠮᠳᠠ ᠲᠥᠯᠥᠪ ᠤᠨ ᠬᠢᠨᠢ 3- 6 ᠵᠢᠩ ᠦᠰᠦ᠋ ᠭᠠᠷᠴᠤ᠂ ᠬᠠᠮᠤᠭ ᠠᠷᠪᠢᠨ ᠳᠠᠭᠠᠨ 7 ᠵᠢᠩ ᠦᠰᠦ᠋ ᠭᠠᠷᠳᠠᠭ ᠪᠥᠭᠡᠳ 14 -17 ᠰᠠᠷ᠎ᠠ ᠦᠷᠭᠦᠯᠵᠢᠯᠡᠨ ᠰᠠᠭᠠᠵᠤ ᠪᠤᠯᠳᠠᠭ᠃ ᠢᠩᠭᠡᠨ ᠦᠰᠦ᠋ ᠪᠣᠯ ᠮᠠᠯᠴᠢᠳ ᠤᠨ ᠴᠠᠭᠠᠨ ᠢᠳᠡᠭᠡᠨ ᠤ ᠭᠤᠣᠯ ᠢᠷᠡᠯᠲᠡ ᠶᠢᠨ ᠨᠢᠭᠡ ᠪᠣᠯᠣᠨ᠎ᠠ᠃ ᠢᠩᠭᠡᠨ ᠦᠰᠦ᠋ ᠪᠠᠷ ᠴᠠᠢ ᠦᠰᠦᠯᠡᠵᠤ ᠤᠤᠭᠤᠬᠤ ᠠᠴᠠ ᠭᠠᠵᠠᠭ᠎ᠠ ᠰᠠᠭᠠᠯᠢ ᠶᠢᠨ ᠠᠷᠢᠬᠢ᠂ ᠥᠷᠥᠮ᠎ᠡ ᠬᠤᠷᠤᠳ ᠬᠢᠬᠦ᠂ ᠬᠥᠷᠥᠩᠭᠡ ᠶᠢ ᠨᠢ ᠬᠤᠷᠢᠶᠠᠨ ᠪᠦᠯᠢᠵᠦ ᠴᠠᠭᠠᠨ ᠲᠣᠰᠣ ᠠᠪᠬᠤ ᠪᠠ ᠠᠭᠠᠷᠤᠤᠯ ᠬᠢᠬᠦ᠂ ᠴᠠᠭᠠᠨ ᠲᠣᠰᠣ ᠪᠠᠨ ᠰᠢᠷᠭᠠᠭᠠᠨ ᠰᠢᠷ᠎ᠠ ᠲᠣᠰᠣ ᠠᠪᠴᠤ ᠪᠤᠯᠳᠠᠭ᠃ ᠢᠩᠭᠡᠨ ᠦᠰᠦ᠋ ᠪᠣᠯ ᠠᠮᠲᠠᠯᠢᠭ᠂ ᠡᠴᠡᠩᠬᠡᠢ ᠶᠢ ᠮᠠᠷᠢᠶᠠᠯᠠᠭᠤᠯᠬᠤ᠂ ᠲᠠᠮᠢᠷ ᠲᠡᠩᠬᠡᠭᠡ ᠰᠡᠯᠪᠢᠨ ᠰᠢᠷ᠎ᠠ ᠶᠢ ᠳᠠᠷᠤᠬᠤ᠂ ᠰᠢᠩᠭᠡᠭᠡᠯᠲᠡ ᠶᠢ ᠰᠠᠶᠢᠵᠢᠷᠠᠭᠤᠯᠬᠤ᠂ ᠥᠳᠬᠡᠨ ᠪᠥᠭᠡᠳ ᠰᠢᠮ᠎ᠡ ᠲᠡᠵᠢᠭᠡᠯ ᠲᠠᠢ᠂ ᠥᠯ ᠰᠠᠶᠢᠲᠠᠢ ᠢᠳᠡᠭᠡᠨ ᠪᠣᠯᠣᠨ᠎ᠠ᠃              ᠮᠣᠩᠭᠤᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ ᠰᠤᠳᠤᠷ ᠲᠤ ︽ᠢᠩᠭᠡᠨ ᠦᠰᠦ᠋ ᠢᠨᠦ ᠥᠴᠥᠬᠡᠨ ᠰᠢᠷᠦᠭᠦᠨ᠂ ᠬᠥᠩᠭᠡᠨ᠂ ᠢᠯᠴᠢᠲᠡᠢ ᠪᠥᠭᠡᠳ ᠳᠠᠪᠤᠰᠤᠯᠢᠭ᠂ ᠠᠮᠲᠠᠯᠢᠭ ᠲᠤᠯᠠ ᠬᠡᠢ᠂ ᠪᠠᠳᠬᠠᠨ᠂ ᠭᠡᠳᠡᠰᠦ ᠬᠥᠭᠡᠭᠡᠬᠦ᠂ ᠬᠤᠷᠣᠬᠠᠢ᠂ ᠰᠤᠪᠠᠭ ᠬᠠᠪᠤᠩ᠂ ᠣᠰᠣᠨ ᠬᠠᠪᠤᠩ᠂ ᠬᠤᠰᠬᠢᠨᠠᠭ ᠤᠨ ᠡᠪᠡᠳᠴᠢᠨ ᠢ ᠠᠷᠢᠯᠭᠠᠬᠤ ᠳᠤ ᠲᠤᠰᠠᠲᠠᠢ︾ ① ᠭᠡᠵᠦ ᠲᠡᠮᠳᠡᠭᠯᠡᠵᠦ ᠪᠠᠶᠢᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ︽ᠢᠩᠭᠡᠨ ᠦᠰᠦ᠋ ᠪᠠᠷ ᠡᠯ᠎ᠡ ᠵᠦᠢᠯ ᠤᠨ ᠤᠵᠢᠭ ᠡᠪᠡᠳᠴᠢᠨ᠂ ᠠᠭᠤᠰᠬᠢ ᠶᠢᠨ ᠰᠦᠷᠢᠶ᠎ᠡ ᠶᠢ ᠡᠳᠡᠭᠡᠷᠡᠭᠦᠯᠦᠭᠰᠡᠭᠡᠷ ᠢᠷᠡᠪᠡ︾ ᠭᠡᠰᠡᠨ ᠲᠡᠮᠳᠡᠭᠯᠡᠯ ᠪᠤᠢ᠃ ᠨᠢᠯᠬ᠎ᠠ ᠬᠡᠦᠬᠡᠳ ᠢ ᠪᠠᠰᠠ ᠢᠩᠭᠡᠨ ᠦᠰᠦ᠋ ᠪᠠᠷ ᠲᠡᠵᠢᠭᠡᠪᠡᠯ ᠰᠢᠩᠭᠡᠭᠡᠯᠲᠡ ᠶᠢ ᠨᠢ ᠰᠠᠶᠢᠵᠢᠷᠠᠭᠤᠯᠤᠨ ᠳᠣᠲᠣᠷ ᠤᠨ ᠠᠯᠢᠪᠠ ᠭᠡᠮ ᠢ ᠠᠷᠢᠯᠭᠠᠨ ᠰᠢᠮ᠎ᠡ ᠲᠡᠵᠢᠭᠡᠯ ᠨᠥᠬᠦᠪᠦᠷᠢᠯᠡᠳᠡᠭ᠃ ᠡᠶᠢᠮᠦ ᠠᠴᠠ ︽ᠢᠩᠭᠡᠨ ᠦᠰᠦ᠋ ᠪᠣᠯ ᠦᠰᠦ᠋ ᠴᠣ᠋ ᠮᠥᠨ᠂ ᠡᠮ ᠴᠣ᠋ ᠮᠥᠨ᠃ ᠡᠮ ᠡᠮ ᠳᠡᠭᠡᠨ ᠬᠥᠮᠥᠨ ᠤ ᠪᠡᠶ᠎ᠡ ᠳᠤ ᠡᠷᠳᠡᠨᠢ ᠮᠡᠲᠦ ᠴᠢᠬᠤᠯᠠ︾ ᠭᠡᠵᠦ ᠮᠠᠯᠴᠢᠳ ᠶᠠᠷᠢᠳᠠᠭ ᠨᠢ ᠲᠠᠯᠠᠭᠠᠷ ᠪᠤᠰᠤ᠃              ᠲᠡᠮᠡᠭᠡ ᠨᠢ ᠮᠣᠩᠭᠤᠯ ᠨᠤᠲᠤᠭ ᠲᠤ ᠴᠢᠮᠡᠭ ᠪᠣᠯᠵᠤ ᠤᠨᠤᠵᠤ ᠡᠳ᠋ᠯᠡᠬᠦ ᠳᠤ ᠬᠦᠴᠦ ᠴᠢᠳᠠᠯ ᠲᠠᠢ᠂ ᠠᠴᠢᠵᠤ ᠬᠤᠮᠨᠣᠬᠤ ᠳᠤ ᠳᠠᠭᠠᠭᠠᠴᠠ ᠰᠠᠶᠢᠲᠠᠢ᠂ ᠭᠠᠩ ᠬᠠᠭᠤᠷᠠᠢ ᠣᠷᠴᠢᠨ ᠲᠣᠭᠤᠷᠢᠨ ᠳᠤ ᠴᠢᠳᠠᠮᠠᠭᠠᠢ ᠪᠠᠶᠢᠳᠠᠭ ᠲᠡᠰᠪᠦᠷᠢ ᠴᠢᠳᠠᠯ ᠲᠠᠢ᠂ ᠲᠡᠩᠬᠡᠭᠡ ᠶᠡᠬᠡᠲᠡᠢ ᠣᠨᠤᠭ᠎ᠠ ᠪᠣᠯᠤᠭᠰᠠᠨ ᠠᠴᠠ ᠮᠣᠩᠭᠤᠯᠴᠤᠳ ᠤᠨ ᠨᠡᠭᠦᠵᠦ ᠰᠠᠭᠤᠬᠤ᠂ ᠠᠶᠠᠨ ᠳᠤ ᠶᠠᠪᠤᠬᠤ ᠬᠡᠷᠡᠭᠴᠡᠭᠡ ᠳᠤ ᠰᠠᠯᠵᠤ ᠪᠣᠯᠣᠰᠢ ᠦᠭᠡᠢ ᠬᠠᠨᠢ ᠲᠦᠰᠢᠭ ᠨᠢ ᠪᠣᠯᠵᠤ ᠢᠷᠡᠵᠠᠢ᠃              ᠨᠢᠭᠡ ᠭᠠᠷᠠᠭ ᠢᠩᠭᠡᠨ ᠦᠰᠦ᠋ ᠤᠤᠭᠤᠵᠤ ᠪᠣᠯᠣᠭᠠᠳ ᠪᠤᠴᠠᠬᠤ ᠪᠠᠷ ᠪᠣᠯᠵᠤ᠂ ᠨᠤᠲᠤᠭ ᠤᠨ ᠠᠬ᠎ᠠ ᠳᠠᠮᠢᠰᠠᠢ ᠶᠢᠨ ᠴᠠᠶᠢᠯᠠᠯᠭ᠎ᠠ ᠳᠤ ᠰᠢᠨ᠎ᠡ ᠨᠡᠷᠡᠭᠰᠡᠨ ᠰᠠᠭᠠᠯᠢ ᠶᠢᠨ ᠠᠷᠢᠬᠢ ᠶᠢᠨ ᠬᠠᠯᠠᠭᠤᠨ ᠠᠭᠤᠷ ᠬᠠᠮᠠᠷ ᠤᠷᠤᠭᠤ ᠴᠣᠷᠭᠢᠨ ᠬᠤᠳᠣᠭᠤᠳᠤᠨ ᠳᠤ ᠣᠷᠣᠵᠤ ᠬᠠᠯᠠᠭᠤᠮᠰᠠᠨ ᠵᠠᠮ ᠳᠤ ᠭᠠᠷᠬᠤ ᠪᠠᠷ ᠭᠠᠷᠬᠤ ᠳᠤ᠂ ᠭᠠᠵᠠᠭ᠎ᠠ ᠵᠡᠯᠡᠨ ᠳᠡᠭᠡᠨ ᠡᠷᠭᠢᠨ ᠪᠤᠶᠢᠯᠠᠬᠤ ᠪᠣᠲᠣᠭᠤᠨ ᠪᠣᠶᠢᠯᠠᠭᠠᠨ ᠳᠤ ᠪᠣᠷᠤᠭ᠎ᠠ ᠰᠢᠪᠡᠷᠡᠨ ᠣᠷᠣᠵᠤ᠂ ᠰᠡᠳᠬᠢᠯ ᠤᠶᠠᠷᠠᠨ ᠨᠢᠳᠦ ᠵᠠᠶᠢᠷᠲᠤᠯ᠎ᠠ ᠃                            ① ᠰ᠊ · ᠵᠠᠮᠪᠠᠯᠳᠣᠷᠵᠢ ᠶᠢᠨ ︽ᠲᠡᠮᠡᠭᠡ ᠲᠡᠭᠷᠢ ᠶᠢᠨ ᠠᠮᠢᠳᠠᠨ︾ ︵ᠺᠢᠷᠢᠯ᠂ ᠤᠯᠠᠭᠠᠨᠪᠠᠭᠠᠲᠤᠷ᠂ 1997 ᠣᠨ︶ ᠨᠣᠮ ᠤᠨ 46 ᠳ᠋ᠤᠭᠠᠷ ᠨᠢᠭᠤᠷ ᠲᠤ᠃  
 
ᠢᠷᠡᠯᠲᠡ᠄ ᠠᠯᠠᠱᠠ ᠶᠢᠨ ᠡᠳᠦᠷ ᠤᠨ ᠰᠣᠨᠢᠨ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号