| | G · ᠴᠣᠭᠲᠤ | ᠪᠢ ᠬᠡᠳᠦᠶᠢᠪᠡᠷ ᠰᠢᠨᠡ ᠨᠡᠶᠢᠭᠡᠮ ᠳᠤ ᠲᠦᠷᠦᠵᠦ᠂ ᠤᠯᠠᠭᠠᠨ ᠲᠤᠭ ᠤᠨ ᠳᠣᠣᠷᠠ ᠦᠰᠦᠨ ᠪᠣᠶᠢᠵᠢᠭᠰᠠᠨ | ᠪᠤᠯᠪᠠᠴᠤ ᠪᠠᠯᠴᠢᠷ ᠪᠠᠭᠠ ᠪᠠᠶᠢᠬᠤ ᠳᠤ ᠣᠳᠣᠬᠢ ᠰᠢᠭ᠋ ᠷᠠᠳᠢᠣ᠋ ᠲᠧᠯᠸᠢᠰ ᠭᠡᠵᠦ ᠪᠠᠶᠢᠬᠤ ᠦᠭᠡᠢ᠂ ᠰᠣᠨᠢᠨ ᠰᠡᠳᠬᠦᠯ | ᠪᠠᠶᠢᠳᠠᠭ ᠴᠤ ᠮᠠᠨ ᠤ ᠬᠢᠨ ᠰᠢᠭ᠋ ᠪᠢᠴᠢᠭ ᠰᠣᠶᠣᠯ ᠦᠭᠡᠢ ᠡᠭᠡᠯ ᠮᠠᠯᠴᠢᠨ ᠣᠯᠵᠤ ᠬᠠᠷᠠᠬᠤ ᠳᠤ ᠪᠡᠷᠬᠡ ᠪᠠᠶᠢᠭᠰᠠᠨ | ᠦᠶᠡ ᠪᠢᠯᠡ᠃ ᠴᠣᠷ ᠤᠨ ᠭᠠᠭᠴᠠ ᠰᠡᠳᠬᠢᠯ ᠢ ᠪᠠᠶᠠᠰᠬᠠᠬᠤ ᠵᠦᠢᠯ ᠨᠢ ᠦᠯᠢᠭᠡᠷ ᠳᠣᠮᠤᠭ ᠰᠣᠨᠤᠰᠬᠤ ᠴᠡᠩᠭᠡᠯ | ᠪᠠᠶᠢᠯᠠ᠃ ᠠᠬᠠ ᠶᠡᠬᠡᠴᠦᠦᠯ ᠠᠴᠠ ᠦᠯᠢᠭᠡᠷ ᠰᠣᠨᠤᠰᠬᠤ ᠶᠢᠨ ᠬᠠᠮᠲᠤ ᠭᠡᠷ ᠲᠤ ᠵᠣᠴᠢᠨ ᠢᠷᠡᠬᠦ ᠶᠢ ᠶᠡᠬᠡᠯᠡ | ᠬᠦᠰᠡᠳᠡᠭ ᠪᠠᠶᠢᠭᠰᠠᠨ᠂ ᠤᠴᠢᠷ ᠨᠢ ᠵᠣᠴᠢᠨ ᠢᠷᠡᠪᠡᠯ ᠲᠡᠳᠡ ᠨᠠᠷ ᠢᠶᠠᠷ ᠦᠯᠢᠭᠡᠷ ᠶᠠᠷᠢᠭᠤᠯᠬᠤ ᠶᠢ ᠭᠤᠶᠤᠵᠤ | ᠨᠠᠶᠢᠳᠠᠳᠠᠭ ᠪᠠᠶᠢᠯᠠ᠃ ︽ᠠᠯᠠᠱᠠ ᠯᠾᠠᠷᠠᠮᠪᠠ ᠠᠭᠸᠠᠩᠳᠠᠨᠳᠠᠷ ᠤᠨ ᠦᠯᠢᠭᠡᠷ︾᠂ ︽ᠳᠡᠭᠡᠳᠦ ᠶᠢᠨ ᠭᠡᠭᠡᠨ ᠤ | ᠦᠯᠢᠭᠡᠷ︾ ᠭᠡᠳ ᠮᠠᠰᠢ ᠣᠯᠠᠨ ᠰᠠᠶᠢᠬᠠᠨ ᠦᠯᠢᠭᠡᠷ ᠳᠣᠮᠤᠭ ᠢ ᠪᠠᠭᠠ ᠶᠢᠨ ᠦᠶᠡ ᠳᠡᠭᠡᠨ ᠰᠣᠨᠣᠰᠤᠭᠰᠠᠨ ᠪᠢᠯᠡ᠃ | ᠴᠣᠬᠤᠮ ᠶᠠᠭᠤ ᠠᠴᠠ ᠪᠣᠯᠤᠭᠰᠠᠨ ᠢ ᠥᠪᠡᠷ ᠢᠶᠠᠨ ᠴᠤ ᠰᠠᠶᠢᠨ ᠮᠡᠳᠡᠯ ᠦᠭᠡᠢ᠂ ᠨᠢᠭᠡ ᠮᠡᠳᠡᠬᠦ ᠳᠤ ᠦᠶᠡ ᠶᠢᠨ | ᠨᠠᠰᠤᠨ ᠤ ᠪᠠᠭᠠᠴᠤᠤᠯ ᠳᠠᠭᠠᠨ ᠪᠠᠰᠠ ᠨᠢᠭᠡ ᠬᠤᠶᠠᠷ ᠦᠯᠢᠭᠡᠷ ᠬᠡᠯᠡᠵᠦ ᠴᠢᠳᠠᠳᠠᠭ ᠪᠣᠯᠴᠢᠬᠠᠭᠰᠠᠨ ᠪᠠᠶᠢᠪᠠ᠃ ᠨᠠᠮᠠᠶᠢ | ᠲᠤᠯᠤᠭᠠᠨ ᠨᠠᠰᠤᠲᠠᠢ ᠪᠠᠶᠢᠬᠤ ᠳᠤ ᠮᠢᠨᠤ ᠠᠬᠠ ᠰᠤᠷᠭᠠᠭᠤᠯᠢ ᠠᠴᠠ ᠪᠠᠨ ᠴᠢᠯᠦᠭᠡᠨ ᠤ ᠬᠤᠭᠤᠴᠠᠭᠠᠨ ᠳᠤ ᠬᠠᠷᠢᠵᠤ | ᠢᠷᠡᠬᠦ ᠳᠡᠭᠡᠨ ᠨᠢᠭᠡ ᠢᠵᠢ ︽ᠭᠤᠷᠪᠠᠨ ᠤᠯᠤᠰ ᠤᠨ ᠦᠯᠢᠭᠡᠷ︾ ᠢ ᠠᠪᠴᠤ ᠢᠷᠡᠭᠡᠳ᠂ ᠣᠷᠣᠢ ᠪᠣᠯᠭᠠᠨ ᠨᠢᠭᠡ | ᠪᠦᠯᠦᠭ ᠢ ᠤᠩᠰᠢᠵᠤ ᠰᠣᠨᠣᠰᠬᠠᠳᠠᠭ ᠪᠠᠶᠢᠭᠰᠠᠨ ᠶᠠᠪᠤᠳᠠᠯ ᠨᠢ ᠨᠠᠳᠠᠳᠤ ᠰᠤᠳᠤᠷ ᠪᠢᠴᠢᠭ ᠲᠤ ᠡᠶᠢᠮᠦ ᠰᠠᠶᠢᠬᠠᠨ | ᠦᠯᠢᠭᠡᠷ ᠳᠣᠮᠤᠭ ᠤᠳ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠳᠠᠭ ᠶᠤᠮ ᠪᠠᠶᠢᠨᠠ ᠭᠡᠰᠡᠨ ᠰᠣᠨᠢᠷᠬᠠᠯ ᠢ ᠲᠦᠷᠦᠭᠦᠯᠵᠦ᠂ | ᠬᠤᠵᠢᠮ ᠤᠨ ᠰᠤᠳᠤᠷ ᠨᠣᠮ ᠴᠤᠭᠯᠠᠭᠤᠯᠬᠤ ᠳᠤᠷᠠ ᠪᠠᠬᠠ ᠶᠢᠨ ᠰᠢᠵᠢᠮ ᠨᠢ ᠡᠨᠡ ᠦᠶᠡ ᠠᠴᠠ ᠡᠬᠢᠯᠡᠨ | ᠡᠷᠴᠢᠯᠡᠭᠳᠡᠭᠰᠡᠨ ᠪᠥᠭᠡᠳ ᠨᠣᠮ ᠤᠨ ᠴᠠᠭᠠᠨ ᠪᠤᠶᠠᠨ ᠤ ᠵᠠᠮ ᠳᠤ ᠠᠯᠬᠤᠭᠠᠳ ᠯᠠ ᠪᠠᠶᠢᠪᠠᠯ ᠨᠢᠭᠡᠨ ᠵᠦᠭ | ᠶᠠᠭᠠᠬᠢᠭᠰᠠᠨ ᠴᠤ ᠲᠣᠳᠣᠷᠠᠬᠤ ᠪᠤᠢ ᠭᠡᠰᠡᠨ ᠢ ᠮᠡᠳᠡᠭᠦᠯᠦᠭᠰᠡᠨ ᠪᠢᠯᠡ᠃ | ᠨᠢᠭᠡ᠂ ᠰᠤᠷᠭᠠᠭᠤᠯᠢ ᠶᠢᠨ ᠮᠥᠷ ᠬᠥᠭᠡᠭᠡᠭᠰᠡᠨ ᠰᠣᠨᠢᠷᠬᠠᠯ ᠲᠠᠢ ᠬᠡᠳᠦᠨ ᠥᠩᠭᠡᠷᠡᠯᠲᠡ | ᠪᠢ ᠬᠡᠳᠦᠶᠢᠪᠡᠷ ᠰᠤᠷᠤᠯᠭᠠ ᠶᠢᠨ ᠮᠥᠷ ᠢ ᠣᠯᠠᠨ ᠵᠢᠯ ᠬᠥᠭᠡᠭᠡᠭᠰᠡᠨ ᠪᠤᠯᠪᠠᠴᠤ ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠬᠤ | ᠶᠠᠪᠤᠴᠠ ᠠᠯᠠᠭ ᠲᠠᠢ ᠪᠤᠯᠠᠭ ᠲᠠᠢ᠃ ᠪᠠᠭᠠ ᠰᠤᠷᠭᠠᠭᠤᠯᠢ ᠶᠢᠨ ᠳᠦᠷᠪᠡᠨ ᠣᠨ ᠳᠤ ᠳᠥᠩᠭᠡᠵᠢ ᠣᠷᠣᠭᠠᠳ | ᠪᠠᠶᠢᠬᠤ ᠳᠤ ᠶᠡᠷᠦ ᠪᠤᠰᠤ ᠶᠢᠨ ᠬᠥᠳᠡᠯᠭᠡᠭᠡᠨ ᠥᠷᠨᠢᠭᠡᠳ᠂ ᠵᠤᠨ ᠤ ᠠᠮᠠᠷᠠᠯᠲᠠ ᠪᠤᠯᠬᠤ ᠳᠤ ᠠᠩᠭᠢ ᠶᠢᠨ | ᠪᠠᠭᠰᠢ ᠠᠴᠠ ︽ᠳᠠᠷᠠᠭᠠ ᠬᠤᠭᠤᠴᠠᠭᠠ ᠰᠤᠷᠭᠠᠭᠤᠯᠢ ᠬᠡᠵᠢᠶᠡ ᠡᠬᠢᠯᠡᠬᠦ ᠶᠢ ᠮᠡᠳᠡᠬᠦ ᠦᠭᠡᠢ᠂ ᠮᠡᠳᠡᠭᠳᠡᠯ ᠭᠦᠯᠢᠶᠡ︾ | ᠭᠡᠰᠡᠨ ᠵᠠᠬᠢᠶᠠ ᠶᠢ ᠬᠠᠶᠢᠷᠠᠯᠠᠭᠰᠠᠨ ᠠᠴᠠ ︽ᠮᠡᠳᠡᠭᠳᠡᠯ︾ ᠬᠦᠯᠢᠶᠡᠭᠡᠳ ᠬᠤᠶᠠᠷ ᠵᠢᠯ ᠭᠠᠷᠤᠢ ᠭᠡᠷ ᠲᠡᠭᠡᠨ ᠰᠠᠭᠤᠪᠠ᠃ | ᠨᠢᠭᠡ ᠮᠡᠳᠡᠬᠦ ᠳᠤ 1969 ᠣᠨ ᠪᠣᠯᠵᠤ᠂ ᠥᠪᠥᠷ ᠮᠣᠩᠭᠤᠯ ᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠵᠡᠭᠦᠨᠰᠢ | ᠪᠠᠷᠠᠭᠤᠨᠰᠢ ᠬᠡᠳᠦᠨ ᠮᠤᠵᠢ ᠳᠤ ᠬᠤᠪᠢᠶᠠᠭᠰᠠᠨ ᠵᠠᠰᠠᠭ ᠵᠠᠬᠢᠷᠭᠠᠨ ᠤ ᠬᠤᠪᠢᠷᠠᠯᠲᠠ ᠭᠠᠷᠴᠤ᠂ ᠠᠯᠠᠱᠠ ᠪᠠᠷᠠᠭᠤᠨ | ᠬᠤᠰᠢᠭᠤ ᠶᠢ ᠭᠠᠨᠰᠤ ᠮᠤᠵᠢ ᠶᠢᠨ ᠦ᠋ ᠸᠧᠢ ᠲᠤᠰᠬᠠᠢ ᠲᠣᠭᠤᠷᠢᠭ ᠲᠤ ᠬᠠᠷᠢᠶᠠᠯᠠᠭᠤᠯᠪᠠ᠃ ᠡᠭᠦᠨ ᠠᠴᠠ ᠪᠣᠯᠵᠤ | ᠭᠦᠩᠱᠧ ᠶᠢᠨ ᠱᠦᠵᠢ᠂ᠳᠠᠷᠤᠭᠠ ᠨᠠᠷ ︽ᠣᠳᠣ ᠮᠣᠩᠭᠤᠯ ᠪᠢᠴᠢᠭ ᠰᠤᠷᠤᠭᠠᠳ ᠬᠡᠷᠡᠭ ᠦᠭᠡᠢ ᠪᠣᠯᠤᠭᠰᠠᠨ︾ | ᠭᠡᠳᠡᠭ ᠶᠠᠷᠢᠶᠠ ᠶᠢ ᠦᠨᠡᠮᠰᠢᠨ᠂ ᠨᠠᠮᠠᠶᠢ ᠨᠢᠭᠡᠳᠦᠯ ᠤᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠶᠢᠨ ᠬᠢᠲᠠᠳ ᠠᠩᠭᠢ ᠶᠢᠨ ᠳᠦᠷᠪᠡᠨ | ᠣᠨ ᠳᠤ ᠣᠷᠣᠭᠤᠯᠤᠨ ᠰᠤᠷᠤᠯᠴᠠᠭᠤᠯᠬᠤ ᠪᠠᠷ ᠪᠣᠯᠪᠠ᠃ ᠲᠡᠷᠡ ᠦᠶᠡ ᠳᠤ ᠪᠢ ᠬᠢᠲᠠᠳ ᠦᠭᠡ ᠨᠢᠭᠡ ᠴᠤ ᠶᠠᠷᠢᠵᠤ | ᠴᠢᠳᠠᠳᠠᠭ ᠦᠭᠡᠢ ᠪᠠᠶᠢᠭᠰᠠᠨ᠃ ᠪᠠᠭᠰᠢ ᠶᠢᠨ ᠬᠢᠴᠢᠶᠡᠯ ᠢ ᠣᠶᠢᠯᠠᠭᠠᠬᠤ ᠦᠭᠡᠢ ᠰᠡᠳᠬᠢᠯ ᠰᠠᠨᠠᠭᠠ ᠶᠢ ᠶᠡᠬᠡᠳᠡ | ᠪᠤᠬᠢᠨᠢᠳᠤᠭᠤᠯᠤᠭᠰᠠᠨ ᠪᠢᠯᠡ᠃ ᠲᠡᠭᠡᠭᠡᠳ ᠠᠷᠭᠠ ᠪᠤᠰᠤ ᠰᠤᠷᠭᠠᠭᠤᠯᠢ ᠶᠢᠨ ᠵᠠᠬᠢᠷᠤᠯ ᠪᠠᠶᠠᠨᠳᠠᠯᠠᠢ ︵ᠮᠣᠩᠭᠤᠯ ᠭᠡᠯᠡ | ᠰᠤᠷᠤᠬᠰᠠᠨ ᠬᠢᠲᠠᠳ ᠬᠥᠮᠥᠨ᠂ ᠬᠢᠲᠠᠳ ᠨᠡᠷᠡ ᠨᠢ ᠬᠠᠨ ᠰᠢᠤᠸᠠᠢ ᠱᠸᠡᠭ ᠭᠡᠳᠡᠭ︶ ᠶᠢ ᠡᠷᠢᠨ ᠣᠴᠢᠵᠤ᠂ ︽ᠪᠢ | ᠬᠢᠲᠠᠳ ᠭᠡᠯᠡ ᠶᠢ ᠰᠠᠶᠢᠨ ᠰᠤᠷᠬᠤ ᠭᠡᠵᠦ ᠴᠢᠷᠮᠠᠶᠢᠵᠤ ᠪᠠᠶᠢᠨᠠ᠂ ᠭᠡᠪᠡᠴᠦ ᠬᠢᠲᠠᠳ ᠦᠭᠡ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ | ᠲᠤᠯᠠ ᠶᠠᠭᠠᠬᠢᠵᠤ ᠬᠢᠲᠠᠳ ᠦᠰᠦᠭ ᠰᠤᠷᠬᠤ ᠪᠢᠯᠡ︖ ᠪᠢ ᠨᠢᠭᠡ ᠣᠨ ᠳᠤ ᠣᠷᠣᠵᠤ ᠡᠬᠢᠨ ᠠᠴᠠ ᠨᠢ ᠰᠠᠶᠢᠨ | ᠰᠤᠷᠤᠶᠠ ᠭᠡᠵᠦ ᠪᠤᠳᠤᠵᠤ ᠪᠠᠶᠢᠨᠠ︾ ᠭᠡᠰᠡᠨ ᠳᠤ᠂ ᠪᠠ᠊᠆ ᠵᠠᠬᠢᠷᠤᠯ ᠠᠴᠠ ︽ᠲᠡᠭᠡᠵᠦ ᠶᠠᠭᠠᠬᠢᠵᠤ ᠪᠤᠯᠳᠠᠭ ᠶᠤᠮ︖ | ᠴᠢᠨᠦ ᠨᠠᠰᠤ ᠡᠶᠢᠮᠦ ᠶᠡᠭᠡ ᠪᠣᠯᠴᠢᠬᠠᠭᠠᠳ ᠨᠢᠭᠡ ᠣᠨ ᠳᠤ ᠰᠠᠭᠤᠵᠤ ᠪᠤᠯᠬᠤ ᠦᠭᠡᠢ︾ ᠭᠡᠪᠡ᠃ ᠪᠢ ᠬᠠᠷᠢᠭᠤ ᠳᠤᠨᠢ | ᠂ ︽ᠲᠡᠭᠡᠪᠡᠯ ᠪᠢ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠮᠠᠯ ᠢᠶᠠᠨ ᠬᠠᠷᠢᠭᠤᠯᠤᠶᠠ︾ ᠭᠡᠵᠡᠢ᠃ ︽ᠪᠠᠶᠢᠵᠠ ᠪᠠᠶᠢᠵᠠ᠂ ᠶᠠᠭᠤ ᠭᠡᠨᠡ︖ | ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠮᠠᠯ ᠬᠠᠷᠢᠭᠤᠯᠤᠨᠠ ᠭᠡᠨᠡ ᠤᠤ︖ ᠡᠨᠡ ᠪᠤᠯᠬᠤ ᠦᠭᠡᠢ᠂ ᠲᠡᠭᠡᠪᠡᠯ ᠭᠤᠷᠪᠠᠨ ᠣᠨ ᠠᠴᠠ | ᠡᠬᠢᠯᠡᠵᠦ ᠰᠤᠷ︾ ᠭᠡᠪᠡ᠃ ᠪᠢ ᠥᠭᠡᠳᠡ ᠠᠴᠠ ᠨᠢ ︽ᠭᠤᠣᠯ ᠤᠴᠢᠷ ᠨᠢ ᠪᠢ ᠬᠢᠲᠠᠳ ᠦᠭᠡ ᠬᠡᠯᠡᠵᠦ ᠴᠢᠳᠠᠬᠤ | ᠦᠭᠡᠢ᠃ ᠨᠢᠭᠡ ᠣᠨ ᠠᠴᠠ ᠰᠤᠷᠪᠠᠯ ᠪᠠᠷᠤᠭ ᠪᠤᠯᠬᠤ ᠪᠠᠶᠢᠬᠠ ᠭᠡᠵᠦ ᠪᠤᠳᠤᠵᠤ ᠪᠠᠶᠢᠨᠠ︾ ᠭᠡᠪᠡ᠃ ᠪᠠ᠊᠆ ᠵᠠᠬᠢᠷᠤᠯ | ᠬᠡᠰᠡᠭ ᠪᠣᠳᠣᠯᠬᠢᠯᠠᠭᠠᠳ᠄ ︽ᠲᠡᠭᠡᠪᠡᠯ ᠴᠢ ᠬᠤᠶᠠᠷ ᠣᠨ ᠳᠤ ᠣᠷᠣᠵᠤ ᠰᠤᠷ︾ ᠭᠡᠯᠡ᠃ ᠢᠩᠭᠢᠭᠡᠳ ᠬᠤᠶᠠᠷ ᠵᠢᠯ | ᠬᠢᠲᠠᠳ ᠠᠩᠭᠢ ᠳᠤ ᠰᠤᠷᠤᠯᠴᠠᠨ᠂ ᠬᠢᠲᠠᠳ ᠭᠡᠯᠡ ᠶᠢ ᠨᠡᠯᠢᠶᠡᠳ ᠬᠡᠯᠡᠬᠦ ᠲᠠᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠲᠠᠨᠢᠬᠤ ᠦᠭᠡᠢ | ᠦᠰᠦᠭ ᠢᠶᠠᠨ ᠲᠣᠯᠢ ᠪᠢᠴᠢᠭ ᠡᠷᠭᠢᠭᠦᠯᠵᠦ ᠰᠤᠷᠤᠭᠠᠳ ᠭᠤᠷᠪᠠᠨ ᠣᠨ ᠢᠶᠠᠨ ᠳᠥᠩᠭᠡᠵᠢ ᠲᠡᠭᠦᠰᠬᠡᠭᠡᠳ | ᠭᠦᠩᠱᠧ ᠳᠡᠭᠡᠨ ᠬᠢᠲᠠᠳ ᠮᠣᠩᠭᠤᠯ ᠬᠤᠶᠠᠷ ᠭᠡᠯᠡ᠂ᠦᠰᠦᠭ ᠢ ᠮᠡᠳᠡᠬᠦ ︽ᠶᠡᠭᠡ ᠡᠷᠳᠡᠮ ᠨᠣᠮ ᠲᠠᠢ︾ ᠰᠡᠬᠡᠭᠡᠲᠡᠨ | ᠬᠥᠮᠥᠨ ᠪᠣᠯᠤᠭᠰᠠᠨ ᠭᠡᠵᠦ ︽ᠡᠷᠳᠦᠭᠡᠳ︾ ᠭᠡᠷ ᠲᠡᠭᠡᠨ ᠬᠠᠷᠢᠵᠤ᠂ ᠬᠠᠮᠲᠤ ᠶᠢᠨ ᠦᠢᠯᠡᠳᠪᠦᠷᠢᠯᠡᠯ ᠳᠤ ᠣᠷᠣᠯᠴᠠᠨ | ᠂ ᠰᠢᠯᠢᠳᠡᠭ ᠡᠷᠦᠭᠡ ᠶᠢᠨ ᠴᠡᠷᠢᠭ ᠪᠣᠯᠵᠤ᠂ ᠵᠠᠯᠠᠭᠤᠴᠤᠳ ᠤᠨ ᠭᠠᠪᠰᠢᠭᠠᠢ ᠠᠩᠭᠢ ᠪᠠᠶᠢᠭᠤᠯᠤᠨ ᠬᠤᠳᠳᠤᠭ | ᠮᠠᠯᠲᠠᠬᠤ᠂ ᠬᠠᠰᠢᠶᠠ ᠰᠠᠷᠠᠪᠴᠢ ᠰᠡᠯᠪᠢᠨ ᠵᠠᠰᠠᠬᠤ᠂ ᠲᠠᠷᠢᠶᠠᠯᠠᠩ ᠤᠨ ᠭᠠᠵᠠᠷ ᠲᠡᠭᠰᠢᠯᠡᠬᠦ᠂ ᠰᠤᠪᠠᠭ ᠴᠦᠭᠦᠷᠦᠮ | ᠮᠠᠯᠲᠠᠬᠤ᠂ ᠠᠶᠠᠨ ᠲᠡᠭᠡᠭᠡᠪᠦᠷᠢ ᠳᠤ ᠶᠠᠪᠤᠬᠤ ᠵᠡᠷᠭᠡ ᠬᠠᠷᠠ ᠠᠵᠢᠯ ᠬᠢᠪᠡ᠃ 1973 ᠣᠨ ᠤ 4 ᠰᠠᠷᠠ ᠳᠤ | ᠬᠤᠰᠢᠭᠤᠨ ᠠᠴᠠ ᠲᠤᠰᠬᠠᠢ ᠲᠣᠮᠢᠯᠠᠯᠲᠠ ᠪᠠᠷ ᠮᠠᠨ ᠤ ᠪᠠᠷᠢᠭᠠᠳᠠ ᠳᠤ ᠴᠢᠭ ᠲᠤ ᠰᠠᠭᠤᠭᠠ ᡂᠢ ᠣᠪᠣᠭᠲᠤ ᠸᠠᠨ | ᠵᠧᠨ ᠭᠡᠭᠴᠢ ᠳᠠᠷᠤᠭᠠ ᠠᠴᠠ ᠨᠠᠮᠠᠶᠢ ᠪᠠᠷᠢᠭᠠᠳᠠ ᠶᠢᠨ ᠨᠢᠭᠲᠠᠯᠠᠨ ᠪᠤᠳᠤᠬᠴᠢ ᠪᠣᠯᠭᠠᠨᠠ ᠭᠡᠰᠡᠨ ᠰᠢᠢᠳᠪᠦᠷᠢ ᠶᠢ | ᠭᠡᠰᠢᠭᠦᠳ ᠤᠨ ᠪᠠᠭᠠ ᠬᠤᠷᠠᠯ ᠳᠡᠭᠡᠷᠡ ᠵᠠᠷᠯᠠᠪᠠ᠃ ᠨᠢᠭᠲᠠᠯᠠᠨ ᠪᠤᠳᠤᠬᠴᠢ ᠶᠢᠨ ᠠᠵᠢᠯ ᠢ ᠶᠡᠷᠦ ᠠᠴᠠ ᠬᠢᠬᠦ ᠳᠤᠷᠠ | ᠦᠭᠡᠢ ᠲᠤᠯᠠ ᠪᠢ ᠰᠢᠭᠤᠳ ︽ᠡᠨᠡ ᠠᠵᠢᠯ ᠢ ᠪᠢ ᠬᠢᠵᠦ ᠴᠢᠳᠠᠬᠤ ᠦᠭᠡᠢ︾ ᠭᠡᠰᠡᠨ ᠳᠤ᠂ ︽ᠨᠠᠮ ᠠᠴᠠ ᠴᠢᠮᠠᠶᠢ | ᠬᠡᠴᠢᠨᠡᠨ ᠵᠢᠯ ᠬᠥᠮᠥᠵᠢᠭᠦᠯᠦᠭᠰᠡᠨ ᠪᠠᠶᠢᠬᠤ ᠳᠤ ᠶᠠᠭᠤᠨ ᠳᠤ ᠬᠢᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠶᠤᠮ︖ ᠴᠢᠨᠦ ᠪᠤᠳᠤᠯ | ᠰᠠᠨᠠᠭᠠ ᠠᠰᠠᠭᠤᠳᠠᠯ ᠲᠠᠢ ᠪᠠᠶᠢᠨᠠ︾ ᠭᠡᠵᠦ ᠨᠠᠮᠠᠶᠢ ᠰᠢᠭᠦᠮᠵᠢᠯᠡᠵᠡᠢ᠃ ᠠᠷᠭᠠ ᠪᠤᠰᠤ ︽ᠡᠨᠡ ᠠᠵᠢᠯ ᠢ ᠴᠢᠨᠢ | ᠬᠦᠯᠢᠶᠡᠶᠡ᠃ ᠭᠡᠪᠡᠴᠦ ᠨᠠᠳᠠᠳᠤ ᠨᠢᠭᠡ ᠱᠠᠭᠠᠷᠳᠠᠯᠭᠠ ᠪᠠᠶᠢᠨᠠ᠂ ᠨᠢᠭᠲᠠᠯᠠᠨ ᠪᠤᠳᠤᠬᠴᠢ ᠶᠢᠨ ᠠᠵᠢᠯ ᠢ ᠬᠦᠯᠢᠶᠡᠭᠰᠡᠭᠡᠷ | ᠬᠠᠮᠢᠭᠠ ᠴᠤ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠣᠨᠠ᠃ ᠮᠢᠨᠤ ᠠᠬᠠ ᠡᠬᠡ ᠤᠯᠤᠰ ᠤᠨ ᠠᠯᠲᠠᠨ ᠬᠢᠯᠢ ᠳᠡᠭᠡᠷᠡ | ᠠᠵᠢᠯᠯᠠᠵᠤ ᠪᠤᠢ᠂ ᠡᠶᠢᠮᠦ ᠪᠣᠯᠬᠤᠷ ᠤᠷᠢᠳᠠᠪᠠᠷ ᠠᠬᠠ ᠲᠠᠢ ᠪᠠᠨ ᠨᠢᠭᠡ ᠵᠣᠯᠭᠠᠭᠠᠳ᠂ ᠲᠠᠷᠠᠭᠠ ᠨᠢ ᠡᠨᠡ ᠠᠵᠢᠯ ᠢ | ᠭᠠᠷᠳᠠᠨ ᠭᠢᠶᠡ︾ ᠭᠡᠰᠡᠨ ᠳᠤ ᠮᠢᠨᠤ ᠬᠦᠰᠡᠯ ᠵᠣᠷᠢᠯᠲᠠ ᠶᠢ ᠵᠥᠪᠰᠢᠶᠡᠷᠡᠵᠡᠢ᠃ ᠶᠡᠷᠦᠨᠢ ᠪᠢ ᠰᠤᠷᠭᠠᠭᠤᠯᠢ ᠳᠤ | ᠰᠠᠭᠤᠬᠤ ᠪᠠᠨ ᠵᠣᠭᠰᠣᠵᠤ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠪᠠᠷᠢᠭᠠᠳᠠ ᠶᠢᠨ ᠭᠡᠰᠢᠭᠦᠨ ᠪᠣᠯᠤᠭᠰᠠᠨ ᠤᠴᠢᠷ ᠢᠶᠠᠨ ᠬᠢᠯᠢ ᠶᠢᠨ | ᠴᠠᠭᠳᠠᠭᠠᠨ ᠤ ᠠᠯᠪᠠᠨ ᠳᠤ ᠪᠠᠶᠢᠭᠰᠠᠨ ᠠᠬᠠ ᠳᠠᠭᠠᠨ ᠠᠶᠤᠭᠠᠳ ᠬᠡᠯᠡᠵᠦ ᠴᠢᠳᠠᠭᠠ ᠦᠭᠡᠢ ᠪᠠᠶᠢᠭᠰᠠᠨ ᠶᠤᠮ᠃ | ᠬᠡᠳᠦᠶᠢᠪᠡᠷ ᠲᠤᠬᠠᠢ ᠶᠢᠨ ᠴᠠᠭ ᠴᠢᠮᠡᠭᠡ ᠬᠤᠯᠪᠤᠭᠠ ᠠᠪᠤᠨᠠ ᠭᠡᠵᠦ ᠵᠠᠬᠢᠳᠠᠯ ᠳ᠋ᠢᠶᠠᠨᠪᠤᠤ ᠠᠴᠠ ᠥᠭᠡᠷᠡ ᠵᠦᠢᠯ | ᠪᠠᠶᠢᠭᠰᠠᠨ ᠦᠭᠡᠢ ᠴᠤ᠂ ᠮᠢᠨᠤ ᠠᠬᠠ ᠨᠠᠮᠠᠶᠢ ᠰᠤᠷᠭᠠᠭᠤᠯᠢ ᠠᠴᠠ ᠭᠠᠷᠤᠭᠰᠠᠨ ᠶᠠᠪᠤᠳᠠᠯ ᠢ ᠭᠠᠳᠠᠷᠯᠠᠭᠰᠠᠨ ᠴᠤ ᠶᠤᠮ | ᠤᠤ᠂ ᠨᠠᠮᠠᠶᠢ ᠲᠡᠭᠦᠨ ᠤ ᠲᠡᠨᠳᠡ ᠣᠴᠢᠵᠤ ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤ ᠭᠡᠰᠡᠨ ᠨᠢᠭᠡᠨ ᠬᠤᠪᠢ ᠵᠠᠬᠢᠳᠠᠯ ᠢᠷᠡᠭᠦᠯᠦᠭᠰᠡᠨ | ᠪᠠᠶᠢᠪᠠ᠃ ᠲᠡᠭᠡᠭᠡᠳ ᠪᠢ ᠪᠠᠷᠢᠭᠠᠳᠠ ᠠᠴᠠ ᠲᠠᠨᠢᠯᠴᠠᠭᠤᠯᠭᠠ ᠶᠢᠨ ᠪᠢᠴᠢᠭ ᠭᠠᠷᠭᠠᠵᠤ ᠠᠪᠤᠭᠠᠳ᠂ ᠰᠤᠷᠭᠠᠭᠤᠯᠢ ᠶᠢᠨ | ᠪᠠ᠊᠆ ᠵᠠᠬᠢᠷᠤᠯ ᠳᠤ ᠲᠠᠨᠢᠯᠴᠠᠭᠤᠯᠭᠠ ᠶᠢᠨ ᠪᠢᠴᠢᠭ ᠢᠶᠠᠨ ᠦᠵᠡᠭᠦᠯᠦᠨ᠂ ︽ᠪᠢ ᠣᠳᠤ ᠠᠬᠠ ᠶᠢᠨ ᠬᠠᠵᠠᠭᠤ ᠳᠤ | ᠣᠴᠢᠵᠤ ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠨᠠ᠂ ᠲᠠ ᠰᠤᠷᠭᠠᠭᠤᠯᠢ ᠰᠢᠯᠵᠢᠭᠦ ᠭᠡᠷᠡᠴᠢ ᠲᠡᠮᠳᠡᠭ ᠭᠠᠷᠭᠠᠵᠤ ᠥᠭᠬᠦ ᠶᠢ | ᠭᠤᠶᠤᠶᠠ︾ ᠭᠡᠰᠡᠨ ᠳᠤ᠂ ︽ᠬᠡᠳᠦᠨ ᠣᠨ ᠪᠤᠢ︖︾ ᠭᠡᠵᠦ ᠠᠰᠠᠭᠤᠪᠠ᠃ ︽ᠠᠩᠬᠠ ᠳᠤᠮᠳᠠᠳᠤ | ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠨᠠ︾ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠲᠡᠭᠡᠭᠡᠳ ᠲᠡᠷᠡ ᠨᠠᠳᠠᠳᠤ ᠪᠠᠭᠠ ᠰᠤᠷᠭᠠᠭᠤᠯᠢ ᠲᠡᠭᠦᠰᠪᠡ | ᠭᠡᠰᠡᠨ ᠰᠤᠷᠭᠠᠭᠤᠯᠢ ᠰᠢᠯᠵᠢᠭᠦ ᠭᠡᠷᠡᠴᠢ ᠲᠡᠮᠳᠡᠭ ᠭᠠᠷᠭᠠᠵᠤ ᠥᠭᠪᠡ᠃ ᠡᠨᠡᠬᠦ ᠭᠡᠷᠡᠴᠢ ᠲᠡᠮᠳᠡᠭ ᠢᠶᠠᠨ ᠠᠪᠴᠤ | ᠬᠤᠰᠢᠭᠤᠨ ᠳᠤ ᠢᠷᠡᠵᠦ ᠳᠣᠲᠣᠭᠠᠳᠤ ᠶᠢ ᠬᠠᠮᠠᠭᠠᠯᠠᠬᠤ ᠬᠡᠯᠲᠡᠰ ︵ᠲᠡᠷᠡ ᠦᠶᠡ ᠳᠤ ᠬᠠᠤᠯᠢ ᠴᠠᠭᠠᠵᠠ ᠶᠢᠨ ᠰᠠᠯᠠᠭᠠ | ᠮᠥᠴᠢᠷ ᠢ ᠨᠡᠶᠢᠯᠡᠭᠦᠯᠦᠨ ᠡᠶᠢᠮᠦ ᠨᠡᠷᠡ ᠲᠠᠢ ᠪᠣᠯᠤᠭᠰᠠᠨ ᠪᠠᠶᠢᠪᠠ︶ ᠲᠤ ᠣᠴᠢᠵᠤ ᠬᠢᠯᠢ ᠶᠢᠨ ᠭᠡᠷᠡᠴᠢ ᠠᠪᠬᠤ | ᠭᠡᠰᠡᠨ ᠳᠤ ᠨᠢᠭᠡ ᠬᠦᠰᠦᠨᠦᠭ ᠥᠭᠴᠦ ᠲᠠᠭᠯᠠᠭᠤᠯᠤᠭᠠᠳ ᠵᠠᠪᠠᠯ ᠨᠢᠭᠡ ᠢᠮᠠᠬᠤ ᠶᠢᠨ ᠭᠡᠷᠡᠯ ᠵᠢᠷᠤᠭ ᠨᠠᠭᠠᠬᠤ | ᠴᠢᠬᠤᠯᠠ ᠲᠠᠢ ᠪᠥᠭᠡᠳ ᠬᠢᠯᠢ ᠳᠤ ᠨᠡᠪᠲᠡᠷᠡᠬᠦ ᠲᠡᠮᠳᠡᠭ ᠳᠡᠭᠡᠷᠡ ᠪᠠᠰᠠ ᠭᠡᠷᠡᠯ ᠵᠢᠷᠤᠭ ᠨᠠᠭᠠᠬᠤ ᠬᠡᠷᠡᠭᠲᠡᠢ ᠭᠡᠵᠦ | ᠵᠠᠬᠢᠪᠠ᠃ ᠲᠡᠷᠡ ᠦᠶᠡ ᠳᠤ ᠨᠠᠳᠠᠳᠤ ᠪᠠᠭᠤᠯᠭᠠᠭᠰᠠᠨ ᠰᠡᠭᠦᠳᠡᠷ ᠵᠢᠷᠤᠭ ᠭᠡᠵᠦ ᠪᠠᠶᠢᠭᠰᠠᠨ ᠦᠭᠡᠢ ᠲᠤᠯᠠ | ᠬᠤᠷᠳᠤᠯᠠᠨ ᠭᠠᠷᠴᠤ ᠭᠡᠷᠡᠯ ᠵᠢᠷᠤᠭ ᠤᠨ ᠭᠠᠵᠠᠷ ᠲᠤ ᠬᠦᠷᠴᠦ ᠵᠢᠷᠤᠭ ᠠᠪᠤᠭᠤᠯᠤᠭᠠᠳ ︽ᠬᠡᠵᠢᠶᠡ ᠤᠬᠢᠶᠠᠵᠤ | ᠭᠠᠷᠭᠠᠬᠤ ᠪᠤᠢ︖︾ ᠭᠡᠵᠦ ᠶᠠᠩ ᠣᠪᠣᠭᠲᠤ ᠭᠡᠷᠡᠯ ᠵᠢᠷᠤᠭ ᠲᠠᠲᠠᠭᠴᠢ ᠠᠴᠠ ᠠᠰᠠᠭᠤᠭᠰᠠᠨ ᠳᠤ᠂ ︽ᠭᠤᠷᠪᠠᠨ | ᠡᠳᠦᠷ ᠤᠨ ᠳᠠᠷᠠᠭᠠ︾ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠲᠤᠬᠠᠢ ᠶᠢᠨ ᠦᠶᠡ ᠨᠢ ᠶᠠᠭ ᠣᠷᠣᠢ ᠶᠢᠨ ᠠᠵᠢᠯ ᠪᠠᠭᠤᠬᠤ ᠴᠠᠭ | ᠪᠣᠯᠣᠭᠠᠳ ᠪᠠᠶᠢᠭᠰᠠᠨ ᠲᠤᠯᠠ ᠬᠠᠵᠠᠭᠤ ᠲᠠᠯᠠ ᠳᠤ ᠪᠠᠶᠢᠷᠢᠰᠢᠭᠰᠠᠨ ᠬᠤᠰᠢᠭᠤᠨ ᠤ ᠲᠥᠪ ᠲᠠᠬᠢ ᠴᠤᠷ ᠤᠨ ᠭᠠᠭᠴᠠ | ᠣᠯᠠᠨ ᠨᠡᠶᠢᠲᠡ ᠶᠢᠨ ᠬᠤᠭᠤᠯᠠᠨ ᠭᠡᠷ ᠲᠤ ᠶᠠᠩ ᠣᠪᠣᠭᠲᠤ ᠭᠡᠷᠡᠯ ᠵᠢᠷᠤᠭ ᠲᠠᠲᠠᠭᠴᠢ ᠶᠢ ᠵᠠᠯᠠᠨ ᠬᠤᠶᠠᠭᠤᠯᠠ | ᠳᠦᠭᠦᠮ ᠬᠤᠭᠤᠯᠠ ᠵᠠᠬᠢᠶᠠᠯᠠᠨ ᠬᠤᠭᠤᠯᠠᠯᠠᠪᠠ᠃ ᠴᠣᠬᠤᠮ ᠶᠠᠭᠤᠨ ᠠᠴᠠ ᠪᠣᠯᠤᠭᠰᠠᠨ ᠢ ᠮᠡᠳᠡᠭᠰᠡᠨ ᠦᠭᠡᠢ᠂ ᠶᠠᠩ | ᠭᠤᠸᠠᠢ ᠨᠠᠳᠠᠳᠤ ︽ᠮᠠᠷᠭᠠᠰᠢ ᠠᠵᠢᠯ ᠳᠤ ᠭᠠᠷᠤᠭᠰᠠᠭᠠᠷ ᠢᠷᠡᠵᠦ ᠭᠡᠷᠡᠯ ᠵᠢᠷᠤᠭ ᠢᠶᠠᠨ ᠠᠪᠤᠭᠠᠷᠠᠢ︾ ᠭᠡᠰᠡᠨ | ᠲᠠᠭᠠᠯᠠᠮᠵᠢᠲᠠᠶᠢᠬᠠᠨ ᠦᠭᠡ ᠬᠠᠶᠢᠷᠠᠯᠠᠯᠠ᠃ ᠳᠠᠷᠠᠭᠠ ᠡᠳᠦᠷ ᠤᠨ ᠬᠢᠨᠢ ᠠᠵᠢᠯ ᠳᠤ ᠭᠠᠷᠬᠤ ᠴᠠᠭ ᠢ ᠠᠮᠵᠢᠨ ᠭᠡᠷᠡᠯ | ᠵᠢᠷᠤᠭ ᠢᠶᠠᠨ ᠠᠪᠤᠭᠠᠳ ᠳᠣᠲᠣᠭᠠᠳᠤ ᠶᠢ ᠬᠠᠮᠠᠭᠠᠯᠠᠬᠤ ᠭᠠᠵᠠᠷ ᠲᠤ ᠣᠴᠢᠵᠤ ᠭᠡᠷᠡᠯ ᠵᠢᠷᠤᠭ ᠢᠶᠠᠨ ᠥᠭᠭᠦᠭᠰᠡᠨ ᠳᠤ | ᠥᠨᠥᠬᠢ ᠬᠦᠰᠦᠨᠦᠭ ᠳᠡᠭᠡᠷᠡ ᠨᠠᠭᠠᠭᠠᠳ ᠭᠡᠷᠡᠯ ᠵᠢᠷᠤᠭ ᠤᠨ ᠳᠣᠣᠷᠠ ᠥᠨᠴᠥᠭ ᠢ ᠲᠠᠭᠠᠷᠠᠭᠤᠯᠵᠤ ᠲᠠᠮᠠᠭᠠ ᠪᠠᠨ | ᠳᠠᠷᠤᠭᠠᠳ᠂ ︽ᠴᠢ ᠡᠭᠦᠨ ᠢ ᠠᠪᠤᠭᠠᠳ ᠦ᠋ ᠸᠧᠢ ᠲᠤᠰᠬᠠᠢ ᠲᠣᠭᠤᠷᠢᠭ ᠲᠤ ᠣᠴᠢᠵᠤ ᠬᠢᠯᠢ ᠶᠢᠨ ᠭᠠᠵᠠᠷ | ᠨᠡᠪᠲᠡᠷᠡᠬᠦ ᠭᠡᠷᠡᠴᠢ ᠲᠡᠮᠳᠡᠭ ᠢ ᠰᠣᠯᠢᠵᠤ ᠠᠪ︾ ᠭᠡᠳ ᠬᠦᠰᠦᠨᠦᠭᠲᠦ ᠶᠢ ᠨᠠᠳᠠᠳᠤ ᠭᠠᠷᠳᠠᠭᠤᠯᠪᠠ᠃ ᠪᠢ | ᠲᠡᠨᠳᠡ ᠠᠴᠠ ᠭᠠᠷᠴᠤ ᠪᠠᠭᠤᠳᠠᠯ ᠳᠤ ᠢᠷᠡᠭᠡᠳ ᠦ᠋ ᠸᠧᠢ ᠳᠤ ᠶᠠᠪᠤᠬᠤ ᠭᠡᠰᠡᠨ ᠪᠤᠯᠪᠠᠴᠤ ᠲᠡᠷᠡ ᠬᠦᠰᠦᠨᠦᠭᠲᠦ ᠶᠢ | ᠬᠠᠷᠠᠵᠤ ᠡᠨᠡ ᠳᠡᠭᠡᠷᠡ ᠮᠢᠨᠤ ᠰᠡᠭᠦᠳᠡᠷ ᠵᠢᠷᠤᠭ ᠪᠠᠶᠢᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠳᠡᠭᠡᠷᠡ ᠨᠢ ᠬᠤᠰᠢᠭᠤᠨ ᠤ | ᠳᠣᠲᠣᠭᠠᠳᠤ ᠶᠢ ᠬᠠᠮᠠᠭᠠᠯᠠᠬᠤ ᠬᠡᠯᠲᠡᠰ ᠤᠨ ᠲᠠᠮᠠᠭᠠ ᠪᠠᠶᠢᠬᠤ ᠲᠤᠯᠠ ᠡᠨᠡ ᠨᠢ ᠨᠠᠳᠠᠳᠤ ᠪᠣᠳᠠᠲᠤ ᠭᠡᠷᠡᠴᠢ ᠪᠤᠯᠬᠤ | ᠪᠢᠰᠢᠦ ᠭᠡᠵᠦ ᠪᠤᠳᠤᠭᠠᠳ ᠦ᠋ ᠸᠧᠢ ᠳᠤ ᠬᠦᠷᠴᠦ ᠬᠢᠯᠢ ᠳᠤ ᠨᠡᠪᠲᠡᠷᠡᠬᠦ ᠲᠡᠮᠳᠡᠭ ᠠᠪᠬᠤ ᠦᠭᠡᠢ ᠪᠠᠷ ᠰᠢᠢᠳᠪᠡ᠃ | ᠶᠠᠭ ᠡᠨᠡ ᠦᠶᠡ ᠳᠤ ᠮᠢᠨᠤ ᠲᠠᠨᠢᠳᠠᠭ ᠳ᠋ᠠᠬᠪᠠ ᠭᠡᠳᠡᠭ ᠬᠥᠮᠥᠨ ᠰᠦᠮᠪᠤᠷ ᠲᠤ ᠪᠠᠶᠢᠭᠠ ᠠᠬᠠ ᠶᠢᠨ ᠳᠠᠭᠠᠨ ᠣᠴᠢᠬᠤ | ᠳᠠᠭᠠᠷᠠᠵᠦ ᠬᠠᠮᠲᠤ ᠶᠠᠪᠤᠬᠤ ᠪᠠᠷ ᠪᠣᠯᠪᠠ᠃ ᠲᠡᠷᠡ ᠬᠡᠯᠡᠭᠰᠡᠨ ᠨᠢ ︽ᠪᠢᠳᠠ ᠮᠥᠩᠭᠦᠨᠪᠤᠯᠠᠭ ᠤᠨ ᠰᠢᠯᠢᠨᠪᠤᠯᠠᠭ | ᠪᠠᠷᠢᠭᠠᠳᠠ ᠶᠢᠨ ᠥᠯᠵᠡᠶᠢᠵᠢᠷᠭᠠᠯ ᠭᠡᠳᠡᠭ ᠠᠶᠢᠯ ᠳᠤ ᠭᠦᠷᠦᠨᠡ᠂ ᠲᠡᠳᠡ ᠮᠠᠨ ᠢ ᠦᠬᠡᠷ ᠤᠰᠤᠨ ᠭᠡᠳᠡᠭ | ᠭᠠᠵᠠᠷ ᠠᠴᠠ ᠲᠤᠰᠴᠤ ᠠᠪᠤᠭᠠᠳ ᠡᠨᠡ ᠠᠶᠢᠯ ᠬᠦᠷᠬᠦ ᠳᠤ ᠰᠦᠮᠪᠦᠷ ᠠᠴᠠ ᠤᠨᠤᠭᠠ ᠢᠷᠡᠵᠦ ᠨᠠᠮᠠᠶᠢ ᠲᠤᠰᠬᠤ ᠶᠤᠮ᠃ | ᠲᠡᠭᠡᠭᠡᠳ ᠲᠡᠨᠳᠡ ᠠᠴᠠ ᠪᠢᠳᠠ ᠬᠠᠮᠲᠤ ᠳᠠᠭᠠᠨ ᠶᠠᠪᠤᠵᠠᠭᠠᠶᠠ︾ ᠭᠡᠳ ᠬᠤᠰᠢᠭᠤᠨ ᠠᠴᠠ ᠮᠥᠩᠭᠦᠨᠪᠤᠯᠠᠭ ᠬᠦᠷᠬᠦ | ᠣᠯᠠᠨ ᠨᠡᠶᠢᠲᠡ ᠶᠢᠨ ᠲᠡᠭᠡᠭᠡᠪᠦᠷᠢ ᠶᠢᠨ ᠮᠠᠰᠢᠨ ᠪᠤᠯᠬᠤ ᠵᠢᠶᠧ ᠹᠠᠩ ᠲᠡᠮᠳᠡᠭᠲᠦ ᠵᠠᠳᠠᠭᠠᠢ ᠲᠡᠷᠭᠡᠨ ᠤ ᠪᠢᠯᠧᠲ | ᠠᠪᠤᠭᠠᠳ ᠠᠯᠤᠰ ᠤᠨ ᠠᠶᠠᠨ ᠢᠶᠠᠨ ᠡᠬᠢᠯᠡᠭᠦᠯᠪᠡ᠃ ᠦᠳᠡ ᠶᠢᠨ ᠬᠤᠶᠢᠨᠠ ᠶᠢᠨ ᠳᠦᠷᠪᠡᠨ ᠴᠠᠭ ᠤᠨ ᠠᠯᠳᠠ ᠳᠤ | ᠪᠢᠳᠠᠨ ᠤ ᠰᠠᠭᠤᠭᠰᠠᠨ ᠲᠡᠷᠭᠡ ᠦᠬᠡᠷ ᠤᠰᠤᠨ ᠳᠤ ᠢᠷᠡᠬᠦ ᠳᠤ ᠥᠯᠵᠡᠶᠢᠵᠢᠷᠭᠠᠯ ᠠᠯᠢ ᠬᠡᠳᠦᠶᠢᠨ ᠢᠷᠡᠭᠡᠳ ᠪᠢᠳᠠᠨ ᠢ | ᠬᠦᠯᠢᠶᠡᠵᠦ ᠪᠠᠶᠢᠪᠠ᠃ ᠪᠢᠳᠠ ᠬᠤᠶᠠᠷ ᠪᠣᠭᠴᠣ ᠪᠣᠭᠤᠳᠠᠯ ᠢᠶᠠᠨ ᠠᠪᠤᠭᠠᠳ ᠲᠡᠷᠭᠡᠨ ᠠᠴᠠ ᠪᠠᠭᠤᠵᠤ ᠤᠨᠤᠯᠭᠠ ᠶᠢᠨ | ᠡᠯᠵᠢᠭᠡᠨ ᠳᠡᠭᠡᠷᠡ ᠶᠠᠭᠤᠮᠠ ᠬᠡᠦᠮᠡ ᠪᠠᠨ ᠠᠴᠢᠭᠠᠳ ᠬᠤᠶᠢᠲᠤ ᠠᠭᠤᠯᠠ ᠵᠦᠭ ᠴᠢᠭᠯᠡᠨ ᠠᠭᠤᠯᠠ ᠳᠠᠪᠠᠵᠤ | ᠥᠯᠵᠡᠶᠢᠵᠢᠷᠭᠠᠯ ᠤᠨ ᠭᠡᠷ ᠲᠤ ᠭᠦᠷᠪᠡ᠃ ᠠᠳᠡ ᠪᠢᠳᠠ ᠬᠤᠶᠠᠷ ᠢᠷᠡᠬᠦ ᠤᠨᠤᠭᠠ ᠬᠦᠯᠢᠶᠡᠭᠡᠳ ᠠᠷᠪᠠᠭᠠᠳ ᠡᠳᠦᠷ | ᠪᠣᠯᠤᠭᠰᠠᠨ ᠲᠤᠯᠠ ᠪᠢ ᠬᠦᠯᠢᠶᠡᠵᠦ ᠶᠠᠳᠠᠨ ︽ᠶᠠᠪᠠᠭᠠᠨ ᠢᠶᠠᠷ ᠶᠠᠪᠤᠵᠠᠭᠠᠶᠠ︾ ᠭᠡᠰᠡᠨ ᠳᠤ ᠳ᠋ᠠᠬᠪᠠ ᠰᠢᠭᠤᠳ ︽ᠵᠠ | ᠲᠡᠭᠡᠪᠡᠯ ᠶᠠᠪᠤᠶᠠ︾ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠪᠢᠳᠠ ᠬᠤᠶᠠᠷ ᠠᠳᠡ ᠠᠴᠠ ᠨᠤᠲᠤᠭ ᠤᠨ ᠬᠥᠮᠥᠨ ᠢᠶᠠᠷ ᠶᠡᠭᠡ ᠲᠥᠯᠥᠪ | ᠵᠠᠮ ᠵᠢᠭᠠᠯᠭᠠᠨ ᠵᠠᠮ ᠳᠠᠭᠠᠨ ᠬᠤᠶᠠᠷ ᠬᠤᠨᠣᠵᠤ ᠭᠤᠷᠪᠠᠳᠠᠭᠢ ᠡᠳᠦᠷ ᠭᠤᠷᠪᠠᠨ ᠠᠯᠳᠠ ᠭᠡᠳᠡᠭ ᠭᠠᠵᠠᠷ ᠲᠤ ᠬᠦᠷᠴᠦ᠂ | ᠨᠢᠭᠡ ᠡᠵᠡᠭᠦᠢ ᠠᠶᠢᠯ ᠳᠤ ᠣᠷᠣᠵᠤ ᠬᠤᠭᠤᠯᠠ ᠬᠢᠵᠦ ᠢᠳᠡᠭᠡᠳ ᠬᠤᠨᠣᠭᠯᠠᠪᠠ᠃ᠡᠨᠡ ᠠᠶᠢᠯ ᠨᠢ ᠶᠠᠭ ᠳ᠋ᠠᠬᠪᠠ ᠶᠢᠨ | ᠠᠬᠠ ᠳ᠋ᠠᠷᠵᠠ ᠶᠢᠨ ᠬᠢᠨ ᠲᠠᠢ ᠬᠠᠮᠲᠤ ᠰᠠᠭᠤᠳᠠᠭ ᠪᠠᠷᠢᠭᠠᠳᠠ ᠶᠢᠨ ᠳᠠᠷᠤᠭᠠ ᠪᠤᠶᠠᠨᠪᠢᠯᠢᠭ᠌ ᠤᠨ ᠬᠢᠨ ᠪᠠᠶᠢᠵᠠᠢ᠃ | ᠪᠢᠳᠠᠨ ᠢ ᠢᠷᠡᠬᠦ ᠠᠴᠠ ᠬᠤᠶᠠᠷ ᠰᠠᠷᠠ ᠶᠢᠨ ᠡᠮᠦᠨᠡ ᠨᠢ ᠮᠣᠩᠭᠤᠯ ᠤᠨ ᠲᠠᠩᠨᠠᠭᠤᠯ ᠣᠰᠣᠷ ᠬᠢᠯᠢ ᠳᠠᠪᠠᠨ ᠣᠷᠣᠵᠤ | ᠢᠷᠡᠭᠰᠡᠨ ᠪᠠᠴᠢᠮ ᠴᠠᠭ ᠪᠠᠶᠢᠭᠰᠠᠨ ᠪᠠᠶᠢᠵᠠᠢ᠃ ᠪᠢᠳᠠ ᠬᠤᠶᠠᠷ ᠡᠨᠡ ᠠᠶᠢᠯ ᠳᠤ ᠢᠷᠡᠵᠦ ᠬᠤᠨᠣᠭᠰᠠᠨ ᠤ ᠳᠠᠷᠠᠭᠠ | ᠡᠳᠦᠷ ᠤᠨ ᠦᠳᠡ ᠶᠢᠨ ᠡᠮᠦᠨᠡ ᠪᠤᠶᠠᠨᠪᠢᠯᠢᠭ᠌ ᠤᠨ ᠠᠪᠠᠭᠠᠢ ᠢᠷᠡᠵᠦ ᠳ᠋ᠠᠬᠪᠠ ᠶᠢᠨ ᠮᠥᠩᠭᠦᠨ ᠰᠢᠳᠦ ᠲᠠᠢ ᠪᠠᠶᠢᠬᠤ ᠶᠢ | ᠬᠠᠷᠠᠭᠠᠳ ᠪᠢᠳᠠ ᠬᠤᠶᠠᠷ ᠢ ᠶᠡᠷᠦ ᠪᠤᠰᠤ ᠶᠢᠨ ᠡᠲᠡᠭᠡᠳ ᠢᠶᠠᠷ ᠰᠡᠵᠢᠭᠯᠡᠪᠡ᠃ ᠲᠡᠭᠡᠭᠡᠳ ᠠᠷᠤ ᠠᠴᠠ ᠨᠢ | ᠪᠤᠶᠠᠨᠪᠢᠯᠢᠭ᠌ ᠪᠣᠯᠣᠨ ᠳ᠋ᠠᠬᠪᠠ ᠶᠢᠨ ᠠᠬᠠ ᠳ᠋ᠠᠷᠵᠠ ᠨᠠᠷ ᠮᠠᠯ ᠢᠶᠠᠨ ᠲᠠᠭᠤᠵᠤ ᠢᠷᠡᠭᠡᠳ ᠬᠠᠷᠢᠯᠴᠠᠨ ᠲᠠᠨᠢᠯᠴᠠᠨ | ᠪᠦᠭᠦᠳᠡᠭᠡᠷ ᠢᠶᠠᠨ ᠶᠡᠬᠡᠳᠡ ᠢᠨᠢᠶᠡᠯᠴᠡᠭᠡᠳ ᠥᠩᠭᠡᠷᠡᠪᠡ᠃ ᠪᠢ ᠲᠡᠨᠳᠡ ᠠᠴᠠ ᠥᠯᠵᠡᠢ ᠳᠤ ᠣᠴᠢᠬᠤ ᠬᠥᠮᠥᠨ ᠤ | ᠤᠨᠤᠭᠠᠨ ᠳᠤ ᠳᠠᠶᠢᠬᠳᠠᠨ᠂ ᠲᠤᠬᠠᠢ ᠶᠢᠨ ᠦᠶᠡ ᠶᠢᠨ ᠨᠢᠭᠡᠳᠦᠭᠡᠷ ᠲᠣᠭᠤᠷᠢᠭ ᠪᠠᠶᠠᠨᠮᠣᠳᠤ ᠳᠤ ᠠᠵᠢᠯᠯᠠᠵᠤ ᠪᠠᠶᠢᠭᠰᠠᠨ | ᠠᠬᠠ ᠶᠢᠨ ᠳᠠᠭᠠᠨ ᠣᠴᠢᠭᠠᠳ᠂ ᠳᠠᠷᠠᠭᠠ ᠡᠳᠦᠷ ᠨᠢ ᠨᠢᠭᠡᠳᠦᠭᠡᠷ ᠲᠣᠭᠤᠷᠢᠭ ᠤᠨ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠶᠢᠨ | ᠠᠩᠬᠠ ᠳᠤᠮᠳᠠᠳᠤ ᠶᠢᠨ ᠨᠢᠭᠡᠳᠦᠭᠡᠷ ᠣᠨ ᠳᠤ ᠣᠷᠣᠵᠤ ᠰᠤᠷᠤᠯᠴᠠᠪᠠ᠃ ᠪᠢ ᠶᠡᠷᠦᠨᠢ ᠪᠠᠭᠠ ᠰᠤᠷᠭᠠᠭᠤᠯᠢ ᠶᠢᠨ | ᠳᠦᠷᠪᠡᠨ ᠣᠨ ᠠᠴᠠ ᠬᠤᠶᠢᠰᠢᠬᠢ ᠠᠭᠤᠯᠭᠠ ᠶᠢ ᠰᠤᠷᠤᠬᠰᠠᠨ ᠦᠭᠡᠢ ᠪᠣᠯᠬᠤᠷ ᠲᠣᠭᠠᠨ ᠤ ᠤᠬᠠᠭᠠᠨ ᠤ | ᠬᠢᠴᠢᠶᠡᠯ ᠳᠤ ᠮᠠᠰᠢ ᠬᠦᠴᠢᠷᠳᠡᠵᠦ ᠪᠠᠶᠢᠯᠠ᠃ ᠲᠡᠭᠡᠭᠡᠳ ᠠᠳᠡ ᠪᠠᠨ ᠨᠠᠮᠤᠷ ᠤᠨ ᠬᠤᠭᠤᠴᠠᠭᠠ ᠶᠢ ᠲᠡᠭᠦᠰᠬᠡᠭᠡᠳ | ᠳᠠᠭᠢᠨ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠳᠠᠭᠠᠨ ᠢᠷᠡᠵᠦ ᠬᠤᠰᠢᠭᠤᠨ ᠤ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠨ | ᠥᠨᠳᠥᠷ ᠳᠤᠮᠳᠠᠳᠤ ᠪᠠᠨ ᠲᠡᠭᠦᠰᠬᠡᠵᠡᠢ᠃ ᠡᠨᠡ ᠬᠤᠭᠤᠴᠠᠭᠠᠨ ᠳᠤ ᠪᠢ ᠰᠤᠷᠭᠠᠭᠤᠯᠢ ᠶᠢᠨ ᠲᠠᠮᠢᠷ ᠤᠨ ᠬᠡᠷᠡᠭᠰᠡᠯ | ᠬᠠᠮᠢᠶᠠᠷᠬᠤ ᠪᠥᠭᠡᠳ ᠡᠳᠦᠷ ᠪᠦᠷᠢ ᠶᠢᠨ ᠬᠢᠴᠢᠶᠡᠯ ᠤᠨ ᠵᠠᠪᠰᠠᠷ ᠤᠨ ᠲᠠᠮᠢᠷ ᠢ ᠵᠢᠯᠣᠭᠤᠳᠤᠨ ᠮᠥᠷᠯᠡᠭᠦᠯᠵᠦ ᠲᠠᠮᠢᠷ | ᠭᠢᠯᠭᠡᠳᠡᠭ ᠪᠠᠶᠢᠭᠰᠠᠨ᠃ ᠪᠠᠰᠠ ᠬᠤᠰᠢᠭᠤᠨ ᠤ ᠠᠵᠢᠯ ᠤᠨ ᠴᠢᠯᠦᠭᠡᠨ ᠤ ᠭᠠᠵᠠᠷ ᠬᠥᠳᠡᠯᠬᠦ ᠶᠢ ᠤᠷᠢᠳᠴᠢᠯᠠᠨ | ᠰᠢᠨᠵᠢᠨ ᠮᠡᠳᠡᠭᠡᠯᠡᠬᠦ ᠠᠯᠪᠠᠨ ᠭᠡᠷ ᠤᠨ ᠰᠢᠡᠵᠢᠭᠴᠢ ᠶᠢᠨ ᠠᠵᠢᠯ ᠢ ᠭᠠᠷᠳᠠᠵᠤ ᠪᠠᠶᠢᠭᠰᠠᠨ ᠪᠥᠭᠡᠳ ᠭᠤᠷᠪᠠ | ᠤᠳᠠᠭᠠᠨ ᠤ ᠶᠡᠬᠡᠬᠡᠨ ᠭᠠᠵᠠᠷ ᠬᠥᠳᠡᠯᠦᠯᠲᠡ ᠶᠢ ᠤᠷᠢᠳᠴᠢᠯᠠᠨ ᠮᠡᠳᠡᠭᠡᠯᠡᠭᠰᠡᠨ ᠠᠴᠠ ᠭᠠᠨᠰᠤ ᠮᠤᠵᠢ ᠶᠢᠨ ᠦ᠋ ᠸᠧᠢ | ᠣᠷᠣᠨ ᠤ ᠲᠡᠷᠢᠭᠦᠨ ᠤ ᠠᠵᠢᠯᠲᠠᠨ ᠢᠶᠠᠷ ᠰᠣᠩᠭᠤᠭᠳᠠᠵᠤ ᠥᠩᠭᠡᠷᠡᠪᠡ᠃ ᠪᠠᠰᠠ ᠰᠤᠷᠭᠠᠭᠤᠯᠢ ᠳᠠᠭᠠᠨ ᠣᠶᠤᠨᠲᠤ | ᠪᠠᠭᠰᠢ ᠶᠢᠨ ᠵᠢᠯᠣᠭᠤᠳᠤᠯᠭᠠ ᠳᠣᠣᠷᠠ ︽ᠢᠯᠵᠢᠮᠡᠭ ᠬᠦᠴᠢᠯ ᠤᠨ ᠨᠠᠲᠷᠢ︾ ᠬᠡᠮᠡᠬᠦ ᠬᠢᠮᠢ ᠶᠢᠨ ᠪᠣᠷᠳᠣᠭᠤᠷ ᠢ | ᠲᠤᠷᠰᠢᠨ ᠪᠦᠲᠦᠭᠡᠵᠦ᠂ ᠰᠤᠷᠭᠠᠭᠤᠯᠢ ᠶᠢᠨ ᠲᠠᠷᠢᠶᠠᠯᠠᠩ ᠤᠨ ᠲᠠᠯᠠᠪᠠᠢ ᠳᠤ ᠶᠡᠬᠡᠪᠡᠷ ᠠᠰᠢᠭᠯᠠᠭᠳᠠᠭᠰᠠᠨ | ᠥᠩᠭᠡᠷᠡᠯᠲᠡ ᠲᠠᠢ᠃ ᠡᠨᠡ ᠮᠡᠲᠦ ᠪᠠᠷ ᠰᠤᠷᠤᠯᠴᠠᠨ ᠪᠠᠶᠢᠵᠤ ᠰᠤᠷᠤᠯᠭᠠ ᠪᠠᠨ ᠲᠡᠭᠦᠰᠬᠡᠨ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠤ | ᠨᠢᠭᠡ ᠠᠴᠠ ᠳᠦᠷᠪᠡᠨ ᠣᠨ ᠤ 28 ᠰᠤᠷᠤᠬᠴᠢ ᠲᠠᠢ ︽ᠲᠡᠮᠡᠭᠡᠨ ᠨᠢᠷᠤᠭᠤᠨ ᠳᠡᠭᠡᠷᠡᠬᠢ ᠰᠤᠷᠭᠠᠭᠤᠯᠢ︾ ᠳᠤ | ᠪᠠᠭᠰᠢᠯᠠᠪᠠ᠃ | ᠬᠤᠶᠠᠷ᠂ ᠰᠤᠳᠤᠷ ᠤᠨ ᠳᠠᠯᠠᠢ ᠳᠤ ᠠᠩᠬᠠ ᠱᠤᠩᠪᠠᠵᠦ ᠡᠬᠢᠯᠡᠭᠰᠡᠨ ᠨᠢ | ᠪᠢ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠭᠠ ᠰᠢᠯᠵᠢᠨ ᠢᠷᠡᠵᠦ | ᠰᠤᠷᠤᠯᠴᠠᠬᠰᠠᠨ ᠦᠶᠡ ᠠᠴᠠ ᠡᠬᠢᠯᠡᠭᠡᠳ᠂ ᠭᠠᠷᠠᠭ ᠤᠨ ᠡᠳᠦᠷ ᠪᠣᠯᠭᠠᠨ ᠳᠤ ᠰᠢᠨᠬᠤᠸᠠ ᠨᠣᠮ ᠤᠨ ᠳᠡᠯᠭᠡᠭᠦᠷ ᠲᠤ | ᠣᠴᠢᠵᠤ ᠨᠣᠮ ᠤᠩᠰᠢᠳᠠᠭ ᠪᠠᠶᠢᠯᠠ᠃ ᠲᠡᠷᠡ ᠦᠶᠡ ᠳᠤ ᠦᠳᠡ ᠶᠢᠨ ᠬᠤᠭᠤᠯᠠ ᠶᠢ ᠦᠳᠡ ᠶᠢᠨ ᠡᠮᠦᠨᠡ ᠶᠢᠨ 10 | ᠴᠠᠭ᠂ ᠣᠷᠣᠢ ᠶᠢᠨ ᠬᠤᠭᠤᠯᠠ ᠶᠢ ᠦᠳᠡ ᠶᠢᠨ ᠬᠤᠶᠢᠨᠠ ᠶᠢᠨ 5 ᠴᠠᠭ ᠲᠤ ᠡᠬᠢᠯᠡᠭᠦᠯᠳᠡᠭ ᠪᠠᠶᠢᠭᠰᠠᠨ᠂ ᠦᠳᠡ ᠪᠠ | ᠣᠷᠣᠢ ᠶᠢᠨ ᠬᠤᠭᠤᠯᠠ ᠶᠢᠨ ᠬᠤᠭᠤᠷᠤᠨᠳᠤᠭᠢ ᠴᠠᠭ ᠨᠢ ᠮᠢᠨᠤ ᠨᠣᠮ ᠤᠩᠰᠢᠬᠤ ᠴᠠᠭ ᠪᠠᠶᠢᠵᠤ᠂ ᠴᠠᠭ ᠢ ᠠᠮᠵᠢᠨ | ᠰᠢᠨᠬᠤᠸᠠ ᠳᠡᠯᠭᠡᠭᠦᠷ ᠲᠤ ᠣᠴᠢᠵᠤ ᠨᠣᠮ ᠤᠩᠰᠢᠳᠠᠭ ᠪᠠᠶᠢᠪᠠ᠃ ᠦᠨᠡᠨᠳᠡᠭᠡᠨ ᠰᠢᠨᠬᠤᠸᠠ ᠨᠣᠮ ᠤᠨ ᠳᠡᠯᠭᠡᠭᠦᠷ ᠲᠤ | ᠢᠯᠡ ᠬᠤᠳᠠᠯᠳᠤᠵᠤ ᠪᠠᠶᠢᠭᠠ ᠨᠣᠮ ᠰᠤᠳᠤᠷ ᠤᠨ ᠳᠣᠲᠣᠷᠠ ᠠᠴᠠ ᠮᠢᠨᠤ ᠤᠩᠰᠢᠨ ᠪᠠᠭ᠋ᠠᠷᠬᠠᠵᠤ ᠪᠠᠶᠢᠭᠰᠠᠨ ᠨᠣᠮ ᠨᠢ | ︽ᠪᠤᠮᠠᠨ ᠡᠷᠳᠡᠨᠢ ᠶᠢᠨ ᠲᠦᠯᠬᠢᠭᠦᠷ︾ ᠭᠡᠳᠡᠭ ᠴᠤᠪᠤᠷᠠᠯ ᠨᠣᠮ ᠪᠠᠶᠢᠪᠠ᠃ ᠡᠨᠡ ᠳᠡᠯᠭᠡᠭᠦᠷ ᠲᠤ ᠨᠠᠩᠰᠠᠯᠮᠠ ᠭᠡᠳᠡᠭ | ᠨᠡᠷᠡ ᠲᠠᠢ ᠨᠢᠭᠡ ᠠᠨᠢᠶᠠ ᠪᠠᠶᠢᠭᠰᠠᠨ᠃ ᠲᠡᠷᠡ ᠮᠢᠨᠤ ᠭᠠᠷᠠᠭ ᠤᠨ ᠡᠳᠦᠷ ᠪᠦᠷᠢ ᠢᠷᠡᠵᠦ ᠨᠣᠮ ᠤᠩᠰᠢᠳᠠᠭ | ᠪᠠᠶᠢᠭᠰᠠᠨ ᠳᠤ ᠰᠡᠳᠬᠢᠯ ᠬᠥᠳᠡᠯᠦᠭᠰᠡᠨ ᠶᠤᠮ ᠤᠤ᠂ ᠡᠰᠡᠪᠡᠯ ᠪᠤᠰᠤᠳ ᠤᠩᠰᠢᠭᠴᠢᠳ ᠤᠨ ᠥᠭᠡᠷᠡ ᠲᠠᠯᠠ ᠶᠢᠨ | ᠪᠤᠷᠤᠭᠤ ᠣᠶᠢᠯᠠᠭᠠᠯᠲᠠ ᠣᠷᠤᠭᠤᠯᠬᠤ ᠠᠴᠠ ᠰᠡᠷᠡᠮᠵᠢᠯᠡᠭᠰᠡᠨ ᠶᠤᠮ ᠤᠤ ᠪᠤᠤ ᠮᠡᠳᠡ᠂ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠨᠠᠮᠠᠶᠢ | ᠰᠢᠭᠤᠳ ᠨᠣᠮ ᠤᠨ ᠬᠥᠮᠥᠷᠭᠡ ᠳᠡᠭᠡᠨ ᠳᠠᠭᠠᠭᠤᠯᠤᠨ ᠣᠷᠣᠭᠤᠯᠤᠭᠠᠳ᠂ ︽ᠪᠢᠲᠡᠭᠡᠢ ᠳᠠᠭᠤ ᠴᠢᠮᠡᠭᠡ ᠭᠠᠷᠭᠠ᠂ | ᠰᠡᠮᠡᠭᠡᠷ ᠰᠠᠭᠤᠭᠠᠳ ᠨᠣᠮ ᠦᠵᠡ᠂ ᠡᠭᠦᠨ ᠢ ᠬᠡᠨ ᠳᠤ ᠴᠤ ᠬᠡᠯᠡᠵᠦ ᠪᠤᠯᠬᠤ ᠦᠭᠡᠢ︾ ᠭᠡᠵᠦ ᠵᠠᠬᠢᠭᠠᠳ ᠡᠭᠦᠳᠡ ᠶᠢ | ᠭᠠᠳᠠᠨᠠ ᠠᠴᠠ ᠨᠢ ᠣᠨᠢᠰᠤᠯᠠᠭᠠᠳ ᠶᠠᠪᠤᠳᠠᠭ ᠪᠠᠶᠢᠯᠠ᠃ ᠲᠡᠷᠡ ᠦᠶᠡ ᠳᠤ ᠰᠢᠨᠬᠤᠸᠠ ᠨᠣᠮ ᠤᠨ ᠳᠡᠯᠭᠡᠭᠦᠷ ᠤᠨ | ᠮᠠᠰᠢ ᠣᠯᠠᠨ ᠨᠣᠮ ᠢ ᠲᠠᠯᠪᠢᠭᠤᠷ ᠠᠴᠠ ᠪᠠᠭᠤᠯᠭᠠᠭᠠᠳ ᠴᠥᠮ ᠢ ᠬᠥᠮᠥᠷᠭᠡ ᠳᠤ ᠬᠠᠳᠠᠭᠠᠯᠠᠵᠤ ᠪᠠᠶᠢᠵᠠᠢ᠃ ᠪᠢ | ᠲᠡᠨᠳᠡ ︽ᠰᠠᠷᠠᠭᠤᠯ ᠨᠤᠲᠤᠭ︾᠂ ︽ᠲᠠᠯᠠ ᠶᠢᠨ ᠲᠦᠳᠡᠭ︾᠂ ︽ᠵᠠᠩᠭᠠᠷ︾᠂ ︽ᠳᠠᠯᠠᠨ ᠬᠤᠳᠠᠯᠴᠢ︾᠂ ︽ | ᠭᠤᠴᠢᠨ ᠬᠤᠶᠠᠷ ᠮᠣᠳᠣᠨ ᠬᠥᠮᠥᠨ ᠤ ᠦᠯᠢᠭᠡᠷ︾᠂ ︽ᠤᠯᠠᠭᠠᠨ ᠬᠠᠳᠠ︾᠂ ︽ᠡᠷᠲᠡᠨ ᠡᠳᠦᠭᠡ ᠶᠢᠨ | ᠭᠠᠶᠢᠬᠠᠮᠰᠢᠭᠲᠤ ᠦᠵᠡᠭᠳᠡᠯ︾᠂ ︽ᠪᠠᠷᠠᠭᠤᠨᠰᠢ ᠵᠣᠷᠴᠢᠭᠰᠠᠨ ᠦᠯᠢᠭᠡᠷ︾᠂ ︽ᠱᠦᠢ ᠬᠤ᠋ ᠶᠢᠨ ᠦᠯᠢᠭᠡᠷ︾᠂ ︽ | ᠤᠯᠠᠭᠠᠨ ᠠᠰᠠᠷ ᠤᠨ ᠵᠡᠭᠦᠳᠦᠨ︾᠂ ︽ᠲᠣᠰᠣ ᠬᠤᠳᠠᠯᠳᠤᠭᠴᠢ ᠶᠢᠨ ᠦᠯᠢᠭᠡᠷ︾᠂ ︽ᠡᠩᠬᠡ ᠲᠠᠶᠢᠪᠤᠩ ᠤᠨ | ᠲᠠᠬᠲᠠᠭᠠ︾᠂ ︽ᠠᠯᠲᠠᠨ ᠵᠢᠭᠠᠰᠤᠨ ᠤ ᠦᠯᠢᠭᠡᠷ︾᠂ ︽ᠰᠤᠪᠤᠳ ᠰᠠᠴᠤᠭᠰᠠᠨ ᠲᠠᠯᠠ︾᠂ ︽ᠵᠠᠯᠠᠭᠤ | ᠨᠠᠰᠤᠨ ᠤ ᠳᠠᠭᠤᠯᠠᠯ︾᠂ ︽ᠴᠦᠨ ᠰᠢᠶᠠᠩ ᠤᠨ ᠦᠯᠢᠭᠡᠷ︾᠂ ︽ᠯᠢᠶᠤᠤ ᠽᠠᠢ ᡁᠢ ᠢ ᠪᠢᠴᠢᠭ︾᠂ ︽ᠵᠠᠯᠠᠭᠤ | ᠨᠠᠰᠤᠨ ᠤ ᠳᠠᠭᠤᠯᠠᠯ︾᠂ ︽ᠮᠠᠨᠳᠤᠭᠰᠠᠨ ᠮᠣᠩᠭᠤᠯ ᠤᠨ ᠬᠥᠬᠡ ᠰᠤᠳᠤᠷ︾ ᠵᠡᠷᠭᠡ ᠨᠣᠮ ᠤᠨ ᠲᠠᠯᠪᠢᠭᠤᠷ ᠠᠴᠠ | ᠪᠠᠭᠤᠯᠭᠠᠭᠰᠠᠨ ᠮᠠᠰᠢ ᠣᠯᠠᠨ ᠨᠣᠮ ᠢ ᠤᠩᠰᠢᠭᠰᠠᠨ ᠪᠥᠭᠡᠳ ᠨᠣᠮ ᠤᠨ ᠳᠠᠯᠠᠢ ᠳᠤ ᠡᠷᠳᠡᠮ ᠤᠨ ᠨᠢᠭᠤᠴᠠ | ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠳᠠᠭ ᠢ ᠡᠨᠡ ᠦᠶᠡ ᠠᠴᠠ ᠤᠯᠠᠮ ᠨᠢᠭᠡ ᠠᠯᠬᠤᠮ ᠲᠠᠨᠢᠨ ᠰᠡᠷᠡᠵᠦ᠂ ᠬᠤᠵᠢᠮ ᠬᠤᠶᠢᠨᠠ ᠨᠣᠮ | ᠰᠤᠳᠤᠷ ᠬᠠᠳᠠᠭᠠᠯᠠᠬᠤ ᠤᠷᠮᠠ ᠵᠣᠷᠢᠭ ᠢ ᠡᠷᠴᠢᠯᠡᠭᠰᠡᠨ ᠪᠢᠯᠡ᠃ | ᠭᠤᠷᠪᠠ᠂ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠠᠯᠲᠠᠨ ᠪᠣᠱᠤᠭᠠ ᠶᠢ ᠠᠯᠬᠤᠭᠰᠠᠨ ᠨᠢ | ᠮᠢᠨᠤ ᠪᠠᠭᠰᠢᠯᠠᠭᠰᠠᠨ ︽ᠲᠡᠮᠡᠭᠡᠨ ᠨᠢᠷᠤᠭᠤᠨ ᠳᠡᠭᠡᠷᠡᠬᠢ ᠰᠤᠷᠭᠠᠭᠤᠯᠢ︾ ᠨᠢ ᠲᠤᠬᠠᠢ ᠶᠢᠨ ᠦᠶᠡ ᠳᠤ | ᠰᠤᠷᠲᠠᠯᠴᠢᠯᠠᠵᠤ ᠪᠠᠶᠢᠭᠰᠠᠨ ᠠᠵᠢᠯ ᠦᠢᠯᠡᠳᠪᠦᠷᠢᠯᠡᠯ ᠠᠴᠠ ᠠᠩᠭᠢᠵᠢᠷᠠᠬᠤ ᠦᠭᠡᠢ ᠪᠠᠷ ᠭᠡᠷ ᠲᠡᠭᠡᠨ ᠰᠠᠭᠤᠨ | ᠬᠢᠴᠢᠶᠡᠯᠯᠡᠬᠦ ᠨᠢᠭᠡᠯᠡ ᠪᠠᠭᠰᠢ ᠲᠠᠢ᠂ ᠨᠢᠭᠡ ᠠᠴᠠ ᠳᠦᠷᠪᠡᠨ ᠣᠨ ᠤ 28 ᠰᠣᠷᠤᠬᠴᠢ ᠲᠠᠢ ᠰᠤᠷᠭᠠᠭᠤᠯᠢ ᠪᠣᠯᠣᠨᠠ᠃ | ᠪᠠᠭᠰᠢ ᠨᠢ ᠡᠪᠦᠯ ᠳᠡᠭᠡᠨ ᠲᠡᠮᠡᠭᠡ ᠤᠨᠤᠵᠤ᠂ ᠬᠠᠪᠤᠷ ᠲᠤ ᠡᠯᠵᠢᠭᠡ ᠤᠨᠤᠵᠤ᠂ ᠵᠤᠨ ᠳᠠᠭᠠᠨ ᠮᠣᠷᠢ ᠤᠨᠤᠵᠤ | ᠰᠤᠷᠤᠬᠴᠢ ᠲᠠᠢ ᠠᠶᠢᠯ ᠪᠣᠯᠭᠠᠨ ᠳᠤ ᠣᠴᠢᠵᠤ ᠬᠢᠴᠢᠶᠡᠯᠯᠡᠳᠡᠭ ᠪᠠᠶᠢᠯᠠ᠃ 1977 ᠣᠨ ᠤ ᠨᠠᠮᠤᠷ᠂ ᠪᠢ | ᠷᠠᠳᠢᠣ᠋ ᠠᠴᠠ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠰᠤᠷᠤᠬᠴᠢ ᠡᠯᠰᠡᠬᠦ ᠳᠦᠷᠢᠮ ᠢ ᠰᠡᠷᠭᠦᠭᠡᠨ᠂ ᠰᠢᠯᠢᠳᠡᠭ ᠠᠴᠠ ᠰᠢᠯᠢᠨ | ᠰᠣᠩᠭᠤᠬᠤ ᠰᠢᠯᠭᠠᠯᠲᠠ ᠶᠢᠨ ᠳᠦᠷᠢᠮ ᠢ ᠡᠨᠡ ᠵᠢᠯ ᠠᠴᠠ ᠬᠡᠷᠡᠭᠵᠢᠭᠦᠯᠦᠨᠡ ᠭᠡᠰᠡᠨ ᠮᠡᠳᠡᠭᠡ ᠶᠢ ᠰᠣᠨᠣᠰᠤᠨ ᠶᠡᠬᠡᠳᠡ | ᠪᠠᠶᠠᠷᠯᠠᠨ᠂ ᠰᠢᠭᠤᠳ ᠭᠦᠩᠱᠧ ᠳᠤ ᠣᠴᠢᠵᠤ᠂ ᠭᠦᠩᠱᠧ ᠶᠢᠨ ᠬᠤᠪᠢᠰᠬᠠᠯ ᠤᠨ ᠵᠥᠪᠯᠡᠯ ᠤᠨ ᠡᠷᠭᠢᠯᠡᠭᠴᠢ ᡂᠢ | ᠸᠠᠨ ᠵᠧᠨ ᠶᠢ ᠡᠷᠢᠵᠦ ᠶᠡᠭᠡ ᠰᠤᠷᠭᠠᠭᠤᠯᠢ ᠳᠤ ᠰᠢᠯᠭᠠᠭᠤᠯᠬᠤ ᠰᠠᠨᠠᠭᠠ ᠪᠠᠨ ᠢᠯᠡᠳᠬᠡᠪᠡ᠃ ᠲᠡᠷᠡ ᠨᠠᠳᠠᠳᠤ ︽ᠪᠢ | ᠴᠢᠮᠠᠶᠢ ᠭᠦᠩᠱᠧ ᠶᠢᠨ ᠰᠣᠶᠣᠯ ᠤᠨ ᠭᠡᠷ ᠲᠤ ᠵᠢᠩᠬᠢᠨᠢ ᠠᠵᠢᠯ ᠢᠶᠠᠷ ᠰᠢᠯᠵᠢᠭᠦᠯᠦᠨ ᠠᠪᠴᠤ ᠺᠢᠨᠣ᠋ ᠲᠠᠯᠪᠢᠬᠤ ᠠᠵᠢᠯ | ᠬᠢᠯᠭᠡᠨᠡ᠃ ᠰᠤᠷᠭᠠᠭᠤᠯᠢ ᠳᠤ ᠰᠢᠯᠭᠠᠬᠤ ᠶᠢ ᠴᠢᠨᠢ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ︾ ᠭᠡᠳ ᠮᠢᠨᠤ ᠠᠮᠠ ᠶᠢ ᠪᠥᠭᠯᠡᠪᠡ᠃ | ᠠᠷᠭᠠ ᠪᠤᠰᠤ ᠪᠠᠰᠠ ᠰᠠᠷᠠ ᠬᠢᠷᠢ ᠪᠣᠯᠣᠭᠠᠳ ᠬᠤᠰᠢᠭᠤᠨ ᠳᠤ ᠰᠤᠷᠠᠭ ᠴᠢᠮᠡᠭᠡ ᠠᠰᠠᠭᠤᠯᠭᠠᠭᠰᠠᠨ ᠳᠤ᠂ ᠬᠥᠮᠥᠰ | ᠰᠢᠯᠭᠠᠭᠤᠯᠬᠤ ᠪᠠᠷ ᠳᠠᠪᠲᠠᠭᠠᠳ ᠨᠢᠭᠡᠨᠲᠡ ᠰᠠᠷᠠ ᠭᠠᠷᠤᠢ ᠪᠣᠯᠤᠭᠰᠠᠨ ᠭᠡᠨᠡ᠃ ᠡᠨᠡ ᠵᠠᠩᠭᠢ ᠶᠢ ᠰᠣᠨᠣᠰᠤᠭᠠᠳ ᠪᠢ | ᠰᠢᠭᠤᠳ ᠪᠠᠷᠢᠭᠠᠳᠠ ᠳᠤ ᠴᠢᠯᠦᠭᠡ ᠬᠡᠯᠡᠬᠦ ᠪᠠᠷ ᠣᠴᠢᠭᠰᠠᠨ ᠳᠤ᠂ ᠪᠠᠷᠢᠭᠠᠳᠠ ᠶᠢᠨ ᠳᠠᠷᠤᠭᠠ ᠵᠦ ᠲᠢᠶᠠᠨ ᠱᠧᠦ | ᠪᠠᠶᠢᠪᠠ᠃ ᠪᠢ ᠶᠡᠭᠡ ᠰᠤᠷᠭᠠᠭᠤᠯᠢ ᠳᠤ ᠰᠢᠯᠭᠠᠭᠤᠯᠬᠤ ᠰᠠᠨᠠᠭᠠ ᠪᠠᠨ ᠢᠯᠡᠳᠬᠡᠵᠦ᠂ ︽ᠰᠢᠯᠭᠠᠭᠤᠯᠬᠤ ᠪᠠᠷ | ᠪᠡᠯᠡᠳᠬᠡᠵᠦ ᠪᠠᠶᠢᠭᠠ ᠬᠥᠮᠥᠰ ᠬᠤᠰᠢᠭᠤᠨ ᠳᠤ ᠳᠠᠪᠲᠠᠯᠭᠠ ᠬᠢᠭᠡᠳ ᠨᠢᠭᠡᠨᠲᠡ ᠰᠠᠷᠠ ᠭᠠᠷᠤᠢ ᠪᠣᠯᠵᠤ ᠪᠠᠶᠢᠨᠠ ᠭᠡᠨᠡ᠃ | ᠬᠠᠭᠠᠰ ᠰᠠᠷᠠ ᠶᠢᠨ ᠬᠤᠶᠢᠨᠠ ᠰᠢᠯᠭᠠᠯᠲᠠ ᠬᠢᠬᠦ ᠶᠤᠮ ᠭᠡᠨᠡ᠃ ᠡᠶᠢᠮᠦ ᠪᠣᠯᠬᠤᠷ ᠪᠢ ᠬᠤᠷᠢᠨ ᠡᠳᠦᠷ ᠤᠨ ᠴᠢᠯᠦᠭᠡ | ᠬᠡᠯᠡᠵᠦ᠂ ᠬᠡᠳᠦᠨ ᠡᠳᠦᠷ ᠴᠤ ᠪᠣᠯᠤᠭ ᠳᠠᠪᠲᠠᠬᠤ ᠰᠠᠨᠠᠭᠠ ᠲᠠᠢ︾ ᠭᠡᠰᠡᠨ ᠳᠤ᠂ ᠵᠦ ᠭᠤᠸᠠᠢ ᠰᠢᠭᠤᠳ ︽ᠡᠨᠡ | ᠴᠢᠨᠢ ᠰᠠᠶᠢᠨ ᠤᠴᠢᠷ᠂ ᠪᠣᠯᠣᠨᠠ ᠪᠣᠯᠣᠨᠠ︾ ᠭᠡᠪᠡ᠃ ᠢᠩᠭᠢᠭᠡᠳ ᠪᠢ ᠬᠤᠰᠢᠭᠤᠨ ᠳᠤ ᠬᠦᠷᠴᠦ ᠳᠠᠪᠲᠠᠬᠤ ᠭᠡᠰᠡᠨ | ᠴᠢᠨᠢ᠂ ᠪᠠᠶᠢᠭᠠᠯᠢ ᠶᠢᠨ ᠪᠠ ᠨᠡᠶᠢᠭᠡᠮ ᠤᠨ ᠬᠤᠶᠠᠷ ᠠᠩᠭᠢ ᠬᠤᠪᠢᠶᠠᠨ ᠳᠠᠪᠲᠠᠵᠤ ᠪᠠᠶᠢᠵᠠᠢ᠃ ᠤᠤᠯ ᠨᠢ ᠭᠠᠵᠠᠷ | ᠬᠥᠳᠡᠯᠬᠦ ᠶᠢ ᠤᠷᠢᠳᠴᠢᠯᠠᠨ ᠰᠡᠷᠭᠡᠶᠢᠯᠡᠬᠦ ᠠᠵᠢᠯ ᠬᠢᠵᠦ ᠪᠠᠶᠢᠭᠰᠠᠨ ᠰᠠᠭᠤᠷᠢ ᠲᠠᠢ ᠲᠤᠯᠠ ᠪᠠᠶᠢᠭᠠᠯᠢ ᠶᠢᠨ ᠠᠩᠭᠢ ᠳᠤ | ᠣᠷᠣᠵᠤ ᠳᠠᠪᠲᠠᠪᠠ᠃ ᠭᠠᠷᠠᠭ ᠤᠨ ᠳᠠᠷᠠᠭᠠ᠂ ᠰᠤᠷᠤᠬᠴᠢ ᠡᠯᠰᠡᠬᠦ ᠵᠠᠷ ᠢ ᠬᠠᠷᠠᠬᠤ ᠳᠤ ᠮᠢᠨᠤ ᠰᠢᠯᠭᠠᠭᠤᠯᠬᠤ ᠪᠠᠷ | ᠵᠣᠷᠢᠵᠤ ᠪᠠᠶᠢᠭᠰᠠᠨ ᠲᠤᠰᠬᠠᠢ ᠮᠡᠷᠭᠡᠵᠢᠯ ᠨᠢ ᠴᠠᠩ ᠴᠦᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠪᠣᠯᠣᠨ ᠶᠦᠨ ᠨᠠᠨ ᠶᠡᠭᠡ | ᠰᠤᠷᠭᠠᠭᠤᠯᠢ ᠪᠠᠶᠢᠵᠤ᠂ ᠭᠠᠨᠰᠤ ᠠᠴᠠ ᠲᠤᠰ ᠪᠦᠷᠢ ᠬᠤᠶᠠᠷ ᠨᠡᠷᠡ ᠠᠪᠤᠨᠠ ᠭᠡᠵᠦ ᠲᠣᠳᠣᠷᠬᠠᠢ ᠵᠠᠷᠯᠠᠭᠰᠠᠨ | ᠬᠠᠷᠠᠭᠳᠠᠪᠠ᠃ ᠲᠡᠭᠡᠭᠡᠳ ᠪᠢ ᠳᠣᠲᠣᠷᠠ ᠪᠠᠨ ︽ᠪᠦᠭᠦ ᠭᠠᠨᠰᠤ ᠲᠠᠶᠢᠮᠦ ᠣᠯᠠᠨ ᠬᠥᠮᠥᠨ ᠪᠤᠢ᠂ ᠥᠴᠥᠬᠡᠨ ᠪᠢ | ᠬᠡᠷᠬᠢᠨ ᠡᠳᠡᠭᠡᠷ ᠬᠥᠮᠥᠰ ᠲᠠᠢ ᠲᠡᠰᠤᠯᠴᠡᠭᠦ ᠪᠢᠯᠡ᠂ ᠬᠠᠰᠢᠯᠠ ᠨᠡᠶᠢᠭᠡᠮ ᠤᠨ ᠠᠩᠭᠢ ᠳᠤ ᠰᠢᠯᠭᠠᠭᠤᠯᠤᠶᠠ︾ ᠭᠡᠳ | ᠰᠤᠷᠤᠬᠴᠢ ᠡᠯᠰᠡᠬᠦ ᠵᠠᠷ ᠢ ᠬᠠᠷᠠᠬᠤ ᠳᠤ ᠮᠣᠩᠭᠤᠯ ᠢᠶᠠᠷ ᠰᠤᠷᠬᠤ ᠨᠡᠶᠢᠭᠡᠮ ᠤᠨ ᠠᠩᠭᠢ ᠨᠢᠭᠡᠯᠬᠡᠨ ᠪᠠᠷᠠᠭᠤᠨ | ᠬᠤᠶᠢᠲᠤ ᠶᠢᠨ ᠦᠨᠳᠦᠰᠦᠲᠡᠨ ᠤ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠪᠠᠶᠢᠵᠤ᠂ ᠥᠭᠡᠷᠡ ᠠᠯᠢ ᠴᠤ ᠶᠡᠭᠡ ᠰᠤᠷᠭᠠᠭᠤᠯᠢ | ᠭᠠᠨᠰᠤ ᠳᠤ ᠮᠣᠩᠭᠤᠯ ᠠᠩᠭᠢ ᠶᠢᠨ ᠨᠡᠷᠡ ᠬᠤᠪᠢᠶᠠᠭᠰᠠᠨ ᠦᠭᠡᠢ ᠪᠠᠶᠢᠯᠠ᠃ ᠪᠢ ᠲᠡᠭᠡᠭᠡᠳ ᠯᠡ ᠨᠢᠭᠡ ᠰᠡᠳᠬᠢᠯ ᠢᠶᠠᠷ | ᠪᠠᠷᠠᠭᠤᠨ ᠬᠤᠶᠢᠲᠤ ᠶᠢᠨ ᠦᠨᠳᠦᠰᠦᠲᠡᠨ ᠤ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠳᠤ ᠰᠢᠯᠭᠠᠭᠤᠯᠬᠤ ᠪᠠᠷ ᠭᠠᠷᠠᠭ ᠭᠠᠷᠤᠢ | ᠳᠠᠪᠲᠠᠭᠠᠳ ᠤᠯᠤᠰ ᠤᠨ ᠰᠢᠯᠭᠠᠯᠲᠠ ᠳᠤ ᠣᠷᠣᠯᠴᠠᠨ ᠰᠢᠯᠭᠠᠭᠤᠯᠪᠠ᠃ ᠰᠢᠯᠭᠠᠯᠲᠠ ᠶᠢᠨ ᠳ᠋ᠦᠩ ᠳᠤ ᠪᠠᠷᠠᠭᠤᠨ | ᠬᠤᠶᠢᠲᠤ ᠶᠢᠨ ᠦᠨᠳᠦᠰᠦᠲᠡᠨ ᠤ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶᠢᠨ ᠴᠥᠭᠡᠨ ᠲᠣᠭᠠᠲᠤ ᠦᠨᠳᠦᠰᠦᠲᠡᠨ ᠤ ᠭᠡᠯᠡ ᠤᠳᠬᠠ | ᠵᠣᠬᠢᠶᠠᠯ ᠤᠨ ᠰᠠᠯᠪᠤᠷᠢ ᠶᠢᠨ ᠮᠣᠩᠭᠤᠯ ᠭᠡᠯᠡ ᠤᠳᠬᠠ ᠵᠣᠬᠢᠶᠠᠯ ᠤᠨ ᠲᠤᠰᠬᠠᠢ ᠮᠡᠷᠭᠡᠵᠢᠯ ᠤᠨ ᠠᠩᠭᠢ ᠳᠤ ᠡᠯᠰᠡᠭᠳᠡᠨ | ᠂ 1978 ᠣᠨ ᠤ 3 ᠰᠠᠷᠠ ᠳᠤ ᠣᠶᠤᠲᠠᠨ ᠤ ᠡᠩᠨᠡᠭᠡ ᠳᠤ ᠵᠢᠬᠰᠠᠬᠳᠠᠬᠰᠠᠨ ᠪᠢᠯᠡ᠃ ᠮᠠᠨ ᠤ ᠰᠠᠯᠪᠤᠷᠢ ᠨᠢ | ᠮᠣᠩᠭᠤᠯ ᠠᠩᠭᠢ ᠪᠠ ᠲᠥᠪᠡᠳ ᠠᠩᠭᠢ ᠭᠡᠬᠦ ᠬᠤᠶᠠᠷ ᠲᠤᠰᠬᠠᠢ ᠮᠡᠷᠭᠡᠵᠢᠯ ᠢᠶᠠᠷ ᠠᠩᠭᠢᠯᠠᠵᠤ᠂ ᠲᠥᠪᠡᠳ ᠬᠤᠶᠠᠷ | ᠠᠩᠭᠢ᠂ ᠮᠣᠩᠭᠤᠯ ᠨᠢᠭᠡ ᠠᠩᠭᠢ ᠪᠠᠶᠢᠪᠠ᠃ | ᠮᠠᠨ ᠤ ᠠᠩᠭᠢ ᠨᠢ ᠰᠢᠯᠭᠠᠯᠲᠠ ᠶᠢᠨ ᠳᠦᠷᠢᠮ ᠰᠡᠷᠭᠦᠭᠡᠭᠳᠡᠭᠰᠡᠨ ᠤ ᠳᠠᠷᠠᠭᠠᠬᠢ ᠠᠩᠬᠠᠳᠠᠭᠴᠢ ᠠᠩᠭᠢ ᠪᠤᠯᠬᠤ | ᠲᠤᠯᠠ ᠰᠤᠷᠭᠠᠭᠤᠯᠢ ᠠᠴᠠ ᠪᠢᠳᠠᠨ ᠢ ᠣᠨᠴᠠ ᠴᠢᠬᠤᠯᠠᠴᠢᠯᠠᠵᠤ᠂ ᠵᠢᠭᠠᠨ ᠰᠤᠷᠭᠠᠯᠲᠠ ᠳᠤ ᠴᠠᠭᠠᠷᠠᠭᠰᠠᠨ ᠪᠠᠭᠰᠢ ᠶᠢ | ᠮᠠᠨ ᠤ ᠠᠩᠭᠢ ᠳᠤ ᠲᠣᠬᠢᠷᠠᠭᠤᠯᠤᠭᠰᠠᠨ ᠪᠠᠶᠢᠯᠠ᠃ ᠰᠤᠷᠤᠯᠭᠠ ᠶᠢᠨ ᠬᠤᠭᠤᠴᠠᠭᠠ ᠳᠤ ᠲᠦᠷᠦᠯ ᠪᠦᠷᠢ ᠵᠠᠪᠠᠯ | ᠰᠤᠷᠬᠤ ᠬᠢᠴᠢᠶᠡᠯ ᠠᠴᠠ ᠭᠠᠳᠠᠨᠠ᠂ ᠰᠠᠶᠢᠨ ᠳᠤᠷᠠ ᠠᠴᠠ ᠪᠠᠨ ᠰᠤᠷᠳᠠᠭ ᠳᠠᠭᠠᠯᠳᠤᠬᠤ ᠬᠢᠴᠢᠶᠡᠯ ᠨᠢ ᠠᠷᠠᠳ ᠤᠨ | ᠠᠮᠠᠨ ᠵᠣᠬᠢᠶᠠᠯ᠂ ᠶᠣᠰᠣ ᠵᠠᠩᠰᠢᠯ᠂ ᠶᠠᠫᠤᠨ ᠭᠡᠯᠡ᠂ ᠣᠷᠤᠰ ᠭᠡᠯᠡ᠂ ᠹᠷᠠᠨᠼᠢ ᠭᠡᠯᠡ ᠵᠡᠷᠭᠡ ᠪᠠᠶᠢᠭᠰᠠᠨ᠃ ᠮᠠᠨ ᠤ | ᠰᠠᠯᠪᠤᠷᠢ ᠶᠢᠨ ᠳᠠᠯᠠᠨ ᠳᠣᠯᠣᠳᠤᠭᠠᠷ ᠠᠩᠭᠢ ᠨᠢ ᠵᠦᠪᠭᠡᠨ ᠭᠤᠷᠪᠠᠭ᠋ᠠᠨ ᠰᠤᠷᠤᠬᠴᠢ ᠲᠠᠢ ᠪᠠᠶᠢᠭᠰᠠᠨ᠂ ᠲᠤᠬᠠᠢ ᠶᠢᠨ | ᠦᠶᠡ ᠳᠤ ᠲᠥᠪᠡᠳ ᠠᠩᠭᠢ ᠳᠤ ᠪᠠᠭᠰᠢᠯᠠᠵᠤ ᠪᠠᠶᠢᠭᠰᠠᠨ ᠪᠠᠭᠰᠢ ᠶᠢᠨ ᠣᠯᠠᠩᠬᠢ ᠲᠠᠢ ᠨᠢ ᠲᠠᠨᠢᠯᠴᠠᠵᠠᠢ᠃ | ᠡᠶᠢᠮᠦ ᠠᠴᠠ ᠣᠯᠠᠨ ᠪᠠᠭᠰᠢ ᠨᠠᠳᠠ ᠳᠤ ᠡᠭᠡᠯᠢᠲᠡᠢ ᠪᠥᠭᠡᠳ ᠡᠯᠡ ᠲᠠᠯᠠ ᠶᠢᠨ ᠡᠷᠳᠡᠮ ᠮᠡᠳᠡᠯᠭᠡ ᠪᠠᠨ ᠬᠠᠷᠠᠮ ᠦᠭᠡᠢ | ᠵᠢᠭᠠᠨ ᠵᠦᠭᠯᠡᠭᠦᠯᠵᠦ ᠦᠭᠳᠡᠭ ᠪᠠᠶᠢᠪᠠ᠃ ᠬᠤᠤ ᠰᠦ᠋ ᠮᠢᠨ ᠪᠠᠭᠰᠢ ᠨᠠᠳᠠᠳᠤ ᠠᠷᠠᠳ ᠤᠨ ᠵᠠᠩ ᠵᠠᠩᠰᠢᠯ᠂ ᠠᠮᠠᠨ | ᠵᠣᠬᠢᠶᠠᠯ᠂ ᠰᠤᠷᠪᠤᠯᠵᠢ ᠪᠢᠴᠢᠭ ᠤᠨ ᠲᠠᠯᠠ ᠶᠢᠨ ᠠᠷᠭᠠ ᠵᠠᠮ ᠢ ᠭᠦᠢᠴᠡᠳ ᠰᠠᠶᠢᠬᠠᠨ ᠵᠢᠭᠠᠨ ᠵᠢᠯᠤᠭᠤᠳᠴᠤ᠂ ᠨᠠᠮᠠᠶᠢ | ᠭᠠᠨᠰᠤ ᠮᠤᠵᠢ ᠶᠢᠨ ᠠᠷᠠᠳ ᠤᠨ ᠠᠮᠠᠨ ᠵᠣᠬᠢᠶᠠᠯ ᠤᠨ ᠨᠡᠶᠢᠭᠡᠮᠯᠢᠭ ᠤᠨ ᠭᠡᠰᠢᠭᠦᠨ ᠪᠤᠯᠭᠠᠬᠤ ᠪᠠᠷ ᠲᠠᠨᠢᠯᠴᠠᠭᠤᠯᠵᠤ᠂ | ᠲᠤᠰ ᠨᠡᠶᠢᠭᠡᠮᠯᠢᠭ ᠤᠨ ᠠᠩᠬᠠᠳᠤᠭᠠᠷ ᠰᠤᠷᠤᠬᠴᠢ ᠭᠠᠷᠤᠯ ᠲᠠᠢ ᠭᠡᠰᠢᠭᠦᠨ ᠪᠤᠯᠭᠠᠬᠰᠠᠨ ᠪᠥᠭᠡᠳ ᠮᠤᠵᠢ ᠶᠢᠨ ᠨᠣᠮ ᠤᠨ | ᠰᠠᠩ ᠤᠨ ᠰᠤᠷᠪᠤᠯᠵᠢ ᠪᠢᠴᠢᠭ ᠤᠨ ᠲᠠᠰᠤᠭ ᠤᠨ ᠰᠠᠩᠴᠢ ᠵᠧᠦ ᠫᠧᠢ ᠰᠢᠶᠠᠨ ᠠᠪᠤᠭᠠᠢ ᠪᠣᠯᠣᠨ ᠮᠦ ᠱᠢ ᠺᠦ᠋ | ᠠᠪᠤᠭᠠᠢ ᠳᠤ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠠᠴᠠ ᠣᠷᠣᠨ ᠨᠤᠲᠤᠭ ᠤᠨ ᠲᠡᠦᠬᠡ ᠰᠣᠶᠣᠯ ᠤᠨ ᠮᠠᠲ᠋ᠧᠷᠢᠶᠠᠯ ᠢ ᠡᠮᠬᠢᠳᠬᠡᠨ | ᠴᠤᠭᠯᠠᠭᠤᠯᠬᠤ ᠤᠷᠮᠠ ᠵᠣᠷᠢᠭ ᠢ ᠡᠷᠴᠢᠯᠡᠭᠰᠡᠨ᠃ ᠪᠢᠳᠠ ᠠᠩᠭᠢ ᠳᠠᠭᠠᠨ ᠲᠣᠰᠤᠨ ᠳᠠᠷᠤᠮᠠᠯ ᠤᠨ ᠰᠡᠳᠬᠦᠯ ᠡᠷᠭᠢᠯᠡᠭᠦ | ᠂ ᠰᠣᠨᠢᠨ ᠭᠠᠷᠭᠠᠬᠤ᠂ ᠲᠡᠭᠦᠨᠴᠢᠯᠡᠨ ᠮᠢᠨᠤ ᠴᠢᠷᠮᠠᠶᠢᠯᠭᠠ ᠪᠠᠷ ᠣᠨᠢᠰᠤᠭᠠ ᠡᠮᠬᠢᠳᠬᠡᠨ ᠴᠤᠭᠯᠠᠭᠤᠯᠵᠤ | ᠳᠣᠰᠤᠨ ᠪᠠᠷ ᠢᠶᠠᠷ ︽ᠮᠢᠩᠭᠠᠨ ᠣᠨᠢᠰᠤᠭᠠ ᠣᠷᠣᠰᠢᠪᠠ︾ ᠬᠡᠮᠡᠬᠦ ᠨᠣᠮ ᠢ ᠬᠡᠪᠯᠡᠭᠦᠯᠦᠭᠡᠳ ᠰᠤᠷᠭᠠᠭᠤᠯᠢ ᠳᠠᠭᠠᠨ | ᠲᠠᠷᠬᠠᠭᠠᠭᠰᠠᠨ ᠪᠠᠶᠢᠵᠤ ᠪᠢᠯᠡ᠃ ᠡᠨᠡ ᠶᠠᠪᠤᠳᠠᠯ ᠨᠢ ᠨᠠᠳᠠᠳᠤ ᠠᠪᠴᠤ ᠬᠡᠯᠡᠪᠡᠯ ᠨᠣᠮ ᠬᠡᠪᠯᠡᠯ ᠪᠠ ᠨᠠᠶᠢᠷᠠᠭᠤᠯᠬᠤ | ᠠᠵᠢᠯ ᠤᠨ ᠠᠩᠬᠠᠨ ᠤ ᠡᠬᠢᠯᠡᠯ ᠪᠠᠶᠢᠵᠤ ᠲᠠᠭᠠᠷᠠᠨᠠ᠃ ᠨᠠᠮᠠᠶᠢ ᠭᠤᠷᠪᠠᠳᠤᠭᠠᠷ ᠣᠨ ᠳᠤ ᠪᠠᠶᠢᠬᠤ ᠳᠤ᠂ ᠲᠥᠪᠡᠳ | ᠲᠤᠰᠬᠠᠢ ᠮᠡᠷᠭᠡᠵᠢᠯ ᠤᠨ ᠴᠡᠳᠡᠡ ᠫᠷᠤᠹᠧᠰᠰᠤᠷ ᠨᠠᠳᠠᠳᠤ ᠠᠭᠸᠠᠩᠳᠠᠨᠳᠠᠷ ᠤᠨ ᠲᠥᠪᠡᠳ ᠵᠣᠬᠢᠶᠠᠯ ᠤᠨ ᠲᠤᠬᠠᠢ | ᠠᠩᠬᠠ ᠲᠠᠨᠢᠯᠴᠠᠭᠤᠯᠤᠭᠰᠠᠨ᠂ ᠳᠠᠷᠠᠭᠠ ᠳᠤᠨᠢ ᠳ᠋ᠣᠷᠰᠢ ᠫᠷᠤᠹᠧᠰᠰᠤᠷ ᠠᠭᠸᠠᠩᠳᠠᠨᠳᠠᠷ ᠤᠨ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠤᠨ | ᠲᠤᠬᠠᠢ ᠤᠯᠠᠮ ᠡᠷᠴᠢᠮ ᠲᠠᠢ ᠦᠭᠡ ᠶᠢ ᠰᠣᠨᠣᠰᠬᠠᠭᠰᠠᠨ ᠳᠤ᠂ ᠪᠢ ᠡᠨᠡ ᠲᠠᠯᠠ ᠪᠠᠷ ᠰᠤᠷᠭᠠᠭᠤᠯᠢ ᠶᠢᠨ ᠨᠣᠮ ᠤᠨ | ᠰᠠᠩ ᠳᠤ ᠰᠠᠷᠠ ᠭᠠᠷᠤᠢ ᠨᠣᠮ ᠤᠨ ᠭᠠᠷᠴᠠᠭ ᠡᠷᠭᠢᠭᠦᠯᠦᠭᠰᠡᠨ ᠤ ᠳ᠋ᠦᠩ ᠳᠤ ᠶᠠᠮᠠᠷᠴᠤ ᠶᠠᠭᠤᠮᠠ ᠣᠯᠵᠤ ᠬᠠᠷᠠᠭᠰᠠᠨ | ᠦᠭᠡᠢ᠂ ᠲᠡᠶᠢᠨᠬᠦ ᠠᠷᠭᠠ ᠪᠤᠰᠤ ᠠᠭᠸᠠᠩᠴᠣᠶᠢᠳᠠᠷ ᠫᠷᠤᠹᠧᠰᠰᠤᠷ ᠤᠨ ᠭᠡᠷ ᠲᠤ ᠣᠴᠢᠨ᠂ ᠠᠭᠸᠠᠩᠳᠠᠨᠳᠠᠷ ᠤᠨ | ᠵᠣᠬᠢᠶᠠᠯ ᠪᠦᠲᠦᠭᠡᠯ ᠤᠨ ᠲᠤᠬᠠᠢ ᠰᠤᠷᠪᠤᠯᠵᠢᠯᠠᠭᠰᠠᠨ ᠳᠤ ᠰᠠᠨᠠᠭᠠᠨ ᠠᠴᠠ ᠭᠠᠳᠠᠭᠤᠷ ᠶᠡᠭᠡ ︽ᠣᠯᠵᠠ︾ ᠣᠯᠵᠤ᠂ | ᠠᠭᠸᠠᠩᠳᠠᠨᠳᠠᠷ ᠤᠨ ᠲᠥᠪᠡᠳ ᠵᠣᠬᠢᠶᠠᠯ ᠤᠨ ᠭᠠᠷᠴᠠᠭ ᠢ ᠪᠠᠭᠰᠢ ᠮᠠᠨᠢ ᠨᠢᠭᠡᠳ ᠨᠢᠭᠡ ᠪᠠᠷ ᠣᠷᠴᠢᠭᠤᠯᠤᠨ ᠬᠡᠯᠡᠵᠦ | ᠥᠭᠭᠦᠭᠰᠡᠨ ᠪᠢᠯᠡ᠃ ᠡᠭᠦᠨ ᠠᠴᠠ ᠡᠬᠢᠯᠡᠨ ᠠᠭᠸᠠᠩᠳᠠᠨᠳᠠᠷ ᠤᠨ ᠵᠣᠬᠢᠶᠠᠯ ᠢ ᠡᠮᠬᠢᠳᠬᠡᠨ ᠴᠤᠭᠯᠠᠭᠤᠯᠬᠤ ᠠᠵᠢᠯ ᠢᠶᠠᠨ | ᠡᠬᠢᠯᠡᠭᠦᠯᠦᠭᠰᠡᠨ ᠪᠠᠶᠢᠨᠠ᠃ | ᠳᠥᠷᠪᠡ᠂ ᠨᠣᠮ ᠰᠤᠳᠤᠷ ᠤᠨ ᠳᠠᠯᠠᠢ ᠠᠴᠠ ᠡᠷᠳᠡᠨᠢ ᠱᠦᠭᠦᠭᠰᠡᠨ ᠨᠢ | ᠨᠠᠮᠠᠶᠢ ᠶᠡᠭᠡ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠵᠤ ᠪᠠᠶᠢᠬᠤ ᠳᠤ᠂ ᠭᠠᠨᠰᠤ ᠮᠤᠵᠢ ᠶᠢᠨ ᠨᠣᠮ ᠤᠨ ᠰᠠᠩ ᠤᠨ | ᠲᠡᠦᠬᠡᠨ ᠰᠣᠷᠪᠤᠯᠵᠢ ᠶᠢᠨ ᠲᠠᠰᠤᠭ ᠨᠢ ᠭᠠᠷᠠᠭ ᠤᠨ ᠭᠤᠷᠪᠠᠨ ᠤ ᠦᠳᠡ ᠶᠢᠨ ᠬᠤᠶᠢᠨᠠ ᠬᠠᠭᠠᠰᠬᠠᠨ ᠡᠳᠦᠷ | ᠤᠩᠰᠢᠭᠴᠢᠳ ᠲᠤ ᠦᠢᠯᠡᠴᠢᠯᠡᠳᠡᠭ ᠪᠠᠶᠢᠪᠠ᠃ ᠭᠡᠪᠡᠴᠦ ᠪᠤᠢ ᠪᠦᠬᠦᠢ ᠨᠣᠮ ᠢ ᠭᠠᠳᠠᠭᠰᠢ ᠵᠢᠭᠡᠯᠡᠭᠦᠯᠳᠡᠭ ᠦᠭᠡᠢ | ᠴᠢᠩᠭᠠ ᠳᠦᠷᠢᠮ ᠲᠠᠢ ᠪᠠᠶᠢᠯᠠ᠃ ᠪᠢ ᠡᠨᠡᠬᠦ ᠬᠤᠪᠣᠷᠬᠠᠨ ᠴᠠᠭ ᠢ ᠶᠡᠷᠦᠨᠢ ᠠᠯᠳᠠᠯ ᠦᠭᠡᠢ ᠪᠠᠷ ᠲᠡᠨᠳᠡ ᠣᠴᠢᠵᠤ | ᠬᠠᠭᠤᠴᠢᠨ ︵1949 ᠣᠨ ᠠᠴᠠ ᠤᠷᠢᠳᠠᠭᠢ︶ ᠰᠣᠨᠢᠨ ᠰᠡᠳᠬᠦᠯ ᠢ ᠨᠢᠭᠡᠳ ᠨᠢᠭᠡ ᠪᠠᠷ ᠡᠷᠭᠢᠭᠦᠯᠦᠨ᠂ | ᠠᠯᠠᠱᠠ ᠶᠢᠨ ᠲᠤᠬᠠᠢ ᠮᠠᠲ᠋ᠧᠷᠢᠶᠠᠯ ᠪᠣᠯᠣᠨ ᠮᠣᠩᠭᠤᠯ ᠭᠠᠵᠠᠷ ᠲᠤ ᠬᠤᠯᠪᠣᠭᠳᠠᠬᠤ ᠬᠡᠷᠡᠭ ᠲᠠᠢ ᠭᠡᠰᠡᠨ ᠵᠣᠬᠢᠶᠠᠯ ᠢ | ᠪᠦᠭᠦ ᠠᠭᠤᠯᠭᠠ ᠪᠠᠷ ᠨᠢ ᠬᠠᠭᠤᠯᠤᠨ ᠲᠡᠮᠳᠡᠭᠯᠡᠳᠡᠭ ᠪᠠᠶᠢᠯᠠ᠃ ᠡᠳᠦᠷ ᠤᠨ ᠤᠳᠠᠭᠠᠨ ᠳᠤ ᠲᠤᠰ ᠲᠠᠰᠤᠭ ᠤᠨ | ᠰᠠᠩᠴᠢ ᠲᠠᠢ ᠤᠯᠠᠮ ᠰᠠᠶᠢᠨ ᠲᠠᠨᠢᠯᠴᠠᠨ ᠨᠠᠶᠢᠵᠠᠯᠠᠭᠰᠠᠨ ᠪᠣᠯᠬᠤᠷ ᠲᠡᠳᠡ ᠨᠠᠳᠠᠳᠤ ᠣᠨᠴᠠᠭᠠᠢ ᠬᠠᠷᠠᠭᠠᠯᠵᠠᠯ | ᠬᠦᠷᠲᠡᠭᠡᠵᠦ᠂ ᠨᠠᠮᠠᠶᠢ ᠶᠠᠪᠤᠬᠤ ᠳᠤ ᠬᠤᠶᠠᠷ ᠬᠤᠪᠢ ᠰᠡᠳᠬᠦᠯ ᠢ ᠨᠢᠭᠤᠴᠠ ᠪᠠᠷ ᠥᠭᠴᠦ ︽ᠰᠤᠷᠭᠠᠭᠤᠯᠢ ᠳᠠᠭᠠᠨ | ᠬᠠᠷᠢᠭᠠᠳ ᠬᠡᠷᠡᠭ ᠲᠠᠢ ᠭᠡᠰᠡᠨ ᠢᠶᠠᠨ ᠬᠠᠭᠤᠯᠤᠭᠠᠷᠠᠢ᠃ ᠭᠡᠪᠡᠴᠦ ᠭᠡᠭᠡᠵᠦ ᠤᠷᠠᠵᠤ ᠪᠤᠯᠬᠤ ᠦᠭᠡᠢ᠂ ᠬᠥᠮᠥᠨ ᠳᠤ | ᠴᠤ ᠬᠡᠯᠡᠵᠦ ᠪᠤᠯᠬᠤ ᠦᠭᠡᠢ︾ ᠭᠡᠵᠦ ᠴᠢᠩᠭᠠ ᠵᠠᠬᠢᠳᠠᠭ ᠪᠠᠶᠢᠪᠠ᠃ ᠪᠢ ᠴᠤ ᠲᠡᠳᠡᠨ ᠤ ᠰᠠᠶᠢᠨ ᠰᠠᠨᠠᠭᠠ ᠶᠢ | ᠬᠥᠰᠡᠷᠳᠡᠭᠦᠯᠦᠯ ᠦᠭᠡᠢ ᠪᠠᠷ ᠬᠦᠷᠬᠦ ᠪᠣᠯᠭᠠᠨ ᠳᠠᠭᠠᠨ ᠵᠢᠭᠡᠯᠡᠭᠰᠡᠨ ᠨᠣᠮ ᠰᠡᠳᠬᠦᠯ ᠢᠶᠠᠨ ᠪᠤᠴᠠᠭᠠᠵᠤ᠂ ᠳᠠᠭᠢᠨ ᠨᠣᠮ | ᠰᠣᠩᠭᠤᠨ ᠬᠠᠭᠤᠯᠵᠤ᠂ ᠶᠠᠪᠤᠬᠤ ᠳᠠᠭᠠᠨ ᠪᠠᠰᠠ ᠬᠤᠶᠠᠷ ᠨᠣᠮ ᠠᠪᠤᠭᠠᠳ ᠶᠠᠪᠤᠵᠤ ᠪᠠᠶᠢᠭᠠᠳ᠂ ᠨᠢᠭᠡ ᠮᠡᠳᠡᠬᠦ ᠳᠤ | ᠲᠠᠪᠢᠭᠠᠳ ᠲᠦᠮᠡᠨ ᠦᠰᠦᠭ ᠤᠨ ᠮᠠᠲ᠋ᠧᠷᠢᠶᠠᠯ ᠢ ᠬᠠᠭᠤᠯᠤᠨ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠪᠠ᠃ ᠡᠭᠦᠨ ᠤ ᠬᠠᠮᠲᠤ | ᠰᠤᠷᠭᠠᠭᠤᠯᠢ ᠶᠢᠨ ᠨᠣᠮ ᠤᠨ ᠰᠠᠩ ᠴᠤ ᠮᠢᠨᠤ ︽ᠡᠷᠳᠡᠨᠢ︾ ᠴᠤᠭᠯᠠᠭᠤᠯᠬᠤ ᠭᠤᠣᠯ ᠭᠠᠵᠠᠷ ᠪᠠᠶᠢᠭᠰᠠᠨ᠂ | ᠰᠤᠷᠭᠠᠭᠤᠯᠢ ᠶᠢᠨ ᠨᠣᠮ ᠤᠨ ᠭᠠᠷᠴᠠᠭ ᠪᠦᠭᠦᠳᠡ ᠶᠢ ᠰᠢᠯᠭᠠᠨ ᠬᠠᠷᠠᠵᠤ᠂ ᠰᠠᠨᠠᠭᠠᠨ ᠳᠤ ᠲᠠᠭᠠᠷᠠᠬᠰᠠᠨ ᠨᠣᠮ | ᠰᠤᠳᠤᠷ ᠢ ᠵᠢᠭᠡᠯᠡᠨ ᠠᠪᠴᠤ ᠤᠩᠰᠢᠬᠤ ᠶᠢᠨ ᠬᠠᠮᠲᠤ ᠬᠡᠷᠡᠭ ᠲᠠᠢ ᠭᠡᠰᠡᠨ ᠬᠡᠰᠡᠭ ᠢ ᠬᠠᠭᠤᠯᠤᠨ ᠲᠡᠮᠳᠡᠭᠯᠡᠳᠡᠭ | ᠪᠠᠶᠢᠯᠠ᠃ | ᠡᠭᠦᠨ ᠠᠴᠠ ᠭᠠᠳᠠᠨᠠ᠂ ᠭᠠᠷᠠᠭ ᠤᠨ ᠡᠳᠦᠷ ᠪᠣᠯᠭᠠᠨ ᠳᠤ ᠵᠠᠪᠠᠯ ᠣᠴᠢᠬᠤ ᠬᠤᠶᠠᠷ ᠭᠠᠵᠠᠷ ᠪᠣᠯ᠂ ᠨᠢᠭᠡ ᠨᠢ | ᠬᠤᠲᠠ ᠶᠢᠨ ᠰᠢᠨᠬᠤᠸᠠ ᠨᠣᠮ ᠤᠨ ᠳᠡᠯᠭᠡᠭᠦᠷ᠂ ᠨᠦᠭᠦᠭᠡ ᠨᠢ ᠯᠠᠨᠵᠧᠦ ᠬᠤᠲᠠ ᠶᠢᠨ ᠬᠠᠭᠤᠴᠢ ᠨᠣᠮ ᠤᠨ ᠳᠡᠯᠭᠡᠭᠦᠷ | ᠪᠣᠯᠣᠨᠠ᠃ ᠰᠢᠨᠬᠤᠸᠠ ᠨᠣᠮ ᠤᠨ ᠳᠡᠯᠭᠡᠭᠦᠷ ᠨᠢ ᠭᠠᠷᠠᠭ ᠤᠨ ᠡᠳᠦᠷ ᠪᠣᠯᠭᠠᠨ ᠰᠢᠨᠡ ᠨᠣᠮ ᠲᠠᠷᠬᠠᠭᠠᠬᠤ ᠪᠣᠯᠬᠤᠷ | ᠵᠠᠪᠠᠯ ᠥᠷᠯᠥᠭᠡ ᠡᠷᠲᠡᠯᠡᠨ ᠬᠦᠷᠴᠦ ᠵᠢᠭᠰᠠᠵᠤ ᠪᠠᠶᠢᠭᠠᠳ ᠡᠭᠦᠳᠡ ᠨᠡᠭᠡᠭᠡᠬᠦ ᠶᠢ ᠬᠦᠯᠢᠶᠡᠳᠡᠭ ᠪᠠᠶᠢᠭᠰᠠᠨ᠃ ᠡᠨᠡ | ᠮᠡᠲᠦ ᠭᠠᠷᠠᠭ ᠪᠣᠯᠭᠠᠨ ᠨᠣᠮ ᠤᠨ ᠳᠡᠯᠭᠡᠭᠦᠷ ᠢᠶᠠᠷ ᠬᠡᠰᠦᠵᠦ᠂ ᠨᠢᠭᠡ ᠮᠡᠳᠡᠬᠦ ᠳᠤ ᠶᠡᠭᠡ ᠪᠠᠭᠠ ᠬᠤᠷᠢ ᠰᠢᠬᠠᠮ | ᠠᠪᠳᠠᠷᠠ ᠨᠣᠮ ᠲᠠᠢ ᠲᠡᠦᠬᠡ ᠰᠣᠶᠣᠯ ᠤᠨ ᠥᠪ ᠢ ᠬᠠᠳᠠᠭᠠᠯᠠᠭᠰᠠᠨ ︽ᠪᠠᠶᠠᠨ︾ ᠬᠥᠮᠥᠨ ᠪᠣᠯᠪᠠ᠃ | ᠲᠠᠪᠤ᠂ ᠣᠷᠣᠨ ᠨᠤᠲᠤᠭ ᠤᠨ ᠰᠣᠶᠣᠯ ᠤᠨ ᠦᠢᠯᠡᠰ ᠲᠤ ᠬᠦᠴᠦ ᠪᠠᠨ ᠡᠷᠭᠦᠭᠰᠡᠨ ᠨᠢ | ᠳᠦᠷᠪᠡᠨ ᠵᠢᠯ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠣᠶᠤᠲᠠᠨ ᠤ ᠠᠮᠢᠳᠤᠷᠠᠯ ᠢ ᠡᠳ᠋ᠯᠡᠵᠦ᠂ ᠰᠣᠶᠣᠯ ᠤᠨ ᠮᠥᠷ | ᠬᠥᠭᠡᠭᠡᠵᠦ᠂ ᠪᠠᠶᠠᠷ ᠴᠡᠩᠭᠡᠯ ᠤᠨ ᠳᠤᠮᠳᠠ ᠥᠩᠭᠡᠷᠡᠭᠡᠭᠡᠳ᠂ ᠭᠠᠨᠵᠤᠭᠠ ᠳᠦᠭᠦᠷᠡᠩ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠨ ᠤ | ᠳ᠋ᠦᠩ ᠳᠤ᠂ ᠨᠠᠮᠠᠶᠢ ᠰᠤᠷᠭᠠᠭᠤᠯᠢ ᠳᠤ ᠦᠯᠡᠳᠡᠭᠡᠬᠦ ᠭᠡᠰᠡᠨ ᠪᠤᠯᠪᠠᠴᠤ ᠪᠢ ᠣᠯᠠᠨ ᠵᠦᠢᠯ ᠤᠨ ᠰᠢᠯᠲᠠᠭ ᠬᠡᠯᠡᠵᠦ᠂ | ᠠᠯᠠᠱᠠ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠤ ᠢᠷᠡᠪᠡ᠃ ᠠᠵᠢᠯ ᠬᠤᠪᠢᠶᠠᠬᠤ ᠳᠤ ᠨᠠᠮᠠᠶᠢ ᠠᠶᠢᠮᠠᠭ ᠤᠨ ᠵᠠᠬᠢᠷᠭᠠ ᠶᠢᠨ ᠠᠯᠪᠠᠨ | ᠭᠡᠷ ᠲᠤ ᠬᠤᠪᠢᠶᠠᠵᠤ᠂ ᠲᠤᠰᠬᠠᠢ ᠣᠷᠴᠢᠭᠤᠯᠤᠭᠴᠢ ᠪᠣᠯᠭᠠᠪᠠ᠃ ᠬᠤᠶᠠᠷ ᠵᠢᠯ ᠰᠢᠬᠠᠮ ᠵᠠᠬᠢᠷᠭᠠ ᠶᠢᠨ ᠠᠯᠪᠠᠨ | ᠪᠢᠴᠢᠭ᠂ ᠳᠠᠷᠤᠭᠠ ᠶᠢᠨ ᠶᠠᠷᠢᠶᠠ ᠵᠡᠷᠭᠡ ᠶᠠᠩᠵᠤ ᠪᠦᠷᠢ ᠶᠢᠨ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ ᠢ ᠣᠷᠴᠢᠭᠤᠯᠵᠤ᠂ ᠲᠤᠰᠬᠠᠢ | ᠠᠵᠢᠯ ᠤᠨ ᠮᠡᠳᠡᠴᠡ ᠮᠡᠳᠡᠯᠭᠡ ᠳᠡᠭᠡᠭᠰᠢᠯᠡᠨ ᠤᠯᠠᠮ ᠢᠶᠠᠷ ᠳᠠᠪᠲᠠᠭᠳᠠᠪᠠ᠃ 1984 ᠣᠨ ᠤ 10 ᠰᠠᠷᠠ ᠳᠤ᠂ | ᠠᠶᠢᠮᠠᠭ ᠤᠨ ᠤᠯᠤᠰ ᠲᠦᠷᠦ ᠶᠢᠨ ᠵᠥᠪᠯᠡᠯᠭᠡᠨ ᠤ ᠰᠣᠶᠣᠯ ᠲᠡᠦᠬᠡ ᠮᠠᠲ᠋ᠧᠷᠢᠶᠠᠯ ᠤᠨ ᠠᠯᠪᠠᠨ ᠭᠡᠷ ᠲᠤ ᠰᠣᠩᠭᠤᠭᠳᠠᠨ | ᠰᠢᠯᠢᠭᠳᠡᠵᠦ᠂ ᠠᠵᠢᠯ ᠰᠢᠯᠵᠢᠨ ᠢᠷᠡᠵᠦ ᠠᠵᠢᠯᠯᠠᠪᠠ᠃ ᠨᠠᠮᠠᠶᠢ ᠰᠣᠶᠣᠯ ᠲᠡᠦᠬᠡ ᠶᠢᠨ ᠮᠠᠲ᠋ᠧᠷᠢᠶᠠᠯ ᠤᠨ ᠠᠯᠪᠠᠨ | ᠭᠡᠷ ᠲᠤ ᠰᠢᠯᠵᠢᠨ ᠣᠴᠢᠬᠤ ᠦᠶᠡ ᠳᠤ ᠨᠢᠭᠡ ᠰᠢᠷᠡᠭᠡ ᠨᠢᠭᠡ ᠰᠠᠨᠳᠠᠯᠢ ᠠᠴᠠ ᠭᠠᠳᠠᠨᠠ᠂ ᠭᠦᠭᠡᠬᠤᠲᠠ ᠳᠤ | ᠬᠤᠷᠠᠯᠳᠤᠭᠤᠯᠤᠭᠰᠠᠨ ᠪᠦᠭᠦ ᠣᠷᠣᠨ ᠤ ᠰᠣᠶᠣᠯ ᠲᠡᠦᠬᠡ ᠶᠢᠨ ᠮᠠᠲ᠋ᠧᠷᠢᠶᠠᠯ ᠤᠨ ᠠᠵᠢᠯ ᠤᠨ ᠬᠤᠷᠠᠯᠳᠤᠭᠠᠨ ᠤ ᠬᠡᠳᠦᠨ | ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ ᠠᠴᠠ ᠥᠭᠡᠷᠡ ᠶᠠᠭᠤ ᠴᠤ ᠪᠠᠶᠢᠭᠰᠠᠨ ᠦᠭᠡᠢ᠂ ᠠᠯᠠᠱᠠ ᠠᠶᠢᠮᠠᠭ ᠤᠨ ᠰᠣᠶᠣᠯ ᠲᠡᠦᠬᠡ ᠶᠢᠨ | ᠠᠵᠢᠯ ᠨᠢ ᠰᠢᠨᠡ ᠭᠡᠷ ᠪᠠᠶᠢᠰᠢᠩ ᠪᠣᠰᠬᠠᠬᠤ ᠠᠳᠠᠯᠢ ᠬᠡᠷᠡᠭ ᠪᠠᠶᠢᠯᠠ᠃ ᠲᠤᠬᠠᠢ ᠶᠢᠨ ᠦᠶᠡ ᠶᠢᠨ ᠨᠠᠰᠤᠲᠠᠶᠢᠴᠤᠳ | ᠤᠳᠠᠭᠠ ᠪᠣᠯᠭᠠᠨ ᠤ ᠬᠥᠳᠡᠯᠭᠡᠭᠡᠨ ᠢ ᠪᠡᠶᠡ ᠪᠠᠷ ᠢᠶᠠᠨ ᠥᠩᠭᠡᠷᠡᠭᠦᠯᠦᠭᠰᠡᠨ ᠪᠣᠯᠬᠤᠷ ᠣᠯᠠᠨ ᠠᠷᠪᠢᠨ ᠲᠡᠦᠬᠡᠨ ᠬᠡᠷᠡᠭ | ᠶᠠᠪᠤᠳᠠᠯ ᠤᠨ ᠰᠦᠪᠡᠭᠴᠢ᠂ ᠥᠪᠡᠷ ᠤᠨ ᠥᠩᠭᠡᠷᠡᠯᠲᠡ ᠵᠡᠷᠭᠡ ᠪᠠᠨ ᠶᠠᠷᠢᠬᠤ ᠳᠤᠷᠠ ᠦᠭᠡᠢ ᠪᠠᠶᠢᠪᠠ᠃ ᠭᠡᠪᠡᠴᠦ ᠪᠢ | ᠡᠳᠡᠭᠡᠷ ᠪᠤᠭᠤᠷᠤᠯᠴᠤᠳ ᠲᠠᠢ ᠠᠷᠭᠠ ᠪᠦᠭᠦᠨ ᠢ ᠰᠦᠪᠡᠭᠴᠢᠯᠡᠨ ᠨᠠᠶᠢᠵᠠᠯᠠᠵᠤ᠂ ᠨᠢᠭᠡ ᠵᠢᠯ ᠤᠨ ᠰᠢᠷᠭᠠᠭᠤ | ᠭᠦᠳᠡᠯᠮᠦᠷᠢ ᠶᠢ ᠵᠠᠷᠤᠴᠠᠭᠤᠯᠤᠨ ᠴᠢᠷᠮᠠᠶᠢᠭᠰᠠᠨ ᠤ ᠳ᠋ᠦᠩ ᠳᠤ ᠳᠠᠷᠠᠭᠠ ᠵᠢᠯ ᠨᠢ ︽ᠠᠯᠠᠱᠠ ᠠᠶᠢᠮᠠᠭ ᠤᠨ ᠰᠣᠶᠣᠯ | ᠲᠡᠦᠬᠡ︾ ᠶᠢᠨ ᠨᠢᠭᠡᠳᠦᠭᠡᠷ ᠡᠮᠬᠢᠳᠬᠡᠯ ᠢ ᠬᠡᠪᠯᠡᠭᠦᠯᠦᠨ ᠲᠠᠷᠬᠠᠭᠠᠪᠠ᠃ ᠡᠨᠡ ᠨᠢ ᠮᠠᠰᠢ ᠰᠠᠶᠢᠨ ᠪᠣᠳᠠᠲᠤ | ᠤᠬᠠᠭᠤᠯᠭᠠ ᠶᠢᠨ ᠬᠠᠭᠤᠳᠠᠰᠤ ᠪᠣᠯᠤᠭᠰᠠᠨ ᠢᠶᠠᠷ ᠮᠠᠰᠢ ᠣᠯᠠᠨ ᠪᠤᠭᠤᠷᠤᠯᠴᠤᠳ ᠪᠡᠶᠡ ᠪᠡᠶᠡ ᠪᠠᠨ ᠲᠠᠨᠢᠯᠴᠠᠭᠤᠯᠤᠨ | ᠨᠠᠮᠠᠶᠢ ᠳᠡᠮᠵᠢᠬᠦ ᠪᠣᠯᠵᠤ᠂ ᠥᠪᠡᠷ ᠤᠨ ᠪᠡᠶᠡ ᠪᠠᠷ ᠢᠶᠠᠨ ᠥᠩᠭᠡᠷᠡᠭᠦᠯᠦᠭᠰᠡᠨ ᠪᠤᠭᠤᠷᠤᠯ ᠳᠤᠷᠠᠰᠤᠮᠵᠢ ᠪᠠᠨ ᠬᠦᠦᠷᠨᠢᠨ | ᠥᠭᠦᠯᠡᠵᠦ ᠦᠭᠳᠡᠭ ᠪᠣᠯᠤᠭᠰᠠᠨ᠂ ᠡᠶᠢᠨᠬᠦ ᠤᠷᠢᠳ ᠬᠤᠵᠢᠳ ᠬᠡᠳᠦᠬᠡᠨ ᠵᠢᠯ ᠤᠨ ᠬᠤᠭᠤᠴᠠᠭᠠᠨ ᠳᠤ ᠵᠠᠭᠤ ᠭᠠᠷᠤᠢ | ᠬᠥᠮᠥᠰ ᠢ ᠰᠤᠷᠪᠤᠯᠵᠢᠯᠠᠨ᠂ ᠬᠤᠶᠠᠷ ᠵᠠᠭᠤ ᠭᠠᠷᠤᠢ ᠲᠦᠮᠡᠨ ᠦᠰᠦᠭ ᠤᠨ ᠮᠠᠲ᠋ᠧᠷᠢᠶᠠᠯ ᠢ ᠴᠤᠭᠯᠠᠭᠤᠯᠪᠠ᠃ ᠡᠨᠡ | ᠮᠡᠲᠦ ᠪᠠᠷ ᠭᠠᠭᠴᠠᠭᠠᠷ ᠢᠶᠠᠨ ᠠᠵᠢᠯᠯᠠᠭᠰᠠᠭᠠᠷ ᠨᠢᠭᠡ ᠮᠡᠳᠡᠬᠦ ᠳᠤ ᠮᠢᠩᠭᠠ ᠭᠠᠷᠤᠢ ᠲᠦᠮᠡᠨ ᠦᠰᠦᠭ ᠤᠨ ᠡᠬᠡ | ᠪᠢᠴᠢᠭ ᠢ ᠴᠤᠭᠯᠠᠭᠤᠯᠤᠨ ᠲᠤᠭᠤᠷᠪᠢᠭᠰᠠᠨ ᠪᠥᠭᠡᠳ ︽ᠠᠯᠠᠱᠠ ᠠᠶᠢᠮᠠᠭ ᠤᠨ ᠰᠣᠶᠣᠯ ᠲᠡᠦᠬᠡ︾ ᠬᠢᠲᠠᠳ ᠮᠣᠩᠭᠤᠯ | ᠬᠡᠯᠡᠨ ᠤ 28 ᠡᠮᠬᠢᠳᠬᠡᠯ᠂ ᠡᠬᠡ ᠪᠢᠴᠢᠭ ᠴᠤᠭᠯᠠᠭᠤᠯᠤᠨ ᠨᠠᠶᠢᠷᠠᠭᠤᠯᠤᠭᠰᠠᠨ ᠰᠡᠳᠬᠦᠯ ᠨᠡᠶᠢᠲᠡ 22 ᠬᠤᠭᠤᠴᠠᠭᠠ᠂ | ︽ᠣᠶᠢᠷᠠᠳ ᠰᠣᠷᠪᠤᠯᠵᠢ ᠪᠢᠴᠢᠭ ᠪᠠ ᠰᠤᠳᠤᠯᠤᠯ︾᠂ ︽ᠠᠯᠠᠱᠠ ᠶᠢᠨ ᠵᠦᠢᠷ ᠴᠠᠴᠠᠨ ᠦᠭᠡᠰ︾᠂ ︽ᠠᠯᠠᠱᠠ | ᠮᠡᠷᠭᠡᠳ ᠤᠨ ᠴᠢᠭᠤᠯᠭᠠᠨ︾᠂ ︽ᠠᠯᠠᠱᠠ ᠶᠢᠨ ᠢᠯᠡᠳᠬᠡᠯ ᠲᠡᠦᠬᠡ︾᠂ ︽ᠠᠭᠸᠠᠩᠳᠠᠨᠳᠠᠷ ᠤᠨ ᠰᠤᠳᠤᠯᠭᠠᠨ ᠤ | ᠥᠭᠦᠯᠡᠯ ᠤᠨ ᠴᠢᠭᠤᠯᠭᠠᠨ︾᠂ ︽ᠵᠢᠷᠭᠤᠳᠤᠭᠠᠷ ᠳᠠᠯᠠᠢ ᠪᠯᠠᠮᠠ ᠼᠠᠩᠶᠠᠩᠵᠠᠮᠰᠤ ᠶᠢᠨ ᠨᠠᠮᠲᠠᠷ︾᠂ ︽ᠪᠠᠷᠠᠭᠤᠨ | ᠬᠡᠶᠢᠳ ᠬᠢᠭᠡᠳ ᠼᠠᠩᠶᠠᠩᠵᠠᠮᠰᠤ︾᠂ ︽ᠠᠯᠠᠱᠠ ᠶᠢᠨ ᠵᠦᠢᠷ ᠰᠡᠴᠡᠨ ᠦᠭᠡ ᠶᠢᠨ ᠴᠢᠭᠤᠯᠭᠠᠨ︾᠂ ︽ᠠᠯᠠᠱᠠ ᠶᠢᠨ | ᠤᠯᠠᠮᠵᠢᠯᠠᠯᠲᠤ ᠢᠳᠡᠭᠡᠨ ᠤᠮᠳᠠᠭᠠᠨ︾᠂ ︽ᠠᠯᠠᠱᠠ ᠶᠢᠨ ᠲᠠᠬᠢᠯᠭᠠᠲᠤ ᠠᠭᠤᠯᠠ ᠤᠰᠤ ᠪᠠ ᠮᠣᠩᠭᠤᠯᠴᠤᠳ ᠤᠨ | ᠤᠯᠠᠮᠵᠢᠯᠠᠯᠲᠤ ᠠᠮᠢ ᠠᠬᠤᠢ ᠶᠢᠨ ᠬᠠᠮᠠᠭᠠᠯᠠᠯᠲᠠ ᠶᠢᠨ ᠵᠠᠩᠰᠢᠯ︾ ︽ᠣᠶᠢᠷᠠᠳ ᠮᠣᠩᠭᠤᠯ ᠤᠨ ᠲᠡᠦᠬᠡ ᠰᠣᠶᠣᠯ ᠤᠨ | ᠰᠤᠳᠤᠯᠤᠯ︾᠂ ︽ᠳᠡᠮᠴᠤᠬᠳᠤᠩᠷᠤᠪ ᠠᠯᠠᠱᠠ ᠳᠤ︾᠂ ︽ᠠᠯᠠᠱᠠ ᠠᠶᠢᠮᠠᠭ ᠤᠨ ᠬᠤᠰᠢᠭᠤ ᠨᠤᠲᠤᠭ ᠤᠨ ᠲᠡᠦᠬᠡᠨ | ᠮᠠᠲ᠋ᠧᠷᠢᠶᠠᠯ︾ ︵ᠨᠢᠭᠡᠳᠦᠭᠡᠷ ᠡᠮᠬᠢᠳᠬᠡᠯ︶᠂ ︽ᠠᠯᠠᠱᠠ ᠶᠢᠨ ᠠᠶᠢᠮᠠᠭ ᠬᠤᠰᠢᠭᠤᠨ ᠤ ᠤᠯᠤᠰ ᠲᠦᠷᠦ ᠶᠢᠨ | ᠵᠥᠪᠯᠡᠯᠭᠡᠨ ᠤ ᠭᠡᠰᠢᠭᠦᠳ ᠤᠨ ᠢᠷᠠᠭᠤ ᠠᠯᠳᠠᠷ︾ ︵1999 ᠣᠨ︶᠂ ︽ᠢᠷᠠᠭᠤ ᠴᠡᠭᠡᠯᠬᠡᠨ ᠨᠠᠰᠤ︾᠂ ︽ | ᠠᠯᠠᠱᠠ ᠯᠾᠠᠷᠠᠮᠪᠠ ᠠᠭᠸᠠᠩᠳᠠᠨᠳᠠᠷ ᠤᠨ ᠰᠤᠳᠤᠯᠭᠠᠨ ᠤ ᠴᠢᠭᠤᠯᠭᠠᠨ︾ ︵1 - 6 ᠡᠮᠬᠢᠳᠬᠡᠯ︶᠂ ︽ᠲᠡᠦᠬᠡᠨ | ᠠᠯᠳᠠᠷᠲᠠᠳ ᠬᠢᠭᠡᠳ ᠠᠯᠠᠱᠠ︾᠂ ︽ᠶᠡᠭᠡ ᠭᠤᠪᠢ ᠶᠢᠨ ᠲᠡᠦᠬᠡᠨ ᠲᠡᠮᠳᠡᠭᠯᠡᠯ︾᠂ ︽ᠼᠠᠩᠶᠠᠩᠵᠠᠮᠰᠤ ᠶᠢᠨ | ᠰᠣᠩᠭᠤᠯᠲᠠ ᠠᠯᠠᠱᠠ︾᠂ ︽ᠨᠡᠷᠡᠲᠦ ᠪᠠᠯᠭᠠᠰᠤ ᠬᠤᠯᠠᠳᠠᠭᠢᠨ ᠢ ᠲᠣᠭᠲᠠᠭᠠᠭᠴᠢ ᠬᠤᠷᠢᠶᠠ︾ ᠵᠡᠷᠭᠡ ᠨᠠᠶᠠ ᠭᠠᠷᠤᠢ | ᠮᠣᠩᠭᠤᠯ ᠬᠢᠲᠠᠳ ᠬᠡᠯᠡᠨ ᠤ ᠨᠣᠮ ᠰᠤᠳᠤᠷ ᠢ ᠬᠡᠪᠯᠡᠭᠦᠯᠵᠡᠢ᠃ ᠡᠨᠡ ᠬᠤᠭᠤᠴᠠᠭᠠᠨ ᠳᠤ ᠪᠠᠰᠠ ᠠᠯᠠᠱᠠ ᠳᠠᠬᠢ | ᠲᠡᠦᠬᠡᠲᠦ ᠬᠥᠮᠥᠰ ᠤᠨ ᠲᠤᠬᠠᠢ ᠠᠩᠬᠠᠷᠤᠨ᠂ ᠨᠡᠩ ᠢᠯᠠᠩᠭᠤᠶᠠ ᠠᠭᠸᠠᠩᠳᠠᠨᠳᠠᠷ ᠤᠨ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠢ | ᠦᠷᠭᠦᠯᠵᠢᠯᠡᠨ ᠴᠤᠭᠯᠠᠭᠤᠯᠤᠨ ᠡᠮᠬᠢᠳᠬᠡᠵᠦ᠂ ᠲᠡᠭᠦᠨ ᠢᠶᠠᠨ ᠲᠥᠪᠡᠳ ᠬᠡᠯᠡᠨ ᠠᠴᠠ ᠮᠣᠩᠭᠤᠯᠴᠢᠯᠠᠬᠤ ᠠᠵᠢᠯ ᠢ | ᠭᠠᠷᠳᠠᠵᠤ᠂ 2014 ᠣᠨ ᠳᠤ ᠵᠢᠷᠭᠤᠭᠠᠨ ᠪᠣᠳᠢ ᠳᠤ ᠪᠠᠭᠲᠠᠭᠠᠭᠰᠠᠨ ︽ᠠᠯᠠᠱᠠ ᠯᠾᠠᠷᠠᠮᠪᠠ ᠠᠭᠸᠠᠩᠳᠠᠨᠳᠠᠷ ᠤᠨ | ᠵᠣᠬᠢᠶᠠᠯ ᠤᠨ ᠴᠢᠭᠤᠯᠭᠠᠨ︾ ᠬᠡᠮᠡᠬᠦ ᠨᠣᠮ ᠢ ᠬᠡᠪᠯᠡᠭᠦᠯᠦᠨ ᠲᠠᠷᠬᠠᠭᠠᠪᠠ᠃ ᠡᠨᠡ ᠨᠢ ᠤᠯᠤᠰ ᠤᠨ ᠳᠣᠲᠣᠭᠠᠳᠤ | ᠭᠠᠳᠠᠭᠠᠳᠤ ᠳᠤ ᠠᠯᠠᠱᠠ ᠯᠾᠠᠷᠠᠮᠪᠠ ᠠᠭᠸᠠᠩᠳᠠᠨᠳᠠᠷ ᠤᠨ ᠲᠤᠬᠠᠢ ᠪᠢᠴᠢᠭᠰᠡᠨ ᠠᠩᠬᠠᠳᠠᠭᠴᠢ ᠨᠣᠮ ᠵᠣᠬᠢᠶᠠᠯ ᠪᠠᠶᠢᠵᠤ᠂ | ᠰᠤᠳᠤᠯᠭᠠᠴᠢᠳ ᠤᠨ ᠠᠩᠬᠠᠷᠤᠯ ᠢ ᠶᠡᠬᠡᠳᠡ ᠲᠠᠲᠠᠭᠰᠠᠨ ᠪᠠᠶᠢᠨᠠ᠃ ᠥᠨᠥ ᠪᠤᠯᠬᠤ ᠳᠤ ᠤᠯᠤᠰ ᠤᠨ ᠳᠣᠲᠣᠨᠠ | ᠭᠠᠳᠠᠨᠠ ᠶᠢᠨ ᠮᠠᠭᠢᠰᠲᠷ ᠪᠠ ᠳ᠋ᠣᠺᠲ᠋ᠣᠷᠠᠨᠲ ᠨᠠᠷ ᠠᠭᠸᠠᠩᠳᠠᠨᠳᠠᠷ ᠤᠨ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠢᠶᠠᠷ ᠴᠣᠯᠠ ᠬᠠᠮᠠᠭᠠᠯᠠᠬᠤ | ᠶᠠᠪᠤᠳᠠᠯ ᠮᠠᠰᠢ ᠣᠯᠠᠨ ᠪᠣᠯᠵᠤ᠂ ᠨᠠᠮᠠᠶᠢ ᠡᠷᠢᠵᠦ ᠰᠣᠷᠪᠤᠯᠵᠢᠯᠠᠭᠠ ᠬᠢᠵᠦ ᠪᠠᠶᠢᠭᠠ ᠠᠰᠫᠢᠷᠠᠨᠲ ᠳ᠋ᠣᠺᠲ᠋ᠣᠷᠠᠨᠲ ᠬᠤᠷᠢ | ᠭᠠᠷᠤᠢ ᠪᠤᠢ᠃ ᠡᠭᠦᠨ ᠢ ᠬᠠᠷᠠᠭᠠᠳ ᠪᠢ᠂ ︽ᠮᠢᠨᠤ ᠳᠥᠴᠢ ᠭᠠᠷᠤᠢ ᠵᠢᠯ ᠤᠨ ᠴᠢᠷᠮᠠᠶᠢᠯᠭᠠ ᠲᠠᠯᠠᠭᠠᠷ ᠪᠤᠰᠤ᠂ | ᠨᠡᠶᠢᠭᠡᠮ ᠨᠡᠶᠢᠳᠡ ᠳᠤ ᠬᠡᠷᠡᠭᠴᠡᠭᠡ ᠲᠠᠢ ᠯᠡ ᠶᠤᠮ ᠪᠠᠶᠢᠨᠠ︾ ᠭᠡᠵᠦ ᠪᠠᠶᠠᠰᠴᠤ ᠶᠠᠪᠤᠳᠠᠭ ᠪᠢᠯᠡ᠃ | ᠴᠠᠭᠠᠨ ᠮᠥᠷ ᠤᠨ ᠶᠠᠪᠤᠳᠠᠯ ᠳᠤ ᠶᠡᠷᠦᠨᠢ ᠰᠠᠶᠢᠨ ᠬᠥᠮᠥᠨ ᠲᠠᠭᠠᠷᠠᠭᠠᠳ ᠯᠠ ᠪᠠᠶᠢᠭᠰᠠᠨ᠂ ᠵᠢᠱᠢᠶᠡᠯᠡᠪᠡᠯ᠂ | ᡂᠢ ᠸᠠᠨ ᠵᠧᠨ ᠨᠠᠮᠠᠶᠢ ᠥᠭᠡᠳᠡ ᠲᠠᠲᠠᠬᠤ ᠭᠡᠰᠡᠨ ᠰᠠᠨᠠᠭᠠ᠂ ᠪᠠᠶᠠᠨᠳᠠᠯᠠᠢ ︵ᠬᠠᠨ ᠰᠢᠤᠸᠠᠢ ᠱᠸᠡᠭ︶ ᠨᠠᠮᠠᠶᠢ ᠡᠷᠳᠡᠮ | ᠮᠡᠳᠡᠯᠭᠡ ᠲᠠᠢ ᠬᠥᠮᠥᠨ ᠪᠤᠯᠭᠠᠬᠤ ᠭᠡᠵᠦ ᠵᠣᠷᠢᠭᠵᠢᠭᠤᠯᠤᠭᠰᠠᠨ᠂ ᠨᠠᠩᠰᠠᠯᠮᠠ ᠠᠨᠢᠶᠠ ᠨᠠᠮᠠᠶᠢ ᠨᠣᠮ ᠤᠨ | ᠬᠥᠮᠥᠷᠭᠡ ᠳᠡᠭᠡᠨ ᠣᠨᠢᠰᠤᠯᠠᠨ ᠨᠣᠮ ᠤᠩᠰᠢᠭᠤᠯᠵᠤ ᠪᠠᠶᠢᠭᠰᠠᠨ ᠨᠢ ᠨᠣᠮ ᠰᠤᠳᠤᠷ ᠤᠨ ᠰᠠᠷᠠᠭᠤᠯ ᠡᠭᠦᠳᠡ ᠤᠷᠤᠭᠤ | ᠬᠥᠲᠥᠯᠵᠦ ᠪᠠᠶᠢᠭᠰᠠᠨ ᠶᠠᠪᠤᠳᠠᠯ᠂ ᠬᠤᠣ ᠰᠦ᠋ ᠮᠢᠨ ᠫᠷᠤᠹᠧᠰᠰᠤᠷ ᠨᠠᠮᠠᠶᠢ ᠡᠷᠳᠡᠮ ᠤᠨ ᠳᠠᠯᠠᠢ ᠥᠭᠡᠳᠡ ᠲᠠᠲᠠᠭᠰᠠᠨ᠂ | ᠴᠡᠳᠡᠡ ᠱᠠᠪᠷᠤᠩ᠂ ᠳ᠋ᠣᠷᠰᠢ᠂ ᠠᠭᠸᠠᠩᠴᠣᠶᠢᠳᠠᠷ ᠵᠡᠷᠭᠡ ᠭᠤᠷᠪᠠᠨ ᠫᠷᠤᠹᠧᠰᠰᠤᠷ ᠨᠠᠳᠠᠳᠤ ᠠᠭᠸᠠᠩᠳᠠᠨᠳᠠᠷ | ᠰᠤᠳᠤᠯᠤᠯ ᠤᠨ ᠵᠠᠮ ᠢ ᠵᠢᠭᠠᠭᠰᠠᠨ ᠵᠡᠷᠭᠡ ᠪᠤᠯᠬᠤ ᠶᠤᠮ᠃ ᠬᠤᠵᠢᠮ ᠨᠢ ᠠᠵᠢᠯ ᠳᠤ ᠭᠠᠷᠤᠭᠰᠠᠨ ᠤ ᠳᠠᠷᠠᠭᠠ᠂ | ᠪᠦᠭᠡ ᠲᠡᠷᠢᠭᠦᠯᠡᠭᠴᠢ ᠪᠣᠯᠣᠨ ᠶᠣᠨᠳᠣᠨ ᠨᠠᠷᠢᠨ ᠪᠢᠴᠢᠭ ᠤᠨ ᠳᠠᠷᠤᠭᠠ ᠨᠠᠮᠠᠶᠢ ᠠᠯᠠᠱᠠ ᠠᠶᠢᠮᠠᠭ ᠤᠨ ᠤᠯᠤᠰ | ᠲᠦᠷᠦ ᠶᠢᠨ ᠵᠥᠪᠯᠡᠯᠭᠡᠨ ᠤ ᠰᠣᠶᠣᠯ ᠲᠡᠦᠬᠡ ᠶᠢᠨ ᠮᠠᠲ᠋ᠧᠷᠢᠶᠠᠯ ᠤᠨ ᠠᠯᠪᠠᠨ ᠭᠡᠷ ᠲᠤ ᠰᠣᠩᠭᠤᠨ ᠰᠢᠯᠵᠢᠭᠦᠯᠵᠦ | ᠢᠷᠡᠭᠦᠯᠦᠭᠡᠳ᠂ ᠰᠣᠶᠣᠯ ᠲᠡᠦᠬᠡ ᠶᠢᠨ ᠲᠤᠰᠬᠠᠢ ᠠᠵᠢᠯ ᠳᠤ ᠲᠣᠬᠢᠷᠠᠭᠤᠯᠤᠭᠰᠠᠨ ᠶᠠᠪᠤᠳᠠᠯ ᠨᠢ ᠣᠷᠣᠨ ᠨᠤᠲᠤᠭ ᠤᠨ | ᠰᠣᠶᠣᠯ ᠲᠡᠦᠬᠡ ᠶᠢᠨ ᠦᠢᠯᠡᠰ ᠲᠤ ᠬᠦᠴᠦ ᠪᠠᠨ ᠡᠷᠭᠦᠨ᠂ ᠣᠯᠠᠨ ᠨᠣᠮ ᠰᠤᠳᠤᠷ ᠢ ᠬᠡᠪᠯᠡᠭᠦᠯᠬᠦ ᠤᠷᠮᠠ ᠵᠣᠷᠢᠭ ᠢ | ᠬᠥᠪᠴᠢᠯᠡᠵᠦ᠂ ᠦᠨᠳᠦᠰᠦ ᠰᠠᠭᠤᠷᠢ ᠨᠢ ᠪᠣᠯᠤᠭᠰᠠᠨ ᠭᠡᠵᠦ ᠪᠤᠳᠤᠳᠠᠭ ᠪᠥᠭᠡᠳ ᠪᠠᠭᠰᠢ ᠳᠠᠷᠤᠭᠠ ᠨᠠᠷ ᠢᠶᠠᠨ | ᠬᠡᠵᠢᠶᠡᠳᠡ ᠰᠠᠨᠠᠵᠤ ᠳᠤᠷᠠᠰᠴᠤ ᠶᠠᠪᠤᠳᠠᠭ ᠪᠢᠯᠡ᠃ | ᠣᠳᠤ ᠪᠢ ᠬᠡᠳᠦᠶᠢᠪᠡᠷ ᠨᠢᠭᠡᠨᠲᠡ ᠲᠡᠳᠬᠦᠪᠦᠷᠢ ᠳᠤ ᠭᠠᠷᠤᠭᠰᠠᠨ ᠪᠤᠯᠪᠠᠴᠤ ᠥᠪᠥᠷ ᠮᠣᠩᠭᠤᠯ ᠤᠨ | ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠰᠣᠶᠣᠯ ᠲᠡᠦᠬᠡ ᠰᠤᠳᠤᠯᠬᠤ ᠣᠷᠳᠣᠨ ᠤ ᠰᠠᠩᠴᠢ ᠭᠡᠰᠢᠭᠦᠨ ᠤ ᠬᠤᠪᠢ ᠳᠤ᠂ | ᠦᠷᠭᠦᠯᠵᠢᠯᠡᠨ ᠨᠤᠲᠤᠭ ᠣᠷᠣᠨ ᠤ ᠪᠠᠨ ᠰᠣᠶᠣᠯ ᠲᠡᠦᠬᠡ ᠶᠢᠨ ᠦᠢᠯᠡᠰ ᠲᠤ ᠪᠦᠭᠦ ᠬᠦᠴᠦ ᠪᠠᠷ ᠢᠶᠠᠨ ᠴᠢᠷᠮᠠᠶᠢᠵᠤ᠂ | ᠨᠡᠩ ᠣᠯᠠᠨ ᠨᠣᠮ ᠰᠤᠳᠤᠷ ᠢ ᠪᠢᠴᠢᠨ ᠦᠯᠡᠳᠡᠭᠡᠬᠦ ᠪᠠᠷ ᠵᠣᠷᠢᠵᠤ ᠶᠠᠪᠤᠨᠠ᠃ | |