ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
﹇ᠤᠷᠠᠨ ᠵᠣᠬᠢᠶᠠᠯ﹈ ᠪᠢᠳᠠᠨ ᠤ ᠠᠭᠤᠯᠵᠠᠯᠲᠠ ᠠᠯᠠᠭ ᠠᠭᠤᠯᠠ ᠶᠢᠨ ᠡᠪᠦᠷ ᠠᠯᠳᠠᠨ ᠲᠣᠣᠷᠠᠢ ᠶᠢᠨ ᠤᠢ ᠳᠤ ᠪᠣᠯᠤᠭᠰᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/3/26
                         ᠳᠠᠭᠤᠳᠠᠭᠠᠴᠢ ᠡ᠊ᠩᠭᠡᠨᠬᠳᠠ                                  - ᠠᠯᠠᠱᠠ᠂ ᠰᠢᠯᠢ ᠶᠢᠨ ᠭᠤᠣᠯ ᠬᠤᠶᠠᠷ ᠨᠤᠲᠤᠭ ᠤᠨ  ᠵᠣᠬᠢᠶᠠᠯᠴᠢᠳ ᠤᠨ ᠪᠢᠯᠢᠭ ᠤᠨ ᠴᠢᠭᠤᠯᠭᠠᠨ ᠤ ᠲᠠᠲᠠᠯᠠᠭ᠎ᠠ          ᠠᠳᠤᠭᠤᠳ ᠨᠢ ᠭᠦᠷᠳᠡᠯ᠎ᠡ ᠲᠡᠭᠷᠢ ᠳᠤ ᠪᠡᠯᠴᠢᠳᠡᠭ          ᠠᠯᠲᠠᠢ ᠶᠢᠨ ᠳᠡᠭᠦᠦ ᠠᠭᠤᠯᠠ ᠬᠡᠮᠡᠭᠳᠡᠭᠰᠡᠨ          ᠠᠯᠠᠭ ᠠᠭᠤᠯᠠ ᠶᠢᠨ ᠡᠪᠦᠷ          ᠠᠯᠳᠠᠨ ᠨᠠᠪᠴᠢᠰ ᠨᠢ ᠨᠢᠰᠦᠯᠳᠦᠭᠡᠳ          ᠰᠢᠯᠦᠭ ᠪᠦᠲᠦᠳᠡᠭ ᠲᠣᠣᠷᠠᠢ          ᠠᠶᠠᠷᠯᠠᠨ ᠠᠶᠠᠷᠯᠠᠨ ᠰᠠᠯᠬᠤ ᠳᠤ          ᠦᠳᠡᠵᠦ ᠤᠷᠤᠰᠤᠭᠰᠠᠨ ᠡᠵᠡᠨ᠎ᠡ ᠭᠤᠣᠯ ᠮᠢᠨᠤ᠁          ᠡᠨᠡ ᠬᠡᠷᠡᠯᠳᠦ ᠮᠥᠷ ᠪᠠᠳᠠᠭ ᠪᠣᠯ ᠰᠢᠯᠢ ᠶᠢᠨ ᠭᠤᠣᠯ ᠠᠶᠢᠮᠠᠭ ᠤᠨ ᠰᠥᠨᠢᠳ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠵᠠᠯᠠᠭᠤ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠪᠠᠲᠤᠴᠡᠩᠭᠡᠯ ᠤᠨ ᠠᠯᠠᠱᠠ ᠠᠴᠠ ᠠᠶᠠᠷᠯᠠᠨ ᠰᠠᠯᠬᠤ ᠦᠶ᠎ᠡ ᠳᠡᠭᠡᠨ ︽ᠲᠠ ᠨᠠᠷ ᠲᠠᠢ ᠪᠠᠨ ᠬᠡᠳᠦᠨ ᠡᠳᠦᠷ ᠤᠨ ᠲᠤᠷᠰᠢ ᠬᠠᠮᠲᠤ ᠪᠠᠶᠢᠯᠴᠠᠵᠤ᠂ ᠡᠨᠡ ᠨᠤᠲᠤᠭ ᠤᠨ ᠬᠠᠯᠠᠭᠤᠨ ᠰᠢᠷᠣᠢ᠂ ᠬᠠᠯᠠᠭᠤᠮᠰᠤᠭ ᠰᠡᠳᠬᠢᠯ ᠳᠤ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠬᠤᠷᠭᠤᠳᠠᠨᠠᠮ ᠪᠢᠯᠡ ᠠ᠋ ᠁ ᠪᠢᠳᠠᠨ ᠤ ᠠᠶᠠᠯᠠᠯ ᠦᠨᠡᠬᠡᠷ ᠯᠡ ᠡᠨᠡ ᠬᠥᠯᠭᠡᠨ ᠶᠡᠭᠡ ᠠᠯᠠᠱᠠ ᠨᠤᠲᠤᠭ ᠤᠨ ᠨᠣᠮ ᠤᠨ ᠭᠡᠭᠡᠨ ᠳᠤ ᠪᠠᠭᠲᠠᠵᠤ᠂ ᠡᠨᠡ ᠰᠠᠶᠢᠬᠠᠨ ᠠᠭᠤᠵᠢᠮ ᠨᠤᠲᠤᠭ ᠠᠴᠠ ᠪᠠᠰᠠ ᠨᠣᠮ ᠤᠨ ᠭᠡᠭᠡ ᠲᠠᠲᠠᠭᠤᠯᠵᠤ᠂ ᠨᠤᠲᠤᠭ ᠤᠨ ᠵᠠᠮ ᠢᠶᠠᠨ ᠡᠯᠭᠦᠯ᠎ᠡ ᠁︾ ᠭᠡᠰᠡᠨ ᠪᠠᠶᠠᠷ ᠳᠣᠭᠳᠣᠯᠤᠯ ᠤᠨ ᠬᠢᠨᠢ ᠢᠯᠡᠷᠬᠡᠶᠢᠯᠡᠯ ᠠᠪᠠᠢ᠃ ᠡ᠊ᠨᠳᠠ ᠶᠠᠷᠢᠵᠤ ᠪᠠᠶᠢᠭ᠎ᠠ ︽ᠲᠠ ᠨᠠᠷ︾ ᠭᠡᠳᠡᠭ ᠨᠢ ᠰᠢᠯᠢ ᠶᠢᠨ ᠭᠤᠣᠯ ᠠᠶᠢᠮᠠᠭ ᠤᠨ ᠢᠶᠠᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠢ ᠲᠥᠯᠥᠭᠡᠯᠡᠨ ᠰᠥᠨᠢᠳ ᠵᠡᠭᠦᠨ ᠬᠤᠰᠢᠭᠤ᠂ ᠰᠥᠨᠢᠳ ᠪᠠᠷᠠᠭᠤᠨ ᠬᠤᠰᠢᠭᠤ᠂ ᠬᠥᠪᠡᠭᠡᠲᠦ ᠰᠢᠷ᠎ᠠ ᠬᠤᠰᠢᠭᠤᠨ ᠤ ᠵᠣᠩᠬᠢᠯᠠᠬᠤ ᠮᠠᠯᠴᠢᠨ ᠵᠣᠬᠢᠶᠠᠯᠴᠢᠳ ᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠵᠣᠬᠢᠶᠠᠯᠴᠢᠳ ᠤᠨ ᠭᠠᠯ ᠠᠶᠠᠨ ᠥᠩ ᠥᠷᠭᠡᠨ ᠠᠯᠠᠱᠠ ᠳᠤ ᠬᠦᠷᠦᠯᠴᠡᠨ ᠢᠷᠡᠵᠤ᠂ ᠡᠨᠡ ᠨᠤᠲᠤᠭ ᠤᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠲᠠᠢ ᠬᠠᠮᠲᠤ ᠥᠷᠭᠡᠨ ᠭᠤᠪᠢ᠂ ᠥᠨᠳᠥᠷ ᠠᠭᠤᠯᠠ᠂ ᠲᠣᠣᠷᠠᠢ ᠶᠢᠨ ᠤᠢ᠂ ᠲᠣᠷᠭᠠᠨ ᠡᠯᠡᠰᠦ ᠶᠢ ᠲᠤᠭᠤᠯᠵᠤ᠂ ᠰᠢᠯᠦᠭ ᠨᠠᠶᠢᠷᠠᠭ ᠢᠶᠠᠨ ᠬᠡᠯᠡᠵᠦ᠂ ᠳᠠᠭᠤᠤ ᠬᠤᠭᠤᠷ ᠢᠶᠠᠨ ᠬᠥᠭᠯᠡᠵᠦ ᠰᠡᠳᠬᠢᠯ ᠤᠨ ᠪᠠᠷᠢᠯᠳᠤᠯᠭ᠎ᠠ ᠲᠠᠢ ᠪᠣᠯᠤᠭᠰᠠᠨ ᠬᠥᠮᠥᠰ ᠢ ᠯᠡ ᠬᠡᠯᠡᠵᠦ ᠪᠤᠢ᠃ ᠡ᠊ᠨᠳᠠ ᠥᠭᠦᠯᠡᠵᠦ ᠪᠠᠶᠢᠭ᠎ᠠ ︽ᠨᠣᠮ ᠤᠨ ᠭᠡᠭᠡ︾ ᠭᠡᠳᠡᠭ ᠨᠢ ᠡᠨᠡ ᠬᠦ ᠪᠢᠯᠢᠭ ᠤᠨ ᠴᠢᠭᠤᠯᠭᠠᠨ ᠤ ᠭᠠᠯ ᠠᠶᠠᠨ ᠤ ᠬᠢᠨ ᠠᠯᠳᠠᠨ ᠳᠡᠯᠡᠬᠡᠢ ᠳᠤ ᠠᠯᠳᠠᠷᠲᠠᠢ ᠠᠭᠸᠠᠩᠳᠠᠨᠳᠠᠷ ᠤᠨ ᠨᠤᠲᠤᠭ ᠢᠶᠠᠷ ᠠᠶᠠᠯᠠᠭᠰᠠᠨ ᠶᠠᠪᠤᠳᠠᠯ ᠨᠢ ᠡᠭᠡᠭᠡ ᠯᠡ ᠨᠣᠮ ᠤᠨ ᠬᠦᠷᠳᠦ ᠡᠷᠭᠢᠭᠦᠯᠬᠦ  ᠯᠦᠭᠡ ᠠᠳᠠᠯᠢ ᠪᠣᠯᠵᠤ᠂ ᠨᠣᠮ ᠪᠦᠲᠦᠭᠡᠵᠦ ᠶᠠᠪᠤᠳᠠᠭ ᠨᠢᠭᠡ ᠪᠦᠯᠦᠭ ︽ᠴᠠᠭᠠᠨ ᠰᠣᠯᠢᠶᠠᠲᠠᠢ︾ ᠬᠥᠮᠥᠰ ᠤᠨ ᠣᠩᠭᠤᠳ ᠢᠶᠠᠨ ᠳᠠᠭᠤᠳᠠᠨ᠂ ᠤᠳᠤᠮᠲᠤ  ᠬᠡᠯᠡᠨ ᠤ ᠪᠠᠨ ᠭᠡᠭᠡᠨ ᠳᠤ ᠪᠠᠭᠲᠠᠯᠴᠠᠵᠤ ᠶᠠᠪᠤᠭᠰᠠᠨ ᠢ ᠶᠠᠷᠢᠵᠤ ᠪᠠᠶᠢᠭ᠎ᠠ ᠶᠤᠮᠰᠠᠨ᠃          ᠨᠣᠮ ᠤᠨ ᠭᠡᠭᠡᠨ ᠳᠤ ᠪᠠᠭᠲᠠᠯᠴᠠᠵᠤ ᠶᠠᠪᠤᠭᠰᠠᠨ ᠨᠤᠲᠤᠭ ᠨᠤᠲᠤᠭ ᠤᠨ ᠵᠣᠬᠢᠶᠠᠯᠴᠢᠳ          ᠬᠡᠳᠦᠢ ᠴᠤ ᠤᠳᠠᠭᠠᠨ ᠣᠨ ᠡᠶᠢᠮᠦ ᠠᠶᠠᠨ ᠤ ᠭᠠᠯ ᠤᠨ ᠬᠢᠨ ᠲᠠᠢ ᠬᠠᠮᠲᠤ ᠪᠠᠶᠢᠭᠠᠯᠢ ᠳᠡᠯᠡᠬᠡᠢ ᠪᠠᠷ ᠷᠠᠰᠢᠶᠠᠯᠠᠨ ᠶᠠᠪᠤᠵᠤ᠂ ᠪᠤᠳᠤᠬᠰᠠᠨ ᠰᠠᠨᠠᠭᠰᠠᠨ ᠢᠶᠠᠨ ᠨᠢᠭᠤᠯ ᠦᠭᠡᠢ ᠬᠤᠪᠢᠶᠠᠯᠴᠠᠵᠤ᠂ ᠪᠠᠳᠠᠭ ᠰᠢᠯᠦᠭ ᠢᠶᠠᠨ ᠤᠷᠤᠯᠳᠤᠨ ᠤᠩᠰᠢᠵᠤ᠂ ᠪᠠᠶᠠᠷ ᠢᠨᠢᠶᠡᠳᠦ ᠬᠤᠶᠠᠷ ᠢᠶᠠᠨ ᠠᠰᠬᠠᠵᠤ ᠶᠠᠪᠤᠭ᠎ᠠ ᠦᠭᠡᠢ ᠰᠠᠨ ᠪᠣᠯ⁈          ᠥᠩ ᠥᠷᠭᠡᠨ ᠠᠯᠠᠱᠠ ᠨᠤᠲᠤᠭ ᠤᠨ ᠥᠨᠥ ᠵᠢᠯ ᠤᠨ ᠨᠠᠮᠤᠷ ᠭᠡᠭᠴᠢ ᠦᠨᠡᠬᠡᠷ  ᠲᠡᠨᠳᠡᠪ ᠤᠨ ᠫᠦᠷᠪᠦᠳᠣᠷᠵᠢ ᠶᠢᠨ ︽ᠤᠷᠳᠤ ᠨᠠᠮᠤᠷ︾ ᠰᠢᠭ᠋ ᠤᠷᠳᠤ ᠨᠠᠮᠤᠷ ᠪᠣᠯᠤᠭᠰᠠᠨ ᠳ᠋ᠠ᠃          ᠰᠢᠯᠢ ᠶᠢᠨ ᠭᠤᠣᠯ ᠤᠨ ᠠᠭᠤᠳᠠᠮ ᠲᠠᠯ᠎ᠠ ᠠᠴᠠ ᠲᠡᠳᠡ ᠨᠠᠷ ᠮᠠᠨᠢ ᠪᠦᠲᠦᠨ ᠨᠢᠭᠡ ᠡᠳᠦᠷ ᠤᠨ ᠵᠠᠮ ᠢ ᠡᠪᠬᠡᠨ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠠᠯᠳ᠋ᠬᠠᠤᠪᠤᠭ᠎ᠠ ᠪᠠᠯᠭᠠᠰᠤᠨ ᠳᠤ ᠬᠦᠷᠦᠯᠴᠡᠨ ᠢᠷᠡᠬᠦ ᠳᠤ  ᠭ᠊ ·  ᠮᠥᠩᠬᠡᠵᠢᠷᠭᠠᠯ ᠭᠤᠸᠠᠢ ᠰᠠᠮᠪᠠᠢ ᠬᠠᠳᠠᠭ᠂ ᠰᠠᠷᠬᠤᠳ ᠤᠨ ᠳᠡᠭᠡᠵᠢ ᠪᠠᠨ ᠡᠷᠭᠦᠨ ᠤᠭᠲᠤᠵᠤ ᠠᠪᠤᠭᠰᠠᠨ ᠶᠤᠮ᠃ ᠮᠠᠨ ᠤ ᠬᠥᠮᠥᠨ ᠨᠦᠭᠦᠭᠡ ︽ᠵᠥᠷᠢᠭᠦᠦ ᠡᠷᠭᠢ︾ ᠨᠣᠮ ᠤᠨ ᠥᠷᠭᠦᠭᠡᠨ ᠤ ᠪᠠᠨ ᠵᠢᠪᠠᠷ ᠢ ᠦᠷᠭᠦᠭᠡᠳᠡᠯ᠎ᠡ ᠨᠠᠶᠢᠷᠠᠭᠴᠢᠳ ᠤᠨ ᠨᠠᠶᠢᠷ ᠵᠣᠬᠢᠶᠠᠵᠤ᠂ ᠰᠢᠯᠦᠭ ᠤᠨ ᠰᠢᠳᠢ᠂ ᠰᠠᠷᠬᠤᠳ ᠤᠨ ᠬᠦᠴᠦᠨ ᠳᠤ ᠨᠠᠮ ᠴᠣᠬᠢᠭᠤᠯᠤᠭᠰᠠᠨ ᠴᠤ ᠲᠡᠪᠡᠷᠢ ᠪᠠᠭᠲᠠᠬᠤ ᠦᠭᠡᠢ ᠨᠣᠮ ᠤᠨ ᠪᠡᠯᠡᠭ ᠲᠤᠰᠴᠤ ᠪᠠᠶᠠᠷᠯᠠᠭᠰᠠᠨ ᠶᠤᠮ᠃ ᠪᠠᠯᠭᠠᠰᠤᠨ ᠤ ᠴᠠᠭᠠᠨ ᠪᠠᠶᠢᠰᠢᠩ ᠳᠠᠭᠠᠨ ᠰᠢᠯᠦᠭ ᠢᠶᠠᠨ ᠪᠢᠴᠢᠵᠦ ᠰᠠᠭᠤᠭ᠎ᠠ ᠮᠥᠩᠬᠡᠵᠢᠷᠭᠠᠯ ᠤᠨ ᠮᠠᠨᠢ  ᠪᠣᠷᠣ ᠦᠷᠭᠦᠭᠡ ᠰᠢᠯᠢ ᠶᠢᠨ ᠭᠤᠣᠯ ᠤᠨ ᠵᠣᠬᠢᠶᠠᠯᠴᠢᠳ ᠲᠤ ᠠᠷᠭ᠎ᠠ ᠦᠭᠡᠢ ᠳᠣᠲᠣᠨᠣ ᠰᠠᠨᠠᠭᠳᠠᠵᠤ᠂ ᠤᠤᠭᠤᠭᠠᠳ ᠰᠠᠭᠤᠮᠠᠷ ᠠᠯᠳ᠋ᠬᠠᠤᠪᠤᠭ᠎ᠠ᠂ ᠤᠴᠢᠷᠯᠠᠭᠠᠳ ᠰᠢᠯᠦᠭᠯᠡᠮᠡᠷ ᠠᠯᠠᠱᠠ ᠠᠬ᠎ᠠ ᠭᠡᠳ ᠬᠤᠷᠭᠤᠳᠠᠨ ᠬᠤᠷᠭᠤᠳᠠᠭᠰᠠᠭᠠᠷ ᠨᠠᠷᠠ ᠤᠨᠠᠬᠤ ᠶᠢᠨ ᠠᠯᠳᠠ ᠳᠤ ᠯᠡ ᠲᠠᠷᠠᠭᠠᠴᠢ ᠶᠢᠨ ᠦᠷᠳᠡᠭᠡ ᠪᠤᠯᠬᠤ ᠪᠠᠳᠠᠢ ᠶᠢᠨ ᠵᠢᠷᠠᠨ ᠪᠠᠯᠭᠠᠰᠤᠨ ᠳᠤ ᠬᠦᠷᠴᠦ ᠣᠴᠢᠭᠰᠠᠨ ᠶᠤᠮ᠃          ᠮᠠᠷᠭᠠᠰᠢ ᠨᠢ ᠬᠤᠶᠠᠷ ᠨᠤᠲᠤᠭ ᠤᠨ ᠵᠣᠬᠢᠶᠠᠯᠴᠢᠳ ᠤᠨ ᠠᠭᠤᠯᠵᠠᠯᠲᠠ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠤᠯᠤᠰ ᠲᠦᠷᠦ ᠶᠢᠨ ᠵᠥᠪᠯᠡᠯᠭᠡᠨ ᠤ ᠠᠭᠤᠳᠠᠮ ᠰᠠᠶᠢᠬᠠᠨ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠪᠣᠯᠵᠤ᠂ ᠠᠯᠠᠱᠠ ᠨᠤᠲᠤᠭ ᠠᠴᠠ ᠪᠠᠨ ᠰᠣᠶᠣᠯ ᠤᠨ ᠵᠢᠳᠬᠦᠯᠲᠡᠨ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠡ᠊ · ᠪᠣᠯᠣᠳ ᠪᠠᠶᠠᠷ ᠲᠠᠯᠠᠷᠬᠠᠯ ᠤᠨ ᠦᠭᠡ ᠬᠡᠯᠡᠵᠦ᠂ ᠪᠢ ᠪᠠᠷ ᠵᠣᠬᠢᠶᠠᠯᠴᠢᠳ ᠤᠨ ᠨᠡᠶᠢᠭᠡᠮᠯᠢᠭ᠂ᠤᠷᠠᠨ ᠪᠦᠲᠦᠭᠡᠯᠴᠢᠳ ᠢ ᠲᠥᠯᠥᠭᠡᠯᠡᠨ ᠠᠯᠠᠱᠠ ᠨᠤᠲᠤᠭ ᠤᠨ ᠵᠣᠬᠢᠶᠠᠯᠴᠢᠳ ᠵᠢᠴᠢ ᠵᠣᠬᠢᠶᠠᠨ ᠪᠦᠲᠦᠭᠡᠯᠭᠡ ᠶᠢᠨ ᠲᠠᠯ᠎ᠠ ᠪᠠᠷ ᠲᠠᠨᠢᠯᠴᠠᠭᠤᠯᠤᠨ᠂ ᠰᠢᠯᠢ ᠶᠢᠨ ᠭᠤᠣᠯ ᠤᠨ ᠭᠤᠷᠪᠠᠨ ᠬᠤᠰᠢᠭᠤᠨ ᠤ ᠤᠳᠬ᠎ᠠ ᠤᠷᠠᠯᠢᠭ ᠤᠨ ᠬᠢᠨ ᠤ ᠬᠤᠯᠪᠣᠭᠠᠨ ᠤ ᠭᠤᠷᠪᠠᠨ ᠰᠠᠶᠢᠠᠬᠠᠨ ᠪᠦᠰᠡᠭᠦᠢ ᠳᠠᠷᠤᠭ᠎ᠠ ᠨᠤᠲᠤᠭ ᠣᠷᠣᠨ ᠤ ᠪᠠᠨ ᠤᠷᠠᠨ ᠵᠣᠬᠢᠶᠠᠯ᠂ ᠤᠳᠬ᠎ᠠ ᠰᠣᠶᠣᠯ ᠤᠨ ᠲᠠᠯ᠎ᠠ ᠪᠠᠷ ᠥᠷᠭᠡᠨ ᠳᠠᠯᠠᠶᠢᠴᠠᠲᠠᠢ ᠲᠠᠨᠢᠯᠴᠠᠭᠤᠯᠵᠤ᠂ ᠰᠢᠯᠢ ᠶᠢᠨ ᠭᠤᠣᠯ᠂ ᠠᠯᠠᠱᠠ ᠨᠤᠲᠤᠭ ᠤᠨ ᠵᠣᠬᠢᠶᠠᠯᠴᠢᠳ ᠤᠨ ᠨᠥᠬᠦᠷᠯᠡᠯ ᠬᠠᠮᠲᠤᠷᠠᠯᠴᠠᠭ᠎ᠠ ᠶᠢ ᠠᠬᠢᠭᠤᠯᠤᠭᠰᠠᠨ ᠰᠠᠶᠢᠬᠠᠨ ᠠᠭᠤᠯᠵᠠᠯᠲᠠ ᠪᠣᠯᠤᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠵᠤᠷᠰᠢᠯ ᠶᠣᠰᠣᠭᠠᠷ ᠬᠠᠮᠲᠤ ᠶᠢᠨ ᠵᠢᠷᠤᠭ ᠲᠠᠲᠠᠵᠤ᠂ ᠰᠣᠷᠪᠤᠯᠵᠢᠯᠠᠭ᠎ᠠ ᠭᠥᠯᠢᠶᠡᠨ᠂ ᠰᠣᠶᠣᠯ ᠤᠨ ᠣᠷᠳᠣᠨ᠂ ᠦᠵᠡᠰᠭᠦᠯᠡᠩ ᠤᠨ ᠭᠠᠵᠠᠷ᠂ ᠮᠦᠽᠧᠢ ᠪᠠᠷ ᠲᠣᠭᠤᠷᠢᠵᠤ ᠪᠢᠯᠡ᠃ ᠭᠡᠲᠡᠯ᠎ᠡ ᠤᠷᠠᠨ ᠪᠦᠲᠦᠭᠡᠯᠴᠢ ᠪᠢᠳᠠᠨ ᠤ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠰᠡᠳᠬᠢᠯ ᠢ ᠬᠠᠮᠤᠭ ᠠᠴᠠ ᠢᠯᠡᠷᠬᠡᠶᠢᠯᠡᠵᠦ ᠴᠢᠳᠠᠳᠠᠭ ᠨᠢ ᠣᠨᠴᠠᠯᠠᠨ ᠵᠣᠬᠢᠶᠠᠯᠴᠢ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠠᠭᠤᠯᠵᠠᠯᠲᠠ ᠭᠡᠭᠴᠢ ᠨᠣᠮ ᠤᠨ ᠰᠠᠶᠢᠬᠠᠨ ᠪᠡᠯᠡᠭ ᠲᠤᠰᠬᠤ ᠶᠠᠪᠤᠳᠠᠯ ᠪᠦᠯᠦᠭᠡ᠃ ᠡᠨᠡ ᠤᠳᠠᠭ᠎ᠠ ᠰᠢᠯᠢ ᠶᠢᠨ ᠭᠤᠣᠯ ᠤᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠲᠡᠷᠮᠡᠨ ᠭᠡᠷ᠂ ᠲᠡᠮᠡᠭᠡᠨ ᠠᠴᠢᠶ᠎ᠠ ᠲᠠᠢ ᠠᠯᠠᠱᠠ ᠳᠤ ᠦᠨᠡᠬᠡᠷ ᠲᠡᠷᠭᠡ ᠪᠠᠷ ᠲᠡᠭᠡᠭᠡᠭᠰᠡᠨ ᠨᠣᠮ ᠤᠨ ᠪᠡᠯᠡᠭ ᠲᠠᠢ ᠢᠷᠡᠵᠡᠭᠡᠭᠰᠡᠨ ᠪᠠᠶᠢᠯ᠎ᠠ᠃ ᠪᠡᠯᠡᠭ ᠲᠤ ᠢᠷᠡᠭᠰᠡᠨ ᠲᠡᠳᠡᠭᠡᠷ ᠨᠣᠮ ᠤᠨ ᠳᠣᠲᠣᠷ᠎ᠠ ︽ᠳ᠋᠊ · ᠴᠠᠭᠠᠨ ᠤ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠤᠨ ᠴᠢᠭᠤᠯᠭᠠᠨ︾ ᠵᠢᠷᠭᠤᠭᠠᠨ ᠪᠣᠳᠢ᠂ ︽ᠴᠠᠬᠠᠷ ᠠᠷᠠᠳ ᠤᠨ ᠠᠮᠠᠨ ᠵᠣᠬᠢᠶᠠᠯ ᠤᠨ ᠴᠢᠭᠤᠯᠭᠠᠨ︾ ᠲᠠᠪᠤᠨ ᠪᠣᠳᠢ᠂ ︽ᠭᠢᠯᠦᠭᠡᠨ ᠰᠥᠨᠢᠳ ᠤᠯᠠᠮᠵᠢᠯᠠᠯᠲᠤ ᠰᠣᠶᠣᠯ ᠤᠨ ᠴᠤᠪᠤᠷᠠᠯ ᠪᠢᠴᠢᠭ ᠣᠷᠣᠰᠢᠪᠠᠢ︾ ᠠᠷᠪᠠᠨ ᠭᠤᠷᠪᠠᠨ ᠪᠣᠳᠢ᠂ ︽ᠬᠥᠪᠡᠭᠡᠲᠦ ᠰᠢᠷ᠎ᠠ ᠬᠤᠰᠢᠭᠤᠨ ᠤ ᠰᠤᠷᠭᠠᠨ ᠬᠥᠮᠦᠵᠢᠯ ᠤᠨ ᠣᠶᠢᠯᠠᠯᠭ᠎ᠠ︾ ᠬᠤᠶᠠᠷ ᠪᠣᠳᠢ ᠵᠡᠷᠭᠡ ᠬᠤᠪᠣᠷ ᠨᠠᠨᠳᠢᠨ ᠥᠪ ᠰᠣᠶᠣᠯ ᠤᠨ ᠣᠶᠢᠯᠠᠯᠭ᠎ᠠ ᠶᠢᠨ ᠪᠦᠲᠦᠭᠡᠯ ᠠᠴᠠ ᠭᠠᠳᠠᠨ᠎ᠠ ᠱᠠ᠊  ·  ᠪᠦᠭᠡ᠂ ᠰ᠊ · ᠲᠡᠮᠦᠷ ᠵᠡᠷᠭᠡ ᠰᠢᠨᠳᠠᠰᠤ ᠲᠠᠢ ᠵᠣᠬᠢᠶᠠᠯᠴᠢ ᠶᠢᠨ  ᠨᠣᠮ ᠲᠡᠭᠦᠪᠦᠷᠢ ᠪᠣᠯᠣᠨ ᠰᠥᠨᠢᠳ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠤᠯᠠᠭᠠᠨᠮᠥ᠋ᠴᠢᠷ ᠤᠨ ᠬᠢᠨ ᠤ ᠰᠢᠩᠭᠡᠬᠡᠨ ᠦᠢᠯᠡᠳᠦᠭᠰᠡᠨ ︽ᠲᠠᠬᠰᠢᠨ ᠣᠷᠣᠨ ᠲᠠᠮᠠᠴᠢ︾ ᠬᠡᠮᠡᠬᠦ ᠵᠣᠬᠢᠶᠠᠯ ᠤᠨ ᠳᠠᠭᠤᠤ ᠶᠢᠨ ᠴᠣᠮᠤᠭ᠂ 2024 ᠣᠨ ᠤ ︽ᠰᠢᠯᠢ ᠶᠢᠨ ᠭᠤᠣᠯ︾ ᠰᠡᠳᠬᠦᠯ ᠤᠨ ᠰᠢᠨ᠎ᠡ ᠳ᠋ᠤᠭᠠᠷ ᠵᠡᠷᠭᠡ ᠨᠢ ᠦᠨᠡᠬᠡᠷ ᠠᠯᠠᠭᠠᠨ ᠳᠡᠭᠡᠷ᠎ᠡ ᠪᠠᠨ ᠲᠠᠯᠪᠢᠭᠠᠳ ᠤᠩᠰᠢᠬᠤ ᠳᠤ ᠰᠡᠳᠬᠢᠯ ᠰᠡᠷᠭᠦᠮᠡᠷ᠂ ᠬᠤᠷᠭᠤᠨ ᠳᠠᠭᠠᠨ ᠲᠠᠯᠪᠢᠭᠠᠳ ᠬᠠᠷᠠᠬᠤ ᠳᠤ ᠭᠡᠷ ᠭᠡᠶᠢᠭᠦᠯᠦᠮᠡᠷ ᠬᠦᠨᠳᠦ ᠶᠢᠨ ᠵᠢᠩ ᠲᠠᠢ ᠪᠦᠲᠦᠭᠡᠯ ᠤᠳ ᠪᠠᠶᠢᠯ᠎ᠠ᠃ ᠨᠤᠲᠤᠭ ᠨᠤᠲᠤᠭ ᠤᠨ ᠬᠢᠨ ᠪᠢᠳᠠ ᠴᠣᠬᠤᠮ ᠬᠦ ᠴᠠᠭ ᠤᠨ ᠰᠠᠶᠢᠬᠠᠨ ᠳᠤ ᠠᠮᠵᠢᠭᠤᠯᠵᠤ ᠥᠪ ᠲᠠᠷᠬᠠᠨ ᠰᠣᠶᠣᠯ ᠢᠶᠠᠨ ᠦᠷ᠎ᠡ ᠬᠤᠶᠢᠴᠢᠰ ᠲᠠᠭᠠᠨ  ᠦᠯᠡᠳᠡᠭᠡᠬᠦ ᠬᠡᠮᠡᠨ ᠶᠡᠭᠡ ᠶᠢ ᠬᠢᠵᠦ ᠪᠦᠲᠦᠭᠡᠵᠦ ᠴᠢᠳᠠᠭᠰᠠᠨ ᠤ ᠬᠢᠨᠢ ᠠᠮᠢᠳᠤ ᠭᠡᠷᠡᠴᠢ ᠡᠨᠡ ᠪᠤᠶᠤ᠃ ᠨᠣᠮ ᠤᠨ ᠭᠡᠭᠡᠨ ᠳᠤ ᠪᠠᠭᠲᠠᠵᠤ ᠶᠠᠪᠤᠳᠠᠭ ᠦᠨᠳᠦᠰᠦᠲᠡᠨ ᠶᠠᠰᠤᠳᠠᠨ ᠤ ᠰᠡᠳᠬᠢᠯ ᠤᠨ ᠭᠠᠯ ᠬᠡᠵᠢᠶᠡᠳᠡ ᠤᠨᠲᠠᠷᠠᠬᠤ ᠶᠣᠰᠣ ᠦᠭᠡᠢ ᠠᠪᠠᠢ᠃          ᠪᠢᠯᠢᠭ ᠤᠨ ᠴᠢᠭᠤᠯᠭᠠᠨ ᠪ᠊ ᠭᠠᠯ ᠠᠶᠠᠨ ᠤ ᠬᠢᠨ ᠠᠯᠳᠠᠨ ᠣᠪᠣᠭ᠎ᠠ ᠳᠤ ᠨᠡᠭᠦᠳᠡᠯ ᠰᠠᠭᠤᠳᠠᠯ ᠲᠠᠢ ᠵᠣᠬᠢᠶᠠᠯᠴᠢ  ᠭ᠊ · ᠮᠥᠩᠬᠡᠵᠢᠷᠭᠠᠯ ᠤᠨ ᠬᠢ ᠪᠠᠷ ᠣᠴᠢᠬᠤ ᠳᠠᠭᠠᠨ ᠴᠤ᠂ ᠠᠯᠠᠭ ᠠᠭᠤᠯᠠ ᠠᠯᠳᠠᠨ ᠲᠠᠪᠰᠢ ᠶᠢᠨ ᠬᠤᠷᠮᠣᠢ ᠳᠤ ᠡᠪᠦᠯᠵᠢᠶ᠎ᠡ ᠬᠠᠪᠤᠷᠵᠢᠶ᠎ᠠ ᠲᠠᠢ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠵ᠊ · ᠰᠤᠳᠤᠨᠤᠮ ᠤᠨ ᠬᠢ ᠪᠠᠷ ᠠᠶᠢᠯᠴᠢᠯᠠᠨ ᠬᠦᠷᠬᠦ ᠳᠡᠭᠡᠨ ᠴᠤ᠂ ᠡᠵᠡᠨ᠎ᠡ ᠳᠠᠬᠢ ᠰᠣᠶᠣᠯ ᠨᠣᠮ ᠤᠨ ᠢᠰᠡᠭᠡᠢ ᠥᠷᠭᠦᠭᠡᠨ ᠤ ᠡᠵᠡᠨ ᠡᠷᠳᠡᠨᠢᠪᠠᠭᠠᠲᠤᠷ ᠤᠨ  ᠬᠢ ᠪᠠᠷ ᠠᠶᠢᠯᠴᠢᠯᠠᠬᠤ ᠳᠠᠭᠠᠨ ᠴᠤ ᠰᠤᠳᠤᠷ ᠤᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠰᠣᠳᠣᠨ ᠨᠣᠮ ᠤᠨ ᠳᠡᠭᠡᠵᠢ ᠪᠠᠨ ᠰᠠᠮᠪᠠᠢ ᠬᠠᠳᠠᠭ ᠳᠡᠭᠡᠷ᠎ᠡ ᠪᠠᠨ ᠲᠠᠯᠪᠢᠭᠠᠳ ᠯᠡ ᠲᠣᠯᠣᠭᠠᠢ ᠮᠡᠬᠦᠶᠢᠨ ᠪᠠᠷᠢᠵᠠᠭᠠᠵᠤ ᠪᠠᠶᠢᠯ᠎ᠠ᠃ ᠲᠡᠳᠡ ᠮᠠᠨᠢ ᠠᠯᠠᠱᠠ ᠳᠤ ᠪᠠᠶᠢᠬᠤ ᠬᠤᠭᠤᠴᠠᠭᠠᠨ ᠳᠠᠭᠠᠨ ᠦᠨᠡᠬᠡᠷ ᠠᠭᠤᠯᠵᠠᠵᠤ ᠲᠠᠨᠢᠯᠴᠠᠭᠰᠠᠨ ᠤᠷᠠᠨ ᠪᠦᠲᠦᠭᠡᠯᠴᠢ ᠪᠣᠯᠭᠠᠨ ᠤ ᠭᠠᠷ ᠢ ᠴᠠᠶᠢᠯᠭᠠᠵᠤ᠂ ᠲᠡᠷᠡ ᠬᠤᠯᠠ ᠲᠡᠭᠷᠢ ᠶᠢᠨ ᠬᠠᠶᠠᠭᠠᠨ ᠳᠠᠬᠢ ᠰᠢᠯᠢ ᠶᠢᠨ ᠭᠤᠣᠯ ᠤᠨ ᠲᠠᠯ᠎ᠠ ᠠᠴᠠ ᠡᠭᠦᠷᠴᠦ ᠢᠷᠡᠭᠰᠡᠨ ᠲᠡᠪᠡᠷᠢ ᠲᠡᠪᠡᠷᠢ ᠨᠣᠮ ᠢᠶᠠᠨ ᠪᠡᠯᠡᠭᠯᠡᠨ᠎ᠡ᠃ ᠪᠦᠲᠦᠭᠡᠭᠰᠡᠨ ᠨᠣᠮ ᠢᠶᠠᠷ ᠢᠶᠠᠨ ᠪᠤᠶᠠᠨ ᠲᠦᠭᠡᠭᠡᠵᠦ ᠶᠠᠪᠤᠭ᠎ᠠ ᠪᠤᠷᠬᠠᠨ ᠰᠡᠳᠬᠢᠯ ᠲᠠᠢ ᠤᠯᠤᠰ ᠭᠡᠭᠴᠢ ᠠᠷᠭ᠎ᠠ ᠦᠭᠡᠢ ᠯᠡ ᠢᠰᠡᠭᠡᠢ ᠲᠤᠭᠤᠷᠭᠠᠲᠤ  ᠲᠦᠮᠡᠨ ᠠᠵᠤᠭᠤ᠃          ᠠᠯᠠᠱᠠᠴᠤᠳ ᠴᠤ ᠭᠡᠰᠡᠨ ᠠᠯᠤᠰ ᠬᠤᠯᠠ ᠠᠴᠠ ᠠᠶᠢᠯᠴᠢᠯᠠᠨ ᠢᠷᠡᠭᠰᠡᠨ ᠭᠡᠶᠢᠴᠢᠨ ᠵᠣᠴᠢᠨ ᠢᠶᠠᠨ ᠭᠠᠷ ᠬᠤᠭᠤᠰᠤᠨ ᠭᠠᠷᠭᠠᠬᠤ ᠦᠭᠡᠢ ᠬᠡᠮᠡᠨ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠰᠣᠶᠣᠯ ᠤᠨ ᠣᠷᠳᠣᠨ ᠤ ᠳᠠᠷᠤᠭ᠎ᠠ ᠬᠤᠩ ᠴᠢ ᠮᠠᠨᠢ ᠰᠣᠶᠣᠯ ᠤᠨ ᠣᠷᠳᠣᠨ ᠳᠠᠭᠠᠨ ᠠᠯᠳᠠᠨ ᠲᠡᠪᠰᠢ ᠠᠯᠠᠭ ᠠᠭᠤᠯᠠ ᠶᠢᠨ  ᠬᠤᠶᠠᠷ ᠵᠠᠯᠠᠭᠤ ᠢᠷᠠᠭᠤ ᠨᠠᠶᠢᠷᠠᠭᠴᠢ᠂ ᠨᠤᠲᠤᠭ ᠤᠨ ᠬᠤᠶᠠᠷ ᠳᠡᠭᠦᠦ ᠼᠡᠶ᠋ᠢᠩᠰᠠᠩ᠂ ᠠᠯᠲᠠᠨᠴᠢᠯᠠᠭᠤ ᠬᠤᠶᠠᠷ ᠤᠨ ᠰᠢᠨ᠎ᠡ ᠨᠣᠮ ᠤᠨ ᠨᠡᠭᠡᠭᠡᠯᠲᠡ ᠶᠢ ᠬᠢᠵᠦ᠂ ᠭᠠᠯ ᠠᠶᠠᠨ ᠤ ᠬᠢᠨ ᠤ ᠳ᠋ᠠᠯᠢᠩ ᠢ ᠳᠦᠭᠦᠷᠭᠡᠲᠡᠯ᠎ᠡ ᠨᠣᠮ ᠪᠡᠯᠡᠭᠯᠡᠭᠰᠡᠨ ᠪᠣᠯ ᠡᠵᠡᠨ᠎ᠡ ᠨᠤᠲᠤᠭ ᠤᠨ ᠡᠷᠳᠡᠨᠢᠪᠠᠭᠠᠲᠤᠷ ᠬᠤᠷᠠᠩᠳᠠ ᠶᠢᠨ ᠨᠣᠮ ᠤᠨ ᠥᠷᠭᠦᠭᠡᠨ ᠤ ᠨᠣᠮ ᠤᠨ ᠪᠡᠯᠡᠭ ᠨᠢ ᠪᠦᠷ ᠴᠤ ᠥᠩᠭᠡ ᠲᠠᠢ ᠬᠠᠷᠠᠭᠳᠠᠵᠤ᠂ ᠲᠡᠳᠡᠨ ᠢ ᠰᠢᠯᠢ ᠶᠢᠨ ᠭᠤᠣᠯ ᠤᠷᠤᠭᠤ ᠪᠠᠨ ᠮᠣᠷᠳᠠᠬᠤ ᠥᠷᠯᠥᠭᠡ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠰᠣᠶᠣᠯ ᠤᠨ ᠥᠪ ᠢ ᠬᠠᠮᠠᠭᠠᠯᠠᠬᠤ᠂ ᠤᠯᠠᠮᠵᠢᠯᠠᠬᠤ ᠲᠠᠯ᠎ᠠ ᠪᠠᠷ ᠦᠢᠭ᠎ᠠ ᠦᠭᠡᠢ ᠭᠦᠳᠡᠯᠮᠦᠷᠢ ᠭᠠᠷᠭᠠᠵᠤ ᠶᠠᠪᠤᠭᠰᠠᠨ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠨᠢᠭᠡᠳᠦᠮᠡᠯ ᠹᠷᠤᠨᠲ ᠤᠨ ᠬᠡᠯᠲᠡᠰ ᠤᠨ  ᠤᠤᠯ ᠤᠨ ᠳᠠᠷᠤᠭ᠎ᠠ ᠠᠯᠲᠠᠨᠴᠡᠴᠡᠭ ᠤᠨ ᠨᠣᠮ ᠤᠨ ᠥᠷᠭᠦᠭᠡᠨ ᠳᠤ ᠦᠪᠡᠳᠡᠭᠰᠢ ᠶᠡᠭᠡ ᠨᠣᠮ ᠤᠨ ᠴᠠᠶᠢᠯᠠᠯᠭ᠎ᠠ ᠪᠣᠯᠵᠤ᠂ ︽ᠮᠢᠨᠤ ᠡ᠊ᠨᠳᠠ ᠠᠴᠠ ᠲᠠ ᠨᠠᠷ ᠲᠣᠭᠤᠵᠤ ᠳᠤᠷᠠᠯᠠᠭᠰᠠᠨ ᠨᠣᠮ ᠢᠶᠠᠨ ᠰᠣᠩᠭᠤᠵᠤ ᠠᠪᠤᠭᠠᠷᠠᠢ︾ ᠭᠡᠰᠡᠨ ᠨᠣᠮ ᠤᠨ ᠥᠷᠭᠦᠭᠡᠨ ᠤ ᠡᠵᠡᠨ ᠤ ᠦᠭᠡ ᠯᠡ ᠡᠨᠡ ᠤᠳᠠᠭᠠᠨ ᠤ ᠵᠣᠬᠢᠶᠠᠯᠴᠢᠳ ᠤᠨ ᠭᠠᠯ ᠠᠶᠠᠨ ᠢ ᠪᠦᠷ ᠴᠤ ︽ᠨᠣᠮ ᠤᠨ ᠪᠤᠶᠠᠨ ᠲᠦᠭᠡᠭᠡᠬᠦ ᠠᠶᠠᠨ︾ ᠪᠣᠯᠭᠠᠨ᠂ ᠬᠥᠮᠥᠨ ᠪᠣᠯᠭᠠᠨ ᠠᠮᠠᠨ ᠳᠠᠭᠠᠨ ︽ᠨᠣᠮ ᠤᠨ ᠴᠠᠭᠠᠨ ᠪᠤᠶᠠᠨ ᠳᠡᠯᠭᠡᠷᠡᠬᠦ ᠪᠣᠯᠲᠤᠭᠠᠢ︾ ᠬᠡᠮᠡᠨ ᠰᠢᠪᠡᠨᠡᠵᠦ ᠪᠠᠶᠢᠯ᠎ᠠ᠃          ᠡᠶᠢᠮᠦ ᠶᠢᠨ ᠲᠤᠯᠠᠳᠠ ᠰᠠᠶᠢᠬᠠᠨ ᠳᠡᠭᠦᠦ ᠪᠠᠲᠤᠴᠡᠩᠭᠡᠯ ᠮᠠᠨᠢ  ᠴᠦ ︽ᠨᠣᠮ ᠤᠨ ᠭᠡᠭᠡ ᠲᠠᠲᠠᠭᠤᠯᠵᠤ᠂ ᠨᠤᠲᠤᠭ ᠤᠨ ᠵᠠᠮ ᠢᠶᠠᠨ ᠡᠯᠭᠦᠯ᠎ᠡ ᠁︾ ᠭᠡᠵᠦ ᠪᠢᠴᠢᠬᠦ ᠦᠭᠡᠢ ᠶᠠᠭᠠᠬᠢᠬᠤ ᠪᠤᠢ᠂ ᠳᠣᠭᠳᠣᠯᠬᠤ ᠦᠭᠡᠢ ᠶᠠᠭᠠᠬᠢᠬᠤ ᠪᠤᠢ᠃ ᠨᠣᠮ ᠳᠤᠷ ᠮᠥᠷᠭᠦᠮᠦ︕          ᠮᠣᠩᠭᠤᠯᠴᠤᠳ ᠣᠨᠢᠭ᠎ᠠ ᠦᠭᠡᠢ ᠠᠮᠢᠳᠤᠷᠠᠵᠤ ᠪᠤᠯᠳᠠᠭ ᠶᠤᠮ ᠤᠤ          ᠵᠣᠬᠢᠶᠠᠯᠴᠢ᠂ ᠰᠢᠯᠦᠭᠴᠢᠳ ᠭᠡᠭᠴᠢ ᠶᠠᠩᠵᠤ ᠶᠠᠩᠵᠤ ᠶᠢᠨ ᠤᠳᠤᠨ ᠳᠤ ᠲᠦᠷᠦᠭᠰᠡᠨ ᠤᠯᠤᠰ ᠭᠡᠳᠡᠭ  ᠨᠢ ᠮᠡᠳᠡᠭᠡᠵᠢ᠃ ᠠᠯᠢ ᠤᠵᠤᠭᠤᠷ ᠪᠦᠲᠦᠭᠡᠯ ᠢᠶᠠᠷ ᠢᠶᠠᠨ ᠲᠠᠨᠢᠯᠴᠠᠭᠰᠠᠨ ᠬᠥᠮᠥᠰ ᠴᠢᠨᠢ ᠪᠦᠷ ᠯᠡ ᠬᠠᠭᠤᠴᠢᠨ ᠲᠠᠨᠢᠯ ᠰᠢᠭ᠋ ᠠᠭᠤᠯᠵᠠᠵᠤ ᠤᠴᠠᠷᠠᠨ ᠳᠣᠭᠳᠣᠯᠤᠨ᠎ᠠ᠃ ᠲᠡᠳᠡ ᠶᠠᠩᠵᠤ ᠶᠠᠩᠵᠤ ᠪᠠᠷ ᠰᠣᠭᠲᠣᠵᠤ ᠦᠵᠡᠨ᠎ᠡ᠃ ᠭᠡᠲᠡᠯ᠎ᠡ ᠣᠯᠠᠩᠬᠢ ᠳᠠᠭᠠᠨ ᠶᠡᠭᠡ ᠲᠥᠯᠥᠪ ᠭᠤᠷᠪᠠᠨ ᠶᠠᠩᠵᠤ ᠪᠠᠷ ᠯᠡ ᠰᠣᠭᠲᠣᠵᠠᠭᠠᠨ᠎ᠠ᠃ ᠪᠠᠶᠢᠭᠠᠯᠢ ᠶᠢᠨ ᠰᠠᠶᠢᠬᠠᠨ ᠳᠤ ᠨᠢᠭᠡ ᠰᠠᠶᠢᠬᠠᠨ ᠰᠣᠭᠲᠣᠨ᠎ᠠ᠃ ᠰᠣᠩᠭᠤᠳᠠᠭ ᠭᠠᠭᠴᠠ ᠮᠥᠷ᠂ ᠰᠤᠭᠤ ᠰᠢᠭ᠋ ᠬᠡᠦᠬᠡᠨ ᠳᠤ ᠨᠢᠭᠡ ᠰᠣᠭᠲᠣᠨ᠎ᠠ᠂ ᠲᠡᠭᠡᠭᠡᠳ ᠯᠡ ᠰᠠᠷᠬᠤᠳ ᠤᠨ ᠬᠦᠴᠦᠨ ᠳᠤ ᠭᠡᠳ ᠭᠤᠷᠪᠠ ᠰᠣᠭᠲᠣᠨ᠎ᠠ᠃          ᠡᠨᠡ ᠤᠳᠠᠭ᠎ᠠ ︽ᠰᠠᠶᠢᠬᠠᠨ ᠦᠭᠡ ᠶᠢ ᠨᠢ ᠲᠠ ᠨᠠᠷ ᠬᠡᠯᠡᠴᠢᠬᠡ᠂ ᠰᠠᠷᠬᠤᠳ ᠢ ᠨᠢ ᠪᠢ ᠤᠤᠭᠤᠶ᠎ᠠ︾ ᠭᠡᠰᠡᠨ ᠰᠢᠯᠤᠭᠤᠨ ᠵᠠᠩ ᠲᠠᠢ ᠲᠤᠭᠤᠰ ᠳᠠᠷᠤᠭ᠎ᠠ ᠲᠠᠢ ᠬᠥᠪᠡᠭᠡᠲᠦ ᠰᠢᠷ᠎ᠠ ᠬᠤᠰᠢᠭᠤᠨ ᠤ ᠬᠢᠨ᠂ ︽ᠠᠯᠠᠱᠠ ᠨᠤᠲᠤᠭ ᠤᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠭᠡᠭᠴᠢ ᠶᠠᠮᠠᠷ ᠰᠠᠶᠢᠬᠠᠨ ᠬᠥᠮᠥᠰ ᠪᠤᠢ︾ ᠭᠡᠵᠦ ᠠᠰᠬᠠᠷᠠᠭᠤᠯᠤᠨ ᠮᠡᠯᠮᠡᠷᠡᠭᠦᠯᠦᠭᠡᠳ ᠢᠷᠡᠳᠡᠭ ᠤᠯᠠᠭᠠᠨᠴᠡᠴᠡᠭ ᠲᠡᠷᠢᠭᠦᠯᠡᠭᠴᠢ ᠲᠠᠢ ᠵᠡᠭᠦᠨ ᠰᠥᠨᠢᠳ ᠤᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ᠂ ︽ᠠᠬ᠎ᠠ ᠠ᠋᠂ ᠳᠡᠭᠦᠦ ᠨᠢ ᠳᠣᠭᠳᠣᠯᠤᠭᠠᠳ ᠥᠴᠥᠭᠡᠳᠦᠷ ᠢᠯᠡᠭᠦᠦ ᠤᠤᠭᠤᠴᠢᠬᠠᠵᠠᠢ᠂ ᠠᠭᠤᠴᠢᠯᠠᠭᠠᠷᠠᠢ︕︾ ᠭᠡᠳ ᠠᠭᠤᠴᠢᠯᠠᠯ ᠬᠦᠰᠡᠳᠡᠭ ᠬᠥᠭᠡᠷᠦᠬᠦᠨ ᠵᠠᠩ ᠲᠠᠢ ᠰᠠᠷᠠᠭᠤᠯ ᠳᠡᠭᠦᠦ ᠪᠠᠷ ᠪᠦᠯᠭᠦᠮ ᠤᠨ ᠳᠠᠷᠤᠭ᠎ᠠ ᠪᠠᠨ ᠪᠤᠯᠭᠠᠬᠰᠠᠨ ᠪᠠᠷᠠᠭᠤᠨ ᠰᠥᠨᠢᠳ ᠤᠨ ᠬᠢᠨ ᠭᠡᠳ ᠯᠡ ᠮᠤᠨᠳᠠᠭ ᠲᠣᠮᠣ ᠰᠣᠶᠣᠯ ᠤᠨ ᠭᠠᠯ ᠠᠶᠠᠨ ᠠᠯᠠᠱᠠ ᠨᠤᠲᠤᠭ ᠢ ᠵᠣᠷᠢᠨ ᠢᠷᠡᠭᠰᠡᠨ ᠶᠤᠮ᠃ ᠡᠨᠡ ᠭᠤᠷᠪᠠᠨ ᠬᠤᠰᠢᠭᠤᠨ ᠤ ᠤᠳᠬ᠎ᠠ ᠤᠷᠠᠯᠢᠭ ᠤᠨ ᠬᠢᠨ ᠤ ᠬᠤᠯᠪᠣᠭᠠᠨ ᠤ ᠦᠵᠡᠰᠬᠦᠯᠡᠩᠲᠡᠢ ᠮᠥᠷᠲᠡᠭᠡᠨ ᠤᠬᠠᠭᠠᠯᠢᠭ ᠭᠤᠷᠪᠠᠨ ᠪᠦᠰᠡᠭᠦᠢ ᠲᠡᠷᠢᠭᠦᠯᠡᠭᠴᠢ ᠶᠢ ᠬᠠᠷᠠᠴᠢᠬᠠᠭᠠᠳ ᠠᠯᠠᠱᠠ ᠶᠢᠨ ᠭᠤᠷᠪᠠᠨ ᠬᠤᠰᠢᠭᠤᠨ ᠤ ᠤᠳᠬ᠎ᠠ ᠤᠷᠠᠯᠢᠭ ᠤᠨ ᠬᠢᠨ ᠤ ᠬᠤᠯᠪᠣᠭᠠᠨ ᠤ ᠬᠢᠨ ᠪᠠᠷᠤᠭ ᠲᠡᠷᠢᠭᠦᠯᠡᠭᠴᠢ ᠪᠣᠯᠭᠠᠨ ᠢᠶᠠᠨ ᠪᠦᠰᠡᠭᠦᠢ ᠪᠠᠷ ᠰᠣᠯᠢᠴᠢᠬᠠᠬᠤ ᠵᠠᠪᠳᠤᠭᠰᠠᠨ ᠰᠢᠦ᠃          ᠵᠠ ᠲᠡᠭᠡᠭᠡᠳ ᠡᠨᠡ ᠪᠦᠯᠭᠦᠮ ᠳᠤ ᠠᠷᠠᠳ ᠤᠨ ᠳᠠᠭᠤᠤ ᠳᠠᠭᠠᠨ ᠠᠮᠢᠨ ᠠᠴᠠ ᠪᠠᠨ ᠬᠠᠶᠢᠷᠠᠲᠠᠢ ᠰᠢᠷᠮᠠᠭᠠᠷ ᠰᠢᠷ᠎ᠠ ᠵᠠᠯᠠᠭᠤ ᠶᠠᠪᠤᠨ᠎ᠠ᠃ ᠲᠡᠭᠦᠨ ᠢ ᠰᠢᠯᠦᠭᠴᠢ ᠲᠣᠳᠣᠪᠢᠯᠢᠭ᠌ ᠬᠡᠮᠡᠨ᠎ᠡ᠃ ᠲᠡᠷᠡ ᠪᠠᠷ ᠰᠢᠯᠦᠭ ᠢᠶᠠᠨ ᠰᠠᠶᠢᠬᠠᠨ ᠤᠩᠰᠢᠨ᠎ᠠ᠃ ᠰᠢᠯᠦᠭ ᠢ ᠨᠢ ᠬᠥᠮᠥᠰ ᠲᠠᠭᠠᠰᠢᠶᠠᠬᠤ ᠪᠠᠷ ᠡᠮᠦᠨ᠎ᠡ ᠪᠠᠨ ᠪᠠᠶᠢᠭ᠎ᠠ ᠰᠢᠯᠤᠨ ᠬᠤᠨᠳᠠᠭ᠎ᠠ ᠲᠠᠢ ᠲᠠᠷᠠᠰᠤ ᠶᠢ ᠠᠪᠴᠤ ︽ᠥᠪᠡᠷ ᠢ ᠪᠠᠨ ᠨᠢᠭᠡ ᠭᠡᠨᠡᠳᠡᠭᠦᠯᠵᠦ ᠪᠠᠶᠢᠭᠠᠳ ᠵᠠᠯᠭᠢᠴᠢᠬᠠᠶ᠎ᠠ︾ ᠬᠡᠮᠡᠨ ᠤᠯᠠᠨ ᠢ ᠢᠨᠢᠶᠡᠯᠭᠡᠨ᠎ᠡ᠃          ᠁          ᠵᠡᠭᠦᠰᠬᠡᠯ ᠴᠢᠮᠡᠭ ᠦᠭᠡᠢ᠂ ᠡᠭᠡᠯᠬᠡᠨ ᠶᠠᠩᠵᠤ ᠪᠠᠷ ᠴᠢᠨᠢ ᠵᠢᠷᠤᠭᠠᠳ           ︽ᠵᠡᠭᠦᠨ ᠰᠡᠷᠪᠡᠩ︾ ᠭᠡᠵᠦ ᠲᠣᠳᠣᠷᠬᠠᠶᠢᠯᠠᠭᠠᠳ ᠬᠠᠨᠠᠨ ᠳᠠᠭᠠᠨ ᠡᠯᠭᠦᠴᠢᠬᠡᠯ᠎ᠡ          ᠵᠢᠷᠦᠬᠡᠨ ᠳᠡᠭᠡᠨ ᠲᠤᠩᠭᠠᠭᠠᠭᠰᠠᠨ ᠨᠠᠨᠳᠢᠨ ᠨᠠᠨᠳᠢᠨ ᠦᠭᠡᠰ ᠢᠶᠠᠨ ᠳᠤᠭᠲᠤᠶᠢᠯᠠᠭᠠᠳ          ᠵᠡᠭᠦᠨ ᠮᠥᠷᠥᠨ ᠳᠡᠭᠡᠨ ᠮᠡᠩᠭᠡ ᠲᠠᠢ ᠥᠬᠢᠨ ᠭᠡᠵᠦ ᠬᠠᠶ᠋ᠢᠭᠯᠠᠭᠠᠳ ᠁ ᠤᠷᠠᠴᠢᠬᠠᠯ᠎ᠠ          ᠬᠠᠴᠠᠷ ᠲᠠᠭᠠᠨ ᠬᠠᠷᠢᠨ ᠰᠠᠨᠠᠭᠠᠨ ᠳᠤ ᠦᠭᠡᠢ ᠪᠠᠷ ᠪᠡᠭᠡ ᠬᠦᠷᠭᠡᠴᠢᠬᠡᠯ᠎ᠡ          ᠴᠢᠮᠠᠶᠢ ᠢᠷᠡᠭᠡᠳ ᠦᠨᠦᠰᠦᠭᠡᠳ ᠶᠠᠪᠤᠭᠰᠠᠨ ᠭᠡᠵᠦ ᠲᠥᠰᠥᠭᠡᠯᠡᠪᠡᠯ ᠪᠤᠯᠬᠤ ᠤᠤ          ᠬᠤᠨᠳᠠᠭ᠎ᠠ ᠲᠠᠢ ᠲᠠᠷᠠᠰᠤ ᠪᠠᠨ ᠡᠷᠭᠢᠬᠦ ᠵᠠᠭᠤᠷ᠎ᠠ ᠪᠠᠨ ᠠᠰᠬᠠᠴᠢᠬᠠᠭᠠᠳ          ᠴᠢᠮᠠᠶᠢ ᠦᠵᠦᠮ ᠲᠡᠭᠦᠬᠦ ᠪᠠᠷ ᠶᠠᠪᠤᠭᠰᠠᠨ ᠢ ᠲᠡᠷᠡᠬᠡᠨ ᠵᠠᠭᠤᠷ᠎ᠠ ᠰᠠᠨᠠᠴᠢᠬᠠᠯ᠎ᠠ          ᠴᠢᠨᠦ ᠡᠵᠡᠭᠦᠢ ᠳᠤ ᠨᠠᠮᠠᠶᠢ ᠲᠦᠷᠢᠮᠡᠬᠡᠶᠢᠯᠡᠨ ᠡᠵᠡᠯᠡᠭᠰᠡᠨ ᠭᠠᠭᠴᠠᠭᠠᠷᠳᠠᠯ ᠭᠡᠭᠴᠢ ᠶᠢ          ᠴᠢᠨᠦ ᠡᠷᠬᠡᠯᠡᠭᠦᠯᠳᠡᠭ ᠠᠯᠠᠭ ᠮᠤᠤᠷ ᠰᠢᠭ᠋ ᠥᠪᠡᠷ ᠲᠡᠭᠡᠨ ᠳᠠᠰᠬᠠᠴᠢᠬᠠᠯ᠎ᠠ          ᠴᠢᠨᠦ ᠪᠠᠶᠢᠭ᠎ᠠ ᠡᠭᠦᠯᠡᠰ ᠤᠨ ᠴᠠᠭᠠᠨᠠᠬᠢ ᠨᠤᠲᠤᠭ ᠲᠤ ᠬᠦᠷᠬᠦ ᠵᠠᠮ ᠦᠭᠡᠢ ᠪᠣᠯᠬᠤᠷ          ᠴᠢᠨᠦ ᠮᠠᠷᠲᠠᠭᠰᠠᠨ ᠲᠣᠭᠤᠷᠤᠤ ᠲᠠᠢ ᠠᠯᠴᠢᠭᠤᠷ ᠢ ᠭᠤᠣᠯ ᠤᠨ ᠤᠰᠤᠨ ᠳᠤ ᠲᠡᠪᠢᠭᠦᠯᠴᠢᠭᠡᠯ᠎ᠡ          ᠴᠢᠨᠦ ᠡᠵᠡᠭᠦᠢ ᠠᠮᠢᠳᠤᠷᠠᠯ ᠠᠴᠠ ᠥᠪᠡᠷ ᠢ ᠪᠠᠨ ᠲᠤᠰᠠᠭᠠᠷᠯᠠᠭᠰᠠᠨ ᠪᠣᠯᠬᠤᠷ          ᠴᠢᠨᠦ ᠤᠬᠢᠶᠠᠭᠠᠳ ᠡᠪᠬᠡᠭᠰᠡᠨ ᠴᠠᠭᠠᠨ ᠴᠠᠮᠴᠠ ᠮᠢᠨᠢ ᠴᠠᠭ ᠤᠨ ᠰᠠᠯᠬᠢᠨ ᠳᠤ ᠰᠢᠷᠠᠯᠠᠴᠢᠬᠠᠵᠠᠢ                    ᠁          ᠮᠠᠨ ᠤ ᠭᠠᠯ ᠠᠶᠠᠨ ᠤ ᠬᠢᠨ ᠤ ᠪᠠᠳᠠᠢ ᠶᠢᠨ ᠵᠢᠷᠠᠨ ᠪᠠᠯᠭᠠᠰᠤᠨ ᠳᠤ ᠪᠣᠯᠤᠭᠰᠠᠨ ︽ᠨᠠᠶᠢᠷᠠᠭ ᠲᠠᠢ ᠦᠳᠡᠰᠢ︾  ᠶᠢᠨ ᠰᠠᠯᠬᠢ ᠶᠢ ᠬᠠᠭᠠᠯᠵᠤ ᠨᠠ᠊ ·  ᠵᠠᠶᠠᠭᠠᠲᠤ ᠭᠡᠳᠡᠭ ᠵᠡᠭᠦᠨ ᠰᠥᠨᠢᠳ ᠤᠨ ᠵᠠᠯᠠᠭᠤ ᠰᠢᠯᠦᠭᠴᠢ ︽ᠵᠡᠭᠦᠨ ᠮᠥᠷᠥᠨ ᠳᠡᠭᠡᠨ ᠮᠡᠩᠭᠡ ᠲᠠᠢ︾ ᠥᠬᠢᠨ ᠳᠤ ᠳᠤᠷᠠᠯᠠᠭᠠᠳ᠂ ᠵᠡᠭᠦᠨ ᠰᠡᠷᠪᠡᠩ ᠳᠤ ᠲᠡᠷᠯᠡᠭᠰᠡᠨ ᠰᠢᠯᠦᠭ ᠢᠶᠠᠨ ᠤᠩᠰᠢᠵᠤ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠥᠬᠢᠳ ᠢ ᠡᠶᠢᠨ ᠬᠦ ᠪᠠᠶᠠᠷᠯᠠᠭᠤᠯᠤᠭᠰᠠᠨ ᠶᠤᠮ᠃ ᠵᠠᠶᠠᠭᠠᠲᠤ ᠶᠢ ᠮᠠᠨᠢ ᠣᠶᠢᠷ᠎ᠠ ᠶᠢᠨ ᠵᠢᠯ ᠰᠢᠯᠦᠭ ᠢᠶᠠᠷ ᠨᠢ ᠠᠷᠤ ᠬᠠᠯᠬ᠎ᠠ᠂ ᠥᠪᠥᠷ ᠮᠣᠩᠭᠤᠯ ᠪᠦᠭᠦᠳᠡ ᠰᠠᠶᠢᠨ ᠲᠠᠨᠢᠳᠠᠭ ᠪᠣᠯᠤᠭᠰᠠᠨ ᠪᠠᠶᠢᠯ᠎ᠠ᠃ ᠶᠠᠭᠤᠮ᠎ᠠ ᠶᠢ ᠰᠠᠶᠢᠬᠠᠨ ᠭᠦᠢᠴᠡᠭᠡᠵᠦ᠂ ᠪᠤᠳᠤᠵᠤ ᠪᠢᠴᠢᠳᠡᠭ ᠳᠡᠭᠦᠦ ᠶᠢᠨ ᠨᠢᠭᠡ ᠨᠢ᠃ ᠬᠠᠯᠲᠤ ᠬᠠᠷᠠᠬᠤ ᠳᠤ ᠷᠢᠨᠴᠢᠨ ᠤ ᠴᠣᠶᠢᠨᠣᠮ ᠰᠢᠭ᠋ ᠰᠠᠷᠬᠤᠳ ᠰᠢᠯᠦᠭ ᠬᠤᠶᠠᠷ ᠲᠤ ᠠᠷᠠᠢ ᠣᠶᠢᠷ᠎ᠠ ᠶᠠᠪᠤᠭ᠎ᠠ ᠶᠤᠮ ᠰᠢᠭ᠋ ᠬᠠᠷᠠᠭᠳᠠᠭᠰᠠᠨ ᠴᠤ ᠬᠠᠯᠠᠮᠴᠠᠭᠤ ᠪᠠᠶᠢᠬᠤ ᠳᠠᠭᠠᠨ ᠬᠡᠯᠡᠭᠰᠡᠨ ᠦᠭᠡ ᠨᠢ ᠨᠠᠳᠠ ᠳᠤ ᠵᠢᠩᠬᠢᠨᠢ ᠰᠢᠯᠦᠭ ᠲᠡᠷᠯᠡᠳᠡᠭ ᠬᠥᠮᠥᠰ ᠡᠶᠢᠮᠦ ᠯᠡ ᠪᠠᠶᠢᠬᠤ ᠶᠣᠰᠣᠲᠠᠢ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠳᠠᠭ᠃ ᠲᠡᠷᠡ ᠨᠠᠮᠠᠶᠢ ᠡ᠊ᠩᠭᠡᠬᠠᠳᠠ ᠠᠬ᠎ᠠ ᠭᠡᠵᠦ ᠬᠦᠨᠳᠦᠳᠬᠡᠳᠡᠭ ᠲᠤᠨᠢ ᠪᠢᠰᠢ᠂ ᠡᠳᠦᠭᠡ ᠲᠡᠭᠦᠨ ᠰᠢᠭ ᠪᠠᠶᠢᠭ᠎ᠠ ᠪᠠᠷ ᠨᠢ ᠪᠠᠶᠢᠭ᠎ᠠ ᠤᠷᠠᠨ ᠪᠦᠲᠦᠭᠡᠯᠴᠢ ᠴᠥᠭᠡᠷᠡᠭᠰᠡᠨ ᠲᠠᠢ ᠯᠡ ᠬᠤᠯᠪᠣᠭᠠᠲᠠᠢ ᠪᠠᠶᠢᠬ᠎ᠠ᠃          ᠭᠠᠯ ᠤᠨ ᠬᠢᠨ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠳᠠᠯᠠᠶᠢᠬᠦ᠋ᠪ ᠪᠠᠯᠭᠠᠰᠤᠨ ᠳᠤ ᠢᠷᠡᠴᠢᠬᠡᠭᠡᠳ  ᠬᠠᠰᠢᠶᠠᠯᠠᠨ ᠰᠠᠭᠠᠵᠤ ᠪᠠᠶᠢᠭ᠎ᠠ ᠲᠡᠮᠡᠭᠡᠨ ᠰᠠᠭᠠᠯᠢ ᠶᠢᠨ ᠦᠢᠯᠡᠰ ᠢ ᠲᠣᠭᠤᠷᠢᠨ ᠦᠵᠡᠬᠦ ᠪᠠᠷ ᠣᠴᠢᠯ᠎ᠠ᠃ ᠢᠩᠭᠡ ᠶᠢ ᠮᠠᠰᠢᠨ ᠢᠶᠠᠷ ᠰᠠᠭᠠᠵᠤ ᠰᠦ ᠨᠢ ᠵᠠᠷᠢᠮ ᠳᠠᠭᠠᠨ ᠴᠢᠰᠤ ᠲᠠᠢ ᠪᠠᠶᠢᠳᠠᠭ ᠭᠡᠰᠡᠨ ᠮᠡᠳᠡᠭᠡ ᠶᠢ ᠰᠣᠨᠣᠰᠤᠭᠰᠠᠨ ᠠᠴᠠ ᠬᠤᠶᠢᠰᠢ ᠮᠢᠨᠤ ᠪᠡᠶ᠎ᠡ ᠡᠶᠢᠮᠦ ᠭᠠᠵᠠᠷ ᠢᠷᠡᠬᠦ ᠠᠴᠠ ᠰᠡᠳᠬᠢᠯ ᠲᠦᠪᠳᠡᠳᠡᠭ ᠦᠭᠡᠢ ᠪᠣᠯᠬᠤᠷ ᠦᠢᠯᠡᠳᠪᠦᠷᠢ ᠶᠢᠨ ᠡᠭᠦᠳᠡᠨ ᠳᠠᠬᠢ ᠮᠠᠨᠠᠭᠠᠨ ᠤ ᠭᠡᠷ ᠤᠨ ᠰᠡᠭᠦᠳᠡᠷ ᠲᠠᠬᠢ ᠪᠠᠯᠪᠠᠷᠬᠠᠢ ᠰᠠᠨᠳᠠᠯᠢ ᠳᠡᠭᠡᠷ᠎ᠡ ᠵᠠᠶᠠᠭᠠᠲᠤ ᠳᠡᠭᠦᠦ ᠲᠠᠢ ᠪᠠᠨ ᠰᠢᠷ᠎ᠠ ᠠᠶᠢᠷᠠᠭ ᠵᠠᠯᠭᠢᠯᠠᠵᠤ ᠰᠠᠭᠤᠯ᠎ᠠ᠃ ᠮᠠᠨ ᠤ ᠬᠥᠮᠥᠨ ᠨᠡᠯᠢᠶᠡᠳ ᠰᠢᠷᠠᠳᠠᠬᠰᠠᠨ ᠪᠠᠶᠢᠳᠠᠯ ᠲᠠᠢ᠃ ᠲᠡᠷᠡ ᠪᠠᠷ ︽ᠠᠯᠠᠱᠠ ᠶᠢ ᠪᠢ ᠠᠭᠤᠳᠠᠮ ᠠᠭᠤᠳᠠᠮ ᠭᠡᠰᠡᠨ ᠴᠢᠨᠢ ᠨᠢᠭᠡ ᠯᠠᠵᠠ ᠰᠢᠷ᠎ᠠ ᠠᠶᠢᠷᠠᠭ ᠵᠠᠯᠭᠢᠯᠠᠵᠤ ᠪᠠᠷᠠᠭ᠎ᠠ ᠦᠭᠡᠢ ᠪᠠᠶᠢᠲᠠᠯ᠎ᠠ ᠨᠢᠭᠡ ᠦᠷᠳᠡᠭᠡ ᠬᠦᠷᠴᠢᠬᠡᠬᠦ ᠶᠤᠮ︾ ᠭᠡᠵᠦ ᠨᠠᠮᠠᠶᠢ ᠱᠣᠣᠯᠠᠪᠠ᠃ ᠤᠤᠭᠤᠵᠤ ᠪᠠᠶᠢᠭ᠎ᠠ ᠠᠶᠢᠷᠠᠭ ᠨᠢ ᠬᠤᠯᠠᠳᠠᠭᠠᠳ ᠪᠠᠶᠢᠭ᠎ᠠ ᠶᠢ ᠠᠭᠤᠳᠠᠮ ᠠᠴᠠ ᠠᠭᠤᠳᠠᠮ ᠨᠤᠲᠤᠭ ᠠᠯᠠᠱᠠ ᠪᠠᠷ ᠵᠦᠢᠷᠯᠡᠬᠦ ᠭᠡᠭᠴᠢ ᠠᠪᠢᠶᠠᠰᠲᠠᠨ ᠤ ᠯᠡ ᠠᠪᠲᠠᠯ ᠪᠢᠵᠡ⁈ ᠢᠩᠭᠢᠵᠦ ᠪᠠᠶᠢᠲᠠᠯ᠎ᠠ ︽ᠬᠠᠨᠠᠷᠠᠭᠰᠠᠨ ᠲᠡᠮᠡᠭᠡ ᠲᠠᠢ ᠰᠥᠨᠢᠳ ᠤᠨ ᠬᠢᠨ ᠬᠠᠨ ᠲᠡᠭᠷᠢ ᠠᠯᠠᠱᠠ ᠳᠤ ᠢᠷᠡᠭᠡᠳ ᠬᠠᠰᠢᠶᠠᠯᠠᠭᠰᠠᠨ ᠲᠡᠮᠡᠭᠡ ᠦᠵᠡᠬᠦ ᠪᠠᠷ ᠶᠠᠭᠠᠷᠠᠬᠤ ᠶᠤᠮ︾ ᠭᠡᠵᠦ ᠰᠥᠨᠢᠳ ᠤᠨ ᠬᠢᠨ ᠢᠶᠠᠨ ᠱᠣᠣᠯᠠᠬᠤ ᠰᠢᠭᠦᠮᠵᠢᠯᠡᠬᠦ ᠶᠢᠨ ᠳᠤᠮᠳᠠᠭᠤᠷ ᠭᠤᠶᠠᠳᠠᠵᠤ ᠠᠮᠵᠢᠪᠠ᠃ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠯᠡ ᠠᠷᠠᠨᠰᠢᠨ ᠡᠶᠢᠮᠦ  ᠪᠢᠵᠡ᠃          ᠪᠠᠲᠤᠴᠡᠩᠭᠡᠯ᠂ ᠨᠡ᠊ ·  ᠵᠠᠶᠠᠭᠠᠲᠤ᠂ ᠠᠯᠲᠠᠨᠴᠢᠯᠠᠭᠤ ᠭᠤᠷᠪᠠᠨ ᠰᠠᠶᠢᠬᠠᠨ ᠭᠢᠯᠠᠯᠵᠠᠭᠰᠠᠨ ᠵᠠᠯᠠᠭᠤ ᠤᠷᠠᠨ ᠪᠦᠲᠦᠭᠡᠯᠴᠢ ᠳᠡᠭᠦᠦ ᠲᠠᠢ ᠪᠠᠨ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠮᠦᠽᠧᠢ ᠪᠠᠷ ᠲᠣᠭᠤᠷᠢᠵᠤ ᠪᠠᠶᠢᠭᠠᠳ ᠵᠢᠦᠢ ᠶᠠᠨ ᠢ ᠵᠣᠷᠢᠵᠤ ᠢᠷᠡᠭᠰᠡᠨ ᠲᠠᠩ ᠤᠯᠤᠰ ᠤᠨ ᠶᠡᠭᠡ ᠰᠢᠯᠦᠭᠴᠢ ᠸᠠᠩ ᠸᠧᠢ ᠶᠢᠨ ᠠᠯᠤᠰ ᠤᠨ ᠬᠢᠵᠠᠭᠠᠷ ᠤᠷᠤᠭᠤ ᠭᠠᠷ ᠲᠠᠶᠠᠯᠠᠨ ᠲᠡᠷᠢᠭᠦᠨ ᠭᠤᠳᠤᠶᠢᠯᠭᠠᠨ ᠵᠣᠭᠰᠤᠭ᠎ᠠ ᠱᠤᠭᠤᠮᠠᠯ ᠤᠨ ᠬᠢᠨᠢ ᠡᠮᠦᠨ᠎ᠡ ᠳᠤᠷᠠᠰᠬᠠᠯ ᠤᠨ ᠵᠢᠷᠤᠭ ᠠᠪᠬᠠᠭᠤᠯᠬᠤ ᠭᠱᠠᠨ᠎ᠠ ᠰᠡᠳᠬᠢᠯ ᠳᠤ ᠶᠠᠭᠤ ᠨᠢᠭᠡ ᠤᠷᠭᠤᠬᠤ ᠰᠢᠭ᠋ ᠪᠣᠯᠪᠠ᠃ ᠸᠠᠩ ᠸᠧᠢ ᠭᠤᠸᠠᠢ᠄           ︽ᠬᠠᠩᠭᠠᠢ ᠲᠡᠷᠭᠡ ᠪᠠᠷ ᠬᠢᠯᠢ ᠶᠢᠨ ᠤᠪᠤᠭᠠᠨ᠎ᠠ ᠣᠴᠢᠬᠤᠶ᠎ᠠ          ᠬᠠᠷᠢᠶᠠᠲᠤ ᠤᠯᠤᠰ ᠭᠠᠰᠢᠭᠤᠨ ᠨᠠᠭᠤᠷ ᠢᠶᠠᠷ ᠲᠠᠭᠠᠷᠢᠪᠠ          ᠦᠮᠭᠦᠷᠢᠭᠦ ᠬᠠᠮᠬᠤᠤᠯ ᠬᠠᠨ ᠤ ᠬᠢᠯᠢ ᠠᠴᠠ ᠭᠠᠷᠴᠤ          ᠪᠤᠴᠠᠬᠤ ᠭᠠᠯᠠᠭᠤ ᠬᠤ᠋ ᠶᠢᠨ ᠲᠡᠭᠷᠢ ᠳᠤ ᠣᠷᠣᠪᠠ          ᠶᠡᠭᠡ ᠡᠯᠡᠰᠦᠨ᠎ᠡ ᠥᠨᠥᠴᠢᠨ ᠤᠳᠤᠭ᠎ᠠ ᠡᠭᠴᠡ          ᠤᠷᠳᠤ ᠭᠤᠣᠯ ᠤᠨ ᠰᠢᠩᠭᠡᠬᠦ ᠨᠠᠷᠠᠨ ᠲᠥᠭᠦᠷᠢᠭ          ᠬᠠᠷᠠᠭᠤᠯ ᠤᠨ ᠴᠡᠷᠢᠭ ᠲᠠᠢ ᠰᠢᠶᠦᠦᠭᠤᠸᠠᠨ ᠪᠤᠭᠤᠮᠳᠠᠨ᠎ᠠ ᠤᠴᠠᠷᠠᠬᠤᠶ᠎ᠠ          ᠬᠠᠩᠭᠠᠢ ᠠᠭᠤᠯᠠᠨ᠎ᠠ ᠴᠠᠭᠳᠠᠭᠤᠯ ᠤᠨ ᠳᠠᠷᠤᠭ᠎ᠠ ᠠᠮᠣᠢ︾ ᠬᠡᠮᠡᠬᠦ           ︽ᠬᠢᠯᠢ ᠶᠢᠨ ᠪᠣᠭᠤᠮᠲᠠ ᠳᠤᠷ ᠡᠯᠴᠢᠯᠡᠭᠰᠡᠨ︾ ᠰᠢᠯᠦᠭ ᠢᠶᠠᠨ ᠪᠢᠴᠢᠵᠦ ᠮᠣᠩᠭᠤᠯ ᠨᠤᠲᠤᠭ ᠢ ᠪᠠᠭ᠋ᠠᠷᠬᠠᠵᠤ ᠪᠠᠶᠢᠭᠰᠠᠨ ᠪᠣᠯ ᠮᠠᠨ ᠤ ᠭᠤᠷᠪᠠᠨ ᠵᠠᠯᠠᠭᠤ ᠶᠢᠨ ᠦᠵᠦᠭ ᠤᠨ ᠳᠣᠣᠷ᠎ᠠ ᠠᠴᠠ ᠢᠷᠡᠬᠦ ᠮᠠᠷᠭᠠᠰᠢ ᠡᠭᠦᠨ ᠠᠴᠠ ᠰᠠᠶᠢᠨ ᠪᠦᠲᠦᠭᠡᠯ ᠲᠦᠷᠦᠭᠦ ᠰᠤᠪᠢᠩ ᠡᠷᠬᠡ ᠦᠭᠡᠢ ᠮᠡᠳᠡᠷᠡᠭᠳᠡᠭᠰᠡᠨ ᠶᠤᠮ᠃          ᠣᠶᠤᠨᠴᠡᠴᠡᠭ ᠭᠡᠳᠡᠭ  ᠪᠠᠭᠰᠢ ᠶᠢᠨ ᠠᠯᠪᠠ ᠲᠠᠢ ᠬᠥᠪᠡᠭᠡᠲᠦ ᠰᠢᠷ᠎ᠠ ᠬᠤᠰᠢᠭᠤᠨ ᠤ ᠪᠤᠨᠲᠣᠭᠤᠷ ᠪᠣᠷᠣ ᠪᠦᠰᠡᠭᠦᠢ ᠲᠠᠭᠤ ᠱᠤᠤ ᠴᠥᠭᠡᠨ ᠲᠠᠢ ᠴᠤ ᠰᠢᠯᠦᠭ ᠢᠶᠠᠷ ᠶᠠᠷᠢᠳᠠᠭ ᠬᠥᠮᠥᠰ ᠤᠨ ᠳᠤᠮᠳᠠ ᠬᠡᠳᠦᠨ ᠤᠳᠠᠭ᠎ᠠ ᠰᠢᠯᠦᠭ ᠤᠩᠰᠢᠬᠤ ᠭᠡᠳ ᠲᠡᠭᠦᠨ ᠳᠤ ᠲᠤᠭᠢᠶᠠᠯ ᠣᠯᠭᠤᠭᠰᠠᠨ ᠦᠭᠡᠢ ᠪᠣᠯᠬᠤᠷ ᠳᠠᠯᠠᠶᠢᠬᠦ᠋ᠪ ᠲᠤ ᠪᠣᠯᠤᠭᠰᠠᠨ ᠢᠯᠠᠯᠲᠠ ᠭᠤᠸᠠᠢ ᠶᠢᠨ ᠴᠠᠶᠢᠯᠠᠯᠭ᠎ᠠ ᠳᠡᠭᠡᠷ᠎ᠡ ︽ᠪᠢ ᠠᠯᠠᠱᠠ ᠳᠤ ᠪᠤᠶᠠᠨᠪᠠᠲᠤ᠂ ᠡ᠊ᠩᠭᠡᠬᠠᠳᠠ ᠬᠤᠶᠠᠷ ᠪᠠᠭᠰᠢ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠢᠷᠡᠭᠰᠡᠨ ᠶᠤᠮ᠃ ᠬᠠᠷᠢᠨ ᠪᠤᠶᠠᠨᠪᠠᠲᠤ ᠭᠤᠸᠠᠢ ᠰᠢᠵᠢᠷ ᠨᠠᠮᠤᠷ ᠤᠨ ᠰᠢᠯᠦᠭ ᠤᠨ ᠨᠠᠶᠢᠷ ᠲᠤ ᠰᠢᠷᠠᠳᠠᠭᠠᠳ ᠢᠷᠡᠭᠡ ᠦᠭᠡᠢ ᠪᠠᠶᠢᠨ᠎ᠠ︾ ᠬᠡᠮᠡᠨ ᠬᠠᠷᠠᠮᠰᠠᠯ ᠢᠶᠠᠨ ᠪᠠᠭ᠎ᠠ ᠵᠡᠷᠭᠡ ᠨᠢᠭᠤᠴᠢᠬᠠᠭᠠᠳ ᠯ᠊ · ᠣᠳᠽᠡᠷ ᠤᠨ ︽ᠳᠡᠯᠭᠡᠷ ᠽᠠᠨᠳᠠᠨ ᠮᠣᠳᠣ︾᠂ ᠲᠠᠩᠭᠤᠳ ᠤᠨ ᠭᠠᠯᠰᠠᠩ ᠤᠨ ︽ᠮᠣᠩᠭᠤᠯ ᠬᠥᠮᠥᠨ ᠤ ᠵᠢᠷᠦᠬᠡᠨ ᠤ ᠪᠢᠴᠢᠭᠡᠰᠦ︾ ᠰᠢᠯᠦᠭ ᠢ ᠤᠶᠠᠩᠭᠠᠯᠠᠵᠤ᠂ ᠬᠤᠷᠠᠭᠰᠠᠨ ᠤᠯᠠᠨ ᠤ ᠨᠢᠳᠦ ᠶᠢ ᠵᠠᠶᠢᠷᠲᠤᠭᠤᠯᠵᠤ᠂ ᠵᠢᠷᠦᠬᠡ ᠶᠢ ᠤᠬᠰᠢᠭᠠᠵᠤ ᠪᠢᠯᠡ᠃ ᠳᠡᠭᠡᠳᠦᠰ ᠤᠨ ᠮᠢᠨᠢ ᠳᠠᠷᠢᠭᠰᠠᠨ ᠳᠡᠯᠭᠡᠷ ᠽᠠᠨᠳᠠᠨ ᠮᠣᠳᠣᠨ ᠤ ᠮᠢᠩᠭ᠎ᠠ ᠲᠦᠮᠡᠨ ᠰᠠᠯᠠᠭ᠎ᠠ ᠨᠠᠮᠠᠭ᠎ᠠ ᠪᠣᠯᠵᠤ ᠪᠢᠳᠠ ᠥᠨᠥᠳᠥᠷ ᠲᠦᠷᠦ ᠳᠤ ᠴᠠᠢ ᠲᠠᠢ᠂ ᠲᠡᠦᠬᠡᠨ ᠳᠤ ᠵᠠᠢ ᠲᠠᠢ ᠵᠣᠭᠰᠣᠵᠤ ᠴᠢᠳᠠᠭ᠎ᠠ ᠪᠣᠯᠪᠠ ᠤᠤ⁈ ᠵᠢᠷᠦᠬᠡᠨ ᠳᠡᠭᠡᠨ ᠪᠢᠴᠢᠭᠡᠰᠦ ᠲᠠᠢ ᠳᠡᠯᠭᠡᠷ ᠽᠠᠨᠳᠠᠨ ᠮᠣᠳᠣ ᠰᠢᠭ᠋ ᠶᠠᠪᠤᠵᠤ ᠴᠢᠳᠠᠭ᠎ᠠ ᠨᠢ ᠭᠡᠳᠦ ᠪᠣᠯ ᠳ᠋ᠠ⁈          ᠮᠠᠨ ᠤ ᠭᠠᠯ ᠠᠶᠠᠨ ᠠᠯᠳᠠᠨ ᠲᠤᠤᠷᠠᠶᠢᠳᠤ ᠡᠵᠡᠨ᠎ᠡ ᠨᠤᠲᠤᠭ ᠤᠷᠤᠭᠤ ᠠᠶᠠᠯᠠᠵᠤ ᠪᠠᠶᠢᠬᠤ ᠳᠤ ᠪᠤᠭᠤᠲᠤ ᠬᠤᠳᠠ ᠶᠢᠨ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠳᠤ ᠤᠳᠠᠯ ᠦᠭᠡᠢ ︽ᠠᠶᠢᠪᠠᠭ᠎ᠠ ᠶᠢᠨ ᠤᠶᠠᠩᠭ᠎ᠠ︾ ᠰᠢᠯᠦᠭ ᠤᠨ ᠨᠠᠭᠠᠳᠤᠮ ᠪᠤᠯᠬᠤ ᠭᠡᠵᠦ᠂ ᠨᠢᠭᠡᠨᠲᠡ ᠶᠡᠭᠡ ᠨᠠᠭᠠᠳᠤᠮ ᠤᠨ ᠡᠴᠦᠰ ᠤᠨ ᠰᠢᠢᠳᠪᠦᠷᠢᠲᠦ ᠮᠥᠷᠥᠶᠢᠴᠡᠭᠡᠨ ᠤ ᠪᠢᠯᠧᠲ ᠣᠯᠣᠭᠰᠠᠨ ᠭᠠᠯ ᠠᠶᠠᠨ ᠳᠤ ᠮᠠᠨᠢ ᠶᠠᠪᠤᠵᠤ ᠪᠠᠶᠢᠭ᠎ᠠ ᠥᠯᠵᠡᠶᠢᠨᠠᠷᠠᠨ᠂ ᠪᠢᠯᠢᠭᠪᠡᠭᠠᠲᠤᠷ᠂ ᠲ᠊ ·  ᠰᠡᠴᠡᠨᠬᠤᠸᠠᠷ ᠭᠤᠷᠪᠠᠨ ᠵᠠᠯᠠᠭᠤ ᠰᠢᠯᠦᠭᠴᠢ ᠮᠠᠨᠢ᠂ ᠠᠯᠠᠱᠠ ᠨᠤᠲᠤᠭ ᠤᠨ ᠥᠪᠡᠷᠮᠢᠴᠡ ᠰᠣᠳᠣᠨ ᠪᠠᠶᠢᠭᠠᠯᠢ᠂ ᠬᠥᠮᠥᠨ ᠠᠷᠠᠳ ᠤᠨ ᠬᠢᠨᠢ ᠥᠭᠭᠢᠶᠡᠮᠦᠷ ᠬᠠᠯᠠᠭᠤᠨ ᠰᠡᠳᠬᠢᠯ ᠳᠤ ᠬᠤᠷᠭᠤᠳᠠᠵᠤ ᠪᠠᠶᠢᠭᠰᠠᠨ ᠴᠤ ᠮᠣᠩᠭᠤᠯ ᠨᠤᠲᠤᠭ ᠲᠤ ᠮᠢᠨᠢ ᠪᠤᠯᠳᠠᠭ ᠴᠥᠭᠡᠨ ᠬᠡᠳᠦᠨ ᠴᠢᠬᠡᠴᠢ ᠰᠢᠳᠤᠷᠭᠤ ᠰᠢᠯᠦᠭ ᠤᠨ ᠨᠠᠭᠠᠳᠤᠮ ᠢ ᠵᠣᠬᠢᠶᠠᠨ ᠪᠠᠶᠢᠭᠤᠯᠵᠤ ᠪᠠᠶᠢᠭ᠎ᠠ ᠬᠥᠮᠥᠰ ᠲᠡᠭᠡᠨ ᠬᠠᠷᠢᠭᠤᠴᠠᠬᠤ ᠶᠢᠨ ᠡᠭᠦᠳᠡᠨ ᠠᠴᠠ ᠡᠵᠡᠨ᠎ᠡ ᠠᠴᠠ ᠤᠨᠤᠭ᠎ᠠ ᠬᠥᠯᠥᠰᠦᠯᠡᠨ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠤᠷᠤᠭᠤ ᠳᠠᠪᠬᠢᠭᠤᠯᠤᠭᠰᠠᠨ ᠶᠤᠮ᠃ ᠬᠥᠯᠥᠰᠦᠯᠡᠭᠰᠡᠨ ᠮᠠᠰᠢᠨ ᠤ ᠡᠵᠡᠨ ᠨᠢ ᠬᠥᠭᠡᠷᠦᠬᠦᠢ ᠲᠡᠷᠡ ᠭᠡᠳᠦ ᠶᠢ ᠦᠭᠡ ᠪᠠᠷ ᠲᠣᠭᠯᠠᠳᠠᠭ ᠥᠨᠳᠥᠷ ᠵᠠᠶᠠᠭ᠎ᠠ ᠲᠠᠢ ᠢᠷᠠᠭᠤ ᠨᠠᠶᠢᠷᠠᠭᠴᠢᠳ ᠭᠡᠵᠦ ᠮᠡᠳᠡᠭᠰᠡᠨ ᠦᠭᠡᠢ ᠯᠡ ᠪᠤᠯᠤᠯᠳᠠᠢ᠂ ᠨᠢᠭᠡ ᠶᠢ ᠨᠢ ᠴᠢᠮᠪᠠᠢ ᠪᠣᠭᠤᠯᠲᠠ ᠲᠠᠢ ᠴᠡᠪᠡᠷ ᠤᠰᠤᠨ ᠤ ᠰᠠᠪᠠᠨ ᠳᠡᠭᠡᠷ᠎ᠡ ᠰᠠᠭᠤᠯᠭᠠᠵᠤ᠂ ᠪᠠᠰᠠ ᠨᠢᠭᠡ ᠶᠢ ᠨᠢ ᠲᠡᠮᠦᠷ ᠰᠠᠭᠤᠳᠠᠯ ᠳᠡᠭᠡᠷ᠎ᠡ ᠲᠣᠬᠢᠷᠠᠭᠤᠯᠵᠠᠢ᠃ ᠡᠭᠦᠨ ᠢ ᠲᠡᠳᠡ ᠶᠠᠭᠠᠬᠢᠨ ᠵᠦᠭᠡᠷ ᠥᠩᠭᠡᠷᠡᠭᠦᠯᠵᠦ ᠴᠢᠳᠠᠬᠤ ᠪᠢᠯᠡ ᠳ᠋ᠧ᠃ ᠤᠷᠳᠤ ᠵᠠᠮ ᠤᠨ ᠠᠶᠠᠨ ᠳᠤ ᠣᠨᠢᠭ᠎ᠠ ᠵᠣᠬᠢᠶᠠᠵᠤ ᠨᠢᠭᠡ ᠨᠢᠭᠡᠨ ᠤ ᠪᠠᠨ ᠠᠶᠠᠨ ᠤ ᠶᠠᠳᠠᠷᠠᠭ᠎ᠠ ᠶᠢ ᠲᠠᠶᠢᠯᠤᠭᠰᠠᠨ ᠢ ᠨᠢ ᠰᠡᠶᠢᠷᠡᠭᠦᠯᠪᠡᠯ᠄ ︽ᠥᠯᠵᠡᠶᠢᠨᠠᠷᠠᠨ ᠢ ᠤᠰᠤᠨ ᠳᠡᠭᠡᠷ᠎ᠡ ᠰᠠᠭᠤᠵᠤ ᠤᠷᠤᠯᠳᠤᠭᠠᠨ ᠳᠤ ᠶᠠᠪᠤᠨ᠎ᠠ ᠭᠡᠳᠡᠭ ᠢ ᠨᠢ ᠤᠷᠢᠳᠤ ᠶᠡᠷᠦ ᠨᠢ ᠵᠡᠭᠦᠳᠦᠯᠡᠭᠡ ᠦᠭᠡᠢ ᠶᠤᠮ ᠳ᠋ᠠ︾ ᠭᠡᠵᠦ ᠶᠠᠪᠤᠭᠤᠯᠬᠤ ᠳᠤ᠂ ︽ᠲ᠊ · ᠰᠡᠴᠡᠨᠬᠤᠸᠠᠷ ᠳᠡᠭᠦᠦ ᠮᠢᠨᠢ ᠲᠡᠮᠦᠷ ᠰᠠᠨᠳᠠᠯᠢ ᠳᠡᠭᠡᠷ᠎ᠡ ᠰᠠᠭᠤᠵᠤ ᠮᠢᠩᠭᠠᠨ ᠤ ᠭᠠᠵᠠᠷ ᠠᠶᠠᠯᠠᠬᠤ ᠪᠠᠨ ᠮᠡᠳᠡᠭᠰᠡᠨ ᠪᠣᠯ ᠲᠠᠷᠬᠠᠨ ᠤ ᠤᠷᠤᠯᠳᠤᠭᠠᠨ ᠳᠤ ᠰᠢᠯᠦᠭ ᠶᠠᠭᠤᠨ ᠳᠠᠭᠠᠨ ᠪᠢᠴᠢᠯ᠎ᠡ ︾ ᠬᠡᠮᠡᠨ ᠬᠠᠷᠢᠭᠤ ᠪᠠᠷᠢᠬᠤ ᠪᠠᠨ ᠮᠠᠷᠲᠠᠭᠰᠠᠨ ᠦᠭᠡᠢ  ᠃ ᠬᠠᠷᠢᠨ ᠪᠡᠶ᠎ᠡ ᠪᠢᠯᠢᠭ ᠬᠤᠶᠠᠷ ᠢᠶᠠᠷ ᠢᠶᠠᠨ ᠲᠣᠮᠣ ᠪᠢᠯᠢᠭᠪᠡᠭᠠᠲᠤᠷ ᠵᠢᠯᠣᠭᠤᠴᠢ ᠶᠢᠨ ᠳᠡᠷᠭᠡᠳᠡᠬᠢ ᠵᠥᠭᠡᠯᠡᠨ ᠰᠠᠭᠤᠳᠠᠯ ᠳᠡᠭᠡᠷ᠎ᠡ ᠶᠡᠬᠡᠮᠰᠦᠭ ᠰᠠᠭᠠᠲᠠᠵᠤ ᠢᠷᠪᠠᠶᠢᠵᠤ ᠪᠠᠶᠢᠭᠠᠳ ᠰᠡᠴᠡᠨᠬᠤᠸᠠᠷ ᠤᠨ ᠪᠠᠳᠠᠢ ᠨᠠᠭᠤᠷ ᠤᠨ ᠡᠯᠡᠰᠦᠨ ᠴᠣᠬᠢᠶᠠᠨ ᠤ ᠡ᠊ᠩᠭᠡᠷ ᠲᠤ ᠨᠠᠷᠠ ᠡᠭᠡᠭᠡᠵᠦ ᠲᠠᠲᠠᠭᠤᠯᠤᠭᠰᠠᠨ ᠵᠢᠷᠤᠭ ᠢ ᠪᠦᠷ ᠭᠠᠯ ᠠᠶᠠᠨ ᠤ ᠴᠤᠭᠯᠠᠷᠠᠯ ᠤᠨ ᠲᠠᠪᠴᠠᠩ ᠳᠡᠭᠡᠷ᠎ᠡ ᠲᠠᠯᠪᠢᠬᠤ ᠳᠠᠭᠠᠨ ᠬᠠᠵᠠᠭᠤ  ᠳᠤᠨᠢ ︽ᠠᠯᠠᠱᠠ ᠳᠤ ᠢᠷᠡᠭᠡᠳ ᠠᠭᠠᠯᠵᠢ ᠪᠣᠯᠵᠠᠢ᠂ ᠠᠶᠢᠪᠠᠭ᠎ᠠ ᠳᠤ ᠣᠴᠢᠭᠠᠳ ᠶᠠᠭᠤ ᠪᠤᠯᠬᠤ ᠪᠣᠯ ᠳ᠋ᠠ︖︾ ᠬᠡᠮᠡᠨ ᠪᠠᠬ᠎ᠠ ᠪᠠᠨ ᠬᠠᠨᠲᠠᠯ᠎ᠠ ᠪᠠᠷᠢᠵᠤ ᠱᠣᠣᠯᠠᠵᠠᠢ᠃ ᠰᠠᠶᠢᠨ ᠤᠷᠠᠨ ᠪᠦᠲᠦᠭᠡᠯᠴᠢ᠂ ᠰᠠᠶᠢᠨ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠭᠡᠭᠴᠢ ᠦᠭᠡ ᠬᠡᠮᠡᠬᠦ ᠲᠣᠷᠭᠠᠨ ᠤᠲᠠᠰᠤ ᠪᠠᠷ ᠣᠷᠴᠢᠯᠠᠩ ᠬᠡᠮᠡᠬᠦ ᠲᠣᠣᠷ ᠨᠡᠬᠡᠵᠦ ᠶᠠᠪᠤᠭ᠎ᠠ ︽ᠤᠷᠠᠯᠢᠭ ᠤᠨ ᠠᠭᠠᠯᠵᠢ ᠤᠳ︾ ᠰᠢᠦ᠃ ᠲᠦᠩᠭᠡᠳᠦ ᠶᠢᠨ ᠴᠤᠤᠳᠠᠯ ᠭᠤᠸᠠᠢ ᠨᠢᠭᠡ ᠤᠳᠠᠭ᠎ᠠ ︽ᠮᠣᠩᠭᠤᠯᠴᠤᠳ ᠣᠨᠢᠭ᠎ᠠ ᠦᠭᠡᠢ  ᠪᠠᠷ ᠠᠮᠢᠳᠤᠷᠠᠵᠤ ᠪᠤᠯᠳᠠᠭ ᠶᠤᠮ ᠤᠤ  ︖︾ ᠭᠡᠵᠦ ᠬᠡᠯᠡᠭᠰᠡᠨ ᠭᠡᠳᠡᠭ᠃ ᠤᠬᠠᠭᠠᠨ ᠪᠢᠯᠢᠭᠲᠦ ᠠᠷᠠᠳ ᠲᠦᠮᠡᠨ ᠤ ᠮᠢᠨᠢ ᠴᠡᠴᠡ ᠶᠢᠨ ᠨᠢᠭᠡ ᠨᠢ ᠣᠨᠢᠭ᠎ᠠ ᠪᠢᠵᠡ᠃ ᠲᠡᠳᠡ ᠭᠤᠷᠪᠠ ᠮᠠᠨᠢ ᠮᠢᠩᠭᠠᠨ ᠭᠠᠵᠠᠷ ᠤᠨ ᠬᠤᠯᠠ ᠳᠤ ᠬᠤᠷᠸ᠎ᠠ ᠶᠢ ᠭᠦᠪᠢᠲᠡᠯ᠎ᠡ ᠰᠡᠳᠬᠢᠯ ᠤᠨ ᠬᠠᠶᠢᠯᠤᠨ ᠪᠣᠯᠤᠭᠰᠠᠨ ᠰᠢᠯᠦᠭ ᠢᠶᠠᠨ ᠪᠤᠳᠤᠵᠤ᠂ ᠪᠢᠰᠢᠯᠭᠠᠵᠤ᠂ ᠴᠡᠭᠡᠵᠢᠯᠡᠵᠦ᠂ ᠬᠤᠲᠠᠯᠠ ᠶᠢ ᠪᠠᠶᠠᠷᠯᠠᠭᠤᠯᠲᠠᠯ᠎ᠠ ᠣᠨᠢᠭ᠎ᠠ ᠵᠣᠬᠢᠶᠠᠵᠤ ᠨᠢᠭᠡ ᠨᠢᠭᠡ ᠪᠠᠨ ︽ᠢᠳᠡᠭᠰᠡᠭᠡᠷ  ︾ ᠴᠠᠭ ᠵᠠᠢ ᠪᠠᠨ ᠮᠠᠷᠲᠠᠮᠠᠷ ᠪᠣᠯᠤᠭᠰᠠᠨ ᠴᠤ ᠮᠠᠷᠭᠠᠰᠢ ᠨᠢ  ᠰᠢᠯᠦᠭ ᠤᠨ ᠨᠠᠭᠠᠳᠤᠮ ᠤᠨ ᠳᠡᠪᠵᠢᠶᠡᠨ ᠳᠡᠭᠡᠷ᠎ᠡ ᠲᠡᠪᠡᠯ ᠢᠶᠠᠷ ᠢᠶᠠᠨ ᠭᠠᠩᠭᠠᠷᠠᠭᠰᠠᠨ ᠭᠤᠷᠪᠠᠨ ᠳᠡᠭᠦᠦ ᠮᠢᠨᠢ ᠳᠡᠯᠡᠬᠡᠢ ᠶᠢ ᠪᠠᠶᠠᠰᠲᠠᠯ᠎ᠠ ᠰᠢᠯᠦᠭ ᠢᠶᠠᠨ ᠤᠩᠰᠢᠭᠰᠠᠨ ᠰᠤᠷᠠᠭ ᠲᠠᠢ᠃ ᠮᠠᠨ ᠤ ᠭᠠᠯ ᠠᠶᠠᠨ ᠤ  ᠬᠢᠨ ᠠᠯᠳᠠᠨ ᠲᠤᠤᠷᠠᠶᠢᠳᠤ ᠨᠤᠲᠤᠭ ᠠᠴᠠ ᠠᠶᠢᠪᠠᠭ᠎ᠠ ᠤᠷᠤᠭᠤ ᠴᠠᠭᠢᠯᠵᠤ ᠶᠠᠪᠤᠭᠰᠠᠨ ᠭᠤᠷᠪᠠᠨ ᠤᠷᠠᠨ ᠪᠦᠲᠦᠭᠡᠯᠴᠢ ᠵᠠᠯᠠᠭᠤ ᠳᠠᠭᠠᠨ ᠤᠷᠤᠯᠳᠤᠭᠠᠨ ᠤ ᠥᠨᠳᠥᠷ ᠠᠮᠵᠢᠯᠲᠠ ᠶᠢ ᠢᠷᠦᠭᠡᠵᠦ ᠢᠯᠡᠭᠦᠦ ᠬᠡᠳᠦᠨ ᠬᠤᠨᠳᠠᠭ᠎ᠠ ᠬᠥᠨᠲᠥᠷᠦᠭᠰᠡᠨ ᠪᠢᠯᠡ᠃ ᠡᠬᠡ ᠬᠡᠯᠡᠨ ᠤ ᠪᠠᠨ ᠨᠥᠮᠥᠷᠢ ᠳᠤ ᠪᠠᠭᠲᠠᠵᠤ ᠶᠠᠪᠤᠭ᠎ᠠ ᠡᠨᠡ ᠬᠡᠳᠦᠨ ᠰᠢᠯᠦᠭᠴᠢ ᠶᠢ ᠪᠢᠳᠠ ᠥᠪᠡᠷ ᠢᠶᠠᠨ ᠬᠠᠶᠢᠷᠠᠯᠠᠬᠤ ᠦᠭᠡᠢ᠂ ᠥᠭᠡᠷ᠎ᠡ ᠬᠡᠨ ᠬᠠᠶᠢᠷᠠᠯᠠᠬᠤ ᠪᠤᠢ⁈          ᠣᠷᠴᠢᠯᠠᠩ ᠢ ᠭᠠᠳᠠᠨ᠎ᠠ ᠪᠠᠨ ᠤᠶᠠᠭᠰᠠᠨ ᠴᠢᠩᠭᠢᠰ ᠤᠨ ᠴᠢᠯᠠᠭᠤᠨ ᠱᠣᠩ᠂ ᠲᠡᠭᠡᠷᠮ᠎ᠡ ᠶᠢᠨ ᠴᠢᠯᠠᠭᠤ ᠲᠠᠢ᠂ ᠣᠷᠣᠵᠤ ᠭᠠᠷᠬᠤ ᠭᠡᠶᠢᠴᠢᠨ ᠵᠣᠴᠢᠨ ᠳᠠᠭᠠᠨ ᠣᠪᠣᠭ᠎ᠠ ᠪᠣᠯᠭᠠᠨ ᠨᠢ ᠦᠯᠢᠭᠡᠷ ᠬᠦᠦᠷᠨᠢᠭᠰᠡᠨ᠂ ᠠᠳᠤᠭᠤ ᠲᠤᠷᠭᠢᠬᠤ ᠨᠠᠮᠤᠷ ᠨᠢ ᠠᠷᠭᠠᠮᠵᠢᠶ᠎ᠠ ᠲᠠᠢ ᠶᠤᠮ ᠰᠢᠭ᠋ ᠤᠶᠠᠭ᠎ᠠ ᠲᠣᠭᠤᠷᠢᠭᠰᠠᠨ᠂ ᠠᠯᠳᠠᠨ ᠤᠨᠢᠶᠠᠷ ᠰᠡᠩᠰᠡᠷᠡᠭᠰᠡᠨ ᠬᠤᠷᠮᠣᠢ ᠳᠤᠨᠢ ᠠᠷᠴᠠ ᠴᠡᠴᠡᠭ ᠤᠷᠤᠯᠳᠤᠨ ᠤᠷᠭᠤᠭᠰᠠᠨ ᠠᠯᠠᠭ ᠠᠭᠤᠯᠠ᠂ ᠠᠯᠳᠠᠨ ᠲᠠᠪᠰᠢ ᠭᠡᠳᠡᠭ ᠢᠬᠢᠷ᠎ᠡ ᠬᠤᠶᠠᠷ ᠠᠭᠤᠯᠠᠨ ᠳᠤ ᠭᠠᠷᠴᠤ ᠬᠡᠶᠢᠮᠣᠷᠢ ᠪᠠᠨ ᠰᠡᠷᠭᠦᠭᠡᠬᠦ ᠪᠣᠯ ᠮᠠᠨ ᠤ ᠡᠨᠡ ᠤᠳᠠᠭᠠᠨ ᠤ ᠰᠣᠶᠣᠯ ᠤᠨ ᠠᠶᠠᠨ ᠤ ᠬᠢᠨ ᠤ ᠲᠣᠮᠣ ᠮᠥᠷᠥᠭᠡᠳᠦᠯ ᠪᠠᠶᠢᠯ᠎ᠠ᠃ ᠤᠯᠠᠨ ᠤ ᠪᠠᠨ ᠠᠮᠤᠷ ᠲᠠᠶᠢᠪᠤᠩ ᠢ ᠪᠤᠳᠤᠵᠤ ᠨᠤᠲᠤᠭ ᠤᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠵᠢᠯᠣᠭᠤ ᠪᠠᠷᠢᠬᠤ ᠪᠠᠷ ᠪᠣᠯᠵᠤ᠂ ᠠᠯᠲᠠᠨᠴᠤᠭ ᠤᠨ ᠴᠤᠭ ᠲᠠᠢ ᠨᠠᠶᠢᠷᠠᠭᠴᠢ ᠼᠡᠶ᠋ᠢᠩᠰᠠᠩ ᠮᠠᠨᠢ ᠵᠠᠮ ᠳᠠᠭᠠᠭᠤᠯᠵᠤ᠂ ᠮᠢᠨᠤ ᠪᠡᠶ᠎ᠡ ᠴᠤ ︽ᠵᠢᠯᠣᠭᠤᠴᠢ︾  ᠶᠢᠨ ᠡ᠊ᠩᠨᠡᠭᠡᠨ ᠳᠤ ᠳᠤᠷᠠᠲᠠᠢ ᠪᠠᠭᠲᠠᠵᠤ ︽ᠥᠷᠭᠡᠨ ᠲᠠᠯ᠎ᠠ ᠠᠴᠠ ᠢᠷᠡᠭᠰᠡᠨ ᠲᠠ ᠨᠠᠷ ᠥᠨᠳᠥᠷ ᠠᠭᠤᠯᠠᠨ ᠠᠴᠠ ᠰᠦᠷᠳᠡᠵᠦ ᠮᠠᠭᠠᠳ᠂ ᠲᠠᠮᠤᠴᠢ ᠶᠢᠨ ᠲᠠᠯ᠎ᠠ ᠠᠴᠠ ᠢᠷᠡᠭᠰᠡᠨ  ᠲᠠ ᠨᠠᠷ ᠲᠠᠭ ᠠᠶᠤᠭᠠᠳ ᠪᠠᠶᠢᠪᠠᠯ ᠲᠡᠷᠭᠡᠨ ᠳᠣᠲᠣᠷ᠎ᠠ ᠪᠠᠨ ᠲᠠᠷᠪᠠᠭ᠎ᠠ ᠰᠢᠭ᠋ ᠲᠦᠷ ᠢᠴᠡᠭᠡᠯᠡᠵᠦ ᠪᠠᠢ︾ ᠬᠡᠮᠡᠨ ᠨᠢᠭᠡ ᠮᠠᠰᠢᠨ ᠳᠤ ᠬᠠᠮᠲᠤ ᠶᠠᠪᠤᠭ᠎ᠠ ᠰᠤᠪᠤᠳ ᠡᠭᠡᠴᠢ᠂ ᠦᠬᠡᠷ ᠰᠢᠭ ᠤᠯᠠᠨ ᠪᠦᠲᠦᠭᠡᠯ ᠲᠠᠢ ᠪᠤᠬ᠎ᠠ ᠲᠡᠮᠦᠷ᠂ ᠣᠶᠤᠨᠴᠡᠴᠡᠭ ᠭᠡᠳᠦ ᠶᠢ ᠱᠣᠣᠯᠠᠵᠤ ᠶᠠᠪᠤᠲᠠᠯ᠎ᠠ᠂ ︽ᠲᠡᠭᠷᠢ ᠶᠢᠨ ᠪᠣᠲᠣᠭᠤ︾ ᠨᠠᠭᠠᠳᠤᠮ ᠤᠨ ᠲᠡᠷᠢᠭᠦᠨ ᠱᠠᠩᠨᠠᠯᠲᠤ ᠥᠯᠵᠡᠶᠢᠨᠠᠷᠠᠨ ᠳᠡᠭᠦᠦ ᠮᠢᠨᠢ ︽ᠬᠠᠳᠠ ᠳᠠᠷᠤᠭ᠎ᠠ ᠰᠢᠯᠦᠭ ᠣᠪᠣᠭ᠎ᠠ ᠪᠢᠴᠢᠬᠦ ᠮᠥᠷᠲᠡᠭᠡᠨ ᠮᠠᠰᠢᠨ ᠴᠤ ᠣᠪᠣᠭ᠎ᠠ ᠪᠠᠷᠢᠴᠢᠬᠠᠳᠠᠭ ᠶᠤᠮ ᠪᠠᠶᠢᠨ᠎ᠠ︾ ᠭᠡᠵᠦ ᠬᠠᠷᠢᠭᠤ ᠪᠠᠷᠢᠯ᠎ᠠ᠃ ᠠᠯᠠᠱᠠ ᠳᠤ ᠤᠯᠠᠨ ᠴᠤ ᠢᠷᠡᠭᠰᠡᠨ᠂ ᠤᠯᠠᠨ ᠴᠤ ᠨᠠᠭᠠᠳᠤᠮ ᠳᠤ ᠤᠳᠤ ᠪᠣᠯᠵᠤ ᠶᠠᠪᠤᠭᠰᠠᠨ ᠥᠯᠵᠡᠶᠢᠨᠠᠷᠠᠨ ᠥᠩ ᠥᠷᠭᠡᠨ ᠠᠯᠠᠱᠠ ᠶᠢ ᠣᠩᠭᠤᠳ ᠠᠪᠢᠶᠠᠰ ᠬᠤᠶᠠᠷ ᠢᠶᠠᠷ ᠢᠶᠠᠨ ᠬᠥᠭᠯᠡᠵᠦ ᠲᠠᠨᠢᠭᠰᠠᠨ ᠪᠣᠯ ᠠᠯᠠᠱᠠ ᠨᠤᠲᠤᠭ ᠤᠨ ᠠᠭᠤᠯᠠ ᠬᠠᠶᠢᠷᠬᠠᠳ ᠲᠡᠭᠦᠨ ᠢ ︽ᠰᠢᠯᠦᠭᠴᠢ ᠬᠦᠦ ᠮᠢᠨᠢ︾ ᠭᠡᠵᠦ ᠲᠤᠰᠴᠤ ᠠᠪᠤᠭᠰᠠᠨ ᠶᠤᠮ᠃ ᠲᠡᠷᠡ ᠪᠠᠷ ᠠᠯᠠᠱᠠ ᠳᠤ ᠡᠯᠢᠭᠡ ᠲᠠᠢ ᠨᠢ ᠢᠯᠡᠭᠡᠨ᠃ ᠮᠣᠩᠭᠤᠯ ᠨᠤᠲᠤᠭ ᠤᠨ ᠮᠢᠨᠢ ᠬᠠᠯᠠᠭᠤᠨ ᠰᠢᠷᠣᠢ ᠬᠠᠮᠢᠭ᠎ᠠ ᠴᠤ ᠭᠡᠰᠡᠨ ᠪᠢᠳᠠᠨ ᠢ ᠪᠠᠨ ᠪᠦᠪᠡᠶᠢᠯᠡᠨ ᠢᠪᠡᠭᠡᠭᠰᠡᠭᠡᠷ ᠠᠵᠤᠭᠤ᠃ ᠣᠪᠣᠭ᠎ᠠ ᠬᠠᠶᠢᠷᠬᠠᠨ ᠢᠶᠠᠨ ᠲᠠᠭᠢᠵᠤ ᠯᠡ ᠪᠠᠶᠢᠶ᠎ᠠ᠂ ᠤᠩᠭᠤᠨ ᠪᠠᠶᠢᠭᠠᠯᠢ ᠳᠠᠭᠠᠨ ᠣᠶᠢᠷᠠᠬᠠᠨ ᠯᠡ ᠶᠠᠪᠤᠶ᠎ᠠ᠃          ᠲᠡᠭᠡᠭᠡᠳ ᠣᠷᠣᠢ ᠨᠢ ᠪᠢᠳᠠ ᠰᠠᠶᠢᠨ ᠤ ᠢᠷᠦᠭᠡᠯ ᠰᠢᠩᠭᠡᠭᠰᠡᠨ ᠰᠡᠳᠬᠢᠯ ᠤᠨ ᠬᠠᠳᠠᠭ ᠳᠡᠭᠡᠷ᠎ᠡ ᠪᠠᠨ ᠪᠢᠯᠢᠭ ᠤᠨ ᠨᠢᠳᠦ ᠪᠠᠨ ᠨᠡᠭᠡᠭᠡᠵᠦ ᠪᠢᠴᠢᠭᠰᠡᠨ ᠨᠣᠮ ᠤᠨ ᠪᠡᠯᠡᠭ ᠲᠠᠢ ᠪᠠᠨ ᠬᠠᠮᠲᠤ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠵ᠊ · ᠰᠤᠳᠤᠨᠤᠮ ᠳᠡᠭᠦᠦ ᠶᠢᠨ ᠳᠡᠭᠡᠨ ᠬᠦᠷᠴᠦ ᠣᠴᠢᠯ᠎ᠠ᠃ ᠲᠡᠳᠡᠨ ᠤ ᠬᠢ ᠴᠤ ᠠᠯᠠᠱᠠ ᠨᠤᠲᠤᠭ ᠤᠨ ᠶᠣᠰᠣ ᠵᠠᠩᠰᠢᠯ ᠢᠶᠠᠷ ᠤᠭᠤᠴᠠ ᠰᠢᠭᠦᠰᠦ ᠪᠠᠨ ᠲᠠᠯᠪᠢᠵᠤ᠂ ᠤᠬᠠᠭᠠᠯᠢᠭ ᠮᠥᠷᠲᠡᠭᠡᠨ ᠭᠦᠳᠡᠯᠮᠦᠷᠢᠴᠢ ᠪᠦᠰᠡᠭᠦᠢ ᠮᠡᠷᠭᠡᠨ ᠨᠢ ᠥᠪᠡᠷ ᠤᠨ ᠭᠠᠷ ᠢᠶᠠᠷ ᠢᠶᠠᠨ ᠬᠢᠭᠰᠡᠨ᠂ ᠠᠭᠤᠯᠠ ᠶᠢᠨ ᠵᠢᠪᠠᠷ ᠲᠤ ᠡᠪᠡᠷᠡᠭᠡᠭᠰᠡᠨ ᠥᠷᠥᠮ᠎ᠡ ᠬᠤᠷᠤᠳ ᠢᠶᠠᠷ ᠢᠶᠠᠨ ᠤᠯᠠᠨ ᠢ ᠳᠠᠶᠢᠯᠠᠵᠤ ᠪᠢᠯᠡ᠃ ᠪᠢᠳᠠ ᠠᠯᠠᠭ ᠠᠭᠤᠯᠠ ᠠᠯᠳᠠᠨ ᠲᠠᠪᠰᠢ ᠶᠢᠨ ᠰᠥᠨᠢ ᠶᠢᠨ ᠲᠡᠭᠷᠢ ᠳᠤ ᠤᠳᠤ ᠲᠦᠭᠡᠭᠡᠲᠡᠯ᠎ᠡ ᠰᠢᠯᠦᠭ ᠢᠶᠠᠨ ᠤᠩᠰᠢᠵᠤ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠵᠠᠭᠠᠯ᠎ᠠ᠃ ᠮᠠᠯᠴᠢᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠤᠨ ᠢᠶᠠᠨ ᠳᠤᠮᠳᠠ ᠬᠦᠷᠴᠦ ᠲᠡᠳᠡᠨ ᠳᠡᠭᠡᠨ ᠤᠷᠮ᠎ᠠ ᠬᠠᠶᠢᠷᠠᠯᠠᠬᠤ ᠶᠢᠨ ᠳᠠᠭᠠᠤ ᠦᠭᠡ ᠶᠢ ᠨᠢ ᠰᠤᠨᠤᠰᠬᠤ ᠪᠣᠯ ᠮᠠᠨ ᠤ ᠡᠨᠡ ᠤᠳᠠᠭᠠᠨ ᠤ ᠰᠣᠶᠣᠯ ᠤᠨ ᠭᠠᠯ ᠠᠶᠠᠨ ᠤ ᠭᠤᠣᠯ ᠵᠣᠷᠢᠯᠭ᠎ᠠ ᠶᠢᠨ ᠨᠢᠭᠡ ᠨᠢ ᠶᠤᠮ᠃ ᠣᠨᠴᠠᠯᠠᠨ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠭ᠊ ·  ᠮᠥᠩᠬᠡᠵᠢᠷᠭᠠᠯ ᠲᠡᠷᠢᠭᠦᠲᠡᠢ ᠵᠣᠬᠢᠶᠠᠯᠴᠢᠳ ᠤᠨ ᠡ᠊ᠩᠨᠡᠭᠡ ᠠᠯᠢ ᠡᠷᠲᠡ ᠠᠴᠠ ᠥᠪᠥᠷ ᠮᠣᠩᠭᠤᠯ ᠳᠠᠭᠠᠨ ᠤᠩᠰᠢᠭᠴᠢᠳ ᠤᠨ ᠢᠶᠠᠨ  ᠥᠨᠳᠥᠷ ᠦᠨᠡᠯᠡᠯᠲᠡ ᠶᠢ ᠣᠯᠣᠭᠰᠠᠭᠠᠷ ᠢᠷᠡᠭᠰᠡᠨ ᠶᠤᠮ᠃ ᠣᠨᠴᠠᠯᠠᠨ ᠵ᠊ ·  ᠰᠡᠷᠭᠦᠯᠡᠩ᠂ ᠵ᠊ · ᠰᠤᠳᠤᠨᠤᠮ ᠡᠭᠡᠴᠢ ᠳᠡᠭᠦᠦ ᠬᠡᠳᠦᠭᠦᠯᠡ ᠤᠨᠠᠭ᠎ᠠ ᠨᠢ ᠪᠤᠰᠬᠠᠭ᠎ᠠ ᠪᠠᠷ ᠢᠶᠠᠨ  ᠳᠦᠷᠦᠳᠡᠭ ᠠᠯᠠᠭ ᠠᠭᠤᠯᠠᠨ ᠳᠠᠭᠠᠨ ᠠᠳᠤᠭᠤ ᠪᠠᠨ ᠮᠠᠨᠠᠵᠤ ᠶᠠᠪᠤᠬᠤ ᠳᠠᠭᠠᠨ᠂ ᠡᠭᠦᠯᠡ ᠨᠢ ᠵᠢᠯᠠᠭᠠᠨ ᠳᠠᠭᠠᠨ ᠠᠷᠴᠠ ᠪᠣᠯᠣᠨ ᠤᠷᠭᠤᠳᠠᠭ᠂ ᠡᠪᠡᠰᠦ ᠨᠢ ᠰᠣᠷᠭᠤᠭ ᠪᠡᠯᠴᠢᠭᠡᠷ ᠲᠡᠭᠡᠨ ᠦᠬᠡᠷ ᠬᠤᠨᠢ ᠪᠠᠨ ᠬᠠᠷᠢᠭᠤᠯᠵᠤ ᠶᠠᠪᠤᠬᠤ ᠳᠠᠭᠠᠨ ᠰᠢᠯᠦᠭ ᠠᠴᠠ ᠪᠠᠨ ᠰᠠᠯᠤᠭ᠎ᠠ ᠦᠭᠡᠢ᠂ ᠰᠡᠳᠬᠢᠯ ᠳᠤᠨᠢ ᠭᠡᠷᠡᠯ ᠭᠡᠭᠡ ᠪᠣᠯᠵᠤ ᠢᠷᠡᠳᠡᠭ ᠨᠣᠮ ᠠᠴᠠ ᠰᠠᠯᠤᠭ᠎ᠠ ᠦᠭᠡᠢ ᠠᠵᠢ᠃ ᠨᠤᠲᠤᠭ ᠤᠰᠤ ᠨᠢ ᠬᠦᠦ ᠬᠡᠦᠬᠡᠨ ᠳᠡᠭᠡᠨ ᠠᠪᠢᠶᠠᠰ ᠪᠢᠯᠢᠭ ᠬᠠᠶᠢᠷᠠᠯᠠᠳᠠᠭ ᠪᠣᠯ ᠨᠣᠮ ᠤᠨ ᠠᠬ᠎ᠠ ᠡᠭᠡᠴᠢ ᠨᠠᠷ ᠨᠢ ᠳᠡᠭᠦᠦ ᠨᠠᠷ ᠲᠡᠭᠡᠨ ᠳᠠᠭᠤᠷᠢᠶᠠᠯ ᠪᠤᠯᠳᠠᠭ ᠠᠵᠢ᠃ ᠶᠠᠭ ᠡᠶᠢᠮᠦ ᠶᠢᠨ ᠤᠴᠢᠷ ᠠᠯᠠᠭ ᠠᠭᠤᠯᠠ ᠠᠯᠳᠠᠨ ᠲᠠᠪᠰᠢ ᠶᠢᠨ ᠰᠠᠯᠬᠢ ᠵᠠᠯᠭᠢᠯᠠᠵᠤ ᠥᠰᠦᠭᠰᠡᠨ ᠰᠠᠶᠢᠨᠪᠠᠶᠠᠷ ᠤᠨ ᠠᠯᠲᠠᠨᠴᠢᠯᠠᠭᠤ᠂ ᠼᠡᠶ᠋ᠢᠩᠰᠠᠩ ᠬᠤᠶᠠᠷ ᠮᠠᠨᠢ ᠡᠨᠡ ᠨᠤᠲᠤᠭ ᠠᠴᠠ ᠥᠰᠴᠦ ᠥᠨᠳᠡᠶᠢᠨ ᠥᠪᠥᠷ ᠮᠣᠩᠭᠤᠯ ᠳᠠᠭᠠᠨ ᠮᠡᠳᠡᠷᠡᠭᠳᠡᠭᠰᠡᠨ ᠵᠠᠯᠠᠭᠤ ᠤᠷᠠᠨ ᠪᠦᠲᠦᠭᠡᠯᠴᠢ ᠪᠣᠯᠵᠤ ᠶᠠᠪᠤᠭ᠎ᠠ᠂ ᠳᠡᠯᠡᠬᠡᠢ ᠲᠡᠳᠡᠨ ᠢ ᠬᠦᠯᠢᠶᠡᠵᠦ ᠪᠤᠢ᠃          ᠠᠯᠲᠠᠨᠴᠢᠯᠠᠭᠤ ᠮᠠᠨᠢ ᠡᠨᠡ ᠤᠳᠠᠭᠠᠨ ᠤ ᠬᠤᠶᠠᠷ ᠨᠤᠲᠤᠭ ᠤᠨ ᠵᠣᠬᠢᠶᠠᠯᠴᠢᠳ ᠤᠨ ᠠᠭᠤᠯᠵᠠᠯᠲᠠ᠂ ᠰᠣᠶᠣᠯ ᠤᠨ ᠰᠣᠯᠢᠯᠴᠠᠭᠠᠨ ᠤ ᠠᠵᠢᠯᠯᠠᠭ᠎ᠠ ᠶᠢ ᠵᠣᠬᠢᠶᠠᠨ ᠪᠠᠶᠢᠭᠤᠯᠬᠤ ᠳᠤ ᠬᠥᠭᠦᠷᠭᠡ ᠪᠣᠯᠵᠤ ᠮᠠᠰᠢ ᠶᠡᠭᠡ ᠤᠬᠠᠭᠠᠨ ᠭᠦᠳᠡᠯᠮᠦᠷᠢ ᠵᠠᠷᠤᠴᠠᠭᠤᠯᠤᠭᠰᠠᠨ ᠶᠤᠮ᠃ ᠲᠡᠷᠡ ᠪᠠᠷ ᠠᠪᠤ ᠶᠢᠨ ᠨᠤᠲᠤᠭ ᠠᠯᠲᠠᠨᠴᠤᠭ ᠲᠤᠨᠢ ᠬᠦᠷᠴᠦ ᠢᠷᠡᠭᠰᠡᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠲᠤ ᠵᠣᠷᠢᠭᠤᠯᠵᠤ ᠰᠢᠯᠦᠭ ᠢᠶᠠᠨ ᠤᠩᠰᠢᠴᠢᠬᠠᠭᠠᠳ᠂ ︽ᠪᠢ ᠰᠢᠯᠦᠭ ᠬᠡᠯᠡᠭᠡ ᠦᠭᠡᠢ᠂ ᠨᠤᠲᠤᠭ ᠤᠨ ᠮᠢᠨᠢ ᠠᠭᠤᠯᠠ ᠨᠠᠳᠠ ᠪᠠᠷ ᠬᠡᠯᠡᠭᠦᠯᠦᠭᠰᠡᠨ ᠶᠤᠮ︾ ᠭᠡᠵᠦ ᠬᠡᠯᠡᠭᠰᠡᠨ ᠨᠢ ᠦᠨᠡᠬᠡᠷ ᠠᠭᠤᠯᠠ ᠶᠢᠨ ᠨᠠᠶᠢᠷᠠᠭᠴᠢ ᠶᠢᠨ ᠤᠬᠠᠭᠠᠨ ᠢ ᠭᠠᠶᠢᠬᠠᠭᠤᠯᠤᠭᠰᠠᠨ ᠤᠴᠢᠷ ᠪᠤᠯᠠᠢ᠃ ᠨᠤᠲᠤᠭ ᠤᠰᠤ ᠪᠠᠷ ᠢᠶᠠᠨ ᠪᠠᠭ᠋ᠠᠷᠬᠠᠵᠤ ᠶᠠᠪᠤᠳᠠᠭ ︽ᠡᠪᠡᠳᠴᠢᠨ︾ ᠵᠦᠪᠭᠡᠨ ᠮᠣᠩᠭᠤᠯ ᠬᠥᠮᠥᠨ ᠳᠤ ᠯᠡ ᠲᠤᠰᠳᠠᠭ ᠪᠢᠵᠡ⁈ᠰᠠᠶᠢᠬᠠᠨ ᠶᠤᠮ ᠠ᠋᠃
  
ᠢᠷᠡᠯᠲᠡ᠄ ᠠᠯᠠᠱᠠ ᠶᠢᠨ ᠡᠳᠦᠷ ᠤᠨ ᠰᠣᠨᠢᠨ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号