ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
﹇ᠤᠷᠠᠨ ᠵᠣᠬᠢᠶᠠᠯ﹈ ᠰᠣᠬᠤᠷ ᠬᠤᠭᠤᠷᠴᠢ ᠶᠢᠨ ᠳᠣᠮᠤᠭ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/4/30
             ᠪᠤᠶᠠᠨᠪᠠᠲᠤ                            ︵ᠵᠡᠭᠦᠳᠦ ᠤᠴᠢᠷ ᠲᠠᠢ᠂ ᠵᠡᠭᠦᠦ ᠰᠦᠪᠡᠭᠴᠢ ᠲᠠᠢ - ᠠᠷᠠᠳ ᠤᠨ ᠵᠦᠢᠷ ᠦᠭᠡ ᠠᠴᠠ︶           ᠬᠤᠭᠤᠷᠴᠢ ᠳ᠋ᠠᠨᠢᠭ᠎ᠠ ᠶᠠᠭᠠᠬᠢᠭᠠᠳ ᠴᠦ ᠶᠤᠮ ᠭᠡᠨᠡᠳᠲᠡ ᠯᠡ ᠮᠥᠷ ᠰᠤᠷᠠᠭ ᠦᠭᠡᠢ ᠠᠯᠠᠭ᠎ᠠ ᠪᠣᠯᠤᠭᠰᠠᠨ ᠭᠡᠨ᠎ᠡ ᠁          ᠤᠤᠯ ᠨᠢ ᠡᠶᠢᠮᠦ ᠠᠵᠤᠭᠤ᠄          ᠰᠡᠭᠦᠯ ᠤᠨ ᠵᠢᠯ ᠤᠳ ᠲᠤ ᠲᠡᠭᠷᠢ ᠬᠠᠩᠭᠠᠢ ᠨᠢᠭᠤᠷ ᠪᠤᠷᠤᠭᠤᠯᠠᠨ ᠬᠤᠷ᠎ᠠ ᠤᠰᠤ ᠪᠠᠨ ᠬᠠᠷᠠᠮᠯᠠᠨ᠂ ᠵᠢᠯ ᠳᠠᠷᠠᠭᠠᠯᠠᠨ ᠭᠠᠩ ᠭᠠᠴᠢᠭ ᠦᠷᠭᠦᠯᠵᠢᠯᠡᠭᠰᠡᠨ ᠤ ᠵᠡᠷᠭᠡᠴᠡᠭᠡ ᠬᠡᠴᠡᠭᠦᠦ ᠨᠡᠷᠡᠲᠦ ᠴᠦ ᠰᠠᠪ ᠯᠡ ᠭᠡᠪᠡᠯ ᠲᠡᠳᠡᠨ ᠤ ᠰᠦᠷᠦᠭ ᠤᠷᠤᠭᠤ ᠤᠯᠠᠩᠭᠠᠰᠤᠨ ᠳᠠᠭᠠᠷᠢᠭᠠᠳ᠂ ︽ᠭᠠᠩ ᠵᠤᠳ ᠲᠠᠢ ᠭᠠᠷ ᠨᠡᠶᠢᠯᠡᠨ︾ ᠥᠨᠥᠬᠢ ᠴᠠᠭᠠᠴᠢ ᠪᠠᠶᠠᠨ ᠤ ᠰᠦᠷᠦᠭ ᠠᠴᠠ ᠪᠠᠭ᠋ᠠᠨ ᠬᠤᠷᠣᠭᠠᠵᠠᠢ᠃ ᠲᠡᠭᠦᠪᠡᠷ ᠪᠠᠷᠠᠬᠤ ᠦᠭᠡᠢ ᠶᠠᠮᠠᠷ ᠴᠦ ᠰᠢᠯᠲᠠᠭᠠᠨ ᠦᠭᠡᠢ ᠪᠠᠷ ᠮᠠᠯ ᠎ ᠨᠢ ᠦᠬᠦᠭᠡᠳ ᠪᠠᠶᠢᠳᠠᠭ ᠪᠣᠯᠪᠠ᠃          ᠲᠡᠭᠡᠭᠡᠳ ᠬᠤᠭᠤᠷᠴᠢ ᠳ᠋ᠠᠨᠢᠭ᠎ᠠ ᠶᠢ ᠵᠠᠯᠠᠵᠤ᠂ ᠬᠤᠭᠤᠷ ᠬᠤᠭᠤᠷᠳᠠᠭᠤᠯᠤᠨ ᠦᠯᠢᠭᠡᠷ ᠲᠤᠤᠯᠢᠰ ᠬᠠᠶᠢᠯᠠᠭᠤᠯᠵᠤ᠂ ᠳᠣᠮ ᠵᠠᠰᠠᠯ ᠬᠢᠯᠭᠡᠪᠡᠯ ᠭᠠᠢ ᠪᠠᠷᠴᠢᠳ ᠠᠴᠠ ᠲᠦᠷᠭᠡᠨ ᠵᠠᠶᠢᠯᠠᠵᠤ ᠪᠤᠯᠬᠤ ᠶᠤᠮ ᠭᠡᠰᠡᠨ ᠵᠠᠷᠤᠴᠠ ᠶᠢᠨ ᠰᠠᠨᠠᠭᠤᠯᠭ᠎ᠠ ᠪᠠᠷ ᠪᠠᠶᠠᠨ ᠴᠠᠭᠠᠴᠢ ᠡᠪᠦᠭᠡᠨ ᠬᠤᠭᠤᠷᠴᠢ ᠶᠢ ᠬᠠᠳᠠᠭ ᠴᠠᠢ ᠲᠠᠢ ᠭᠡᠷ ᠲᠡᠭᠡᠨ ᠵᠠᠯᠠᠭᠰᠠᠨ ᠪᠤᠯᠪᠠᠴᠤ ᠪᠡᠶ᠎ᠡ ᠯᠠᠭᠱᠠᠨ ᠲᠠᠭᠠᠷᠠᠤ ᠪᠠᠶᠢᠨ᠎ᠠ ᠭᠡᠰᠡᠨ ᠰᠢᠯᠲᠠᠭ ᠢᠶᠠᠷ ᠲᠠᠲᠠᠭᠠᠯᠵᠠᠵᠠᠢ᠃ ᠡᠶᠢᠮᠦ ᠶᠠᠩᠵᠤ ᠪᠠᠷ ᠪᠠᠶᠢᠨ ᠲᠠᠭᠢᠨ ᠬᠥᠮᠥᠨ ᠲᠣᠮᠢᠯᠠᠨ ᠵᠠᠯᠠᠭᠰᠠᠨ ᠪᠤᠯᠪᠠᠴᠤ ᠪᠦᠷ ᠯᠡ ᠠᠳᠠᠯᠢᠬᠠᠨ ᠦᠷ᠎ᠡ ᠳ᠋ᠦᠩ ᠣᠯᠪᠠ᠃ ︽ᠭᠤᠣᠯ ᠲᠠᠰᠤᠷᠠᠬᠰᠠᠨ ᠴᠦ ᠭᠤᠷᠢ ᠲᠠᠰᠤᠷᠠᠳᠠᠭ ᠦᠭᠡᠢ︾ ᠨᠥᠭᠦᠭᠡ ᠪᠠᠶᠠᠨ ᠡᠴᠦᠰ ᠤᠨ ᠭᠤᠷᠢᠳᠠᠯᠭ᠎ᠠ ᠡᠪᠦᠷᠯᠡᠨ ᠥᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠢᠶᠠᠨ ᠡᠪᠦᠭᠡᠨ ᠤ ᠳᠤ ᠣᠴᠢᠵᠤ᠂ ᠡᠴᠢᠨᠡᠭᠡᠨ ᠲᠡᠴᠢᠨᠡᠭᠡᠨ ᠯᠠᠩ ᠮᠥᠩᠭᠦ᠂ ᠮᠠᠯ ᠤᠨᠤᠭ᠎ᠠ ᠠᠮᠠᠯᠠᠨ ᠰᠥᠬᠦᠷᠡᠬᠦ ᠶᠢᠨ ᠨᠠᠭᠠᠭᠤᠷ ᠭᠤᠶᠣᠭᠰᠠᠨ ᠪᠤᠯᠪᠠᠴᠤ ᠬᠤᠭᠤᠷᠴᠢ ᠳ᠋ᠠᠨᠢᠭ᠎ᠠ ᠪᠠᠰᠠ ᠯᠠ ᠬᠥᠳᠡᠯᠦᠭᠰᠡᠨ ᠦᠭᠡᠢ ᠮᠥᠷᠲᠡᠭᠡᠨ ᠲᠡᠭᠰᠢ ᠬᠠᠷᠠᠵᠤ᠂ ᠴᠠᠢ ᠴᠦ ᠠᠶᠠᠭᠠᠯᠠᠭᠰᠠᠨ ᠦᠭᠡᠢ ᠭᠡᠨ᠎ᠡ᠃ ᠪᠠᠶᠠᠨ ᠳᠡᠯᠪᠡᠷᠡᠲᠡᠯ᠎ᠡ ᠪᠠᠨ ᠠᠭᠤᠷᠯᠠᠵᠤ᠂ ᠮᠢᠨᠤ ᠮᠠᠯ ᠰᠦᠷᠦᠭ ᠬᠤᠷᠣᠭᠳᠠᠭᠠᠳ ᠪᠠᠶᠢᠳᠠᠭ ᠨᠢ ᠴᠢᠨᠦ ᠬᠠᠷᠢᠶᠠᠯ ᠵᠢᠳᠭ᠋᠎ᠠ ᠠᠴᠠ ᠪᠣᠯᠤᠭᠰᠠᠨ ᠪᠠᠶᠢᠬ᠎ᠠ ᠬᠡᠮᠡᠨ ᠰᠣᠬᠤᠷ ᠳᠣᠭᠤᠯᠠᠩ᠂ ᠬᠤᠭᠤᠰᠤᠨ ᠶᠠᠳᠠᠭᠤ ᠳᠣᠯᠣᠭᠠᠨ ᠪᠤᠯᠴᠢᠷᠬᠠᠢ ᠶᠢ ᠨᠢ ᠲᠣᠭᠠᠴᠢᠨ ᠬᠠᠷᠢᠶᠠᠭᠠᠳ ᠵᠣᠭᠰᠣᠭᠰᠠᠨ ᠦᠭᠡᠢ ᠬᠤᠶᠠᠷ ᠵᠠᠷᠤᠴᠠ ᠪᠠᠨ ᠵᠠᠷᠯᠢᠭᠳᠠᠨ ᠠᠮᠢᠨ ᠭᠤᠣᠯ ᠨᠢ ᠪᠣᠯᠤᠭᠰᠠᠨ ᠡᠺᠡᠯ ᠬᠡᠮᠡᠬᠦ ᠬᠤᠭᠤᠷ ᠢ ᠨᠢ ᠪᠠᠯᠪᠠ ᠳᠡᠪᠰᠡᠨ ᠬᠤᠭᠤᠯᠵᠤ᠂ ᠲᠤᠯᠭᠠᠨ ᠤ ᠭᠠᠯ ᠤᠷᠤᠭᠤ ᠰᠢᠳᠡᠭᠰᠡᠨ ᠠᠵᠢ᠃ ᠡᠪᠦᠭᠡᠨ ᠬᠡᠦᠬᠡᠳ ᠰᠢᠭ ᠣᠷᠢ ᠳᠠᠭᠤ ᠲᠠᠯᠪᠢᠨ ᠭᠠᠯ ᠤᠷᠤᠭᠤ ᠬᠤᠭᠤᠷ ᠢᠶᠠᠨ ᠠᠪᠬᠤ ᠭᠡᠵᠦ ᠵᠢᠳᠬᠦᠭᠰᠡᠨ ᠪᠤᠯᠪᠠᠴᠤ ᠬᠤᠶᠠᠷ ᠵᠠᠯᠠᠭᠤ ᠡᠪᠦᠭᠡᠨ ᠤ ᠭᠠᠷ ᠢ ᠎ ᠨᠢ ᠮᠤᠰᠬᠢᠨ ᠬᠤᠭᠤᠯᠠᠢ ᠶᠢ ᠨᠢ ᠪᠠᠭᠠᠯᠵᠠᠭᠤᠷᠳᠠᠨ ᠬᠤᠭᠤᠷ ᠢ ᠰᠢᠲᠠᠵᠤ ᠪᠠᠷᠠᠲᠠᠯ᠎ᠠ ᠨᠢ ᠨᠤᠬᠤᠴᠢᠨ ᠳᠠᠷᠤᠵᠠᠢ᠃ ᠬᠤᠭᠤᠷ ᠨᠢ ᠬᠥᠬᠡ ᠤᠯᠠᠭᠠᠨ ᠣᠯᠠᠨ ᠥᠩᠭᠡ ᠪᠠᠷ ᠲᠣᠭᠤᠨᠣ ᠲᠤᠯᠲᠠᠯ᠎ᠠ ᠳᠦᠷᠡᠯᠵᠡᠨ ᠰᠢᠲᠠᠵᠤ ᠳᠠᠭᠤᠰᠬᠤ ᠳᠤ ᠡᠪᠦᠭᠡᠨ ᠢ ᠣᠷᠭᠢᠨ ᠭᠠᠷᠬᠤ ᠳᠠᠭᠠᠨ ︽ᠣᠳᠣ ᠴᠢᠨᠦ ᠬᠤᠭᠤᠷ ᠢᠶᠠᠷ ᠢᠶᠠᠨ ᠡᠷᠳᠦᠨ ᠬᠤᠶᠢᠰᠠᠭᠠᠨᠠᠬᠤ ᠶᠢ ᠴᠢᠨᠢ ᠬᠠᠷᠠᠶ᠎ᠠ ᠳ᠋ᠠ︕︾ ᠭᠡᠳ ᠰᠡᠳᠬᠢᠯ ᠬᠠᠩᠬᠤᠯᠤᠭᠤᠨ ᠢᠨᠢᠶᠡᠯᠳᠦᠨ ᠭᠠᠷᠴᠤ ᠣᠳᠴᠠᠢ᠃ ᠡᠪᠦᠭᠡᠨ ᠭᠡᠷ ᠤᠨ ᠢᠶᠠᠨ ᠪᠣᠱᠤᠭ᠎ᠠ ᠪᠠᠷ ᠵᠦᠳᠡᠭᠦᠬᠡᠨ ᠮᠥᠯᠬᠦᠨ ᠭᠠᠷᠴᠤ ᠢᠷᠡᠭᠡᠳ᠂ ︽ᠲᠣᠭᠤᠨᠣ ᠳᠤ ᠴᠢᠨᠢ ᠲᠠᠰ ᠥᠨᠳᠡᠭᠡᠯᠡ︕ ᠲᠣᠭᠤᠭᠠᠨ ᠳᠤ ᠴᠢᠨᠢ ᠴᠢᠨ᠋ᠸ᠎ᠠ ᠬᠦᠯᠦᠭᠯᠡ︕ ᠭᠤᠯᠣᠮᠲᠠ ᠠᠴᠠ ᠴᠢᠨᠢ ᠭᠤᠶᠣᠣ ᠤᠷᠭᠤ︕ ᠭᠤᠷᠪᠠᠨ ᠡᠳᠦᠷ ᠠᠴᠠ ᠭᠤᠲᠤᠭ ᠢᠶᠠᠨ ᠣᠯ︕ ᠁︾ ᠬᠡᠮᠡᠨ ᠲᠡᠳᠡ ᠨᠠᠷ ᠤᠨ ᠠᠷᠤ ᠠᠴᠠ ᠰᠢᠷᠣᠢ ᠰᠠᠴᠤᠨ ᠮᠣᠷᠳᠠᠭᠤᠯᠤᠭᠰᠠᠨ ᠭᠡᠳᠡᠭ ᠶᠤᠮ᠃          ᠲᠡᠷᠡ ᠡᠳᠦᠷ ᠤᠨ ᠰᠥᠨᠢ ᠠᠴᠠ ᠯᠠ ᠡᠪᠦᠭᠡᠨ ᠬᠤᠭᠤᠷᠴᠢ ᠵᠡᠭᠦᠳᠦ ᠵᠡᠷᠭᠡᠯᠭᠡᠨ ᠰᠢᠭ ᠠᠯᠠᠭ᠎ᠠ ᠪᠣᠯᠤᠭᠰᠠᠨ ᠠᠪᠠᠢ᠃          ᠁          ᠬᠤᠭᠤᠷᠴᠢ ᠳ᠋ᠠᠨᠢᠭ᠎ᠠ ᠶᠠᠳᠠᠭᠤ ᠠᠶᠢᠯ ᠤᠨ ᠵᠦᠳᠡᠭᠦᠦ ᠬᠡᠦᠬᠡᠳ ᠪᠠᠶᠢᠵᠠᠢ᠃ ᠡᠬᠡ ᠨᠢ ᠴᠡᠷᠡᠨᠪᠠᠳᠮ᠎ᠠ ᠭᠡᠳᠡᠭ ᠭᠠᠭᠴᠠ ᠪᠡᠶ᠎ᠡ ᠪᠦᠰᠡᠭᠦᠢ᠃ ᠭᠠᠵᠠᠷ ᠳᠠᠭᠠᠭᠠᠬᠤ ᠦᠭᠡᠢ ᠪᠠᠶᠠᠨ ᠪᠠᠷᠬᠠᠰ ᠤᠨ ᠵᠠᠷᠤᠳᠠᠰᠤ ᠤᠳ ᠤᠨ ᠨᠢᠭᠡ ᠨᠢ ᠪᠥᠭᠡᠳ ᠲᠡᠷᠲᠡᠭᠡ ᠬᠤᠲᠠᠨ ᠵᠠᠬ᠎ᠠ ᠳᠤ ᠤᠲᠤᠭ᠎ᠠ ᠰᠢᠷᠣᠢ ᠬᠤᠶᠠᠷ ᠵᠠᠭᠤᠭᠰᠠᠨ ᠴᠣᠮᠴᠣᠭᠤᠷ ᠬᠠᠷ᠎ᠠ ᠴᠡᠭᠡᠵᠢᠨ ᠭᠡᠷ ᠎ ᠲᠡᠭᠡᠨ ᠬᠦᠦ ᠲᠠᠢ ᠪᠠᠨ ᠬᠤᠶᠠᠭᠤᠯᠠᠬᠠᠨ ᠠᠮᠢᠳᠤᠷᠠᠵᠤ᠂ ᠭᠠᠷ ᠤᠨ ᠤᠷ᠎ᠠ᠂ ᠭᠠᠪᠰᠢᠭᠠᠢ ᠭᠦᠳᠡᠯᠮᠦᠷᠢ ᠪᠠᠷ ᠢᠶᠠᠨ ᠪᠠᠶᠠᠨ ᠠᠶᠢᠯ ᠤᠨ ᠥᠨᠳᠥᠷ ᠬᠡᠮᠵᠢᠭᠦᠷ ᠲᠤ ᠠᠷᠠᠢ ᠲᠣᠷᠤᠨ᠂ ᠥᠷᠥᠰᠢᠶᠡᠯ ᠦᠭᠡᠢ ᠬᠠᠷᠢᠶᠠᠯ ᠵᠠᠩᠳᠤᠷᠤᠯ ᠢ ᠲᠡᠪᠴᠢᠶᠡᠷᠢ ᠵᠢᠭᠠᠨ ᠲᠡᠰᠪᠦᠷᠢᠯᠡᠵᠦ᠂ ᠦᠯᠡᠳᠡᠭᠰᠡᠨ ᠳᠤᠰᠤᠭᠰᠠᠨ ᠢᠶᠠᠷ ᠨᠢ ᠬᠤᠭᠤᠯᠠᠯᠠᠨ᠂ ᠤᠷᠠᠭᠳᠠᠭᠰᠠᠨ ᠬᠠᠶᠠᠭᠳᠠᠭᠰᠠᠨ ᠢᠶᠠᠷ ᠎ ᠨᠢ ᠬᠤᠪᠴᠠᠰᠤᠯᠠᠵᠤ᠂ ᠡᠳᠦᠷ ᠤᠨ ᠨᠠᠷᠠ ᠶᠢ ᠪᠠᠷᠠᠵᠤ᠂ ᠡᠪᠦᠯ ᠵᠤᠨ ᠢ ᠡᠯᠡᠭᠡᠭᠰᠡᠭᠡᠷ ᠡᠳᠦᠢ ᠬᠦᠷᠴᠡᠢ᠃          ᠳ᠋ᠠᠨᠢᠭ᠎ᠠ ᠶᠢᠨ ᠨᠡᠷ᠎ᠡ ᠶᠢ ᠬᠦᠷᠡᠯᠲᠣᠭᠤᠭ᠎ᠠ ᠭᠡᠳᠡᠭ ᠪᠤᠯᠪᠠᠴᠤ ᠲᠡᠭᠦᠪᠡᠷ ᠨᠢ ᠳᠠᠭᠤᠳᠠᠭᠰᠠᠨ ᠬᠥᠮᠥᠨ ᠡᠵᠢ ᠪᠣᠯᠣᠨ ᠨᠠᠭᠠᠳᠴᠤ ᠥᠰᠦᠭᠰᠡᠨ ᠦᠶ᠎ᠡ ᠶᠢᠨ ᠬᠡᠳᠦᠨ ᠬᠡᠦᠬᠡᠳ ᠠᠴᠠ ᠥᠭᠡᠷ᠎ᠡ ᠬᠥᠮᠥᠨ ᠪᠠᠶᠢᠭᠰᠠᠨ ᠦᠭᠡᠢ᠃ ᠬᠤᠵᠢᠮ ᠨᠢ ᠨᠠᠰᠤ ᠠᠬᠢᠵᠤ ᠠᠯᠳᠠᠷ ᠮᠠᠨᠳᠤᠬᠤ ᠶᠢᠨ ᠬᠢᠷᠢ ᠪᠠᠷ ᠬᠥᠮᠥᠰ ᠨᠤᠲᠤᠭ ᠤᠨ ᠵᠠᠩᠰᠢᠯ ᠶᠣᠰᠣᠭᠠᠷ ᠳ᠋ᠠᠨᠢᠭ᠎ᠠ ᠬᠡᠮᠡᠨ ᠠᠪᠤᠭᠠᠶᠢᠯᠠᠨ ᠳᠠᠭᠤᠳᠠᠭᠠᠳ᠂ ᠬᠦᠷᠡᠯᠲᠣᠭᠤᠭ᠎ᠠ ᠭᠡᠰᠡᠨ ᠨᠡᠷ᠎ᠡ ᠶᠢ ᠪᠠᠷᠤᠭ ᠮᠠᠷᠲᠠᠵᠠᠢ᠃          ᠬᠦᠷᠡᠯᠲᠣᠭᠤᠭ᠎ᠠ ᠲᠠᠪᠤ ᠵᠢᠷᠭᠤᠭᠠᠨ ᠨᠠᠰᠣᠨ ᠤ ᠦᠶ᠎ᠡ ᠳᠡᠭᠡᠨ ᠨᠢᠭᠡ ᠡᠳᠦᠷ ᠡᠵᠢ ᠠᠴᠠ ᠪᠠᠨ ︽ᠥᠭᠡᠷ᠎ᠡ ᠠᠶᠢᠯ ᠤᠨ ᠬᠡᠦᠬᠡᠳ ᠪᠦᠷ ᠠᠪᠤ ᠲᠠᠢ ᠪᠠᠶᠢᠬᠤ ᠳᠤ ᠪᠢ ᠶᠠᠭᠠᠬᠢᠭᠠᠳ ᠪᠠᠶᠢᠳᠠᠭ ᠦᠭᠡᠢ ᠶᠤᠮ ᠪᠤᠢ︖︾ ᠭᠡᠵᠦ ᠭᠡᠨᠡᠳᠲᠡ ᠠᠰᠠᠭᠤᠬᠤ ᠳᠤ ᠡᠵᠢ ᠨᠢ ᠰᠢᠷᠢᠳᠡᠭ ᠰᠢᠷᠢᠵᠦ ᠪᠠᠶᠢᠭᠰᠠᠨ ᠢᠶᠠᠨ ᠵᠤᠭ ᠲᠤᠰᠤᠨ ︽ᠡᠵᠢ ᠨᠢ ᠴᠢᠮᠠᠶᠢ ᠵᠡᠭᠦᠳᠦ ᠪᠠᠷ ᠢᠶᠠᠨ ᠣᠯᠣᠭᠰᠠᠨ ᠶᠤᠮ᠃ ᠠᠷᠪᠠᠨ ᠨᠠᠢᠮᠠ ᠲᠠᠢ ᠪᠠᠶᠢᠭᠰᠠᠨ ᠲᠡᠷᠡ ᠵᠢᠯ ᠤᠨ ᠨᠢᠭᠡ ᠰᠥᠨᠢ ᠶᠢᠨ ᠵᠡᠭᠦᠳᠦᠨ ᠳᠤ ᠮᠣᠷᠢᠨ ᠬᠤᠭᠤᠷ ᠪᠠᠷᠢᠭᠰᠠᠨ ᠨᠢᠭᠡ ᠰᠠᠶᠢᠬᠠᠨ ᠵᠠᠯᠠᠭᠤ ᠣᠷᠣᠵᠤ ᠢᠷᠡᠭᠡᠳ᠂ ᠨᠠᠳᠠᠳᠤ ᠣᠬᠲᠣ ᠠᠴᠠ ᠰᠣᠨᠣᠰᠤᠭ᠎ᠠ ᠦᠭᠡᠢ ᠳᠠᠭᠤᠤ ᠶᠢ ᠬᠤᠭᠤᠷᠳᠠᠨ ᠳᠠᠭᠤᠯᠠᠵᠤ ᠥᠭᠬᠦ ᠳᠤ ᠪᠢ ᠲᠡᠰᠬᠡᠯ ᠦᠭᠡᠢ ᠤᠶᠠᠷᠠᠨ ᠤᠬᠢᠯᠠᠵᠤ ᠪᠠᠶᠢᠬᠤ ᠶᠤᠮ᠃ ᠲᠡᠭᠡᠵᠦ ᠵᠡᠭᠦᠳᠦᠯᠡᠭᠰᠡᠨ ᠠᠴᠠ ᠴᠢᠮᠠᠶᠢ ᠵᠢᠷᠮᠦᠰᠦᠯᠡᠭᠰᠡᠨ ᠶᠤᠮ᠃ ᠲᠡᠶᠢᠮᠦ ᠪᠣᠯᠬᠤᠷ ᠴᠢ ᠪᠣᠯ ᠵᠡᠭᠦᠳᠦᠨ ᠤ ᠬᠦᠦ ᠶᠤᠮ ᠰᠢᠦ᠃ ᠠᠪᠤ ᠴᠢᠨᠢ ᠬᠠᠮᠢᠭ᠎ᠠ ᠨᠢᠭᠡᠲᠡᠭᠡ ᠬᠤᠭᠤᠷ ᠢᠶᠠᠨ ᠬᠥᠭᠯᠡᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠭᠠᠳ ᠯᠠ ᠶᠠᠪᠤᠵᠤ ᠪᠤᠢ ᠪᠠᠶᠢᠬ᠎ᠠ︾ ᠬᠡᠮᠡᠨ ᠬᠦᠦ ᠶᠢᠨ ᠢᠶᠠᠨ ᠠᠰᠠᠭᠤᠯᠲᠠ ᠶᠢ ᠲᠣᠪᠴᠢᠬᠠᠨ ᠬᠠᠷᠢᠭᠤᠯᠤᠭᠠᠳ ᠳᠠᠭᠢᠵᠤ ᠶᠠᠭᠤ ᠴᠦ ᠬᠡᠯᠡᠭᠰᠡᠨ ᠦᠭᠡᠢ᠃ ᠬᠦᠦ ᠵᠠᠯᠭᠠᠭᠠᠳ ︽ᠲᠡᠷᠡ ᠬᠤᠭᠤᠷ ᠭᠡᠭᠴᠢ ᠨᠢ ᠶᠠᠮᠠᠷ ᠶᠠᠭᠤᠮ᠎ᠠ ᠪᠠᠶᠢᠳᠠᠭ ᠶᠤᠮ ᠪᠤᠢ︖︾ ᠭᠡᠵᠦ ᠠᠰᠠᠭᠤᠬᠤ ᠳᠤᠨᠢ ︽ᠵᠢᠷᠤᠭ᠎ᠠ ᠴᠠᠭᠠᠨ ᠮᠣᠷᠢᠨ ᠤ ᠰᠡᠭᠦᠯ ᠤᠨ ᠶᠡᠷᠡ ᠶᠢᠰᠦᠨ ᠬᠢᠯᠭᠠᠰᠤ ᠪᠠᠷ ᠴᠢᠪᠬᠠᠳᠠᠰᠤ ᠶᠢ ᠨᠢ ᠬᠢᠵᠦ᠂ ᠮᠣᠭᠠᠢ ᠶᠢᠨ ᠠᠷᠠᠰᠤ ᠪᠠᠷ ᠴᠠᠷᠠᠭ᠎ᠠ ᠶᠢ ᠨᠢ ᠪᠦᠷᠢᠭᠰᠡᠨ ᠮᠣᠷᠢᠨ ᠤ ᠲᠣᠯᠣᠭᠠᠢ ᠲᠠᠢ ᠮᠠᠰᠢ ᠰᠣᠨᠤᠰᠬᠤᠯᠠᠩᠲᠠᠢ ᠳᠠᠭᠤ ᠠᠶᠠᠯᠭᠤ ᠭᠠᠷᠳᠠᠭ ᠬᠥᠭᠵᠢᠮ ᠤᠨ ᠵᠢᠮᠰᠡᠭ ᠢ ᠬᠡᠯᠡᠳᠡᠭ ᠶᠤᠮ ᠪᠠᠶᠢᠨ᠎ᠠ ᠯᠠᠢ︾ ᠭᠡᠳ ᠲᠦᠯᠡᠭᠡ ᠪᠣᠯᠣᠨ ᠰᠢᠳᠡᠮᠰᠦ ᠡᠨᠡ ᠲᠡᠷᠡ ᠪᠠᠷ ᠦᠯᠢᠭᠡᠷᠯᠡᠨ ᠬᠡᠯᠡᠵᠦ ᠥᠭᠴᠡᠢ᠃          ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠬᠦᠦ ᠡᠵᠢ ᠠᠴᠠ ᠪᠠᠨ ᠠᠪᠤ ᠶᠢᠨ ᠢᠶᠠᠨ ᠲᠤᠬᠠᠢ ᠳᠠᠭᠢᠵᠤ ᠠᠰᠠᠭᠤᠭᠰᠠᠨ ᠦᠭᠡᠢ ᠃ ᠬᠠᠷᠢᠨ ᠠᠪᠤ ᠪᠠᠨ ᠰᠢᠭ᠋ ᠬᠤᠭᠤᠷᠴᠢ ᠪᠤᠯᠬᠤ ᠶᠢ ᠪᠢᠲᠡᠭᠦᠬᠡᠨ ᠮᠥᠷᠥᠭᠡᠳᠴᠦ᠂ ᠳᠠᠷᠠᠭ᠎ᠠ ᠡᠳᠦᠷ ᠠᠴᠠ ᠨᠢ ᠡᠬᠢᠯᠡᠨ ᠡᠵᠢ ᠶᠢᠨ ᠢᠶᠠᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠪᠤᠴᠢᠭᠢᠨᠠᠭᠤᠷ ᠤᠨ ᠬᠤᠵᠤᠤᠯ᠎ᠠ ᠪᠠᠷ ᠬᠤᠭᠤᠷ ᠮᠠᠶ᠋ᠢᠭ ᠤᠨ ᠶᠠᠭᠤᠮ᠎ᠠ ᠬᠢᠵᠦ᠂ ᠪᠠᠷᠬᠠᠰ ᠪᠠᠶᠠᠨ ᠤ ᠠᠳᠤᠭᠤᠨ ᠤ ᠵᠡᠯᠡᠨ ᠳᠡᠭᠡᠷ᠎ᠡ ᠠᠴᠠ ᠴᠠᠭᠠᠨ ᠮᠣᠷᠢᠨ ᠤ ᠬᠢᠯᠭᠠᠰᠤ ᠴᠤᠭᠯᠠᠭᠤᠯᠤᠨ ᠰᠣᠯᠢ ᠶᠢᠨ ᠮᠣᠳᠣ ᠪᠠᠷ ᠬᠤᠭᠤᠷ ᠤᠨ ᠬᠥᠪᠴᠢ ᠪᠣᠯᠭᠠᠨ ᠵᠡᠭᠦᠳᠦᠨ ᠳᠤ ᠢᠷᠡᠭᠰᠡᠨ ᠠᠪᠤ ᠪᠠᠨ ᠲᠥᠰᠥᠭᠡᠯᠡᠨ ᠬᠢᠷᠦᠭᠡᠳᠡᠨ ᠲᠣᠭᠯᠠᠳᠠᠭ ᠪᠣᠯᠪᠠ᠃          ᠬᠠᠪᠤᠷ ᠤᠨ ᠳᠤᠮᠳᠠ ᠰᠠᠷ᠎ᠠ ᠶᠢᠨ ᠤᠷᠲᠤ ᠰᠢᠷ᠎ᠠ ᠡᠳᠦᠷ ᠪᠠᠷᠬᠠᠰ ᠪᠠᠶᠠᠨ ᠤ ᠬᠡᠳᠦᠨ ᠲᠤᠩᠭᠤᠢ ᠢᠩᠭᠡ ᠪᠣᠲᠣᠭᠤ ᠪᠠᠨ ᠭᠤᠯᠣᠭᠠᠳ ᠶᠡᠷᠦ ᠬᠥᠬᠦᠭᠦᠯᠬᠦ ᠦᠭᠡᠢ ᠪᠣᠯᠬᠤᠷ ᠠᠷᠭ᠎ᠠ ᠶᠠᠳᠠᠬᠤ ᠳᠠᠭᠠᠨ ᠬᠠᠮᠢᠭ᠎ᠠ ᠬᠤᠯᠠ ᠠᠴᠠ ᠪᠠᠭ ᠰᠤᠮᠤ ᠠᠯᠤᠰᠯᠠᠵᠤ ᠪᠠᠶᠢᠵᠤ ᠨᠢᠭᠡ ᠬᠤᠭᠤᠷᠴᠢ ᠵᠠᠯᠠᠭᠤ ᠶᠢ ᠵᠠᠯᠠᠵᠤ ᠠᠪᠴᠢᠷᠠᠪᠠ᠃ ᠬᠤᠭᠤᠷᠴᠢ ᠵᠠᠯᠠᠭᠤ ᠠᠶᠢᠯ ᠳᠤ ᠣᠷᠣᠵᠤ ᠴᠠᠶᠢᠯᠠᠵᠤ ᠪᠠᠷᠠᠮᠠᠭᠴᠠ ᠪᠠᠨ ᠭᠠᠷᠴᠤ ᠢᠷᠡᠨ᠂ ᠲᠡᠮᠡᠭᠡᠨ ᠤ ᠬᠤᠲᠠᠨ ᠳᠠᠬᠢ ᠲᠡᠮᠡᠭᠡ ᠤᠶᠠᠳᠠᠭ ᠪᠦᠳᠦᠭᠦᠨ ᠵᠠᠭ ᠤᠨ ᠬᠤᠵᠤᠤᠯ᠎ᠠ ᠳᠡᠭᠡᠷ᠎ᠡ ᠰᠠᠨᠳᠠᠶᠢᠯᠠᠵᠤ ᠰᠠᠭᠤᠭᠠᠳ᠂ ᠪᠣᠲᠣᠭᠤ ᠪᠠᠨ ᠭᠤᠯᠣᠭᠰᠠᠨ ᠢᠩᠭᠡᠨ ᠳᠤ ᠬᠤᠭᠤᠷᠳᠠᠵᠤ ᠭᠠᠷᠪᠠ᠃ ᠬᠦᠦ ᠶᠢᠨ ᠡᠵᠢ ᠨᠢ ᠪᠠᠰᠠ ᠪᠣᠲᠣᠭᠤ ᠠᠪᠬᠠᠭᠤᠯᠬᠤ ᠠᠵᠢᠯ ᠳᠤ ᠭᠠᠷ ᠪᠡᠶ᠎ᠡ ᠣᠷᠣᠯᠴᠠᠨ᠂ ︽ᠭᠦᠭᠡᠰ︕ᠭᠦᠭᠡᠰ︕︾ ᠬᠡᠮᠡᠨ ᠭᠤᠨᠢᠭᠲᠠᠶᠢᠬᠠᠨ ᠠᠶᠠᠰ ᠲᠠᠢ ᠪᠠᠷ ᠤᠶᠠᠩᠭᠠᠯᠠᠭᠤᠯᠤᠨ ᠳᠠᠭᠤᠯᠠᠵᠤ ᠡᠬᠢᠯᠡᠯ᠎ᠡ᠃ ᠥᠳᠬᠡᠨ ᠬᠠᠷ᠎ᠠ ᠬᠥᠮᠥᠰᠬᠡ ᠲᠠᠢ᠂ ᠬᠦᠷᠡᠩ ᠪᠣᠷᠣ ᠴᠢᠷᠠᠢ ᠲᠠᠢ ᠵᠠᠯᠠᠭᠤ ᠥᠷᠭᠡᠨ ᠴᠠᠭᠠᠨ ᠰᠢᠳᠦ ᠪᠠᠨ ᠢᠷᠠᠯᠵᠠᠭᠤᠯᠤᠨ ᠡᠵᠢ ᠤᠷᠤᠭᠤ ᠨᠢ ᠪᠠᠶᠢᠨ ᠪᠠᠶᠢᠨ ᠬᠠᠷᠠᠨ ᠦᠯᠦ ᠮᠡᠳᠡᠭ ᠲᠣᠯᠣᠭᠠᠢ ᠳᠣᠬᠢᠨ ᠢᠨᠢᠶᠡᠮᠰᠦᠭᠯᠡᠨ ᠬᠤᠭᠤᠷᠳᠠᠵᠤ ᠰᠠᠭᠤᠬᠤ ᠶᠢ ᠎ ᠨᠢ ᠬᠠᠷᠠᠭᠠᠳ ᠬᠠᠨᠤᠰᠢ ᠦᠭᠡᠢ᠂ ᠰᠣᠨᠣᠰᠤᠭᠠᠳ ᠪᠠᠷᠠᠰᠢ ᠦᠭᠡᠢ ᠪᠠᠶᠢᠪᠠ᠃          ᠲᠡᠷᠡ ᠤᠶᠠᠷᠠᠭᠤᠨ ᠵᠢᠪᠬᠤᠯᠠᠩᠲᠤ ᠬᠤᠭᠤᠷ ᠤᠨ ᠢᠷᠠᠭᠤ ᠲᠤᠩᠭᠠᠯᠠᠭ ᠠᠶᠠᠯᠭᠤ ᠳᠤ ᠬᠦᠦ ᠶᠢᠨ ᠰᠡᠳᠬᠢᠯ ᠪᠦᠷᠢᠮᠦᠰᠦᠨ ᠲᠠᠲᠠᠭᠳᠠᠵᠤ᠂ ᠬᠤᠭᠤᠷᠴᠢ ᠶᠢᠨ ᠳᠡᠷᠭᠡᠳᠡ ᠡᠯᠡᠰᠦᠨ ᠳᠡᠭᠡᠷ᠎ᠡ ᠰᠥᠬᠦᠷᠡᠨ ᠰᠠᠭᠤᠭᠠᠳ᠂ ᠬᠤᠭᠤᠷ ᠤᠨ ᠴᠢᠪᠬᠠᠳᠠᠰᠤᠨ ᠳᠤ ᠠᠯᠠᠭ ᠬᠤᠶᠠᠷ ᠨᠢᠳᠦ ᠪᠠᠨ ᠠᠯᠳᠠᠴᠢᠬᠠᠬᠤ ᠰᠢᠬᠠᠮ ᠰᠢᠷᠲᠡᠩᠭᠡᠨ ᠪᠠᠶᠢᠯ᠎ᠠ᠃ ᠪᠣᠲᠣᠭᠤ ᠪᠠᠨ ᠭᠤᠯᠣᠭᠰᠠᠨ ᠢᠩᠭᠡᠰ ᠤᠨ ᠬᠦᠷᠡᠩ ᠠᠯᠠᠭ ᠨᠢᠳᠦᠨ ᠠᠴᠠ ᠪᠥᠭᠡᠮ ᠪᠥᠭᠡᠮ ᠨᠢᠯᠪᠤᠰᠤ ᠪᠥᠮᠪᠥᠷᠢᠨ ᠤᠨᠠᠵᠤ᠂ ᠴᠢᠨᠦᠷᠡᠭᠰᠡᠨ ᠬᠥᠬᠦ ᠨᠢ ᠢᠪᠢᠯᠦᠨ᠂ ᠥᠯᠥᠰᠥᠭᠰᠡᠨ ᠪᠣᠲᠣᠭᠤ ᠤᠳ ᠨᠢ ᠬᠤᠪᠳᠣᠭᠯᠠᠨ ᠬᠥᠬᠦᠵᠦ ᠡᠬᠢᠯᠡᠬᠦ ᠳᠤ᠂ ᠬᠦᠦ ᠶᠢᠨ ᠲᠣᠷᠮᠣᠯᠵᠠᠭᠰᠠᠨ ᠨᠢᠳᠦᠨ ᠠᠴᠠ ᠴᠦ ᠥᠪᠡᠷ ᠤᠨ ᠡᠷᠬᠡ ᠦᠭᠡᠢ ᠨᠢᠯᠪᠤᠰᠤ ᠠᠰᠠᠬᠠᠷᠠᠨ᠂ ᠲᠡᠷᠲᠡᠭᠡ ᠬᠠᠷᠠᠭᠳᠠᠬᠤ ᠠᠭᠤᠯᠠ ᠲᠣᠯᠣᠭᠠᠳ᠂ ᠳᠡᠷᠭᠡᠳᠡ ᠪᠥᠮᠪᠥᠶᠢᠬᠦ ᠭᠡᠷ ᠬᠠᠰᠢᠶ᠎ᠠ᠂ ᠮᠣᠷᠢᠨ ᠤ ᠵᠡᠯ᠎ᠡ᠂ ᠲᠡᠮᠡᠭᠡᠨ ᠤ ᠱᠣᠩ ᠲᠡᠷᠡᠴᠢᠯᠡᠨ ᠨᠢᠳᠦᠨ ᠳᠤ ᠲᠣᠷᠬᠤ ᠪᠦᠭᠦ ᠶᠠᠭᠤᠮᠠᠰ ᠬᠤᠭᠤᠷ ᠤᠨ ᠠᠶᠠᠯᠭᠤᠨ ᠳᠤ ᠬᠥᠭᠯᠡᠭᠳᠡᠨ ᠨᠠᠶᠢᠭᠤᠯᠵᠠᠨ ᠭᠠᠩᠬᠤᠵᠤ ᠪᠠᠶᠢᠬᠤ ᠰᠢᠭ᠋ ᠬᠠᠷᠠᠭᠳᠠᠪᠠ᠃ ᠡᠵᠢ ᠶᠢᠨ ᠬᠢᠨᠢ ᠳᠠᠩᠳᠠ ᠶᠠᠷᠢᠳᠠᠭ ᠦᠯᠢᠭᠡᠷ ᠤᠨ ᠣᠯᠨᠨ ᠪᠠᠭᠠᠲᠤᠷ ᠤᠳ ᠬᠠᠲᠠᠷᠢᠭᠤᠯᠤᠭᠠᠳ ᠭᠠᠲᠤᠯᠬᠤ ᠰᠢᠭ᠋᠂ ᠲᠡᠭᠦᠨ ᠤ ᠳᠤᠮᠳᠠ ᠥᠪᠡᠷ ᠢᠶᠠᠨ ᠡᠮᠡᠭᠡᠯ ᠳᠡᠭᠡᠷ᠎ᠡ ᠪᠠᠨ ᠬᠤᠭᠤᠷ ᠢᠶᠠᠨ ᠲᠠᠲᠠᠨ ᠢᠨᠢᠶᠡᠳᠦ ᠠᠯᠳᠠᠨ ᠳᠠᠭᠤᠯᠠᠵᠤ ᠶᠠᠪᠤᠭ᠎ᠠ ᠪᠠᠷ ᠲᠥᠰᠥᠭᠡᠯᠡᠭᠡᠳ ᠠᠮᠵᠢᠵᠠᠢ᠃ ᠢᠩᠭᠢᠵᠦ ᠲᠥᠰᠥᠭᠡᠯᠡᠨ ᠪᠤᠳᠣᠭᠠᠳ᠂ ᠬᠡᠴᠢᠨᠡᠭᠡᠨ ᠬᠤᠨᠤᠭ ᠰᠣᠨᠣᠰᠤᠭᠠᠳ ᠰᠠᠭᠤᠭᠰᠠᠨ ᠴᠦ ᠤᠶᠢᠳᠬᠤ ᠪᠠᠷ ᠦᠭᠡᠢ ᠪᠠᠶᠢᠪᠠ᠃ ᠬᠤᠭᠤᠷ ᠤᠨ ᠡᠭᠡᠰᠢᠭᠯᠡᠩᠲᠦ ᠠᠶᠠᠯᠭᠤᠨ ᠳᠤ ᠤᠶᠠᠷᠠᠨ ᠤᠬᠠᠭᠠᠷᠠᠭᠰᠠᠨ ᠶᠤᠮ ᠰᠢᠭ᠋ ᠢᠩᠭᠡᠰ ᠨᠢᠭᠡ ᠨᠢᠭᠡ ᠪᠠᠷ ᠪᠣᠲᠣᠭᠤ ᠪᠠᠨ ᠬᠥᠬᠦᠭᠦᠯᠦᠨ᠂ ᠳᠡᠯᠡᠩ ᠤᠨ ᠴᠢᠨᠦᠷᠡᠭᠡ ᠨᠢ ᠲᠠᠯᠪᠢᠭᠳᠠᠨ ᠲᠠᠶᠢᠪᠤᠰᠢᠷᠠᠵᠤ᠂ ᠪᠣᠲᠣᠭᠤ ᠪᠠᠨ ᠬᠠᠵᠢᠭᠯᠠᠵᠤ ᠬᠠᠶᠢᠷᠳᠠᠭ ᠪᠠᠶᠢᠭᠰᠠᠨ ᠪᠣᠯ ᠬᠠᠷᠠᠮᠯᠠᠨ ᠳᠠᠭᠠᠷᠢᠳᠠᠭ ᠪᠣᠯᠪᠠ᠃ ᠵᠠᠯᠠᠭᠳᠠᠵᠤ ᠢᠷᠡᠭᠰᠡᠨ ᠬᠤᠭᠤᠷᠴᠢ ᠶᠢᠨ ᠬᠡᠷᠡᠭ ᠪᠦᠲᠦᠵᠦ᠂ ᠪᠠᠰᠠ ᠠᠶᠢᠯ ᠳᠤ ᠵᠠᠯᠬᠠᠲᠠᠯ᠎ᠠ᠃ ᠳᠥᠷᠥᠭᠡ ᠠᠪᠬᠤ ᠶᠢᠨ ᠢᠶᠠᠨ ᠡᠮᠦᠨ᠎ᠡ ︽ᠡᠨᠡ ᠬᠡᠦᠬᠡᠳ ᠬᠤᠭᠤᠷ ᠬᠥᠭᠵᠢᠮ ᠳᠤ ᠦᠨᠡᠬᠡᠷ ᠬᠤᠷᠣᠬᠠᠢ ᠲᠠᠢ ᠪᠠᠶᠢᠨ᠎ᠠ ᠰᠢᠦ᠃ ᠡᠶᠢᠮᠦ ᠬᠡᠦᠬᠡᠳ ᠢ ᠪᠢ ᠶᠡᠷᠦ ᠦᠵᠡᠭᠡ ᠦᠭᠡᠢ᠃ ᠵᠠᠶᠠᠭᠠᠮᠠᠯ ᠠᠪᠢᠶᠠᠰ ᠲᠠᠢ ᠬᠦᠦ ᠶᠤᠮ ᠳ᠋ᠡ ᠴᠢ ᠁︾ ᠭᠡᠳ ᠳᠤᠬᠤᠨ ᠳᠡᠭᠡᠷ᠎ᠡ ᠨᠢ ᠵᠥᠭᠡᠯᠡᠨ ᠦᠨᠦᠰᠴᠡᠢ᠃ ᠬᠦᠷᠡᠯᠲᠣᠭᠤᠭ᠎ᠠ ᠬᠥᠮᠥᠨ ᠪᠣᠯᠤᠭᠰᠠᠨ ᠠᠴᠠ ᠬᠤᠶᠢᠰᠢ ᠠᠩᠬ᠎ᠠ ᠤᠳᠠᠭ᠎ᠠ ᠡᠷ᠎ᠡ ᠬᠥᠮᠥᠨ ᠢᠶᠠᠷ ᠦᠨᠦᠰᠦᠭᠦᠯᠦᠭᠰᠡᠨ ᠨᠢ ᠲᠡᠷᠡ ᠪᠠᠶᠢᠪᠠ᠃ ᠡᠨᠡ ᠬᠤᠭᠤᠷᠴᠢ ᠠᠬ᠎ᠠ ᠠᠷᠠᠢ ᠠᠪᠤ ᠮᠢᠨᠢ ᠪᠢᠰᠢ ᠪᠠᠶᠢᠭ᠎ᠠ ᠳ᠋ᠠ᠃ ᠬᠡᠷᠪᠡ ᠮᠥᠨ ᠰᠠᠨ ᠪᠣᠯ ᠶᠠᠮᠠᠷ ᠭᠤᠶᠣ ᠪᠤᠢ ᠭᠡᠵᠦ ᠪᠤᠳᠣᠵᠠᠢ᠃ ᠬᠤᠲᠠᠨ ᠵᠠᠬ᠎ᠠ ᠶᠢᠨ ᠠᠯᠢ ᠯᠡ ᠥᠨᠳᠥᠷ ᠪᠤᠲᠠ ᠰᠣᠨᠳᠤᠤᠯᠠ᠂ ᠬᠠᠳᠠ ᠴᠢᠯᠠᠭᠤᠨ ᠳᠡᠭᠡᠷ᠎ᠡ ᠭᠠᠷᠴᠤ ᠵᠣᠭᠰᠣᠭᠠᠳ᠂ ᠲᠡᠰᠢᠭᠦᠯᠦᠭᠡᠳ ᠣᠳᠬᠤ ᠬᠤᠭᠤᠷᠴᠢ ᠶᠢᠨ ᠠᠷᠤ ᠠᠴᠠ ᠪᠠᠷ᠎ᠠ ᠲᠠᠰᠤᠷᠠᠲᠠᠯ᠎ᠠ ᠨᠢ ᠦᠳᠡᠬᠦ ᠳᠡᠭᠡᠨ ᠰᠡᠮᠭᠡᠨ ᠤᠬᠢᠯᠠᠵᠤ ᠪᠠᠶᠢᠪᠠ᠃ ᠲᠡᠷᠡ ᠯᠡ ᠡᠳᠦᠷ ᠠᠴᠠ ᠡᠬᠢᠯᠡᠨ ᠲᠡᠷᠡ ᠬᠤᠭᠤᠷᠴᠢ ᠶᠢᠨ ᠮᠣᠷᠢᠨ ᠬᠤᠭᠤᠷ ᠢ ᠳᠠᠭᠤᠷᠢᠶᠠᠯᠭᠠᠨ ᠤᠤᠯ ᠤᠨ ᠬᠢ ᠠᠴᠠ ᠪᠠᠨ ᠠᠷᠠᠢ ᠳᠡᠭᠡᠷ᠎ᠡ ᠰᠢᠭ ᠬᠤᠭᠤᠷ ᠬᠢᠬᠦ ᠶᠢ ᠬᠢᠴᠢᠶᠡᠪᠡ᠃ ᠤᠭᠤᠷᠠᠭ ᠨᠢ ᠵᠠᠩᠭᠢᠷᠠᠭᠰᠠᠨ ᠲᠣᠷᠯᠤᠭ ᠤᠨ ᠬᠤᠵᠤᠤᠯ᠎ᠠ ᠪᠠᠷ ᠬᠤᠭᠤᠷ ᠪᠣᠯᠭᠠᠨ᠂ ᠣᠯᠠᠨ ᠡᠳᠦᠷ ᠬᠤᠨᠤᠭ ᠴᠤᠭᠯᠠᠭᠤᠯᠤᠭᠰᠠᠨ ᠮᠣᠷᠢᠨ ᠤ ᠪᠠᠨ ᠬᠢᠯᠭᠠᠰᠤ ᠪᠠᠷ ᠴᠢᠪᠬᠠᠳᠠᠰᠤ᠂ ᠰᠣᠯᠢ ᠶᠢᠨ ᠮᠣᠳᠣ ᠪᠠᠷ ᠬᠥᠪᠴᠢ ᠬᠢᠪᠡ᠃ ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠲᠡᠷᠡ ᠬᠤᠭᠤᠷᠴᠢ ᠠᠬ᠎ᠠ ᠪᠠᠨ ᠰᠢᠭ᠋ ᠡᠰᠡᠬᠦᠯ᠎ᠡ ᠡᠵᠢ ᠶᠢᠨ ᠬᠢᠨᠢ ᠵᠡᠭᠦᠳᠦᠨ ᠳᠤ ᠢᠷᠡᠭᠰᠡᠨ ᠠᠪᠤ ᠪᠠᠨ ᠰᠢᠭ᠋ ᠬᠤᠭᠤᠷᠳᠠᠵᠤ ᠪᠠᠶᠢᠨ᠎ᠠ ᠬᠡᠮᠡᠨ ᠵᠠᠪ ᠴᠢᠯᠦᠭᠡ ᠯᠠ ᠣᠯᠳᠠᠪᠠᠯ ︽ᠬᠤᠭᠤᠷ︾ ᠎ ᠢᠶᠠᠨ ᠬᠢᠷᠦᠭᠡᠳᠡᠵᠦ ᠭᠠᠷᠤᠨ᠎ᠠ᠃ ᠲᠡᠭᠦᠨ ᠳᠤ ᠳᠠᠭᠤ ᠠᠪᠢᠶ᠎ᠠ ᠲᠠᠢ ᠶᠠᠭᠤᠮ᠎ᠠ ᠪᠦᠭᠦᠨ ᠭᠠᠶᠢᠬᠠᠮᠰᠢᠭᠲᠤ ᠬᠥᠭᠵᠢᠮ ᠤᠨ ᠠᠶᠠᠯᠭᠤ ᠪᠣᠯᠣᠨ ᠲᠥᠰᠥᠭᠡᠯᠡᠭᠳᠡᠨ᠎ᠡ᠃ ᠢᠩᠭᠡ ᠪᠣᠲᠣᠭᠤᠨ ᠤ ᠭᠤᠩᠭᠢᠨᠠᠭᠠᠨ᠂ ᠢᠰᠢᠭᠡ ᠬᠤᠷᠠᠭᠠᠨ ᠤ ᠮᠠᠶᠢᠯᠠᠭᠠᠨ᠂ ᠭᠦᠯᠦᠭ ᠮᠣᠷᠢᠳ ᠤᠨ ᠦᠦᠷᠰᠡᠭᠡᠨ᠂ ᠪᠤᠲᠠ ᠮᠣᠳᠣᠨ ᠤ ᠰᠡᠷᠴᠢᠭᠢᠨᠡᠭᠡᠨ᠂ ᠰᠣᠯᠢ ᠬᠤᠯᠤᠰᠤᠨ ᠤ ᠬᠤᠭᠤᠷᠣᠨᠳᠤ ᠪᠠᠨ ᠬᠠᠪᠢᠷᠤᠯᠳᠤᠭᠰᠠᠨ ᠦᠯᠦ ᠮᠡᠳᠡᠭᠬᠡᠨ ᠠᠨᠢᠷ᠂ᠲᠡᠷᠡ ᠪᠢᠲᠡᠭᠡᠢ ᠭᠡᠯᠡ ᠰᠢᠪᠠᠭᠤᠳ ᠤᠨ ᠵᠢᠷᠭᠢᠭᠡᠨ᠂ ᠴᠠᠷᠴᠠ ᠭᠤᠯᠢᠶ᠎ᠠ ᠶᠢᠨ ᠴᠠᠷᠭᠢᠶ᠎ᠠ᠂ ᠲᠠᠷᠪᠠᠭ᠎ᠠ ᠶᠢᠨ ᠬᠤᠰᠭᠢᠷᠤᠭ᠎ᠠ ᠁ ᠭᠦᠷᠲᠡᠯ᠎ᠡ ᠪᠦᠷ ᠬᠥᠭᠵᠢᠮ ᠤᠨ ᠪᠤᠮᠠᠨ ᠠᠶᠠᠯᠭᠤ ᠪᠣᠯᠵᠤ ᠮᠡᠳᠡᠷᠡᠮᠵᠢ ᠶᠢ ᠨᠢ ᠬᠥᠭᠯᠡᠳᠡᠭ ᠪᠠᠶᠢᠪᠠ᠃ ᠶᠢᠷᠲᠢᠨᠴᠦ ᠶᠢᠨ ᠪᠦᠭᠦ ᠳᠠᠭᠤ ᠠᠪᠢᠶ᠎ᠠ ᠪᠦᠷ ᠬᠥᠭᠵᠢᠮ ᠶᠤᠮ ᠭᠡᠵᠦ ᠲᠡᠷᠡ ᠪᠠᠯᠴᠢᠷ ᠣᠶᠣᠨ ᠳᠠᠭᠠᠨ ᠪᠠᠲᠤ ᠨᠤᠲᠠ ᠢᠲᠡᠭᠡᠭᠰᠡᠨ ᠠᠪᠠᠢ᠃          ᠵᠤᠨ ᠤ ᠳᠡᠯᠭᠡᠷ ᠰᠠᠷ᠎ᠠ ᠳᠠᠭᠤᠰᠴᠤ᠂ ᠨᠠᠮᠤᠷ ᠤᠨ ᠨᠠᠯᠠᠭᠠᠷ ᠡᠳᠦᠷ ᠡᠬᠢᠯᠡᠵᠦ ᠪᠠᠶᠢᠭᠰᠠᠨ ᠨᠢᠭᠡ ᠡᠳᠦᠷ᠂ ᠪᠠᠶᠠᠨ ᠪᠠᠷᠬᠠᠰ ᠤᠨ ᠬᠢᠨ ᠰᠢᠨ᠎ᠡ ᠢᠰᠡᠭᠡᠢ ᠪᠠᠷ ᠲᠣᠮᠣ ᠴᠠᠭᠠᠨ ᠪᠠᠶᠢᠪᠠᠩᠭ᠎ᠠ ︵ᠭᠡᠷ︶ ᠪᠦᠷᠢᠭᠰᠡᠨ ᠪᠠᠶᠠᠷ ᠢᠶᠠᠨ ᠲᠡᠮᠳᠡᠭᠯᠡᠵᠦ᠂ ᠬᠤᠯᠠ ᠣᠶᠢᠷ᠎ᠠ ᠶᠢᠨ ᠭᠡᠶᠢᠴᠢᠨ ᠢᠶᠠᠨ ᠵᠠᠯᠠᠨ ᠨᠢᠵᠢᠭᠢᠷ ᠨᠠᠶᠢᠷ ᠪᠠᠵᠠᠭᠠᠪᠠ᠃ ᠡᠨᠡ ᠨᠠᠶᠢᠷ ᠳᠡᠭᠡᠷ᠎ᠡ ᠦᠯᠢᠭᠡᠷ ᠳᠣᠮᠤᠭ ᠤᠨ ᠪᠣᠭᠳᠠ ᠴᠠᠭᠠᠨ ᠡᠪᠦᠭᠡᠨ ᠰᠢᠭ ᠴᠠᠯ ᠪᠤᠭᠤᠷᠤᠯ ᠨᠢᠭᠡ ᠬᠤᠭᠤᠷᠴᠢ ᠶᠢ ᠰᠠᠭᠠᠲᠠᠭᠤᠯᠵᠤ᠂ ᠭᠡᠷ ᠤᠨ ᠵᠢᠪᠠᠷ ᠥᠷᠭᠦᠭᠡᠨ᠂ ᠲᠤᠤᠯᠢ ᠬᠠᠶᠢᠯᠠᠭᠤᠯᠤᠨ ᠳᠠᠭᠤᠤ ᠬᠤᠭᠤᠷ ᠤᠨ ᠳᠠᠯᠠᠢ ᠪᠣᠯᠪᠠ᠃          ᠮᠠᠭᠤ ᠴᠠᠭ ᠤᠨ ᠰᠡᠭᠦᠯ ᠳᠤ ᠭᠡᠨ᠎ᠡ          ᠰᠠᠶᠢᠨ ᠴᠠᠭ ᠤᠨ ᠲᠦᠷᠦᠭᠦᠨ ᠳᠤ ᠭᠡᠨ᠎ᠡ          ᠵᠥᠪ ᠤᠨ ᠵᠥᠪ ᠢ ᠪᠤᠳᠣᠵᠣ ᠣᠯᠳᠠᠭ          ᠵᠥᠩ ᠪᠢᠯᠢᠭᠲᠦ ᠪᠠᠭᠠᠲᠤᠷ ᠪᠠᠶᠢᠵᠤ ᠯᠡ ᠭᠡᠨ᠎ᠡ ᠁          ᠭᠡᠳ ᠯᠡ ᠡᠪᠦᠭᠡᠨ ᠬᠤᠭᠤᠷᠴᠢ ᠲᠤᠤᠯᠢ ᠬᠠᠶᠢᠯᠠᠬᠤ ᠳᠤ ᠬᠦᠷᠡᠯ ᠬᠦᠦ ᠥᠪᠡᠷ ᠤᠨ ᠮᠡᠳᠡᠯ ᠦᠭᠡᠢ ᠬᠤᠭᠤᠷ ᠤᠨ ᠠᠶᠠᠯᠭᠤ ᠳᠤ ᠬᠤᠪᠰᠤᠳᠠᠭᠤᠯᠤᠬᠰᠠᠨ ᠶᠤᠮ ᠰᠢᠭ᠋ ᠠᠪᠲᠠᠭᠳᠠᠨ᠂ ᠰᠢᠨ᠎ᠡ ᠪᠠᠶᠢᠪᠠᠩᠭ᠎ᠠ ᠶᠢᠨ ᠬᠠᠲᠠᠪᠴᠢ ᠪᠠᠷ ᠣᠷᠣᠵᠤ ᠣᠴᠢᠨ᠂ ᠭᠡᠶᠢᠴᠢᠳ ᠵᠣᠴᠢᠳ ᠤᠨ ᠳᠤᠮᠳᠠ ᠬᠤᠭᠤᠷ ᠤᠨ ᠡᠭᠡᠰᠢᠭᠯᠡᠩ ᠳᠤ ᠨᠢᠳᠦ ᠪᠠᠨ ᠠᠨᠢᠨ ᠰᠣᠭᠲᠣᠭᠤᠷᠠᠵᠤ᠂ ᠵᠥᠭᠡᠯᠡᠨ ᠰᠠᠯᠬᠢᠨ᠎ᠠ ᠦᠯᠦ ᠶᠠᠯᠢᠭ ᠬᠥᠳᠡᠯᠬᠦ ᠭᠢᠯᠭᠠᠨ᠎ᠠ ᠶᠢᠨ ᠲᠣᠯᠣᠭᠠᠢ ᠰᠢᠭ᠋ ᠨᠠᠶᠢᠭᠤᠨ ᠰᠠᠭᠤᠵᠤ ᠪᠠᠶᠢᠯ᠎ᠠ᠃ ᠪᠠᠷᠬᠠᠰ ᠪᠠᠶᠠᠨ ᠤ ᠬᠠᠷᠭᠢᠰ ᠬᠠᠲᠠᠭᠤ ᠪᠠᠷ ᠢᠶᠠᠨ ᠴᠤᠤ ᠳᠤ ᠭᠠᠷᠤᠭᠰᠠᠨ ᠶᠡᠭᠡ ᠬᠠᠲᠤᠨ ᠪᠠᠯᠵᠢᠳᠮ᠎ᠠ ᠵᠡᠭᠦᠨ ᠬᠤᠶᠢᠲᠤ ᠬᠤᠶᠢᠮᠤᠷ ᠠᠴᠠ ᠭᠡᠨᠡᠳᠲᠡ ᠬᠦᠦ ᠶᠢ ᠣᠯᠵᠤ ᠦᠵᠡᠭᠡᠳ ︽ᠲᠡᠷᠡ ᠪᠤᠵᠠᠷ ᠵᠣᠯᠪᠢᠩ ᠰᠢᠭᠡᠰᠦ ᠶᠢ ᠶᠠᠭᠠᠬᠢᠭᠠᠳ ᠣᠷᠣᠭᠤᠯᠤᠭᠠᠳ ᠢᠷᠡᠴᠢᠬᠡᠭᠰᠡᠨ ᠪᠠᠶᠢᠭ᠎ᠠ ᠶᠤᠮ᠂ ᠬᠥᠭᠡᠭᠡᠵᠦ ᠭᠠᠷᠭ᠎ᠠ︕ ᠪᠦᠭᠡᠰᠦ ᠬᠢᠭᠤᠷᠰᠤᠨ ᠳᠠᠭᠠᠨ ᠪᠠᠷᠢᠭᠳᠠᠭᠰᠠᠨ ᠬᠠᠷ᠎ᠠ ᠭᠤᠶᠢᠷᠠᠨᠴᠢ ᠨᠠᠶᠢᠷ ᠤᠨ ᠬᠡᠶᠢᠮᠣᠷᠢ ᠶᠢ ᠬᠡᠪᠲᠡᠭᠦᠯᠬᠦ ᠨᠢ᠃ ᠴᠢ ᠬᠤᠷᠳᠤᠨ ᠡ᠊ᠡᠳᠡ ᠠᠴᠠ ᠵᠠᠶᠢᠯ ᠭᠡᠮ︾ ᠬᠡᠮᠡᠨ ᠬᠠᠰᠬᠢᠷᠤᠨ ᠵᠠᠩᠳᠤᠷᠤᠭᠰᠠᠨ ᠢ ᠬᠦᠦ ᠶᠠᠭᠤ ᠴᠦ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠨᠢᠳᠦᠨ ᠳᠡᠭᠡᠨ ᠨᠢᠯᠪᠤᠰᠤ ᠪᠥᠮᠪᠥᠷᠢᠭᠦᠯᠦᠨ ᠬᠤᠭᠤᠷ ᠤᠨ ᠡᠭᠡᠰᠢᠭ ᠲᠤᠤᠯᠢ ᠶᠢᠨ ᠤᠳᠬ᠎ᠠ ᠪᠠᠷ ᠦᠯᠢᠭᠡᠷ ᠤᠨ ᠰᠠᠶᠢᠬᠠᠨ ᠢ ᠲᠥᠰᠥᠭᠡᠯᠡᠨ ᠰᠣᠨᠣᠰᠴᠤ ᠰᠠᠭᠤᠨ᠎ᠠ᠃ ᠡᠨᠡ ᠪᠠᠶᠢᠳᠠᠯ ᠨᠢ ᠬᠠᠲᠤᠨ ᠤ ᠬᠢᠯᠢᠩ ᠢ ᠤᠯᠠᠮ ᠰᠡᠳᠡᠷᠡᠭᠡᠵᠦ ︽ᠶᠠᠭᠠᠬᠢᠭᠰᠠᠨ ᠦᠭᠡ ᠰᠣᠨᠣᠰᠳᠠᠭ ᠦᠭᠡᠢ ᠲᠡᠨᠡᠭ ᠰᠡᠭ ᠪᠤᠢ᠃ ᠳᠠᠮᠷᠢᠨ ᠴᠢ ᠲᠡᠭᠦᠨ ᠢ ᠬᠤᠷᠳᠤᠨ ᠴᠢᠷᠴᠦ ᠭᠠᠷᠭᠠᠨ ᠰᠠᠶᠢᠨ ᠨᠢᠭᠡ ᠬᠠᠰᠢᠷᠠᠭᠠᠭᠠᠳ ᠥᠭ︕︾ ᠬᠡᠮᠡᠨ ᠰᠢᠳᠦ ᠪᠠᠨ ᠬᠠᠪᠢᠷᠤᠨ ᠠᠭᠠᠰᠢᠯᠠᠯ᠎ᠠ᠃ ᠥᠨᠥᠬᠢ ᠭᠠᠯ ᠲᠣᠭᠤᠭᠠᠨ ᠤ ᠵᠠᠷᠤᠳᠠᠰᠤ ᠳᠠᠮᠷᠢᠨ ᠬᠦᠦ ᠶᠢ ᠡᠯᠢᠶ᠎ᠡ ᠲᠠᠤᠯᠠᠢ ᠰᠢᠭᠦᠷᠭᠦ ᠮᠡᠲᠦ ᠵᠠᠭᠠᠮ᠎ᠠ ᠠᠴᠠ ᠨᠢ ᠶᠠᠭᠤ ᠬᠠᠢ ᠦᠭᠡᠢ ᠤᠭᠵᠠ ᠲᠠᠲᠠᠨ ᠭᠠᠳᠠᠭᠰᠢ ᠪᠠᠨ ᠴᠢᠯᠠᠭᠤᠳᠠᠵᠤ ᠭᠠᠷᠭᠠᠭᠠᠳ ᠪᠥᠭᠰᠡ ᠤᠷᠤᠭᠤ ᠨᠢ ᠭᠡᠳᠦ ᠭᠡᠳᠦ ᠢᠰᠬᠦᠯᠵᠦ ᠣᠷᠭᠢᠪᠡ᠃ ᠡᠪᠦᠭᠡᠨ ᠬᠤᠭᠤᠷᠴᠢ ᠲᠤᠤᠯᠢ ᠬᠠᠶᠢᠯᠠᠬᠤ ᠪᠠᠨ ᠲᠦᠷ ᠵᠣᠭᠰᠣᠭᠠᠨ ᠭᠡᠷ ᠤᠨ ᠪᠠᠷᠠᠭᠤᠨ ᠬᠤᠶᠢᠮᠤᠷ ᠠᠴᠠ ︽ᠶᠠᠭᠠᠬᠢᠵᠤ ᠪᠠᠶᠢᠭ᠎ᠠ ᠨᠢ ᠲᠡᠷᠡ ᠪᠤᠢ︖ ᠬᠥᠭᠡᠷᠦᠬᠦᠢ᠃ ᠰᠣᠨᠣᠰᠴᠤ ᠯᠠ ᠪᠠᠶᠢᠭ᠃ ᠬᠤᠪᠣᠷᠬᠠᠨ ᠠᠪᠢᠶᠠᠰ ᠲᠠᠢ ᠬᠡᠦᠬᠡᠳ ᠪᠠᠶᠢᠬᠤ ᠰᠢᠭ᠋ ᠪᠠᠶᠢᠨ᠎ᠠ︾ ᠭᠡᠬᠦ ᠨᠢ ᠰᠣᠨᠣᠰᠳᠠᠭᠰᠠᠨ ᠪᠤᠯᠪᠠᠴᠤ ᠬᠡᠨ ᠴᠦ ᠲᠡᠭᠦᠨ ᠤ ᠦᠭᠡ ᠶᠢ ᠰᠠᠨᠠᠭᠠᠨ ᠳᠠᠭᠠᠨ ᠠᠪᠴᠤ᠂ ᠬᠦᠦ ᠶᠢ ᠥᠷᠥ ᠡᠪᠡᠳᠴᠦ ᠥᠮᠥᠭᠡᠷᠡᠭᠰᠡᠨ ᠦᠭᠡᠢ᠃ ᠬᠦᠷᠡᠯ ᠬᠦᠦ ᠬᠤᠭᠤᠷ ᠤᠨ ᠠᠶᠠᠯᠭᠤ ᠳᠤ ᠤᠶᠠᠷᠠᠩᠭᠤᠢ ᠪᠠᠶᠢᠭᠰᠠᠨ ᠤ ᠳᠡᠭᠡᠷ᠎ᠡ ᠬᠦᠴᠦᠲᠡᠢ ᠵᠣᠳᠣᠭᠤᠯᠤᠭᠰᠠᠨ ᠪᠣᠯᠬᠤᠷ ᠰᠡᠮᠭᠡᠨ ᠡᠬᠡᠷ ᠲᠠᠲᠠᠨ ᠤᠭᠢᠯᠠᠬᠰᠠᠭᠠᠷ ᠮᠠᠭᠤ ᠭᠡᠷ ᠲᠡᠭᠡᠨ ᠳᠣᠭᠤᠯᠳᠠᠨ ᠬᠠᠷᠢᠭᠠᠳ᠂ ᠨᠠᠶᠢᠷ ᠤᠨ ᠭᠡᠷ ᠠᠴᠠ ᠰᠡᠪᠡᠯᠵᠡᠭᠦᠷ ᠰᠠᠯᠬᠢᠨ᠎ᠠ ᠬᠦᠢᠰ ᠬᠦᠢᠰ ᠰᠣᠨᠣᠰᠳᠠᠬᠤ ᠬᠤᠭᠤᠷ ᠬᠥᠭᠵᠢᠮ ᠤᠨ ᠭᠦᠭ ᠠᠶᠠᠯᠭᠤ ᠳᠤ ᠲᠠᠭᠠᠷᠠᠭᠤᠯᠤᠨ ᠥᠨᠥᠬᠢ ︽ᠬᠤᠭᠤᠷ︾ ᠎ ᠢᠶᠠᠨ ᠲᠠᠲᠠᠬᠤ ᠶᠢᠨ ᠰᠠᠴᠠᠭᠤ ᠶᠠᠳᠠᠭᠤ ᠲᠠᠷᠴᠢᠭ ᠬᠤᠪᠢ ᠵᠠᠶᠠᠭᠠᠨ ᠳᠠᠭᠠᠨ ᠭᠤᠮᠣᠳᠠᠩᠬᠠᠨ ᠤᠬᠢᠯᠠᠵᠤ ᠰᠠᠭᠤᠯ᠎ᠠ᠃          ᠰᠥᠨᠢ ᠣᠷᠣᠢ ᠪᠤᠯᠬᠤ ᠳᠤ ᠨᠠᠶᠢᠷ ᠬᠠᠪᠲᠠᠭᠠᠶᠢᠷᠠᠵᠤ᠂ ᠥᠨᠳᠥᠷ ᠪᠣᠭᠤᠨᠢ ᠳᠤᠤᠭᠠᠷᠴᠤ᠂ ᠣᠶᠢᠷ᠎ᠠ ᠬᠠᠪᠢ ᠶᠢᠨ ᠭᠡᠶᠢᠴᠢᠨ ᠶᠠᠪᠤᠵᠤ ᠡᠬᠢᠯᠡᠪᠡ ᠪᠤᠯᠣᠯᠲᠠᠢ᠃ ᠭᠡᠨᠡᠳᠲᠡ ᠪᠠᠶᠠᠨ ᠪᠠᠷᠬᠠᠰ ᠤᠨ ᠪᠠᠭ᠎ᠠ ᠬᠠᠲᠤᠨ ᠤ ᠬᠦᠦ ᠭᠦᠶᠦᠵᠦ ᠢᠷᠡᠭᠡᠳ ︽ᠬᠦᠷᠡᠯ ᠠ᠋︕ ᠴᠢᠮᠠᠶᠢ ᠬᠤᠭᠤᠷᠴᠢ ᠡᠪᠦᠭᠡ ᠳᠠᠭᠤᠳᠠᠵᠤ ᠪᠠᠶᠢᠨ᠎ᠠ᠃ ᠶᠠᠷᠢᠬᠤ ᠶᠠᠭᠤᠮ᠎ᠠ ᠪᠠᠶᠢᠨ᠎ᠠ ᠭᠡᠨ᠎ᠡ᠃ ᠬᠤᠷᠳᠤᠯᠠᠭᠠᠴᠢ︾ ᠭᠡᠯ᠎ᠡ᠃ ᠬᠦᠷᠡᠯ ᠴᠢᠬᠢᠨ ᠳᠡᠭᠡᠨ ᠢᠲᠡᠭᠡᠵᠦ ᠶᠠᠳᠠᠭᠰᠠᠨ ᠪᠤᠯᠪᠠᠴᠤ ᠳᠣᠪᠳᠣᠨ ᠢ ᠳᠠᠭᠠᠭᠠᠳ ᠣᠴᠢᠪᠠ᠃ ᠠᠷᠪᠠᠨ ᠲᠠᠪᠤᠨ ᠤ ᠰᠦᠨ ᠭᠡᠷᠡᠯ ᠳᠤ ᠪᠤᠭᠤᠷᠤᠯ ᠬᠤᠭᠤᠷᠴᠢ ᠮᠥᠩᠭᠦᠨ ᠴᠠᠭᠠᠨ ᠦᠰᠦ ᠪᠠᠨ ᠨᠠᠮᠤᠷ ᠤᠨ ᠰᠥᠨᠢ ᠶᠢᠨ ᠤᠶᠠᠬᠠᠨ ᠵᠢᠪᠠᠷ ᠲᠤ ᠨᠠᠮᠢᠷᠠᠭᠤᠯᠤᠨ᠂ ᠬᠤᠲᠠᠨ ᠵᠠᠬ᠎ᠠ ᠶᠢᠨ ᠪᠣᠷᠵᠢᠨ ᠬᠠᠳᠠᠨ ᠳᠡᠭᠡᠷ᠎ᠡ ᠰᠠᠭᠠᠲᠠᠵᠤ ᠪᠠᠶᠢᠪᠠ᠃ ᠦᠯᠢᠭᠡᠷ ᠤᠨ ᠶᠠᠭᠤᠮ᠎ᠠ ᠦᠵᠡᠵᠦ ᠪᠠᠶᠢᠭ᠎ᠠ ᠶᠤᠮ ᠰᠢᠭ᠋ ᠵᠡᠭᠦᠳᠦᠯᠡᠵᠦ ᠪᠠᠶᠢᠭ᠎ᠠ ᠴᠦ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠨ᠎ᠠ᠃ ᠳᠣᠪᠳᠣᠨ ᠪᠢ ᠬᠠᠷᠢᠯ᠎ᠠ ᠭᠡᠳ ᠭᠦᠶᠦᠨ ᠣᠳᠪᠠ᠃ ᠬᠦᠦ ᠠᠶᠤᠵᠤ ᠪᠦᠱᠦᠭᠦᠷᠭᠡᠨ ᠰᠡᠮ ᠰᠡᠮ ᠠᠯᠬᠤᠭᠰᠠᠭᠠᠷ ᠬᠦᠷᠴᠦ ᠣᠴᠢᠬᠤ ᠳᠤ ᠬᠤᠭᠤᠷᠴᠢ ᠭᠤᠸᠠᠢ ︽ᠵᠠ ᠬᠦᠦ ᠮᠢᠨᠢ ᠨᠠᠭᠠᠰᠢ ᠪᠠᠨ ᠢᠷ᠎ᠡ︕ ᠪᠢᠲᠡᠭᠡᠢ ᠠᠶᠤᠵᠤ ᠡᠷᠡᠭᠡᠯᠡ︕ ᠮᠢᠨᠤ ᠬᠠᠵᠠᠭᠤ ᠳᠤ ᠰᠠᠭᠤ︕ ᠴᠢᠮ᠎ᠠ ᠳᠤ ᠶᠠᠷᠢᠬᠤ ᠶᠠᠭᠤᠮ᠎ᠠ ᠪᠠᠶᠢᠨ᠎ᠠ︾ ᠭᠡᠬᠦ ᠶᠢ ᠎ ᠨᠢ ᠰᠣᠨᠣᠰᠤᠭᠠᠳ ᠬᠦᠦ ᠶᠢᠨ ᠳᠣᠲᠣᠷ᠎ᠠ ᠭᠡᠭᠡ ᠲᠠᠲᠠᠭᠠᠳ ᠶᠠᠪᠤᠴᠢᠬᠠᠯ᠎ᠠ᠃ ᠪᠤᠭᠤᠷᠤᠯ ᠬᠤᠭᠤᠷᠴᠢ ᠪᠢᠯᠢᠭᠲᠦ ᠭᠥᠷᠥᠭᠡᠰᠦᠨ ᠤ ᠲᠣᠯᠣᠭᠠᠢ ᠲᠠᠢ ᠬᠤᠭᠤᠷ ᠢᠶᠠᠨ ᠵᠡᠭᠦᠨ ᠭᠠᠷ ᠲᠠᠭᠠᠨ ᠪᠠᠷᠢᠨ᠂ ᠨᠥᠭᠦᠭᠡ ᠭᠠᠷ ᠢᠶᠠᠷ ᠢᠶᠠᠨ ᠬᠦᠦ ᠶᠢᠨ ᠲᠣᠯᠣᠭᠠᠢ ᠶᠢ ᠵᠥᠭᠡᠯᠡᠬᠡᠨ ᠢᠯᠢᠭᠰᠡᠨ ᠢᠶᠠᠨ᠄ ︽ᠴᠢᠮᠠᠶᠢ ᠳᠠᠭᠤᠤ ᠬᠤᠭᠤᠷ ᠲᠤ ᠶᠠᠰᠤᠨ ᠠᠴᠠ ᠪᠠᠨ ᠳᠤᠷᠠᠲᠠᠢ᠂ᠲᠡᠭᠡᠭᠡᠳ ᠪᠠᠰᠠ ᠲᠡᠭᠷᠢ ᠠᠴᠠ ᠵᠠᠶᠠᠭᠠᠭᠰᠠᠨ ᠠᠪᠢᠶᠠᠰ ᠲᠠᠢ ᠭᠡᠳᠡᠭ ᠢ ᠪᠢ ᠵᠥᠩ ᠰᠤᠪᠢᠩ ᠢᠶᠠᠷ ᠢᠶᠠᠨ ᠨᠡᠪᠲᠡ ᠬᠠᠷᠠᠵᠤ ᠮᠡᠳᠡᠵᠦ ᠪᠠᠶᠢᠨ᠎ᠠ᠃ ᠬᠤᠭᠤᠷᠴᠢ ᠪᠤᠯᠬᠤ ᠠᠮᠠᠷ ᠦᠭᠡᠢ᠃ ᠲᠡᠷᠡ ᠮᠥᠷᠲᠡᠭᠡᠨ ᠲᠦᠮᠡᠨ ᠠᠴᠠ ᠰᠤᠭᠤᠷᠠᠭᠰᠠᠨ ᠬᠤᠭᠤᠷᠴᠢ ᠪᠤᠯᠬᠤ ᠪᠦᠷ ᠴᠦ ᠠᠮᠠᠷ ᠦᠭᠡᠢ᠃ ᠠᠮᠢᠳᠤᠷᠠᠯ ᠶᠠᠳᠠᠭᠤ ᠶᠠᠭᠠᠬᠢᠬᠤ ᠪᠤᠢ᠃ ᠬᠥᠮᠥᠨ ᠠᠪᠢᠶᠠᠰ ᠤᠬᠠᠭᠠᠨ ᠬᠤᠶᠠᠷ ᠢᠶᠠᠨ ᠵᠥᠪ ᠬᠡᠷᠡᠭᠯᠡᠵᠦ ᠴᠢᠳᠠᠪᠠᠯ ᠬᠤᠪᠢ ᠵᠠᠶᠠᠭ᠎ᠠ ᠪᠠᠨ ᠬᠤᠪᠢᠷᠠᠭᠤᠯᠵᠤ ᠪᠤᠯᠳᠠᠭ ᠶᠤᠮ︾ ᠭᠡᠬᠦ ᠳᠤ ︽ᠥᠪᠥᠧ ᠠ᠋︕ ᠪᠢ ᠲᠠᠨ ᠢ ᠳᠠᠭᠠᠭᠠᠳ ᠶᠠᠪᠤᠮᠠᠷ ᠪᠠᠶᠢᠨ᠎ᠠ᠃ ᠲᠠᠨ ᠰᠢᠭ᠋ ᠬᠤᠭᠤᠷᠴᠢ ᠪᠣᠯᠣᠶ᠎ᠠ ᠭᠡᠵᠦ ᠪᠤᠳᠣᠵᠣ ᠪᠠᠶᠢᠨ᠎ᠠ︾ ᠭᠡᠪᠡ᠃ ᠡᠪᠦᠭᠡᠨ ᠨᠢᠳᠦ ᠪᠠᠨ ᠠᠨᠢᠨ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢᠶᠠᠨ ︽ᠪᠢ ᠬᠥᠭᠰᠢᠨ ᠬᠤᠨᠢᠨ ᠤ ᠨᠠᠰᠤ ᠦᠭᠡᠢ ᠪᠣᠯᠤᠭᠰᠠᠨ ᠬᠥᠮᠥᠨ᠃ ᠪᠢ ᠱᠠᠪᠢ ᠳᠠᠭᠠᠭᠤᠯᠬᠤ ᠦᠭᠡᠢ᠃ ᠴᠢᠨᠦ ᠪᠠᠭᠰᠢ ᠬᠤᠭᠤᠷ ᠤᠨ ᠪᠤᠷᠬᠠᠨ ᠲᠡᠭᠷᠢ ᠶᠢᠨ ᠨᠢᠭᠡᠨ ᠵᠠᠢ ᠳᠤ ᠪᠠᠶᠢᠭ᠎ᠠ᠃ ᠭᠠᠭᠴᠠ ᠬᠦ ᠴᠢ ᠮᠠᠰᠢ ᠶᠡᠭᠡ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ᠂ ᠦᠷᠡᠭᠳᠡᠯ ᠬᠤᠬᠢᠷᠠᠯ ᠭᠠᠷᠭᠠᠬᠤ ᠬᠡᠷᠡᠭᠲᠡᠢ ᠪᠣᠯᠣᠨ᠎ᠠ᠃ ᠴᠢ ᠴᠢᠳᠠᠬᠤ ᠶᠤᠮ ᠪᠣᠯᠪᠠ ᠦᠦ ᠳ᠋ᠡ︖︾ ᠭᠡᠳ ᠭᠦᠨ ᠰᠠᠨᠠᠭ᠎ᠠ ᠠᠯᠳᠠᠯ᠎ᠠ᠃ ︽ᠪᠢ ᠴᠢᠳᠠᠨ᠎ᠠ ᠠ᠋᠃ ᠲᠡᠷᠡ ᠨᠢ ᠶᠠᠭᠤ ᠶᠤᠮ ᠪᠣᠯ︖︾ ᠭᠡᠳ ᠬᠦᠦ ᠡᠪᠦᠳᠦᠭ ᠢ ᠨᠢ ᠲᠦᠰᠢᠨ ᠭᠠᠵᠠᠷ ᠲᠤ ᠴᠣᠮᠴᠣᠶᠢᠵᠤ ᠰᠠᠭᠤᠪᠠ᠃ ᠲᠤᠤᠯᠢᠴᠢ᠄ ︽ᠴᠢ ᠨᠠᠳᠠ ᠠᠴᠠ ᠬᠤᠯᠠ ᠠᠭᠤᠤ ᠬᠤᠭᠤᠷᠴᠢ ᠪᠣᠯᠣᠨ᠎ᠠ ᠭᠡᠳᠡᠭ ᠢ ᠲᠡᠭᠷᠢ ᠵᠢᠭᠠᠵᠤ ᠠᠨᠳᠠᠭᠠᠶᠢᠯᠠᠬᠤ ᠳᠤ ᠪᠡᠯᠡᠨ ᠪᠠᠶᠢᠨ᠎ᠠ᠃ ᠭᠡᠪᠡᠴᠦ ᠨᠢᠭᠡ ᠯᠡ ᠶᠠᠭᠤᠮᠠᠨ ᠳᠡᠭᠡᠷ᠎ᠡ ᠰᠠᠨᠠᠭ᠎ᠠ ᠵᠣᠪᠠᠭᠠᠳ ᠪᠠᠶᠢᠬᠤ ᠶᠤᠮ︾ ᠭᠡᠳ ᠠᠯᠤᠰ ᠠᠴᠠ ᠶᠠᠭᠤ ᠨᠢᠭᠡ ᠶᠢ ᠴᠢᠩᠨᠠᠭᠠᠷᠬᠠᠨ ᠳᠠᠭᠤ ᠪᠠᠨ ᠬᠤᠷᠢᠶᠠᠪᠠ᠃ ︽ᠥᠪᠥᠧ ᠮᠢᠨᠢ︕ ᠶᠠᠭᠠᠬᠢᠯ᠎ᠠ ᠭᠡᠵᠢ︾ ᠭᠡᠬᠦ ᠳᠤ ᠡᠪᠦᠭᠡᠨ ᠤᠷᠲᠤ ᠴᠠᠭᠠᠨ ᠰᠠᠬᠠᠯ ᠢᠶᠠᠨ ᠰᠢᠪᠲᠤᠷᠠᠭᠠᠳ᠄ ︽ᠴᠢ ᠬᠠᠷᠠᠭ᠎ᠠ ᠪᠠᠨ ᠠᠯᠳᠠᠬᠤ ᠪᠣᠯᠣᠨ᠎ᠠ᠃ ᠴᠢ ᠨᠠᠮᠠᠶᠢ ᠬᠠᠷᠠ᠃ ᠪᠢ ᠰᠣᠬᠤᠷ ᠬᠥᠮᠥᠨ ᠰᠢᠦ ᠳ᠋ᠡ᠃ ᠠᠷᠪᠠᠨ ᠨᠠᠢᠮᠠᠨ ᠨᠠᠰᠤᠨ ᠠᠴᠠ ᠪᠠᠨ ᠳᠠᠯᠠᠨ ᠨᠠᠢᠮᠠ ᠭᠦᠷᠲᠡᠯ᠎ᠡ ᠪᠠᠨ ᠨᠢᠭᠡᠨ ᠵᠢᠷᠠᠨ ᠤ ᠲᠤᠷᠰᠢ ᠨᠢᠳᠦ ᠦᠭᠡᠢ ᠶᠠᠪᠤᠯ᠎ᠠ᠃ ᠮᠢᠨᠤ ᠨᠢᠳᠦ᠂ ᠮᠢᠨᠤ ᠭᠡᠷᠡᠯ ᠭᠡᠭᠡ ᠡᠨᠡ ᠬᠤᠭᠤᠷ ᠪᠠᠶᠢᠭᠰᠠᠨ᠃ ᠲᠡᠭᠡᠭᠡᠳ ᠵᠣᠬᠰᠣᠬᠤ ᠦᠭᠡᠢ ᠮᠢᠨᠤ ᠨᠡᠷ᠎ᠡ ᠲᠥᠷᠥ᠂ ᠣᠩᠭᠤᠳ ᠪᠢᠯᠢᠭ᠂ ᠡᠳ᠋ ᠬᠤᠭᠰᠢᠯ᠂ ᠳᠠᠭᠤ ᠬᠤᠭᠤᠯᠠᠢ᠂ ᠵᠠᠮ ᠮᠥᠷ᠂ ᠠᠮᠢ ᠠᠮᠢᠳᠤᠷᠠᠯ ᠲᠡᠷᠡ ᠴᠦ ᠪᠠᠶᠢᠲᠤᠭᠠᠢ ᠮᠢᠨᠤ ᠰᠢᠳᠢᠲᠦ ᠲᠠᠷᠨᠢ᠂ ᠳᠣᠮ ᠵᠠᠰᠠᠯ᠂ ᠭᠤᠨᠢᠭ ᠪᠠᠶᠠᠷ ᠁ ᠪᠦᠷ ᠡᠨᠡ ᠬᠤᠭᠤᠷ ᠶᠤᠮ᠃ ᠪᠢ ᠠᠪᠤ ᠡᠵᠢ ᠠᠴᠠ ᠬᠠᠶᠢᠷᠠᠯᠠᠭᠰᠠᠨ ᠠᠯᠠᠭ ᠬᠤᠶᠠᠷ ᠨᠢᠳᠦ ᠪᠠᠨ ᠠᠯᠳᠠᠵᠤ ᠪᠠᠶᠢᠵᠤ ᠡᠨᠡ ᠪᠦᠭᠦᠨ ᠢ ᠰᠣᠯᠢᠵᠤ ᠠᠪᠴᠢᠷᠠᠭᠰᠠᠨ ᠰᠢᠦ ᠳ᠋ᠡ᠃ ᠡᠶᠢᠮᠦ ᠶᠢᠨ ᠲᠤᠯᠠᠳᠠ ᠴᠢᠮᠠᠶᠢ ᠬᠠᠷ᠎ᠠ ᠨᠢᠯᠬ᠎ᠠ ᠠᠴᠠ ᠨᠢ ᠬᠠᠷᠠᠭ᠎ᠠ ᠶᠢ ᠴᠢᠨᠢ ᠠᠯᠳᠠᠭᠤᠯᠵᠤ᠂ ᠬᠠᠷᠠᠩᠭᠤᠢ ᠶᠢᠷᠲᠢᠨᠴᠦ ᠳᠤᠮᠳᠠᠭᠤᠷ ᠶᠠᠪᠤᠭᠤᠯᠤᠮᠠᠷ ᠦᠭᠡᠢ ᠰᠠᠨᠠᠭᠳᠠᠨ᠎ᠠ᠃ ᠰᠠᠶᠢᠨ ᠶᠠᠭᠤᠮ᠎ᠠ ᠪᠦᠭᠦᠨ ᠬᠢᠰᠠᠭᠠᠨ ᠲᠠᠢ᠃ ᠴᠢ ᠰᠠᠶᠢᠲᠤᠷ ᠪᠤᠳᠣᠭᠠᠳ ᠰᠢᠢᠳ ᠢᠶᠠᠨ ᠭᠠᠷᠭ᠎ᠠ ᠳ᠋ᠠ︕︾ ᠭᠡᠯ᠎ᠡ᠃ ᠬᠦᠦ ᠬᠡᠰᠡᠭ ᠪᠣᠳᠣᠯᠭᠠᠰᠢᠷᠠᠨ ᠰᠠᠭᠤᠭᠰᠠᠨ ᠢᠶᠠᠨ᠄ ︽ᠪᠢ ᠬᠤᠭᠤᠷᠴᠢ ᠪᠣᠯᠴᠢᠬᠠᠭᠰᠠᠨ ᠪᠠᠶᠢᠨ᠎ᠠ ᠭᠡᠵᠦ ᠦᠷᠭᠦᠯᠵᠢ ᠵᠡᠭᠦᠳᠦᠯᠡᠳᠡᠭ᠃ ᠲᠠᠨ ᠰᠢᠭ᠋ ᠬᠤᠭᠤᠷᠴᠢ ᠪᠣᠯᠵᠤ ᠴᠢᠳᠠᠪᠠᠯ ᠶᠠᠭᠠᠬᠢᠭᠰᠠᠨ ᠴᠦ ᠶᠠᠭᠠᠬᠢᠬᠤᠪ᠃ ᠪᠢ ᠠᠶᠤᠵᠤ ᠪᠠᠶᠢᠪᠠᠴᠤ ᠵᠣᠷᠢᠭ ᠰᠢᠢᠳᠦᠯ᠎ᠡ︾ ᠭᠡᠳ ᠭᠠᠷ ᠢᠶᠠᠨ ᠵᠠᠩᠭᠢᠳᠤᠨ ᠡᠷᠡᠰ ᠲᠠᠰᠤ ᠬᠠᠷᠢᠭᠤᠯᠪᠠ᠃ ︽ᠴᠢ ᠴᠦ ᠲᠣᠮᠣ ᠬᠥᠮᠥᠨ ᠰᠢᠭ ᠶᠠᠷᠢᠬᠤ ᠶᠤᠮ᠃ ᠡᠵᠢ ᠲᠠᠢ ᠪᠠᠨ ᠵᠥᠪᠳᠡᠯᠴᠡᠭᠡᠳ ᠵᠥᠪᠰᠢᠶᠡᠷᠡᠭᠰᠡᠨ ᠤ ᠳᠠᠷᠠᠭ᠎ᠠ ᠰᠣᠩᠭᠤᠯᠲᠠ ᠬᠢᠭᠡᠷᠡᠢ︕︾ ᠭᠡᠳ ᠬᠤᠭᠤᠷ ᠤᠨ ᠢᠶᠠᠨ ᠲᠣᠯᠣᠭᠠᠢ ᠶᠢ ᠬᠠᠴᠠᠷ ᠲᠠᠭᠠᠨ ᠨᠠᠭᠠᠨ ᠴᠢᠮᠡᠭᠡ ᠦᠭᠡᠢ ᠪᠣᠯᠪᠠ᠃          ᠶᠠᠭ ᠡᠨᠡ ᠦᠶ᠎ᠡ ᠳᠤ ᠡᠵᠢ ᠨᠢ ᠬᠦᠦ ᠪᠠᠨ ᠬᠠᠶᠢᠭᠠᠳ ᠢᠷᠡᠵᠦ ᠲᠠᠭᠠᠷᠠᠯ᠎ᠠ᠃ ᠡᠨᠡ ᠪᠦᠭᠦᠨ ᠢ ᠡᠵᠢ ᠎ ᠳᠤᠨᠢ ᠬᠡᠯᠡᠬᠦ ᠳᠤ ᠡᠵᠢ ᠨᠢ ᠭᠦᠨ ᠪᠣᠳᠣᠯᠭᠠᠰᠢᠷᠠᠯ ᠳᠤ ᠠᠪᠲᠠᠨ ᠬᠡᠰᠡᠭ ᠳᠠᠭᠤ ᠦᠭᠡᠢ ᠪᠠᠶᠢᠭᠰᠠᠨ ᠢᠶᠠᠨ ᠰᠠᠨᠠᠭ᠎ᠠ ᠠᠯᠳᠠᠭᠠᠳ᠄ ︽ᠶᠠᠮᠠᠷ ᠴᠦ ᠬᠠᠲᠠᠭᠤ ᠰᠣᠩᠭᠤᠯᠲᠠ ᠪᠤᠢ᠃ ᠮᠢᠨᠤ ᠬᠦᠦ ᠴᠦ ᠬᠤᠭᠤᠷ ᠤᠨ ᠴᠠᠭᠠᠨ ᠰᠣᠯᠢᠶ᠎ᠠ ᠲᠤᠰᠴᠢᠬᠠᠭᠰᠠᠨ ᠭᠡᠬᠦ ᠳᠤ ᠪᠣᠯᠣᠨ᠎ᠠ᠃ ᠬᠤᠭᠤᠷ ᠰᠢᠭ᠋ ᠶᠠᠭᠤᠮ᠎ᠠ ᠬᠢᠴᠢᠬᠡᠭᠡᠳ ᠡᠳᠦᠷ ᠲᠡᠭᠡᠨ ᠬᠢᠷᠦᠭᠡᠳᠡᠵᠦ ᠰᠠᠭᠤᠬᠤ ᠶᠢ ᠨᠢ ᠬᠠᠷᠠᠬᠤ ᠪᠠᠷ ᠥᠷᠥᠪᠳᠦᠭᠡᠳ ᠪᠠᠶᠢᠳᠠᠭ ᠶᠤᠮ᠃ ᠬᠤᠭᠤᠷᠴᠢ ᠵᠠᠯᠠᠭᠤ ᠨᠠᠮᠠᠶᠢ ᠲᠠᠭᠠᠯᠠᠵᠤ ᠪᠠᠶᠢᠨ᠎ᠠ ᠭᠡᠵᠦ ᠵᠡᠭᠦᠳᠦᠯᠡᠭᠡᠳ ᠯᠠ ᠬᠦᠦ ᠮᠢᠨᠢ ᠨᠠᠳᠠᠳᠤ ᠵᠠᠶᠠᠭᠠᠭᠰᠠᠨ᠃ ᠬᠤᠭᠤᠷ ᠬᠥᠭᠯᠡᠵᠦ ᠠᠮᠢᠳᠤᠷᠠᠬᠤ ᠶᠢᠨ ᠲᠠᠪᠢᠯᠠᠩ ᠲᠠᠢ ᠶᠤᠮ ᠪᠣᠯᠪᠠ ᠦᠦ ᠭᠡᠵᠦ ᠳᠠᠩᠳᠠ ᠪᠤᠳᠣᠵᠣ ᠶᠠᠪᠤᠳᠠᠭ᠃ ᠬᠤᠭᠤᠷᠴᠢ ᠪᠣᠯᠵᠤ ᠬᠤᠪᠢ ᠵᠠᠶᠠᠭ᠎ᠠ ᠨᠢ ᠬᠤᠪᠢᠷᠠᠬᠤ ᠴᠦ ᠶᠤᠮ ᠪᠢᠵᠡ᠃ ᠪᠠᠭᠰᠢ ᠲᠠ ᠪᠣᠯᠭᠤᠭᠠᠵᠤ ᠬᠠᠶᠢᠷᠠᠯᠠ︕︾ ᠭᠡᠳ ᠵᠠᠯᠪᠠᠷᠢᠨ ᠮᠥᠷᠭᠦᠪᠡ᠃ ︽ᠡᠵᠢ ᠠ᠋︕ ᠲᠠ ᠵᠥᠪᠰᠢᠶᠡᠷᠡᠭᠰᠡᠨ ᠦᠦ︖ ᠶᠠᠮᠠᠷ ᠭᠤᠶᠣ ᠪᠤᠢ︾ ᠭᠡᠳ ᠨᠢᠳᠦᠨ ᠳᠡᠭᠡᠨ ᠪᠠᠶᠠᠷ ᠤᠨ ᠣᠴᠢ ᠭᠢᠯᠠᠯᠵᠠᠭᠤᠯᠤᠨ ᠳᠡᠪᠬᠡᠷᠦᠨ ᠪᠣᠰᠣᠯ᠎ᠠ᠃ ︽ᠮᠢᠨᠤ ᠬᠦᠦ ᠨᠢᠭᠡ ᠨᠠᠰᠤ ᠪᠠᠷ ᠢᠶᠠᠨ ᠬᠠᠷᠠᠭ᠎ᠠ ᠦᠭᠡᠢ ᠶᠠᠭᠠᠬᠢᠵᠤ ᠠᠮᠢᠳᠤᠷᠠᠨ᠎ᠠ ᠳ᠋ᠠ ᠭᠡᠬᠦ ᠠᠴᠠ ᠯᠡ ᠰᠡᠳᠬᠢᠯ ᠨᠢᠭᠡ ᠯᠡ ᠲᠦᠪᠳᠡᠬᠦ ᠦᠭᠡᠢ ᠪᠠᠶᠢᠨ᠎ᠠ︾ ᠭᠡᠳ ᠡᠵᠢ ᠨᠢ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠳᠤ ︽ᠡᠨᠡ ᠥᠪᠥᠧ ᠡᠶᠢᠮᠦ ᠰᠠᠶᠢᠬᠠᠨ ᠶᠠᠪᠤᠵᠤ ᠪᠠᠶᠢᠨ᠎ᠠ ᠰᠢᠳᠡ︾ ᠭᠡᠳ ᠬᠤᠭᠤᠷᠴᠢ ᠶᠢᠨ ᠭᠠᠷ ᠢ ᠠᠳᠬᠤᠨ ᠡᠵᠢ ᠶᠢ ᠪᠠᠨ ᠴᠢᠷᠠᠶᠢᠴᠢᠯᠠᠨ ᠶᠠᠷᠢᠯ᠎ᠠ᠃ ᠡᠪᠦᠭᠡᠨ ᠬᠤᠭᠤᠷᠴᠢ᠄ ︽ᠲᠡᠭᠡᠪᠡᠯ ᠪᠢ ᠴᠢᠮᠠᠳᠤ ᠶᠠᠭᠠᠬᠢᠵᠤ ᠭᠠᠶᠢᠬᠠᠮᠰᠢᠭᠲᠤ ᠬᠤᠭᠤᠷᠴᠢ ᠪᠤᠯᠬᠤ ᠶᠢ ᠬᠡᠯᠡᠵᠦ ᠥᠭᠭᠦᠶ᠎ᠡ︕ ᠲᠠ ᠨᠠᠷ ᠰᠢᠢᠳᠦᠭᠰᠡᠨ ᠪᠣᠯ ᠪᠢ ᠡᠨᠡ ᠬᠤᠭᠤᠷ ᠢᠶᠠᠨ ᠥᠭᠭᠦᠨ᠎ᠡ᠃ ᠴᠢ ᠴᠠᠭᠠᠨ ᠮᠣᠷᠢ ᠡᠳᠦᠷ ᠠᠴᠠ ᠳᠠᠷᠤᠢ ᠡᠨᠡ ᠰᠥᠨᠢ ᠠᠴᠠ ᠡᠬᠢᠯᠡᠨ ᠥᠨᠳᠥᠷ ᠭᠠᠵᠠᠷ ᠤᠨ ᠣᠷᠣᠢ ᠳᠤ ᠣᠳᠣ ᠭᠦᠢᠴᠡᠭᠰᠡᠨ ᠬᠤᠶᠢᠨ᠎ᠠ ᠭᠠᠷᠤᠭᠠᠳ ᠦᠦᠷ ᠤᠨ ᠴᠣᠯᠮᠣᠨ ᠲᠣᠳᠣᠷᠠᠬᠤ ᠪᠤᠯᠲᠠᠯ᠎ᠠ ᠪᠦᠭᠦ ᠰᠡᠳᠬᠢᠯ ᠢᠶᠠᠨ ᠲᠥᠪᠯᠡᠷᠡᠭᠦᠯᠦᠨ ᠬᠤᠭᠤᠷ ᠢᠶᠠᠨ ᠲᠠᠲᠠᠭᠠᠳ ᠯᠠ ᠪᠠᠶᠢᠬᠤ ᠬᠡᠷᠡᠭᠲᠡᠢ᠃ ᠬᠡᠨ ᠴᠦ ᠴᠢᠮᠠᠳᠤ ᠳᠡᠷᠭᠡᠳᠡ ᠠᠴᠠ ᠴᠢᠨᠢ ᠪᠠᠭᠰᠢᠯᠠᠬᠤ ᠦᠭᠡᠢ᠃ ᠪᠠᠭᠰᠢ ᠴᠢᠨᠢ ᠲᠡᠭᠷᠢ ᠳᠡᠭᠡᠷ᠎ᠡ ᠠᠴᠠ ᠬᠠᠷᠠᠵᠤ ᠪᠠᠶᠢᠬᠤ ᠪᠣᠯᠣᠨ᠎ᠠ ᠭᠡᠵᠦ ᠪᠢ ᠰᠠᠶ᠋ᠢ ᠬᠡᠯᠡᠭᠰᠡᠨ᠃ ᠶᠠᠪᠤᠬᠤ ᠲᠣᠲᠣᠮ ᠬᠠᠷᠠᠭ᠎ᠠ ᠴᠢᠨᠢ ᠮᠠᠭᠤᠳᠠᠭᠠᠳ ᠢᠷᠡᠵᠦ ᠪᠠᠶᠢᠪᠠᠯ ᠴᠢ ᠬᠤᠭᠤᠷᠴᠢ ᠪᠣᠯᠵᠤ ᠪᠠᠶᠢᠭ᠎ᠠ ᠨᠢ ᠲᠡᠷᠡ᠃ ᠬᠠᠮᠤᠭ ᠡᠴᠦᠰ ᠲᠤ ᠬᠠᠷᠠᠭ᠎ᠠ ᠪᠠᠨ ᠪᠦᠷᠢᠮᠦᠰᠦᠨ ᠠᠯᠳᠠᠭᠰᠠᠨ ᠴᠠᠭ ᠠᠴᠠ ᠯᠠ ᠴᠢ ᠳᠣᠮᠣᠭᠲᠤ ᠬᠤᠭᠤᠷᠴᠢ ᠶᠢᠨ ᠵᠢᠩᠳᠠᠭᠠᠨ ᠳᠤ ᠭᠦᠷᠦᠨ᠎ᠡ᠃ ᠰᠠᠯᠬᠢ ᠪᠣᠷᠣᠭᠠᠨ᠂ ᠬᠦᠢᠲᠡᠨ ᠬᠠᠯᠠᠭᠤᠨ ᠡᠰᠡᠬᠦᠯ᠎ᠡ ᠵᠠᠯᠬᠠᠭᠤᠷᠠᠯ᠂ ᠴᠥᠬᠦᠷᠡᠯ ᠠᠴᠠ ᠪᠣᠯᠵᠤ ᠳᠤᠮᠳᠠ ᠠᠴᠠ ᠨᠢ ᠳᠣᠷᠭᠤᠨ ᠵᠣᠭᠰᠣᠪᠠᠯ ᠰᠠᠨᠠᠭᠰᠠᠨ ᠬᠡᠷᠡᠭ ᠴᠢᠨᠢ ᠰᠠᠭᠠᠷᠠᠨ᠎ᠠ᠃ ᠡᠶᠢᠮᠦ ᠯᠠ ᠬᠠᠲᠠᠭᠤ ᠲᠠᠩᠭᠠᠷᠢᠭ ᠲᠠᠢ᠃ ᠭᠠᠶᠢᠠᠬᠠᠮᠰᠢᠬᠲᠤ ᠬᠤᠭᠤᠷᠴᠢ ᠶᠢᠨ ᠬᠤᠪᠢ ᠵᠠᠶᠠᠭ᠎ᠠ ᠬᠠᠲᠠᠭᠤᠬᠠᠨ ᠪᠠᠶᠢᠳᠠᠭ ᠶᠤᠮ ᠳ᠋ᠠ᠃ ᠪᠤᠷᠬᠠᠨ ᠠᠴᠠ ᠬᠥᠮᠥᠨ ᠳᠤ ᠶᠡᠭᠡ ᠠᠪᠢᠶᠠᠰ ᠤᠨ ᠪᠤᠶᠠᠨ ᠢ ᠲᠡᠶᠢᠮᠦ ᠴᠦ ᠬᠢᠮᠳᠠ ᠲᠥᠰᠥᠷ ᠬᠠᠶᠢᠷᠠᠯᠠᠳᠠᠭ ᠦᠭᠡᠢ ᠪᠤᠯᠣᠯᠲᠠᠢ᠃ ᠲᠡᠶᠢᠮᠦ ᠠᠴᠠ ᠠᠪᠢᠶᠠᠰᠲᠠᠨ ᠤ ᠵᠣᠪᠠᠯᠠᠩ ᠳᠠᠭᠤᠰᠳᠠᠭ ᠦᠭᠡᠢ ᠶᠤᠮ᠃ ᠭᠡᠬᠦ ᠳᠡᠭᠡᠨ ᠭᠠᠷ ᠤᠨ ᠬᠤᠷᠤᠭᠤᠨ ᠳᠤ ᠪᠠᠭᠲᠠᠵᠤ ᠲᠣᠭᠠᠯᠠᠭᠳᠠᠬᠤ ᠡᠳᠡᠭᠡᠷ ᠬᠥᠮᠥᠰ ᠤᠨ ᠪᠤᠶᠠᠨ ᠳᠤ ᠯᠠ ᠣᠷᠴᠢᠯᠠᠩ ᠤᠨ ᠬᠦᠷᠳᠦ ᠰᠠᠶᠢᠨ ᠵᠦᠭ ᠤᠷᠤᠭᠤ ᠡᠷᠭᠢᠵᠦ ᠪᠠᠶᠢᠳᠠᠭ ᠤᠴᠢᠷᠲᠠᠢ︾ ᠭᠡᠳ ᠬᠤᠭᠤᠷ ᠢᠶᠠᠨ ᠬᠥᠭᠯᠡᠨ ᠳᠤᠤᠭᠠᠷᠭᠠᠭᠰᠠᠨ ᠢᠶᠠᠨ᠄ ︽ᠵᠠ᠂ ᠬᠤᠵᠢᠮ ᠤᠨ ᠶᠡᠭᠡ ᠬᠤᠪᠣᠷᠬᠠᠨ ᠬᠤᠭᠤᠷᠴᠢ ᠴᠢᠮᠠᠳᠤ ᠶᠢᠰᠦᠨ ᠦᠶ᠎ᠡ ᠳᠠᠮᠵᠢᠭᠰᠠᠨ ᠡᠺᠡᠯ ᠬᠡᠮᠡᠭᠴᠢ ᠬᠤᠭᠤᠷ ᠢᠶᠠᠨ ᠥᠪᠯᠡᠭᠦᠯᠵᠦ ᠥᠭᠭᠦᠶ᠎ᠡ᠃ ᠡᠨᠡ ᠪᠣᠯ ᠴᠢᠨᠦ ᠠᠮᠢ᠂ ᠠᠮᠢᠳᠤᠷᠠᠯ᠂ ᠠᠯᠢᠪᠠ ᠪᠦᠭᠦᠨ ᠴᠢᠨᠢ ᠪᠠᠶᠢᠬᠤ ᠪᠣᠯᠣᠨ᠎ᠠ᠃ ᠶᠠᠭᠤ ᠪᠠᠷ ᠴᠦ ᠰᠣᠯᠢᠵᠤ ᠪᠤᠯᠬᠤ ᠦᠭᠡᠢ᠃ ᠡᠳ᠋ ᠮᠥᠩᠭᠦ᠂ ᠥᠩᠭᠡ ᠳᠠᠷᠠᠰᠤᠨ ᠤ ᠰᠢᠨᠤᠯ ᠠᠴᠠ ᠬᠤᠯᠠᠬᠠᠨ ᠶᠠᠪᠤᠬᠤ ᠬᠡᠷᠡᠭᠲᠡᠢ᠃ ᠬᠡᠷᠪᠡ ᠲᠡᠶᠢᠮᠦ ᠶᠠᠭᠤᠮᠠᠨ ᠳᠤ ᠬᠤᠷᠣᠬᠠᠶᠢᠰᠴᠦ ᠬᠡᠮᠡᠨ ᠠᠪᠢᠶᠠᠰ ᠴᠢᠨᠢ ᠠᠷᠭᠠᠯ᠂ ᠤᠪᠠᠳᠢᠰ ᠴᠢᠨᠢ ᠦᠨᠡᠰᠦ ᠪᠤᠯᠬᠤ ᠪᠤᠢ︾ ᠭᠡᠳ ᠲᠣᠷᠭᠠᠨ ᠬᠠᠳᠠᠭ ᠵᠠᠩᠭᠢᠳᠤᠭᠰᠠᠨ ᠬᠤᠭᠤᠷ ᠢᠶᠠᠨ ᠬᠤᠶᠠᠷ ᠭᠠᠷᠳᠠᠨ ᠬᠦᠦ ᠳᠤ ᠪᠠᠷᠢᠪᠠ᠃ ᠬᠦᠦ ᠰᠥᠭᠦᠳᠴᠦ ᠮᠥᠷᠭᠦᠨ ᠲᠣᠰᠪᠠ᠃ ᠡᠪᠦᠭᠡᠨ ᠬᠦᠦ ᠶᠢᠨ ᠵᠤᠯᠠᠢ ᠳᠡᠭᠡᠷ᠎ᠡ ᠤᠳᠠᠭᠠᠨ ᠭᠡᠭᠴᠢ ᠦᠨᠦᠰᠬᠦ ᠳᠤ ᠶᠠᠮᠠᠷ ᠨᠢᠭᠡᠨ ᠬᠦᠴᠦᠲᠦ ᠤᠷᠤᠰᠬᠠᠯ ᠪᠦᠭᠦ ᠪᠡᠶ᠎ᠡ ᠶᠢᠨ ᠬᠢᠨᠢ ᠮᠡᠳᠡᠷᠡᠯ ᠤᠨ ᠰᠤᠪᠠᠭ ᠢᠶᠠᠷ ᠤᠷᠤᠰᠤᠨ ᠣᠷᠣᠬᠤ ᠰᠢᠭ᠋ ᠰᠠᠨᠠᠭᠳᠠᠵᠠᠢ᠃          ᠪᠤᠭᠤᠷᠤᠯ ᠬᠤᠭᠤᠷᠴᠢ ᠬᠦᠦ ᠶᠢ ᠪᠣᠰᠬᠠᠨ ᠳᠡᠷᠭᠡᠳᠡ ᠪᠠᠨ ᠰᠠᠭᠤᠯᠭᠠᠭᠠᠳ᠄ ︽ᠲᠤᠸᠠ᠂ ᠣᠶᠢᠷᠠᠳ᠂ ᠠᠯᠲᠠᠶᠢᠴᠤᠳ ᠡᠭᠦᠨ ᠢ ᠡᠺᠡᠯ ᠪᠤᠶᠤ ᠢᠭᠢᠯ ᠭᠡᠳᠡᠭ ᠶᠤᠮ᠃ ᠮᠣᠷᠢᠨ ᠬᠤᠭᠤᠷ ᠤᠨ ᠰᠠᠳᠤᠨ ᠲᠦᠷᠦᠯ ᠯᠡ ᠳ᠋ᠡ᠃ ᠡᠬᠡ ︵ᠡᠭᠡᠵᠦ ᠭᠡᠰᠡᠨ ᠤ ᠢᠵᠠᠭᠤᠷ︶᠂ ᠡᠷᠭᠢᠭᠡᠳ ᠢᠷ᠎ᠡ ᠭᠡᠰᠡᠨ ᠤᠳᠬ᠎ᠠ ᠲᠠᠢ ᠶᠤᠮ ᠭᠡᠨ᠎ᠡ ᠯᠠᠢ᠃ ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ ᠨᠢᠭᠡᠨ ᠬᠥᠮᠥᠨ ᠲᠦᠯᠡᠭᠡ ᠲᠡᠭᠦᠬᠦ ᠪᠠᠷ ᠠᠭᠤᠯᠠᠨ ᠳᠤ ᠶᠠᠪᠤᠭᠰᠠᠨ ᠶᠤᠮ ᠪᠠᠶᠢᠨ᠎ᠠ᠃ ᠵᠠᠮ ᠳᠤᠨᠢ ᠠᠭᠤᠢ ᠠᠴᠠ ᠵᠦᠢᠷᠯᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ ᠰᠠᠶᠢᠬᠠᠨ ᠠᠶᠠᠯᠭᠤ ᠳᠠᠭᠤᠷᠢᠰᠤᠨ ᠰᠣᠨᠣᠰᠳᠠᠪᠠ ᠭᠡᠨ᠎ᠡ᠃ ᠪᠠᠭᠯᠠᠵᠤ ᠡᠭᠦᠷᠦᠭᠰᠡᠨ ᠲᠦᠯᠡᠭᠡ ᠪᠠᠨ ᠲᠠᠯᠪᠢᠴᠢᠬᠠᠭᠠᠳ ᠠᠭᠤᠢ ᠤᠷᠤᠭᠤ ᠱᠠᠭᠠᠶᠢᠪᠠᠯ ᠲᠡᠨᠳᠡ ᠠᠭᠤᠯᠠ ᠶᠢᠨ ᠡᠵᠡᠨ ᠰᠠᠪᠳᠠᠭ ᠰᠠᠭᠤᠴᠢᠬᠠᠭᠰᠠᠨ ᠣᠬᠲᠣ ᠦᠵᠡᠭᠡ ᠦᠭᠡᠢ ᠡᠲᠡᠭᠡᠳ ᠬᠥᠭᠵᠢᠮ ᠲᠣᠭᠯᠠᠵᠤ ᠪᠠᠶᠢᠨ᠎ᠠ ᠭᠡᠨ᠎ᠡ᠃ ᠬᠤᠭᠤᠷᠳᠠᠵᠤ ᠪᠤᠢ ᠠᠶᠠᠯᠭᠤᠨ ᠤ ᠰᠠᠶᠢᠬᠠᠨ ᠳᠤ ᠠᠪᠲᠠᠭᠠᠳ ᠥᠨᠥᠬᠢ ᠬᠥᠮᠥᠨ ᠶᠠᠭᠤ ᠪᠦᠭᠦᠨ ᠢᠶᠠᠨ ᠮᠠᠷᠲᠠᠭᠠᠳ ᠴᠢᠩᠨᠠᠨ ᠰᠠᠭᠤᠵᠠᠢ᠃ ᠬᠡᠰᠡᠭ ᠰᠠᠭᠠᠲᠠᠭᠰᠠᠨ ᠤ ᠡᠴᠦᠰ ᠲᠤ ᠲᠡᠷᠡ ᠪᠠᠷ ᠭᠡᠨᠡᠳᠲᠡ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠪᠠᠨ ᠰᠠᠨᠠᠵᠤ ᠣᠯᠣᠭᠠᠳ ᠰᠠᠯᠵᠤ ᠶᠠᠳᠠᠨ ᠪᠣᠰᠴᠤ᠂ ᠠᠭᠤᠢ ᠶᠢᠨ ᠡᠭᠦᠳᠡᠨ ᠳᠤ ᠣᠷᠭᠢᠬᠰᠠᠨ ᠲᠦᠯᠡᠭᠡ ᠪᠠᠨ ᠬᠠᠮᠤᠵᠤ ᠠᠪᠬᠤ ᠳᠠᠭᠠᠨ ᠰᠠᠨᠠᠭᠠᠨ ᠳᠤ ᠦᠭᠡᠢ ᠲᠡᠷᠡ ᠬᠤᠭᠤᠷ ᠢ ᠪᠠᠰᠠ ᠡᠭᠦᠷᠦᠭᠡᠳ ᠬᠠᠷᠢᠭᠰᠠᠨ ᠠᠵᠢ᠃ ᠬᠠᠷᠢᠵᠤ ᠣᠴᠢᠲᠠᠯ᠎ᠠ ᠭᠡᠷ ᠬᠤᠲᠠᠯᠠᠭᠠᠷ ᠨᠢ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭ᠎ᠠ ᠪᠣᠯᠤᠭᠰᠠᠨ ᠲᠡᠳᠦᠢ ᠦᠭᠡᠢ ᠲᠠᠨᠢᠵᠤ ᠮᠡᠳᠡᠬᠦ ᠬᠥᠮᠥᠨ ᠠᠮᠢᠲᠠᠨ ᠲᠡᠷᠡ ᠬᠠᠪᠢ ᠳᠤᠨᠢ ᠨᠢᠭᠡ ᠴᠦ ᠪᠠᠶᠢᠭᠰᠠᠨ ᠦᠭᠡᠢ᠃ ᠡᠵᠢ ᠠᠪᠤ ᠭᠡᠷ ᠣᠷᠣᠨ ᠢᠶᠠᠨ ᠠᠰᠠᠭᠤᠵᠤ ᠰᠤᠷᠠᠭᠯᠠᠭᠰᠠᠨ ᠳᠤ ᠲᠠᠨᠢᠬᠤ ᠪᠠᠶᠢᠲᠤᠭᠠᠢ ᠰᠤᠷᠠᠭ ᠢ ᠨᠢ ᠬᠡᠯᠡᠬᠦ ᠬᠥᠮᠥᠨ ᠲᠠᠭᠠᠷᠠᠯᠳᠤᠭᠰᠠᠨ ᠦᠭᠡᠢ ᠭᠡᠨ᠎ᠡ᠃ ᠬᠠᠷᠢᠨ ᠨᠢᠭᠡ ᠥᠨᠳᠥᠷ ᠨᠠᠰᠤ ᠲᠠᠢ ᠡᠪᠦᠭᠡᠨ ᠯᠡ ᠣᠯᠠᠨ ᠵᠢᠯ ᠤᠨ ᠡᠮᠦᠨ᠎ᠡ ᠲᠡᠭᠦᠨ ᠢ ᠵᠢᠭᠠᠬᠠᠨ ᠪᠠᠶᠢᠬᠤ ᠳᠤ ᠡ᠊ᠡᠳᠡᠭᠢ ᠶᠢᠨ ᠨᠢᠭᠡ ᠬᠥᠮᠥᠨ ᠠᠭᠤᠯᠠᠨ ᠳᠤ ᠲᠦᠯᠡᠭᠡ ᠲᠡᠭᠦᠬᠦ ᠪᠠᠷ ᠶᠠᠪᠤᠭᠠᠳ ᠡᠷᠭᠢᠵᠦ ᠢᠷᠡᠭᠡ ᠦᠭᠡᠢ ᠲᠤᠬᠠᠢ ᠶᠠᠷᠢᠵᠠᠭᠠᠳᠠᠭ ᠪᠠᠶᠢᠭᠰᠠᠨ ᠢ ᠳᠤᠷᠠᠰᠤᠨ ᠶᠠᠷᠢᠵᠠᠢ᠃ ᠣᠩᠭᠤᠳ ᠰᠠᠪᠳᠠᠭ ᠤᠨ ᠬᠤᠭᠤᠷᠳᠠᠬᠤ ᠶᠢ ᠴᠢᠩᠨᠠᠨ ᠰᠠᠭᠠᠲᠠᠵᠤ ᠰᠠᠭᠤᠬᠤ ᠵᠠᠭᠤᠷ᠎ᠠ ᠬᠥᠮᠥᠨ ᠤ ᠠᠮᠢᠳᠤᠷᠠᠯ ᠤᠨ ᠪᠦᠬᠦᠯᠢ ᠪᠦᠲᠦᠨ ᠬᠤᠭᠤᠴᠠᠭ᠎ᠠ ᠤᠯᠠᠷᠢᠭᠰᠠᠨ ᠪᠤᠯᠬᠤ ᠶᠢ ᠲᠡᠷᠡ ᠬᠥᠮᠥᠨ ᠰᠠᠶ᠋ᠢ ᠯᠠ ᠤᠬᠠᠭᠠᠷᠠᠪᠠ᠃          ᠢᠩᠭᠢᠭᠡᠳ ᠴᠠᠯ ᠵᠠᠯᠠᠭᠤᠬᠠᠨ ᠡᠷ᠎ᠡ ᠠᠭᠤᠯᠠᠨ ᠠᠴᠠ ᠪᠠᠭᠤᠵᠤ ᠢᠷᠡᠭᠰᠡᠨ ᠪᠣᠯ ᠨᠠᠷᠠ ᠵᠢᠷᠭᠠᠬᠤ ᠶᠢᠨ ᠠᠯᠳᠠ ᠳᠤ ᠭᠤᠨᠢᠭ ᠬᠠᠷᠠᠮᠰᠠᠯ ᠳᠠᠭᠠᠨ ᠠᠪᠲᠠᠭᠠᠳ ᠨᠠᠳᠠ ᠰᠢᠭ᠋ ᠢᠶᠠᠨ ᠴᠠᠯ ᠪᠤᠭᠤᠷᠤᠯ ᠡᠪᠦᠭᠡᠨ ᠪᠣᠯᠤᠭᠰᠠᠨ ᠶᠤᠮ ᠭᠡᠳᠡᠭ᠃ ᠥᠨᠥᠬᠢ ᠡᠪᠦᠭᠡᠨ ᠲᠡᠪᠡᠷᠢᠵᠦ ᠢᠷᠡᠭᠰᠡᠨ ᠲᠦᠯᠡᠭᠡᠨ ᠳᠡᠭᠡᠷ᠎ᠡ ᠪᠠᠨ ᠰᠠᠨᠳᠠᠶᠢᠯᠠᠵᠤ ᠰᠠᠭᠤᠭᠠᠳ ᠠᠭᠤᠢ ᠠᠴᠠ ᠠᠪᠴᠢᠷᠠᠭᠰᠠᠨ ᠬᠤᠭᠤᠷ ᠢᠶᠠᠨ ᠲᠠᠲᠠᠵᠤ᠂ ᠥᠪᠡᠷ ᠤᠨ ᠦᠵᠡᠭᠰᠡᠨ ᠰᠣᠨᠣᠰᠤᠭᠰᠠᠨ ᠢᠶᠠᠨ ᠲᠤᠤᠯᠢ ᠪᠣᠯᠭᠠᠨ ᠬᠠᠶᠢᠯᠠᠵᠤ ᠂ ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠠᠮᠢᠳᠤᠷᠠᠯ ᠤᠨ ᠢᠶᠠᠨ ᠲᠤᠬᠠᠢ ᠠᠶᠠᠯᠠᠭᠤᠯᠤᠨ ᠳᠠᠭᠤᠯᠠᠵᠠᠢ᠃ ᠲᠡᠷᠡ ᠴᠠᠭ ᠠᠴᠠ ᠬᠤᠶᠢᠰᠢ ᠥᠨᠥᠬᠢ ᠬᠥᠭᠵᠢᠮ ᠤᠨ ᠵᠢᠮᠰᠡᠭ ᠢ ︽ᠡᠺᠡᠯ︾ ᠪᠤᠶᠤ ︽ᠡᠷᠭᠢᠨ ᠬᠠᠷᠢ︾ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠶᠤᠮ ᠭᠡᠨ᠎ᠡ ᠯᠠᠢ᠃ ᠲᠡᠷᠡ ᠳᠣᠮᠣᠭᠲᠤ ᠬᠤᠭᠤᠷ ᠤᠨ ᠦᠷᠭᠦᠯᠵᠢᠯᠡᠯ ᠡᠨᠡ ᠪᠠᠶᠢᠨ᠎ᠠ ᠰᠢᠦ ᠳ᠋ᠡ᠃ ᠬᠤᠭᠤᠷ ᠤᠨ ᠭᠡᠭᠡᠨ ᠠᠶᠠᠯᠭᠤ ᠲᠤᠤᠯᠢ ᠶᠢᠨ ᠰᠢᠳᠢᠲᠦ ᠦᠭᠡ ᠰᠣᠨᠣᠰᠳᠠᠭᠰᠠᠨ ᠭᠠᠵᠠᠷ ᠬᠤᠷ᠎ᠠ ᠪᠣᠷᠣᠭᠠᠨ᠂ ᠬᠤᠷᠢᠮ ᠨᠠᠶᠢᠷ᠂ ᠪᠠᠶᠠᠷ ᠴᠡᠩᠭᠡᠯ ᠲᠠᠰᠤᠷᠠᠬᠤ ᠤᠴᠢᠷ ᠦᠭᠡᠢ᠃ ᠭᠡᠷ ᠤᠨ ᠵᠢᠪᠠᠷ᠂ ᠭᠡᠮ ᠵᠢᠮ ᠬᠤᠷᠭᠤᠳᠠᠬᠤ ᠶᠣᠰᠣ ᠦᠭᠡᠢ᠃ ᠬᠤᠭᠤᠷ ᠲᠠᠢ ᠪᠠᠨ ᠪᠠᠶᠢᠭᠰᠠᠨ ᠴᠠᠭ ᠲᠤ ᠬᠤᠷ ᠮᠣᠩᠭᠤᠯ ᠤᠨ ᠬᠡᠶᠢᠮᠣᠷᠢ ᠰᠢᠷᠣᠶᠢᠳᠠᠬᠤ ᠦᠭᠡᠢ᠃ ᠠᠪᠢᠶᠠᠰᠯᠢᠭ ᠬᠦᠦ ᠲᠠᠢ ᠲᠠᠭᠠᠷᠠᠵᠤ᠂ ᠬᠤᠭᠤᠷ ᠬᠥᠭᠵᠢᠮ ᠢᠶᠠᠨ ᠥᠪᠯᠡᠭᠦᠯᠦᠭᠰᠡᠨ ᠮᠢᠨᠢ ᠡᠨᠡ ᠨᠠᠰᠤᠨ ᠤ ᠬᠡᠷᠡᠭ ᠪᠦᠲᠦᠯ᠎ᠡ᠃ ᠴᠢᠮᠠᠶᠢ ᠲᠡᠭᠷᠢ ᠪᠤᠷᠬᠠᠨ ᠬᠠᠷᠠᠵᠤ ᠪᠠᠶᠢᠭ︕ ᠪᠢ ᠣᠳᠣ ᠶᠠᠪᠤᠶ᠎ᠠ ᠳ᠋ᠠ︾ ᠭᠡᠳ ᠪᠤᠰᠬᠤ ᠳᠠᠭᠠᠨ ᠬᠦᠦ ᠬᠤᠭᠤᠷ ᠬᠤᠶᠠᠷ ᠢ ᠡᠭᠡᠯᠵᠢᠯᠡᠨ ᠦᠨᠦᠰᠦᠭᠰᠡᠨ ᠢᠶᠠᠨ ᠡᠪᠦᠭᠡᠨ ᠬᠤᠭᠤᠷᠴᠢ ᠬᠡᠢ ᠦᠵᠡᠭᠳᠡᠯ ᠮᠡᠲᠦ ᠠᠯᠠᠭ᠎ᠠ ᠪᠣᠯᠵᠤ ᠣᠳᠪᠠ᠃ ᠬᠦᠦ ᠮᠡᠯ ᠭᠠᠶᠢᠬᠠᠨ ᠴᠡᠯ ᠬᠥᠬᠡᠷᠡᠵᠦ ᠬᠤᠴᠣᠷᠴᠠᠢ᠃          ᠬᠦᠦ ᠪᠤᠭᠤᠷᠤᠯ ᠬᠤᠭᠤᠷᠴᠢ ᠶᠢᠨ ᠵᠠᠬᠢᠶᠠᠰᠤ ᠶᠣᠰᠣᠭᠠᠷ ᠲᠡᠷᠡ ᠰᠥᠨᠢ ᠠᠴᠠ ᠨᠢ ᠭᠡᠷ ᠤᠨ ᠢᠶᠠᠨ ᠵᠡᠭᠦᠨ ᠬᠤᠶᠢᠲᠤ ᠣᠪᠣᠭ᠎ᠠ ᠲᠠᠢ ᠠᠭᠤᠯᠠᠨ ᠳᠡᠭᠡᠷ᠎ᠡ ᠪᠠᠨ ᠭᠠᠷᠤᠭᠠᠳ ᠬᠤᠭᠤᠷ ᠢᠶᠠᠨ ᠲᠠᠲᠠᠵᠤ ᠡᠬᠢᠯᠡᠵᠡᠢ᠃ ᠡᠨᠡ ᠶᠠᠩᠵᠤ ᠪᠠᠷ ᠬᠠᠪᠤᠷᠵᠢᠶ᠎ᠠ ᠨᠠᠮᠤᠷᠵᠢᠶ᠎ᠠ ᠭᠡᠳ ᠨᠤᠲᠤᠭ ᠰᠡᠯᠭᠦᠵᠦ ᠨᠡᠭᠦᠳᠡᠯᠯᠡᠭᠰᠡᠨ ᠴᠦ᠂ ᠬᠠᠪᠰᠤᠷᠭ᠎ᠠ ᠰᠢᠭᠤᠷᠭ᠎ᠠ ᠲᠠᠢ ᠶᠠᠮᠠᠷ ᠰᠥᠨᠢ ᠪᠠᠶᠢᠭᠰᠠᠨ ᠴᠦ ᠵᠣᠷᠢᠭᠰᠠᠨ ᠠᠴᠠ ᠪᠠᠨ ᠬᠠᠵᠠᠶᠢᠯ ᠦᠭᠡᠢ ᠲᠠᠲᠠᠭᠰᠠᠭᠠᠷ ᠯᠠ ᠪᠠᠶᠢᠯ᠎ᠠ᠃ ᠬᠥᠭᠡᠷᠦᠬᠦᠢ ᠮᠠᠭᠤ ᠡᠵᠢ ᠨᠢ ᠬᠤᠪᠴᠠᠰᠤ ᠬᠤᠨᠠᠷ ᠢ ᠨᠢ ᠵᠤᠵᠠᠭᠠᠯᠠᠨ᠂ ᠨᠥᠬᠦᠳ ᠨᠥᠮᠥᠷᠢ ᠨᠢ ᠪᠣᠯᠵᠤ᠂ ᠰᠥᠨᠢᠵᠢᠨ ᠰᠠᠬᠢᠵᠤ ᠰᠠᠭᠤᠳᠠᠭ ᠪᠠᠶᠢᠵᠠᠢ᠃ ᠴᠣᠬᠤᠮ ᠬᠤᠭᠤᠷᠴᠢ ᠶᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠭᠤᠷᠪᠠᠨ ᠵᠢᠯ ᠤᠨ ᠣᠢ ᠳᠡᠭᠡᠷ᠎ᠡ ᠪᠠᠨ ᠬᠠᠷᠠᠭ᠎ᠠ ᠪᠠᠨ ᠪᠦᠷᠢᠮᠦᠰᠦᠨ ᠠᠯᠳᠠᠪᠠ᠃ ᠶᠠᠭ ᠲᠡᠷᠡᠬᠡᠨ ᠭᠱᠠᠨ ᠳᠤ ᠬᠤᠭᠤᠷ ᠤᠨ ᠬᠤᠶᠠᠷ ᠴᠢᠪᠬᠠᠳᠠᠰᠤᠨ ᠠᠴᠠ ᠴᠠᠭᠠᠨ ᠬᠥᠬᠡ ᠬᠤᠶᠠᠷ ᠥᠩᠭᠡ ᠶᠢᠨ ᠭᠡᠷᠡᠯ ᠭᠢᠯᠠᠰᠬᠢᠨ ᠦᠵᠡᠭᠳᠡᠵᠡᠢ᠃ ᠦᠳᠡᠰᠢ ᠶᠢᠨ ᠣᠳᠣᠳ ᠰᠢᠭᠦᠷᠦᠭᠡᠳ ᠠᠪᠤᠮᠠᠷ ᠣᠶᠢᠷᠠᠬᠠᠨ ᠢᠷᠠᠯᠵᠠᠵᠤ᠂ ᠴᠠᠭᠠᠨ ᠡᠪᠡᠰᠦᠨ ᠤ ᠲᠣᠯᠣᠭᠠᠢ ᠴᠦ ᠦᠯᠦ ᠬᠥᠳᠡᠯᠦᠨ᠎ᠡ᠃ ᠰᠥᠨᠢ ᠶᠢᠨ ᠶᠢᠷᠲᠢᠨᠴᠦ ᠶᠠᠭᠤ ᠨᠢᠭᠡ ᠶᠢ ᠴᠢᠩᠨᠠᠬᠤ ᠮᠡᠲᠦ ᠨᠠᠮ ᠬᠥᠮ ᠪᠠᠶᠢᠪᠠ᠃ ᠭᠡᠨᠡᠳᠲᠡ ᠲᠡᠭᠷᠢ ᠠᠴᠠ ᠥᠨᠥᠬᠢ ᠪᠤᠭᠤᠷᠤᠯ ᠬᠤᠭᠤᠷᠴᠢ ᠪᠠᠭᠤᠵᠤ ᠢᠷᠡᠭᠡᠳ᠄ ︽ᠴᠢ ᠣᠳᠣ ᠵᠢᠩᠬᠢᠨᠢ ᠭᠠᠶᠢᠠᠬᠠᠮᠰᠢᠬᠲᠤ ᠬᠤᠭᠤᠷᠴᠢ ᠪᠣᠯᠤᠭᠰᠠᠨ᠃ ᠪᠢ ᠴᠢᠮᠠᠶᠢ ᠠᠯᠤᠰ ᠤᠨ ᠣᠳᠣᠨ ᠤ ᠵᠠᠢ ᠠᠴᠠ ᠣᠶᠣᠨ ᠰᠠᠨᠠᠭ᠎ᠠ ᠪᠠᠷ ᠵᠠᠯᠠᠨ ᠵᠢᠯᠤᠭᠤᠳᠴᠤ᠂ ᠪᠠᠭ᠋ᠠᠷᠬᠠᠨ ᠬᠠᠷᠠᠵᠤ ᠪᠠᠶᠢᠭᠰᠠᠨ ᠰᠢᠦ᠃ ᠠᠯᠠᠭ ᠬᠤᠶᠠᠷ ᠨᠢᠳᠦ ᠪᠠᠷ ᠢᠶᠠᠨ ᠴᠢ ᠠᠯᠲᠠᠨ ᠳᠡᠯᠡᠬᠡᠢ ᠳᠤ ᠬᠤᠣᠰ ᠦᠭᠡᠢ ᠠᠪᠢᠶᠠᠰ ᠡᠷᠳᠡᠮ ᠢ ᠰᠣᠯᠢᠵᠤ ᠠᠪᠴᠤ ᠴᠢᠳᠠᠯ᠎ᠠ᠃ ᠬᠤᠭᠤᠷ ᠢᠶᠠᠨ ᠪᠠᠷᠢᠬᠤ ᠳᠤ ᠯᠡ ᠣᠩᠭᠤᠳ ᠴᠢᠨᠢ ᠬᠥᠭᠯᠡᠭᠳᠡᠵᠦ᠂ ᠦᠭᠡᠨ ᠤ ᠰᠠᠶᠢᠬᠠᠨ ᠴᠢᠨᠢ ᠲᠤᠤᠯᠢᠰ ᠪᠣᠯᠣᠨ ᠠᠰᠠᠬᠠᠷᠠᠵᠤ᠂ ᠦᠯᠢᠭᠡᠷ ᠳᠣᠮᠤᠭ ᠤᠳ ᠬᠥᠭᠵᠢᠮ ᠪᠣᠯᠣᠨ ᠤᠶᠠᠩᠭᠠᠷᠠᠬᠤ ᠪᠣᠯᠣᠨ᠎ᠠ᠃ ᠡᠨᠡ ᠦᠳᠡᠰᠢ ᠠᠴᠠ ᠬᠤᠶᠢᠰᠢ ᠴᠢᠨᠦ ᠬᠤᠶᠠᠷ ᠨᠢᠳᠦ ᠴᠢᠨᠢ ᠣᠭᠲᠠᠷᠭᠤᠢ ᠶᠢᠨ ᠬᠠᠮᠢᠭ᠎ᠠ ᠨᠢᠭᠡᠲᠡᠭᠡ ᠢᠵᠢᠯᠢ ᠬᠤᠶᠠᠷ ᠣᠳᠣ ᠪᠣᠯᠣᠨ ᠭᠡᠷᠡᠯᠲᠦᠨ᠎ᠡ᠃ ᠴᠢ ᠣᠳᠣ ᠠᠴᠠ ᠳᠤᠷᠠᠲᠠᠢ ᠭᠠᠵᠠᠷ ᠢᠶᠠᠨ ᠬᠤᠭᠤᠷᠳᠠᠵᠤ ᠶᠠᠪᠤᠵᠤ ᠪᠣᠯᠣᠨ᠎ᠠ᠃ ᠵᠠ ᠡᠶᠢᠮᠦ︾ ᠭᠡᠳ ᠬᠠᠮᠢᠭᠠᠰᠢ ᠪᠠᠨ ᠴᠦ ᠶᠤᠮ ᠭᠡᠨᠡᠳᠲᠡ ᠠᠯᠠᠭ᠎ᠠ ᠪᠣᠯᠵᠠᠢ᠃          ᠲᠡᠶᠢᠨ ᠬᠦ ᠠᠪᠢᠶᠠᠰ ᠨᠢ ᠴᠠᠯᠭᠢᠭᠰᠠᠨ ᠨᠢᠭᠡᠨ ᠵᠠᠯᠠᠭᠤᠬᠠᠨ ᠰᠣᠬᠤᠷ ᠬᠤᠭᠤᠷᠴᠢ ᠳᠡᠯᠡᠬᠡᠢ ᠳᠤ ᠮᠡᠨᠳᠦᠯᠡᠵᠡᠢ᠃ ᠪᠠᠷᠬᠠᠰ ᠪᠠᠶᠠᠨ ᠢ ᠪᠠᠭᠲᠠᠭᠠᠭᠰᠠᠨ ᠨᠤᠲᠤᠭ ᠤᠰᠤᠨ ᠤ ᠬᠢᠨ ᠨᠢᠳᠦ ᠴᠢᠬᠢ ᠪᠠᠨ ᠢᠲᠡᠭᠡᠬᠦᠶ᠎ᠡ ᠪᠡᠷᠬᠡ ᠪᠠᠶᠢᠪᠠ᠃ ᠲᠡᠭᠦᠨ ᠢ ᠳᠠᠭᠤᠯᠠᠵᠤ ᠬᠤᠭᠤᠷᠳᠠᠵᠤ ᠡᠰᠡᠬᠦᠯ᠎ᠡ ᠲᠤᠤᠯᠢ ᠪᠠᠨ ᠬᠠᠶᠢᠯᠠᠨ ᠬᠥᠭᠡᠮᠡᠶᠢᠯᠡᠭᠡᠳ ᠡᠬᠢᠯᠡᠬᠦ ᠳᠤ ᠶᠠᠮᠠᠷ ᠣᠷᠤᠭ᠎ᠠ ᠳᠣᠬᠰᠢᠨ ᠠᠳᠤᠭᠤ ᠴᠦ ᠭᠡᠳ ᠨᠣᠮᠣᠬᠠᠷᠠᠨ ᠬᠠᠵᠠᠭᠠᠷᠯᠠᠭᠤᠯᠵᠤ᠂ ᠪᠣᠲᠣᠭᠤ ᠪᠠᠨ ᠭᠤᠯᠣᠭᠰᠠᠨ ᠶᠠᠮᠠᠷ ᠠᠭᠠᠰᠢ ᠮᠠᠭᠤᠲᠠᠢ ᠢᠩᠭᠡ ᠴᠦ ᠪᠣᠲᠣᠭᠤ ᠪᠠᠨ ᠭᠤᠩᠭᠢᠨᠠᠨ ᠬᠥᠬᠦᠭᠦᠯᠵᠦ ᠲᠡᠷᠡ ᠪᠢᠲᠡᠭᠡᠢ ᠭᠡᠯᠡ ᠠᠶᠢᠯ ᠠᠶᠢᠯ ᠤᠨ ᠪᠠᠩᠬᠠᠷ ᠤᠳ ᠲᠣᠯᠣᠭᠠᠢ ᠪᠠᠨ ᠭᠡᠯᠵᠶᠢᠯᠭᠡᠨ ᠴᠢᠬᠢ ᠪᠠᠨ ᠰᠣᠷᠲᠣᠶᠢᠯᠭᠠᠨ ᠱᠣᠮᠪᠣᠶᠢᠨ ᠰᠠᠭᠤᠵᠤ ᠰᠣᠨᠣᠰᠬᠤ ᠠᠭᠠᠳ ᠵᠦᠢᠯ ᠤᠨ ᠤᠯᠠᠨ ᠰᠢᠪᠠᠭᠤᠳ ᠵᠢᠷᠭᠢᠬᠦ ᠪᠠᠨ ᠮᠠᠷᠲᠠᠨ ᠪᠤᠲᠠ ᠮᠣᠳᠣᠨ ᠤ ᠣᠷᠣᠢ ᠳᠤ ᠰᠡᠮᠭᠡᠨ ᠰᠠᠭᠤᠵᠤ ᠴᠢᠩᠨᠠᠨ᠎ᠠ᠃ ᠪᠣᠷᠤᠭ᠎ᠠ ᠣᠷᠣᠬᠤ ᠦᠭᠡᠢ ᠪᠣᠯ ᠬᠤᠭᠤᠷ ᠢᠶᠠᠨ ᠲᠠᠲᠠᠨ ᠲᠡᠭᠷᠢ ᠪᠠᠨ ᠠᠷᠭᠠᠳᠠᠬᠤ ᠳᠤ ᠯᠠ ᠰᠠᠨᠠᠭ᠎ᠠ ᠪᠠᠷ ᠠᠰᠬᠠᠷᠠᠨ᠎ᠠ᠃ ᠭᠤᠪᠢ ᠬᠠᠩᠭᠠᠢ ᠨᠤᠲᠤᠭ ᠭᠠᠩ ᠵᠤᠳ ᠭᠡᠳᠡᠭ ᠢ ᠪᠠᠷᠤᠭ ᠮᠠᠷᠲᠠᠬᠤ ᠳᠤ ᠬᠦᠷᠴᠦ᠂ ᠮᠠᠯ ᠰᠦᠷᠦᠭ ᠥᠨᠢᠷ ᠥᠳᠬᠡᠨ ᠥᠰᠴᠦ᠂ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠭᠠᠢ ᠪᠠᠷᠴᠢᠳ ᠴᠦ ᠲᠣᠬᠢᠶᠠᠯᠳᠤᠬᠤ ᠨᠢ ᠬᠤᠪᠣᠷ ᠪᠣᠯᠪᠠ᠃ ᠬᠥᠮᠥᠰ ᠪᠣᠳᠠᠲᠤ ᠠᠬᠤᠢ ᠳᠤ ᠪᠤᠰᠤ ᠦᠯᠢᠭᠡᠷ ᠳᠤᠮᠤᠭ ᠤᠨ ᠣᠷᠣᠨ ᠳᠤ ᠠᠮᠢᠳᠤᠷᠠᠵᠤ ᠪᠠᠶᠢᠭ᠎ᠠ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠬᠤ ᠪᠣᠯᠵᠠᠢ᠃ ᠲᠡᠶᠢᠮᠦ ᠪᠣᠯᠬᠤᠷ ᠬᠦᠷᠡᠯ ᠬᠤᠭᠤᠷᠴᠢ ᠶᠢ ᠬᠥᠮᠥᠰ ᠪᠠᠰᠠ ︽ᠪᠤᠷᠬᠠᠨ ᠬᠤᠭᠤᠷᠴᠢ︾ ᠬᠡᠮᠡᠨ ᠪᠢᠰᠢᠷᠡᠨ ᠰᠢᠲᠦᠳᠡᠭ ᠪᠠᠶᠢᠯ᠎ᠠ᠃          ᠨᠢᠭᠡ ᠤᠳᠠᠭ᠎ᠠ ᠬᠤᠯᠠ ᠶᠢᠨ ᠬᠤᠰᠢᠭᠤᠨ ᠤ ᠬᠥᠮᠥᠨ ᠬᠤᠭᠤᠷᠴᠢ ᠳ᠋ᠠᠨᠢᠭ᠎ᠠ ᠶᠢ ᠵᠠᠯᠠᠵᠤ ᠠᠪᠤᠭᠠᠳ ᠭᠡᠷ ᠲᠡᠭᠡᠨ ᠣᠶᠢᠷᠠᠳᠵᠤ ᠶᠠᠪᠤᠲᠠᠯ᠎ᠠ ᠭᠡᠨᠡᠳᠲᠡ ᠤᠯᠠᠭᠠᠨ ᠬᠠᠷᠠᠩᠭᠤᠢ ᠮᠠᠨᠠᠨ ᠪᠦᠷᠬᠦᠵᠦ ᠡᠳᠦᠷ ᠢᠶᠠᠷ ᠶᠠᠭᠤ ᠴᠦ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠪᠠ᠃ ᠲᠡᠷᠡ ᠬᠤᠶᠠᠷ ᠳᠥᠩᠭᠡᠵᠦ ᠨᠢᠭᠡ ᠰᠠᠭᠯᠠᠭᠠᠷ ᠮᠣᠳᠣᠨ ᠠᠴᠠ ᠲᠡᠮᠡᠭᠡ ᠪᠠᠨ ᠤᠶᠠᠵᠤ ᠠᠮᠵᠢᠭᠠᠳ᠂ ᠨᠥᠮᠥᠷᠢ ᠳᠤᠨᠢ ᠣᠷᠣᠵᠤ ᠰᠠᠭᠤᠲᠠᠯ᠎ᠠ ᠰᠦᠷᠦᠭ ᠪᠣᠣᠬᠠᠢ ᠪᠦᠰᠡᠯᠡᠵᠦ ᠠᠪᠴᠠᠢ᠃ ᠥᠨᠥᠬᠢ ᠡᠷ᠎ᠡ ᠰᠡᠩᠳᠡ ᠮᠡᠩᠳᠡ ᠲᠦᠯᠡᠭᠡ ᠣᠪᠣᠭᠠᠯᠠᠨ ᠭᠠᠯ ᠢᠶᠠᠨ ᠠᠰᠠᠭᠠᠬᠤ ᠳᠤ ᠪᠣᠣᠬᠠᠢ ᠨᠤᠭᠤᠳ ᠭᠠᠯ ᠤᠨ ᠭᠡᠷᠡᠯ ᠲᠤᠰᠬᠤ ᠲᠡᠳᠦᠶᠢᠬᠡᠨ ᠵᠠᠢ ᠳᠤ ᠨᠢᠳᠦᠨ ᠠᠴᠠ ᠪᠠᠨ ᠨᠣᠭᠤᠭᠠᠨ ᠭᠡᠷᠡᠯ ᠣᠴᠢᠯᠠᠭᠤᠯᠤᠨ ᠵᠠᠷᠢᠮ ᠨᠢ ᠣᠴᠣᠶᠢᠨ ᠰᠠᠭᠤᠵᠤ᠂ ᠵᠠᠷᠢᠮ ᠎ ᠨᠢ ᠨᠠᠭᠠᠰᠢ ᠴᠠᠭᠠᠰᠢ ᠬᠤᠯᠬᠢᠬᠤ ᠨᠢ ᠬᠠᠷᠠᠭᠳᠠᠪᠠ᠃ ᠣᠳᠣ ᠢᠩᠭᠢᠭᠡᠳ ᠴᠢᠨ᠋ᠸ᠎ᠠ ᠶᠢᠨ ᠬᠤᠭᠤᠯᠠ ᠪᠣᠯᠵᠤ ᠳᠠᠭᠤᠰᠳᠠᠭ ᠪᠠᠶᠢᠵᠠᠢ ᠭᠡᠳ ᠲᠡᠷᠡ ᠬᠤᠶᠠᠷ ᠤᠨ ᠬᠤᠶᠢᠬ᠎ᠠ ᠶᠢᠨ ᠦᠰᠦ ᠨᠢ ᠪᠤᠰᠬᠤ ᠰᠢᠭ᠋ ᠪᠣᠯᠪᠠ᠃ ᠬᠤᠭᠤᠷᠴᠢ ᠭᠤᠸᠠᠢ ᠬᠤᠭᠤᠷ ᠢᠶᠠᠨ ᠰᠢᠭᠦᠷᠴᠦ ᠠᠪᠤᠨ ︽ᠣᠳᠣ ᠬᠤᠭᠤᠷ ᠲᠠᠭᠠᠨ ᠪᠦᠭᠦ ᠵᠦᠢᠯ ᠢᠶᠠᠨ ᠳᠠᠭᠠᠳᠬᠠᠬᠤ ᠠᠴᠠ ᠁︾ ᠭᠡᠳ ᠲᠤᠤᠯᠢ ᠬᠠᠶᠢᠯᠠᠨ ᠬᠤᠭᠤᠷᠳᠠᠵᠤ ᠪᠠᠰᠠ ᠳᠠᠭᠤᠯᠠᠵᠤ ᠬᠥᠭᠡᠮᠡᠶᠢᠳᠡᠵᠦ ᠭᠠᠷᠪᠠ᠃ ᠰᠦᠷᠦᠭ ᠪᠣᠣᠬᠠᠢ ᠴᠦ ᠨᠠᠭᠠᠰᠢ ᠪᠠᠨ ᠳᠠᠭᠠᠷᠢᠵᠤ ᠳᠠᠪᠰᠢᠯᠠᠬᠤ ᠪᠠᠨ ᠪᠣᠯᠢᠭᠠᠳ ᠲᠡᠷᠡ ᠳᠣᠣᠷ᠎ᠠ ᠪᠠᠨ ᠣᠴᠣᠶᠢᠨ ᠰᠠᠭᠤᠭᠠᠳ ᠶᠠᠭ ᠯᠠ ᠤᠷᠠᠨ ᠰᠠᠶᠢᠬᠠᠨ ᠤ ᠲᠣᠬᠯᠠᠯᠲᠠ ᠦᠵᠡᠵᠦ ᠪᠠᠶᠢᠭ᠎ᠠ ᠪᠣᠯᠪᠠᠰᠤᠨ ᠦᠵᠡᠭᠴᠢ ᠰᠢᠭ ᠲᠠᠭ ᠬᠥᠳᠡᠯᠦᠯ ᠦᠭᠡᠢ ᠨᠠᠮ ᠬᠥᠮ ᠰᠣᠨᠣᠰᠴᠤ ᠪᠠᠶᠢᠯ᠎ᠠ᠃ ᠬᠠᠭᠤᠷᠠᠢ ᠲᠦᠯᠡᠭᠡ ᠴᠦ ᠳᠠᠭᠤᠰᠴᠤ ᠪᠣᠣᠬᠠᠢ ᠨᠤᠭᠤᠳ ᠢ ᠲᠦᠷ ᠴᠦ ᠭᠡᠰᠡᠨ ᠠᠷᠭᠠᠯᠠᠵᠤ ᠠᠶᠤᠯᠭᠠᠵᠤ ᠪᠠᠶᠢᠭᠰᠠᠨ ᠭᠠᠯ ᠴᠦ ᠤᠨᠲᠠᠷᠠᠪᠠ᠃ ᠲᠡᠭᠷᠢ ᠶᠢᠨ ᠬᠠᠷᠠᠩᠭᠤᠢ ᠠᠭᠠᠵᠢᠮ ᠢᠶᠠᠷ ᠰᠡᠶᠢᠷᠡᠭᠵᠢᠨ ᠵᠠᠮᠬᠠᠷᠠᠬᠤ ᠳᠤ ᠪᠣᠣᠬᠠᠢ ᠨᠤᠭᠤᠳ ᠴᠦ ᠲᠣᠬᠯᠠᠯᠲᠠ ᠰᠣᠨᠢᠷᠬᠠᠵᠤ ᠳᠠᠭᠤᠰᠤᠭᠠᠳ ᠬᠠᠷᠢᠬᠤ ᠭᠡᠵᠦ ᠪᠠᠶᠢᠭ᠎ᠠ ᠦᠵᠡᠭᠴᠢᠳ ᠮᠡᠲᠦ ᠪᠦᠭᠦᠳᠡᠭᠡᠷ ᠰᠤᠨᠢᠶᠠᠨ ᠪᠣᠰᠣᠭᠠᠳ ᠰᠡᠳᠬᠢᠯ ᠳᠤ ᠭᠦᠷᠦᠭᠰᠡᠨ ᠰᠠᠶᠢᠬᠠᠨ ᠲᠤᠬᠯᠠᠯᠲᠠ ᠠᠴᠠ ᠰᠠᠯᠵᠤ ᠶᠠᠳᠠᠨ ᠪᠠᠶᠢᠭ᠎ᠠ ᠮᠡᠲᠦ ᠡᠷᠭᠢᠵᠦ ᠬᠠᠷᠠᠭᠰᠠᠭᠠᠷ ᠲᠡᠷᠡᠦᠬᠡᠨ ᠭᠦᠪᠡᠭᠡ ᠳᠡᠭᠡᠭᠦᠷ ᠳᠠᠪᠠᠵᠤ ᠣᠲᠣᠭᠰᠠᠨ ᠭᠡᠨ᠎ᠡ᠃          ᠲᠡᠭᠦᠨ ᠤ ᠬᠡᠲᠦᠶᠢᠳᠦᠭᠰᠡᠨ ᠠᠪᠢᠶᠠᠰ ᠬᠥᠮᠥᠨ ᠴᠢᠨᠠᠷ ᠬᠤᠶᠠᠷ ᠲᠤᠨᠢ ᠪᠠᠶᠠᠨ ᠶᠠᠳᠠᠭᠤ ᠶᠠᠩᠵᠤ ᠪᠦᠷᠢ ᠶᠢᠨ ᠪᠦᠰᠡᠭᠦᠶᠢᠴᠦᠦᠯ ᠬᠥᠯ ᠠᠯᠳᠠᠨ ᠳᠤᠷᠠᠯᠠᠭᠰᠠᠨ ᠪᠤᠯᠪᠠᠴᠤ ᠲᠡᠷᠲᠡᠭᠡ ᠬᠤᠰᠢᠭᠤᠨ ᠤ ᠨᠢᠭᠡ ᠯᠠ ᠪᠦᠰᠡᠭᠦᠢ ᠳᠤ ᠰᠡᠳᠬᠢᠯ ᠠᠯᠳᠠᠷᠠᠭᠰᠠᠨ ᠶᠤᠮ ᠭᠡᠳᠡᠭ᠃ ᠲᠡᠷᠡ ᠪᠠᠷ ᠵᠠᠰᠠᠭ ᠨᠣᠶᠠᠨ ᠤ ᠤᠷᠢᠯᠭ᠎ᠠ ᠪᠠᠷ ᠳᠠᠭᠤᠤ ᠬᠤᠭᠤᠷ ᠢᠶᠠᠨ ᠡᠷᠭᠦᠵᠦ ᠶᠠᠪᠤᠬᠤ ᠳᠠᠭᠠᠨ ᠲᠠᠨᠢᠯᠴᠠᠵᠤ ᠳᠤᠷᠠᠯᠠᠯᠴᠠᠭᠰᠠᠨ ᠠᠵᠢ᠃ ᠲᠡᠷᠡ ᠥᠬᠢᠨ ᠣᠷᠳᠣᠨ ᠤ ᠳᠠᠭᠤᠴᠢ ᠪᠠᠷ ᠵᠠᠷᠤᠴᠠᠯᠠᠭᠳᠠᠵᠤ ᠪᠠᠶᠢᠵᠠᠢ᠃ ᠬᠤᠷᠢᠮ ᠢᠶᠠᠨ ᠬᠢᠬᠦ ᠪᠠᠷ ᠲᠣᠪᠯᠠᠴᠢᠬᠠᠭᠰᠠᠨ ᠪᠠᠶᠢᠬᠤ ᠳᠤᠨᠢ ᠨᠢᠭᠡ ᠤᠳᠠᠭᠠᠨ ᠤ ᠡᠷᠬᠡ ᠪᠤᠯᠢᠶᠠᠯᠳᠤᠭᠠᠨ ᠤ ᠦᠢᠮᠡᠭᠡᠨ ᠰᠠᠮᠠᠭᠤᠨ ᠳᠤ ᠰᠦᠢᠲᠦ ᠪᠦᠰᠡᠭᠦᠢ ᠨᠢ ᠳᠠᠭᠠᠷᠢᠬᠳᠠᠨ ᠬᠠᠷᠠᠮᠰᠠᠯᠲᠠᠢ ᠪᠠᠷ ᠨᠠᠰᠤ ᠪᠠᠷᠠᠵᠠᠢ᠃ ᠬᠥᠭᠡᠷᠦᠬᠦᠢ ᠮᠠᠭᠤ ᠡᠵᠢ ᠨᠢ ᠴᠦ ᠮᠥᠨ ᠲᠡᠷᠡ ᠵᠢᠯ ᠪᠤᠷᠬᠠᠨ ᠪᠣᠯᠤᠭᠰᠠᠨ ᠭᠡᠨ᠎ᠡ ᠃ ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠲᠡᠭᠦᠨ ᠤ ᠳᠤᠷᠠᠯᠠᠯ ᠤᠨ ᠭᠠᠯ ᠨᠢ ᠤᠨᠲᠠᠷᠠᠭᠰᠠᠨ ᠮᠡᠲᠦ ᠳᠠᠭᠢᠵᠤ ᠬᠡᠨ ᠳᠤ ᠴᠦ ᠳᠤᠷᠠᠯᠠᠭᠰᠠᠨ ᠦᠭᠡᠢ᠂ ᠨᠠᠰᠤᠨ ᠲᠤᠷᠰᠢ ᠥᠨᠥᠴᠢᠨ ᠪᠦᠷᠭᠦᠳ ᠰᠢᠭ ᠶᠠᠪᠤᠭᠰᠠᠨ ᠭᠡᠳᠡᠭ᠃          ᠁ ᠁ ᠁          ᠬᠤᠭᠤᠷᠴᠢ ᠳ᠋ᠠᠨᠢᠭ᠎ᠠ ᠶᠢᠨ ᠮᠥᠷ ᠰᠤᠷᠠᠭ ᠦᠭᠡᠢ ᠠᠯᠠᠭ᠎ᠠ ᠪᠣᠯᠤᠭᠰᠠᠨ ᠢ ᠳᠤᠭᠤᠯᠤᠭᠠᠳ ᠨᠤᠲᠤᠭ ᠤᠰᠤᠨ ᠤ ᠬᠢᠨ ᠡᠷᠢᠯ ᠰᠤᠷᠠᠯ ᠪᠣᠯᠵᠤ᠂ ᠬᠥᠯ ᠲᠠᠢ ᠨᠢ ᠬᠦᠯᠬᠦᠵᠦ᠂ ᠬᠥᠯ ᠦᠭᠡᠢ ᠨᠢ ᠮᠥᠯᠬᠦᠵᠦ ᠬᠠᠶᠢᠭᠰᠠᠨ ᠪᠤᠯᠪᠠᠴᠤ ᠶᠠᠭᠤ ᠴᠦ ᠣᠯᠣᠭᠰᠠᠨ ᠦᠭᠡᠢ ᠬᠤᠴᠣᠷᠴᠠᠢ᠃ ᠬᠠᠷᠢᠨ ᠬᠡᠳᠦᠨ ᠲᠣᠯᠣᠭᠠᠳ ᠤᠨ ᠬᠢᠨᠢ ᠴᠠᠭᠠᠨ᠎ᠠ ᠰᠠᠭᠤᠳᠠᠭ ᠨᠢᠭᠡ ᠬᠤᠳᠳᠤᠭ ᠤᠰᠤᠨ ᠤ ᠪᠠᠰᠠ ᠯᠠ ᠳᠠᠭᠤᠤ ᠬᠤᠭᠤᠷ ᠤᠨ ᠠᠳᠠ ᠣᠷᠣᠰᠢᠭᠰᠠᠨ ᠭᠡᠮᠡᠷ ᠵᠢᠭᠠᠬᠠᠨ ᠬᠦᠦ ᠬᠤᠭᠤᠷᠴᠢ ᠥᠪᠥᠧ ᠬᠤᠭᠤᠷᠬᠠᠢ ᠬᠤᠭᠤᠷ ᠢᠶᠠᠨ ᠡᠭᠦᠷᠦᠭᠡᠳ ᠣᠭᠲᠠᠷᠭᠤᠢ ᠶᠢᠨ ᠴᠠᠭᠠᠨ ᠣᠶᠣᠳᠠᠯ ᠢ ᠳᠠᠭᠠᠵᠤ ᠂ ᠲᠡᠭᠷᠢ ᠥᠭᠡᠳᠡ ᠶᠠᠪᠤᠭᠠᠳ ᠣᠲᠣᠭᠰᠠᠨ ᠢ ᠪᠢ ᠵᠡᠭᠦᠳᠦᠨ ᠳᠡᠭᠡᠨ ᠬᠠᠷᠠᠭᠰᠠᠨ᠃ ᠬᠤᠶᠢᠨ᠎ᠠ ᠠᠴᠠ ᠨᠢ ᠰᠦᠷᠦᠭ ᠴᠠᠭᠠᠨ ᠴᠢᠨ᠋ᠸ᠎ᠠ ᠳᠠᠭᠠᠵᠤ ᠤᠯᠢᠬᠰᠠᠭᠠᠷ ᠶᠠᠪᠤᠵᠤ ᠪᠠᠶᠢᠨ᠎ᠠ ᠭᠡᠵᠦ ᠵᠡᠭᠦᠳᠦᠯᠡᠭᠰᠡᠨ ᠭᠡᠵᠦ ᠪᠠᠰᠠ ᠨᠡᠮᠡᠵᠦ ᠬᠡᠯᠡᠵᠡᠢ᠃ ᠲᠡᠷᠡ ᠬᠦᠦ ᠶᠢᠨ ᠵᠡᠭᠦᠳᠦ ᠶᠢ ᠬᠡᠨ ᠴᠦ ᠶᠠᠭᠤᠮᠠᠨ ᠴᠢᠨᠡᠭᠡᠨ ᠳᠤ ᠪᠤᠳᠤᠬᠰᠠᠨ ᠦᠭᠡᠢ᠃ ︽ᠪᠤᠷᠬᠠᠨ ᠬᠤᠭᠤᠷᠴᠢ︾ ᠎ ᠶᠢᠨ ᠵᠢᠩᠬᠢᠨᠢ ᠳᠦᠷᠢ ᠲᠥᠷᠬᠦ ᠴᠦ ᠬᠥᠮᠥᠰ ᠤᠨ ᠣᠢ ᠰᠠᠨᠠᠮᠵᠢ ᠠᠴᠠ ᠠᠯᠭᠤᠷᠬᠠᠨ ᠵᠠᠮᠬᠠᠷᠠᠵᠤ᠂ ᠳᠣᠮᠤᠭ ᠪᠣᠯᠣᠨ ᠶᠠᠷᠢᠭᠳᠠᠬᠤ ᠲᠡᠳᠦᠢ ᠪᠣᠯᠵᠠᠢ᠃          ᠡᠪᠦᠭᠡᠨ ᠬᠤᠭᠤᠷᠴᠢ ᠰᠤᠷᠠᠭ ᠠᠯᠳᠠᠷᠠᠭᠰᠠᠨ ᠬᠡᠳᠦᠬᠡᠨ ᠬᠤᠨᠤᠭ ᠤᠨ ᠳᠠᠷᠠᠭ᠎ᠠ ᠬᠤᠭᠤᠷᠴᠢ ᠶᠢᠨ ᠬᠤᠭᠤᠷ ᠢ ᠬᠤᠭᠤ ᠳᠡᠪᠰᠡᠵᠦ ᠭᠠᠯ ᠤᠷᠤᠭᠤ ᠰᠢᠳᠡᠭᠰᠡᠨ ᠬᠤᠶᠠᠷ ᠬᠥᠮᠥᠨ ᠤ ᠨᠢᠭᠡ ᠨᠢ ᠰᠣᠭᠲᠣᠭᠤ ᠬᠥᠯᠴᠥᠭᠦᠦ ᠬᠥᠳᠡᠭᠡ ᠲᠥᠭᠡᠷᠢᠵᠦ ᠬᠤᠨᠣᠭᠠᠳ ᠬᠡᠭᠡᠷ᠎ᠡ ᠶᠢᠨ ᠨᠣᠬᠠᠢ ᠶᠢᠨ ᠵᠠᠭᠤᠰᠢ ᠪᠣᠯᠵᠤ᠂ ᠨᠥᠭᠦᠭᠡ ᠨᠢ ᠤᠴᠢᠷ ᠪᠢᠲᠡᠭᠦᠯᠢᠭ ᠢᠶᠠᠷ ᠬᠤᠳᠳᠤᠭ ᠳᠣᠲᠣᠷ᠎ᠠ ᠪᠣᠭᠤᠵᠤ ᠦᠬᠦᠭᠰᠡᠨ ᠭᠡᠨ᠎ᠡ᠃ ᠲᠡᠷᠡ ᠬᠤᠶᠠᠷ ᠬᠡᠯᠡᠯᠴᠡᠭᠡ ᠲᠠᠢ ᠶᠤᠮ ᠰᠢᠭ ᠡᠳᠦᠷ ᠳᠠᠷᠠᠭᠠᠯᠠᠨ ᠳᠠᠭᠤᠰᠴᠠᠢ᠃ ᠡᠪᠦᠭᠡᠨ ᠬᠤᠭᠤᠷᠴᠢ ᠮᠠᠭᠠᠳ ᠦᠭᠡᠢ ᠨᠠᠰᠤᠨ ᠳᠠᠭᠠᠨ ᠨᠢᠭᠦᠯ ᠬᠢᠭᠰᠡᠨ ᠭᠡᠪᠡᠯ ᠡᠨᠡ ᠯᠡ ᠪᠠᠶᠢᠵᠤ ᠪᠤᠯᠬᠤ᠃          ᠬᠤᠭᠤᠷᠴᠢ ᠶᠢ ᠬᠠᠯᠢᠭᠰᠠᠨ ᠠᠴᠠ ᠬᠤᠶᠢᠰᠢ ᠭᠤᠪᠢ ᠨᠤᠲᠤᠭ ᠲᠤ ᠪᠠᠷᠤᠭ ᠠᠷᠪᠠᠨ ᠵᠢᠯ ᠤᠨ ᠶᠢᠰᠦ ᠨᠢ ᠭᠠᠩᠳᠠᠨ᠂ ᠡᠪᠡᠰᠦ ᠤᠷᠭᠤᠮᠠᠯ ᠲᠠᠴᠢᠷᠰᠢᠵᠤ᠂ ᠬᠢᠵᠢᠭ ᠲᠠᠬᠤᠯ ᠳᠡᠯᠭᠡᠷᠡᠨ᠂ ᠭᠠᠢ ᠪᠠᠷᠴᠢᠳ ᠣᠯᠠᠰᠢᠷᠠᠵᠤ᠂ ᠬᠥᠮᠥᠨ ᠠᠮᠢᠲᠠᠨ ᠣᠷᠣᠰᠢᠨ ᠪᠠᠶᠢᠬᠤᠢ ᠶᠢᠨ ᠠᠷᠭ᠎ᠠ ᠦᠭᠡᠢ ᠳᠤ ᠲᠤᠯᠵᠤ᠂ ᠪᠠᠶᠠᠨ ᠪᠠᠷᠬᠠᠰ ᠤᠨ ᠦᠷ᠎ᠡ ᠰᠠᠳᠤᠨ ᠢ ᠪᠠᠭᠲᠠᠭᠠᠭᠰᠠᠨ ᠤᠤᠭᠠᠯ ᠨᠤᠲᠤᠭ ᠤᠨ ᠬᠥᠮᠥᠰ ᠬᠥᠮᠥᠨ ᠤ ᠭᠠᠵᠠᠷ ᠬᠥᠨᠳᠡᠯᠡᠨ ᠤ ᠨᠤᠲᠤᠭ ᠲᠤ ᠨᠡᠭᠦᠳᠡᠯᠯᠡᠵᠦ ᠡᠰᠡᠬᠦᠯ᠎ᠡ ᠰᠠᠭᠤᠷᠢᠰᠢᠬᠤ ᠪᠣᠯᠤᠭᠰᠠᠨ ᠭᠡᠨ᠎ᠡ᠃ ᠥᠨᠥᠬᠢ ᠬᠠᠷᠢ ᠭᠠᠵᠠᠷ ᠠᠴᠠ ᠶᠠᠪᠠᠭᠠᠨ ᠨᠢᠴᠦᠭᠦᠨ ᠢᠷᠡᠭᠡᠳ ᠶᠠᠭᠤᠮᠠᠵᠢᠵᠤ ᠬᠥᠷᠥᠩᠭᠡᠵᠢᠭᠰᠡᠨ ᠴᠠᠭᠠᠴᠢ ᠪᠠᠶᠠᠨ ᠴᠦ ᠪᠠᠶᠢᠳᠠᠭ ᠮᠠᠯ ᠰᠦᠷᠦᠭ ᠢᠶᠠᠨ ᠭᠠᠩ ᠵᠤᠳ᠂ ᠭᠠᠯᠵᠠᠭᠤ ᠪᠣᠣᠬᠠᠢ ᠬᠤᠶᠠᠷ ᠲᠤ ᠡᠷᠭᠦᠵᠦ ᠳᠠᠭᠤᠰᠬᠠᠭᠠᠳ ᠮᠣᠳᠣ ᠪᠠᠨ ᠪᠠᠷᠢᠵᠤ ᠨᠤᠲᠤᠭ ᠪᠤᠴᠠᠭᠠᠳ ᠰᠤᠷᠠᠭ ᠲᠠᠰᠤᠷᠠᠵᠠᠢ᠃ ᠰᠦᠷᠦᠭᠯᠡᠵᠦ ᠶᠠᠪᠤᠳᠠᠭ ᠴᠢᠨ᠋ᠸ᠎ᠠ ᠶᠢᠨ ᠮᠥᠷ ᠴᠦ ᠳᠠᠭᠢᠵᠤ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠭᠡᠨ᠎ᠡ᠃          ᠰᠣᠬᠤᠷ ᠬᠤᠭᠤᠷᠴᠢ ᠮᠠᠨᠢ ᠵᠡᠭᠦᠳᠦᠨ ᠳᠤᠮᠳᠠᠭᠤᠷ ᠢᠷᠡᠭᠰᠡᠨ ᠰᠢᠭ ᠢᠶᠠᠨ ᠵᠡᠭᠦᠳᠦᠨ ᠳᠤᠮᠳᠠᠭᠤᠷ ᠪᠤᠴᠠᠭᠰᠠᠨ ᠠᠪᠠᠢ᠃          ᠪᠤᠷᠬᠠᠨ ᠬᠤᠭᠤᠷᠴᠢ ᠬᠡᠮᠡᠭᠳᠡᠳᠡᠭ ᠳᠣᠮᠣᠭᠲᠤ ᠬᠤᠭᠤᠷᠴᠢ ᠴᠣᠬᠤᠮ ᠬᠡᠵᠢᠶ᠎ᠡ ᠨᠢᠭᠡᠨ ᠴᠠᠭ ᠲᠤ ᠪᠠᠶᠢᠵᠤ ᠥᠩᠭᠡᠷᠡᠭᠰᠡᠨ ᠡᠰᠡᠬᠦ ᠨᠢ ᠡᠷᠡᠭᠡᠯᠵᠡᠭᠡ ᠲᠠᠢ ᠶᠤᠮ᠃ ᠬᠡᠷᠪᠡ ᠪᠠᠶᠢᠭᠰᠠᠨ ᠪᠣᠯ ᠶᠢᠷᠲᠢᠨᠴᠦ ᠶᠢᠨ ᠬᠥᠭᠵᠢᠮᠲᠦ ᠵᠡᠭᠦᠳᠦ ᠪᠠᠶᠢᠭᠰᠠᠨ ᠪᠠᠶᠢᠬ᠎ᠠ᠃ ᠲᠡᠷᠡ ᠪᠠᠷ ᠵᠡᠭᠦᠳᠦᠨ ᠠᠴᠠ ᠲᠠᠰᠤᠷᠠᠵᠤ᠂ ᠬᠤᠭᠤᠷ ᠠᠴᠠ ᠮᠡᠨᠳᠦᠯᠡᠭᠰᠡᠨ ᠳᠣᠮᠤᠭ ᠪᠠᠶᠢᠭᠰᠠᠨ ᠪᠤᠶᠤ᠃          ᠭᠤᠪᠢ ᠰᠠᠶᠢᠬᠠᠨ ᠨᠤᠲᠤᠭ ᠤᠨ ᠭᠡᠭᠡ ᠲᠠᠲᠠᠭᠰᠠᠨ ᠳᠣᠮᠤᠭ ᠳᠤᠮᠳᠠᠭᠤᠷ ᠲᠤᠭᠤᠴᠢᠵᠤ ᠥᠩᠭᠡᠷᠡᠭᠰᠡᠨ ᠭᠠᠶᠢᠬᠠᠮᠰᠢᠭᠲᠤ ᠨᠢᠭᠡᠨ ᠵᠡᠭᠦᠳᠦ ᠡᠶᠢᠨ ᠬᠦ ᠵᠢᠷᠭᠠᠭᠰᠠᠨ ᠠᠪᠠᠢ᠃          
  
ᠢᠷᠡᠯᠲᠡ᠄ ᠠᠯᠠᠱᠠ ᠶᠢᠨ ᠡᠳᠦᠷ ᠤᠨ ᠰᠣᠨᠢᠨ 
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号