ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
﹇ᠤᠷᠠᠨ ᠵᠣᠬᠢᠶᠠᠯ﹈ ᠪᠢᠳᠠᠨ ᠤ ᠠᠭᠤᠯᠵᠠᠯᠲᠠ ᠠᠯᠠᠭ ᠠᠭᠤᠯᠠ ᠶᠢᠨ ᠡᠪᠦᠷ ᠠᠯᠳᠠᠨ ᠲᠣᠣᠷᠠᠢ ᠶᠢᠨ ᠤᠢ ᠳᠤ ᠪᠣᠯᠤᠭᠰᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/4/7
ᠳᠠᠭᠤᠳᠠᠭᠠᠴᠢ ᠡ᠊ᠩᠭᠡᠨᠬᠳᠠ                             - ᠠᠯᠠᠱᠠ᠂ ᠰᠢᠯᠢ ᠶᠢᠨ ᠭᠤᠣᠯ ᠬᠤᠶᠠᠷ ᠨᠤᠲᠤᠭ ᠤᠨ  ᠵᠣᠬᠢᠶᠠᠯᠴᠢᠳ ᠤᠨ ᠭᠠᠯ ᠠᠶᠠᠨ ᠤ ᠲᠠᠲᠠᠯᠠᠭ᠎ᠠ                    ᠳᠤᠷᠠᠰᠤᠮᠵᠢ ᠪᠣᠯᠭᠠᠨ ᠨᠢ ᠠᠷᠴᠢᠭᠳᠠᠳᠠᠭ ᠦᠭᠡᠢ ᠲᠤᠮᠤᠭ ᠰᠢᠭ᠋ ᠦᠯᠡᠳᠡᠳᠡᠭ ᠤᠯᠤᠰ ᠭᠡᠭᠴᠢ ᠵᠣᠬᠢᠶᠠᠯᠴᠢᠳ ᠪᠤᠶᠤ           ︽ᠢᠮᠠᠭᠲᠠ ᠪᠢᠳᠠᠨ ᠢ ᠠᠭᠤᠯᠵᠠᠭᠤᠯᠳᠠᠭ ᠢᠷᠠᠭᠤ ᠨᠠᠶᠢᠷᠠᠭ ᠮᠠᠨᠳᠤᠲᠤᠭᠠᠢ︾ ᠬᠡᠮᠡᠬᠦ ᠦᠭᠡ ᠤᠷᠠᠨ ᠪᠦᠲᠦᠭᠡᠯᠴᠢ ᠬᠥᠮᠥᠨ ᠪᠣᠯᠭᠠᠨ ᠤ ᠵᠢᠷᠦᠬᠡ ᠰᠡᠳᠬᠢᠯ ᠤᠨ ᠦᠭᠡ ᠪᠣᠯᠤᠭᠰᠠᠨ ᠤ ᠭᠤᠣᠯ ᠰᠢᠯᠲᠠᠭᠠᠨ ᠨᠢ ︽ᠠᠭᠤᠯᠵᠠᠯᠲᠠ︾ ᠳᠤ  ᠪᠠᠶᠢᠭ᠎ᠠ ᠶᠤᠮ᠂ ᠲᠡᠳᠡ ᠠᠭᠤᠯᠵᠠᠭᠰᠠᠭᠠᠷ ᠯᠡ ᠭᠡᠳᠡ ᠴᠠᠬᠢᠭᠤᠷ  ᠰᠢᠭ᠋ ᠨᠢᠭᠡ ᠨᠢᠭᠡᠨ ᠢᠶᠠᠨ ᠴᠠᠬᠢᠵᠤ ᠭᠠᠯ ᠠᠰᠠᠭᠠᠨ᠎ᠠ᠃ ᠡᠨᠡ ᠭᠠᠯ ᠢ ᠨᠢ ᠲᠣᠭᠤᠷᠢᠭᠠᠳ ᠦᠯᠢᠭᠡᠷ ᠡᠭᠦᠰᠦᠨ᠎ᠡ᠂ ᠲᠡᠷᠡ ᠦᠯᠢᠭᠡᠷ ᠪᠣᠯᠭᠠᠨ ᠠᠴᠠ ᠨᠢ ᠤᠬᠠᠭᠠᠷᠠᠯ ᠢᠷᠡᠨ᠎ᠡ᠃ ᠤᠤᠭᠤᠵᠤ ᠢᠳᠡᠬᠦ ᠶᠢᠨ ᠲᠥᠯᠥᠭᠡ ᠠᠮᠢᠳᠤᠷᠠᠵᠤ ᠪᠠᠶᠢᠭ᠎ᠠ ᠶᠤᠮ ᠰᠢᠭ᠋ ᠰᠠᠵᠢᠯᠠᠵᠤ ᠶᠠᠪᠤᠭ᠎ᠠ ᠬᠥᠮᠥᠰ ᠤᠨ ᠶᠠᠳᠠᠮᠠᠭ ᠶᠠᠷᠢᠶ᠎ᠠ ᠲᠡᠳᠡᠨ ᠤ ᠳᠤᠮᠳᠠ ᠬᠡᠵᠢᠶᠡᠳᠡ ᠥᠷᠨᠢᠵᠦ ᠪᠠᠶᠢᠷᠢ ᠠᠪᠴᠤ ᠴᠢᠳᠠᠳᠠᠭ ᠦᠭᠡᠢ᠂ ᠶᠠᠪᠤᠵᠤ ᠰᠠᠭᠤᠭᠰᠠᠨ ᠬᠢᠵᠦ ᠪᠦᠲᠦᠭᠡᠭᠰᠡᠨ ᠢᠶᠠᠨ ᠯᠡ ᠶᠠᠷᠢᠵᠤ᠂ ᠪᠠᠶᠢᠭᠠᠯᠢ ᠠᠴᠠ ᠪᠠᠨ ᠲᠠᠭᠠᠰᠢᠶᠠᠯ ᠠᠪᠴᠤ ᠪᠠᠶᠢᠵᠤ ᠪᠠᠶᠢᠭᠰᠠᠨ ᠪᠦᠭᠦᠨ ᠢᠶᠠᠨ ᠴᠡᠭᠡᠵᠢᠨ ᠤ ᠪᠠᠶᠠᠷ ᠪᠣᠯᠭᠠᠨ ᠠᠰᠬᠠᠳᠠᠭ ᠠᠴᠠ ᠲᠡᠳᠡᠨ ᠤ ᠶᠠᠷᠢᠭᠰᠠᠨ ᠪᠣᠯᠭᠠᠨ ᠨᠢ᠂ ᠬᠡᠯᠡᠭᠰᠡᠨ ᠪᠣᠯᠭᠠᠨ ᠨᠢ ᠲᠤᠮᠤᠭ ᠰᠢᠭ᠋ ᠦᠯᠡᠳᠡᠳᠡᠭ ᠤᠴᠢᠷᠲᠠᠢ᠃           ︽ᠳᠡᠯᠡᠬᠡᠢ ᠶᠢᠨ ᠳᠡᠭᠡᠪᠦᠷ ᠢᠰᠡᠭᠡᠢ ᠦᠷᠭᠦᠭᠡ︾ - ᠡᠨᠡ ᠢᠯᠴᠢ ᠲᠠᠢ ᠦᠭᠡ ᠡᠷᠳᠡᠨᠢᠪᠠᠭᠠᠲᠤᠷ ᠢ ᠡᠵᠡᠨ᠎ᠡ ᠲᠠᠢ ᠬᠤᠯᠪᠣᠨ᠎ᠠ᠂ ᠡᠵᠡᠨ᠎ᠡ ᠶᠢ ᠳᠡᠯᠡᠬᠡᠢ ᠲᠠᠢ ᠬᠤᠯᠪᠣᠨ᠎ᠠ᠃ ᠰᠣᠶᠣᠯ ᠭᠡᠭᠴᠢ ᠨᠢᠭᠡ ᠭᠠᠵᠠᠷ ᠣᠷᠣᠨ ᠤ ᠨᠡᠷ᠎ᠡ ᠶᠢᠨ ᠬᠠᠭᠤᠳᠠᠰᠤ ᠪᠤᠯᠳᠠᠭ ᠵᠢᠮ᠎ᠡ ᠲᠠᠢ᠃ ᠡᠵᠡᠨ᠎ᠡ ᠳᠤ ᠢᠷᠡᠭᠰᠡᠨ ᠰᠣᠶᠣᠯ ᠤᠨ ᠭᠠᠯ ᠠᠶᠠᠨ ᠤ ᠬᠢᠨ ᠵᠠᠪᠠᠯ   ᠰᠣᠶᠣᠯ ᠨᠣᠮ ᠤᠨ ᠢᠰᠡᠭᠡᠢ ᠦᠷᠭᠦᠭᠡ ᠪᠠᠷ ᠣᠷᠣᠵᠤ ︽ᠠᠳᠢᠰ︾ ᠠᠪᠳᠠᠭ ᠶᠣᠰᠣᠲᠠᠢ᠃ ᠬᠤᠶᠠᠷ ᠰᠥᠨᠢᠳ ᠪᠣᠯᠣᠨ ᠬᠥᠪᠡᠭᠡᠲᠦ ᠰᠢᠷ᠎ᠠ ᠶᠢᠨ ᠠᠬᠠᠨ ᠳᠡᠭᠦᠦᠰ ᠮᠢᠨᠢ ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠤ ᠨᠣᠮ ᠳᠤ ᠬᠠᠶᠢᠷᠠᠲᠠᠢ ᠶᠢ ᠳᠠᠶᠠᠩ ᠤᠨ ᠰᠣᠨᠣᠷ ᠲᠤ ᠬᠦᠷᠭᠡᠭᠰᠡᠨ ᠰᠣᠶᠣᠯ ᠨᠣᠮ ᠤᠨ ᠢᠰᠡᠭᠡᠢ  ᠥᠷᠭᠦᠭᠡᠨ ᠳᠤ ᠠᠯᠤᠰ ᠠᠴᠠ ᠠᠴᠢᠵᠤ ᠢᠷᠡᠭᠰᠡᠨ ᠨᠣᠮ ᠢᠶᠠᠨ ᠲᠣᠷᠭ᠎ᠠ ᠪᠠᠷ ᠪᠠᠷᠢᠨᠲᠠᠭᠯᠠᠨ ︽ᠳᠡᠯᠡᠬᠡᠢ ᠶᠢᠨ ᠳᠡᠭᠡᠪᠦᠷ ᠢᠰᠡᠭᠡᠢ ᠦᠷᠭᠦᠭᠡ︾ ᠬᠡᠮᠡᠬᠦ ᠪᠢᠴᠢᠭᠡᠰᠦ ᠲᠠᠢ ᠪᠠᠨ ᠬᠠᠮᠲᠤ ᠪᠠᠷᠢᠯ᠎ᠠ᠃          ᠡᠷᠳᠡᠨᠢᠪᠠᠭᠠᠲᠤᠷ  ᠴᠤ ︽ᠲᠠᠨᠠᠷ ᠮᠠᠨᠢ ᠨᠠᠷᠠ ᠵᠥᠪ ᠡᠷᠭᠢᠭᠡᠳ ᠮᠠᠨ ᠤ ᠨᠤᠲᠤᠭ ᠲᠤ ᠬᠦᠷᠴᠦ ᠢᠷᠡᠭᠰᠡᠨ ᠪᠠᠶᠢᠨ᠎ᠠ︾ ᠬᠡᠮᠡᠨ ᠮᠠᠰᠢ ᠰᠠᠶᠢᠬᠠᠨ ᠭᠥᠯᠢᠶᠡᠨ ᠠᠪᠴᠤ᠂ᠮᠠᠨ ᠤ ᠠᠯᠠᠱᠠ ᠶᠢ ᠠᠯᠢ ᠡᠷᠲᠡ ᠠᠴᠠ ︽ᠡᠷᠦᠭᠡ ᠪᠠᠷ ᠢᠶᠠᠨ ᠬᠠᠷᠠᠬᠤ ᠳᠤ ᠮᠣᠳᠣ ᠲᠠᠢ ᠰᠠᠶᠢᠬᠠᠨ ᠠᠯᠠᠱᠠ᠂ ᠡᠭᠦᠳᠡ ᠪᠠᠷ ᠢᠶᠠᠨ ᠬᠠᠷᠠᠬᠤ ᠳᠤ ᠤᠰᠤ ᠲᠠᠢ ᠰᠠᠶᠢᠬᠠᠨ ᠠᠯᠠᠱᠠ︾ ᠭᠡᠵᠦ ᠱᠠᠭᠰᠢᠳᠠᠭ ᠪᠣᠯ ᠡᠵᠡᠨ᠎ᠡ ᠲᠣᠷᠭᠤᠳ ᠨᠤᠲᠤᠭ ᠢ ︽ᠲᠣᠣᠷᠠᠢ ᠶᠢᠨ ᠨᠠᠪᠴᠢᠰ ᠨᠢ ᠲᠣᠭᠤᠨᠣ ᠪᠠᠷ ᠨᠢ ᠬᠠᠷᠠᠭᠳᠠᠳᠠᠭ᠂ ᠲᠣᠷᠭᠠᠨ ᠡᠯᠡᠰᠦᠨ ᠳᠡᠭᠡᠷ᠎ᠡ ᠨᠢ ᠲᠠᠤᠯᠠᠢ ᠶᠢᠨ ᠮᠥᠷ ᠬᠠᠷᠠᠭᠳᠠᠳᠠᠭ︾ ᠬᠡᠮᠡᠳᠡᠭ ᠰᠢᠦ ᠬᠡᠮᠡᠨ ᠪᠠᠭ᠎ᠠ ᠥᠬᠢᠨ ᠠᠶᠠᠨ᠎ᠠ ᠲᠠᠢ ᠪᠠᠨ ᠬᠤᠶᠠᠭᠤᠯᠠ ᠪᠢᠳᠠᠨ ᠳᠤ ᠵᠠᠮᠴᠢ ᠪᠣᠯᠵᠤ ᠬᠠᠷ᠎ᠠ ᠬᠤᠳᠠ᠂ ᠰᠤᠪᠨᠠᠭᠤᠷ᠂ ᠰᠠᠬᠢᠭᠤᠯᠰᠤᠨ ᠲᠣᠣᠷᠠᠢ᠂ ᠴᠢᠩᠭᠢᠰ ᠤᠨ ᠶᠢᠰᠦᠨ ᠬᠥᠬᠡ ᠴᠢᠯᠠᠭᠤ ᠪᠠᠷ ᠲᠣᠭᠤᠷᠢᠭᠤᠯᠵᠤ᠂ ᠠᠯᠳᠠᠨ ᠲᠤᠤᠷᠠᠶᠢᠳᠤ ᠨᠤᠲᠤᠭ ᠢ ᠭᠠᠯ ᠠᠶᠠᠨ ᠤ ᠬᠢᠨ ᠳᠤ ᠲᠡᠦᠬᠡ ᠰᠣᠶᠣᠯ ᠠᠴᠠ ᠨᠢ ᠡᠬᠢᠯᠡᠨ ᠲᠦᠷᠦ ᠲᠦᠮᠡᠨ ᠤ ᠬᠢᠨᠢ ᠠᠴᠢ ᠡᠨᠡᠷᠢᠯ ᠢ ᠭᠦᠷᠳᠡᠯ᠎ᠡ ᠲᠠᠨᠢᠯᠴᠠᠭᠤᠯᠵᠤ ᠶᠠᠪᠤᠯ᠎ᠠ᠃ ︽ᠬᠥᠮᠥᠨ ᠪᠢᠰᠢ᠂ ᠴᠡᠷᠢᠭ︾ ᠭᠡᠵᠦ ᠥᠪᠡᠷ ᠢ ᠪᠠᠨ ᠲᠠᠨᠢᠯᠴᠠᠭᠤᠯᠬᠤ ᠳᠤᠷᠠᠲᠠᠢ ᠡᠷᠳᠡᠨᠢᠪᠠᠭᠠᠲᠤᠷ ᠮᠠᠨᠢ ᠦᠳᠡᠯᠲᠡ ᠶᠢᠨ ᠨᠠᠶᠢᠷ ᠳᠡᠭᠡᠷ᠎ᠡ ︽ᠨᠠᠮᠠᠶᠢ ᠲᠠᠨᠠᠷ ᠳᠤᠭᠤᠢ ᠰᠠᠭᠤᠵᠤ ᠪᠠᠶᠢᠪᠠᠯ  ᠳᠠᠭᠤᠯᠠᠵᠤ ᠪᠠᠶᠢᠨ᠎ᠠ ᠭᠡᠵᠦ ᠪᠤᠳᠤᠭᠠᠷᠠᠢ᠂ ᠳᠠᠭᠤᠯᠠᠭᠠᠳ ᠡᠬᠢᠯᠡᠪᠡᠯ ᠰᠢᠷᠤᠩᠬᠠᠶᠢᠯᠠᠵᠤ ᠪᠠᠶᠢᠨ᠎ᠠ ᠭᠡᠵᠦ ᠰᠠᠨᠠᠭᠠᠷᠠᠢ︾ ᠬᠡᠮᠡᠨ ᠤᠯᠠᠨ ᠢ ᠢᠨᠢᠶᠡᠯᠭᠡᠨ᠂ ᠠᠯᠠᠱᠠ ᠠᠭᠸᠠᠩᠳᠠᠨᠳᠠᠷ᠂ ᠠᠷᠤ ᠬᠠᠯᠬ᠎ᠠ ᠶᠢᠨ ᠷᠠᠪᠵᠠᠢ ᠬᠤᠲᠤᠭᠲᠤ ᠲᠠᠢ ᠠᠭᠤᠯᠵᠠᠭᠰᠠᠨ ᠲᠤᠮᠤᠭ ᠢ ᠶᠠᠷᠢᠵᠤ ᠤᠯᠠᠨ ᠢ ᠠᠷᠪᠠ ᠶᠢᠰᠦᠳᠦᠭᠡᠷ ᠵᠠᠭᠤᠨ ᠤᠷᠤᠭᠤ ᠬᠥᠲᠥᠯᠪᠡ᠃ ᠲᠡᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠤᠢ᠂ ᠠᠯᠠᠱᠠ ᠨᠤᠲᠤᠭ ᠢ ᠡᠨᠡ ᠠᠯᠳᠠᠨ ᠳᠡᠯᠡᠬᠡᠢ ᠠᠭᠸᠠᠩᠳᠠᠨᠳᠠᠷ ᡀᠠᠷᠠᠮᠪᠠ ᠪᠠᠷ ᠲᠠᠨᠢᠳᠠᠭ ᠶᠤᠮ ᠴᠢᠨᠢ ᠠᠯᠠᠱᠠ ᠳᠤ ᠪᠤᠯᠬᠤ ᠰᠣᠶᠣᠯ ᠤᠨ ᠦᠢᠯᠡ ᠠᠵᠢᠯᠯᠠᠭᠠᠨ ᠳᠤ ᠰᠣᠶᠣᠯᠲᠤ ᠠᠷᠠᠳ ᠤᠨ ᠳᠤᠮᠳᠠ ᠠᠭᠸᠠᠩᠳᠠᠨᠳᠠᠷ ᠶᠠᠷᠢᠭᠳᠠᠬᠤ ᠦᠭᠡᠢ ᠭᠠᠯ ᠠᠶᠠᠨ ᠶᠠᠭᠠᠬᠢᠨ ᠪᠠᠶᠢᠵᠤ ᠪᠤᠯᠬᠤ ᠪᠢᠯᠡ ᠳ᠋ᠧ᠃ ᠭᠠᠯ ᠠᠶᠠᠨ ᠤ ᠦᠳᠡᠯᠲᠡ ᠶᠢᠨ ᠨᠠᠶᠢᠷ ᠢ ᠡᠵᠡᠨ᠎ᠡ ᠨᠤᠲᠤᠭ ᠲᠠᠭᠠᠨ ᠬᠦᠨᠳᠦᠲᠡᠢ ᠰᠠᠶᠢᠬᠠᠨ ᠪᠤᠭᠤᠷᠤᠯ᠂  ᠦᠷ᠎ᠡ ᠬᠤᠶᠢᠴᠢᠰ ᠤᠨ  ᠲᠥᠯᠥᠭᠡ ᠨᠠᠰᠤᠨ ᠲᠤᠷᠰᠢ ᠵᠢᠳᠬᠦᠭᠰᠡᠨ ᠠᠷᠠᠳ ᠤᠨ ᠪᠠᠭᠰᠢ᠂ ᠵᠣᠬᠢᠶᠠᠯᠴᠢ ᠢᠯᠠᠯᠲᠠ ᠪᠠᠭᠰᠢᠲᠠᠨ ᠳᠠᠭᠠᠭᠠᠵᠤ᠂ᠬᠤᠨᠢ ᠮᠠᠭᠤᠯᠠᠨ᠂ ᠬᠤᠷᠠᠵᠠ ᠠᠷᠠᠵᠠ ᠪᠠᠨ ᠬᠤᠨᠳᠠᠭᠠᠨ ᠳᠠᠭᠠᠨ ᠰᠥᠩᠨᠡᠨ᠂ ᠬᠤᠭᠤᠷ ᠳᠠᠭᠤᠤ᠂ ᠬᠤᠯᠪᠤᠭ᠎ᠠ ᠰᠢᠯᠦᠭ ᠢᠶᠠᠨ ᠪᠠᠷᠢᠨ᠂ ᠬᠤᠯᠠ ᠶᠢᠨ ᠳᠣᠲᠣᠨᠣ ᠬᠥᠮᠥᠰ ᠢᠶᠠᠨ ᠦᠨᠡᠬᠡᠷ ᠨᠢᠭᠡ ᠪᠠᠶᠠᠷᠯᠠᠭᠤᠯᠤᠭᠰᠠᠨ ᠶᠤᠮ᠃          ᠲᠡᠷᠡ ᠦᠳᠡᠰᠢ ᠰᠠᠶᠢᠬᠠᠨ ᠪᠠᠶᠢᠯ᠎ᠠ᠃ ᠢᠯᠠᠯᠲᠠ ᠪᠠᠭᠰᠢ ᠮᠢᠨᠢ ᠬᠤᠭᠤᠯᠠᠢ ᠪᠠᠨ ᠡᠷᠢᠶᠡᠨᠲᠦᠭᠦᠯᠦᠨ ᠰᠥᠨᠢᠳ ᠨᠤᠲᠤᠭ ᠤᠨ ᠠᠯᠳᠠᠷᠲᠤ ᠡᠷᠳᠡᠮᠲᠡᠨ  ᠳ᠋᠊ · ᠴᠠᠭᠠᠨ ᠭᠤᠸᠠᠢ ᠶᠢ ᠳᠤᠷᠠᠰᠤᠨ ᠪᠢᠴᠢᠭᠰᠡᠨ ᠰᠢᠯᠦᠭ ᠢᠶᠠᠨ ᠬᠡᠯᠡᠬᠦ ᠪᠣᠯᠵᠤ᠂           ︽ᠭᠤᠶᠢᠪᠢᠰᠢ ᠦᠭᠡᠢ ᠰᠥᠰᠥ ᠵᠣᠷᠢᠭ ᠢ ᠪᠠᠷᠢᠵᠤ          ᠭᠤᠳᠤᠯ ᠤᠨ ᠤᠯᠠ ᠪᠠᠨ ᠡᠯᠡᠭᠡᠪᠡ ᠳ᠋ᠠ᠂ ᠬᠥᠭᠡᠷᠦᠬᠦᠢ ᠮᠢᠨᠢ          ᠬᠠᠳᠠᠨ ᠵᠢᠷᠤᠭ ᠴᠢᠯᠠᠭᠤᠨ ᠰᠣᠶᠣᠯ ᠬᠡᠮᠡᠨ          ᠬᠠᠯᠠᠰᠢᠷᠠᠯ ᠦᠭᠡᠢ ᠵᠢᠳᠬᠦᠵᠦ ᠶᠠᠪᠤᠭᠰᠠᠨ          ᠬᠥᠷᠥᠰᠥᠨ ᠠᠴᠠ ᠤᠷᠭᠤᠭᠰᠠᠨ - ᠬᠥᠮᠥᠨ ᠴᠢᠯᠠᠭᠤ          ᠡᠷ᠎ᠡ ᠶᠢᠨ ᠰᠠᠶᠢᠨ ᠡᠷ᠎ᠡ          ᠡᠷᠳᠡᠮᠲᠡᠨ ᠪᠠᠭᠰᠢ ᠳ᠋᠊ ·  ᠴᠠᠭᠠᠨ ᠠᠬ᠎ᠠ          ᠵᠡᠷᠭᠡᠯᠭᠡᠨᠲᠦ ᠭᠤᠪᠢ ᠳᠤ ᠲᠦᠷᠦᠭᠰᠡᠨ ᠳᠡᠭᠦᠦ ᠶᠢᠨ ᠢᠶᠠᠨ          ᠵᠡᠭᠦᠳᠦᠨ ᠳᠤ ᠳᠠᠩᠳᠠ ᠬᠤᠨᠣᠭᠰᠢᠵᠤ          ᠵᠢᠷᠦᠬᠡᠨ ᠳᠤ ᠨᠢᠭᠡ ᠯᠡ ᠬᠠᠳᠠᠩᠰᠢᠭᠰᠠᠨ          ᠨᠣᠮ ᠤᠨ ᠰᠠᠶᠢᠨ ᠠᠬ᠎ᠠ          ᠬᠤᠷᠸ᠎ᠠ ᠶᠢᠨ ᠮᠣᠩᠭᠤᠯ ᠬᠤᠶᠢᠴᠢᠰ ᠲᠠᠭᠠᠨ          ᠬᠤᠯᠠ ᠲᠡᠷᠲᠡᠭᠡ ᠴᠠᠭ ᠦᠶ᠎ᠡ ᠶᠢᠨ          ᠬᠤᠪᠣᠷ ᠨᠠᠨᠳᠢᠨ ᠰᠣᠶᠣᠯ ᠤᠨ ᠥᠪ ᠢ          ᠬᠤᠨᠣᠭᠰᠢᠭᠤᠯᠤᠨ ᠥᠪᠯᠡᠭᠦᠯᠬᠦ ᠶᠢ ᠰᠡᠳᠬᠢᠭᠰᠡᠨ          ᠬᠤᠣᠰ ᠦᠭᠡᠢ ᠨᠢᠭᠡᠨ ᠪᠣᠳᠣᠯᠭᠠᠲᠠᠨ          ᠲᠡᠭᠷᠢ ᠶᠢᠨ ᠬᠠᠶᠠᠭ᠎ᠠ ᠮᠥᠷᠭᠦᠭᠡᠳ ᠪᠤᠴᠠᠭᠰᠠᠨ          ᠲᠡᠨᠢᠭᠡᠷ ᠠᠭᠤᠳᠠᠮ ᠲᠠᠮᠤᠴᠢ ᠶᠢᠨ ᠲᠠᠯ᠎ᠠ ᠶᠢᠨ ᠢᠶᠠᠨ          ᠨᠣᠶᠠᠨ ᠠᠭᠤᠯᠠᠰ ᠤᠨ ᠴᠢᠯᠠᠭᠤ ᠪᠦᠭᠦᠨ ᠳᠤ          ᠨᠣᠪᠧᠯ ᠤᠨ ᠱᠠᠩᠨᠠᠯ ᠬᠦᠷᠲᠡᠭᠡᠬᠦ ᠭᠡᠵᠦ          ᠵᠢᠷᠦᠬᠡᠨ ᠲᠠᠮᠢᠷ ᠢᠶᠠᠨ ᠰᠢᠪᠬᠠᠵᠤ          ᠵᠥᠩᠳᠡᠭᠡᠨ ᠯᠡ ᠪᠦᠲᠦᠭᠡᠯ ᠲᠠᠢ ᠶᠠᠪᠤᠭ᠎ᠠ          ᠰᠣᠳᠣᠨ ᠮᠣᠩᠭᠤᠯ ᠳᠠᠭᠠᠨ  ᠭᠠᠪᠢᠶ᠎ᠠ ᠲᠠᠢ          ᠰᠥᠨᠢᠳ ᠤᠨ ᠡᠨᠡ ᠬᠦᠦ ᠳ᠋᠊ · ᠴᠠᠭᠠᠨ ᠠᠬ᠎ᠠ ᠮᠠᠭᠲᠠᠭᠠᠯᠲᠠᠢ︾ ᠬᠡᠮᠡᠭᠰᠡᠨ ᠨᠢ ᠤᠴᠢᠷᠲᠠᠢ᠂ ᠡᠷᠳᠡᠮᠲᠡᠨ ᠮᠡᠷᠭᠡᠳ ᠢᠶᠠᠨ ᠬᠠᠶᠢᠷᠠᠯᠠᠨ ᠬᠦᠨᠳᠦᠳᠬᠡᠳᠡᠭ ᠰᠥᠨᠢᠳ ᠤᠨ ᠠᠷᠠᠳ ᠲᠦᠮᠡᠨ ᠳ᠋᠊  ·  ᠴᠠᠭᠠᠨ ᠬᠡᠮᠡᠬᠦ ᠰᠦᠭ ᠵᠢᠷᠤᠭ ᠰᠤᠳᠤᠯᠤᠭᠠᠴᠢ ᠡᠷᠳᠡᠮᠲᠡᠨ ᠬᠦᠦ ᠶᠢᠨ ᠢᠶᠠᠨ ᠵᠢᠷᠭᠤᠭᠠᠨ ᠪᠣᠳᠢ ᠨᠣᠮ ᠢ ᠨᠢ ᠨᠠᠶᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠵᠦ ᠤᠩᠰᠢᠭᠴᠢᠳ ᠤᠨ ᠠᠯᠠᠭᠠᠨ ᠳᠡᠭᠡᠷ᠎ᠡ ᠲᠠᠯᠪᠢᠭᠰᠠᠨ ᠨᠢ ᠴᠠᠭᠠᠨ᠎ᠠ ᠪᠠᠨ ᠦᠭᠭᠦᠭᠡᠵᠢ ᠲᠠᠢ ᠦᠢᠯᠡᠰ ᠪᠣᠯᠵᠠᠢ᠃ ᠳ᠋᠊  · ᠴᠠᠭᠠᠨ  ᠪᠣᠯ ᠮᠣᠩᠭᠤᠯ ᠨᠤᠲᠤᠭ ᠤᠨ ᠴᠢᠯᠠᠭᠤᠨ ᠨᠣᠮ ᠤᠨ ᠨᠢᠭᠤᠴᠠ ᠶᠢ ᠴᠡᠭᠡᠵᠢᠨ ᠤ ᠭᠠᠯ ᠢᠶᠠᠨ ᠠᠰᠠᠭᠠᠨ ᠪᠠᠶᠢᠵᠤ ᠲᠠᠶᠢᠯᠤᠭᠰᠠᠨ ᠭᠠᠪᠢᠶᠠᠲᠠᠨ ᠶᠤᠮᠰᠠᠨ  ᠃          ᠲᠤᠤᠷᠠᠶᠢᠳᠤ ᠨᠤᠲᠤᠭ ᠤᠨ ᠲᠣᠬᠢᠯᠢᠭ ᠰᠠᠶᠢᠬᠠᠨ ᠮᠣᠩᠭᠤᠯ ᠵᠣᠭᠤᠭ ᠤᠨ ᠦᠷᠦᠭᠡ ᠲᠡᠷᠡ ᠦᠳᠡᠰᠢ ᠲᠡᠦᠬᠡ ᠰᠣᠶᠣᠯ ᠤᠨ ᠬᠠᠯᠠᠭᠤᠨ ᠶᠠᠷᠢᠶ᠎ᠠ ᠪᠠᠷ ᠪᠢᠯᠬᠠᠵᠤ ᠪᠠᠶᠢᠯ᠎ᠠ᠃ ᠪᠠᠷᠠᠭᠤᠨ ᠰᠥᠨᠢᠳ ᠤᠨ ᠵᠢᠪᠬᠤᠭᠠᠯᠢᠭ ᠵᠠᠯᠠᠭᠤ ᠮᠥᠩᠬᠡᠵᠢᠷᠭᠠᠯ ᠬᠤᠰᠢᠭᠤᠨ ᠤ ᠪᠠᠨ ᠤᠯᠠᠭᠠᠨᠮᠥ᠋ᠴᠢᠷ ᠤᠨ ᠳᠠᠷᠤᠭ᠎ᠠ ᠪᠠᠷ ᠠᠵᠢᠯᠯᠠᠵᠤ ᠪᠠᠶᠢᠬᠤ ᠳᠠᠭᠠᠨ ᠤᠯᠤᠰ ᠤᠨ ᠲᠡᠷᠢᠭᠦᠯᠡᠭᠴᠢ ᠳᠤ ᠵᠠᠬᠢᠳᠠᠯ ᠪᠢᠴᠢᠵᠦ᠂ ᠬᠥᠩᠭᠡᠨ ᠮᠣᠷᠢᠲᠤ ᠴᠡᠷᠢᠭ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠤᠯᠠᠭᠠᠨᠮᠥ᠋ᠴᠢᠷ ᠤᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠪᠦᠭᠦᠨ ᠤ ᠬᠦᠨᠳᠦᠳᠬᠡᠯ ᠢ ᠣᠯᠣᠭᠰᠠᠨ ᠲᠣᠮᠣ ᠭᠠᠷ ᠤᠨ ᠨᠢᠭᠡᠨ ᠪᠠᠶᠢᠵᠠᠢ᠃ ᠲᠡᠷᠡ ᠪᠠᠷ ᠳᠠᠭᠤᠤ ᠰᠠᠶᠢᠬᠠᠨ ᠳᠠᠭᠤᠯᠠᠨ᠎ᠠ᠂ ᠪᠦᠯᠭᠦᠮ ᠤᠨ ᠳᠠᠷᠤᠭ᠎ᠠ ᠰᠠᠷᠠᠭᠤᠯ ᠨᠢ ᠪᠦᠯᠲᠡᠶᠢᠵᠦ ᠪᠠᠶᠢᠭᠠᠳ᠄ ︽ᠮᠥᠩᠬᠡᠵᠢᠷᠭᠠᠯ ᠠᠬ᠎ᠠ ᠨᠠᠮᠠᠶᠢ ᠲᠥᠯᠥᠭᠡᠯᠡᠭᠡᠳ ᠨᠢᠭᠡ ᠳᠠᠭᠤᠯᠠᠭᠠᠳ ᠥᠭ︾ ᠭᠡᠪᠡᠯ᠂ ︽ᠪᠢ ᠶᠠᠮᠠᠷ ᠴᠢᠨᠦ ᠬᠤᠪᠢ ᠶᠢᠨ ᠥᠮᠴᠢ ᠤᠤ︖︾ ᠭᠡᠵᠦ ᠨᠤᠲᠤᠭ ᠤᠨ ᠳᠡᠭᠦᠦ ᠳᠡᠭᠡᠨ ᠪᠠᠭ᠎ᠠ ᠵᠡᠷᠭᠡ ᠭᠤᠮᠣᠷᠬᠠᠭᠰᠠᠨ ᠴᠤ ᠠᠷᠠᠳ ᠤᠨ ᠳᠠᠭᠤᠤ ᠶᠢ ᠪᠣᠯ ᠠᠷᠭ᠎ᠠ ᠦᠭᠡᠢ ᠭᠤᠶᠤ ᠳᠠᠭᠤᠯᠠᠳᠠᠭ ᠪᠠᠶᠢᠨ᠎ᠠ᠃ ᠲᠡᠭᠡᠭᠡᠳ ᠪᠦᠷ ︽ᠮᠠᠨ ᠤ ᠠᠷᠠᠳ ᠤᠨ ᠳᠠᠭᠤᠤ ᠪᠣᠯᠭᠠᠨ ᠦᠯᠢᠭᠡᠷ ᠲᠠᠢ ᠰᠢᠦ︾ ᠬᠡᠮᠡᠨ ᠲᠡᠷᠡ ᠦᠳᠡᠰᠢ ︽ᠰᠢᠷ᠎ᠠ ᠬᠠᠳᠠᠨ ᠤ ᠡ᠊ᠩᠭᠡᠷ︾ ᠬᠡᠮᠡᠬᠦ ᠨᠤᠲᠤᠭ ᠪᠣᠯᠭᠠᠨ ᠳᠤ ᠳᠠᠭᠤᠯᠠᠭᠳᠠᠳᠠᠭ ᠠᠷᠠᠳ ᠤᠨ ᠳᠠᠭᠤᠤ ᠶᠢᠨ ᠲᠡᠦᠬᠡ ᠶᠢ ᠶᠠᠷᠢᠵᠤ ᠰᠣᠨᠣᠰᠤᠭᠰᠠᠨ ᠪᠦᠭᠦᠨ ᠢ ᠪᠦᠷ ᠨᠢᠯᠪᠤᠰᠤᠨ ᠳᠤ ᠳᠡᠪᠲᠦᠭᠡᠴᠢᠬᠡᠬᠦ ᠵᠠᠪᠳᠤᠭᠰᠠᠨ᠃ ᠲᠡᠷᠡ ᠬᠡᠦᠬᠡᠨ ᠪᠣᠯᠭᠠᠨ ᠳᠤᠷᠠᠯᠠᠮᠠᠷ ᠵᠤᠵᠠᠭᠠᠨ ᠤᠷᠤᠭᠤᠯ ᠢᠶᠠᠨ ᠰᠢᠯᠡᠮᠡᠳᠡᠨ ᠪᠠᠶᠢᠵᠤ ᠢᠩᠭᠢᠵᠦ ᠡᠬᠢᠯᠡᠪᠡ᠄          ᠰᠢᠷ᠎ᠠ ᠬᠠᠳᠠᠨ ᠤ ᠬᠢᠨᠢ ᠣᠷᠣᠢ ᠳᠡᠭᠡᠷ᠎ᠡ ᠨᠢ ᠭᠦ᠋          ᠰᠢᠷ᠎ᠠ ᠰᠣᠯᠣᠩᠭ᠎ᠠ ᠨᠢ ᠲᠠᠲᠠᠨ᠎ᠠ ᠳ᠋ᠠ ᠭᠦ᠋          ᠰᠢᠷ᠎ᠠ ᠤᠭᠤᠷᠠᠭ ᠢᠶᠠᠨ ᠰᠢᠮᠡᠭᠦᠯᠦᠭᠰᠡᠨ          ᠡᠵᠢ ᠶᠢ ᠪᠠᠨ ᠪᠤᠳᠤᠬᠤᠯᠠᠷ ᠳᠡᠩ ᠳᠤᠩ ᠲᠠᠢ ᠭᠦ᠋                    ᠬᠥᠬᠡ ᠬᠠᠳᠠᠨ ᠤ ᠬᠢᠨᠢ ᠣᠷᠣᠢ ᠳᠡᠭᠡᠷ᠎ᠡ ᠨᠢ ᠭᠦ᠋          ᠬᠥᠬᠡ ᠰᠣᠯᠣᠩᠭ᠎ᠠ ᠨᠢ ᠲᠠᠲᠠᠨ᠎ᠠ ᠳ᠋ᠠ ᠭᠦ᠋          ᠬᠥᠬᠦ ᠶᠢᠨ ᠰᠦ ᠪᠠᠨ ᠰᠢᠮᠡᠭᠦᠯᠦᠭᠰᠡᠨ          ᠡᠵᠢ ᠶᠢ ᠪᠠᠨ ᠪᠤᠳᠤᠬᠤᠯᠠᠷ ᠳᠡᠩ ᠳᠤᠩ ᠲᠠᠢ ᠭᠦ᠋                    ᠤᠯᠠᠭᠠᠨ ᠬᠠᠳᠠᠨ ᠤ ᠬᠢᠨᠢ ᠣᠷᠣᠢ ᠳᠡᠭᠡᠷ᠎ᠡ ᠨᠢ ᠭᠦ᠋          ᠤᠯᠠᠭᠠᠨ ᠰᠣᠯᠣᠩᠭ᠎ᠠ ᠨᠢ ᠲᠠᠲᠠᠨ᠎ᠠ ᠳ᠋ᠠ ᠭᠦ᠋          ᠤᠭᠤᠷᠠᠭ ᠰᠦ ᠪᠠᠨ ᠰᠢᠮᠡᠭᠦᠯᠦᠭᠰᠡᠨ          ᠡᠵᠢ ᠶᠢ ᠪᠠᠨ ᠪᠤᠳᠤᠬᠤᠯᠠᠷ ᠳᠡᠩ ᠳᠤᠩ ᠲᠠᠢ ᠭᠦ᠋          ᠲᠤᠰ ᠳᠠᠭᠤᠤ ᠨᠢ 19 ᠳ᠋ᠦ᠋ᠭᠡᠷ ᠵᠠᠭᠤᠨ ᠤ ᠳᠤᠮᠳᠠᠴᠢ ᠪᠠᠷ ᠵᠣᠬᠢᠶᠠᠭᠳᠠᠨ ᠳᠡᠯᠭᠡᠷᠡᠭᠰᠡᠨ ᠮᠠᠭᠠᠳᠯᠠᠯ ᠲᠠᠢ᠃ ᠲᠤᠬᠠᠢ ᠶᠢᠨ ᠴᠠᠭ ᠦᠶ᠎ᠡ ᠳᠤ ᠴᠢᠭᠤᠯᠤᠯᠲᠤ ᠬᠠᠭᠠᠯᠭ᠎ᠠ ᠠᠴᠠ ᠳ᠋ᠠ ᠬᠦᠷᠢᠶ᠎ᠡ ᠶᠢᠨ ᠬᠤᠭᠤᠷᠣᠨᠳᠤ ᠲᠡᠮᠡᠭᠡᠨ ᠵᠢᠩ ᠶᠡᠭᠡᠯᠠ ᠶᠠᠪᠤᠳᠠᠭ ᠪᠠᠶᠢᠵᠠᠢ᠂ ᠨᠠᠩᠭᠢᠶᠠᠳ ᠣᠷᠣᠨ ᠤ ᠴᠠᠢ ᠪᠠᠷᠠᠭ᠎ᠠ ᠨᠢ ᠴᠢᠭᠤᠯᠤᠯᠲᠤ ᠬᠠᠭᠠᠯᠭ᠎ᠠ ᠳᠤ ᠢᠷᠡᠵᠦ ᠲᠡᠮᠡᠭᠡᠨ ᠵᠢᠩ ᠳᠤ ᠠᠴᠢᠭᠳᠠᠵᠤ ᠴᠠᠬᠠᠷ ᠤᠨ ᠨᠤᠲᠤᠭ ᠢ ᠲᠤᠭᠤᠯᠵᠤ ᠰᠥᠨᠢᠳ ᠤᠨ ᠥᠷᠭᠡᠨ ᠲᠠᠮᠠᠴᠢ ᠶᠢ ᠡᠪᠬᠡᠵᠦ᠂ ᠡᠮᠦᠨ᠎ᠡ ᠭᠤᠪᠢ ᠶᠢ ᠭᠠᠲᠤᠯᠤᠨ ᠬᠠᠯᠬ᠎ᠠ ᠶᠢᠨ ᠠᠭᠤᠳᠠᠮ ᠨᠤᠲᠤᠭ ᠢ ᠳᠠᠪᠠᠨ ᠪᠠᠶᠢᠵᠤ ᠳ᠋ᠠ ᠬᠦᠷᠢᠶ᠎ᠡ ᠣᠷᠣᠳᠠᠭ ᠪᠠᠶᠢᠵᠠᠢ᠃ ᠲᠤᠰ ᠳᠠᠭᠤᠤ ᠵᠣᠬᠢᠶᠠᠭᠳᠠᠬᠤ ᠶᠢᠨ ᠦᠶ᠎ᠡ ᠪᠠᠷ ᠡᠮᠦᠨ᠎ᠡ ᠠᠴᠠ ᠬᠤᠶᠢᠰᠢ ᠶᠠᠪᠤᠭᠰᠠᠨ ᠨᠢᠭᠡᠨ ᠴᠤᠪᠤᠭ᠎ᠠ ᠲᠡᠮᠡᠭᠡᠨ ᠵᠢᠩ ᠨᠢ ᠤᠳᠤ ᠶᠢᠨ  ᠮᠣᠩᠭᠤᠯ ᠤᠯᠤᠰ ᠤᠨ ᠲᠥᠪ ᠠᠶᠢᠮᠠᠭ ᠤᠨ ᠣᠷᠴᠢᠮ ᠭᠦᠷᠦᠭᠡᠳ ᠬᠤᠭᠤᠰᠤᠷᠠᠲᠠᠯ᠎ᠠ ᠪᠠᠨ ᠲᠣᠨᠣᠭᠳᠠᠭᠰᠠᠨ ᠬᠡᠷᠡᠭ ᠭᠠᠷᠴᠠᠢ᠃ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠬᠡᠳᠦᠨ ᠨᠠᠩᠭᠢᠶᠠᠳ ᠵᠢᠩᠴᠢᠳ ᠨᠢ ᠬᠦᠷᠢᠶᠡᠨ ᠳᠤ ᠬᠦᠷᠴᠦ ᠬᠦᠷᠢᠶᠡᠨ ᠳᠤ ᠪᠠᠶᠢᠩᠭᠤ ᠰᠠᠭᠤᠭ᠎ᠠ ᠮᠠᠨᠵᠤ ᠶᠢᠨ ᠵᠤᠷᠭᠠᠨ ᠳᠤ ᠬᠡᠷᠡᠭ ᠮᠡᠳᠡᠭᠦᠯᠦᠭᠰᠡᠨ ᠳᠤ ᠵᠤᠷᠭᠠᠨ ᠪ᠊ ᠨᠣᠶᠠᠨ ᠶᠡᠬᠡᠳᠡ ᠭᠢᠯᠢᠩᠨᠡᠨ ᠬᠦᠷᠢᠶᠡᠨ ᠤ ᠮᠣᠩᠭᠤᠯ ᠵᠠᠰᠠᠭ ᠲᠤ ᠵᠢᠩ ᠲᠥᠯᠥᠭᠦᠯᠬᠦ ᠶᠢ ᠴᠢᠩᠭ᠎ᠠ ᠱᠠᠭᠠᠷᠳᠠᠵᠠᠢ᠃ ᠭᠡᠪᠡᠴᠦ ᠮᠣᠩᠭᠤᠯ ᠤᠨ ᠰᠠᠶᠢᠳ ᠨᠠᠷ ᠳᠡᠭᠡᠷᠡᠮᠴᠢᠳ ᠢ ᠪᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠴᠠᠭ ᠤᠳᠠᠬᠤ ᠳᠤ ᠮᠠᠨᠵᠤ ᠶᠢᠨ ᠨᠣᠶᠠᠨ ᠪᠡᠭᠡᠵᠢᠩ ᠳᠤ ᠮᠡᠳᠡᠭᠦᠯᠦᠭᠰᠡᠨ ᠳᠤ ᠮᠠᠨᠵᠤ ᠶᠢᠨ ᠲᠦᠷᠦ ᠠᠴᠠ ᠳᠡᠭᠡᠷᠡᠮᠴᠢᠳ ᠢ ᠵᠠᠪᠠᠯ ᠴᠠᠭᠠᠵᠠᠯᠠᠬᠤ ᠶᠢ ᠮᠣᠩᠭᠤᠯ ᠤᠨ ᠲᠠᠯ᠎ᠠ ᠳᠤ ᠬᠠᠲᠠᠭᠤ ᠲᠤᠯᠭᠠᠵᠤ ᠡᠰᠡ ᠰᠢᠢᠳᠪᠦᠷᠢᠯᠡᠪᠡᠰᠦ ᠮᠣᠩᠭᠤᠯ ᠨᠣᠶᠠᠳ ᠤᠨ ᠵᠡᠷᠭᠡ ᠵᠢᠩᠰᠡ ᠶᠢ ᠨᠢ ᠮᠤᠯᠲᠤᠯᠵᠤ ᠶᠠᠯᠠᠯᠠᠬᠤ ᠵᠠᠷᠯᠢᠭ ᠪᠠᠭᠤᠯᠭᠠᠵᠠᠢ᠃ ᠬᠡᠷᠡᠭ ᠡᠶᠢᠮᠦ ᠬᠡᠴᠡᠭᠦᠦ ᠪᠣᠯᠤᠭᠰᠠᠨ ᠤᠴᠢᠷ ᠠᠴᠠ ᠮᠣᠩᠭᠤᠯ ᠤᠨ ᠰᠠᠶᠢᠳ ᠨᠣᠶᠠᠳ ᠠᠷᠭ᠎ᠠ ᠪᠤᠰᠤ ᠬᠢᠯᠢᠰ ᠬᠡᠷᠡᠭ ᠵᠣᠬᠢᠶᠠᠵᠤ ᠠᠮᠢ ᠪᠠᠨ ᠠᠪᠤᠷᠠᠬᠤ ᠶᠢ ᠪᠤᠳᠤᠵᠦ ᠵᠢᠩ ᠤᠨ ᠵᠠᠮ ᠳᠠᠭᠠᠵᠤ ᠵᠢᠩᠴᠢᠳ ᠲᠤ ᠲᠦᠯᠡᠭᠡ ᠤᠰᠤ ᠣᠶᠢᠷᠠᠲᠤᠭᠤᠯᠵᠤ ᠠᠮᠢ ᠪᠠᠨ ᠠᠷᠭᠠᠴᠠᠭᠠᠵᠤ ᠠᠮᠢᠳᠤᠷᠠᠳᠠᠭ ᠡᠵᠢ ᠬᠦᠦ ᠬᠤᠶᠠᠷ ᠲᠤ ᠬᠡᠷᠡᠭ ᠨᠥᠮᠥᠷᠭᠡᠵᠦ ᠬᠦᠦ ᠶᠢ ᠨᠢ ᠪᠠᠷᠢᠪᠴᠢᠯᠠᠵᠠᠢ᠃ ᠲᠤᠬᠠᠢ ᠶᠢᠨ ᠴᠠᠭ ᠲᠤ ᠮᠣᠩᠭᠤᠯ ᠳᠤ ᠬᠠᠮᠤᠭ ᠤᠨ ᠴᠢᠩᠭ᠎ᠠ ᠬᠠᠤᠯᠢ ᠰᠢᠢᠳᠬᠡᠯ ᠨᠢ ︽ᠶᠢᠰᠦᠨ ᠡᠷᠡᠭᠦᠦ  ︾ ᠪᠠᠶᠢᠭᠰᠠᠨ ᠠᠴᠠ ᠪᠢᠰᠢ  ᠰᠢᠭᠤᠳ ᠬᠥᠨᠥᠭᠡᠵᠦ ᠴᠠᠭᠠᠵᠠᠯᠠᠬᠤ ᠬᠠᠤᠯᠢ ᠦᠭᠡᠢ ᠪᠠᠶᠢᠵᠠᠢ᠃ ᠮᠣᠩᠭᠤᠯ ᠰᠠᠶᠢᠳ ᠨᠣᠶᠠᠳ ᠶᠠᠳᠠᠭᠤ ᠬᠦᠦ ᠶᠢ ᠬᠢᠯᠢᠰ ᠢᠶᠠᠷ ᠴᠠᠭᠠᠵᠠᠯᠠᠵᠤ ᠲᠡᠭᠷᠢ ᠲᠤᠯᠤᠮ᠎ᠠ ᠨᠢᠭᠦᠯ ᠬᠢᠬᠦ ᠭᠡᠵᠦ ᠪᠠᠶᠢᠭ᠎ᠠ ᠪᠠᠨ ᠲᠡᠭᠷᠢ ᠳᠤ ᠪᠦᠦ ᠦᠵᠡᠭᠳᠡᠶ᠎ᠡ ᠬᠡᠮᠡᠨ ᠬᠦᠦ ᠶᠢᠨ ᠲᠣᠯᠣᠭᠠᠢ ᠶᠢ ᠲᠦᠷᠪᠡᠨ ᠤᠯᠠᠷᠢᠯ ᠤᠨ ᠲᠤᠷᠰᠢ ᠡᠳᠦᠷ ᠪᠦᠷᠢ ᠨᠠᠷᠠᠨ ᠮᠠᠨᠳᠤᠭᠰᠠᠨ ᠠᠴᠠ ᠨᠠᠷᠠᠨ ᠵᠢᠷᠭᠠᠲᠠᠯ᠎ᠠ ᠨᠠᠷᠠᠨ ᠤ ᠭᠡᠷᠡᠯ ᠦᠯᠦ ᠲᠤᠰᠬᠤ ᠭᠠᠵᠠᠷ ᠲᠤ ᠴᠠᠭᠠᠵᠠᠯᠠᠬᠤ ᠪᠠᠷ ᠵᠥᠪᠯᠡᠵᠡᠢ᠃ ᠨᠣᠶᠠᠳ ᠤᠨ ᠵᠠᠷᠯᠢᠭ ᠢᠶᠠᠷ ᠲᠤᠯᠤᠭᠠᠨ ᠮᠣᠷᠢᠲᠠᠨ ᠳᠦᠷᠪᠡᠨ ᠠᠭᠤᠯᠠ ᠪᠠᠷ ᠤᠯᠠᠨ ᠡᠳᠦᠷ ᠬᠠᠶᠢᠭᠰᠠᠭᠠᠷ ᠪᠠᠶᠢᠵᠤ ᠬᠦᠷᠢᠶᠡᠨ ᠠᠴᠠ ᠬᠤᠶᠢᠲᠤ ᠵᠦᠭ ᠤᠨ ᠠᠭᠤᠯᠠᠨ ᠳᠤ ᠵᠡᠭᠦᠨ ᠬᠤᠶᠢᠰᠢ ᠬᠠᠨᠳᠤᠭᠰᠠᠨ ᠰᠢᠷ᠎ᠠ ᠬᠠᠳᠠ ᠲᠠᠢ ᠠᠮᠠᠰᠠᠷ ᠵᠢᠯᠠᠭ᠎ᠠ ᠶᠢ ᠪᠤᠯᠬᠤ ᠶᠤᠮ ᠪᠠᠶᠢᠨ᠎ᠠ ᠬᠡᠮᠡᠨ ᠲᠣᠳᠣᠯᠠᠵᠠᠢ᠃ ᠴᠠᠭᠠᠵᠠᠯᠠᠬᠤ ᠡᠳᠦᠷ ᠮᠠᠨᠵᠤ ᠨᠣᠶᠠᠨ ᠵᠢᠯᠠᠭᠠᠨ ᠵᠠᠬ᠎ᠠ ᠳᠤ ᠴᠠᠴᠠᠷ ᠮᠠᠶᠢᠬᠠᠨ ᠪᠠᠷᠢᠵᠤ᠂ ᠲᠤᠭ ᠳᠠᠯᠪᠠᠭ᠎ᠠ ᠬᠡᠶᠢᠰᠬᠡᠨ᠂ ᠬᠡᠩᠭᠡᠷᠭᠡ ᠴᠠᠩ ᠳᠡᠯᠡᠳᠴᠦ ᠲᠦᠮᠡᠨ ᠢ ᠴᠤᠭᠯᠠᠭᠤᠯᠤᠨ ︽ᠲᠦᠷᠦ ᠶᠢᠨ ᠴᠠᠭᠠᠵᠠ︾  ᠪᠠᠨ ᠭᠦᠢᠴᠡᠳᠬᠡᠬᠦ ᠭᠡᠵᠦ ᠪᠠᠶᠢᠲᠠᠯ᠎ᠠ ᠬᠦᠦ ᠶᠢᠨ ᠡᠵᠢ ᠨᠢ ᠰᠦ ᠲᠠᠢ ᠮᠣᠳᠣᠨ ᠲᠠᠭᠱᠠ  ᠪᠠᠷᠢᠵᠤ ᠲᠠᠶᠠᠭ ᠢᠶᠠᠨ ᠲᠤᠯᠤᠭᠰᠠᠭᠠᠷ ᠰᠠᠯᠭᠠᠨᠠᠨ ᠢᠷᠡᠵᠦ ᠴᠠᠭᠠᠵᠠ ᠶᠢᠨ ᠲᠠᠯᠠᠪᠠᠢ ᠳᠤ ᠰᠥᠭᠦᠳᠴᠦ ᠤᠯᠠᠨ ᠨᠣᠶᠠᠳ ᠠᠴᠠ ᠬᠦᠦ ᠪᠠᠨ ᠲᠡᠭᠷᠢ ᠳᠤ ᠭᠠᠷᠬᠤ ᠠᠴᠠ ᠨᠢ ᠡᠮᠦᠨ᠎ᠡ ᠥᠪᠡᠷ ᠤᠨ ᠭᠠᠷ ᠢᠶᠠᠷ ᠢᠶᠠᠨ ᠰᠦ ᠠᠮᠰᠠᠭᠤᠯᠴᠢᠬᠠᠶ᠎ᠠ ᠬᠡᠮᠡᠨ ᠭᠤᠶᠣᠵᠠᠢ᠃ ᠡᠭᠦᠨ ᠢ ᠨᠢ ᠨᠣᠶᠠᠳ ᠵᠥᠪᠰᠢᠶᠡᠷᠡᠵᠡᠢ᠃ ᠡᠵᠢ ᠨᠢ ᠰᠦ ᠪᠠᠨ ᠪᠠᠷᠢᠨ ᠰᠠᠯᠭᠠᠨᠠᠨ ᠪᠠᠶᠢᠬᠤ ᠳᠤ ᠬᠦᠦ ᠨᠢ ᠡᠵᠢ ᠳᠡᠭᠡᠨ ᠡᠨᠡ ᠬᠦ ︽ᠰᠢᠷ᠎ᠠ ᠬᠠᠳᠠ︾ ᠳᠠᠭᠤᠤ ᠶᠢ ᠳᠠᠭᠤᠯᠠᠵᠤ ᠪᠠᠶᠢᠵᠠᠢ᠃ ᠡᠨᠡ ᠬᠦ ᠰᠡᠳᠬᠢᠯ ᠡᠪᠭᠡᠷᠡᠮ᠎ᠡ ᠪᠠᠶᠢᠳᠠᠯ ᠢ ᠬᠠᠷᠠᠭᠰᠠᠨ ᠮᠠᠨᠵᠤ ᠨᠣᠶᠠᠨ ᠴᠠᠭᠠᠵᠠ ᠶᠠᠪᠤᠭᠤᠯᠬᠤ ᠶᠢ ᠵᠣᠭᠰᠤᠭᠠᠬᠤ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ᠂ ᠡᠵᠢ ᠬᠦᠦ ᠬᠤᠶᠠᠷ ᠢ ᠬᠢᠯᠢᠰ ᠬᠡᠮᠡᠨ ᠨᠤᠲᠤᠭ ᠲᠤᠨᠢ ᠪᠤᠴᠠᠭᠠᠭᠰᠠᠨ ᠠᠵᠢ ︵ᠡᠨᠡ ᠦᠯᠢᠭᠡᠷ ᠢ ᠪᠢ ᠠᠷᠪᠠᠭᠠᠳ ᠵᠢᠯ ᠤᠨ ᠡᠮᠦᠨ᠎ᠡ ᠨᠢᠭᠡᠨ ᠨᠣᠮ ᠠᠴᠠ ᠤᠩᠰᠢᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠬᠤ ᠶᠤᠮ᠂ ᠶᠠᠭ ᠬᠡᠵᠢᠶ᠎ᠡ ᠬᠠᠮᠢᠭ᠎ᠠ ᠨᠢ ᠤᠩᠰᠢᠭᠰᠠᠨ ᠰᠣᠨᠣᠰᠤᠭᠰᠠᠨ ᠢᠶᠠᠨ ᠮᠠᠷᠲᠠᠴᠢᠬᠠᠵᠠᠢ︶᠃          ᠢᠩᠭᠢᠭᠡᠳ ᠲᠡᠦᠬᠡᠲᠦ ᠳᠠᠭᠤᠤ ᠶᠢᠨ  ᠲᠡᠦᠬᠡ ᠶᠢ ᠰᠣᠨᠣᠰᠴᠤ ᠤᠶᠠᠷᠠᠵᠤ ᠰᠠᠭᠤᠭᠰᠠᠨ ᠤᠯᠠᠨ ᠢ ᠨᠦᠭᠦᠭᠡ ᠦᠬᠡᠷ ᠲᠡᠮᠦᠷ ᠰᠣᠴᠢᠭᠠᠵᠤ ︽ᠡᠨᠡ ᠦᠵᠦᠮ ᠤᠨ ᠤᠯᠠᠭᠠᠨ ᠲᠠᠷᠠᠰᠤ ᠶᠢ ᠪᠢ ᠥᠨᠥᠳᠥᠷ ᠴᠡᠭᠡ ᠪᠣᠭᠤᠮᠲᠠ ᠠᠴᠠ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠶᠤᠮ᠃ ᠤᠤᠯ ᠨᠢ ᠰᠥᠨᠢᠳ ᠲᠡᠭᠡᠨ  ᠡᠭᠦᠷᠦᠭᠡᠳ ᠬᠠᠷᠢᠶ᠎ᠠ ᠭᠡᠰᠡᠨ ᠶᠤᠮ᠃ ᠤᠬᠠᠭᠠᠨᠲᠤ ᠠᠷᠠᠳ ᠤᠨ ᠳᠠᠭᠤᠤ ᠶᠢᠨ ᠢᠶᠠᠨ  ᠠᠮᠢᠨ ᠲᠡᠦᠬᠡ ᠳᠤ ᠤᠶᠠᠷᠠᠭᠠᠳ ᠪᠠᠶᠢᠬᠤ ᠪᠠᠷ ᠤᠳᠤ ᠵᠠᠳᠠᠯᠴᠢᠬᠠᠶ᠎ᠠ᠃ ᠡᠨᠡ ᠭᠠᠯ ᠠᠶᠠᠨ ᠤ ᠪᠦᠰᠡᠭᠦᠶᠢᠴᠦᠳ ᠨᠠᠳᠠᠳᠤ ᠵᠣᠷᠢᠭᠤᠯᠵᠤ ︿ᠡᠷᠭᠢᠨ ᠡᠷᠭᠢᠨ ᠬᠤᠷᠭᠤᠳᠠᠭᠠᠳ ᠪᠠᠶᠢᠳᠠᠭ ᠨᠢ ᠰ᠊ ·  ᠲᠡᠮᠦᠷ ᠤᠨ ᠰᠠᠨᠠᠭ᠎ᠠ ᠤᠤ ᠳ᠋ᠠ᠂ ᠪᠤᠴᠠᠨ ᠪᠤᠴᠠᠨ ᠡᠷᠭᠢᠭᠡᠳ ᠪᠠᠶᠢᠳᠠᠭ ᠨᠢ ᠪᠤᠬ᠎ᠠ ᠲᠡᠮᠦᠷ ᠤᠨ ᠰᠡᠳᠬᠢᠯ ᠶᠤᠮ ᠤᠤ ᠳ᠋ᠠ﹀ ᠭᠡᠰᠡᠨ ᠣᠨᠢᠭ᠎ᠠ ᠵᠣᠬᠢᠶᠠᠭᠰᠠᠨ ᠪᠠᠶᠢᠨ᠎ᠠ ᠯᠠᠢ᠃ ᠦᠵᠦᠮ ᠤᠨ ᠤᠯᠠᠭᠠᠨ ᠤᠷᠤᠭᠤᠯ ᠲᠠᠢ ᠦᠵᠡᠰᠭᠦᠯᠡᠩ ᠪᠦᠰᠡᠭᠦᠶᠢᠴᠦᠳ ᠲᠤ ᠦᠨᠡᠬᠡᠷ ᠲᠠᠯᠠᠷᠬᠠᠵᠤ ᠪᠠᠶᠢᠨ᠎ᠠ︾ ᠭᠡᠳ ᠯᠣᠩᠬᠤᠨ ᠤ ᠪᠠᠨ ᠪᠥᠭᠯᠡᠭᠡ ᠶᠢ ᠦᠰᠦᠷᠭᠡᠯ᠎ᠡ᠃ ᠲᠠᠪᠤᠨ ᠵᠠᠭᠤᠨ ᠦᠬᠡᠷ ᠲᠠᠢ ᠬᠥᠮᠥᠨ ᠲᠠᠪᠢᠨ ᠯᠣᠩᠬᠤ ᠶᠢ ᠵᠠᠳᠠᠯᠤᠭᠰᠠᠨ ᠴᠤ ᠶᠠᠭᠠᠬᠢᠳᠠᠭ ᠶᠤᠮ᠃          ᠤᠯᠤᠰ ᠤᠳ ᠤᠯᠠᠭᠠᠨ ᠲᠠᠷᠠᠰᠤᠨ ᠤ ᠱᠠᠯᠠᠭᠠᠨ ᠠᠴᠠ ᠠᠷᠠᠢ ᠰᠠᠯᠵᠤ ᠠᠮᠵᠢᠭ᠎ᠠ ᠦᠭᠡᠢ ᠪᠠᠶᠢᠲᠠᠯ᠎ᠠ ᠵᠡᠭᠦᠨ ᠬᠤᠶᠢᠭᠤᠷ ᠵᠣᠮᠪᠣᠶᠢᠵᠤ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠭᠤ ·  ᠪᠤᠶᠠᠨᠲᠣᠭᠲᠠᠬᠤ ᠭᠤᠸᠠᠢ ᠭᠡᠨᠡᠳᠲᠡ ᠳᠠᠭᠤᠤ ᠠᠶᠠᠯᠤᠨ ᠪᠠᠶᠢᠭᠰᠠᠨ ᠢᠶᠠᠨ᠂ ︽︿ᠭᠦᠨᠳᠦᠦᠷ﹀ ᠭᠡᠬᠦ ᠠᠷᠠᠳ ᠤᠨ ᠳᠠᠭᠤᠤ ᠪᠣᠯ ᠦᠨᠡᠨ ᠬᠥᠮᠥᠨ ᠤ ᠦᠨᠡᠨ ᠦᠢᠯᠡ ᠶᠠᠪᠤᠳᠠᠯ ᠠᠴᠠ ᠡᠭᠦᠰᠦᠯᠲᠡᠢ᠃ ᠭᠦᠨᠳᠦᠦᠷ ᠤᠨ ᠵᠢᠩᠬᠢᠨᠢ ᠨᠡᠷ᠎ᠡ ᠨᠢ ᠳᠠᠮᠷᠢᠨᠵᠠᠪ ᠭᠡᠳᠡᠭ᠃ ᠤᠤᠯ ᠤᠨ ᠴᠠᠬᠠᠷ ᠱᠠᠩᠳᠤ ᠠᠳᠤᠭᠤᠴᠢᠨ ᠬᠤᠰᠢᠭᠤᠨ ᠤ ᠬᠥᠮᠥᠨ᠂ ᠲᠡᠷᠡ ᠪᠠᠷ ᠱᠠᠩᠳᠤ ᠠᠳᠤᠭᠤᠴᠢᠨ ᠬᠤᠰᠢᠭᠤᠨ ᠤ ᠰᠢᠲᠦᠭᠡᠨᠲᠦ ᠰᠦᠮ᠎ᠡ ᠶᠢᠨ ᠨᠢᠭᠡ ᠪᠤᠯᠬᠤ ᠭᠦᠦᠰᠢ ᠶᠢᠨ ᠰᠦᠮ᠎ᠡ ᠶᠢᠨ ᠪᠠᠨᠳᠢ ᠪᠠᠶᠢᠵᠤ᠂ ᠬᠠᠷᠠᠬᠠᠨ ᠪᠠᠭ᠎ᠠ ᠠᠴᠠ ᠪᠠᠨ ᠬᠦᠴᠦ ᠴᠢᠳᠠᠯ ᠶᠡᠭᠡ᠂ ᠪᠢᠷ᠎ᠠ ᠲᠡᠩᠬᠡᠭᠡ ᠲᠠᠢ ᠪᠣᠯᠬᠤᠷ ᠦᠷᠭᠦᠯᠵᠢ ᠰᠦᠮ᠎ᠡ ᠶᠢᠨ ᠪᠣᠷᠣ ᠠᠵᠢᠯ ᠳᠤ ᠵᠠᠷᠤᠭᠳᠠᠨ᠂ ᠰᠢᠯᠢ ᠶᠢᠨ ᠭᠤᠣᠯ ᠤᠨ ᠴᠢᠭᠤᠯᠭᠠᠨ ᠤ ᠵᠡᠭᠦᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ ᠡᠵᠢ ᠨᠠᠭᠤᠷ ᠠᠴᠠ ᠳᠠᠪᠤᠰᠤ ᠲᠡᠭᠡᠭᠡᠬᠦ ᠳᠠᠪᠤᠰᠤᠨ ᠠᠶᠠᠨ ᠳᠤ ᠵᠢᠯ ᠪᠣᠯᠭᠠᠨ ᠬᠡᠳᠦᠨ ᠰᠠᠷ᠎ᠠ ᠪᠠᠷ ᠶᠠᠪᠤᠳᠠᠭ ᠭᠡᠨ᠎ᠡ᠃ ᠢᠩᠭᠢᠭᠡᠳ ᠠᠯᠤᠰ ᠬᠤᠯᠠ ᠶᠢᠨ ᠨᠢᠭᠡ ᠥᠬᠢᠨ ᠲᠠᠢ ᠬᠠᠶᠢᠷ᠎ᠠ ᠳᠤᠷᠠᠯᠠᠯ ᠲᠠᠢ ᠪᠣᠯᠤᠭᠰᠠᠨ ᠪᠤᠯᠪᠠᠴᠤ ᠨᠢᠭᠡ ᠳᠤ᠂ ᠲᠡᠷᠡ ᠪᠣᠯ ᠰᠦᠮ᠎ᠡ ᠳᠤ ᠯᠠᠮᠠ ᠶᠢᠨ ᠲᠠᠩᠰᠠ ᠲᠠᠢ᠂ ᠬᠤᠶᠠᠷ ᠲᠤ᠂ ᠬᠠᠶᠢᠷᠠᠯᠠᠭᠰᠠᠨ ᠥᠬᠢᠨ ᠨᠢ ᠲᠡᠭᠦᠨ ᠤ ᠨᠤᠲᠤᠭ ᠠᠴᠠ ᠳᠠᠩᠴᠤ ᠬᠤᠯᠠ ᠭᠠᠵᠠᠷ ᠲᠤ ᠪᠠᠶᠢᠭ᠎ᠠ᠂ ᠭᠤᠷᠪᠠ ᠳᠤ᠂ ᠲᠦᠷᠦ ᠭᠦᠷᠦᠨ ᠤ ᠰᠣᠯᠢᠭᠳᠠᠯ ᠵᠡᠷᠭᠡ ᠠᠴᠠ ᠬᠡᠳᠦᠨ ᠮᠢᠩᠭᠠᠨ ᠭᠠᠵᠠᠷ ᠤᠨ ᠠᠯᠤᠰ ᠲᠠᠬᠢ ᠡᠵᠢ ᠨᠠᠭᠤᠷ ᠤᠨ ᠳᠠᠪᠤᠰᠤᠨ ᠠᠶᠠᠨ ᠤ ᠠᠵᠢᠯ ᠬᠥᠯ ᠬᠤᠷᠢᠶᠠᠭᠳᠠᠭᠰᠠᠨ ᠭᠡᠨ᠎ᠡ᠃ ᠵᠠ ᠢᠩᠭᠢᠭᠡᠳ ᠭᠦᠨᠳᠦᠦᠷ ᠬᠡᠮᠡᠭᠴᠢ ᠬᠤᠴᠢ ᠲᠠᠢ ᠳᠠᠮᠷᠢᠨᠵᠠᠪ  ᠰᠡᠳᠬᠢᠯ ᠭᠠᠩᠰᠠᠷᠠᠬᠤ ᠳᠠᠭᠠᠨ ᠡᠨᠡ ᠳᠠᠭᠤᠤ ᠶᠢ ᠵᠣᠬᠢᠶᠠᠨ ᠳᠠᠭᠤᠯᠠᠭᠰᠠᠨ ᠭᠡᠳᠡᠭ ᠠᠮᠠᠨ ᠤᠯᠠᠮᠵᠢᠯᠠᠯ ᠪᠠᠶᠢᠳᠠᠭ︾ ᠬᠡᠮᠡᠨ ︽ᠭᠦᠨᠳᠦᠦᠷ︾ ᠭᠡᠬᠦ ᠮᠣᠩᠭᠤᠯ ᠨᠤᠲᠤᠭ ᠲᠤ ᠤᠯᠠᠨ ᠬᠤᠪᠢᠯᠪᠤᠷᠢ ᠪᠠᠷ ᠳᠠᠭᠤᠯᠠᠭᠳᠠᠳᠠᠭ ᠠᠷᠠᠳ ᠤᠨ ᠳᠠᠭᠤᠤ ᠶᠢᠨ ᠢᠶᠠᠨ ᠲᠡᠦᠬᠡ ᠶᠢ ᠠᠮᠲᠠᠷᠬᠠᠨ ᠶᠠᠷᠢᠵᠤ ᠤᠯᠠᠨ ᠤ ᠰᠡᠳᠬᠢᠯ ᠢ ᠪᠠᠶᠠᠰᠬᠠᠭᠠᠳ᠂ ᠳᠤᠨᠳᠠᠷᠠᠰᠢ ᠦᠭᠡᠢ ᠳᠠᠭᠤᠯᠠᠭᠳᠠᠵᠤ ᠯᠡ ᠪᠠᠶᠢᠳᠠᠭ ᠠᠷᠠᠳ ᠤᠨ ᠳᠠᠭᠤᠤ ᠶᠢᠨ ᠮᠢᠨᠢ ᠡᠭᠡᠰᠢᠭ ᠪᠣᠯᠭᠠᠨ ᠳᠤ ᠭᠦᠪᠦᠷᠡᠵᠦ ᠯᠡ ᠪᠠᠶᠢᠳᠠᠭ ᠳᠤᠷᠠᠯᠠᠯ ᠬᠠᠶᠢᠷ᠎ᠠ ᠶᠢᠨ ᠦᠯᠢᠭᠡᠷ ᠡᠪᠦᠭᠡᠨ ᠵᠣᠬᠢᠶᠠᠯᠴᠢ ᠶᠢ ᠭᠡᠵᠢᠭᠡᠯᠡᠭᠰᠡᠨ ᠲᠥᠯᠥᠪ ᠲᠠᠢ᠂ ᠴᠠᠬᠠᠷ ᠤᠨ ᠰᠠᠶᠢᠬᠠᠨ ᠪᠦᠰᠡᠭᠦᠢ ᠳᠤ ᠵᠣᠷᠢᠭᠤᠯᠤᠭᠰᠠᠨ ︽ᠴᠠᠬᠠᠷ ᠤᠨ ᠰᠠᠶᠢᠬᠠᠨ ᠭᠦᠩᠵᠦ︾ ᠬᠡᠮᠡᠬᠦ ᠬᠠᠶᠢᠷ᠎ᠠ ᠶᠢᠨ ᠪᠠᠳᠠᠭ ᠢᠶᠠᠨ ᠤᠩᠰᠢᠵᠤ ᠬᠤᠷᠠᠭᠰᠠᠨ ᠤᠯᠠᠨ ᠵᠠᠯᠠᠭᠤ ᠰᠢᠯᠦᠭᠴᠢᠳ ᠤᠨ ᠢᠶᠠᠨ ᠬᠤᠷᠣᠬᠠᠢ ᠶᠢ ᠬᠥᠳᠡᠯᠭᠡᠯ᠎ᠡ᠃ ᠳᠤᠷᠠᠯᠠᠯ ᠳᠤ ᠨᠠᠰᠤ ᠵᠢᠯ ᠤᠨ ᠬᠢᠵᠠᠭᠠᠷ ᠪᠠᠶᠢᠳᠠᠭ ᠦᠭᠡᠢ ᠲᠤᠯᠠ ᠳᠠᠭᠤᠤ  ᠰᠢᠯᠦᠭ ᠲᠤ ᠮᠥᠩᠬᠡ ᠦᠯᠡᠳᠡᠳᠡᠭ ᠵᠢᠮ᠎ᠡ ᠲᠠᠢ ᠠᠵᠤᠭᠤ᠃ ᠲᠡᠷᠡ ᠰᠢᠯᠦᠭ ᠨᠢ᠄          ᠨᠠᠷᠠ ᠬᠤᠷ᠎ᠠ ᠨᠢ ᠨᠠᠯᠠᠶᠢᠨ          ᠨᠠᠪᠴᠢ ᠴᠡᠴᠡᠭ ᠨᠢ ᠮᠦᠰᠢᠶᠡᠭᠰᠡᠨ           ︽ᠴᠠᠬᠠᠷ ᠤᠨ ᠰᠠᠶᠢᠬᠠᠨ ᠭᠦᠩᠵᠦ︾  ᠶᠢᠨ ᠨᠤᠲᠤᠭ          ᠴᠠᠭᠯᠠᠰᠢ ᠦᠭᠡᠢ ᠭᠤᠶᠣᠬᠠᠨ ᠪᠠᠶᠢᠨᠠᠮ          ᠬᠡᠭᠡᠷ᠎ᠡ ᠶᠢᠨ ᠴᠡᠴᠡᠭᠡᠰ ᠢ ᠢᠴᠢᠭᠡᠮᠡᠷ          ᠬᠡᠭᠡᠨᠴᠢᠷ ᠰᠠᠶᠢᠬᠠᠨ ᠠᠪᠠᠭ᠋ᠠᠶᠢᠳᠠᠳ          ᠤᠯᠠᠷᠢᠯ ᠤᠨ ᠰᠠᠯᠬᠢᠨ ᠢ ᠠᠲᠠᠭᠠᠷᠬᠠᠭᠤᠯᠤᠮᠠᠷ          ᠤᠶᠠᠬᠠᠨ ᠽᠠᠮᠪᠦᠯᠢᠩ ᠤᠨ ᠭᠦᠭᠦᠭᠡᠴᠢᠨ          ᠢᠨᠢᠶᠡᠳᠦᠨ ᠳᠤᠨᠢ ᠨᠠᠷᠠ ᠪᠢᠰᠢᠭᠦᠷᠬᠡᠵᠦ          ᠳᠠᠭᠤᠤ ᠳᠤᠨᠢ ᠰᠠᠷᠠᠨ ᠵᠢᠷᠭᠠᠨ᠎ᠠ          ᠮᠣᠩᠭᠤᠯ ᠪᠦᠰᠡᠭᠦᠢ ᠶᠢᠨ ᠨᠠᠮᠪᠠᠭᠠᠯᠢᠭ ᠵᠢᠪᠬᠤᠭ᠎ᠠ          ᠮᠢᠩᠭᠠᠨ ᠡᠷᠡᠴᠦᠦᠯ ᠤᠨ ᠰᠡᠳᠬᠢᠯ ᠭᠡᠵᠢᠭᠡᠳᠡᠨ᠎ᠡ          ᠶᠠᠩᠵᠢᠨᡀᠠᠮᠤ ᠶᠢᠨ ᠰᠠᠬᠢᠭᠤᠰᠤ ᠴᠠᠴᠠᠨ - ᠭᠤᠸ᠎ᠠ ᠪᠠᠷ           ︽ᠪᠤᠯᠠᠭᠠᠨ ᠲᠣᠬᠤᠢ︾ ᠰᠢᠷᠭᠤᠯᠤᠨ ᠰᠢᠷᠤᠩᠬᠠᠶᠢᠯᠠᠵᠤ          ᠪᠥᠵᠢᠬᠦ ᠶᠢᠨ ᠡᠷᠳᠡᠮ᠂ ᠦᠷᠵᠢᠨ - ᠬᠠᠩᠷᠠ ᠪᠠᠷ          ᠪᠥᠵᠢᠭ ᠤᠨ ᠳᠡᠪᠵᠢᠶᠡᠨ ᠨᠢᠯᠬᠠᠷᠠᠨᠠᠮ᠁          ᠵᠠ ᠲᠡᠭᠡᠭᠡᠳ ᠨᠠᠶᠢᠷ ᠴᠤ ᠬᠠᠪᠲᠠᠭᠠᠶᠢᠷᠠᠬᠤ ᠶᠠᠩᠵᠤ ᠠᠯᠠᠭ᠎ᠠ᠃ ᠪᠦᠭᠦᠳᠠ ᠪᠤᠭᠤᠷᠤᠯ ᠵᠣᠬᠢᠶᠠᠯᠴᠢ ᠶᠢᠨ ᠳᠤᠷᠠᠯᠠᠳᠠᠭ ︽ᠪᠤᠯᠠᠭᠠᠨ ᠲᠣᠬᠤᠢ︾ ᠳᠠᠭᠤᠤ ᠶᠢ ᠳᠠᠭᠤᠯᠠᠳᠠᠭ ᠴᠠᠬᠠᠷ ᠪᠦᠰᠡᠭᠦᠢ ᠶᠢ ᠲᠥᠰᠥᠭᠡᠯᠡᠭᠡᠳ ᠰᠠᠭᠤᠵᠤ ᠪᠠᠶᠢᠬᠤ ᠴᠢᠯᠦᠭᠡᠨ ᠳᠤ  ᠮᠣᠯᠬᠢ ᠪᠢ ︽ᠠᠷᠠᠳ ᠤᠨ ᠳᠠᠭᠤᠤ ᠶᠢᠨ ᠠᠯᠭᠢᠷᠮ᠎ᠠ︾ ᠰᠢᠯᠦᠭ ᠢᠶᠠᠨ ᠬᠡᠯᠡᠵᠦ ᠭᠦᠭ ᠨᠡᠮᠡᠵᠦ᠂ ᠤᠯᠠᠨ ᠰᠠᠶᠢᠬᠠᠨ ᠷᠣᠮᠠᠨ ᠤ ᠡᠵᠡᠨ ᠱᠠ᠊  · ᠪᠦᠭᠡ ︽ᠬᠥᠳᠡᠭᠡ ᠰᠢᠯᠢ︾ ᠵᠦᠴᠦᠭᠡ ᠶᠢᠨ ᠢᠶᠠᠨ ᠭᠤᠣᠯ ᠳᠠᠭᠤᠤ ᠪᠤᠯᠬᠤ ︽ᠠᠷᠤ ᠰᠢᠯᠢ ᠶᠢᠨ ᠲᠤᠮᠤᠭ︾ ᠳᠠᠭᠤᠤ ᠪᠠᠨ ᠨᠤᠲᠤᠭ ᠤᠨ ᠳᠡᠭᠦᠦ ᠲᠣᠳᠣᠪᠢᠯᠢᠭ᠌ ᠢᠶᠠᠷ ᠢᠶᠠᠨ ᠳᠠᠭᠤᠯᠠᠭᠤᠯᠬᠤ ᠭᠡᠵᠦ ᠨᠡᠯᠢᠶᠡᠳ ᠬᠡᠳᠦᠨ ᠬᠤᠨᠳᠠᠭ᠎ᠠ ᠲᠠᠲᠠᠴᠢᠬᠠᠭᠠᠳ ᠨᠠᠳᠠ ᠠᠴᠠ ᠨᠦᠭᠦᠭᠡ ᠬᠠᠶᠢᠷ᠎ᠠ ᠶᠢᠨ ᠰᠢᠯᠦᠭ ᠢ ᠪᠠᠳᠢᠷᠯᠠᠬᠤ ᠶᠢᠨ ᠳᠠᠭᠠᠤ ︽ᠠᠯᠠᠱᠠ ᠳᠤ ᠢᠷᠡᠬᠦ ᠠᠴᠠ ᠡᠮᠦᠨ᠎ᠡ ᠬᠠᠨ ᠲᠡᠭᠷᠢ ᠠᠯᠠᠱᠠ ᠭᠡᠭᠴᠢ ᠲᠡᠭᠷᠢ ᠲᠠᠢ ᠵᠦᠢᠷᠯᠡᠭᠰᠡᠨ ᠶᠠᠭᠠᠬᠢᠭᠰᠠᠨ ᠲᠣᠮᠣ ᠨᠡᠷ᠎ᠡ ᠲᠠᠢ ᠭᠠᠵᠠᠷ ᠪᠤᠢ ᠭᠡᠵᠦ ᠪᠠᠰᠤᠵᠤ ᠪᠠᠶᠢᠭᠰᠠᠨ ᠪᠣᠯ ᠠᠯᠠᠱᠠ ᠨᠤᠲᠤᠭ ᠤᠨ ᠠᠭᠤᠯᠠ ᠤᠰᠤ᠂ ᠭᠤᠪᠢ ᠴᠦᠯ᠂ ᠬᠥᠮᠥᠨ ᠠᠷᠠᠳ ᠲᠠᠢ ᠨᠢ ᠠᠭᠤᠯᠵᠠᠭᠠᠳ ᠡᠨᠡ ᠨᠤᠲᠤᠭ ᠲᠤ ᠬᠠᠨ ᠲᠡᠭᠷᠢ ᠠᠯᠠᠱᠠ ᠭᠡᠰᠡᠨ ᠨᠡᠷ᠎ᠡ ᠪᠠᠭᠠᠳᠠᠬᠤ ᠪᠠᠶᠢᠵᠠᠢ︾ ᠬᠡᠮᠡᠨ ᠨᠤᠲᠤᠭ ᠤᠨ ᠰᠠᠶᠢᠬᠠᠨ ᠢ ᠰᠡᠳᠬᠢᠯ ᠳᠣᠭᠳᠣᠯᠤᠨ ᠮᠠᠭᠲᠠᠬᠤ ᠳᠤ ᠨᠤᠲᠤᠭ ᠤᠨ ᠮᠠᠨᠢ ᠵᠣᠬᠢᠶᠠᠯᠴᠢᠳ ᠴᠠᠭᠠᠨ᠎ᠠ ᠪᠠᠨ ᠯᠡ ᠨᠢᠭᠡ ᠬᠠᠨᠠᠭᠠᠷ ᠰᠠᠭᠤᠵᠤ ᠪᠠᠶᠢᠯ᠎ᠠ᠃ ᠨᠤᠲᠤᠭ ᠢᠶᠠᠷ ᠢᠶᠠᠨ ᠪᠠᠭ᠋ᠠᠷᠬᠠᠬᠤ ᠰᠢᠭ᠋ ᠪᠠᠷᠳᠠᠮ ᠵᠦᠢᠯ ᠥᠭᠡᠷ᠎ᠡ ᠬᠠᠮᠢᠭ᠎ᠠ ᠪᠠᠶᠢᠨ᠎ᠠ ᠪᠤᠢ⁈ ᠦᠨᠡᠬᠡᠷ ᠮᠠᠨ ᠤ ᠭᠠᠯ ᠠᠶᠠᠨ ᠤ ᠬᠢᠨ ᠲᠡᠷᠡ ᠦᠳᠡᠰᠢ ᠮᠣᠩᠭᠤᠯ ᠲᠦᠮᠡᠨ  ᠪ᠊ ᠳᠠᠭᠤᠤ ᠳᠤ ᠪᠠᠶᠢᠳᠠᠭ ᠬᠦᠴᠦ᠂ ᠳᠠᠭᠤᠤ ᠶᠢᠨ ᠰᠢᠯᠦᠭ ᠲᠤ ᠨᠢᠭᠤᠭᠳᠠᠭᠰᠠᠨ ᠰᠢᠳᠢ ᠶᠢ ᠡᠷᠬᠡ ᠦᠭᠡᠢ ᠮᠡᠳᠡᠷᠡᠨ᠂ ᠮᠣᠩᠭᠤᠯ ᠤᠯᠤᠰ ᠤᠨ ᠠᠷᠠᠳ ᠤᠨ ᠤᠷᠠᠨ ᠵᠣᠬᠢᠶᠠᠯᠴᠢ ᠪᠠᠪᠤᠤ ᠶᠢᠨ ᠯᠾᠠᠭᠪᠠᠰᠦ᠋ᠷᠦᠩ ᠤᠨ ︽ᠠᠷᠠᠳ ᠤᠨ ᠳᠠᠭᠤᠤ ᠶᠢᠨ ᠰᠢᠯᠦᠭ ᠰᠢᠭ ᠭᠠᠭᠴᠠ ᠰᠢᠯᠦᠭ ᠪᠢᠴᠢᠴᠢᠬᠡᠬᠦ ᠶᠤᠮᠰᠠᠨ︾ ᠭᠡᠰᠡᠨ ᠦᠭᠡᠨ ᠤ ᠤᠬᠠᠭᠠᠨ ᠢ ᠣᠶᠢᠯᠠᠭᠠᠨ ᠳᠤᠷᠠᠯᠠᠯ ᠤᠨ ᠤᠯᠠᠭᠠᠨ ᠲᠠᠷᠠᠰᠤ᠂ ᠳᠠᠭᠤᠤ ᠶᠢᠨ ᠴᠡᠩᠬᠡᠷ ᠠᠶᠠᠯᠭᠤ᠂ ᠲᠤᠷᠤᠨ᠎ᠠ ᠶᠢᠨ ᠰᠢᠯᠦᠭᠴᠢᠳ ᠤᠨ ᠲᠣᠷᠭᠠᠨ ᠪᠠᠳᠠᠭ ᠤᠳ ᠢᠶᠠᠷ ᠲᠤᠤᠷᠠᠶᠢᠳᠤ ᠨᠤᠲᠤᠭ ᠤᠨ ᠦᠳᠡᠰᠢ ᠶᠢᠨ ᠲᠡᠭᠷᠢ ᠶᠢ ᠴᠢᠮᠡᠵᠦ ᠣᠷᠣᠢ ᠪᠤᠯᠳᠠᠯ᠎ᠠ ᠨᠠᠷᠭᠢᠵᠠᠭᠠᠭᠰᠠᠨ ᠪᠢᠯᠡ᠃ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠤᠨ ᠠᠭᠤᠯᠵᠠᠯᠲᠠ ᠭᠡᠵᠦ ᠡᠶᠢᠮᠦᠷᠬᠦᠦ ᠯᠡ ᠪᠠᠶᠢᠳᠠᠭ ᠶᠤᠮᠰᠠᠨ᠃          ᠮᠣᠯᠬᠢ ᠪᠢᠴᠢᠭᠡᠴᠢ ᠪᠢ ᠴᠤ ᠠᠭᠤᠯᠠᠨ ᠳᠤ ᠥᠰᠦᠭᠰᠡᠨ ᠬᠡᠦᠬᠡᠳ ᠪᠣᠯᠬᠤᠷ ᠠᠯᠢ ᠡᠷᠲᠡ ᠠᠴᠠ ᠬᠤᠯᠠ ᠶᠢᠨ ᠬᠥᠮᠥᠨ ᠤ ᠮᠥᠷᠥᠭᠡᠳᠦᠯ ᠢ ᠠᠷᠭᠠᠮᠵᠢᠭᠰᠠᠨ᠂ ᠣᠶᠢᠷ᠎ᠠ ᠶᠢᠨ ᠬᠥᠮᠥᠨ ᠤ ᠬᠦᠰᠡᠯ ᠢ ᠪᠡᠶᠡᠯᠡᠭᠦᠯᠦᠭᠰᠡᠨ ᠠᠯᠠᠭ ᠠᠭᠤᠯᠠ ᠠᠯᠳᠠᠨ ᠲᠡᠪᠰᠢ ᠳᠤ ᠨᠢᠭᠡ ᠣᠴᠢᠬᠤ ᠶᠤᠮᠰᠠᠨ ᠭᠡᠰᠡᠨ ᠪᠤᠳᠤᠯ ᠢᠶᠠᠨ ᠲᠡᠭᠡᠭᠡᠭᠰᠡᠭᠡᠷ ᠡᠨᠡ ᠤᠳᠠᠭ᠎ᠠ ᠰᠢᠯᠢ ᠶᠢᠨ ᠭᠤᠣᠯ ᠤᠨ ᠵᠣᠬᠢᠶᠠᠯᠴᠢᠳ ᠡᠨᠡᠭᠦᠷ ᠢᠷᠡᠨ᠎ᠡ ᠭᠡᠰᠡᠨ ᠴᠢᠮᠡᠭᠡ ᠪᠠᠷ ᠤᠷᠢᠳᠴᠢᠯᠠᠨ ᠭᠠᠷᠠᠭ ᠤᠨ ᠡᠮᠦᠨ᠎ᠡ ᠠᠯᠳᠠᠨ ᠲᠡᠪᠰᠢ ᠶᠢᠨ ᠰᠦᠮ᠎ᠡ ᠳᠤ ᠬᠦᠷᠴᠦ ᠨᠣᠮ ᠤᠨ ᠲᠠᠭᠤ ᠰᠣᠨᠣᠰᠴᠤ᠂ ᠠᠭᠯᠠᠭ ᠲᠠᠶᠢᠪᠤᠩ ᠣᠷᠴᠢᠨ ᠳᠤ ᠪᠡᠶ᠎ᠡ ᠰᠡᠳᠬᠢᠯ ᠢᠶᠠᠨ ᠠᠮᠠᠷᠠᠭᠠᠨ᠂ ᠰᠢᠯᠦᠭ ᠤᠨ ᠣᠩᠭᠤᠳ ᠢᠶᠠᠨ ᠳᠠᠭᠤᠳᠠᠵᠤ ᠰᠠᠭᠤᠭᠰᠠᠨ ᠰᠠᠨ᠃ ᠲᠡᠭᠡᠭᠡᠳ ᠲᠡᠨᠳᠡ ᠴᠡᠴᠡᠭ ᠤᠨ ᠰᠢᠭᠦᠳᠡᠷᠢ ᠲᠠᠢ ᠨᠠᠮᠤᠷ ᠤᠨ ᠥᠷᠯᠥᠭᠡ ᠴᠢᠬᠢ ᠨᠢ ᠲᠠᠭᠠᠷᠠᠬᠰᠠᠨ ᠲᠠᠤᠯᠠᠢ ᠶᠢᠨ ᠪᠥᠵᠥᠩ ᠲᠠᠢ ᠲᠠᠭᠠᠷᠠᠯᠳᠤᠵᠤ᠂ ᠠᠳᠤᠭᠤ ᠲᠤᠷᠭᠢᠵᠤ ᠬᠤᠨᠣᠭᠰᠠᠨ ᠦᠳᠡᠰᠢ ᠶᠢᠨ ᠰᠠᠷᠠᠨ ᠠᠷᠭᠠᠮᠵᠢᠶ᠎ᠠ ᠲᠠᠢ ᠶᠤᠮ ᠰᠢᠭ᠋ ᠤᠶᠠᠭ᠎ᠠ ᠲᠣᠭᠤᠷᠢᠬᠤ ᠪᠠᠷ ᠨᠢ ᠥᠷᠯᠥᠭᠡ ᠬᠠᠷᠠᠬᠤ ᠳᠤ ᠮᠣᠷᠢᠨ ᠤᠶᠠᠭ᠎ᠠ ᠲᠣᠭᠤᠷᠢᠨ ᠮᠦᠭᠦᠨ ᠬᠦᠷᠢᠶ᠎ᠡ ᠲᠠᠲᠠᠴᠢᠬᠠᠭᠰᠠᠨ ᠢ ᠭᠠᠶᠢᠬᠠᠵᠤ ︽ᠠᠯᠳᠠᠨ ᠲᠡᠪᠰᠢ ᠶᠢᠨ ᠰᠦᠮ᠎ᠡ ᠳᠤ ᠠᠮᠤᠭᠤᠯᠠᠩ ᠥᠷᠯᠥᠭᠡ ᠰᠠᠭᠠᠲᠠᠬᠤ ᠨᠢ ᠠ᠋︾ ᠬᠡᠮᠡᠬᠦ ᠪᠦᠲᠦᠭᠡᠯ ᠢᠶᠠᠨ ᠲᠡᠷᠯᠡᠵᠤ ᠪᠢᠯᠡ᠃          ᠤᠷᠳᠤ ᠨᠠᠮᠤᠷ ᠤᠨ ᠤᠨᠢᠶᠠᠷ ᠮᠠᠨᠠᠨ ᠭᠡᠵᠦ ᠥᠷᠯᠥᠭᠡᠨ ᠨᠠᠷᠠᠨ ᠠᠴᠠ ᠤᠷᠢᠳᠤᠭᠤᠷ ᠠᠮᠵᠢᠨ ᠣᠷᠴᠢᠯᠠᠩ ᠤᠨ ᠭᠤᠸ᠎ᠠ ᠶᠢ ᠪᠦᠲᠦᠭᠡᠬᠦ ᠭᠡᠵᠦ ᠶᠠᠭᠠᠷᠠᠳᠠᠭ ᠢ ᠴᠢᠩᠭᠢᠰ ᠤᠨ ᠠᠯᠳᠠᠨ ᠲᠠᠪᠰᠢ ᠶᠢᠨ ᠣᠪᠣᠭᠠᠨ ᠳᠤ ᠭᠠᠷᠴᠤ ᠪᠠᠶᠢᠬᠤ ᠳᠠᠭᠠᠨ ᠤᠴᠢᠷᠲᠠᠶᠢᠬᠠᠨ ᠱᠠᠭᠰᠢᠨ ᠭᠠᠶᠢᠬᠠᠵᠤ ᠢᠭᠡᠷᠡᠯᠡᠨ ᠴᠡᠩᠬᠡᠷᠯᠡᠭᠡ ᠡᠨᠡ ᠬᠤᠶᠠᠷ ᠠᠭᠤᠯᠠ ᠠᠯᠲᠠᠨᠴᠤᠭ ᠤᠨ ᠮᠠᠯᠴᠢᠳ ᠲᠤ ᠪᠤᠶᠠᠨ ᠬᠡᠰᠢᠭ ᠢᠶᠠᠨ ᠲᠦᠭᠡᠭᠡᠭᠰᠡᠭᠡᠷ ᠭᠡᠳᠡᠭ ᠢ ᠰᠠᠨᠠᠬᠤ ᠳᠤ ᠥᠪᠡᠷ ᠤᠨ ᠡᠷᠬᠡ ᠦᠭᠡᠢ  ᠭᠠᠷᠮᠠᠭᠠᠢ ᠨᠠᠶᠢᠷᠠᠭᠴᠢ ᠳᠣᠯᠭᠠᠷ ᠤᠨ ᠨᠢᠮ᠎ᠠ ᠶᠢᠨ ︽ᠠᠷᠭᠠᠯᠢ ᠶᠢᠨ ᠠᠭᠤᠯᠠ︾ ᠭᠡᠳᠡᠭ ᠰᠣᠩᠭᠤᠳᠠᠭ ᠪᠦᠲᠦᠭᠡᠯ ᠤᠨ ᠮᠥᠷ ᠪᠠᠳᠠᠭ ᠰᠠᠨᠠᠭᠠᠨ ᠳᠤ ᠪᠠᠭᠤᠯ᠎ᠠ᠃            ᠠᠷᠭᠠᠯᠢ ᠶᠢᠨ ᠠᠭᠤᠯᠠ          ᠪᠠᠷ᠎ᠠ ᠪᠠᠷ᠎ᠠ ᠪᠠᠨ ᠬᠠᠷᠠᠭᠰᠠᠨ ᠬᠤᠯᠠ ᠶᠢᠨ ᠴᠡᠩᠬᠡᠷ ᠠᠭᠤᠯᠠ          ᠪᠠᠭ᠎ᠠ ᠠᠴᠠ ᠪᠠᠨ ᠮᠢᠨᠤ ᠬᠠᠶᠢᠷᠠᠲᠠᠢ ᠬᠤᠶᠠᠷ ᠴᠡᠩᠬᠡᠷ ᠠᠭᠤᠯᠠ          ᠵᠡᠷᠭᠡᠯᠭᠡ ᠭᠦᠶᠦᠭᠰᠡᠨ ᠲᠠᠯ᠎ᠠ ᠶᠢᠨ ᠵᠡᠷᠭᠡᠴᠡᠭᠡ ᠬᠤᠶᠠᠷ ᠠᠭᠤᠯᠠ          ᠵᠡᠭᠡᠷ᠎ᠡ ᠴᠠᠬᠢᠯᠤᠭᠰᠠᠨ ᠬᠥᠨᠳᠡᠢ ᠶᠢᠨ ᠰᠤᠨᠲᠤᠭᠠᠢ ᠬᠤᠶᠠᠷ ᠠᠭᠤᠯᠠ          ᠰᠠᠭᠠᠬᠠᠯᠲᠠ ᠬᠤᠶᠠᠷ ᠠᠶᠢᠯ ᠤᠨ ᠰᠠᠨᠠᠭ᠎ᠠ ᠨᠢᠭᠡ ᠭᠡᠳᠡᠭ ᠰᠢᠭ          ᠰᠠᠶᠢᠬᠠᠨ ᠬᠤᠶᠠᠷ ᠠᠭᠤᠯᠠ ᠶᠢᠨ ᠰᠠᠯᠬᠢ ᠪᠠᠰᠠ ᠨᠡᠶᠢᠯᠡᠨ᠎ᠡ          ᠰᠠᠶᠢᠬᠠᠨ ᠬᠤᠶᠠᠷ ᠠᠭᠤᠯᠠ ᠶᠢᠨ ᠰᠠᠯᠬᠢ ᠨᠡᠶᠢᠯᠡᠪᠡ ᠭᠡᠬᠦ ᠳᠤ          ᠪᠣᠲᠣᠭᠤᠨ ᠴᠠᠭᠠᠨ ᠡᠭᠦᠯᠡᠨ ᠤ ᠪᠣᠷᠤᠭ᠎ᠠ ᠪᠠᠰᠠ ᠨᠡᠶᠢᠯᠡᠨ᠎ᠡ          ᠪᠣᠲᠣᠭᠤᠨ ᠴᠠᠭᠠᠨ ᠡᠭᠦᠯᠡᠨ ᠤ ᠪᠣᠷᠤᠭ᠎ᠠ ᠨᠡᠶᠢᠯᠡᠪᠡ ᠭᠡᠬᠦ ᠳᠤ          ᠴᠡᠩᠬᠡᠷ ᠬᠤᠶᠠᠷ ᠠᠭᠤᠯᠠ ᠶᠢᠨ ᠴᠡᠴᠡᠭ ᠪᠠᠰᠠ ᠨᠡᠶᠢᠯᠡᠨ᠎ᠡ          ᠬᠤᠯᠠ ᠶᠢᠨ ᠬᠤᠯᠠ ᠠᠴᠠ ᠪᠠᠷ᠎ᠠ ᠲᠠᠢ ᠠᠷᠭᠠᠯᠢ ᠶᠢᠨ ᠬᠤᠶᠠᠷ ᠠᠭᠤᠯᠠ          ᠬᠤᠶᠠᠭᠤᠯᠠ ᠪᠠᠨ ᠪᠠᠶᠢᠬᠤ ᠨᠢ ᠵᠢᠷᠭᠠᠯ ᠲᠠᠢ ᠠᠮᠠᠷᠠᠭ ᠤᠨ ᠬᠤᠶᠠᠷ ᠠᠭᠤᠯᠠ          ᠬᠡᠨ ᠬᠡᠨ ᠠᠴᠠ ᠪᠠᠨ ᠴᠤ ᠬᠤᠯᠠᠳᠬᠤ ᠦᠭᠡᠢ ᠲᠠᠯ᠎ᠠ ᠶᠢᠨ ᠬᠤᠶᠠᠷ ᠠᠭᠤᠯᠠ          ᠬᠡᠵᠢᠶ᠎ᠡ ᠴᠤ ᠭᠡᠰᠡᠨ ᠣᠶᠢᠷᠠᠳᠬᠤ ᠦᠭᠡᠢ ᠳᠠᠭᠤᠤ ᠶᠢᠨ ᠬᠤᠶᠠᠷ ᠠᠭᠤᠯᠠ᠁          ᠮᠠᠨ ᠤ ᠭᠠᠯ ᠠᠶᠠᠨ ᠤ ᠬᠢᠨ ᠶᠠᠭ ᠯᠡ ᠡᠨᠡ ᠰᠢᠯᠦᠭ ᠲᠤ ᠭᠠᠷᠳᠠᠭ ᠰᠢᠭ᠋ ᠠᠯᠠᠭ ᠠᠭᠤᠯᠠ ᠠᠯᠳᠠᠨ ᠲᠡᠪᠰᠢ ᠶᠢᠨ ᠤᠷᠭᠢᠯ ᠢᠶᠠᠷ ᠨᠢ ᠰᠠᠯᠬᠢ ᠨᠡᠶᠢᠯᠡᠳᠡᠭ ᠢ ᠭᠠᠶᠢᠬᠠᠵᠤ᠂ ᠪᠡᠯ ᠢᠶᠠᠷ ᠨᠢ ᠴᠡᠴᠡᠭ ᠨᠡᠶᠢᠯᠡᠳᠡᠭ ᠢ ᠱᠠᠭᠰᠢᠵᠤ᠂ ᠪᠤᠳᠤᠯ ᠪᠤᠳᠤᠯ ᠳᠠᠭᠠᠨ ᠤᠯᠠᠨ ᠰᠠᠶᠢᠬᠠᠨ ᠪᠦᠲᠦᠭᠡᠯ ᠢᠶᠠᠨ ᠪᠢᠰᠢᠯᠭᠠᠭᠰᠠᠭᠠᠷ ᠯᠡ ᠨᠤᠲᠤᠭ ᠨᠤᠲᠤᠭ ᠤᠷᠤᠭᠤ ᠪᠠᠨ ᠪᠤᠴᠠᠵᠠᠭᠠᠭᠰᠠᠨ ᠶᠤᠮ᠃ ᠳᠡᠮᠡᠢ ᠴᠤ ᠤᠳᠠᠯ ᠦᠭᠡᠢ ᠪᠠᠷᠠᠭᠤᠨ ᠰᠥᠨᠢᠳ ᠤᠨ ᠮᠥᠩᠬᠡᠵᠢᠷᠭᠠᠯ ᠳᠡᠭᠦᠦ ᠨᠠᠳᠠᠳᠤ ︽ᠠᠶᠠᠯᠭᠤ ᠲᠠᠩᠰᠤᠭ ᠠᠯᠠᠱᠠ︾ ᠬᠡᠮᠡᠬᠦ  ᠳᠠᠭᠤᠤ ᠶᠢᠨ ᠰᠢᠯᠦᠭ ᠢᠶᠠᠨ ᠢᠷᠡᠭᠦᠯᠵᠦ ᠪᠢᠯᠡ᠃          ᠡᠨᠡ ᠪᠦᠲᠦᠭᠡᠯ ᠢ ᠨᠢ ᠡ᠊ᠨᠳᠠ ᠤᠯᠠᠨ ᠲᠠᠢ ᠬᠤᠪᠢᠶᠠᠯᠴᠠᠪᠠᠯ᠄                          ᠠᠶᠠᠯᠭᠤ ᠲᠠᠩᠰᠤᠭ ᠠᠯᠠᠱᠠ          ᠰᠢᠷᠡᠮᠦᠨ ᠲᠠᠪᠠᠭᠲᠤ ᠲᠡᠮᠡᠭᠡᠳ ᠨᠢ ᠰᠦᠵᠢᠷᠡᠵᠦ ᠬᠤᠩᠭᠤᠷᠳᠠᠬᠰᠠᠨ ᠭᠤᠪᠢ          ᠰᠢᠯᠦᠭ ᠲᠡᠷᠯᠡᠭᠰᠡᠨ ᠠᠬ᠎ᠠ ᠶᠢᠨ ᠮᠢᠨᠢ ᠰᠡᠳᠬᠢᠯ ᠳᠤ ᠰᠢᠩᠭᠡᠭᠰᠡᠨ ᠡᠯᠡᠰᠦᠨ          ᠰᠢᠲᠦᠭᠡᠨ ᠥᠨᠳᠥᠷ ᠠᠯᠳᠠᠨ ᠲᠡᠪᠰᠢ ᠶᠢᠨ ᠥᠨᠢᠷ ᠲᠠᠩᠰᠤᠭ ᠪᠤᠶᠠᠨ          ᠰᠢᠭᠦᠰᠦ ᠵᠠᠰᠠᠭᠰᠠᠨ ᠡᠵᠡᠨ ᠤ ᠬᠢᠨᠢ ᠲᠠᠯᠠᠢ ᠪᠠᠶᠠᠨ ᠬᠡᠰᠢᠭ                    ᠬᠥᠮᠥᠨ ᠤ ᠬᠤᠪᠣᠷᠬᠠᠨ ᠵᠠᠶᠠᠭ᠎ᠠ ᠶᠢ ᠳᠠᠭᠤᠤ ᠪᠠᠷ ᠠᠷᠭᠠᠳᠠᠭᠰᠠᠨ ᠨᠤᠲᠤᠭ                    ᠭᠦᠭ ᠨᠢ ᠬᠠᠨᠤᠭᠰᠠᠨ ᠬᠤᠭᠤᠷ ᠰᠢᠭ᠋ ᠠᠶᠠᠯᠭᠤ ᠲᠠᠩᠰᠤᠭ ᠠᠯᠠᠱᠠ ᠮᠢᠨᠤ ᠵᠧ          ᠳᠥᠯᠭᠡᠨ ᠭᠤᠪᠢ ᠳᠤ ᠲᠡᠦᠬᠡ ᠪᠠᠨ ᠮᠠᠨᠠᠭᠰᠠᠨ ᠭᠤᠯᠣᠮᠲᠠ          ᠲᠡᠭᠷᠢ ᠠᠴᠠ ᠣᠶᠢᠷᠠᠬᠠᠨ ᠨᠤᠲᠤᠭ ᠤᠨ ᠡᠷᠬᠡᠰ ᠰᠠᠭᠠᠲᠠᠭᠰᠠᠨ ᠪᠠᠭᠤᠴᠠ          ᠳᠡᠭᠡᠭᠰᠢ ᠪᠠᠨ ᠵᠠᠶᠠᠭᠠᠲᠤ ᠲᠦᠮᠡᠨ ᠤ ᠲᠡᠩᠴᠡᠵᠦ ᠪᠣᠰᠣᠭᠰᠠᠨ ᠥᠯᠥᠭᠡᠢ          ᠲᠦᠷᠢᠯᠭᠡ ᠡᠷᠭᠦᠬᠦ ᠳᠡᠭᠦᠦ ᠶᠢᠨ ᠮᠢᠨᠢ ᠳᠠᠭᠤᠤ ᠰᠢᠭ᠋ ᠴᠠᠮᠢᠨ ᠨᠤᠲᠤᠭ                   ᠬᠥᠮᠥᠨ ᠤ ᠬᠤᠪᠣᠷᠬᠠᠨ ᠵᠠᠶᠠᠭ᠎ᠠ ᠶᠢ ᠳᠠᠭᠤᠤ ᠪᠠᠷ ᠠᠷᠭᠠᠳᠠᠭᠰᠠᠨ ᠨᠤᠲᠤᠭ                   ᠭᠦᠭ ᠨᠢ ᠬᠠᠨᠤᠭᠰᠠᠨ ᠬᠤᠭᠤᠷ ᠰᠢᠭ᠋ ᠠᠶᠠᠯᠭᠤ ᠲᠠᠩᠰᠤᠭ ᠠᠯᠠᠱᠠ ᠮᠢᠨᠤ ᠵᠧ          ᠴᠠᠭ ᠴᠠᠭ ᠤᠨ ᠨᠡᠭᠦᠳᠡᠯ ᠢ ᠲᠡᠯᠡᠮᠡᠨ ᠵᠡᠷᠭᠡᠯᠭᠡᠨ ᠳᠤ ᠪᠦᠪᠡᠶᠢᠯᠡᠭᠰᠡᠨ          ᠴᠠᠴᠠᠨ ᠬᠤᠩᠭᠤᠷ ᠪᠦᠰᠡᠭᠦᠢ ᠶᠢᠨ ᠰᠠᠴᠤᠯᠢ ᠪᠠᠨ ᠡᠷᠭᠦᠭᠰᠡᠨ ᠨᠤᠲᠤᠭ          ᠴᠢᠳᠦᠷ ᠤᠨ ᠽᠠᠨᠳᠠᠨ ᠴᠢᠭᠳᠠ ᠰᠢᠭ᠋ ᠴᠢᠨᠳᠠᠮᠤᠨᠢ ᠭᠤᠷᠪᠠᠨ ᠬᠤᠰᠢᠭᠤ          ᠼᠠᠩᠶᠠᠩᠵᠠᠮᠰᠤ ᠶᠢᠨ ᠠᠯᠳᠠᠷ ᠮᠥᠩᠬᠡᠷᠡᠭᠰᠡᠨ ᠮᠡᠷᠭᠡᠳ ᠤᠨ ᠲᠠᠬᠰᠢᠨ ᠣᠷᠣᠨ                  ᠬᠥᠮᠥᠨ ᠤ ᠬᠤᠪᠣᠷᠬᠠᠨ ᠵᠠᠶᠠᠭ᠎ᠠ ᠶᠢ ᠳᠠᠭᠤᠤ ᠪᠠᠷ ᠠᠷᠭᠠᠳᠠᠭᠰᠠᠨ ᠨᠤᠲᠤᠭ                  ᠭᠦᠭ ᠨᠢ ᠬᠠᠨᠤᠭᠰᠠᠨ ᠬᠤᠭᠤᠷ ᠰᠢᠭ᠋ ᠠᠶᠠᠯᠭᠤ ᠲᠠᠩᠰᠤᠭ ᠠᠯᠠᠱᠠ ᠮᠢᠨᠤ ᠵᠧ          ᠮᠥᠩᠬᠡᠵᠢᠷᠭᠠᠯ ᠳᠡᠭᠦᠦ ᠶᠢᠨ ᠰᠡᠳᠬᠢᠯ ᠠᠴᠠ ᠤᠨᠳᠤᠷᠤᠬᠰᠠᠨ ᠡᠨᠡ ᠰᠠᠶᠢᠬᠠᠨ ᠰᠢᠯᠦᠭ᠂ ᠠᠶᠠᠯᠭᠤ ᠪᠠᠷ ᠵᠢᠭᠦᠷᠯᠡᠨ ᠳᠠᠭᠤᠤ ᠪᠣᠯᠣᠨ ᠳᠠᠭᠤᠯᠠᠭᠳᠠᠬᠤ ᠶᠢᠨ ᠴᠠᠭ ᠲᠤ ᠪᠢᠳᠠ ᠨᠠᠷᠠ ᠲᠤᠨᠤᠷᠠᠭᠰᠠᠨ ᠮᠣᠩᠭᠤᠯ ᠨᠤᠲᠤᠭ ᠤᠨ ᠠᠯᠢ ᠨᠢᠭᠡᠨ ᠬᠢᠵᠠᠭᠠᠷ ᠲᠤ ᠠᠬᠢᠭᠠᠳ ᠠᠭᠤᠯᠵᠠᠬᠤ ᠶᠤᠮ᠃ ᠪᠢᠳᠠᠨ ᠤ ᠠᠭᠤᠯᠵᠠᠯᠲᠠ ᠠᠯᠠᠭ ᠠᠭᠤᠯᠠ ᠶᠢᠨ ᠡᠪᠦᠷ ᠲᠤ᠂ ᠠᠯᠳᠠᠨ ᠲᠠᠪᠰᠢ ᠶᠢᠨ ᠬᠤᠷᠮᠣᠢ ᠳᠤ᠂ ᠠᠯᠳᠠᠨ ᠲᠣᠣᠷᠠᠢ ᠶᠢᠨ ᠭᠦᠨ ᠳᠤ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠢ ᠲᠡᠷᠡ ᠦᠶ᠎ᠡ ᠳᠤ ᠡᠷᠭᠢᠨ ᠰᠠᠨᠠᠬᠤ ᠳᠤ ᠲᠠᠭᠠᠯᠠᠮᠵᠢᠲᠠᠢ᠃ ᠠᠯᠠᠭ ᠠᠭᠤᠯᠠ ᠠᠯᠳᠠᠨ ᠲᠡᠪᠰᠢ ᠶᠢᠨ ᠠᠯᠳᠠᠨ ᠨᠠᠮᠤᠷ ᠠ᠋  ᠭᠡᠵᠦ ᠪᠠᠶᠢᠭᠠᠯᠢ ᠰᠢᠭ᠋ ᠪᠠᠶᠢᠭᠠᠯᠢ᠂ ᠠᠷᠤ ᠭᠤᠪᠢ ᠳᠠᠭᠠᠨ ᠰᠢᠷᠭᠠᠯᠲᠤᠨ ᠰᠢᠷᠭᠠᠯᠲᠤᠬᠤ ᠠᠯᠳᠠᠨ ᠲᠣᠣᠷᠠᠢ ᠭᠡᠵᠦ ᠮᠣᠳᠣ ᠰᠢᠭ᠋ ᠮᠣᠳᠣ ᠠ᠋᠃ ᠬᠥᠮᠥᠨ ᠪᠢᠳᠠ ᠴᠣᠬᠤᠮ ᠠᠭᠤᠯᠠ ᠶᠢᠨ ᠴᠢᠨᠡᠭᠡᠨ ᠪᠤᠳᠤᠵᠤ᠂ ᠮᠣᠳᠣᠨ ᠤ ᠴᠢᠨᠡᠭᠡᠨ ᠪᠢᠰᠢᠯᠭᠠᠵᠤ ᠴᠢᠳᠠᠳᠠᠭ ᠰᠠᠨ ᠪᠢᠯᠡ ᠤᠤ⁉
 
ᠢᠷᠡᠯᠲᠡ᠄ ᠠᠯᠠᠱᠠ ᠶᠢᠨ ᠡᠳᠦᠷ ᠤᠨ ᠰᠣᠨᠢᠨ 
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号