ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠰᠢᠨ᠎ᠡ ᠬᠦᠳᠡᠭᠡ
ᠴᠢᠯᠠᠭᠤᠨ ᠤ ᠨᠢᠯᠪᠤᠰᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/12/3
ᠵᠡᠭᠦᠨᠭᠠᠷ ᠪᠤᠶᠠᠨᠪᠠᠲᠤᠴᠢᠯᠠᠭᠤᠳ ᠤᠨ ᠤᠭᠢᠯᠠᠯᠳᠤᠬᠤ ᠳᠠᠭᠤᠨ ᠢᠶᠠᠷ ᠪᠢ ᠨᠠᠮ ᠭᠦᠮ ᠵᠡᠭᠦᠳᠦᠨ ᠤ ᠶᠢᠷᠲᠢᠨᠴᠦ ᠠᠴᠠ ᠪᠠᠨ ᠲᠤᠭ᠎ᠠ ᠦᠭᠡᠢ ᠣᠯᠠᠠ ᠤᠳᠠᠭ᠎ᠠ ᠠᠷᠠᠢ ᠴᠢᠮᠡᠢ ᠰᠣᠴᠢᠨ ᠰᠡᠷᠡᠵᠦ᠂ ᠪᠣᠳᠠᠳᠤ ᠠᠬᠤᠢ ᠤᠷᠤᠭᠤ ᠴᠢᠳᠠᠨ ᠶᠠᠳᠠᠨ ᠪᠤᠴᠠᠵᠤ ᠢᠷᠡᠳᠡᠭ ᠪᠣᠯᠪᠠ᠃ ᠬᠡᠵᠢᠶ᠎ᠡ ᠠᠴᠠ ᠲᠡᠶᠢᠮᠦ ᠪᠣᠯᠵᠤ ᠡᠬᠢᠯᠡᠭᠰᠡᠨ ᠢᠶᠠᠨ ᠮᠠᠷᠲᠠᠵᠤ ᠣᠷᠬᠢᠵᠠᠢ᠃ ᠶᠠᠮᠠᠷ ᠴᠦ ᠪᠠᠶᠢᠭᠰᠠᠨ ᠬᠠᠮᠢᠭ᠎ᠠ ᠨᠢᠭᠡᠲᠡᠭᠡ ᠠᠴᠠ ᠨᠤᠲᠤᠭ ᠤᠨ ᠮᠢᠨᠢ ᠴᠢᠯᠠᠭᠤ ᠠᠮᠢ ᠲᠠᠯᠪᠢᠨ ᠴᠢᠷᠠᠯᠠᠨ ᠤᠭᠢᠯᠠᠵᠤ᠂ ᠨᠢᠯᠪᠤᠰᠤᠨ ᠳᠠᠭᠠᠨ ᠳᠡᠪᠲᠣᠨ ᠭᠤᠨᠢᠵᠤ ᠭᠤᠲᠤᠵᠤ ᠶᠠᠪᠤᠭ᠎ᠠ ᠶᠢ ᠵᠢᠷᠦᠬᠡᠨ ᠤ ᠪᠠᠨ ᠴᠠᠭᠠᠨ ᠵᠥᠩ ᠢᠶᠠᠷ ᠮᠡᠳᠡᠷᠡᠳᠡᠭ ᠪᠣᠯᠣᠭᠠᠳ ᠴᠢᠮᠠᠯᠠᠬᠤ ᠪᠠᠷ ᠦᠭᠡᠢ ᠣᠨ ᠵᠢᠯ ᠢ ᠠᠷᠤ ᠳᠠᠭᠠᠨ ᠬᠠᠶᠠᠭᠰᠠᠨ ᠨᠢ ᠦᠨᠡᠡ ᠪᠢᠯᠡ᠃ᠴᠢᠯᠠᠭᠤᠨ ᠳᠤ ᠨᠢᠯᠪᠤᠰᠤ ᠲᠠᠢ ᠭᠡᠳᠡᠭ ᠲᠤ ᠬᠡᠨ ᠨᠢᠭᠡᠨ ᠢᠲᠡᠭᠡᠬᠦ ᠦᠭᠡᠢ ᠪᠠᠶᠢᠬ᠎ᠠ᠃ ᠲᠡᠶᠢᠮᠦ ᠡ᠂ ᠴᠢᠯᠠᠭᠤᠨ ᠤ ᠨᠢᠯᠪᠤᠰᠤ ᠶᠢ ᠬᠡᠨ ᠴᠦ ᠬᠠᠷᠠᠬᠤ ᠦᠭᠡᠢ᠃ ᠦᠨᠡᠨ ᠳᠡᠭᠡᠨ ᠬᠡᠨ ᠳᠤ ᠴᠦ ᠬᠠᠷᠠᠭᠳᠠᠬᠤ ᠦᠭᠡᠢ᠃ ᠬᠦᠮᠦᠨ ᠳᠡᠯᠡᠬᠡᠢ  ᠳᠤ ᠪᠤᠷᠤᠭᠤ ᠲᠠᠢ ᠶᠠᠭᠤᠮ᠎ᠠ ᠬᠢᠬᠦ ᠳᠤ ᠶᠤᠮ ᠦᠦ ᠥᠪᠡᠷ ᠢᠶᠠᠨ ᠨᠤᠲᠤᠭ ᠠᠴᠠ ᠪᠠᠨ ᠬᠤᠯᠠ ᠲᠡᠷᠲᠡᠭᠡ ᠰᠠᠯᠵᠤ ᠬᠠᠭᠠᠴᠠᠭᠰᠠᠨ ᠦᠶ᠎ᠡ ᠳᠤ ᠯᠠ ᠴᠢᠯᠠᠭᠤ ᠦᠷᠭᠦᠯᠵᠢ ᠲᠡᠮᠡᠭᠡ ᠰᠢᠭ ᠢᠶᠠᠨ ᠠᠰᠬᠠᠷᠠᠲᠠᠯ᠎ᠠ ᠤᠭᠢᠯᠠᠳᠠᠭ ᠭᠡᠨᠡᠮ᠃ ᠤᠭᠢᠯᠠᠬᠤ ᠴᠢᠮᠡᠭᠡᠨ ᠳᠤ ᠨᠢ ᠲᠡᠭᠷᠢ ᠶᠢᠨ ᠲᠠᠩᠨᠠᠢ ᠤᠷᠠᠭᠳᠠᠵᠤ᠂ ᠳᠡᠯᠡᠬᠡᠢ ᠶᠢᠨ ᠲᠡᠩᠬᠡᠯᠢᠭ ᠲᠤ ᠴᠠᠪᠠ ᠰᠠᠭᠤᠳᠠᠭ ᠢ ᠬᠦᠮᠦᠨ ᠬᠡᠮᠡᠭᠴᠢ ᠬᠠᠷ᠎ᠠ ᠲᠡᠷᠢᠭᠦᠲᠡᠨ ︽ᠤᠬᠠᠭᠠᠨ︾ ᠳᠠᠭᠠᠨ ᠡᠷᠡᠮᠰᠢᠭᠡᠳ ᠳᠠᠩᠴᠢ ᠠᠩᠵᠠᠭᠠᠷᠠᠳᠠᠭ ᠦᠭᠡᠢ ᠠᠵᠢ᠃ᠴᠢᠯᠠᠭᠤ ᠪᠣᠯᠭᠠᠨ ᠢ ᠪᠢ ᠭᠠᠷᠠᠭ ᠡᠷᠬᠡᠰ ᠤᠨ ᠴᠠᠷᠴᠠᠭᠰᠠᠨ ᠦᠭᠡᠰ᠂ ᠦᠯᠦ ᠮᠡᠳᠡᠭᠳᠡᠭᠴᠢ ᠴᠠᠭ ᠲᠣᠭᠠᠯᠠᠯ ᠤᠨ ᠮᠡᠳᠡᠭᠡᠯᠡᠯ ᠪᠤᠶᠤ ᠲᠡᠭᠦᠨ ᠤ ᠲᠤᠬᠠᠢ ᠦᠨᠡᠨ ᠪᠠᠲᠤᠲᠠᠢ ᠲᠡᠮᠳᠡᠭᠯᠡᠯ ᠬᠡᠮᠡᠨ ᠦᠷᠭᠦᠯᠵᠢ ᠪᠣᠳᠣᠳᠠᠭ ᠰᠠᠨ᠃ ᠭᠠᠭᠴᠠᠬᠠᠨ ᠮᠠᠨ ᠤ ᠴᠡᠩᠬᠡᠷ ᠳᠡᠯᠡᠬᠡᠢ ᠳᠤ ᠴᠦ ᠪᠤᠰᠤ ᠥᠨᠥ ᠶᠢᠨ ᠣᠯᠵᠣ ᠮᠡᠳᠡᠭᠰᠡᠨ ᠪᠦᠬᠦ ᠣᠳᠣ ᠡᠷᠬᠡᠰ ᠲᠤ ᠪᠦᠷ ᠠᠭᠠᠷ ᠤᠰᠤ ᠬᠡᠬᠦᠴᠢᠯᠡᠨ ᠪᠤᠰᠤᠳ ᠶᠠᠭᠤᠮ᠎ᠠ ᠪᠠᠷ ᠳᠤᠲᠠᠭᠤ ᠶᠤᠮ ᠭᠡᠬᠦ ᠳᠤ ᠴᠢᠯᠠᠭᠤ ᠪᠠᠷ ᠬᠠᠷᠢᠨ ᠪᠠᠶᠠᠨ ᠲᠠᠩᠰᠤᠭ ᠶᠤᠮ ᠰᠠᠨᠵᠠᠢ᠃ ᠲᠡᠶᠢᠮᠦ ᠪᠣᠯᠬᠤᠷ ᠦᠨᠳᠦᠷ ᠬᠥᠭᠵᠢᠯ ᠲᠠᠢ ᠤᠯᠤᠰ ᠭᠦᠷᠦᠨ ᠰᠠᠨᠰᠠᠷ ᠤᠨ ᠬᠥᠯᠭᠡ ᠪᠠᠷ ᠲᠡᠨᠳᠡ ᠠᠴᠠ ᠴᠢᠯᠠᠭᠤ ᠶᠢ ᠨᠢ ᠳᠡᠭᠡᠵᠢ ᠪᠣᠯᠭᠠᠨ ᠠᠪᠴᠦ ᠢᠷᠡᠭᠡᠳ ᠲᠡᠷᠡ ᠭᠠᠷᠠᠭ ᠣᠳᠣᠨ ᠤ ᠨᠠᠰᠤ ᠰᠢᠳᠦ ᠨᠠᠮᠲᠠᠷ ᠲᠡᠦᠬᠡ ᠶᠢ ᠨᠢ ᠲᠦᠪᠡᠭ ᠦᠭᠡᠢ ᠲᠣᠮᠢᠶᠠᠯᠠᠨ ᠲᠣᠭᠲᠠᠭᠠᠳᠠᠭ ᠭᠡᠨ᠎ᠡ᠃ ᠲᠡᠭᠡᠭᠡᠳ ᠪᠣᠳᠣᠬᠤ ᠳᠤ ᠴᠢᠯᠠᠭᠤ ᠪᠣᠯ ᠬᠠᠮᠤᠭ ᠤᠨ ᠥᠷᠭᠡᠨ ᠲᠦᠭᠡᠮᠡᠯ᠂ ᠬᠠᠮᠤᠭ ᠤᠨ ᠲᠡᠰᠪᠤᠷᠢ ᠲᠡᠪᠴᠢᠶᠡᠷᠢ ᠲᠠᠢ᠂ ᠬᠠᠮᠤᠭ ᠤᠨ ᠭᠦᠨ ᠨᠢᠭᠤᠴᠠᠯᠢᠭ᠂ ᠬᠠᠮᠤᠭ ᠤᠨ ᠦᠨᠢ ᠮᠥᠩᠬᠡ ᠶᠢᠨ ᠣᠷᠣᠰᠢᠬᠤᠢ ᠶᠤᠮᠰᠠᠨᠵᠠᠢ᠃ ᠡᠭᠦᠨ ᠠᠴᠠ ᠰᠢᠯᠲᠠᠭᠠᠯᠠᠵᠦ ᠪᠢ ᠬᠠᠮᠤᠭ ᠰᠡᠭᠦᠯᠴᠢ ᠶᠢᠨ ᠦᠭᠡ ᠪᠠᠨ᠂ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠰᠦᠨᠡᠰᠦ ᠪᠠᠨ ᠡᠬᠡ ᠨᠤᠲᠤᠭ ᠤᠨ ᠢᠶᠠᠨ ᠡᠭᠡᠯ ᠪᠣᠷᠭᠢᠯ ᠴᠢᠯᠠᠭᠤᠨ ᠳᠤ ᠯᠠ ᠰᠢᠪᠰᠢᠨ ᠰᠢᠩᠭᠡᠭᠡᠵᠦ ᠦᠯᠡᠳᠡᠭᠡᠬᠦ ᠶᠢ ᠮᠥᠷᠥᠭᠡᠳᠬᠦ ᠪᠣᠯᠪᠠ᠃ᠮᠣᠩᠭᠤᠯ ᠨᠤᠲᠤᠭ ᠤᠨ ᠮᠢᠨᠢ ᠬᠡᠭᠡᠷ᠎ᠡ ᠲᠠᠯ᠎ᠠ ᠳᠤ ᠬᠠᠮᠢᠭ᠎ᠠ ᠰᠠᠢ ᠦᠭᠡᠢ ᠯᠠ ᠲᠠᠭᠠᠷᠠᠵᠤ ᠪᠠᠶᠢᠳᠠᠭ ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠶᠢ ᠬᠠᠷᠠᠬᠤ ᠪᠦᠷᠢ ᠡᠯᠡᠷ ᠪᠠᠯᠠᠷ ᠴᠠᠭ ᠲᠤ ᠠᠮᠢᠳᠤᠷᠠᠯ ᠤᠨ ᠠᠩᠬᠠᠨ ᠤ ᠭᠠᠯ ᠭᠤᠯᠣᠮᠲᠠ ᠪᠠᠨ ᠠᠰᠠᠭᠠᠭᠰᠠᠨ ᠵᠠᠯᠠᠭᠤᠬᠠᠨ ᠬᠤᠣᠰ ᠡᠰᠡᠪᠡᠯ ᠰᠡᠭᠦᠯᠴᠢ ᠶᠢᠨ ᠭᠠᠯ ᠢᠶᠠᠨ ᠮᠠᠨᠠᠭᠰᠠᠨ ᠪᠤᠭᠤᠷᠤᠯ ᠳᠡᠭᠡᠳᠦᠰ ᠢᠶᠠᠨ ᠣᠯᠵᠣ ᠬᠠᠷᠠᠬᠤ ᠰᠢᠭ᠋ ᠪᠣᠯᠳᠠᠭ᠃ ᠲᠡᠷᠡ ᠪᠦᠯᠢᠶᠡᠨ ᠬᠥᠬᠡ ᠨᠤᠷᠮᠠᠨ ᠳᠤ ᠨᠢ ᠲᠡᠷᠡ ᠭᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ ᠲᠡᠷᠲᠡᠭᠡ ᠨᠢᠭᠡᠨ ᠴᠠᠭ ᠤᠨ ᠦᠯᠢᠭᠡᠷ ᠳᠣᠮᠤᠭ ᠤᠳ ᠣᠨ ᠴᠠᠭ ᠢ ᠥᠷᠲᠡᠭᠡᠯᠡᠨ ᠥᠨᠥ ᠶᠢ ᠬᠦᠷᠲᠡᠯ᠎ᠡ ᠮᠠᠠᠨᠠᠭᠠᠰᠤᠲᠠᠢ ᠬᠡᠪ ᠢᠶᠠᠷ ᠢᠶᠠᠨ ᠪᠠᠶᠢᠭ᠎ᠠ ᠭᠡᠳᠡᠭ ᠲᠤ ᠨᠢᠭᠡ ᠶᠡᠭᠡ ᠡᠷᠡᠭᠡᠯᠵᠡᠬᠦ ᠦᠭᠡᠢ ᠪᠠᠶᠢᠨ᠎ᠠ᠃ ᠬᠡᠵᠢᠶ᠎ᠡ ᠴᠦ ᠶᠤᠮ ᠮᠡᠳᠡᠬᠦ ᠦᠭᠡᠢ ᠨᠢᠭᠡᠨ ᠴᠠᠭ ᠲᠤ ᠨᠢᠭᠡ ᠵᠠᠯᠠᠭᠤ ᠰᠦᠨᠢ ᠳᠦᠯᠢ ᠪᠠᠷ ᠭᠡᠷ ᠵᠦᠭ ᠢᠶᠠᠨ ᠳᠡᠪᠬᠢᠵᠤ ᠶᠠᠪᠤᠬᠤ ᠳᠠᠭᠠᠨ ᠭᠡᠷ ᠠᠴᠠ ᠨᠢ ᠬᠤᠯᠠ ᠦᠭᠡᠶᠢᠬᠡᠨ ᠨᠢᠭᠡᠨ ᠬᠤᠲᠣᠭᠤᠷ ᠲᠠᠬᠢ ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤᠨ ᠤ ᠵᠠᠬ᠎ᠠ ᠳᠤ ᠬᠤᠶᠠᠭ ᠲᠤᠭᠤᠯᠭ᠎ᠠ  ᠲᠠᠢ ᠬᠦᠮᠦᠰ ᠬᠤᠯᠤ ᠲᠠᠢ ᠠᠶᠢᠷᠠᠭ ᠰᠥᠩᠨᠡᠨ ᠲᠠᠰ ᠲᠠᠰ ᠬᠥᠬᠦᠷᠡᠯᠳᠤᠨ ᠰᠠᠭᠤᠵᠠᠭᠠᠬᠤ ᠶᠢ ᠣᠯᠵᠣ ᠬᠠᠷᠠᠭᠠᠳ᠂ ᠥᠨᠥᠬᠢ ᠴᠢᠳᠬᠦᠷ ᠱᠤᠯᠤᠮ ᠨᠢ ᠶᠤᠮ ᠪᠠᠶᠢᠬ᠎ᠠ ᠭᠡᠵᠤ ᠤᠬᠠᠭᠠᠨ ᠰᠦᠨᠡᠰᠦ ᠦᠭᠡᠢ ᠠᠶᠤᠵᠤ ᠰᠡᠵᠢᠭᠯᠡᠨ ᠤᠮ ᠬᠤᠮ ᠦᠭᠡᠢ ᠳᠠᠪᠬᠢᠨ ᠭᠡᠷ ᠲᠡᠭᠡᠨ ᠣᠴᠢᠵᠤ ᠬᠡᠯᠡᠬᠦ ᠳᠤ ᠨᠢ ᠭᠡᠷ ᠤᠨ ᠬᠤᠶᠢᠮᠣᠷ ᠠᠪᠳᠠᠷ᠎ᠠ ᠬᠠᠯᠬᠠᠯᠠᠨ ᠰᠠᠭᠠᠲᠠᠭᠰᠠᠨ ᠪᠤᠭᠤᠷᠤᠯ ᠡᠪᠦᠭᠡ ᠨᠢ ᠲᠣᠭᠤᠨᠣ ᠪᠠᠷ ᠱᠠᠭᠠᠶᠢᠬᠤ ᠣᠳᠣᠳ ᠢ ᠨᠢᠭᠡ ᠬᠠᠷᠠᠨ᠂ ᠲᠤᠯᠭᠠᠨ ᠳᠤ ᠴᠢᠮᠡᠭᠡ ᠦᠭᠡᠶᠢᠬᠡᠨ ᠨᠣᠴᠣᠬᠤ ᠠᠷᠭᠠᠯ ᠤᠨ ᠭᠠᠯ ᠢᠶᠠᠨ ᠨᠢᠭᠡ ᠰᠢᠷᠲᠡᠩᠭᠡᠨ᠄ ︽ᠠᠶᠤᠵᠤ ᠰᠡᠵᠢᠭᠯᠡᠬᠦ ᠶᠢᠨ ᠬᠡᠷᠡᠭ ᠦᠭᠡᠢ ᠳ᠋ᠡ᠂ ᠮᠢᠨᠦ ᠬᠦᠦ᠃ ᠭᠠᠯ ᠭᠤᠯᠣᠮᠲᠠ ᠳᠠᠭᠠᠨ ᠦᠦᠬᠡ ᠲᠡᠦᠬᠡ ᠮᠠᠨᠢ ᠡᠷᠭᠢᠵᠦ ᠢᠷᠡᠵᠦ ᠪᠠᠶᠢᠭ᠎ᠠ ᠶᠢᠨ ᠴᠣᠨᠳᠣᠩ ᠲᠡᠷᠡ ᠪᠠᠶᠢᠬᠤ ᠦᠭᠡᠢ ᠦᠦ᠃ ᠪᠡᠮᠪᠡᠭᠡᠨᠡᠵᠦ ᠠᠶᠤᠬᠤ ᠶᠢᠨ ᠣᠷᠣᠨ ᠳᠤ ᠬᠠᠷᠢᠨ ᠪᠡᠯᠭᠡᠰᠢᠶᠡᠵᠦ ᠪᠠᠶᠠᠷᠯᠠᠬᠤ ᠬᠡᠷᠡᠭᠲᠡᠢ ᠶᠤᠮ ᠰᠢᠦ︾ ᠭᠡᠵᠤ ᠬᠡᠯᠡᠭᠰᠡᠨ ᠪᠥᠭᠡᠳ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠡᠷᠲᠡ ᠭᠡᠭᠴᠢ ᠨᠢ ᠪᠣᠰᠣᠭᠠᠳ ᠲᠠᠷᠡ ᠭᠤᠷᠪᠠᠨ ᠴᠢᠯᠠᠭᠤᠨ ᠳᠤ ᠣᠴᠢᠵᠤ ᠰᠠᠭᠠᠮ᠎ᠠ ᠰᠦ ᠪᠠᠷ ᠳᠡᠭᠡᠵᠢ ᠡᠷᠭᠦᠭᠰᠡᠨ ᠭᠡᠳᠡᠭ ᠶᠤᠮ᠃ᠮᠢᠨᠦ ᠮᠣᠩᠭᠤᠯ ᠤᠨ ᠭᠠᠯ ᠭᠤᠯᠣᠮᠲᠠ ᠡᠳᠡᠭᠡᠷ ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤᠨ ᠠᠴᠠ ᠯᠠ ᠡᠬᠢᠯᠡᠭᠰᠡᠨ ᠭᠡᠵᠤ ᠪᠢ ᠢᠲᠡᠭᠡᠯ ᠦᠨᠡᠮᠰᠢᠯ ᠢᠶᠠᠨ ᠳᠦᠭᠦᠷᠭᠡᠵᠦ ᠶᠠᠪᠤᠳᠠᠭ ᠰᠠᠨ᠃ ᠦᠯᠦ ᠮᠡᠳᠡᠭᠬᠡᠨ ᠬᠦ᠋ ᠨᠠᠭᠠᠯᠳᠤᠭᠰᠠᠨ ᠡᠨᠡ ᠭᠤᠷᠪᠠᠨ ᠴᠢᠯᠠᠭᠤ ᠵᠦᠭᠡᠷ ᠴᠦ ᠨᠢᠭᠡ ᠴᠢᠯᠠᠭᠤ ᠯᠠᠪ ᠪᠢᠰᠢ᠃ ᠮᠠᠨ ᠤ ᠮᠣᠩᠭᠤᠯ ᠤᠨ ᠥᠩᠭᠡᠷᠡᠭᠰᠡᠨ᠂ ᠣᠳᠣ᠂ ᠢᠷᠡᠭᠡᠳᠦᠢ ᠭᠤᠷᠪᠠᠨ ᠴᠠᠭ ᠤᠨ ᠭᠠᠩ ᠪᠠᠲᠤ ᠢᠯᠡᠷᠬᠡᠶᠢᠯᠡᠯ᠂ ᠠᠳᠡ ᠲᠡᠦᠬᠡ ᠦᠳᠡᠯᠡᠭᠡᠳ ᠮᠣᠷᠳᠠᠭᠰᠠᠨ ᠤ ᠬᠦᠨᠳᠦᠲᠦ ᠭᠡᠷᠡᠴᠢ᠂ ᠡᠷᠲᠡᠨ ᠤ ᠪᠠᠭᠠᠲᠤᠷ ᠤᠨ ᠳᠥᠷᠥᠭᠡ ᠠᠮᠠᠷᠠᠭᠠᠭᠰᠠᠨ ᠭᠠᠵᠠᠷ ᠪᠠᠶᠢᠵᠤ ᠪᠣᠯᠬᠤ ᠶᠤᠮ᠃ ᠮᠥᠨ ᠴᠦ ︽ᠮᠢᠨᠦ ᠡᠬᠡ ᠣᠷᠣᠨ︾ ᠭᠡᠰᠡᠨ ᠴᠢᠨᠳᠠᠮᠤᠨᠢᠯᠠᠭᠰᠠᠨ ᠭᠤᠷᠪᠠᠨ ᠨᠠᠨᠳᠢᠨ ᠦᠰᠦᠭ᠂ ᠨᠡᠭᠦᠳᠡᠯ ᠰᠣᠶᠣᠯ ᠤᠨ ᠮᠢᠨ᠋᠊ ᠢ ᠪᠠᠯᠠᠷᠠᠰᠢ ᠦᠭᠡᠢ ᠢᠮ ᠲᠠᠮᠠᠭ᠎ᠠ ᠭᠠᠷᠴᠠᠭ᠎ᠠ ᠦᠭᠡᠢ ᠮᠥᠨ᠃ ᠡᠨᠡ ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠪᠠᠷ ᠭᠠᠵᠠᠷ ᠰᠢᠷᠣᠢ ᠪᠠᠨ ᠲᠠᠮᠠᠭᠠᠯᠠᠭᠠᠳ ᠮᠣᠷᠳᠠᠭᠰᠠᠨ ᠤᠬᠠᠭᠠᠨᠲᠤ ᠳᠡᠭᠡᠳᠦᠰ ᠮᠢᠨᠢ ᠦᠷ᠎ᠡ ᠬᠤᠶᠢᠴᠢᠰ ᠪᠢᠳᠡᠨ ᠳᠡᠭᠡᠨ ᠶᠠᠮᠠᠷ ᠨᠢᠭᠡᠨ ᠨᠢᠭᠤᠴᠠ ᠳᠣᠬᠢᠶ᠎ᠠ ᠲᠡᠮᠳᠡᠭ ᠵᠠᠬᠢᠶᠠᠰᠤᠯᠠᠨ ᠦᠯᠡᠳᠡᠭᠡᠭᠰᠡᠨ ᠢ ᠪᠢᠳᠡ ᠮᠡᠳᠡᠬᠦ ᠴᠦ ᠦᠭᠡᠢ ᠬᠡᠨᠡᠭ ᠴᠦ ᠦᠭᠡᠢ ᠶᠠᠪᠤᠵᠤ ᠪᠠᠶᠢᠭ᠎ᠠ ᠴᠦ ᠶᠤᠮ ᠪᠢᠵᠡ ᠬᠡᠨ ᠮᠡᠳᠡᠬᠦ ᠪᠤᠢ᠃ ᠢᠵᠢᠯ ᠨᠢᠭᠡᠨ ᠰᠢᠯᠤᠭᠤᠨ ᠳᠡᠭᠡᠷ᠎ᠡ ᠦᠯᠦ ᠣᠷᠣᠰᠢᠬᠤ ᠭᠤᠷᠪᠠᠨ ᠴᠡᠭ ᠨᠢᠭᠡ ᠬᠠᠪᠲᠠᠭᠠᠢ ᠶᠢ ᠲᠣᠭᠲᠠᠭᠠᠬᠤ ᠪᠦᠭᠡᠳ ᠵᠥᠪᠬᠡᠨ ᠨᠢᠭᠡ ᠯᠠ ᠬᠠᠪᠲᠠᠭᠠᠢ ᠶᠢ ᠲᠤᠭᠲᠠᠭᠠᠳᠠᠭ ᠲᠣᠭᠠᠨ ᠤ ᠤᠬᠠᠭᠠᠨ ᠤ ᠢᠯᠡᠶᠣᠰᠤ ᠶᠢ ᠮᠠᠨ ᠤ ᠡᠪᠦᠭᠡ ᠳᠡᠭᠡᠳᠦᠰ ᠡᠨᠡ ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠪᠠᠷ ᠲᠡᠳᠦᠢ ᠪᠤᠰᠤ ᠲᠡᠦᠬᠡ ᠶᠢᠨ ᠤᠷᠲᠤ ᠬᠤᠭᠤᠴᠠᠭᠠᠨ ᠤ ᠣᠷᠣᠰᠢᠯ ᠲᠣᠭᠲᠠᠨᠢᠯ ᠢᠶᠠᠷ ᠢᠶᠠᠨ ᠲᠡᠭᠦᠰ ᠲᠡᠭᠦᠯᠳᠡᠷ ᠪᠠᠲᠤᠯᠠᠨ ᠬᠠᠷᠠᠭᠤᠯᠵᠤ ᠴᠢᠳᠠᠭᠰᠠᠨ ᠭᠡᠵᠤ ᠪᠢ ᠪᠣᠳᠣᠨᠠᠮ᠃ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠮᠢᠨᠢ ᠳᠠᠪᠲᠠᠭᠳᠠᠰᠢ ᠦᠭᠡᠢ ᠰᠣᠶᠣᠯ ᠢᠷᠭᠡᠨᠰᠢᠯ ᠤᠨ ᠡᠨᠡ ᠬᠦ ᠠᠭᠤᠤ ︽ᠬᠠᠪᠲᠠᠭᠠᠢ︾ ᠶᠢ ᠲᠤᠯᠵᠤ ᠲᠣᠭᠲᠠᠭᠠᠵᠤ ᠢᠷᠡᠭᠰᠡᠨ ᠭᠤᠷᠪᠠᠨ ᠴᠡᠭ ᠪᠣᠯᠪᠠᠰᠤ ᠵᠣᠬᠢᠴᠠᠬᠤᠢ᠂ ᠲᠡᠪᠴᠢᠬᠦᠢ᠂ ᠲᠡᠮᠡᠴᠡᠬᠦᠢ ᠭᠤᠷᠪᠠ ᠬᠡᠮᠡᠨ ᠪᠢ ᠤᠬᠠᠭᠠᠷᠠᠬᠤ ᠪᠦᠯᠦᠭᠡ᠃ ᠵᠣᠬᠢᠴᠠᠬᠤᠢ ᠭᠡᠳᠡᠭ ᠨᠢ ᠮᠠᠯ ᠠᠵᠤ ᠠᠬᠤᠢ ᠡᠷᠬᠢᠯᠡᠭᠰᠡᠨ ᠮᠠᠯᠴᠢᠨ ᠳᠡᠭᠡᠳᠦᠰ ᠮᠢᠨᠢ ᠭᠠᠵᠠᠷ ᠲᠡᠭᠷᠢ ᠶᠢᠨ ᠢᠶᠠᠨ ᠠᠭᠠᠰᠢ ᠠᠷᠠᠨᠰᠢᠨ ᠢ ᠠᠷᠭᠠᠳᠠᠩᠬᠠᠨ ᠨᠡᠭᠦᠵᠦ ᠪᠠᠭᠤᠵᠤ ᠶᠠᠪᠤᠬᠤ ᠳᠠᠭᠠᠨ ᠪᠠᠶᠢᠭᠠᠯᠢ ᠳᠡᠯᠡᠬᠡᠢ ᠲᠠᠢ ᠪᠠᠨ ᠳᠠᠰᠤᠨ ᠵᠣᠬᠢᠴᠠᠵᠤ᠂ ᠰᠢᠲᠦᠨ ᠪᠠᠷᠢᠯᠳᠤᠵᠤ᠂ ᠲᠡᠭᠦᠨ ᠢᠶᠠᠨ ᠣᠩᠭᠤᠨ ᠬᠡᠪ ᠢᠶᠠᠷ ᠨᠢ ᠬᠠᠶᠢᠷᠠᠯᠠᠨ ᠬᠠᠮᠠᠭᠠᠯᠠᠵᠤ᠂ ᠦᠷ᠎ᠡ ᠬᠤᠶᠢᠴᠢᠰ ᠲᠠᠭᠠᠨ ᠥᠪᠯᠡᠭᠦᠯᠦᠨ ᠥᠭᠭᠦᠭᠰᠡᠨ ᠢ ᠬᠡᠯᠡᠵᠤ ᠪᠠᠶᠢᠨ᠎ᠠ᠃ ᠲᠡᠪᠴᠢᠬᠦᠢ ᠭᠡᠳᠡᠭ ᠨᠢ ᠬᠤᠶᠠᠷ ᠰᠠᠨᠠᠭ᠎ᠠ ᠶᠢ ᠠᠭᠤᠯᠤᠨ᠎ᠠ᠃ ᠨᠢᠭᠡ  ᠨᠢ ᠡᠷᠡᠰ ᠲᠡᠰᠦ ᠳᠥᠷᠪᠡᠨ ᠤᠯᠠᠷᠢᠯ ᠲᠠᠢ ᠬᠠᠲᠠᠭᠤ ᠳᠣᠭᠰᠢᠨ ᠠᠭᠤᠷ ᠠᠮᠢᠰᠬᠤᠯ ᠲᠠᠢ ᠥᠩ ᠭᠠᠩ ᠠᠯᠠᠭᠯᠠᠭᠰᠠᠨ ᠭᠠᠵᠠᠷ ᠨᠤᠲᠤᠭ ᠲᠤ ᠲᠡᠰᠪᠤᠷᠢ ᠲᠡᠪᠴᠢᠶᠡᠷᠢ ᠶᠢᠨ ᠡᠷᠴᠢ ᠬᠦᠴᠦ ᠪᠠᠷ ᠣᠷᠣᠰᠢᠨ ᠠᠮᠢᠳᠤᠷᠠᠵᠤ᠂ ᠪᠠᠶᠢᠨ ᠳᠠᠬᠢᠨ ᠬᠠᠶᠢᠷ᠎ᠠ ᠨᠠᠶᠢᠷ ᠦᠭᠡᠢ ᠲᠣᠬᠢᠶᠠᠯᠳᠤᠵᠤ ᠪᠠᠶᠢᠭᠰᠠᠨ ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ ᠰᠠᠮᠠᠭᠤᠨ ᠠᠶᠤᠯ ᠵᠠᠨᠤᠯᠬᠢᠯᠡᠯ ᠢ ᠪᠡᠶ᠎ᠡ ᠰᠡᠳᠬᠢᠯ ᠤᠨ ᠲᠡᠩᠬᠡᠭᠡ ᠪᠠᠷ ᠳᠠᠪᠠᠨ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠢ ᠬᠡᠯᠡᠬᠦ ᠠᠪᠠᠢ᠃ ᠨᠥᠭᠦᠭᠡ ᠨᠢ ᠬᠤᠮᠣᠬᠠᠢ ᠰᠢᠨᠤᠬᠠᠢ ᠰᠡᠳᠬᠢᠯ ᠢ ᠲᠡᠪᠴᠢᠨ ᠭᠡᠭᠡᠨ ᠲᠤᠩᠭᠠᠯᠠᠭ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ ᠢ ᠬᠡᠯᠡᠨ᠎ᠡ᠃ ᠲᠡᠮᠡᠴᠡᠬᠦᠢ ᠭᠡᠳᠡᠭ ᠨᠢ ᠮᠠᠨ ᠤ ᠮᠣᠩᠭᠤᠯ ᠢᠮᠠᠭᠲᠠ ︽ᠵᠣᠪᠠᠵᠤ ᠪᠠᠶᠢᠭᠰᠠᠨ ᠴᠦ ᠵᠣᠪᠬᠢ ᠨᠢ ᠳᠡᠭᠡᠭᠰᠢ ᠪᠠᠨ︾ ᠪᠠᠶᠢᠵᠤ᠂ ᠶᠠᠭᠤ ᠪᠦᠬᠦᠨ ᠰᠠᠶᠢᠬᠠᠨ ᠪᠣᠯᠣᠨ᠎ᠠ ᠭᠡᠳᠡᠭ ᠲᠤ ᠢᠲᠡᠭᠡᠵᠦ ᠨᠠᠶᠢᠳᠠᠵᠤ᠂ ᠲᠡᠮᠡᠴᠡᠵᠦ ᠲᠡᠮᠡᠦᠯᠡᠵᠦ ᠶᠠᠪᠤᠭᠰᠠᠨ ᠢ ᠬᠡᠯᠡᠵᠦ ᠪᠠᠶᠢᠭ᠎ᠠ᠃ ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠮᠠᠨᠢ ᠡᠶᠢᠮᠦ ᠯᠠ ᠡᠴᠢᠨ᠎ᠡ ᠳᠠᠯᠳᠠ ᠶᠢᠨ ᠤᠳᠬ᠎ᠠ ᠤᠴᠢᠷ ᠠᠬᠤᠭᠤᠯᠤᠭᠰᠠᠨ ᠶᠡᠷᠦ ᠪᠤᠰᠤ ᠶᠢᠨ ᠭᠦᠨ ᠤᠬᠠᠭᠠᠨ ᠤ ᠲᠤᠯᠬᠤ ᠴᠡᠭ ᠶᠤᠮ ᠳ᠋ᠠ᠃ ᠭᠡᠲᠡᠯ᠎ᠡ ᠥᠨᠥᠳᠥᠷ ᠪᠢᠳᠡ ᠡᠨᠡ ᠪᠦᠬᠦᠨ ᠢ ᠦᠯᠦ ᠠᠩᠵᠠᠭᠠᠷᠠᠬᠤ ᠪᠤᠶᠦ ᠪᠦᠷᠢᠮᠦᠰᠦᠨ ᠮᠠᠷᠲᠠᠵᠤ ᠣᠷᠬᠢᠭᠰᠠᠨ ᠡᠰᠡᠪᠡᠯ ᠦᠨ᠎ᠡ ᠴᠡᠨ᠎ᠡ ᠳᠤ ᠬᠦᠷᠪᠡᠯ ᠲᠣᠯᠣᠭᠠᠢ ᠳᠠᠪᠠᠭᠤᠯᠤᠨ ᠬᠤᠳᠠᠯᠳᠤᠵᠤ ᠬᠤᠪᠢᠯᠭᠠᠵᠤ ᠪᠠᠶᠢᠭ᠎ᠠ ᠶᠢ ᠬᠡᠯᠡᠬᠦ ᠳᠤ ᠶᠠᠭᠤᠲᠠᠢ ᠭᠠᠰᠢᠭᠤᠨ᠃ ᠡᠭᠦᠨ ᠠᠴᠠ ᠰᠢᠯᠲᠠᠭᠠᠯᠠᠵᠤ ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠶᠠᠭᠤ ᠨᠢᠭᠡ ᠶᠢ ᠦᠭᠡᠶᠢᠯᠡᠭᠡᠳ ᠤᠭᠢᠯᠠᠵᠤ ᠳᠠᠭᠤᠯᠠᠵᠤ ᠪᠠᠶᠢᠬᠤ ᠰᠢᠭ᠋᠂ ᠭᠤᠣᠯ ᠢᠶᠠᠨ ᠲᠠᠰᠤᠷᠠᠲᠠᠯ᠎ᠠ ᠪᠢᠳᠡᠨ ᠳᠡᠭᠡᠨ ᠭᠤᠮᠣᠳᠠᠵᠤ ᠭᠤᠨᠳᠠᠵᠤ ᠪᠠᠶᠢᠬᠤ ᠰᠢᠭ᠋ ᠪᠠᠶᠢᠰᠭᠢᠭᠠᠳ ᠯᠠ ᠨᠠᠳᠠᠳᠤ ᠪᠣᠳᠣᠭᠳᠠᠬᠤ ᠨᠢ ᠬᠠᠴᠢᠨ ᠪᠥᠭᠡᠳ ᠬᠡᠴᠡᠭᠦᠦ᠃ ᠵᠠᠷᠢᠮ ᠭᠠᠵᠠᠷ ᠤᠳ ᠢᠶᠠᠷ ᠡᠨᠡ ᠭᠤᠷᠪᠠᠨ ᠴᠢᠯᠠᠭᠤ ᠲᠣᠳᠣᠷᠬᠠᠢ ᠪᠤᠰᠤ ᠰᠢᠯᠲᠠᠭᠠᠨ ᠢᠶᠠᠷ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭ᠎ᠠ ᠪᠣᠯᠵᠤ ᠪᠠᠶᠢᠭ᠎ᠠ ᠭᠡᠨ᠎ᠡ᠃ ᠲᠡᠷᠡ ᠲᠡᠭᠡᠭᠡᠳ ᠬᠠᠮᠢᠭ᠎ᠠ ᠨᠡᠭᠦᠭᠡᠳ ᠶᠠᠪᠤᠴᠢᠬᠠᠭᠰᠠᠠ ᠶᠤᠮ ᠪᠣᠯ ᠡ︖ ᠬᠡᠨ ᠨᠡᠭᠦᠯᠭᠡᠭᠡᠳ ᠶᠠᠪᠤᠴᠢᠬᠠᠭᠰᠠᠨ ᠶᠤᠮ ᠪᠣᠯ ᠡ︖ ᠡᠵᠡᠨ ᠨᠢ ᠰᠠᠭᠤᠷᠢᠰᠢᠭᠠᠳ ᠡᠬᠢᠯᠡᠬᠦ ᠳᠤ ᠴᠢᠯᠠᠭᠤ ᠨᠢ ᠨᠡᠭᠦᠳᠡᠯᠯᠡᠭᠡᠳ ᠶᠠᠪᠤᠴᠢᠬᠠᠳᠠᠭ ᠶᠤᠮ ᠭᠡᠵᠢ ᠦᠦ⁈ᠮᠣᠩᠭᠤᠯ ᠬᠦᠮᠦᠨ ᠪᠦᠬᠦᠨ ᠨᠤᠲᠤᠭ ᠤᠰᠤᠨ ᠤ ᠪᠠᠨ ᠶᠠᠭᠤ ᠪᠣᠯᠭᠠᠨ ᠳᠤ ᠦᠷ᠎ᠡ ᠰᠠᠳᠤᠨ ᠢᠶᠠᠨ ᠰᠢᠭ᠋ ᠬᠠᠶᠢᠷᠠᠲᠠᠢ ᠪᠦᠭᠡᠳ ︽ᠠᠮᠢ ᠲᠠᠢ ᠪᠣᠯᠭᠠᠨ ᠨᠢ ᠰᠠᠬᠢᠭᠤᠰᠤ ᠲᠠᠢ᠂ ᠠᠮᠢ ᠦᠭᠡᠢ ᠪᠣᠯᠭᠠᠨ ᠨᠢ ᠡᠵᠡᠨ ᠲᠠᠢ︾ ᠬᠡᠮᠡᠨ ᠰᠠᠨᠠᠵᠤ᠂ ᠲᠡᠷᠡ ᠳᠤᠮᠳᠠ ᠪᠠᠨ ᠴᠢᠯᠠᠭᠤ ᠶᠢ ᠮᠠᠰᠢ ᠶᠡᠭᠡ ᠬᠠᠶᠢᠷᠠᠯᠠᠨ ᠳᠡᠭᠡᠳᠦᠯᠡᠳᠡᠭ ᠪᠠᠶᠢᠪᠠ᠃ ᠳᠠᠭᠤ ᠶᠢ ᠨᠢ ᠰᠣᠨᠣᠰᠬᠤ ᠭᠡᠵᠤ ᠬᠤᠭᠤᠷᠣᠨᠳᠤ ᠨᠢ ᠬᠠᠪᠢᠷᠤᠯᠳᠤᠭᠤᠯᠤᠨ ᠣᠴᠢ ᠦᠰᠦᠷᠬᠦ ᠶᠢ ᠨᠢ ᠬᠠᠷᠠᠬᠤ ᠭᠡᠵᠤ ᠨᠢᠭᠡ ᠪᠠᠷ ᠨᠢ ᠨᠥᠭᠦᠭᠡ ᠶᠢ ᠨᠢ ᠪᠠᠯᠪᠠᠴᠢᠵᠤ ᠪᠠᠶᠢᠭᠠᠳ ︽ᠴᠢᠨ᠋ᠸ᠎ᠠ ᠶᠢᠨ ᠰᠢᠳᠦ ᠬᠤᠷᠴᠠᠳᠳᠠᠭ ᠭᠡᠳᠡᠭ ᠶᠤᠮ︾ ᠭᠡᠵᠤ ᠡᠵᠢ ᠪᠠᠷ ᠢᠶᠠᠨ ᠴᠡᠭᠡᠷᠯᠡᠭᠦᠯᠦᠨ ᠵᠠᠩᠨᠠᠭᠤᠯᠳᠠᠭ ᠪᠠᠶᠢᠭᠰᠠᠨ ᠪᠠᠭ᠎ᠠ ᠶᠢᠨ ᠶᠠᠪᠤᠳᠠᠯ ᠢᠶᠠᠨ ᠮᠠᠷᠲᠠᠵᠤ ᠦᠯᠦ ᠴᠢᠳᠠᠨ᠎ᠠ᠃ ᠲᠡᠷᠡ ᠨᠢ ᠨᠤᠲᠤᠭ ᠤᠨ ᠴᠢᠯᠠᠭᠤ ᠪᠠᠨ ᠴᠠᠪᠠ ᠰᠡᠪ ᠰᠠᠭᠤᠯᠭᠠᠴᠢᠬᠠᠬᠤ ᠠᠴᠠ ᠯᠠ ᠬᠠᠷᠠᠮᠨᠠᠵᠤ ᠬᠢᠮᠠᠭᠠᠳᠠᠵᠤ ᠪᠠᠶᠢᠭᠰᠠᠨ ᠬᠡᠷᠡᠭ ᠭᠡᠳᠡᠭ ᠢ ᠰᠡᠭᠦᠯ  ᠳᠤ ᠨᠢ ᠤᠬᠠᠭᠠᠷᠠᠭᠰᠠᠨ᠃ ᠮᠠᠨ ᠤ ᠮᠣᠩᠭᠤᠯᠴᠤᠳ ᠡᠷᠲᠡ ᠢᠵᠠᠭᠤᠷ ᠠᠴᠠ ᠪᠠᠨ ᠴᠠᠬᠢᠭᠤᠷ ᠴᠢᠯᠠᠭᠤ ᠪᠠᠷ ᠬᠡᠲᠡ ᠴᠠᠬᠢᠨ ᠭᠠᠯ ᠢᠶᠠᠨ ᠠᠰᠠᠭᠠᠵᠤ᠂ ᠠᠮᠢ ᠠᠮᠢᠳᠤᠷᠠᠯ ᠢᠶᠠᠨ ᠦᠷᠭᠦᠯᠵᠢᠯᠡᠭᠦᠯᠵᠦ ᠢᠷᠡᠭᠰᠡᠨ᠃ ᠡᠷᠳᠡᠨᠢ ᠶᠢᠨ ᠴᠢᠯᠠᠭᠤ ᠪᠠᠷ  ᠨᠢ ᠬᠥᠭᠡᠷᠭᠡ ᠪᠣᠯᠭᠠᠨ ᠮᠡᠨᠳᠦ ᠵᠥᠷᠢᠭᠦᠯᠵᠦ᠂ ᠭᠠᠩᠰᠠᠨ ᠤ ᠰᠣᠷᠣᠭᠤᠯ ᠪᠣᠯᠭᠠᠨ ᠡᠳᠦᠷᠵᠢᠨ ᠬᠥᠬᠦᠵᠦ ᠰᠢᠮᠡᠵᠦ᠂ ᠰᠣᠨᠳᠣᠷ ᠪᠦᠯᠡᠵᠡᠭ ᠪᠣᠯᠭᠠᠨ ᠭᠤᠶᠣᠵᠣ ᠭᠠᠩᠭᠠᠷᠠᠵᠤ ᠶᠠᠪᠤᠭᠰᠠᠨ᠃ ᠭᠠᠵᠠᠷ ᠤᠨ ᠴᠢᠯᠠᠭᠤᠵᠢᠭᠰᠠᠨ ᠨᠢᠯᠪᠤᠰᠤ᠂ ᠭᠠᠷᠴᠠᠭ᠎ᠠ ᠦᠭᠡᠢ ᠪᠢᠳᠡᠨ ᠤ ᠴᠤᠭᠯᠠᠷᠠᠭᠰᠠᠨ ᠪᠣᠳᠣᠯ ᠬᠡᠮᠡᠨ ᠪᠡᠯ ᠤᠨ ᠴᠢᠯᠠᠭᠤᠳ ᠢᠶᠠᠨ ᠳᠡᠭᠡᠭᠰᠢ ᠨᠢ ᠬᠤᠮᠢᠵᠤ᠂ ᠣᠪᠣᠭ᠎ᠠ ᠪᠣᠰᠬᠠᠨ ᠭᠠᠵᠠᠷ ᠲᠡᠭᠷᠢ ᠲᠠᠢ ᠪᠠᠨ ᠦᠭᠡ ᠪᠠᠨ ᠣᠯᠣᠯᠴᠠᠵᠤ᠂ ᠡᠭᠦᠷᠢᠳᠡ ᠶᠢᠨ ᠰᠠᠶᠢᠨ ᠰᠠᠶᠢᠬᠠᠨ ᠢᠶᠠᠨ ᠳᠠᠭᠠᠳᠬᠠᠵᠤ ᠢᠷᠡᠭᠰᠡᠨ᠃ ᠬᠠᠮᠢᠭ᠎ᠠ ᠲᠤᠷᠠᠲᠠᠢ ᠭᠠᠵᠠᠷ ᠢᠶᠠᠨ ᠬᠠᠨ᠎ᠠ ᠪᠠᠨ ᠳᠤᠭᠤᠶᠢᠯᠠᠨ ᠬᠠᠶᠠᠭ᠎ᠠ ᠪᠠᠨ ᠴᠢᠯᠠᠭᠤ ᠪᠠᠷ ᠳᠠᠷᠤᠵᠤ᠂ ᠴᠢᠭᠲᠠᠭ᠎ᠠ ᠪᠠᠨ ᠴᠢᠯᠠᠭᠤ ᠪᠠᠷ ᠪᠠᠬᠢᠯᠡᠨ ᠴᠢᠩᠭᠠᠯᠠᠵᠤ᠂ ᠭᠠᠯᠵᠠᠭᠤ ᠰᠢᠭᠤᠷᠭᠠᠨ ᠳᠤ ᠴᠦ ᠢᠰᠡᠭᠡᠢ ᠣᠷᠳᠣᠨ ᠨᠢ ᠭᠠᠩᠬᠤᠯ ᠦᠭᠡᠢ ᠪᠠᠭᠤᠷᠢ ᠰᠠᠭᠤᠷᠢ ᠲᠠᠢ ᠪᠦᠲᠦᠨ ᠲᠣᠬᠢᠯᠢᠭ ᠪᠠᠶᠢᠵᠤ ᠴᠢᠳᠠᠭᠰᠠᠨ᠃ ᠬᠢᠲᠤᠭ᠎ᠠ ᠰᠡᠯᠡᠮ᠎ᠡ ᠪᠠᠨ ᠴᠢᠯᠠᠭᠤ ᠪᠠᠷ ᠪᠢᠯᠡᠭᠦᠳᠡᠵᠦ᠂ ᠲᠠᠷᠢᠶ᠎ᠠ ᠪᠤᠳᠠᠭ᠎ᠠ ᠪᠠᠨ ᠴᠢᠯᠠᠭᠤᠨ ᠲᠡᠭᠡᠷᠮ᠎ᠡ ᠪᠠᠷ ᠲᠠᠯᠬᠠᠳᠠᠵᠤ ᠪᠠᠶᠢᠯ᠎ᠠ᠃ ᠳᠦᠴᠢᠨ ᠨᠢᠭᠡᠨ ᠴᠢᠯᠠᠭᠤ ᠪᠠᠷ ᠨᠢ ᠬᠤᠪᠤᠯᠠᠭ ᠲᠠᠲᠠᠨ ᠲᠥᠯᠭᠡ ᠪᠠᠷᠢᠵᠤ᠂ ᠬᠤᠯᠠ ᠣᠶᠢᠷ᠎ᠡ ᠶᠢᠨ ᠤᠴᠢᠷ ᠪᠢᠲᠡᠭᠦᠯᠢᠭ ᠴᠢᠮᠡᠭᠡ ᠶᠢ ᠴᠢᠯᠠᠭᠤᠨ ᠤ ᠪᠠᠨ ᠪᠠᠭᠤᠯᠲᠠ ᠠᠴᠠ ᠵᠠᠳᠠᠯᠤᠨ ᠬᠠᠷᠠᠳᠠᠭ ᠪᠠᠶᠢᠯ᠎ᠠ᠃ ᠲᠡᠭᠡᠭᠡᠳ ᠴᠦ ᠵᠣᠭᠰᠤᠬᠤ ᠦᠭᠡᠢ ᠬᠤᠷᠸ᠎ᠠ ᠠᠴᠠ ᠨᠠᠰᠤ ᠪᠠᠨ ᠶᠡᠭᠦᠯᠡᠬᠦ ᠳᠡᠭᠡᠨ ᠨᠤᠲᠤᠭ ᠤᠨ ᠢᠶᠠᠨ ᠪᠦᠯᠢᠶᠡᠨ ᠴᠢᠯᠠᠭᠤ ᠶᠢ ᠳᠡᠷᠡᠯᠡᠭᠡᠳ᠂ ᠨᠤᠲᠤᠭ ᠤᠰᠤᠨ ᠳᠠᠭᠠᠨ ᠮᠥᠩᠬᠡᠷᠡᠨ ᠰᠢᠩᠭᠡᠳᠡᠭ ᠪᠠᠶᠢᠪᠠ᠃ ᠮᠢᠩᠭ᠎ᠠ ᠮᠢᠩᠭᠠᠨ ᠵᠢᠯ ᠤᠨ ᠲᠤᠷᠰᠢ ᠮᠣᠩᠭᠤᠯ ᠬᠦᠮᠦᠨ ᠤ ᠠᠮᠢᠳᠤᠷᠠᠯ ᠠᠬᠤᠢ ᠳᠤ ᠴᠢᠯᠠᠭᠤ ᠴᠢᠯᠠᠭᠤᠨ ᠤ ᠦᠵᠡᠭᠦᠯᠦᠭᠰᠡᠨ ᠠᠴᠢ ᠭᠠᠪᠢᠶ᠎ᠠ ᠶᠢ ᠶᠠᠭᠠᠬᠢᠨ ᠲᠣᠭᠠᠴᠢᠵᠤ ᠪᠠᠷᠠᠬᠤ ᠪᠢᠯᠡ᠃ ᠲᠡᠶᠢᠮᠦ ᠠᠴᠠ ᠨᠤᠲᠤᠭ ᠤᠰᠤᠨ ᠤ ᠮᠢᠨᠢ ᠴᠢᠯᠠᠭᠤ ᠪᠣᠯᠭᠠᠨ ᠪᠦᠷ ᠠᠯᠮᠠᠰ ᠡᠷᠳᠡᠨᠢ ᠠᠴᠠ ᠦᠨᠡᠲᠡᠢ ᠪᠦᠭᠡᠳ ᠪᠠᠰᠠ ᠡᠷᠲᠡ ᠪᠠᠯᠠᠷ ᠤᠨ ᠦᠯᠢᠭᠡᠷ ᠳᠣᠮᠤᠭ ᠰᠢᠩᠭᠡᠭᠡᠰᠦᠲᠡᠢ ᠤᠨᠠᠭᠠᠨ ᠪᠠᠶᠢᠭᠠᠯᠢ ᠶᠢᠨ ᠮᠥᠩᠬᠡ ᠶᠢᠨ ᠰᠤᠳᠤᠷ ᠤᠳ ᠪᠢᠯᠡ᠃ᠪᠣᠯᠴᠢᠮ ᠦᠭᠡᠢ ᠲᠡᠨᠡᠭᠬᠡᠨ ᠨᠠᠰᠤᠨ ᠳᠠᠭᠠᠨ ᠰᠢᠪᠠᠭᠤᠨ ᠳᠤ ᠴᠦ ᠶᠤᠮ ᠦᠦ ᠲᠠᠤᠯᠠᠢ ᠳᠤ ᠴᠦ ᠶᠤᠮ ᠦᠦ ᠰᠢᠳᠡᠭᠰᠡᠨ ᠴᠢᠯᠠᠭᠤ ᠠᠵᠠ ᠪᠠᠷ ᠲᠤᠰᠤᠭ᠎ᠠ ᠦᠭᠡᠢ ᠶᠤᠮ᠃ ᠴᠢᠯᠠᠭᠤ ᠥᠪᠡᠷ ᠢᠶᠠᠨ ︽ᠵᠠᠮ ᠪᠤᠷᠤᠭᠤᠯᠠᠭᠠᠳ︾ ᠣᠨᠤᠭ᠎ᠠ ᠦᠭᠡᠢ  ᠨᠢ ᠨᠠᠮᠠᠶᠢ ᠨᠢᠭᠦᠯ ᠬᠢᠬᠦ ᠠᠴᠠ ᠨᠢᠭᠡ ᠤᠳᠠᠭ᠎ᠠ ᠴᠦ ᠪᠣᠯᠪᠠ ᠠᠪᠤᠷᠠᠵᠤ ᠳ᠋ᠠ ᠭᠡᠵᠤ ᠪᠢ ᠣᠳᠣ ᠪᠢ ᠴᠢᠯᠠᠭᠤᠨ ᠳᠤ ᠦᠷᠭᠦᠯᠵᠢ ᠵᠠᠯᠪᠠᠷᠢᠨ ᠲᠠᠯᠠᠷᠬᠠᠳᠠᠭ ᠰᠠᠨ᠃ ᠦᠳᠡᠰᠢ ᠪᠠᠷ ᠲᠣᠬᠤᠭᠤᠷᠠᠬᠠᠭᠠᠳ ᠲᠡᠷᠭᠡᠯ ᠰᠠᠷᠠᠨ ᠥᠭᠡᠳᠡ ᠰᠢᠳᠡᠭᠰᠡᠨ ᠴᠢᠯᠠᠭᠤ ᠮᠠᠨᠢ ᠣᠳᠣ ᠬᠦᠷᠲᠡᠯ᠎ᠡ ᠵᠣᠷᠢᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠬᠦᠷᠴᠦ ᠴᠢᠳᠠᠭ᠎ᠠ ᠦᠭᠡᠢ ᠶᠠᠭ ᠯᠠ ᠮᠢᠨᠦ ᠪᠡᠶᠡᠯᠡᠭᠡ ᠦᠭᠡᠢ ᠮᠥᠷᠥᠭᠡᠳᠦᠯ ᠰᠢᠭ ᠵᠠᠮ ᠳᠠᠭᠠᠨ ︽ᠨᠢᠰᠴᠦ︾ ᠯᠠ ᠶᠠᠪᠤᠭ᠎ᠠ ᠭᠡᠳᠡᠭ ᠲᠤ ᠪᠢ ᠢᠲᠡᠭᠡᠨᠡᠮ᠃ᠣᠨ ᠵᠢᠯ ᠢ ᠬᠦᠯᠬᠦᠵᠦ᠂ ᠡᠰᠡᠪᠡᠯ ᠣᠨ ᠵᠢᠯ ᠳᠤ ᠬᠦᠯᠬᠦᠭᠳᠡᠵᠦ᠂ ᠪᠤᠮ ᠰᠠᠶ᠎ᠠ ᠵᠢᠯ ᠢᠶᠠᠷ ᠡᠨᠡ ᠯᠠ ᠨᠤᠲᠤᠭ ᠤᠨ ᠨᠠᠷᠠ ᠰᠠᠯᠬᠢ ᠵᠠᠯᠭᠢᠯᠠᠵᠤ᠂ ᠡᠷᠬᠡ ᠳᠤᠷ᠎ᠠ ᠪᠠᠷ ᠱᠠᠷᠭᠢᠵᠤ ᠱᠠᠭᠢᠵᠤ ᠬᠡᠪᠲᠡᠭᠰᠡᠨ ᠬᠡᠭᠡᠷ᠎ᠡ ᠲᠠᠯ᠎ᠠ ᠶᠢᠨ ᠬᠡᠬᠡᠮᠰᠦᠭ ᠴᠢᠯᠠᠭᠤᠳ ᠮᠢᠨᠢ ᠥᠨᠥ ᠪᠣᠯᠬᠤ ᠳᠤ ᠭᠠᠷ ᠠᠴᠠ ᠭᠠᠷ ᠳᠠᠮᠵᠢᠨ᠂ ᠭᠠᠵᠠᠷ ᠠᠴᠠ ᠭᠠᠵᠠᠷ ᠠᠯᠤᠰᠯᠠᠨ᠂ ᠮᠥᠩᠭᠦ ᠠᠴᠠ ᠮᠥᠩᠭᠦ ᠬᠤᠪᠢᠯᠤᠨ ᠬᠠᠮᠢᠭ᠎ᠠ ᠣᠴᠢᠵᠤ ᠶᠠᠪᠤᠭ᠎ᠠ ᠶᠢ ᠪᠢ ᠶᠠᠭᠠᠬᠢᠨ ᠮᠡᠳᠡᠨᠡᠮ᠃ ᠭᠠᠭᠴᠠ ᠬᠦ ᠡᠭᠦᠰᠦᠭᠰᠡᠨ ︽ᠲᠥᠷᠥᠭᠰᠡᠨ︾ ᠨᠤᠲᠤᠭ ᠠᠴᠠ ᠪᠠᠨ ᠰᠠᠯᠤᠭᠠᠳ ᠤᠭᠢᠯᠠᠨ ᠬᠠᠶᠢᠯᠠᠨ ᠶᠠᠪᠤᠭ᠎ᠠ ᠶᠢ ᠯᠠ ᠬᠠᠮᠢᠭ᠎ᠠ ᠨᠢᠭᠡ ᠵᠦᠭ ᠠᠴᠠ ᠣᠯᠵᠤ ᠰᠣᠨᠣᠰᠬᠤ ᠲᠡᠳᠦᠶᠢᠬᠡᠨ ᠶᠠᠪᠤᠨᠠᠮ᠃ᠬᠤᠷᠳᠤᠨ ᠮᠣᠷᠢᠨ ᠤ ᠲᠤᠭᠤᠷᠠᠢ ᠪᠠᠷ ᠣᠷᠣᠨ ᠠᠴᠠ ᠪᠠᠨ ᠲᠥᠭᠡᠷᠢᠴᠢᠬᠦ ᠠᠴᠠ ᠬᠢᠴᠢᠶᠡᠳᠡᠭ ᠮᠥᠷᠲᠡᠭᠡᠨ ᠪᠠᠰᠠ ᠮᠠᠯ ᠤᠨ ᠢᠶᠠᠨ ᠬᠤᠶᠢᠨ᠎ᠠ ᠠᠴᠠ ᠰᠢᠳᠡᠵᠦ᠂ ᠵᠠᠶᠠᠭ᠎ᠠ ᠶᠢ ᠨᠢ ᠭᠡᠮᠲᠦᠭᠡᠬᠦ ᠠᠴᠠ ᠪᠣᠯᠭᠤᠮᠵᠢᠯᠠᠭᠠᠳ ᠬᠠᠶᠠᠵᠤ ᠴᠢᠳᠠᠭ᠎ᠠ ᠦᠭᠡᠢ ᠭᠠᠵᠠᠷ ᠲᠤ ᠨᠢ ᠣᠷᠬᠢᠭᠰᠠᠨ ᠲᠡᠷᠡ ᠴᠢᠯᠠᠭᠤ᠂ ᠬᠦᠢ ᠶᠢ ᠮᠢᠨᠢ ᠲᠠᠰᠤᠯᠤᠭᠰᠠᠨ ᠲᠡᠷᠡ ᠢᠷ ᠲᠠᠢ ᠴᠢᠯᠠᠭᠤ ᠪᠠᠰᠠ ᠬᠦᠢ ᠶᠢ ᠮᠢᠨᠢ ᠡᠯᠢᠭᠡᠨ ᠳᠣᠣᠷ᠎ᠠ ᠪᠠᠨ ᠳᠠᠷᠤᠵᠤ ᠨᠢᠭᠤᠴᠠᠯᠠᠭᠰᠠᠨ ᠡᠩᠭᠡᠷ ᠭᠠᠵᠠᠷ ᠤᠨ ᠬᠤᠨᠢᠨ ᠴᠠᠭᠠᠨ ᠴᠢᠯᠠᠭᠤ ᠂ ᠪᠠᠯᠴᠢᠷ ᠪᠠᠭ᠎ᠠ ᠠᠴᠠ ᠪᠠᠨ ᠮᠠᠯ ᠰᠦᠷᠦᠭ᠂ ᠭᠡᠷ ᠪᠠᠶᠢᠰᠢᠩ᠂ ᠠᠪᠳᠠᠷ᠎ᠠ ᠰᠠᠪᠠ ᠪᠣᠯᠭᠠᠵᠤ ᠲᠣᠭᠯᠠᠵᠤ ᠪᠠᠶᠢᠭᠰᠠᠨ ᠬᠤᠷᠸ᠎ᠠ ᠶᠢᠨ ᠪᠦᠬᠦ ᠥᠩᠭᠡ ᠶᠢ ᠪᠠᠵᠠᠵᠤ ᠪᠠᠭᠲᠠᠭᠠᠭᠰᠠᠨ ᠲᠠᠷᠡ ᠣᠯᠠᠨ ᠶᠠᠩᠵᠤ ᠬᠡᠯᠪᠡᠷᠢ ᠶᠢᠨ ᠴᠢᠯᠠᠭᠤ᠂ ᠮᠣᠩᠭᠤᠯ ᠠᠶᠢᠯ ᠤᠨ ᠬᠡᠦᠬᠡᠳ ᠤᠳ ︽ᠪᠢᠯᠡᠭᠦᠦ ᠴᠢᠯᠠᠭᠤ᠂ ᠪᠢᠯᠡᠭᠦᠦ ᠴᠢᠯᠠᠭᠤ᠂᠂᠂︾ ᠬᠡᠮᠡᠨ ᠬᠡᠯᠡ ᠳᠤ ᠣᠷᠣᠳᠠᠭ ᠪᠠᠶᠢᠭᠰᠠᠨ ᠲᠡᠷᠡ ᠤᠪᠠᠳᠢᠰ ᠲᠠᠢ ᠴᠢᠯᠠᠭᠤ᠂ ᠬᠥᠯ ᠳᠤ ᠣᠷᠤᠬᠤ ᠳᠤ ᠨᠢ ᠪᠦᠳᠦᠷᠢᠭᠡᠵᠦ᠂ ᠤᠭᠢᠯᠠᠭᠤᠯᠵᠤ ᠬᠤᠷᠸ᠎ᠠ ᠶᠢᠨ ᠠᠭᠠᠭ ᠣᠮᠤᠭ ᠢ ᠠᠩᠬ᠎ᠠ ᠲᠠᠨᠢᠭᠤᠯᠤᠭᠰᠠᠨ ᠲᠡᠷᠡ ︽ᠤᠬᠠᠭᠠᠯᠢᠭ︾ ᠴᠢᠯᠠᠭᠤ᠂᠂᠂ ᠣᠳᠣ ᠬᠠᠮᠢᠭ᠎ᠠ ᠪᠠᠶᠢᠨ᠎ᠠ︖ ᠬᠠᠮᠢᠭ᠎ᠠ ᠪᠠᠶᠢᠨ᠎ᠠ ᠡ⁉ ᠮᠠᠯ ᠠᠮᠢᠲᠠᠨ ᠤ ᠲᠤᠭᠤᠷᠠᠢ ᠳᠤ᠂ ᠴᠠᠭ ᠤᠨ ᠰᠠᠯᠬᠢᠨ ᠳᠤ᠂ ᠭᠠᠯᠠᠪ ᠤᠨ ᠡᠷᠬᠡ ᠪᠠᠷ ᠡᠷᠳᠡᠨᠢ ᠶᠢᠨ ᠴᠢᠯᠠᠭᠤ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠳᠠᠭᠠᠨ᠂ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠨ ᠤ ᠭᠠᠯᠪᠢᠷ ᠳᠦᠷᠰᠦ ᠲᠠᠢ ᠲᠥᠰᠲᠡᠢ ᠪᠣᠯᠵᠤ ᠪᠦᠲᠦᠭᠰᠡᠨ ᠳᠡᠭᠡᠨ᠂ ᠬᠡᠨ ᠨᠢᠭᠡᠨ ᠤ ᠬᠡᠲᠡᠪᠴᠢ ᠲᠠᠷᠭᠤᠯᠠᠭᠤᠯᠤᠨ ᠨᠢᠳᠦ ᠰᠡᠳᠬᠢᠯ ᠤᠨ ᠬᠢᠨᠢ ᠬᠤᠷᠣᠬᠠᠢ ᠶᠢ ᠭᠠᠷᠭᠠᠨ ᠭᠡᠷ ᠤᠨ ᠮᠤᠬᠤᠷ ᠲᠤ ᠠᠮᠢᠰᠬᠤᠯ ᠳᠠᠪᠴᠢᠳᠠᠨ ᠦᠵᠡᠮᠦᠷᠢ ᠪᠣᠯᠣᠨ ᠬᠡᠪᠲᠡᠬᠦ ᠳᠡᠭᠡᠨ ᠬᠡᠮᠵᠢᠶ᠎ᠡ ᠬᠢᠵᠠᠭᠠᠷ ᠦᠭᠡᠢ ᠬᠠᠷᠠᠮᠰᠠᠨ ᠶᠠᠩᠭᠢᠨᠠᠲᠠᠯ᠎ᠠ ᠤᠭᠢᠯᠠᠳᠠᠭ ᠨᠢ ᠮᠡᠳᠡᠭᠡᠵᠢ᠃︽ᠮᠠᠨ ᠤ ᠣᠶᠢᠷ᠎ᠡ ᠬᠠᠪᠢ ᠳᠤ ᠥᠩᠭᠡ ᠲᠠᠢ ᠬᠡᠯᠪᠡᠷᠢ ᠲᠠᠢ ᠦᠨᠡᠲᠦ ᠰᠠᠶᠢᠬᠠᠨ ᠴᠢᠯᠠᠭᠤ ᠪᠠᠶᠢᠳᠠᠭ ᠦᠭᠡᠢ ᠳᠤ ᠨᠢ ᠪᠢ ᠶᠡᠭᠡ ᠪᠠᠶᠠᠷᠯᠠᠳᠠᠭ᠃ ᠪᠤᠷᠬᠠᠨ ᠲᠡᠭᠷᠢ ᠳᠡᠭᠡᠨ ᠪᠠᠰᠠ ᠵᠠᠯᠪᠠᠷᠢᠳᠠᠭ︾ ᠭᠡᠵᠤ ᠳᠡᠭᠦᠦ ᠶᠢᠨ ᠮᠠᠨᠢ ᠬᠡᠯᠡᠭᠰᠡᠨ ᠢ ᠪᠢ ᠮᠠᠷᠲᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠶᠤᠮ᠃ᠪᠢ ᠵᠡᠭᠦᠳᠦᠨ ᠤ ᠪᠠᠨ ᠭᠦᠨ ᠠᠯᠤᠰ ᠲᠤ᠂ ᠵᠥᠩ ᠮᠡᠳᠡᠷᠡᠬᠦᠢ ᠶᠢᠨ ᠢᠶᠠᠨ ᠲᠣᠷᠭᠠᠨ ᠰᠡᠵᠢᠭᠦᠷ ᠲᠤ ᠨᠤᠲᠤᠭ ᠤᠨ ᠴᠢᠯᠠᠭᠤᠳ ᠤᠨ ᠢᠶᠠᠨ ᠮᠡᠭᠰᠢᠨ ᠤᠭᠢᠯᠠᠯᠳᠤᠬᠤ ᠶᠢ ᠳᠠᠩᠳᠠ ᠣᠯᠵᠣ ᠰᠣᠨᠣᠰᠳᠠᠭ᠃ ᠬᠤᠲᠠ ᠰᠠᠭᠤᠷᠢᠨ᠂ ᠳᠣᠲᠣᠷ ᠭᠠᠵᠠᠷ ᠲᠤ ᠡᠵᠡᠨ ᠠᠴᠠ ᠪᠠᠨ ᠤᠷᠢᠲᠠᠵᠤ᠂ ᠨᠡᠭᠦᠵᠦ ᠣᠴᠢᠵᠤ ᠪᠠᠶᠢᠭ᠎ᠠ ᠤᠤᠭᠠᠯ ᠨᠤᠲᠤᠭ ᠤᠨ ᠮᠢᠨᠢ ᠴᠢᠯᠠᠭᠤ ᠥᠪᠡᠷ ᠤᠨ ᠢᠶᠠᠨ ᠬᠤᠪᠢ ᠵᠠᠶᠠᠭᠠᠨ ᠤ ᠲᠤᠬᠠᠢ ᠡᠰᠡᠪᠡᠯ ᠠᠷᠠᠴᠢᠭ᠎ᠠ ᠦᠭᠡᠢ ᠡᠵᠡᠨ ᠤ ᠪᠠᠨ ᠲᠤᠬᠠᠢ ᠰᠢᠨᠠᠯᠤᠭᠠᠳ ᠤᠭᠢᠯᠠᠭᠰᠠᠨ ᠪᠠᠶᠢᠵᠦ ᠮᠡᠳᠡᠨ᠎ᠡ᠃ ᠡᠰᠡᠪᠡᠯ ᠣᠷᠣᠰᠢᠨ ᠪᠤᠢ ᠡᠬᠡ ᠳᠡᠯᠡᠬᠡᠢ ᠶᠢᠨ ᠢᠶᠠᠨ ᠢᠷᠡᠭᠡᠳᠦᠢ ᠶᠢᠨ ᠲᠥᠯᠥᠭᠡ ᠰᠢᠮᠰᠢᠷᠡᠨ ᠤᠭᠢᠯᠠᠭᠰᠠᠨ ᠴᠦ ᠪᠠᠶᠢᠵᠤ ᠮᠡᠳᠡᠨ᠎ᠡ᠃ᠣᠷᠣᠨ ᠠᠴᠠ ᠪᠠᠨ ᠬᠥᠳᠡᠯᠥᠭᠰᠡᠨ ᠴᠢᠯᠠᠭᠤ ᠭᠤᠷᠪᠠᠨ ᠵᠢᠯ ᠵᠣᠪᠠᠵᠤ ᠤᠭᠢᠯᠠᠳᠠᠭ ᠬᠡᠮᠡᠨ ᠬᠦᠮᠦᠨ ᠤ ᠨᠤᠲᠤᠭ ᠤᠨ ᠴᠢᠯᠠᠭᠤ ᠶᠢ ᠠᠪᠬᠤ ᠠᠴᠠ ᠡᠷᠡᠰ ᠴᠡᠭᠡᠷᠯᠡᠳᠡᠭ ᠮᠠᠨ ᠤ ᠬᠢᠨ ᠪᠤᠰᠤᠳ ᠤᠨ ᠨᠤᠲᠤᠭ ᠠᠴᠠ ᠴᠢᠯᠠᠭᠤ ᠠᠪᠳᠠᠭ ᠦᠭᠡᠢ ᠪᠦᠭᠡᠳ ᠥᠪᠡᠷ ᠤᠨ ᠨᠤᠲᠤᠭ ᠤᠨ ᠢᠶᠠᠨ ᠴᠢᠯᠠᠭᠤ ᠶᠢ ᠴᠦ ᠪᠤᠰᠤᠳ ᠲᠤ ᠥᠭᠳᠡᠭ ᠦᠭᠡᠢ ᠪᠠᠶᠢᠭᠰᠠᠨ ᠪᠢᠯᠡ᠃ ᠭᠡᠲᠡᠯ᠎ᠡ ᠣᠳᠣ᠂᠂᠂ ᠴᠢᠯᠠᠭᠤ ᠤᠭᠢᠯᠠᠠᠭᠠᠳ ᠯᠠ᠂᠂᠂᠂ᠡᠬᠡ ᠣᠷᠣᠨ ᠤᠷᠤᠭᠤ ᠮᠢᠨᠢ ᠡᠷᠡᠭᠡ ᠴᠡᠭᠡᠷ ᠦᠭᠡᠢ ᠥᠩᠭᠡᠯᠵᠡᠭᠴᠢ ᠡᠵᠡᠷᠬᠡᠭ ᠳᠠᠶᠢᠰᠤᠨ ᠤ ᠥᠭᠡᠳᠡ ᠠᠴᠠ ᠠᠮᠢ ᠬᠠᠶᠢᠷ᠎ᠠ ᠦᠭᠡᠢ ᠲᠡᠮᠡᠴᠡᠯᠳᠣᠵᠣ ᠶᠠᠪᠤᠭᠰᠠᠨ ᠪᠠᠭᠠᠲᠤᠷ ᠤᠳ ᠤᠨ ᠮᠢᠨᠢ ᠠᠰᠬᠠᠷᠠᠭᠰᠠᠨ ᠴᠢᠰᠤ᠂ ᠰᠡᠭᠦᠯᠴᠢ ᠶᠢᠨ ᠪᠣᠳᠤᠯ ᠨᠢ ᠠᠭᠤᠰᠤᠨ ᠰᠢᠮᠡᠳᠦᠭᠰᠡᠨ ᠴᠢᠯᠠᠭᠤ ᠪᠣᠯᠭᠠᠨ ᠢᠶᠠᠨ ᠪᠢᠳᠡ ᠪᠤᠷᠬᠠᠨ ᠠᠴᠠ ᠴᠦ ᠬᠦᠷᠲᠡᠯ᠎ᠡ ᠬᠠᠷᠠᠮᠨᠠᠬᠤ ᠶᠣᠰᠣᠲᠠᠢ ᠪᠠᠶᠢᠭᠰᠠᠨ᠃ ᠭᠡᠲᠡᠯ᠎ᠡ ᠣᠳᠣ᠂᠂᠂ ᠭᠠᠵᠠᠷ ᠤᠨ ᠰᠢᠷᠬ᠎ᠠ ᠰᠡᠳᠡᠷᠡᠭᠡᠳ ᠯᠠ᠂᠂᠂᠂ᠡᠷᠡᠬᠡᠢ ᠶᠢᠨ ᠴᠢᠨᠡᠭᠡᠨ ᠴᠢᠯᠠᠭᠤᠨ ᠠᠴᠠ ᠡᠬᠡ ᠣᠷᠣᠨ ᠮᠢᠨᠢ ᠡᠬᠢᠯᠡᠳᠡᠭ ᠰᠠᠨ᠃ ᠭᠡᠲᠡᠯ᠎ᠡ ᠣᠳᠣ᠂᠂᠂ ᠪᠢ ᠥᠪᠡᠷ ᠢᠶᠠᠨ ᠤᠭᠢᠯᠠᠠᠭᠠᠳ ᠯᠠ᠂᠂᠂᠂ᠴᠢᠯᠠᠭᠤᠳ ᠤᠨ ᠲᠡᠦᠬᠡ ᠪᠣᠯ ᠭᠠᠯᠠᠪ ᠤᠨ ᠲᠡᠦᠬᠡ᠃ ᠴᠢᠯᠠᠭᠤᠳ ᠤᠨ ᠬᠤᠪᠢ ᠵᠠᠶᠠᠭ᠎ᠠ ᠪᠣᠯ ᠨᠤᠲᠤᠭ ᠤᠨ ᠬᠤᠪᠢ ᠵᠠᠶᠠᠭ᠎ᠠ᠃ ᠮᠠᠭᠠᠳ ᠦᠭᠡᠢ ᠴᠢᠯᠠᠭᠤᠳ ᠤᠨ ᠨᠢᠯᠪᠤᠰᠤ ᠪᠢᠳᠡᠨ ᠤ ᠨᠢᠯᠪᠤᠰᠤ ᠪᠠᠶᠢᠵᠤ ᠪᠣᠯᠬᠤ᠃ᠲᠡᠭᠦᠵᠦ ᠬᠤᠳᠠᠯᠳᠤᠭᠰᠠᠨ ᠴᠢᠯᠠᠭᠤᠨ ᠤ ᠪᠠᠨ ᠲᠤᠭ᠎ᠠ ᠪᠠᠷ ᠬᠠᠷᠠᠮᠰᠠᠨ ᠨᠠᠮᠠᠨᠴᠢᠯᠠᠬᠤ ᠴᠠᠭ ᠢᠷᠡᠵᠤ ᠮᠡᠳᠡᠨ᠎ᠡ᠃ ᠰᠢᠨᠤᠯ ᠳᠤ ᠪᠠᠨ ᠴᠠᠳᠬᠤ ᠦᠭᠡᠢ ᠬᠦᠮᠦᠰ ᠴᠢᠯᠠᠭᠤᠨ ᠤ ᠨᠢᠯᠪᠤᠰᠤᠨ ᠳᠤ ᠵᠢᠪᠴᠦ ᠳᠠᠭᠤᠰᠬᠤ ᠴᠠᠭ ᠢᠷᠡᠬᠦ ᠪᠤᠢ ᠭᠡᠵᠤ ᠪᠢ ᠪᠣᠳᠣᠨᠠᠮ᠂ ᠪᠠᠰᠠ ᠠᠶᠤᠨᠠᠮ᠃                 ︽ᠮᠠᠭᠤ ᠴᠢᠷᠠᠶᠢᠲᠤ︾ ᠬᠡᠮᠡᠬᠦ ᠭᠠᠯ ᠪᠡᠴᠢᠨ ᠵᠢᠯ ᠤᠨ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠠᠷᠪᠠᠨ ᠨᠠᠢᠮᠠᠨ ᠪᠤᠶᠤ            2016 ᠣᠨ ᠤ 2 ᠰᠠᠷ᠎ᠠ ᠶᠢᠨ 24   ᠤ ᠡᠳᠦᠷ᠃ ᠤᠯᠠᠭᠴᠢᠨ ᠦᠬᠡᠷ ᠡᠳᠦᠷ᠃ ᠣᠲᠣᠷ ᠤᠨ ᠪᠠᠶᠢᠰᠢᠩ ᠳᠤ᠃ᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ
 
ᠢᠷᠡᠯᠲᠡ᠄ ᠲᠤᠰ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠵᠢᠷᠡᠨ
ᠠᠯᠠᠱᠠ ᠬᠠᠶᠢᠷᠠᠬᠠᠨ ᠮᠢᠨᠢ
ᠪᠤᠯᠵᠤᠭᠠᠨ ᠤ ᠵᠢᠭᠠᠬᠠᠨ ᠠᠮᠠᠷᠠᠭ
ᠰᠦᠪᠸᠢ ᠮᠢᠨᠢ
ᠴᠡᠩᠬᠡᠷ ᠭᠤᠪᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号