| ᠵᠡᠭᠦᠨᠭᠠᠷ ᠪᠤᠶᠠᠨᠪᠠᠲᠤ | | ᠡᠪᠡᠰᠤ ᠡᠪᠡᠰᠣᠨ ᠤ ᠮᠥᠩᠭᠦᠨ ᠰᠤᠷ ᠲᠡᠭᠡᠷᠡ ᠤᠳᠤᠳ ᠤᠨ ᠭᠡᠭᠡ ᠲᠤᠭᠳᠠᠭᠠᠵᠤ | ᠡᠳᠤᠷ ᠡᠳᠤᠷ ᠤᠨ ᠴᠠᠶᠢᠨ ᠤ ᠲᠡᠭᠡᠵᠢ ᠪᠠᠷ ᠲᠡᠯᠡᠭᠡᠢ ᠶᠢᠨ ᠠᠷᠠᠨᠰᠢᠨ ᠢ ᠠᠷᠭᠠᠳᠠᠵᠤ | ᠵᠡᠭᠦᠳᠤ ᠵᠡᠭᠦᠳᠤᠨ ᠤ ᠡᠭᠢᠨ ᠳᠤ ᠭᠥᠤ ᠲᠠᠢ ᠪᠠᠨ ᠤᠴᠠᠷᠠᠨ ᠵᠢᠷᠭᠠᠵᠤ | ᠵᠥᠩ ᠰᠤᠪᠢᠩ ᠤᠨ ᠡᠷᠭᠡ ᠪᠠᠷ ᠥᠪᠡᠷ ᠢ ᠪᠠᠨ ᠬᠠᠭᠤᠷᠤᠨ ᠲᠠᠶᠢᠳᠬᠤᠷᠠᠵᠤ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠤ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠰᠢᠪᠰᠢᠵᠤ ᠤᠷᠭᠢᠭᠰᠠᠨ ᠶᠢᠰᠤᠨ ᠵᠤᠭᠤᠰ ᠪᠠᠷ ᠭᠥᠥ ᠶᠢᠨ ᠢᠶᠠᠨ ᠠᠨᠢᠷ ᠢ ᠨᠠᠭᠠᠰᠢᠯᠠᠭᠤᠯᠵᠤ | ᠰᠢᠪᠡᠨᠡᠵᠤ ᠲᠤᠭᠠᠯᠠᠭᠰᠠᠨ ᠮᠠᠨᠢ ᠶᠢᠨ ᠡᠷᠢᠭᠡ ᠪᠠᠷ ᠭᠥᠤ ᠶᠢᠨ ᠢᠶᠠᠨ ᠰᠡᠭᠦᠳᠡᠷ ᠢ ᠭᠡᠷᠡᠯᠳᠤᠭᠦᠯᠵᠥ | ᠰᠢᠳᠠᠵᠤ ᠲᠥᠷᠡᠯᠵᠡᠭᠰᠡᠨ ᠵᠠᠭ ᠤᠨ ᠭᠠᠯ ᠲᠡᠭᠡᠭᠦᠷ ᠭᠥᠥ ᠶᠢᠨ ᠢᠶᠠᠨ ᠵᠠᠶᠠᠭᠠ ᠶᠢ ᠠᠷᠢᠭᠤᠯᠠᠵᠤ | ᠰᠢᠷᠢᠭᠯᠡᠵᠥ ᠤᠤᠭᠢᠭᠤᠯᠤᠭᠰᠠᠨ ᠰᠠᠩ ᠤᠨ ᠤᠳᠤᠭᠠ ᠪᠠᠷ ᠭᠥᠥ ᠶᠢᠨ ᠢᠶᠠᠨ ᠪᠠᠷᠴᠢᠳ ᠢ ᠥᠷᠭᠦᠭᠡᠵᠥ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠤ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠭᠥᠭᠡ ᠲᠡᠭᠷᠢ ᠶᠢᠨ ᠬᠤᠷᠮᠤᠢ ᠶᠢ ᠲᠤᠷᠭᠠ ᠮᠡᠳᠤ ᠰᠡᠮᠡᠯᠡᠵᠤ ᠨᠠᠮᠠ ᠶᠢ ᠬᠠᠷᠠᠯᠠ᠂ ᠡᠵᠢ ᠮᠢᠨᠢ | ᠭᠥᠭᠯᠡᠷᠡᠭᠰᠡᠨ ᠶᠡᠭᠡ ᠮᠠᠨᠠᠨ ᠢ ᠬᠠᠶᠠᠭᠠ ᠮᠡᠳᠥ ᠰᠢᠭᠤᠵᠤ ᠨᠠᠮᠠ ᠶᠢ ᠰᠠᠷᠠᠪᠴᠢᠯᠠᠯᠠ᠂ ᠡᠵᠢ ᠮᠢᠨᠢ | ᠭᠥᠭᠡᠮᠳᠥᠭ ᠭᠥᠢᠳᠡᠨ ᠵᠢᠪᠠᠷ ᠢ ᠠᠶᠢᠷᠠᠭ ᠮᠡᠳᠥ ᠵᠠᠯᠭᠢᠯᠠᠵᠤ ᠨᠠᠮᠠ ᠶᠢ ᠰᠠᠨᠠᠯᠠ᠂ ᠡᠵᠢ ᠮᠢᠨᠢ | ᠭᠥᠮᠥᠰᠭᠡᠨ ᠰᠠᠷᠠᠨ ᠤ ᠨᠢᠯᠪᠤᠰᠤ ᠶᠢ ᠠᠭᠠᠷᠤᠤᠯ ᠮᠡᠳᠥ ᠡᠭᠰᠢᠭᠡᠵᠥ ᠨᠠᠮᠠ ᠶᠢ ᠭᠥᠯᠢᠶᠡᠯᠡ᠂ ᠡᠵᠢ ᠮᠢᠨᠢ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠤ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠴᠢᠳᠤᠷ ᠲᠠᠢ ᠮᠤᠷᠢ ᠢᠨᠴᠠᠭᠠᠵᠤ ᠰᠢᠭᠦᠳᠡᠷᠢ ᠰᠢᠯᠭᠡᠭᠡᠭᠰᠡᠨ ᠥᠷᠯᠥᠭᠡ | ᠴᠡᠴᠡᠭ ᠤᠨ ᠰᠤᠯᠤᠩᠭᠠᠨ ᠠᠴᠠ ᠤᠷᠭᠤᠭᠰᠠᠨ ᠨᠠᠷᠠᠨ ᠤ ᠰᠤᠷᠮᠤᠤᠰᠤ ᠢᠷᠪᠡᠭᠡᠨᠡᠭᠦᠯᠵᠥ | ᠴᠠᠢ ᠪᠠᠨ ᠬᠤᠪᠢᠶᠠᠯᠴᠠᠬᠤ ᠭᠥᠮᠥᠨ ᠥᠭᠡᠢ ᠭᠠᠭᠴᠠᠭᠠᠷᠳᠠᠵᠤ ᠰᠠᠭᠤᠭᠰᠠᠨ ᠡᠵᠢ ᠳᠡᠭᠡᠨ | ᠴᠠᠪᠢᠳᠠᠷ ᠰᠠᠭᠠᠷᠠᠯ ᠵᠡᠷᠭᠡᠯᠭᠡ ᠵᠥᠰᠥᠵᠥ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠥ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠲᠡᠮᠡᠭᠡᠨ ᠳᠡᠭᠡᠨ ᠶᠠᠪᠤᠭᠰᠠᠨ ᠬᠤᠶᠢᠭᠤᠷ ᠭᠥᠥ ᠮᠢᠨᠢ ᠢᠷᠡᠴᠢᠭᠡᠭᠰᠠᠨ ᠪᠠᠶᠢᠭᠠᠰᠠᠢ ᠭᠡᠵᠥ | ᠲᠥᠯᠡᠭᠡ ᠬᠤᠭᠤᠴᠢᠬᠤ ᠶᠢᠨ ᠠᠭᠱᠠᠨ ᠳᠤ ᠪᠠᠷᠠᠭᠤᠨ ᠴᠢᠭᠢ ᠮᠢᠨᠢ ᠴᠤᠩᠭᠢᠨᠠᠭᠠᠰᠠᠢ ᠭᠡᠵᠤ | ᠲᠤᠭᠭᠢᠭᠠᠳ ᠰᠡᠷᠢᠭᠦ ᠶᠢᠨ ᠵᠡᠭᠦᠳᠥᠨ ᠳᠤ ᠭᠥᠥ ᠪᠠᠨ ᠨᠢᠭᠡ ᠬᠠᠷᠠᠬᠤ ᠰᠠᠨ ᠭᠡᠵᠥ | ᠲᠠᠭᠤᠤ ᠠᠶᠠᠰᠯᠠᠬᠤ ᠶᠢᠨ ᠴᠢᠯᠥᠭᠡᠨ ᠳᠤ ᠬᠤᠷᠸᠠ ᠶᠢ ᠠᠮᠤᠭᠤᠯᠠᠩ ᠪᠠᠶᠢᠭ ᠭᠡᠵᠥ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠤ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠪᠠᠭᠤᠭᠠᠳ ᠨᠡᠭᠦᠭᠰᠡᠨ ᠪᠠᠭᠤᠴᠠ ᠡᠪᠡᠰᠤ ᠤᠷᠭᠤᠵᠤ ᠲᠠᠶᠢᠳᠬᠤᠷᠠᠭᠰᠠᠨ ᠪᠠᠶᠢᠳᠠᠭ | ᠪᠤᠯᠭᠤᠯᠠᠭᠰᠠᠨ ᠭᠠᠳᠠᠰᠤᠨ ᠤ ᠰᠢᠷᠬᠠ ᠴᠡᠴᠡᠭ ᠢᠶᠠᠷ ᠢᠨᠢᠶᠡᠵᠥ ᠠᠨᠠᠭᠰᠠᠨ ᠪᠠᠶᠢᠳᠠᠭ | ᠮᠠᠨᠠᠵᠤ ᠲᠠᠯᠪᠢᠭᠰᠠᠨ ᠭᠠᠯ ᠤᠨ ᠥᠨᠡᠰᠤ ᠨᠢ ᠪᠥᠯᠢᠶᠡᠨ ᠭᠡᠪ ᠪᠠᠷ ᠢᠶᠠᠨ ᠪᠠᠶᠢᠳᠠᠭ | ᠮᠠᠶᠢᠵᠢᠭᠢᠷ ᠡᠵᠢ ᠶᠢᠨ ᠮᠢᠨᠢ ᠭᠢᠰᠭᠢᠭᠰᠡᠨ ᠮᠥᠷ ᠲᠡᠭᠡᠷᠡ ᠤᠳᠤᠳ ᠭᠥᠯᠪᠥᠷᠢᠵᠥ ᠬᠤᠨᠤᠭᠰᠠᠨ ᠪᠠᠶᠢᠳᠠᠭ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠤ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠥᠭᠡ ᠪᠠᠷ ᠵᠤᠯᠠ ᠪᠠᠷᠢᠭᠠᠳ ᠥᠨᠡᠭᠡᠨ ᠬᠠᠷᠠᠩᠭᠤᠢ ᠶᠢ ᠭᠡᠶᠢᠭᠦᠯᠳᠡᠭ ᠪᠠᠶᠢᠭᠰᠠᠨ᠂ ᠡᠵᠢ ᠮᠢᠨᠢ | ᠥᠯᠢᠭᠡᠷ ᠢᠶᠠᠷ ᠤᠬᠠᠭᠠᠨ ᠵᠠᠳᠠᠯᠤᠭᠠᠳ ᠤᠨᠠᠭᠠᠨ ᠮᠥᠷᠥᠭᠡᠳᠥᠯ ᠢ ᠴᠠᠭᠢᠳᠠᠭ ᠪᠠᠶᠢᠭᠰᠠᠨ᠂ ᠡᠵᠢ ᠮᠢᠨᠢ | ᠥᠥᠷ ᠢᠶᠠᠷ ᠰᠠᠴᠤᠯᠢ ᠡᠷᠭᠦᠭᠡᠳ ᠠᠭᠤᠯᠠᠰ ᠤᠨ ᠴᠠᠩᠭᠠᠭᠠ ᠶᠢ ᠲᠠᠶᠢᠯᠳᠠᠭ ᠪᠠᠶᠢᠭᠰᠠᠨ᠂ ᠡᠵᠢ ᠮᠢᠨᠢ | ᠥᠢᠯᠡ ᠶᠢᠨ ᠬᠠᠶᠢᠴᠢ ᠪᠠᠷ ᠭᠤᠨᠢᠭ ᠢᠶᠠᠨ ᠬᠠᠶᠢᠴᠢᠯᠠᠭᠠᠳ ᠵᠢᠷᠭᠠᠯ ᠡᠰᠭᠡᠳᠡᠭ ᠪᠠᠶᠢᠭᠰᠠᠨ᠂ ᠡᠵᠢ ᠮᠢᠨᠢ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠤ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠭᠠᠵᠠᠷ ᠤᠨ ᠲᠠᠳᠠᠬᠤ ᠭᠥᠴᠥᠨ ᠳᠤ ᠵᠢᠯ ᠠᠴᠠ ᠵᠢᠯ ᠳᠤ ᠪᠥᠭᠴᠥᠶᠢᠭᠰᠡᠨ | ᠭᠠᠩ ᠤᠨ ᠪᠤᠷᠤᠭᠠᠨ ᠤ ᠲᠤᠰᠤᠯ ᠳᠤ ᠭᠤᠨᠢᠭ ᠢᠶᠠᠨ ᠲᠡᠪᠳᠥᠭᠡᠵᠥ ᠴᠡᠯᠮᠡᠭᠰᠡᠨ | ᠮᠥᠩᠭᠡ ᠴᠠᠰᠤ ᠲᠠᠢ ᠬᠠᠶᠢᠷᠬᠠᠨ ᠳᠠᠭᠠᠨ ᠠᠯᠳᠠᠨ ᠲᠤᠷᠠᠰᠤᠮᠵᠢ ᠪᠠᠨ ᠨᠢᠭᠤᠴᠠᠯᠠᠭᠰᠠᠨ | ᠮᠥᠩᠭᠦᠨ ᠰᠣᠷ ᠲᠠᠢ ᠰᠠᠨᠴᠢᠭ ᠠᠴᠠ ᠨᠢ ᠨᠠᠮᠤᠷ ᠤᠨ ᠰᠢᠪᠠᠭᠤ ᠨᠢᠰᠥᠭᠰᠡᠨ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠤ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠪᠤᠳᠤᠭᠤ ᠪᠠᠨ ᠥᠭᠦᠭᠡᠷᠳᠡᠭᠡᠳ ᠨᠠᠭᠠᠰᠢ ᠪᠠᠨ ᠡᠷᠭᠢᠭᠦ ᠳᠤ ᠨᠢ ᠤᠶᠠᠭᠠᠨ ᠲᠡᠭᠡᠷᠡ ᠪᠠᠨ ᠪᠠᠭᠤᠮᠠᠷ ᠪᠠᠶᠢᠨᠠ | ᠪᠤᠴᠢᠭᠢᠨᠠᠭᠤᠷ ᠤᠨ ᠥᠨᠳᠥᠰᠥ ᠰᠢᠭ ᠭᠠᠷ ᠢᠶᠠᠷ ᠴᠢᠨᠢ ᠭᠡᠮᠰᠢᠯ ᠤᠨ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠭᠤᠯᠤᠮᠠᠷ ᠪᠠᠶᠢᠨᠠ | ᠪᠤᠭᠤᠷᠤᠯ ᠲᠡᠭᠡᠳᠥᠰ ᠤᠨ ᠵᠢᠮᠡᠯᠡᠭᠰᠡᠨ ᠬᠠᠷᠠᠴᠠ ᠪᠠᠷ ᠥᠪᠡᠷ ᠢ ᠪᠠᠨ ᠨᠢᠭᠡ ᠤᠷᠢᠶᠠᠯᠭᠠᠮᠠᠷ ᠪᠠᠶᠢᠨᠠ | ᠪᠤᠷᠬᠠᠨ ᠤ ᠠᠯᠠᠭᠠᠨ ᠠᠴᠠ ᠷᠠᠰᠢᠶᠠᠨ ᠠᠮᠰᠠᠭᠤᠯᠵᠤ ᠡᠵᠢ ᠶᠢ ᠪᠠᠨ ᠮᠥᠩᠭᠡ ᠵᠢᠷᠭᠠᠭᠠᠮᠠᠷ ᠪᠠᠶᠢᠨᠠ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠤ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠠᠯᠳᠠᠨ ᠨᠠᠷᠠᠨ ᠤ ᠴᠠᠭᠠᠨᠠ ᠠᠴᠠ ᠭᠥᠥ ᠴᠢᠨᠢ ᠲᠠᠪᠭᠢᠵᠤ ᠶᠠᠪᠤᠨᠠ | ᠠᠨᠢᠵᠤ ᠥᠵᠡᠭᠡ ᠥᠭᠡᠢ ᠪᠤᠷᠬᠠᠨ ᠤ ᠮᠡᠯᠮᠡᠢ ᠠᠴᠠ ᠲᠠᠨ ᠳᠠᠭᠠᠨ ᠢᠷᠡᠵᠥ ᠶᠠᠪᠤᠨᠠ | ᠠᠳᠠᠨ ᠲᠡᠮᠡᠭᠡᠨ ᠤ ᠵᠤᠨᠵᠢᠶᠠᠨ ᠳᠤ ᠬᠠᠨ ᠭᠠᠷᠤᠳᠢ ᠰᠢᠭ᠋ ᠨᠢᠰᠴᠤ ᠶᠠᠪᠤᠨᠠ | ᠠᠷᠭᠠᠯ ᠤᠨ ᠤᠳᠤᠭᠠ ᠭᠤᠭᠴᠤᠭᠠᠷᠠᠭᠰᠠᠨ ᠲᠤᠯᠤᠭᠠᠳ ᠤᠨ ᠴᠠᠭᠠᠨᠠᠬᠠᠨ ᠭᠥᠷᠴᠤ ᠶᠠᠪᠤᠨᠠ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠤ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | ᠲᠡᠮᠡᠭᠡ ᠲᠡᠷᠭᠡᠭᠰᠡᠨ ᠰᠤᠯᠢ ᠲᠠᠢ ᠲᠡᠨᠵᠢᠨ ᠳᠤ ᠭᠡᠷ ᠮᠢᠨᠢ ᠪᠠᠶᠢᠳᠠᠭ | ᠲᠡᠭᠷᠢ ᠶᠢᠨ ᠰᠤᠯᠤᠩᠭᠠᠨ ᠤ ᠨᠢᠭᠡᠨ ᠥᠵᠥᠭᠦᠷ ᠲᠤ ᠡᠵᠢ ᠮᠢᠨᠢ ᠪᠠᠶᠢᠳᠠᠭ | ᠡᠷᠭᠡᠰ ᠭᠠᠷᠠᠭ ᠤᠨ ᠤᠷᠤᠰᠬᠠᠯ ᠪᠥᠭᠦᠨ ᠨᠠᠷᠠ ᠵᠥᠪ ᠡᠷᠭᠢᠵᠥ ᠪᠠᠶᠢᠳᠠᠭ | ᠡᠵᠢ ᠳᠡᠭᠡᠨ ᠤᠴᠢᠬᠤ ᠵᠥᠭ ᠮᠢᠨᠢ ᠪᠤᠷᠬᠠᠨ ᠤ ᠵᠥᠭ ᠪᠠᠶᠢᠳᠠᠭ ᠡ | ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠭᠥᠯᠢᠶᠡᠵᠤ ᠪᠠᠶᠢᠨᠠ | ᠡᠵᠢ ᠡ︕ ᠪᠢ ᠲᠠᠨ ᠤᠷᠤᠭᠤ ᠶᠠᠪᠤᠵᠤ ᠪᠠᠶᠢᠨᠠ | | ᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦ | ᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷ | ᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ |