| | ᠵᠡᠭᠦᠨᠭᠠᠷ ᠪᠤᠶᠠᠨᠪᠠᠲᠤ | | ᠥᠷᠥᠮᠡ ᠲᠤᠰᠤ ᠭᠥᠪᠦᠭᠰᠡᠨ ᠠᠶᠠᠭᠠ ᠲᠠᠢ ᠴᠠᠶᠢᠨ ᠳᠤ | ᠥᠷᠯᠥᠭᠡ ᠶᠢᠨ ᠨᠠᠷᠠᠨ ᠲᠤᠩᠭᠤᠴᠢᠭᠰᠠᠨ | ᠥᠭᠡᠭᠦᠨ ᠰᠡᠳᠭᠢᠯ ᠲᠤᠨᠤᠷᠠᠭᠰᠠᠨ ᠰᠠᠷᠬᠤᠳ ᠤᠨ ᠲᠤᠭᠠᠷᠠ ᠳᠤ | ᠥᠳᠡᠰᠢ ᠶᠢᠨ ᠰᠠᠷᠠᠨ ᠪᠢᠰᠢᠭᠦᠷᠭᠡᠭᠰᠡᠨ | ᠡᠪᠡᠰᠤᠨ ᠳᠤ ᠮᠡᠯᠮᠡᠷᠡᠭᠰᠡᠨ ᠡᠭᠡᠰᠢᠭ ᠲᠠᠭᠤᠨ ᠤ ᠰᠠᠴᠤᠯᠢ ᠳᠤ | ᠤᠳᠤᠳ ᠤᠨ ᠮᠢᠰᠢᠶᠡᠯ ᠡᠷᠭᠡᠯᠡᠭᠰᠡᠨ | ᠥᠭᠭᠦᠭᠡᠵᠢ ᠵᠢᠷᠭᠠᠯ ᠱᠠᠭᠢᠭᠰᠠᠨ ᠱᠠᠭᠠᠢ ᠲᠤᠭᠯᠠᠭᠠᠮ ᠳᠤ | ᠭᠠᠯ ᠤᠨ ᠪᠤᠷᠬᠠᠨ ᠠᠮᠤᠷᠯᠢᠭᠰᠠᠨ | ᠲᠠᠮᠰᠤᠭᠪᠤᠯᠠᠭ ᠤᠨ ᠶᠡᠭᠡ ᠭᠤᠪᠢ ᠮᠢᠨᠢ᠃ | ᠰᠠᠷᠠᠨ ᠤ ᠲᠠᠤᠯᠠᠢ ᠭᠥᠮᠡᠯᠢᠳᠥ ᠶᠢᠨ ᠭᠥᠨᠳᠡᠢ ᠶᠢᠨ | ᠶᠠᠪᠠᠭᠠᠨ ᠵᠠᠭ ᠲᠤᠨᠢ ᠪᠥᠯᠢᠶᠡᠰᠴᠥ ᠬᠤᠨᠤᠳᠠᠭ | ᠰᠠᠯᠭᠢᠨ ᠤ ᠠᠭᠠᠭ ᠰᠤᠯᠢ ᠬᠤᠯᠤᠰᠤᠨ ᠳᠤᠨᠢ ᠲᠠᠭᠠᠭᠢᠷᠠᠵᠤ | ᠪᠤᠷᠤᠯᠵᠢ ᠲᠠᠢ ᠲᠡᠨᠵᠢ ᠳᠤᠨᠢ ᠲᠤᠶᠢᠯᠳᠠᠵᠤ ᠴᠤᠴᠠᠷᠠᠳᠠᠭ | ᠰᠠᠶᠠ ᠵᠢᠯ ᠤᠨ ᠨᠠᠮᠳᠠᠷ ᠤᠳ ᠢ | ᠰᠢᠭᠤᠢ ᠶᠢᠨ ᠲᠠᠪᠤᠰᠤ ① ᠪᠠᠷ ᠬᠤᠵᠢᠷᠯᠠᠵᠤ ᠮᠥᠩᠭᠡ ᠴᠤᠮᠨᠤᠳᠠᠭ | ᠰᠠᠶᠢᠬᠠᠨ ᠪᠥᠰᠡᠭᠦᠶᠢᠴᠤᠤᠯ ᠨᠢ ᠨᠠᠷᠠ ᠰᠠᠯᠭᠢ ᠪᠠᠷ ᠥᠨᠥᠰᠥᠭᠦᠯᠵᠥ | ᠭᠥᠷᠡᠯ ᠵᠢᠰᠥ ᠪᠠᠷ ᠲᠤᠶᠠᠭᠠᠷᠠᠳᠠᠭ | ᠲᠠᠮᠰᠤᠭᠪᠤᠯᠠᠭ ᠤᠨ ᠶᠡᠭᠡ ᠭᠤᠪᠢ ᠮᠢᠨᠢ᠃ | ᠲᠤᠯᠤᠭᠠᠳ ᠤᠨ ᠴᠠᠭᠠᠨᠠ ᠠᠴᠠ ᠲᠡᠮᠡᠭᠡ ᠲᠠᠢ ᠭᠥᠮᠥᠨ | ᠱᠤᠪᠤᠰ ᠱᠤᠪᠤᠰ ᠭᠠᠷᠤᠭᠠᠳ ᠢᠷᠡᠭᠦ ᠳᠤ | ᠲᠤᠭᠤᠭᠠ ᠲᠠᠢ ᠰᠢᠷᠭᠠᠯ ᠴᠠᠢ | ᠲᠠᠷᠭᠢᠯᠤᠨ ᠲᠡᠪᠡᠷᠡᠨ ᠪᠤᠴᠠᠯᠵᠤ ᠡᠭᠢᠯᠡᠳᠡᠭ | ᠲᠤᠷᠤᠮ ᠪᠤᠳᠤᠭᠤ ᠭᠤᠩᠭᠢᠨᠠᠯᠳᠤᠨ | ᠲᠤᠷᠯᠤᠭ ᠤᠨ ᠥᠨᠳᠥᠰᠥ ᠰᠤᠭᠤᠷᠠᠳᠠᠯᠠ ᠲᠤᠩᠭᠤᠷᠬᠤ ᠳᠤ | ᠲᠤᠭᠤᠰᠤᠳᠤ ᠪᠤᠷᠤ ᠤᠷᠴᠢᠯᠠᠩ ᠤᠨ | ᠤᠨᠢᠰᠤᠭᠠ ᠮᠡᠳᠤ ᠠᠷᠠᠨᠰᠢᠨ ᠢ ᠵᠥᠩᠨᠡᠵᠥ ᠮᠡᠳᠡᠳᠡᠭ | ᠲᠠᠮᠰᠤᠭᠪᠤᠯᠠᠭ ᠤᠨ ᠶᠡᠭᠡ ᠭᠤᠪᠢ ᠮᠢᠨᠢ᠃ | ᠠᠯᠤᠰ ᠲᠤ ᠮᠤᠷᠳᠠᠭᠰᠠᠨ ᠭᠥᠥ ᠪᠠᠨ ᠰᠠᠨᠴᠢᠭ ᠢᠶᠠᠨ ᠭᠠᠩᠳᠠᠳᠠᠯᠠ ᠰᠠᠨᠠᠵᠤ | ᠮᠠᠨᠢ ᠭᠥᠯᠭᠦᠭᠰᠡᠨ ᠡᠵᠢ | ᠠᠯᠳᠠᠨ ᠪᠤᠷᠬᠠᠨ ᠤ ᠮᠡᠯᠮᠡᠢ ᠠᠴᠠ ᠡᠭᠢ ᠠᠪᠴᠤ ᠤᠷᠤᠰᠤᠭᠰᠠᠨ | ᠢᠨᠵᠠᠭᠠᠨ ᠰᠠᠭᠠᠷᠠᠯ ᠵᠡᠷᠭᠡᠯᠭᠡᠨ | ᠠᠳᠠᠨ ᠲᠡᠮᠡᠭᠡᠨ ᠤ ᠪᠥᠭᠦᠨ ᠠᠴᠠ ᠨᠠᠷᠠ ᠤᠭᠰᠢᠵᠤ ᠮᠠᠨᠳᠤᠭᠰᠠᠨ | ᠠᠯᠠᠱᠠ ᠶᠢᠨ ᠲᠤᠷᠭᠠᠨ ᠭᠢᠵᠠᠭᠠᠷ | ᠠᠭᠢ ᠨᠢᠳᠥᠯᠡᠭᠰᠡᠨ ᠰᠢᠯᠢ ᠪᠠᠷ ᠰᠠᠯᠭᠢ ᠵᠡᠭᠡᠷᠡ ᠬᠤᠶᠠᠷ ᠴᠠᠭᠢᠯᠤᠭᠰᠠᠨ | ᠠᠰᠢᠳᠠ ᠶᠢᠨ ᠠᠮᠤᠭᠤᠯᠠᠩ ᠤᠷᠤᠨ | ᠲᠠᠮᠰᠤᠭᠪᠤᠯᠠᠭ ᠤᠨ ᠶᠡᠭᠡ ᠭᠤᠪᠢ ᠮᠢᠨᠢ᠃ | ᠰᠥᠷᠥᠭ ᠰᠥᠷᠥᠭ ᠬᠠᠪᠳᠠᠭᠠᠢ ᠰᠢᠭ᠋ ᠬᠤᠶᠢᠯᠠᠷᠠᠵᠤ ᠲᠤᠭᠳᠠᠭᠰᠠᠨ | ᠲᠤᠮᠤᠭ ᠤᠨ ᠭᠥᠭᠡ ᠴᠤᠭᠢᠶᠠ ② ᠨᠤᠭᠤᠳ | ᠰᠥ ᠰᠥᠨ ᠤ ᠲᠡᠭᠡᠵᠢ ᠪᠠᠷ ᠲᠠᠭᠤᠯᠠᠵᠤ ᠴᠢᠭᠤᠯᠠᠭᠰᠠᠨ | ᠨᠡᠭᠦᠳᠡᠯ ᠤᠨ ᠴᠠᠭᠠᠨ ᠬᠤᠨ ᠨᠤᠭᠤᠳ | ᠰᠥᠵᠢᠭ ᠰᠥᠵᠢᠭ ᠤᠨ ᠴᠢᠯᠠᠭᠤ ᠪᠠᠷ ᠲᠡᠭᠷᠢ ᠳᠤ ᠠᠰᠠᠭᠰᠠᠨ | ᠰᠢᠳᠥᠯᠭᠡ ᠶᠢᠨ ᠲᠠᠭᠱᠠᠨᠤᠪᠤᠭᠠ ᠨᠤᠭᠤᠳ | ᠰᠥᠭ ᠰᠥᠨᠡᠰᠥᠨ ᠤ ᠤᠩᠭᠤᠳ ᠢᠶᠠᠷ ᠥᠪᠡᠷ ᠢ ᠪᠠᠨ ᠢᠷᠯᠡᠭᠰᠡᠨ | ᠱᠠᠭᠠᠵᠠᠭᠠᠢ ᠠᠯᠠᠭ ᠴᠠᠭᠢᠭᠤᠷ ᠨᠤᠭᠤᠳ | ᠲᠠᠮᠰᠤᠭᠪᠤᠯᠠᠭ ᠤᠨ ᠶᠡᠭᠡ ᠭᠤᠪᠢ ᠮᠢᠨᠢ᠃ | ᠪᠤᠷᠠᠨᠳᠠᠭ ᠲᠠᠰᠤᠷᠠᠮᠠ ᠭᠥᠶᠥᠳᠡᠯ ᠲᠠᠢ ᠬᠤᠷᠳᠤᠨ ᠠᠳᠠᠳ ᠢᠶᠠᠷ ᠢᠶᠠᠨ | ᠭᠡᠶᠢᠮᠥᠷᠢ ᠪᠠᠨ ᠰᠡᠷᠭᠦᠭᠡᠭᠰᠡᠨ ᠮᠠᠯᠴᠢᠨ ᠵᠠᠶᠠᠭᠠ | ᠪᠤᠭᠤᠷᠤᠯ ᠲᠡᠥᠭᠡ ᠶᠢᠨ ᠲᠤᠭᠰᠢᠨ ᠥᠶᠡᠷ ᠲᠤ | ᠤᠷᠤᠰᠤᠭᠠ ᠨᠢ ᠥᠭᠡᠢ ᠥᠯᠡᠳᠡᠭᠰᠡᠨ ᠤᠨᠠᠭᠠᠨ ᠱᠠᠰᠳᠢᠷ | ᠪᠤᠯᠠᠭᠠᠨ ᠨᠤᠳᠤᠭ ᠤᠨ ᠢᠶᠠᠨ ᠰᠢᠷᠥᠶᠢᠨ ᠲᠡᠭᠡᠷᠡ | ᠪᠤᠷᠤᠩᠬᠤᠢ ᠶᠢᠨ ᠰᠡᠭᠦᠳᠡᠷ ᠲᠤᠰᠤᠭᠠ ᠨᠢ ᠥᠭᠡᠢ ᠰᠢᠤ᠂ ᠮᠢᠨᠤ ᠠᠷᠠᠳ ᠲᠥᠮᠡᠨ | ᠪᠤᠷᠠᠮ ᠰᠢᠭ᠋ ᠥᠭᠢᠳ ᠢᠶᠠᠨ ᠪᠤᠤᠷᠠᠨ ᠲᠠᠶᠢᠯᠤᠭ ᠰᠢᠭ᠋ | ᠵᠠᠶᠢᠳᠠᠩ ᠭᠥᠮᠥᠨ ᠳᠤ ᠥᠭᠭᠦᠭᠡ ᠥᠭᠡᠢ ᠰᠢᠤ᠂ ᠮᠢᠨᠤ ᠤᠬᠠᠭᠠᠨᠳᠤ ᠲᠡᠭᠡᠳᠥᠰ | ᠲᠠᠮᠰᠤᠭᠪᠤᠯᠠᠭ ᠤᠨ ᠶᠡᠭᠡ ᠭᠤᠪᠢ ᠮᠢᠨᠢ᠃ | ᠭᠠᠯ ᠲᠠᠢ ᠵᠤᠤᠬᠠ ᠭᠥᠯᠴᠥᠵᠥ | ᠨᠠᠷᠠ ᠲᠠᠢ ᠬᠤᠶᠢᠮᠤᠷ ᠰᠠᠭᠠᠳᠠᠭᠰᠠᠨ | ᠭᠠᠩᠰᠠ ᠭᠥᠭᠦᠵᠥ ᠬᠠᠭᠤᠴᠢ ᠲᠡᠯᠭᠡᠭᠰᠡᠨ | ᠪᠢᠴᠢᠭᠳᠦ ᠭᠥᠷᠡᠩ ᠬᠠᠳᠠ ᠰᠢᠭ᠋ ᠬᠠᠷᠠᠴᠤᠤᠯ ᠮᠢᠨᠢ | ᠭᠠᠩ ᠲᠠᠢ ᠵᠤᠳ ᠲᠠᠢ ᠲᠡᠭᠷᠢ ᠪᠠᠨ ᠠᠷᠭᠠᠳᠠᠵᠤ | ᠤᠪᠤᠭᠠᠨ ᠳᠠᠭᠠᠨ ᠴᠢᠯᠠᠭᠤ ᠨᠡᠮᠡᠵᠥ ᠲᠠᠶᠢᠳᠬᠤᠷᠠᠭᠰᠠᠨ | ᠭᠠᠯᠪᠠ ᠶᠢᠨ ᠭᠤᠪᠢ ᠶᠢᠨ ᠮᠤᠬᠤᠷ ᠠᠪᠴᠤ ᠪᠠᠭᠤᠳᠠᠯᠯᠠᠭᠰᠠᠨ | ᠮᠤᠩᠭᠤᠯ ᠤᠨ ᠲᠠᠩᠰᠤᠭ ᠥᠷᠭᠦᠯᠵᠢᠯᠡᠯ | ᠲᠠᠮᠰᠤᠭᠪᠤᠯᠠᠭ ᠤᠨ ᠶᠡᠭᠡ ᠭᠤᠪᠢ ᠮᠢᠨᠢ᠃ | ᠡᠭᠦᠯᠡᠰ ᠰᠢᠯᠭᠡᠭᠡᠵᠥ ᠠᠭᠰᠤᠮ ᠪᠤᠤᠷᠠ ᠭᠥᠷᠭᠢᠷᠡᠭᠦ ᠳᠤ | ᠶᠢᠰᠥ ᠶᠢᠨ ᠭᠥᠢᠳᠡᠨ ᠲᠠᠭᠵᠢᠵᠤ ᠰᠥᠭᠦᠷᠡᠳᠡᠭ | ᠡᠭᠦᠳᠡ ᠭᠤᠤᠯᠯᠠᠵᠤ ᠬᠤᠯᠠᠨ ᠵᠢᠷᠤᠭᠠ ᠵᠢᠷᠭᠢᠭᠦ ᠳᠤ | ᠬᠤᠯᠠ ᠶᠢᠨ ᠵᠤᠴᠢᠨ ᠪᠠᠭᠤᠵᠤ ᠮᠤᠷᠳᠠᠳᠠᠭ | ᠠᠶᠢᠷᠠᠭ ᠲᠤᠭᠰᠢᠷᠠᠵᠤ ᠽᠠᠨᠳᠠᠨ ᠠᠷᠬᠠᠳ ③ ᠰᠢᠵᠢᠭᠢᠨᠡᠭᠦ ᠳᠤ | ᠪᠤᠳᠤᠭᠤ ᠵᠡᠭᠦᠳᠥᠨ ᠠᠴᠠ ᠪᠠᠨ ᠰᠤᠴᠢᠨ ᠰᠡᠷᠢᠳᠡᠭ | ᠠᠶᠠᠨ ᠤᠶᠢᠷᠠᠳᠤᠵᠤ ᠬᠤᠩᠬᠠ ᠱᠤᠤᠭᠢᠵᠤ ᠡᠭᠢᠯᠡᠭᠦ ᠳᠤ | ᠪᠥᠵᠥᠩ ᠭᠡᠪᠳᠡᠷᠢ ᠠᠴᠠ ᠪᠠᠨ ᠲᠡᠯᠡᠭᠡᠢ ᠶᠢ ᠬᠠᠷᠠᠳᠠᠭ | ᠲᠠᠮᠰᠤᠭᠪᠤᠯᠠᠭ ᠤᠨ ᠶᠡᠭᠡ ᠭᠤᠪᠢ ᠮᠢᠨᠢ᠃ | ᠡᠯᠡᠰᠥᠨ ᠬᠤᠰᠢᠯᠠᠩ ᠲᠠᠢ ᠰᠡᠷᠪᠡᠩ ᠳᠤᠨᠢ ᠲᠡᠭᠷᠢ ᠶᠢᠨ ᠵᠡᠭᠦᠳᠥ ᠮᠡᠳᠤ | ᠮᠥᠨᠳᠥᠷ ᠴᠠᠭᠠᠨ ᠭᠤᠶᠤᠤ ᠪᠤᠢ | ᠡᠯᠡᠷ ᠪᠠᠯᠠᠷ ᠡᠵᠡᠭᠦᠢ ᠶᠡᠭᠡ ᠪᠡᠯᠴᠢᠭᠡᠷ ᠲᠤᠨᠢ ᠰᠠᠷᠠᠨ ᠤ ᠭᠥᠷᠢᠶᠡ ᠮᠡᠳᠤ | ᠮᠤᠩᠭᠤᠯ ᠭᠡᠷ ᠤᠨ ᠪᠠᠭᠤᠷᠢ ᠪᠤᠢ | ᠨᠠᠷᠡᠬᠤᠷᠭᠢᠷᠠᠬᠤ ᠬᠤᠩᠬᠤᠷ ᠲᠤᠨᠢ ᠪᠤᠷᠬᠠᠨ ᠤ ᠰᠠᠨᠠᠭᠠ ᠮᠡᠳᠣ | ᠭᠥᠷᠢᠶᠡᠳᠥ④ ᠶᠢᠨ ᠴᠤᠭᠴᠢᠨ ᠲᠤᠭᠠᠩ ᠪᠤᠢ | ᠨᠠᠢᠮᠠᠨ ᠵᠥᠭ ᠤᠨ ᠭᠡᠰᠢᠭ ᠲᠤᠨᠢ ᠮᠢᠩᠭᠠᠨ ᠵᠤᠯᠠ ᠮᠡᠳᠤ | ᠮᠥᠩᠭᠡ ᠶᠢᠨ ᠴᠠᠭᠠᠨ ᠰᠤᠪᠢᠩ ᠪᠤᠢ | ᠲᠠᠮᠰᠤᠭᠪᠤᠯᠠᠭ ᠤᠨ ᠶᠡᠭᠡ ᠭᠤᠪᠢ ᠮᠢᠨᠢ᠃ | ᠵᠤᠨ ᠤ ᠵᠢᠩ ᠥᠳᠡ ᠳᠤ ᠵᠢᠷᠠᠨ ᠤ ᠨᠠᠭᠤᠷ ᠪᠤᠴᠠᠯᠵᠤ | ᠭᠥᠷᠪᠡᠯ ᠴᠠᠩᠭᠠᠭᠰᠠᠨ ᠨᠤᠳᠤᠭ | ᠵᠠᠭᠤᠨ ᠵᠠᠭᠤᠨ ᠤ ᠪᠡᠷᠭᠡ ᠶᠢ ᠢᠩᠭᠡᠨ ᠰᠥ ᠪᠠᠷ ᠮᠢᠯᠢᠶᠠᠵᠤ | ᠠᠷᠭᠠᠳᠠᠵᠤ ᠲᠤᠭᠤᠯᠤᠭᠰᠠᠨ ᠠᠮᠢᠳᠤᠷᠠᠯ | ᠵᠡᠭᠦᠥ ᠶᠢᠨ ᠰᠥᠪᠡᠭᠴᠢ ᠪᠠᠷ ᠭᠤᠭᠴᠤᠭᠠᠷᠠᠵᠤ ᠤᠷᠤᠰᠤᠭᠰᠠᠨ ᠤᠨ ᠵᠢᠯ ᠤᠳ ᠢ | ᠲᠤᠭᠤᠨᠤ ᠠᠴᠠ ᠪᠠᠨ ᠴᠢᠭᠳᠠᠯᠠᠭᠰᠠᠨᠠᠶᠢᠯ | ᠵᠢᠷᠥᠭᠡᠨ ᠤ ᠰᠤᠳᠠᠯ ᠢᠶᠠᠷ ᠪᠠᠭᠳᠠᠵᠤ ᠲᠡᠷᠭᠡᠭᠰᠡᠨ ᠲᠡᠮᠡᠭᠡᠨ ᠤ ᠵᠠᠶᠠᠭᠠ ᠶᠢ | ᠪᠤᠷᠬᠠᠨ ᠳᠠᠭᠠᠨ ᠵᠠᠯᠪᠢᠷᠠᠭᠰᠠᠨ ᠮᠤᠩᠭᠤᠯ | ᠲᠠᠮᠰᠤᠭᠪᠤᠯᠠᠭ ᠤᠨ ᠶᠡᠭᠡ ᠭᠤᠪᠢ ᠮᠢᠨᠢ᠃ | ① ᠰᠢᠭᠤᠢ ᠶᠢᠨ ᠲᠠᠪᠤᠰᠤ│ ᠮᠠᠨ ᠤ ᠨᠤᠳᠤᠭ ᠲᠤ ᠲᠠᠪᠤᠨ ᠥᠩᠭᠡ ᠶᠢᠨ ᠲᠠᠪᠤᠰᠤ ᠭᠠᠷᠳᠠᠭ ᠰᠢᠭᠤᠢ ᠶᠢᠨ | ᠭᠤᠤᠯ ᠭᠡᠰᠡᠨ ᠭᠠᠵᠠᠷ᠃ ② ᠴᠤᠭᠢᠶᠠ│ ᠠᠭᠤᠯᠠ ᠰᠢᠭ᠋ ᠥᠨᠳᠥᠷ ᠡᠯᠡᠰᠥ ᠶᠢ ᠮᠠᠨᠠᠶᠢᠭᠢᠨ ᠴᠤᠭᠢᠶᠠ ᠭᠡᠭᠦ᠃ ③ | ᠠᠷᠬᠠᠳ│ ᠠᠶᠢᠷᠠᠭ ᠢᠰᠭᠡᠳᠡᠭ ᠮᠤᠳᠤᠨ ᠰᠠᠪᠠ᠃ ④ ᠭᠥᠷᠢᠶᠡᠳᠥ│ ᠴᠢᠯᠥᠭᠡᠯᠡᠭᠳᠡᠭᠦ ᠠᠴᠠ ᠡᠮᠥᠨᠡ ᠠᠯᠠᠱᠠ | ᠶᠢᠨ ᠨᠠᠢᠮᠠᠨ ᠶᠡᠭᠡ ᠭᠡᠶᠢᠳ ᠤᠨ ᠨᠢᠭᠡ ᠪᠠᠶᠢᠵᠠᠢ᠃ ᠶᠡᠭᠡ ᠡᠯᠡᠰᠥᠨ ᠲᠤᠮᠳᠠ ᠪᠠᠶᠢᠷᠢᠯᠠᠵᠤ ᠪᠠᠶᠢᠳᠠᠭ᠃ | | | ᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦ | ᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷ | ᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ |