ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠰᠢᠨ᠎ᠡ ᠬᠦᠳᠡᠭᠡ
ᠬᠤᠶᠢᠳ ᠠᠶᠢᠮᠠᠭ ᠤᠨ ᠡᠭᠦᠰᠤᠯ ᠭᠠᠷᠤᠯ ᠵᠢᠴᠢ ᠳᠠᠷᠬᠠᠯᠳᠠ ᠶᠢᠨ ᠳᠤᠬᠠᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/12/11
ᠨᠢᠭᠡ᠂ ᠬᠤᠶᠢᠳ ᠣᠪᠤᠭ ᠤᠨ ᠡᠭᠦᠰᠦᠯ ᠭᠠᠷᠤᠯ ᠬᠢᠭᠡᠳ ᠲᠡᠭᠦᠨ ᠤ ᠨᠡᠷᠡᠶᠢᠳᠦᠯ᠃ ᠬᠤᠶᠢᠳ ᠭᠡᠳᠡᠭ ᠪᠣᠯ ᠮᠣᠩᠭᠤᠯ ᠲᠡᠣᠬᠡ ᠰᠣᠷᠪᠤᠯᠵᠢ ᠳᠤ ᠭᠠᠷᠳᠠᠭ ︽ᠣᠢ ᠶᠢᠨ ᠢᠷᠭᠡᠨ︾ ᠬᠡᠮᠡᠭᠳᠡᠭᠰᠡᠨ ᠣᠶᠢᠷᠡᠳ ᠮᠣᠩᠭᠤᠯ ᠤᠨ ᠨᠢᠭᠡᠨ ᠠᠶᠢᠮᠠᠭ ᠪᠣᠯᠬᠤ ᠬᠤᠶᠢᠳ ᠠᠶᠢᠮᠠᠭ ᠤᠨ ᠨᠡᠷ᠎ᠡ ᠠᠴᠠ ᠡᠭᠦᠰᠦᠯ ᠭᠠᠷᠤᠯ ᠲᠠᠢ᠃ ᠳᠠᠷᠤᠢ ᠠᠶᠢᠮᠠᠭ ᠤᠨ ᠢᠶᠠᠨ ᠨᠡᠷ᠎ᠡ ᠪᠠᠷ ᠣᠪᠤᠭ ᠢᠶᠠᠨ ᠪᠣᠯᠭᠠᠭᠰᠠᠨ ᠪᠠᠷᠠᠭᠤᠨ ᠮᠣᠩᠭᠤᠯ ᠤᠨ ᠣᠪᠤᠭ ᠶᠠᠰᠣᠳᠠᠳ ᠤᠨ ᠨᠢᠭᠡ ᠨᠢ ᠮᠦᠨ᠃ ᠬᠢᠲᠠᠳ ᠪᠢᠴᠢᠭ ᠰᠤᠳᠤᠷ ᠤᠳ ᠲᠤ ︽辉特︾ ︽慧特︾ ᠭᠡᠬᠦᠴᠢᠯᠡᠨ ᠪᠢᠴᠢᠳᠡᠭ᠃ ᠬᠤᠶᠢᠳ ᠠᠶᠢᠮᠠᠭ ᠤᠨ ᠡᠭᠦᠰᠦᠯ ᠭᠠᠷᠤᠯ ᠬᠢᠭᠡᠳ ᠬᠤᠶᠢᠳ ᠠᠶᠢᠮᠠᠭ ᠤᠨ ᠨᠡᠷᠡᠶᠢᠳᠦᠯ ᠤᠨ ᠲᠤᠬᠠᠢ ᠬᠡᠳᠦ ᠬᠡᠳᠦᠨ ᠠᠳᠠᠯᠢ ᠪᠣᠰᠣ ᠵᠦᠢᠯ ᠤᠨ ᠬᠡᠯᠡᠯᠭᠡ᠂ ᠲᠡᠣᠬᠡ ᠲᠡᠮᠳᠡᠭᠯᠡᠯ ᠪᠠ ᠰᠤᠳᠤᠯᠭᠠᠨ ᠤ ᠦᠷ᠎ᠡ ᠳ᠋ᠦᠩ ᠵᠡᠷᠭᠡᠴᠡᠨ ᠣᠷᠤᠰᠢᠵᠦ ᠪᠠᠶᠢᠳᠠᠭ᠃ ᠬᠤᠶᠢᠳ ᠠᠶᠢᠮᠠᠭ ᠤᠨ ᠡᠭᠦᠰᠦᠯ ᠭᠠᠷᠤᠯ ᠤᠨ ᠲᠤᠬᠠᠢ ᠬᠡᠯᠡᠪᠡᠯ ᠨᠢᠭᠡ ᠨᠢ ︽ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ︾ ᠳᠤ ᠳᠤᠷᠠᠳᠤᠭᠰᠠᠨ ᠴᠢᠩᠭᠢᠰ ᠬᠠᠭᠠᠨ ᠬᠠᠮᠤᠭ ᠠᠩᠬ᠎ᠠ ᠬᠡᠣᠬᠡᠳ ᠳᠡᠭᠦᠦ ᠨᠠᠷ ᠲᠡᠭᠡᠨ ᠦᠮᠴᠢ ᠬᠤᠪᠢᠶᠠᠬᠤ ᠳᠤ ᠴᠠᠭᠠᠳᠠᠢ ᠳᠤ ᠬᠤᠪᠢᠶᠠᠵᠦ ᠦᠭᠭᠦᠭᠰᠡᠨ ᠠᠯᠪᠠᠲᠦ ︽ᠨᠠᠢᠮᠠᠨ ᠮᠢᠩᠭᠠᠨ ᠢᠷᠭᠡᠳ︾ ᠢ ᠬᠤᠶᠢᠳ ᠤᠨ ᠠᠶᠢᠮᠠᠭ ᠤᠨ ᠡᠭᠦᠰᠦᠯ ᠭᠠᠷᠤᠯ ᠭᠡᠵᠦ ᠦᠵᠡᠳᠡᠭ᠃ ᠨᠦᠭᠦᠭᠡ ᠨᠢᠭᠡ ᠨᠢ ︽ᠡᠷᠳᠡᠨ ᠤ ᠮᠣᠩᠭᠤᠯ ᠤᠨ ᠬᠠᠭᠠᠳ ᠤᠨ ᠦᠨᠳᠦᠰᠦᠨ ᠤ ᠶᠡᠭᠡ ᠰᠢᠷ᠎ᠠ ᠲᠤᠭᠤᠵᠢ ᠣᠷᠤᠰᠢᠪᠠ︾ ᠪᠠᠷ ᠡᠰᠢ ᠪᠠᠷᠢᠮᠲᠠ ᠪᠣᠯᠭᠠᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠠᠬᠠᠯᠠᠭᠴᠢ ᠨᠢ ᠣᠶᠢᠷᠠᠳ ᠤᠨ ᠬᠤᠳᠤᠭ᠎ᠠ ᠪᠠᠬᠢ ᠶᠢᠨ ᠬᠤᠶᠠᠷ ᠬᠦᠪᠡᠭᠦᠨ ᠢᠨᠠᠯᠴᠢ ᠪᠠ ᠲᠦᠷᠦᠯᠴᠢ ᠮᠦᠨ ᠭᠡᠵᠦ ᠦᠵᠡᠳᠡᠭ᠃ ᠪᠠᠰᠠ ᠨᠢᠭᠡ ᠨᠢ ︽ᠬᠠᠭᠠᠳ ᠤᠨ ᠦᠨᠳᠦᠰᠦᠨ ᠤ ᠡᠷᠳᠡᠨᠢ ᠶᠢᠨ ᠳᠣᠪᠴᠢ︾ ᠪᠣᠯᠤᠨ ᠯᠣᠪᠰᠠᠩᠳᠠᠨᠽᠠᠨ ᠤ ︽ᠠᠯᠲᠠᠨ ᠳᠣᠪᠴᠢ︾ ᠳᠠᠬᠢ ︽ᠲᠤᠸᠠ ᠰᠣᠬᠤᠷ ᠤᠨ ᠳᠦᠷᠪᠡᠨ ᠬᠦᠪᠡᠭᠦᠨ ᠳᠦᠷᠪᠡᠨ ᠣᠶᠢᠷᠠᠳ ᠢ ᠪᠦᠷᠢᠯᠳᠦᠭᠦᠯᠪᠡ︾ ᠭᠡᠰᠡᠨ ᠢ ᠦᠨᠳᠦᠰᠦᠯᠡᠨ ᠬᠤᠶᠢᠳ ᠠᠶᠢᠮᠠᠭ ᠪᠤᠯ ᠲᠤᠸᠠ ᠰᠣᠬᠤᠷ ᠤᠨ ᠭᠤᠷᠪᠠᠳᠤᠭᠠᠷ ᠬᠦᠪᠡᠭᠦᠨ ᠡᠮᠨᠢᠭ ᠤᠨ ᠬᠤᠶᠢᠴᠢᠰ ᠮᠦᠨ ᠭᠡᠵᠦ ᠪᠣᠢ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠲᠣᠳᠤ ᠮᠣᠩᠭᠤᠯ ᠲᠡᠤᠬᠡ ᠶᠢᠨ ᠰᠣᠷᠪᠤᠯᠵᠢ ᠪᠢᠴᠢᠭ ᠤᠳ ᠲᠤ ᠬᠤᠶᠢᠳ ᠠᠶᠢᠮᠠᠭ ᠪᠣᠯ ᠮᠤᠩᠭᠤᠯ ᠠᠴᠠ ᠰᠠᠯᠵᠦ ᠭᠠᠷᠴᠦ ᠢᠷᠡᠭᠰᠡᠨ ᠴᠢᠩᠭᠢᠰ ᠬᠠᠭᠠᠨ ᠤ ᠬᠤᠶᠢᠴᠢ ᠦᠶ᠎ᠡ ᠪᠣᠯᠬᠤ ᠶᠠᠪᠠᠭᠠᠨ ᠮᠡᠷᠭᠡᠨ ᠤ ᠬᠤᠶᠢᠴᠢᠰ ᠭᠡᠳᠡᠭ ᠲᠡᠮᠳᠡᠭᠯᠡᠯ ᠴᠦ ᠪᠣᠢ᠃ ᠬᠤᠶᠢᠳ ᠣᠪᠤᠭ ᠤᠨ ᠳᠠᠭᠤᠳᠠᠯᠭ᠎ᠠ ᠪᠢᠴᠢᠯᠭᠡ ᠶᠢᠨ ᠬᠤᠪᠢᠷᠠᠯ ᠭᠡᠪᠡᠯ ᠬᠤᠶᠢᠳ ᠭᠡᠳᠡᠭ ᠦᠭᠡ ᠪᠣᠯ ᠵᠦᠭ ᠴᠢᠭ ᠤᠨ ᠢᠯᠭᠠᠯ ᠢ ᠵᠢᠭᠠᠭᠰᠠᠨ ᠬᠤᠶᠢᠲᠦ ᠭᠡᠰᠡᠨ ᠦᠭᠡᠨ ᠤ ᠬᠤᠪᠢᠷᠠᠯ ᠮᠦᠨ ᠭᠡᠵᠦ ᠣᠯᠠᠩᠬᠢ ᠡᠷᠳᠡᠮᠳᠡᠨ ᠵᠦᠪᠰᠢᠶᠡᠷᠡᠵᠦ ᠪᠣᠢ᠃ ᠭᠡᠬᠦ ᠳᠤ ᠠᠳᠠᠯᠢ ᠪᠣᠰᠣ ᠲᠡᠣᠬᠡᠨ ᠴᠠᠭ ᠦᠶ᠎ᠡ᠂ ᠠᠳᠠᠯᠢ ᠪᠣᠰᠤ ᠪᠦᠰᠡ ᠨᠤᠲᠤᠭ ᠲᠤ ᠬᠤᠶᠢᠳ᠂ ᠬᠤᠶᠢᠳ ᠳᠤᠯᠤᠭᠠᠨ᠂ ᠬᠤᠶᠢᠳ ᠴᠦᠬᠦᠷᠦᠭ᠂ ᠶᠡᠭᠡ ᠬᠤᠶᠢᠳ᠂ ᠪᠠᠭ᠎ᠠ ᠬᠤᠶᠢᠳ ᠂ ᠴᠠᠭᠠᠨ ᠮᠣᠷᠢᠲᠦ ᠶᠢᠨ ᠬᠤᠶᠢᠳ ᠭᠡᠵᠦ ᠠᠳᠠᠯᠢ ᠪᠣᠰᠤ ᠳᠠᠭᠤᠳᠠᠬᠤ ᠠᠴᠠ ᠭᠠᠳᠠᠨ᠎ᠠ ᠵᠠᠷᠢᠮ ᠬᠦᠮᠦᠰ ᠬᠤᠶᠢᠳ ᠭᠡᠳᠡᠭ ᠦᠭᠡ ᠪᠣᠯ ᠮᠣᠩᠭᠤᠯ ᠤᠨ ᠡᠷᠲᠡᠨ ᠤ ᠦᠭᠡ ᠪᠣᠯᠬᠤ ᠣᠶᠢᠷᠠᠳ ᠬᠡᠯᠡᠯᠭᠡ ᠶᠢᠨ ᠬᠤᠨᠢ ᠶᠢ ᠬᠤᠢ ᠭᠡᠵᠦ ᠬᠡᠯᠡᠳᠡᠭ ᠦᠭᠡᠨ ᠤ ᠠᠷᠤ ᠳᠤ ᠣᠯᠠᠨ ᠲᠤᠭᠠᠨ ᠤ ᠳᠠᠭᠠᠪᠤᠷᠢ ᠵᠠᠯᠭᠠᠭᠠᠳ ᠬᠤᠶᠢᠳ ᠪᠣᠯᠤᠭᠰᠠᠨ ᠭᠡᠵᠦ ᠦᠵᠡᠳᠡᠭ ᠴᠦ ᠪᠣᠢ᠃ ᠤᠭᠰᠠᠭᠠᠲᠠᠨ ᠤ ᠡᠭᠦᠰᠦᠯ ᠭᠠᠷᠤᠯ ᠢᠵᠠᠭᠤᠷ ᠢ ᠬᠠᠶᠢᠬᠤ ᠪᠣᠯ ᠨᠡᠯᠦᠭᠡᠷ ᠶᠡᠭᠡ ᠮᠦᠷᠲᠡᠭᠡᠨ ᠬᠦᠨ ᠨᠠᠷᠢᠨ ᠰᠤᠳᠤᠯᠭᠠᠨ ᠤ ᠠᠵᠢᠯ ᠲᠤᠯᠠ ᠡᠭᠦᠨ ᠳᠤ ᠣᠷᠢᠶᠠᠯᠳᠤᠬᠤ ᠠᠷᠭ᠎ᠠ ᠦᠭᠡᠢ ᠶᠤᠮ᠃ ᠬᠤᠶᠠᠷ᠂ ᠬᠤᠶᠢᠳ ᠠᠶᠢᠮᠠᠭ ᠤᠨ ᠪᠠᠶᠢᠷᠢ ᠰᠠᠭᠤᠷᠢ ᠬᠢᠭᠡᠳ ᠲᠡᠭᠦᠨ ᠤ ᠦᠢᠯᠡ ᠬᠡᠷᠡᠭ ᠤᠨ ᠲᠣᠪᠴᠢ᠃ ᠬᠤᠶᠢᠳ ᠠᠶᠢᠮᠠᠭ ᠨᠢ ᠠᠩᠬ᠎ᠠ ᠶᠡᠭᠡ ᠮᠣᠩᠭᠤᠯ ᠬᠠᠭᠠᠨᠲᠦ ᠤᠯᠤᠰ ᠠᠴᠠ ᠡᠮᠦᠨ᠎ᠡ 12 ᠳ᠋ᠤᠭᠠᠷ ᠵᠠᠭᠤᠨ ᠤ ᠠᠳᠠᠭ᠂ 13 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠬᠢ ᠪᠠᠷ ᠣᠶᠢᠷᠠᠳ ᠠᠶᠢᠮᠠᠭ ᠤᠨ ᠤᠤᠭᠠᠨ ᠪᠦᠷᠢᠯᠳᠦᠭᠦᠨ ᠪᠦᠭᠡᠳ ᠲᠣᠯᠤᠭᠠᠶᠢᠯᠠᠭᠴᠢ ᠶᠢᠨ ᠬᠤᠪᠢ ᠪᠠᠷ ᠲᠡᠣᠬᠡᠨ ᠳᠠᠪᠴᠠᠩ ᠳᠤ ᠢᠯᠡᠷᠡᠨ ᠭᠠᠷᠤᠭᠰᠠᠨ ᠴᠠᠭ ᠠᠴᠠ ᠪᠠᠨ 18 ᠳ᠋ᠤᠭᠠᠷ ᠵᠠᠭᠤᠨ ᠤ ᠳᠣᠣᠷᠠᠲᠦ ᠬᠠᠭᠠᠰ ᠤᠨ ᠦᠶ᠎ᠡ᠂ ᠳᠠᠷᠤᠢ ᠴᠢᠩ ᠤᠯᠤᠰ ᠤᠨ ᠦᠶᠡᠰ ᠣᠶᠢᠷᠠᠳ ᠮᠤᠩᠭᠤᠯ ᠵᠠᠳᠠᠷᠠᠲᠠᠯ᠎ᠠ ᠣᠶᠢᠷᠠᠳ ᠤᠨ ᠪᠦᠷᠢᠯᠳᠦᠭᠦᠨ ᠠᠶᠢᠮᠠᠭ ᠪᠠᠶᠢᠭᠰᠠᠨ ᠤᠷᠲᠤ ᠤᠳᠠᠭᠠᠨ ᠲᠡᠣᠬᠡ ᠲᠠᠢ ᠠᠶᠢᠮᠠᠭ ᠤᠭᠰᠠᠭ᠎ᠠ ᠮᠦᠨ᠃ ᠬᠤᠶᠢᠳ ᠠᠶᠢᠮᠠᠭ 12 ᠳ᠋ᠤᠭᠠᠷ ᠵᠠᠭᠤᠨ ᠤ ᠠᠳᠠᠭ᠂ 13 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠬᠢᠨ ᠳᠠᠬᠢ ᠮᠤᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠲᠠᠬᠢ ᠨᠡᠭᠦᠳᠡᠯᠴᠢᠨ ᠠᠶᠢᠮᠠᠭ ᠤᠳ ᠤᠨ ᠪᠠᠶᠢᠷᠢ ᠰᠠᠭᠤᠷᠢ ᠪᠣᠯᠢᠶᠠᠯᠳᠣᠭᠰᠠᠨ ᠲᠡᠮᠡᠴᠡᠭᠡᠨ ᠤ ᠳᠤᠮᠳᠠ ᠲᠡᠮᠦᠵᠢᠨ ᠤ ᠡᠰᠡᠷᠭᠦᠦ ᠪᠦᠯᠦᠭ ᠲᠤ ᠵᠣᠭᠰᠣᠵᠦ᠂ ᠲᠡᠮᠦᠵᠢᠨ ᠲᠠᠢ ᠡᠰᠡᠷᠭᠦᠴᠡᠯᠳᠦᠨ ᠲᠤᠯᠤᠯᠳᠤᠵᠤ ᠪᠠᠶᠢᠭᠰᠠᠨ ᠢᠶᠠᠨ 1207 ᠣᠨ ᠳᠤ ᠶᠡᠭᠡ ᠮᠣᠩᠭᠤᠯ ᠬᠠᠭᠠᠨᠲᠦ ᠤᠯᠤᠰ ᠲᠤ ᠪᠠᠭᠤᠵᠦ ᠦᠭᠭᠦᠨ ᠳᠠᠭᠠᠵᠦ᠂ ᠬᠤᠵᠢᠮ ᠤᠨ ᠮᠣᠩᠭᠤᠯ ᠤᠨ ᠶᠡᠭᠡ ᠨᠢᠭᠡᠳᠦᠯ ᠳᠤ ᠬᠦᠴᠦ ᠪᠠᠨ ᠡᠷᠭᠦᠵᠦ᠂ ᠭᠠᠪᠢᠶ᠎ᠠ ᠪᠠᠶᠢᠭᠤᠯᠤᠨ ᠵᠢᠳᠬᠦᠯ ᠦᠵᠡᠭᠦᠯᠵᠦ ᠶᠠᠪᠤᠭᠰᠠᠨ ᠲᠤᠯᠠ ᠬᠤᠵᠢᠮ ᠤᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠢᠵᠠᠭᠤᠷᠲᠠᠨ ᠮᠣᠩᠭᠤᠯ ᠬᠠᠭᠠᠨᠲᠦ ᠣᠯᠣᠰ ᠤᠨ ᠦᠶ᠎ᠡ ᠳᠤ ᠦᠶ᠎ᠡ ᠳᠠᠷᠠᠭᠠᠯᠠᠨ ᠴᠢᠩᠭᠢᠰ ᠤᠨ ᠠᠯᠲᠠᠨ ᠣᠷᠤᠭ ᠤᠨ ᠬᠢᠨ ᠲᠠᠢ ᠬᠤᠳᠠ ᠤᠷᠤᠭ ᠤᠨ ᠬᠤᠯᠪᠤᠭ᠎ᠠ ᠪᠠᠶᠢᠭᠤᠯᠤᠨ ᠣᠯᠤᠰ ᠲᠦᠷᠦ ᠶᠢᠨ ᠲᠠᠯ᠎ᠠ ᠪᠠᠷ ᠨᠡᠯᠢᠶᠡᠳ ᠡᠷᠬᠡᠰᠢᠶᠡᠬᠦ ᠬᠦᠴᠦᠨ ᠲᠠᠢ ᠪᠣᠯᠵᠦ᠂ ᠶᠡᠷᠦᠨᠢ ᠬᠦᠴᠦᠷᠬᠡᠭ ᠠᠶᠢᠮᠠᠭ ᠤᠨ ᠡᠩᠨᠡᠭᠡᠨ ᠳᠤ ᠪᠠᠭᠳᠠᠵᠦ᠂ ᠣᠶᠢᠷᠠᠳ ᠠᠶᠢᠮᠠᠭ ᠤᠨ ᠭᠤᠣᠯ ᠴᠣᠭᠴᠠ ᠪᠦᠷᠢᠯᠳᠦᠭᠦᠨ ᠨᠢ ᠪᠠᠶᠢᠭᠰᠠᠨ ᠪᠣᠯᠪᠠᠴᠦ ᠶᠤᠸᠠᠨ ᠤᠯᠤᠰ ᠤᠨ ᠡᠬᠢᠨ ᠤ ᠦᠶ᠎ᠡ ᠳᠤ ᠪᠣᠯᠤᠭᠰᠠᠨ ᠠᠷᠢᠠᠠᠪᠤᠬ᠎ᠠ ᠪᠣᠯᠤᠨ ᠬᠤᠪᠢᠯᠠᠢ ᠠᠬ᠎ᠠ ᠳᠡᠭᠦᠦ ᠬᠤᠶᠠᠷ ᠤᠨ ᠬᠠᠭᠠᠨ ᠰᠠᠭᠤᠷᠢᠨ ᠪᠤᠯᠢᠶᠠᠯᠳᠤᠭᠰᠠᠨ ᠤᠯᠤᠰ ᠲᠦᠷᠦ ᠶᠢᠨ ᠲᠡᠮᠡᠴᠡᠯ ᠳᠤ ᠠᠷᠢᠠᠠᠪᠤᠬ᠎ᠠ ᠶᠢ ᠳᠡᠮᠵᠢᠭᠡᠳ ᠢᠯᠠᠭᠳᠠᠭᠰᠠᠨ ᠠᠴᠠ ᠬᠤᠵᠢᠮ ᠤᠨ ᠬᠠᠭᠠᠨ ᠬᠤᠪᠢᠯᠠᠢ ᠪᠠ ᠲᠡᠭᠦᠨ ᠤ ᠬᠤᠶᠢᠴᠢᠰ ᠲᠤ ᠢᠲᠡᠭᠡᠯ ᠬᠦᠨᠳᠦ ᠪᠠᠭᠤᠷᠠᠵᠦ ᠤᠯᠤᠰ ᠲᠦᠷᠦ ᠶᠢᠨ ᠳᠠᠪᠴᠠᠩ ᠠᠴᠠ ᠬᠤᠯᠠᠳᠬᠤ ᠶᠢ ᠳᠠᠭᠠᠯᠳᠤᠨ ᠬᠦᠴᠦᠨ ᠴᠢᠳᠠᠯ ᠨᠢ ᠤᠶᠠᠳᠠᠵᠦ᠂ ᠣᠶᠢᠷᠠᠳ ᠠᠶᠢᠮᠠᠭ ᠤᠨ ᠲᠣᠯᠤᠭᠠᠶᠢᠯᠠᠭᠴᠢ ᠶᠢᠨ ᠰᠠᠭᠤᠳᠠᠯ ᠴᠦ ᠴᠣᠷᠤᠰ ᠠᠶᠢᠮᠠᠭ ᠤᠨ ᠭᠠᠷ ᠲᠤ ᠰᠢᠯᠵᠢᠵᠦ 14 ᠳ᠋ᠤᠭᠡᠷ ᠵᠠᠭᠤᠨ ᠤ ᠰᠡᠭᠦᠯᠴᠢ ᠠᠴᠠ 18 ᠳ᠋ᠤᠭᠠᠷ ᠵᠠᠭᠤᠨ ᠤ ᠳᠡᠭᠡᠳᠦ ᠬᠠᠭᠠᠰ ᠦᠶ᠎ᠡ ᠬᠦᠷᠲᠡᠯᠡᠬᠢ ᠬᠤᠭᠤᠴᠠᠭᠠᠨ ᠳᠠᠬᠢ ᠮᠢᠩ ᠤᠯᠤᠰ ᠬᠢᠭᠡᠳ ᠬᠤᠶᠢᠲᠦ ᠶᠤᠸᠠᠨ ᠣᠯᠣᠰ ᠤᠨ ᠬᠤᠭᠤᠷᠤᠨᠳᠤᠬᠢ ᠲᠠᠶᠢᠨ ᠳᠠᠵᠢᠨ ᠪᠠ ᠵᠡᠭᠦᠨ ᠮᠣᠩᠭᠤᠯ ᠤᠨ ᠹᠸᠣᠳᠠᠯ ᠤᠨ ᠢᠵᠠᠭᠤᠷᠲᠠᠳ ᠪᠠ ᠣᠶᠢᠷᠠᠳ ᠤᠨ ᠲᠡᠮᠡᠴᠡᠭᠡᠨ ᠤ ᠳᠤᠮᠳᠠ᠂ ᠬᠤᠶᠢᠳ ᠠᠶᠢᠮᠠᠭ ᠳᠡᠮᠡᠢ ᠶᠡᠭᠡ ᠦᠢᠯᠡᠳᠦᠯ ᠦᠵᠡᠭᠦᠯᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠮᠢᠩ ᠤᠯᠤᠰ ᠤᠨ ᠰᠡᠭᠦᠯᠴᠢ᠂ ᠴᠢᠩ ᠤᠯᠤᠰ ᠤᠨ ᠡᠬᠢᠨ ᠦᠶ᠎ᠡ ᠪᠣᠯᠬᠤ ᠳᠤ ᠬᠦᠴᠦ ᠲᠠᠮᠢᠷ ᠨᠢ ᠤᠯᠠᠮ ᠮᠠᠭᠤᠲᠠᠵᠦ ᠪᠡᠶ᠎ᠡ ᠪᠠᠨ ᠳᠠᠭᠠᠭᠠᠬᠤ ᠴᠢᠳᠠᠪᠤᠷᠢ ᠨᠢ ᠰᠤᠯᠠᠷᠠᠵᠦ᠂ ᠵᠠᠷᠢᠮ ᠨᠢ ᠪᠣᠰᠤᠳ ᠤᠨ ᠬᠠᠷᠢᠶᠠᠨ ᠳᠤ ᠪᠠᠭᠳᠠᠯᠴᠠᠵᠦ᠂ ᠵᠠᠷᠢᠮ ᠨᠢ ᠪᠣᠰᠤᠳ ᠤᠨ ᠬᠠᠪᠢᠷᠭᠠᠨ ᠳᠤ ᠪᠠᠷᠠᠳᠠᠵᠤ ᠪᠠᠶᠢᠭᠰᠠᠨ ᠦᠩᠭᠡᠷᠡᠯᠲᠡ ᠲᠠᠢ ᠪᠣᠯᠪᠠᠴᠦ ᠲᠡᠷᠡ ᠨᠢ ᠭᠤᠣᠯ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠬᠤ ᠣᠷᠤᠰᠢᠨ ᠨᠤᠲᠤᠭᠯᠠᠬᠤ ᠭᠠᠵᠠᠷ ᠨᠤᠲᠤᠭ ᠤᠨ ᠬᠤᠪᠢ ᠠᠴᠠ ᠢᠯᠡᠷᠡᠵᠦ ᠪᠠᠶᠢᠭᠰᠠᠨ ᠠᠴᠠ ᠪᠢᠰᠢ ᠤᠯᠤᠰ ᠲᠦᠷᠦ ᠶᠢᠨ ᠲᠠᠯ᠎ᠠ ᠪᠠᠷ ᠬᠠᠰᠢᠯᠠ ᠣᠶᠢᠷᠠᠳ ᠤᠨ ᠨᠢᠭᠡᠨ ᠪᠦᠷᠢᠯᠳᠦᠭᠦᠨ ᠠᠶᠢᠮᠠᠭ ᠤᠨ ᠪᠠᠶᠢᠷᠢ ᠰᠠᠭᠤᠷᠢ ᠪᠠᠨ ᠠᠯᠳᠠᠭᠠᠳ ᠦᠭᠡᠢ ᠣᠷᠤᠰᠢᠭᠰᠠᠭᠠᠷ ᠢᠷᠡᠭᠰᠡᠨ ᠪᠦᠭᠡᠳ 18 ᠳ᠋ᠤᠭᠠᠷ ᠵᠠᠭᠤᠨ ᠤ ᠲᠤᠮᠳᠠᠴᠢ ᠦᠶ᠎ᠡ ᠪᠠᠷ ᠬᠤᠶᠢᠳ ᠠᠶᠢᠮᠠᠭ ᠲᠤᠯᠤᠭᠠᠢ ᠦᠨᠳᠡᠶᠢᠵᠦ᠂ ᠬᠦᠮᠦᠨ ᠠᠮᠠ ᠣᠯᠠᠨ ᠲᠠᠢ ᠬᠦᠴᠦᠷᠭᠡᠭ ᠠᠶᠢᠮᠠᠭ ᠤᠨ ᠬᠤᠪᠢ ᠪᠠᠷ ᠣᠶᠢᠷᠠᠳ ᠤᠨ ᠭᠤᠣᠯ ᠪᠦᠷᠢᠯᠳᠦᠭᠦᠨ ᠤ ᠨᠢᠭᠡ ᠨᠢ ᠪᠣᠯᠵᠦ ᠣᠶᠢᠷᠠᠳ ᠮᠣᠩᠭᠤᠯ ᠤᠨ ᠲᠣᠲᠤᠭᠠᠳᠦ ᠳᠠᠭᠠᠨ ᠤᠯᠤᠰ ᠲᠦᠷᠦ ᠶᠢᠨ ᠲᠠᠪᠴᠠᠩ ᠳᠤ ᠦᠰᠦᠷᠦᠯᠳᠦᠨ ᠭᠠᠳᠠᠭᠠᠳᠤ ᠳᠠᠭᠠᠨ ᠮᠠᠨᠵᠦ ᠶᠢᠨ ᠲᠦᠷᠢᠮᠡᠬᠡᠶᠢᠯᠡᠭᠴᠢᠳ ᠲᠠᠢ ᠰᠢᠭᠤᠷᠬᠠᠢ ᠡᠰᠡᠷᠭᠦᠴᠡᠯᠳᠦᠨ ᠲᠡᠮᠡᠴᠡᠯᠳᠦᠭᠰᠡᠨ ᠪᠢᠯᠡ᠃ ᠶᠡᠷᠦ ᠶᠢᠨ ᠦᠭᠡᠨ ᠳᠤ ︽ᠡᠩᠭᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ ᠬᠠᠮᠤᠭ ᠤᠨ ᠦᠰᠢᠶ᠎ᠡ ᠲᠠᠢ ᠬᠦᠮᠦᠨ ᠪᠣᠯ ᠭᠠᠯᠳᠠᠨ ᠪᠣᠱᠤᠭᠲᠦ᠂ ᠲᠡᠭᠷᠢ ᠳᠡᠳᠭᠦᠭᠴᠢ ᠬᠠᠭᠠᠨ ᠤ ᠬᠠᠮᠤᠭ ᠤᠨ ᠬᠤᠷᠤᠰᠳᠠᠭ ᠬᠦᠮᠦᠨ ᠪᠣᠯ ᠠᠮᠤᠷᠰᠠᠨᠠᠭ᠎ᠠ︾ ᠭᠡᠳᠡᠭ ᠨᠢ ᠤᠴᠢᠷ ᠲᠠᠢ ᠦᠭᠡ ᠮᠦᠨ᠃ ᠮᠠᠨᠵᠦ ᠶᠢᠨ ᠬᠠᠭᠠᠳ ᠠᠷᠭᠠᠳᠠᠬᠤ᠂ ᠲᠠᠲᠠᠬᠤ᠂ ᠠᠶᠤᠯᠭᠠᠬᠤ ᠭᠤᠷᠪᠠ ᠪᠠᠷ ᠲᠠᠪᠤᠬᠠᠨ ᠵᠢᠯ ᠤᠨ ᠳᠤᠲᠣᠷ᠎ᠠ ᠵᠡᠭᠦᠨ ᠮᠤᠩᠭᠤᠯ ᠢ ᠳᠠᠭᠠᠭᠤᠯᠵᠦ᠂ ᠮᠣᠩᠭᠤᠯ ᠤᠨ ᠯᠢᠭᠳᠡᠨ ᠬᠠᠭᠠᠨ ᠢ ᠭᠠᠭᠴᠠ ᠰᠦᠷ ᠢᠶᠠᠷ ᠠᠶᠤᠯᠭᠠᠵᠦ᠂ ᠬᠠᠶᠢᠷᠠᠲᠠᠢ ᠬᠠᠲᠤᠨ᠂ ᠬᠠᠭᠠᠨ ᠵᠠᠯᠭᠠᠮᠵᠢᠯᠠᠬᠤ ᠬᠦᠪᠡᠭᠦᠨ ᠢᠶᠠᠨ ᠣᠷᠬᠢᠭᠠᠳ ᠲᠤᠲᠠᠭᠠᠯᠭᠠᠭᠰᠠᠨ᠃ ᠬᠤᠷᠢᠬᠠᠨ ᠵᠢᠯ ᠤᠨ ᠬᠤᠭᠤᠷᠤᠨᠳᠦ ᠦᠪᠦᠷ ᠮᠣᠩᠭᠤᠯ ᠤᠨ ᠬᠤᠷᠢᠨ ᠳᠦᠷᠪᠡᠨ ᠠᠶᠢᠮᠠᠭ ᠢ ᠭᠠᠷ ᠲᠠᠭᠠᠨ ᠣᠷᠤᠭᠤᠯᠵᠦ ᠶᠠᠮᠠᠷ ᠴᠦ ᠵᠡᠪᠰᠡᠭ ᠬᠦᠳᠡᠯᠭᠡᠭᠰᠡᠨ ᠦᠭᠡᠢ ᠣᠷᠠᠨ ᠦᠭᠡ ᠣᠲᠤᠭ᠎ᠠ ᠵᠢᠩᠰᠡ ᠬᠤᠶᠡᠷ ᠢᠶᠠᠷ ᠠᠷᠤ ᠮᠣᠩᠭᠤᠯ ᠤᠨ ᠨᠠᠶᠠᠨ ᠵᠢᠷᠭᠤᠭᠠᠨ ᠬᠤᠰᠢᠭᠤ ᠶᠢ ᠬᠤᠷᠢᠶᠠᠮᠵᠢᠯᠠᠭᠰᠠᠨ ᠠᠲᠠᠯ᠎ᠠ ᠪᠠᠷᠠᠭᠤᠨ ᠮᠣᠩᠭᠤᠯ ᠬᠡᠮᠡᠬᠦ ᠣᠶᠢᠷᠠᠳ ᠨᠢ ᠬᠠᠷᠢᠨ ᠮᠠᠨᠵᠦ ᠲᠠᠢ ᠵᠠᠭᠤ ᠭᠠᠷᠤᠢ ᠵᠢᠯ ᠡᠰᠡᠷᠭᠦᠴᠡᠯᠳᠦᠨ ᠭᠤᠷᠪᠠᠨ ᠦᠶ᠎ᠡ ᠶᠢᠨ ᠬᠠᠭᠠᠨ ᠤ ᠰᠠᠨᠠᠭᠠᠨ ᠤ ᠡᠪᠡᠳᠴᠢᠨ ᠪᠣᠯᠵᠦ ᠬᠤᠶᠠᠷ ᠦᠶ᠎ᠡ ᠶᠢᠨ ᠬᠠᠭᠠᠨ ᠬᠡᠳᠦᠨ ᠤᠳᠠᠭ᠎ᠠ ᠪᠡᠶ᠎ᠡ ᠪᠠᠷ ᠶᠡᠭᠡ ᠴᠡᠷᠢᠭ ᠬᠦᠳᠡᠯᠭᠡᠨ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠦᠷᠡᠭᠳᠡᠯ ᠰᠦᠢᠳᠦᠯ ᠭᠠᠷᠭᠠᠨ ᠬᠠᠮᠤᠭ ᠤᠨ ᠰᠡᠭᠦᠯ ᠳᠤ ᠵᠡᠪᠰᠡᠭ ᠤᠨ ᠬᠦᠴᠦ ᠪᠠᠷ ᠯᠠ ᠰᠠᠶ᠋ᠢ ᠳᠠᠷᠤᠵᠦ ᠠᠪᠤᠭᠰᠠᠨ ᠶᠣᠮ᠃ ᠡᠨᠡ ᠶᠡᠭᠡ ᠬᠠᠷᠠᠰᠠᠯᠲᠤ ᠠᠯᠠᠯᠳᠤᠭᠠᠨ ᠳᠤ ᠬᠤᠶᠢᠳ ᠠᠶᠢᠮᠠᠭ ᠣᠶᠢᠷᠠᠳ ᠮᠣᠩᠭᠤᠯᠴᠤᠳ ᠲᠠᠢ ᠬᠠᠮᠲᠦ ᠪᠠᠷ ᠴᠣᠬᠤᠮ ᠵᠢᠩᠬᠢᠨᠢ ᠦᠨᠳᠦᠰᠦᠲᠡᠨ ᠤ ᠪᠠᠨ ᠡᠷᠬᠡ ᠮᠡᠳᠡᠯ ᠡᠬᠡ ᠣᠷᠤᠨ ᠤ ᠪᠠᠨ ᠡᠩᠭᠡ ᠲᠠᠶᠢᠪᠤᠩ ᠢᠶᠠᠨ ᠬᠠᠷᠠᠮᠨᠠᠵᠦ᠂ ᠬᠠᠯᠠᠭᠤᠨ ᠠᠮᠢ ᠪᠠᠨ ᠦᠷᠡᠭᠳᠡᠭᠦᠯᠦᠨ ᠪᠦᠯᠢᠶᠡᠨ ᠴᠢᠰᠣ ᠪᠠᠨ ᠠᠰᠬᠠᠷᠠᠭᠤᠯᠤᠨ ᠠᠶᠢᠮᠠᠭ ᠤᠭᠰᠠᠭ᠎ᠠ ᠪᠠᠨ ᠪᠠᠯᠠᠷᠠᠲᠠᠯ᠎ᠠ ᠪᠠᠨ ᠭᠠᠳᠠᠭᠠᠳᠦ ᠶᠢᠨ ᠲᠦᠷᠢᠮᠡᠬᠡᠶᠢᠯᠡᠭᠴᠢᠳ ᠲᠠᠢ ᠰᠢᠭᠤᠷᠬᠠᠢ ᠲᠡᠮᠡᠴᠡᠭᠰᠡᠨ ᠠᠷᠠᠳ ᠲᠦᠮᠡᠨ ᠤ ᠨᠢᠭᠡ ᠨᠢ ᠮᠦᠨ᠃ ᠭᠡᠬᠦ ᠳᠤ ᠰᠡᠭᠦᠯ ᠤᠨ ᠦᠶ᠎ᠡ ᠳᠤ ᠬᠤᠶᠢᠳ ᠤᠨ ᠢᠵᠠᠭᠤᠷᠲᠠᠳ ᠡᠷᠬᠡ ᠵᠡᠷᠭᠡ ᠳᠤ ᠤᠯᠠᠶᠢᠰᠢᠷᠠᠵᠦ ᠲᠣᠲᠤᠭᠠᠳᠦ ᠶᠢᠨ ᠦᠷᠢᠰᠦᠯᠳᠦᠭᠡᠨ ᠲᠤᠮᠳᠠ ᠵᠦᠢ ᠪᠣᠰᠤ ᠶᠢᠨ ᠭᠡᠨᠡᠨ ᠭᠡᠮᠲᠦ ᠠᠷᠭ᠎ᠠ ᠠᠪᠴᠠᠯ ᠢ ᠬᠡᠷᠡᠭᠯᠡᠵᠦ᠂ ᠬᠤᠲᠠᠨ ᠳᠠᠭᠠᠨ ᠴᠢᠨ᠋ᠸ᠎ᠠ ᠬᠦᠲᠦᠯᠦᠨ ᠣᠷᠤᠭᠤᠯᠵᠦ᠂ ᠪᠠᠷᠠᠭᠤᠨ ᠮᠤᠩᠭᠤᠯ ᠤᠨ ᠰᠦᠢᠷᠡᠯ ᠢ ᠲᠦᠷᠭᠡᠳᠭᠡᠭᠰᠡᠨ ᠴᠢᠰᠤᠲᠦ ᠰᠤᠷᠭᠠᠮᠵᠢ ᠶᠢ ᠬᠡᠨ ᠬᠦᠮᠦᠨ ᠬᠡᠵᠢᠶ᠎ᠡ ᠴᠦ ᠭᠡᠰᠡᠨ ᠳᠠᠯᠳᠠᠯᠠᠵᠦ ᠪᠣᠯᠬᠤ ᠦᠭᠡᠢ ᠪᠢᠯᠡ᠃ ᠭᠤᠷᠪᠠ᠂ ᠣᠶᠢᠷᠠᠳ ᠤᠨ ᠨᠡᠭᠦᠳᠡᠯ ᠬᠢᠭᠡᠳ ᠬᠤᠶᠢᠳ ᠠᠶᠢᠮᠠᠭ ᠤᠨ ᠡᠵᠡᠮᠰᠢᠯ ᠨᠤᠲᠤᠭ ᠤᠨ ᠲᠦᠢᠮᠤ᠃ ᠬᠤᠶᠢᠳ ᠠᠶᠢᠮᠠᠭ ᠨᠢ ᠣᠶᠢᠷᠠᠳ ᠮᠣᠩᠭᠤᠯ ᠤᠨ ᠤᠤᠭᠠᠨ ᠠᠶᠢᠮᠠᠭ ᠤᠨ ᠨᠢᠭᠡ ᠪᠣᠯᠬᠤ ᠪᠦᠭᠡᠳ ᠲᠡᠣᠬᠡ ᠶᠢᠨ ᠤᠯᠠᠷᠢᠯ ᠬᠤᠪᠢᠰᠤᠯ ᠤᠨ ᠳᠤᠮᠳᠠ ᠣᠶᠢᠷᠠᠳ ᠠᠴᠠ ᠠᠩᠭᠢᠵᠢᠷᠠᠵᠦ ᠪᠠᠶᠢᠭ᠎ᠠ ᠦᠭᠡᠢ ᠶᠢᠨ ᠬᠤᠪᠢ ᠳᠤ ᠣᠶᠢᠷᠠᠳ ᠮᠣᠩᠭᠤᠯ ᠤᠨ ᠡᠵᠡᠮᠰᠢᠯ ᠨᠤᠲᠤᠭ ᠲᠤ ᠬᠤᠶᠢᠳ ᠠᠶᠢᠮᠠᠭ ᠪᠠᠭᠲᠠᠯᠴᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠢᠯᠡ᠃ ᠲᠡᠣᠬᠡ ᠲᠡᠮᠳᠡᠭᠯᠡᠯ ᠢ ᠦᠨᠳᠦᠰᠦᠯᠡᠪᠡᠯ᠄ ︽ᠣᠢ ᠶᠢᠨ ᠢᠷᠭᠡᠳ︾ ᠬᠡᠮᠡᠭᠳᠡᠭᠰᠡᠨ ᠣᠶᠢᠷᠠᠳ ᠮᠣᠩᠭᠤᠯ 12 ᠳ᠋ᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠳᠤ ᠶᠧᠨᠢᠰᠢ ᠭᠤᠤᠯ ᠤᠨ ᠳᠡᠭᠡᠳᠦ ᠤᠷᠤᠰᠬᠠᠯ ᠤᠨ ᠰᠢᠰᠢᠭᠡᠳ ᠭᠤᠣᠯ᠂ ᠨᠠᠢᠮᠠᠨ ᠮᠦᠷᠡᠨ ᠤ ᠤᠷᠤᠰᠬᠠᠯ ᠣᠷᠤᠨ᠂ ᠮᠣᠩᠭᠤᠯ ᠤᠨ ᠦᠨᠳᠦᠷᠯᠢᠭ ᠤᠨ ᠬᠤᠶᠢᠲᠦ ᠬᠡᠰᠡᠭ ᠪᠠᠶᠢᠭᠠᠯ ᠨᠠᠭᠤᠷ ᠤᠨ ᠡᠮᠦᠨ᠎ᠡ ᠦᠵᠦᠭᠦᠷ ᠤᠨ ᠵᠡᠭᠦᠨ ᠪᠠᠷᠠᠭᠤᠨ ᠪᠡᠶ᠎ᠡ ᠳᠤ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠪᠠᠷᠠᠭᠤᠨᠰᠢ ᠰᠢᠯᠵᠢᠵᠦ ᠪᠠᠶᠢᠭᠠᠯ ᠨᠠᠭᠤᠷ ᠤᠨ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤ ᠨᠤᠲᠤᠭᠯᠠᠵᠦ ᠪᠠᠶᠢᠭᠰᠠᠨ ᠪᠠᠶᠢᠨ᠎ᠠ᠃ 13 ᠳ᠋ᠤᠭᠠᠷ ᠵᠠᠭᠤᠨ ᠤ ᠰᠡᠭᠦᠯᠴᠢ ᠶᠢᠨ ᠦᠶ᠎ᠡ ᠪᠠᠷ ᠣᠶᠢᠷᠠᠳ ᠠᠶᠢᠮᠠᠭ ᠣᠢ ᠲᠠᠶᠢᠭ᠎ᠠ ᠠᠴᠠ ᠪᠠᠨ ᠨᠡᠭᠦᠳᠡᠯᠯᠡᠨ ᠭᠠᠷᠴᠦ ᠪᠠᠷᠠᠭᠤᠨᠰᠢᠯᠠᠨ ᠠᠯᠲᠠᠢ ᠶᠢᠨ ᠨᠢᠷᠤᠭᠤᠨ ᠤ ᠣᠷᠴᠢᠨ ᠣᠴᠢᠵᠦ ᠨᠤᠲᠤᠭᠯᠠᠬᠤ ᠳᠤ ᠬᠤᠶᠢᠳ ᠤᠳ ᠪᠠᠰᠠ ᠪᠠᠭᠲᠠᠯᠴᠠᠵᠦ ᠪᠠᠶᠢᠭᠰᠠᠨ ᠨᠢ ᠳᠠᠮᠵᠢᠭ ᠦᠭᠡᠢ᠃ 15 ᠳ᠋ᠤᠭᠠᠷ ᠵᠠᠭᠤᠨ ᠤ ᠳᠣᠣᠷᠠᠳᠦ ᠬᠠᠭᠠᠰ ᠦᠶ᠎ᠡ ᠠᠴᠠ ᠬᠤᠶᠢᠰᠢ ᠳᠠᠶᠠᠨ ᠬᠠᠭᠠᠨ ᠪᠣᠯᠤᠨ ᠲᠡᠭᠦᠨ ᠤ ᠬᠤᠶᠢᠴᠢ ᠦᠶ᠎ᠡ ᠶᠢᠨ ᠬᠢᠨ ᠣᠶᠢᠷᠠᠳ ᠢ ᠴᠡᠷᠢᠭ ᠤᠨ ᠬᠦᠴᠦ ᠪᠠᠷ ᠰᠢᠬᠠᠵᠦ ᠪᠠᠶᠢᠭᠠᠳ ᠭᠤᠪᠢ ᠶᠢᠨ ᠬᠤᠶᠢᠲᠦ ᠲᠠᠯ᠎ᠠ ᠠᠴᠠ ᠠᠭᠠᠵᠢᠮ ᠢᠶᠠᠷ ᠪᠠᠷᠠᠭᠤᠨᠰᠢ ᠰᠢᠯᠵᠢᠭᠦᠯᠵᠦ 16 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠴᠦᠰ ᠪᠣᠯᠬᠤ ᠳᠤ ᠦᠭᠡᠯᠡᠳ᠂ ᠪᠠᠭᠠᠲᠤᠳ᠂ ᠬᠤᠶᠢᠳ᠂ ᠴᠠᠷᠭᠤᠳ ᠬᠠᠩᠭᠠᠢ ᠠᠭᠤᠯᠠ ᠶᠢᠨ ᠡᠷᠭᠢ ᠠᠴᠠ ᠬᠦᠩᠬᠦᠢ᠂ ᠵᠠᠪᠬᠠᠨ ᠭᠤᠣᠯ ᠤᠨ ᠰᠠᠪᠠ ᠭᠠᠵᠠᠷ ᠪᠣᠯᠤᠨ ᠵᠠᠯᠮᠠᠨ ᠬᠠᠷ᠎ᠠ ᠠᠭᠤᠯᠠ ᠶᠢᠨ ᠡᠷᠭᠢ ᠬᠦᠷᠳᠡᠯᠡᠬᠢ ᠣᠷᠤᠨ ᠳᠤ ᠨᠡᠭᠦᠳᠡᠯᠯᠡᠨ ᠮᠡᠯᠵᠢᠵᠦ ᠪᠠᠶᠢᠭᠰᠠᠨ ᠦᠶ᠎ᠡ ᠳᠤ ᠬᠤᠶᠢᠳ ᠠᠶᠢᠮᠠᠭ ᠨᠢ ᠬᠠᠩᠭᠠᠢ ᠠᠭᠤᠯᠠ ᠶᠢᠨ ᠨᠠᠷᠠᠨ ᠪᠠᠯ ᠵᠠᠪᠬᠠᠨ ᠭᠤᠤᠯ ᠤᠨ ᠰᠠᠪᠠ ᠭᠠᠵᠠᠷ ᠲᠠᠬᠢ ᠬᠠᠷᠠᠭᠠᠨ᠎ᠠ᠂ ᠲᠠᠷᠪᠠᠭᠠᠲᠠᠢ᠂ ᠶᠠᠷ ᠠᠴᠠ ᠪᠠᠷᠠᠭᠤᠨ ᠬᠤᠶᠢᠰᠢ ᠠᠯᠲᠠᠨ ᠳᠡᠪᠰᠢ ᠠᠭᠤᠯᠠ᠂ ᠲᠠᠷᠪᠠᠭᠠᠲᠠᠢ ᠶᠢᠨ ᠵᠡᠭᠦᠨᠳᠡᠬᠢ ᠴᠣᠷᠭᠤ᠂ ᠪᠣᠷᠤ ᠪᠤᠷᠭᠠᠰᠤᠨ ᠵᠡᠷᠭᠡ ᠭᠠᠵᠠᠷ ᠲᠤ ᠨᠤᠲᠤᠭᠯᠠᠵᠦ ᠪᠠᠶᠢᠭᠰᠠᠨ ᠪᠢᠯᠡ᠃ 17 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠬᠢᠨ ᠦᠶ᠎ᠡ ᠳᠤ ᠬᠤᠶᠢᠳ ᠤᠳ ᠡᠷᠴᠢᠰ ᠭᠤᠣᠯ ᠪᠠ ᠣᠪᠢ ᠭᠤᠣᠯ ᠤᠨ ᠳᠤᠮᠳᠠ ᠳᠡᠭᠡᠳᠦ ᠤᠷᠤᠰᠬᠠᠯ ᠤᠨ ᠣᠷᠤᠨ ᠳᠤ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠵᠦ ᠪᠠᠶᠢᠭᠰᠠᠨ ᠪᠢᠯᠡ᠃ ᠮᠢᠩ ᠤᠯᠤᠰ ᠤᠨ ᠰᠡᠭᠦᠯᠴᠢ᠂ ᠴᠢᠩ ᠤᠯᠤᠰ ᠤᠨ ᠡᠬᠢᠨ ᠦᠶ᠎ᠡ ᠳᠤ ᠬᠦᠷᠬᠦ ᠳᠤ᠂ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠴᠦ ᠲᠠᠮᠢᠷ ᠤᠶᠠᠳᠠᠭᠰᠠᠨ ᠠᠴᠠ ᠪᠡᠶ᠎ᠡ ᠪᠠᠨ ᠳᠠᠭᠠᠭᠠᠬᠤ ᠴᠢᠳᠠᠪᠤᠷᠢ ᠨᠢ ᠰᠤᠯᠠᠷᠠᠵᠦ ᠵᠠᠷᠢᠮ ᠦᠶ᠎ᠡ ᠳᠤ ᠦᠭᠡᠷ᠎ᠡ ᠠᠶᠢᠮᠠᠭ ᠢ ᠪᠠᠷᠠᠳᠠᠨ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠵᠦ ᠪᠠᠶᠢᠭᠰᠠᠨ ᠪᠢᠯᠡ᠃ ᠬᠤᠵᠢᠮ ᠤᠨ ᠦᠶ᠎ᠡ ᠳᠤ ᠬᠤᠶᠢᠳ ᠠᠶᠢᠮᠠᠭ ᠤᠨ ᠵᠠᠷᠢᠮ ᠨᠢ ᠳᠦᠷᠪᠡᠳ ᠠᠶᠢᠮᠠᠭ ᠤᠨ ᠬᠠᠷᠢᠶᠠᠲᠦ ᠪᠣᠯᠵᠦ ᠲᠠᠷᠪᠠᠭᠠᠲᠠᠢ ᠶᠢᠨ ᠭᠠᠵᠠᠷ ᠨᠤᠲᠤᠭᠯᠠᠵᠦ ᠪᠠᠶᠢᠭᠰᠠᠨ ᠪᠠ ᠵᠠᠷᠢᠮ ᠨᠢ ᠴᠣᠷᠤᠰ ᠤᠨ ᠭᠠᠯᠳᠠᠨᠳᠤᠷᠵᠢ ᠳᠤ ᠲᠦᠰᠢᠭᠯᠡᠨ ᠡᠷᠢᠶᠡᠨ ᠬᠠᠪᠢᠷᠭ᠎ᠠ ᠶᠢᠨ ᠭᠠᠵᠠᠷ ᠰᠠᠭᠤᠵᠦ ᠪᠠᠶᠢᠭᠰᠠᠨ ᠳᠡᠮᠳᠡᠭᠯᠡᠯ ᠪᠣᠢ᠃ ᠳᠦᠷᠪᠡ᠂ ᠣᠶᠢᠷᠠᠳ ᠮᠣᠩᠭᠤᠯ ᠤᠨ ᠬᠠᠭᠠᠷᠠᠯ ᠬᠢᠭᠡᠳ ᠬᠤᠶᠢᠳ ᠠᠶᠢᠮᠠᠭ ᠤᠨ ᠪᠣᠲᠠᠷᠠᠯ᠃ 18 ᠳ᠋ᠤᠭᠠᠷ ᠵᠠᠭᠤᠨ ᠤ ᠲᠠᠪᠢᠭᠠᠳ ᠣᠨ ᠤ ᠰᠡᠭᠦᠯᠴᠢ ᠶᠢᠨ ᠮᠠᠨᠵᠦ ᠶᠢᠨ ᠵᠡᠭᠦᠠᠭᠠᠷ ᠨᠣᠲᠤᠭ ᠲᠠᠬᠢ ᠲᠦᠷᠢᠮᠡᠬᠡᠶᠢᠯᠡᠨ ᠡᠵᠡᠯᠡᠯᠲᠡ ᠳᠠᠷᠤᠢ ᠮᠠᠨᠵᠦ ᠶᠢᠨ ᠣᠶᠢᠷᠠᠳ ᠤᠨ ᠠᠷᠠᠳ ᠲᠦᠮᠡᠨ ᠳᠤ ᠶᠠᠪᠤᠭᠤᠯᠤᠭᠰᠠᠨ ᠶᠡᠭᠡ ᠬᠢᠲᠤᠯᠭ᠎ᠠ ᠯᠡ ᠬᠤᠶᠢᠳ ᠠᠶᠢᠮᠠᠭ ᠲᠤ ᠰᠦᠢᠷᠡᠯ ᠤᠨ ᠴᠢᠨᠠᠷᠲᠠᠢ ᠴᠣᠬᠢᠯᠲᠠ ᠪᠣᠯᠵᠦ ᠬᠤᠶᠢᠳ ᠠᠶᠢᠮᠠᠭ ᠲᠠᠨᠤᠭ ᠢᠶᠠᠨ ᠪᠠᠷᠠᠵᠦ ᠲᠠᠭᠠᠷᠴᠤᠭ ᠢᠶᠠᠨ ᠭᠦᠪᠢᠵᠦ ᠠᠯᠠᠭᠳᠠᠨ ᠬᠢᠲᠤᠭᠳᠠᠵᠦ᠂ ᠰᠠᠷᠨᠢᠨ ᠪᠤᠲᠠᠷᠠᠵᠦ᠂ ᠠᠮᠢ ᠵᠣᠯᠪᠠᠭᠰᠠᠨ ᠬᠡᠳᠦ ᠨᠢ ᠬᠦᠮᠦᠨ ᠤ ᠭᠠᠵᠠᠷ ᠬᠦᠨᠳᠡᠯᠡᠨ ᠤ ᠨᠤᠲᠤᠭ ᠲᠤ ᠠᠶᠢᠮᠠᠭ ᠤᠨ ᠨᠡᠷ᠎ᠡ ᠨᠢ ᠣᠪᠤᠭ ᠪᠣᠯᠤᠨ ᠦᠯᠡᠳᠡᠵᠦ ᠪᠠᠶᠢᠭ᠎ᠠ ᠨᠢ ᠡᠨᠡ ᠪᠣᠯᠪᠠᠴᠦ 17 ᠳ᠋ᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠠᠴᠠ ᠭᠠᠵᠠᠷ ᠠᠪᠴᠦ ᠡᠭᠢᠯᠡᠭᠰᠡᠨ ᠣᠶᠢᠷᠠᠳ ᠤᠨ ᠢᠵᠠᠭᠤᠷᠳᠠᠳ ᠤᠨ ᠳᠣᠲᠤᠭᠠᠳᠦ ᠶᠢᠨ ᠵᠦᠷᠢᠴᠡᠯᠳᠦᠭᠡᠨ ᠲᠡᠮᠡᠴᠡᠯ ᠪᠠ ᠲᠣᠷᠭᠤᠳ᠂ ᠳᠦᠷᠪᠡᠳ᠂ ᠬᠤᠱᠤᠳ ᠤᠨ ᠭᠠᠳᠠᠭᠰᠢ ᠨᠡᠭᠦᠳᠡᠯᠯᠡᠯᠲᠡ᠂ ᠭᠠᠯᠳᠠᠨ ᠪᠣᠱᠤᠭᠲᠦ ᠬᠠᠭᠠᠨ ᠤ ᠬᠠᠵᠠᠭᠤ ᠬᠠᠪᠢᠷᠭ᠎ᠠ ᠪᠠᠨ ᠬᠠᠳᠤᠷᠠᠭᠰᠠᠨ ᠬᠠᠲᠠᠭᠤ ᠲᠦᠷᠪᠡᠯᠲᠡ᠂ ᠨᠡᠩ ᠢᠯᠠᠩᠭᠤᠶ᠎ᠠ ᠰᠡᠭᠦᠯᠴᠢ ᠶᠢᠨ ᠦᠶ᠎ᠡ ᠶᠢᠨ ᠨᠢᠮᠠᠳᠣᠷᠵᠢ᠂ ᠳᠠᠸᠠᠴᠢ᠂ ᠠᠮᠤᠷᠰᠠᠨᠠᠭ᠎ᠠ ᠨᠠᠷ ᠤᠨ ᠬᠠᠭᠠᠨ ᠰᠠᠭᠤᠷᠢᠨ ᠪᠤᠯᠢᠶᠠᠯᠳᠤᠭᠰᠠᠨ ᠲᠡᠮᠡᠴᠡᠯ ᠨᠢ ᠣᠶᠢᠷᠠᠳ ᠮᠣᠩᠭᠤᠯ ᠤᠨ ᠬᠠᠭᠠᠷᠠᠯ᠂ ᠵᠡᠭᠦᠠᠭᠠᠷ ᠬᠠᠭᠠᠨᠲᠦ ᠤᠯᠤᠰ ᠤᠨ ᠮᠦᠬᠦᠯ ᠢ ᠰᠠᠭᠤᠷᠢᠯᠠᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠬᠤᠶᠢᠳ ᠠᠶᠢᠮᠠᠭ ᠤᠨ ᠪᠤᠲᠠᠷᠠᠯ ᠢ ᠡᠬᠢᠯᠡᠭᠦᠯᠦᠭᠰᠡᠨ ᠪᠢᠯᠡ᠃ ᠡ᠊ᠡᠳᠡ ᠵᠦᠪᠬᠡᠨ ᠲᠡᠲᠡᠵᠦ ᠬᠡᠯᠡᠬᠦ ᠳᠤ 1628 ᠤᠨ ︵ᠲᠡᠭᠷᠢ ᠶᠢᠨ ᠰᠡᠴᠡᠨ ᠤ 2 ᠳ᠋ᠤᠭᠠᠷ ᠣᠨ︶ ᠳᠤ ᠲᠣᠷᠭᠤᠳ ᠳᠦᠷᠪᠡᠳ ᠠᠶᠢᠮᠠᠭ ᠢ ᠳᠠᠭᠠᠵᠦ᠂ ᠢᠵᠢᠯ ᠵᠠᠢ ᠪᠠ ᠬᠠᠯᠬ᠎ᠠ ᠳᠤ ᠬᠡᠳᠦᠢ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠳᠠᠭᠠᠯᠳᠤᠨ ᠣᠴᠢᠭᠰᠠᠨ ᠪᠠ 1636 ᠣᠨ ︵ᠳᠡᠭᠡᠳᠦ ᠡᠷᠳᠡᠮᠲᠦ ᠶᠢᠨ ᠠᠩᠬᠠᠳᠤᠭᠠᠷ ᠣᠨ︶ ᠤ ᠦᠶ᠎ᠡ ᠳᠤ ᠬᠤᠱᠤᠳ ᠢ ᠳᠠᠭᠠᠵᠦ ᠬᠡᠳᠦᠢ ᠬᠤᠶᠢᠳ ᠤᠳ ᠬᠦᠬᠡᠨᠠᠭᠤᠷ ᠲᠤ ᠣᠴᠢᠭᠰᠠᠨ ᠪᠠ 1670 ᠣᠨ ︵ᠡᠩᠭᠡ ᠠᠮᠤᠭᠤᠯᠠᠩ ᠤᠨ 9 ᠳ᠋ᠣᠭᠡᠷ ᠣᠨ︶ ᠠᠴᠠ 1680 ‍ᠭᠠᠳ ᠣᠨ ᠤ ᠬᠤᠭᠤᠷᠤᠨᠳᠦ ᠭᠠᠯᠳᠠᠨ ᠪᠣᠱᠤᠭᠲᠦ ᠶᠢᠨ ᠲᠦᠷᠪᠡᠯᠲᠡ ᠳᠤ ᠪᠠᠰᠠ ᠬᠡᠳᠦᠢ ᠬᠤᠶᠢᠳ ᠬᠦᠬᠡᠨᠠᠭᠤᠷ᠂ ᠠᠯᠠᠱᠠ᠂ ᠬᠠᠯᠬ᠎ᠠ᠂ ᠢᠵᠢᠯ ᠵᠠᠢ ᠵᠡᠷᠭᠡ ᠭᠠᠵᠠᠷ ᠣᠷᠤᠨ ᠳᠤ ᠲᠦᠷᠪᠡᠵᠦ ᠣᠴᠢᠭᠰᠠᠨ ᠭᠡᠳᠡᠭ ᠤᠨ ᠲᠤᠬᠠᠢ ᠲᠣᠳᠤᠷᠬᠠᠢ ᠲᠤᠭ᠎ᠠ ᠪᠠᠷᠢᠮᠲᠠ ᠦᠭᠡᠢ ᠪᠣᠯᠪᠠᠴᠦ ᠬᠤᠶᠢᠳ ᠤᠳ ᠤᠨ ᠬᠦᠮᠦᠨ ᠠᠮᠠ ᠶᠢᠨ ᠲᠠᠷᠬᠠᠯᠲᠠ ᠨᠢ ᠪᠤᠰᠤᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠲᠠᠢ ᠴᠦᠬᠡᠨ ᠪᠢᠰᠢ ᠬᠤᠯᠢᠯᠳᠤᠵᠦ ᠪᠠᠶᠢᠭᠰᠠᠨ ᠭᠡᠳᠡᠭ ᠢ ᠭᠡᠷᠡᠴᠢᠯᠡᠵᠦ ᠪᠣᠢ᠃ ᠡᠭᠦᠨ ᠠᠴᠠ ᠬᠤᠵᠢᠮ ᠭᠡᠬᠦ ᠳᠤ 1750 ᠣᠨ ︵ᠲᠡᠭᠷᠢ ᠳᠡᠳᠬᠦᠭᠴᠢ ᠶᠢᠨ 15 ᠳ᠋ᠤᠭᠠᠷ ᠣᠨ︶ ᠠᠴᠠ ᠡᠬᠢᠯᠡᠨ ᠵᠡᠭᠦᠠᠭᠠᠷ ᠤᠨ ᠵᠠᠶᠢᠰᠠᠩ ᠰᠠᠭᠠᠷᠠᠯ᠂ ᠳᠦᠷᠪᠡᠳ ᠤᠨ ᠭᠤᠷᠪᠠᠨ ᠴᠡᠷᠡᠩ ︵ᠴᠡᠷᠡᠩ᠂ ᠴᠡᠷᠡᠩᠠᠤᠪᠠᠰᠢ᠂ ᠴᠡᠷᠡᠩᠮᠦ᠋ᠩᠬᠡ︶᠂ ᠬᠤᠱᠤᠳ ᠤᠨ ᠪᠠᠯᠵᠤᠤᠷ ᠵᠡᠷᠭᠡ ᠪᠣᠰᠤᠳ ᠠᠶᠢᠮᠠᠭ ᠢ ᠳᠠᠭᠠᠵᠦ ᠮᠠᠨᠵᠦ ᠳᠤ ᠣᠷᠤᠵᠦ ᠦᠭᠭᠦᠭᠰᠡᠨ ᠪᠠ ᠭᠡᠨᠳᠦᠨᠵᠠᠪ᠂ ᠠᠮᠤᠷᠰᠠᠨᠠᠭ᠎ᠠ᠂ ᠠᠪᠲᠠᠰᠢ᠂ ᠯᠣᠪᠽᠠᠩ᠂ ᠲᠠᠮᠠᠷᠢᠨ ᠵᠡᠷᠭᠡ ᠬᠤᠶᠢᠳ ᠤᠨ ᠳᠠᠶᠢᠵᠢ ᠨᠠᠷ ᠦᠪᠡᠷ ᠦᠪᠡᠷ ᠤᠨ ᠬᠠᠷᠢᠶᠠᠳᠦ ᠪᠠᠨ ᠳᠠᠭᠠᠭᠤᠯᠤᠨ ᠮᠠᠨᠵᠦ ᠳᠤ ᠪᠠᠭᠤᠵᠦ ᠦᠭᠬᠦ ᠳᠤ ᠨᠡᠩ ᠣᠯᠠᠨ ᠲᠣᠭᠠᠨ ᠤ ᠬᠤᠶᠢᠳ ᠤᠳ ᠪᠠᠶᠢᠭᠰᠠᠨ ᠭᠡᠳᠡᠭ ᠢ ᠬᠤᠵᠢᠮ ᠤᠨ ᠦᠢᠯᠡ ᠬᠡᠷᠡᠭ ᠲᠣᠳᠤᠷᠠᠭᠤᠯᠵᠦ ᠪᠠᠶᠢᠨ᠎ᠠ᠃ 18 ᠳ᠋ᠤᠭᠠᠷ ᠵᠠᠭᠤᠨ ᠤ ᠳᠣᠣᠷ᠎ᠠ ᠬᠠᠭᠠᠰ ᠦᠶ᠎ᠡ ᠳᠤ ᠮᠠᠨᠵᠦ ᠶᠢᠨ ᠲᠦᠷᠦ ᠮᠣᠩᠭᠤᠯ ᠨᠤᠲᠤᠭ ᠲᠤ ᠬᠤᠰᠢᠭᠤ ᠴᠢᠭᠤᠯᠭᠠᠨ ᠪᠠᠶᠢᠭᠤᠯᠬᠤ ᠳᠤ ᠬᠤᠶᠢᠳ ᠤᠳ ᠢ ᠵᠠᠭ ᠭᠤᠣᠯ ᠤᠨ ᠡᠬᠢ ᠪᠢᠳᠤᠷᠢᠶ᠎ᠠ ᠨᠠᠭᠤᠷ ᠤᠨ ᠴᠢᠭᠤᠯᠭᠠᠨ ᠳᠤ ᠨᠢᠭᠡ ᠬᠤᠰᠢᠭᠤ᠂ ᠰᠠᠶᠢᠨ ᠵᠠᠶᠠᠭᠠᠲᠦ ᠶᠢᠨ ᠵᠡᠭᠦᠨ ᠭᠠᠷ ᠤᠨ ᠴᠢᠭᠤᠯᠭᠠᠨ ᠳᠤ ︽ᠪᠠᠭᠠᠲᠤᠷ ᠭᠦᠩ ᠤᠨ ᠬᠤᠰᠢᠭᠤ︾ ᠭᠡᠵᠦ ᠨᠢᠭᠡ ᠬᠤᠰᠢᠭᠤ᠂ ᠰᠠᠶᠢᠨ ᠵᠠᠶᠠᠭᠠᠲᠦ ᠶᠢᠨ ᠪᠠᠷᠠᠭᠤᠨ ᠭᠠᠷ ᠤᠨ ᠴᠢᠭᠤᠯᠭᠠᠨ ᠳᠤ ︽ᠰᠦᠵᠢᠭᠲᠦ ᠭᠦᠩ ᠤᠨ ᠬᠤᠰᠢᠭᠤ︾ ᠭᠡᠵᠦ ᠨᠢᠭᠡ ᠬᠤᠰᠢᠭᠤ᠂ ᠬᠦᠬᠡᠨᠠᠭᠤᠷ ᠲᠤ ︽ᠲᠤᠨᠳᠤᠭ ᠭᠦᠩ ᠤᠨ ᠬᠤᠰᠢᠭᠤ︾ ᠭᠡᠵᠦ ᠨᠢᠭᠡ ᠬᠤᠰᠢᠭᠤ᠂ ᠬᠦᠯᠦᠨ ᠪᠤᠶᠢᠷ ᠲᠤ ︽ᠶᠡᠭᠡ ᠮᠢᠩᠭᠠᠨ ᠬᠤᠰᠢᠭᠤ︾ ᠭᠡᠵᠦ ᠨᠢᠭᠡ ᠬᠤᠰᠢᠭᠤ ᠨᠡᠶᠢᠲᠡ ᠲᠠᠪᠤᠨ ᠬᠤᠶᠢᠳ ᠤᠨ ᠬᠤᠰᠢᠭᠤ ᠶᠢ ᠪᠠᠶᠢᠭᠤᠯᠤᠭᠰᠠᠨ ᠠᠴᠠ ᠦᠵᠡᠪᠡᠯ ᠲᠤᠬᠠᠢ ᠶᠢᠨ ᠦᠶ᠎ᠡ ᠵᠡᠭᠦᠠᠭᠠᠷ ᠨᠤᠲᠤᠭ ᠠᠴᠠ ᠨᠡᠭᠦᠳᠡᠯᠯᠡᠵᠦ ᠰᠢᠯᠵᠢᠵᠦ ᠲᠤᠲᠠᠭᠠᠵᠦ ᠳᠦᠷᠪᠡᠵᠦ ᠭᠠᠷᠤᠭᠰᠠᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠲᠡᠶᠢᠮᠦ ᠴᠦ ᠴᠦᠬᠡᠨ ᠪᠢᠰᠢ ᠭᠡᠳᠡᠭ ᠢ ᠬᠠᠷᠠᠭᠤᠯᠵᠦ ᠪᠣᠢ᠃ ᠡᠳᠡᠭᠡᠷ ᠪᠣᠯ ᠵᠦᠪᠬᠡᠨ ᠨᠡᠷ᠎ᠡ ᠲᠦᠷᠦ ᠲᠠᠢ ᠬᠦᠮᠦᠰ ᠤᠨ ᠲᠡᠣᠬᠡ ᠰᠣᠷᠪᠤᠯᠵᠢ ᠳᠤ ᠦᠯᠡᠳᠡᠭᠳᠡᠭᠰᠡᠨ ᠪᠠᠷᠢᠮᠲᠠ ᠬᠢᠭᠡᠳ ᠮᠡᠨᠵᠦ ᠶᠢᠨ ᠵᠠᠰᠠᠭ ᠵᠠᠬᠢᠷᠭᠠᠨ ᠤ ᠪᠠᠶᠢᠭᠤᠯᠤᠮᠵᠢ ᠳᠤ ᠬᠠᠷᠢᠶᠠᠯᠠᠭᠳᠠᠭᠰᠠᠨ ᠬᠦᠮᠦᠰ ᠤᠨ ᠲᠤᠭ᠎ᠠ ᠬᠢᠵᠠᠭᠠᠷ ᠲᠡᠳᠦᠢ ᠬᠠᠷᠢᠨ ᠵᠢᠩᠭᠢᠨᠢ ᠣᠯᠠᠨ ᠲᠣᠭᠠᠨ ᠤ ᠳᠠᠶᠢᠨ ᠳᠠᠵᠢᠨ ᠤ ᠬᠦᠯ ᠳᠤ ᠳᠦᠷᠪᠡᠵᠦ ᠪᠤᠲᠠᠷᠠᠭᠰᠠᠨ ᠡᠩ ᠤᠨ ᠠᠷᠠᠳ᠂ ᠴᠡᠷᠢᠭ ᠤᠨ ᠠᠯᠪᠠᠨ ᠳᠤ ᠳᠠᠲᠠᠭᠳᠠᠵᠦ ᠨᠤᠲᠤᠭ ᠤᠰᠤᠨ ᠠᠴᠠ ᠰᠠᠯᠤᠭᠰᠠᠨ᠂ ᠮᠠᠨᠵᠦ ᠶᠢᠨ ᠶᠡᠭᠡ ᠬᠢᠲᠤᠯᠭ᠎ᠠ ᠳᠤ ᠠᠮᠢ ᠡᠷᠡᠰᠳᠡᠭᠰᠡᠨ ᠪᠠ ᠵᠡᠭᠦᠠᠭᠠᠷ ᠤᠨ ᠳᠠᠶᠢᠨ ᠤ ᠳᠠᠷᠠᠭ᠎ᠠ ᠡᠯ᠎ᠡ ᠭᠠᠵᠠᠷ ᠴᠦᠯᠡᠭᠳᠡᠭᠰᠡᠨ ᠬᠦᠮᠦᠰ ᠭᠡᠪᠡᠯ ᠨᠡᠩ ᠣᠯᠠᠨ ᠪᠠᠶᠢᠬᠤ ᠶᠣᠰᠤᠲᠠᠢ᠃ ᠮᠠᠨᠵᠤ ᠶᠢᠨ ᠡᠷᠬᠡ ᠪᠠᠷᠢᠭᠴᠢᠳ ᠮᠤᠩᠭᠤᠯ ᠬᠦᠮᠥᠨ ᠢ ᠠᠷᠭᠠᠯᠠᠵᠤ ᠠᠷᠬᠠᠯᠠᠵᠤ᠂ ᠬᠠᠷᠠᠳᠠᠵᠤ ᠰᠡᠵᠢᠭᠯᠡᠵᠦ᠂ ᠠᠯᠠᠵᠤ ᠬᠢᠳᠤᠬᠤ ᠳᠠᠭᠠᠨ ᠪᠠᠷᠠᠭᠤᠨ ᠮᠤᠩᠭᠤᠯ ᠳᠤ ᠬᠠᠮᠤᠭ ᠤᠨ ᠬᠠᠳᠠᠭᠤ ᠬᠠᠨᠳᠤᠭᠰᠠᠨ᠂ ᠪᠠᠷᠠᠭᠤᠨ ᠮᠤᠩᠭᠤᠯ ᠤᠨ ᠳᠤᠳᠤᠷ᠎ᠠ ᠠᠴᠠ ᠬᠤᠶᠢᠳ ᠬᠦᠮᠦᠰ ᠢ ᠬᠠᠮᠤᠭ ᠤᠨ ᠭᠡᠷᠴᠡᠭᠡᠢ ᠪᠠᠷ ᠳᠠᠷᠤᠩᠭᠤᠶᠢᠯᠠᠭᠰᠠᠨ ᠪᠠᠶᠢᠳᠠᠭ᠃ ᠮᠠᠨᠵᠤ ᠴᠢᠩ ᠵᠡᠭᠦᠠᠭᠠᠷ ᠢ ᠡᠵᠡᠯᠡᠬᠦ ᠳᠡᠭᠡᠨ 60 ᠲᠦᠮᠡᠨ ᠤᠶᠢᠷᠠᠳ ᠢ ᠬᠢᠳᠤᠵᠤ ᠵᠦᠪᠬᠡᠨ ᠠᠭᠤᠯᠠ ᠬᠠᠳᠠᠨ ᠳᠤ ᠨᠢᠭᠤᠭᠳᠠᠨᠵᠤ ᠠᠮᠢ ᠵᠤᠯᠪᠠᠭᠰᠠᠨ ᠡᠬᠡᠨᠡᠷ ᠬᠡᠣᠬᠡᠳ᠂ ᠬᠦᠭᠰᠢᠳ ᠵᠡᠮᠳᠡᠭ ᠠᠴᠠ ᠦᠭᠡᠷ᠎ᠡ ᠡᠷ᠎ᠡ ᠪᠦᠰᠡᠳᠠᠢ ᠬᠦᠮᠦᠨ ᠤ ᠪᠠᠷ᠎ᠠ ᠳᠠᠰᠤᠷᠠᠵᠤ᠂ ᠵᠡᠭᠦᠠᠭᠠᠷ ᠨᠤᠳᠤᠭ ᠡᠵᠡᠬᠦ᠋ᠢᠷᠡᠭᠰᠡᠨ ᠭᠡᠳᠡᠭ ᠲᠡᠤᠬᠡ ᠲᠠᠢ᠃ ᠲᠡᠷᠡ ᠶᠡᠭᠡ ᠬᠢᠳᠤᠯᠭ᠎ᠠ ᠳᠤ ᠭᠤᠤᠯ ᠬᠤᠶᠢᠳ ᠠᠶᠢᠮᠠᠭ ᠪᠤᠯᠤᠨ ᠵᠡᠭᠦᠠᠭᠠᠷ ᠠᠶᠢᠮᠠᠭ ᠤᠨ ᠬᠦᠮᠦᠰ ᠢᠯᠡᠬᠦᠤ ᠠᠮᠢ ᠡᠷᠡᠰᠳᠡᠭᠰᠡᠨ ᠭᠡᠬᠦ ᠳᠤ ᠢᠯᠡᠬᠦᠳᠡᠬᠦ ᠦᠭᠡᠢ ᠃ ᠤᠴᠢᠷ ᠨᠢ ᠨᠢᠭᠡ ᠳᠤ ᠵᠡᠭᠦᠠᠭᠠᠷ ᠤᠨ ᠪᠤᠰᠤᠯᠭ᠎ᠠ ᠶᠢ ᠬᠤᠶᠢᠳ ᠤᠨ ᠲᠠᠶᠢᠵᠢ ᠠᠮᠤᠷᠰᠠᠨᠠᠭ᠎ᠠ ᠡᠭᠦᠰᠭᠡᠨ ᠤᠳᠤᠷᠢᠳᠤᠭᠰᠠᠨ᠃ ᠬᠤᠶᠠᠷ ᠲᠤ ᠪᠤᠰᠤᠯᠭ᠎ᠠ ᠵᠡᠭᠦᠠᠭᠠᠷ ᠤᠨ ᠨᠤᠳᠤᠭ ᠲᠤ ᠡᠭᠦᠰᠴᠤ᠂ ᠮᠦᠨ ᠲᠡᠷᠡ ᠨᠤᠳᠤᠭ ᠲᠤ ᠳᠠᠷᠤᠩᠭᠤᠶᠢᠯᠠᠭᠳᠠᠭᠰᠠᠨ᠂ ᠭᠤᠷᠪᠠ ᠳᠤ᠂ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠲᠤᠷᠭᠤᠳ ᠤᠯᠠᠩᠬᠢ ᠨᠢ ᠢᠵᠢᠯ ᠵᠠᠢ ᠳᠤ᠂ ᠬᠤᠱᠤᠳ ᠤᠨ ᠶᠡᠬᠡᠩᠬᠢ ᠨᠢ ᠬᠦᠬᠡᠨᠠᠭᠤᠷ ᠲᠤ᠂ ᠲᠦᠷᠪᠡᠳ ᠤᠨ ᠬᠠᠭᠠᠰ ᠨᠢ ᠢᠵᠢᠯ ᠵᠠᠢ ᠪᠠ ᠬᠠᠯᠬ᠎ᠠ ᠳᠤ ᠨᠡᠭᠦᠴᠢᠬᠡᠭᠰᠡᠨ ᠤᠷᠢᠳᠠᠯ ᠳᠤᠤᠷ᠎ᠠ ᠪᠤᠰᠤᠯᠭ᠎ᠠ ᠳᠤ ᠪᠤᠰᠤᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠤᠷᠤᠯᠴᠠᠭᠰᠠᠨ ᠪᠤᠯᠪᠠᠴᠤ ᠭᠤᠤᠯ ᠬᠦᠴᠦ ᠨᠢ ᠬᠤᠶᠢᠳ ᠪᠠ ᠵᠡᠭᠦᠠᠭᠠᠷ ᠠᠶᠢᠮᠠᠭ ᠤᠨ ᠬᠦᠮᠦᠰ ᠪᠠᠶᠢᠭᠰᠠᠨ ᠨᠢ ᠢᠯᠡᠷᠬᠡᠢ᠃ ᠡᠬᠦᠨ ᠤ ᠤᠯᠠᠮ ᠠᠴᠠ ᠮᠠᠨᠵᠤ ᠶᠢᠨ ᠡᠷᠬᠡ ᠪᠠᠷᠢᠭᠴᠢᠳ ᠬᠤᠶᠢᠳ ᠬᠦᠮᠦᠰ ᠪᠠ ᠵᠡᠭᠦᠠᠭᠠᠷ ᠬᠦᠮᠦᠰ ᠢ ᠬᠠᠮᠤᠭ ᠤᠨ ᠬᠡᠷᠴᠡᠭᠡᠢ ᠪᠠᠷ ᠠᠯᠠᠨ ᠬᠢᠳᠤᠵᠤ᠂ ᠶᠠᠯᠠᠯᠠᠨ ᠴᠦᠯᠡᠵᠤ᠂ ᠪᠤᠲᠠᠷᠠᠭᠠᠨ ᠰᠠᠷᠨᠢᠭᠤᠯᠵᠤ᠂ ᠤᠭᠰᠠᠭ᠎ᠠ ᠤᠳᠤᠮ ᠢ ᠨᠢ ᠦᠭᠡᠢ ᠬᠢᠬᠦ ᠪᠠᠷ ᠵᠤᠷᠢᠯᠭ᠎ᠠ ᠪᠤᠯᠭᠠᠭᠰᠠᠨ ᠲᠤᠯᠠ ᠬᠤᠵᠢᠮ ᠤᠨ ᠤᠯᠠᠨ ᠲᠦᠷᠦ ᠶᠢᠨ ᠰᠤᠯᠢᠭᠳᠠᠯ ᠳᠤ ᠴᠤ ᠡᠨᠡ ᠬᠤᠶᠠᠷ ᠠᠶᠢᠮᠠᠭ ᠵᠢᠭᠠᠭᠳᠠᠭᠰᠠᠨ ᠭᠠᠵᠠᠷ ᠨᠤᠳᠤᠭ ᠦᠭᠡᠢ᠂ ᠠᠶᠢᠮᠠᠭ ᠤᠭᠰᠠᠭᠠᠨ ᠤ ᠬᠢᠨᠢ ᠨᠡᠷ᠎ᠡ ᠪᠠᠷ ᠨᠡᠷᠡᠶᠢᠳᠦᠭᠰᠡᠨ ᠵᠠᠰᠭ ᠵᠠᠬᠢᠷᠭᠠᠨ ᠤ ᠪᠠᠶᠢᠭᠤᠯᠤᠮᠵᠢ ᠴᠤ ᠦᠭᠡᠢ᠂ ᠤᠯᠠ ᠮᠦᠷ ᠨᠢ ᠪᠠᠯᠠᠷᠠᠵᠤ ᠪᠠᠶᠢᠭ᠎ᠠ ᠠᠶᠢᠮᠠᠭ ᠤᠭᠰᠠᠭ᠎ᠠ ᠪᠤᠯᠵᠤ ᠪᠢᠯᠡ᠃ ᠳᠡᠪᠤ᠂ ᠬᠤᠶᠢᠳ ᠤᠪᠤᠭᠳᠡᠡ ᠤ ᠳᠠᠷᠬᠠᠠ ᠰᠠᠭᠤᠷᠢᠰᠢᠵᠤ ᠪᠠᠶᠢᠭ᠎ᠠ ᠭᠠᠵᠠᠷ ᠤᠷᠤᠠ᠃ ᠮᠤᠩᠭᠤᠯ ᠤᠨ ᠲᠡᠤᠬᠡ᠂ ᠵᠠᠩ ᠦᠢᠯᠡ ᠰᠤᠳᠤᠯᠤᠭᠠᠴᠢ᠂ ᠤᠷᠤᠨ ᠨᠤᠳᠤᠭ ᠤᠨ ᠤᠶᠢᠯᠠᠯᠭ᠎ᠠ ᠶᠢᠨ ᠡᠷᠳᠡᠮᠲᠡᠨ ᠮᠢᠭᠭᠠᠳ᠂ ᠱ᠊ · ᠲᠦᠩᠰᠢᠭ ︽ᠮᠠᠨᠵᠤ ᠨᠠᠷ ᠬᠤᠶᠢᠳ ᠢ ᠠᠮᠤᠷᠰᠠᠨᠠᠭ᠎ᠠ ᠶᠢᠨ ᠬᠡᠷᠡᠭ ᠤᠴᠢᠷ ᠢᠶᠠᠷ ᠳᠠᠷᠤᠩᠭᠤᠶᠢᠯᠠᠨ ᠬᠢᠳᠤᠵᠤ ᠶᠡᠬᠡᠳᠡ ᠠᠯᠠᠵᠤ ᠤᠰᠠᠳᠬᠠᠭᠠᠳ ᠦᠯᠡᠳᠡᠭᠰᠡᠨ ᠢ ᠨᠢ ᠠᠷᠤ ᠬᠠᠯᠬ᠎ᠠ᠂ ᠦᠪᠦᠷ ᠮᠤᠩᠭᠤᠯ ᠤᠷᠴᠢᠮ ᠤᠨ ᠮᠤᠵᠢ ᠳᠤ ᠲᠠᠷᠬᠠᠭᠠᠨ ᠴᠦᠯᠡᠭᠰᠡᠨ ᠢᠶᠠᠷ ᠪᠡᠶ᠎ᠡ ᠪᠠᠨ ᠳᠠᠭᠠᠭᠠᠭᠰᠠᠨ ᠤᠪᠤᠭ ᠠᠶᠢᠮᠠᠭ ᠤᠨ ᠬᠡᠯᠪᠡᠷᠢ ᠠᠯᠳᠠᠭᠳᠠᠪᠡ︾ 【1】 ᠭᠡᠵᠤ ᠲᠡᠮᠳᠡᠭᠯᠡᠭᠰᠡᠨ ᠨᠢ ᠬᠤᠶᠢᠳ ᠠᠶᠢᠮᠠᠭ ᠤᠨ ᠦᠩᠭᠡᠷᠡᠭᠰᠡᠨ ᠦᠢᠯᠡ ᠬᠡᠷᠡᠭ ᠪᠠ ᠤᠳᠤ ᠶᠢᠨ ᠲᠠᠷᠬᠠᠨ ᠪᠤᠲᠠᠷᠠᠯᠲᠠ ᠶᠢ ᠦᠨᠡᠨ ᠮᠦᠨ ᠢᠶᠠᠷ ᠳ᠋ᠦᠩᠨᠡᠭᠰᠡᠨ ᠤ ᠬᠤᠷᠢᠶᠠᠩᠭᠤᠶᠢᠯᠠᠯ ᠮᠦᠨ ᠭᠡᠵᠦ ᠬᠡᠯᠡᠬᠦ ᠳᠤ ᠢᠯᠡᠬᠦᠳᠡᠬᠦ ᠦᠭᠡᠢ᠃ ᠮᠠᠨᠵᠦ ᠶᠢᠨ ᠲᠦᠷᠦ ᠮᠣᠩᠭᠤᠯ ᠢ ᠳᠠᠷᠤᠩᠭᠤᠶᠢᠯᠠᠨ ᠬᠢᠲᠤᠬᠤ᠂ ᠪᠤᠲᠠᠷᠠᠭᠠᠨ ᠰᠠᠯᠭᠠᠬᠤ᠂ ᠴᠦᠯᠡᠨ ᠵᠠᠶᠢᠯᠠᠭᠤᠯᠬᠤ ᠪᠤᠳᠤᠯᠭ᠎ᠠ ᠶᠢᠨ ᠦᠷ᠎ᠡ ᠳ᠋ᠦᠩ ᠳᠤ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠠᠶᠢᠮᠠᠭ ᠤᠨ ᠬᠠᠷᠢᠶ᠎ᠠ ᠪᠠᠨ ᠠᠯᠳᠠᠵᠦ᠂ ᠤᠯᠤᠰ ᠤᠨ ᠳᠣᠲᠤᠭᠠᠳᠦ ᠭᠠᠳᠠᠭᠠᠲᠦ ᠳᠠᠬᠢ ᠣᠯᠠᠨ ᠭᠠᠵᠠᠷ ᠲᠤ ᠳ᠋ᠠᠰᠢ ᠶᠢᠨ ᠲᠠᠷᠢᠶ᠎ᠠ ᠰᠢᠬ ᠰᠠᠴᠤᠭᠳᠠᠵᠦ᠂ ᠣᠳᠤ ᠵᠦᠪᠬᠡᠨ ᠠᠶᠢᠮᠠᠭ ᠤᠨ ᠨᠡᠷ᠎ᠡ ᠪᠠᠨ ᠦᠪᠡᠷ ᠤᠨ ᠣᠪᠤᠭ ᠪᠣᠯᠭᠠᠨ᠂ ᠬᠤᠶᠢᠳ ᠤᠪᠤᠭᠲᠠᠨ ᠤ ᠬᠤᠪᠢ ᠪᠠᠷ ᠣᠷᠤᠰᠢᠵᠦ ᠪᠣᠢ᠃ ᠣᠳᠤ ᠶᠢᠨ ᠪᠢᠳᠡᠨ ᠤ ᠮᠡᠳᠡᠵᠦ ᠪᠠᠶᠢᠭ᠎ᠠ ᠬᠤᠶᠢᠳ ᠤᠨ ᠲᠠᠷᠬᠠᠯᠲᠠ ᠭᠡᠪᠡᠯ ᠮᠠᠨ ᠤ ᠤᠯᠤᠰ ᠤᠨ ᠬᠦᠬᠡᠨᠠᠭᠤᠷ ᠮᠣᠵᠢ ᠶᠢᠨ ᠭᠦᠩ ᠾᠧ ᠰᠢᠶᠠᠨ ᠢᠶᠠᠷ ᠭᠤᠣᠯ ᠪᠣᠯᠭᠠᠭᠰᠠᠨ ᠤᠭ ᠤᠨ ᠳᠡᠭᠡᠳᠦ ᠮᠣᠩᠭᠤᠯ ᠤᠨ ᠬᠤᠰᠢᠭᠤᠳ ᠢᠶᠠᠷ ᠴᠦᠬᠡᠨ ᠪᠠᠷᠤᠭ ᠪᠣᠢ᠃ ᠳᠡᠳᠡ ᠪᠣᠯ 1636 — 1637 ᠣᠨ ᠳᠤ ᠬᠤᠱᠤᠳ ᠤᠨ ᠭᠦᠦᠰᠢ ᠬᠠᠭᠠᠨ ᠢ ᠳᠠᠭᠠᠵᠦ ᠬᠦᠬᠡᠨᠠᠭᠤᠷ ᠲᠤ ᠣᠴᠢᠭᠰᠠᠨ ᠬᠤᠶᠢᠳ ᠤᠨ ᠲᠠᠶᠢᠵᠢ ᠳ᠋ᠢᠪᠠ ᠶᠢᠨ ᠬᠠᠷᠢᠶᠠᠲᠦ ᠪᠠ ᠬᠤᠵᠢᠮ ᠤᠨ ᠭᠠᠯᠳᠠᠨ ᠪᠣᠱᠤᠭᠲᠦ ᠶᠢᠨ ᠦᠶ᠎ᠡ ᠳᠤ ᠳᠦᠷᠪᠡᠵᠦ ᠣᠴᠢᠭᠰᠠᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠤᠨ ᠦᠷ᠎ᠡ ᠬᠤᠶᠢᠴᠢᠰ ᠮᠦᠨ᠃ ᠬᠠᠷᠠᠮᠦ᠋ᠷᠡᠨ ᠮᠣᠵᠢ ᠶᠢᠨ ᠴᠢᠴᠢᠬᠠᠷ ᠬᠤᠲᠠ ᠶᠢᠨ ᠹᠦ᠋ ᠢᠦᠢ ᠰᠢᠶᠠᠨ ᠤ ᠹᠦ᠋ ᠬᠠᠢ ᠪᠠᠯᠭᠠᠰᠤᠨ ᠳᠤ ᠶᠡᠭᠡ ᠮᠢᠩᠭᠠᠨ ᠵᠡᠷᠭᠡ ᠳᠦᠷᠪᠡᠨ ᠣᠪᠤᠭ ᠤᠨ ᠬᠤᠶᠢᠳ ᠠᠶᠢᠮᠠᠭ ᠠᠴᠠ ᠭᠠᠷᠤᠯ ᠲᠠᠢ ᠬᠤᠶᠠᠷ ᠮᠢᠩᠭ᠎ᠠ ᠭᠠᠷᠤᠢ ᠬᠦᠮᠦᠰ ᠣᠷᠤᠰᠢᠨ ᠰᠠᠭᠤᠷᠢᠰᠢᠵᠦ ᠪᠣᠢ᠃ ᠲᠡᠳᠡᠨ ᠪᠣᠯ 1754 ᠣᠨ ︵ᠲᠡᠭᠷᠢ ᠳᠡᠳᠭᠦᠭᠴᠢ ᠶᠢᠨ 19 ᠳ᠋ᠤᠭᠡᠷ ᠣᠨ︶ ᠪᠣᠯᠤᠨ 1755 ᠣᠨ ︵ᠲᠡᠭᠷᠢ ᠳᠡᠳᠭᠦᠭᠴᠢ ᠶᠢᠨ 20 ᠳ᠋ᠤᠭᠠᠷ ᠣᠨ︶ ᠳᠤ ᠮᠠᠨᠵᠦ ᠳᠤ ᠳᠠᠭᠠᠬᠤ ᠪᠠᠷ ᠣᠴᠢᠭᠰᠠᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠲᠠᠶᠢᠵᠢ ᠠᠪᠲᠠᠰᠢ ᠪᠣᠯᠤᠨ ᠪᠠᠰᠠᠩ ᠤᠨ ᠬᠠᠷᠢᠶᠠᠲᠦ ᠪᠣᠯᠤᠨ᠎ᠠ᠃ ᠰᠢᠨᠵᠢᠶᠠᠩ ᠤᠨ ᠣᠶᠢᠷᠠᠳ ᠮᠣᠩᠭᠤᠯᠴᠤᠳ ᠤᠨ ᠣᠷᠤᠰᠢᠨ ᠰᠠᠭᠤᠵᠦ ᠪᠠᠶᠢᠭ᠎ᠠ ᠰᠢᠶᠠᠨ ᠨᠤᠭᠤᠳ ᠢᠶᠠᠷ ᠦᠪᠡᠷ ᠢ ᠪᠠᠨ ᠬᠤᠶᠢᠳ ᠠᠶᠢᠮᠠᠭ ᠠᠴᠠ ᠡᠭᠦᠰᠦᠯ ᠭᠠᠷᠤᠯ ᠲᠠᠢ ᠭᠡᠳᠡᠭ ᠬᠦᠮᠦᠰ ᠪᠠᠶᠢᠳᠠᠭ᠃ ᠳᠡᠲᠡᠨ ᠪᠣᠯ ᠵᠡᠭᠦᠠᠭᠠᠷ ᠤᠨ ᠳᠠᠶᠢᠨ ᠤ ᠦᠶ᠎ᠡ ᠳᠤ ᠵᠡᠭᠦᠠᠭᠠᠷ ᠨᠤᠲᠤᠭ ᠲᠤ ᠦᠯᠡᠳᠡᠭᠰᠡᠨ ᠪᠣᠶᠤ ᠲᠠᠶᠢᠨ ᠤ ᠳᠠᠷᠠᠭ᠎ᠠ ᠪᠤᠴᠠᠵᠦ ᠢᠷᠡᠭᠰᠡᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠤᠨ ᠬᠤᠶᠢᠴᠢᠰ ᠮᠦᠨ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠰᠢᠯᠢ ᠶᠢᠨ ᠭᠤᠣᠯ ᠠᠶᠢᠮᠠᠭ ᠤᠨ ᠤᠭ ᠤᠨ ᠴᠠᠬᠠᠷ ᠤᠨ ᠬᠡᠳᠦᠨ ᠬᠤᠰᠢᠭᠤᠨ ᠤ ᠦᠭᠡᠯᠡᠳ ᠤᠨ ᠳᠣᠮᠳᠠ ᠬᠡᠰᠡᠭ ᠬᠤᠶᠢᠳ ᠣᠪᠤᠭᠲᠠᠨ ᠪᠠᠶᠢᠳᠠᠭ᠃ ᠲᠡᠳᠡᠨ ᠪᠣᠯ 1690 ᠣᠨ ︵ᠡᠩᠭᠡ ᠠᠮᠤᠭᠤᠯᠠᠩ ᠤᠨ 29 ᠳ᠋ᠤᠭᠡᠷ ᠣᠨ︶ ᠤ ᠦᠶ᠎ᠡ ᠳᠤ ᠭᠠᠯᠳᠠᠨ ᠪᠣᠱᠤᠭᠲᠦ ᠶᠢᠨ ᠴᠡᠷᠢᠭ ᠠᠴᠠ ᠪᠤᠲᠠᠷᠠᠨ ᠲᠠᠰᠤᠷᠠᠵᠦ ᠦᠯᠡᠳᠡᠭᠰᠡᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠪᠠ ᠬᠤᠵᠢᠮ ᠤᠨ 1750 ‍ᠭᠠᠳ ᠣᠨ ᠠᠴᠠ ᠬᠤᠶᠢᠰᠢ ᠮᠠᠨᠵᠦ ᠶᠢᠨ ᠲᠦᠷᠦ ᠠᠴᠠ ᠨᠡᠭᠦᠯᠭᠡᠵᠦ ᠴᠦᠯᠡᠭᠰᠡᠨ ᠣᠶᠢᠷᠠᠳ ᠤᠨ ᠳᠣᠲᠤᠷᠠᠬᠢ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠤᠨ ᠦᠷ᠎ᠡ ᠬᠤᠶᠢᠴᠢᠰ ᠮᠦᠨ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠦᠪᠦᠷ ᠮᠣᠩᠭᠤᠯ ᠤᠨ ᠵᠠᠷᠢᠮ ᠬᠤᠰᠢᠭᠤᠳ ᠢᠶᠠᠷ ᠬᠠᠶᠠ ᠨᠢᠭᠡ ᠬᠡᠳᠦ ᠪᠠᠷ ᠪᠠᠶᠢᠭ᠎ᠠ ᠬᠤᠶᠢᠳ ᠣᠪᠤᠭᠲᠠᠳ ᠪᠣᠯ ᠵᠡᠬᠦᠠᠭᠠᠷ ᠤᠨ ᠳᠠᠶᠢᠨ ᠤ ᠳᠠᠷᠠᠭ᠎ᠠ ᠮᠠᠨᠵᠦ ᠶᠢᠨ ᠲᠦᠷᠦ ᠵᠠᠰᠠᠭ ᠤᠨ ᠠᠯᠪᠠᠳᠠᠯᠭ᠎ᠠ ᠪᠠᠷ ᠨᠡᠭᠦᠯᠭᠡᠵᠦ ᠣᠴᠢᠭᠤᠯᠤᠭᠰᠠᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠤᠶᠢᠴᠢᠰ ᠮᠦᠨ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠠᠯᠠᠱᠠ ᠠᠶᠢᠮᠠᠭ ᠤᠨ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤ᠂ ᠠᠯᠠᠱᠠ ᠵᠡᠭᠦᠨ ᠬᠤᠰᠢᠭᠤ ᠪᠣᠯ ᠣᠳᠤ ᠶᠢᠨ ᠬᠤᠶᠢᠳ ᠣᠪᠤᠭᠲᠠᠨ ᠤ ᠨᠡᠯᠢᠶᠡᠳ ᠲᠦᠪᠯᠡᠷᠡᠵᠦ ᠪᠠᠶᠢᠭ᠎ᠠ ᠭᠠᠵᠠᠷ ᠨᠤᠲᠤᠭ ᠮᠦᠨ᠃ ᠭᠡᠬᠦ ᠳᠤ ᠲᠡᠳᠡᠨ ᠤ ᠠᠯᠠᠱᠠ ᠳᠤ ᠢᠷᠡᠭᠰᠡᠨ ᠴᠠᠭ ᠬᠤᠭᠤᠴᠠᠭ᠎ᠠ᠂ ᠵᠠᠮ ᠮᠦᠷ ᠨᠢ ᠠᠳᠠᠯᠢ ᠦᠭᠡᠢ ᠪᠣᠯᠤᠯᠲᠠᠢ᠃ ᠣᠳᠤ ᠶᠢᠨ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠳᠠᠮᠰᠣᠭᠪᠤᠯᠠᠭ ᠰᠣᠮᠤ᠂ ᠮᠦᠩᠭᠦᠨᠪᠤᠯᠠᠭ ᠰᠤᠮᠤ᠂ ᠠᠯᠳ᠋ᠬᠠᠣᠪᠤᠭ᠎ᠠ ᠰᠣᠮᠤ ᠭᠢᠬᠡᠳ ᠠᠯᠠᠱᠠ ᠵᠡᠭᠦᠨ ᠬᠤᠰᠢᠭᠤᠨ ᠤ ᠪᠠᠶᠠᠨᠨᠢᠷᠤᠭᠤᠨ ᠰᠤᠮᠤ᠂ ᠬᠤᠩᠭᠤᠷᠠᠦ᠋ᠯᠦᠩ ᠰᠤᠮᠣ ᠪᠠᠷ ᠭᠤᠣᠯ ᠪᠣᠯᠭᠠᠭᠰᠠᠨ ᠬᠤᠶᠢᠲᠦ ᠪᠡᠶ᠎ᠡ ᠶᠢᠨ ᠰᠣᠮᠤ ᠪᠠᠷ ᠨᠡᠯᠢᠶᠡᠳ ᠬᠤᠶᠢᠳ ᠤᠳ ᠲᠦᠪᠯᠡᠷᠡᠵᠦ ᠪᠣᠢ᠂ ᠲᠡᠳᠡ ᠪᠣᠯ 1677 ᠤᠨ ︵ᠡᠩᠭᠡ ᠠᠮᠤᠭᠤᠯᠠᠩ ᠤᠨ 16 ᠳ᠋ᠤᠭᠠᠷ ᠣᠨ︶ ᠤ ᠦᠶ᠎ᠡ ᠪᠠᠷ ᠵᠡᠭᠦᠠᠭᠠᠷ ᠤᠨ ᠲᠠᠶᠢᠵᠢ ᠬᠠᠨᠳᠦ ᠪᠠ ᠡᠷᠳᠡᠨᠢ ᠬᠤᠰᠢᠭᠤᠴᠢ ᠶᠢ ᠳᠠᠭᠠᠵᠦ ᠡᠵᠡᠨ᠎ᠡ ᠪᠠᠷ ᠳᠠᠮᠵᠢᠨ ᠠᠯᠠᠱᠠ ᠳᠤ ᠢᠷᠡᠭᠰᠡᠨ ᠬᠤᠶᠢᠳ ᠪᠠ ᠮᠦᠨ ᠲᠡᠷᠡ ᠦᠶᠡᠰ ᠢᠶᠠᠷ ᠬᠤᠱᠤᠳ ᠤᠨ ᠭᠠᠯᠳᠠᠨᠳᠣᠷᠵᠢ ᠶᠢ ᠳᠠᠭᠠᠵᠦ ᠠᠯᠠᠱᠠ ᠳᠤ ᠢᠷᠡᠭᠰᠡᠨ ᠬᠤᠶᠢᠳ ᠤᠨ ᠲᠠᠶᠢᠵᠢ ᠯᠣᠪᠽᠠᠩ ᠤᠨ ᠬᠠᠷᠢᠶᠠᠲᠦ ᠶᠢᠨ ᠠᠯᠠᠱᠠ ᠳᠤ ᠦᠯᠡᠳᠡᠵᠦ ᠬᠤᠴᠤᠷᠤᠭᠰᠠᠨ ᠬᠦᠮᠦᠰ ᠤᠨ ᠬᠤᠶᠢᠴᠢᠰ ᠮᠦᠨ ᠪᠣᠯᠤᠯᠲᠠᠢ ᠃ ᠨᠦᠭᠦᠭᠡ ᠨᠢᠭᠡ ᠪᠦᠯᠦᠭ ᠨᠢ 1670 ‍ᠭᠠᠳ ᠣᠨ ᠤ ᠰᠡᠭᠦᠯᠴᠢ᠂ 1680 ‍ᠭᠠᠳ ᠣᠨ ᠤ ᠡᠬᠢ ᠪᠠᠷ ᠬᠤᠱᠤᠳ ᠤᠨ ᠡᠷᠬᠡ ᠵᠢᠨᠦᠩ ᠬᠤᠷᠤᠯᠠᠢ ᠶᠢ ᠳᠠᠭᠠᠵᠦ ᠠᠯᠠᠱᠠ ᠳᠤ ᠢᠷᠡᠭᠰᠡᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠤᠶᠢᠴᠢᠰ ᠮᠦᠨ᠃ ᠪᠠᠰᠠ ᠨᠢᠭᠡ ᠪᠦᠯᠦᠭ ᠨᠢ ᠣᠳᠣ ᠶᠢᠨ ᠠᠯᠠᠱᠠ ᠵᠡᠭᠦᠨ ᠬᠤᠰᠢᠭᠤᠨ ᠤ ᠪᠠᠷᠠᠭᠤᠨ ᠪᠡᠶ᠎ᠡ ᠶᠢᠨ ᠨᠤᠲᠤᠭ ᠪᠤᠯᠬᠤ ᠤᠨᠳᠤᠷᠤᠯᠲᠦ ᠰᠣᠮᠤ᠂ ᠲᠡᠭᠷᠢ ᠡᠯᠡᠰᠦ ᠰᠤᠮᠤ ᠪᠠᠷ ᠠᠵᠦ ᠲᠦᠷᠦᠵᠦ ᠪᠠᠶᠢᠭ᠎ᠠ ᠬᠤᠶᠢᠳ ᠤᠳ ᠪᠣᠯ 1680 ‍ᠭᠠᠳ ᠣᠨ ᠤ ᠦᠶ᠎ᠡ ᠪᠠᠷ ᠬᠤᠱᠤᠳ ᠤᠨ ᠸᠴᠢᠷᠲᠦ ᠰᠡᠴᠡᠨ ᠬᠠᠨ ᠤ ᠣᠮᠪᠤᠯᠤ ᠯᠤᠪᠰᠠᠩᠭᠤᠮᠪᠤ ︵ᠯᠣᠪᠰᠠᠩᠭᠤᠮᠪᠤ ᠷᠠᠪᠲᠠᠨ︶ ᠢ ᠳᠠᠭᠠᠵᠦ ᠪᠠᠭ᠎ᠠ ᠬᠤᠵᠢᠮᠳᠠᠭᠤ ᠰᠢᠭ᠋ ᠠᠯᠠᠱᠠ ᠳᠤ ᠢᠷᠡᠭᠰᠡᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠤᠶᠢᠴᠢ ᠦᠶ᠎ᠡ ᠮᠦᠨ ᠭᠡᠳᠡᠭ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠣᠷᠤᠰ ᠤᠨ ᠬᠤᠯᠪᠤᠭᠠᠨ ᠤ ᠬᠠᠯᠢᠮᠠᠭ ᠤᠯᠤᠰ ᠲᠤ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠤᠨ ᠤᠯᠠ ᠮᠦᠷ ᠪᠠᠶᠢᠨ᠎ᠠ ᠭᠡᠰᠡᠨ ᠮᠡᠳᠡᠭᠡ ᠪᠣᠢ᠃ ᠲᠡᠳᠡ ᠪᠣᠯ 1628 ᠣᠨ ︵ᠲᠡᠭᠷᠢ ᠶᠢᠨ ᠰᠡᠴᠡᠨ ᠤ 2 ᠳ᠋ᠤᠭᠠᠷ ᠣᠨ︶ ᠳᠤ ᠲᠣᠷᠭᠤᠳ ᠪᠠ ᠳᠦᠷᠪᠡᠳ ᠠᠶᠢᠮᠠᠭ ᠲᠠᠢ ᠬᠠᠮᠲᠦ ᠣᠴᠢᠭᠰᠠᠨ ᠪᠣᠶᠤ 1676 ᠣᠨ ︵ᠡᠩᠭᠡ ᠠᠮᠤᠭᠤᠯᠠᠩ ᠤᠨ 15 ᠳ᠋ᠤᠭᠠᠷ ᠣᠨ︶ ᠤ ᠦᠶ᠎ᠡ ᠪᠠᠷ ᠸᠴᠢᠷᠲᠦ ᠰᠡᠴᠡᠨ ᠬᠠᠨ ᠤ ᠬᠠᠲᠤᠨ ᠳᠣᠷᠵᠢᠷᠠᠪᠳᠠᠨ ᠤ ᠳᠠᠭᠠᠭᠤᠯᠭ᠎ᠠ ᠪᠠᠷ ᠢᠵᠢᠯ ᠵᠠᠢ ᠳᠤ ᠣᠴᠢᠭᠰᠠᠨ ᠬᠤᠶᠢᠳ ᠤᠳ ᠤᠨ ᠬᠤᠶᠢᠴᠢᠰ ᠮᠦᠨ᠃ ᠣᠳᠤ ᠮᠣᠩᠭᠤᠯ ᠤᠯᠤᠰ ᠤᠨ ᠭᠤᠪᠢ ᠠᠯᠲᠠᠢ ᠠᠶᠢᠮᠠᠭ ᠤᠨ ᠰᠢᠷᠭ᠎ᠠ ᠰᠣᠮᠤ ᠪᠠᠷ ᠬᠡᠰᠡᠭ ᠬᠤᠶᠢᠳ ᠣᠪᠤᠭᠲᠠᠨ ᠪᠣᠢ᠂ ᠳᠡᠳᠡᠨ ᠪᠣᠯ ᠤᠭ ᠨᠢ ᠬᠤᠱᠤᠳ ᠠᠶᠢᠮᠠᠭ ᠤᠨ ᠭᠠᠯᠳᠠᠨᠳᠣᠷᠵᠢ ᠶᠢ ᠳᠠᠭᠠᠵᠦ ᠠᠯᠠᠱᠠ ᠳᠤ ᠣᠴᠢᠭᠠᠳ ᠪᠤᠴᠠᠭᠰᠠᠨ ᠬᠤᠶᠢᠳ ᠤᠨ ᠲᠠᠶᠢᠵᠢ ᠯᠣᠪᠽᠠᠩ ᠤᠨ ᠬᠠᠷᠢᠶᠠᠲᠦ ᠮᠦᠨ᠃ ᠪᠠᠰᠠ ᠮᠣᠩᠭᠤᠯ ᠤᠯᠤᠰ ᠤᠨ ᠣᠪᠰᠦ ᠠᠶᠢᠮᠠᠭ ᠤᠨ ᠲᠦᠪ ᠤᠯᠠᠭᠠᠠᠭᠤᠮᠤ ᠣᠷᠴᠢᠮ ᠬᠡᠰᠡᠭ ᠬᠤᠶᠢᠳ ᠤᠳ ᠪᠣᠢ᠂ ᠲᠡᠳᠡᠨ ᠪᠣᠯ 1753 ᠤᠨ ︵ᠳᠡᠭᠷᠢ ᠳᠡᠳᠭᠦᠭᠴᠢ ᠶᠢᠨ 18 ᠳ᠋ᠤᠭᠠᠷ ᠣᠨ︶ ᠳᠤ ᠳᠦᠷᠪᠡᠳ ᠤᠨ ᠭᠤᠷᠪᠠᠨ ᠴᠠᠷᠠᠨ ᠢ ᠳᠠᠭᠠᠵᠦ ᠬᠠᠯᠬ᠎ᠠ ᠳᠤ ᠣᠴᠢᠭᠰᠠᠨ ᠬᠤᠶᠢᠳ ᠤᠨ ᠲᠠᠶᠢᠵᠢ ᠭᠡᠨᠳᠦᠨᠵᠠᠪ᠂ ᠭᠦᠮᠵᠠᠪ᠂ ᠢᠰᠢᠭᠡ ᠨᠠᠷ ᠤᠨ ᠬᠠᠷᠢᠶᠠᠲᠦ ᠮᠦᠨ᠃ ᠪᠠᠰᠠ ᠨᠢᠭᠡ ᠬᠡᠰᠡᠭ ᠨᠢ ᠲᠡᠭᠦᠨ ᠠᠴᠠ ᠬᠤᠵᠢᠭᠤ 1755 ᠤᠨ ︵ᠳᠡᠭᠷᠢ ᠳᠡᠳᠭᠦᠭᠴᠢ ᠶᠢᠨ 20 ᠳ᠋ᠤᠭᠠᠷ ᠤᠨ︶ ᠤ ᠦᠶ᠎ᠡ ᠳᠤ ᠮᠠᠨᠵᠦ ᠳᠤ ᠳᠠᠭᠠᠵᠦ ᠣᠷᠤᠭᠰᠠᠨ ᠲᠠᠮᠠᠷᠢᠨ ᠤ ᠬᠠᠷᠢᠶᠠᠲᠦ ᠮᠦᠨ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠣᠳᠣ ᠶᠢᠨ ᠮᠣᠩᠭᠤᠯ ᠤᠯᠤᠰ ᠤᠨ ᠣᠪᠰᠤ ᠠᠶᠢᠮᠠᠭ ᠤᠨ ᠪᠠᠶᠠᠳ᠂ ᠳᠦᠷᠪᠡᠳ ᠤᠨ ᠳᠣᠲᠤᠷ᠎ᠠ᠂ ᠪᠠᠶ᠋ᠬᠠᠦ᠋ᠯᠦᠭᠡᠢ ᠠᠶᠢᠮᠠᠭ ᠤᠨ ᠦᠭᠡᠯᠡᠳ ᠤᠨ ᠳᠣᠲᠤᠷ᠎ᠠ᠂ ᠭᠤᠪᠢ ᠠᠯᠲᠠᠢ ᠠᠶᠢᠮᠠᠭ ᠤᠨ ᠤᠷᠢᠶᠠᠩᠬᠠᠢ ᠶᠢᠨ ᠳᠣᠲᠤᠷ᠎ᠠ᠂ ᠬᠤᠪᠲᠦ ᠠᠶᠢᠮᠠᠭ ᠤᠨ ᠲᠣᠷᠭᠤᠳ ᠤᠨ ᠳᠣᠮᠳᠠ ᠬᠤᠶᠢᠳ ᠣᠪᠤᠭ ᠲᠠᠢ ᠬᠦᠮᠦᠰ ᠲᠠᠷᠬᠠᠵᠦ ᠪᠠᠶᠢᠳᠠᠭ᠃ ᠲᠡᠳᠡᠨ ᠪᠣᠯ ᠢᠷᠡᠯᠲᠡ ᠨᠢ ᠠᠳᠠᠯᠢ ᠦᠭᠡᠢ᠂ ᠠᠳᠠᠯᠢ ᠪᠣᠰᠣ ᠴᠠᠭ ᠦᠶ᠎ᠡ ᠳᠤ ᠦᠭᠡᠷ᠎ᠡ ᠦᠭᠡᠷ᠎ᠡ ᠵᠠᠮ ᠮᠦᠷ ᠢᠶᠠᠷ ᠬᠠᠯᠬ᠎ᠠ ᠳᠤ ᠣᠴᠢᠭᠰᠠᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠤᠶᠢᠴᠢᠰ ᠮᠦᠨ᠃ ᠡᠭᠦᠨ ᠳᠤ ᠶᠡᠬᠡᠩᠬᠢ ᠨᠢ 1637 ᠤᠨ ︵ᠳᠡᠭᠷᠢ ᠶᠢᠨ ᠰᠡᠴᠡᠨ ᠤ 10 ᠳ᠋ᠤᠭᠠᠷ ᠣᠨ︶ ᠳᠤ ᠳᠦᠷᠪᠡᠳ ᠠᠶᠢᠮᠠᠭ ᠢ ᠳᠠᠭᠠᠵᠦ ᠣᠴᠢᠭᠰᠠᠨ ᠪᠠ 1750 ᠤᠨ ︵ᠳᠡᠭᠷᠢ ᠳᠡᠳᠭᠦᠭᠴᠢ ᠶᠢᠨ 15 ᠳ᠋ᠤᠭᠠᠷ ᠤᠨ︶ ᠤ ᠦᠶ᠎ᠡ ᠠᠴᠠ ᠬᠤᠶᠢᠰᠢ ᠵᠡᠭᠦᠠᠭᠠᠷ ᠠᠴᠠ ᠳᠦᠷᠪᠡᠵᠦ ᠣᠴᠢᠭᠰᠠᠨ ᠪᠠ ᠲᠣᠷᠭᠤᠳ ᠢ ᠳᠠᠭᠠᠵᠦ ᠢᠵᠢᠯ ᠵᠠᠢ ᠠᠴᠠ ᠪᠤᠴᠠᠵᠦ ᠢᠷᠡᠭᠰᠡᠨ ᠬᠤᠶᠢᠳ ᠤᠨ ᠦᠷ᠎ᠡ ᠬᠤᠶᠢᠴᠢᠰ ᠮᠦᠨ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠴᠦᠬᠡᠨ ᠬᠡᠳᠦ ᠨᠢ ᠲᠡᠣᠬᠡᠨ ᠳᠠᠬᠢ ᠤᠶᠢᠷᠠᠳ ᠠᠶᠢᠮᠠᠭ ᠤᠨ ᠪᠠᠷᠠᠭᠤᠨᠰᠢ ᠰᠢᠯᠵᠢᠬᠦ ᠳᠤ ᠵᠠᠮ ᠵᠠᠭᠤᠷ᠎ᠠ ᠪᠠᠨ ᠦᠯᠡᠳᠡᠵᠦ ᠬᠤᠴᠤᠷᠤᠭᠰᠠᠨ ᠪᠣᠶᠤ ᠨᠡᠭᠦᠳᠡᠯ ᠮᠠᠯᠵᠢᠯ ᠤᠨ ᠵᠠᠮ ᠮᠦᠷ᠂ ᠳᠠᠶᠢᠨ ᠳᠠᠵᠢᠨ ᠤ ᠬᠦᠯ ᠢᠶᠠᠷ ᠬᠤᠪᠢ ᠬᠤᠪᠢ ᠪᠠᠷ ᠢᠶᠠᠨ ᠳᠦᠷᠪᠡᠵᠦ ᠣᠴᠢᠭᠰᠠᠨ ᠪᠣᠶᠤ ᠰᠢᠨᠵᠢᠶᠠᠩ ᠤᠨ ᠴᠡᠷᠢᠭ ᠤᠨ ᠡᠷᠬᠡᠲᠡᠨ ᠤ ᠡᠵᠡᠮᠰᠢᠯ ᠤᠨ ᠦᠶ᠎ᠡ ᠳᠤ ᠳᠤᠲᠠᠭᠠᠵᠦ ᠵᠠᠶᠢᠯᠠᠵᠦ ᠣᠴᠢᠭᠰᠠᠨ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠤᠨ ᠦᠷ᠎ᠡ ᠬᠤᠶᠢᠴᠢᠰ ᠪᠠᠶᠢᠵᠦ ᠪᠣᠯᠤᠨ᠎ᠠ᠃ ᠶᠡᠷᠦᠨᠢ ᠮᠣᠩᠭᠤᠯ ᠤᠯᠤᠰ ᠲᠤ ᠪᠠᠶᠢᠭ᠎ᠠ ᠣᠶᠢᠷᠠᠳ ᠤᠳ ᠪᠣᠯ ᠤᠷᠲᠦ ᠤᠳᠠᠭᠠᠨ ᠲᠡᠣᠬᠡ ᠶᠢᠨ ᠶᠠᠪᠤᠴᠠ ᠳᠤ ᠣᠯᠠᠨ ᠲᠠᠪᠤᠨ ᠰᠢᠯᠲᠠᠭᠠᠨ ᠢᠶᠠᠷ ᠣᠯᠠᠨ ᠴᠦᠬᠡᠨ ᠠᠳᠠᠯᠢ ᠪᠣᠰᠤ ᠤᠳᠠᠭ᠎ᠠ ᠳᠠᠷᠠᠭ᠎ᠠ ᠪᠠᠷ ᠣᠷᠤᠵᠦ ᠭᠠᠷᠣᠭᠰᠠᠨ ᠲᠡᠣᠬᠡ ᠲᠠᠢ ᠲᠤᠯᠠ ᠲᠡᠳᠡᠨ ᠤ ᠲᠤᠮᠳᠠ ᠬᠤᠶᠢᠳ ᠠᠶᠢᠮᠠᠭ ᠤᠨ ᠬᠦᠮᠦᠰ ᠪᠠᠶᠢᠭ᠎ᠠ ᠨᠢ ᠣᠳᠣ ᠶᠢᠨ ᠮᠣᠩᠭᠤᠯ ᠤᠯᠤᠰ ᠲᠤ ᠪᠠᠶᠢᠭ᠎ᠠ ᠬᠤᠶᠢᠳ ᠣᠪᠤᠭᠲᠠᠨ ᠤ ᠢᠷᠡᠯ ᠮᠦᠨ ᠪᠠᠶᠢᠬᠤ ᠶᠣᠰᠤᠲᠠᠢ᠃
 
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠯᠠᠱᠠ ᠶᠢᠨ ᠮᠤᠩᠭᠤᠯ ᠮᠦᠰᠯᠢᠮᠴᠤᠳ ᠤᠨ ᠵᠠᠩ ᠵᠡᠩᠰᠢᠯ ᠪᠡ ᠴᠡᠬᠡᠷᠯᠡᠯ᠁
ᠲᠤᠷᠭᠤᠳ ᠠᠩᠴᠢᠨ ᠤ ᠭᠦᠷᠣᠭᠡᠰᠦ ᠠᠩᠨᠠᠬᠤ ᠣᠷᠡᠨ ᠠᠷᠭ᠎ᠠ᠁
ᠬᠤᠱᠤᠳ ᠮᠥᠩᠬᠡᠨᠠᠷᠠᠨ᠁
ᠴᠢᠳᠠᠯ ᠲᠠᠢ ᠠᠪᠤᠭᠠᠢ ᠭᠠᠷᠮ᠎ᠠ ᠶᠢᠨ ᠲᠤᠮᠤᠭ
ᠲᠡᠬᠡᠳᠦ ᠮᠤᠩᠭᠤᠯᠴᠤᠳ ᠤᠨ ᠮᠠᠯ ᠠᠵᠤ ᠠᠬᠤᠢ ᠶᠢᠨ ᠪᠠᠭᠠᠵᠢ ᠭᠡᠷᠡᠭᠰᠡᠯ ᠤᠨ ᠲᠤᠬᠠᠢ ᠲᠦᠬᠦᠮ ᠲᠠᠶᠢᠯᠤᠮᠵᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号