ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠰᠢᠨ᠎ᠡ ᠬᠦᠳᠡᠭᠡ
ᠰᠢᠨ᠎ᠠ ᠬᠡᠷ ᠮᠢᠯᠢᠶᠠᠯᠭ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-12-05
   ᠤᠮ ᠰᠠᠶᠢᠨ ᠠᠮᠤᠭᠤᠯᠠᠩ ᠪᠤᠯᠳᠤᠭᠠᠢ ᠰᠤᠳᠤ ᠪᠤᠭᠳᠠ ᠶᠢᠨ ᠵᠤᠬᠢᠶᠠᠯ ᠰᠤᠳᠠᠢ ᠬᠠᠳᠤᠨ ᠤ ᠥᠯᠢᠬᠡᠷ ᠴᠢᠩᠬᠢᠰ ᠪᠤᠭᠳᠠ ᠶᠢᠨ ᠵᠤᠬᠢᠶᠠᠯ  ᠴᠢᠨᠤᠸᠠᠨ ᠬᠠᠳᠤᠨ ᠤ ᠥᠯᠢᠬᠡᠷ ᠰᠠᠭᠤᠭᠰᠠᠨ ᠨᠤᠳᠤᠭ ᠢ ᠨᠢ ᠰᠢᠨᠵᠢᠪᠡᠰᠥ ᠰᠥᠷ ᠰᠥᠯᠳᠠ ᠨᠢ ᠲᠡᠭᠵᠢᠷᠡᠭᠰᠡᠨ ᠰᠥᠯᠳᠡ ᠬᠡᠶᠢᠮᠤᠷᠢ ᠪᠠᠳᠠᠷᠠᠭᠰᠠᠨ ᠠᠮᠢ ᠨᠠᠰᠤ ᠨᠢ ᠤᠷᠳᠤᠰᠢᠭᠰᠠᠨ ᠠᠮᠤᠷ ᠲᠠᠪᠠ ᠪᠠᠷ ᠵᠢᠷᠭᠠᠭᠰᠠᠨ ᠠᠰᠢᠳᠠ ᠶᠢᠨ ᠪᠤᠶᠠᠨ ᠢᠪᠡᠬᠡᠭᠰᠡᠨ ᠠᠯᠢᠪᠠ ᠤᠴᠠᠷᠠᠯ ᠪᠥᠷᠢᠳᠥᠭᠰᠡᠨ ᠡᠰᠨᠢᠯ ᠤᠨ ᠶᠤᠰᠤᠨ ᠲᠤᠭᠳᠠᠭᠰᠠᠨ  ᠡᠬᠡᠯᠢᠳᠡᠢ ᠰᠠᠶᠢᠬᠠᠨ ᠭᠠᠵᠠᠷ ᠬᠡᠷ ᠡᠷᠥᠬᠡ ᠶᠢ ᠪᠠᠶᠢᠭᠤᠯᠬᠤ ᠶᠢᠨ ᠲᠡᠳᠥᠢ ᠪᠠᠷ ᠬᠡᠶᠢᠬᠦᠯᠥᠭᠴᠢ ᠪᠤᠷᠬᠠᠨ ᠮᠠᠨᠢ ᠬᠥᠪᠴᠢᠨ ᠲᠥᠷᠪᠡᠨ ᠬᠠᠷ᠎ᠠ ᠶᠢᠨ ᠲᠤᠳᠤᠷ᠎ᠠ ᠠᠴᠠ ᠬᠥᠴᠥᠳᠥ ᠪᠠᠭᠠᠨ᠎ᠠ ᠪᠠᠷ ᠲᠤᠯᠭᠠᠭᠤᠷᠢᠯᠠᠨ ᠬᠥᠷᠳᠥᠨ ᠬᠡᠪᠳᠥ ᠬᠡᠷ ᠬᠡᠮᠡᠭᠴᠢ ᠶᠢ ᠬᠥᠭᠵᠢᠬᠦᠨ ᠰᠠᠶᠢᠬᠠᠨ ᠪᠠᠶᠢᠭᠤᠯᠬᠤ ᠶᠢᠨ ᠶᠤᠰᠤᠨ ᠠᠨᠤ ᠰᠢᠨ᠎ᠠ ᠥᠷᠥᠬᠡ ᠶᠢ ᠬᠡᠶᠢᠬᠦᠯᠬᠦ  ᠰᠢᠵᠢᠷ ᠨᠠᠷᠠᠨ ᠢ ᠬᠡᠷᠡᠯᠳᠥᠬᠦᠯᠬᠦ ᠭᠤᠸᠠᠪᠠᠷ ᠽᠠᠨᠳᠠᠨ ᠮᠤᠳᠤ ᠪᠠᠷ ᠨᠢ  ᠭᠤᠤᠯ ᠢ ᠨᠢ ᠴᠠᠪᠴᠢᠨ ᠬᠢᠭᠰᠡᠨ ᠰᠢᠷ᠎ᠠ ᠠᠭᠠᠷᠠᠤ ᠮᠤᠳᠤ ᠪᠠᠷ ᠨᠢ  ᠱᠠᠭ᠎ᠠ ᠶᠢ ᠨᠢ ᠴᠠᠪᠴᠢᠨ ᠭᠠᠷᠭᠠᠭᠰᠠᠨ ᠴᠢᠯᠬᠡᠷ ᠴᠥ᠋ ᠶᠥ᠋ ᠮᠤᠳᠤ ᠪᠠᠷ ᠨᠢ  ᠴᠥ᠋  ᠶᠢ ᠨᠢ ᠴᠠᠪᠴᠢᠨ ᠴᠢᠭᠳᠠᠯᠠᠭᠰᠠᠨ ᠠᠷᠤ ᠶᠢᠨ ᠰᠤᠬᠠᠢ ᠮᠤᠳᠤ ᠪᠠᠷ ᠨᠢ ᠠᠯᠬᠤᠭ ᠢ ᠨᠢ ᠮᠠᠳᠠᠨ ᠲᠠᠭᠠᠷᠠᠭᠤᠯᠤᠭᠰᠠᠨ ᠠᠷᠰᠯᠠᠨ ᠵᠠᠭᠠᠨ᠎ᠠ ᠶᠢᠨ ᠰᠢᠷᠢ ᠪᠠᠷ ᠨᠢ ᠠᠪᠴᠠᠯᠳᠤᠭᠤᠯᠤᠨ ᠥᠳᠡᠬᠡᠷᠯᠡᠭᠰᠡᠨ ᠭᠤᠶᠢᠳᠠ ᠲᠠᠷᠬᠠᠨ ᠤ ᠪᠥᠳᠥᠬᠡᠭᠰᠡᠨ ᠭᠠᠤᠯᠢ ᠲᠡᠮᠥᠷ ᠴᠠᠪᠴᠢᠳᠠᠭ  ᠬᠤᠷᠴᠠ ᠢᠷᠡᠳᠥ ᠤᠶᠢᠯᠨ ᠪᠠᠷ ᠨᠢ ᠬᠤᠰᠢᠭᠤ ᠪᠥᠬᠦᠳᠡ ᠶᠢ ᠨᠢ ᠲᠠᠭᠠᠷᠠᠭᠤᠯᠤᠭᠰᠠᠨ ᠬᠤᠳᠠᠯᠨ ᠥᠯᠵᠢ ᠲᠡᠬᠦᠰᠥᠭᠰᠡᠨ ᠭᠤᠤᠯ ᠡᠷᠳᠡᠨᠢ ᠲᠤᠭᠤᠨᠤ ᠶᠢ ᠴᠢᠨᠢ ᠮᠢᠯᠠᠭᠠᠮᠤ︕ ᠭᠤᠶᠢᠪᠠᠰᠢ ᠥᠬᠡᠢ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠤᠯᠢᠶᠠᠰᠤ ᠬᠡᠭᠴᠢ ᠮᠤᠳᠤ ᠪᠠᠷ ᠨᠢ ᠤᠨᠢ ᠶᠢ ᠨᠢ ᠵᠠᠯᠠᠵᠤ ᠬᠢᠭᠰᠡᠨ ᠤᠨᠠᠭ᠎ᠠ ᠲᠠᠭ᠎ᠠ ᠶᠢᠨ ᠲᠡᠯ ᠢᠶᠠᠷ ᠨᠢ ᠤᠶᠠᠭ᠎ᠠ ᠰᠡᠬᠡᠯᠳᠡᠷᠬᠡ ᠶᠢ ᠨᠢ ᠲᠠᠮᠠᠭᠤᠯᠤᠭᠰᠠᠨ ᠮᠤᠷᠤᠢ ᠥᠬᠡᠢ ᠠᠰᠠᠬᠠᠨ  ᠮᠤᠬᠢᠷ ᠥᠬᠡᠢ ᠰᠢᠯᠤᠭᠤᠬᠠᠨ ᠥᠨᠳᠥᠷ ᠪᠤᠭᠤᠨᠢ ᠨᠢ ᠲᠡᠩᠴᠡᠭᠰᠡᠨ ᠥᠶ᠎ᠡ ᠵᠡᠷᠬᠡᠴᠡᠨ ᠲᠤᠯᠤᠯᠴᠠᠭᠰᠠᠨ ᠤᠨᠢ ᠡᠷᠳᠡᠨᠢ ᠶᠢ ᠴᠢᠨᠢ ᠮᠢᠯᠠᠭᠠᠮᠤ ᠠᠭᠤᠳᠠᠮ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠬᠠᠷ᠎ᠠ ᠽᠠᠨᠳᠠᠨ ᠮᠤᠳᠤ ᠪᠠᠷ ᠨᠢ ᠬᠠᠨ᠎ᠠ ᠶᠢ ᠨᠢ ᠴᠠᠪᠴᠢᠨ ᠬᠢᠭᠰᠡᠨ ᠬᠠᠨᠳᠠᠭᠠᠢ ᠪᠤᠭᠤ ᠶᠢᠨ ᠰᠢᠷᠢ ᠪᠠᠷ ᠨᠢ ᠬᠠᠪ ᠬᠡᠳᠡᠯ᠎ᠡ ᠲᠠᠳᠠᠵᠤ ᠥᠳᠡᠬᠡᠷᠯᠡᠭᠰᠡᠨ ᠨᠠᠬᠢᠶ᠎ᠠ ᠲᠠᠬᠢᠭᠤ ᠶᠢ ᠨᠢ ᠲᠠᠭᠠᠷᠠᠭᠤᠯᠵᠤ ᠨᠠᠰᠢ ᠴᠠᠰᠢ ᠵᠠᠯᠠᠭᠰᠠᠨ ᠨᠠᠨᠴᠢᠨ ᠪᠠᠳᠮ᠎ᠠ ᠶᠢᠨ ᠰᠢᠯᠵᠢ ᠪᠠᠷ ᠨᠢ ᠨᠠᠭᠠᠨ᠎ᠠ ᠴᠠᠭᠠᠨ᠎ᠠ ᠠᠴᠠ ᠨᠢ ᠲᠤᠪᠴᠢᠯᠠᠭᠰᠠᠨ ᠥᠯᠵᠡᠢ ᠤᠳᠠᠰᠤᠨ ᠰᠥᠯᠵᠢᠶ᠎ᠡ ᠲᠠᠢ  ᠥᠨᠴᠥᠭ ᠲᠥᠷᠪᠡᠯᠵᠢᠨ ᠨᠢᠳᠤ ᠲᠠᠢ ᠥ ᠰᠡᠪ ᠥᠬᠡᠢ ᠨᠡᠶᠢᠯᠡᠬᠦᠯᠥᠭᠰᠡᠨ ᠥᠷᠬᠡᠨ ᠪᠠᠭᠳᠠᠭᠠᠮᠵᠢ ᠨᠡᠬᠦᠴᠡ ᠲᠠᠢ ᠬᠠᠨ᠎ᠠ ᠡᠷᠳᠡᠨᠢ ᠶᠢ ᠴᠢᠨᠢ ᠮᠢᠯᠠᠭᠠᠮᠤ︕ ᠬᠠᠮᠤᠭ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠪᠠᠷᠠᠭᠤᠨ ᠠᠭᠤᠯᠠᠨ ᠳᠤ ᠤᠷᠭᠤᠭᠰᠠᠨ ᠪᠠᠳᠤ ᠴᠠᠭᠠᠨ ᠽᠠᠨᠳᠠᠨ ᠢ ᠪᠠᠭᠠᠳᠤᠷ ᠨᠡᠷᠡᠳᠥ ᠬᠥᠮᠥᠨ ᠢᠶᠠᠷ ᠪᠠᠰᠤᠨ ᠲᠠᠷᠢᠭᠤᠯᠵᠤ ᠠᠪᠴᠢᠷᠠᠭᠠᠳ ᠭᠠᠩ ᠲᠠᠢ ᠰᠥᠬᠡ ᠪᠠᠷ ᠴᠠᠪᠴᠢᠨ ᠭᠠᠯ ᠲᠠᠢ ᠴᠤᠷᠬᠢᠭᠤᠯ ᠢᠶᠠᠷ ᠨᠥᠬᠡᠯᠡᠵᠥ ᠬᠠᠷᠠᠭᠤᠯ ᠤᠨ ᠢᠷ ᠥᠩᠬᠡᠯᠡᠵᠥ ᠬᠠᠳᠠᠭᠠᠰᠤᠨ ᠤ ᠥᠵᠥᠬᠦᠷ ᠢᠶᠠᠷ ᠪᠠᠷᠢᠯᠳᠤᠭᠤᠯᠤᠭᠰᠠᠨ ᠡᠷᠬᠢᠬᠦ ᠬᠤᠶᠠᠷ ᠲᠠᠯᠠᠪᠴᠢ ᠲᠠᠢ ᠡᠷᠳᠡᠨᠢ ᠰᠢᠬᠦᠷ ᠤᠨ ᠰᠢᠨᠵᠢ ᠲᠠᠢ  ᠡᠪ ᠠᠴᠠ ᠨᠢ ᠲᠡᠩᠴᠡᠬᠦᠬᠡᠨ ᠡᠬᠡᠴᠢ ᠲᠡᠬᠦᠥ ᠬᠤᠶᠠᠷ ᠴᠠᠴᠠᠭᠤᠬᠠᠨ ᠨᠠᠭᠠᠨ᠎ᠠ ᠴᠠᠭᠠᠨ᠎ᠠ ᠴᠥᠬᠦᠷᠬᠡ ᠲᠠᠢ  ᠨᠠᠷᠢᠨ ᠪᠥᠳᠥᠬᠦᠨ ᠱᠤᠭᠤᠮ ᠲᠠᠢ ᠬᠠᠭᠠᠯᠭ᠎ᠠ ᠶᠢ ᠴᠢᠨᠢ ᠮᠢᠯᠠᠭᠠᠮᠤ︕ ᠬᠠᠮᠤᠭ ᠶᠡᠭᠡ ᠪᠤᠶᠠᠨ ᠬᠡᠰᠢᠭ  ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠲᠤᠮ ᠬᠡᠭᠴᠢ ᠮᠤᠳᠤ ᠪᠠᠷ ᠨᠢ ᠲᠤᠳᠤᠭᠤ ᠶᠢ ᠴᠠᠪᠴᠢᠨ ᠬᠢᠭᠰᠡᠨ ᠪᠤᠷᠤ ᠽᠠᠨᠳᠠᠨ ᠮᠤᠳᠤ ᠪᠠᠷ ᠨᠢ ᠪᠤᠱᠤᠭ᠎ᠠ ᠶᠢ ᠨᠢ ᠴᠠᠪᠴᠢᠨ ᠬᠢᠭᠰᠡᠨ ᠲᠤᠤᠷᠠᠬᠢ ᠲᠡᠬᠡᠷᠡᠬᠢ ᠴᠥ᠋ ᠲᠠᠢ ᠨᠢ ᠲᠤᠳᠠᠭᠤ ᠥᠬᠡᠢ ᠴᠥᠮ ᠮᠢᠯᠠᠭᠠᠮᠤ︕ ᠲᠤᠨᠳᠠᠷᠠᠰᠢ ᠥᠬᠡᠢ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠬᠤᠨᠢᠨ ᠤ ᠤᠩᠭᠠᠰᠤ ᠶᠢ ᠵᠤᠯᠠᠵᠤ ᠬᠤᠶᠠᠷ ᠮᠤᠷᠢ ᠪᠠᠷ ᠲᠠᠳᠠᠭᠤᠯᠤᠭᠰᠠᠨ ᠠᠬᠠᠷ ᠤᠷᠳᠤ ᠶᠢ ᠵᠤᠯᠠᠵᠤ  ᠠᠭᠳᠠ ᠮᠤᠷᠢ ᠪᠠᠷ ᠲᠠᠳᠠᠭᠤᠯᠤᠭᠰᠠᠨ ᠴᠠᠰᠤ ᠴᠠᠭᠠᠨ ᠢᠰᠡᠬᠡᠢ  ᠴᠠᠷᠪᠠᠭ᠎ᠠ ᠪᠤᠯᠤᠨ ᠲᠤᠭᠤᠷᠭ᠎ᠠ ᠶᠢ ᠴᠢᠨᠢ ᠠᠯᠳᠠᠨ ᠵᠢᠭᠠᠰᠤᠨ ᠳᠤ ᠰᠢᠨᠵᠢ ᠲᠠᠢ  ᠠᠷᠤ ᠥᠪᠥᠷ ᠲᠡᠬᠡᠪᠥᠷ ᠢ ᠴᠢᠨᠢ ᠨᠠᠩᠴᠢᠳ ᠪᠠᠳᠮ᠎ᠠ ᠶᠢᠨ ᠲᠡᠪᠢᠰᠬᠡᠷ ᠮᠡᠳᠥ  ᠨᠠᠪᠴᠢᠨ ᠬᠡᠯᠪᠡᠷᠢᠳᠥ ᠬᠥᠯᠳᠡᠷᠬᠡ ᠶᠢ ᠴᠢᠨᠢ ᠠᠷᠢᠭᠤᠨ ᠲᠠᠯᠠᠢ ᠶᠠᠩᠵᠤ ᠲᠠᠢ  ᠠᠮᠨ ᠲᠥᠷᠪᠡᠯᠵᠢᠨ ᠡᠷᠥᠬᠡ ᠶᠢ ᠴᠢᠨᠢ ᠥᠯᠵᠡᠢ ᠤᠳᠠᠰᠤᠨ ᠰᠥᠯᠵᠢᠶᠡᠰᠥ ᠲᠠᠢ ᠡᠬᠦᠳᠡᠨ ᠲᠡᠷᠢᠬᠦᠳᠡᠨ ᠶᠢ ᠴᠢᠨᠢ ᠮᠢᠯᠠᠭᠠᠮᠤ︕ ᠥᠨᠢᠷ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠳᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠪᠤᠷᠤᠭᠤ ᠵᠥᠪ ᠨᠡᠶᠢᠯᠡᠬᠦᠯᠥᠭᠰᠡᠨ ᠪᠤᠳᠤᠭ ᠤᠨ ᠥᠩᠬᠡ ᠪᠠᠷ ᠲᠠᠭᠠᠷᠠᠭᠤᠯᠤᠭᠰᠠᠨ ᠰᠤᠯᠤᠭᠠᠢ ᠪᠤᠷᠤᠭᠤ ᠪᠠᠷ ᠨᠡᠶᠢᠳᠡᠬᠡᠭᠰᠡᠨ ᠰᠤᠯᠤᠩᠭ᠎ᠠ ᠶᠢᠨ ᠥᠩᠬᠡ ᠪᠠᠷ ᠲᠠᠭᠠᠷᠠᠭᠤᠯᠤᠭᠰᠠᠨ ᠤᠯᠠᠨ ᠤᠭᠤᠰᠤᠷ ᠪᠥᠬᠦᠨ ᠢ ᠴᠢᠨᠢ  ᠤᠷᠤ ᠤᠷᠤ ᠳᠤ ᠨᠢ ᠮᠢᠯᠠᠭᠠᠮᠤ︕ · ᠤᠨᠴᠠ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠤᠷᠤᠭᠰᠠᠨ ᠪᠤᠤᠷ᠎ᠠ ᠶᠢᠨ ᠵᠤᠭᠳᠤᠷ ᠢᠶᠠᠷ ᠤᠷᠢᠶᠠᠨ ᠲᠠᠮᠤᠵᠤ ᠬᠢᠭᠰᠡᠨ ᠤᠭᠳᠠᠷᠭᠤᠢ ᠶᠢᠨ ᠵᠢᠪᠠᠷ ᠰᠠᠯᠬᠢᠨ ᠤ  ᠲᠠᠷᠤᠯᠭ᠎ᠠ ᠪᠤᠯᠭᠠᠨ ᠵᠤᠬᠢᠶᠠᠭᠰᠠᠨ ᠬᠤᠯᠠᠨ ᠴᠢᠬᠢᠳᠤ ᠶᠢᠨ ᠲᠡᠯ ᠢᠶᠠᠷ ᠨᠢ  ᠡᠷᠴᠢᠯᠡᠨ ᠲᠠᠮᠤᠵᠤ ᠬᠢᠭᠰᠡᠨ ᠬᠤᠷᠮᠤᠰᠳᠠ ᠶᠢᠨ ᠵᠢᠪᠠᠷ ᠰᠠᠯᠬᠢᠨ ᠤ ᠲᠠᠷᠤᠯᠭ᠎ᠠ ᠪᠤᠯᠭᠠᠨ ᠵᠤᠬᠢᠶᠠᠭᠰᠠᠨ ᠭᠠᠵᠠᠷ ᠠᠴᠠ ᠥᠯᠥ ᠰᠠᠯᠬᠤ  ᠭᠠᠩ ᠲᠡᠮᠥᠷ ᠭᠠᠳᠠᠰᠤᠳᠤ ᠵᠢᠪᠬᠤᠯᠠᠩᠳᠤ ᠬᠡᠷ ᠤᠨ ᠴᠢᠨᠢ ᠰᠥᠯᠳᠠ ᠵᠢᠳᠤᠭ᠎ᠠ ᠶᠢ ᠴᠢᠨᠢ ᠮᠢᠯᠠᠭᠠᠮᠤ  ᠵᠢᠷᠭᠠᠯ ᠢ ᠢᠪᠡᠬᠡᠭᠴᠢ ᠪᠤᠶᠠᠨ ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠤᠭᠳᠠᠷᠭᠤᠢ ᠶᠢᠨ ᠰᠠᠯᠬᠢᠨ ᠳᠤ ᠨᠢ  ᠲᠥᠰᠢᠯᠬᠡ ᠪᠤᠯᠤᠭᠰᠠᠨ ᠪᠠᠭᠠᠨ᠎ᠠ ᠤᠷᠳᠤᠨ ᠴᠠᠭᠠᠨ ᠥᠷᠥᠬᠡᠨ ᠳᠤᠨᠢ  ᠲᠤᠯᠭᠠᠭᠤᠷᠢ ᠪᠤᠯᠤᠭᠰᠠᠨ ᠪᠠᠭᠠᠨ᠎ᠠ ᠠᠭᠠᠷ ᠤᠨ ᠰᠠᠯᠬᠢᠨ ᠳᠤ ᠨᠢ ᠲᠥᠰᠢᠯᠬᠡ ᠪᠤᠯᠤᠭᠰᠠᠨ ᠪᠠᠭᠠᠨ᠎ᠠ ᠠᠷᠪᠠᠨ ᠬᠠᠨᠠᠳᠤ ᠶᠢᠨ ᠥᠷᠥᠬᠡᠨ ᠳᠤᠨᠢ  ᠲᠤᠯᠭᠠᠭᠤᠷᠢ ᠪᠤᠯᠤᠭᠰᠠᠨ ᠪᠠᠭᠠᠨ᠎ᠠ ᠲᠥᠬᠦᠷᠢᠭ ᠴᠠᠭᠠᠨ ᠬᠡᠷ ᠤᠨ ᠲᠤᠭᠤᠨᠤ ᠶᠢ ᠨᠢ ᠭᠤᠤᠯᠳᠠᠨ ᠲᠤᠯᠳᠠᠭ ᠲᠥᠷᠥ ᠶᠢᠨ ᠬᠡᠯᠬᠢᠶ᠎ᠡ ᠪᠠᠶᠢᠭᠤᠯᠬᠤ ᠳᠤ ᠡᠬᠦᠳᠡᠨ ᠭᠤᠤᠯ ᠳᠤᠨᠢ ᠲᠠᠷᠤᠳᠠᠭ ᠪᠠᠳᠤ ᠰᠠᠯᠠᠭ᠎ᠠ ᠠᠴᠠ ᠲᠠᠢ ᠪᠠᠭᠠᠨ᠎ᠠ ᠶᠢ ᠴᠢᠨᠢ ᠮᠢᠯᠠᠭᠠᠮᠤ︕ ᠪᠠᠷᠠᠭᠳᠠᠰᠢ ᠥᠬᠡᠢ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠪᠠᠷᠠᠭᠤᠨ ᠡᠮᠥᠨ᠎ᠡ ᠲᠠᠯᠪᠢᠭᠰᠠᠨ ᠪᠠᠳᠤ ᠤᠯᠠᠭᠠᠨ ᠠᠪᠳᠠᠷ᠎ᠠ ᠳᠤᠨᠢ ᠥᠬᠡᠳᠡᠩ ᠬᠤᠷᠭᠤᠢ ᠬᠤᠶᠢᠯᠠᠭᠠᠰᠤᠳᠠᠢ ᠥᠩᠬᠡᠳᠥ ᠮᠠᠩᠨᠤᠭ ᠡᠪᠬᠡᠬᠡᠰᠥᠳᠡᠢ ᠬᠠᠮᠪᠤ ᠲᠤᠷᠭ᠎ᠠ ᠬᠤᠶᠢᠯᠠᠭᠠᠰᠤᠳᠠᠢ ᠬᠠᠯᠢᠭᠤ ᠪᠤᠯᠠᠭ᠎ᠠ ᠲᠡᠯᠬᠡᠰᠥᠳᠡᠢ ᠬᠠᠮᠳᠤ ᠪᠥᠬᠦᠳᠡ ᠶᠢ ᠮᠢᠯᠠᠭᠠᠮᠤ ᠬᠠᠮᠤᠭ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤᠷ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ ᠪᠤᠳᠢ ᠮᠤᠳᠤᠨ ᠰᠢᠷᠡᠭᠡ ᠶᠢ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠪᠠᠨ ᠲᠠᠯᠪᠢᠭᠰᠠᠨ ᠪᠤᠷᠬᠠᠨ ᠵᠠᠯᠠᠬᠤ ᠬᠥᠩᠬᠡᠷᠸ᠎ᠠ ᠶᠢ ᠪᠠᠰᠨ ᠲᠡᠬᠡᠷ᠎ᠡ ᠨᠢ ᠲᠤᠬᠢᠶᠠᠭᠰᠠᠨ ᠠᠨᠳᠤᠤ ᠲᠥᠪᠡᠳ ᠲᠤ ᠱᠥᠩᠰᠢᠭᠯᠡᠭᠰᠡᠨ ᠠᠯᠳᠠ ᠮᠥᠩᠬᠦ ᠪᠠᠷ ᠪᠥᠳᠥᠬᠡᠭᠰᠡᠨ ᠠᠷᠢᠶᠠᠪᠠᠯᠤ ᠪᠤᠷᠬᠠᠨ ᠢ ᠠᠰ ᠭᠤᠤᠯ ᠳᠤᠨᠢ ᠵᠠᠯᠠᠭᠰᠠᠨ ᠤᠭᠠᠯᠵᠨ ᠲᠠᠢ ᠤᠯᠠᠭᠠᠨ ᠬᠤᠪᠬᠢ ᠶᠢ ᠤᠷᠢᠳᠠᠭᠤᠷ ᠨᠢ ᠲᠠᠯᠪᠢᠭᠰᠠᠨ ᠤᠳᠤᠯᠭ᠎ᠠ ᠪᠤᠯᠤᠭᠠᠳ ᠬᠥᠵᠢᠰ ᠢ ᠤᠩᠭᠠᠰᠭᠠᠮᠠᠨ ᠠᠷᠢᠭᠤᠯᠤᠭᠰᠠᠨ ᠤᠳᠪᠠᠯ᠎ᠠ ᠵᠠᠮᠪᠠᠭ᠎ᠠ ᠲᠡᠷᠢᠬᠦᠳᠡᠨ ᠢ ᠤᠷᠠᠨ ᠨᠠᠷᠢᠨ ᠵᠢᠭᠰᠠᠭᠠᠭᠰᠠᠨ ᠢᠵᠢᠯ ᠨᠠᠢᠮᠠᠨ ᠲᠠᠬᠢᠯ ᠢ ᠢᠷᠮᠡᠭ ᠲᠤᠯᠭᠠᠨ ᠵᠢᠭᠳᠡᠷᠡᠬᠦᠯᠥᠭᠰᠡᠨ ᠢᠪᠡᠬᠡᠯᠳᠥ ᠮᠥᠩᠬᠡ ᠶᠢᠨ ᠵᠤᠯᠨ ᠶᠢ ᠲᠡᠬᠦᠨ ᠤ ᠴᠠᠭᠠᠨ᠎ᠠ ᠨᠢ ᠪᠠᠳᠮᠠᠯᠠᠭᠤᠯᠤᠭᠰᠠᠨ ᠪᠤᠷᠬᠠᠨ ᠪᠤᠯᠤᠨ ᠲᠠᠬᠢᠯ ᠢ ᠴᠢᠨᠢ ᠪᠤᠯᠳᠤ ᠶᠢ ᠢᠷᠥᠬᠡᠨ ᠮᠢᠯᠢᠶᠠᠮᠤ᠃ ᠪᠤᠴᠠᠯᠳᠠ ᠥᠬᠡᠢ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤᠷ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠠᠰᠤᠷᠤ ᠲᠥᠷᠪᠡᠨ ᠤᠨᠢ ᠲᠠᠢ ᠠᠪᠤᠷᠭᠤ ᠲᠡᠰ ᠤᠨ ᠫᠡᠩᠰᠡ ᠲᠠᠢ ᠠᠯᠳᠠᠨ ᠮᠥᠩᠬᠦᠨ ᠲᠤᠯᠢ ᠲᠠᠢ ᠠᠮᠠᠨ ᠬᠡᠰᠢᠭ ᠤᠨ ᠢᠪᠡᠬᠡᠯ ᠲᠠᠢ ᠠᠮᠤᠷ ᠮᠡᠨᠳᠥ ᠶᠢᠨ ᠢᠷᠥᠬᠡᠯ ᠲᠠᠢ ᠠᠯᠢᠪᠠ ᠰᠠᠶᠢᠨ ᠤ ᠪᠡᠯᠬᠡᠳᠡᠯ ᠲᠠᠢ ᠠᠷᠢᠭᠤᠨ ᠪᠤᠶᠠᠨᠳᠤ ᠲᠠᠯᠠᠯᠭ᠎ᠠ ᠶᠢ ᠴᠢᠨᠢ ᠮᠢᠯᠢᠶᠠᠮᠤ᠃ ᠠᠰᠢᠳᠠ ᠶᠢᠨ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤᠷ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠲᠠᠯᠪᠢᠭᠰᠠᠨ ᠪᠠᠷᠠᠭᠠᠨ ᠤ ᠥᠵᠥᠬᠦᠷ ᠪᠠᠶᠢᠷᠢᠯᠠᠭᠠᠳᠠᠢ ᠵᠠᠭᠠᠳᠠᠰᠤ ᠵᠥᠢᠳᠡᠰᠥ ᠥᠨᠴᠥᠭ ᠲᠠᠢ ᠵᠠᠩᠬᠢᠶ᠎ᠠ ᠡᠷᠳᠡᠨᠢ ᠶᠢᠨ ᠵᠢᠷᠥᠬᠡ ᠲᠠᠢ ᠵᠠᠩ ᠠᠪᠳᠠᠷ᠎ᠠ ᠶᠢ ᠴᠢᠨᠢ ᠮᠢᠯᠢᠶᠠᠮᠤ᠃ ᠵᠠᠶᠢᠯᠠᠰᠢ ᠥᠬᠡᠢ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤᠷ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ᠂ ᠲᠡᠪᠰᠡᠭ ᠲᠥᠷᠪᠡᠨ ᠥᠨᠴᠥᠭ ᠲᠠᠢ ᠲᠡᠭᠰᠢᠬᠡᠨ ᠲᠥᠷᠪᠡᠨ ᠬᠥᠯ ᠲᠠᠢ ᠲᠡᠯᠬᠡᠵᠥ ᠲᠠᠯᠪᠢᠬᠤ ᠪᠥᠷᠬᠦᠬᠦᠯ ᠲᠠᠢ ᠲᠡᠬᠡᠷ᠎ᠡ ᠪᠠᠨ ᠭᠤᠷᠪᠠᠨ ᠤᠯᠪᠤᠭ ᠲᠠᠢ ᠠᠯᠳᠠᠨ ᠯᠤᠤ ᠶᠢᠨ ᠴᠠᠪᠴᠢᠭᠠᠷ ᠲᠠᠢ ᠠᠮᠢᠳᠤ ᠴᠢᠨᠳᠠᠮᠤᠨᠢ ᠡᠷᠳᠡᠨᠢ ᠲᠠᠢ ᠠᠭᠠᠷ ᠤᠨ ᠨᠠᠷᠠᠨ ᠤ ᠲᠤᠰᠬᠠᠯ ᠲᠠᠢ ᠠᠷᠤᠳᠠᠢ ᠴᠢᠩᠪᠠᠨ ᠭᠠᠳᠠᠷ ᠲᠠᠢ ᠠᠬᠠᠷ ᠢᠰᠢᠬᠡᠢ ᠲᠤᠳᠤᠷ ᠲᠠᠢ ᠠᠰᠠᠭᠠᠭᠰᠠᠨ ᠪᠠᠮᠪᠠᠷ ᠵᠢᠷᠤᠭ ᠲᠠᠢ ᠲᠡᠷ᠎ᠡ ᠪᠤᠯᠤᠨ ᠤᠷᠤ ᠶᠢ ᠴᠢᠨᠢ ᠲᠡᠭᠰᠢ ᠪᠥᠷᠢᠨ ᠮᠢᠯᠢᠶᠠᠮᠤ᠃  ᠲᠡᠯᠬᠡᠷ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤᠷ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠬᠥᠨᠳᠥᠳᠥ ᠶᠡᠭᠡ ᠲᠥᠷᠥ ᠳᠤᠨᠢ ᠡᠮᠥᠰᠥᠨ᠎ᠡ ᠬᠡᠮᠡᠨ ᠪᠡᠯᠡᠳᠬᠡᠭᠰᠡᠨ ᠬᠥᠮᠥᠨ ᠤ ᠥᠪᠡᠷ ᠤᠨ ᠨᠢᠳᠤᠨ ᠳᠤᠨᠢ ᠥᠵᠡᠮᠵᠢ ᠪᠤᠯᠭᠠᠨ ᠲᠠᠯᠪᠢᠭᠰᠠᠨ ᠬᠥᠷᠬᠡᠨ ᠬᠡᠤᠬᠡᠨ ᠤ ᠬᠤᠪᠴᠠᠰᠤ ᠶᠢ ᠥᠪᠴᠢ ᠪᠥᠷᠢᠨ ᠲᠠᠭᠠᠷᠠᠭᠤᠯᠤᠭᠠᠳ ᠠᠳᠡ ᠪᠥᠬᠦᠨ ᠢ ᠮᠢᠯᠢᠶᠠᠮᠤ᠃ ᠡᠳ᠋ ᠤᠨ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤᠷ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠬᠠᠷ᠎ᠠ ᠮᠤᠳᠤ ᠶᠢ ᠬᠠᠷᠠᠭᠤᠯᠳᠤᠨ ᠬᠢᠭᠰᠡᠨ ᠬᠠᠨ᠎ᠠ ᠶᠢᠨ ᠬᠡ ᠪᠠᠷ ᠴᠢᠮᠡᠭᠯᠡᠨ ᠬᠢᠭᠰᠡᠨ ᠬᠠᠯᠢᠭᠤ ᠪᠤᠯᠭ᠎ᠠ᠂ ᠬᠠᠮᠪᠤ ᠲᠤᠷᠭ᠎ᠠ ᠬᠠᠰ ᠮᠠᠨᠤ᠂ ᠲᠠᠨ᠎ᠠ ᠰᠤᠪᠤᠳ ᠬᠠᠮᠤᠭ ᠥᠨᠡᠳᠡᠢ ᠡᠷᠳᠡᠨᠢᠰ ᠬᠠᠳᠠᠭᠠᠯᠠᠭᠰᠠᠨ ᠵᠥᠷ ᠭᠤᠷ ᠢ ᠲᠡᠭᠳᠡᠬᠦᠯᠵᠥ ᠵᠢᠬᠦᠷᠳᠡᠨ ᠲᠤᠭᠤᠰ ᠢ ᠨᠢᠰᠬᠡᠭᠰᠡᠨ ᠤᠳᠠᠪᠠᠯ᠎ᠠ ᠯᠢᠩᠬᠤᠸ᠎ᠠ ᠲᠡᠯᠬᠡᠷᠡᠬᠦᠯᠵᠥ ᠤᠯᠠᠭᠠᠨ ᠨᠤᠭᠤᠭᠠᠨ ᠢᠶᠠᠷ ᠱᠢᠷᠳᠡᠭᠰᠡᠨ ᠵᠥᠢᠯ ᠤᠨ ᠰᠠᠶᠢᠬᠠᠨ ᠵᠢᠷᠤᠭ ᠲᠠᠢ ᠵᠡᠬᠦᠨ ᠠᠪᠳᠠᠷ᠎ᠠ ᠶᠢ ᠴᠢᠨᠢ ᠮᠢᠯᠢᠶᠠᠮᠤ᠃ ᠵᠥᠢᠷᠯᠡᠰᠢ ᠥᠬᠡᠢ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤᠷ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠤᠭᠠᠯᠵᠨ ᠡᠰᠬᠡᠳᠡᠭ ᠬᠠᠶᠢᠴᠢ ᠤᠷᠠᠯᠠᠵᠤ ᠤᠶᠤᠳᠠᠭ ᠵᠡᠬᠦᠥ ᠤᠨᠠᠭᠠᠵᠤ ᠨᠠᠭᠠᠳᠠᠭ ᠢᠯᠤᠤᠷ ᠤᠳᠠᠰᠤ ᠬᠤᠸᠠᠷ ᠤᠨ ᠪᠥᠥᠷᠡᠯᠵᠢ ᠨᠠᠷᠢᠨ ᠶᠠᠭᠤᠮᠠᠰ ᠬᠢᠳᠡᠭ ᠨᠠᠢᠮᠠᠨ ᠥᠨᠴᠥᠭᠳᠥ ᠬᠠᠶᠢᠷᠴᠠᠭ ᠢ ᠴᠢᠨᠢ ᠵᠡᠬᠦᠨ ᠠᠪᠳᠠᠷ᠎ᠠ ᠲᠡᠬᠡᠷᠡᠬᠢ ᠶᠢ ᠵᠥᠢ ᠡᠷᠡᠮᠪᠡ ᠪᠠᠷ ᠨᠢ ᠮᠢᠯᠢᠶᠡᠮᠤ᠃ ᠵᠤᠵᠠᠭᠠᠨ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤᠷ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠬᠤᠰᠤ ᠮᠤᠳᠤᠨ ᠪᠥᠳᠥᠴᠡ ᠲᠠᠢ ᠬᠤᠶᠠᠷ ᠢᠵᠢᠯ ᠨᠡᠬᠡᠬᠡᠯᠬᠡᠢ ᠲᠠᠢ ᠬᠤᠷᠢᠶᠠᠵᠤ ᠬᠠᠳᠠᠭᠠᠯᠠᠬᠤ ᠪᠠᠭᠳᠠᠭᠠᠮᠵᠢ ᠲᠠᠢ ᠬᠤᠷᠭᠤ ᠶᠢ ᠴᠢᠨᠢ ᠮᠢᠯᠢᠶᠠᠮᠤ᠃ ᠠᠩᠬᠢ ᠨᠠᠢᠮᠠᠨ ᠥᠨᠴᠥᠭ ᠲᠠᠢ ᠠᠷᠪᠠᠨ ᠵᠢᠷᠭᠤᠭᠠᠨ ᠢᠯᠠᠤ ᠲᠠᠢ ᠠᠭᠠᠷᠤ ᠰᠠᠭᠤᠯᠭ᠎ᠠ ᠶᠢᠨ ᠲᠠᠯᠪᠢᠭᠤᠷ ᠡᠷᠬᠢᠬᠦᠯᠬᠡ ᠶᠢ ᠴᠢᠨᠢ ᠮᠢᠯᠢᠶᠠᠮᠤ᠃ ᠡᠩ ᠥᠬᠡᠢ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤᠷ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠤᠳᠤᠮᠳᠤ ᠬᠥᠮᠥᠨ ᠢᠶᠠᠷ ᠡᠰᠬᠡᠬᠦᠯᠥᠭᠰᠡᠨ ᠤᠷᠠᠨ ᠬᠥᠮᠥᠨ ᠢᠶᠠᠷ ᠰᠢᠷᠡᠬᠦᠯᠥᠭᠰᠡᠨ ᠡᠪ ᠲᠠᠢ ᠬᠥᠮᠥᠨ ᠢᠶᠠᠷ ᠡᠰᠬᠡᠬᠦᠯᠥᠭᠰᠡᠨ ᠡᠷᠳᠡᠮ ᠲᠠᠢ ᠬᠥᠮᠥᠨ ᠢᠶᠠᠷ ᠱᠢᠷᠳᠡᠬᠦᠯᠥᠭᠰᠡᠨ ᠰᠢᠨᠵᠢᠵᠤ ᠬᠠᠷᠠᠬᠤ ᠳᠤ ᠰᠠᠶᠢᠬᠠᠨ ᠬᠡᠳ ᠰᠢᠷᠡᠬᠡᠰᠥ ᠤᠭᠠᠯᠵᠨ ᠭᠠᠷᠭᠠᠭᠰᠠᠨ ᠠᠵᠢᠭᠯᠠᠵᠤ ᠬᠠᠷᠠᠬᠤ ᠳᠤ ᠰᠠᠶᠢᠬᠠᠨ ᠬᠡᠳ ᠠᠷᠠᠭ᠎ᠠ ᠬᠠᠮᠪᠤ ᠶᠢ ᠬᠠᠳᠬᠤᠭᠤᠯᠤᠭᠰᠠᠨ ᠤᠯᠤᠰ ᠢ ᠥᠵᠡᠬᠦ ᠳᠤ ᠰᠠᠶᠢᠬᠠᠨ ᠬᠡᠳ ᠤᠭᠠᠯᠵᠨ ᠤᠳᠠᠰᠤ ᠰᠥᠯᠵᠢᠬᠦᠯᠥᠭᠰᠡᠨ ᠤᠷᠳᠤ ᠴᠠᠭᠠᠨ ᠲᠤᠭᠤᠷᠢᠭᠤᠯᠭᠠᠨ ᠤ ᠠᠭᠤᠯᠵᠠᠷ ᠲᠡᠬᠡᠷ᠎ᠡ ᠨᠢ ᠮᠢᠯᠢᠶᠡᠮᠤ᠃ ᠮᠠᠨ ᠤ ᠳᠤ ᠪᠠᠶᠢᠪᠠᠯ ᠤᠩᠭᠠᠰᠤ ᠮᠠᠨᠵᠤ ᠳᠤ ᠪᠠᠶᠢᠪᠠᠯ ᠬᠢᠪᠢᠰ ᠲᠠᠷᠭᠤᠨ ᠬᠤᠨᠢᠨ ᠤ ᠨᠤᠤᠰᠤ ᠲᠠᠪᠤᠯᠠᠭ ᠪᠤᠯᠤᠨ ᠮᠠᠶᠥᠶᠢᠰ ᠶᠢ ᠴᠢᠨᠢ ᠲᠠᠭᠠᠷᠠᠭᠤᠯᠵᠤ ᠪᠥᠬᠦᠨ ᠢ ᠮᠢᠯᠢᠶᠠᠮᠤ᠃ ᠲᠠᠪᠠᠳᠠᠢ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠲᠥᠷᠥ ᠶᠢᠨ ᠲᠥᠷᠪᠡᠨ ᠤᠴᠤᠭ ᠲᠠᠢ  ᠲᠥᠬᠦᠷᠢᠭ ᠭᠤᠷᠪᠠᠨ ᠴᠠᠭᠠᠷᠢᠭ ᠲᠠᠢ ᠲᠥᠰᠢᠬᠦ ᠲᠥᠷᠪᠡᠨ ᠰᠢᠬᠢᠷ᠎ᠡ ᠲᠠᠢ  ᠲᠡᠮᠥᠷ ᠪᠡᠭᠡ ᠬᠠᠳᠠᠭᠠᠷ ᠲᠠᠢ ᠭᠠᠩ ᠡᠷᠳᠡᠨᠢ ᠲᠤᠯᠭ᠎ᠠ  ᠭᠠᠯ ᠭᠤᠯᠤᠮᠳᠠ ᠶᠢ ᠴᠢᠨᠢ ᠮᠢᠯᠠᠭᠠᠮᠤ︕ ᠪᠠᠯᠪᠠ ᠶᠢᠨ ᠲᠠᠷᠬᠠᠨ ᠪᠠᠯᠪᠠᠵᠤ ᠬᠢᠭᠰᠡᠨ ᠪᠠᠰᠠ ᠨᠢᠬᠡ ᠲᠠᠷᠬᠠᠨ ᠲᠠᠪᠳᠠᠵᠤ ᠬᠢᠭᠰᠡᠨ ᠬᠠᠶᠢᠴᠢ ᠲᠡᠮᠥᠷ ᠶᠢ ᠴᠢᠨᠢ ᠮᠢᠯᠠᠭᠠᠮᠤ  ᠬᠠᠮᠤᠭ ᠶᠡᠭᠡ ᠪᠤᠶᠠᠨ ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ ᠠᠷᠴᠠ ᠽᠠᠨᠳᠠᠨ ᠮᠤᠳᠤ ᠪᠠᠷ ᠨᠢ  ᠠᠶᠢᠷᠠᠭ ᠤᠨ ᠭᠠᠩ ᠢ ᠨᠢ ᠬᠢᠭᠰᠡᠨ ᠪᠡᠭᠡ ᠴᠠᠷᠠᠰᠤᠨ ᠮᠤᠳᠤ ᠪᠠᠷ ᠨᠢ ᠪᠥᠯᠢᠬᠦᠷ ᠢ ᠨᠢ ᠵᠠᠰᠠᠵᠤ ᠬᠢᠭᠰᠡᠨ ᠠᠪᠤ ᠡᠵᠢ ᠬᠥᠷᠥᠩᠬᠡᠯᠡᠭᠰᠡᠨ ᠠᠶᠢᠷᠠᠭ ᠢ ᠴᠢᠨᠢ ᠮᠢᠯᠠᠭᠠᠮᠤ︕ ᠠᠰᠤᠷᠤ ᠶᠡᠭᠡ ᠪᠤᠶᠠᠨ ᠬᠡᠰᠢᠭ  ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ ᠲᠠᠯᠠᠢ ᠡᠵᠢ ᠶᠢᠨ ᠬᠡᠰᠢᠭ  ᠲᠠᠪᠤᠰᠤ ᠬᠤᠵᠢᠷ ᠤᠨ ᠲᠠᠭᠠᠷᠴᠤᠭ ᠠᠶᠠᠭ᠎ᠠ ᠱᠠᠭᠠᠵᠠᠩ ᠰᠠᠪᠬ᠎ᠠ ᠲᠠᠢ  ᠠᠮᠠᠪᠠᠨ ᠭᠠᠮᠵᠢᠩ ᠪᠤᠤᠳᠤᠤ ᠲᠠᠢ ᠠᠯᠤᠬ᠎ᠠ ᠰᠥᠬᠡ ᠪᠠᠷᠢᠭᠤᠯ ᠲᠠᠢ  ᠠᠮᠤ ᠪᠤᠳᠠᠭ᠎ᠠ ᠬᠡᠤᠳᠡᠢ ᠲᠠᠢ ᠲᠡᠯᠪᠡ ᠲᠤᠭᠤᠭ᠎ᠠ ᠬᠠᠪᠬᠠᠭᠠᠰᠤ ᠲᠠᠢ  ᠲᠡᠪᠤᠷ᠎ᠡ ᠬᠤᠤ ᠨᠢ ᠲᠠᠭᠯᠠᠭ᠎ᠠ ᠲᠠᠢ ᠳ᠋ᠧᠩ ᠤᠨ ᠲᠠᠩᠬᠠᠨ ᠨᠢ ᠬᠠᠳᠬᠤᠭᠤᠷ ᠲᠠᠢ ᠲᠡᠷᠡᠰᠤᠨ ᠱᠥᠬᠦᠷ ᠨᠢ ᠪᠤᠭᠤᠯᠳᠠ ᠲᠠᠢ  ᠲᠡᠭᠰᠢ ᠪᠥᠷᠢᠨ ᠮᠢᠯᠠᠭᠠᠮᠤ ᠲᠡᠯᠬᠡᠷ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕ ᠬᠤᠪᠢᠩ ᠲᠠᠢ ᠲᠤᠰᠤ ᠬᠤᠸᠠᠨᠵᠢ ᠲᠠᠢ ᠬᠤᠷᠤᠳ ᠪᠤᠳᠤᠩ ᠲᠠᠢ ᠠᠴᠠ ᠠᠷᠢᠬᠢ ᠪᠤᠷᠳᠤᠭᠤ ᠲᠠᠢ ᠠᠴᠠ ᠴᠠᠢ ᠲᠠᠭᠤ ᠲᠠᠢ ᠡᠴᠠ‌ᠬᠤᠭᠤᠷ ᠴᠤᠤᠳᠠᠢ ᠠᠴᠠ ᠯᠢᠩᠪᠦ ᠥᠷᠥᠨ ᠲᠤᠭᠯᠠᠬᠤ ᠰᠢᠳᠠᠷ᠎ᠠ ᠤᠷᠬᠢᠨ ᠨᠠᠭᠠᠳᠬᠤ ᠱᠠᠭ᠎ᠠ ᠵᠢᠰᠥ ᠥᠵᠡᠬᠦ ᠲᠤᠯᠢ ᠵᠡᠬᠦᠵᠥ ᠶᠠᠪᠤᠬᠤ ᠰᠢᠯ ᠱᠥᠬᠦᠷ ᠰᠠᠮ᠂ ᠰᠢᠳᠥᠨ ᠤ ᠤᠸ᠎ᠠ ᠪᠢᠷ ᠴᠠᠭᠠᠰᠤ ᠪᠢᠴᠢᠭ ᠤᠨ ᠬᠡᠷᠡᠭᠰᠡᠯ ᠡᠷ᠎ᠡ ᠶᠢᠨ ᠵᠤᠳᠤᠭ ᠡᠪ ᠤᠨ ᠴᠠᠪᠠᠤ ᠲᠥᠩᠫᠧᠩ ᠰᠠᠪᠠ ᠲᠥᠷᠥᠬᠡ ᠰᠠᠭᠤᠯᠭ᠎ᠠ ᠲᠤᠭᠤᠭᠠᠨ ᠱᠥᠬᠦᠷ ᠲᠤᠭᠤᠰᠤᠨ ᠤ ᠬᠥᠪᠢᠬᠦᠷ ᠤᠨᠢᠰᠤ ᠲᠥᠯᠬᠢᠬᠦᠷ ᠤᠰᠤᠨ ᠲᠠᠮᠵᠢᠭᠤᠷ ᠤᠭᠤᠷ ᠮᠠᠨᠴᠤ ᠤᠳᠤᠭᠠᠨ ᠤ ᠪᠠᠷᠢᠭᠤᠯ ᠠᠷᠤᠭ ᠰᠠᠪᠠᠷ᠂ ᠠᠴᠨ ᠪᠤᠯᠭᠠᠷᠢ ᠬᠥᠷᠵᠨ ᠵᠡᠬᠡᠳᠥᠥ᠂ ᠬᠢᠷᠥᠬᠡ ᠤᠭᠤᠯᠢ ᠮᠤᠷᠢᠨ ᠤ ᠮᠠᠭᠠᠵᠢᠭᠤᠷ ᠮᠤᠤᠷ ᠤᠨ ᠢᠳᠡᠬᠦᠷ ᠭᠠᠳᠠᠨ᠎ᠠ ᠪᠠᠶᠢᠬᠤ ᠭᠠᠷᠵᠢ ᠶᠢᠨ ᠲᠠᠪᠰᠢ ᠥᠯᠡᠳᠡᠬᠡᠯ ᠥᠬᠡᠢ ᠪᠥᠬᠦᠨ ᠢ ᠮᠢᠯᠢᠶᠡᠮᠤ᠃ ᠥᠯᠵᠡᠢ ᠲᠠᠢ ᠶᠡᠭᠡ ᠪᠤᠶᠠᠨ ᠬᠡᠰᠢᠭ ᠡᠨᠡ ᠬᠡᠷ ᠲᠤᠷ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︕    
 
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠳᠠᠶᠢᠨ
ᠬᠦᠬᠡ ᠲᠡᠭᠷᠢ ᠶᠢᠨ ᠠᠯᠲᠠᠨ ᠲᠡᠪᠰᠢ
ᠨᠠᠶᠢᠷᠠᠭᠴᠢ ᠪᠤᠶᠠᠨᠪᠠᠲᠤ ᠬᠢᠭᠡᠳ ᠮᠣᠩᠭᠤᠯ ᠤᠨ ᠢᠷᠠᠭᠤ ᠨᠠᠶᠢᠷᠠᠭ
ᠨᠠᠶᠢᠷᠠᠭᠴᠢ ᠪᠤᠶᠠᠨᠪᠠᠲᠤ ᠶᠢᠨ ᠰᠢᠯᠦᠭ ᠬᠢᠭᠡᠳ ︽ᠪᠢ︾᠎ ᠶᠢᠨ ᠤᠬᠠᠮᠰᠠᠷ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号