ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠰᠢᠨ᠎ᠡ ᠬᠦᠳᠡᠭᠡ
ᠾᠦᠩᠨᠦ ᠶᠢᠨ 日逐 ᠭᠡᠳᠡᠭ ᠨᠡᠷ᠎ᠡ ᠦᠭᠡ ᠶᠢ ᠲᠠᠬᠢᠨ ᠰᠡᠳᠦᠪᠯᠡᠨ ᠦᠬᠦᠯᠡᠬᠦ ᠨᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/10/20
ᠣᠣᠬᠠᠨ · ᠬᠠᠭᠳᠠ 日逐 ︵ᠿᠢ ᠵᠦ᠋︶ ᠭᠡᠳᠡᠭ ᠾᠦᠩᠨᠦ ᠦᠭᠡ ᠶᠢ ᠵᠣᠬᠢᠶᠠᠭᠴᠢ ᠠᠴᠠ ︽ᠢᠯᠳᠦᠨ︾ ︵Ildun︶ ᠭᠡᠳᠡᠭ ᠮᠣᠩᠭᠤᠯ ᠦᠭᠡ ᠭᠡᠵᠦ ᠲᠠᠶᠢᠯᠪᠣᠷᠢᠯᠠᠵᠣ ᠦᠩᠭᠡᠷᠡᠭᠰᠡᠨ ᠶᠣᠮ᠃ ᠲᠡᠭᠡᠪᠡᠯ ᠢᠯᠳᠦᠨ ᠴᠣᠬᠤᠮ ᠶᠠᠮᠠᠷ ᠣᠳᠬ᠎ᠠ ᠲᠠᠢ ᠦᠭᠡ ᠪᠣᠢ︖ ᠡᠭᠦᠨ ᠢ ᠲᠣᠣᠯᠢ ︽ᠵᠢᠩᠭᠠᠷ︾ ᠢ ᠣᠩᠰᠢᠭᠰᠠᠨ ᠬᠦᠮᠦᠰ ᠯᠠᠪ ᠲᠣᠲᠣᠷᠬᠠᠢ ᠶᠣᠮ᠃ ᠪᠣᠳᠠᠳᠠᠢ ᠶᠠᠷᠢᠪᠠᠯ ︽ᠵᠢᠩᠭᠠᠷ︾ ᠲᠤ ᠭᠠᠷᠳᠠᠭ ᠪᠠᠭᠠᠳᠣᠷᠴᠣᠳ ᠢ ᠶᠡᠭᠡ ᠲᠦᠯᠦᠪ ᠭᠤᠷᠪᠠᠨ ᠲᠡᠰ ᠬᠤᠪᠢᠶᠠᠨ᠎ᠠ᠃ ᠨᠢᠭᠡᠳᠦᠭᠡᠷ ᠲᠡᠰ ᠲᠤ ᠵᠢᠬᠰᠠᠭᠠᠭᠳᠠᠭᠰᠠᠨ ᠭᠤᠣᠯ ᠪᠠᠭᠠᠳᠣᠷᠴᠣᠳ ᠪᠣᠯ ᠨᠡᠷ᠎ᠡ ᠲᠠᠢ ᠣᠪᠣᠭ ᠲᠠᠢ᠂ ᠬᠤᠴᠢ ᠲᠠᠢ ᠴᠣᠯᠠ ᠲᠠᠢ ᠮᠦᠷᠳᠡᠭᠡᠨ᠂ ᠣᠨᠣᠭᠰᠠᠨ ᠮᠣᠷᠢ ᠡᠮᠦᠰᠦᠭᠰᠡᠨ ᠬᠤᠶᠠᠭ ᠲᠣᠭᠤᠯᠭ᠎ᠠ᠂ ᠠᠭᠠᠰᠢ ᠵᠠᠩ᠂ ᠠᠳᠬᠤᠭᠰᠠᠨ ᠵᠡᠪᠰᠡᠭ ᠬᠦᠷᠳᠡᠯ᠎ᠡ ᠨᠠᠷᠢᠨ ᠲᠣᠲᠣᠷᠬᠠᠢ ᠲᠦᠷᠰᠦᠯᠡᠨ ᠦᠭᠦᠯᠡᠭᠰᠡᠨ ᠪᠠᠶᠢᠳᠠᠭ᠃ ᠲᠡᠭᠡᠭᠡᠳ ᠲᠡᠳᠡ ᠵᠦᠪᠬᠡᠨ ᠠᠷᠠᠭ ᠣᠯᠠᠭᠠᠨ ᠬᠤᠩᠭᠤᠷ ᠮᠡᠳᠦ ᠶᠢᠨ ᠠᠷᠪᠠᠭᠠᠳᠬᠠᠨ ᠬᠦᠮᠦᠰ ᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠮᠦᠷᠳᠡᠭᠡᠨ ᠲᠡᠳᠡᠨᠡᠷ ᠲᠤ ᠶᠡᠷᠦᠩᠬᠡᠢ ᠨᠡᠷᠡᠶᠢᠳᠦᠯ ᠭᠡᠵᠦ ᠪᠠᠶᠢᠬᠤ ᠦᠭᠡᠢ ᠶᠣᠮ᠃ ᠬᠤᠶᠠᠳᠣᠭᠠᠷ ᠲᠡᠰ ᠲᠤ ᠵᠢᠬᠰᠠᠭᠠᠭᠳᠠᠬᠤ ᠪᠠᠭᠠᠳᠣᠷᠴᠣᠳ ᠤᠨ ᠶᠡᠷᠦᠩᠬᠡᠢ ᠨᠡᠷᠡᠶᠢᠳᠦᠯ  ᠨᠢ ︽ᠪᠣᠳᠣᠩ︾ ᠭᠡᠵᠦ᠂ ᠬᠡ ᠵᠢᠯᠠᠭᠠᠨ ᠮᠡᠳᠦ ᠴᠦᠬᠡᠨ ᠨᠢᠭᠡ ᠬᠤᠶᠠᠷᠬᠠᠨ ᠬᠦᠮᠦᠨ ᠳᠤᠨᠢ ᠣᠪᠣᠭ ᠨᠡᠷ᠎ᠡ ᠲᠠᠢ ᠪᠠᠶᠢᠬᠤ ᠳᠤ᠂ ᠪᠣᠰᠣᠳ ᠶᠡᠬᠡᠩᠬᠢ ᠨᠢ ᠪᠦᠷ ᠣᠪᠣᠭ ᠨᠡᠷ᠎ᠡ ᠴᠦ ᠦᠭᠡᠢ᠂ ᠵᠦᠪᠬᠡᠨ ᠭᠤᠷᠪᠠᠨ ᠵᠠᠭᠤᠨ ᠪᠣᠳᠣᠩ᠂ ᠨᠠᠢᠮᠠᠨ ᠮᠢᠩᠭᠠᠨ ᠪᠣᠳᠣᠩ ᠭᠡᠳᠡᠭ ᠶᠡᠷᠦᠩᠬᠡᠢ ᠲᠤᠭ᠎ᠠ ᠯᠠ ᠪᠠᠶᠢᠳᠠᠭ᠃ ᠭᠤᠷᠪᠠᠳᠣᠭᠠᠷ ᠲᠡᠰ ᠲᠤ ᠵᠢᠬᠰᠠᠭᠠᠭᠳᠠᠬᠤ ᠪᠠᠭᠠᠳᠣᠷᠴᠣᠳ ᠤᠨ ᠶᠡᠷᠦᠩᠬᠡᠢ ᠨᠡᠷᠡᠶᠢᠳᠦᠯ ᠨᠢ ᠢᠯᠳᠣᠨ ᠭᠡᠳᠡᠭ᠂ ᠲᠡᠳᠡᠨᠡᠷ ᠤᠨ ᠬᠤᠪᠢ ᠬᠦᠮᠦᠨ ᠳᠤ ᠶᠡᠷᠦ ᠨᠢ ᠣᠪᠣᠭ ᠨᠡᠷ᠎ᠡ ᠴᠦ ᠦᠭᠡᠢ ᠶᠡᠷᠦᠩᠬᠡᠢ ᠲᠤᠭ᠎ᠠ ᠴᠦ ᠦᠭᠡᠢ᠂ ᠵᠦᠪᠬᠡᠨ ᠨᠢᠭᠡᠳᠦᠭᠡᠷ ᠲᠡᠰ ᠤᠨ ᠪᠠᠭᠠᠳᠣᠷᠴᠣᠳ ᠲᠠᠶᠢᠨ  ᠳᠤ ᠮᠣᠷᠳᠠᠬᠤ ᠦᠶ᠎ᠡ ᠳᠤ᠂ ᠲᠡᠳᠡᠨᠡᠷ ᠤᠨ ᠪᠠᠭᠠᠳᠣᠷ ᠬᠦᠴᠦ ᠪᠠᠷᠳᠠᠮ ᠵᠣᠷᠢᠭ ᠢ ᠮᠠᠭᠳᠠᠬᠤ ᠡᠭᠦᠳᠡᠨ ᠠᠴᠠ ᠬᠡᠨ ᠬᠡᠨ ᠵᠦᠪᠬᠡᠨ ᠠᠷᠪᠠᠨ ᠲᠠᠪᠣᠨ ᠢᠯᠳᠦᠨ ᠲᠠᠭᠠᠭᠤᠯᠵᠣ ᠮᠣᠷᠳᠠᠨ ᠭᠠᠷᠣᠯ᠎ᠠ ᠭᠡᠬᠦ ᠪᠣᠶᠣ ᠬᠤᠷᠢᠬᠠᠨ ᠢᠯᠳᠦᠨ ᠲᠠᠭᠠᠭᠤᠯᠣᠨ ᠲᠠᠶᠢᠨ ᠳᠤ ᠮᠣᠷᠳᠠᠯ᠎ᠠ ᠭᠡᠵᠦ ᠦᠬᠦᠯᠡᠳᠡᠭ ᠶᠣᠮ᠃ ᠡᠨᠡᠬᠦ ᠢᠯᠳᠦᠨ ᠪᠣᠯ ᠲᠠᠷᠣᠢ ᠵᠣᠬᠢᠶᠠᠭᠴᠢ ᠶᠢᠨ ᠰᠣᠳᠣᠯᠣᠭᠰᠠᠨ  ᠢᠶᠠᠷ ᠾᠦᠩᠨᠦ ᠶᠢᠨ ᠲᠡᠣᠬᠡᠨ ᠳᠤ ᠭᠠᠷᠳᠠᠭ ᠿᠢ ᠵᠦ᠋ ᠪᠣᠯᠣᠨ᠎ᠠ᠃ ᠢᠯᠳᠦᠨ ᠭᠡᠳᠡᠭ ᠦᠭᠡ ᠲᠣᠣᠯᠢ ᠵᠢᠩᠭᠠᠷ ᠲᠤ ᠮᠦᠨ ︽ᠢᠯᠳᠦᠨ︾ ᠬᠡᠪ ᠢᠶᠠᠷ ᠪᠠᠶᠢᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠲᠣᠣᠷ᠎ᠠ ᠲᠡᠰ ᠤᠨ ᠴᠡᠷᠢᠭ ᠤᠨ ᠨᠣᠶᠠᠳ ᠢ ᠵᠢᠭᠠᠭᠰᠠᠨ ᠨᠢ ᠮᠠᠰᠢ ᠲᠣᠲᠣᠷᠬᠠᠢ ᠬᠠᠷᠠᠭᠳᠠᠵᠣ ᠪᠠᠶᠢᠭ᠎ᠠ᠃ ᠭᠡᠪᠡᠴᠦ ᠢᠯᠳᠣᠨ ᠭᠡᠳᠡᠭ ᠦᠭᠡ ᠠᠷᠪᠠᠨ ᠲᠠᠪᠣᠳᠣᠭᠠᠷ ᠵᠠᠭᠤᠨ ᠤ ᠨᠡᠶᠢᠳᠡ ᠮᠣᠩᠭᠤᠯ ᠬᠡᠯᠡᠨ ᠳᠤ ᠨᠢᠭᠡᠨᠳᠡ ︽ᠢᠯᠳᠡᠩ︾ ᠪᠣᠯᠣᠭᠠᠳ ᠪᠠᠶᠢᠵᠠᠢ᠃ ᠲᠡᠭᠡᠭᠡᠳ ᠣᠳᠬ᠎ᠠ ᠨᠢ ᠵᠢᠭᠠᠬᠠᠨ ᠰᠢᠯᠵᠢᠵᠦ᠂ ᠢᠯᠳᠡᠩ ᠭᠡᠳᠡᠭ ᠨᠢ ᠲᠠᠶᠢᠴᠢᠩ᠂ ᠣᠶᠢᠵᠢᠩ᠂ ᠢᠯᠳᠡᠩ ᠭᠡᠵᠦ ᠪᠦᠷ ᠴᠡᠷᠢᠭ ᠪᠠᠭᠠᠳᠣᠷ ᠤᠨ ᠬᠡᠷᠭᠢᠮ ᠴᠣᠯᠠ ᠪᠣᠯᠵᠣ ᠬᠤᠪᠢᠷᠠᠵᠠᠢ᠃ ᠡᠬᠦᠨ ᠢ ︽ᠮᠣᠩᠭᠤᠯ ᠬᠡᠯᠡᠨ ᠤ ᠶᠡᠭᠡ ᠲᠠᠶᠢᠯᠪᠣᠷᠢ ᠳᠣᠯᠢ︾ ᠳᠤ ᠲᠠᠶᠢᠯᠪᠣᠷᠢᠯᠠᠵᠣ ᠪᠠᠶᠢᠭ᠎ᠠ ᠪᠠᠶᠢᠳᠠᠯ ᠢ ᠲᠣᠪᠴᠢᠯᠠᠨ ᠦᠬᠦᠯᠡᠪᠡᠯ ᠲᠣᠣᠷᠠᠬᠢ ᠮᠡᠳᠦ ᠭᠤᠷᠪᠠᠨ ᠵᠦᠢᠯ ᠤᠨ ᠠᠭᠤᠯᠭ᠎ᠠ  ᠲᠠᠢ ᠪᠠᠶᠢᠭ᠎ᠠ᠄ ᠨᠢᠭᠡ илдэн Хэргэм цол. ︵ᠢᠯᠳᠡᠩ ᠬᠡᠷᠬᠡᠮ ᠴᠣᠯᠠ︶᠃ ᠬᠤᠶᠠᠷ илдэн арт ︵ардаа илд мэт чандартай нэг төрлийн бөднө шувуу. ᠢᠯᠳᠡᠩ ᠠᠷᠲᠣ ᠠᠷᠣ ᠳᠠᠭᠠᠨ ᠢᠯᠳᠦ ᠮᠡᠳᠦ ᠠᠷ ᠲᠠᠢ ︵ᠴᠠᠩᠳᠠᠷᠳᠠᠢ︶ ᠢᠭᠡ ᠲᠦᠷᠦᠯ ᠤᠨ ᠪᠦᠳᠦᠨ᠎ᠡ ᠰᠢᠪᠠᠭᠤ︶ ᠃ ᠭᠤᠷᠪᠠ илдэн нохой ︵нэгэн зүйлийн гөрөөс. ᠢᠯᠳᠡᠩ ᠨᠣᠬᠠᠢ ᠨᠢᠭᠡ ᠵᠦᠢᠯ ᠤᠨ ᠭᠦᠷᠦᠭᠡᠰᠦ︶ ᠭᠡᠵᠡᠢ᠃ 日逐 ᠭᠡᠳᠡᠭ ᠾᠦᠩᠨᠦ ᠦᠭᠡ ᠶᠢ ᠬᠢᠳᠠᠳ ᠳᠣᠯᠢ ᠪᠢᠴᠢᠭ ᠨᠦᠭᠦᠳ ᠢᠶᠠᠷ ᠲᠠᠶᠢᠯᠪᠣᠷᠢᠯᠠᠵᠣ ᠪᠠᠶᠢᠭ᠎ᠠ ᠪᠠᠶᠢᠳᠠᠯ ᠶᠡᠭᠡ ᠲᠦᠯᠦᠪ ᠲᠣᠣᠷᠠᠬᠢ ᠮᠡᠳᠦ᠄ ᠣᠳᠣ ᠦᠶ᠎ᠡ ᠶᠢᠨ ᠬᠢᠳᠠᠳ ᠦᠰᠦᠭ ᠤᠨ ᠯᠠᠲ᠋ᠢᠨ ᠭᠠᠯᠢᠭ ᠨᠢ rì zhú ︵ᠿᠢ ᠵᠦ᠋︶ ᠭᠡᠵᠦ ᠣᠩᠰᠢᠨ᠂ ᠡᠷᠳᠡᠨ ᠤ ᠾᠦᠩᠨᠦ ᠬᠦᠮᠦᠨ ᠤ ᠸᠠᠩ ᠤᠨ ᠬᠡᠷᠭᠢᠮ ᠴᠣᠯᠠ ᠮᠦᠨ ᠭᠡᠵᠦ ᠲᠠᠶᠢᠯᠪᠣᠷᠢᠯᠠᠵᠠᠢ᠃ ᠣᠳᠣ ᠦᠵᠡᠪᠡᠯ ᠡᠨᠡᠬᠦ ᠲᠠᠶᠢᠯᠪᠣᠷᠢ ᠭᠦᠢᠴᠡᠳ ᠪᠣᠯᠵᠣ ᠴᠢᠳᠠᠭᠰᠠᠨ ᠦᠭᠡᠢ᠃ ᠣᠴᠢᠷ ᠨᠢ ᠾᠦᠩᠨᠦ ᠬᠡᠯᠡᠨ ᠳᠤ 日逐王 ︵ᠿᠢ ᠵᠦ᠋ ᠸᠠᠩ︶ ᠭᠡᠪᠡᠯ ᠰᠠᠶ᠋ᠢ ᠾᠦᠩᠨᠦ ᠬᠠᠭᠠᠳ ᠤᠨ ᠭᠦᠪᠡᠭᠦᠳ ᠲᠡᠭᠦᠦᠨᠡᠷ ᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠬᠠᠨ ᠬᠦᠪᠡᠭᠦᠳ ︵ᠸᠠᠩ︶ ᠤᠨ ᠬᠡᠷᠭᠢᠮ ᠵᠡᠷᠭᠡ ᠶᠢᠨ ᠨᠡᠷᠡᠶᠢᠳᠦᠯ ᠪᠣᠯᠣᠨ᠎ᠠ᠃ ᠬᠡᠷᠪᠡ ᠵᠦᠪᠬᠡᠨ 日逐 ︵ᠿᠢ ᠵᠦ᠋︶ ᠭᠡᠪᠡᠯ ᠬᠠᠷᠢᠨ ᠪᠣᠰᠣᠳ ᠣᠪᠣᠭᠳᠠᠨ ᠤ ᠢᠵᠠᠭᠤᠷᠳᠠᠨ ᠨᠡᠷ ᠠᠴᠠ ᠪᠦᠷᠢᠯᠳᠦᠭᠰᠡᠨ ᠾᠦᠩᠨᠦ ᠲᠦᠷᠦ ᠶᠢᠨ ᠰᠠᠶᠢᠳ ᠳᠦᠰᠢᠮᠡᠳ ᠤᠨ ᠵᠡᠷᠭᠡ ᠲᠣᠰᠢᠶᠠᠯ ᠤᠨ ᠨᠡᠷ᠎ᠡ ᠪᠣᠯᠣᠨ᠎ᠠ᠃ ᠲᠡᠭᠡᠭᠡᠳ ᠸᠠᠩ ᠨᠡᠷ ᠨᠢ ᠪᠠᠰᠠ ᠲᠦᠪ ᠤᠨ ᠪᠠ ᠣᠷᠣᠨ ᠨᠣᠳᠤᠭ ᠲᠤ ᠠᠵᠢᠯᠯᠠᠳᠠᠭ ᠸᠠᠩ ᠭᠡᠵᠦ ᠣᠯᠠᠨ ᠠᠷᠪᠢᠨ ᠲᠠᠰ ᠬᠤᠪᠢᠶᠠᠳᠠᠭ ᠪᠠᠶᠢᠭ᠎ᠠ᠃ ᠮᠠᠨ ᠤ ᠠᠳᠡ ᠶᠠᠷᠢᠯᠴᠠᠬᠤ ᠭᠡᠵᠦ ᠪᠠᠶᠢᠭ᠎ᠠ ᠿᠢ ᠵᠦ᠋ ᠸᠠᠩ ᠨᠢ ᠬᠡᠳᠦᠶᠢᠪᠡᠷ ︽ᠲᠦᠷᠦ  ᠶᠢᠨ ᠲᠦᠷᠪᠡᠨ ᠲᠣᠯᠭᠠᠭᠤᠷᠢ︾ ︵国之四角︶ ᠳᠤ ᠪᠠᠭᠳᠠᠬᠤ ᠦᠭᠡᠢ ᠪᠣᠯᠪᠠᠴᠣ᠂ ᠮᠦᠨ ᠪᠠᠰᠠ ︽ᠲᠦᠷᠦ ᠶᠢᠨ ᠵᠢᠷᠭᠤᠭᠠᠨ ᠵᠣᠪᠬᠢᠰ︾ ︵国之六角︶ ᠢ ᠡᠵᠡᠮᠳᠡᠭᠰᠡᠨ ᠡᠷᠬᠡᠳᠡᠨ ᠬᠡᠷᠭᠢᠮᠳᠡᠨ ᠪᠠᠶᠢᠵᠠᠢ᠃ ᠲᠦᠷᠦ ᠶᠢᠨ ᠲᠦᠷᠪᠡᠨ ᠲᠣᠯᠭᠠᠭᠤᠷᠢ ᠨᠡᠷ ᠪᠣᠯ ᠬᠤᠶᠢᠨ᠎ᠠ ᠬᠤᠶᠢᠨ᠎ᠠ ᠠᠴᠠ ᠪᠠᠨ ᠲᠡᠰ ᠲᠠᠷᠠᠭᠠᠯᠠᠨ ᠡᠵᠡᠨ ᠬᠠᠭᠠᠨ ᠤ ᠡᠷᠳᠡᠨᠢ ᠶᠢᠨ ᠰᠠᠭᠤᠷᠢᠨ ᠢ ᠡᠵᠡᠯᠡᠬᠦ ᠬᠢᠷᠢ ᠬᠡᠮ ᠲᠠᠢ ᠬᠦᠮᠦᠰ ᠮᠦᠷᠳᠡᠭᠡᠨ ᠣᠯᠣᠰ ᠭᠡᠷ ᠤᠨ ᠬᠦᠨᠳᠦ ᠴᠢᠬᠤᠯᠠ ᠦᠢᠯᠡ ᠬᠡᠷᠡᠭ ᠢ ᠰᠢᠢᠳᠬᠦ ᠡᠷᠬᠡᠳᠦ ᠬᠡᠷᠭᠢᠮᠳᠡᠳ ᠪᠠᠶᠢᠬᠤ ᠳᠤ᠂ ᠲᠦᠷᠦ ᠶᠢᠨ ᠵᠢᠷᠭᠤᠭᠠᠨ ᠲᠣᠯᠭᠠᠭᠤᠷᠢ ᠨᠢ ᠬᠠᠷᠢᠨ ᠵᠦᠪᠬᠡᠨ ᠬᠠᠷᠢ ᠭᠠᠳᠠᠭᠠᠳᠣ ᠠᠶᠢᠮᠠᠭ ᠪᠦᠯᠦᠭ ᠢᠶᠠᠨ ᠵᠠᠰᠠᠨ ᠵᠠᠬᠢᠷᠬᠤ ᠣᠷᠣᠨ ᠨᠣᠳᠤᠭ ᠤᠨ ᠬᠠᠭᠠᠨ ᠢᠵᠠᠭᠤᠷᠳᠠᠨ ᠤ ᠬᠡᠷᠬᠢᠮᠳᠡᠳ ᠪᠠᠶᠢᠭᠰᠠᠨ ᠠᠵᠠᠢ᠂ ᠲᠣᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠬᠢᠳᠠᠳ ᠲᠦᠷᠦ ᠶᠢᠨ ᠲᠣᠭᠳᠠᠯᠴᠠᠭ᠎ᠠ ᠲᠠᠢ ᠠᠳᠠᠯᠢᠳᠬᠠᠪᠠᠯ ᠮᠣᠵᠢ ᠶᠢᠨ ᠡᠵᠡᠳ ᠲᠠᠢ ᠲᠡᠩᠴᠡᠭᠦ᠂ ᠢᠵᠠᠭᠤᠷᠳᠠᠨ ᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠨᠣᠶᠠᠳ ᠳᠣᠰᠢᠶᠠᠯᠳᠠᠨ ᠪᠣᠯᠣᠨ᠎ᠠ᠃ ᠶᠠᠭ ᠡᠶᠢᠮᠦ ᠠᠴᠠ ︽ᠬᠠᠨ ᠣᠯᠣᠰ ᠤᠨ ᠪᠢᠴᠢᠭ︾ ᠪᠣᠶᠣ ︽ᠬᠤᠶᠢᠳᠣ ᠬᠠᠨ ᠣᠯᠣᠰ ᠤᠨ ᠪᠢᠴᠢᠭ︾  ᠲᠤ ᠿᠢ ᠵᠦ᠋ ᠸᠠᠩ ᠪᠣᠯ ᠾᠦᠩᠨᠦ ᠶᠢᠨ ᠨᠢᠭᠡᠨ ᠲᠣᠣᠷᠠᠳᠣ ᠲᠡᠰ ᠤᠨ ᠸᠠᠩ ᠤᠨ ᠬᠡᠷᠭᠢᠮ ᠪᠣᠯᠣᠨ᠎ᠠ ᠭᠡᠵᠦ ᠦᠬᠦᠯᠡᠭᠰᠡᠨ ᠶᠣᠮ᠃ ᠪᠣᠳᠠᠳᠣ ᠵᠢᠱᠢᠶ᠎ᠡ ᠪᠠᠷ ᠶᠠᠷᠢᠪᠠᠯ᠂ ᠬᠠᠨ ᠣᠯᠣᠰ ᠲᠤ ᠪᠠᠭᠤᠵᠣ ᠦᠭᠭᠦᠭᠡᠳ ︽ᠡᠮᠦᠨᠡᠳᠦ ᠾᠦᠩᠨᠦ︾ ᠪᠣᠯᠣᠭᠰᠠᠨ ᠢᠥᠢ ᠵᠢᠶᠠᠨ ᠿᠢ ᠵᠦ᠋ ᠸᠠᠩ ᠬᠡᠷᠬᠢᠮ ᠲᠠᠢ ᠪᠢᠢ ︵比︶ ᠭᠡᠳᠡᠭ ᠭᠠᠭᠴᠠ ᠬᠢᠳᠠᠳ ᠦᠰᠦᠭ ᠤᠨ ᠨᠡᠷ᠎ᠡ ᠪᠠᠨ ᠲᠡᠣᠬᠡᠨ ᠳᠤ ᠦᠯᠡᠳᠡᠭᠡᠭᠰᠡᠨ ᠾᠦᠩᠨᠦ ᠢᠵᠠᠭᠤᠷᠳᠠᠨ ᠪᠣᠯ ᠲᠠᠷᠣᠢ ᠾᠦᠩᠨᠦ ᠶᠢᠨ ᠡᠮᠦᠨᠡᠳᠦ ᠬᠡᠰᠡᠭ ᠤᠨ ᠠᠶᠢᠮᠠᠭ ᠪᠦᠯᠦᠭ ᠪᠣᠯᠣᠨ ᠡᠣ ᠬᠤᠸᠠᠨ ᠠᠶᠢᠮᠠᠭ ᠢ ᠵᠠᠬᠢᠷᠴᠣ ᠪᠠᠶᠢᠭᠰᠠᠨ ᠿᠢ ᠵᠦ᠋ ᠸᠠᠩ ᠪᠣᠯᠬᠤ ᠶᠣᠮ᠃ 日逐 ᠬᠤᠶᠠᠷ ᠦᠰᠦᠭ ᠤᠨ ᠬᠢᠳᠠᠳ ᠬᠡᠯᠡᠨ ᠳᠠᠬᠢ ᠡᠷᠳᠡᠨ ᠡᠳᠦᠬᠡ ᠶᠢᠨ ᠠᠪᠢᠶ᠎ᠠ ᠠᠶᠠᠯᠭᠤ᠄ 日 ᠦᠰᠦᠭ᠄ ⑴日 ᠦᠰᠦᠭ ᠤᠨ ᠣᠳᠣ ᠦᠶ᠎ᠡ ᠶᠢᠨ ᠯᠠᠲ᠋ᠢᠨ ᠭᠠᠯᠢᠭ᠄ rì ︵ᠿᠢ︶᠃ ⑵日 ᠦᠰᠦᠭ ᠤᠨ ᠬᠢᠳᠠᠳ ︽ᠣᠯᠣᠰ ᠤᠨ ᠬᠡᠯᠡᠨ ᠤ ᠦᠭᠡᠰ ᠤᠨ ᠲᠣᠯᠢ︾ ᠲᠠᠬᠢ ᠣᠳᠬ᠎ᠠ ᠶᠢᠨ ᠲᠠᠶᠢᠯᠪᠣᠷᠢ᠄ 日 ᠦᠰᠦᠭ ᠪᠣᠯ ᠬᠢᠳᠠᠳ ᠬᠡᠯᠡᠨ ᠳᠤ ᠨᠠᠷᠠ ᠪᠣᠯᠣᠨ ᠡᠳᠦᠷ ᠢ ᠪᠦᠷ 日 ᠭᠡᠳᠡᠭ᠂ ᠪᠠᠰᠠ ᠲᠣᠰᠬᠠᠶᠢᠯᠠᠨ ᠶᠠᠫᠣᠨ ᠣᠯᠣᠰ ᠢ ᠵᠢᠭᠠᠨ᠎ᠠ ᠭᠡᠪᠡ᠃ ᠪᠠᠰᠠ ᠵᠠᠷᠢᠮ ᠴᠦᠬᠡᠨ ᠲᠣᠬᠢᠶᠠᠯᠳᠣᠯ ᠳᠤ ᠡᠨᠡᠬᠦ ᠦᠰᠦᠭ ᠢ ᠮᠢ ᠬᠡᠮᠡᠨ ᠣᠩᠰᠢᠵᠣ᠂ ᠬᠦᠮᠦᠨ ᠤ ᠨᠡᠷ᠎ᠡ ᠳᠤ ᠬᠡᠷᠡᠭᠯᠡᠨ᠎ᠡ᠂ ᠵᠢᠱᠢᠶᠡᠯᠡᠪᠡᠯ ᠶᠢᠨ ᠮᠢ ᠳ᠋ᠢ ︵金日磾︶ ᠭᠡᠳᠡᠭ ᠬᠦᠮᠦᠨ ᠤ ᠨᠡᠷ᠎ᠡ ᠳᠤ ᠡᠨᠡᠬᠦ ᠦᠰᠦᠭ ᠢ ᠮᠢ ᠭᠡᠵᠦ ᠣᠩᠰᠢᠨ᠎ᠠ ᠭᠡᠵᠡᠢ᠃ ⑶日 ᠦᠰᠦᠭ ᠤᠨ ᠲᠡᠭᠡᠳᠦ ᠡᠷᠳᠡᠨ ᠤ ᠠᠪᠢᠶ᠎ᠠ ᠠᠶᠠᠯᠭᠤ᠄ njig ᠭᠡᠵᠦ ᠭᠠᠭᠴᠠ ᠣᠩᠰᠢᠯᠭ᠎ᠠ ᠶᠢ ᠰᠡᠷᠭᠦᠭᠡᠵᠡᠢ᠃ ᠬᠡᠷᠪᠡ ᠬᠢᠳᠠᠳ ᠬᠡᠯᠡᠨ ᠤ ᠨᠣᠳᠤᠭ ᠤᠨ ᠠᠪᠢᠶᠠᠨ ᠠᠴᠠ ᠦᠵᠡᠪᠡᠯ ᠡᠨᠡᠬᠦ 日 ᠦᠰᠦᠭ ᠤᠨ ᠲᠡᠭᠡᠳᠦ ᠡᠷᠳᠡᠨ ᠤ ᠠᠪᠢᠶ᠎ᠠ ᠳᠤ ᠠᠳᠠᠭ ᠨᠢ ᠬᠡᠳᠦᠨ ᠠᠷᠪᠠᠨ ᠵᠦᠢᠯ ᠤᠨ ᠠᠪᠢᠶᠠᠯᠠᠯᠭ᠎ᠠ ᠪᠠᠶᠢᠳᠠᠭ ᠶᠣᠮ᠃ ᠶᠠᠭ ᠡᠶᠢᠮᠦ ᠠᠴᠠ ︽ᠦᠰᠦᠭ ᠪᠢᠴᠢᠭ ᠤᠨ ᠲᠠᠶᠢᠯᠪᠣᠷᠢ︾ ᠲᠣᠯᠢ ᠳᠤ ᠲᠡᠭᠦᠨ ᠤ ᠠᠪᠢᠶᠠᠨ ᠤ ᠲᠣᠬᠠᠢ ᠶᠠᠭᠤ ᠴᠦ ᠬᠡᠯᠡᠭᠰᠡᠨ ᠦᠭᠡᠢ᠂ ᠵᠦᠪᠬᠡᠨ ᠣᠳᠬ᠎ᠠ ᠶᠢ ᠨᠢ ᠲᠠᠶᠢᠯᠪᠣᠷᠢᠯᠠᠰᠠᠨ ᠠᠵᠠᠢ᠃ ⑷日 ᠦᠰᠦᠭ ᠤᠨ ᠴᠢᠨ ᠣᠯᠣᠰ ᠠᠴᠠ ᠡᠮᠦᠨᠡᠬᠢ ᠠᠪᠢᠶ᠎ᠠ ᠠᠶᠠᠯᠭᠤ᠄ ȵi̯ĕt᠂ njiet ᠵᠡᠷᠭᠡ ᠪᠠᠷ ᠰᠡᠷᠭᠦᠭᠡᠵᠡᠢ᠃ ⑸日 ᠦᠰᠦᠭ ᠤᠨ ᠬᠠᠨ ᠣᠯᠣᠰ ᠤᠨ ᠦᠶ᠎ᠡ ᠶᠢᠨ ᠲᠣᠯᠢ ᠪᠢᠴᠢᠭ ︽ᠦᠰᠦᠭ ᠪᠢᠴᠢᠭ ᠤᠨ ᠲᠠᠶᠢᠯᠪᠣᠷᠢ︾  ᠳᠠᠬᠢ ᠠᠪᠢᠶ᠎ᠠ ᠠᠶᠠᠯᠭᠤ : ᠲᠣᠰ ᠳᠣᠯᠢ ᠳᠤ ᠲᠡᠭᠦᠨ ᠤ ᠠᠪᠢᠶ᠎ᠠ ᠠᠶᠠᠯᠭᠤ ᠶᠢ ᠲᠠᠶᠢᠯᠪᠣᠷᠢᠯᠠᠭᠰᠠᠨ ᠦᠭᠡᠢ᠂ ᠵᠦᠪᠬᠡᠨ ᠣᠳᠬ᠎ᠠ ᠶᠢ ᠨᠢ ᠲᠠᠶᠢᠯᠪᠣᠷᠢᠯᠠᠵᠠᠢ᠃ ⑹日 ᠦᠰᠦᠭ ᠤᠨ ᠲᠠᠩ ᠶᠦᠨ ᠭᠤᠸᠠᠩ ᠶᠦᠨ᠂ ᠵᠢᠢ ᠶᠦᠨ᠂ ᠶᠦᠨ ᠾᠦᠢ᠂ ᠵᠧᠩ ᠶᠦᠨ ᠵᠡᠷᠭᠡ ᠲᠣᠯᠢ ᠪᠢᠴᠢᠭ ᠳᠠᠬᠢ ᠠᠪᠢᠶ᠎ᠠ ᠠᠶᠠᠯᠭᠤ᠄ ᠲᠠᠩ ᠶᠦᠨ ᠪᠣᠯᠣᠨ ᠵᠧᠩ ᠶᠦᠨ ᠳᠤ ᠪᠣᠯ 人質切 ᠭᠡᠵᠦ᠂ ᠵᠢᠢ ᠶᠦᠨ ᠪᠣᠯᠣᠨ ᠶᠦᠨ ᠾᠦᠢ ᠳᠤ 入質切 ᠭᠡᠪᠡ᠃ ᠪᠠᠰᠠ ᠵᠶᠢᠢ ᠶᠦ᠋ᠨ ᠳᠤ 而力切 ᠭᠡᠪᠡ᠃ ⑺日 ᠦᠰᠦᠭ ᠤᠨ ᠲᠠᠩ ᠣᠯᠣᠰ ᠤᠨ ᠦᠶ᠎ᠡ ᠶᠢᠨ ᠠᠪᠢᠶ᠎ᠠ ᠨᠢ᠄ *njit ᠭᠡᠵᠡᠢ᠃ ⑻日 ᠦᠰᠦᠭ ᠤᠨ ᠶᠠᠫᠣᠨ ᠬᠡᠯᠡᠨ ᠳᠠᠬᠢ ᠣᠩᠰᠢᠯᠭ᠎ᠠ᠄ [にち] [nichi] ᠭᠡᠪᠡ᠃ にち ᠪᠣᠯ ᠲᠠᠷᠣᠢ 日 ᠦᠰᠦᠭ ᠤᠨ ᠲᠣᠮᠳᠠᠳᠣ ᠡᠷᠳᠡᠨ ᠤ ᠠᠪᠢᠶ᠎ᠠ ᠪᠣᠯᠬᠤ *njit ᠤᠨ ᠶᠠᠫᠣᠨ ᠬᠡᠯᠡᠨ ᠳᠠᠬᠢ ᠠᠪᠢᠶᠠᠯᠠᠪᠣᠷᠢ （音読） ᠪᠣᠯᠣᠨ᠎ᠠ᠃ ⑼日 ᠦᠰᠦᠭ ᠤᠨ ᠺᠣᠷᠢᠶ᠎ᠠ ᠬᠡᠯᠡᠨ ᠳᠠᠬᠢ ᠣᠩᠰᠢᠯᠭ᠎ᠠ᠄ IL ︵ᠢᠯ︶ ᠭᠡᠪᠡ᠃ IL ᠭᠡᠳᠡᠭ ᠨᠢ ᠵᠣᠬᠢᠶᠠᠭᠴᠢ  ᠶᠢᠨ ᠦᠵᠡᠬᠦ ᠪᠠᠷ ᠦᠨᠡᠨᠳᠡᠭᠡᠨ ᠲᠣᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠣᠮᠠᠷᠠᠳᠣ ᠬᠢᠳᠠᠳ ᠤᠨ ᠨᠢᠭᠡ ᠬᠡᠰᠡᠭ ᠨᠣᠳᠤᠭ ᠤᠨ ᠠᠪᠢᠶ᠎ᠠ ᠶᠢ ᠲᠦᠯᠦᠭᠡᠯᠡᠵᠦ ᠪᠠᠶᠢᠨ᠎ᠠ᠃ ᠡᠳᠦᠬᠡ ᠪᠣᠯᠳᠠᠯ᠎ᠠ ᠱᠠᠨᠳᠦᠩ ᠾᠧᠪᠸᠢ ᠵᠢᠴᠢ ᠱᠠᠨᠳᠦᠩ ᠾᠧᠪᠸᠢ ᠠᠴᠠ ᠨᠡᠭᠦᠳᠡᠯᠯᠡᠨ ᠢᠷᠡᠭᠰᠡᠨ ᠵᠡᠭᠦᠨ ᠬᠤᠶᠢᠳᠦ ᠶᠢᠨ ᠭᠤᠷᠪᠠᠨ ᠮᠣᠵᠢ ᠶᠢᠨ ᠬᠢᠳᠠᠳᠴᠣᠳ ᠪᠣᠯ ᠲᠣᠰ ᠦᠭᠡ ᠶᠢ ᠮᠦᠨ ᠶᠢ ︵yì︶ ᠭᠡᠵᠦ ᠣᠩᠰᠢᠭᠰᠠᠭᠠᠷ ᠪᠠᠶᠢᠭ᠎ᠠ ᠶᠣᠮ᠃ ᠣᠨᠴᠠᠭᠠᠶᠢᠯᠠᠨ ᠯᠢᠶᠥᠥᠶᠠᠩ ᠣᠷᠴᠢᠮ ᠤᠨ ᠨᠣᠳᠤᠭ ᠤᠨ ᠬᠡᠯᠡᠨ  ᠳᠤ ᠨᠡᠩ ᠢᠯᠡᠷᠬᠡᠢ ᠪᠠᠶᠢᠳᠠᠭ᠃ ᠡᠭᠦᠨ ᠠᠴᠠ ᠦᠵᠡᠪᠡᠯ ᠲᠡᠭᠡᠳᠦ ᠡᠷᠳᠡ ᠦᠶ᠎ᠡ ᠶᠢᠨ ᠣᠮᠠᠷᠠᠳᠣ ᠬᠢᠳᠠᠳ ᠲᠤ ᠲᠣᠰ ᠦᠰᠦᠭ ᠢ IL ︵ᠢᠯ︶ ᠭᠡᠵᠦ ᠣᠩᠰᠢᠵᠣ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠠᠭᠠᠵᠢᠮ ᠢᠶᠠᠷ ᠬᠤᠪᠢᠷᠠᠵᠣ yì ᠪᠣᠯᠣᠭᠰᠠᠨ ᠪᠣᠯᠣᠯᠴᠠᠭ᠎ᠠ ᠲᠠᠢ᠂ ᠶᠠᠭ ᠡᠶᠢᠮᠦ ᠠᠴᠠ ᠲᠡᠭᠡᠷ᠎ᠡ ᠲᠣᠷᠠᠳᠣᠭᠰᠠᠨ ᠨᠣᠳᠤᠭ ᠤᠨ ᠨᠠᠰᠣ ᠶᠠᠪᠣᠭᠰᠠᠨ ᠬᠦᠮᠦᠰ ᠤᠦᠰᠦᠭ  ᠢ ᠮᠦᠨ yì ᠭᠡᠵᠦ ᠠᠪᠢᠶᠠᠯᠠᠭᠰᠠᠭᠠᠷ ᠪᠠᠶᠢᠭ᠎ᠠ᠃ ᠬᠡᠯᠡᠯᠭᠡᠨ ᠦᠭᠡᠢ ᠣᠳᠣ ᠶᠢᠨ ᠵᠠᠯᠠᠭᠤᠴᠣᠳ ᠪᠣᠯ ᠨᠡᠶᠢᠳᠡ ᠶᠢᠨ ᠬᠡᠷᠡᠭᠯᠡᠭᠡᠨ ᠳᠤ ᠪᠦᠷ rì ︵ᠿᠢ︶ ᠭᠡᠵᠦ ᠠᠪᠢᠶᠠᠯᠠᠬᠤ ᠪᠣᠯᠵᠠᠢ᠃ ⑽日 ᠦᠰᠦᠭ ᠤᠨ ᠸᠢᠶᠧᠲᠨᠠᠮ ᠬᠡᠯᠡᠨ ᠳᠠᠬᠢ ᠣᠩᠰᠢᠯᠭ᠎ᠠ᠄ nhật ᠭᠡᠪᠡ᠃ nhật ᠭᠡᠳᠡᠭ ᠨᠢ ᠲᠣᠰ ᠦᠭᠡᠨ ᠤ ᠡᠮᠦᠨᠡᠳᠦ ᠬᠢᠳᠠᠳ ᠤᠨ ᠨᠣᠳᠤᠭ ᠤᠨ ᠠᠪᠢᠶ᠎ᠠ ᠠᠶᠠᠯᠭᠤ ᠶᠢ ᠲᠦᠯᠦᠭᠡᠯᠡᠵᠦ ᠪᠠᠶᠢᠬ᠎ᠠ᠃ ⑾日 ᠦᠰᠦᠭ ᠤᠨ ᠬᠢᠳᠠᠳ ᠤᠨ ᠲᠣᠲᠣᠭᠠᠳᠣ ᠭᠠᠳᠠᠭᠠᠳᠣ ᠶᠢᠨ ᠬᠢᠳᠠᠳᠴᠢ ᠡᠷᠳᠡᠮᠳᠡᠳ ᠤᠨ ᠰᠡᠷᠭᠦᠭᠡᠭᠰᠡᠨ ᠲᠣᠮᠳᠠᠳᠣ ᠡᠷᠳᠡᠨ ᠤ ᠠᠪᠢᠶ᠎ᠠ ᠠᠶᠠᠯᠭᠤ᠄ ȵʑi̯ĕt᠂ ȵʑĭĕt᠂ ȵiĕt᠂ ȵʑjet᠂ ȵiɪt᠂ ȵit ᠵᠡᠷᠭᠡ ᠪᠠᠷ ᠰᠡᠷᠭᠦᠭᠡᠵᠡᠢ᠃ ᠲᠡᠭᠡᠷᠡᠬᠢ ᠡᠳᠡᠭᠡᠷ ᠣᠩᠰᠢᠯᠭ᠎ᠠ ᠨᠢ ᠦᠨᠡᠨᠳᠡᠭᠡᠨ ᠪᠦᠷ ᠲᠠᠩ ᠣᠯᠣᠰ  ᠤᠨ ᠦᠶ᠎ᠡ ᠶᠢᠨ ᠣᠩᠰᠢᠯᠭ᠎ᠠ *njit ᠲᠠᠢ ᠣᠶᠢᠷᠠᠯᠴᠠᠭ᠎ᠠ ᠪᠠᠶᠢᠭ᠎ᠠ ᠨᠢ ᠢᠯᠡᠬᠡᠨ ᠪᠠᠶᠢᠨ᠎ᠠ᠃ ⑿日 ᠦᠰᠦᠭ ᠤᠨ ᠮᠣᠩᠭᠤᠯ ᠫᠠᠭᠰᠪᠠ ᠦᠰᠦᠭ ᠳᠠᠬᠢ ᠣᠩᠰᠢᠯᠭ᠎ᠠ᠄ ꡔꡞ ︵ri︶ ᠭᠡᠪᠡ᠃ ⒀日 ᠦᠰᠦᠭ ᠤᠨ ᠬᠢᠳᠠᠳ ᠬᠡᠯᠡᠨ ᠤ ᠣᠯᠠᠨ ᠨᠣᠳᠤᠭ ᠤᠨ ᠠᠪᠢᠶᠠᠨ ᠳᠠᠬᠢ ᠠᠪᠢᠶ᠎ᠠ᠄ ᠺᠧ ᠵᠢᠶᠠ ᠬᠡᠯᠡᠨ ᠳᠤ ȵit᠂ ŋit᠂ git᠂ niʔ᠂ lie ᠵᠡᠷᠭᠡ ᠪᠠᠶᠢᠵᠣ᠂ ᠶᠣᠸᠠᠢ ᠬᠡᠯᠡᠨ ᠳᠤ 0iɐt᠂ jɐt᠂ ȵɐt᠂ jat᠂ kɐk᠂ jɐk᠂ ŋiɐt᠂ ᵑgæt᠂ jiʔ ᠪᠣᠯᠣᠨ iək ᠵᠡᠷᠭᠡ ᠪᠠᠶᠢᠵᠣ᠂ ᠮᠢᠨᠨᠠᠨ ᠬᠡᠯᠡᠨ ᠳᠤ lit᠂ dzit᠂ zik᠂ zil᠂ nik᠂ ŋ i᠂ m/ni ᠪᠣᠯᠣᠨ l/tsiʔ ᠪᠠ t/tsiʔ ᠵᠡᠷᠭᠡ ᠪᠠᠶᠢᠵᠣ᠂ ᠡᠣ ᠬᠡᠯᠡᠨ  ᠳᠤ d/ɲaʔ/iʔ ᠵᠡᠷᠭᠡ ᠣᠨᠴᠠᠭᠠᠢ ᠠᠪᠢᠶ᠎ᠠ ᠴᠦ ᠪᠠᠶᠢᠳᠠᠭ ᠠᠵᠠᠢ᠃ ᠪᠣᠰᠣᠳ ᠢ ᠨᠢ ᠲᠣᠪᠴᠢᠯᠠᠪᠠ᠃ ⒁日 ᠦᠰᠦᠭ ᠤᠨ ︽ᠬᠢᠳᠠᠳ ᠬᠡᠯᠡᠨ ᠤ ᠨᠣᠳᠤᠭ ᠤᠨ ᠠᠪᠢᠶᠠᠨ ᠤ ᠲᠣᠯᠢ︾ ᠳᠠᠬᠢ ᠠᠪᠢᠶ᠎ᠠ᠄ ᠭᠤᠸᠠᠩ ᠶᠦᠨ ᠠᠪᠢᠶᠠᠨ ᠳᠤ [nit]᠂ ᠮᠮᠢᠨᠨᠠᠨ ᠬᠡᠯᠡᠨ ᠳᠤ [lit8]᠂ ᠭᠤᠸᠠᠩ ᠵᠸᠥ ᠬᠡᠯᠡᠨ ᠳᠤ [jat6]᠂ ᠴᠣᠣᠵᠸᠥ ᠬᠡᠯᠡᠨ  ᠳᠤ [rig8]᠂ ᠺᠧ ᠵᠢᠶᠠ ᠬᠡᠯᠡᠨ ᠳᠤ [ngit5]᠂ ᠸᠧᠢᠲᠸᠥ ᠬᠡᠯᠡᠨ ᠳᠤ [yäk6] ᠭᠡᠵᠡᠢ᠃ ⒂日 ᠦᠰᠦᠭ ᠤᠨ ᠡᠷᠳᠡᠨ ᠤ ᠠᠪᠢᠶᠠᠨ ᠤ ᠬᠢᠨᠠᠨ ᠲᠣᠭᠳᠠᠭᠠᠯᠳᠠ᠄ 日 ᠦᠰᠦᠭ ᠪᠣᠯ ᠬᠢᠳᠠᠳ ᠬᠡᠯᠡᠨ ᠳᠤ ᠲᠦᠭᠡᠮᠡᠯ ᠬᠡᠷᠡᠭᠯᠡᠭᠳᠡᠬᠦ ᠦᠭᠡ ᠪᠣᠯᠬᠤᠷ ᠡᠯ᠎ᠡ ᠨᠣᠳᠤᠭ ᠤᠨ ᠠᠶᠠᠯᠭᠤᠨ ᠳᠤ ᠵᠦᠢᠯ ᠵᠢᠰᠣᠮ ᠤᠨ ᠠᠪᠢᠶ᠎ᠠ ᠠᠶᠠᠯᠭᠤ ᠪᠠᠶᠢᠳᠠᠭ ᠠᠵᠠᠢ᠃ ᠲᠡᠭᠡᠷᠡᠬᠢ ᠠᠪᠢᠶ᠎ᠠ ᠠᠶᠠᠯᠭᠤ ᠶᠢ ᠬᠤᠷᠢᠶᠠᠩᠭᠤᠶᠢᠯᠠᠪᠠᠯ᠂ ᠾᠦᠩᠨᠦ ᠶᠢᠨ ᠦᠶ᠎ᠡ ᠳᠤ ᠲᠣᠰ ᠦᠰᠦᠭ ᠤᠨ ᠠᠪᠢᠶ᠎ᠠ ᠭᠡᠪᠡᠯ ᠨᠠᠭᠠᠳᠣ ᠵᠠᠬ᠎ᠠ ᠲᠠᠭᠠᠨ ᠠᠷᠪᠠᠨ ᠬᠡᠳᠦ ᠪᠠᠶᠢᠭᠰᠠᠨ ᠲᠦᠯᠦᠪᠳᠡᠢ᠂ ᠪᠣᠳᠠᠳᠠᠢ ᠶᠠᠷᠢᠪᠠᠯ njig᠂ ŋjig ᠂ njit᠂ ljit᠂ dzit᠂ jiʔ᠂ jɐk᠂ mi᠂ miʔ᠂ zik᠂ zil ᠪᠣᠶᠣ mig ᠵᠡᠷᠭᠡ ᠪᠦᠷ ᠪᠠᠶᠢᠵᠣ ᠪᠣᠯᠣᠨ᠎ᠠ᠃ ᠴᠢᠨᠠᠭᠰᠢᠯᠠᠪᠠᠯ rig᠂ yig᠂ lig᠂ nig ᠪᠣᠯᠣᠨ ŋit᠂ git᠂ niʔ ᠵᠡᠷᠭᠡ ᠪᠠᠶᠢᠬᠤ ᠨᠢ ᠡᠩ  ᠤᠨ ᠬᠡᠷᠡᠭ ᠮᠦᠨ᠃ ᠵᠣᠬᠢᠶᠠᠭᠴᠢ ᠶᠢᠨ ᠠᠩᠬᠠᠷᠣᠭᠰᠠᠨ ᠢᠶᠠᠷ 日 ᠦᠰᠦᠭ ᠢ ᠨᠠᠭᠠᠳᠣ ᠵᠠᠬ᠎ᠠ ᠨᠢ ᠾᠦᠩᠨᠦ ᠬᠡᠯᠡᠨ  ᠤ ᠲᠣᠣᠷᠠᠬᠢ ᠮᠡᠳᠦ ᠬᠡᠳᠦᠨ ᠠᠪᠢᠶ᠎ᠠ ᠶᠢ ᠣᠷᠴᠢᠭᠤᠯᠬᠤ ᠳᠤ ᠬᠡᠷᠡᠭᠯᠡᠵᠦ ᠪᠠᠶᠢᠪᠠ᠃ ᠨᠢᠭᠡ ᠢᠯ il᠂ ᠬᠤᠶᠠᠷ ᠢᠭ ig᠂ ᠭᠤᠷᠪᠠ ᠮᠢᠭ mig᠂ ᠲᠣᠮᠳᠠᠳᠣ ᠡᠷᠳᠡᠨ ᠦᠶ᠎ᠡ ᠳᠤ ᠪᠣᠯᠬᠤ ᠳᠤ ᠨᠢᠲ nit, ᠨᠢᠺ nik᠂ ᠯᠢᠺ lik ᠵᠡᠷᠭᠡ  ᠪᠠᠷ ᠴᠦ ᠬᠡᠷᠡᠭᠯᠡᠵᠦ ᠪᠠᠶᠢᠵᠠᠢ᠃ ᠨᠣᠳᠤᠭ ᠤᠨ ᠠᠶᠠᠯᠭᠤᠨ ᠠᠴᠠ ᠦᠵᠡᠪᠡᠯ ᠲᠣᠰ ᠦᠰᠦᠭ ᠤᠨ ᠠᠪᠢᠶᠠᠨ ᠤ ᠰᠡᠬᠦᠯ ︵韵尾︶ ᠨᠢ ᠨᠡᠩ ᠣᠯᠠᠨ ᠪᠠᠶᠢᠭᠰᠠᠨ ᠨᠢ ᠲᠣᠲᠣᠷᠬᠠᠢ᠂ ᠨᠠᠭᠠᠳᠣ ᠵᠠᠬ᠎ᠠ ᠨᠢ t᠂ d᠂ k᠂ g᠂ h᠂ l ᠵᠢᠴᠢ ᠲᠦᠪᠦᠩᠭᠡᠢ ᠶᠢᠨ ᠠᠪᠢᠶ᠎ᠠ ᠪᠣᠯᠬᠤ ʔ ᠵᠡᠷᠭᠡ ᠪᠦᠷ ᠠᠪᠢᠶᠠᠨ ᠰᠡᠬᠦᠯ ᠪᠣᠯᠵᠣ ᠪᠠᠶᠢᠭᠰᠠᠨ ᠶᠣᠮ᠃ ᠣᠨᠴᠠᠭᠠᠶᠢᠯᠠᠨ ᠠᠩᠬᠠᠷᠬᠤ ᠨᠢ R ᠭᠡᠶᠢᠭᠦᠯᠦᠭᠴᠢ ᠪᠠᠷ ᠡᠬᠢᠯᠡᠳᠡᠭ ᠦᠭᠡ ᠶᠢ ᠬᠢᠳᠠᠳ ᠬᠡᠯᠡᠨ ᠳᠤ L᠂ N᠂ Y ᠵᠡᠷᠭᠡ ᠲᠠᠢ ᠰᠡᠯᠬᠦᠴᠡᠨ ᠬᠡᠷᠡᠭᠯᠡᠵᠦ ᠪᠠᠶᠢᠵᠠᠢ᠃ ᠶᠠᠭ ᠮᠠᠨ ᠤ ᠮᠣᠩᠭᠤᠯ ᠬᠡᠯᠡᠨ ᠳᠤ ᠠ ᠬᠠ ᠭᠠ ᠺᠠ ᠵᠡᠷᠭᠡ ᠶᠢ ᠰᠡᠯᠭᠦᠴᠡᠨ ᠬᠡᠷᠡᠭᠯᠡᠬᠦ ᠲᠠᠢ ᠢᠵᠢᠯᠬᠡᠨ ᠦᠵᠡᠭᠳᠡᠯ ᠣᠷᠣᠰᠢᠵᠣ ᠪᠠᠶᠢᠪᠠ᠃ ᠡᠳᠡᠭᠡᠷ ᠢ ᠦᠨᠳᠦᠰᠦᠯᠡᠵᠦ ᠲᠣᠬᠠᠢ ᠶᠢᠨ ᠦᠶ᠎ᠡ ᠳᠤ ᠿᠢ ᠦᠰᠦᠭ ᠢᠶᠠᠷ ᠾᠦᠩᠨᠦ ᠬᠡᠯᠡᠨ ᠤ ᠢᠯ il᠂ ᠢᠭ ig᠂ ᠮᠢᠭ mig ᠵᠡᠷᠭᠡ ᠭᠤᠷᠪᠠᠨ ᠠᠪᠢᠶ᠎ᠠ ᠶᠢ ᠠᠪᠢᠶᠠᠴᠢᠯᠠᠨ ᠣᠷᠴᠢᠭᠤᠯᠬᠤ ᠳᠤ ᠬᠡᠷᠡᠭᠯᠡᠵᠦ ᠪᠠᠶᠢᠪᠠ ᠭᠡᠵᠦ ᠵᠣᠬᠢᠶᠠᠭᠴᠢ ᠠᠴᠠ ᠦᠵᠡᠵᠦ ᠪᠠᠶᠢᠨ᠎ᠠ᠃ ᠲᠣᠰ ᠦᠰᠦᠭ ᠢ ᠢᠯ ᠭᠡᠵᠦ ᠣᠩᠰᠢᠬᠤ ᠶᠢᠨ ᠪᠠᠰᠠ ᠨᠢᠭᠡ ᠬᠠᠵᠠᠭᠤ ᠶᠢᠨ ᠭᠡᠷᠡᠴᠢ ᠭᠡᠪᠡᠯ ᠬᠢᠳᠠᠨ ᠬᠡᠯᠡᠨ ᠳᠤ ᠡᠨᠡᠬᠦ 日 ᠦᠰᠦᠭ ᠢ ᠲᠠᠷᠣᠢ ︽ᠢᠯ︾ ᠭᠡᠵᠦ ᠣᠩᠰᠢᠵᠣ ᠪᠠᠶᠢᠵᠠᠢ᠃ ᠵᠢᠱᠢᠶᠡᠯᠡᠪᠡᠯ ᠬᠠᠮᠤᠭ ᠡᠷᠳᠡ ᠬᠢᠳᠠᠨ ᠤ ᠨᠠᠢᠮᠠᠨ ᠶᠡᠭᠡ ᠠᠶᠢᠮᠠᠭ ᠭᠡᠵᠦ ᠲᠡᠣᠬᠡᠨ ᠳᠤ ᠢᠯᠡᠷᠡᠬᠦ ᠳᠤ ᠲᠡᠭᠦᠨ ᠤ ᠲᠣᠲᠣᠷ᠎ᠠ ᠨᠢᠭᠡ ᠠᠶᠢᠮᠠᠭ ᠨᠢ 日连 ᠭᠡᠳᠡᠭ ᠨᠡᠷ᠎ᠡ ᠲᠠᠢ ᠪᠠᠶᠢᠭᠰᠠᠨ ᠶᠣᠮ᠃ ᠬᠤᠵᠢᠮ ᠣᠳᠠᠯ ᠦᠭᠡᠢ ᠡᠨᠡᠬᠦ ᠨᠡᠷ᠎ᠡ ᠲᠡᠣᠬᠡᠨ ᠠᠴᠠ ᠨᠢᠭᠡᠮᠦᠰᠦᠨ ᠣᠰᠠᠳᠴᠠᠢ᠃ ᠰᠢᠯᠳᠠᠭᠠᠨ  ᠨᠢ ᠲᠣᠰ ᠠᠶᠢᠮᠠᠭ ᠦᠪᠡᠷ ᠤᠨ ᠠᠶᠢᠮᠠᠭ ᠤᠨ ᠨᠡᠷ᠎ᠡ ᠪᠠᠨ ᠠᠪᠢᠶ᠎ᠠ ᠨᠢ ᠨᠡᠩ ᠣᠶᠢᠷᠠᠯᠴᠠᠭ᠎ᠠ ᠬᠢᠳᠠᠳ ᠦᠰᠦᠭ 耶律 ᠶᠢ ᠰᠣᠩᠭᠤᠨ ᠬᠡᠷᠡᠭᠯᠡᠭᠰᠡᠨ ᠠᠴᠠ ᠪᠣᠯᠵᠠᠢ᠃ 日连 ᠭᠡᠪᠡᠯ ᠢᠯ + ᠯᠢᠶᠠᠨ ︵ᠡᠯᠢᠶᠡᠨ ᠤ ᠠᠮᠠᠨ ᠶᠠᠷᠢᠶᠠᠨ ᠤ ᠬᠡᠯᠪᠡᠷᠢ︶ ᠭᠡᠵᠦ᠂ 耶律 ᠭᠡᠪᠡᠯ ᠲᠡᠭᠦᠨ ᠤ ᠣᠯᠠᠨ ᠲᠣᠭᠠᠨ ᠤ ᠬᠡᠯᠪᠡᠷᠢ ᠶᠢ ᠢᠯᠡᠳᠭᠡᠵᠦ ᠪᠠᠶᠢᠭ᠎ᠠ ᠦᠭᠡ ᠪᠣᠯᠬᠤ ᠶᠢᠯᠢᠶᠧᠲ ︵ᠡᠯᠢᠶᠡᠳ︶ ᠪᠣᠯᠣᠨ᠎ᠠ᠃ ᠡᠯᠢᠶᠡᠨ᠂ ᠡᠯᠢᠶᠠᠳ ᠣᠪᠣᠭ ᠣᠳᠣ ᠴᠦ ᠮᠣᠩᠭᠤᠯᠴᠣᠳ ᠲᠣᠲᠣᠷ᠎ᠠ ᠪᠠᠶᠢᠭᠰᠠᠭᠠᠷ ᠶᠣᠮ᠃ 逐 ᠦᠰᠦᠭ᠄ ⑴逐 ᠦᠰᠦᠭ ᠤᠨ ᠣᠳᠣ ᠦᠶ᠎ᠡ ᠶᠢᠨ ᠯᠠᠲ᠋ᠢᠨ ᠭᠠᠯᠢᠭ᠄ zhú ᠭᠡᠵᠡᠢ᠃ ⑵逐 ᠦᠰᠦᠭ ᠤᠨ ᠬᠢᠳᠠᠳ ︽ᠣᠯᠣᠰ ᠤᠨ ᠬᠡᠯᠡᠨ ᠤ ᠦᠭᠡᠰ ᠤᠨ ᠲᠣᠯᠢ︾ ᠲᠠᠬᠢ ᠣᠳᠬ᠎ᠠ ᠶᠢᠨ ᠲᠠᠶᠢᠯᠪᠣᠷᠢ᠄ ᠲᠣᠪᠴᠢᠯᠠᠨ ᠦᠬᠦᠯᠡᠪᠡᠯ ᠲᠣᠣᠷᠠᠬᠢ ᠮᠡᠳᠦ ᠭᠤᠷᠪᠠᠨ ᠵᠦᠢᠯ ᠤᠨ ᠲᠠᠶᠢᠯᠪᠣᠷᠢ ᠲᠠᠢ᠂ ᠨᠢᠭᠡ ᠬᠦᠭᠡᠭᠡᠬᠦ ᠦᠯᠳᠡᠬᠦ᠂ ᠬᠤᠶᠠᠷ ᠲᠡᠰ ᠲᠠᠷᠠᠭᠠᠯᠠᠬᠤ᠂ ᠭᠤᠷᠪᠠ ᠮᠦᠴᠡᠷᠬᠡᠨ ᠲᠡᠮᠡᠴᠡᠯᠳᠦᠬᠦ ᠵᠡᠷᠭᠡ ᠪᠣᠢ᠃ ⑶逐 ᠦᠰᠦᠭ ᠤᠨ ᠲᠡᠭᠡᠳᠦ ᠡᠷᠳᠡᠨ ᠤ ᠠᠪᠢᠶ᠎ᠠ ᠠᠶᠠᠯᠭᠤ᠄ l'ɯwɢ ᠭᠡᠵᠦ ᠰᠡᠷᠭᠦᠭᠡᠵᠡᠢ᠃ ⑷逐 ᠦᠰᠦᠭ ᠤᠨ ᠴᠢᠨ ᠣᠯᠣᠰ ᠠᠴᠠ ᠡᠮᠦᠨᠡᠬᠢ ᠠᠪᠢᠶ᠎ᠠ ᠠᠶᠠᠯᠭᠤ᠄ dǐuk ᠪᠣᠶᠣ dʰjok ᠡᠰᠡᠬᠦᠯ᠎ᠡ drjəkw ᠵᠡᠷᠭᠡ ᠪᠠᠷ ᠰᠡᠷᠭᠦᠭᠡᠵᠡᠢ᠃ ⑸逐 ᠦᠰᠦᠭ ᠤᠨ ᠬᠠᠨ ᠣᠯᠣᠰ ᠤᠨ ᠦᠶ᠎ᠡ ᠶᠢᠨ ᠲᠣᠯᠢ ᠪᠢᠴᠢᠭ ︽ᠦᠰᠦᠭ ᠪᠢᠴᠢᠭ ᠤᠨ ᠲᠠᠶᠢᠯᠪᠣᠷᠢ︾  ᠳᠠᠬᠢ ᠠᠪᠢᠶ᠎ᠠ ᠠᠶᠠᠯᠭᠤ᠄ ᠁ 豚省聲 ᠭᠡᠵᠦ᠂ ᠬᠤᠵᠢᠮ ᠤᠨ ᠬᠦᠮᠦᠰ 直六切 ᠭᠡᠵᠦ ᠬᠡᠷᠴᠢᠨ ᠭᠠᠯᠢᠭᠴᠢᠯᠠᠨ᠎ᠠ ᠭᠡᠪᠡ᠃ ᠱᠠᠨ ᠬᠠᠢ ᠵᠢᠩ ᠪᠢᠴᠢᠭ ᠲᠤ ᠲᠣᠰ ᠦᠰᠦᠭ ᠢ ᠲᠦᠨ ︵豚︶ ᠭᠡᠵᠦ ᠣᠩᠰᠢᠮᠣᠢ ᠭᠡᠵᠡᠢ᠃ ᠲᠡᠭᠦᠨ ᠤ ᠣᠣᠯ ᠦᠭᠡ ᠨᠢ ︽᠁ 苦山，有兽焉，名曰山膏，其状如逐︾ ᠭᠡᠵᠡᠢ᠂ ᠠᠳᠡ ᠡᠨᠡᠬᠦ 逐 ᠦᠰᠦᠭ ᠢ ᠭᠠᠭ᠋ᠠᠢ ᠭᠡᠳᠡᠭ ᠬᠢᠳᠠᠳ ᠦᠰᠦᠭ 豚 ᠲᠠᠢ ᠣᠩᠰᠢᠯᠭ᠎ᠠ ᠣᠳᠭ᠎ᠠ ᠪᠦᠷ ᠠᠳᠠᠯᠢ ᠭᠡᠵᠦ ᠲᠠᠶᠢᠯᠪᠣᠷᠢᠯᠠᠵᠠᠢ᠃ ᠡᠶᠢᠮᠦ ᠠᠴᠠ ᠽᠢ ᠾᠦᠢ ᠪᠦ᠋ ᠭᠡᠳᠡᠭ ᠬᠢᠳᠠᠳ ᠲᠣᠯᠢ ᠪᠢᠴᠢᠭ ᠲᠤ 逐 ᠦᠰᠦᠭ ᠢ ᠪᠠᠰᠠ 豚 ︵ᠲᠦᠨ︶ ᠭᠡᠵᠦ ᠣᠩᠰᠢᠮᠣᠢ᠂ ᠣᠳᠬ᠎ᠠ ᠨᠢ ᠴᠦ 豚 ᠲᠠᠢ ᠨᠢᠭᠡᠨ ᠠᠳᠠᠯᠢ ᠭᠡᠵᠦ ᠲᠠᠶᠢᠯᠪᠣᠷᠢᠯᠠᠵᠠᠢ᠃ ⑹逐 ᠦᠰᠦᠭ ᠤᠨ ᠲᠠᠩ ᠶᠦᠨ ᠭᠤᠸᠠᠩ ᠶᠦᠨ᠂ ᠵᠢᠢ ᠶᠦᠨ᠂ ᠶᠦᠨ ᠾᠦᠢ᠂ ᠵᠧᠩ ᠶᠦᠨ ᠵᠡᠷᠭᠡ ᠲᠣᠯᠢ ᠪᠢᠴᠢᠭ ᠳᠠᠬᠢ ᠠᠪᠢᠶ᠎ᠠ ᠠᠶᠠᠯᠭᠤ᠄ ᠲᠠᠩ ᠶᠦᠨ ᠪᠣᠯᠣᠨ ᠵᠧᠩ ᠶᠦᠨ ᠳᠤ ᠪᠦᠷ 直六切 ᠭᠡᠵᠦ᠂ ᠵᠢᠢ ᠶᠦᠨ ᠪᠣᠯᠣᠨ ᠶᠦᠨ ᠾᠦᠢ ᠳᠤ ᠪᠦᠷ 仲六切 ᠭᠡᠵᠦ ᠬᠡᠷᠴᠢᠨ ᠭᠠᠯᠢᠭᠴᠢᠯᠠᠨ ᠠᠪᠢᠶ᠎ᠠ ᠨᠢ 軸 ᠪᠣᠯᠣᠨ᠎ᠠ ᠭᠡᠵᠡᠢ᠃ ᠪᠠᠰᠠ ᠽᠢ ᠾᠦᠢ ᠪᠦ᠋ ᠲᠣᠯᠢ ᠳᠤ 同門切 ᠭᠡᠵᠦ ᠬᠡᠷᠴᠢᠨ ᠭᠠᠯᠢᠭᠴᠢᠯᠠᠵᠣ 豚 ᠭᠡᠳᠡᠭ ᠦᠰᠦᠭ ᠲᠠᠢ ᠣᠩᠰᠢᠯᠭ᠎ᠠ ᠪᠠ ᠣᠳᠬ᠎ᠠ ᠨᠢ ᠨᠢᠭᠡᠨ ᠠᠳᠠᠯᠢ ᠬᠡᠮᠡᠵᠡᠢ᠃ ᠭᠡᠪᠡᠴᠦ ᠪᠢᠳᠡ ᠠᠩᠬᠠᠷᠬᠤ ᠨᠢ 豚 ᠦᠰᠦᠭ ᠬᠡᠳᠦᠶᠢᠪᠡᠷ ᠣᠳᠣ ᠪᠣᠯ tún ᠭᠡᠵᠦ ᠠᠪᠢᠶᠠᠯᠠᠬᠤ ᠪᠣᠯᠪᠠᠴᠣ᠂ ᠲᠡᠭᠡᠳᠦ ᠡᠷᠳᠡᠨ ᠦᠶ᠎ᠡ᠂ ᠲᠠᠷᠣᠢ ᠾᠦᠩᠨᠦ ᠶᠢᠨ ᠦᠶ᠎ᠡ ᠳᠤ duːn ︵ᠳ᠋ᠦᠨ︶ ᠭᠡᠵᠦ ᠣᠩᠰᠢᠳᠠᠭ ᠪᠠᠶᠢᠵᠠᠢ᠃ ⑺逐 ᠦᠰᠦᠭ ᠤᠨ ᠲᠠᠩ ᠣᠯᠣᠰ ᠤᠨ ᠦᠶ᠎ᠡ ᠶᠢᠨ ᠠᠪᠢᠶ᠎ᠠ ᠨᠢ᠄ *djhiuk ᠭᠡᠪᠡ᠃ ⑻逐 ᠦᠰᠦᠭ ᠤᠨ ᠶᠠᠫᠣᠨ ᠬᠡᠯᠡᠨ ᠳᠠᠬᠢ ᠣᠩᠰᠢᠯᠭ᠎ᠠ᠄ ちく（音読）᠃ ⑼逐 ᠦᠰᠦᠭ ᠤᠨ ᠺᠣᠷᠢᠶ᠎ᠠ ᠬᠡᠯᠡᠨ ᠳᠠᠬᠢ ᠣᠩᠰᠢᠯᠭ᠎ᠠ᠄ CHWUK ᠪᠣᠶᠣ CEK ᠭᠡᠪᠡ᠃ ⑽逐 ᠦᠰᠦᠭ ᠤᠨ ᠸᠢᠶᠧᠲᠨᠠᠮ ᠬᠡᠯᠡᠨ ᠳᠠᠬᠢ ᠣᠩᠰᠢᠯᠭ᠎ᠠ᠄ trục ᠭᠡᠵᠡᠢ᠃ ⑾逐 ᠦᠰᠦᠭ ᠤᠨ ᠬᠢᠳᠠᠳ ᠤᠨ ᠲᠣᠲᠣᠭᠠᠳᠣ ᠭᠠᠳᠠᠭᠠᠳᠣ ᠶᠢᠨ ᠬᠢᠳᠠᠳᠴᠢ ᠡᠷᠳᠡᠮᠳᠡᠳ ᠤᠨ ᠰᠡᠷᠭᠦᠭᠡᠭᠰᠡᠨ ᠲᠣᠮᠳᠠᠳᠣ ᠡᠷᠳᠡᠨ ᠤ ᠠᠪᠢᠶ᠎ᠠ ᠠᠶᠠᠯᠭᠤ᠄ ȡʱi̯uk᠂ ȡĭuk᠂ ɖuwk ᠭᠡᠵᠦ ᠰᠡᠷᠭᠦᠭᠡᠵᠡᠢ᠃ ᠡᠳᠡᠭᠡᠷ ᠠᠪᠢᠶ᠎ᠠ ᠬᠠᠷᠢᠨ ᠲᠣᠰ ᠦᠰᠦᠭ ᠤᠨ ᠲᠠᠩ ᠣᠯᠣᠰ ᠤᠨ ᠦᠶ᠎ᠡ ᠶᠢᠨ ᠠᠪᠢᠶ᠎ᠠ ᠲᠠᠢ ᠣᠶᠢᠷᠠᠯᠴᠠᠭ᠎ᠠ ᠪᠠᠶᠢᠨ᠎ᠠ᠃ ⑿逐 ᠦᠰᠦᠭ ᠤᠨ ᠮᠣᠩᠭᠤᠯ ᠫᠠᠭᠰᠪᠠ ᠦᠰᠦᠭ ᠳᠠᠬᠢ ᠣᠩᠰᠢᠯᠭ᠎ᠠ᠄ ꡅꡦꡟ ᠪᠣᠯᠣᠨ ꡄꡦꡟ ᠭᠡᠵᠦ᠂ ᠡᠮᠦᠨᠡᠬᠢ ᠶᠢ ᠨᠢ tʂʼy ᠭᠡᠵᠦ᠂ ᠬᠤᠶᠢᠨᠠᠬᠢ ᠶᠢ ᠨᠢ dʐy ᠭᠡᠵᠦ ᠣᠯᠠᠨ ᠣᠯᠣᠰ ᠤᠨ ᠭᠠᠯᠢᠭ ᠬᠠᠳᠠᠵᠠᠢ᠃ ⒀逐 ᠦᠰᠦᠭ ᠤᠨ ᠬᠢᠳᠠᠳ ᠬᠡᠯᠡᠨ ᠤ ᠣᠯᠠᠨ ᠨᠣᠳᠤᠭ ᠤᠨ ᠠᠪᠢᠶᠠᠨ ᠳᠠᠬᠢ ᠠᠪᠢᠶ᠎ᠠ᠄ ᠺᠧ ᠵᠢᠶᠠ ᠬᠡᠯᠡᠨ ᠳᠤ tsʰuk᠂ tʃʰuk᠂ tsuk ᠭᠡᠳᠡᠭ᠂ ᠶᠣᠸᠠᠢ ᠬᠡᠯᠡᠨ ᠳᠤ ᠪᠣᠯ ᠺᠧ ᠵᠢᠶᠠ ᠬᠡᠯᠡ ᠲᠠᠢ ᠠᠳᠠᠯᠢ ᠦᠭᠡᠢ ᠲᠠᠯ᠎ᠠ ᠨᠢ ᠡᠬᠢᠨ ᠤ ᠠᠪᠢᠶ᠎ᠠ ᠨᠢ ts ᠪᠠ tʃ ᠪᠠᠷ ᠭᠤᠣᠯᠳᠠᠵᠣ᠂ ᠠᠶᠠᠯᠭᠤ ᠨᠢ uk ᠪᠢᠰᠢ ᠬᠠᠷᠢᠨ ok ᠢᠶᠠᠷ ᠭᠤᠣᠯᠳᠠᠵᠠᠢ᠃ ᠮᠢᠨᠨᠠᠨ ᠬᠡᠯᠡᠨ ᠳᠤ ᠡᠬᠢᠨ ᠤ ᠠᠪᠢᠶ᠎ᠠ ᠨᠢ ᠭᠤᠣᠯᠳᠠᠭᠤ t ︵ᠲᠡᠯᠡᠬᠡᠢ ᠨᠡᠶᠢᠳᠡ ᠶᠢᠨ ᠠᠪᠢᠶᠠᠨ ᠭᠠᠯᠢᠭ ᠪᠣᠯᠬᠤᠷ d ᠪᠠᠷ ᠣᠩᠰᠢᠨ᠎ᠠ︶ ᠪᠠᠷ ᠭᠤᠣᠯᠳᠠᠵᠣ᠂ ᠬᠠᠶ᠎ᠠ ᠵᠠᠷᠢᠮ ᠨᠢ h ᠴᠦ ᠪᠠᠶᠢᠨ᠎ᠠ᠃ ᠬᠠᠷᠢᠨ ᠬᠤᠶᠢᠨᠠᠬᠢ ᠠᠶᠠᠯᠭᠤ ᠨᠢ ᠶᠣᠸᠠᠢ ᠬᠡᠯᠡ ᠲᠠᠢ ᠠᠳᠠᠯᠢᠪᠳᠣᠷ ᠠᠵᠠᠢ᠃ ⒁逐 ᠦᠰᠦᠭ ᠤᠨ ︽ᠬᠢᠳᠠᠳ ᠬᠡᠯᠡᠨ ᠤ ᠨᠣᠳᠤᠭ ᠤᠨ ᠠᠪᠢᠶᠠᠨ ᠤ ᠲᠣᠯᠢ︾ ᠳᠠᠬᠢ ᠠᠪᠢᠶ᠎ᠠ᠄ ᠭᠤᠸᠠᠩ ᠶᠦᠨ ᠠᠶᠠᠯᠭᠤ ᠳᠤ [driuk]᠂ ᠮᠢᠨᠨᠠᠨ ᠬᠡᠯᠡᠨ ᠳᠤ [dak8] ᠪᠣᠯᠣᠨ [diok8]᠂ ᠭᠤᠸᠠᠩᠵᠸᠥ ᠬᠡᠯᠡᠨ ᠳᠤ [zuk6]᠂ ᠴᠣᠣᠵᠸᠥ ᠬᠡᠯᠡᠨ ᠳᠤ [dog8]᠂ ᠺᠧ ᠵᠢᠶᠠ ᠬᠡᠯᠡᠨ ᠳᠤ [cuk6]᠂ ᠸᠧᠢᠲᠸᠥ ᠬᠡᠯᠡᠨ ᠳᠤ [zuk6] ᠭᠡᠵᠡᠢ᠃ ⒂逐 ᠦᠰᠦᠭ ᠤᠨ ᠡᠷᠳᠡᠨ ᠤ ᠠᠪᠢᠶᠠᠨ ᠤ ᠬᠢᠨᠠᠨ ᠲᠣᠭᠳᠠᠭᠠᠯᠳᠠ᠄ 逐 ᠦᠰᠦᠭ ᠤᠨ ᠡᠷᠳᠡᠨ ᠤ ᠠᠪᠢᠶ᠎ᠠ ᠣᠨᠴᠠ ᠪᠣᠳᠣᠯᠢᠶᠠᠨ ᠲᠠᠢ ᠪᠢᠰᠢ᠂ ᠲᠡᠭᠡᠳᠦ ᠡᠷᠳᠡᠨ ᠤ ᠦᠶ᠎ᠡ ᠳᠤ duːn ᠭᠡᠵᠦ᠂ ᠲᠣᠮᠳᠠᠳᠣ ᠡᠷᠳᠡᠨ ᠤ ᠦᠶ᠎ᠡ  ᠳᠤ *djhiuk ᠪᠣᠯᠵᠣ᠂ ᠶᠣᠸᠠᠨ ᠣᠯᠣᠰ ᠤᠨ ᠦᠶ᠎ᠡ ᠳᠤ ᠨᠢᠭᠡᠨᠳᠡ ꡅꡦꡟ ︵tʂʼy︶ ᠪᠣᠯᠣᠨ ꡄꡦꡟ ︵dʐy︶ ᠪᠣᠯᠵᠠᠢ᠃ ᠡᠶᠢᠮᠦ ᠠᠴᠠ ᠠᠳᠡ ᠲᠣᠰ ᠦᠰᠦᠭ ᠢ duːn ᠢᠶᠠᠷ ᠣᠩᠰᠢᠬᠤ ᠨᠢ ᠣᠳᠬ᠎ᠠ ᠶᠢᠨ ᠲᠠᠯ᠎ᠠ ᠠᠴᠠ ᠦᠵᠡᠪᠡᠯ ᠭᠠᠭ᠋ᠠᠢ ᠭᠡᠵᠦ ᠲᠣᠷᠣᠮᠵᠢᠯᠠᠨ ᠬᠠᠷᠢᠶᠠᠵᠣ ᠪᠠᠶᠢᠭ᠎ᠠ ᠦᠭᠡ ᠪᠣᠯᠪᠠᠴᠣ᠂ ᠠᠪᠢᠶᠠᠨ  ᠤ ᠲᠠᠯ᠎ᠠ ᠠᠴᠠ ᠦᠵᠡᠪᠡᠯ ᠬᠠᠷᠢᠨ ᠵᠦᠪ ᠣᠨᠣᠪᠴᠢᠳᠠᠢ ᠪᠠᠶᠢᠨ᠎ᠠ᠃ ᠣᠴᠢᠷ ᠨᠢ 日逐 ᠭᠡᠳᠡᠭ ᠬᠢᠳᠠᠳ ᠦᠰᠦᠭ ᠪᠣᠯ ︽ᠢᠯᠳᠣᠨ︾ ︵Ildun︶ ᠭᠡᠳᠡᠭ ᠾᠦᠩᠨᠦ — ᠮᠣᠩᠭᠤᠯ ᠦᠭᠡ ᠶᠢ ᠠᠪᠢᠶᠠᠴᠢᠯᠠᠨ ᠣᠷᠴᠢᠭᠤᠯᠣᠭᠰᠠᠨ ᠦᠰᠦᠭ ᠪᠣᠯᠣᠨ᠎ᠠ᠃ 日逐 ᠤ ᠲᠠᠶᠢᠯᠪᠣᠷᠢ᠄ 日逐 ᠪᠣᠯ ᠵᠢᠩᠭᠠᠷ ᠲᠤ ᠭᠠᠷᠳᠠᠭ ᠢᠯᠳᠣᠨ ᠮᠦᠨ᠂ ᠮᠦᠨᠴᠦ ᠾᠦᠩᠨᠦ ᠶᠢᠨ ᠦᠶ᠎ᠡ ᠶᠢᠨ ᠸᠠᠩ ᠤᠨ ᠬᠡᠷᠭᠢᠮ ᠪᠣᠯᠣᠨ ᠨᠣᠶᠠᠳ ᠳᠣᠰᠢᠶᠠᠯᠳᠠᠨ ᠤ ᠨᠡᠷ᠎ᠡ ᠴᠣᠯᠠ ᠪᠣᠯᠣᠨ᠎ᠠ᠃ ᠲᠡᠬᠦᠨ ᠤ 日 ᠦᠰᠦᠭ ᠢ ᠡᠷᠳᠡ ᠦᠶ᠎ᠡ ᠳᠤ njiɡ᠂ njit᠂ Il᠂ ɡit᠂ zit᠂ ŋit᠂ jiʔ᠂ mi ᠪᠣᠶᠣ miʔ ᠵᠡᠷᠭᠡ ᠪᠠᠷ ᠪᠦᠷ ᠣᠩᠰᠢᠵᠣ ᠪᠠᠶᠢᠵᠠᠢ᠃ ᠡᠭᠦᠨ ᠢ ᠶᠠᠷᠢᠵᠣ ᠪᠠᠶᠢᠬᠤ ᠨᠢ ᠬᠤᠵᠢᠮ 金日磾 ᠭᠡᠳᠡᠭ ᠾᠦᠩᠨᠦ ᠬᠦᠮᠦᠨ ᠤ ᠨᠡᠷ᠎ᠡ ᠶᠢ ᠲᠠᠶᠢᠯᠪᠣᠷᠢᠯᠠᠬᠤ ᠳᠤ ᠪᠠᠰᠠ ᠲᠠᠬᠢᠨ ᠲᠣᠷᠠᠳᠬᠤ ᠪᠣᠯᠣᠨ᠎ᠠ᠃ 金日磾 ᠶᠢᠨ ᠨᠡᠷ᠎ᠡ ᠲᠣᠲᠣᠷᠠᠬᠢ 日 ᠶᠢ ᠲᠠᠷᠣᠢ miʔ ᠭᠡᠵᠦ ᠣᠩᠰᠢᠨ᠂ ᠺᠢᠮᠢᠭᠳᠡᠢ ᠪᠣᠶᠣ ᠺᠢᠮᠡᠭᠳᠡᠢ ᠭᠡᠵᠦ ᠲᠠᠶᠢᠯᠪᠣᠷᠢᠯᠠᠨ᠎ᠠ᠃ ᠺᠢᠮᠡᠭᠳᠡᠢ ᠲᠠᠷᠣᠢ ᠣᠳᠣᠬᠢ ᠮᠣᠩᠭᠤᠯ ᠬᠡᠯᠡᠨ ᠤ ᠬᠢᠮᠡᠭᠳᠡᠢ ︵Himegdei︶ ᠮᠦᠨ᠃ ᠬᠢᠮᠡᠭᠳᠡᠢ ᠶᠢᠨ ᠬᠢᠮᠡᠭ ᠭᠡᠳᠡᠭ ᠦᠭᠡ ᠨᠢ ᠨᠠᠭᠤᠷ ᠲᠠᠩᠬᠢᠰ ᠮᠡᠳᠦ ᠶᠡᠭᠡ ᠣᠰᠣᠨ ᠤ ᠲᠣᠯᠬᠢᠶᠠᠨ ᠢᠶᠠᠷ ᠡᠷᠬᠢ ᠳᠤ ᠬᠠᠶᠠᠭᠳᠠᠵᠣ ᠭᠠᠷᠣᠭᠰᠠᠨ ᠣᠷᠭᠤᠮᠠᠯ ᠤᠨ ᠶᠠᠯᠵᠠᠮᠠᠭ ᠢ ᠬᠡᠯᠡᠨ᠎ᠡ᠃ ᠡᠶᠢᠮᠦ ᠠᠴᠠ ᠬᠢᠮᠡᠭ ᠭᠡᠳᠡᠭ ᠢ ᠰᠢᠭᠤᠳ ᠶᠠᠷᠢᠪᠠᠯ ᠶᠡᠭᠡ ᠣᠰᠣᠨ ᠤ ᠬᠤᠭ ᠭᠡᠳᠡᠭ ᠦᠭᠡ ᠪᠣᠯᠣᠨ᠎ᠠ᠃ ᠬᠢᠮᠡᠭᠳᠡᠢ ᠪᠣᠯ ᠪᠦᠬᠡᠴᠡᠶᠢᠭᠦᠯᠵᠦ ᠦᠭᠭᠰᠡᠨ ᠨᠡᠷ᠎ᠡ ᠪᠣᠯᠣᠨ᠎ᠠ᠃ ᠶᠠᠭ ᠣᠳᠣ ᠦᠶ᠎ᠡ ᠶᠢᠨ ᠬᠡᠣᠬᠡᠳ ᠢᠶᠠᠨ ᠮᠠᠭᠤᠨᠣᠬᠠᠢ ᠭᠡᠵᠦ ᠨᠡᠷ᠎ᠡ ᠦᠭᠭᠦ ᠲᠠᠢ ᠠᠳᠠᠯᠢ ᠦᠢᠯᠡ ᠠᠵᠠᠢ᠃ ᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ
 
ᠢᠷᠡᠯᠲᠡ᠄ ᠲᠣᠰ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠯᠠᠱᠠ ᠦᠷᠡᠰ ᠨᠠᠶᠢᠷ ᠤᠨ ᠡᠭᠦᠰᠦᠯᠲᠡ ᠲᠡᠤᠬᠡ
ᠠᠯᠠᠱᠠ ᠣᠷᠴᠢᠭᠤᠯᠭ᠎ᠠ ᠶᠢᠨ ᠰᠤᠷᠭᠠᠭᠤᠯᠢ ᠶᠢᠨ ᠠᠩᠭᠢ ᠪᠠᠶᠢᠭᠤᠯᠪᠠ
ᠠᠯᠠᠱᠠ ᠦᠬᠢᠳ ᠤᠨ ᠰᠤᠷᠭᠠᠭᠤᠯᠢ  ᠶᠢ ᠪᠠᠶᠢᠭᠤᠯᠪᠠ
ᠠᠯᠠᠱᠠ ᠪᠠᠭᠰᠢ ᠶᠢᠨ ᠰᠤᠷᠭᠠᠭᠤᠯᠢ ᠪᠠᠶᠢᠭᠤᠯᠪᠠ
ᠪᠠᠭ᠎ᠠ ᠬᠡᠤᠬᠡᠳ ᠢ ᠯᠠᠮᠠ ᠪᠣᠯᠭᠠᠬᠤ ᠶᠢ ᠬᠤᠷᠢᠭᠯᠠᠭᠰᠠᠨ ᠨᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号