ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠰᠢᠨ᠎ᠡ ᠬᠦᠳᠡᠭᠡ
ᠲᠣᠬᠤᠯᠭ᠎ᠠ ᠲᠡᠮᠦᠷ ᠬᠠᠭᠠᠨ ᠤ ᠬᠦᠪᠡᠭᠦᠨ ᠾᠢᠳᠢᠷ ᠬᠤᠵᠠ ᠬᠠᠭᠠᠨ ᠤ ᠨᠣᠶᠠᠷᠬᠠᠯ ᠤᠨ ᠡᠬᠢᠯᠡᠯᠳᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/3/20
ᠬᠤᠷᠢᠨ ᠵᠢᠷᠭᠤᠳᠣᠭᠠᠷ ᠪᠦᠯᠦᠭ      ᠲᠡᠭᠡᠷ᠎ᠡ ᠨᠢᠭᠡᠨᠳᠡ ᠦᠬᠦᠯᠡᠵᠦ ᠦᠩᠭᠡᠷᠡᠭᠰᠡᠨ ᠢᠶᠠᠷ ᠲᠣᠬᠤᠯᠭ᠎ᠠ ᠲᠡᠮᠦᠷ ᠬᠠᠭᠠᠨ ᠤ ᠬᠠᠮᠤᠭ ᠪᠠᠭ᠎ᠠ ᠬᠦᠪᠡᠭᠦᠨ ᠾᠢᠳᠢᠷ ᠬᠤᠵᠠ ᠬᠠᠭᠠᠨ ᠢ ᠦᠯᠦᠭᠡᠢ ᠲᠠᠢ ᠪᠠᠶᠢᠬᠤ ᠳᠤ ᠡᠮᠢᠷ ᠬᠤᠳᠠᠶᠢᠳᠠ ᠪᠣᠯᠣᠨ ᠲᠡᠭᠦᠨ ᠤ ᠡᠬᠡ ᠺᠢᠷ · ᠠᠬ᠎ᠠ᠂ ᠬᠠᠮᠠᠷ ᠠᠳ᠋ᠳᠢᠨ ᠤ ᠬᠢᠳᠣᠯᠭ᠎ᠠ ᠠᠴᠠ ᠠᠪᠣᠷᠠᠨ ᠨᠢᠭᠤᠵᠣ ᠭᠠᠷᠭᠠᠭᠰᠠᠨ ᠶᠣᠮ᠃ ᠾᠢᠳᠢᠷ ᠬᠤᠵᠠ ᠬᠠᠭ᠋ᠠᠨ ᠠᠷᠪᠠᠨ ᠬᠤᠶᠠᠷ ᠨᠠᠰᠣᠯᠠᠭᠰᠠᠨ ᠤ ᠰᠡᠬᠦᠯᠡᠷ ᠲᠡᠭᠦᠨ ᠤ ᠲᠠᠭᠠᠭᠰᠠᠳ ᠮᠦᠨ ᠯᠠ ᠬᠠᠮᠠᠷ ᠠᠳ᠋ᠳᠢᠨᠨ ᠤ ᠬᠤᠣᠷᠯᠠᠯ ᠠᠴᠠ ᠡᠮᠢᠶᠡᠵᠦ ᠪᠠᠶᠢᠯ᠎ᠠ᠃ ᠡᠶᠢᠮᠦ ᠠᠴᠠ ᠺᠠᠱᠭᠠᠷ ᠠᠴᠠ ᠭᠠᠳᠠᠭᠰᠢ ᠨᠢᠭᠤᠨ ᠵᠠᠶᠢᠯᠠᠭᠤᠯᠣᠨ ᠭᠠᠷᠭᠠᠬᠤ ᠪᠠᠷ ᠲᠦᠯᠦᠪᠯᠡᠵᠦ ᠪᠠᠶᠢᠪᠠ᠃ ᠡᠮᠢᠷ ᠬᠤᠳᠠᠶᠢᠳᠠ ᠶᠢᠨ ᠰᠠᠨᠠᠭ᠎ᠠ ᠪᠠᠷ ᠪᠣᠯ ᠦᠪᠡᠷ ᠤᠨ ᠦᠨᠡᠨᠴᠢ ᠵᠢᠷᠣᠮ ᠲᠠᠢ᠂ ᠢᠳᠡᠭᠡᠯᠳᠡᠢ ᠬᠡᠳᠦᠨ ᠲᠠᠭᠠᠭᠰᠠᠳ ᠢᠶᠠᠨ ᠲᠣᠮᠢᠯᠠᠵᠣ ᠲᠡᠭᠦᠨ ᠢ ᠲᠠᠭᠠᠯᠳᠣᠨ ᠶᠠᠪᠣᠭᠤᠯᠬᠤ ᠪᠠᠷ ᠪᠣᠳᠣᠯᠬᠢᠯᠠᠵᠠᠢ᠃ ᠭᠡᠳᠡᠯ᠎ᠡ ᠲᠡᠭᠦᠨ ᠤ ᠡᠬᠡ  ᠨᠢ᠄ ︽ᠶᠠᠭᠠᠬᠢᠭᠰᠠᠨ ᠴᠦ ᠴᠢᠨᠦ ᠲᠣᠣᠷᠠᠬᠢ ᠬᠦᠮᠦᠨ ᠢᠶᠠᠨ ᠶᠠᠪᠣᠭᠤᠯᠵᠣ ᠪᠣᠯᠬᠤ ᠦᠭᠡᠢ᠂ ᠣᠴᠢᠷ ᠨᠢ ᠬᠡᠵᠢᠶ᠎ᠡ ᠨᠢᠭᠡᠨ ᠴᠠᠭ ᠲᠤ ᠡᠨᠡ ᠬᠡᠣᠬᠡᠳ ᠬᠠᠭᠠᠨ ᠰᠠᠭᠤᠷᠢᠨ ᠲᠠᠭᠠᠨ ᠭᠠᠷᠣᠭᠰᠠᠭᠠᠷ᠂ ᠲᠡᠳᠡᠭᠡᠷ ᠮᠡᠳᠦ ᠲᠣᠣᠷᠠᠳᠣ ᠭᠠᠷᠣᠯ  ᠲᠠᠢ ᠬᠦᠮᠦᠰ ᠭᠡᠨᠡᠳᠳᠡ ᠨᠢᠭᠡᠨ ᠴᠠᠭ ᠢᠶᠠᠷ ᠡᠷᠬᠡ ᠮᠡᠳᠡᠯ ᠲᠠᠢ ᠪᠣᠯᠪᠠᠯ᠂ ᠴᠢᠮ᠎ᠠ ᠪᠠ ᠴᠢᠨᠦ ᠬᠦᠪᠡᠭᠦᠳ ᠠᠴᠢ ᠨᠡᠷ  ᠲᠤ ᠲᠠᠶᠢᠰᠣᠨ ᠪᠣᠯᠬᠤ ᠶᠣᠮ᠃ ᠰᠢᠯᠳᠠᠭᠠᠨ ᠭᠡᠪᠡᠯ ᠲᠡᠳᠡ ᠪᠣᠰᠣᠳ ᠬᠦᠮᠦᠰ ᠲᠡᠳᠡᠨᠡᠷ ᠲᠤ ᠬᠦᠨᠳᠦᠳᠭᠡᠯ ᠭᠦᠢᠴᠡᠳ ᠦᠭᠡᠢ ᠰᠠᠨᠠᠭᠳᠠᠵᠣ᠂ ᠬᠤᠭᠤᠷᠣ ᠵᠠᠭᠤᠷ᠎ᠠ ᠪᠠᠨ ᠦᠬᠦᠯᠡᠯᠳᠦᠵᠦ᠂ ᠡᠳᠡᠭᠡᠷ ᠬᠦᠮᠦᠰ ᠪᠦᠷ ᠣᠣᠯ ᠨᠢ ᠪᠣᠭᠤᠯ ᠲᠡᠳᠦᠢ ᠯᠠ ᠪᠠᠶᠢᠭᠰᠠᠨ ᠶᠣᠮ ᠭᠡᠵᠡᠭᠡᠬᠦ ᠶᠣᠮ᠃ ᠡᠶᠢᠮᠦ ᠠᠴᠠ ᠲᠠᠨᠢᠬᠤ ᠦᠭᠡᠢ ᠬᠦᠮᠦᠨ ᠢ ᠲᠣᠮᠢᠯᠠᠪᠠᠴᠣ ᠲᠣᠣᠷᠠᠬᠢ ᠲᠠᠭᠠᠭᠰᠠᠳ ᠢᠶᠠᠨ ᠲᠣᠮᠢᠯᠠᠵᠣ ᠪᠣᠯᠬᠤ ᠦᠭᠡᠢ ᠬᠡᠵᠡᠢ᠃ ᠲᠡᠭᠡᠭᠡᠳ ᠬᠤᠳᠠᠶᠢᠳᠠ ᠠᠷᠪᠠᠨ ᠬᠤᠶᠠᠷ ᠬᠦᠮᠦᠨ ᠰᠣᠩᠭᠤᠵᠣ ᠲᠡᠭᠦᠨ ᠢ ᠬᠠᠮᠠᠯᠠᠭᠤᠯᠣᠨ ᠬᠦᠷᠭᠡᠪᠡ᠃ ᠬᠤᠵᠢᠮ ᠡᠨᠡ ᠠᠷᠪᠠᠨ ᠬᠤᠶᠠᠷ ᠬᠦᠮᠦᠨ ᠪᠦᠷ ᠡᠮᠢᠷ ᠪᠣᠯᠵᠠᠭᠠᠵᠠᠢ᠃ ᠲᠡᠳᠡᠨᠡᠷ ᠤᠨ ᠣᠯᠠᠩᠬᠢ ᠬᠤᠶᠢᠴᠢᠰ ᠨᠢ ᠡᠳᠦᠬᠡ ᠪᠣᠯᠳᠠᠯ᠎ᠠ ᠪᠦᠷ ᠠᠮᠢᠳᠣᠷᠠᠭᠰᠠᠭᠠᠷ ᠪᠠᠶᠢᠨ᠎ᠠ᠃ ᠡᠳᠡᠭᠡᠷ ᠬᠦᠮᠦᠨ ᠤ ᠲᠣᠲᠣᠷ᠎ᠠ ᠨᠢᠭᠡᠨ ᠠᠷᠵᠢᠷᠠᠺ ᠭᠡᠭᠴᠢ ᠪᠣᠯ ᠲᠠᠷᠣᠢ ᠢᠲ᠋ᠠᠷᠵᠢ ᠶᠢᠨ ᠣᠯᠠᠨ ᠡᠮᠢᠷ ᠤᠨ ᠲᠡᠭᠡᠳᠦᠰ ᠶᠣᠮ᠃ ᠪᠠᠰᠠ ᠬᠤᠷᠣᠽᠧᠮ ᠤᠨ ᠲᠠᠵᠢᠷ ᠭᠡᠭᠴᠢ ᠶᠢᠨ ᠬᠤᠶᠢᠴᠢᠰ ᠪᠣᠯ ᠬᠤᠩᠵᠠ ᠶᠢᠨ ᠣᠯᠠᠨ ᠡᠮᠢᠷ ᠤᠨ ᠲᠡᠭᠡᠳᠦᠰ ᠶᠣᠮ᠃ ᠪᠠᠰᠠ ᠨᠦᠬᠦᠭᠡ ᠨᠢᠭᠡ ᠨᠢ ᠴᠠᠯᠢᠱ ᠠᠶᠢᠮᠠᠭ ᠤᠨ ᠰᠠᠶ᠋ᠢᠳᠢ᠂ ᠲᠡᠭᠦᠨ ᠤ ᠬᠤᠶᠢᠴᠢᠰ ᠪᠦᠷ ᠡᠮᠢᠷ ᠪᠣᠯᠵᠠᠭᠠᠵᠣ ᠂ ᠯᠠᠺᠠᠪ ᠪᠣᠶᠣ ᠺᠦᠱᠵᠢ ᠭᠡᠳᠡᠭ ᠴᠣᠯᠠ ᠲᠠᠢ ᠪᠠᠶᠢᠵᠣ᠂ ᠬᠤᠵᠢᠮ ᠪᠦᠷ ᠬᠦᠬᠡᠯᠳᠠᠱ① ᠭᠡᠳᠡᠭ ᠪᠣᠯᠵᠠᠢ᠃ ᠡᠨᠡ ᠬᠡᠳᠦᠨ ᠬᠦᠮᠦᠨ ᠪᠦᠷ ᠡᠮᠢᠷ ᠪᠣᠯᠵᠠᠭᠠᠪᠠ᠃ ᠡᠨᠡ ᠠᠷᠪᠠᠨ ᠬᠤᠶᠠᠭᠤᠯᠠ ᠶᠢᠨ ᠪᠣᠰᠣᠳ ᠬᠦᠮᠦᠨ ᠨᠢ ᠴᠦ ᠪᠦᠷ ᠯᠠ ᠡᠶᠢᠮᠦ ᠪᠠᠶᠢᠭᠰᠠᠨ ᠶᠣᠮ᠃    ᠶᠡᠷᠦᠩᠬᠡᠶᠢᠯᠡᠭᠡᠳ ᠬᠡᠯᠡᠪᠡᠯ ᠲᠡᠳᠡ ᠾᠢᠳᠢᠷ ᠬᠤᠵᠠ ᠬᠠᠭᠠᠨ ᠢ ᠪᠠᠳᠠᠺᠱᠠᠨ ᠪᠠ ᠺᠠᠱᠭᠠᠷ ᠤᠨ ᠬᠤᠭᠤᠷᠣᠨᠳᠣ ᠪᠠᠶᠢᠭ᠎ᠠ ᠠᠭᠤᠯᠠᠷᠬᠠᠭ ᠣᠷᠣᠨ ᠳᠤ ᠲᠠᠭᠠᠭᠤᠯᠣᠨ ᠠᠪᠠᠴᠢᠵᠣ ᠨᠢᠭᠤᠨ ᠲᠡᠵᠢᠭᠡᠵᠡᠢ᠃ ᠭᠡᠪᠡᠴᠦ ᠬᠠᠮᠠᠷ ᠠᠳ᠋ᠳᠢᠨ ᠤ ᠨᠢᠭᠤᠴᠠ ᠲᠠᠩᠨᠠᠭᠤᠯ ᠮᠦᠨ ᠯᠠ ᠲᠡᠳᠡᠨᠡᠷ ᠤᠨ ᠪᠡᠶ᠎ᠡ ᠲᠠᠯᠳᠠᠯᠠᠵᠣ ᠪᠠᠶᠢᠭ᠎ᠠ ᠭᠠᠵᠠᠷ ᠢ ᠡᠷᠢᠨ ᠰᠣᠷᠠᠵᠣ ᠯᠠ ᠪᠠᠶᠢᠪᠠ᠃ ᠡᠶᠢᠮᠦ ᠠᠴᠠ ᠲᠡᠳᠡ ᠲᠡᠨᠳᠡ ᠠᠴᠠ ᠪᠠᠨ ᠣᠷᠭᠤᠨ ᠭᠠᠷᠴᠣ᠂ ᠢᠥᠢ ᠲᠢᠶᠠᠨ ᠤ ᠠᠭᠤᠯᠠᠨ ᠣᠷᠣᠨ ᠳᠤ ᠰᠢᠷᠭᠤᠪᠠ᠃ ᠬᠤᠵᠢᠮ ᠬᠦᠮᠦᠰ ᠲᠤ ᠮᠡᠳᠡᠭᠳᠡᠬᠦ ᠠᠴᠠ ᠪᠣᠯᠭᠤᠮᠵᠢᠯᠠᠨ ᠲᠠᠬᠢᠨ ᠰᠢᠷ᠎ᠠ ᠣᠶᠢᠭᠤᠷ② ᠤᠨ ᠨᠣᠳᠤᠭ ᠲᠤ ᠬᠦᠷᠴᠦ᠂ ᠵᠣᠷᠵᠠᠨ③ ᠪᠣᠯᠣᠨ ᠯᠣᠪ ᠺᠠᠲ᠋ᠠᠺ④ ᠵᠡᠷᠭᠡ ᠪᠠᠷ ᠲᠡᠨᠦᠬᠦᠴᠢᠯᠡᠨ ᠠᠮᠢᠳᠣᠷᠠᠵᠣ ᠠᠷᠪᠠᠨ ᠬᠤᠶᠠᠷ ᠵᠢᠯ ᠪᠣᠯᠣᠭᠰᠠᠨ ᠶᠣᠮ᠃ ᠬᠠᠮᠠᠷ ᠠᠳ᠋ᠳᠢᠨ ᠦᠬᠦᠭᠰᠡᠨ ᠤ ᠰᠡᠬᠦᠯᠡᠷ ᠬᠦᠮᠦᠰ ᠬᠤᠶᠢᠨ᠎ᠠ ᠬᠤᠶᠢᠨ᠎ᠠ ᠠᠴᠠ ᠪᠠᠨ ᠾᠢᠳᠢᠷ ᠬᠤᠵᠠ ᠬᠠᠭᠠᠨ  ᠢ ᠡᠷᠢᠵᠡᠭᠡᠪᠡ᠃ ᠡᠮᠢᠷ ᠬᠤᠳᠠᠶᠢᠳᠠ ᠮᠠᠰᠢ ᠣᠯᠠᠨ ᠬᠦᠮᠦᠨ ᠲᠣᠮᠢᠯᠠᠨ᠂ ᠲᠠᠯᠳᠠᠯᠠᠵᠣ ᠪᠠᠶᠢᠭ᠎ᠠ ᠭᠠᠵᠠᠷ ᠠᠴᠠ ᠲᠡᠬᠦᠨ  ᠢ ᠡᠷᠢᠨ ᠣᠯᠵᠣ ᠠᠪᠴᠢᠷᠠᠭᠠᠳ ᠣᠯᠠᠨ ᠲᠠᠭᠠᠭᠰᠠᠳ ᠨᠡᠷ ᠢᠶᠠᠨ ᠲᠠᠭᠠᠭᠤᠯᠣᠨ ᠲᠡᠭᠦᠨ ᠢ ᠬᠦᠷᠢᠶᠡᠯᠡᠵᠦ ᠬᠠᠭᠠᠨ ᠰᠠᠭᠤᠯᠭᠠᠪᠠ⑤᠃ ᠲᠡᠭᠡᠭᠡᠳ ᠡᠨᠡᠬᠦ ᠬᠠᠭᠠᠨ ᠤ ᠬᠡᠷᠡᠯ ᠬᠢᠯᠪᠠᠭ᠎ᠠ ᠮᠣᠩᠭᠤᠯ ᠤᠨ ᠬᠠᠮᠤᠭ ᠡᠷᠬᠢᠮ ᠲᠡᠭᠡᠳᠦ ᠰᠠᠭᠤᠳᠠᠯ  ᠢ ᠭᠡᠷᠡᠯᠳᠦᠭᠦᠯᠵᠦ᠂ ᠮᠣᠩᠭᠤᠯᠰᠲ᠋ᠠᠨ ᠤ ᠲᠦᠷᠦ ᠵᠠᠰᠠᠭ ᠡᠳᠦᠷ ᠢᠷᠡᠬᠦᠶ᠎ᠡ ᠬᠦᠭᠵᠢᠨ ᠮᠠᠨᠳᠣᠵᠠᠢ᠃    ᠵᠠᠯᠭᠠᠭᠠᠳ ᠡᠨᠡᠬᠦ ᠬᠠᠭᠠᠨ ᠡᠮᠢᠷ ᠲᠡᠮᠦᠷ ᠲᠠᠢ ᠨᠠᠶᠢᠷᠠᠮᠳᠠᠵᠣ᠂ ᠬᠠᠭᠠᠨ ᠤ ᠲᠦᠷᠦᠯ ᠤᠨ ᠬᠡᠣᠬᠡᠨ ᠲᠠᠸᠠᠺᠠᠯ · ᠬᠠᠨᠢᠮ ︵ᠵᠠᠷᠢᠮ ᠬᠦᠮᠦᠨ ᠤ ᠬᠡᠯᠡᠬᠦ ᠪᠠᠷ ᠲᠡᠭᠦᠨ ᠤ ᠬᠡᠣᠬᠡᠨ ᠭᠡᠳᠡᠭ᠂ ᠭᠡᠪᠡᠴᠦ ᠾᠢᠳᠢᠷ ᠬᠤᠵᠠ ᠳᠤ ᠲᠡᠶᠢᠮᠦ ᠲᠣᠮᠣ ᠬᠡᠣᠬᠡᠨ ᠲᠠᠢ ᠭᠡᠬᠦ ᠳᠤ ᠵᠢᠭᠠᠬᠠᠨ ᠰᠡᠵᠢᠭᠯᠡᠯ ᠲᠠᠢ ᠪᠠᠶᠢᠨ᠎ᠠ — ᠮᠣᠩᠭᠤᠯᠴᠢᠯᠠᠭᠴᠢ ᠠᠴᠠ︶ ᠢ ᠲᠡᠮᠦᠷ ᠲᠤ ᠪᠣᠭᠳᠣᠯᠣᠨ ᠦᠭᠭᠦᠪᠡ᠃ ᠾᠢᠳᠢᠷ ᠬᠤᠵᠠ ᠬᠠᠭᠠᠨ ᠰᠠᠭᠤᠷᠢᠨ ᠳᠤ ᠪᠠᠶᠢᠭ᠎ᠠ ᠦᠶ᠎ᠡ ᠳᠡᠭᠡᠨ ᠪᠠᠰᠠ ᠬᠢᠳᠠᠨ ᠵᠦᠭ ᠲᠤ ᠠᠷᠢᠭᠤᠨ ᠲᠠᠶᠢᠨ ᠵᠠᠷᠯᠠᠵᠣ ᠪᠠᠶᠢᠭᠰᠠᠨ ᠶᠣᠮ᠃ ᠲᠡᠷᠡ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠬᠢᠳᠠᠨ ᠤ ᠬᠤᠶᠠᠷ ᠬᠢᠯᠢ ᠶᠢᠨ ᠬᠤᠳᠠ ᠬᠠᠷ᠎ᠠ ᠬᠤᠵᠣᠣ ᠪᠠ ᠲᠦᠷᠹᠠᠨ ᠢ ᠡᠵᠡᠯᠡᠨ ᠠᠪᠴᠣ᠂ ᠲᠡᠨᠳᠡᠬᠢ ᠠᠷᠠᠳ ᠢᠷᠭᠡᠳ ᠢ ᠠᠯᠪᠠᠳᠠᠵᠣ ᠪᠠᠶᠢᠭᠠᠳ ᠢᠰᠯᠠᠮ ᠱᠠᠰᠢᠨ ᠰᠢᠳᠦᠭᠦᠯᠦᠭᠰᠡᠨ ᠶᠣᠮ᠃ ᠡᠶᠢᠮᠦ ᠠᠴᠠ ᠡᠨᠡ ᠬᠤᠶᠠᠷ ᠭᠠᠵᠠᠷ ᠢ ᠰᠠᠶ᠋ᠢ ︽ᠳ᠋ᠠᠷ · ᠠᠯ · ᠢᠰᠯᠠᠮ︾ ︵Dar al Islam᠂ ᠲᠠᠷᠣᠢ ᠢᠰᠯᠠᠮ ᠨᠣᠳᠤᠭ ᠭᠡᠳᠡᠭ ᠣᠳᠬ᠎ᠠ ᠲᠠᠢ ᠦᠭᠡ ᠪᠣᠯᠣᠨ᠎ᠠ︶ ᠬᠡᠮᠡᠨ ᠨᠡᠷᠡᠶᠢᠳᠦᠬᠦ ᠪᠣᠯᠪᠠ᠃ ᠮᠣᠩᠭᠤᠯ ᠬᠠᠭᠠᠨ ᠤ ᠰᠠᠭᠤᠳᠠᠭ ᠭᠠᠵᠠᠷ ᠢᠶᠠᠷ ᠠᠪᠴᠣ ᠬᠡᠯᠡᠪᠡᠯ᠂ ᠡᠨᠡ ᠨᠣᠳᠤᠭ ᠤᠨ ᠴᠢᠬᠤᠯᠠ ᠴᠢᠨᠠᠷ ᠵᠦᠪᠬᠡᠨ ᠺᠠᠱᠭᠠᠷ ᠤᠨ ᠲᠠᠷᠠᠭ᠎ᠠ ᠯᠠ ᠣᠷᠣᠬᠤ ᠶᠣᠮ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠵᠠᠷᠢᠮ ᠬᠦᠮᠦᠨ ᠤ ᠬᠡᠯᠡᠬᠦ ᠪᠠᠷ ᠡᠨᠡᠬᠦ ᠨᠣᠳᠤᠭ ᠢ ᠢᠰᠯᠠᠮ ᠱᠠᠰᠢᠨ ᠤ ᠲᠠᠷᠬᠠᠨ ᠰᠣᠷᠭᠠᠯ ᠲᠦᠷᠢᠮ ᠢᠶᠠᠷ ᠬᠤᠪᠢᠶᠠᠨ ᠰᠠᠯᠭᠠᠵᠣ᠂ ᠬᠠᠭᠠᠨ ᠤ ᠭᠠᠷ ᠲᠤ ᠨᠢᠭᠡᠨ ᠬᠡᠰᠡᠭ ᠬᠡᠮᠡᠷᠯᠢᠭ ᠪᠣᠯᠣᠨ ᠨᠢᠭᠡᠨ ᠲᠣᠯᠣᠭᠠᠢ ᠬᠦᠬᠡ ᠦᠬᠡᠷ⑥ ᠦᠯᠡᠳᠡᠵᠡᠢ᠃ ᠡᠨᠡᠬᠦ ᠬᠠᠭᠠᠨ ᠤ ᠢᠩᠬᠢᠵᠦ ᠬᠢᠵᠦ ᠪᠠᠶᠢᠭ᠎ᠠ ᠨᠢ ᠢᠰᠯᠠᠮ ᠱᠠᠰᠢᠨ ᠤ ᠣᠯᠣᠰ ᠲᠠᠭᠠᠨ ᠦᠩᠭᠡ ᠭᠡᠷᠡᠯ ᠨᠡᠮᠡᠷᠢᠯᠡᠬᠦ ᠭᠡᠰᠡᠨ ᠰᠠᠨᠠᠭ᠎ᠠ ᠪᠣᠯᠣᠨ᠎ᠠ᠃    ︽ᠲᠡᠮᠦᠷ ᠤᠨ ᠲᠠᠶᠢᠨ ᠤ ᠭᠠᠪᠢᠶ᠎ᠠ ᠶᠢᠨ ᠲᠡᠮᠳᠡᠭᠯᠡᠯ︾ ᠳᠤ ᠬᠡᠯᠡᠭᠰᠡᠨ ᠨᠢ ᠡᠮᠢᠷ ᠲᠡᠮᠦᠷ ᠡᠮᠦᠨ᠎ᠡ ᠣᠮᠠᠷ᠎ᠠ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠬᠢᠯᠢ ᠬᠢᠵᠠᠭᠠᠷ ᠲᠠᠭᠠᠨ ᠪᠦᠷ ᠰᠠᠨᠠᠭ᠎ᠠ ᠠᠮᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠵᠡᠭᠦᠨ ᠵᠦᠭ ᠤᠨ ᠡᠯ᠎ᠡ ᠣᠯᠣᠰ ᠲᠤ ᠠᠯᠣᠰ ᠤᠨ ᠲᠠᠶᠢᠨ ᠬᠢᠬᠦ ᠪᠠᠷ ᠪᠡᠯᠡᠳᠭᠡᠵᠦ ᠡᠬᠢᠯᠡᠵᠡᠢ᠃ ᠣᠨᠴᠠᠭᠠᠶᠢᠯᠠᠨ ᠵᠡᠭᠦᠨ ᠵᠦᠭ ᠤᠨ ᠬᠠᠮᠤᠭ ᠲᠣᠮᠣ ᠣᠯᠣᠰ ᠬᠢᠳᠠᠨ ᠢ ᠲᠣᠪᠳᠣᠯᠬᠤ ᠪᠠᠷ ᠪᠣᠯᠪᠠ᠃ ᠲᠣᠰ ᠨᠣᠮ ᠳᠤ ᠡᠨᠡ ᠣᠳᠠᠭᠠᠨ ᠤ ᠠᠯᠣᠰ ᠲᠠᠶᠢᠯᠠᠯᠳᠠ ᠶᠢᠨ ᠲᠦᠯᠦᠪᠯᠡᠭᠡ ᠶᠢᠨ ᠲᠣᠬᠠᠢ ᠮᠠᠰᠢ ᠣᠷᠳᠣ ᠰᠣᠨᠵᠢᠷᠠᠭᠰᠠᠨ ᠠᠭᠤᠯᠭ᠎ᠠ ᠪᠢᠴᠢᠵᠡᠢ᠃ ᠶᠡᠭᠡ ᠲᠦᠯᠦᠪ ᠦᠬᠦᠯᠡᠭᠰᠡᠨ ᠨᠢ ᠡᠮᠢᠷ ᠲᠡᠮᠦᠷ ᠡᠨᠡᠬᠦ ᠠᠯᠣᠰ ᠲᠠᠶᠢᠯᠠᠯᠳᠠ ᠲᠠᠭᠠᠨ ᠨᠢᠭᠡ ᠰᠠᠯᠠᠭ᠎ᠠ ᠨᠠᠶᠠᠨ ᠲᠦᠮᠡᠨ ᠬᠦᠮᠦᠨ ᠢᠶᠠᠷ ᠪᠦᠷᠢᠯᠳᠦᠭᠰᠡᠨ ᠮᠣᠨᠳᠠᠭ ᠲᠣᠮᠣ ᠴᠡᠷᠢᠭ ᠠᠷᠮᠠᠢ ᠴᠤᠭᠯᠠᠭᠤᠯᠵᠠᠢ᠃ ᠲᠡᠭᠡᠭᠡᠳ ᠪᠦᠷ ᠢᠷᠠᠺ ᠪᠠ ᠷᠦᠮ ︵ᠫᠧᠷᠰ ᠲᠦᠷᠺ ᠢ ᠵᠢᠭᠠᠵᠣ ᠪᠠᠶᠢᠨ᠎ᠠ︶ ᠤᠨ ᠴᠡᠷᠢᠭ ᠤᠨ ᠲᠠᠳᠬᠠᠯ ᠢᠶᠠᠷ ᠬᠦᠮᠦᠨ ᠪᠦᠷᠢ ᠳᠤ ᠭᠦᠢᠴᠡᠳ ᠲᠣᠯᠣᠭᠠᠨ ᠣᠨ ᠤ ᠬᠦᠨᠡᠰᠦ ᠪᠡᠯᠡᠳᠭᠡᠭᠰᠡᠨ ᠠᠵᠠᠢ᠃ ᠬᠢᠳᠠᠨ ᠪᠣᠯᠣᠨ ᠮᠠᠸᠧᠢᠷᠠᠨᠨᠠᠷ ᠤᠨ ᠬᠤᠭᠤᠷᠣᠨᠳᠣ ᠪᠠᠶᠢᠭ᠎ᠠ ᠨᠣᠳᠤᠭ ᠢᠶᠠᠷ ᠲᠠᠷᠢᠶᠠᠯᠠᠵᠣ ᠪᠣᠯᠬᠤ ᠭᠠᠵᠠᠷ ᠲᠣᠩ ᠴᠦᠬᠡᠨ ᠪᠦᠭᠡᠳ ᠬᠦᠮᠦᠨ ᠠᠮᠠ ᠣᠨᠴᠠ ᠰᠡᠶᠢᠷᠡᠭ ᠪᠣᠯᠬᠤᠷ ᠲᠡᠷᠡ ᠴᠡᠷᠢᠭ ᠲᠡᠭᠡᠨ ᠵᠠᠷᠯᠠᠵᠣ ᠬᠦᠮᠦᠨ ᠪᠦᠷᠢ ᠦᠪᠡᠷ ᠤᠨ ᠬᠠᠩᠭᠠᠯᠭ᠎ᠠ ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠬᠤᠶᠠᠷ ᠰᠦᠨ ᠤ ᠦᠨᠢᠶ᠎ᠡ᠂ ᠠᠷᠪᠠᠨ ᠰᠦᠨ ᠤ ᠢᠮᠠᠭ᠎ᠠ ᠠᠪᠴᠣ ᠶᠠᠪᠣᠬᠤ ᠬᠡᠷᠡᠭᠳᠡᠢ᠂ ᠴᠡᠷᠢᠭ ᠤᠨ ᠬᠠᠩᠭᠠᠯᠭ᠎ᠠ ᠲᠠᠭᠤᠰᠣᠭᠰᠠᠨ ᠤ ᠲᠠᠷᠠᠭ᠎ᠠ ᠲᠡᠭᠦᠨ ᠤ ᠰᠦ ᠶᠢ ᠰᠠᠭᠠᠵᠣ ᠢᠳᠡᠨ ᠰᠦ ᠭᠠᠷᠬᠤ ᠪᠠᠨ ᠪᠣᠯᠢᠪᠠᠯ ᠦᠬᠡᠷ ᠢᠮᠠᠭ᠎ᠠ ᠪᠠᠨ ᠠᠯᠠᠵᠣ᠂ ᠮᠬ᠎ᠠ ᠶᠢ ᠨᠢ ᠢᠳᠡᠵᠦ ᠶᠠᠪᠣᠭᠠᠷᠠᠢ ᠭᠡᠵᠡᠢ᠃     ᠡᠳᠡᠭᠡᠷ ᠪᠡᠯᠡᠳᠭᠡᠯ ᠢᠶᠠᠨ ᠬᠢᠵᠦ ᠲᠠᠭᠤᠰᠣᠭᠠᠳ᠂ ᠡᠮᠢᠷ ᠲᠡᠮᠦᠷ ᠰᠠᠮᠠᠷᠺᠠᠨᠳ᠋ ᠠᠴᠠ ᠮᠣᠷᠳᠠᠨ ᠭᠠᠷᠴᠠᠢ᠃ ᠲᠣᠰ ᠵᠢᠯ ᠤᠨ ᠡᠪᠦᠯ ᠲᠦᠷᠺᠰᠲ᠋ᠠᠨ ᠬᠦᠷᠴᠦ ᠬᠦᠷᠢᠶ᠎ᠡ ᠪᠠᠭᠤᠪᠠ᠃ ᠡᠭᠦᠨ ᠤ ᠬᠠᠮᠳᠣ ᠪᠠᠰᠠ ᠾᠢᠳᠢᠷ ᠬᠤᠵᠠ ᠬᠠᠭᠠᠨ ᠳᠤ ᠡᠯᠴᠢ ᠢᠯᠡᠭᠡᠨ ᠮᠣᠩᠭᠤᠯᠰᠲ᠋ᠠᠨ ᠳᠤ ᠲᠠᠷᠢᠶᠠᠯᠠᠵᠣ ᠪᠣᠯᠬᠤ ᠡᠰᠡᠬᠦ ᠲᠣᠬᠠᠢ ᠠᠰᠠᠭᠤᠯᠭᠠᠨ᠂ ᠴᠡᠷᠢᠭ ᠠᠩᠬᠢ ᠳᠠᠭᠠᠨ ᠠᠮᠣ ᠬᠦᠨᠡᠰᠦ ᠬᠠᠩᠭᠠᠬᠤ ᠲᠣᠬᠠᠢ ᠰᠣᠷᠠᠭᠯᠠᠪᠠ᠃    ᠪᠢ ᠦᠷᠬᠦᠯᠵᠢ ᠮᠢᠨᠦ ᠡᠴᠢᠭᠡ ︵ᠲᠡᠭᠦᠨ ᠢ ᠠᠯᠯᠠᠾ ᠡᠨᠡᠷᠢᠬᠦ ᠪᠣᠯᠳᠣᠭᠠᠢ︶ ᠶᠢᠨ ᠦᠬᠦᠯᠡᠬᠦ ᠶᠢ ᠰᠣᠨᠣᠰᠬᠤᠯ᠎ᠠ᠂ ᠲᠡᠷᠡ ᠵᠢᠯ ᠤᠨ ᠬᠠᠪᠣᠷ ᠤᠨ ᠡᠬᠢ ᠪᠠᠷ ᠰᠢᠨ᠎ᠡ ᠴᠡᠭᠡ ᠢᠰᠦᠭᠰᠡᠨ ᠲᠡᠷᠡ ᠡᠳᠦᠷ᠂ ᠮᠣᠩᠭᠤᠯ ᠤᠨ ᠡᠷᠳᠡᠨ ᠤ ᠲᠦᠷᠢᠮ ᠶᠣᠰᠣᠭᠠᠷ ᠦᠪᠡᠳᠡᠭᠰᠢ ᠶᠡᠭᠡ ᠬᠤᠷᠢᠮ ᠪᠣᠯᠵᠣ᠂ ᠬᠤᠷᠢᠮ ᠲᠡᠭᠡᠷ᠎ᠡ ᠡᠮᠢᠷ ᠬᠤᠳᠠᠶᠢᠳᠠ ᠶᠠᠭ ᠰᠠᠶᠢᠬᠠᠨ ᠬᠠᠭᠠᠨ ᠳᠤ ᠬᠤᠨᠳᠠᠭ᠎ᠠ ᠡᠷᠭᠦᠵᠦ ᠪᠠᠶᠢᠬᠤ ᠳᠤ᠂ ᠭᠡᠨᠡᠳᠳᠡ ᠢᠵᠠᠭᠤᠷᠳᠠᠨ ᠠᠬᠠᠯᠠᠭᠴᠢ ᠠᠴᠠ ᠡᠮᠢᠷ ᠲᠡᠮᠦᠷ ᠤᠨ ᠡᠯᠴᠢ ᠢᠷᠡᠪᠡ ᠭᠡᠵᠦ ᠮᠡᠳᠡᠭᠦᠯᠦᠨ᠂ ᠡᠯᠴᠢ ᠶᠢᠨ ᠢᠷᠡᠭᠰᠡᠨ ᠵᠣᠷᠢᠯᠭ᠎ᠠ ᠶᠢ ᠬᠠᠭᠠᠨ ᠳᠤ ᠰᠣᠨᠣᠰᠬᠠᠪᠠ᠃ ᠡᠨᠡᠬᠦ ᠢᠵᠠᠭᠤᠷᠳᠠᠨ ᠪᠠᠰᠠ ᠦᠬᠦᠯᠡᠭᠰᠡᠨ ᠨᠢ᠄ ︽ᠪᠢᠳᠡ ᠲᠡᠳᠡᠨᠡᠷ ᠢ ᠡᠰᠡᠷᠭᠦᠴᠡᠬᠦ ᠬᠦᠴᠦᠨ ᠬᠦᠷᠦᠯᠴᠡᠬᠦ ᠦᠭᠡᠢ᠂ ᠬᠡᠳᠦᠶᠢᠪᠡᠷ ᠲᠣᠩ ᠶᠡᠭᠡ ᠬᠠᠷᠠᠮᠰᠠᠯ ᠲᠠᠢ ᠬᠡᠷᠡᠭ ᠪᠣᠯᠪᠠᠴᠣ ᠵᠦᠪᠬᠡᠨ ᠠᠯᠪᠠ ᠪᠠᠷᠢᠬᠤ ᠯᠠ ᠬᠡᠷᠡᠭᠳᠡᠢ ᠪᠣᠯᠪᠠ︾ ᠭᠡᠵᠡᠢ᠃ ᠾᠢᠳᠢᠷ ᠬᠤᠵᠠ ᠬᠠᠭᠠᠨ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠮᠠᠰᠢᠳᠠ ᠬᠡᠯᠮᠡᠭᠳᠡᠨ ᠴᠡᠭᠡ ᠲᠠᠢ ᠬᠤᠨᠳᠠᠭ᠎ᠠ ᠪᠠᠨ ᠭᠠᠵᠠᠷ ᠠᠯᠳᠠᠴᠢᠬᠠᠪᠠ ᠭᠡᠳᠡᠭ ᠶᠣᠮ᠃ ᠡᠮᠢᠷ ᠬᠤᠳᠠᠶᠢᠳᠠ ᠲᠡᠭᠦᠨ ᠳᠤ᠄ ︽ᠬᠠᠭᠠᠨᠳᠠᠨ ᠮᠢᠨᠢ᠂ ᠡᠨᠡ ᠬᠤᠨᠳᠠᠭ᠎ᠠ ᠲᠠᠢ ᠲᠠᠶᠢᠪᠣᠰᠢᠷᠠᠯ ᠤᠨ ᠡᠭᠡᠳᠡᠩ  ᠢᠶᠠᠨ ᠬᠦᠨᠳᠦᠷᠴᠦ᠂ ᠦᠨᠦᠳᠦᠷ ᠪᠢᠳᠡᠬᠡᠢ ᠮᠠᠷᠭᠠᠰᠢ ᠶᠢᠨ ᠲᠦᠯᠦᠭᠡ ᠵᠣᠪᠠᠭᠠᠷᠠᠢ᠂ ᠮᠠᠷᠭᠠᠰᠢ ᠪᠣᠯᠣᠭᠠᠳ ᠮᠠᠷᠭᠠᠰᠢ ᠶᠢᠨ ᠣᠴᠢᠷ ᠢ ᠪᠣᠳᠣᠯᠬᠢᠯᠠᠶ᠎ᠠ︾ ᠭᠡᠵᠡᠢ᠃ ᠡᠮᠢᠷ ᠬᠤᠳᠠᠶᠢᠳᠠ ᠵᠠᠯᠭᠠᠭᠠᠳ ᠬᠡᠯᠡᠭᠰᠡᠨ ᠨᠢ᠄ ︽ᠬᠦᠮᠦᠰ ᠤᠨ ᠬᠡᠯᠡᠯᠴᠡᠬᠦ ᠪᠠᠷ ᠨᠢᠭᠡᠨ ᠠᠯᠮᠣᠷᠠᠳ ᠢ ᠲᠡᠭᠷᠢ ᠦᠭᠡᠳᠡ ᠰᠢᠳᠡᠭᠡᠳ ᠠᠯᠮᠣᠷᠠᠳ ᠣᠨᠠᠵᠣ ᠢᠷᠡᠬᠦ ᠬᠤᠭᠤᠷᠣᠨᠳᠣ᠂ ᠠᠯᠯᠠᠾ ᠲᠡᠭᠷᠢ ᠴᠢᠮ᠎ᠡ ᠳᠤ ᠵᠠᠭᠤᠨ ᠣᠳᠠᠭ᠎ᠠ ᠦᠯᠵᠡᠢ ᠪᠡᠯᠭᠡ ᠬᠦᠷᠳᠡᠭᠡᠵᠦ ᠠᠮᠵᠢᠬᠤ ᠶᠣᠮ ᠭᠡᠳᠡᠭ᠃ ᠲᠡᠭᠡᠪᠡᠯ ᠨᠢᠭᠡ ᠵᠢᠯ ᠤᠨ ᠬᠤᠭᠤᠴᠠᠭᠠᠨ ᠲᠣᠲᠣᠷ᠎ᠠ ᠮᠢᠩᠭ᠎ᠠ ᠲᠦᠮᠡᠨᠳᠡ ᠠᠪᠣᠷᠠᠯ ᠬᠠᠶᠢᠷᠠᠯᠠᠵᠣ ᠠᠮᠵᠢᠬᠤ ᠪᠢᠰᠢᠥ᠃ ᠵᠠ ᠬᠠᠭᠠᠨᠳᠠᠨ ᠮᠢᠨᠢ ᠢᠩᠬᠢᠵᠦ ᠪᠣᠳᠣᠪᠠᠯ ᠰᠡᠳᠭᠢᠯ ᠠᠮᠠᠷᠠᠬᠤ ᠪᠢᠵᠡ︾ ᠭᠡᠪᠡ᠃    ᠲᠡᠭᠦᠨ ᠤ ᠦᠭᠡ ᠬᠠᠯᠳᠣ ᠲᠠᠭᠤᠰᠣᠳᠠᠯ᠎ᠠ᠂ ᠲᠡᠳᠡ ᠺᠠᠷᠢᠬᠠᠰ ᠨᠠᠭᠤᠷ ᠤᠨ ᠬᠦᠪᠡᠭᠡ ᠪᠠᠷ ᠨᠢᠭᠡ ᠬᠠᠷ᠎ᠠ ᠮᠣᠷᠢ ᠣᠨᠣᠵᠣ᠂ ᠴᠠᠭᠠᠨ ᠬᠤᠪᠴᠠᠰᠣ ᠡᠮᠦᠰᠦᠭᠰᠡᠨ ᠬᠦᠮᠦᠨ ᠢᠨᠠᠭᠰᠢ ᠴᠢᠨᠡᠭᠡ ᠮᠡᠳᠡᠨ ᠲᠣᠪᠳᠣᠯᠭᠠᠵᠣ ᠪᠠᠶᠢᠭ᠎ᠠ ᠶᠢ ᠣᠯᠵᠣ ᠬᠠᠷᠠᠵᠠᠢ᠃ ᠲᠡᠷᠡ ᠬᠦᠮᠦᠨ ᠲᠣᠪᠳᠣᠯᠣᠭᠰᠠᠭᠠᠷ ᠶᠠᠷᠭᠠᠴᠢᠳ ᠤᠨ ᠢᠰᠡᠭᠡᠢ ᠮᠠᠶᠢᠬᠠᠨ ᠤ ᠬᠠᠵᠠᠭᠤ ᠪᠠᠷ ᠬᠡᠨᠡᠭ ᠴᠦ ᠦᠭᠡᠢ ᠲᠣᠪᠳᠣᠯᠣᠨ ᠦᠩᠭᠡᠷᠡᠪᠡ᠃ ᠶᠡᠷᠦ ᠶᠢᠨ ᠬᠦᠮᠦᠰ ᠪᠣᠯ ᠠᠳᠡ ᠢᠷᠡᠭᠰᠡᠭᠡᠷ ᠵᠠᠪᠠᠯ ᠮᠣᠷᠢᠨ ᠠᠴᠠ ᠪᠠᠨ ᠪᠠᠭᠤᠬᠤ ᠶᠣᠰᠣᠳᠠᠢ ᠶᠣᠮ᠃ ᠭᠡᠳᠡᠯ᠎ᠡ ᠲᠡᠷᠡ ᠬᠦᠮᠦᠨ ᠦᠷᠬᠦᠯᠵᠢᠯᠡᠨ ᠲᠣᠪᠳᠣᠯᠵᠣ ᠬᠠᠭᠠᠨ ᠤ ᠰᠢᠳᠠᠷ ᠬᠠᠮᠠᠭᠠᠯᠠᠭᠴᠢ ᠶᠢᠨ ᠬᠠᠷᠠᠭᠤᠯ ᠤᠨ ᠭᠠᠵᠠᠷ ᠢᠶᠠᠷ ᠴᠦ ᠠᠵᠢᠭ ᠦᠭᠡᠢ ᠲᠣᠪᠳᠣᠯᠣᠨ ᠦᠩᠭᠡᠷᠡᠵᠡᠢ᠃ ᠲᠦᠷᠪᠡᠨ ᠲᠠᠯ᠎ᠠ ᠪᠠᠷ ᠨᠢ ᠪᠠᠶᠢᠭᠰᠠᠨ ᠬᠠᠭᠠᠨ ᠤ ᠵᠠᠰᠠᠭᠤᠯ⑦ ᠲᠡᠭᠦᠨ ᠶᠠᠭᠠᠬᠢᠵᠣ ᠬᠤᠷᠢᠭᠯᠠᠭᠰᠠᠨ ᠪᠣᠯᠪᠠᠴᠣ ᠲᠡᠶᠢᠯᠦᠭᠡ ᠦᠭᠡᠢ᠂ ᠲᠡᠷᠡ ᠰᠢᠭᠤᠳ ᠬᠠᠭᠠᠨ  ᠤ ᠡᠮᠦᠨ᠎ᠡ ᠢᠷᠡᠵᠦ ᠦᠨᠳᠦᠷ ᠲᠠᠭᠤ ᠪᠠᠷ ᠬᠠᠰᠬᠢᠷᠣᠨ ᠬᠡᠯᠡᠭᠰᠡᠨ ᠨᠢ᠄ ︽ᠡᠮᠢᠷ ᠲᠡᠮᠦᠷ ᠨᠢᠭᠡᠨᠳᠡ ᠦᠬᠦᠴᠢᠭᠡᠯ᠎ᠡ᠂ ᠲᠡᠷᠡ ᠣᠲᠷᠠᠷ ᠲᠤ ᠦᠬᠦᠵᠡᠢ︾ ᠭᠡᠵᠦ ᠬᠡᠯᠡᠵᠦ ᠪᠠᠷᠠᠭᠠᠳ ᠲᠠᠬᠢᠨ ᠴᠢᠨᠠᠭᠰᠢ ᠮᠣᠷᠢ ᠲᠠᠰᠢᠭᠤᠷᠳᠠᠨ ᠲᠣᠪᠳᠣᠯᠭᠠᠨ ᠶᠠᠪᠣᠪᠠ᠃ ᠵᠠᠯᠭᠠᠭᠠᠳ ᠮᠠᠰᠢ ᠣᠯᠠᠨ ᠮᠣᠷᠢᠳᠠᠨ ᠲᠣᠮᠢᠯᠠᠨ ᠲᠡᠭᠦᠨ ᠤ ᠬᠤᠶᠢᠨ᠎ᠠ ᠠᠴᠠ ᠨᠡᠬᠡᠭᠦᠯᠦᠭᠰᠡᠨ ᠪᠣᠯᠪᠠᠴᠣ᠂ ᠬᠡᠨ ᠬᠦᠮᠦᠨ ᠴᠦ ᠭᠦᠢᠴᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠶᠠᠮᠠᠷᠴᠣ ᠴᠢᠮᠡᠭᠡ ᠣᠯᠵᠣ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠴᠠᠵᠣ ᠢᠷᠡᠪᠡ ᠭᠡᠳᠡᠭ ᠶᠣᠮ᠃ ᠲᠦᠴᠢᠨ ᠲᠠᠪᠣᠨ ᠡᠳᠦᠷ ᠦᠩᠭᠡᠷᠡᠭᠡᠳ ᠰᠠᠶ᠋ᠢ ᠦᠨᠡᠨ ᠴᠢᠮᠡᠭᠡ ᠣᠯᠵᠣ᠂ ᠡᠮᠢᠷ ᠲᠡᠮᠦᠷ ᠦᠨᠡᠬᠡᠷ ᠣᠲᠷᠠᠷ ᠲᠤ ᠦᠬᠦᠪᠡ ᠭᠡᠳᠡᠭ ᠢ ᠮᠡᠳᠡᠵᠡᠢ᠃ ᠢᠩᠬᠢᠭᠡᠳ ᠰᠠᠶ᠋ᠢ ᠬᠠᠭᠠᠨ ᠤ ᠰᠡᠳᠬᠢᠯ ᠲᠠᠶᠢᠪᠣᠰᠢᠷᠠᠭᠰᠠᠨ ᠶᠣᠮ᠃    ᠾᠢᠳᠢᠷ ᠬᠤᠵᠠ ᠬᠠᠭᠠᠨ ᠪᠣᠯ ᠾᠢᠵᠢᠷ ᠲᠣᠭᠠᠯᠠᠯ ᠤᠨ 770 ᠣᠨ ᠠᠴᠠ ᠡᠮᠦᠨ᠎ᠡ ᠮᠡᠨᠳᠦᠯᠡᠵᠦ᠂᠂ ᠲᠡᠭᠡᠷᠡᠬᠢ ᠬᠡᠷᠡᠭ ᠣᠴᠢᠷ ᠪᠣᠯ ᠾᠢᠵᠢᠷ ᠲᠣᠭᠠᠯᠠᠯ ᠤᠨ807 ᠣᠨ ᠳᠤ ᠡᠭᠦᠰᠦᠭᠰᠡᠨ ᠶᠣᠮ᠃ ᠭᠡᠶ᠎ᠡ ᠮᠡᠨ ᠤ ᠡᠨᠡᠬᠦ ᠬᠠᠭᠠᠨ᠂ ᠡᠮᠢᠷ ᠲᠡᠮᠦᠷ ᠦᠬᠦᠭᠰᠡᠨ ᠤ ᠰᠡᠬᠦᠯᠡᠷ ᠪᠠᠰᠠ ᠬᠡᠳᠦᠢ ᠣᠷᠳᠣ ᠬᠤᠭᠤᠴᠠᠭ᠎ᠠ ᠠᠮᠢᠳᠣᠷᠠᠵᠣ ᠠᠭᠰᠠᠨ ᠢ ᠬᠡᠨ ᠴᠦ ᠮᠡᠳᠡᠬᠦ ᠦᠭᠡᠢ ᠪᠣᠯᠵᠠᠢ᠃ ᠡᠨᠡ ᠪᠦᠬᠦᠨ ᠢ ᠵᠦᠪᠬᠡᠨ ᠠᠯᠯᠠᠾ ᠲᠡᠭᠷᠢ ᠯᠠ ᠲᠣᠲᠣᠷᠬᠠᠢ ᠮᠡᠳᠡᠬᠦ ᠪᠣᠶ᠎ᠠ᠃    ᠡᠨᠡ ᠬᠠᠭᠠᠨ ᠰᠠᠭᠤᠷᠢᠨ ᠳᠤ ᠰᠠᠭᠤᠬᠤ ᠦᠶ᠎ᠡ ᠳᠤ᠂ ᠬᠠᠮᠠᠷ ᠠᠳ᠋ᠳᠢᠨ ᠬᠠᠭᠠᠨ ᠰᠠᠭᠤᠷᠢᠨ ᠢ ᠪᠣᠯᠢᠶᠠᠨ ᠡᠵᠡᠯᠡᠭᠰᠡᠨ ᠪᠠ ᠡᠮᠢᠷ ᠲᠡᠮᠦᠷ ᠤᠨ ᠲᠦᠷᠢᠮᠡᠬᠡᠶᠢᠯᠡᠯ ᠵᠡᠷᠭᠡ ᠠᠴᠠ ᠪᠣᠯᠵᠣ᠂ ᠣᠯᠣᠰ ᠭᠡᠷ ᠨᠣᠷᠠᠨ ᠰᠦᠢᠷᠡᠬᠦ ᠳᠤ ᠬᠦᠷᠴᠡᠢ᠃ ᠡᠳᠦᠬᠡ ᠣᠳᠣ ᠲᠠᠬᠢᠨ ᠠᠮᠢᠯᠠᠨ ᠰᠡᠷᠭᠦᠵᠦ ᠬᠦᠭᠵᠢᠨ ᠪᠡᠬᠡᠵᠢᠵᠦ ᠡᠬᠢᠯᠡᠪᠡ᠃ ᠨᠢᠭᠡᠨᠳᠡ ᠬᠠᠶᠠᠭᠳᠠᠨ ᠣᠷᠬᠢᠭᠳᠠᠭᠰᠠᠨ ᠬᠠᠭᠤᠴᠢᠨ ᠲᠦᠷᠢᠮ ᠪᠦᠬᠦᠨ ᠰᠡᠷᠭᠦᠵᠦ᠂ ᠬᠠᠭᠠᠨᠳᠣ ᠣᠯᠣᠰ ᠤᠨ ᠲᠦᠷᠦ ᠵᠠᠰᠠᠭ ᠢᠵᠠᠭᠤᠷᠳᠠᠨ ᠤ ᠬᠠᠷᠢᠶᠠᠳᠣ ᠶᠣᠰᠣᠨ ᠲᠠᠬᠢᠨ ᠣᠣᠯ ᠶᠣᠰᠣᠭᠠᠷ ᠬᠡᠷᠡᠭᠵᠢᠭᠳᠡᠪᠡ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠬᠦᠮᠦᠰ ᠤᠨ ᠠᠩᠬᠠᠷᠣᠯ  ᠳᠤ ᠣᠷᠣᠭᠰᠠᠨ ᠬᠡᠷᠡᠭ ᠭᠡᠪᠡᠯ ᠡᠮᠢᠷ ᠬᠤᠳᠠᠶᠢᠳᠠ ᠦᠪᠡᠷ ᠤᠨ ᠭᠠᠷ ᠲᠤ ᠪᠠᠶᠢᠭᠰᠠᠨ ᠡᠷᠬᠡ ᠮᠡᠳᠡᠯ ᠢᠶᠠᠨ ᠴᠦ ᠣᠣᠯ ᠶᠣᠰᠣᠭᠠᠷ ᠬᠠᠭᠠᠨ ᠡᠵᠡᠨ ᠳᠤ ᠪᠣᠴᠠᠭᠠᠨ ᠦᠭᠭᠦᠪᠡ᠃    ᠴᠢᠩᠬᠢᠰ ᠬᠠᠭᠠᠨ ᠤ ᠨᠣᠶᠠᠷᠬᠠᠯ ᠤᠨ ᠦᠶ᠎ᠡ ᠳᠤ ᠡᠮᠢᠷ ᠬᠤᠳᠠᠶᠢᠳᠠ ᠶᠢᠨ ᠲᠡᠭᠡᠳᠦᠰ ᠲᠤ ᠲᠣᠯᠣᠭᠠᠨ ᠵᠦᠢᠯ ᠤᠨ ᠣᠨᠴᠠᠭᠠᠢ ᠡᠷᠬᠡ ︵ᠲᠦᠷᠺ ᠬᠡᠯᠡᠨ ᠳᠤ ᠮᠠᠨᠰᠠᠪ ᠭᠡᠳᠡᠭ᠃ Mansab︶ ᠣᠯᠭᠤᠵᠣ ᠪᠠᠶᠢᠭᠰᠠᠨ ᠠᠵᠠᠢ᠃    ᠨᠢᠭᠡ᠄ ᠬᠡᠩᠬᠡᠷᠭᠡ ᠬᠡᠷᠡᠭᠯᠡᠬᠦ ᠡᠷᠬᠡ᠃    ᠬᠤᠶᠠᠷ᠄ ᠲᠤᠭ ᠬᠡᠷᠡᠭᠯᠡᠬᠦ ᠡᠷᠬᠡ᠂ ᠲᠦᠷᠺ ᠬᠡᠯᠡᠨ ᠳᠤ ᠡᠮᠦᠨᠡᠬᠢ ᠶᠢ ᠨᠢ ᠨᠠᠺᠠᠷ᠎ᠠ  ︵nakara︶ ᠭᠡᠵᠦ᠂ ᠬᠤᠶᠢᠨᠠᠬᠢ ᠶᠢ ᠨᠢ ᠲᠦᠮᠡᠨ ᠤ ᠲᠤᠭ ︵tumen tugh︶ ᠭᠡᠳᠡᠭ ᠠᠵᠠᠢ᠃    ᠭᠤᠷᠪᠠ᠄ ᠲᠡᠭᠦᠨ ᠤ ᠬᠤᠶᠠᠷ ᠰᠢᠳᠠᠷ ᠬᠦᠮᠦᠰ ᠪᠠᠰᠠ ᠬᠤᠰᠢᠭᠤᠨ ᠲᠤᠭ ︵kushun-tugh︶ ᠬᠡᠷᠡᠭᠯᠡᠵᠦ ᠪᠣᠯᠳᠠᠭ ᠡᠷᠬᠡ ᠲᠠᠢ᠂ ᠬᠤᠰᠢᠭᠤᠨ ᠲᠤᠭ ᠨᠢ Chapar tugh ᠲᠠᠢ ᠢᠵᠢᠯ ᠣᠳᠬ᠎ᠠ ᠲᠠᠢ ᠦᠭᠡ ᠠᠵᠠᠢ᠃    ᠲᠦᠷᠪᠡ᠄ ᠲᠡᠷᠡ ᠦᠪᠡᠷ ᠤᠨ ᠪᠡᠶ᠎ᠡ ᠨᠢ ᠬᠠᠭᠠᠨ ᠤ ᠬᠤᠷᠠᠯᠳᠠᠢ ᠲᠡᠭᠡᠷ᠎ᠡ ᠬᠤᠷ ︵Kur︶ ᠠᠭᠰᠣᠵᠣ⑧ ᠪᠣᠯᠳᠠᠭ ᠡᠷᠬᠡ ᠲᠠᠢ᠂ ᠬᠡᠳᠦᠶᠢᠪᠡᠷ ᠮᠣᠩᠭᠤᠯ ᠬᠦᠮᠦᠨ ᠤ ᠲᠠᠳᠬᠠᠯ ᠢᠶᠠᠷ ᠶᠠᠮᠠᠷᠪᠠ ᠬᠦᠮᠦᠨ ᠬᠠᠭᠠᠨ ᠤ ᠡᠮᠦᠨ᠎ᠡ ᠬᠤᠷ ᠠᠭᠰᠣᠵᠣ ᠪᠣᠯᠳᠠᠭ ᠦᠭᠡᠢ ᠲᠦᠷᠢᠮ ᠲᠠᠢ ᠭᠡᠪᠡᠴᠦ ᠬᠠᠭᠠᠨ ᠦᠪᠡᠰᠦᠪᠡᠨ ᠪᠣᠯ ᠬᠤᠷ ᠢᠶᠠᠨ ᠭᠠᠷ ᠲᠠᠭᠠᠨ ᠪᠠᠷᠢᠵᠣ ᠪᠠᠶᠢᠭ᠎ᠠ ᠦᠶ᠎ᠡ ᠳᠤ ᠡᠷᠬᠡᠳᠡᠨ ᠲᠦᠰᠢᠮᠡᠯ ᠬᠤᠷ ᠠᠭᠰᠣᠵᠣ ᠪᠣᠯᠣᠨ᠎ᠠ᠃    ᠲᠠᠪᠤ᠄ ᠬᠠᠭᠠᠨ ᠲᠠᠢ ᠬᠠᠮᠳᠣ ᠠᠪᠠ ᠣᠷᠣᠪᠠᠯ ᠪᠠᠰᠠ ᠪᠣᠰᠣᠳ ᠲᠣᠭᠳᠠᠭᠰᠠᠨ ᠣᠨᠴᠠᠭᠠᠢ ᠡᠷᠬᠡ ᠲᠠᠢ᠃    ᠵᠢᠷᠭᠤᠭ᠎ᠠ᠄ ᠮᠣᠩᠭᠤᠯ ᠤᠨ ᠪᠦᠬᠦ ᠡᠮᠢᠷ ᠨᠡᠷ ᠢ ᠠᠬᠠᠯᠠᠬᠤ ᠡᠷᠬᠡ ᠲᠠᠢ᠂ ᠬᠠᠭᠠᠨ ᠵᠠᠷᠯᠢᠭ ᠲᠣᠲᠣᠷ᠎ᠠ ᠲᠡᠭᠦᠨ ᠤ ᠨᠡᠷ᠎ᠡ ᠶᠢᠨ ᠡᠮᠦᠨ᠎ᠡ ︽ᠮᠣᠩᠭᠤᠯ ᠣᠯᠣᠰ ᠤᠨ ᠰᠠᠷᠳᠠ⑩︾ ᠭᠡᠳᠡᠭ ᠴᠣᠯᠠ ᠨᠡᠮᠡᠳᠡᠭ᠃    ᠲᠣᠯᠤᠭ᠎ᠠ᠄ ᠬᠠᠭᠠᠨ ᠤ ᠡᠮᠨᠦᠨ᠎ᠡ ᠪᠣᠰᠣᠳ ᠡᠮᠢᠷ ᠤᠨ ᠰᠠᠭᠤᠳᠠᠯ ᠲᠡᠬᠦᠨ ᠤ ᠰᠠᠭᠤᠳᠠᠯ ᠠᠴᠠ ᠨᠢᠭᠡ ᠰᠣᠮᠣᠨ ᠤ ᠬᠢᠷᠢ ᠬᠤᠯᠠ ᠵᠠᠢ ᠳᠤ ᠪᠠᠶᠢᠬᠤ ᠶᠣᠰᠣᠳᠠᠢ᠃    ᠲᠡᠭᠡᠷᠡᠬᠢ ᠲᠣᠯᠣᠭᠠᠨ ᠵᠦᠢᠯ ᠤᠨ ᠣᠨᠴᠠ ᠡᠷᠬᠡ ᠶᠢ ᠴᠢᠩᠬᠢᠰ ᠬᠠᠭᠠᠨ ᠠᠴᠠ ᠣᠷᠳᠣᠪ ᠳᠤ ᠱᠠᠩᠨᠠᠭᠰᠠᠨ ᠶᠣᠮ᠃ ᠡᠮᠢᠷ ᠪᠣᠷᠣᠯᠵᠢ ᠬᠢᠪᠴᠠᠭ ᠤᠨ ᠲᠠᠯ᠎ᠠ ᠨᠣᠳᠤᠭ ᠠᠴᠠ ᠲᠣᠬᠤᠯᠭ᠎ᠠ ᠲᠡᠮᠦᠷ ᠬᠠᠭᠠᠨ ᠢ ᠡᠷᠢᠨ ᠠᠪᠴᠢᠷᠠᠵᠣ ᠲᠡᠭᠦᠨ ᠢ ᠬᠦᠷᠢᠶᠡᠯᠡᠨ ᠬᠠᠭᠠᠨ ᠰᠠᠭᠤᠷᠢᠨ ᠳᠤ ᠭᠠᠷᠭᠠᠭᠰᠠᠨ ᠤ ᠰᠡᠬᠦᠯᠡᠷ᠂ ᠲᠣᠬᠤᠯᠭ᠎ᠠ ᠲᠡᠮᠦᠷ ᠬᠠᠭᠠᠨ ᠲᠡᠭᠦᠨ ᠤ ᠭᠠᠪᠢᠶ᠎ᠠ ᠵᠢᠳᠭᠦᠯ ᠢ ᠬᠦᠬᠢᠬᠦᠯᠬᠦ ᠶᠢᠨ ᠡᠭᠦᠳᠡᠨ ᠠᠴᠠ ᠡᠨᠡᠬᠦ ᠲᠣᠯᠣᠭᠠᠨ ᠵᠣᠷᠪᠣᠰ ᠣᠨᠴᠠᠭᠠᠢ ᠡᠷᠬᠡ ᠶᠢᠨ ᠲᠡᠭᠡᠷ᠎ᠡ ᠪᠠᠰᠠ ᠬᠤᠶᠠᠷ ᠵᠦᠢᠯ ᠨᠡᠮᠡᠨ ᠱᠠᠩᠨᠠᠵᠠᠢ᠃ ᠡᠶᠢᠮᠦ ᠠᠴᠠ ᠡᠮᠢᠷ ᠪᠣᠷᠣᠯᠵᠢ ᠳᠤ ᠶᠢᠰᠦᠨ ᠵᠦᠢᠯ ᠤᠨ ᠣᠨᠴᠠᠭᠠᠢ ᠡᠷᠳᠡ ᠲᠠᠢ ᠪᠣᠯᠪᠠ᠃ ᠰᠢᠨ᠎ᠡ ᠨᠡᠮᠡᠭᠰᠡᠨ ᠬᠤᠶᠠᠷ ᠵᠦᠢᠯ ᠤᠨ ᠣᠨᠴᠠᠭᠠᠢ ᠡᠷᠬᠡ ᠨᠢ ᠨᠢᠭᠡᠳᠦᠭᠡᠷ ᠲᠤ᠂ ᠲᠡᠭᠦᠨ ᠳᠤ ᠬᠠᠭᠠᠨ ᠳᠤ ᠡᠷᠭᠦᠨ ᠠᠶᠢᠯᠠᠳᠬᠠᠬᠤ ᠦᠭᠡᠢ ᠪᠠᠷ ᠬᠤᠰᠢᠭᠤ ᠡᠮᠢᠷ ᠠᠴᠠ ᠲᠣᠷᠣᠭᠰᠢᠬᠢ ᠨᠣᠶᠠᠳ ︵ᠮᠢᠩᠭᠠᠨ ᠤ ᠨᠣᠶᠠᠳ︶ ᠢ ᠲᠣᠮᠢᠯᠠᠨ ᠣᠭᠴᠠᠷᠠᠭᠤᠯᠬᠤ ᠡᠷᠬᠡ ᠲᠠᠢ᠂ ᠬᠤᠶᠠᠷ ᠲᠤ᠂ ᠪᠣᠷᠣᠯᠵᠢ ᠪᠠ ᠲᠡᠭᠦᠨ ᠤ ᠬᠤᠶᠢᠴᠢᠰ ᠶᠢᠰᠦᠨᠳᠡ ᠶᠠᠯ᠎ᠠ ᠣᠯᠣᠭᠰᠠᠨ ᠴᠦ ᠡᠷᠡᠭᠦᠳᠡᠨ ᠰᠢᠭᠦᠵᠦ ᠪᠣᠯᠬᠤ ᠦᠭᠡᠢ ᠵᠢᠷᠣᠮ ᠲᠠᠢ᠃ ᠠᠷᠪᠠᠳᠣᠭᠠᠷ ᠣᠳᠠᠭ᠎ᠠ ᠶᠠᠯ᠎ᠠ ᠬᠬᠢᠭᠰᠡᠨ ᠪᠣᠯ ᠰᠢᠭᠦᠨ ᠠᠰᠠᠭᠤᠬᠤ ᠲᠠᠭᠠᠨ ᠲᠣᠣᠷᠠᠬᠢ ᠮᠡᠳᠦ ᠵᠢᠷᠣᠮ ᠢᠶᠠᠷ ᠰᠢᠭᠦᠬᠦ ᠪᠣᠯᠣᠨ᠎ᠠ᠃ ᠲᠠᠷᠣᠢ᠂ ᠶᠠᠯᠠᠳᠠᠨ ᠢᠶᠠᠨ ᠬᠤᠶᠠᠷ ᠨᠠᠰᠣᠳᠡᠢ ︵ᠲᠠᠭ᠎ᠠ︶ ᠴᠠᠭᠠᠨ ᠮᠣᠷᠢᠨ ᠳᠤ ᠣᠨᠣᠭᠤᠯᠵᠣ᠂ ᠮᠣᠷᠢᠨ ᠤ ᠲᠣᠭᠤᠷᠠᠢ ᠲᠣᠣᠷ᠎ᠠ ᠶᠢᠰᠦᠨ ᠲᠠᠪᠬᠤᠷ ᠴᠠᠭᠠᠨ ᠢᠰᠡᠭᠡᠢ ᠲᠡᠪᠢᠰᠦᠨ᠂ ᠶᠠᠯᠠᠳᠠᠨ ᠲᠠᠭᠠᠨ ᠬᠦᠨᠳᠦᠳᠭᠡᠯ ᠦᠵᠡᠬᠦᠯᠦᠨ᠂ ᠬᠠᠭᠠᠨ ᠨᠢ ᠦᠨᠳᠦᠷ ᠰᠠᠭᠤᠳᠠᠯ ᠠᠴᠠ ᠲᠡᠭᠦᠨ  ᠢ ᠰᠢᠬᠦᠨ ᠠᠰᠠᠭᠤᠨ᠎ᠠ᠃ ᠬᠡᠷᠪᠡ ᠰᠢᠬᠦᠨ ᠠᠰᠠᠭᠤᠵᠣ ᠪᠠᠷᠠᠭᠠᠳ ᠶᠠᠯᠠᠳᠠᠨ ᠦᠨᠡᠬᠡᠷ ᠦᠬᠦᠬᠦ ᠶᠠᠯ᠎ᠠ ᠲᠠᠢ ᠮᠦᠷᠳᠡᠭᠡᠨ ᠡᠮᠦᠨᠡᠬᠢ ᠶᠢᠰᠦᠨ ᠣᠳᠠᠭᠠᠨ ᠤ ᠠᠯᠳᠠᠯ ᠨᠢ ᠪᠦᠷ ᠭᠡᠷᠡᠴᠢᠯᠡᠭᠳᠡᠭᠰᠡᠨ ᠪᠠᠶᠢᠪᠠᠯ᠂ ᠬᠤᠶᠠᠷ ᠡᠮᠢᠷ ᠲᠣᠮᠢᠯᠠᠨ ᠬᠢᠨᠠᠭᠤᠯᠵᠣ ᠪᠠᠶᠢᠭᠠᠳ ᠶᠠᠯᠠᠳᠠᠨ ᠤ ᠪᠠᠨ ᠴᠢᠰᠦᠨ ᠰᠣᠳᠠᠰᠣ ᠶᠢ ᠬᠠᠭᠠᠯᠠᠵᠣ᠂ ᠪᠦᠬᠦ ᠪᠡᠶ᠎ᠡ ᠶᠢᠨ ᠴᠢᠰᠦ ᠶᠢ ᠨᠢ ᠣᠷᠣᠰᠬᠠᠨ ᠭᠠᠷᠭᠠᠵᠣ ᠪᠠᠶᠢᠮᠠᠨ ᠦᠬᠦᠭᠦᠯᠦᠨ᠎ᠡ᠃ ᠶᠠᠯᠠᠳᠠᠨ ᠦᠬᠦᠭᠰᠡᠨ ᠤ ᠰᠡᠭᠦᠯᠡᠷ ᠬᠤᠶᠠᠷ ᠡᠮᠢᠷ ᠨᠢ ᠦᠨᠳᠦᠷ ᠲᠠᠭᠤ ᠪᠠᠷ ᠣᠬᠢᠯᠠᠬᠤ ᠣᠷᠣᠰᠢᠭᠤᠯᠭ᠎ᠠ ᠶᠢᠨ ᠶᠣᠰᠣᠯᠠᠯ ᠲᠣᠮᠳᠠ ᠲᠡᠭᠦᠨ ᠤ ᠬᠡᠬᠦᠷ ᠢ ᠰᠠᠶ᠋ᠢ ᠰᠢᠯᠵᠢᠬᠦᠯᠦᠨ ᠣᠷᠣᠰᠢᠭᠤᠯᠣᠨ᠎ᠠ⑾ ᠃    ᠡᠨᠡ ᠶᠢᠰᠦᠨ ᠵᠦᠢᠯ ᠤᠨ ᠣᠨᠴᠠᠭᠠᠢ ᠡᠷᠬᠡ ᠶᠢ ᠲᠣᠬᠤᠯᠭ᠎ᠠ ᠲᠡᠮᠦᠷ ᠬᠠᠭᠠᠨ ᠤ ᠬᠠᠰ ᠲᠠᠮᠠᠭ᠎ᠠ ᠶᠢ ᠲᠠᠷᠣᠭᠰᠠᠨ ᠵᠠᠷᠯᠢᠭ ᠪᠢᠴᠢᠭ ᠲᠤ ᠲᠡᠮᠳᠡᠭᠯᠡᠵᠦ ᠪᠠᠶᠢᠨ᠎ᠠ᠃ ᠪᠢ ᠨᠢᠭᠡ ᠣᠳᠠᠭ᠎ᠠ ᠦᠪᠡᠷ ᠤᠨ ᠨᠢᠳᠣ ᠪᠠᠷ ᠲᠡᠭᠦᠨ ᠢ ᠣᠯᠵᠣ ᠦᠵᠡᠭᠰᠡᠨ ᠶᠣᠮ᠃ ᠣᠴᠢᠷ ᠨᠢ ᠲᠡᠭᠦᠨ ᠢ ᠮᠢᠨᠦ ᠭᠡᠷ ᠲᠦᠷᠦᠯ ᠲᠣᠲᠣᠷ᠎ᠠ ᠣᠯᠠᠮᠵᠢᠯᠠᠨ ᠬᠠᠳᠠᠭᠠᠯᠣᠵᠣ ᠪᠠᠶᠢᠪᠠ᠃ ᠡᠴᠦᠰ ᠲᠡᠭᠡᠨ ᠮᠢᠨᠦ ᠡᠴᠢᠭᠡ ︵ᠠᠯᠯᠠᠾ ᠲᠡᠭᠦᠨ ᠳᠤ ᠠᠮᠣᠷ ᠲᠦᠪᠰᠢᠨ ᠬᠠᠶᠢᠷᠠᠯᠠᠬᠤ ᠪᠣᠯᠳᠣᠭᠠᠢ︶ ᠳᠤ ᠣᠯᠠᠮᠵᠢᠯᠠᠭᠳᠠᠨ ᠢᠷᠡᠭᠰᠡᠨ ᠪᠣᠯᠪᠠᠴᠣ᠂ ᠰᠢᠪᠠᠨᠢ ᠬᠠᠭᠠᠨ ᠤ ᠰᠠᠮᠠᠭᠤᠷᠠᠯ ᠤᠨ ᠦᠶ᠎ᠡ ᠳᠤ ᠡᠪᠳᠡᠭᠰᠡᠨ ᠪᠣᠶᠣ ᠠᠯᠳᠠᠭᠳᠠᠪᠠ᠃ ᠡᠨᠡᠬᠦ ᠵᠠᠷᠯᠢᠭ ᠪᠢᠴᠢᠭ ᠢ ᠮᠣᠩᠭᠤᠯ ᠦᠰᠦᠭ ᠢᠶᠠᠷ ᠪᠢᠴᠢᠭᠰᠡᠨ ᠪᠦᠭᠡᠳ ᠣᠨ ᠵᠢᠯ ᠢ ᠨᠢ ᠭᠠᠭ᠋ᠠᠢ ᠵᠢᠯ ᠂ ᠺᠦᠨᠳᠦᠱ ᠲᠤ ᠪᠢᠴᠢᠪᠡᠢ⑿ ᠬᠡᠮᠡᠨ ᠪᠢᠴᠢᠵᠣ ᠠᠮᠣᠢ᠃ ᠡᠨᠡᠬᠦ ᠪᠢᠴᠢᠭ ᠴᠦ ᠲᠣᠬᠤᠯᠭ᠎ᠠ ᠲᠡᠮᠦᠷ ᠬᠠᠭᠠᠨ ᠤ ᠨᠣᠶᠠᠷᠬᠠᠯ ᠤᠨ ᠲᠣᠲᠣᠷ᠎ᠠ ᠺᠦᠨᠳᠦᠱ ᠴᠦ ᠪᠠᠭᠳᠠᠵᠣ ᠪᠠᠶᠢᠭᠰᠠᠨ ᠢ ᠬᠠᠷᠠᠭᠤᠯᠵᠣ ᠪᠠᠶᠢᠨ᠎ᠠ᠃ ᠬᠠᠷᠠᠮᠰᠠᠯ ᠲᠠᠢ ᠨᠢ ᠡᠳᠦᠬᠡ ᠠᠮᠢᠳᠣ ᠰᠡᠷᠡᠭᠦᠨ ᠪᠠᠶᠢᠭ᠎ᠠ ᠮᠣᠩᠭᠤᠯᠴᠣᠳ ᠳᠣᠳᠣᠷ᠎ᠠ ᠡᠨᠡᠬᠦ ᠬᠠᠭᠠᠨ ᠤ ᠰᠠᠭᠤᠷᠢᠨ ᠳᠤ ᠪᠠᠶᠢᠭᠰᠠᠨ ᠲᠣᠲᠣᠷᠠᠬᠠᠢ ᠬᠡᠷᠡᠭ ᠣᠴᠢᠷ ᠢ ᠮᠡᠳᠡᠬᠦ ᠬᠦᠮᠦᠨ ᠴᠦ ᠨᠢᠭᠡᠨᠳᠡ ᠦᠭᠡᠢ ᠪᠣᠯᠵᠠᠢ᠃ ᠡᠶᠢᠮᠦ ᠠᠴᠠ ᠪᠢ ︽ᠲᠡᠮᠦᠷ ᠤᠨ ᠲᠠᠶᠢᠨ ᠤ ᠭᠠᠪᠢᠶ᠎ᠠ ᠶᠢᠨ ᠲᠡᠮᠳᠡᠭᠯᠡᠯ︾ ᠲᠠᠬᠢ ᠠᠭᠤᠯᠭ᠎ᠠ ᠶᠢ ᠲᠣᠰ ᠨᠣᠮ ᠳᠠᠭᠠᠨ ᠬᠠᠭᠤᠯᠣᠨ ᠣᠷᠣᠭᠤᠯᠵᠣ ᠪᠠᠶᠢᠨ᠎ᠠ᠃    ᠾᠢᠳᠢᠷ ᠬᠤᠵᠠ ᠬᠠᠭᠠᠨ ᠡᠮᠢᠷ ᠪᠣᠷᠣᠯᠵᠢ ᠶᠢᠨ ᠬᠦᠪᠡᠭᠦᠨ ᠬᠤᠳᠠᠶᠢᠳᠠ ᠶᠢᠨ ᠬᠠᠪᠰᠣᠷᠣᠯᠭ᠎ᠠ ᠪᠠᠷ ᠬᠠᠮᠠᠷ ᠠᠳ᠋ᠳᠢᠨ ᠤ ᠪᠠᠷᠰ ᠤᠨ ᠠᠮᠠᠨ ᠠᠴᠠ ᠮᠣᠯᠳᠣᠷᠢᠨ ᠭᠠᠷᠴᠣ᠂ ᠬᠤᠵᠢᠮ ᠬᠠᠭᠠᠨ ᠰᠠᠭᠤᠷᠢᠨ ᠢᠶᠠᠨ ᠡᠵᠡᠯᠡᠭᠰᠡᠨ ᠪᠣᠯᠬᠤᠷ ᠲᠡᠭᠦᠨ ᠳᠤ ᠲᠠᠬᠢᠨ ᠪᠠᠰᠠ ᠭᠤᠷᠪᠠᠨ ᠵᠦᠢᠯ ᠤᠨ ᠣᠨᠴᠠᠭᠠᠢ ᠡᠷᠬᠡ ᠨᠡᠮᠡᠨ ᠣᠯᠭᠤᠵᠠᠢ᠃ ᠡᠶᠢᠮᠦ ᠠᠴᠠ ᠡᠮᠢᠷ ᠪᠣᠷᠣᠯᠵᠢ ᠳᠤ ᠨᠡᠶᠢᠳᠡ ᠠᠷᠪᠠᠨ ᠬᠤᠶᠠᠷ ᠵᠦᠢᠯ ᠤᠨ ᠣᠨᠴᠠᠭᠠᠢ ᠡᠷᠬᠡ ᠲᠠᠢ ᠶᠣᠮ ᠲᠡᠭᠦᠨ ᠤ ᠠᠭᠤᠯᠭ᠎ᠠ ᠨᠢ ᠲᠣᠣᠷᠠᠬᠢ ᠮᠡᠳᠦ᠂ ᠠᠷᠪᠠ᠄ ᠬᠤᠷᠢᠮ ᠨᠠᠶᠢᠷ ᠲᠡᠭᠡᠷ᠎ᠡ ᠬᠠᠭᠠᠨ ᠤ ᠵᠠᠰᠠᠭᠤᠯ ᠵᠢᠱᠢᠶᠡᠯᠡᠵᠦ ᠪᠠᠶᠢᠭ᠎ᠠ ᠦᠶ᠎ᠡ ᠳᠤ ᠡᠮᠢᠷ ᠬᠤᠳᠠᠶᠢᠳᠠ ᠦᠪᠡᠷ ᠤᠨ ᠬᠤᠶᠠᠷ ᠲᠠᠭᠠᠯᠳᠠ ᠪᠠᠨ ᠲᠣᠮᠢᠯᠠᠨ ᠵᠢᠱᠢᠶᠡᠨ ᠳᠤ ᠣᠷᠣᠯᠴᠠᠭᠤᠯᠵᠣ᠂ ᠨᠢᠭᠡ ᠨᠢ ᠪᠠᠷᠠᠭᠤᠨ ᠭᠠᠷ ᠲᠠᠯ᠎ᠠ ᠳᠤ ᠵᠣᠭᠰᠣᠨ᠂ ᠬᠠᠭᠠᠨ ᠳᠤ ᠬᠤᠨᠳᠠᠭ᠎ᠠ ᠬᠡᠮᠨᠡᠨ᠎ᠡ᠃ ᠨᠦᠬᠦᠭᠡ ᠨᠢᠭᠡ ᠨᠢ ᠵᠡᠭᠦᠨ ᠭᠠᠷ ᠲᠠᠯ᠎ᠠ ᠳᠤ ᠵᠣᠭᠰᠣᠨ ᠲᠣᠰᠬᠠᠶᠢᠯᠠᠨ ᠡᠮᠢᠷ ᠬᠤᠳᠠᠶᠢᠳᠠ ᠳᠤ ᠬᠤᠨᠳᠠᠭ᠎ᠠ ᠬᠡᠮᠨᠡᠳᠡᠭ ᠠᠵᠠᠢ᠃ ᠠᠷᠪᠠ ᠨᠢᠭᠡ᠄ ᠠᠯᠢᠪᠠ ᠵᠠᠷᠯᠢᠭ ᠪᠢᠴᠢᠭ ᠲᠤ ᠪᠦᠷ ᠡᠮᠢᠷ ᠬᠤᠳᠠᠶᠢᠳᠠ ᠶᠢᠨ ᠲᠠᠮᠠᠭ᠎ᠠ ᠶᠢ ᠲᠠᠷᠣᠬᠤ ᠶᠣᠰᠣᠳᠠᠢ᠃ ᠬᠡᠯᠡᠯᠭᠡᠨ ᠦᠭᠡᠢ ᠪᠦᠷ ᠬᠠᠭᠠᠨ ᠲᠠᠮᠠᠭ᠎ᠠ ᠶᠢᠨ ᠲᠠᠷᠠᠭ᠎ᠠ ᠲᠠᠷᠣᠬᠤ ᠶᠣᠮ᠃ ᠠᠷᠪᠠᠨ ᠬᠤᠶᠠᠳᠣᠭᠠᠷ ᠵᠣᠷᠪᠣᠰ ᠣᠨᠴᠠᠭᠠᠢ ᠡᠷᠬᠡ ᠶᠢᠨ ᠪᠣᠳᠠᠳᠣ ᠠᠭᠤᠯᠭ᠎ᠠ  ᠶᠢ ᠶᠠᠮᠠᠷᠪᠠ ᠪᠢᠴᠢᠭ ᠬᠠᠷ᠎ᠠ ᠳᠤ ᠪᠦᠷ ᠪᠢᠴᠢᠵᠦ ᠲᠡᠮᠳᠡᠭᠯᠡᠭᠰᠡᠨ ᠦᠭᠡᠢ ᠶᠣᠮ᠃    ᠡᠨᠡ ᠪᠣᠯ ᠲᠠᠷᠣᠢ ᠡᠮᠢᠷ ᠬᠤᠳᠠᠶᠢᠳᠠ ᠳᠤ ᠣᠯᠭᠤᠭᠰᠠᠨ ᠵᠠᠷᠯᠢᠭ ᠪᠢᠴᠢᠭ ᠲᠤ ᠲᠡᠮᠳᠡᠭᠯᠡᠵᠦ ᠪᠠᠶᠢᠭ᠎ᠠ ᠠᠷᠪᠠᠨ ᠬᠤᠶᠠᠷ ᠵᠦᠢᠯ ᠤᠨ ᠣᠨᠴᠠᠭᠠᠢ ᠡᠷᠬᠡ ᠮᠡᠳᠡᠯ ᠪᠣᠯᠣᠨ᠎ᠠ᠃ ᠡᠮᠢᠷ ᠬᠤᠳᠠᠶᠢᠳᠠ ᠨᠠᠰᠣ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠡᠨᠡᠬᠦ ᠵᠠᠷᠯᠢᠭ ᠪᠢᠴᠢᠭ ᠢ ᠲᠡᠭᠦᠨ ᠤ ᠬᠦᠪᠡᠭᠦᠨ ᠡᠮᠢᠷ · ᠮᠠᠬᠠᠮᠠᠳ᠋ · ᠱᠠᠾ · ᠬᠦᠷᠭᠡᠨ⒀ ᠳᠤ ᠣᠯᠠᠮᠵᠢᠯᠠᠭᠳᠠᠨ ᠢᠷᠡᠵᠡᠢ᠃ ᠮᠠᠬᠠᠮᠠᠳ᠋ · ᠱᠠᠾ ᠨᠠᠰᠣ ᠪᠠᠷᠠᠭᠰᠠᠨ ᠳᠤ ᠲᠠᠬᠢᠨ ᠲᠡᠭᠦᠨ ᠤ ᠬᠦᠪᠡᠭᠦᠨ ᠰᠠᠶ᠋ᠢᠳ᠋ · ᠠᠯᠢ · ᠬᠦᠷᠭᠡᠨ ᠳᠤ ᠣᠯᠠᠮᠵᠢᠯᠠᠭᠳᠠᠨ ᠢᠷᠡᠪᠡ᠃ ᠲᠡᠭᠦᠨ ᠢ ᠨᠠᠰᠣ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠲᠠᠬᠢᠨ ᠲᠡᠭᠦᠨ ᠤ ᠬᠦᠪᠡᠭᠦᠨ ᠮᠠᠬᠠᠮᠠᠳ᠋ · ᠬᠠᠶᠢᠳᠠᠷ · ᠮᠢᠷᠽᠠ · ᠬᠦᠷᠭᠡᠨ ᠳᠤ ᠣᠯᠠᠮᠵᠢᠯᠠᠭᠳᠠᠨ ᠢᠷᠡᠵᠡᠢ᠃ ᠲᠡᠭᠦᠨ ᠢ ᠨᠠᠰᠣ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠲᠠᠬᠢᠨ ᠲᠡᠭᠦᠨ ᠤ ᠬᠦᠪᠡᠭᠦᠨ ᠮᠠᠬᠠᠮᠠᠳ᠋ · ᠬᠤᠰᠢᠨ · ᠮᠢᠷᠽᠠ · ᠬᠦᠷᠭᠡᠨ ᠳᠤ ᠣᠯᠠᠮᠵᠢᠯᠠᠭᠳᠠᠨ ᠢᠷᠡᠪᠡ᠃ ᠮᠠᠬᠠᠮᠠᠳ᠋ · ᠬᠤᠰᠢᠨ · ᠮᠢᠷᠽᠠ · ᠬᠦᠷᠭᠡᠨ ᠪᠣᠯ ᠲᠣᠰ ᠨᠣᠮ ᠤᠨ ᠵᠣᠬᠢᠶᠠᠭᠴᠢ ᠪᠣᠯᠬᠤ ᠮᠢᠷᠽᠠ · ᠬᠠᠶᠢᠳᠠᠷ ᠮᠢᠨᠦ ᠡᠴᠢᠭᠡ ᠶᠣᠮ᠃    ᠮᠢᠨᠦ ᠡᠴᠢᠭᠡ ᠳᠤ ᠵᠣᠪᠠᠯᠠᠩ ᠲᠣᠬᠢᠶᠠᠭᠰᠠᠨ ᠤ ᠰᠡᠬᠦᠯᠡᠷ᠂ ᠮᠢᠨᠦ ᠠᠪᠠᠭ᠎ᠠ ᠰᠠᠶ᠋ᠢᠳ᠋ · ᠮᠠᠬᠠᠮᠠᠳ᠋ · ᠮᠢᠷᠽᠠ ᠱᠠᠰᠢᠨ  ᠤ ᠬᠠᠮᠠᠭᠠᠯᠠᠭᠴᠢ ᠡᠵᠡᠨ ᠰᠣᠯᠲ᠋ᠠᠨ · ᠰᠠᠶ᠋ᠢᠳ᠋ ᠬᠠᠭᠠᠨ ᠢ ᠳᠦᠰᠢᠪᠡ᠃ ᠡᠨᠡ ᠱᠠᠰᠢᠨ ᠤ ᠬᠠᠮᠠᠭᠠᠯᠠᠭᠴᠢ ᠬᠠᠭᠠᠨ ᠠᠴᠠ ᠪᠣᠢ ᠪᠦᠬᠦᠢ ᠡᠳᠡᠭᠡᠷ ᠣᠨᠴᠠᠭᠠᠢ ᠡᠷᠬᠡ ᠶᠢ ᠪᠦᠷ ᠮᠢᠨᠦ ᠠᠪᠠᠭ᠎ᠠ ᠳᠤ ᠰᠢᠯᠵᠢᠬᠦᠯᠦᠨ ᠬᠦᠷᠳᠡᠭᠡᠭᠰᠡᠨ ᠶᠣᠮ᠃ ᠡᠳᠡᠭᠡᠷ ᠬᠡᠷᠡᠭ ᠤᠨ ᠲᠣᠬᠠᠢ ᠲᠣᠲᠣᠷᠬᠠᠢ ᠠᠭᠤᠯᠭ᠎ᠠ ᠶᠢ ᠲᠣᠰ ᠨᠣᠮ ᠤᠨ ᠬᠤᠶᠠᠳᠣᠭᠠᠷ ᠪᠣᠳᠢ ᠳᠤ ᠨᠢᠭᠡᠨᠳᠡ ᠲᠣᠲᠣᠷᠬᠠᠶᠢᠯᠠᠨ ᠦᠬᠦᠯᠡᠵᠡᠢ᠃ ᠡᠳᠡᠭᠡᠷ ᠣᠨᠴᠠᠭᠠᠢ ᠡᠷᠬᠡ ︵ᠬᠠᠮᠤᠭ ᠠᠩᠬᠠᠨ ᠤ ᠲᠣᠯᠣᠭᠠᠨ ᠵᠦᠢᠯ ᠤᠨ ᠣᠨᠴᠠᠭᠠᠢ ᠡᠷᠬᠡ ᠶᠢ ᠵᠢᠭᠠᠵᠣ ᠪᠠᠶᠢᠨ᠎ᠠ︶ ᠾᠢᠵᠢᠷ ᠲᠣᠭᠠᠯᠠᠯ ᠤᠨ 625 ᠣᠨ᠂ ᠲᠠᠷᠣᠢ ᠴᠢᠩᠬᠢᠰ ᠬᠠᠭᠠᠨ ᠴᠠᠭ ᠦᠶ᠎ᠡ ᠠᠴᠠ ᠡᠬᠢᠯᠡᠭᠡᠳ ᠂ ᠡᠳᠦᠬᠡ ᠶᠢᠨ ᠾᠢᠵᠢᠷ ᠲᠣᠭᠠᠯᠠᠯ ᠤᠨ 940 ᠣᠨ ᠤ ᠮᠦᠾᠷᠠᠮ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠪᠣᠯᠵᠣ᠂ ᠰᠠᠶ᠋ᠢᠳ᠋ ᠬᠠᠭᠠᠨ ᠨᠠᠰᠣ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠷᠠᠰᠢᠳ᠋ ᠬᠠᠭᠠᠨ ᠬᠠᠭᠠᠨ ᠰᠠᠭᠤᠷᠢᠨ ᠢ ᠵᠠᠯᠭᠠᠮᠵᠢᠯᠠᠨ᠂ ᠮᠢᠨᠦ ᠠᠪᠠᠭ᠎ᠠ  ᠶᠢ ᠠᠯᠠᠬᠤ ᠦᠶ᠎ᠡ ᠪᠣᠯᠳᠠᠯ᠎ᠠ ᠬᠦᠴᠦᠨ ᠲᠠᠢ ᠪᠠᠶᠢᠭᠰᠠᠨ ᠶᠣᠮ᠃ ᠡᠨᠡ ᠶᠡᠭᠡ ᠵᠣᠪᠠᠯᠠᠩ ᠡᠭᠦᠰᠦᠭᠡᠳ᠂ ᠰᠣᠯᠲ᠋ᠠᠨ · ᠷᠠᠰᠢᠳ᠋ ᠬᠠᠭᠠᠨ᠂ ᠬᠠᠭᠠᠨ ᠰᠠᠭᠤᠷᠢᠨ ᠳᠤ ᠭᠠᠷᠣᠭᠰᠠᠨ ᠠᠴᠠ ᠮᠢᠨᠦ ᠲᠡᠭᠡᠳᠦ ᠶᠢᠨ ᠬᠠᠭᠤᠴᠢᠨ ᠵᠢᠷᠣᠮ ᠲᠣᠭᠳᠠᠭᠠᠯ ᠪᠦᠷ ᠡᠪᠳᠡᠭᠳᠡᠨ ᠣᠰᠠᠳᠣᠵᠠᠢ᠃    ᠠᠯᠢᠪᠠ ᠶᠢ ᠡᠭᠦᠳᠦᠭᠴᠢ ᠦᠷᠦᠰᠢᠶᠡᠯᠳᠣ ᠠᠯᠯᠠᠾ ᠳᠤ ᠲᠠᠯᠠᠷᠬᠠᠮᠣ︕ ᠨᠠᠳᠠ ᠶᠢ ᠡᠨᠡ ᠶᠢᠷᠲᠢᠨᠴᠦ ᠳᠤ ᠢᠷᠡᠬᠦ ᠦᠶᠡᠰ ᠲᠡᠷᠡ ᠨᠠᠳᠠ ᠶᠢ ᠨᠢᠭᠡᠨ ᠮᠣᠩᠭᠤᠯ ᠬᠠᠭᠠᠳ ᠢ ᠳᠦᠰᠢᠬᠦ ᠦᠭᠡᠢ ᠡᠷᠬᠡ ᠴᠢᠯᠦᠭᠡᠳᠦ ᠬᠦᠮᠦᠨ ᠪᠣᠯᠭᠠᠪᠠ᠃ ᠲᠡᠭᠦᠨ ᠤ ᠨᠠᠳᠠ ᠬᠦᠷᠳᠡᠭᠡᠭᠰᠡᠨ ︽ᠣᠨᠴᠠᠭᠠᠢ ᠡᠷᠬᠡ︾ ᠭᠡᠪᠡᠯ ᠡᠨᠡ ᠨᠠᠰᠣᠨ ᠳᠠᠭᠠᠨ ᠡᠵᠡᠨ ᠤ ᠬᠠᠶᠢᠷ᠎ᠠ ᠳᠤ ᠬᠦᠷᠳᠡᠨ᠂ ᠡᠷᠬᠢᠬᠦ ᠲᠦᠷᠦᠯ ᠳᠡᠭᠡᠨ ᠦᠷᠦᠰᠢᠶᠡᠯᠳᠦ ᠲᠠᠯᠠᠢ ᠶᠢᠨ ᠨᠢᠭᠡ ᠲᠣᠰᠣᠯ ᠣᠰᠣ ᠪᠣᠯᠭᠠᠪᠠ᠃ ᠠᠯᠯᠠᠾ ᠲᠡᠭᠷᠢ  ᠶᠢ ᠬᠦᠰᠡᠬᠦ ᠨᠢ᠂ ᠮᠢᠨᠦ ᠪᠡᠶ᠎ᠡ ᠴᠣᠭᠴᠠ ᠶᠢ ᠡᠷᠬᠡ ᠴᠢᠯᠦᠭᠡ ᠲᠠᠢ ᠪᠣᠯᠭᠠᠭᠰᠠᠨ ᠠᠳᠠᠯᠢ ᠪᠠᠷ᠂ ᠮᠢᠨᠦ ᠰᠡᠳᠬᠢᠯ ᠵᠢᠷᠦᠬᠡ ᠶᠢ ᠡᠷᠬᠡ ᠴᠢᠯᠦᠭᠡ ᠲᠠᠢ ᠪᠣᠶᠠᠨ ᠵᠢᠷᠭᠠᠯ ᠡᠳ᠋ᠯᠡᠬᠦ ᠪᠣᠯᠭᠠᠬᠤ ᠠᠵᠢᠶᠠᠮᠣ᠃    ᠰᠢᠯᠦᠭ ᠲᠤ ᠦᠬᠦᠯᠡᠭᠰᠡᠨ ᠠᠨᠣᠶᠢᠷᠲᠢᠨᠴᠦ ᠶᠢᠨ ᠬᠦᠮᠦᠨ ᠪᠦᠷ ᠭᠤᠮᠣᠳᠠᠯ ᠦᠯᠡᠭᠦᠳᠡᠢ᠂ᠶᠠᠲᠠᠷᠠᠭᠰᠠᠨ ᠪᠢ ᠴᠦ ᠣᠯᠠᠨ ᠠᠴᠠ ᠪᠠᠨ ᠦᠨᠦᠴᠢᠷᠡᠵᠡᠢ᠃ᠣᠯᠠᠭᠠᠨ ᠲᠣᠭᠤᠰᠣᠨ᠎ᠠ ᠲᠡᠷᠪᠡᠬᠦ ᠰᠡᠳᠬᠢᠯ ᠠᠷᠢᠯᠣᠭᠠᠳ᠂ᠦᠯᠡᠳᠡᠭᠰᠡᠨ ᠴᠠᠭ ᠢᠶᠠᠷ ᠦᠨᠡᠨ ᠰᠡᠳᠬᠢᠯ ᠢ ᠢᠯᠡᠷᠡᠬᠦᠯᠰᠦᠭᠡᠢ᠃ᠠᠶ᠎ᠠ ᠬᠤᠬᠤᠢ︕ᠶᠠᠭᠤᠨ ᠢᠯᠡᠭᠦᠴᠡ ᠦᠭᠦᠯᠡᠬᠦ ᠪᠣᠢ᠂ᠠᠯᠯᠠᠾ ᠲᠡᠭᠷᠢ ᠯᠠ ᠴᠣᠷᠢ ᠶᠢᠨ ᠭᠠᠭᠴᠠ ᠠᠪᠣᠷᠠᠯ︕ᠲᠣᠰ ᠪᠦᠯᠦᠭ ᠤᠨ ᠲᠠᠶᠢᠯᠪᠣᠷᠢ① ᠡᠨᠡᠬᠦ ᠬᠦᠬᠡᠯᠳᠠᠱ ᠭᠡᠳᠡᠭ ᠨᠡᠷ᠎ᠡ ᠦᠭᠡ ᠶᠢ ᠫᠧᠷᠰ ᠬᠡᠯᠡᠨ ᠳᠤ Kukiltash ᠭᠡᠬᠦ ᠪᠣᠶᠣ ᠡᠰᠡᠬᠦᠯ᠎ᠡ ᠪᠠᠰᠠdashGukildash ᠭᠡᠳᠡᠭ ᠪᠠᠶᠢᠨ᠎ᠠ᠃ ᠭᠡᠳᠡᠯ᠎ᠡ ᠲᠦᠷᠺ ᠬᠡᠯᠡᠨ ᠳᠤ ᠬᠠᠷᠢᠨ Bukuldash ᠭᠡᠳᠡᠭ ᠠᠵᠠᠢ᠃ ᠲᠡᠭᠦᠨ ᠤ ᠣᠳᠬ᠎ᠠ ᠨᠢ ᠠᠬ᠎ᠠ ᠲᠡᠭᠦᠥ ᠶᠢᠨ ᠬᠤᠯᠪᠣᠭ᠎ᠠ ᠭᠡᠬᠦ ᠪᠣᠶᠣ ᠲᠦᠷᠦᠭᠰᠡᠨ ᠠᠬ᠎ᠠ ᠲᠡᠭᠦᠥ ᠨᠡᠷ ᠭᠡᠳᠡᠭ ᠣᠳᠬ᠎ᠠ ᠲᠠᠢ ᠦᠭᠡ ᠠᠵᠠᠢ᠃ ᠡᠶᠢᠮᠦ ᠠᠴᠠ ᠬᠤᠶᠢᠨᠠᠬᠢ ᠠᠪᠢᠶᠠᠯᠯᠠᠭ᠎ᠠ ᠨᠢ ᠵᠦᠪ ᠪᠠᠶᠢᠨ᠎ᠠ᠃② ᠰᠢᠷ᠎ᠠ ᠣᠶᠢᠭᠤᠷ ᠤᠨ ᠣᠯᠣᠰ᠂ ᠨᠣᠳᠤᠭ ᠨᠢ ᠢᠥᠢ ᠲᠢᠶᠠᠨ ᠪᠠ ᠵᠣᠷᠵᠠᠨ ᠤ ᠬᠤᠭᠤᠷᠣᠨᠳᠣ ᠪᠠᠶᠢᠨ᠎ᠠ᠃ ᠮᠢᠩ ᠣᠯᠣᠰ ᠤᠨ ᠲᠡᠣᠬᠡᠨ ᠳᠤ ᠲᠡᠮᠳᠡᠭᠯᠡᠭᠰᠡᠨ ᠢᠶᠠᠷ ᠲᠡᠭᠦᠨ ᠤ ᠨᠣᠳᠤᠭ ᠮᠢᠩᠭᠠᠨ ᠭᠠᠵᠠᠷ ᠠᠭᠤᠳᠠᠮ ᠪᠠᠶᠢᠵᠣ᠂ ᠭᠠᠨᠰᠣ ᠬᠦᠷᠳᠡᠯ᠎ᠡ ᠮᠢᠩᠭ᠎ᠠ ᠲᠠᠪᠣᠨ ᠵᠠᠭᠤᠨ ᠭᠠᠵᠠᠷ ᠠᠮᠣᠢ᠂ ᠵᠡᠭᠦᠨᠰᠢ ᠬᠠᠨ ᠳ᠋ᠦᠩ ᠳᠤ ᠲᠣᠯᠵᠣ᠂ ᠪᠠᠷᠠᠭᠤᠨᠰᠢ ᠲᠡᠭᠷᠢ ᠠᠭᠤᠯᠠᠨ ᠳᠤ ᠬᠦᠷᠴᠦ᠂ ᠣᠮᠠᠷᠠᠰᠢ ᠱᠠ ᠵᠸᠥ ᠬᠦᠷᠳᠡᠭ᠂ ᠡᠮᠦᠨ᠎ᠡ ᠬᠢᠯᠢ ᠨᠢ ᠲᠦᠪᠡᠳ ᠬᠦᠷᠦᠨ᠎ᠡ᠃ ᠣᠷᠳᠣᠳᠠ ᠰᠠᠭᠤᠬᠤ ᠭᠡᠷ ᠪᠠᠷᠢᠯᠭ᠎ᠠ ᠦᠭᠡᠢ᠂ ᠢᠰᠡᠬᠡᠢ ᠮᠠᠶᠢᠬᠠᠨ ᠳᠤ ᠰᠠᠭᠤᠵᠣ᠂ ᠦᠷᠬᠦᠯᠵᠢᠳᠡ ᠨᠡᠭᠦᠳᠡᠯᠯᠡᠳᠡᠭ ᠬᠦᠮᠦᠰ ᠠᠵᠠᠢ ᠭᠡᠵᠡᠢ᠃③ ᠵᠣᠷᠵᠠᠨ ᠪᠣᠯ ᠯᠣᠪ ᠨᠠᠭᠤᠷ ᠪᠠ ᠢᠥᠢ ᠲᠢᠶᠠᠨ ᠤ ᠬᠤᠭᠤᠷᠣᠨᠳᠣ ᠪᠠᠶᠢᠵᠠᠢ᠃④ ᠯᠣᠪ ᠨᠠᠭᠤᠷ ᠺᠠᠲ᠋ᠠᠺ ᠭᠡᠵᠦ ᠡᠮᠦᠨ᠎ᠡ ᠨᠢᠬᠡᠨᠳᠡ ᠲᠠᠶᠢᠯᠪᠣᠷᠢᠯᠠᠵᠣ ᠦᠩᠭᠡᠷᠡᠪᠡ᠃⑤ ᠾᠢᠳᠢᠷ ᠬᠤᠵᠠ ᠬᠠᠭᠠᠨ ᠤ ᠬᠠᠭᠠᠨ ᠰᠠᠭᠤᠷᠢᠨ ᠳᠤ ᠰᠠᠭᠤᠭᠰᠠᠨ ᠲᠣᠬᠠᠢ ᠪᠠᠷᠲ᠋ᠥᠯᠢᠲ ᠤᠨ ᠨᠣᠳᠠᠯᠠᠬᠤ ᠪᠠᠷ ᠯᠠᠪᠳᠠᠢ1389 ᠣᠨ ᠢᠶᠠᠷ ᠨᠢᠭᠡᠨᠳᠡ ᠬᠠᠭᠠᠨ ᠰᠠᠭᠤᠪᠠ ᠭᠡᠵᠡᠢ᠃ ᠡᠭᠦᠨ ᠢ ᠲᠡᠭᠦᠨ ᠤ ᠵᠣᠬᠢᠶᠠᠭᠰᠠᠨ ︽ᠲᠣᠯᠣᠭᠠᠨ ᠭᠤᠣᠯ ᠤᠨ ᠲᠡᠣᠬᠡᠨ ᠬᠤᠷᠢᠶᠠᠩᠭᠤᠢ︾ ᠭᠡᠳᠡᠭ ᠨᠣᠮ ᠤᠨ ᠣᠷᠣᠰ ᠬᠡᠪᠯᠡᠯ ᠤᠨ ᠬᠤᠶᠠᠳᠣᠭᠠᠷ ᠪᠣᠳᠢ ᠶᠢᠨ ᠨᠢᠭᠡᠳᠦᠭᠡᠷ ᠬᠤᠪᠢᠶᠠᠷᠢ ᠲᠡᠪᠳᠡᠷ ᠤᠨ 82 ᠳ᠋ᠣᠭᠠᠷ ᠨᠢᠭᠤᠷ ᠲᠤ ᠦᠵᠡ᠃ ᠮᠢᠷᠽᠠ · ᠬᠠᠶᠢᠳᠠᠷ ᠤᠨ ᠵᠣᠬᠢᠶᠠᠭᠰᠠᠨ ︽ᠷᠠᠰᠢᠳ᠋  ᠶᠢᠨ ᠲᠡᠣᠬᠡ︾ ︵ᠣᠷᠣᠰ ᠬᠡᠯᠡᠨ ᠤ ᠬᠡᠪᠯᠡᠯ︶ ᠳᠤ ᠾᠢᠳᠢᠷ ᠬᠤᠵᠠ ᠬᠠᠭᠠᠨ ᠢ ᠾᠢᠵᠢᠷ ᠲᠣᠭᠠᠯᠠᠯ ᠤᠨ770 ᠣᠨ  ᠠᠴᠠ ᠡᠮᠦᠨ᠎ᠡ ᠮᠡᠨᠳᠦᠯᠡᠵᠡᠢ ᠭᠡᠵᠦ ᠬᠡᠯᠡᠪᠡ᠃ ᠭᠡᠪᠡᠴᠦ ᠪᠣᠳᠠᠳᠠᠢ ᠠᠯᠢ ᠣᠨ ᠭᠡᠵᠦ ᠬᠡᠯᠡᠭᠰᠡᠨ ᠦᠭᠡᠢ᠃ ᠡᠭᠦᠨ ᠠᠴᠠ ᠦᠵᠡᠪᠡᠯ ᠪᠠᠷᠲ᠋ᠥᠯᠢᠲ ᠤᠨ ᠡᠰᠢᠯᠡᠭᠰᠡᠨ ᠣᠣᠯ ᠨᠣᠮ ᠨᠢ ᠷᠣᠰ ᠤᠨ ᠠᠩᠭ᠍ᠯᠢᠴᠢᠯᠠᠭᠰᠠᠨ ᠨᠣᠮ ᠲᠠᠢ ᠨᠢᠭᠡ ᠡᠬᠡ ᠪᠢᠰᠢ ᠪᠣᠯᠣᠯᠳᠠᠢ᠃⑥ ︽ᠨᠢᠭᠡᠨ ᠬᠡᠰᠡᠭ ᠬᠡᠮᠡᠷᠯᠢᠭ ᠪᠠ ᠨᠢᠭᠡᠨ ᠲᠣᠯᠣᠭᠠᠢ ᠬᠦᠬᠡ ᠦᠬᠡᠷ︾ ᠭᠡᠳᠡᠭ ᠦᠭᠡ ᠴᠣᠬᠤᠮ ᠶᠠᠮᠠᠷ ᠣᠳᠬ᠎ᠠ  ᠲᠠᠢ ᠬᠡᠷᠡᠭᠯᠡᠭᠰᠡᠨ ᠢ ᠮᠡᠳᠡᠭᠰᠡᠨ ᠦᠭᠡᠢ᠂ ᠪᠠᠷᠤᠭ ᠡᠷᠬᠡ ᠮᠡᠳᠡᠯ ᠤᠨ ᠪᠡᠯᠭᠡ ᠲᠡᠮᠳᠡᠭ ᠴᠦ ᠶᠣᠮ ᠦᠦ᠃ ᠶᠠᠮᠠᠷ ᠪᠠᠶᠢᠭᠰᠠᠨ ᠴᠦ ᠣᠣᠯ ᠦᠰᠭ ᠢ ᠨᠢ ᠭᠠᠯᠢᠭᠴᠢᠯᠠᠨ ᠪᠢᠴᠢᠭᠰᠡᠨ ᠨᠢ ᠠᠰᠠᠭᠤᠳᠠᠯ ᠦᠭᠡᠢ᠃⑦ ᠵᠠᠰᠠᠭᠤᠯ ᠭᠡᠵᠦ ᠬᠠᠭᠠᠨ ᠤ ᠰᠢᠳᠠᠷ ᠴᠡᠷᠢᠭ ᠢ ᠵᠢᠠᠭᠵᠣ ᠬᠡᠯᠡᠵᠡᠢ᠃ ᠯᠠᠲ᠋ᠢᠨ ᠦᠰᠦᠭ ᠢᠶᠠᠷ yasavul ᠭᠡᠵᠦ ᠪᠢᠴᠢᠵᠦ ᠪᠠᠶᠢᠭ᠎ᠠ ᠨᠢ ᠵᠠᠷᠢᠮ ᠲᠦᠷᠺ ᠬᠡᠯᠡᠨ ᠳᠤ ᠮᠣᠩᠭᠤᠯ ᠬᠡᠯᠡᠨ ᠤ ᠵ᠊ ᠶᠢ ᠶ᠊ ᠪᠠᠷ ᠠᠪᠢᠯᠠᠬᠤ ᠠᠴᠠ ᠪᠣᠯᠣᠭᠰᠠᠨ ᠪᠠᠶᠢᠭ᠎ᠠ ᠶᠣᠮ᠃ ᠲᠣᠬᠠᠢ ᠶᠢᠨ ᠦᠶ᠎ᠡ ᠳᠤ ᠵᠠᠰᠠᠭᠤᠯ ᠭᠡᠳᠡᠭ ᠨᠢ ᠬᠠᠭᠠᠨ ᠤ ᠰᠢᠳᠠᠷ ᠴᠡᠷᠢᠭ᠂ ᠲᠠᠷᠣᠢ ᠴᠢᠩᠬᠢᠰ ᠬᠠᠭᠠᠨ ᠤ ᠦᠶ᠎ᠡ ᠶᠢᠨ ᠬᠡᠰᠢᠭᠳᠡᠨ ᠲᠣᠷᠬᠠᠭ ᠬᠡᠪᠳᠡᠭᠦᠯ ᠮᠡᠳᠦᠰ ᠰᠢᠲᠠᠷ ᠴᠡᠷᠢᠭ ᠢ ᠵᠢᠭᠠᠵᠣ ᠪᠠᠶᠢᠭ᠎ᠠ ᠠᠵᠠᠢ᠃ ᠠᠳᠡ ᠬᠢᠳᠠᠳᠴᠢᠯᠠᠭᠴᠢ ᠠᠴᠠ ᠲᠠᠭᠠᠭᠰᠠᠳ ᠭᠡᠬᠦ ᠪᠣᠶᠣ ᠬᠢᠳᠠᠳ ᠡᠷᠳᠡᠨ ᠤ ᠬᠡᠯᠡ ᠪᠠᠷ ᡁᠢ ᠶᠢᠨ ᠡᠣ ︵执金吾︶ ᠭᠡᠵᠦ ᠣᠷᠴᠢᠭᠤᠯᠵᠠᠢ᠃ ᡁᠢ ᠶᠢᠨ ᠡᠣ ᠭᠡᠪᠡᠯ ᠡᠷᠳᠡᠨ ᠤ ᠬᠢᠳᠠᠳ ᠬᠠᠭᠠᠳ ᠤᠨ ᠰᠢᠳᠠᠷ ᠬᠠᠮᠠᠭᠠᠯᠠᠭᠴᠢ ᠨᠡᠷ ᠨᠢ ᠠᠯᠳᠠᠨ ᠲᠦᠮᠦᠭᠡ ︵ᠰᠦᠬᠡ︶ ᠭᠡᠳᠡᠭ ᠶᠣᠰᠣᠯᠠᠯ ᠤᠨ ᠪᠡᠯᠭᠡ ᠲᠡᠮᠳᠡᠭ ᠪᠣᠯᠣᠭᠰᠠᠨ ᠵᠡᠪᠰᠡᠭ ᠡᠷᠭᠦᠵᠦ ᠶᠠᠮᠠᠷᠪᠠ ᠬᠦᠮᠦᠨ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠲᠡᠭᠦᠨ ᠤ ᠬᠠᠵᠠᠭᠤ ᠪᠠᠷ ᠦᠩᠭᠡᠷᠡᠵᠦ ᠪᠣᠯᠬᠤ ᠦᠭᠡᠢ ᠲᠦᠷᠢᠮ ᠲᠠᠢ ᠬᠦᠮᠦᠰ ᠶᠣᠮ᠂ ᠡᠶᠢᠮᠦ ᠠᠴᠠ ᠲᠡᠳᠡ ᠪᠣᠯ ᠬᠠᠭᠠᠨ ᠢᠶᠠᠨ ᠬᠠᠮᠠᠭᠠᠯᠠᠬᠤ ᠬᠠᠳᠠᠭᠤ ᠡᠭᠦᠷᠭᠡ ᠳᠣᠰᠢᠶᠠᠯ ᠢ ᠭᠦᠢᠴᠡᠳᠬᠡᠵᠦ ᠪᠠᠶᠢᠭ᠎ᠠ ᠰᠢᠳᠠᠷ ᠬᠠᠮᠠᠭᠠᠯᠠᠭᠴᠢᠳ ᠢ ᠪᠣᠯᠣᠨ᠎ᠠ᠃⑧ ᠬᠤᠷ ᠠᠭᠰᠣᠬᠤ ᠭᠡᠳᠡᠭ ᠡᠨᠡ ᠣᠨᠴᠠᠭᠠᠢ ᠡᠷᠬᠡ ᠶᠢ ᠠᠩᠭ᠍ᠯᠢᠴᠢᠯᠠᠭᠴᠢ ᠪᠠ ᠬᠢᠳᠠᠳᠴᠢᠯᠠᠭᠴᠢ ᠠᠴᠠ ᠲᠣᠩ ᠣᠯᠠᠨ ᠲᠠᠶᠢᠯᠪᠣᠷᠢ ᠬᠢᠵᠡᠢ᠃ ᠶᠠᠭᠤᠨᠠᠢ ᠬᠤᠪᠢᠩ ᠮᠡᠳᠦ ᠡᠳ᠋᠂ ᠪᠦᠰᠡᠨ ᠠᠴᠠ ᠪᠠᠨ ᠲᠡᠭᠦᠵᠢᠯᠡᠬᠦ ᠬᠤᠪᠢᠩ ᠪᠣᠯᠣᠯᠳᠠᠢ ᠭᠡᠬᠦ ᠵᠡᠷᠭᠡ ᠪᠠᠷ ᠲᠠᠶᠢᠯᠪᠣᠷᠢᠯᠠᠬᠤ ᠪᠠᠷ ᠣᠷᠣᠯᠳᠣᠵᠠᠢ᠃ ᠬᠠᠭᠠᠨ ᠤ ᠡᠮᠦᠨ᠎ᠡ ᠬᠤᠷ ᠠᠭᠰᠣᠬᠤ ᠭᠡᠪᠡᠯ ᠨᠢᠭᠡᠨ ᠣᠨᠴᠠᠭᠠᠢ ᠡᠷᠬᠡ ᠭᠡᠬᠦ ᠪᠣᠶᠣ ᠬᠠᠭᠠᠨ ᠤ ᠲᠣᠲᠣᠨᠣ ᠰᠢᠳᠠᠷ ᠤᠨ ᠪᠡᠯᠭᠡ ᠲᠡᠮᠳᠡᠭ ᠪᠣᠯᠬᠤ ᠶᠣᠮ᠃ ᠭᠡᠪᠡᠴᠦ ᠴᠢᠩᠬᠢᠰ ᠬᠠᠭᠠᠨ ᠤ ᠦᠶ᠎ᠡ ᠶᠢᠨ ᠣᠯᠠᠨ ᠰᠠᠶᠢᠳ ᠲᠦᠰᠢᠮᠡᠳ᠂ ᠣᠨᠴᠠᠭᠠᠶᠢᠯᠠᠨ ᠰᠢᠳᠠᠷ ᠠᠨᠳᠠ ᠨᠦᠭᠦᠷ ᠲᠡᠭᠡᠨ ᠬᠦᠷᠳᠡᠭᠡᠭᠰᠡᠨ ᠣᠨᠴᠠᠭᠠᠢ ᠡᠷᠬᠡ ᠶᠢ ︽ᠮᠣᠩᠭᠤᠯ ᠤᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ︾ ᠳᠤ ᠵᠣᠷᠪᠦᠰᠴᠢᠯᠠᠨ ᠲᠡᠮᠳᠡᠭᠯᠡᠭᠰᠡᠨ ᠦᠭᠡᠢ᠂ ᠵᠦᠪᠬᠡᠨ ︽ᠶᠢᠰᠦᠨ ᠠᠯᠳᠠᠯ ᠳᠤ ᠪᠢᠳᠡᠬᠡᠢ ᠠᠯᠳᠠᠳᠣᠭᠠᠢ︾᠂ ᠲᠠᠷᠣᠢ ᠶᠢᠰᠦᠨ ᠣᠳᠠᠭ᠎ᠠ ᠠᠯᠳᠠᠭ᠎ᠠ ᠭᠠᠷᠭᠠᠭᠰᠠᠨ ᠴᠦ ᠪᠢᠳᠡᠬᠡᠢ ᠶᠠᠯᠠᠳᠠᠭᠳᠠᠬᠤ ᠪᠣᠯᠳᠣᠭᠠᠢ ᠭᠡᠳᠡᠭ ᠣᠳᠬ᠎ᠠ ᠲᠠᠢ ᠦᠬᠡ ᠪᠠᠷ ᠢᠯᠡᠳᠭᠡᠭᠰᠡᠨ ᠲᠡᠳᠦᠢ ᠶᠣᠮ᠃ ᠶᠢᠰᠦᠨ ᠠᠯᠳᠠᠯ ᠳᠤ ᠶᠠᠮᠠᠷ ᠶᠠᠮᠠᠷ ᠠᠭᠤᠯᠭ᠎ᠠ ᠪᠠᠭᠳᠠᠬᠤ ᠶᠢ ᠲᠣᠲᠣᠷᠬᠠᠢ ᠶᠠᠷᠢᠭᠰᠠᠨ ᠦᠭᠡᠢ᠂ ᠵᠦᠪᠬᠡᠨ ᠠᠩ ᠤᠨ ᠣᠯᠵᠠ  ᠪᠠᠨ ᠦᠪᠡᠰᠦᠪᠡᠨ ᠠᠪᠴᠣ ᠪᠣᠯᠣᠨ᠎ᠠ᠂ ᠲᠠᠶᠢᠨ ᠤ ᠣᠯᠵᠠ ᠪᠠᠨ ᠦᠪᠡᠷ ᠢᠶᠠᠨ ᠠᠪᠴᠣ ᠪᠣᠯᠣᠨ᠎ᠠ ᠵᠡᠷᠭᠡ ᠦᠭᠡ ᠪᠠᠷ ᠲᠦᠭᠦᠮ ᠢᠯᠡᠳᠭᠡᠭᠡᠳ ᠦᠩᠭᠡᠷᠡᠵᠡᠢ᠃ ᠡᠶᠢᠮᠦ ᠠᠴᠠ ᠮᠢᠷᠽᠠ · ᠬᠠᠶᠢᠳᠠᠷ ᠤᠨ ᠨᠣᠮ ᠢᠳᠡᠭᠡᠮᠵᠢ ᠲᠠᠢ ᠪᠣᠯ ᠡᠨᠡᠬᠦ ᠲᠡᠮᠳᠡᠭᠯᠡᠯ ᠮᠠᠰᠢ ᠰᠣᠨᠢᠷᠬᠠᠯ ᠲᠠᠢ ᠪᠣᠯᠣᠨ᠎ᠠ — ᠮᠣᠩᠭᠤᠯᠴᠢᠯᠠᠭᠴᠢ ᠠᠴᠠ᠃⑨ ᠡᠭᠦᠨ ᠤ ᠲᠣᠬᠠᠢ ︽ᠮᠣᠩᠭᠤᠯ ᠤᠨ ᠨᠢᠭᠤᠴᠠ ᠲᠣᠪᠴᠢᠶ᠎ᠠ︾ ᠳᠤ ᠲᠣᠲᠣᠷᠬᠠᠢ ᠲᠡᠮᠳᠡᠭᠯᠡᠯ ᠪᠠᠶᠢᠭ᠎ᠠ ᠶᠣᠮ᠃ ᠲᠠᠷᠣᠢ ᠬᠠᠭᠠᠨ ᠲᠠᠢ ᠬᠠᠮᠳᠣ ᠠᠪᠠ ᠳᠤ ᠣᠷᠣᠪᠠᠯ᠂ ᠠᠯᠠᠭᠰᠠᠨ ᠠᠩ ᠣᠯᠵᠠ ᠪᠠᠨ ᠦᠪᠡᠷ ᠢᠶᠠᠨ ᠦᠯᠡᠳᠡᠭᠡᠨ ᠠᠪᠴᠣ᠂ ᠡᠰᠡᠬᠦᠯ᠎ᠡ ᠪᠠᠰᠠ ᠲᠠᠶᠢᠨ ᠳᠤ ᠣᠷᠣᠭᠠᠳ ᠣᠯᠵᠠᠯᠠᠭᠰᠠᠨ ᠣᠯᠵᠠ ᠪᠠᠨ ᠦᠪᠡᠷ ᠲᠡᠭᠡᠨ ᠠᠪᠬᠤ ᠵᠡᠷᠭᠡ ᠣᠨᠴᠠᠭᠠᠢ ᠡᠷᠬᠡ ᠶᠢ ᠵᠢᠭᠠᠵᠣ ᠪᠠᠶᠢᠭ᠎ᠠ ᠪᠣᠯᠣᠯᠳᠠᠢ᠃ ᠡᠶᠢᠮᠦᠷᠬᠦ ᠡᠷᠬᠡ ᠪᠣᠯ ᠭᠤᠣᠯᠳᠠᠭᠤ ᠲᠠᠷᠬᠠᠳ ᠲᠤ ᠣᠯᠭᠤᠭᠰᠠᠨ ᠣᠨᠴᠠᠭᠠᠢ ᠡᠷᠬᠡ ᠪᠣᠯᠣᠨ᠎ᠠ᠃ ᠬᠠᠷᠢᠨ ᠭᠠᠪᠢᠶᠠᠳᠠᠨ ᠲᠤ ᠣᠯᠭᠤᠬᠤ ᠣᠨᠴᠠᠭᠠᠢ ᠡᠷᠬᠡ ᠮᠦᠨ ᠡᠶᠢᠮᠦ ᠪᠠᠶᠢᠭᠰᠠᠨ ᠡᠰᠡᠬᠦ ᠶᠢ ᠣᠯᠵᠣ ᠮᠡᠳᠡᠬᠦ ᠳᠤ ᠬᠦᠴᠢᠷ ᠪᠣᠯᠵᠠᠢ᠃⑩ ᠡᠨᠡ ᠰᠠᠷᠳᠠ ︵萨尔达︶ ᠭᠡᠳᠡᠭ ᠨᠢ ᠲᠡᠷᠢᠬᠦᠨ ᠰᠠᠶᠢᠳ᠂ ᠲᠡᠷᠢᠬᠦᠨ ᠡᠮᠢᠷ ᠭᠡᠳᠡᠭ ᠣᠳᠬ᠎ᠠ ᠲᠠᠢ ᠦᠭᠡ ᠠᠵᠠᠢ᠃ ᠦᠨᠡᠨᠳᠡᠭᠡᠨ ᠡᠨᠡᠬᠦ ᠳᠣᠰᠢᠶᠠᠯ ᠤᠨ ᠲᠣᠬᠠᠢ ᠶᠠᠷᠢᠬᠤ ᠲᠠᠭᠠᠨ ᠲᠣᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠮᠣᠩᠭᠤᠯ ᠣᠯᠣᠰ ᠲᠤ ᠪᠣᠯ ᠣᠯᠣᠰ ᠪᠠᠬᠢ ᠭᠡᠳᠡᠭ ᠭᠡᠵᠦ ᠮᠢᠷᠽᠠ · ᠬᠠᠶᠢᠳᠠᠷ ᠣᠯᠠᠨᠳᠠ ᠶᠠᠷᠢᠵᠣ ᠦᠩᠭᠡᠷᠡᠪᠡ — ᠮᠣᠩᠭᠤᠯᠴᠢᠯᠠᠭᠴᠢ ᠠᠴᠠ᠃⑾ᠠᠳᠡ ᠦᠬᠦᠯᠡᠵᠦ ᠪᠠᠶᠢᠭ᠎ᠠ ᠶᠢᠰᠦᠨ ᠵᠦᠢᠯ ᠤᠨ ᠣᠨᠴᠠᠭᠠᠢ ᠡᠷᠬᠡ ᠡᠳ᠋ᠯᠡᠵᠦ ᠪᠠᠶᠢᠭ᠎ᠠ ᠬᠦᠮᠦᠰ ᠢ ᠦᠨᠡᠨᠳᠡᠭᠡᠨ ᠲᠠᠷᠬᠠᠨ ᠭᠡᠳᠡᠭ᠂ ᠲᠠᠷᠬᠠᠨ ᠭᠡᠳᠡᠭ ᠨᠢ ᠵᠠᠷᠢᠮ ᠦᠶ᠎ᠡ ᠳᠤ ᠪᠠᠰᠠ ᠠᠶᠢᠮᠠᠭ ᠣᠭᠰᠠᠭ᠎ᠠ ᠪᠣᠶᠣ ᠣᠪᠣᠭ ᠣᠳᠣᠮ ᠤᠨ ᠨᠡᠷ᠎ᠡ ᠪᠠᠷ ᠢᠯᠡᠷᠡᠬᠦ ᠴᠦ ᠪᠣᠢ ᠭᠡᠵᠦ ᠾᠧᠩᠷᠢ ᠶᠦᠯ ᠤᠨ ︽ᠵᠡᠭᠦᠨ ᠬᠢᠵᠠᠭᠠᠷ ᠤᠨ ᠵᠠᠮ ᠤᠨ ᠲᠡᠮᠳᠡᠭᠯᠡᠯ ᠤᠨ ᠴᠣᠪᠣᠷᠠᠯ︾ ᠭᠡᠳᠡᠭ ᠨᠣᠮ ᠳᠠᠭᠠᠨ ᠦᠬᠦᠯᠡᠵᠡᠢ᠃ ᠲᠡᠷᠡ ᠵᠠᠯᠭᠠᠭᠠᠳ ᠬᠡᠯᠡᠭᠰᠡᠨ ᠨᠢ ᠲᠠᠷᠬᠠᠨ ᠢ ᠠᠽᠢ ᠶᠢᠨ ᠵᠣᠬᠢᠶᠠᠯᠴᠢᠳ ᠶᠡᠷᠦ ᠨᠢ ᠨᠢᠭᠡ ᠠᠶᠢᠮᠠᠭ ᠤᠨ ᠨᠡᠷ᠎ᠡ ᠪᠠᠷ ᠬᠡᠷᠡᠭᠯᠡᠳᠡᠭ ᠭᠡᠵᠡᠢ᠃ ᠡᠶᠢᠮᠦ ᠠᠴᠠ ᠲᠠᠷᠬᠠᠨ ᠭᠡᠳᠡᠭ ᠨᠢ ᠠᠶᠢᠮᠠᠭ ᠣᠭᠰᠠᠭ᠎ᠠ᠂ ᠣᠪᠣᠭ ᠣᠳᠣᠮ᠂ ᠬᠡᠷᠬᠢᠮ ᠵᠡᠷᠬᠡ ᠮᠡᠳᠦ ᠪᠠᠷ ᠮᠠᠰᠢ ᠪᠠᠯᠠᠷᠬᠠᠢ ᠣᠳᠬ᠎ᠠ ᠲᠠᠢ ᠬᠡᠷᠡᠭᠯᠡᠵᠦ ᠪᠠᠶᠢᠪᠠ ᠭᠡᠪᠡ᠃ ᠶᠠᠭ ᠡᠶᠢᠮᠦ ᠠᠴᠠ ᠲᠡᠮᠦᠷ ᠤᠨ ᠴᠠᠭᠠᠵᠠ ᠳᠤ ᠳᠣᠷᠠᠳᠣᠭᠰᠠᠨ ᠲᠠᠶᠢᠯᠠᠨ ᠲᠠᠭᠠᠭᠤᠯᠣᠭᠳᠠᠭᠰᠠᠨ ᠲᠦᠴᠢᠨ ᠠᠶᠢᠮᠠᠭ ᠢ ᠵᠢᠬᠰᠠᠭᠠᠬᠤ ᠦᠶ᠎ᠡ ᠳᠤ ᠲᠡᠭᠦᠨ ᠤ ᠲᠣᠲᠣᠷ᠎ᠠ ᠲᠣᠣᠷᠠᠬᠢ ᠮᠡᠳᠦ ᠠᠷᠪᠠᠨ ᠬᠤᠶᠠᠷ ᠠᠶᠢᠮᠠᠭ ᠪᠠᠭᠳᠠᠯᠴᠠᠵᠣ ᠪᠠᠶᠢᠵᠠᠢ᠄ ᠪᠠᠷᠣᠯᠠᠰ᠂ ᠲᠠᠷᠬᠠᠨ᠂ ᠠᠷᠬᠤᠨ᠂ ᠵᠠᠯᠠᠶᠢᠷ᠂ ᠲᠣᠯᠠᠾᠴ᠂ ᠳ᠋ᠦᠯᠳᠧ᠂ ᠮᠣᠩᠭᠤᠯ᠂ ᠰᠦᠯᠳᠦᠰ᠂ ᠲᠣᠬᠠᠢ᠂ ᠬᠢᠪᠴᠠᠭ᠂ ᠠᠷᠣᠯᠠᠳ᠂ ᠪᠣᠯᠣᠨ ᠲᠠᠲ᠋ᠠᠷ ᠵᠡᠷᠭᠡ ᠪᠠᠶᠢᠭ᠎ᠠ ᠶᠣᠮ᠃ ᠡᠳᠡᠭᠡᠷ ᠨᠠᠷᠠᠰ ᠵᠠᠷᠢᠮ ᠨᠢ ᠠᠶᠢᠮᠠᠭ ᠣᠭᠰᠠᠭ᠎ᠠ ᠶᠢ ᠲᠦᠯᠦᠭᠡᠵᠦ ᠪᠠᠶᠢᠬᠤ ᠳᠤ ᠵᠠᠷᠢᠮ ᠨᠢ ᠬᠡᠷᠬᠢᠮ ᠵᠡᠷᠭᠡ ᠶᠢ ᠲᠦᠯᠦᠭᠡᠯᠡᠵᠦ ᠪᠠᠶᠢᠨ᠎ᠠ᠃⑿ ᠮᠢᠷᠽᠠ · ᠬᠠᠶᠢᠳᠠᠷ ᠤᠨ ᠡᠨᠡᠬᠦ ᠡᠴᠦᠰ ᠤᠨ ᠦᠬᠦᠯᠡᠮᠵᠢ ᠠᠴᠠ ᠦᠵᠡᠬᠦᠯ᠎ᠡ ᠡᠨᠡᠬᠦ ᠮᠣᠩᠭᠤᠯ ᠢᠶᠠᠷ ᠪᠢᠴᠢᠭᠰᠡᠨ ᠵᠠᠷᠯᠢᠭ ᠪᠢᠴᠢᠭ ᠪᠠᠷᠤᠭ ᠲᠡᠣᠬᠡᠨ ᠦᠨᠡᠨ ᠲᠠᠢ ᠨᠡᠶᠢᠴᠡᠵᠦ ᠪᠠᠶᠢᠨ᠎ᠠ᠃ ᠮᠣᠩᠭᠤᠯ ᠬᠠᠭᠠᠳ ᠤᠨ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ ᠪᠠ ᠵᠠᠷᠯᠢᠭ ᠪᠢᠴᠢᠭ ᠤᠨ ᠡᠴᠦᠰ ᠲᠤ ᠪᠦᠷ ᠵᠠᠷᠯᠢᠭ ᠪᠢᠴᠢᠭ ᠢᠶᠠᠨ ᠪᠢᠴᠢᠭᠰᠡᠨ ᠣᠨ ᠰᠠᠷ᠎ᠠ ᠡᠳᠦᠷ ᠢᠶᠠᠨ ᠲᠣᠲᠣᠷᠬᠠᠶᠢᠯᠠᠨ ᠪᠢᠴᠢᠭᠰᠡᠨ ᠤ ᠲᠠᠷᠠᠭ᠎ᠠ ᠪᠦᠷ ᠶᠠᠮᠠᠷ ᠭᠠᠵᠠᠷ ᠲᠤ ᠪᠢᠴᠢᠪᠡᠢ ᠭᠡᠳᠡᠭ ᠲᠣᠲᠣᠳᠬᠠᠯ ᠦᠭᠡᠰ ᠲᠠᠢ ᠪᠠᠶᠢᠵᠠᠢ᠃ ᠵᠢᠱᠢᠶᠡᠯᠡᠪᠡᠯ ︽ᠮᠣᠩᠭᠤᠯ ᠤᠨ ᠨᠢᠭᠤᠴᠠ ᠲᠣᠪᠴᠢᠶᠠᠨ︾ ᠤ ᠡᠴᠦᠰ ᠲᠤ ᠬᠤᠯᠣᠭᠠᠨᠠ ᠵᠢᠯ ᠬᠤᠯᠠᠨ ᠰᠠᠷ᠎ᠠ ᠬᠡᠷᠦᠯᠦᠨ ᠤ ᠬᠦᠳᠡᠭᠡ ᠠᠷᠠᠯ ᠁ ᠪᠢᠴᠢᠵᠦ ᠲᠡᠭᠦᠰᠪᠡ ᠭᠡᠵᠦ ᠪᠠᠶᠢᠬᠤ ᠳᠤ᠂ ᠮᠦᠩᠭᠡ ᠬᠠᠭᠠᠨ ᠤ ᠲᠠᠪᠣᠳᠣᠭᠠᠷ ᠣᠨ ᠲᠡᠭᠦᠥ ᠬᠤᠪᠢᠯᠠᠢ ᠲᠠᠭᠠᠨ ᠲᠣᠰᠢᠶᠠᠨ ᠦᠭᠭᠦᠭᠰᠡᠨ ᠵᠠᠷᠯᠢᠭ ᠪᠢᠴᠢᠭ ᠲᠤ ᠠᠴᠠ ᠁ ᠡᠳᠡᠭᠡᠷ ᠶᠠᠭᠤ ᠶᠢ ᠬᠠᠷᠠᠭᠤᠯᠵᠣ ᠪᠠᠶᠢᠬᠤ ᠪᠣᠢ ᠭᠡᠪᠡᠯ ᠲᠠᠷᠣᠢ ᠡᠳᠡᠭᠡᠷ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ ᠪᠣᠶᠣ ᠵᠠᠷᠯᠢᠭ ᠪᠢᠴᠢᠭ ᠲᠤ ᠡᠨᠡᠬᠦ ᠲᠣᠲᠣᠳᠬᠠᠯ ᠨᠢ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ ᠤᠨ ᠳ᠋ᠣᠭᠠᠷ ᠢ ᠬᠠᠷᠠᠭᠤᠯᠵᠣ ᠪᠠᠶᠢᠬᠤ ᠦᠢᠯᠡᠳᠦᠯ ᠠᠴᠠ ᠪᠣᠯᠵᠠᠢ᠃ ᠡᠭᠦᠨ  ᠠᠴᠠ ᠦᠵᠡᠪᠡᠯ ᠮᠢᠷᠽᠠ · ᠬᠠᠶᠢᠳᠠᠷ ᠤᠨ ᠬᠡᠯᠡᠯᠭᠡ ᠨᠢ ᠲᠡᠣᠬᠡᠨ ᠦᠨᠡᠨ ᠤ ᠬᠤᠪᠢ ᠦᠨᠳᠦᠷ ᠪᠠᠶᠢᠨ᠎ᠠ — ᠮᠣᠩᠭᠤᠯᠴᠢᠯᠠᠭᠴᠢ ᠠᠴᠠ᠃⒀ ᠡᠨᠡ ᠬᠦᠷᠭᠡᠨ ᠭᠡᠳᠡᠭ ᠲᠣᠲᠣᠳᠬᠠᠯ ᠨᠡᠷ᠎ᠡ ᠪᠣᠯ ᠲᠣᠰᠬᠠᠶᠢᠯᠠᠨ ᠬᠠᠭᠠᠨ ᠤ ᠬᠦᠷᠭᠡᠨ ᠭᠡᠳᠡᠭ ᠣᠳᠬ᠎ᠠ ᠪᠠᠷ ᠬᠡᠷᠡᠭᠯᠡᠭᠳᠡᠨ᠎ᠡ᠂ ᠲᠠᠷᠣᠢ ᠬᠢᠳᠠᠳ ᠲᠡᠣᠬᠡᠨ ᠨᠣᠮ ᠳᠤ ᠦᠬᠦᠯᠡᠭᠳᠡᠬᠦ ᠹᠦ᠋ ᠮᠠ ᠭᠡᠳᠡᠭ ᠦᠭᠡ ᠲᠠᠢ ᠣᠳᠬ᠎ᠠ ᠲᠡᠩᠴᠡᠬᠦ ᠶᠣᠮ᠃ ᠡᠶᠢᠮᠦ ᠡᠷᠬᠢᠨ ᠴᠣᠯᠠ ᠬᠤᠵᠢᠮ ᠤᠨ ᠴᠠᠭᠠᠳᠠᠢ ᠶᠢᠨ ᠣᠯᠣᠰ ᠲᠤ ᠮᠠᠰᠢ ᠬᠦᠨᠳᠦᠳᠭᠡᠯ ᠲᠠᠢ ᠨᠢᠭᠡᠨ ᠴᠣᠯᠠ ᠪᠠᠶᠢᠭᠰᠠᠨ ᠠᠵᠠᠢ᠃ ᠡᠶᠢᠮᠦ ᠠᠴᠠ ᠲᠡᠮᠦᠷ ᠬᠦᠷᠳᠡᠯ᠎ᠡ ᠴᠠᠭᠠᠳᠠᠢ ᠬᠠᠭᠠᠳ ᠤᠨ ᠬᠡᠣᠬᠡᠨ ᠢ ᠪᠣᠭᠳᠣᠯᠣᠨ ᠠᠪᠴᠣ ᠬᠦᠷᠭᠡᠨ ᠴᠣᠯᠠ ᠲᠠᠢ ᠪᠣᠯᠬᠤ ᠶᠢ ᠡᠷᠭᠢᠮ ᠳᠤ ᠲᠣᠭᠠᠴᠠᠵᠣ ᠪᠠᠶᠢᠵᠠᠢ᠃ ᠰᠢᠯᠳᠠᠭᠠᠨ ᠨᠢ ᠴᠢᠩᠬᠢᠰ ᠬᠠᠭᠠᠳ ᠤᠨ ᠬᠤᠶᠢᠴᠢᠰ ᠤᠨ ᠬᠦᠷᠭᠡᠨ ᠭᠡᠪᠡᠯ ᠴᠢᠩᠬᠢᠰ ᠬᠠᠭᠠᠳ ᠤᠨ ᠬᠤᠶᠢᠴᠢᠰ ᠲᠠᠢ ᠡᠩ ᠲᠡᠩᠴᠡᠵᠦ ᠴᠢᠳᠠᠬᠤ ᠡᠷᠬᠢᠮ ᠪᠠᠶᠢᠷᠢᠨ ᠳᠤ ᠬᠦᠷᠴᠡᠢ ᠭᠡᠳᠡᠭ ᠣᠳᠬ᠎ᠠ ᠲᠠᠢ ᠪᠣᠯᠬᠤ ᠶᠣᠮ᠃ᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ
 
ᠢᠷᠡᠯᠲᠡ᠄ ᠣᠳᠬᠠᠨ ᠬᠠᠭᠲᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠯᠠᠱᠠ ᠦᠷᠡᠰ ᠨᠠᠶᠢᠷ ᠤᠨ ᠡᠭᠦᠰᠦᠯᠲᠡ ᠲᠡᠤᠬᠡ
ᠠᠯᠠᠱᠠ ᠣᠷᠴᠢᠭᠤᠯᠭ᠎ᠠ ᠶᠢᠨ ᠰᠤᠷᠭᠠᠭᠤᠯᠢ ᠶᠢᠨ ᠠᠩᠭᠢ ᠪᠠᠶᠢᠭᠤᠯᠪᠠ
ᠠᠯᠠᠱᠠ ᠦᠬᠢᠳ ᠤᠨ ᠰᠤᠷᠭᠠᠭᠤᠯᠢ  ᠶᠢ ᠪᠠᠶᠢᠭᠤᠯᠪᠠ
ᠠᠯᠠᠱᠠ ᠪᠠᠭᠰᠢ ᠶᠢᠨ ᠰᠤᠷᠭᠠᠭᠤᠯᠢ ᠪᠠᠶᠢᠭᠤᠯᠪᠠ
ᠪᠠᠭ᠎ᠠ ᠬᠡᠤᠬᠡᠳ ᠢ ᠯᠠᠮᠠ ᠪᠣᠯᠭᠠᠬᠤ ᠶᠢ ᠬᠤᠷᠢᠭᠯᠠᠭᠰᠠᠨ ᠨᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号