ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠰᠢᠨ᠎ᠡ ᠬᠦᠳᠡᠭᠡ
ᠮᠣᠩᠭᠤᠯ ᠡᠷᠳᠡᠮᠲᠡᠨ ᠦᠵᠦᠮᠦᠴᠢᠨ ᠭᠤᠮᠪᠤᠵᠠᠪ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/4/7
   ᠠᠷᠪᠠᠨ ᠨᠠᠢᠮᠠᠳᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠶᠢᠨ ᠠᠯᠳᠠᠷᠳᠤ ᠰᠤᠶᠤᠯ ᠤᠨ ᠵᠢᠳᠬᠦᠯᠳᠡᠨ ᠪᠦᠬᠡᠳ ᠨᠡᠶᠢᠭᠡᠮ ᠲᠠᠶᠠᠭᠠᠷ ᠨᠠᠷ᠎ᠡ ᠠᠯᠳᠠᠷᠰᠢᠭᠰᠠᠨ ᠬᠦᠨᠳᠦᠳᠦ ᠡᠷᠳᠡᠮᠳᠡᠨ ᠦᠵᠦᠮᠦᠴᠢᠨ ᠬᠦᠩ ᠭᠤᠮᠪᠤᠵᠠᠪ ᠪᠤᠯ᠂ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ ᠦᠶ᠎ᠡ ᠳᠤ᠂ ᠤᠤᠯ ᠤᠨ ᠰᠢᠯᠢ ᠶᠢᠨ ᠭᠤᠤᠯ ᠴᠢᠭᠤᠯᠭᠠᠨ ᠤ ᠦᠵᠦᠮᠦᠴᠢᠨ ᠪᠠᠷᠠᠭᠤᠨ ᠬᠤᠰᠢᠭᠤ ᠶᠢᠨ ᠲᠡᠷᠢᠬᠦᠨ ᠵᠡᠷᠭᠡ ᠶᠢᠨ ᠲᠤᠰᠠᠯᠠᠭᠴᠢ ᠲᠠᠶᠢᠵᠢ᠂ ᠵᠠᠰᠠᠭ ᠲᠦᠷᠦ ᠶᠢᠨ ᠬᠦᠩ ᠤᠳᠠᠷᠠᠢ ᠨᠤᠶᠠᠨ ᠤ ᠬᠦᠪᠡᠬᠦᠨ ᠪᠤᠯᠤᠨ ᠵᠠᠶᠠᠭᠠᠭᠰᠠᠨ ᠪᠠᠶᠢᠨ᠎ᠠ᠃ ᠭᠤᠮᠪᠤᠵᠠᠪ ᠤᠨ ᠬᠤᠶᠠᠳᠤᠭᠠᠷ ᠶᠡᠭᠡ ᠠᠪᠠᠭ᠎ᠠ ᠰᠤᠳᠠᠨᠢ ᠪᠤᠯ ᠦᠵᠦᠮᠦᠴᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠭᠤᠷᠪᠠᠳᠤᠭᠠᠷ ᠦᠶ᠎ᠡ ᠶᠢᠨ ᠵᠠᠰᠠᠭ ᠨᠤᠶᠠᠨ ᠬᠤᠱᠤᠢ ᠰᠡᠴᠡᠨ ᠴᠢᠨ ᠸᠠᠩ ᠪᠤᠯᠤᠨ᠃ ᠲᠡᠷᠡ 1658 ᠤᠨ ᠳᠤ ᠦᠵᠦᠮᠦᠴᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠴᠢᠨ ᠸᠠᠩ ᠤᠨ ᠰᠠᠭᠤᠷᠢᠨ ᠢ ᠵᠠᠯᠠᠭᠠᠮᠵᠢᠯᠠᠵᠤ 1690 ᠤᠨ ᠳᠤ ᠡᠪᠡᠳᠴᠢᠨ ᠢᠶᠠᠷ ᠨᠠᠰᠤ ᠪᠠᠷᠠᠵᠠᠢ᠃ ᠰᠤᠳᠠᠨᠢ ᠶᠢ ᠵᠠᠰᠠᠭ ᠪᠠᠷᠢᠵᠤ ᠪᠠᠶᠢᠬᠤ ᠬᠤᠭᠤᠴᠠᠭᠠᠨ ᠳᠤ᠂ ᠭᠤᠮᠪᠤᠵᠠᠪ ᠤᠨ ᠡᠴᠢᠭᠡ ᠤᠳᠠᠷᠠᠢ ᠵᠠᠰᠠᠭ ᠲᠦᠷᠦ ᠶᠢᠨ ᠲᠤᠰᠠᠯᠠᠭᠴᠢ ᠬᠦᠩ ᠪᠠᠶᠢᠵᠤ᠂ ᠠᠬ᠎ᠠ ᠰᠤᠳᠠᠨᠢ ᠶᠢ ᠬᠠᠪᠰᠤᠷᠤᠨ ᠲᠦᠷᠤ ᠵᠠᠰᠠᠭ ᠤᠨ ᠶᠡᠭᠡ ᠦᠢᠯᠡ ᠶᠢ ᠬᠠᠮᠢᠶᠠᠷᠤᠨ ᠰᠢᠳᠬᠡᠳᠡᠭ ᠡᠷᠭᠡ ᠵᠡᠷᠭᠡ ᠲᠠᠢ ᠬᠦᠮᠦᠨ ᠪᠠᠶᠢᠪᠠ᠃ ᠡᠷᠳᠡᠮᠳᠡᠨ ᠬᠦᠩ ᠭᠤᠮᠪᠤᠵᠠᠪ ᠬᠡᠳᠦᠶᠢᠪᠡᠷ ᠡᠶᠢᠮᠤ ᠨᠢᠭᠡᠨ ᠢᠵᠠᠭᠤᠷᠳᠠᠨ ᠤ ᠡᠭᠦᠳᠡᠨ ᠳᠤ ᠮᠡᠨᠳᠤᠯᠠᠵᠤ᠂ ᠲᠦᠷᠦ ᠶᠢᠨ ᠬᠡᠷᠬᠢᠮᠳᠡᠨ ︽ᠲᠠᠶᠢᠵᠢ︾ ᠪᠤᠶᠤ ︽ᠬᠦᠩ︾ ᠤᠨ ᠵᠡᠷᠭᠡ ᠪᠠᠷ ᠲᠡᠤᠬᠡ ᠰᠤᠳᠤᠷ ᠲᠤ ᠲᠡᠮᠳᠡᠭᠯᠡᠭᠳᠡᠭᠰᠡᠨ ᠪᠤᠯᠪᠠᠴᠤ᠂ ᠦᠨᠡᠨ ᠳᠡᠭᠡᠨ ᠲᠡᠷᠡ ᠪᠤᠯ᠂ ᠵᠡᠷᠭᠡ ᠬᠡᠷᠬᠢᠮ ᠳᠤ ᠰᠢᠨᠤᠬᠠᠶᠢᠷᠠᠵᠤ᠂ ᠵᠢᠩᠰᠡ ᠤᠳᠤᠭ ᠬᠦᠬᠡᠬᠡᠴᠡᠯᠳᠤᠨ᠂ ᠵᠢᠷᠭᠠᠯ ᠴᠡᠩᠭᠡᠯ ᠳᠤ ᠰᠤᠭᠳᠤᠭᠤᠷᠠᠭᠰᠠᠨ ︽ᠲᠠᠶᠢᠵᠢ︾᠂ ︽ᠬᠦᠩ︾ ᠪᠢᠰᠢ᠂ ᠬᠠᠷᠢᠨ ᠪᠦᠬᠦ ᠨᠠᠰᠤᠨ ᠤ ᠤᠶᠤᠨ ᠴᠢᠳᠠᠯ᠂ ᠤᠢ ᠪᠢᠯᠢᠭ ᠢᠶᠠᠨ ᠪᠦᠬᠦᠶᠢᠯᠡ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠰᠤᠶᠤᠯ ᠪᠤᠯᠪᠠᠰᠤᠨ ᠤ ᠮᠠᠨᠳᠤᠯ ᠬᠦᠭᠵᠢᠯᠳᠡ ᠪᠠ ᠲᠤᠮᠳᠠᠳᠤ ᠤᠯᠤᠰ ᠤᠨ ᠦᠨᠳᠦᠰᠦᠳᠡᠨ ᠨᠦᠭᠦᠳ ᠤᠨ ᠰᠤᠶᠤᠯ ᠤᠨ ᠰᠤᠯᠢᠯᠴᠠᠭᠠᠨ ᠤ ᠦᠢᠯᠡᠰ ᠲᠤ ᠬᠠᠷᠠᠮ ᠦᠬᠡᠢ ᠵᠤᠷᠢᠭᠤᠯᠤᠭᠰᠠᠨ ᠬᠦᠨᠳᠦᠳᠬᠡᠨ ᠪᠢᠰᠢᠷᠡᠭᠦᠰᠢᠳᠡᠢ ᠰᠤᠶᠤᠯ ᠤᠨ ᠵᠢᠳᠬᠦᠯᠳᠡᠨ ᠪᠠᠶᠢᠭᠰᠠᠨ ᠶᠤᠮ᠃    ᠭᠤᠮᠪᠤᠵᠠᠪ ᠬᠦᠩ ᠤᠨ ᠲᠦᠷᠦᠵᠤ ᠮᠡᠨᠳᠤᠯᠡᠭᠰᠡᠨ ᠪᠠ ᠨᠦᠭᠴᠢᠵᠤ ᠬᠠᠯᠢᠭᠰᠠᠨ ᠪᠤᠳᠠᠳᠠᠢ ᠤᠨ ᠵᠢᠯ ᠤᠨ ᠲᠤᠬᠠᠢ ᠤᠳᠤᠬᠠᠨ ᠪᠤᠯᠳᠠᠯ᠎ᠠ ᠲᠡᠤᠬᠡᠨ ᠪᠠᠳᠤᠳᠠᠢ ᠪᠠᠷᠢᠮᠳᠠ ᠤᠯᠳᠠᠭᠠᠳᠤᠢ ᠪᠤᠯᠪᠠᠴᠤ᠂ ᠰᠤᠳᠤᠯᠤᠭᠴᠢ ᠨᠠᠷ ᠲᠡᠬᠦᠨ ᠤ ᠦᠢᠯᠡ ᠬᠦᠳᠡᠯᠭᠡᠭᠡᠨ ᠤ ᠰᠦᠪᠡᠭᠴᠢ ᠪᠠ ᠵᠤᠬᠢᠶᠠᠯ ᠪᠦᠳᠦᠭᠡᠯ ᠤᠨ ᠬᠢᠨᠢ ᠮᠡᠳᠡᠭᠡ ᠪᠠᠷᠢᠮᠳᠠ ᠶᠢ ᠠᠰᠢᠭᠯᠠᠵᠤ ᠨᠡᠶᠢᠳᠡᠮ ᠳᠡᠭᠡᠨ ᠪᠦᠷ ᠲᠡᠬᠦᠨ ᠢ ᠠᠷᠪᠠᠨ ᠲᠤᠯᠤᠳᠤᠭᠠᠷ ᠵᠠᠭᠤᠨ ᠤ ᠰᠡᠭᠦᠯᠴᠢ ᠶᠢᠨ ᠦᠶ᠎ᠡ ᠠᠴᠠ ᠠᠷᠪᠠᠨ ᠨᠠᠢᠮᠠᠳᠤᠭᠠᠷ ᠵᠠᠭᠤᠨ ᠤ ᠲᠤᠮᠳᠠᠴᠢ ᠦᠶ᠎ᠡ ᠬᠦᠷᠳᠡᠯ᠎ᠡ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠠᠯᠳᠠᠷᠳᠤ ᠲᠠᠤᠬᠡᠴᠢ᠂ ᠤᠷᠴᠢᠭᠤᠯᠤᠭᠴᠢ᠂ ᠭᠡᠯᠡᠨ ᠤ ᠡᠷᠳᠡᠮᠳᠡᠨ᠂ ᠰᠤᠶᠤᠯ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠵᠢᠳᠬᠦᠯᠳᠡᠨ ᠪᠠ ᠠᠨᠠᠭᠠᠬᠤ ᠤᠬᠠᠭᠠᠨᠳᠠᠨ ᠮᠦᠨ ᠭᠡᠵᠦ ᠰᠠᠨᠠᠯ ᠨᠢᠭᠡᠳᠡᠢ ᠦᠨᠡᠯᠡᠨ ᠦᠵᠡᠵᠡᠭᠡᠵᠤ ᠪᠠᠶᠢᠨ᠎ᠠ᠃    ᠭᠤᠮᠪᠤᠵᠠᠪ ᠬᠦᠩ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ ᠦᠶ᠎ᠡ ︵1662 — 1722︶ ᠳᠤ ᠪᠡᠭᠡᠵᠢᠩ ᠳᠤ ᠤᠴᠢᠵᠤ᠂ ᠬᠠᠭᠠᠨ ᠤ ᠤᠷᠳᠤᠨ ᠤ ᠤᠯᠤᠰ ᠤᠨ ᠬᠦᠪᠡᠬᠦᠳ ᠤᠨ ᠰᠤᠷᠭᠠᠭᠤᠯᠢ ᠳᠤ᠂ ᠮᠠᠨᠵᠤ᠂ ᠮᠤᠩᠭᠤᠯ᠂ ᠬᠢᠳᠠᠳ᠂ ᠲᠦᠪᠡᠳ ᠵᠡᠷᠭᠡ ᠲᠦᠷᠪᠡᠨ ᠲᠦᠷᠦᠯ ᠤᠨ ᠦᠬᠡ ᠬᠡᠯᠡ ᠦᠰᠦᠭ ᠪᠢᠴᠢᠭ ᠢ ᠰᠤᠷᠴᠤ ᠡᠵᠡᠮᠰᠢᠭᠰᠡᠨ ᠪᠦᠬᠡᠳ ᠰᠡᠬᠦᠯᠡᠷ ᠨᠢ ᠪᠠᠰᠠ ᠡᠨᠡᠳᠬᠡᠭ ᠰᠠᠨᠰᠺᠢᠷᠲ᠂ ᠤᠶᠢᠭᠤᠷ ᠵᠡᠷᠭᠡ ᠬᠡᠯᠡ᠂ ᠦᠰᠦᠭ ᠢ ᠨᠡᠮᠡᠨ ᠰᠤᠷᠤᠭᠠᠳ᠂ ᠨᠠᠶᠢᠳᠡ ᠪᠠᠷ ᠢᠶᠠᠨ ᠵᠦᠪᠰᠢᠶᠡᠷᠡᠭᠰᠡᠨ ᠨᠡᠷᠡᠳᠤ ᠡᠷᠳᠡᠮᠳᠡᠨ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠡᠨᠡ ᠪᠦᠬᠦᠨ ᠨᠢ ᠲᠡᠬᠦᠨ ᠳᠤ᠂ ᠪᠡᠭᠡᠵᠢᠩ ᠳᠠᠬᠢ ︽ᠲᠠᠩᠭᠤᠳ ᠪᠢᠴᠢᠭ ᠤᠨ ᠰᠤᠷᠭᠠᠭᠤᠯᠢ ᠶᠢᠨ ᠪᠦᠬᠦᠳᠡ ᠶᠢ ᠵᠠᠬᠢᠨ ᠰᠤᠷᠭᠠᠭᠴᠢ︾ ᠪᠠᠷ ᠠᠵᠢᠯᠯᠠᠬᠤ  ᠳᠤᠨᠢ ᠠᠰᠢᠭᠳᠠᠢ ᠰᠠᠶᠢᠨ ᠨᠦᠬᠦᠴᠡᠯ ᠤᠯᠭᠤᠭᠰᠠᠨ ᠪᠤᠯᠬᠤᠷ᠂ ᠨᠡᠶᠢᠷᠠᠯᠳᠤ ᠲᠦᠪ ᠬᠠᠭᠠᠨ ︵1723 — 1735︶ ᠤ ᠦᠶ᠎ᠡ ᠠᠴᠠ ᠡᠬᠢᠯᠡᠵᠤ᠂ ᠲᠠᠩᠭᠤᠳ ᠪᠢᠴᠢᠭ ᠤᠨ ᠰᠤᠷᠭᠠᠭᠤᠯᠢ ᠶᠢᠨ ᠨᠡᠶᠢᠳᠡ ᠶᠢ ᠵᠠᠬᠢᠨ ᠰᠤᠷᠭᠠᠭᠴᠢ ᠪᠠᠷ ᠪᠠᠷᠤᠭ ᠭᠤᠴᠢᠭᠠᠳ ᠵᠢᠯ ᠠᠵᠢᠯᠯᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠨᠡᠬᠦ ᠬᠤᠭᠤᠴᠠᠭᠠᠨ ᠳᠠᠭᠠᠨ ᠬᠦᠨᠳᠦᠳᠦ ᠡᠷᠳᠡᠮᠳᠡᠨ ᠮᠠᠨᠢ ᠦᠯ ᠬᠤᠭᠤᠯᠠ ᠶᠢ ᠤᠮᠠᠷᠳᠠᠨ᠂ ᠡᠳᠦᠷ ᠰᠦᠨᠢ ᠶᠢ ᠲᠡᠮᠡᠴᠡᠵᠤ᠂ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠦᠢᠯᠡᠰ ᠪᠠ ᠡᠯ᠎ᠡ ᠦᠨᠳᠦᠰᠦᠳᠡᠨ ᠤ ᠰᠤᠶᠤᠯ ᠤᠨ ᠰᠤᠯᠢᠯᠴᠠᠭᠠᠨ ᠤ ᠲᠦᠯᠦᠭᠡ᠂ ᠦᠪᠡᠷ ᠤᠨ ᠬᠦᠯᠦᠰᠤ ᠴᠢᠰᠤ ᠪᠠᠨ ᠬᠠᠷᠠᠮ ᠦᠬᠡᠢ ᠤᠷᠤᠰᠬᠠᠭᠰᠠᠨ ᠤ ᠳ᠋ᠦᠩ ᠳᠤ᠂ ᠡᠷᠳᠡᠨᠢ ᠶᠢᠨ ᠦᠨ᠎ᠡ ᠴᠠᠨ᠎ᠠ ᠲᠠᠢ ᠡᠯᠪᠡᠭ ᠪᠠᠶᠠᠯᠢᠭ ᠰᠤᠳᠤᠷ ᠨᠤᠮ ᠪᠠ ᠰᠤᠳᠤᠯᠭᠠᠨ ᠤ ᠦᠪ ᠬᠦᠷᠦᠩᠬᠡ ᠪᠠᠨ ᠦᠷ᠎ᠡ ᠬᠡᠦᠬᠡᠳ ᠪᠢᠳᠡᠨ ᠳᠡᠭᠡᠨ ᠦᠪᠯᠡᠵᠤ ᠦᠯᠡᠳᠡᠭᠡᠭᠰᠡᠨ ᠪᠠᠶᠢᠨ᠎ᠠ᠃    ᠡᠩ ᠲᠡᠷᠢᠬᠦᠨ ᠳᠤ᠂ ᠡᠷᠳᠡᠮᠳᠡᠨ ᠬᠦᠩ ᠭᠤᠮᠪᠤᠵᠠᠪ ᠪᠤᠯ ᠨᠢᠭᠡᠨ ᠦᠨᠡᠨ ᠢ ᠪᠠᠷᠢᠮᠳᠠᠯᠠᠳᠠᠭ ᠠᠯᠳᠠᠷᠳᠤ ᠲᠡᠤᠬᠡᠴᠢ ᠪᠠᠶᠢᠭᠰᠠᠨ ᠶᠤᠮ᠃ ᠲᠡᠷᠡ ᠪᠠᠷ ᠨᠠᠶᠢᠷᠠᠯᠳᠤ ᠲᠦᠪ ᠬᠠᠭᠠᠨ ᠤ ᠭᠤᠷᠪᠠᠳᠤᠭᠠᠷ ᠤᠨ᠂ ᠲᠤᠬᠠᠶᠢᠯᠠᠪᠠᠯ ᠨᠡᠶᠢᠳᠡ ᠶᠢᠨ ᠤᠨ ᠲᠤᠭᠠᠯᠠᠯ ᠤᠨ 1725 ᠤᠨ ᠳᠤ᠂ ᠲᠠᠩᠭᠤᠳ ᠪᠢᠴᠢᠭ ᠤᠨ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠨ ᠰᠤᠳᠤᠯᠵᠤ ᠪᠠᠶᠢᠬᠤ ᠳᠠᠭᠠᠨ᠂ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠭᠡᠳᠡᠭ ᠲᠡᠤᠬᠡ ᠶᠢᠨ ᠵᠤᠬᠢᠶᠠᠯ ᠢᠶᠠᠨ ᠦᠪᠡᠷ ᠤᠨ ᠦᠨᠳᠦᠰᠦᠳᠡᠨ ᠤ ᠬᠡᠯᠡ ᠪᠠᠷ ᠢᠶᠠᠨ ᠪᠢᠴᠢᠨ ᠲᠠᠭᠤᠰᠬᠠᠵᠠᠢ᠃ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠪᠤᠯ ᠲᠦᠢᠯ ᠤᠨ ᠪᠠᠶᠠᠯᠢᠭ ᠠᠭᠤᠯᠭ᠎ᠠ  ᠲᠠᠢ ᠲᠡᠤᠬᠡ ᠶᠢᠨ ᠵᠤᠬᠢᠶᠠᠯ ᠪᠦᠭᠡᠳ ᠲᠡᠬᠦᠨ ᠳᠤ ᠲᠤᠰᠬᠠᠭᠰᠠᠨ ᠨᠡᠶᠢᠭᠡᠮ ᠤᠨ ᠦᠵᠡᠯ ᠰᠠᠨᠠᠭ᠎ᠠ ᠨᠢ ᠴᠤ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠡᠭᠡᠨ ᠲᠡᠤᠬᠡᠳᠤ ᠲᠠᠪᠰᠢᠩᠭᠤᠢ ᠦᠢᠯᠡᠳᠦᠯ ᠲᠠᠢ ᠪᠠᠶᠢᠭᠰᠠᠨ ᠶᠤᠮ᠃ ᠡᠨᠡ ᠲᠤᠬᠠᠢ ᠡᠷᠳᠡᠮᠳᠡᠨ ᠴᠤᠶᠢᠵᠢ ᠪᠠᠭᠰᠢ ᠪᠠᠷ ︽ᠭᠠᠩᠭᠠᠩ ᠶᠢᠨ ᠤᠷᠤᠰᠬᠠᠯ︾ ᠤᠨ ᠤᠷᠤᠰᠢᠯ ᠳᠠᠭᠠᠨ᠄ ︽ᠴᠢᠩᠬᠢᠰ ᠬᠠᠭᠠᠨ ᠤ ᠠᠯᠳᠠᠨ ᠤᠷᠤᠭ ᠪᠤᠯ ᠲᠡᠭᠡᠳᠦ ᠲᠡᠭᠷᠢ ᠠᠴᠠ ᠵᠠᠶᠠᠭᠠᠭᠰᠠᠨ ᠪᠦᠬᠡᠳ ᠭᠠᠩᠭ᠎ᠠ ᠮᠦᠷᠡᠨ ᠤ ᠤᠷᠤᠰᠬᠠᠯ ᠮᠡᠳᠦ ᠦᠨᠢ ᠡᠭᠦᠷᠢᠳᠡ ᠲᠠᠰᠤᠷᠠᠰᠢ ᠦᠬᠡᠢ ᠦᠷᠬᠦᠯᠵᠢᠯᠡᠵᠤ ᠪᠠᠶᠢᠨ᠎ᠠ ᠭᠡᠰᠡᠨ ᠢ ᠮᠤᠩᠭᠤᠯᠴᠤᠳ ᠲᠤ ᠮᠡᠳᠡᠬᠦᠯᠦᠨ᠂ ᠲᠠᠳᠡᠨᠡᠷ ᠲᠤ 〈 ᠠᠯᠳᠠᠨ ᠲᠡᠯᠡᠬᠡᠢ ᠶᠢ ᠡᠵᠡᠯᠡᠭᠰᠡᠨ ᠰᠤᠳᠤ ᠪᠤᠭᠳᠠ ᠴᠢᠩᠬᠢᠰ ᠬᠠᠭᠠᠨ ᠢᠯᠠᠳᠤᠭᠠᠢ 〉 ᠭᠡᠰᠡᠨ ᠢᠳᠡᠭᠡᠯ ᠵᠤᠷᠢᠭ ᠢ ᠪᠤᠢ ᠪᠤᠯᠭᠠᠬᠤ ᠭᠡᠵᠠᠢ᠃ ᠡᠨᠡ ᠪᠤᠯ 〈 ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ 〉 ᠢ ᠲᠤᠭᠤᠷᠪᠢᠨ ᠪᠢᠴᠢᠭᠰᠡᠨ ᠤ ᠭᠤᠤᠯ ᠵᠤᠷᠢᠯᠭ᠎ᠠ ᠪᠤᠯᠵᠤ᠂ ᠲᠡᠬᠦᠨ ᠤ ᠦᠨᠳᠦᠰᠦᠨ ᠦᠵᠡᠯ ᠰᠠᠨᠠᠠᠭ᠎ᠠ ᠪᠤᠯᠵᠤ ᠲᠤᠭᠳᠠᠵᠠᠢ︾ ᠬᠡᠮᠡᠨ ᠮᠠᠰᠢ ᠵᠦᠪ ᠤᠨᠤᠪᠴᠢᠳᠠᠢ ᠮᠦᠷᠳᠡᠭᠡᠨ ᠦᠨᠡᠨ ᠭᠤᠤᠯᠴᠢ ᠪᠠᠷ ᠦᠨᠡᠯᠡᠨ ᠲᠡᠮᠳᠡᠭᠯᠡᠵᠤ ᠪᠢᠯᠡ᠃    ᠮᠠᠨ ᠤ ᠦᠵᠡᠬᠦ ᠪᠠᠷ ᠭᠤᠮᠪᠤᠵᠠᠪ ᠬᠦᠩ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠢᠶᠠᠨ ᠪᠢᠴᠢᠬᠦ ᠳᠤ᠂ ᠡᠶᠢᠮᠤ ᠨᠢᠭᠡ ᠬᠡᠳᠦᠨ ᠲᠠᠯ᠎ᠠ ᠶᠢᠨ ᠠᠰᠠᠭᠤᠳᠠᠯ ᠢ ᠲᠤᠩ ᠲᠤᠪᠤᠶᠢᠯᠭᠠᠭᠰᠠᠨ ᠪᠠᠶᠢᠨ᠎ᠠ᠃    ︵ᠨᠢᠭᠡ︶ ᠲᠡᠤᠬᠡ ᠶᠢᠨ ᠦᠨᠡᠨ ᠢ ᠲᠦᠪ ᠶᠤᠰᠤᠭᠠᠷ ᠰᠡᠷᠭᠦᠬᠡᠵᠦ᠂ ᠮᠤᠩᠭᠤᠯᠴᠤᠳ ᠲᠤ ᠦᠪᠡᠷ ᠤᠨ ᠬᠢᠨᠢ ᠲᠡᠤᠬᠡ ᠶᠢ ᠦᠨᠡᠨ ᠮᠦᠨ ᠢᠶᠠᠷ ᠨᠢ ᠲᠠᠨᠢᠭᠤᠯᠤᠨ᠂ ᠲᠡᠳᠡᠨ ᠤ ᠦᠨᠳᠦᠰᠦᠳᠡᠨ ᠢ ᠪᠠᠨ ᠢᠳᠡᠭᠡᠨ ᠬᠦᠨᠳᠦᠳᠬᠡᠬᠦ ᠡᠷᠢᠯ ᠬᠦᠰᠡᠯ ᠢ ᠴᠢᠩᠭᠠᠳᠬᠠᠵᠤ᠂ ᠦᠨᠳᠦᠰᠦᠳᠡᠨ ᠤ ᠪᠠᠨ ᠲᠦᠯᠦᠭᠡ ᠲᠡᠮᠡᠴᠡᠬᠦ ᠡᠷᠴᠢ ᠵᠤᠷᠢᠭ ᠤᠳ ᠪᠤᠯᠭᠠᠨ᠎ᠠ᠃ ᠤᠯᠠᠨ ᠤ ᠮᠡᠳᠡᠭᠡᠵᠢ ᠪᠠᠷ᠂ ᠭᠤᠮᠪᠤᠵᠠᠪ ᠬᠦᠩ ᠤᠨ ᠤᠷᠤᠰᠢᠨ ᠠᠮᠢᠳᠤᠷᠠᠵᠤ ᠪᠠᠶᠢᠭᠰᠠᠨ ᠴᠠᠭ ᠦᠶ᠎ᠡ ᠪᠤᠯ ᠲᠡᠤᠬᠡ ᠶᠢᠨ ᠤᠷᠤᠭ᠎ᠠ ᠪᠤᠰᠤᠭ᠎ᠠ ᠤᠨ ᠵᠢᠯ ᠪᠤᠯᠬᠤ ᠪᠦᠬᠡᠳ ᠮᠠᠨᠵᠤ ᠴᠢᠩ ᠤᠨ ᠨᠤᠶᠠᠷᠬᠠᠯ ᠮᠤᠩᠭᠤᠯ ᠤᠷᠤᠨ ᠳᠤ ᠲᠤᠭᠳᠠᠨᠢᠬᠤ ᠶᠢ ᠲᠠᠭᠠᠯᠳᠤᠨ ᠡᠷᠬᠡ ᠴᠢᠯᠦᠭᠡᠳᠤ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠨᠢᠭᠡᠳᠡᠨ ᠪᠤᠰᠤᠳ ᠤᠨ ᠪᠤᠭᠤᠯᠴᠢᠯᠠᠯ ᠳᠤ ᠤᠷᠤᠭᠰᠠᠨ ᠪᠠᠶᠢᠨ᠎ᠠ᠃ ᠮᠠᠨᠵᠤ ᠴᠢᠩ ᠤᠨ ᠲᠡᠷᠰᠡᠯᠡᠬᠦᠤ ᠨᠤᠶᠠᠷᠬᠠᠭᠴᠢᠳ ᠦᠪᠡᠷ ᠤᠨ ᠦᠨᠳᠦᠰᠦᠳᠡᠨ ᠤ ᠪᠠᠨ ᠨᠤᠶᠠᠷᠬᠠᠯ ᠢ ᠦᠨᠢᠳᠡ ᠪᠠᠳᠤᠳᠬᠠᠬᠤ ᠶᠢᠨ ᠲᠦᠯᠦᠭᠡ᠂ ᠮᠤᠩᠭᠤᠯᠴᠤᠳ ᠲᠤ ᠬᠠᠳᠠᠭᠤ ᠵᠦᠬᠡᠯᠡᠨ ᠠᠷᠭ᠎ᠠ ᠶᠢ ᠵᠡᠷᠭᠡ ᠪᠠᠷ ᠬᠡᠷᠡᠭᠯᠡᠵᠤ ᠂ ᠮᠤᠩᠭᠤᠯ ᠤᠨ ᠲᠡᠭᠡᠳᠤ ᠲᠠᠪᠬᠤᠷᠭᠠᠳᠠᠨ ᠢ ᠪᠤᠯ ᠦᠨᠳᠦᠷ ᠪᠦᠭᠯᠡᠬᠦᠤ᠂ ᠤᠳᠤᠭ ᠵᠢᠩᠰᠡ᠂ ᠦᠩᠬᠡᠳᠤ ᠦᠬᠢᠳ ᠰᠢᠪᠡᠭᠴᠢᠨ ᠢᠶᠠᠷ ᠨᠢᠳᠤ ᠰᠡᠳᠬᠢᠯ ᠢ ᠨᠢ ᠬᠤᠷᠢᠶᠠᠵᠤ᠂ ᠡᠪᠦᠳᠦᠭ ᠰᠦᠬᠦᠷᠡᠬᠦᠯᠦᠨ ᠡᠮᠦᠨ᠎ᠡ ᠪᠠᠨ ᠮᠦᠷᠬᠦᠯᠦᠨ ᠠᠪᠴᠠᠢ ᠃ ᠨᠦᠬᠦᠭᠡ ᠲᠠᠯ᠎ᠠ ᠪᠠᠷ ᠱᠠᠰᠢᠨ ᠤ ᠮᠤᠩᠬᠠᠷᠠᠭᠤᠯᠤᠯ ᠤᠨ ᠲᠦᠷᠦ ᠶᠢᠨ ᠪᠤᠳᠤᠯᠭ᠎ᠠ ᠶᠢ ᠲᠡᠩᠭᠡᠭᠡ ᠮᠡᠳᠡᠨ ᠬᠦᠭᠡᠭᠡᠷᠡᠭᠳᠡᠵᠦ᠂ ᠦᠷᠬᠡᠨ ᠤᠯᠠᠨ ᠲᠦᠮᠡᠨ ᠤ ᠤᠶᠤᠨ ᠰᠠᠨᠠᠭ᠎ᠠ ᠤᠢ ᠪᠢᠯᠢᠭ ᠢ ᠬᠦᠯᠢᠶᠡᠰᠦᠯᠡᠵᠤ᠂ ᠰᠦᠮ᠎ᠡ ᠶᠡᠭᠡ ᠪᠠᠷ ᠪᠠᠷᠢᠵᠤ᠂ ᠰᠦᠰᠦᠭ ᠢ ᠨᠢ ᠠᠳᠬᠤᠬᠤ ᠬᠡᠷᠴᠡᠭᠡᠢ ᠲᠦᠷᠦ ᠶᠢᠨ ᠪᠤᠳᠤᠯᠭ᠎ᠠ ᠶᠢ ᠬᠡᠷᠡᠭᠵᠢᠭᠦᠯᠦᠭᠰᠡᠨ ᠪᠠᠶᠢᠨ᠎ᠠ᠃ ᠪᠠᠰᠠ ᠶᠠᠭᠤᠨ ᠤ ︽ᠲᠦᠪᠡᠳ ᠮᠤᠩᠭᠤᠯ ᠨᠢᠭᠡᠨ ᠤᠭᠰᠠᠭ᠎ᠠ︾ ᠭᠡᠬᠦ ᠪᠤᠶᠤ ︽ᠮᠠᠨᠵᠤ ᠮᠤᠩᠭᠤᠯ ᠨᠢᠭᠡᠨ ᠤᠭᠰᠠᠭ᠎ᠠ︾ ᠭᠡᠬᠦ ᠬᠤᠳᠠᠯ ᠬᠠᠭᠤᠷᠮᠠᠭ ᠲᠡᠤᠬᠡ ᠵᠤᠬᠢᠶᠠᠵᠤ ᠦᠷᠬᠡᠨ ᠤᠯᠠᠨ ᠮᠤᠩᠭᠤᠯᠴᠤᠳ ᠢ ︽ᠪᠤᠭᠳᠠ ᠬᠠᠭᠠᠨ︾ ᠪᠠ ︽ᠪᠠ ᠪᠦᠷᠢᠨ ᠴᠢᠩ ᠤᠯᠤᠰ︾ ᠤᠨ ᠢᠶᠠᠨ ᠨᠤᠶᠠᠷᠬᠠᠯ ᠳᠤ ᠪᠠᠶᠢᠯᠭᠠᠬᠤ ᠳᠠᠭᠠᠨ᠂ ᠦᠨᠳᠦᠰᠦ ᠪᠠᠷᠢᠮᠳᠠ ᠤᠯᠬᠤ ᠭᠡᠵᠦ ᠲᠡᠤᠬᠡ ᠶᠢ ᠭᠠᠵᠢᠭᠤᠳᠠᠭᠤᠯᠤᠭᠰᠠᠨ ᠲᠤᠩ ᠴᠤ ᠤᠯᠠᠨ ᠴᠠᠯᠴᠢᠶ᠎ᠠ ᠨᠤᠮᠯᠠᠯ ᠭᠠᠷᠭᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠨᠡ ᠪᠦᠬᠦᠨ ᠨᠢ ᠬᠡᠷᠬᠢᠨ ᠪᠢᠴᠢᠭ ᠰᠤᠶᠤᠯ ᠳᠤ ᠨᠡᠪᠲᠡᠷᠡᠵᠦ ᠪᠢᠯᠢᠭ ᠤᠬᠠᠭᠠᠨ ᠨᠡᠭᠡᠭᠡᠭᠳᠡᠭᠰᠡᠨ ᠡᠷᠳᠡᠮᠳᠡᠨ ᠭᠤᠮᠪᠤᠵᠠᠪ ᠢ ᠮᠡᠭᠡᠯᠡᠨ ᠴᠢᠳᠠᠬᠤ ᠠᠵᠠᠢ᠃ ᠡᠶᠢᠨᠬᠦ ᠡᠷᠳᠡᠮᠳᠡᠨ ᠭᠤᠮᠪᠤᠵᠠᠪ ᠢᠶᠠᠷ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠪᠤᠯ ᠡᠨᠡᠳᠬᠡᠭ ᠲᠦᠪᠡᠳ ᠠᠴᠠ ᠡᠰᠢ ᠦᠨᠳᠦᠰᠦ ᠲᠠᠢ ᠬᠡᠬᠦ ᠪᠤᠯ ︽ᠲᠠᠯᠠᠢ ᠯᠠᠮᠠ ᠲᠡᠷᠢᠬᠦᠳᠡᠨ ᠲᠠᠶᠢᠨ ᠨᠤᠮᠠᠯᠠᠭᠰᠠᠨ︾ ᠪᠤᠷᠬᠠᠨ ᠱᠠᠰᠢᠨᠳᠠᠨ ᠤ ᠪᠤᠷᠤᠭᠤ ᠭᠠᠵᠢᠭᠤ ᠴᠠᠯᠴᠢᠶ᠎ᠠ ᠭᠡᠰᠡᠨ ᠢ ᠵᠠᠳᠠ ᠢᠯᠡᠴᠢᠯᠡᠵᠤ ︽ᠮᠤᠩᠭᠤᠯ ᠤᠨ ᠨᠢᠭᠤᠴᠠ ᠲᠤᠪᠴᠢᠶᠠᠨ︾ ᠪᠤᠯᠤᠨ ︽ᠲᠠᠶᠢᠶᠤᠸᠠᠨ ᠤᠯᠤᠰ ᠤᠨ ᠭᠤᠤᠯ ᠰᠤᠳᠤᠷ︾ ᠵᠡᠷᠭᠡ ᠦᠨᠡᠨ ᠲᠡᠤᠬᠡ ᠶᠢ ᠮᠦᠷᠳᠡᠨ ᠬᠢᠨᠠᠵᠤ᠂ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠲᠡᠤᠬᠡ ᠶᠢ ᠦᠨᠡᠨ ᠵᠦᠪ ᠢᠶᠠᠷ ᠨᠢ ᠰᠡᠷᠬᠦᠬᠡᠬᠦ ᠪᠠᠷ ᠴᠢᠷᠮᠠᠶᠢᠵᠤ ︽ᠲᠡᠭᠡᠳᠤ ᠲᠡᠭᠷᠢ ᠠᠴᠠ ᠵᠠᠶᠠᠭᠠᠵᠤ ᠲᠦᠷᠦᠭᠰᠡᠨ ᠲᠡᠭᠡᠳᠤᠰ ᠤᠨ ᠲᠡᠤᠬᠡ︾ ᠪᠠᠨ ᠪᠢᠴᠢᠭᠰᠡᠨ ᠪᠢᠯᠡ᠃ ᠶᠠᠭ ᠡᠶᠢᠮᠤ ᠵᠤᠷᠢᠯᠳᠠ ᠪᠠᠷ ᠦᠪᠡᠷ ᠤᠨ ᠦᠨᠳᠦᠰᠦᠳᠡᠨ ᠤ ᠬᠡᠯᠡ ᠦᠰᠦᠭ ᠢᠶᠠᠷ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠭᠡᠳᠡᠭ ᠠᠯᠳᠠᠷᠳᠤ ᠲᠡᠤᠬᠡ ᠶᠢᠨ ᠵᠤᠬᠢᠶᠠᠯ ᠢᠶᠠᠨ ᠪᠢᠴᠢᠭᠰᠡᠨ ᠪᠦᠬᠡᠳ ︽ᠠᠩᠬᠠᠨ ᠤ ᠪᠦᠯᠦᠭ︾ ᠪᠠ ︽ᠨᠦᠬᠦᠭᠡ ᠪᠦᠯᠦᠭ︾ ᠬᠡᠮᠡᠨ ᠬᠤᠶᠠᠷ ᠠᠩᠬᠢᠯᠠᠵᠤ᠂ ︽ᠠᠩᠬᠠᠨ ᠤ ᠪᠦᠯᠦᠭ︾ ᠲᠡᠭᠡᠨ ︽ᠬᠢᠶᠠᠳ ᠶᠠᠰᠤᠳᠠᠨ︾ ᠤ ᠠᠯᠳᠠᠨ ᠤᠷᠤᠭ ᠤᠨ ᠤᠭ ᠦᠨᠳᠦᠰᠦ ᠪᠤᠯᠬᠤ ᠴᠢᠩᠬᠢᠰ ᠬᠠᠭᠠᠨ ᠤ ᠢᠵᠠᠭᠤᠷ ᠠᠴᠠ ᠮᠤᠩᠭᠤᠯ ᠲᠦᠷᠦ ᠶᠢᠨ ᠬᠠᠭᠠᠳ ᠨᠤᠶᠠᠳ ᠤᠨ ᠭᠤᠤᠯ ᠤᠭᠰᠠᠭ᠎ᠠ ᠵᠠᠯᠭᠠᠮᠵᠢᠯᠠᠯ ᠢ ᠤᠨ ᠲᠠᠷᠠᠭᠠᠯᠠᠨ ᠨᠠᠷᠢᠨ ᠲᠤᠭᠠᠴᠢᠵᠤ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠨ᠎ᠠ᠃ ︽ᠨᠦᠬᠦᠭᠡ ᠪᠦᠯᠦᠭ︾ ᠲᠡᠭᠡᠨ ᠴᠢᠩᠬᠢᠰ ᠬᠠᠭᠠᠨ ᠤ ᠲᠡᠭᠦᠤᠨᠡᠷ ᠤᠳ ᠪᠤᠯᠤᠨ ᠲᠡᠳᠡᠨ ᠤ ᠦᠷ᠎ᠡ ᠠᠴᠢᠨᠠᠷ ᠤᠨ ᠬᠠᠷᠢᠶ᠎ᠠ ᠠᠶᠢᠮᠠᠭ ᠤᠨ ᠨᠤᠶᠠᠳ ᠲᠦᠰᠢᠮᠡᠳ ᠤᠨ ᠦᠷ᠎ᠡ ᠵᠠᠯᠭᠠᠮᠵᠢ᠂ ᠮᠤᠩᠭᠤᠯ ᠤᠨ ᠲᠡᠤᠬᠡᠨ ᠳᠠᠬᠢ ᠭᠠᠪᠢᠶ᠎ᠠ ᠵᠢᠳᠬᠦᠯ ᠲᠠᠢ ᠰᠠᠶᠢᠳ ᠲᠦᠰᠢᠮᠡᠯ᠂ ᠮᠤᠩᠭᠤᠯ ᠤᠨ ᠨᠡᠶᠢᠭᠡᠮ ᠤᠨ ᠵᠠᠰᠠᠭ ᠵᠠᠬᠢᠷᠭᠠᠨ ᠤ ᠪᠠᠶᠢᠭᠤᠯᠤᠮᠵᠢ᠂ ᠮᠠᠨᠵᠤ ᠴᠢᠩ ᠤᠨ ᠨᠤᠶᠠᠷᠬᠠᠯ ᠳᠠᠬᠢ ᠦᠪᠦᠷ ᠮᠤᠩᠭᠤᠯ ᠤᠨ ᠬᠤᠰᠢᠭᠤ ᠨᠤᠳᠤᠭ ᠤᠨ ᠬᠤᠪᠢᠶᠠᠷᠢ ᠵᠡᠷᠭᠡ ᠶᠢ ᠨᠢᠭᠡᠳ ᠨᠢᠭᠡ ᠪᠠᠷ ᠨᠠᠷᠢᠨ ᠲᠤᠳᠤᠷᠬᠠᠢ ᠲᠡᠮᠳᠡᠭᠯᠡᠵᠠᠢ᠃ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠮᠠᠨᠳᠤᠭᠰᠠᠨ ᠲᠡᠤᠬᠡ ᠶᠢ ᠨᠠᠷᠢᠨ ᠲᠤᠳᠤᠷᠬᠠᠢ ᠪᠦᠬᠡᠳ ᠵᠦᠪ ᠦᠨᠡᠨ ᠢᠶᠠᠷ ᠨᠢ ᠰᠡᠷᠭᠦᠭᠡᠨ ᠪᠢᠴᠢᠭᠰᠡᠨ ᠶᠠᠪᠤᠳᠠᠯ ᠪᠤᠯ ᠮᠤᠩᠭᠤᠯᠴᠤᠳ ᠤᠨ ᠦᠵᠡᠯ ᠤᠬᠠᠮᠰᠠᠷ ᠢ ᠤᠷᠢᠶᠠᠯᠠᠨ ᠲᠠᠭᠤᠳᠠᠵᠤ᠂ ᠲᠡᠳᠡᠨ ᠤ ᠦᠨᠳᠦᠰᠦᠳᠡᠨ ᠢᠶᠠᠨ ᠬᠠᠶᠢᠷᠠᠯᠠᠨ ᠬᠦᠨᠳᠦᠳᠬᠡᠬᠦ ᠦᠵᠡᠯ ᠰᠡᠳᠬᠢᠯᠭᠡ ᠶᠢ ᠬᠠᠳᠠᠭᠠᠯᠠᠨ ᠪᠠᠳᠠᠷᠠᠭᠤᠯᠵᠤ᠂ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠪᠠᠨ ᠢᠷᠡᠭᠡᠳᠦᠢ ᠳᠤ ᠢᠳᠡᠭᠡᠯ ᠡᠷᠡᠮᠡᠯᠵᠡᠯᠡᠯ ᠲᠠᠢ ᠪᠠᠶᠢᠯᠭᠠᠬᠤ ᠶᠢ ᠵᠤᠷᠢᠭᠰᠠᠨ ᠶᠤᠮ᠃ ᠡᠶᠢᠮᠤ ᠨᠢᠭᠡᠨ ᠬᠠᠳᠠᠭᠤ ᠪᠤᠳᠤᠯ ᠲᠦᠰᠢᠵᠤ ᠬᠤᠯᠠ ᠶᠢᠨ ᠵᠤᠷᠢᠯᠳᠠ ᠶᠢ ᠡᠪᠦᠷᠯᠡᠭᠰᠡᠨ ᠪᠤᠯᠬᠤᠷ᠂ ᠲᠡᠷᠡ ᠦᠪᠡᠷ ᠤᠨ ᠡᠷᠬᠡ ᠵᠡᠷᠭᠡ ᠪᠠᠨ ᠤᠭᠴᠠᠷᠠᠭᠳᠠᠬᠤ ᠶᠢ ᠦᠴᠦᠬᠡᠨ ᠤᠶᠢᠰᠢᠶᠠᠯ ᠦᠬᠡᠢ᠂ ᠦᠬᠦᠵᠤ ᠵᠤᠪᠠᠭ᠋ᠤ ᠠᠶᠤᠯ ᠢ ᠦᠴᠦᠬᠡᠨ ᠴᠤ ᠬᠠᠶᠢᠬᠤᠷᠬᠤ ᠦᠬᠡᠢ᠂ ᠪᠤᠷᠬᠠᠨ ᠱᠠᠰᠢᠨ ᠪᠦᠬᠦ ᠮᠤᠩᠭᠤᠯ ᠤᠷᠤᠨ ᠢ ᠨᠤᠶᠠᠷᠬᠠᠵᠤ ᠪᠠᠶᠢᠭᠰᠠᠨ ᠪᠠᠯᠠᠷ ᠬᠠᠷᠠᠩᠭᠤᠢ ᠦᠶ᠎ᠡ ᠳᠤ ᠡᠨᠡᠳᠬᠡᠭ᠂ ᠲᠦᠪᠡᠳ᠂ ᠮᠤᠩᠭᠤᠯ ᠦᠨᠳᠦᠰᠦ ᠤᠭᠰᠠᠭ᠎ᠠ ᠨᠢᠭᠡ ᠭᠡᠬᠦ ᠪᠤᠯ ︽ᠲᠠᠯᠠᠢ ᠯᠠᠮᠠ ᠲᠡᠷᠢᠬᠦᠳᠡᠨ ᠲᠠᠶᠢᠨ ᠨᠤᠮᠯᠠᠭᠰᠠᠨ︾ ᠲᠠᠰᠢᠶᠠᠷᠠᠯ ᠪᠤᠷᠤᠭᠤ ᠴᠠᠯᠴᠢᠶ᠎ᠠ ᠭᠡᠳᠡᠭ ᠢ ᠲᠡᠤᠬᠡ ᠶᠢᠨ ᠪᠠᠷᠢᠮᠳᠠ ᠪᠠᠷ ᠨᠢᠴᠤᠭᠠᠵᠤ᠂ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠲᠡᠤᠬᠡ ᠶᠢ ᠮᠦᠨ ᠵᠦᠪ ᠢᠶᠠᠷ ᠨᠢ ᠰᠡᠷᠭᠦᠬᠡᠨ ᠲᠡᠮᠳᠡᠭᠯᠡᠭᠰᠡᠨ ᠶᠠᠪᠤᠳᠠᠯ ᠪᠤᠯ ᠦᠨᠢᠳᠡ ᠪᠠᠯᠠᠷᠠᠰᠢ ᠦᠬᠡᠢ ᠡᠷᠳᠡᠮᠳᠡᠨ ᠤ ᠮᠠᠨᠢ ᠭᠠᠪᠢᠶ᠎ᠠ ᠵᠢᠳᠬᠦᠯ ᠪᠤᠯᠤᠨ᠎ᠠ᠃    ︵ᠬᠤᠶᠠᠷ︶ ᠮᠠᠨᠵᠤ ᠴᠢᠩ ᠤᠨ ᠦᠨᠳᠦᠰᠦᠳᠡᠨ ᠤ ᠲᠠᠷᠤᠯᠠᠯ ᠢ ᠡᠰᠡᠷᠬᠦᠴᠡᠵᠤ᠂ ᠦᠪᠡᠷ ᠤᠨ ᠦᠨᠳᠦᠰᠦᠳᠡᠨ ᠤ ᠪᠠᠨ ᠲᠤᠰᠠᠭᠠᠷ ᠲᠤᠭᠳᠠᠨᠢᠯ ᠢ ᠰᠡᠷᠬᠦᠬᠡᠬᠦ ᠲᠦᠪ ᠴᠢᠩᠭ᠎ᠠ ᠤᠯᠤᠰ ᠲᠦᠷᠦ ᠶᠢᠨ ᠵᠤᠷᠢᠯᠳᠠ ᠶᠢ ᠪᠠᠷᠢᠮᠳᠠᠯᠠᠭᠰᠠᠨ ᠪᠠᠶᠢᠨ᠎ᠠ᠃ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠪᠤᠯ ᠮᠠᠨᠳᠤᠭᠰᠠᠨ ᠴᠠᠭ ᠠᠴᠠ ᠪᠠᠨ ᠠᠪᠤᠭᠠᠳ ᠨᠢᠭᠡᠨ ᠡᠷᠬᠡ ᠴᠢᠯᠦᠭᠡᠳᠤ ᠲᠤᠰᠠᠭᠠᠷ ᠲᠤᠭᠳᠠᠨᠢᠭᠰᠠᠨ ᠤᠯᠤᠰ ᠦᠨᠳᠦᠰᠦᠳᠡᠨ ᠪᠠᠶᠢᠭᠰᠠᠨ ᠶᠤᠮ᠃ ᠠᠷᠪᠠᠨ ᠲᠤᠯᠤᠳᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠳᠤ᠂ ᠮᠠᠨᠵᠤ ᠴᠢᠩ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠤᠨ ᠵᠦᠢᠯ ᠵᠦᠢᠯ ᠤᠨ ᠬᠠᠷᠬᠢᠰ ᠬᠡᠷᠴᠡᠭᠡᠢ ᠲᠦᠷᠦ ᠶᠢᠨ ᠪᠤᠳᠤᠯᠭ᠎ᠠ ᠶᠢᠨ ᠳ᠋ᠦᠩ ᠳᠤ᠂ ᠮᠤᠩᠭᠤᠯᠴᠤᠳ ᠪᠦᠷ ᠯᠡ ᠮᠠᠨᠵᠤ ᠴᠢᠩ ᠤᠨ ᠨᠤᠶᠠᠷᠬᠠᠯ ᠳᠤ ᠤᠷᠤᠵᠤ ᠦᠪᠡᠷ ᠤᠨ ᠦᠨᠳᠦᠰᠦᠳᠡᠨ ᠤ ᠡᠷᠬᠡ ᠴᠢᠯᠦᠭᠡ ᠪᠠ ᠲᠤᠰᠠᠭᠠᠷ ᠲᠤᠭᠳᠠᠨᠢᠯ ᠢᠶᠠᠨ ᠠᠯᠳᠠᠨ᠂ ᠬᠡᠷᠴᠡᠭᠡᠢ ᠪᠠᠯᠠᠮᠠᠳ ᠦᠨᠳᠦᠰᠦᠳᠡᠨ ᠤ ᠲᠠᠷᠤᠯᠠᠯ ᠮᠦᠯᠵᠢᠯ ᠢ ᠠᠮᠰᠠᠬᠤ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠭᠡᠳᠡᠯ᠎ᠡ ᠮᠠᠨᠵᠤ ᠴᠢᠩ ᠤᠨ ᠨᠤᠶᠠᠷᠬᠠᠯ ᠢ ᠡᠰᠡᠷᠬᠦᠴᠡᠭᠰᠡᠨ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠲᠡᠮᠡᠴᠡᠯ ᠶᠡᠷᠦᠨᠢ ᠲᠠᠰᠤᠷᠠᠭᠰᠠᠨ ᠦᠬᠡᠢ᠂ ᠯᠢᠭᠳᠡᠨ ᠬᠠᠭᠠᠨ ᠤ ᠲᠠᠶᠢᠨ ᠠᠴᠠ ᠭᠠᠯᠳᠠᠨ ᠪᠤᠱᠤᠭᠳᠤ ᠶᠢᠨ ᠲᠡᠮᠡᠴᠡᠯ ᠬᠦᠷᠳᠡᠯ᠎ᠡ᠂ ᠶᠡᠭᠡ ᠪᠠᠭ᠎ᠠ ᠤᠯᠠᠨ ᠤᠳᠠᠭᠠᠨ ᠤ ᠪᠤᠰᠤᠯᠭ᠎ᠠ ᠲᠡᠮᠡᠴᠡᠯ ᠢ ᠶᠠᠪᠤᠭᠤᠯᠤᠭᠰᠠᠨ ᠪᠦᠬᠡᠳ ᠤᠨᠴᠠᠭᠠᠶᠢᠯᠠᠨ ᠭᠠᠯᠳᠠᠨ ᠪᠤᠱᠤᠭᠳᠤ ᠶᠢᠨ ᠮᠠᠨᠵᠤ ᠴᠢᠩ ᠢ ᠡᠰᠡᠷᠬᠦᠴᠡᠭᠰᠡᠨ ᠲᠡᠮᠡᠴᠡᠯ ᠳᠤ ᠭᠤᠮᠪᠤᠵᠠᠪ ᠤᠨ ᠡᠷᠦᠬᠡ ᠭᠡᠷ᠂ ᠤᠶᠢᠷ᠎ᠠ ᠰᠠᠳᠤᠨ ᠪᠦᠬᠦᠨ ᠢᠶᠠᠷ ᠬᠤᠯᠪᠤᠭᠳᠠᠵᠤ᠂ ᠦᠵᠦᠮᠦᠴᠢᠨ ᠲᠠᠶᠢᠵᠢ ᠨᠤᠶᠠᠳ ᠢᠶᠠᠷ ᠭᠠᠯᠳᠠᠨ ᠪᠤᠱᠤᠭᠳᠤ ᠶᠢᠨ ᠲᠡᠮᠡᠴᠡᠯ ᠢ ᠢᠯᠡ ᠪᠤᠶᠤ ᠲᠠᠯᠳᠠ ᠪᠠᠷ ᠲᠠᠮᠵᠢᠨ ᠲᠤᠰᠠᠯᠠᠵᠤ᠂ ᠮᠠᠨᠵᠤ ᠴᠢᠩ ᠤᠨ ᠨᠤᠶᠠᠷᠬᠠᠯ ᠢ ᠡᠰᠡᠷᠬᠦᠴᠡᠭᠰᠡᠨ ᠪᠠᠶᠢᠨ᠎ᠠ᠃ ᠡᠳᠡᠭᠡᠷ ᠭᠡᠷᠡᠭ ᠠᠴᠠ ᠪᠤᠯᠵᠤ ᠭᠤᠮᠪᠤᠵᠠᠪ ᠬᠦᠩ ᠴᠤ ᠡᠯᠳᠡᠪ ᠢᠶᠠᠷ ᠭᠠᠳᠠᠭᠤᠷᠴᠢᠯᠠᠭᠳᠠᠨ ᠰᠡᠵᠢᠭᠯᠡᠭᠳᠡᠬᠦ ᠪᠤᠯᠤᠭᠰᠠᠨ ᠪᠤᠶᠤ ᠡᠶᠢᠮᠤ ᠪᠤᠶᠤ ᠲᠡᠶᠢᠮᠤ ᠰᠢᠯᠳᠠᠭᠠᠨ ᠠᠴᠠ ᠪᠤᠯᠵᠤ ᠮᠠᠨᠵᠤ ᠴᠢᠩ ᠢ ᠡᠰᠡᠷᠬᠦᠴᠡᠭᠰᠡᠨ ᠮᠤᠩᠭᠤᠯ ᠤᠨ ᠤᠯᠠᠨ ᠤᠳᠠᠭᠠᠨ ᠤ ᠪᠤᠰᠤᠯᠭ᠎ᠠ ᠢᠯᠠᠭᠳᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠨᠡᠬᠦ ᠪᠠᠶᠢᠳᠠᠯ ᠳᠤ ᠮᠤᠩᠭᠤᠯ ᠤᠨ ᠵᠠᠷᠢᠮ ᠢᠵᠠᠭᠤᠷᠳᠠᠨ ᠲᠤᠷᠠᠳᠠᠶ᠎ᠠ ᠦᠨᠳᠦᠰᠦᠳᠡᠨ ᠤ ᠡᠷᠬᠡ ᠠᠰᠢᠭ ᠢ ᠬᠤᠳᠠᠯᠳᠤᠵᠤ᠂ ᠮᠠᠨᠵᠤ ᠴᠢᠩ ᠤᠯᠤᠰ ᠲᠤ ᠡᠪᠦᠳᠦᠭ ᠲᠠᠷᠤᠨ ᠪᠠᠭᠤᠵᠤ ᠦᠭᠭᠦᠭᠰᠡᠨ ᠪᠦᠬᠡᠳ ᠨᠡᠯᠢᠶᠡᠳ ᠬᠦᠮᠦᠰ ᠴᠤ ᠦᠨᠳᠦᠰᠦᠳᠡᠨ ᠤ ᠢᠷᠡᠭᠡᠳᠦᠢ ᠳᠤ ᠢᠳᠡᠭᠡᠯ ᠵᠤᠷᠢᠭ ᠢᠶᠠᠨ ᠠᠯᠳᠠᠵᠤ ᠭᠠᠷ ᠢᠶᠠᠨ ᠨᠤᠬᠤᠯᠤᠨ ᠭᠤᠳᠤᠷᠠᠨ ᠵᠤᠪᠠᠵᠤ ᠪᠠᠶᠢᠪᠠ᠃ ᠡᠶᠢᠮᠤ ᠲᠡᠤᠬᠡᠳᠤ ᠠᠬᠤᠢ ᠪᠠᠶᠢᠳᠠᠯ ᠤᠨ ᠲᠤᠤᠷ᠎ᠠ᠂ ᠭᠤᠮᠪᠤᠵᠠᠪ ᠬᠦᠩ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠢᠶᠠᠨ ᠪᠢᠴᠢᠵᠤ᠂ ᠮᠤᠩᠭᠤᠯᠴᠤᠳ ᠤᠨ ᠰᠦᠰᠦ ᠵᠤᠷᠢᠭ ᠪᠠ ᠰᠡᠳᠬᠢᠯ ᠰᠠᠨᠠᠭᠠᠨ ᠤ ᠲᠤᠯᠭᠠᠭᠤᠷᠢ ᠪᠤᠯᠤᠭᠰᠠᠨ ᠴᠢᠩᠬᠢᠰ ᠬᠠᠭᠠᠨ ᠤ ᠴᠠᠭ ᠦᠶ᠎ᠡ ᠶᠢ ᠡᠷᠬᠢᠴᠡᠬᠦᠯᠦᠨ ᠲᠤᠩᠭᠠᠵᠤ ︽ᠠᠯᠳᠠᠨ ᠲᠡᠯᠡᠬᠡᠢ ᠶᠢ ᠡᠵᠡᠯᠡᠭᠰᠡᠨ ᠰᠤᠳᠤ ᠪᠤᠭᠳᠠ ᠴᠢᠩᠬᠢᠰ ᠬᠠᠭᠠᠨ ᠢᠯᠠᠳᠤᠭᠠᠢ︾ ᠭᠡᠵᠦ ᠦᠨᠳᠦᠷ ᠲᠠᠭᠤᠨ ᠢᠶᠠᠷ ᠬᠠᠰᠬᠢᠷᠴᠤ ᠪᠦᠬᠦ ᠮᠤᠩᠭᠤᠯᠴᠤᠳ ᠢ ᠤᠷᠢᠶᠠᠯᠠᠨ ᠲᠠᠶᠢᠴᠢᠯᠠᠵᠤ᠂ ᠦᠪᠡᠷ ᠤᠨ ᠦᠨᠳᠦᠰᠦᠳᠡᠨ ᠤ ᠪᠠᠨ ᠢᠷᠡᠭᠡᠳᠦᠢ ᠳᠤ ᠢᠳᠡᠭᠡᠯ ᠲᠠᠢ ᠪᠠᠶᠢᠬᠤ ᠶᠢ ᠰᠡᠩᠭᠡᠷᠡᠬᠦᠯᠦᠨ ᠰᠤᠷᠭᠠᠭᠰᠠᠨ ᠶᠤᠮ᠃ ᠮᠤᠩᠭᠤᠯᠴᠤᠳ ᠤᠨ ᠮᠠᠨᠳᠤᠵᠤ ᠮᠦᠬᠦᠬᠦ ᠳᠤ ᠬᠤᠯᠪᠤᠭᠳᠠᠭᠰᠠᠨ ᠪᠠᠴᠢᠮ ᠵᠠᠩᠬᠢᠯᠠᠭ᠎ᠠ ᠶᠢᠨ ᠦᠶ᠎ᠡ ᠳᠤ᠂ ᠦᠩᠬᠡᠷᠡᠭᠰᠡᠨ ᠲᠡᠤᠬᠡ ᠶᠢᠨ ᠬᠢᠨᠢ ᠰᠢᠵᠢᠷ ᠠᠯᠳᠠᠨ ᠦᠶ᠎ᠡ ᠪᠠᠷ ᠦᠯᠢᠭᠡᠷ ᠲᠠᠭᠤᠷᠢᠶᠠᠯ ᠪᠤᠯᠭᠠᠵᠤ᠂ ᠡᠪ ᠨᠢᠭᠡᠳᠤᠯ ᠲᠠᠢ ᠨᠢᠭᠳᠠᠷᠠᠵᠤ᠂ ᠡᠷᠬᠡ ᠴᠢᠯᠦᠭᠡᠳᠤ ᠲᠤᠰᠠᠭᠠᠷ ᠲᠤᠭᠳᠠᠨᠢᠭᠰᠠᠨ ᠵᠠᠰᠠᠭ ᠲᠦᠷᠦ ᠪᠠᠶᠢᠭᠤᠯᠬᠤ ᠡᠷᠡᠮᠡᠯᠵᠡᠯᠡᠯ ᠬᠦᠰᠡᠯ ᠢ ᠨᠢ ᠲᠤᠰᠬᠠᠵᠤ᠂ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠢᠯᠠᠭᠳᠠᠰᠢ ᠦᠬᠡᠢ᠂ ᠬᠠᠷᠢᠨ ᠭᠠᠩᠭ᠎ᠠ ᠮᠦᠷᠡᠨ ᠤ ᠤᠷᠤᠰᠬᠠᠯ ᠮᠡᠳᠤ ᠦᠨᠢ ᠡᠭᠦᠷᠢᠳᠡ ᠪᠠᠨ ᠤᠶᠢᠯᠤᠨ ᠲᠠᠪᠠᠯᠭᠠᠯᠠᠵᠤ ᠤᠷᠤᠰᠬᠤ ᠶᠤᠰᠤᠳᠠᠢ ᠭᠡᠳᠡᠭ ᠤᠳᠬ᠎ᠠ ᠰᠠᠨᠠᠭ᠎ᠠ ᠶᠢ ᠴᠢᠬᠤᠯᠠᠴᠢᠯᠠᠵᠤ ᠦᠷᠭᠡᠨ ᠤᠯᠠᠨ ᠲᠦᠮᠡᠨ ᠪᠠ ᠤᠶᠤᠳᠠᠨ ᠰᠡᠭᠡᠭᠡᠳᠡᠨ ᠢ ᠤᠷᠢᠶᠠᠯᠠᠵᠤ ᠲᠠᠶᠢᠴᠢᠯᠠᠭᠰᠠᠨ ᠶᠠᠪᠤᠳᠠᠯ ᠨᠢ ᠬᠡᠷᠡᠭ ᠲᠡᠭᠡᠷ᠎ᠡ ᠪᠠᠨ ᠮᠤᠩᠭᠤᠯᠴᠤᠳ ᠤᠨ ᠦᠨᠳᠦᠰᠦᠳᠡᠨ ᠢᠶᠠᠨ ᠬᠠᠶᠢᠷᠠᠯᠠᠬᠤ ᠡᠬᠡ ᠤᠷᠤᠨᠴᠢ ᠦᠵᠡᠯ ᠰᠠᠨᠠᠭ᠎ᠠ ᠶᠢ ᠪᠠᠳᠤᠳᠬᠠᠨ ᠪᠠᠬᠢᠵᠢᠬᠦᠯᠵᠤ᠂ ᠮᠠᠨᠵᠤ ᠴᠢᠩ ᠤᠨ ᠨᠤᠶᠠᠷᠬᠠᠯ ᠢ ᠡᠰᠡᠷᠬᠦᠴᠡᠬᠦ ᠠᠪᠤᠷᠭᠤ ᠶᠡᠭᠡ ᠬᠦᠴᠦᠨ ᠤ ᠡᠬᠢ ᠤᠨᠳᠤᠷᠤᠯ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠡᠨᠡ ᠨᠢ ᠮᠦᠨᠴᠤ ᠦᠶ᠎ᠡ ᠶᠢᠨ ᠦᠶ᠎ᠡ ᠶᠢᠨ ᠦᠨᠳᠦᠰᠦᠳᠡᠨ ᠤ ᠪᠠᠭᠠᠳᠤᠷᠴᠤᠳ ᠤᠨ ᠦᠨᠳᠦᠰᠦᠳᠡᠨ ᠢᠶᠠᠨ ᠮᠠᠨᠳᠤᠭᠤᠯᠬᠤ ᠢᠳᠡᠭᠡᠯ ᠵᠤᠷᠢᠭ ᠤᠨ ᠬᠢᠨᠢ ᠢᠪᠡᠯᠦᠯ ᠬᠦᠴᠦᠨ ᠪᠤᠯᠤᠭᠰᠠᠨ ᠭᠡᠵᠦ ᠬᠡᠯᠡᠬᠦ ᠶᠤᠰᠤᠳᠠᠢ᠃    ᠮᠤᠩᠭᠤᠯᠴᠤᠳ ᠤᠨ ᠦᠨᠳᠦᠰᠦᠳᠡᠨ ᠢᠶᠠᠨ ᠬᠠᠶᠢᠷᠠᠯᠠᠬᠤ ᠦᠵᠡᠯ ᠤᠬᠠᠮᠰᠠᠷ ᠪᠠ ᠢᠳᠡᠭᠡᠯ ᠵᠤᠷᠢᠭ ᠢ ᠬᠦᠪᠴᠢᠯᠡᠬᠦ ᠵᠤᠷᠢᠯᠭ᠎ᠠ ᠪᠠᠷ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠪᠢᠴᠢᠭᠳᠡᠭᠰᠡᠨ ᠪᠤᠯᠬᠤᠷ᠂ ᠦᠭᠡᠷ᠎ᠡ ᠪᠤᠰᠤᠳ ᠮᠤᠩᠭᠤᠯ ᠤᠨ ᠲᠡᠤᠬᠡ ᠰᠤᠷᠪᠤᠯᠵᠢ ᠪᠢᠴᠢᠭ ᠲᠤ ᠪᠠᠶᠢᠳᠠᠭ ᠦᠬᠡᠢ ᠰᠢᠨ᠎ᠡ ᠰᠤᠷᠭᠤᠭ ᠮᠡᠳᠡᠭᠡ ᠪᠠᠷᠢᠮᠳᠠ ᠶᠢ ᠬᠠᠩᠭᠠᠵᠤ᠂ ᠦᠨᠳᠦᠰᠦᠳᠡᠨ ᠤ ᠪᠠᠨ ᠲᠡᠤᠬᠡ ᠰᠤᠶᠤᠯ ᠤᠨ ᠦᠪ ᠢ ᠪᠦᠬᠦ ᠲᠠᠯ᠎ᠠ ᠪᠠᠷ ᠤᠯᠠᠮᠵᠢᠯᠠᠵᠤ ᠬᠠᠳᠠᠭᠠᠯᠠᠬᠤ ᠶᠢ ᠰᠠᠨᠠᠭᠠᠴᠢᠯᠠᠭᠰᠠᠨ ᠢ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠤᠨ ᠪᠠᠶᠠᠯᠢᠭ ᠠᠭᠤᠯᠭ᠎ᠠ ᠠᠴᠠ ᠤᠬᠠᠭᠠᠷᠠᠵᠤ ᠪᠤᠯᠤᠨ᠎ᠠ᠃ ᠵᠢᠱᠢᠶᠡᠯᠡᠬᠦ ᠳᠤ᠂ ︽ᠮᠤᠩᠭᠤᠯ ᠤᠨ ᠶᠡᠭᠡ ᠬᠦᠭᠵᠢᠮ ᠠᠷᠪᠠᠨ ᠵᠢᠷᠭᠤᠭ᠎ᠠ᠂ ᠪᠠᠭ᠎ᠠ ᠬᠦᠭᠵᠢᠮ ᠠᠷᠪᠠᠨ ᠭᠤᠷᠪᠠ︾ ᠭᠡᠵᠦ ᠲᠤᠳᠤᠷᠬᠠᠢ ᠲᠤᠷᠠᠳᠤᠭᠰᠠᠨ ᠪᠦᠬᠡᠳ ᠠᠷᠪᠠᠨ ᠬᠡᠳᠦᠨ ᠬᠦᠭᠵᠢᠮ ᠤᠨ ᠨᠡᠷᠡᠰ ᠢ ᠲᠡᠮᠳᠡᠭᠯᠡᠭᠰᠡᠨ ᠶᠤᠮ᠃ ᠡᠨᠡ  ᠨᠢ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠲᠠᠭᠤᠤ ᠬᠦᠭᠵᠢᠮ ᠤᠨ ᠲᠡᠤᠬᠡ ᠶᠢ ᠰᠤᠳᠤᠯᠬᠤ ᠳᠤ ᠪᠦᠷ ᠴᠤ ᠬᠤᠪᠤᠷ ᠴᠤᠬᠠᠭ ᠮᠡᠳᠡᠭᠡ ᠪᠠᠷᠢᠮᠳᠠ ᠪᠤᠯᠬᠤ ᠶᠤᠮ ᠡ᠃ ᠡᠨᠡᠬᠦ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠭᠡᠳᠡᠭ ᠵᠤᠬᠢᠶᠠᠯ ᠨᠢ ᠦᠨᠡᠨ ᠢ ᠪᠠᠷᠢᠮᠳᠠᠯᠠᠭᠰᠠᠨ ᠵᠤᠷᠢᠭ ᠰᠠᠨᠠᠭ᠎ᠠ ᠪᠠ ᠪᠠᠶᠠᠯᠢᠭ ᠠᠭᠤᠯᠭ᠎ᠠ ᠪᠠᠷ ᠢᠶᠠᠨ ᠭᠠᠳᠠᠭᠠᠳᠤ ᠲᠤᠳᠤᠭᠠᠳᠤ ᠶᠢᠨ ᠲᠡᠤᠬᠡᠴᠢ ᠪᠤᠯᠤᠨ ᠡᠷᠳᠡᠮᠳᠡᠨ ᠨᠠᠷ ᠤᠨ ᠦᠨᠳᠦᠷ ᠦᠨᠡᠯᠡᠯᠳᠡ ᠶᠢ ᠤᠯᠵᠤ᠂ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠲᠡᠤᠬᠡ ᠰᠤᠷᠪᠤᠯᠵᠢ ᠪᠢᠴᠢᠭ ᠤᠨ ᠬᠢᠨᠢ ᠨᠢᠭᠡ ᠨᠢ ᠪᠤᠯᠵᠤ ᠲᠡᠭᠡᠵᠢᠯᠡᠭᠳᠡᠭᠰᠡᠨ ᠪᠢᠯᠡ᠃ ᠵᠢᠱᠢᠶᠡᠯᠡᠬᠦ ᠳᠤ᠂ ᠠᠷᠪᠠᠨ ᠨᠠᠢᠮᠠᠳᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠶᠢᠨ ᠪᠠᠭᠠᠷᠢᠨ ᠤ ᠲᠡᠤᠬᠡᠴᠢᠨ ᠷᠠᠰᠢᠫᠤᠩᠰᠤᠭ᠂ ᠲᠡᠷᠮᠠᠳᠠᠯᠠᠢ ᠠᠷᠠᠳ ᠤᠨ ᠲᠡᠤᠬᠡᠴᠢᠨ ᠲᠠᠷᠮ᠎ᠠ ᠬᠦᠤᠰᠢ ᠨᠠᠷ ︽ᠪᠤᠯᠤᠷ ᠡᠷᠢᠬᠡ︾᠂ ︽ᠴᠠᠭᠠᠨ ᠯᠢᠩᠬᠸ᠎ᠠ ᠶᠢᠨ ᠡᠷᠢᠬᠡᠰ︾᠂ ︽ᠠᠯᠳᠠᠨ ᠤᠷᠤᠭ ᠤᠨ ᠲᠠᠨ ᠤ ᠲᠤᠳᠠ ᠲᠡᠤᠬᠡ︾ ᠵᠡᠷᠭᠡ ᠮᠤᠩᠭᠤᠯ ᠲᠡᠤᠬᠡ ᠶᠢᠨ ᠵᠤᠬᠢᠶᠠᠯ ᠪᠢᠴᠢᠬᠦ ᠳᠡᠭᠡᠨ ᠪᠦᠷ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠢ ᠠᠰᠢᠭᠯᠠᠭᠰᠠᠨ ᠪᠠᠶᠢᠨ᠎ᠠ᠃ ᠮᠦᠨ ᠲᠡᠬᠦᠨᠴᠢᠯᠡᠨ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠡᠬᠢᠨ ᠤ ᠦᠶ᠎ᠡ ᠶᠢᠨ ᠵᠦᠪᠯᠡᠯᠳᠤ ᠶᠢᠨ ᠮᠤᠩᠭᠤᠯᠴᠢ ᠡᠷᠳᠡᠮᠳᠡᠨ ᠫᠦᠴᠡᠺᠦᠹᠰᠺᠢ 1910 ᠤᠨ ᠤ ᠦᠶ᠎ᠡ ᠪᠠᠷ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠤᠨ ᠨᠢᠭᠡ ᠬᠠᠭᠤᠯᠠᠪᠤᠷᠢ ᠶᠢ ᠠᠪᠠᠭ᠎ᠠ ᠬᠤᠰᠢᠭᠤᠨ ᠠᠴᠠ ᠤᠯᠵᠤ ᠠᠪᠠᠴᠢᠭᠠᠳ᠂ 1960 ᠤᠨ ᠳᠤ ᠭᠡᠷᠡᠯ ᠵᠢᠷᠤᠭ ᠢᠶᠠᠷ ᠪᠠᠭᠤᠯᠭᠠᠨ ᠤᠳᠤᠷᠢᠳᠬᠠᠯ ᠬᠠᠪᠰᠤᠷᠭᠠᠵᠤ ᠮᠤᠰᠺᠧᠨ ᠳᠤ ᠬᠡᠪᠯᠡᠬᠦᠯᠵᠠᠢ᠃    ᠦᠪᠦᠷ ᠮᠤᠩᠭᠤᠯ ᠤᠨ ᠨᠡᠶᠢᠭᠡᠮ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠲᠡᠤᠬᠡ ᠰᠤᠳᠤᠯᠬᠤ ᠭᠠᠵᠠᠷ ᠤᠨ ᠡᠷᠳᠡᠮᠳᠡᠨ ᠴᠤᠶᠢᠵᠢ ᠪᠠᠭᠰᠢ ᠪᠠᠷ ︽ᠭᠠᠩᠭ᠎ᠠ ᠶᠢᠨ ᠤᠷᠤᠰᠬᠠᠯ︾ ᠪᠢᠴᠢᠭᠳᠡᠭᠰᠡᠨ ᠬᠤᠶᠠᠷ ᠵᠠᠭᠤ ᠲᠠᠪᠢᠨ ᠵᠢᠯ ᠤᠨ ᠤᠢ ᠳᠤ ᠵᠤᠷᠢᠭᠤᠯᠤᠨ ᠲᠠᠶᠢᠯᠤᠭ᠎ᠠ ᠲᠠᠯᠪᠢᠵᠤ᠂ ᠲᠠᠶᠢᠯᠪᠤᠷᠢ ᠬᠠᠳᠠᠭᠠᠭᠠᠳ᠂ 1981 ᠤᠨ ᠳᠤ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠠᠴᠠ ᠬᠡᠪᠯᠡᠬᠦᠯᠦᠨ ᠨᠡᠶᠢᠳᠡᠯᠡᠭᠰᠡᠨ ᠪᠢᠯᠡ᠃    ᠭᠤᠮᠪᠤᠵᠠᠪ ᠪᠤᠯ ᠡᠯ᠎ᠡ ᠦᠨᠳᠦᠰᠦᠳᠡᠨ ᠤ ᠤᠳᠬ᠎ᠠ ᠰᠤᠶᠤᠯ ᠤᠨ ᠰᠤᠯᠢᠯᠴᠠᠭᠠᠨ ᠳᠤ ᠡᠷᠬᠢᠮ ᠵᠢᠳᠬᠦᠯ ᠢᠶᠠᠨ ᠨᠡᠮᠡᠷᠢᠯᠡᠭᠰᠡᠨ ᠰᠢᠯᠭᠠᠷᠠᠭᠰᠠᠨ ᠤᠷᠴᠢᠭᠤᠯᠤᠭᠴᠢ ᠪᠠ ᠭᠠᠷᠮᠠᠭᠠᠢ ᠰᠤᠶᠤᠯ ᠤᠨ ᠵᠢᠳᠬᠦᠯᠳᠡᠨ ᠪᠤᠯᠤᠨ᠎ᠠ᠃ ᠲᠡᠷᠡ ᠪᠠᠷ ᠡᠷᠳᠡᠨ ᠤ ᠡᠨᠡᠳᠬᠡᠭ ᠲᠦᠪᠡᠳ ᠤᠨ ᠰᠤᠶᠤᠯ ᠤᠨ ᠠᠪᠤᠷᠭᠤ ᠪᠦᠳᠦᠭᠡᠯ ᠪᠤᠯᠬᠤ ︽ᠭᠠᠨᠵᠤᠤᠷ︾ ᠬᠢᠭᠡᠳ ︽ᠲᠠᠨᠵᠤᠤᠷ ︾ ᠢ ᠤᠷᠴᠢᠭᠤᠯᠬᠤ ᠠᠵᠢᠯ ᠳᠤ ᠤᠯᠠᠨ ᠠᠴᠠ ᠤᠷᠤᠶᠢᠯᠠᠮ᠎ᠠ ᠭᠠᠪᠢᠶ᠎ᠠ ᠵᠢᠳᠬᠦᠯ ᠭᠠᠷᠭᠠᠭᠰᠠᠨ ᠶᠤᠮ᠃ ᠲᠤᠬᠠᠶᠢᠯᠠᠪᠠᠯ ᠡᠷᠳᠡᠮᠳᠡᠨ ᠭᠤᠮᠪᠤᠵᠠᠪ ᠠᠷᠪᠠᠨ ᠨᠠᠢᠮᠠᠳᠤᠭᠠᠷ ᠵᠠᠭᠤᠨ ᠤ ᠲᠦᠴᠢᠭᠡᠳ ᠤᠨ ᠤ ᠦᠶ᠎ᠡ ᠪᠠᠷ ︽ᠲᠠᠨᠵᠤᠤᠷ︾ ᠢ ᠪᠦᠷᠢᠳᠬᠡᠨ ᠤᠷᠴᠢᠭᠤᠯᠬᠤ ᠪᠠ ᠶᠡᠷᠦᠩᠬᠡᠶᠢᠯᠡᠨ ᠬᠢᠨᠠᠬᠤ ᠬᠦᠨᠳᠦ ᠬᠠᠳᠠᠭᠤᠵᠢᠯᠳᠠᠢ ᠡᠬᠦᠷᠭᠡ ᠶᠢ ᠬᠦᠯᠢᠶᠡᠵᠠᠢ᠃ ᠢᠩᠬᠢᠬᠡᠳ ᠲᠡᠷᠡ ᠶᠠᠭᠤᠨ ᠤ ᠡᠮᠦᠨ᠎ᠡ ︽ᠲᠦᠪᠡᠳ ᠬᠡᠯᠡ ᠶᠢ ᠬᠢᠯᠪᠠᠷ ᠢᠶᠠᠷ ᠰᠤᠷᠬᠤ ᠨᠡᠷᠡᠳᠤ ᠪᠢᠴᠢᠭ︾ ᠭᠡᠳᠡᠭ ᠲᠦᠪᠡᠳ ᠮᠤᠩᠭᠤᠯ ᠲᠤᠯᠢ ᠪᠢᠴᠢᠭ ᠢ ᠨᠠᠶᠢᠷᠠᠭᠤᠯᠤᠨ ᠵᠤᠬᠢᠶᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠨᠡᠬᠦ ᠲᠤᠯᠢ ᠶᠢ ᠤᠷᠠᠳ ᠤᠨ ᠬᠦᠤᠰᠢ ᠪᠢᠯᠢᠬᠦᠨᠳᠠᠯᠠᠢ ᠨᠦᠬᠦᠵᠤ ᠰᠢᠬᠦᠭᠡᠳ᠂ ᠲᠡᠭᠷᠢ ᠲᠡᠳᠬᠦᠭᠰᠡᠨ ᠤ ᠬᠤᠶᠠᠳᠤᠭᠠᠷ ᠤᠨ᠂ ᠲᠤᠬᠠᠶᠢᠯᠠᠪᠠᠯ 1737 ᠤᠨ ᠳᠤ ᠮᠤᠳᠤᠨ ᠪᠠᠷ ᠢᠶᠠᠷ ᠬᠡᠪᠯᠡᠬᠦᠯᠵᠠᠢ᠃ ᠡᠨᠡᠬᠦ ᠲᠤᠯᠢ ᠶᠢ ᠵᠤᠬᠢᠶᠠᠬᠤ ᠳᠠᠭᠠᠨ ᠭᠤᠮᠪᠤᠵᠠᠪ ᠭᠥᠡᠭ ᠲᠤᠶᠢᠯ ᠤᠨ ᠨᠡᠷᠢᠨ ᠨᠢᠮᠪᠠᠢ ᠬᠥᠳᠡᠯᠮᠥᠷᠢ ᠵᠠᠷᠤᠴᠠᠭᠤᠯᠵᠦ ᠤᠷᠢᠳ ᠬᠤᠵᠢᠳ 《 ᠭᠤᠷᠪᠠᠨᠳᠠ ᠰᠢᠭᠦᠵᠦ 》 ᠪᠤᠯᠬᠤᠷ᠂ ᠤᠯᠠᠩᠬᠢ ᠥᠬᠡᠰ ᠨᠢ ᠮᠠᠰᠢ ᠵᠥᠪ ᠤᠨᠤᠪᠴᠢᠳᠠᠢ ᠤᠷᠴᠢᠭᠤᠯᠵᠦ ᠲᠠᠶᠢᠯᠪᠣᠷᠢᠯᠠᠭᠰᠠᠨ ᠭᠡᠳᠡᠭ᠃ ᠵᠢᠱᠢᠶᠠᠯᠡᠬᠦ ᠳᠤ᠂ ᠲᠥᠪᠡᠳ ᠬᠡᠯᠡᠨ ᠳᠤ ᠮᠤᠩᠭᠤᠯ ᠢ 《 ᠰᠤᠭ 》 ᠪᠣᠶᠣ 《 ᠡᠾᠦᠷ 》 ᠬᠡᠵᠦ ᠬᠤᠶᠠᠷ ᠵᠥᠢᠯ ᠢᠶᠠᠷ ᠨᠡᠷᠡᠯᠡᠳᠡᠭ ᠪᠤᠯᠪᠠᠴᠦ᠂ ᠲᠡᠳᠡᠨ ᠤ ᠬᠤᠭᠤᠷᠤᠨᠳᠦᠬᠢ ᠢᠯᠭᠠᠪᠤᠷᠢ ᠨᠢ ᠮᠠᠰᠢ ᠪᠠᠯᠠᠷᠬᠠᠢ ᠪᠠᠶᠢᠭᠰᠠᠨ ᠬᠡᠨ᠎ᠡ᠃ ᠬᠡᠳᠡᠯ᠎ᠡ 《 ᠭᠤᠮᠪᠤᠵᠡᠪ ᠤᠨ ᠲᠤᠯᠢ 》 ︵ᠲᠦᠪᠡᠳ ᠬᠡᠯᠡ ᠶᠢ ᠬᠢᠯᠪᠡᠷ ᠢᠶᠠᠷ ᠰᠣᠷᠬᠤ ᠨᠠᠷᠡᠳᠥ ᠪᠢᠴᠢᠭ ᠢ ᠪᠠᠰᠠ ︿ᠭᠤᠮᠪᠣᠵᠡᠪ ᠤᠨ ᠲᠤᠯᠢ﹀ ᠭᠡᠳᠡᠭ︶ ᠳᠤ 《 ᠰᠤᠭ 》 ᠢ 《 ᠮᠤᠩᠭᠤᠯ 》 ᠬᠡᠮᠡᠨ 《 ᠡᠾᠥᠷ 》 ᠬᠡᠳᠡᠭ ᠢ 《 ᠱᠠᠷᠠᠶᠢᠭᠤᠯ ᠤᠨ ᠮᠤᠩᠭᠤᠯ 》 ︵ᠤᠳᠥ ᠶᠢᠨ ᠮᠤᠩᠭᠤᠷ᠂ ᠶᠤᠭᠤᠷ᠂ ᠪᠤᠤ ᠠᠨ᠂ ᠳ᠋ᠦᠩᠰᠢᠶᠠᠩ ᠵᠡᠷᠬᠡ ᠮᠤᠩᠭᠤᠯ ᠤᠨ ᠲᠦᠷᠥᠯ ᠬᠡᠯᠡᠳᠡᠨ︶ ᠬᠡᠵᠦ ᠲᠤᠳᠤᠷᠬᠠᠢ ᠢᠯᠭᠠᠨ ᠲᠠᠶᠢᠯᠪᠤᠷᠢᠯᠠᠭᠰᠠᠨ ᠬᠡᠨ᠎ᠡ᠃ ᠡᠶᠢᠮᠥ ᠠᠴᠠ 《 ᠭᠤᠮᠪᠤᠵᠡᠪ ᠤᠨ ᠲᠤᠯᠢ 》 ᠬᠡᠵᠦ ᠠᠯᠳᠠᠷᠰᠢᠭᠰᠠᠨ ᠪᠤᠶᠦ ᠬᠤᠵᠢᠮ ᠤᠨ ᠲᠤᠯᠢᠴᠢ ᠨᠢ ᠲᠥᠪᠡᠳ ᠮᠤᠩᠭᠤᠯ ᠲᠤᠯᠢ ᠵᠤᠬᠢᠶᠠᠬᠤ ᠳᠠᠭᠠᠨ ᠪᠥᠷ ᠬᠥᠨᠳᠥᠳᠬᠡᠨ ᠠᠰᠢᠬᠯᠠᠭᠰᠠᠨ ᠶᠤᠮ᠃    ᠭᠤᠮᠪᠤᠵᠡᠪ 《 ᠲᠥᠪᠡᠳ ᠬᠡᠯᠡ ᠶᠢ ᠬᠢᠯᠪᠡᠷ ᠢᠶᠠᠷ ᠰᠤᠷᠬᠤ ᠨᠡᠷᠡᠳᠥ ᠪᠢᠴᠢᠭ 》 ᠢᠶᠠᠨ ᠪᠠᠷᠯᠠᠭᠤᠯᠣᠭᠰᠠᠨ ᠤ ᠲᠠᠷᠠᠭ᠎ᠠ᠂ 《 ᠲᠠᠨᠵᠤᠤᠷ 》 ᠢ ᠭᠤᠤᠯᠴᠢᠯᠡᠨ ᠤᠷᠴᠢᠭᠤᠯᠬᠤ ᠪᠡ ᠶᠡᠷᠦᠩᠬᠡᠶᠢᠯᠡᠨ ᠬᠢᠨᠡᠬᠤ ᠬᠥᠨᠳᠥ ᠡᠭᠦᠷᠬᠡ ᠶᠢ ᠬᠥᠯᠢᠶᠠᠨ ᠭᠠᠷᠳᠠᠵᠦ᠂ 1741 ᠤᠨ — 1742 ᠤᠨ ᠤ ᠬᠤᠭᠤᠷᠤᠨᠳᠥ 《 ᠮᠡᠷᠭᠡᠳ ᠭᠠᠷᠬᠤ ᠶᠢᠨ ᠤᠷᠤᠨ 》 ᠬᠡᠮᠡᠬᠦ ᠲᠠᠪᠤᠨ ᠤᠬᠠᠭᠠᠨ ︵ᠡᠷᠳᠡᠨ ᠤ ᠡᠨᠡᠳᠬᠡᠭ ᠤᠨ ᠲᠡᠪᠤᠨ ᠤᠬᠠᠭᠠᠨ ᠭᠡᠳᠡᠭ ᠨᠢ ᠲᠤᠳᠤᠭᠠᠳᠥ ᠤᠬᠠᠭᠠᠨ ︵ᠬᠥᠨ ᠤᠬᠠᠭᠠᠨ︶ ᠤᠴᠢᠷ ᠰᠢᠯᠲᠠᠭᠠᠨ ᠤ ᠤᠬᠠᠭᠠᠨ ︵ᠯᠤᠬᠢᠭ ᠤᠨ ᠤᠬᠠᠭᠠᠨ︶ ᠲᠠᠭᠤᠨ ᠤ ᠤᠬᠠᠭᠠᠨ ︵ᠬᠡᠯᠡ ᠰᠢᠨᠵᠢᠯᠡᠯ︶ ᠤᠷᠠᠯᠠᠬᠤᠢ ᠶᠢᠨ ᠤᠬᠠᠭᠠᠨ ︵ᠲᠤᠭ᠎ᠠ ᠵᠢᠷᠤᠬᠠᠢ᠂ ᠤᠳᠬ᠎ᠠ ᠤᠷᠠᠯᠢᠭ᠂ ᠤᠷᠠᠨ ᠪᠡᠷᠢᠯᠭ᠎ᠠ᠂ ᠥᠰᠥᠭ ᠪᠢᠴᠢᠭ᠂ ᠴᠡᠷᠢᠭ ᠤᠨ ᠡᠷᠳᠡᠮ ᠵᠡᠷᠬᠡ︶ ᠲᠡᠵᠢᠬᠡᠬᠦᠢ ᠶᠢᠨ ᠤᠬᠠᠭᠠᠨ ︵ᠡᠮ ᠡᠮᠨᠡᠯᠬᠡ᠂ ᠡᠷᠡᠬᠦᠯ ᠬᠠᠮᠠᠭᠠᠯᠠᠯ︶ ᠤ ᠲᠤᠯᠢ ᠶᠢ ᠭᠤᠤᠯᠴᠢᠯᠠᠨ ᠨᠠᠶᠢᠷᠠᠭᠤᠯᠵᠦ᠂ ᠪᠢᠯᠢᠬᠦᠨᠳᠠᠯᠠᠢ᠂ ᠠᠭᠸᠠᠩᠳᠠᠮᠫᠢᠯ ᠵᠡᠷᠬᠡ ᠤᠯᠡᠨ ᠡᠷᠳᠡᠮᠳᠡᠨ ᠬᠥᠥᠰᠢ ᠣᠷᠴᠢᠭᠤᠯᠤᠭᠴᠢ ᠨᠡᠷ ᠬᠢᠨᠡᠨ ᠰᠢᠬᠦᠬᠡᠳ᠂ 1742 ᠤᠨ ᠳᠤ ᠪᠡᠭᠡᠵᠢᠩ ᠳᠤ ᠮᠤᠳᠤᠨ ᠪᠠᠷ ᠢᠶᠠᠷ ᠬᠡᠪᠯᠡᠬᠦᠯᠥᠭᠰᠡᠨ ᠪᠡᠶᠢᠨ᠎ᠡ᠃    《 ᠯᠢᠰᠢ ᠶᠢᠨ ᠣᠷᠳᠥ ᠬᠠᠷᠰᠢ 》ᠭᠡᠳᠡᠭ ᠲᠦᠪᠡᠳ ᠮᠤᠩᠭᠤᠯ ᠲᠤᠪᠴᠢ ᠲᠤᠯᠢ ᠶᠢ ᠤᠷᠠᠳ ᠤᠨ ᠭᠥᠥᠰᠢ ᠪᠢᠯᠢᠬᠦᠨᠳᠠᠯᠠᠢ ᠨᠠᠶᠢᠷᠠᠭᠤᠯᠵᠦ ᠭᠤᠮᠪᠤᠵᠠᠪ ᠬᠥᠩ ᠬᠢᠨᠡᠵᠦ ᠠᠷᠢᠭᠤᠤᠬᠠᠭᠠᠳ 1734 ᠤᠨ ᠳᠤ ᠪᠡᠭᠡᠵᠢᠩ ᠳᠤ ᠪᠡᠷᠠᠯᠠᠭᠤᠯᠤᠭᠰᠠᠨ ᠶᠤᠮ᠃ ᠲᠤᠰ ᠲᠤᠯᠢ ᠪᠤᠯ ᠬᠢᠴᠢᠶᠠᠯ ᠬᠥᠮᠥᠵᠢᠯ ᠤᠨ ᠯᠠᠪᠯᠠᠯᠳᠠ ᠪᠡ ᠡᠷᠳᠡᠮ ᠰᠢᠨᠵᠢᠯᠡᠬᠡᠨ ᠤ ᠬᠢᠨᠡᠯᠳᠠ ᠳᠤ ᠵᠤᠷᠢᠭᠤᠯᠤᠭᠰᠠᠨ ᠪᠥᠭᠡᠳ 《 ᠮᠡᠷᠭᠡᠳ ᠭᠠᠷᠬᠤ ᠶᠢᠨ ᠤᠷᠤᠨ 》 ᠬᠡᠭᠦ ᠲᠠᠪᠤᠨ ᠤᠬᠠᠭᠠᠨ ᠤ ᠲᠤᠯᠢ ᠳᠠᠬᠢ ᠰᠠᠨᠰᠺᠠᠷᠲ ᠵᠢᠬᠡᠯᠡᠯᠬᠡ ᠥᠬᠡ ᠪᠡ ᠡᠷᠳᠡᠨ ᠤ ᠡᠨᠡᠳᠬᠡᠭ ᠲᠦᠪᠡᠳ ᠤᠨ ᠬᠥᠨ ᠪᠡᠷᠭᠡ ᠤᠳᠬ᠎ᠠ ᠲᠠᠢ ᠥᠬᠡᠰ ᠢ ᠨᠠᠷᠢᠨ ᠲᠠᠶᠢᠯᠪᠤᠷᠢᠯᠡᠵᠦ ᠥᠬᠦᠯᠡᠭᠰᠡᠨ ᠪᠠᠶᠢᠨ᠎ᠡ᠃ ᠭᠤᠮᠪᠣᠵᠠᠪ ᠬᠥᠩ ᠤᠨ ᠭᠤᠤᠯᠴᠢᠯᠠᠵᠦ ᠨᠠᠶᠢᠷᠠᠭᠤᠯᠤᠭᠰᠠᠨ《 ᠮᠡᠷᠭᠡᠳ ᠭᠠᠷᠬᠤ ᠶᠢᠨ ᠤᠷᠤᠨ》ᠬᠡᠭᠦ ᠲᠠᠪᠤᠨ ᠤᠬᠠᠭᠠᠨ ᠤ ᠲᠤᠯᠢ ᠨᠢ《 ᠲᠠᠨᠵᠥᠥᠷ》 ᠢ ᠤᠷᠴᠢᠭᠤᠯᠬᠤ ᠳᠤ ᠪᠡᠷᠢᠮᠵᠢᠶ᠎ᠡ ᠪᠤᠯᠤᠭᠰᠠᠨ ᠨᠡᠷ᠎ᠡ ᠲᠤᠮᠢᠶ᠎ᠡ ᠶᠢ ᠨᠢᠬᠡᠳᠬᠡᠭᠰᠡᠨ《 ᠲᠤᠬᠢᠶᠠᠨ ᠤ ᠪᠢᠴᠢᠭ 》 ︵ᠲᠤᠯᠢ ︶ ᠲᠠᠳᠥᠶᠢᠬᠡᠨ ᠪᠢᠰᠢ᠂ ᠬᠠᠷᠢᠨ ᠮᠤᠩᠭᠤᠯ ᠥᠨᠳᠥᠰᠥᠳᠡᠨ ᠤ ᠤᠷᠴᠢᠭᠤᠯᠭ᠎ᠠ ᠶᠢᠨ ᠤᠨᠤᠯ  ᠢ ᠳ᠋ᠥᠩᠨᠡᠨ ᠰᠢᠬᠦᠮᠵᠢᠯᠡᠵᠦ ᠂ ᠤᠷᠴᠢᠭᠤᠯᠭ᠎ᠠ ᠶᠢᠨ ᠥᠨᠳᠥᠰᠥᠨ ᠤᠨᠤᠯ ᠱᠠᠭᠠᠷᠳᠠᠯᠭ᠎ᠠ᠂ ᠵᠠᠷᠴᠢᠮ ᠪᠠᠷᠢᠮᠵᠢᠶ᠎ᠡ᠂ ᠠᠷᠭ᠎ᠠ ᠪᠠᠷᠢᠯ ᠳᠤ ᠬᠥᠷᠳᠡᠯ᠎ᠡ ᠨᠠᠷᠢᠨ ᠥᠬᠦᠯᠡᠨ ᠲᠤᠳᠤᠷᠬᠠᠶᠢᠯᠠᠭᠰᠠᠨ ᠤᠷᠴᠢᠭᠤᠯᠭ᠎ᠠ ᠶᠢᠨ ᠤᠨᠤᠯ ᠤᠨ ᠤᠤᠭᠠᠨ ᠵᠤᠬᠢᠶᠠᠯ ᠬᠡᠵᠦ ᠰᠣᠳᠣᠯᠣᠭᠴᠢᠳ ᠪᠠᠳᠣᠯᠠᠭᠰᠠᠨ ᠪᠠᠶᠢᠨ᠎ᠡ᠃ ᠤᠷᠴᠢᠭᠤᠯᠭ᠎ᠠ ᠶᠢᠨ ᠲᠤᠬᠠᠢ《 ᠮᠡᠷᠭᠡᠳ ᠭᠠᠷᠬᠤ ᠶᠢᠨ ᠤᠷᠤᠨ》 ᠤ ᠤᠷᠣᠰᠢᠯ ᠳᠤ ᠲᠤᠷᠠᠳᠤᠭᠰᠠᠨ ᠢ ᠲᠤᠪᠴᠢᠯᠠᠨ ᠲᠡᠮᠳᠡᠭᠯᠡᠪᠡᠯ᠄    《 ᠡᠳᠥᠬᠡ ᠵᠠᠷᠯᠢᠭ ᠤᠨ ᠱᠠᠰᠳᠢᠷ ︵ᠲᠠᠨᠵᠥᠥᠷ︶ ᠪᠥᠭᠦᠳᠡ ᠶᠢ ᠮᠤᠩᠭᠤᠯ ᠤᠨ ᠬᠡᠯᠡᠨ ᠳᠤᠷ ᠤᠷᠴᠢᠭᠤᠯᠵᠦ ᠬᠡᠪ ᠲᠤᠷ ᠪᠥᠳᠥᠬᠡᠬᠦ ᠬᠡᠷᠡᠭ ᠲᠠᠢ ᠬᠡᠮᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠳᠤᠷ ᠰᠢᠳᠥᠵᠦ᠂ ᠤᠷᠴᠢᠭᠤᠯᠬᠤᠢ ᠳᠤᠷ ᠴᠢᠬᠤᠯᠠ ᠣᠷᠣᠪᠠᠢ᠃    ᠲᠡᠭᠦᠨ᠎ᠡ ᠶᠡᠭᠡ ᠤᠤᠷ ᠮᠤᠩᠭᠤᠯ ᠤᠨ ᠲᠤᠰ ᠲᠣᠰ ᠤᠷᠤᠨ ᠤ ᠥᠬᠡ ᠶᠢᠨ ᠭᠤᠤᠯ ᠠᠳᠠᠯᠢ ᠪᠤᠯᠪᠠᠴᠥ ᠪᠠᠷ ᠥᠨᠴᠥᠭ ᠥᠴᠥᠬᠡᠨ ᠠᠳᠠᠯᠢ ᠪᠤᠰᠥ ᠤᠯᠠᠨ ᠪᠤᠢ᠃ ᠢᠯᠠᠩᠭᠤᠶ᠎ᠡ ᠨᠤᠮ ᠤᠷᠴᠢᠭᠤᠯᠤᠭᠴᠢ ᠳᠤᠷ ᠨᠡᠷ᠎ᠡ ᠲᠤᠬᠢᠶ᠎ᠡ ︵ᠲᠤᠮᠢᠶ᠎ᠡ︶ ᠨᠡᠷᠡᠶᠢᠳᠭᠦᠢ ᠶᠤᠰᠤᠨ ᠢ ᠴᠠᠭᠠᠵᠢᠯᠠᠨ ᠲᠤᠭᠳᠠᠭᠠᠭᠰᠠᠨ ᠮᠠᠳᠥ ᠨᠢᠬᠡᠨ ᠥᠬᠡᠢ ᠶᠢᠨ ᠲᠤᠯᠠ ᠬᠡᠯᠡᠮᠥᠷᠴᠢ ᠨᠠᠷ ᠥᠪᠡᠷ ᠥᠪᠡᠷ ᠤᠨ ᠵᠤᠷᠢᠭ ᠢᠶᠠᠷ ᠡᠯᠳᠡᠪ ᠵᠥᠢᠯ ᠥᠯᠥ ᠵᠤᠬᠢᠯᠳᠣᠬᠤ ᠨᠡᠷᠡᠶᠢᠳᠭᠡᠯ ᠨᠠᠶᠢᠷᠠᠭᠤᠯᠪᠠᠰᠥ ᠰᠤᠨᠤᠰᠬᠤᠢ ᠰᠡᠳᠬᠢᠭᠦᠢ ᠶᠢ ᠲᠠᠭᠠᠯᠠᠭᠴᠢᠳ ᠲᠠ ᠮᠠᠳᠡᠬᠦᠶ᠎ᠡ ᠪᠡᠷᠭᠡ ᠲᠡᠷᠢᠬᠦᠳᠡᠨ ᠬᠡᠮ ᠤᠨ ᠤᠷᠤᠨ ᠪᠤᠯᠬᠤ ᠶᠢᠨ ᠲᠤᠯᠠ ᠰᠠᠶᠢᠨ ᠵᠠᠷᠯᠢᠭ ᠤᠨ ᠨᠡᠷ᠎ᠡ ᠲᠤᠬᠢᠶᠠᠨ ᠤ ᠨᠡᠷᠡᠶᠢᠳᠬᠡᠯ ᠢ ᠨᠡᠷᠡᠶᠢᠳᠭᠦᠢ ᠶᠤᠰᠤᠨ ᠢ ᠪᠥᠳᠥᠭᠦᠪᠴᠢᠯᠡᠨ ᠬᠤᠷᠢᠶᠠᠭᠰᠠᠨ ᠨᠢᠬᠡᠨ ᠢ ᠨᠠᠶᠢᠷᠠᠭᠤᠯᠵᠦ ᠬᠡᠪ ᠰᠡᠶᠢᠯᠥᠬᠡᠳ ᠬᠤᠳᠠᠯᠠ ᠳᠤᠷ ᠲᠦᠭᠡᠭᠡᠨ ᠥᠢᠯᠡᠳᠪᠡᠢ᠃    ᠲᠤᠰᠠ ᠡᠷᠳᠡᠮ ᠬᠢᠬᠡᠳ ᠭᠡᠮ ᠠᠯᠳᠠᠯ ᠢ ᠰᠠᠶᠢᠳᠣᠷ ᠮᠠᠭᠠᠳᠯᠠᠵᠦ ᠪᠤᠳᠠᠳᠠᠢ ᠤᠷᠴᠢᠭᠤᠯᠬᠤ ᠶᠤᠰᠤᠨ ᠠᠨᠥ᠂ ᠭᠤᠤᠯ ᠥᠬᠡᠰ ᠢ ᠲᠥᠪᠡᠳ ᠬᠡᠯᠡᠨ ᠤ ᠥᠶ᠎ᠡ ᠵᠡᠷᠬᠡ ᠶᠠᠮᠪᠠᠷᠴᠢᠯᠠᠨ ᠤᠷᠴᠢᠭᠤᠯᠪᠠᠰᠥ ᠮᠣᠩᠭᠤᠯ ᠤᠨ ᠬᠡᠯᠡᠨ᠎ᠡ ᠮᠠᠳᠠᠬᠦᠢ  ᠳᠤᠷ ᠬᠢᠯᠪᠡᠷ ᠪᠥᠭᠡᠳ ᠤᠳᠬ᠎ᠠ ᠥᠯᠥ ᠰᠣᠯᠢᠯᠴᠠᠬᠤ ᠨᠤᠭᠤᠳ ᠢ ᠲᠡᠷᠡ ᠬᠦ ᠶᠤᠰᠤᠭᠠᠷ ᠤᠷᠴᠢᠭᠤᠯᠤᠭᠳᠠᠬᠤᠢ ︵ᠤᠷᠴᠢᠭᠤᠯᠳᠤᠭᠠᠢ︶᠃ ᠲᠡᠶᠢᠮᠥ ᠪᠤᠰᠥ ᠤᠷᠢᠳᠥ ᠬᠤᠶᠢᠳᠥ ᠥᠬᠡ ᠶᠢ ᠰᠣᠯᠢᠭᠤᠯᠪᠠᠰᠥ ᠤᠳᠬ᠎ᠠ ᠠᠨᠥ ᠲᠤᠳᠥ ᠮᠠᠳᠡᠭᠳᠠᠭᠦᠨ ᠥᠬᠦᠯᠡᠬᠦ ᠬᠢᠯᠪᠡᠷ ᠨᠤᠭᠤᠳ ᠢ ᠰᠢᠯᠥᠭᠯᠡᠭᠰᠡᠨ ᠥᠬᠡ ᠪᠤᠯᠪᠠᠰᠥ ᠨᠢᠬᠡᠨ ᠰᠢᠯᠥᠭ ᠤᠨ ᠲᠤᠲᠤᠷ᠎ᠡ ᠠᠯᠢ ᠠᠮᠠᠷ ᠢᠶᠠᠷ ᠰᠣᠯᠢᠭᠤᠯᠵᠦ᠂ ᠤᠷᠴᠢᠭᠤᠯᠬᠤᠢ ᠬᠢᠭᠡᠳ ᠥᠷᠬᠦᠯᠵᠢᠯᠡᠭᠰᠡᠨ ᠥᠭᠡᠰ ᠢ ᠨᠢᠬᠡᠨ ᠬᠤᠶᠠᠷ ᠪᠠ ᠭᠤᠷᠪᠠᠨ ᠲᠠᠷᠢᠬᠦᠳᠡᠨ ᠲᠠᠳᠡᠭᠡᠷ ᠥᠬᠡᠰ ᠤᠨ ᠤᠳᠬ᠎ᠠ ᠠᠯᠢᠨ ᠳᠤᠷ ᠬᠥᠷᠬᠦᠢ ᠲᠡᠭᠡᠭᠰᠢ ᠠᠯᠢ ᠠᠮᠠᠷ ᠢᠶᠠᠷ ᠰᠣᠯᠢᠭᠤᠯᠵᠦ ᠤᠷᠴᠢᠭᠤᠯᠤᠭᠳᠠᠬᠤᠢ ᠁    ᠪᠠᠰᠠ ᠵᠠᠷᠢᠮ ᠳᠤᠷ ᠲᠥᠪᠡᠳ ᠬᠡᠯᠡᠨ ᠤ ᠶᠤᠰᠤᠭᠠᠷ ᠤᠷᠴᠢᠭᠤᠯᠪᠠᠰᠥ ᠮᠤᠩᠭᠤᠯ ᠥᠰᠥᠭ ᠲᠤᠷ ᠠᠰᠥᠷᠥ ᠢᠯᠡᠬᠦ ︵ᠢᠯᠡᠬᠦᠥ︶ ᠥᠯᠡᠳᠡᠵᠦ ᠤᠳᠬ᠎ᠠ ᠶᠢᠨ ᠬᠤᠪᠢ ᠶᠢ ᠬᠠᠯᠬᠠᠯᠠᠬᠤ ᠮᠠᠳᠥ ᠴᠥ ᠤᠯᠠᠨ ᠪᠤᠢ ᠶᠢᠨ ᠲᠤᠯᠠ ᠲᠠᠬᠦᠨ ᠳᠤᠷ ᠬᠡᠮ ᠥᠯᠥ ᠪᠤᠯᠬᠤᠷ ᠪᠠᠷ ᠢᠯᠡᠬᠦ ᠥᠬᠡᠰ ᠢ ᠤᠭᠤᠷᠴᠥ ︵ᠣᠷᠬᠢᠵᠦ︶ ᠪᠤᠯᠬᠤ ᠪᠥᠭᠡᠳ ᠤᠳ᠋ ᠦᠬᠡᠢ ︵ᠬᠡᠮ︶ ᠦᠯᠦ ᠪᠤᠯᠬᠤ ᠦᠬᠡ ᠶᠢ ᠦᠴᠦᠬᠡᠨ ᠨᠡᠮᠡᠵᠤ ᠤᠷᠴᠢᠭᠤᠯᠤᠭᠳᠠᠬᠤᠢ᠃    ᠁ ᠪᠤᠰᠤ ᠪᠠᠰᠠ ᠮᠠᠭᠳᠠᠬᠤ ᠦᠬᠡ ᠬᠢᠭᠡᠳ ᠮᠠᠭᠠᠳᠬᠠᠬᠤ ᠶᠢᠨ ᠦᠬᠡ ᠪᠠ ᠭᠠᠶᠢᠬᠠᠬᠤ ᠦᠬᠡ᠂ ᠤᠶᠢᠳᠬᠠᠷᠯᠠᠬᠤ ᠶᠢᠨ ᠦᠬᠡ᠂ ᠠᠶᠤᠬᠤ ᠶᠢᠨ ᠦᠬᠡ ᠮᠡᠳᠤᠰ ᠲᠤᠷ ᠢᠨᠤ᠂ ᠮᠤᠩᠭᠤᠯ ᠬᠡᠯᠡᠨ ᠳᠤᠷ ᠬᠤᠳᠠᠯᠠ ᠶᠢᠨ ᠠᠯᠳᠠᠷᠰᠢᠭᠰᠠᠨ ᠪᠦᠬᠡᠳ ᠶᠡᠭᠡ ᠴᠢᠳᠠᠯ ᠲᠤ ᠰᠡᠳᠬᠢᠯ ᠢ ᠬᠦᠳᠡᠯᠭᠡᠨ ᠴᠢᠳᠠᠬᠤᠢ ᠤᠴᠢᠷ ᠲᠤᠷ ᠬᠦᠷᠦᠭᠰᠡᠨ ᠦᠬᠡᠰ ᠢᠶᠠᠷ ᠤᠷᠴᠢᠭᠤᠯᠤᠭᠳᠠᠬᠤᠢ᠃    ᠪᠤᠰᠤ ᠪᠠᠰᠠ ᠮᠤᠩᠭᠤᠯ ᠬᠡᠯᠡᠨ ᠳᠤᠷ ᠰᠢᠯᠦᠭᠯᠡᠭᠰᠡᠨ ᠬᠢᠬᠡᠳ ᠦᠷᠬᠦᠯᠵᠢᠯᠡᠭᠰᠡᠨ ᠤ ᠢᠯᠭᠠᠯ ᠪᠠ ᠰᠢᠯᠦᠭ ᠳᠤᠷ ᠴᠤ ᠪᠠᠳᠠᠭ ᠤᠷᠳᠤ ᠤᠬᠤᠷ ᠲᠡᠭᠰᠢ ᠪᠤᠯᠬᠤ ᠲᠡᠷᠢᠬᠦᠳᠡᠨ ᠲᠦᠪᠡᠳ ᠤᠨ ᠬᠡᠯᠡᠨ ᠶᠠᠮᠪᠠᠷᠴᠢᠯᠠᠨ ᠡᠰᠡ ᠪᠤᠯᠪᠠᠰᠤ ᠪᠠᠷ ᠰᠢᠯᠦᠭᠯᠡᠭᠰᠡᠨ ᠨᠦᠭᠦᠳ ᠢ ᠢᠨᠤ ᠢᠷᠠᠭᠤ ᠨᠠᠶᠢᠷᠳᠠᠢ ᠤᠳᠬ᠎ᠠ ᠲᠡᠬᠦᠰ ᠮᠡᠳᠡᠬᠦᠶ᠎ᠡ ᠬᠢᠯᠪᠡᠷ ᠪᠦᠬᠡᠳ ᠪᠠᠳᠠᠭ ᠤᠨ ᠤᠷᠳᠤ ᠤᠬᠤᠷ ᠢ ᠴᠤ ᠤᠯᠠᠩᠬᠢᠨ ᠢ ᠲᠡᠭᠰᠢ ᠦᠢᠯᠡᠳᠴᠤ ᠪᠠᠰᠠ ᠮᠠᠭᠳᠠᠭᠠᠯ ᠬᠢᠭᠡᠳ ᠵᠠᠯᠪᠠᠷᠢᠯ ᠮᠡᠳᠤ ᠵᠠᠷᠢᠮ ᠤᠳ ᠲᠤᠷ ᠮᠤᠩᠭᠤᠯ ᠬᠡᠯᠡᠨ ᠳᠤᠷ ᠠᠯᠳᠠᠷᠰᠢᠭᠰᠠᠨ ᠲᠤᠯᠤᠭᠠᠢ ᠬᠤᠯᠪᠤᠬᠤ ᠮᠡᠳᠤ ᠦᠢᠯᠡᠳᠪᠡᠰᠤ ᠪᠠᠷ ᠬᠠᠷᠰᠢ ᠦᠬᠡᠢ ᠪᠤᠯᠠᠢ……    ᠢᠯᠠᠭᠤᠭᠰᠠᠨ ᠤ ᠰᠠᠶᠢᠨ ᠵᠠᠷᠯᠢᠭ ᠲᠠᠭᠠᠯᠠᠯ ᠤᠨ ᠲᠠᠶᠢᠯᠪᠤᠷᠢ ᠯᠤᠭ᠎ᠠ ᠰᠠᠯᠳᠠ ᠶᠢ ᠶᠡᠭᠡ ᠤᠤᠷ ᠮᠤᠩᠭᠤᠯ ᠤᠨ ᠬᠡᠯᠡᠪᠡᠷ ᠤᠷᠴᠢᠭᠤᠯᠬᠤᠢ ᠳᠤᠷ ᠴᠢᠬᠤᠯᠠ ᠬᠡᠷᠡᠭ ᠲᠤ ᠭᠤᠤᠯ ᠶᠤᠰᠤᠨ ᠮᠡᠷᠭᠡᠳ ᠭᠠᠷᠬᠤ ᠶᠢᠨ ᠤᠷᠤᠨ ᠬᠡᠮᠡᠳᠡᠬᠦ ᠡᠬᠦᠨ ᠢ ᠰᠤᠳᠤᠯᠬᠤᠶ᠎ᠠ ᠲᠠᠭᠠᠯᠠᠭᠴᠢᠳ ᠨᠢᠭᠳᠠᠳᠠ ᠰᠢᠨᠵᠢᠯᠡᠵᠦ ᠪᠤᠤᠺᠠᠯᠢ ︵ᠬᠤᠪᠢ ᠬᠦᠮᠦᠨ︶ ᠳᠤᠷ ᠦᠯᠦ ᠢᠳᠡᠬᠡᠨ ᠨᠤᠮ ᠳᠤᠷ ᠢᠳᠡᠬᠡᠬᠦ᠂ ᠦᠬᠡ ︵ᠦᠰᠦᠭ︶ ᠳᠤᠷ ᠦᠯᠦ ᠢᠳᠡᠬᠡᠨ ︵ᠦᠯᠦ ᠪᠠᠷᠢᠮᠳᠠᠯᠠᠨ︶ ᠤᠳᠬ᠎ᠠ  ᠳᠤᠷ ᠢᠳᠡᠬᠡᠬᠦᠢ ︵ᠪᠠᠷᠢᠮᠳᠠᠯᠠᠬᠤ︶ ᠶᠢᠨ ᠡᠬᠦᠳᠡᠨ ᠠᠴᠠ ᠰᠠᠶᠢᠳᠤᠷ ᠮᠡᠳᠡᠨ ᠦᠢᠯᠡᠳᠦᠮᠤᠢ ‍ᠶ᠎ᠠ︾ ᠭᠡᠵᠠᠢ᠃ ᠢᠩᠬᠢᠬᠡᠳ ᠡᠷᠳᠡᠮᠳᠡᠨ ᠭᠤᠮᠪᠤᠵᠠᠪ ᠤᠨ ᠰᠢᠭᠤᠳ ᠡᠷᠬᠢᠯᠡᠭᠡ ᠪᠠᠷ ᠡᠨᠡᠬᠦ ᠤᠷᠴᠢᠭᠤᠯᠭ᠎ᠠ ᠶᠢᠨ ᠤᠨᠤᠯ ᠵᠠᠷᠴᠢᠮ ᠢ ᠪᠠᠷᠢᠮᠳᠠᠯᠠᠵᠤ᠂ ᠤᠯᠠᠨ ᠬᠡᠯᠡᠮᠤᠷᠴᠢ ᠬᠦᠤᠰᠢ ᠡᠷᠳᠡᠮᠳᠡᠨ ᠨᠠᠷ᠂ ᠬᠤᠶᠠᠷ ᠵᠠᠭᠤ ᠬᠤᠷᠢᠨ ᠲᠠᠪᠤᠨ ᠪᠤᠳᠢ ᠲᠠᠨᠵᠤᠤᠷ ᠢ 1742 ᠤᠨ ᠠᠴᠠ ᠡᠬᠢᠯᠡᠵᠦ 1749 ᠤᠨ ᠳᠤ ᠤᠷᠴᠢᠭᠤᠯᠵᠤ ᠲᠡᠭᠦᠰᠬᠡᠬᠡᠳ ᠪᠠᠷᠠᠯᠠᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃    ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠵᠠᠭᠤᠨ ᠤ ᠰᠡᠬᠦᠯᠴᠢ ᠶᠢᠨ ᠦᠶ᠎ᠡ ᠪᠠᠷ ᠮᠤᠩᠭᠤᠯ ᠤᠨ ᠰᠤᠶᠤᠯ ᠤᠨ ᠵᠢᠳᠬᠦᠯᠳᠡᠨ ᠴᠤᠶᠢᠵᠢᠠᠤᠳᠰᠤᠷ ᠤᠨ ᠤᠷᠴᠢᠭᠤᠯᠵᠤ ᠡᠬᠢᠯᠡᠭᠰᠡᠨ ︽ᠭᠤᠷᠪᠠᠨ ᠵᠠᠭᠤᠨ ᠭᠤᠴᠢᠨ ᠭᠤᠷᠪᠠᠳᠤ︾ ᠨᠢ ᠠᠷᠪᠠᠨ ᠨᠠᠢᠮᠠᠳᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠳᠤ ᠠᠯᠳᠠᠷᠳᠤ ᠡᠷᠳᠡᠮᠳᠡᠨ ᠭᠤᠮᠪᠤᠵᠠᠪ ᠤᠨ ᠭᠠᠷ ᠲᠤ ᠠᠮᠵᠢᠯᠳᠠ ᠲᠠᠢ ᠪᠠᠷ ᠤᠷᠴᠢᠭᠤᠯᠤᠭᠳᠠᠵᠤ ᠲᠡᠭᠦᠰᠴᠠᠢ᠃ ᠡᠨᠡᠬᠦ ᠲᠡᠯᠡᠬᠡᠢ ᠶᠢᠨ ᠰᠤᠶᠤᠯ ᠤᠨ ᠠᠪᠤᠷᠭᠤ ᠪᠦᠳᠦᠭᠡᠯ ᠪᠤᠯᠬᠤ ︽ᠲᠠᠨᠵᠤᠤᠷ︾ ᠢ ᠦᠨᠳᠦᠰᠦᠳᠡᠨ ᠤ ᠪᠠᠨ ᠬᠡᠯᠡ ᠪᠠᠷ ᠠᠭᠤᠯᠭ᠎ᠠ ᠪᠦᠷᠢᠨ ᠤᠳᠬ᠎ᠠ ᠲᠡᠭᠦᠰ ᠢᠷᠠᠭᠤ ᠤᠶᠢᠯᠠᠭᠠᠮᠵᠢᠳᠠᠢ ᠤᠷᠴᠢᠭᠤᠯᠵᠤ ᠪᠠᠷᠠᠯᠠᠭᠤᠯᠤᠭᠰᠠᠨ ᠶᠠᠪᠤᠳᠠᠯ ᠪᠤᠯ ᠡᠷᠬᠢᠨ ᠰᠠᠶᠢᠳ ᠭᠤᠮᠪᠤᠵᠠᠪ ᠤᠨ ᠡᠷᠬᠢᠮ ᠭᠠᠪᠢᠶ᠎ᠠ ᠵᠢᠳᠬᠦᠯ ᠲᠠᠢ ᠰᠠᠯᠵᠤ ᠪᠤᠯᠤᠰᠢ ᠦᠬᠡᠢ ᠶᠤᠮ᠃ ᠡᠨᠡ ᠨᠢ ᠲᠡᠯᠡᠬᠡᠢ ᠶᠢᠨ ᠦᠨᠳᠦᠰᠦᠳᠡᠨ ᠨᠦᠭᠦᠳ ᠤᠨ ᠰᠤᠶᠤᠯ ᠤᠨ ᠰᠤᠯᠢᠯᠴᠠᠭ᠎ᠠ ᠶᠢ ᠠᠬᠢᠭᠤᠯᠬᠤ ᠳᠤ ᠬᠦᠨᠳᠦ ᠴᠢᠬᠤᠯᠠ ᠬᠤᠪᠢ ᠨᠡᠮᠡᠷᠢ ᠪᠤᠯᠤᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠬᠡᠢ ᠲᠡᠯᠡᠬᠡᠢ ᠳ᠋ᠠᠬᠢᠨ ᠤ ᠮᠤᠩᠭᠤᠯ ᠤ ᠰᠤᠳᠤᠯᠤᠯ ᠤᠨ ᠬᠦᠭᠵᠢᠯ ᠳᠤ ᠴᠤ ᠲᠦᠯᠬᠢᠨ ᠠᠬᠢᠭᠤᠯᠤᠭᠰᠠᠨ ᠶᠤᠮ᠃    ᠠᠷᠪᠠ ᠶᠢᠰᠦᠳᠦᠭᠡᠷ ᠵᠠᠭᠤᠨ ᠠᠴᠠ ᠨᠠᠰᠢ ᠫᠤᠼᠳᠠᠨᠢᠶᠧᠹ᠂ ᠯᠠᠤᠹᠧᠷ᠂ ᠺᠤᠸᠠᠸ᠋ᠹᠰᠺᠢ ᠱᠮᠢᠲ᠂ ᠸᠠᠯᠳᠢᠮᠢᠷᠼᠤᠹ ᠵᠡᠷᠭᠡ ᠮᠤᠩᠭᠤᠯᠴᠢ ᠡᠷᠳᠡᠮᠳᠡᠨ ᠨᠠᠷ ᠴᠦᠮ ︽ᠮᠡᠷᠭᠡᠳ ᠭᠠᠷᠬᠤ ᠶᠢᠨ ᠤᠷᠤᠨ︾᠂ ︽ᠲᠦᠪᠡᠳ ᠤᠨ ᠬᠡᠯᠡ ᠶᠢ ᠬᠢᠯᠪᠠᠷ ᠢᠶᠠᠷ ᠰᠤᠷᠬᠤ ᠨᠡᠷᠡᠳᠦ ᠪᠢᠴᠢᠭ︾ ᠵᠡᠷᠭᠡ ᠪᠠᠷ ᠲᠦᠯᠬᠢᠬᠦᠷ ᠪᠤᠯᠭᠠᠵᠤ ᠪᠠᠶᠢᠭᠠᠳ ︽ᠭᠠᠨᠵᠤᠤᠷ︾ ︽ᠲᠠᠨᠵᠤᠤᠷ︾ ᠤᠨ ᠮᠤᠩᠭᠤᠯ ᠤᠷᠴᠢᠭᠤᠯᠭ᠎ᠠ ᠶᠢᠨ ᠬᠡᠯᠡ ᠶᠢ ᠰᠤᠳᠤᠯᠵᠤ ᠡᠷᠳᠡᠮ ᠰᠢᠨᠵᠢᠯᠡᠬᠡᠨ ᠤ ᠠᠯᠳᠠᠷᠳᠤ ᠦᠬᠦᠯᠡᠯ ᠵᠤᠬᠢᠶᠠᠯ ᠪᠢᠴᠢᠵᠠᠢ᠃    ᠲᠡᠷᠡᠴᠢᠯᠡᠨ ︽ᠮᠡᠷᠭᠡᠳ ᠭᠠᠷᠬᠤ ᠶᠢᠨ ᠤᠷᠤᠨ︾ ︽ᠲᠦᠪᠡᠳ ᠤᠨ ᠬᠡᠯᠡ ᠶᠢ ᠬᠢᠯᠪᠠᠷ ᠢᠶᠠᠷ ᠰᠤᠷᠬᠤ ᠨᠡᠷᠡᠳᠤ ᠪᠢᠴᠢᠭ︾ ︽ᠭᠠᠨᠵᠤᠤᠷ︾ ︽ᠲᠠᠨᠵᠤᠤᠷ︾ ᠵᠡᠷᠭᠡ ᠵᠤᠬᠢᠶᠠᠯ ᠳᠤ ᠲᠠᠪᠤᠨ ᠤᠬᠠᠭᠠᠨ ᠤ ᠠᠯᠢ ᠤᠯᠠᠨ ᠨᠡᠷ᠎ᠡ ᠲᠤᠮᠢᠶ᠎ᠠ ᠶᠢ ᠮᠤᠩᠭᠤᠯ ᠬᠡᠯᠡ ᠪᠠᠷ ᠢᠶᠠᠨ ᠤᠨᠤᠪᠴᠢᠳᠠᠢ ᠰᠠᠶᠢᠬᠠᠨ ᠨᠡᠷᠡᠯᠡᠨ ᠤᠷᠴᠢᠭᠤᠯᠤᠭᠰᠠᠨ ᠶᠠᠪᠤᠳᠠᠯ ᠨᠢ ᠡᠳᠦᠭᠡ ᠴᠤ ᠪᠢᠳᠡ ᠪᠦᠬᠦᠨ ᠤ ᠬᠦᠷᠳᠡᠭᠡᠯ ᠪᠤᠯᠬᠤ ᠶᠤᠰᠤᠳᠠᠢ᠃ ᠡᠨᠡ ᠲᠤᠬᠠᠢ ᠡᠷᠳᠡᠮᠳᠡᠨ ᠲᠡᠮᠤᠷᠴᠡᠷᠢᠩ᠄ ︽ᠮᠤᠩᠭᠤᠯ ᠤᠨ ᠰᠤᠩᠭᠤᠳᠠᠭ ᠪᠢᠴᠢᠭ ᠤᠨ ᠬᠡᠯᠡ ᠪᠤᠶᠤ ᠤᠳᠬ᠎ᠠ ᠵᠤᠬᠢᠶᠠᠯ ᠤᠨ ᠬᠡᠯᠡ ᠨᠢ 17 —18 ᠳ᠋ᠤᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠳᠤ ᠪᠠᠷᠠᠯᠠᠭᠰᠠᠨ〈 ᠭᠠᠨᠵᠤᠤᠷ 〉〈 ᠲᠠᠨᠵᠤᠤᠷ 〉 ᠤᠨ ᠤᠷᠴᠢᠭᠤᠯᠭ᠎ᠠ ᠶᠢᠨ ᠬᠡᠯᠡᠨ ᠳᠤ ᠬᠠᠮᠤᠭ ᠤᠨ ᠲᠤᠳᠤ ᠢᠯᠡᠷᠡᠯ ᠢᠶᠠᠨ ᠤᠯᠤᠭᠰᠠᠨ ᠪᠠᠶᠢᠨ᠎ᠠ︾ ᠭᠡᠵᠦ ᠦᠨᠳᠦᠷ ᠢᠶᠠᠷ ᠦᠨᠡᠯᠡᠨ ᠲᠡᠮᠳᠡᠭᠯᠡᠵᠠᠢ᠃    ᠭᠤᠮᠪᠤᠵᠠᠪ ᠢᠶᠠᠷ ︽ᠲᠠᠨᠵᠤᠤᠷ︾ ᠤᠨ ᠤᠷᠴᠢᠭᠤᠯᠭ᠎ᠠ ᠶᠢ ᠶᠡᠷᠦᠩᠬᠡᠶᠢᠯᠡᠨ ᠬᠢᠨᠠᠵᠤ ᠪᠠᠷᠠᠯᠠᠭᠤᠯᠤᠭᠰᠠᠨ ᠤ ᠲᠠᠷᠠᠭ᠎ᠠ ᠂ ᠪᠠᠰᠠ ᠲᠡᠭᠷᠢ ᠲᠡᠳᠬᠦᠭᠴᠢ ︵1736 ᠤᠨ — 1796 ᠤᠨ︶ ᠬᠠᠭᠠᠨ ᠤ ᠵᠠᠷᠯᠢᠭ ᠢᠶᠠᠷ ᠬᠢᠲᠠᠳ ︽ᠭᠠᠨᠵᠤᠤᠷ ︾ ᠲᠤᠳᠤᠷᠠᠬᠢ ᠲᠦᠪᠡᠳ ᠬᠡᠯᠡ ᠲᠡᠭᠡᠷ᠎ᠡ ᠦᠬᠡᠢ ᠵᠦᠢᠯ ᠢ ᠲᠦᠪᠡᠳ ᠬᠡᠯᠡ ᠪᠠᠷ ᠤᠷᠴᠢᠭᠤᠯᠬᠤ ᠪᠤᠶᠤ ᠬᠢᠲᠠᠳ ᠬᠡᠯᠡ ᠲᠡᠭᠡᠷ᠎ᠡ ᠦᠬᠡᠢ ᠶᠢ ᠬᠢᠲᠠᠳ ᠬᠡᠯᠡ ᠪᠠᠷ ᠤᠷᠴᠢᠭᠤᠯᠬᠤ ᠡᠬᠦᠷᠭᠡ ᠶᠢ ᠬᠦᠯᠢᠶᠡᠭᠰᠡᠨ ᠪᠦᠬᠡᠳ ︽ᠬᠤᠶᠠᠷ ᠦᠬᠡᠢ ᠦᠨᠳᠦᠰᠦᠨ ᠲᠠᠶᠢᠨ ᠢᠯᠭᠤᠭᠰᠠᠨ︾ ᠢ ᠤᠷᠴᠢᠭᠤᠯᠤᠨ ᠲᠡᠯᠭᠡᠷᠡᠬᠦᠯᠬᠦ ᠴᠢᠬᠤᠯᠠ ᠰᠠᠨᠠᠯ ᠢ ᠲᠤᠷᠠᠳᠤᠭᠰᠠᠨ ᠬᠡᠮᠡᠨ ᠪᠠᠭᠠᠷᠢᠨ ᠤ ᠲᠡᠤᠬᠡᠴᠢ ᠲᠠᠷᠮᠠᠳᠠᠯᠠᠢ ︽ᠴᠠᠭᠠᠨ ᠯᠢᠩᠬᠸ᠎ᠠ ᠶᠢᠨ ᠡᠷᠢᠬᠡᠰ︾ ᠲᠡᠭᠡᠨ ᠮᠡᠳᠡᠭᠡᠯᠡᠭᠰᠡᠨ ᠪᠢᠯᠡ᠃ ᠪᠢᠳᠡ ︽ᠭᠠᠨᠵᠤᠤᠷ︾ ᠢ ᠤᠷᠴᠢᠭᠤᠯᠬᠤ ᠳᠤ ᠤᠷᠤᠯᠴᠠᠭᠰᠠᠨ ᠬᠦᠮᠦᠰ ᠢ ᠰᠢᠬᠦᠨ ᠦᠵᠡᠬᠦ ᠳᠤ᠂ ᠦᠵᠦᠮᠦᠴᠢᠨ ᠬᠦᠩ ᠭᠤᠮᠪᠤᠵᠠᠪ ︽ᠭᠠᠨᠵᠤᠤᠷ︾ ᠢ ᠪᠦᠷᠢᠳᠬᠡᠨ ᠤᠷᠴᠢᠭᠤᠯᠬᠤ ᠠᠵᠢᠯ ᠳᠤ ᠤᠷᠤᠯᠴᠠᠭᠰᠠᠨ ᠮᠡᠳᠦ ᠪᠠᠶᠢᠨ᠎ᠠ᠃ ︽ᠭᠠᠨᠵᠤᠤᠷ︾ ᠢ ᠤᠷᠴᠢᠭᠤᠯᠬᠤ ᠳᠤ ᠤᠷᠤᠯᠴᠠᠭᠰᠠᠨ ᠬᠦᠮᠦᠰ ᠤᠨ ᠲᠤᠳᠤᠷ᠎ᠠ᠂ ︽ᠦᠵᠦᠮᠦᠴᠢᠨ ᠤᠪᠠᠰᠢ︾ ᠬᠡᠮᠡᠨ ᠲᠡᠮᠳᠡᠭᠯᠡᠭᠳᠡᠭᠰᠡᠨ ᠨᠢᠬᠡᠨ ᠬᠦᠮᠦᠨ ᠪᠠᠶᠢᠳᠠᠭ᠃ ᠮᠠᠨ ᠤ ᠦᠵᠡᠬᠦ ᠪᠠᠷ ᠡᠨᠡᠬᠦ ︽ᠦᠵᠦᠮᠦᠴᠢᠨ ᠤᠪᠠᠰᠢ︾ ᠭᠡᠳᠡᠭ ᠨᠢ ᠦᠭᠡᠷ᠎ᠡ ᠬᠦᠮᠦᠨ ᠪᠢᠰᠢ᠂ ᠬᠠᠷᠢᠨ ᠡᠷᠳᠡᠮᠳᠡᠨ ᠬᠦᠩ ᠭᠤᠮᠪᠤᠵᠠᠪ ᠤᠨ ᠰᠠᠬᠢᠯ ᠤᠨ ᠨᠡᠷ᠎ᠡ ᠰᠢᠭ ᠪᠠᠶᠢᠨ᠎ᠠ᠃ ᠮᠤᠩᠭᠤᠯ ᠤᠨ ᠡᠷᠳᠡᠨ ᠤ ᠰᠤᠷᠪᠤᠯᠵᠢ ᠪᠢᠴᠢᠭ ᠲᠤ ᠵᠠᠷᠢᠮ ᠳᠠᠭᠠᠨ ᠰᠢᠭᠤᠳ ᠤᠪᠤᠭ ᠨᠡᠷ᠎ᠡ ᠪᠠᠨ ᠪᠢᠴᠢᠬᠦ ᠦᠬᠡᠢ᠂ ᠬᠠᠷᠢᠨ ᠵᠡᠷᠭᠡ ᠬᠡᠷᠬᠢᠮ᠂ ᠴᠤᠯᠠ ᠮᠢᠨᠳᠠᠭ᠂ ᠰᠠᠬᠢᠯ ᠰᠠᠨᠸᠠᠷ ᠤᠨ ᠨᠡᠷ᠎ᠡ ᠪᠠᠨ ᠪᠢᠴᠢᠳᠡᠭ ᠵᠠᠩᠰᠢᠯ ᠵᠦᠩᠳᠡᠬᠡᠨ ᠪᠠᠶᠢᠭᠰᠠᠨ ᠶᠤᠮ᠃ ᠭᠤᠮᠪᠤᠵᠠᠪ ︽ᠤᠪᠠᠰᠢ︾ ᠶᠢᠨ ᠰᠠᠬᠢᠯ ᠠᠪᠤᠭᠰᠠᠨ ᠨᠢ ᠦᠨᠡᠨ ᠪᠢᠯᠡ᠃ ᠭᠤᠮᠪᠤᠵᠠᠪ ᠤᠨ ᠨᠠᠶᠢᠷᠠᠭᠤᠯᠤᠨ ᠵᠤᠬᠢᠶᠠᠭᠰᠠᠨ᠂ ︽ᠤᠳᠠᠶᠢᠱᠠᠨ ᠠᠭᠤᠯᠠ ᠶᠢᠨ ᠠᠳᠢᠰᠳᠢᠨ ᠲᠤ ᠰᠢᠳᠦᠬᠡᠨ ᠲᠠᠪᠤᠨ ᠵᠠᠭᠤᠨ ᠪᠠᠨᠳᠢᠳᠠ ᠶᠢᠨ ᠴᠢᠳᠡᠭ ᠤᠷᠤᠰᠢᠪᠠᠢ︾ ᠭᠡᠮᠡᠬᠦ ᠰᠤᠳᠤᠷ ᠲᠤ᠂ ︽ᠴᠢᠩᠬᠢᠰ ᠪᠤᠭᠳᠠ ᠶᠢᠨ ᠠᠯᠳᠠᠨ ᠤᠷᠤᠭ ᠠᠴᠠ ᠴᠢᠳᠡᠭ ᠦᠬᠦᠯᠡᠭᠴᠢ ᠲᠦᠷᠪᠡᠨ ᠬᠡᠯᠡᠲᠦ ᠤᠪᠠᠰᠢ ᠮᠠᠭᠦᠸᠠᠪᠤᠸᠠ ᠰᠬᠢᠨᠪᠠᠰ ︵ᠭᠤᠮᠪᠤᠵᠠᠪ︶ ᠪᠢ︾ ᠭᠡᠵᠦ ᠲᠤᠪ ᠲᠤᠳᠤᠷᠬᠠᠢ ᠲᠤᠰᠢᠶᠠᠨ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠳᠠᠭ᠃ ᠡᠬᠦᠨ ᠢᠶᠠᠷ ᠦᠵᠡᠬᠦᠯ᠎ᠡ᠂ ᠡᠷᠳᠡᠮᠳᠡᠨ ᠬᠦᠩ ᠭᠤᠮᠪᠤᠵᠠᠪ ︽ᠭᠠᠨᠵᠤᠤᠷ︾ ᠢ ᠪᠦᠷᠢᠳᠬᠡᠨ ᠤᠷᠴᠢᠭᠤᠯᠬᠤ ︵ᠬᠢᠲᠠᠳ ᠬᠡᠯᠡᠨ ᠠᠴᠠ ᠲᠦᠪᠡᠳ ᠬᠡᠯᠡᠨ ᠳᠤ ᠤᠷᠴᠢᠭᠤᠯᠤᠭᠰᠠᠨ ᠪᠤᠶᠤ ᠲᠦᠪᠡᠳ ᠬᠡᠯᠡᠨ ᠠᠴᠠ ᠬᠢᠲᠠᠳ ᠬᠡᠯᠡᠨ ᠳᠤ ᠤᠷᠴᠢᠭᠤᠯᠤᠭᠰᠠᠨ︶ ᠠᠵᠢᠯ ᠢ ᠬᠢᠵᠦ ᠪᠠᠶᠢᠭᠰᠠᠨ ᠨᠢ ᠮᠠᠳᠠᠭ ᠦᠬᠡᠢ ᠪᠠᠶᠢᠨ᠎ᠠ᠃ ᠪᠤᠳᠠᠳᠠᠢ ᠮᠡᠳᠡᠭᠡ ᠪᠠᠷᠢᠮᠳᠠ ᠶᠢ ᠦᠨᠳᠦᠰᠦᠯᠡᠪᠡᠯ ᠲᠡᠷᠡ ᠪᠠᠷ ᠬᠢᠲᠠᠳ ︽ᠭᠠᠨᠵᠤᠤᠷ︾ ︵大藏经︶ ᠤᠨ ᠲᠤᠳᠤᠷᠠᠬᠢ ︽ᠪᠤᠷᠬᠠᠨ ᠤ ᠬᠦᠷᠦᠭ ᠢ ᠱᠤᠭᠤᠮᠠᠯᠠᠬᠤ ᠪᠠ ᠵᠢᠷᠤᠬᠤ ᠲᠤᠬᠠᠢ ᠵᠢᠭᠠᠪᠤᠷᠢ︾ ᠪᠤᠶᠤ ︽造像量度经︾ ᠬᠡᠮᠡᠬᠦ ᠰᠤᠳᠤᠷ ᠢ ᠲᠦᠪᠡᠳ ᠬᠡᠯᠡᠨ ᠠᠴᠠ ᠬᠢᠲᠠᠳ ᠬᠡᠯᠡᠨ ᠳᠤ ᠤᠷᠴᠢᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ︽ᠲᠠᠩᠰᠤᠭ ᠯᠠᠮᠠ ᠶᠢᠨ ᠴᠠᠳᠢᠭ︾ ᠢ ᠬᠢᠲᠠᠳ ᠬᠡᠯᠡᠨ ᠠᠴᠠ ᠲᠦᠪᠡᠳ ᠬᠡᠯᠡᠨ ᠳᠤ ᠤᠷᠴᠢᠭᠤᠯᠵᠠᠢ᠃ ᠪᠠᠰᠠ ︽ᠼᠠᠨᠳᠠᠨ ᠵᠤᠤ ᠶᠢᠨ ᠨᠠᠮᠳᠠᠷ︾᠂ ︽ᠤᠳᠠᠶᠢᠱᠠᠨ ᠠᠭᠤᠯᠠ ᠶᠢᠨ ᠠᠳᠢᠰᠳᠢᠨ ᠲᠤ ᠰᠢᠳᠦᠭᠡᠨ ᠲᠠᠪᠤᠨ ᠵᠠᠭᠤᠨ ᠪᠠᠨᠳᠢᠳᠠ ᠶᠢᠨ ᠴᠢᠳᠡᠭ ᠤᠷᠤᠰᠢᠪᠠᠢ︾ ᠭᠡᠬᠦ ᠮᠡᠲᠦ ᠶᠢᠨ ᠱᠠᠰᠢᠨ ᠤ ᠲᠡᠤᠬᠡ ᠨᠠᠮᠳᠠᠷ ᠤᠨ ᠬᠤᠪᠤᠷ ᠴᠤᠬᠠᠭ ᠨᠤᠮ ᠢ ᠲᠦᠪᠡᠳ ᠬᠡᠯᠡ ᠪᠠᠷ ᠵᠤᠬᠢᠶᠠᠭᠰᠠᠨ ᠪᠠᠶᠢᠨ᠎ᠠ᠃ ᠲᠡᠬᠦᠨᠴᠢᠯᠡᠨ ᠲᠡᠷᠡ ᠪᠠᠰᠠ ᠦᠪᠡᠷᠦᠨ ᠦᠨᠳᠦᠷ ᠮᠡᠳᠡᠯᠭᠡ ᠪᠤᠯᠪᠠᠰᠤᠷᠠᠯ ᠢᠶᠠᠨ ᠠᠰᠢᠭᠯᠠᠵᠤ᠂ ︽ᠵᠠᠨᠠᠭ ᠴᠤᠶᠢᠵᠤᠩ︾ ᠲᠤᠬᠠᠶᠢᠯᠠᠪᠠᠯ ︽ᠬᠢᠲᠠᠳ ᠭᠠᠵᠠᠷ ᠪᠤᠷᠬᠠᠨ ᠤ ᠱᠠᠰᠢᠨ ᠲᠡᠯᠭᠡᠷᠡᠭᠰᠡᠨ ᠲᠡᠤᠬᠡ︾ ᠭᠡᠳᠡᠭ ᠲᠤᠰᠬᠠᠢ ᠱᠠᠰᠢᠨ ᠲᠡᠯᠭᠡᠷᠡᠭᠰᠡᠨ ᠲᠡᠤᠬᠡ ᠶᠢᠨ ᠨᠤᠮ ᠢᠶᠠᠨ ᠲᠦᠪᠡᠳ ᠬᠡᠯᠡ ᠪᠠᠷ ᠵᠤᠬᠢᠶᠠᠵᠤ 1746 ᠤᠨ ᠳᠤ ᠲᠦᠪᠡᠳ ᠤᠨ ᠯᠾᠰᠠ ᠬᠤᠳᠠᠨ ᠳᠤ ᠬᠡᠪᠯᠡᠬᠦᠯᠵᠦ᠂ ᠪᠤᠳᠠᠯᠠᠩ ᠤᠷᠳᠤᠨ ᠤ ᠪᠢᠴᠢᠭ ᠰᠤᠳᠤᠷ ᠤᠨ ᠬᠦᠷᠢᠶᠡᠯᠡᠩ ᠳᠤ ᠬᠠᠳᠠᠭᠠᠯᠠᠭᠤᠯᠵᠠᠢ᠃ ᠡᠳᠡᠭᠡᠷ ᠪᠦᠬᠦᠨ ᠨᠢ ᠪᠤᠷᠬᠠᠨ ᠱᠠᠰᠢᠨ ᠤ ᠲᠡᠤᠬᠡ ᠶᠢᠨ ᠰᠤᠳᠤᠯᠤᠯ ᠪᠤᠯᠤᠨ ᠮᠤᠩᠭᠤᠯ᠂ ᠲᠦᠪᠡᠳ᠂ ᠬᠢᠲᠠᠳ ᠵᠡᠷᠭᠡ ᠦᠨᠳᠦᠰᠦᠳᠡᠨ ᠤ ᠰᠤᠶᠤᠯ ᠤᠨ ᠬᠠᠷᠢᠯᠴᠠᠭ᠎ᠠ ᠰᠤᠯᠢᠯᠴᠠᠭ᠎ᠠ ᠶᠢ ᠰᠤᠳᠤᠯᠬᠤ ᠳᠤ ᠪᠦᠷ ᠴᠤ ᠦᠨ᠎ᠡ ᠴᠠᠨ᠎ᠠ ᠲᠠᠢ ᠲᠡᠤᠬᠡ ᠶᠢᠨ ᠪᠠᠷᠢᠮᠳᠠ ᠪᠤᠯᠬᠤ ᠨᠢ ᠭᠠᠷᠴᠠᠭ᠎ᠠ ᠦᠬᠡᠢ ᠶᠤᠮ᠃    ᠭᠤᠮᠪᠤᠵᠠᠪ ᠬᠦᠩ ᠪᠤᠯ ᠮᠦᠨᠴᠦ ᠨᠢᠬᠡᠨ ᠬᠡᠯᠡ ᠰᠢᠨᠵᠢᠯᠡᠯ ᠤᠨ ᠡᠷᠳᠡᠮᠳᠡᠨ ᠪᠠ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠵᠢᠳᠬᠦᠯᠳᠡᠨ ᠪᠤᠯᠤᠨ᠎ᠠ᠃ ᠲᠡᠷᠡ ᠪᠡᠭᠡᠵᠢᠩ ᠳᠠᠬᠢ ᠲᠠᠩᠭᠤᠳ ᠪᠢᠴᠢᠭ ᠤᠨ ᠰᠤᠷᠭᠠᠭᠤᠯᠢ ᠶᠢᠨ ᠪᠦᠬᠦᠳᠡ ᠶᠢ ᠵᠠᠬᠢᠨ ᠰᠤᠷᠭᠠᠭᠴᠢ ᠪᠠᠷ ᠭᠤᠴᠢᠭᠠᠳ ᠵᠢᠯ ᠠᠵᠢᠯᠯᠠᠬᠤ ᠳᠠᠭᠠᠨ ᠬᠦᠨᠳᠦ ᠬᠠᠳᠠᠭᠤᠵᠢᠯᠳᠠᠢ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠤᠨ ᠠᠵᠢᠯ ᠢ ᠬᠠᠷᠢᠭᠤᠴᠠᠨ ᠬᠢᠬᠦ ᠠᠴᠠ ᠭᠠᠳᠠᠨ᠎ᠠ ᠵᠢᠭᠠᠨ ᠰᠤᠷᠭᠠᠬᠤ ᠬᠡᠷᠡᠭᠴᠡᠭᠡ ᠱᠠᠭᠠᠷᠳᠠᠯᠭ᠎ᠠ ᠶᠢ ᠦᠨᠳᠦᠰᠦᠯᠡᠨ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠤᠨ ᠪᠢᠴᠢᠭ ᠨᠤᠮ ᠢ ᠤᠯᠠᠨ ᠲᠤᠭ᠎ᠠ ᠪᠠᠷ ᠨᠠᠶᠢᠷᠠᠭᠤᠯᠤᠨ ᠪᠢᠴᠢᠭᠰᠡᠨ ᠪᠠᠶᠢᠨ᠎ᠠ᠃ ᠵᠢᠱᠢᠶᠡᠯᠡᠬᠦ ᠳᠤ᠂ ︽ᠠᠯᠢ ᠭᠠᠯᠢ ᠦᠰᠦᠭ ᠤᠨ ᠲᠦᠷᠢᠮ︾ ᠬᠡᠮᠡᠬᠦ ᠰᠠᠨᠰᠺᠠᠷᠠᠲ ᠴᠠᠭᠠᠨ ᠲᠤᠯᠤᠭᠠᠢ ᠶᠢᠨ ᠰᠤᠷᠬᠤ ᠪᠢᠴᠢᠭ᠂ ︽ᠲᠦᠪᠡᠳ ᠬᠡᠯᠡ ᠶᠢ ᠬᠢᠯᠪᠠᠷ ᠢᠶᠠᠷ ᠰᠤᠷᠬᠤ ᠨᠡᠷᠡᠳᠦ ᠪᠢᠴᠢᠭ︾ ᠵᠡᠷᠬᠡ ᠶᠢ ᠨᠠᠶᠢᠷᠠᠭᠤᠯᠤᠨ ᠵᠢᠭᠠᠵᠤ᠂ ᠤᠯᠠᠨ ᠲᠤᠭᠠᠨ ᠤ ᠤᠶᠤᠳᠠᠨ ᠰᠡᠭᠡᠭᠡᠳᠡᠨ ᠪᠠ ᠤᠷᠴᠢᠭᠤᠯᠤᠭᠴᠢ ᠬᠡᠯᠡᠮᠤᠷᠴᠢ ᠨᠠᠷ ᠢ ᠬᠦᠮᠦᠵᠢᠭᠦᠯᠦᠭᠰᠡᠨ ᠶᠤᠮ᠃ ᠡᠨᠡᠬᠦ ᠲᠠᠩᠭᠤᠳ ᠪᠢᠴᠢᠭ ᠤᠨ ᠰᠤᠷᠭᠠᠭᠤᠯᠢ ᠠᠴᠠ ᠬᠦᠮᠦᠵᠢᠬᠦᠯᠵᠦ ᠭᠠᠷᠭᠠᠭᠰᠠᠨ ᠤᠯᠠᠨ ᠠᠷᠪᠢᠨ ᠤᠶᠤᠳᠠᠨ ᠰᠡᠭᠡᠭᠡᠳᠡᠨ ᠨᠢ ︽ᠲᠠᠨᠵᠤᠤᠷ︾ ᠢ ᠤᠷᠴᠢᠭᠤᠯᠬᠤ ᠳᠤ ᠭᠤᠤᠯᠯᠠᠭᠴᠢ ᠬᠦᠴᠦᠨ ᠪᠤᠯᠤᠭᠰᠠᠨ ᠪᠦᠬᠡᠳ ᠬᠤᠵᠢᠮ ᠨᠢ ᠪᠦᠷ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠰᠤᠶᠤᠯ ᠤᠨ ᠵᠢᠳᠬᠦᠯᠳᠡᠨ ᠪᠤᠯᠤᠭᠰᠠᠨ ᠪᠢᠯᠡ᠃    ᠭᠤᠮᠪᠤᠵᠠᠪ ᠢᠶᠠᠷ ︽ᠲᠦᠪᠡᠳ ᠬᠡᠯᠡ ᠶᠢ ᠬᠢᠯᠪᠠᠷ ᠢᠶᠠᠷ ᠰᠤᠷᠬᠤ ᠨᠡᠷᠡᠳᠦ ᠪᠢᠴᠢᠭ︾ ᠲᠡᠭᠡᠨ᠂ ᠲᠦᠪᠡᠳ ᠤᠨ ᠦᠰᠦᠭ ᠪᠢᠴᠢᠭ ᠤᠨ ᠡᠭᠦᠰᠦᠯ ᠭᠠᠷᠤᠯ᠂ ᠦᠭᠡᠰ ᠤᠨ ᠰᠠᠩ ᠪᠠ ᠬᠡᠯᠡᠨ ᠤ ᠵᠦᠢ ᠵᠡᠷᠭᠡ ᠶᠢ ᠨᠡᠯᠢᠶᠡᠳ ᠰᠢᠰᠲ᠋ᠧᠮ  ᠲᠠᠢ ᠰᠢᠨᠵᠢᠯᠡᠨ ᠰᠤᠳᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠤᠤᠯ ᠵᠤᠬᠢᠶᠠᠯ ᠤᠨ ᠤᠷᠤᠰᠢᠯ ᠳᠤ᠂ ︽ᠲᠦᠪᠡᠳ ᠤᠨ ᠦᠰᠦᠭ ᠬᠡᠮᠡᠪᠡᠰᠤ ᠲᠦᠪᠡᠳ ᠤᠨ ᠰᠤᠷᠤᠭᠰᠠᠩᠭᠠᠮᠪᠤ ᠬᠠᠭᠠᠨ ᠢᠶᠠᠷ ᠲᠦᠪᠡᠳ ᠲᠤᠷ ᠪᠤᠷᠬᠠᠨ ᠤ ᠱᠠᠰᠢᠨ ᠢ ᠲᠡᠯᠭᠡᠷᠡᠬᠦᠯᠦᠨ ᠦᠢᠯᠡᠳᠬᠦ ᠶᠢᠨ ᠲᠤᠯᠠᠳᠠ ᠲᠤᠮᠢ ᠰᠠᠮᠪᠤᠸᠠ ᠲᠦᠰᠢᠮᠡᠯ ᠢ ᠡᠨᠡᠳᠬᠡᠭ ᠲᠤ ᠦᠰᠦᠭ ᠬᠢᠭᠡᠳ ᠨᠤᠮ ᠢ ᠰᠤᠷᠬᠤ ᠪᠠᠷ ᠢᠯᠡᠭᠡᠪᠡᠢ᠃ ᠲᠤᠮᠢ ᠰᠠᠮᠪᠤᠸᠠ ᠡᠨᠡᠳᠬᠡᠭ ᠲᠤᠷ ᠬᠦᠷᠴᠤ ᠦᠰᠦᠭ ᠲᠡᠷᠢᠬᠦᠳᠡᠨ ᠢ ᠰᠤᠨᠤᠰᠤᠭᠠᠳ᠂ ᠲᠦᠪᠡᠳ ᠲᠤᠷ ᠢᠷᠡᠵᠦ ᠶᠡᠭᠡ ᠬᠡᠷᠡᠭ ᠲᠤ ᠶᠢᠨ ᠲᠤᠯᠠᠳᠠ ᠯᠠᠸ᠋ᠹᠠ ᠦᠰᠦᠭ ᠢ ᠦᠯᠢᠭᠡᠷᠯᠡᠨ ᠲᠦᠪᠡᠳ ᠤᠨ ᠬᠡᠼᠢᠢᠭ ᠦᠰᠦᠭ ᠬᠢᠭᠡᠳ ᠸᠠᠷᠳᠤ ᠦᠰᠦᠭ ᠢ ᠦᠯᠢᠭᠡᠷᠯᠡᠵᠦ ᠲᠦᠪᠡᠳ ᠤᠨ ᠺᠠᠱᠠᠷ ᠦᠰᠦᠭ ᠢ ᠵᠤᠬᠢᠶᠠᠪᠠᠢ︾ ᠭᠡᠵᠦ ᠲᠦᠪᠡᠳ ᠦᠰᠦᠭ ᠪᠢᠴᠢᠭ ᠤᠨ ᠡᠬᠦᠰᠦᠯ ᠭᠠᠷᠤᠯ ᠢ ᠲᠤᠳᠤᠷᠬᠠᠢ ᠲᠡᠮᠳᠡᠭᠯᠡᠭᠰᠡᠨ ᠪᠦᠬᠡᠳ ᠪᠤᠷᠬᠠᠨ ᠱᠠᠰᠢᠨ ᠠᠴᠠ ᠠᠯᠢ ᠡᠷᠳᠡ ︽ᠡᠰᠷᠤᠨ ᠦᠰᠦᠭ᠂ ︵ᠰᠠᠨᠰᠺᠠᠷᠲ ᠦᠰᠦᠭ︶ ᠸᠠᠷᠳᠤ ᠦᠰᠦᠭ᠂ ᠰᠢᠨᠳᠤ ᠦᠰᠦᠭ᠂ ᠨᠠᠩᠬᠢᠶᠠᠳ ᠦᠰᠦᠭ᠂ ᠬᠠᠮᠤᠭ ᠲᠠᠭᠤᠨ ᠢ ᠤᠷᠢᠶᠠᠭᠰᠠᠨ ᠦᠰᠦᠭ᠂ ᠯᠢᠩᠬᠤᠸ᠎ᠠ ᠶᠢᠨ ᠵᠢᠷᠦᠬᠡᠨ ᠤ ᠦᠰᠦᠭ᠂ ᠲᠠᠯᠠᠢ ᠶᠢᠨ ᠬᠢᠵᠠᠭᠠᠷ ᠤᠨ ᠦᠰᠦᠭ︾ ᠵᠡᠷᠭᠡ ᠵᠢᠷᠠᠨ ᠲᠦᠷᠪᠡᠨ ᠵᠦᠢᠯ ᠤᠨ ᠦᠰᠦᠭ ᠪᠠᠶᠢᠭᠰᠠᠨ ᠭᠡᠵᠦ ᠵᠢᠭᠠᠭᠠᠳ᠂ ᠬᠦᠮᠦᠨ ᠲᠦᠷᠦᠯᠭᠢᠳᠡᠨ ᠤ ᠪᠤᠯᠪᠠᠰᠤᠨ ᠰᠤᠶᠤᠯ ᠪᠤᠳᠢᠳᠢᠨ ᠤ ᠱᠠᠰᠢᠨ ᠠᠴᠠ ᠬᠤᠯᠠ ᠡᠷᠳᠡ ᠪᠤᠢ ᠪᠤᠯᠤᠭᠰᠠᠨ ᠢ ᠨᠤᠳᠠᠯᠠᠭᠰᠠᠨ ᠪᠠᠶᠢᠨ᠎ᠠ᠃ ᠮᠦᠨ ᠲᠡᠬᠦᠨᠴᠢᠯᠡᠨ ᠱᠠᠷᠠᠶᠢᠭᠤᠯ ᠬᠡᠯᠡ ︵ᠤᠳᠤ ᠶᠢᠨ ᠮᠤᠩᠭᠤᠷ᠂ ᠶᠤᠭᠤᠷ᠂ ᠪᠤᠤ ᠠᠨ᠂ ᠳ᠋ᠦᠩᠰᠢᠶᠠᠩ ᠵᠡᠷᠭᠡ ᠦᠨᠳᠦᠰᠦᠳᠡᠨ ᠤ ᠬᠡᠯᠡ︶ ᠪᠤᠯ ᠮᠤᠩᠭᠤᠯ ᠲᠦᠷᠦᠯ ᠬᠡᠯᠡ ᠪᠤᠯᠬᠤ ᠶᠢ ᠠᠩᠬ᠎ᠠ ᠤᠳᠠᠭ᠎ᠠ ᠲᠤᠳᠤᠷᠬᠠᠶᠢᠯᠠᠨ ᠵᠢᠭᠠᠭᠰᠠᠨ ᠪᠢᠯᠡ᠃    ᠭᠤᠮᠪᠤᠵᠠᠪ ᠬᠦᠩ ᠢᠶᠠᠷ ᠡᠷᠳᠡᠨ ᠤ ᠡᠨᠡᠳᠬᠡᠭ ᠲᠦᠪᠡᠳ ᠤᠨ ᠲᠠᠪᠤᠨ ᠤᠬᠠᠭᠠᠨ ᠳᠤ ᠨᠡᠪᠲᠡᠷᠡᠭᠰᠡᠨ ᠨᠡᠷᠡᠳᠦ ᠡᠷᠳᠡᠮᠳᠡᠨ ᠪᠤᠯᠬᠤ ᠶᠢᠨ ᠬᠤᠪᠢ ᠠᠴᠠ ᠵᠦᠪᠬᠡᠨ ᠨᠡᠶᠢᠭᠡᠮ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠢ ᠨᠢᠮᠪᠠᠢ ᠰᠤᠳᠤᠯᠵᠤ ᠨᠠᠨᠳᠢᠨ ᠪᠦᠳᠦᠭᠡᠯ ᠦᠪᠯᠡᠵᠦ ᠦᠯᠡᠳᠡᠭᠡᠭᠰᠡᠨ ᠲᠡᠳᠦᠶᠢᠯᠡ ᠪᠢᠰᠢ᠂ ᠮᠦᠨᠴᠦ ᠪᠠᠶᠢᠭᠠᠯᠢ ᠶᠢᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠢ ᠪᠠᠭ᠋ᠠᠳᠠᠢ ᠰᠢᠮᠳᠠᠨ ᠰᠤᠳᠤᠯᠵᠤ᠂ ᠦᠪᠡᠷ ᠤᠨ ᠦᠳᠡᠯᠦᠭᠡ ᠨᠠᠰᠤᠨ ᠳᠠᠭᠠᠨ ᠪᠠᠰᠠ ᠡᠯ᠎ᠡ ᠦᠨᠳᠦᠰᠦᠳᠡᠨ ᠤ ᠡᠷᠡᠬᠦᠯ ᠮᠡᠨᠳᠤ ᠶᠢᠨ ᠲᠦᠯᠦᠭᠡ᠂ ᠪᠡᠶ᠎ᠡ ᠰᠡᠳᠬᠢᠯ ᠢᠶᠠᠨ ᠵᠦᠳᠡᠭᠡᠵᠦ ᠮᠤᠩᠭᠤᠯ ᠬᠡᠯᠡ ᠪᠠᠷ ︽ᠲᠤᠯᠤᠭᠠᠨ ᠡᠷᠳᠡᠨᠢ ᠶᠢᠨ ᠮᠦᠬᠦᠯᠢᠭ ᠪᠠ ᠡᠮ ᠤᠨ ᠵᠤᠷ︾ ︽ᠡᠮ ᠤᠨ ᠨᠡᠷ᠎ᠡ ᠲᠦᠪᠡᠳ᠂ ᠮᠤᠩᠭᠤᠯ᠂ ᠬᠢᠲᠠᠳ ᠬᠠᠳᠠᠮᠠᠯ ᠤᠷᠤᠰᠢᠪᠠᠢ︾᠂ ︽ᠡᠯᠳᠡᠪ ᠴᠢᠬᠤᠯᠠ ᠬᠡᠷᠡᠭᠲᠦ ᠡᠮ ᠤᠨ ᠨᠠᠶᠢᠷᠠᠯᠭ᠎ᠠ︾ ᠬᠡᠬᠦ ᠬᠡᠳᠦᠨ ᠢᠵᠢ ᠠᠨᠠᠭᠠᠬᠤ ᠤᠬᠠᠭᠠᠨ ᠤ ᠨᠤᠮ ᠪᠢᠴᠢᠭ ᠢ ᠨᠠᠶᠢᠷᠠᠭᠤᠯᠤᠨ ᠵᠤᠬᠢᠶᠠᠵᠠᠢ᠃ ᠡᠳᠡᠭᠡᠷ ᠠᠨᠠᠭᠠᠬᠤ ᠤᠬᠠᠭᠠᠨ ᠤ ᠨᠤᠮ ᠪᠢᠴᠢᠭ ᠨᠢ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠡᠮ ᠡᠮᠨᠡᠯᠭᠡ ᠶᠢᠨ ᠲᠡᠤᠬᠡ᠂ ᠡᠮᠨᠡᠯᠭᠡ ᠮᠡᠷᠭᠡᠵᠢᠯ ᠤᠨ ᠲᠤᠷᠰᠢᠯᠭ᠎ᠠ ᠰᠤᠷᠭᠠᠮᠵᠢ ᠵᠢᠴᠢ ᠡᠨᠡᠬᠦ ᠲᠠᠯ᠎ᠠ ᠪᠠᠷ ᠬᠢ ᠦᠨᠳᠦᠰᠦᠳᠡᠨ ᠤ ᠰᠤᠶᠤᠯ ᠤᠨ ᠰᠤᠯᠢᠯᠴᠠᠭ᠎ᠠ ᠶᠢ ᠤᠶᠢᠯᠠᠭᠠᠬᠤ ᠳᠤ ᠪᠦᠷ ᠴᠤ ᠦᠨ᠎ᠡ ᠴᠠᠨ᠎ᠠ ᠲᠠᠢ ᠲᠡᠤᠬᠡ ᠶᠢᠨ ᠲᠤᠷᠠᠰᠬᠠᠯ ᠮᠦᠨ᠃    ︽ᠡᠯᠳᠡᠪ ᠴᠢᠬᠤᠯᠠ ᠬᠡᠷᠡᠭᠳᠦ ᠡᠮ ᠤᠨ ᠨᠠᠶᠢᠷᠠᠯᠭ᠎ᠠ︾ ᠭᠡᠳᠡᠭ ᠨᠤᠮ ᠨᠢ ︽ᠲᠤᠯᠤᠭᠠᠨ ᠡᠷᠳᠡᠨᠢ ᠶᠢᠨ ᠮᠦᠬᠦᠯᠢᠭ ᠪᠠ ᠡᠮ ᠤᠨ ᠵᠤᠷ︾ ᠭᠡᠰᠡᠨ ᠨᠡᠷ᠎ᠡ ᠪᠠᠷ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠮᠤᠳᠤᠨ ᠪᠠᠷ ᠢᠶᠠᠷ ᠬᠡᠪᠯᠡᠭᠳᠡᠵᠠᠢ᠃ ᠪᠤᠳᠠᠳᠠᠢ ᠪᠢᠴᠢᠭᠳᠡᠭᠰᠡᠨ ᠤᠨ ᠵᠢᠯ ᠢ ᠨᠤᠳᠠᠳᠠᠢ ᠬᠡᠯᠡᠬᠦᠶ᠎ᠡ ᠪᠡᠷᠭᠡ᠂ ᠵᠤᠬᠢᠶᠠᠯ ᠤᠨ ᠲᠡᠭᠦᠰᠬᠡᠯ ᠰᠢᠯᠦᠭ ᠲᠤ᠂ ︽ᠬᠡᠦᠬᠡᠨ  ᠡᠴᠡᠭᠡᠨ ︵ᠬᠡᠦᠬᠡᠳ ᠠᠴᠠ ᠪᠠᠨ︶ ᠬᠦᠭᠰᠢᠷᠡᠯᠳᠦᠭᠰᠡᠨ᠂ ᠬᠡᠨ ᠬᠡᠨ ᠳᠤᠷ ᠲᠤᠰᠠ ᠪᠤᠯᠬᠤ ᠶᠢ ᠰᠠᠨᠠᠵᠤ᠂ ᠬᠡᠳᠦᠨ ᠮᠡᠷᠭᠡᠳ ᠠᠴᠠ ᠤᠯᠵᠤ ᠰᠤᠨᠤᠰᠤᠭᠰᠠᠨ ᠢᠶᠠᠨ ᠬᠡᠯᠬᠢᠵᠦ ᠵᠢᠭᠳᠡᠯᠡᠬᠦᠯᠦᠨ ᠪᠢᠴᠢᠪᠡᠢ ᠪᠢ︾ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠢ ᠦᠨᠳᠦᠰᠦᠯᠡᠵᠦ᠂ ᠪᠠᠷᠤᠭ ᠠᠷᠪᠠᠨ ᠨᠠᠢᠮᠠᠳᠤᠭᠠᠷ ᠵᠠᠭᠤᠨ ᠤ ᠲᠤᠮᠳᠠᠴᠢ ᠦᠶ᠎ᠡ ᠪᠠᠷ ᠵᠤᠬᠢᠶᠠᠭᠳᠠᠭᠰᠠᠨ ᠦᠳᠡᠯᠦᠭᠡ ᠨᠠᠰᠤᠨ ᠤ ᠬᠢᠨᠢ ᠪᠦᠳᠦᠭᠡᠯ ᠬᠡᠵᠦ ᠮᠠᠭᠠᠳᠯᠠᠨ᠎ᠠ᠃ ᠤᠳᠤᠬᠠᠨ ᠳᠤ ᠤᠯᠳᠠᠭᠰᠠᠨ ᠬᠤᠯᠪᠤᠭᠳᠠᠯ ᠪᠦᠬᠦᠢ ᠮᠡᠳᠡᠭᠡ ᠪᠠᠷᠢᠮᠳᠠ ᠶᠢ ᠦᠨᠳᠦᠰᠦᠯᠡᠪᠡᠯ᠂ ᠲᠤᠰ ᠪᠢᠴᠢᠭ ᠪᠤᠯ ᠮᠤᠩᠭᠤᠯ ᠬᠡᠯᠡ ᠪᠠᠷ ᠠᠩᠬᠠᠳᠤᠭᠴᠢ ᠤᠳᠠᠭ᠎ᠠ ᠪᠢᠴᠢᠭᠳᠡᠨ ᠬᠡᠪᠯᠡᠭᠳᠡᠭᠰᠡᠨ ᠠᠨᠠᠭᠠᠬᠤ ᠤᠬᠠᠭᠠᠨ ᠤ ᠪᠢᠴᠢᠭ ᠪᠤᠯᠬᠤ ᠶᠤᠮ᠃    ︽ᠲᠤᠯᠤᠭᠠᠨ ᠡᠷᠳᠡᠨᠢ ᠶᠢᠨ ᠮᠦᠬᠦᠯᠢᠭ ᠪᠠ ᠡᠮ ᠤᠨ ᠵᠤᠷ︾ ᠬᠠᠭᠤᠳᠠᠰᠤᠨ ᠲᠤᠭ᠎ᠠ ᠬᠢᠵᠠᠭᠠᠷ ᠲᠠᠢ ᠨᠢᠮᠬᠡᠨ ᠪᠤᠯᠪᠠᠴᠤ ᠲᠤᠶᠢᠯ ᠤᠨ ᠪᠠᠶᠠᠯᠢᠭ ᠠᠭᠤᠯᠭ᠎ᠠ ᠲᠠᠢ᠃ ᠡᠬᠦᠨᠳᠦ ᠭᠠᠳᠠᠷ ᠲᠤᠳᠤᠷ ᠰᠠᠯᠠᠭᠠᠨ ᠤ ᠡᠪᠡᠳᠴᠢᠨ᠂ ᠡᠬᠡ ᠨᠢᠯᠬᠠᠰ ᠤᠨ ᠡᠪᠡᠳᠴᠢᠨ᠂ ᠲᠠᠪᠤᠨ ᠡᠷᠬᠡᠳᠡᠨ ᠵᠢᠷᠭᠤᠭᠠᠨ ᠮᠠᠬᠠᠪᠤᠳ ᠲᠠᠪᠤᠨ ᠴᠤᠯᠤ ᠶᠢᠨ ᠡᠯ᠎ᠡ ᠵᠦᠢᠯ ᠤᠨ ᠡᠪᠡᠳᠴᠢᠨ ᠢ ᠡᠮᠨᠡᠨ ᠵᠠᠰᠠᠬᠤ ᠡᠯᠳᠡᠪ ᠴᠢᠬᠤᠯᠠ ᠡᠮᠨᠡᠯᠭᠡ ᠶᠢᠨ ᠠᠷᠭ᠎ᠠ ᠲᠤᠷᠰᠢᠯᠭ᠎ᠠ ᠶᠢ ᠡᠮᠬᠢᠳᠬᠡᠵᠦ ᠤᠷᠤᠭᠤᠯᠵᠠᠢ᠃ ᠤᠨᠴᠠᠭᠠᠶᠢᠯᠠᠨ ᠨᠢᠭᠡᠨ ᠵᠦᠢᠯ ᠤᠨ ᠡᠮ ᠢ ᠠᠳᠠᠯᠢ ᠪᠤᠰᠤ ᠬᠦᠯᠭᠡ ᠪᠠᠷ ᠬᠤᠪᠢᠷᠠᠭᠤᠯᠵᠤ ᠬᠡᠷᠡᠭᠯᠡᠭᠰᠡᠨ ᠨᠢ ᠮᠠᠰᠢ ᠭᠠᠶᠢᠬᠠᠮᠰᠢᠭ ᠲᠠᠢ ᠪᠠᠶᠢᠳᠠᠭ᠃ ᠵᠢᠱᠢᠶᠡᠯᠡᠬᠦ ᠳᠤ᠂ ︽ᠲᠤᠯᠤᠭᠠᠨ ᠡᠷᠳᠡᠨᠢ ᠶᠢᠨ ᠮᠦᠬᠦᠯᠢᠭ︾ ᠭᠡᠳᠡᠭ ᠨᠢᠭᠡᠨ ᠵᠤᠷ ᠡᠮ ᠢ ᠭᠤᠴᠢ ᠶᠢᠰᠦᠨ ᠬᠦᠯᠭᠡ ᠪᠠᠷ ᠬᠤᠪᠢᠷᠠᠭᠤᠯᠤᠨ ᠬᠡᠷᠡᠭᠯᠡᠵᠦ᠂ ᠭᠤᠴᠢᠨ ᠶᠢᠰᠦᠨ ᠵᠦᠢᠯ ᠤᠨ ᠡᠪᠡᠳᠴᠢᠨ ᠢ ᠠᠨᠠᠭᠠᠵᠤ ᠴᠢᠳᠠᠬᠤ ᠪᠠ ᠲᠡᠬᠦᠨ ᠠᠴᠠ ᠨᠡᠩ ᠤᠯᠠᠨ ᠡᠪᠡᠳᠴᠢᠨ ᠢ ᠡᠮᠨᠡᠨ ᠵᠠᠰᠠᠵᠤ ᠪᠤᠯᠬᠤ ᠶᠢ ᠠᠮᠢᠳᠤᠯᠢᠭ ᠰᠢᠳᠢ  ᠲᠠᠢ ᠦᠵᠡᠬᠦᠯᠦᠭᠰᠡ ᠪᠢᠯᠡ᠃ ᠲᠡᠬᠦᠨᠴᠢᠯᠡᠨ ᠪᠠᠰᠠ ᠴᠡᠴᠡᠭ ︵ᠪᠤᠳᠤ︶ ᠡᠪᠡᠳᠴᠢᠨ ᠢ ᠰᠡᠷᠭᠡᠶᠢᠯᠡᠨ ᠵᠠᠰᠠᠬᠤ ᠠᠷᠭ᠎ᠠ ᠬᠡᠮᠵᠢᠶ᠎ᠡ ᠪᠠ ᠮᠠᠯᠴᠢᠨ ᠬᠦᠮᠦᠨ ᠤ ᠬᠠᠨᠢ ᠪᠤᠯᠤᠭᠰᠠᠨ ᠮᠤᠷᠢ᠂ ᠨᠤᠬᠠᠢ ᠶᠢᠨ ᠵᠠᠷᠢᠮ ᠡᠪᠡᠳᠴᠢᠨ ᠢ ᠡᠮᠨᠡᠨ ᠵᠠᠰᠠᠬᠤ ᠢᠬᠡᠷ ᠰᠢᠬᠢᠷ ᠲᠤᠷᠰᠢᠯᠭᠠᠳᠤ ᠵᠤᠷ ᠢ ᠴᠦᠬᠡᠨ ᠪᠤᠰᠤ ᠶᠢ ᠡᠮᠬᠢᠳᠬᠡᠨ ᠤᠷᠤᠭᠤᠯᠪᠠ᠃    ︽ᠡᠯᠳᠡᠪ ᠴᠢᠬᠤᠯᠠ ᠬᠡᠷᠡᠭᠳᠦ ᠡᠮ ᠤᠨ ᠨᠠᠶᠢᠷᠠᠯᠭ᠎ᠠ︾ ᠭᠡᠳᠡᠭ ᠨᠤᠮ ᠨᠢ ᠡᠳᠦᠭᠡ ᠮᠠᠨ ᠳᠤ ᠭᠠᠷ ᠪᠢᠴᠢᠮᠡᠯ ᠢᠶᠠᠷ ᠤᠯᠳᠠᠵᠠᠢ᠃ ᠡᠬᠦᠨ ᠤ ᠡᠮᠦᠨᠡᠬᠢ ᠪᠦᠯᠦᠭ ᠨᠢ ︽ᠲᠤᠯᠤᠭᠠᠨ ᠡᠷᠳᠡᠨᠢ ᠶᠢᠨ ᠮᠦᠬᠦᠯᠢᠭ ᠪᠠ ᠡᠮ ᠤᠨ ᠵᠤᠷ︾  ᠲᠠᠢ ᠪᠠᠨ ᠠᠳᠠᠯᠢ ᠪᠠᠶᠢᠳᠠᠭ᠃ ᠭᠡᠳᠡᠯ᠎ᠡ ᠰᠡᠬᠦᠯ ᠤᠨ ᠬᠠᠭᠠᠰ ᠬᠡᠰᠡᠭ ᠨᠢ ᠬᠢᠲᠠᠳ ᠦᠨᠳᠦᠰᠦᠳᠡᠨ ᠤ ᠨᠡᠷᠡᠳᠦ ᠡᠮ ᠤᠨ ᠦᠢᠯᠡᠳᠦᠯ ᠲᠤᠰᠠ ᠶᠢ ᠡᠮᠬᠢᠳᠬᠡᠨ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠲᠤᠰᠬᠠᠢ ᠵᠤᠷ ᠪᠤᠯᠤᠨ᠎ᠠ᠃ ᠡᠬᠦᠨᠳᠦ ᠭᠤᠴᠢᠨ ᠨᠠᠢᠮᠠᠨ ᠵᠦᠢᠯ ᠤᠨ ᠬᠢᠲᠠᠳ ᠦᠨᠳᠦᠰᠦᠳᠡᠨ ᠤ ᠤᠯᠠᠮᠵᠢᠯᠠᠯᠳᠤ ᠴᠢᠬᠤᠯᠠ ᠡᠮ ᠤᠨ ᠨᠡᠷ᠎ᠡ᠂ ᠦᠢᠯᠡᠳᠦᠯ ᠬᠡᠷᠡᠭᠴᠡᠭᠡ᠂ ᠠᠴᠢ ᠲᠤᠰᠠ᠂ ᠠᠨᠠᠭᠠᠬᠤ ᠡᠪᠡᠳᠴᠢᠨ ᠪᠠ ᠤᠤᠭᠤᠬᠤ ᠠᠷᠭ᠎ᠠ᠂ ᠬᠡᠷᠡᠭᠯᠡᠬᠦ ᠬᠡᠮᠵᠢᠶ᠎ᠡ ᠳᠤ ᠬᠦᠷᠳᠡᠯ᠎ᠡ ᠨᠠᠷᠢᠨ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠪᠦᠬᠡᠳ ᠴᠦᠬᠡᠨ ᠪᠤᠰᠤ ᠬᠢᠲᠠᠳ ᠮᠤᠩᠭᠤᠯ ᠡᠮ ᠤᠨ ᠨᠡᠷ᠎ᠡ ᠲᠤᠮᠢᠶ᠎ᠠ ᠶᠢ ᠬᠠᠷᠢᠴᠠᠭᠤᠯᠤᠨ ᠲᠡᠮᠳᠡᠭᠯᠡᠵᠦ ᠦᠯᠡᠳᠡᠭᠡᠪᠡ᠃ ᠡᠨᠡ ᠨᠢ ᠮᠦᠨᠴᠦ ᠮᠤᠩᠭᠤᠯ ᠢᠶᠠᠷ ᠤᠷᠴᠢᠭᠤᠯᠤᠭᠳᠠᠭᠰᠠᠨ ᠬᠠᠮᠤᠭ ᠠᠩᠬᠠᠨ ᠤ ᠬᠢᠲᠠᠳ ᠡᠮ ᠤᠨ ᠵᠤᠷ ᠪᠤᠯᠬᠤ ᠰᠢᠭ᠋ ᠪᠠᠶᠢᠨ᠎ᠠ᠃ ᠡᠨᠡ ᠪᠦᠬᠦᠨ ᠨᠢ ᠡᠯ᠎ᠡ ᠦᠨᠳᠦᠰᠦᠳᠡᠨ ᠤ ᠰᠤᠶᠤᠯ ᠤᠨ ᠰᠤᠯᠢᠯᠴᠠᠭ᠎ᠠ ᠶᠢ ᠠᠬᠢᠭᠤᠯᠵᠤ᠂ ᠡᠯᠳᠡᠪ ᠵᠦᠢᠯ ᠤᠨ ᠡᠪᠡᠳᠴᠢᠨ ᠡᠮᠬᠡᠭ ᠤᠨ ︽ᠡᠰᠡᠷᠭᠦᠴᠡᠭᠴᠢ ᠬᠦᠨᠦᠭᠡᠯ ᠢ ᠨᠢ ᠠᠷᠢᠯᠭᠠᠵᠤ︾ ︽ᠡᠬᠡ ᠪᠤᠯᠤᠭᠰᠠᠤᠨ᠎ᠠ︾ ᠪᠦᠬᠦᠨ ᠳᠤ ︽ᠶᠡᠭᠡ ᠲᠤᠰᠠ ᠪᠤᠯᠵᠤ᠂ ᠡᠭᠡᠨᠡᠩᠳᠡ ᠤᠷᠤᠰᠢᠨ ᠲᠡᠯᠭᠡᠷᠡᠵᠦ︾ ᠢᠷᠡᠭᠰᠡᠨ ᠪᠢᠯᠡ᠃ ᠪᠢᠳᠡ ᠦᠨᠳᠦᠰᠦᠳᠡᠨ ᠤ ᠰᠤᠶᠤᠯ ᠤᠨ ᠦᠪ ᠬᠦᠷᠦᠩᠭᠡ ᠪᠠᠨ ᠦᠮᠴᠢᠯᠡᠵᠦ ᠠᠪᠬᠤ ᠪᠠ ᠦᠷᠭᠡᠨ ᠤᠯᠠᠨ ᠲᠦᠮᠡᠨ ᠳᠡᠭᠡᠨ ᠲᠠᠨᠢᠯᠴᠠᠭᠤᠯᠬᠤ ᠵᠤᠷᠢᠯᠭ᠎ᠠ ᠶᠢ ᠡᠪᠦᠷᠯᠡᠨ᠂ ᠮᠠᠨ ᠳᠤ ᠤᠯᠳᠠᠭᠰᠠᠨ ︽ᠲᠤᠯᠤᠭᠠᠨ ᠡᠷᠳᠡᠨᠢ ᠶᠢᠨ ᠮᠦᠬᠦᠯᠢᠭ ᠪᠠ ᠡᠮ ᠤᠨ ᠵᠤᠷ︾ ᠭᠡᠳᠡᠭ ᠮᠤᠳᠤᠨ ᠪᠠᠷ ᠤᠨ ᠬᠡᠪᠯᠡᠯ ᠪᠠ ︽ᠡᠯᠳᠡᠪ ᠴᠢᠬᠤᠯᠠ ᠬᠡᠷᠡᠭᠲᠦ ᠡᠮ ᠤᠨ ᠨᠠᠶᠢᠷᠠᠯᠭ᠎ᠠ︾ ᠭᠡᠳᠡᠭ ᠪᠢᠴᠢᠮᠡᠯ ᠲᠡᠪᠳᠡᠷ ᠬᠤᠶᠠᠷ ᠢ ᠡᠮᠬᠢᠳᠬᠡᠨ ᠨᠡᠶᠢᠯᠡᠬᠦᠯᠵᠦ᠂ 1988 ᠤᠨ ᠤ 7 ᠰᠠᠷ᠎ᠠ ᠳᠤ᠂ ᠵᠡᠬᠦᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ ᠮᠤᠩᠭᠤᠯ ᠡᠮᠨᠡᠯᠭᠡ ᠶᠢᠨ ᠰᠤᠳᠤᠯᠤᠯ ᠤᠨ ᠨᠡᠶᠢᠭᠡᠮᠯᠢᠭ ᠤᠨ ᠨᠠᠶᠢᠳᠠᠯᠭ᠎ᠠ ᠪᠠᠷ ᠲᠤᠳᠤᠭᠠᠳᠤ ᠳᠠᠭᠠᠨ ᠬᠡᠪᠯᠡᠬᠦᠯᠦᠨ ᠲᠠᠷᠬᠠᠭᠠᠭᠰᠠᠨ ᠶᠤᠮ᠃    ᠡᠬᠦᠨ ᠠᠴᠠ ᠭᠠᠳᠠᠨ᠎ᠠ ᠡᠷᠳᠡᠮᠳᠡᠨ ᠬᠦᠩ ᠭᠤᠮᠪᠤᠵᠠᠪ ᠢᠶᠠᠷ ︽ᠡᠮ ᠤᠨ ᠨᠡᠷ᠎ᠡ ᠲᠦᠪᠡᠳ᠂ ᠮᠤᠩᠭᠤᠯ᠂ ᠬᠢᠲᠠᠳ ᠬᠠᠳᠠᠮᠠᠯ ᠤᠷᠤᠰᠢᠪᠠᠢ︾ ᠭᠡᠳᠡᠭ ᠭᠤᠷᠪᠠᠨ ᠬᠡᠯᠡᠨ ᠤ ᠬᠠᠪᠰᠤᠷᠠᠮᠠᠯ ᠡᠮ ᠤᠨ ᠨᠡᠷᠡᠰ ᠤᠨ ᠲᠤᠯᠢ ᠶᠢ ᠪᠢᠴᠢᠭᠰᠡᠨ ᠪᠠᠶᠢᠨ᠎ᠠ᠃ ᠡᠬᠦᠨ ᠳᠡᠭᠡᠨ ᠭᠤᠷᠪᠠᠨ ᠵᠠᠭᠤ ᠲᠠᠯᠠ ᠭᠠᠷᠤᠢ ᠡᠮ ᠤᠨ ᠨᠡᠷᠡᠰ ᠢ ᠨᠠᠢᠮᠠᠨ ᠶᠡᠭᠡ ᠰᠡᠳᠦᠪ ᠢᠶᠠᠷ ᠠᠩᠬᠢᠯᠠᠨ ᠵᠢᠭᠰᠠᠭᠠᠵᠤ ᠪᠢᠴᠢᠵᠠᠢ᠃ ᠲᠤᠰ ᠲᠤᠯᠢ ᠤᠷᠢᠳ ᠬᠤᠵᠢᠳ ᠬᠤᠶᠠᠷ ᠤᠳᠠᠭ᠎ᠠ ᠪᠠᠷᠠᠯᠠᠭᠳᠠᠭᠰᠠᠨ ᠪᠠᠶᠢᠳᠠᠯᠳᠠᠢ᠃ ᠡᠨᠡᠬᠦ ᠲᠤᠯᠢ ᠶᠢᠨ ᠠᠩᠬᠠᠨ ᠤ ᠪᠠᠷ ᠨᠢ ᠪᠠᠭ᠎ᠠ ᠰᠠᠭ᠎ᠠ ᠠᠳᠡᠬᠦᠷᠡᠯ ᠲᠠᠢ ᠪᠠᠶᠢᠭᠰᠠᠨ ᠠᠵᠠᠢ᠃ ᠡᠬᠦᠨ ᠢ ᠦᠵᠡᠭᠰᠡᠨ ᠠᠷᠪᠠᠨ ᠶᠢᠰᠦᠳᠦᠭᠡᠷ ᠵᠠᠭᠤᠨ ᠤ ᠦᠶ᠎ᠡ ᠶᠢᠨ ᠠᠯᠳᠠᠷᠳᠤ ᠡᠮᠳᠤ ᠪᠤᠳᠠᠰ ᠤᠨ ᠤᠬᠠᠭᠠᠨᠳᠠᠨ ᠨᠠᠢᠮᠠᠨ ᠬᠤᠰᠢᠭᠤᠨ ᠤ ᠠᠮᠪᠠᠯᠳᠤᠷᠵᠢ ᠪᠠᠷ ᠲᠡᠬᠦᠨ ᠤ ᠪᠢᠴᠢᠭᠰᠡᠨ ︽ᠦᠵᠡᠰᠬᠦᠯᠡᠩᠳᠤ ᠨᠢᠳᠤᠨ ᠴᠢᠮᠡᠭ︾ ᠭᠡᠳᠡᠭ ᠡᠮ ᠤᠨ ᠤᠬᠠᠭᠠᠨ ᠤ ᠨᠤᠮ ᠤᠨ ᠤᠷᠤᠰᠢᠯ ᠳᠠᠭᠠᠨ᠄ ︽ᠡᠳᠦᠭᠡ ᠶᠢᠨ ᠡᠮᠴᠢ ᠨᠠᠷ ᠦᠪᠡᠷ ᠦᠪᠡᠷ ᠤᠨ ᠢᠶᠠᠨ ᠡᠮ ᠲᠠᠨᠢᠬᠤ ᠶᠤᠰᠤ ᠪᠠᠨ ᠲᠤᠰ ᠲᠤᠰ ᠪᠠᠷᠢᠮᠳᠠᠯᠠᠵᠤ…… ᠬᠢᠲᠠᠳ ᠨᠡᠷ᠎ᠡ ᠶᠢ ᠬᠤᠳᠬᠤᠯᠳᠤᠭᠤᠯᠵᠤ᠂ ᠱᠤᠤ ᠶᠤᠤ ︵芍药︶ ᠶᠢ ᠮᠠᠨᠤ ᠬᠡᠬᠦ᠂ ᠬᠤᠸᠠᠩ ᠴᠢ ︵黄芪︶ ᠶᠢ ᠯᠢᠳᠡᠷᠢ ᠬᠡᠬᠦ…… ᠵᠡᠷᠭᠡ ᠪᠤᠯ ᠵᠦᠷᠢᠶᠡᠨ ᠢᠶᠠᠨ ᠭᠠᠷᠭᠠᠭᠰᠠᠨ ᠦᠬᠡᠢ ᠶᠢᠨ ᠤᠴᠢᠷ ᠪᠤᠯᠠᠢ᠂ ᠲᠡᠬᠦᠨ ᠤ ᠤᠯᠠᠩᠬᠢ ᠠᠨᠤ ᠨᠤᠶᠠᠨ ᠭᠤᠮᠪᠤᠵᠠᠪ ᠤᠨ ᠪᠤᠷᠤᠭᠤ ᠪᠢᠴᠢᠭ ᠢ ᠰᠢᠳᠦᠭᠰᠡᠨ ᠠᠴᠠ ᠪᠤᠯᠵᠤᠬᠤᠢ︾ ᠭᠡᠮᠡᠨ ᠪᠤᠯᠭᠤᠮᠵᠢ ᠦᠬᠡᠢ ᠰᠢᠬᠦᠮᠵᠢᠯᠡᠯ ᠲᠠᠯᠪᠢᠭᠰᠠᠨ ᠪᠠᠶᠢᠳᠠᠭ᠃ ᠭᠡᠳᠡᠯ᠎ᠡ ᠭᠤᠮᠪᠤᠵᠠᠪ ᠬᠦᠩ ᠠᠯᠢ ᠡᠷᠳᠡ ᠦᠪᠡᠷ ᠤᠨ ᠲᠤᠯᠢ ᠶᠢᠨ ᠢᠶᠠᠨ ᠪᠤᠷᠤᠭᠤ ᠶᠢ ᠨᠢᠭᠡᠨᠳᠡ ᠵᠠᠯᠠᠷᠠᠭᠤᠯᠤᠭᠠᠳ ᠲᠠᠬᠢᠨ ᠬᠡᠪᠯᠡᠬᠦᠯᠦᠭᠰᠡᠨ ᠪᠠᠶᠢᠨ᠎ᠠ᠃ ᠲᠠᠬᠢᠨ ᠬᠡᠪᠯᠡᠬᠦᠯᠦᠭᠰᠡᠨ᠂ ︽ᠡᠮ ᠤᠨ ᠨᠡᠷ᠎ᠡ ᠲᠦᠪᠡᠳ ᠮᠤᠩᠭᠤᠯ ᠬᠢᠲᠠᠳ ᠬᠠᠳᠠᠮᠠᠯ ᠤᠷᠤᠰᠢᠪᠠᠢ︾ ᠭᠡᠳᠡᠭ ᠵᠤᠬᠢᠶᠠᠯ ᠤᠨ ᠢᠶᠠᠨ ᠲᠡᠭᠦᠰᠬᠡᠯ ᠦᠬᠡᠨ ᠳᠤ᠂ ︽ᠮᠢᠨᠤ ᠤᠷᠢᠳᠠ ᠦᠢᠯᠡᠳᠦᠭᠰᠡᠨ ᠪᠢᠴᠢᠭ ᠲᠡᠬᠦᠨ ᠳᠤᠷ᠂ ᠠᠷᠠᠬᠠᠨ ︵ᠬᠠᠷᠠᠬᠠᠨ ᠪᠤᠶᠤ︶ ᠠᠪᠴᠤ ᠶᠠᠪᠤᠬᠤᠶ᠎ᠠ ᠡᠪ ᠦᠬᠡᠢ ᠮᠡᠳᠦ᠂ ᠪᠠᠭ᠎ᠠ ᠰᠠᠭ᠎ᠠ ᠵᠠᠰᠠᠪᠠᠰᠤ ᠵᠤᠬᠢᠬᠤ ᠪᠤᠢ ᠶᠢᠨ ᠲᠤᠯᠠᠳᠠ ᠵᠢᠴᠢ ᠨᠠᠶᠢᠷᠠᠯᠳᠤ ᠲᠦᠪ ᠤᠨ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠤᠨ ︵1734︶ ᠮᠤᠳᠤᠨ ︵ᠬᠦᠭᠡ︶ ᠪᠠᠷᠰ ᠵᠢᠯ ᠤᠨ ᠵᠤᠨ ᠤ ᠲᠤᠮᠳᠠᠳᠤ ᠰᠠᠷ᠎ᠠ ᠶᠢᠨ ᠰᠠᠶᠢᠨ ᠡᠳᠦᠷ ᠡᠨᠡ ᠬᠡᠪ ᠢ ᠲᠠᠬᠢᠵᠤ ᠰᠡᠶᠢᠯᠦᠭᠰᠡᠨ ᠪᠤᠯᠠᠢ︾ ᠭᠡᠵᠦ ᠲᠤᠳᠤᠷᠬᠠᠶᠢᠯᠠᠭᠰᠠᠨ ᠪᠦᠬᠡᠳ ᠲᠤᠰ ᠲᠤᠯᠢ ᠳᠠᠭᠠᠨ ︽ᠯᠢᠳᠡᠷᠢ ᠶᠢ苦参︾᠂ ︽ᠮᠠᠨᠤ ᠶᠢ青木香︾ ᠭᠡᠵᠦ ᠲᠤᠰ ᠲᠤᠰ ᠲᠤᠳᠤᠷᠬᠠᠢ ᠰᠠᠶᠢᠬᠠᠨ ᠵᠠᠰᠠᠨ ᠵᠠᠯᠠᠷᠠᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠲᠡᠬᠦᠨᠴᠢᠯᠡᠨ ︽ᠲᠦᠪᠡᠳ ᠬᠡᠯᠡ ᠶᠢ ᠬᠢᠯᠪᠠᠷ ᠢᠶᠠᠷ ᠰᠤᠷᠬᠤ ᠨᠡᠷᠡᠳᠦ ᠪᠢᠴᠢᠭ︾ ᠭᠡᠬᠦ ᠲᠦᠪᠡᠳ ᠮᠤᠩᠭᠤᠯ ᠲᠤᠯᠢ ᠳᠠᠭᠠᠨ ᠴᠤ ᠴᠦᠬᠡᠨ ᠪᠤᠰᠤ ᠲᠦᠪᠡᠳ ᠮᠤᠩᠭᠤᠯ ᠡᠮ ᠤᠨ ᠨᠡᠷᠡᠰ ᠢ ᠡᠮᠬᠢᠳᠬᠡᠨ ᠲᠡᠮᠳᠡᠭᠯᠡᠵᠦ ᠪᠢᠯᠡ᠃ ᠡᠨᠡ ᠪᠦᠬᠦᠨ ᠨᠢ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠠᠨᠠᠭᠠᠬᠤ ᠤᠬᠠᠭᠠᠨ ᠤ ᠲᠠᠯ᠎ᠠ ᠪᠠᠷ ᠤᠷᠤᠭᠤᠯᠤᠭᠰᠠᠨ ᠭᠤᠮᠪᠤᠵᠠᠪ ᠬᠦᠩ ᠤᠨ ᠭᠠᠪᠢᠶ᠎ᠠ ᠵᠢᠳᠬᠦᠯ ᠪᠤᠯᠬᠤ ᠪᠠᠷ ᠪᠠᠷᠠᠬᠤ ᠦᠬᠡᠢ ᠡᠮ ᠡᠮᠨᠡᠯᠭᠡ ᠶᠢᠨ ᠲᠡᠤᠬᠡ ᠰᠤᠳᠤᠯᠤᠯ ᠳᠤ ᠴᠤ ᠲᠤᠳᠠᠭᠳᠠᠵᠤ ᠪᠤᠯᠤᠰᠢ ᠦᠬᠡᠢ ᠬᠤᠪᠤᠷ ᠴᠤᠬᠠᠭ ᠪᠢᠴᠢᠭ ᠤᠳ ᠪᠤᠯᠤᠨ᠎ᠠ᠃    ᠬᠦᠨᠳᠦᠳᠦ ᠡᠷᠳᠡᠮᠳᠡᠨ ᠭᠤᠮᠪᠤᠵᠠᠪ ᠮᠠᠨᠢ ᠬᠡᠳᠦ ᠬᠡᠳᠦᠨ ᠦᠨᠳᠦᠰᠦᠳᠡᠨ ᠤ ᠬᠡᠯᠡ ᠪᠠᠷ ᠪᠤᠯᠪᠠᠰᠤᠷᠠᠩᠭᠤᠢ ᠰᠠᠶᠢᠬᠠᠨ ᠪᠢᠴᠢᠵᠤ ᠨᠡᠶᠢᠷᠠᠭᠤᠯᠬᠤ ᠪᠤᠶᠤ ᠤᠷᠴᠢᠭᠤᠯᠵᠤ ᠴᠢᠳᠠᠳᠠᠭ ᠢᠶᠠᠷ ᠪᠠᠷᠠᠬᠤ ᠦᠬᠡᠢ ᠤᠷᠠᠨ ᠵᠤᠬᠢᠶᠠᠯ ᠤᠶᠠᠩᠭ᠎ᠠ ᠨᠠᠶᠢᠷᠠᠭ ᠤᠨ ᠲᠠᠯ᠎ᠠ ᠪᠠᠷ ᠴᠤ ᠦᠷᠭᠡᠨ ᠮᠡᠳᠡᠯᠭᠡ ᠦᠨᠳᠦᠷ ᠪᠤᠯᠪᠠᠰᠤᠷᠠᠯ ᠲᠠᠢ ᠪᠠᠶᠢᠯ᠎ᠠ ᠭᠡᠰᠡᠨ ᠢ ᠲᠡᠬᠦᠨ ᠤ ᠵᠤᠬᠢᠶᠠᠯ ᠤᠨ ᠬᠡᠯᠡ ᠨᠠᠶᠢᠷᠠᠭᠤᠯᠭ᠎ᠠ ᠪᠠ ᠡᠬᠢᠯᠡᠯᠳᠡ ᠲᠡᠭᠦᠰᠬᠡᠯ ᠤᠨ ᠰᠤᠨᠢᠨ ᠰᠠᠶᠢᠬᠠᠨ ᠰᠢᠯᠦᠭ ᠤᠶᠠᠩᠭ᠎ᠠ ᠪᠠᠷ ᠪᠠᠳᠤᠯᠠᠭᠳᠠᠨ ᠪᠠᠶᠢᠨ᠎ᠠ᠃ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠬᠦᠨᠳᠦ ᠬᠠᠳᠠᠭᠤᠵᠢᠯᠳᠠᠢ ᠡᠭᠦᠷᠭᠡᠯᠡᠯ ᠲᠠᠷᠤᠭᠠᠰᠤ ᠠᠴᠠ ᠪᠤᠯᠵᠤ᠂ ᠡᠨᠡᠬᠦ ᠡᠷᠳᠡᠮᠳᠡᠨ ᠮᠠᠨᠢ ᠲᠠ ᠪᠢᠳᠡᠨ ᠳᠤ ᠤᠩᠰᠢᠵᠤ ᠰᠤᠨᠢᠷᠬᠠᠬᠤ ᠤᠯᠠᠨ ᠠᠷᠪᠢᠨ ᠤᠶᠠᠩᠭ᠎ᠠ ᠨᠠᠶᠢᠷᠠᠭ ᠢ ᠡᠷᠬᠦᠨ ᠪᠠᠷᠢᠭ᠎ᠠ ᠦᠬᠡᠢ ᠴᠤ᠂ ᠲᠡᠬᠦᠨ ᠤ ᠵᠤᠬᠢᠶᠠᠯ ᠤᠨ ᠤᠯᠠᠩᠬᠢ ᠨᠢ ᠡᠬᠢᠯᠡᠯᠳᠡ ᠲᠡᠭᠦᠰᠬᠡᠯ ᠤᠨ ᠰᠢᠯᠦᠭ ᠲᠠᠢ ᠪᠦᠭᠡᠳ ᠰᠢᠯᠦᠭ ᠤᠨ ᠬᠢᠨᠢ ᠦᠬᠡ ᠬᠡᠯᠡᠯᠭᠡ ᠨᠢ ᠤᠷᠤᠰᠤᠮ᠎ᠠ ᠤᠨᠤᠪᠴᠢᠳᠠᠢ᠂ ᠤᠳᠬ᠎ᠠ ᠰᠠᠨᠠᠭ᠎ᠠ ᠨᠢ ᠬᠦᠨ ᠶᠤᠭᠳᠠ ᠪᠠᠶᠢᠳᠠᠭ ᠃ ᠡᠶᠢᠨᠬᠦ ᠲᠡᠬᠦᠨ ᠤ ᠰᠢᠯᠦᠭ ᠤᠶᠠᠩᠭ᠎ᠠ ᠨᠢ ᠪᠦᠬᠦ ᠵᠤᠬᠢᠶᠠᠯ ᠪᠦᠳᠦᠭᠡᠯ ᠤᠨ ᠢᠶᠠᠨ ᠪᠦᠷᠢᠯᠳᠦᠭᠦᠨ ᠭᠡᠰᠡᠭ ᠪᠤᠯᠬᠤ ᠪᠠᠷ ᠪᠠᠷᠠᠬᠤ ᠦᠬᠡᠢ ᠮᠦᠨᠴᠤ ᠲᠡᠬᠦᠨ ᠤ ᠦᠵᠡᠯ ᠰᠠᠨᠠᠭ᠎ᠠ ᠶᠢ ᠤᠶᠢᠯᠠᠭᠠᠨ ᠡᠵᠡᠮᠰᠢᠬᠦ ᠳᠤ ᠲᠤᠳᠠᠭᠳᠠᠵᠤ ᠪᠤᠯᠤᠰᠢ ᠦᠬᠡᠢ ᠦᠨᠳᠦᠰᠦ ᠪᠠᠷᠢᠮᠳᠠ ᠪᠤᠯᠬᠤ ᠶᠤᠮ᠃ ᠢᠩᠬᠢᠬᠡᠳ ᠪᠢᠳᠡ ᠵᠢᠱᠢᠶ᠎ᠡ ᠪᠠᠷᠢᠮᠳᠠ ᠪᠤᠯᠭᠠᠨ ᠲᠠᠨᠢᠯᠴᠠᠭᠤᠯᠬᠤ ᠵᠤᠷᠢᠯᠭ᠎ᠠ ᠪᠠᠷ ᠲᠡᠬᠦᠨ ᠤ ᠰᠢᠯᠦᠭ ᠠᠴᠠ ᠨᠢᠭᠡ ᠪᠦᠯᠦᠭ ᠢ ᠰᠡᠶᠢᠷᠡᠬᠦᠯᠦᠨ ᠡᠨᠡᠬᠦ ᠲᠠᠨᠢᠯᠴᠠᠭᠤᠯᠭ᠎ᠠ ᠶᠢᠨ ᠬᠠᠮᠳᠤ ᠲᠠᠭᠠᠯᠳᠤᠭᠤᠯᠪᠠ᠃ ᠦᠵᠡᠬᠦ ᠮᠡᠷᠭᠡᠳ ᠦᠨᠡᠯᠡᠨ ᠰᠢᠬᠦᠮᠵᠢᠯᠡᠬᠦ ᠶᠢ ᠬᠢᠴᠢᠶᠡᠩᠬᠦᠶᠢᠯᠡᠨ ᠠᠶᠢᠯᠠᠳᠬᠠᠶ᠎ᠠ᠃ᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ
 
ᠢᠷᠡᠯᠲᠡ᠄ ᠠ᠊ · ᠫᠤᠩᠰᠤᠭ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠯᠠᠱᠠ ᠦᠷᠡᠰ ᠨᠠᠶᠢᠷ ᠤᠨ ᠡᠭᠦᠰᠦᠯᠲᠡ ᠲᠡᠤᠬᠡ
ᠠᠯᠠᠱᠠ ᠣᠷᠴᠢᠭᠤᠯᠭ᠎ᠠ ᠶᠢᠨ ᠰᠤᠷᠭᠠᠭᠤᠯᠢ ᠶᠢᠨ ᠠᠩᠭᠢ ᠪᠠᠶᠢᠭᠤᠯᠪᠠ
ᠠᠯᠠᠱᠠ ᠦᠬᠢᠳ ᠤᠨ ᠰᠤᠷᠭᠠᠭᠤᠯᠢ  ᠶᠢ ᠪᠠᠶᠢᠭᠤᠯᠪᠠ
ᠠᠯᠠᠱᠠ ᠪᠠᠭᠰᠢ ᠶᠢᠨ ᠰᠤᠷᠭᠠᠭᠤᠯᠢ ᠪᠠᠶᠢᠭᠤᠯᠪᠠ
ᠪᠠᠭ᠎ᠠ ᠬᠡᠤᠬᠡᠳ ᠢ ᠯᠠᠮᠠ ᠪᠣᠯᠭᠠᠬᠤ ᠶᠢ ᠬᠤᠷᠢᠭᠯᠠᠭᠰᠠᠨ ᠨᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号