ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠰᠢᠨ᠎ᠡ ᠬᠦᠳᠡᠭᠡ
ᠬᠥᠬᠡᠬᠤᠲᠠ ᠶᠢᠨ ᠠᠷᠪᠠᠨ ᠲᠠᠪᠤᠨ ᠬᠦᠷᠢᠶ᠎ᠡ ᠰᠦᠮ᠎ᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/5/11
  ᠬᠥᠬᠡᠬᠤᠲᠠ ᠶᠢᠨ ᠠᠷᠪᠠᠨ ᠲᠠᠪᠤᠨ ᠬᠦᠷᠢᠶ᠎ᠡ ᠰᠦᠮ᠎ᠡ ᠶᠢᠨ ᠪᠠᠶᠢᠭᠤᠯᠤᠭᠳᠠᠭᠰᠡᠨ ᠤᠨ ᠵᠢᠯ᠂ ᠪᠠᠶᠢᠭᠤᠯᠤᠭᠰᠡᠨ ᠬᠦᠮᠦᠨ᠂ ᠲᠡᠳᠡᠭᠡᠷ ᠤᠨ ᠵᠠᠷᠯᠢᠭ ᠢᠶᠠᠷ ᠲᠤᠭᠳᠠᠭᠠᠭᠰᠡᠨ ᠨᠡᠷᠡᠶᠢᠳᠦᠯ ᠪᠤᠯᠤᠨ ᠶᠡᠷᠦ ᠶᠢᠨ ᠨᠡᠷᠡᠶᠢᠳᠦᠯ ᠤᠨ ᠲᠤᠬᠠᠢ ᠡᠷᠳᠡᠮᠳᠠᠳ ᠤᠷᠲᠦ ᠤᠳᠠᠭᠠᠨ ᠬᠤᠭᠤᠴᠠᠭ᠎ᠠ ᠮᠠᠷᠭᠤᠯᠳᠤᠭᠰᠠᠭᠠᠷ ᠢᠷᠡᠵᠡᠢ᠃ ᠲᠤᠰ ᠦᠭᠦᠯᠡᠯ ︽ᠬᠥᠬᠡᠬᠤᠲᠠ ᠶᠢᠨ ᠪᠦᠭᠦᠳᠠ ᠯᠠᠮᠠ ᠪᠠᠨᠳᠢ ᠨᠠᠷ ᠢ ᠵᠠᠬᠢᠷᠤᠭᠴᠢ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠶᠢᠨ ᠲᠠᠮᠠᠭᠠᠨ ᠭᠠᠵᠠᠷ︾ ᠤᠨ ᠮᠤᠩᠭᠤᠯ ᠦᠰᠦᠭ ᠤᠨ ᠲᠠᠩᠰᠠ ᠬᠠᠷ᠎ᠠ ᠶᠢ ᠦᠨᠳᠦᠰᠦᠯᠡᠨ ᠲᠡᠳᠡᠭᠡᠷ ᠮᠠᠳᠠᠭ ᠲᠠᠢ ᠠᠰᠠᠭᠤᠳᠠᠯ ᠢ ᠲᠤᠳᠤᠷᠠᠭᠤᠯᠬᠤ ᠶᠢᠨ ᠳᠠᠭᠤ᠂ ᠲᠡᠳᠡᠭᠡᠷ ᠤᠨ ᠪᠠᠶᠢᠭᠤᠯᠤᠭᠳᠠᠭᠰᠡᠨ ᠲᠡᠤᠭᠡᠲᠦ ᠤᠴᠢᠷ ᠰᠢᠯᠳᠠᠭᠠᠨ ᠢ ᠦᠭᠦᠯᠡᠭᠰᠡᠨ ᠵᠤᠬᠢᠶᠠᠯ ᠪᠤᠯᠬᠤ ᠶᠤᠮ᠃   ᠨᠢᠭᠡ᠂ ᠮᠤᠩᠭᠤᠯ ᠤᠶᠢᠷᠠᠳ ᠬᠤᠶᠠᠷ ᠤᠨ ᠦᠶ᠎ᠡ ᠶᠢᠨ ᠵᠢᠷᠭᠤᠭᠠᠨ ᠰᠦᠮ᠎ᠡ   1576 ᠤᠨ ᠳᠤ ᠮᠤᠩᠭᠤᠯ ᠤᠨ ᠪᠠᠷᠭᠤᠨ ᠭᠤᠷᠪᠠᠨ ᠲᠦᠮᠡᠨ ᠤᠨ ᠲᠦᠮᠡᠳ ᠤᠨ ᠠᠯᠳᠠᠨ ᠬᠠᠭᠠᠨ ᠰᠤᠳᠨᠠᠮᠵᠠᠮᠰᠦ ᠲᠠᠯᠠᠢ ᠯᠠᠮᠠ ᠶᠢ ᠵᠠᠯᠠᠬᠤ ᠪᠠᠷ ᠬᠦᠬᠡᠨᠠᠭᠤᠷ ᠲᠤ ᠪᠠᠶᠢᠭᠤᠯᠤᠭᠰᠡᠨ ᠴᠠᠪᠴᠢᠶᠠᠯ ᠰᠦᠮ᠎ᠡ ᠪᠤᠯ ᠮᠤᠩᠭᠤᠯ ᠤᠷᠤᠨ ᠳᠤ ᠬᠠᠮᠤᠭ ᠤᠨ ᠲᠡᠷᠢᠭᠦᠨ ᠳᠤ ᠪᠠᠶᠢᠭᠤᠯᠤᠭᠰᠡᠨ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠤ ᠰᠦᠮ᠎ᠡ ᠪᠤᠯᠤᠨ᠎ᠠ᠃ ᠠᠯᠳᠠᠨ ᠬᠠᠭᠠᠨ ᠴᠠᠪᠴᠢᠶᠠᠯ ᠰᠦᠮ᠎ᠡ ᠶᠢᠨ ᠵᠤᠷᠢᠭ ᠰᠠᠨᠠᠭ᠎ᠠ ᠶᠢ ᠦᠨᠳᠦᠰᠦᠯᠡᠨ᠂ ᠬᠦᠬᠡᠨᠠᠭᠤᠷ ᠠᠴᠠ ᠳ᠋ᠦᠩᠭᠦᠷ ᠬᠤᠳᠤᠭᠳᠦ  ᠶᠢ ᠳᠠᠭᠠᠭᠤᠯᠤᠨ ᠬᠦᠬᠡ ᠬᠤᠳᠠᠨ᠎ᠠ ᠢᠷᠡᠭᠡᠳ 1579 ᠤᠨ ᠳᠤ ᠰᠤᠶᠤᠯ ᠳᠤᠷ ᠲᠠᠭᠠᠭᠤᠯᠬᠤ ᠬᠤᠳᠠ （归化城） ᠶᠢᠨ ᠡᠮᠦᠨ᠎ᠡ ᠬᠠᠭᠠᠯᠭᠠᠨ ᠤ ᠭᠠᠳᠠᠨ᠎ᠠ ᠨᠢᠭᠡ ᠭᠠᠵᠠᠷ ᠤᠨ ᠠᠯᠤᠰ ᠲᠤ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠤ ᠮᠤᠩᠭᠤᠯ ᠭᠠᠵᠠᠷ ᠲᠠᠬᠢ ᠬᠤᠶᠠᠳᠤᠭᠠᠷ ᠰᠦᠮ᠎ᠡ ᠶᠢ ᠪᠠᠶᠢᠭᠤᠯᠪᠠ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠮᠢᠩ ᠤᠯᠤᠰ ᠤᠨ ᠸᠠᠨ ᠯᠢ ᠬᠠᠭᠠᠨ ᠠᠴᠠ ᠡᠨᠡᠬᠦ ᠰᠦᠮ᠎ᠡ ᠳᠤ ᠬᠠᠶᠢᠷᠠᠯᠠᠭᠰᠡᠨ ᠬᠤᠩ ᠽᠢ ᠰᠧ （弘慈寺） ᠬᠡᠮᠡᠬᠦ ᠬᠢᠳᠠᠳ ᠨᠡᠷ᠎ᠡ ᠶᠢ ᠮᠤᠩᠭᠤᠯᠴᠢᠯᠠᠪᠠᠯ ︵ᠶᠡᠭᠡ ᠨᠢᠭᠦᠯᠡᠰᠬᠦᠢ ᠰᠦᠮ᠎ᠡ︶ ᠭᠡᠰᠡᠨ ᠤᠤᠬ᠎ᠠ ᠲᠠᠢ᠃ ᠪᠤᠳᠤᠬᠤᠯᠠᠷ᠂ ᠮᠤᠩᠭᠤᠯᠴᠤᠳ ᠤᠨ ᠶᠡᠷᠦᠳᠡᠭᠡᠨ ᠬᠡᠯᠡᠳᠡᠭ ᠶᠡᠭᠡ ᠵᠤᠤ ᠬᠡᠮᠡᠬᠦ ᠨᠢ ︵ᠶᠡᠭᠡ ᠨᠢᠭᠦᠯᠡᠰᠬᠦᠢ ᠰᠦᠮ᠎ᠡ︶ ᠶᠢᠨ ᠲᠦᠭᠦᠮᠴᠢᠯᠡᠯ ᠪᠤᠯᠬᠤ ᠪᠠᠶᠢᠬ᠎ᠠ᠂ ᠬᠢᠳᠠᠳ ᠢᠶᠠᠷ ᠲᠡᠭᠦᠨ ᠢ ᠳ᠋ᠠ ᠵᠤᠤ （大召） ᠭᠡᠳᠡᠭ᠃ ᠱᠠᠭᠢᠮᠤᠨᠢ ᠶᠢᠨ ᠵᠤᠤ ᠪᠤᠯᠤᠨ ᠰᠦᠮ᠎ᠡ ᠬᠡᠶᠢᠳ ᠬᠡᠮᠡᠬᠦ ᠦᠭᠡ᠂ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠲᠡᠯᠭᠡᠷᠡᠭᠰᠡᠨ ᠠᠴᠠ ᠨᠠᠭᠠᠰᠢ ᠮᠤᠩᠭᠤᠯ ᠬᠡᠯᠡᠨ ᠳᠤ ᠠᠳᠠᠯᠢ ᠤᠳᠬ᠎ᠠ ᠪᠠᠷ ᠬᠡᠷᠡᠭᠯᠡᠭᠳᠡᠬᠦ ᠪᠤᠯᠵᠠᠢ᠃ ᠶᠡᠭᠡ ᠵᠤᠤ ᠶᠢ ᠠᠩᠬ᠎ᠠ ᠪᠠᠶᠢᠭᠤᠯᠤᠭᠰᠡᠨ ᠬᠦᠮᠦᠨ ᠢ ᠨᠢ ᠲᠤᠷᠠᠰᠬᠠᠵᠦ᠂ ᠪᠠᠰᠠ ᠠᠯᠳᠠᠨ ᠬᠠᠭᠠᠨ ᠤ ᠰᠦᠮ᠎ᠡ᠂ ᠭᠡᠬᠡᠨ ᠬᠠᠭᠠᠨ ᠤ ᠰᠦᠮ᠎ᠡ ᠭᠡᠳᠡᠭ ᠪᠢᠯᠡ᠃ ᠭᠡᠬᠡᠨ ᠬᠠᠭᠠᠨ ᠭᠡᠳᠡᠭ ᠨᠢ ᠠᠯᠳᠠᠨ ᠬᠠᠭᠠᠨ ᠤ ᠱᠠᠰᠢᠨ ᠤ ᠬᠦᠨᠳᠤᠳᠭᠡᠯ ᠴᠤᠯᠠ ᠪᠤᠯᠤᠨ᠎ᠡ᠃ ᠪᠤᠷᠬᠠᠨ ᠤ ᠱᠠᠰᠢᠨ ᠢ ᠦᠨᠳᠦᠰᠦᠯᠡᠭᠴᠢ ᠱᠠᠭᠵᠠᠮᠤᠨᠢ ᠶᠢᠨ ᠵᠠᠷᠯᠢᠭ ︽ᠭᠠᠨᠵᠤᠤᠷ︾ ᠨᠤᠮ ᠢ ᠮᠤᠩᠭᠤᠯ ᠤᠨ ᠪᠠᠷᠭᠤᠨ ᠭᠤᠷᠪᠠᠨ ᠲᠦᠮᠡᠨ ᠤ ᠭᠠᠵᠠᠷ ᠲᠤ ᠠᠩᠬ᠎ᠠ ᠲᠡᠷᠢᠭᠦᠨ ᠶᠡᠭᠡ ᠵᠤᠤ ᠳᠤ ᠵᠠᠯᠠᠵᠦ ᠲᠠᠬᠢᠭᠰᠡᠨ ᠪᠤᠯᠬᠤᠷ᠂ ᠶᠡᠭᠡ ᠵᠤᠤ ᠶᠢ ᠮᠤᠩᠭᠤᠯᠴᠤᠳ ᠵᠠᠷᠢᠮ ᠳᠠᠭᠠᠨ ᠪᠠᠰᠠ ᠭᠠᠨᠵᠤᠤᠷ ᠤᠨ ᠰᠦᠮ᠎ᠡ ᠭᠡᠵᠦ ᠬᠡᠯᠡᠳᠡᠭ᠃ ᠲᠤᠰ ᠰᠦᠮ᠎ᠡ ᠳᠤ ᠪᠠᠰᠠ ᠮᠦᠩᠭᠦᠨ ᠢᠶᠠᠷ ᠴᠢᠳᠬᠤᠭᠰᠡᠨ ᠪᠤᠷᠬᠠᠨ ᠢ ᠲᠠᠬᠢᠵᠦ ᠪᠠᠶᠢᠪᠠ᠂ ᠡᠶᠢᠨᠬᠦ ᠪᠠᠰᠠ ᠮᠦᠩᠭᠦᠨ ᠪᠤᠷᠬᠠᠨ ᠤ ᠰᠦᠮ᠎ᠡ ︵银佛寺︶ ᠭᠡᠳᠡᠭ ᠪᠠᠶᠢᠵᠠᠢ᠃   ᠲᠦᠮᠡᠳ ᠤᠨ ᠠᠯᠳᠠᠨ ᠬᠠᠭᠠᠨ ᠨᠠᠰᠤ ᠨᠦᠭᠴᠢᠭᠰᠡᠨ ᠤ ᠲᠠᠷᠠᠭ᠎ᠠ᠂ ᠲᠡᠭᠦᠨ ᠤ ᠬᠠᠭᠠᠨ ᠰᠭᠤᠷᠢᠨ ᠢ ᠵᠠᠯᠭᠠᠮᠵᠢᠯᠠᠭᠴᠢ ᠰᠡᠩᠭᠡ ᠲᠦᠭᠦᠷᠡᠩ ᠬᠠᠭᠠᠨ ᠪᠠᠷᠭᠤᠨ ᠭᠤᠷᠪᠠᠨ ᠲᠦᠮᠡᠨ ᠤ ᠹᠸᠤᠳᠠᠯ ᠨᠤᠶᠠᠳ ᠲᠠᠢ ᠵᠦᠪᠳᠡᠯᠴᠡᠵᠦ᠂ ᠭᠤᠳᠠᠭᠠᠷ ᠲᠦᠷᠢ ᠶᠢᠨ ᠲᠠᠯᠠᠢ ᠯᠠᠮᠠ ᠰᠤᠤᠨᠠᠮᠵᠠᠮᠰᠦ ᠶᠢ ᠬᠦᠬᠡ ᠬᠤᠳᠠᠨ᠎ᠡ ᠨᠤᠮ ᠲᠠᠯᠪᠢᠭᠤᠯᠬᠤ ᠪᠠᠷ ᠵᠠᠯᠠᠭᠰᠡᠨ᠃ ᠰᠤᠤᠨᠠᠮᠵᠠᠮᠰᠦ ᠲᠠᠯᠠᠢ ᠯᠠᠮᠠ 1585 ᠤᠨ ᠳᠤ ᠵᠠᠯᠠᠯᠭ᠎ᠠ ᠪᠠᠷ ᠬᠦᠬᠡ ᠬᠤᠳᠠᠨ᠎ᠡ ᠢᠷᠡᠬᠦ ᠳᠤ᠂ ᠲᠡᠭᠦᠨ ᠤ ᠬᠤᠶᠢᠨ᠎ᠡ  ᠠᠴᠠ ᠰᠢᠳᠢᠳᠦ ᠭᠠᠪᠴᠦ ᠬᠡᠮᠡᠬᠦ ᠯᠠᠮᠠ ᠪᠠᠷ᠎ᠠ ᠪᠤᠯᠵᠦ ᠢᠷᠡᠵᠠᠢ᠃ ᠰᠤᠤᠨᠠᠮᠵᠠᠮᠰᠦ ᠲᠠᠯᠠᠢ ᠯᠠᠮᠠ 1588 ᠤᠨ ᠳᠤ ᠲᠠᠭᠠᠯᠠᠯ ᠪᠠᠷᠢᠬᠤ ᠳᠠᠭᠠᠨ ᠭᠡᠷᠢᠶᠡᠰᠦ ᠵᠠᠷᠯᠢᠭ ᠪᠢᠴᠢᠵᠦ ᠵᠠᠬᠢᠭᠰᠡᠨ ᠨᠢ᠄ ︽ᠰᠢᠳᠢᠳᠦ ᠭᠠᠪᠴᠦ ᠴᠢ ᠪᠠᠷ ᠮᠢᠨᠦ ᠤᠷᠤᠨ ᠳᠤ ᠮᠢᠨᠦ ᠰᠢᠷᠡᠭᠡᠨ ᠳᠤ ᠰᠠᠭᠤᠵᠦ᠂ ᠱᠠᠷᠢᠯ ᠤᠨ ᠠᠯᠢᠪᠡ ᠦᠢᠯᠡᠰ ᠢ ᠲᠡᠭᠦᠰᠭᠡᠨ ᠦᠢᠯᠡᠳᠦᠭᠡᠳ᠂ ᠮᠢᠨᠦ ᠬᠤᠶᠢᠳᠤ ᠲᠦᠷᠦᠯ ᠤᠨ ᠬᠤᠪᠢᠯᠭᠠᠨ ᠢ ᠵᠡᠭᠦᠨ ᠬᠤᠶᠢᠳᠦ ᠵᠦᠭ ᠲᠤ ᠡᠷᠢᠭ᠍ᠳᠦᠨ︾ ᠭᠡᠵᠠᠢ᠃ ᠰᠢᠳᠢᠳᠦ ᠭᠠᠪᠴᠦ ᠡᠨᠡᠬᠦ ᠬᠡᠷᠢᠶᠡᠰᠦ ᠵᠠᠷᠯᠢᠭ ᠢᠶᠠᠷ ᠬᠥᠬᠡᠬᠤᠲᠠ ᠳᠠᠬᠢ ᠭᠤᠷᠪᠠᠳᠤᠭᠠᠷ ᠲᠠᠯᠠᠢ ᠯᠠᠮᠠ ᠰᠤᠳᠨᠠᠮᠵᠠᠮᠰᠦ ᠶᠢᠨ ᠰᠢᠷᠡᠭᠡᠨ ᠳᠤ ᠰᠠᠭᠤᠵᠦ ᠮᠤᠩᠭᠤᠯ ᠭᠠᠵᠠᠷ ᠤᠨ ᠱᠠᠰᠢᠨ ᠤ ᠬᠡᠷᠡᠭ ᠢ ᠤᠷᠤᠯᠠᠨ ᠡᠷᠬᠢᠯᠡᠭᠡᠳ᠂ ᠲᠦᠮᠡᠳ ᠤᠨ ᠠᠯᠳᠠᠨ ᠬᠠᠭᠠᠨ ᠤ ᠠᠴᠢ ᠶᠢ ᠲᠠᠯᠠᠢ ᠯᠠᠮᠠ ᠶᠢᠨ ᠬᠤᠪᠢᠯᠭᠠᠨ ᠪᠤᠯᠭᠠᠨ ᠵᠠᠯᠠᠵᠦ ᠶᠤᠨᠳᠤᠨᠵᠠᠮᠰᠦ ᠬᠡᠮᠡᠨ ᠨᠡᠷᠡᠶᠢᠳᠦᠭᠡᠳ᠂ ᠪᠠᠭᠰᠢ ᠨᠢ ᠪᠤᠯᠵᠦ ᠨᠤᠮ ᠰᠤᠷᠭᠠᠭᠠᠭᠠᠳ᠂ ᠰᠢᠷᠡᠭᠡᠳᠦ ᠬᠦᠤᠰᠢ ᠴᠤᠷᠵᠢ ᠬᠡᠮᠡᠨ ᠠᠯᠳᠠᠷᠰᠢᠭᠰᠡᠨ᠃ ᠡᠭᠦᠨ ᠠᠴᠠ ᠦᠵᠡᠬᠦ ᠳᠤ ᠰᠢᠷᠡᠭᠡᠳᠦ ᠵᠤᠤ ᠶᠢ ᠭᠤᠳᠠᠭᠠᠷ ᠰᠤᠳᠨᠠᠮᠵᠠᠮᠰᠦ ᠲᠠᠯᠠᠢ ᠯᠠᠮᠠ 1585 ᠤᠨ ᠳᠤ ᠬᠦᠬᠡᠬᠤᠳᠠ ᠳᠤ ᠢᠷᠡᠬᠦ ᠦᠶᠡᠰ ᠪᠠᠶᠢᠭᠤᠯᠤᠭᠰᠡᠨ ᠪᠠᠶᠢᠬᠤ ᠶᠤᠰᠤᠳᠠᠢ᠃ ᠰᠢᠷᠡᠭᠡᠳᠦ ᠵᠤᠤ ᠨᠢ ᠶᠡᠭᠡ ᠵᠤᠤ ᠶᠢᠨ ᠵᠡᠭᠦᠨᠳᠠᠢ ᠵᠠᠭᠤ ᠰᠢᠬᠠᠮ ᠠᠯᠬᠤᠮ ᠵᠠᠶᠢᠳᠠᠢ ᠭᠠᠵᠠᠷ ᠲᠤ ᠤᠷᠤᠰᠢᠨ᠎ᠡ᠃   ᠬᠥᠬᠡᠬᠤᠲᠠ ᠶᠢᠨ ᠶᠡᠭᠡ ᠵᠤᠤ᠂ ᠰᠢᠷᠡᠭᠡᠳᠦ ᠵᠤᠤ ᠶᠢ ᠲᠦᠮᠠᠳ ᠤᠨ ᠠᠯᠳᠠᠨ ᠬᠠᠭᠠᠨ᠂ ᠰᠤᠳᠨᠠᠮᠵᠠᠮᠰᠦ ᠲᠠᠯᠠᠢ ᠯᠠᠮᠠ ᠬᠤᠶᠠᠭᠤᠯᠠ ᠶᠢᠨ ᠠᠮᠢᠳᠦ ᠪᠠᠶᠢᠬᠤ ᠴᠠᠭ ᠲᠤ ᠪᠠᠶᠢᠭᠤᠯᠤᠭᠰᠡᠨ ᠪᠤᠯᠬᠤᠷ᠂ ᠮᠤᠩᠭᠤᠯ ᠰᠤᠷᠪᠤᠯᠵᠢ ᠪᠢᠴᠢᠭ ᠲᠤ ᠲᠡᠳᠡᠭᠡᠷ ᠢ ᠶᠡᠷᠦᠳᠡᠭᠡᠨ ᠠᠯᠳᠠᠨ ᠬᠠᠭᠠᠨ᠂ ᠭᠤᠷᠪᠠᠳᠤᠭᠠᠷ ᠲᠠᠯᠠᠢ ᠯᠠᠮᠠ ᠶᠢᠨ ᠪᠦᠲᠦᠭᠡᠭᠰᠡᠨ ᠬᠤᠶᠠᠷ ᠵᠤᠤ ᠰᠢᠳᠦᠭᠡᠨ ᠭᠡᠵᠦ ᠬᠠᠮᠳᠤᠤᠬᠠᠨ ᠬᠡᠯᠡᠳᠡᠭ᠃   ᠲᠦᠷᠪᠡᠳᠦᠭᠡᠷ ᠲᠠᠯᠠᠢ ᠯᠠᠮᠠ ᠶᠤᠨᠳᠤᠨᠵᠠᠮᠰᠦ 1602 ᠤᠨ ᠳᠤ ᠬᠥᠬᠡᠬᠤᠲᠠ ᠠᠴᠠ ᠲᠦᠪᠡᠳ ᠲᠤ ᠵᠠᠯᠠᠭᠳᠠᠭᠰᠡᠨ  ᠳᠤ ᠲᠦᠪᠡᠳ ᠤᠨ ᠱᠠᠰᠢᠨ ᠤ ᠡᠷᠬᠡ ᠪᠠᠷᠢᠭᠴᠢᠳ ᠠᠴᠠ ᠮᠠᠶᠢᠳᠠᠷᠢ ᠬᠤᠳᠤᠭᠳᠦ ᠶᠢ ᠮᠤᠩᠭᠤᠯ ᠤᠷᠤᠨ ᠤ ᠱᠠᠰᠢᠨ ᠤ ᠡᠷᠬᠡ ᠶᠢ ᠪᠠᠷᠢᠭᠤᠯᠬᠤ ᠪᠠᠷ ᠬᠦᠬᠡ ᠬᠤᠳᠠᠨ᠎ᠠ ᠲᠤᠮᠢᠯᠠᠨ ᠢᠷᠡᠭᠦᠯᠦᠭᠰᠡᠨ᠃ ᠡᠭᠦᠨ ᠠᠴᠠ ᠡᠬᠢᠯᠡᠨ ᠴᠢᠩ ᠤᠯᠤᠰ ᠤᠨ ᠨᠤᠶᠠᠷᠬᠠᠯ ᠲᠤᠭᠳᠠᠨᠢᠬᠤ ᠪᠤᠯᠳᠠᠯ᠎ᠠ᠂ ᠲᠦᠮᠡᠳ ᠤᠨ ᠬᠠᠷ᠎ᠠ ᠰᠢᠷ᠎ᠡ ᠹᠸᠤᠳᠡᠯ ᠨᠤᠶᠠᠳ ᠠᠴᠠ ᠬᠥᠬᠡᠬᠤᠲᠠ ᠤᠷᠤᠨ ᠳᠤ ᠤᠷᠢᠳ ᠬᠤᠵᠢᠳ ᠪᠠᠰᠠ ᠲᠦᠷᠪᠡᠨ ᠶᠡᠭᠡ ᠰᠦᠮ᠎ᠡ ᠶᠢ ᠨᠡᠮᠡᠵᠦ ᠪᠠᠶᠢᠭᠤᠯᠵᠠᠢ᠃ ᠶᠠᠭᠤᠨ ᠤ ᠡᠮᠦᠨ᠎ᠡ 1606 ᠤᠨ  ᠳᠤ ᠠᠯᠳᠠᠨ ᠬᠠᠭᠠᠨ ᠤ ᠠᠴᠢ ᠲᠠᠶᠢᠴᠢᠩ ᠡᠵᠠᠢ ᠶᠢᠨ ᠡᠬᠡᠨᠡᠷ ᠮᠠᠴᠢᠨ ᠬᠠᠳᠤᠨ ᠪᠤᠳᠠᠰᠠᠷᠢ ᠲᠠᠢ ᠤᠷᠤᠭᠯᠠᠭᠠᠳ ᠬᠥᠬᠡᠬᠤᠲᠠ ᠶᠢᠨ ᠪᠠᠷᠭᠤᠨᠳᠠᠢ ᠬᠤᠶᠠᠷ ᠵᠠᠭᠤᠨ ᠭᠠᠵᠠᠷ ᠤᠨ ᠠᠯᠤᠰ ᠤᠨ ᠭᠠᠷᠤᠳᠢ ᠶᠢᠨ ᠭᠤᠤ ᠶᠢᠨ ᠪᠠᠷᠭᠤᠨ ᠡᠷᠭᠢ  ᠳᠠᠬᠢ ᠳᠠᠯᠠᠨ ᠲᠡᠷᠢᠭᠦᠨ ᠠᠭᠤᠯᠠ ︵大青山︶ ᠶᠢᠨ ᠶᠢᠰᠦᠨ ᠤᠷᠭᠢᠯᠳᠦ ᠬᠠᠳᠠ ᠶᠢᠨ ᠡᠩᠭᠡᠷ ᠲᠤᠤᠷ᠎ᠡ ᠠᠯᠳᠠᠨ ᠬᠠᠭᠠᠨ ᠤ ᠵᠦᠩᠭᠡᠨ ᠬᠠᠳᠤᠨ ᠪᠤᠯᠤᠨ ᠲᠡᠭᠦᠨ ᠤ ᠬᠦᠪᠡᠭᠦᠨ ᠪᠤᠳᠠᠰᠠᠷᠢ ᠶᠢᠨ ᠪᠠᠭ᠎ᠠ ᠬᠤᠷᠢᠶᠠᠨ ᠤ ᠬᠤᠳᠠ  ᠶᠢᠨ ᠪᠠᠬᠢᠯᠡᠯᠳᠡ ᠳᠤ ᠨᠢᠭᠡᠨ ᠰᠦᠮ᠎ᠡ ᠶᠢ ᠦᠷᠭᠡᠳᠭᠡᠨ ᠪᠠᠶᠢᠭᠤᠯᠵᠦ᠂ ᠲᠤᠳᠤᠷᠡᠬᠢ ᠮᠠᠶᠢᠳᠠᠷᠢ ᠪᠤᠷᠬᠠᠨ ᠤ ᠪᠡᠶ᠎ᠡ ᠶᠢ ᠡᠷᠳᠡᠨᠢᠰ ᠢᠶᠠᠷ ᠪᠦᠳᠦᠭᠡᠭᠰᠡᠨ᠃ ᠨᠡᠨ ᠰᠦᠮ᠎ᠡ ᠶᠢ ᠪᠠᠶᠢᠭᠤᠯᠵᠦ ᠲᠠᠭᠤᠰᠤᠭᠰᠡᠨ ᠤ ᠲᠠᠷᠠᠭ᠎ᠠ ᠲᠤᠬᠠᠢ ᠶᠢᠨ ᠦᠶ᠎ᠡ  ᠶᠢᠨ ᠮᠠᠶᠢᠳᠠᠷᠢ ᠬᠤᠳᠤᠭᠳᠦ ᠶᠢ ᠵᠠᠯᠠᠵᠦ ᠠᠮᠢᠯᠠᠭᠤᠯᠤᠭᠰᠡᠨ ᠪᠤᠯᠬᠤᠷ᠂ ᠲᠡᠭᠦᠨ ᠢ ᠪᠠᠰᠠ ᠮᠠᠶᠢᠳᠠᠷᠢ ᠶᠢᠨ ᠰᠦᠮ᠎ᠡ ᠪᠤᠶᠤ ᠮᠠᠶᠢᠳᠠᠷᠢ ᠶᠢᠨ ᠵᠤᠤ ᠭᠡᠵᠦ ᠨᠡᠷᠡᠯᠡᠪᠡ᠃ ᠮᠦᠨ 1606 ᠤᠨ ᠳᠤ᠂ ᠤᠰᠤᠳᠤ ᠶᠢᠨ ᠪᠠᠷᠭᠤᠨ ᠵᠤᠤ ᠶᠢ ᠴᠠᠬᠠᠷ ᠲᠢᠶᠠᠨᠴᠢ ᠬᠤᠳᠤᠭᠳᠦ ᠠᠴᠠ ᠬᠥᠬᠡᠬᠤᠲᠠ ᠶᠢᠨ ᠪᠠᠷᠭᠤᠨ ᠬᠤᠶᠢᠳᠦ ᠠᠷᠪᠠᠭᠠᠳ ᠭᠠᠵᠠᠷ ᠤᠷᠤᠰᠢᠬᠤ ᠨᠠᠷᠤᠰᠤᠳᠦ ᠠᠭᠤᠯᠠ ᠶᠢᠨ ᠦᠪᠦᠷ ᠲᠤ ᠪᠠᠶᠢᠭᠤᠯᠤᠭᠰᠡᠨ᠃ ᠰᠤᠷᠪᠤᠯᠵᠢ ᠪᠢᠴᠢᠭ ᠤᠨ ᠲᠡᠮᠳᠡᠭᠯᠡᠯ ᠢ ᠦᠨᠳᠦᠰᠦᠯᠡᠪᠡᠯ᠂ ᠤᠰᠤᠳᠦ ᠶᠢᠨ ᠪᠠᠷᠭᠤᠨ ᠵᠤᠤ ᠶᠢ ᠰᠢᠬᠦᠷ ᠲᠠᠷᠬᠠᠨ᠂ ᠪᠠᠶᠢᠯᠠ ᠲᠠᠷᠬᠠᠨ ᠲᠡᠷᠢᠭᠦᠯᠡᠨ ᠮᠤᠩᠭᠤᠯ ᠲᠠᠷᠬᠠᠴᠢᠳ ᠦᠪᠡᠷᠳᠡᠭᠡᠨ ᠪᠠᠶᠢᠭᠤᠯᠵᠠᠢ᠃ ᠨᠡᠨ ᠦᠶᠡᠰ ᠲᠤ᠂ ᠯᠠᠮᠠ ᠶᠢᠨ ᠠᠭᠤᠢ ᠶᠢᠨ ᠰᠦᠮ᠎ᠡ ᠶᠢ ᠪᠠᠶᠢᠭᠤᠯᠤᠭᠰᠡᠨ ᠨᠢ ᠴᠤᠶᠢᠰᠢᠪ ᠲᠢᠶᠡᠨᠴᠢ ᠬᠤᠳᠤᠭᠳᠦ ᠶᠢᠨ ᠠᠩᠬᠠᠳᠤᠭᠠᠷ ᠲᠦᠷᠢ ᠭᠡᠬᠦ᠂ ᠮᠢᠩ ᠤᠯᠤᠰ ᠤᠨ ᠦᠶ᠎ᠡ ᠶᠢᠨ ᠮᠤᠩᠭᠤᠯ ᠤᠨ ᠲᠡᠤᠬᠡᠨ ᠲᠡᠭᠡᠷᠡᠬᠢ ᠠᠯᠳᠠᠷᠳᠦ ᠪᠤᠭᠳᠠ ᠴᠠᠭᠠᠨ ᠯᠠᠮᠠ ᠪᠤᠯᠬᠤ ᠪᠦᠭᠡᠳ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠨᠡᠷ᠎ᠡ ᠠᠯᠳᠠᠷᠰᠢᠭᠰᠡᠨ ᠬᠦᠬᠡᠬᠤᠳᠠ ᠶᠢᠨ ᠴᠤᠶᠢᠨᠰᠢᠪ ᠲᠢᠶᠠᠨᠴᠢ ᠬᠤᠳᠤᠭᠳᠦ᠂ ᠴᠠᠭᠠᠨ ᠲᠢᠶᠠᠨᠴᠢ ᠬᠤᠳᠤᠭᠳᠦ᠂ ᠡᠷᠳᠡᠨᠢ ᠲᠢᠶᠠᠨᠴᠢ ᠬᠤᠳᠤᠭᠳᠦ᠂ ᠲᠡᠷᠡᠴᠢᠯᠡᠨ ᠤᠰᠤᠳᠦ ᠶᠢᠨ ᠪᠠᠷᠭᠤᠨ ᠵᠤᠤ ᠶᠢ ᠪᠠᠶᠢᠭᠤᠯᠤᠭᠰᠡᠨ ᠴᠠᠬᠠᠷ ᠲᠢᠶᠠᠨᠴᠢ ᠬᠤᠳᠤᠭᠳᠦ ᠶᠢᠨ ᠠᠩᠬᠠᠳᠤᠭᠠᠷ ᠲᠦᠷᠢ ᠨᠦᠭᠦᠳ ᠢ ᠪᠦᠷ ᠲᠡᠭᠦᠨ ᠤ ᠱᠠᠪᠢ ᠭᠡᠵᠦ ᠬᠡᠯᠡᠳᠡᠭ᠃ ᠲᠦᠮᠠᠳ ᠤᠨ ᠠᠯᠳᠠᠨ ᠬᠠᠭᠠᠨ ᠪᠤᠯᠤᠨ ᠰᠤᠳᠨᠠᠮᠵᠠᠮᠰᠦ ᠲᠠᠯᠠᠢ ᠯᠠᠮᠠ ᠮᠤᠩᠭᠤᠯ ᠤᠷᠤᠨ ᠳᠤ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠢ ᠲᠠᠯᠭᠡᠷᠡᠭᠦᠯᠬᠦ  ᠠᠴᠠ ᠡᠮᠦᠨ᠎ᠡ᠂ ᠪᠤᠭᠳᠠ ᠴᠠᠭᠠᠨ ᠯᠠᠮᠠ ᠪᠢᠴᠢᠭᠡᠴᠢ ᠶᠢᠨ ᠠᠷᠤ ᠠᠭᠤᠯᠠ ᠶᠢᠨ ᠠᠭᠤᠢ ᠰᠠᠭᠤᠷᠢᠨ ᠪᠤᠯᠭᠠᠵᠦ᠂ ᠲᠠᠯᠠᠨ ᠲᠡᠷᠢᠭᠦᠨ ᠠᠭᠤᠯᠠ ᠪᠡ ᠠᠪᠠᠭ᠎ᠠ ᠬᠠᠷ᠎ᠠ ᠶᠢᠨ ᠠᠭᠤᠯᠠ ᠶᠢ ᠭᠡᠰᠦᠵᠦ ᠨᠤᠮ ᠪᠢᠰᠢᠯᠭᠠᠯ ᠬᠢᠵᠦ᠂ ᠯᠠᠮᠠ ᠶᠢᠨ ᠠᠭᠤᠢ  ᠶᠢᠨ ᠬᠠᠭᠤᠴᠢᠨ ᠰᠦᠮ᠎ᠡ ᠶᠢ ᠪᠠᠶᠢᠭᠤᠯᠤᠭᠰᠡᠨ᠃ ᠡᠶᠢᠮᠦ ᠤᠴᠢᠷ ᠠᠴᠠ᠂ ᠯᠠᠮᠠ ᠶᠢᠨ ᠠᠭᠤᠢ ᠶᠢᠨ ᠰᠦᠮ᠎ᠡ ᠶᠢᠨ ᠱᠠᠰᠢᠨ ᠲᠦᠷᠦ ᠶᠢᠨ ᠪᠠᠶᠢᠷᠢ ᠰᠠᠭᠤᠷᠢ ᠨᠢ ᠬᠡᠳᠦᠶᠢᠪᠡᠷ ᠠᠯᠳᠠᠨ ᠬᠠᠭᠠᠨ ᠤ ᠪᠠᠶᠢᠭᠤᠯᠤᠭᠰᠨ ᠶᠡᠭᠡ ᠵᠤᠤ ᠪᠤᠯᠤᠨ ᠰᠤᠳᠨᠠᠮᠵᠠᠮᠰᠦ ᠲᠠᠯᠠᠢ ᠯᠠᠮᠠ ᠶᠢᠨ ᠪᠠᠶᠢᠭᠤᠯᠤᠭᠰᠡᠨ ᠰᠢᠷᠡᠭᠡᠳᠦ ᠵᠤᠤ ᠠᠴᠠ ᠲᠤᠤᠷ᠎ᠠ ᠪᠤᠯᠪᠠᠴᠦ ᠪᠠᠶᠢᠭᠤᠯᠤᠭᠰᠡᠨ ᠴᠠᠭ ᠦᠶ᠎ᠡ ᠨᠢ ᠲᠡᠳᠡᠭᠡᠷ ᠠᠴᠠ ᠡᠷᠳᠡ ᠶᠤᠮ᠃ ᠨᠡᠨ ᠨᠢ ᠤᠳᠤ ᠪᠤᠯᠳᠠᠯ᠎ᠠ ᠬᠦᠮᠦᠰ ᠤᠨ ᠲᠡᠷ᠎ᠡ ᠰᠤᠨᠢᠷᠬᠠᠯ ᠢ ᠲᠠᠳᠠᠭᠰᠡᠭᠠᠷ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠡ ᠮᠢᠩ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠬᠥᠬᠡᠬᠤᠲᠠ ᠳᠤ ᠪᠠᠶᠢᠭᠤᠯᠤᠭᠳᠠᠭᠰᠡᠨ ᠪᠠᠭ᠎ᠠ ᠵᠤᠤ ᠪᠤᠢ᠃ ᠪᠠᠭ᠎ᠠ ᠵᠤᠤ ᠨᠢ ᠠᠯᠳᠠᠨ ᠬᠠᠭᠠᠨ ᠤ ᠠᠴᠢ ᠤᠨᠪᠤ ᠬᠤᠩ ᠲᠠᠶᠢᠵᠢ ᠡᠴᠢᠭᠡ ᠪᠤᠳᠠᠰᠠᠷᠢ ᠶᠢᠨ ᠢᠶᠠᠨ ᠰᠢᠷᠡᠭᠡᠳᠦ ᠵᠤᠤ ᠶᠢᠨ ᠵᠡᠭᠦᠨᠳᠠᠢ ᠪᠠᠶᠢᠭᠤᠯᠤᠭᠰᠡᠨ ᠬᠠᠭᠤᠴᠢᠨ ᠰᠦᠮ᠎ᠡ ᠶᠢ ᠦᠷᠭᠡᠳᠭᠡᠨ ᠪᠠᠶᠢᠭᠤᠯᠤᠭᠰᠡᠨ᠃ ᠲᠡᠭᠦᠨ  ᠢ ᠪᠠᠶᠢᠭᠤᠯᠤᠭᠰᠡᠨ ᠪᠤᠳᠠᠳᠠᠢ ᠤᠨ ᠵᠢᠯ ᠨᠢ 1621 — — 1627 ᠤᠨ ᠪᠤᠯᠤᠨ᠎ᠡ᠃ ᠡᠭᠦᠨ ᠤ ᠬᠠᠮᠳᠦ ᠤᠨᠪᠤ ᠬᠤᠩ ᠲᠠᠶᠢᠵᠢ 1623 ᠤᠨ ᠳᠤ ᠶᠡᠭᠡ ᠵᠤᠤ ᠶᠢᠨ ᠨᠢᠭᠡᠨ ᠬᠤᠤᠰ ᠬᠦᠷᠡᠯ ᠠᠷᠠᠰᠯᠠᠨ ᠢ ᠴᠢᠳᠬᠤᠭᠰᠡᠨ᠂ ᠲᠡᠷᠡ ᠨᠢ ᠤᠳᠤ ᠪᠤᠯᠳᠠᠯ᠎ᠠ ᠪᠠᠶᠢᠭᠰᠠᠭᠠᠷ᠃ ︽ᠨᠠᠶᠢᠵᠢ ᠲᠤᠶᠢᠨ ᠤ ᠨᠢᠭᠡᠳᠦᠭᠡᠷ ᠲᠦᠷᠢ ᠶᠢᠨ ᠨᠠᠮᠳᠠᠷ︾ ᠲᠤ ᠲᠡᠮᠳᠡᠭᠯᠡᠬᠦ ᠪᠠᠷ᠂ ᠮᠢᠩ ᠤᠯᠤᠰ ᠤᠨ ᠸᠠᠨᠯᠢ ᠬᠠᠭᠠᠨ ᠤ ᠦᠶ᠎ᠡ ᠳᠤ ᠨᠠᠶᠢᠵᠢ ᠲᠤᠶᠢᠨ ᠤ ᠨᠢᠭᠡᠳᠦᠭᠡᠷ ᠲᠦᠷᠢ ᠬᠦᠬᠡ ᠬᠤᠳᠠᠨ᠎ᠡ ᠢᠷᠡᠬᠦ ᠳᠤ ᠪᠠᠭ᠎ᠠ ᠵᠤᠤ ᠪᠠᠶᠢᠭᠰᠡᠨ ᠦᠭᠡᠢ᠂ ᠴᠢᠩ ᠤᠯᠤᠰ ᠤᠨ ᠡᠶᠡᠪᠡᠷ ᠵᠠᠰᠠᠭᠴᠢ ᠶᠢᠨ ᠠᠷᠪᠠᠳᠤᠭᠠᠷ ᠤᠨ ᠳᠤ ᠲᠡᠷᠡ ᠬᠤᠷᠴᠢᠨ ᠠᠴᠠ ᠲᠠᠬᠢᠨ ᠬᠦᠬᠡ ᠬᠤᠳᠠᠨ᠎ᠡ ᠪᠤᠴᠠᠵᠦ ᠢᠷᠡᠬᠦ ᠦᠶ᠎ᠡ ᠳᠤ ᠡᠨᠡᠬᠦ ᠰᠦᠮ᠎ᠡ ᠨᠢᠭᠡᠨᠳᠠ ᠬᠠᠭᠤᠴᠢᠷᠠᠭᠰᠡᠨ ᠪᠠᠶᠢᠵᠠᠢ᠃ ᠶᠡᠭᠡ ᠵᠤᠤ ᠲᠠᠢ ᠬᠠᠷᠢᠴᠠᠭᠤᠯᠤᠨ ᠡᠭᠦᠨ ᠢ ᠪᠠᠭ᠎ᠠ ᠵᠤᠤ ᠭᠡᠵᠦ ᠨᠡᠷᠡᠶᠢᠳᠦᠭᠰᠡᠨ᠃ ᠤᠴᠢᠷ ᠨᠢ ᠲᠦᠮᠡᠳ ᠤᠨ ᠠᠯᠳᠠᠨ ᠬᠠᠭᠠᠨ ᠨᠠᠰᠤ ᠨᠦᠭᠴᠢᠭᠰᠡᠨ ᠤ ᠲᠠᠷᠠᠭ᠎ᠠ᠂ ᠰᠡᠩᠭᠡ ᠲᠦᠭᠦᠷᠡᠩ ᠬᠠᠭᠠᠨ ᠪᠠᠷᠭᠤᠨ ᠭᠤᠷᠪᠡᠨ ᠲᠦᠮᠡᠨ ᠤ ᠬᠠᠭᠠᠨ ᠭᠡᠳᠡᠭ ᠪᠠᠶᠢᠭᠰᠡᠨ ᠪᠤᠯᠪᠠᠴᠦ᠂ ᠤᠳᠠᠯ ᠦᠭᠡᠢ ᠤᠷᠳᠤᠰ ᠤᠨ ᠪᠤᠱᠤᠭᠳᠦ ᠵᠢᠨᠦᠩ ᠪᠡᠶ᠎ᠡ  ᠪᠠᠨ ᠮᠦᠨ ᠴᠦ ᠬᠠᠭᠠᠨ ᠬᠡᠮᠡᠨ᠂ ᠬᠡᠷᠡᠭ ᠲᠡᠭᠡᠷ᠎ᠡ ᠪᠠᠨ ᠲᠦᠮᠡᠳ ᠬᠠᠭᠠᠨ ᠤ ᠤᠳᠤᠷᠢᠳᠤᠯᠭ᠎ᠠ ᠠᠴᠠ ᠰᠠᠯᠴᠢᠬᠠᠭᠰᠡᠨ ᠪᠠᠶᠢᠵᠠᠢ᠃ ᠡᠭᠦᠨ ᠢᠶᠠᠷ ᠦᠯᠦ ᠪᠠᠷᠠᠮ ᠰᠡᠩᠭᠡ ᠲᠦᠭᠦᠷᠡᠩ ᠬᠠᠭᠠᠨ ᠨᠠᠰᠤ ᠨᠦᠭᠴᠢᠭᠰᠡᠨ ᠤ ᠲᠠᠷᠠᠭ᠎ᠠ᠂ ᠲᠦᠮᠡᠳ ᠤᠨ ᠬᠠᠭᠠᠨ ᠰᠠᠭᠤᠷᠢᠨ ᠢ ᠨᠠᠮᠤᠳᠠᠢ ᠬᠠᠭᠠᠨ᠂ ᠪᠤᠱᠤᠭᠳᠦ ᠬᠠᠭᠠᠨ ᠵᠠᠯᠭᠠᠨᠵᠢᠯᠠᠭᠰᠡᠨ᠃ ᠤᠨᠪᠤ ᠬᠤᠩ ᠲᠠᠶᠢᠵᠢ ᠡᠮᠡᠭᠡ ᠵᠦᠩᠭᠡᠨ ᠬᠠᠳᠤᠨ᠂ ᠡᠵᠢ ᠮᠠᠴᠢᠨ ᠬᠠᠳᠤᠨ ᠤ ᠪᠠᠨ ᠨᠦᠯᠦᠭᠡ ᠶᠢ ᠠᠰᠢᠭᠯᠡᠨ ᠦᠪᠡᠷᠦᠨ ᠪᠠᠶᠢᠭᠤᠯᠤᠭᠰᠡᠨ ᠰᠦᠮ᠎ᠡ  ᠪᠠᠨ ᠠᠯᠳᠠᠨ ᠭᠡᠭᠡᠨ ᠬᠠᠭᠠᠨ ᠤ ᠪᠠᠶᠢᠭᠤᠯᠤᠭᠰᠡᠨ ᠶᠡᠭᠡ ᠵᠤᠤ ᠲᠠᠢ ᠵᠡᠷᠭᠡᠴᠡᠭᠦᠯᠦᠨ ᠪᠠᠭ᠎ᠠ ᠵᠤᠤ ᠭᠡᠵᠡᠢ᠃   ᠡᠶᠢᠨᠬᠦ᠂ ᠮᠤᠩᠭᠤᠯ ᠤᠶᠢᠷᠠᠳ ᠬᠤᠶᠠᠷ ᠤᠨ ᠦᠶ᠎ᠡ ᠶᠢᠨ ᠬᠥᠬᠡᠬᠤᠲᠠ ᠶᠢᠨ ᠰᠦᠮ᠎ᠡ ᠬᠡᠶᠢᠳ ᠭᠡᠳᠡᠭ ᠨᠢ ᠶᠡᠭᠡ ᠵᠤᠤ᠂ ᠰᠢᠷᠡᠭᠡᠳᠦ ᠵᠤᠤ᠂ ᠮᠠᠶᠢᠳᠠᠷᠢ ᠵᠤᠤ᠂ ᠤᠰᠤᠳᠤ ᠶᠢᠨ ᠪᠠᠷᠭᠤᠨ ᠵᠤᠤ᠂ ᠯᠠᠮᠠ ᠶᠢᠨ ᠠᠭᠤᠢ ᠶᠢᠨ ᠰᠦᠮ᠎ᠡ᠂ ᠪᠠᠭ᠎ᠠ ᠵᠤᠤ ᠵᠡᠷᠭᠡ ᠪᠤᠯᠤᠨ᠎ᠡ᠃ ᠡᠳᠡᠭᠡᠷ ᠵᠢᠷᠭᠤᠭᠠᠨ ᠰᠦᠮ᠎ᠡ ᠠᠴᠠ ᠭᠠᠳᠠᠨ᠎ᠡ᠂ ᠬᠠᠷᠠᠭᠴᠢᠨ ᠭᠤᠤᠯ ᠤᠨ ᠠᠮᠠᠨ ᠳᠤ ᠪᠠᠶᠢᠭᠤᠯᠤᠭᠰᠡᠨ ᠰᠠ ᠴᠤᠷᠵᠢ ᠶᠢᠨ ᠰᠦᠮ᠎ᠡ᠂ ᠴᠠᠭᠠᠨ ᠰᠤᠪᠤᠷᠭ᠎ᠠ ᠶᠢᠨ ᠬᠠᠵᠠᠭᠤ ᠳᠤ ᠪᠠᠶᠢᠭᠰᠡᠨ ᠬᠢᠳᠠᠳ ᠬᠤᠤᠱᠠᠩ ᠤᠨ ᠬᠤᠸᠠ ᠶᠠᠨ ᠰᠧ ᠬᠡᠶᠢᠳ ᠠᠯᠢ ᠡᠷᠳᠡ ᠮᠢᠩ ᠤᠯᠤᠰ ᠤᠨ ᠰᠡᠭᠦᠯᠴᠢ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠨᠢᠭᠡᠨᠳᠡ ᠰᠦᠢᠳᠴᠠᠢ᠃ ᠴᠠᠭᠠᠨ ᠰᠤᠪᠤᠷᠭ᠎ᠠ ᠶᠢᠨ ᠵᠡᠭᠦᠨᠳᠠᠢ ᠰᠦᠮᠠᠴᠢᠨ ᠲᠤᠰᠬᠤᠨ ᠳᠤ ᠶᠤᠨᠳᠤᠨᠵᠠᠮᠰᠦ ᠲᠠᠯᠠᠢ ᠯᠠᠮᠠ  ᠶᠢᠨ ᠡᠴᠢᠭᠡ ᠰᠦᠮᠪᠦᠷ ᠲᠠᠶᠢᠵᠢ ᠶᠢᠨ ᠪᠠᠶᠢᠭᠤᠯᠤᠭᠰᠡᠨ ᠪᠠᠶᠠᠭᠤᠳ ᠪᠠᠭᠠᠳᠤᠷ ᠲᠠᠶᠢᠵᠢ ᠶᠢᠨ ᠰᠦᠮ᠎ᠡ ︽ᠰᠤᠶᠤᠯ ᠤᠨ ᠶᠡᠭᠡ ᠬᠤᠪᠢᠰᠬᠠᠯ︾ ᠤᠨ ᠲᠤᠮᠳᠠ ᠰᠦᠢᠳᠴᠠᠢ᠃ ᠡᠳᠡᠭᠡᠷ ᠰᠦᠮ᠎ᠡ ᠬᠡᠶᠢᠳ ᠢ ᠪᠠᠶᠢᠭᠤᠯᠤᠭᠰᠡᠨ ᠶᠠᠪᠤᠳᠠᠯ ᠨᠢ ᠮᠤᠩᠭᠤᠯ ᠤᠶᠢᠷᠠᠳ ᠬᠤᠶᠠᠷ ᠤᠨ ᠦᠶ᠎ᠡ ᠠᠴᠠ ᠠᠪᠤᠭᠠᠳ ᠬᠥᠬᠡᠬᠤᠲᠠ ᠶᠢ ᠭᠡᠷᠡᠯ ᠲᠤᠶᠠᠭ᠎ᠠ ᠰᠠᠴᠤᠷᠠᠭᠰᠡᠨ ᠭᠤᠶᠤ ᠦᠵᠡᠮᠵᠢᠳᠠᠢ ᠬᠤᠳᠠ ᠪᠤᠯᠭᠠᠪᠠ᠃ ᠡᠭᠦᠨ ᠤ ᠵᠡᠷᠭᠡᠴᠡᠭᠡ ᠪᠠᠷ᠂ ᠬᠦᠬᠡ ᠬᠤᠳᠡ ᠨᠢ ᠮᠤᠩᠭᠤᠯ᠂ ᠲᠦᠪᠡᠳ᠂ ᠬᠢᠳᠠᠳ ᠵᠡᠷᠭᠡ ᠤᠯᠠᠨ ᠦᠨᠳᠦᠰᠦᠳᠠᠨ ᠪᠡ ᠮᠤᠩᠭᠤᠯ ᠤᠨ ᠤᠯᠠᠨ ᠠᠶᠢᠮᠠᠭ ᠤᠨ ᠬᠤᠭᠤᠷᠤᠨᠳᠤᠬᠢ ᠠᠵᠦ ᠠᠬᠤᠢ᠂ ᠰᠤᠶᠤᠯ  ᠤᠨ ᠲᠦᠪ ᠪᠤᠯᠤᠭᠰᠡᠨ ᠢᠶᠠᠷ ᠦᠯᠦ ᠪᠠᠷᠠᠮ᠂ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠤ ᠮᠤᠩᠭᠤᠯ ᠤᠷᠤᠨ ᠳᠤ ᠲᠡᠯᠭᠡᠷᠡᠬᠦ ᠰᠠᠭᠤᠷᠢᠨ ᠭᠠᠵᠠᠷ ᠪᠤᠯᠵᠠᠢ᠃ ᠲᠡᠷᠡ ᠦᠶ᠎ᠡ ᠠᠴᠠ ᠡᠬᠢᠯᠡᠨ ᠶᠡᠭᠡ ᠬᠡᠮᠵᠢᠶᠡᠨ ᠤ ᠲᠦᠪᠡᠳ᠂ ᠬᠢᠳᠠᠳ ᠨᠤᠮ ᠰᠤᠳᠤᠷ ᠬᠦᠬᠡ ᠬᠤᠳᠠᠨ ᠳᠤ ᠮᠤᠩᠭᠤᠯ ᠬᠡᠯᠡ ᠪᠠᠷ ᠤᠷᠴᠢᠭᠤᠯᠤᠭᠳᠠᠨ᠂ ᠠᠶᠤᠰᠢ ᠬᠦᠤᠰᠢ᠂ ᠰᠢᠷᠡᠭᠡᠳᠦ ᠬᠦᠤᠰᠢ ᠮᠡᠳᠦ ᠤᠨ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠬᠡᠯᠡ ᠲᠡᠤᠬᠡ ᠶᠢᠨ ᠡᠷᠳᠡᠮᠳᠠᠳ ᠭᠠᠷᠪᠡ᠃ ᠰᠦᠮ᠎ᠡ ᠬᠡᠶᠢᠳ ᠤᠨ ᠪᠦᠳᠦᠭᠡᠨ ᠪᠠᠶᠢᠭᠤᠯᠤᠯᠳᠠ ᠶᠢ ᠲᠠᠭᠠᠯᠳᠤᠨ᠂ ᠰᠢᠬᠦᠷ ᠲᠠᠷᠬᠠᠨ᠂ ᠪᠠᠶᠢᠯᠠ ᠲᠠᠷᠬᠠᠨ ᠮᠡᠳᠦ ᠶᠢᠨ ᠮᠤᠩᠭᠤᠯ ᠦᠨᠳᠦᠰᠦᠳᠠᠨ ᠤ ᠪᠠᠷᠢᠯᠭ᠎ᠠ᠂ ᠤᠷᠠᠨ ᠵᠢᠷᠤᠭ ᠵᠡᠷᠭᠡ ᠤᠯᠠᠨ ᠲᠠᠯ᠎ᠠ ᠶᠢᠨ ᠡᠷᠳᠡᠮᠳᠠᠳ ᠢᠯᠡᠷᠡᠨ ᠭᠠᠷᠪᠡ᠃ ᠢᠩᠭᠢᠭᠡᠳ ᠮᠤᠩᠭᠤᠯ ᠤᠨ ᠵᠡᠭᠦᠨ ᠭᠠᠷ ᠤᠨ ᠴᠠᠬᠠᠷ ᠲᠦᠮᠡᠨ᠂ ᠬᠠᠯᠬ᠎ᠠ ᠲᠦᠮᠡᠨ ᠪᠡ ᠲᠡᠭᠷᠢ ᠠᠭᠤᠯᠠ ᠶᠢᠨ ᠠᠷᠤ ᠦᠪᠦᠷ ᠤᠨ ᠲᠤᠮᠳᠠᠳᠦ ᠲᠦᠷᠪᠡᠨ ᠤᠶᠢᠷᠠᠳ ᠬᠦᠷᠳᠡᠯ᠎ᠡ᠂ ᠪᠦᠷ ᠬᠦᠮᠦᠨ ᠢᠷᠡᠭᠦᠯᠦᠨ ᠬᠥᠬᠡᠬᠤᠲᠠ ᠠᠴᠠ ᠨᠤᠮ ᠰᠤᠳᠤᠷ ᠵᠠᠯᠠᠬᠤ ᠪᠤᠶᠤ ᠰᠦᠮ᠎ᠡ ᠬᠡᠶᠢᠳ ᠪᠠᠶᠢᠭᠤᠯᠬᠤ ᠮᠡᠷᠭᠡᠵᠢᠯ ᠰᠤᠷᠤᠯᠴᠠᠬᠤ ᠪᠤᠯᠤᠭᠰᠡᠨ᠃ ᠠᠷᠤ ᠲᠤᠯᠤᠭᠠᠨ ᠬᠤᠰᠢᠭᠤ ᠬᠠᠯᠬ᠎ᠠ ᠶᠢᠨ ᠹᠸᠤᠳᠠᠯ ᠨᠤᠶᠠᠳ 1586 ᠤᠨ ᠳᠤ ᠤᠷᠬᠤᠨ ᠭᠤᠤᠯ ᠤᠨ ᠵᠡᠭᠦᠨ ᠡᠷᠭᠢ ᠲᠡᠭᠡᠷ᠎ᠡ ᠭᠤᠪᠢ ᠶᠢᠨ ᠠᠷᠤ ᠶᠢᠨ ᠰᠢᠷ᠎ᠡ  ᠶᠢᠨ ᠱᠠᠰᠢᠨ ᠤ ᠠᠩᠬᠠᠳᠤᠭᠠᠷ ᠰᠦᠮ᠎ᠡ ᠪᠤᠯᠬᠤ ᠡᠷᠳᠡᠨᠢ ᠵᠤᠤ ᠶᠢ ᠪᠠᠶᠢᠭᠤᠯᠬᠤ ᠳᠤ ᠮᠦᠨ ᠬᠥᠬᠡᠬᠤᠲᠠ ᠶᠢᠨ ᠶᠡᠭᠡ ᠵᠤᠤ ᠶᠢᠨ ᠦᠯᠢᠭᠡᠷ ᠮᠠᠶ᠋ᠢᠭ ᠢ ᠲᠠᠭᠤᠷᠢᠶᠠᠭᠰᠡᠨ᠃ ᠮᠢᠩ ᠤᠯᠤᠰ ᠤᠨ ᠰᠡᠭᠦᠯᠴᠢ ᠴᠢᠩ ᠤᠯᠤᠰ ᠤᠨ ᠡᠬᠢᠨ ᠤ ᠦᠶ᠎ᠡ ᠪᠤᠯᠤᠭᠠᠳ᠂ ᠵᠠᠷᠢᠮ ᠳᠠᠭᠠᠨ ᠬᠥᠬᠡᠬᠤᠲᠠ ᠬᠡᠮᠡᠬᠦ ᠨᠡᠷ᠎ᠡ ᠴᠦ ᠵᠤᠤ ᠬᠤᠳᠠ ᠬᠡᠮᠡᠬᠦ ᠨᠡᠷ᠎ᠡ ᠪᠠᠷ ᠤᠷᠤᠯᠠᠭᠳᠠᠬᠤ ᠪᠤᠯᠵᠠᠢ᠃ ᠡᠭᠦᠨ ᠠᠴᠠ᠂ ᠬᠥᠬᠡᠬᠤᠲᠠ ᠳᠠᠬᠢ ᠮᠤᠩᠭᠤᠯ ᠤᠶᠢᠷᠠᠳ ᠬᠤᠶᠠᠷ ᠤᠨ ᠦᠶ᠎ᠡ ᠶᠢᠨ ᠰᠦᠮ᠎ᠡ ᠬᠡᠶᠢᠳ ᠮᠤᠩᠭᠤᠯ ᠤᠨ ᠡᠯ᠎ᠡ ᠠᠶᠢᠮᠠᠭ ᠲᠤ ᠬᠢᠷᠢ ᠵᠡᠷᠭᠡ ᠶᠡᠭᠡ ᠨᠦᠯᠦᠭᠡ ᠲᠠᠢ ᠪᠠᠶᠢᠭᠰᠡᠨ ᠢ ᠮᠡᠳᠡᠵᠦ ᠪᠤᠯᠤᠨ᠎ᠡ᠃   ᠬᠤᠶᠠᠷ᠂ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠶᠢᠨ ᠶᠢᠰᠦᠨ ᠰᠦᠮ᠎ᠡ   ᠮᠠᠨᠵᠦ ᠶᠢᠨ ᠰᠡᠴᠡᠨ ᠬᠠᠭᠠᠨ 1632 ᠤᠨ ᠳᠤ ᠮᠤᠩᠭᠤᠯ ᠤᠨ ᠯᠢᠭᠳᠡᠨ ᠬᠠᠭᠠᠨ ᠢ ᠲᠡᠶᠢᠯᠦᠭᠡᠳ ᠬᠦᠬᠡ ᠬᠤᠳᠠᠨ᠎ᠡ ᠢᠷᠡᠵᠦ ᠶᠡᠭᠡ ᠵᠤᠤ ᠳᠤ ᠪᠠᠭᠤᠵᠦ᠂ ᠦᠪᠡᠷ ᠤᠨ ᠨᠡᠷ᠎ᠡ ᠬᠦᠨᠳᠦ ᠪᠠᠷ ᠢᠶᠠᠨ ᠭᠡᠭᠡᠨ ᠬᠠᠭᠠᠨ ᠤ ᠰᠦᠮ᠎ᠡ ᠶᠢ ᠬᠠᠮᠠᠭᠠᠯᠠᠨ᠎ᠡ ᠭᠡᠵᠦ ᠲᠤᠩᠬᠠᠭᠯᠠᠪᠠ᠃ ᠲᠡᠭᠦᠨ ᠤ ᠴᠤᠬᠤᠮ ᠰᠠᠨᠠᠭ᠎ᠠ ᠨᠢ ᠪᠡᠶ᠎ᠡ ᠪᠠᠨ ᠮᠤᠩᠭᠤᠯ ᠤᠨ ᠪᠠᠷᠭᠤᠨ ᠭᠠᠷ  ᠤᠨ ᠲᠦᠮᠡᠳ ᠤᠨ ᠠᠯᠳᠠᠨ ᠬᠠᠭᠠᠨ ᠤ ᠱᠠᠰᠢᠨ ᠲᠦᠷᠦ ᠶᠢ ᠵᠠᠯᠭᠠᠮᠵᠢᠯᠠᠪᠠ ᠭᠡᠵᠦ ᠢᠯᠡᠷᠬᠡᠶᠢᠯᠡᠭᠰᠡᠨ ᠶᠠᠪᠤᠳᠠᠯ ᠪᠤᠯᠬᠤ ᠶᠤᠮ᠃ ᠨᠡᠨ ᠨᠢ ᠮᠤᠩᠭᠤᠯ ᠤᠨ ᠯᠢᠭᠳᠡᠨ ᠬᠠᠭᠠᠨ ᠤ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠢ ᠡᠰᠡᠷᠭᠦᠴᠡᠬᠦ ᠲᠦᠷᠦ ᠶᠢᠨ ᠪᠤᠳᠤᠯᠭ᠎ᠠ  ᠲᠠᠢ ᠢᠯᠡᠷᠬᠡᠢ ᠠᠳᠠᠯᠢᠳᠬᠠᠯ ᠪᠤᠯᠤᠭᠠᠳ᠂ ᠮᠤᠩᠭᠤᠯ ᠤᠨ ᠡᠯ᠎ᠡ ᠠᠶᠢᠮᠠᠭ ᠤᠨ ᠲᠤᠳᠤᠭᠠᠳᠦ ᠶᠢᠨ ᠵᠦᠷᠢᠴᠡᠯ ᠢ ᠶᠡᠬᠡᠳᠭᠡᠭᠰᠡᠨ ᠢᠶᠠᠷ ᠦᠯᠦ ᠪᠠᠷᠠᠮ᠂ ᠬᠥᠬᠡᠬᠤᠲᠠ ᠶᠢᠨ ᠬᠤᠳᠤᠭᠳᠦ ᠬᠤᠪᠢᠯᠭᠠᠳ ᠢ ᠪᠡᠶ᠎ᠡ ᠳᠡᠭᠡᠨ ᠲᠠᠳᠠᠵᠦ᠂ ᠤᠤᠯ ᠭᠠᠵᠠᠷ ᠤᠷᠤᠨ ᠤ ᠮᠤᠩᠭᠤᠯ ᠤᠨ ᠦᠷᠭᠡᠨ ᠤᠯᠠᠨ ᠰᠦᠰᠦᠭᠳᠡᠨ ᠲᠦᠮᠡᠨ ᠤ ᠬᠠᠷᠢ ᠦᠨᠳᠦᠰᠦᠳᠠᠨ ᠤ ᠲᠦᠷᠢᠮᠬᠡᠶᠢᠯᠡᠯ  ᠢ ᠡᠰᠡᠷᠭᠦᠴᠡᠬᠦ ᠵᠤᠷᠢᠭ ᠰᠠᠨᠠᠭ᠎ᠠ ᠶᠢ ᠪᠠᠳᠠᠷᠠᠭᠤᠯᠤᠭᠰᠡᠨ᠃ ᠴᠠᠬᠠᠷ ᠤᠨ ᠮᠡᠷᠭᠡᠨ ᠯᠠᠮᠠ ᠮᠤᠩᠭᠤᠯ ᠤᠨ ᠮᠠᠬᠠᠺᠠᠯᠠ ᠪᠤᠷᠬᠠᠨ ᠢ ᠮᠠᠨᠵᠦ ᠶᠢᠨ ᠰᠡᠴᠡᠨ ᠬᠠᠭᠠᠨ ᠳᠤ ᠬᠦᠷᠭᠡᠬᠦ ᠠᠴᠠ ᠡᠮᠦᠨ᠎ᠡ᠂ ᠬᠥᠬᠡᠬᠤᠲᠠ ᠶᠢᠨ ᠠᠰᠢᠩ ᠯᠠᠮᠠ᠂ ᠨᠠᠶᠢᠵᠢ ᠲᠤᠶᠢᠨ᠂ ᠴᠠᠬᠠᠷ ᠲᠢᠶᠠᠨᠴᠢ᠂ ᠮᠡᠷᠭᠡᠨ ᠲᠢᠶᠠᠨᠴᠢ ᠪᠡᠶ᠎ᠡ ᠪᠠᠷ ᠢᠶᠠᠨ ᠮᠦᠭᠳᠡᠨ ᠬᠤᠳᠠ ᠳᠤ ᠬᠦᠷᠴᠦ ᠮᠠᠨᠵᠦ ᠶᠢ ᠲᠠᠭᠠᠪᠠ᠃ ᠨᠠᠶᠢᠵᠢ ᠲᠤᠶᠢᠨ ᠲᠦᠰᠢᠶᠡᠳᠦ ᠴᠢᠨ ᠸᠠᠩ ᠤᠨ ᠬᠤᠰᠢᠭᠤᠨ᠎ᠡ ᠪᠠᠶᠠᠨ ᠬᠤᠰᠢᠭᠤ ᠰᠦᠮ᠎ᠡ ᠶᠢ ᠪᠠᠶᠢᠭᠤᠯᠤᠨ᠂ ᠨᠤᠨ ᠠᠷᠪᠠᠨ ᠬᠤᠰᠢᠭᠤ᠂ ᠮᠤᠩᠭᠤᠯ ᠨᠠᠶᠢᠮᠠᠨ ᠬᠤᠰᠢᠭᠤ᠂ ᠵᠤᠰᠤᠳᠦ ᠶᠢᠨ ᠴᠢᠭᠤᠯᠭᠠᠨ᠂ ᠵᠤᠤ ᠤᠳᠠ ᠶᠢᠨ ᠴᠢᠭᠤᠯᠭᠠᠨ ᠤ ᠲᠠᠬᠢᠯ ᠤᠨ ᠤᠷᠤᠨ ᠪᠤᠯᠤᠭᠰᠡᠨ᠃ ᠠᠰᠢᠩ ᠯᠠᠮᠠ ᠮᠦᠭᠳᠡᠨ ᠤ ᠮᠠᠭᠠᠳ ᠢᠯᠭᠤᠭᠰᠡᠨ ᠰᠦᠮ᠎ᠡ ᠶᠢ ᠡᠷᠬᠢᠯᠡᠵᠦ᠂ ᠬᠤᠵᠢᠮ ᠨᠢ ᠬᠦᠷᠢᠶ᠎ᠡ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠯᠠᠮᠠ ᠪᠤᠯᠪᠠ᠃ ᠬᠥᠬᠡᠬᠤᠲᠠ ᠶᠢᠨ ᠤᠰᠤᠳᠦ ᠶᠢᠨ ᠪᠠᠷᠭᠤᠨ ᠵᠤᠤ ᠶᠢᠨ ᠴᠠᠬᠠᠷ ᠲᠢᠶᠠᠨᠴᠢ ᠬᠤᠳᠤᠭᠳᠦ ᠮᠦᠨ ᠪᠡᠶ᠎ᠡ ᠪᠠᠷ ᠢᠶᠠᠨ ᠮᠦᠭᠳᠡᠨ ᠳᠤ ᠤᠴᠢᠵᠦ ᠮᠠᠨᠵᠦ ᠶᠢᠨ ᠰᠡᠴᠡᠨ ᠬᠠᠭᠠᠨ ᠳᠤ ᠬᠦᠨᠳᠦ ᠪᠡᠯᠡᠭ ᠪᠠᠷᠢᠵᠦ᠂ ᠲᠡᠭᠦᠨ ᠢ ᠰᠢᠳᠤᠷᠭᠤ ᠪᠠᠷ ᠲᠠᠭᠠᠬᠤ ᠰᠡᠳᠭᠢᠯ ᠪᠠᠨ ᠢᠯᠡᠷᠬᠡᠶᠢᠯᠡᠭᠰᠡᠨ᠃ ᠡᠶᠢᠨᠬᠦ᠂ ᠬᠥᠬᠡᠬᠤᠲᠠ ᠨᠢ ᠮᠤᠩᠭᠤᠯ ᠤᠶᠢᠷᠠᠳ ᠬᠤᠶᠠᠷ ᠤᠨ ᠦᠶ᠎ᠡ ᠳᠤ ᠮᠤᠩᠭᠤᠯ ᠤᠷᠤᠨ ᠪᠤᠯᠤᠨ ᠲᠤᠳᠤᠷ᠎ᠡ ᠭᠠᠵᠠᠷ᠂ ᠮᠦᠨ ᠲᠡᠷᠡᠴᠢᠯᠡᠨ ᠮᠤᠩᠭᠤᠯ ᠤᠨ ᠤᠯᠠᠨ ᠠᠶᠢᠮᠠᠭ ᠤᠨ ᠬᠤᠭᠤᠷᠤᠨᠳᠤᠬᠢ ᠠᠵᠦ ᠠᠬᠤᠢ ᠂ ᠰᠤᠶᠤᠯ ᠪᠤᠯᠪᠠᠰᠤᠷᠠᠯ᠂ ᠱᠠᠰᠢᠨ ᠰᠤᠷᠳᠠᠬᠤᠨ ᠤ ᠬᠠᠷᠢᠯᠴᠠᠭᠠᠨ ᠤ ᠲᠦᠪ ᠪᠠᠶᠢᠭᠰᠡᠨ ᠪᠤᠯ᠂ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠮᠠᠨᠵᠦ ᠬᠠᠭᠠᠨ ᠠᠴᠠ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠤ ᠬᠤᠳᠤᠭᠳᠦ ᠬᠤᠪᠢᠯᠭᠠᠳ ᠢ ᠠᠰᠢᠭᠯᠡᠨ ᠮᠤᠩᠭᠤᠯ ᠤᠨ ᠤᠯᠠᠨ ᠠᠶᠢᠮᠠᠭ ᠤᠨ ᠹᠸᠤᠳᠠᠯ ᠨᠤᠶᠠᠳ ᠲᠠᠢ ᠬᠠᠷᠢᠴᠠᠭ᠎ᠠ ᠬᠤᠯᠪᠤᠭ᠎ᠠ ᠠᠪᠬᠤ ᠪᠤᠶᠤ ᠲᠡᠳᠡᠨ ᠢ ᠤᠷᠤᠭᠤᠯᠵᠦ ᠠᠪᠬᠤ ᠭᠤᠤᠯ ᠭᠠᠵᠠᠷ ᠪᠤᠯᠤᠭᠰᠡᠨ᠃   ᠴᠢᠩ ᠤᠯᠤᠰ ᠤᠨ ᠨᠤᠶᠠᠷᠬᠠᠯ ᠦᠪᠦᠷ ᠮᠤᠩᠭᠤᠯ ᠳᠤ ᠲᠤᠭᠳᠠᠨᠢᠭᠰᠡᠨ ᠠᠴᠠ ᠮᠠᠨᠵᠦ ᠶᠢᠨ ᠰᠡᠴᠡᠨ ᠬᠠᠭᠠᠨ 1640 ᠤᠨ ᠳᠤ ᠬᠥᠬᠡᠬᠤᠲᠠ ᠶᠢᠨ ᠲᠦᠮᠡᠳ ᠤᠨ ᠡᠵᠡᠨ ᠭᠦᠯᠦᠭᠡ ᠴᠦᠬᠦᠷ ᠲᠤ ᠵᠠᠷᠯᠢᠭ ᠪᠠᠭᠤᠯᠭᠠᠨ᠂ ᠲᠦᠮᠡᠳ  ᠤᠨ ᠵᠡᠭᠦᠨ ᠪᠡᠷᠭᠤᠨ ᠬᠤᠶᠠᠷ ᠭᠠᠷ ᠠᠴᠠ ᠵᠠᠩᠬᠢ ᠯᠠᠪᠳᠠᠢ ᠪᠤᠯᠤᠨ ᠪᠤᠶᠠᠨᠳᠦ ᠶᠢ ᠲᠤᠰ ᠲᠤᠰ ᠭᠠᠷᠭᠠᠵᠦ᠂ ᠰᠦᠮ᠎ᠡ  ᠶᠢᠨ ᠲᠡᠮᠴᠢ ᠨᠠᠷ ᠲᠠᠢ ᠬᠠᠮᠳᠤᠷᠠᠭᠤᠯᠤᠨ ᠶᠡᠭᠡ ᠵᠤᠤ ᠶᠢ ᠬᠠᠮᠤᠭ ᠤᠨ ᠲᠡᠷᠢᠭᠦᠨ ᠳᠤ ᠶᠡᠬᠡᠳᠭᠡᠨ ᠵᠠᠰᠠᠭᠤᠯᠵᠦ᠂ ᠵᠠᠷᠯᠢᠭ ᠢᠶᠠᠷ ︽ᠴᠠᠭᠯᠠᠰᠢ ᠦᠭᠡᠢ ᠰᠦᠮ᠎ᠡ︾ ᠬᠡᠮᠡᠬᠦ ᠮᠠᠨᠵᠦ᠂ ᠮᠤᠩᠭᠤᠯ᠂ ᠬᠢᠳᠠᠳ ᠭᠤᠷᠪᠡᠨ ᠵᠦᠢᠯ ᠤᠨ ᠦᠰᠦᠭ ᠬᠠᠪᠰᠤᠷᠭᠠᠭᠰᠡᠨ ᠰᠦᠮ᠎ᠡ ᠶᠢᠨ ᠢᠯᠡᠷᠬᠡᠶᠢᠯᠡᠯ ᠱᠠᠩᠨᠠᠭᠠᠳ᠂ ᠪᠠᠰᠠ ︽ᠪᠤᠭᠳᠠ ᠡᠵᠡᠨ ᠲᠦᠮᠡᠨ ᠨᠠᠰᠤᠯᠠᠳᠤᠭᠠᠢ︾ ᠭᠡᠰᠡᠨ ᠠᠯᠳᠠᠨ ᠫᠠᠶᠢᠰᠠ ᠦᠢᠯᠡᠳᠴᠦ ᠶᠡᠭᠡ ᠵᠤᠤ ᠳᠤ ᠲᠤᠰᠢᠶᠠᠨ ᠦᠭᠴᠦ ᠲᠠᠬᠢᠭᠤᠯᠪᠠ᠃ 1652 ᠤᠨ ᠳᠤ ᠲᠠᠪᠤᠳᠤᠭᠠᠷ ᠲᠦᠷᠢ ᠶᠢᠨ ᠲᠠᠯᠠᠢ ᠯᠠᠮᠠ ᠯᠤᠪᠰᠠᠩᠵᠠᠮᠰᠦ ᠴᠢᠩ ᠤᠯᠤᠰ ᠤᠨ ᠡᠶᠡᠪᠡᠷ ᠵᠠᠰᠠᠭᠴᠢ ᠬᠠᠭᠠᠨ ᠤ ᠵᠠᠯᠠᠯᠭ᠎ᠠ  ᠪᠠᠷ ᠲᠦᠪᠡᠳ ᠠᠴᠠ ᠪᠡᠭᠡᠵᠢᠩ ᠳᠤ ᠢᠷᠡᠬᠦ ᠪᠤᠶᠤ ᠪᠤᠴᠠᠬᠤ ᠵᠠᠮ ᠳᠠᠭᠠᠨ ᠪᠦᠷ ᠬᠥᠬᠡᠬᠤᠲᠠ ᠶᠢ ᠲᠠᠭᠠᠷᠢᠵᠦ᠂ ᠲᠦᠮᠡᠳ ᠤᠨ ᠠᠯᠳᠠᠨ ᠬᠠᠭᠠᠨ ᠪᠤᠯᠤᠨ ᠰᠤᠳᠨᠠᠮᠵᠠᠮᠰᠦ ᠲᠠᠯᠠᠢ ᠯᠠᠮᠠ ᠶᠢᠨ ᠦᠶ᠎ᠡ ᠳᠤ ᠪᠠᠶᠢᠭᠤᠯᠤᠭᠰᠡᠨ ᠶᠡᠭᠡ ᠵᠤᠤ᠂ ᠰᠢᠷᠡᠭᠡᠳᠦ ᠵᠤᠤ ᠳᠤ ᠲᠢᠶᠡᠨ ᠤᠷᠤᠰᠢᠯ ᠠᠶᠢᠯᠠᠳᠤᠨ ᠴᠡᠴᠡᠭ ᠡᠷᠭᠦᠭᠡᠳ᠂ ᠠᠷᠤ ᠦᠪᠦᠷ ᠮᠤᠩᠭᠤᠯ ᠤᠨ ᠹᠸᠤᠳᠡᠯ ᠨᠤᠶᠠᠳ ᠲᠤ ᠮᠦᠷᠭᠦᠯ ᠲᠠᠯᠪᠢᠭᠰᠡᠨ᠃ ᠡᠶᠢᠨᠬᠦ᠂ ᠬᠥᠬᠡᠬᠤᠲᠠ ᠤᠷᠤᠨ ᠳᠤ ᠴᠢᠩ ᠤᠯᠤᠰ ᠤᠨ ᠡᠶᠡᠪᠡᠷ ᠵᠠᠰᠠᠭᠴᠢ ᠬᠠᠭᠠᠨ ᠤ ᠦᠶ᠎ᠡ ᠳᠤ ᠰᠦᠮ᠎ᠡ ᠬᠡᠶᠢᠳ ᠪᠠᠶᠢᠭᠤᠯᠬᠤ ᠠᠩᠬᠠᠳᠤᠭᠠᠷ ᠤᠳᠠᠭᠠᠨ ᠤ ᠦᠷᠨᠢᠯᠳᠠ ᠪᠤᠢ ᠪᠤᠯᠤᠭᠠᠳ᠂ ᠲᠠᠪᠤᠬᠠᠨ ᠵᠢᠯ ᠤᠨ ᠬᠤᠭᠤᠷᠤᠨᠳᠦ ᠭᠤᠷᠪᠡᠨ ᠬᠦᠷᠢᠶ᠎ᠡ ᠰᠦᠮ᠎ᠡ ᠨᠡᠮᠡᠵᠦ ᠪᠠᠶᠢᠭᠤᠯᠤᠭᠰᠡᠨ᠃ 1655 ᠤᠨ ᠳᠤ᠂ ᠬᠥᠬᠡᠬᠤᠲᠠ ᠶᠢᠨ ᠪᠠᠷᠭᠤᠨᠳᠠᠢ ᠵᠢᠷᠠᠨ ᠭᠠᠵᠠᠷ ᠬᠤᠯᠠ ᠪᠠᠶᠢᠭ᠎ᠠ ᠰᠢᠪᠠᠭᠤᠴᠢ ᠲᠤᠰᠬᠤᠨ ᠤ ᠠᠷᠤ ᠠᠭᠤᠯᠠᠨ ᠤ ᠦᠪᠦᠷ  ᠲᠤ ᠴᠠᠭᠠᠨ ᠲᠢᠶᠠᠨᠴᠢ ᠬᠤᠳᠤᠭᠳᠦ ᠠᠴᠠ ︽ᠨᠠᠰᠤᠳᠠ ᠠᠰᠠᠷᠠᠯᠳᠦ ᠰᠦᠮ᠎ᠡ︾ ᠶᠢ ᠪᠠᠶᠢᠭᠤᠯᠪᠠ᠃ ᠮᠦᠨ ᠤᠨ ᠳᠤ᠂ ᠬᠥᠬᠡᠬᠤᠲᠠ ᠶᠢᠨ ᠵᠡᠭᠦᠨ ᠬᠤᠶᠢᠳᠦ ᠵᠢᠷᠡᠨ ᠭᠠᠵᠠᠷ ᠲᠤ ᠡᠷᠳᠡᠨᠢ ᠲᠢᠶᠠᠨᠴᠢ ᠬᠤᠳᠤᠭᠳᠦ ᠪᠠᠷ ︽ᠪᠤᠶᠠᠨ ᠢ ᠮᠠᠨᠳᠤᠭᠤᠯᠤᠭᠴᠢ ᠰᠦᠮ᠎ᠡ︾ ᠶᠢ ᠪᠠᠶᠢᠭᠤᠯᠪᠠ᠃ ᠬᠥᠬᠡᠬᠤᠲᠠ ᠳᠤ ᠨᠡᠨ ᠰᠦᠮ᠎ᠡ ᠶᠢ ᠶᠡᠷᠤ ᠳᠡᠭᠡᠨ ᠵᠡᠭᠦᠨ ᠯᠠᠮᠠ ᠶᠢᠨ ᠠᠭᠤᠢ ᠰᠦᠮ᠎ᠡ ᠬᠡᠮᠡᠨ᠂ ᠠᠩᠬᠠᠨ ᠤ ᠪᠤᠭᠳᠠ ᠴᠠᠭᠠᠨ ᠯᠠᠮᠠ ᠶᠢᠨ ᠪᠢᠰᠢᠯᠭᠠᠯ ᠤᠨ ᠤᠷᠤᠨ ᠪᠠᠶᠢᠭᠰᠡᠨ ᠪᠠᠷᠭᠤᠨ ᠯᠠᠮᠠ  ᠶᠢᠨ ᠠᠭᠤᠢ ᠰᠦᠮ᠎ᠡ ᠠᠴᠠ ᠢᠯᠭᠠᠳᠠᠭ᠃ 1661 ᠤᠨ ᠳᠤ ᠯᠤᠪᠰᠠᠩᠵᠠᠮᠰᠦ ᠲᠠᠯᠠᠢ ᠯᠠᠮᠠ ᠶᠢᠨ ᠵᠠᠯᠠᠯᠭ᠎ᠠ ᠳᠤ ᠲᠡᠷᠢᠭᠦᠨ ᠤ ᠡᠯᠴᠢ ᠪᠠᠷ ᠶᠠᠪᠤᠭᠰᠡᠨ ᠰᠢᠷᠡᠪᠡ ᠯᠠᠮᠠ ᠬᠠᠷᠢᠭᠤᠴᠠᠨ᠂ ᠬᠥᠬᠡᠬᠤᠲᠠ ᠶᠢᠨ ᠬᠠᠭᠤᠴᠢᠨ ᠬᠤᠳᠠ ᠶᠢᠨ ᠪᠠᠷᠭᠤᠨᠳᠠᠢ ᠬᠤᠶᠠᠷ ᠭᠠᠵᠠᠷ ᠪᠠᠶᠢᠬᠤ ᠵᠠᠳᠠᠭᠠᠢ ᠭᠤᠤᠯ ᠤᠨ ᠡᠷᠭᠢ ᠲᠡᠭᠡᠷ᠎ᠡ ︽ᠦᠯᠵᠡᠢ ᠶᠢ ᠡᠷᠬᠢᠮ ᠪᠤᠯᠭᠠᠭᠴᠢ ᠰᠦᠮ᠎ᠡ︾ ᠶᠢ ᠪᠠᠶᠢᠭᠤᠯᠤᠭᠰᠡᠨ ᠪᠠᠶᠢᠨ᠎ᠡ᠃ ᠡᠨᠡᠬᠦ ᠰᠦᠮ᠎ᠡ ᠶᠢ ᠬᠤᠵᠢᠮ ᠨᠢ ᠰᠢᠷᠠᠪᠠ ᠯᠠᠮᠠ ᠶᠢᠨ ᠱᠠᠪᠢ ᠫᠤᠩᠰᠤᠭ ᠶᠡᠬᠡᠳᠭᠡᠨ ᠵᠠᠰᠠᠭᠰᠡᠨ ᠠᠴᠠ᠂ ᠲᠡᠭᠦᠨ ᠢ ᠶᠡᠷᠦᠨᠢ ᠫᠤᠩᠰᠤᠭ ᠵᠤᠤ ᠭᠡᠵᠦ ᠨᠡᠷᠡᠯᠡᠬᠦ ᠪᠤᠯᠵᠠᠢ᠃ ᠫᠤᠩᠰᠤᠭ ᠵᠤᠤ ᠳᠤ ᠵᠡᠭᠦᠭᠠᠷ ᠬᠠᠭᠠᠨᠳᠦ ᠤᠯᠤᠰ ᠤᠨ ᠭᠠᠯᠳᠠᠨ ᠪᠤᠱᠤᠭᠳᠦ ᠬᠠᠭᠠᠨ ᠢ ᠲᠡᠮᠵᠢᠵᠦ ᠪᠠᠶᠢᠭᠰᠡᠨ ᠢᠯᠠᠭᠤᠭᠰᠡᠨ ᠬᠤᠳᠤᠭᠳᠦ ᠰᠠᠭᠤᠵᠦ ᠪᠠᠶᠢᠪᠠ᠃ ᠬᠤᠵᠢᠮ᠂ ᠵᠠᠶᠠᠭᠠᠳᠠᠢ ᠨᠦᠬᠦᠷ ᠬᠤᠪᠢᠰᠬᠠᠯ ᠬᠢᠬᠦ ᠳᠡᠭᠡᠨ ᠮᠦᠨ ᠲᠤᠰ ᠰᠦᠮ᠎ᠡ ᠪᠠᠷ ᠰᠠᠭᠤᠷᠢᠨ ᠭᠠᠵᠠᠷ ᠪᠤᠯᠭᠠᠵᠦ ᠪᠠᠶᠢᠭᠰᠡᠨ᠃ ᠴᠢᠩ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠠᠴᠠ ᠡᠶᠡᠪᠡᠷ ᠵᠠᠰᠠᠭᠴᠢ ᠶᠢᠨ ᠦᠶ᠎ᠡ ᠳᠤ ᠲᠡᠭᠡᠷᠡᠬᠢ ᠭᠤᠷᠪᠠᠨ ᠰᠦᠮ᠎ᠡ ᠶᠢ ᠵᠦᠪᠰᠢᠶᠡᠷᠡᠨ ᠪᠠᠶᠢᠭᠤᠯᠤᠭᠰᠡᠨ ᠶᠠᠪᠤᠳᠠᠯ ᠨᠢ᠂ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠠᠷᠤ ᠬᠠᠯᠬ᠎ᠠ᠂ ᠤᠶᠢᠷᠠᠳ ᠮᠤᠩᠭᠤᠯ ᠬᠢᠭᠡᠳ ᠲᠦᠪᠡᠳ ᠤᠨ ᠬᠤᠭᠤᠷᠤᠨᠳᠤᠬᠢ ᠬᠠᠷᠢᠴᠠᠭᠠᠨ ᠳᠤ ᠯᠤᠳᠤ ᠶᠡᠭᠡ ᠦᠢᠯᠡᠳᠦᠯ ᠭᠠᠷᠭᠠᠭᠰᠡᠨ ᠪᠢᠯᠡ᠃   1661 ᠤᠨ ᠠᠴᠠ ᠬᠤᠶᠢᠰᠢ᠂ ᠴᠢᠩ ᠤᠯᠤᠰ ᠤᠨ ᠲᠦᠷᠦ ᠶᠢᠨ ᠶᠡᠭᠡ ᠡᠷᠬᠡ ᠶᠢ ᠪᠠᠷᠢᠭᠰᠡᠨ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠪᠤᠯᠤᠨ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠤ ᠬᠠᠭᠠᠨ ᠯᠤᠪᠰᠠᠩᠵᠠᠮᠰᠦ ᠲᠠᠯᠠᠢ ᠯᠠᠮᠠ ᠶᠢᠨ ᠬᠤᠭᠤᠷᠤᠨᠳᠦ ᠵᠦᠷᠢᠴᠡᠯ ᠡᠬᠢᠯᠡᠨ ᠡᠭᠦᠰᠦᠭᠰᠡᠨ᠃ ᠴᠢᠩ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠠᠴᠠ ᠬᠢᠳᠠᠳ ᠤᠨ ᠪᠢᠴᠢᠭ ᠤᠨ ᠰᠤᠷᠭᠠᠯᠳᠠᠨ ᠤ ᠠᠷᠭ᠎ᠠ ᠮᠡᠭᠡ ᠶᠢ ᠬᠡᠷᠡᠭᠯᠡᠵᠦ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠤ ᠬᠦᠴᠦ ᠶᠢ ᠰᠠᠯᠭᠠᠵᠦ᠂ ᠦᠪᠡᠷ ᠤᠨ ᠬᠦᠴᠦ  ᠪᠠᠨ ᠶᠡᠬᠡᠳᠭᠡᠬᠦ ᠶᠢᠨ ᠲᠦᠯᠦᠭᠡ᠂ ᠬᠦᠬᠡᠨᠠᠭᠤᠷ ᠲᠦᠪᠡᠳ ᠲᠤ ᠬᠤᠱᠤᠳ ᠤᠶᠢᠷᠠᠳ ᠤᠨ ᠬᠦᠤᠰᠢ ᠬᠠᠭᠠᠨ ᠤ ᠭᠤᠯ ᠤᠭᠰᠠᠭ᠎ᠠ ᠲᠦᠷᠦᠯ ᠤᠨ ᠨᠤᠶᠠᠳ ᠢ ᠲᠡᠮᠵᠢᠵᠦ᠂ ᠠᠷᠤ ᠮᠤᠩᠭᠤᠯ ᠳᠤ ᠵᠢᠪᠽᠤᠨᠳᠠᠮᠪᠠ ᠬᠤᠳᠤᠭᠳᠦ ᠶᠢ ᠲᠡᠮᠵᠢᠵᠦ᠂ ᠦᠪᠦᠷ ᠮᠤᠩᠭᠤᠯ ᠳᠤ ᠨᠠᠶᠢᠵᠢ ᠲᠤᠶᠢᠨ ᠢ ᠲᠡᠮᠵᠢᠵᠦ᠂ ᠪᠡᠭᠡᠵᠢᠩ ᠤᠨ ᠤᠯᠠᠨ ᠰᠦᠮ᠎ᠡ ᠶᠢᠨ ᠵᠠᠰᠠᠭ ᠵᠠᠬᠢᠷᠭᠠᠨ ᠢ ᠴᠢᠩᠭᠠᠳᠬᠠᠬᠤ ᠶᠢᠨ ᠵᠡᠷᠭᠡᠴᠡᠭᠡ ᠪᠠᠷ᠂ ᠬᠥᠬᠡᠬᠤᠲᠠ ᠳᠤ ᠰᠦᠮ᠎ᠡ ᠬᠡᠶᠢᠳ ᠪᠠᠶᠢᠭᠤᠯᠬᠤ ᠬᠤᠶᠠᠳᠤᠭᠠᠷ ᠤᠳᠠᠭᠠᠨ ᠤ ᠦᠷᠨᠢᠯᠳᠠ ᠭᠠᠷᠭᠠᠭᠰᠡᠨ᠃ ᠯᠤᠪᠰᠠᠩᠵᠠᠮᠰᠦ ᠲᠠᠯᠠᠢ ᠯᠠᠮᠠ1662 ᠤᠨ ᠳᠤ ᠵᠢᠪᠽᠤᠨᠳᠠᠮᠪᠠ ᠬᠤᠳᠤᠭᠳᠦ ᠶᠢᠨ ᠬᠦᠴᠦ ᠶᠢ ᠪᠠᠭᠠᠰᠬᠠᠬᠤ ᠵᠢᠴᠢ ᠵᠠᠰᠠᠭᠳᠦ ᠬᠠᠭᠠᠨ ᠳᠤ ᠱᠠᠰᠢᠨ ᠰᠤᠷᠳᠠᠬᠤᠨ ᠤ ᠲᠠᠯ᠎ᠠ ᠶᠢᠨ ᠲᠤᠰᠠᠯᠠᠮᠵᠢ ᠦᠵᠡᠭᠦᠯᠬᠦ  ᠪᠠᠷ ᠲᠦᠪᠡᠳ ᠠᠴᠠ ᠽᠠᠶ᠎ᠠ ᠪᠠᠨᠳᠢᠳᠠ ᠬᠤᠳᠤᠭᠳᠦ ᠶᠢ ᠵᠠᠮ ᠠᠴᠠ ᠨᠢ ᠦᠯᠡᠳᠡᠭᠡᠵᠦ᠂ ᠬᠥᠬᠡᠬᠤᠲᠠ ᠶᠢᠨ ᠵᠡᠭᠦᠨ ᠬᠤᠶᠢᠳᠦ ᠵᠠᠭᠤᠨ ᠭᠠᠵᠠᠷ ᠲᠠᠬᠢ ᠬᠠᠷᠠᠭᠴᠢᠨ ᠭᠤᠤ ᠶᠢᠨ ᠡᠬᠢ ᠵᠢᠷᠭᠠᠯᠠᠩᠳᠦ ᠠᠭᠤᠯᠠᠨ᠎ᠠ ︽ᠰᠠᠶᠢᠨ ᠢ ᠡᠷᠬᠢᠯᠡᠭᠴᠢ ᠰᠦᠮ᠎ᠡ︾ ᠶᠢ ᠪᠠᠶᠢᠭᠤᠯᠤᠨ ᠰᠠᠭᠤᠯᠭᠠᠪᠠ᠃ 1669 ᠤᠨ ᠳᠤ᠂ ᠬᠦᠬᠡ ᠬᠤᠳᠠᠨ᠎ᠡ ᠬᠠᠭᠤᠴᠢᠨ ᠬᠤᠳᠠ ᠶᠢᠨ ᠪᠠᠷᠭᠤᠨ ᠡᠮᠦᠨ᠎ᠡ ᠬᠤᠶᠠᠷ ᠭᠠᠵᠠᠷ ᠵᠠᠶᠢᠳᠠᠢ ︽ᠦᠯᠵᠡᠢ ᠶᠢ ᠬᠦᠨᠳᠦᠳᠭᠡᠭᠴᠢ ᠰᠦᠮ᠎ᠡ︾ ᠶᠢ ᠪᠠᠶᠢᠭᠤᠯᠵᠦ᠂ ᠤᠮᠪᠤ ᠵᠠᠮᠰᠠ ᠶᠢᠨ ᠬᠤᠪᠢᠯᠭᠠᠨ ᠢᠶᠠᠷ ᠡᠷᠬᠢᠯᠡᠭᠦᠯᠪᠡ᠃ 1685 ᠤᠨ ᠳᠤ᠂ ᠬᠤᠱᠤᠳ ᠤᠨ ᠬᠦᠤᠰᠢ ᠬᠠᠭᠠᠨ ᠤ ᠤᠭᠰᠠᠭ᠎ᠠ ᠲᠦᠷᠦᠯ ᠪᠤᠯᠬᠤ ᠬᠤᠶᠠᠳᠤᠭᠠᠷ ᠲᠦᠷᠢ ᠶᠢᠨ ᠢᠯᠭᠤᠭᠰᠡᠨ ᠬᠤᠳᠤᠭᠳᠦ ᠶᠢ ᠵᠠᠯᠠᠵᠦ ᠬᠥᠬᠡᠬᠤᠲᠠ ᠶᠢᠨ ᠪᠦᠭᠦᠳᠠ ᠯᠠᠮᠠ ᠪᠠᠨᠳᠢ ᠨᠠᠷ ᠢ ᠵᠠᠬᠢᠷᠤᠭᠴᠢ ᠵᠠᠰᠠᠭ ᠯᠠᠮᠠ ᠲᠠᠯᠪᠢᠭᠠᠳ᠂ ᠫᠤᠩᠰᠤᠭ ᠵᠤᠤ ᠳᠤ ᠰᠠᠭᠤᠯᠭᠠᠨ ᠲᠦᠪᠡᠳ ᠮᠤᠩᠭᠤᠯ ᠤᠨ ᠬᠡᠷᠡᠭ ᠶᠠᠪᠤᠳᠠᠯ ᠤᠨ ᠴᠢᠮᠡᠭᠡ ᠶᠢ ᠲᠠᠮᠵᠢᠭᠤᠯᠬᠤ ᠨᠢᠳᠦ ᠴᠢᠬᠢ ᠪᠤᠯᠭᠠᠨ ᠲᠠᠩᠨᠠᠭᠤᠯ ᠤᠨ ᠠᠵᠢᠯ ᠬᠢᠯᠭᠡᠬᠦ ᠪᠠᠷ ᠭᠤᠷᠢᠳᠠᠪᠠ᠃ ᠭᠡᠳᠡᠯ᠎ᠡ᠂ ᠬᠤᠶᠠᠳᠤᠭᠠᠷ ᠲᠦᠷᠢ ᠶᠢᠨ ᠢᠯᠭᠤᠭᠰᠡᠨ ᠬᠤᠳᠤᠭᠳᠦ ᠮᠠᠨᠵᠦ ᠬᠠᠭᠠᠨ ᠤ ᠴᠠᠭᠳᠠᠭ᠎ᠠ ᠲᠠᠩᠨᠠᠭᠤᠯ ᠪᠤᠯᠤᠭᠰᠡᠨ ᠦᠭᠡᠢ ᠮᠦᠷᠳᠡᠭᠡᠨ᠂ ᠴᠢᠩ ᠤᠯᠤᠰ ᠪᠤᠯᠤᠨ ᠵᠡᠭᠦᠭᠠᠷ ᠬᠠᠭᠠᠨᠳᠦ ᠤᠯᠤᠰ ᠬᠤᠶᠠᠷ ᠤᠨ ᠲᠠᠶᠢᠨ ᠤ ᠶᠠᠪᠤᠴᠠ ᠳᠤ ᠭᠠᠯᠳᠠᠨ ᠪᠤᠱᠤᠭᠳᠦ ᠬᠠᠭᠠᠨ ᠤ ᠲᠠᠯ᠎ᠠ ᠳᠤ ᠵᠤᠭᠰᠤᠵᠦ᠂ ᠴᠢᠩ ᠤᠯᠤᠰ ᠤᠨ ᠡᠩᠭᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠢ ᠨᠢᠭᠡᠨ ᠦᠶ᠎ᠡ ᠪᠤᠳᠤᠯ ᠠᠯᠳᠠᠭᠤᠯᠵᠦ ᠰᠠᠨᠳᠤᠷᠭᠠᠭᠰᠡᠨ ᠪᠢᠯᠠ᠃ ᠨᠠᠨ ᠲᠤᠬᠠᠢ ᠬᠥᠬᠡᠬᠤᠲᠠ  ᠶᠢᠨ ᠲᠦᠮᠡᠳ ᠮᠤᠩᠭᠤᠯᠴᠤᠳ ᠤᠨ ᠲᠤᠮᠳᠠ᠂ ᠬᠤᠶᠠᠳᠤᠭᠠᠷ ᠲᠦᠷᠢ ᠶᠢᠨ ᠢᠯᠠᠭᠤᠭᠰᠡᠨ ᠬᠤᠳᠤᠭᠳᠦ ᠶᠢ ᠮᠠᠭᠳᠠᠨ ᠲᠠᠭᠤᠯᠠᠭᠰᠡᠨ ᠡᠳᠦᠢ ᠲᠡᠳᠦᠢ ᠤᠯᠠᠮᠵᠢᠯᠠᠯ ᠶᠠᠷᠢᠶ᠎ᠡ ᠪᠤᠢ᠃ ᠲᠡᠷᠡ ᠦᠶ᠎ᠡ ᠳᠤ᠂ ᠡᠩᠭᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠠᠷᠭ᠎ᠠ ᠪᠤᠰᠤ ︽ᠦᠯᠵᠠᠢ ᠶᠢ ᠡᠷᠬᠢᠮ ᠪᠤᠯᠭᠠᠭᠴᠢ ᠰᠦᠮ᠎ᠡ︾ ᠳᠤ ᠰᠠᠭᠤᠵᠦ ᠪᠠᠶᠢᠭᠰᠡᠨ ᠫᠤᠩᠰᠤᠭ ᠯᠠᠮᠠ ᠪᠠᠷ ᠬᠤᠶᠠᠳᠤᠭᠠᠷ ᠲᠦᠷᠢ ᠶᠢᠨ ᠢᠯᠠᠭᠤᠭᠰᠡᠨ ᠬᠤᠳᠤᠭᠳᠦ ᠶᠢᠨ ᠲᠤᠰᠢᠶᠠᠯ ᠢ ᠲᠦᠷ ᠵᠠᠭᠤᠷ᠎ᠠ ᠤᠷᠤᠯᠠᠭᠤᠯᠵᠦ᠂ 1696 ᠤᠨ ᠪᠤᠯᠤᠨ 1697 ᠤᠨ ᠳᠤ ᠭᠠᠯᠳᠠᠨ ᠪᠤᠱᠤᠭᠳᠦ ᠬᠠᠭᠠᠨ ᠢ ᠲᠠᠶᠢᠯᠠᠬᠤ ᠳᠠᠭᠠᠨ ᠪᠡᠶ᠎ᠡ ᠪᠠᠷ ᠢᠶᠠᠨ ᠬᠦᠬᠡ ᠬᠤᠳᠠᠨ᠎ᠡ ᠬᠤᠶᠠᠷ ᠤᠳᠠᠭ᠎ᠠ ᠢᠷᠡᠵᠦ ᠬᠤᠶᠠᠳᠤᠭᠠᠷ ᠲᠦᠷᠢ ᠶᠢᠨ ᠨᠠᠶᠢᠵᠢ ᠲᠤᠶᠢᠨ ᠤ ᠡᠷᠬᠢᠯᠡᠭᠰᠡᠨ ᠪᠠᠭ᠎ᠠ ᠵᠤᠤ ᠳᠤ ᠪᠠᠭᠤᠭᠠᠳ ᠡᠮᠦᠰᠦᠭᠰᠡᠨ ᠬᠤᠶᠠᠭ ᠲᠤᠭᠤᠯᠭ᠎ᠠ ᠪᠠᠨ ᠦᠯᠡᠳᠡᠭᠡᠨ ᠲᠠᠬᠢᠭᠤᠯᠵᠦ᠂ ᠬᠤᠶᠠᠳᠤᠭᠠᠷ ᠲᠦᠷᠢ ᠶᠢᠨ ᠨᠠᠶᠢᠵᠢ ᠲᠤᠶᠢᠨ ᠬᠤᠳᠤᠭᠳᠦ ᠶᠢ ᠵᠢᠩᠬᠢᠨᠢ ᠪᠠᠷ ᠬᠥᠬᠡᠬᠤᠲᠠ ᠶᠢᠨ ᠪᠦᠭᠦᠳᠡ ᠪᠠᠯᠮ᠎ᠠ ᠪᠠᠨᠳᠢ ᠨᠠᠷ ᠢ ᠵᠠᠬᠢᠷᠤᠭᠴᠢ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠪᠠᠯᠮ᠎ᠠ ᠲᠠᠯᠪᠢᠵᠦ ᠬᠥᠬᠡᠬᠤᠲᠠ ᠶᠢᠨ ᠤᠯᠠᠨ ᠰᠦᠮ᠎ᠡ ᠳᠤ ᠤᠳᠠᠭ᠎ᠠ ᠲᠠᠷᠠᠭᠠᠯᠠᠨ ᠢᠯᠡᠷᠬᠡᠶᠢᠯᠡᠯ ᠨᠡᠷ᠎ᠡ ᠬᠠᠶᠢᠷᠠᠯᠠᠨ ᠱᠠᠩᠨᠠᠵᠠᠢ᠃ ᠭᠠᠯᠰᠠᠩᠵᠠᠮᠰᠦ ᠲᠠᠯᠠᠢ ᠯᠠᠮᠠ ᠶᠢ ᠲᠦᠪᠡᠳ ᠲᠤ ᠬᠦᠷᠭᠡᠵᠦ ᠲᠦᠪᠡᠳ ᠠᠴᠠ ᠵᠡᠭᠦᠭᠠᠷ ᠬᠠᠭᠠᠨᠳᠦ ᠤᠯᠤᠰ ᠤᠨ ᠴᠡᠷᠢᠭ ᠢ ᠦᠯᠳᠠᠨ ᠬᠦᠭᠡᠭᠡᠭᠰᠡ 1722 ᠤᠨ ᠳᠤ᠂ ᠬᠦᠬᠡ ᠬᠤᠳᠠᠨ᠎ᠡ ︽ᠪᠤᠶᠠᠨ ᠢ ᠡᠩᠭᠡᠵᠢᠭᠦᠯᠦᠭᠴᠢ ᠰᠦᠮ᠎ᠡ︾ ᠶᠢ ᠪᠠᠶᠢᠭᠤᠯᠪᠠ᠃ ᠡᠶᠢᠨᠬᠦ᠂ ᠴᠢᠩ ᠤᠯᠤᠰ ᠤᠨ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ ᠦᠶ᠎ᠡ ᠳᠤ ᠬᠦᠬᠡ ᠬᠤᠳᠠᠨ᠎ᠡ ᠤᠷᠢᠳ ᠬᠤᠵᠢᠳ ︽ᠰᠠᠶᠢᠨ ᠢ ᠡᠷᠬᠢᠯᠡᠭᠴᠢ ᠰᠦᠮ᠎ᠡ︾᠂ ︽ᠦᠯᠵᠡᠢ ᠶᠢ ᠬᠦᠨᠳᠦᠳᠭᠡᠭᠴᠢ ᠰᠦᠮ᠎ᠡ︾᠂ ︽ᠶᠡᠭᠡ ᠪᠠᠶᠠᠰᠬᠤᠯᠠᠩᠳᠦ ᠰᠦᠮ᠎ᠡ︾᠂ ︽ᠪᠤᠶᠠᠨ ᠢ ᠡᠩᠬᠡᠵᠢᠭᠦᠯᠦᠭᠴᠢ ᠰᠦᠮ᠎ᠡ︾ ᠵᠡᠷᠭᠡ ᠲᠦᠷᠪᠡᠨ ᠬᠦᠷᠢᠶ᠎ᠡ ᠰᠦᠮ᠎ᠡ ᠪᠤᠯᠤᠨ ᠤᠰᠤᠳᠤ ᠶᠢᠨ ᠵᠡᠭᠦᠨ ᠵᠤᠤ᠂ ᠴᠠᠭᠠᠨ ᠬᠠᠳᠠ ᠶᠢᠨ ᠵᠤᠤ᠂ ᠴᠤᠷᠵᠢ ᠶᠢᠨ ᠵᠤᠤ᠂ ᠯᠢᠰᠦ ᠶᠢᠨ ᠵᠤᠤ ᠮᠡᠳᠦ ᠶᠢᠨ ᠲᠠᠪᠤᠨ ᠬᠠᠷᠢᠶᠠᠳᠦ ᠰᠦᠮ᠎ᠡ ᠶᠢ ᠪᠠᠶᠢᠭᠤᠯᠤᠭᠰᠡᠨ᠃ 1722 ᠤᠨ ᠳᠤ ᠴᠢᠩ ᠤᠯᠤᠰ ᠬᠡᠳᠦᠶᠢᠪᠡᠷ ᠲᠦᠪᠡᠳ ᠢ ᠡᠵᠡᠯᠡᠵᠦ ᠭᠠᠯᠰᠠᠩᠵᠠᠮᠰᠦ ᠲᠠᠯᠠᠢ ᠪᠠᠯᠮ᠎ᠠ ᠶᠢ ᠰᠢᠷᠡᠭᠡᠨ  ᠳᠤ ᠰᠠᠭᠤᠯᠭᠠᠨ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠢ ᠡᠷᠬᠡᠨ ᠳᠡᠭᠡᠨ ᠤᠷᠤᠭᠤᠯᠤᠭᠰᠡᠨ ᠪᠤᠯᠪᠠᠴᠦ᠂ ᠦᠨᠳᠦᠰᠦᠳᠠᠨ ᠤ ᠲᠠᠷᠤᠯᠠᠯ ᠢ ᠡᠰᠡᠷᠭᠦᠴᠡᠭᠰᠡᠨ ᠮᠤᠩᠭᠤᠯ ᠤᠨ ᠠᠷᠠᠳ ᠲᠦᠮᠡᠨ ᠤ ᠰᠢᠳᠤᠷᠭᠤ ᠲᠡᠮᠡᠴᠡᠯ ᠢ ᠪᠦᠷᠢᠮᠦᠰᠦᠨ ᠤᠰᠠᠳᠬᠠᠵᠦ ᠴᠢᠳᠠᠭᠰᠡᠨ ᠦᠭᠡᠢ᠃ ᠨᠠᠶᠢᠷᠠᠯᠳᠦ ᠲᠦᠪ ᠤᠨ ᠦᠶ᠎ᠡ ᠳᠤ᠂ ᠴᠢᠩ ᠤᠯᠤᠰ ᠤᠨ ᠴᠡᠷᠢᠭ ᠭᠤᠪᠢ ᠶᠢᠨ ᠠᠷᠤ ᠶᠢᠨ ᠬᠠᠯᠬ᠎ᠠ ᠶᠢᠨ ᠪᠠᠷᠭᠤᠨ ᠵᠠᠬ᠎ᠠ ᠶᠢᠨ ᠬᠤᠳᠤᠩ ᠬᠤᠷᠠᠭ᠎ᠠ ᠨᠠᠭᠤᠷ ᠲᠤ ᠵᠡᠭᠦᠭᠠᠷ ᠬᠠᠭᠠᠨᠳᠦ ᠤᠯᠤᠰ ᠤᠨ ᠴᠡᠷᠢᠭ ᠲᠤ ᠶᠡᠬᠡᠪᠡᠷ ᠢᠯᠠᠭᠳᠠᠭᠰᠡᠨ ᠪᠦᠭᠡᠳ ᠲᠠᠶᠢᠨ ᠤ ᠡᠮᠦᠨ᠎ᠡ ᠹᠠᠷᠤᠨᠲ ᠠᠴᠠ ᠲᠤᠳᠠᠭᠠᠨ ᠪᠤᠷᠤᠭᠤᠯᠬᠤ ᠮᠤᠩᠭᠤᠯ ᠴᠡᠷᠢᠭ ᠤᠳ ᠤᠨ ᠲᠤᠭ᠎ᠠ ᠴᠦ ᠡᠳᠦᠷ ᠠᠴᠠ ᠡᠳᠦᠷ ᠤᠯᠠᠰᠢᠷᠠᠭᠰᠡᠨ ᠪᠠᠶᠢᠨ᠎ᠡ᠃ ᠡᠭᠦᠨ ᠠᠴᠠ ᠪᠤᠯᠵᠦ᠂ ᠴᠢᠩ ᠤᠯᠤᠰ ᠤᠨ ᠨᠠᠶᠢᠷᠠᠯᠳᠦ ᠲᠦᠪ ᠬᠠᠭᠠᠨ ᠤ ᠵᠠᠷᠯᠢᠭ ᠢᠶᠠᠷ ᠬᠥᠬᠡᠬᠤᠲᠠ ᠠᠴᠠ ᠬᠡᠳᠦᠨ ᠮᠢᠩᠭᠠᠨ ᠭᠠᠵᠠᠷ ᠬᠤᠯᠠ ᠪᠠᠶᠢᠬᠤ ᠠᠷᠤ ᠮᠤᠩᠭᠤᠯ ᠠᠴᠠ ᠦᠪᠦᠷ ᠮᠤᠩᠭᠤᠯ ᠳᠤ ᠢᠷᠡᠬᠦ ᠳᠤ ᠡᠷᠬᠡᠪᠡᠰᠢ ᠲᠠᠭᠠᠷᠢᠬᠤ ᠠᠯᠳᠠᠢ ᠶᠢᠨ ᠴᠡᠷᠢᠭ ᠤᠨ ᠵᠠᠮ ᠤᠨ ᠲᠤᠯᠢ ᠪᠤᠯᠠᠭ ᠦᠷᠳᠡᠭᠡᠨ ᠳᠤ ︽ᠦᠷᠦᠰᠢᠶᠡᠨ ᠠᠪᠤᠷᠠᠭᠴᠢ ᠰᠦᠮ᠎ᠡ︾ ᠶᠢ ᠪᠠᠶᠢᠭᠤᠯᠵᠦ ᠨᠢᠳᠦ ᠴᠢᠬᠢ ᠪᠤᠯᠭᠠᠭᠠᠳ᠂ ᠬᠥᠬᠡᠬᠤᠲᠠ  ᠠᠴᠠ ᠯᠠᠮᠠ ᠲᠤᠮᠢᠯᠠᠨ ᠰᠠᠭᠤᠯᠭᠠᠵᠦ᠂ ᠲᠡᠳᠡᠨ ᠢ ᠮᠦᠨ ᠬᠥᠬᠡᠬᠤᠲᠠ ᠶᠢᠨ ᠪᠦᠭᠦᠳᠠ ᠯᠠᠮᠠ ᠪᠠᠨᠳᠢ ᠨᠠᠷ ᠢ ᠵᠠᠬᠢᠷᠤᠭᠴᠢ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠶᠢᠨ ᠲᠠᠮᠠᠭᠠᠨ ᠭᠠᠵᠠᠷ ᠲᠤ ᠲᠤᠰᠢᠶᠠᠨ ᠵᠠᠬᠢᠷᠤᠭᠤᠯᠵᠠᠢ᠃ ᠲᠡᠭᠷᠢ ᠲᠡᠳᠭᠦᠭᠴᠢ ᠬᠠᠭᠠᠨ  ᠠᠴᠠ ᠤᠶᠢᠷᠠᠳ ᠤᠨ ᠠᠷᠠᠳ ᠲᠦᠮᠡᠨ ᠢ ᠬᠠᠷᠬᠢᠰ ᠬᠡᠷᠴᠡᠭᠡᠢ ᠪᠠᠷ ᠬᠢᠳᠤᠨ ᠠᠯᠠᠭᠰᠡᠨ ᠶᠠᠪᠤᠳᠠᠯ ᠨᠢ ᠠᠷᠤ ᠦᠪᠦᠷ ᠮᠤᠩᠭᠤᠯ ᠤᠨ ᠠᠷᠠᠳ ᠲᠦᠮᠡᠨ ᠤ ᠬᠢᠯᠢᠩ ᠬᠤᠷᠤᠰᠤᠯ ᠢ ᠨᠡᠩ ᠢᠯᠡᠭᠦᠤ ᠲᠡᠭᠳᠡᠭᠡᠭᠰᠡᠨ᠃ ᠡᠶᠢᠮᠦ ᠪᠠᠶᠢᠳᠠᠯ ᠲᠤᠤᠷ᠎ᠠ᠂ ᠴᠢᠩ ᠤᠯᠤᠰ ᠨᠢᠭᠡᠨᠳᠡᠭᠡᠭᠦᠷ ᠵᠠᠩᠵᠤᠨ ᠬᠤᠳᠤᠭᠳᠦ ᠮᠡᠳᠦ ᠶᠢᠨ ᠰᠢᠷ᠎ᠡ ᠶᠢᠨ ᠱᠠᠰᠢᠨ ᠤ ᠬᠤᠳᠤᠭᠳᠦ ᠬᠤᠪᠢᠯᠭᠠᠳ ᠢ ᠠᠰᠢᠭᠯᠡᠨ ᠮᠤᠩᠭᠤᠯ ᠤᠨ ᠠᠷᠠᠳ ᠲᠦᠮᠡᠨ ᠤ ᠲᠡᠮᠡᠴᠡᠯ ᠤᠨ ᠵᠤᠷᠢᠭ ᠰᠠᠨᠠᠭ᠎ᠠ ᠶᠢ ᠮᠤᠩᠬᠠᠷᠠᠭᠤᠯᠵᠦ᠂ ᠨᠦᠭᠦᠭᠡᠳᠡᠭᠡᠭᠦᠷ ᠮᠤᠩᠭᠤᠯ ᠭᠠᠷᠤᠯᠳᠠᠢ ᠬᠤᠳᠤᠭᠳᠦ ᠬᠤᠪᠢᠯᠭᠠᠳ ᠢ ᠴᠦ ᠪᠤᠯᠭᠤᠮᠵᠢᠯᠠᠨ ᠰᠡᠵᠢᠭᠯᠡᠬᠦ ᠪᠤᠯᠵᠠᠢ᠃ 1765 ᠤᠨ ᠳᠤ ᠲᠡᠭᠷᠢ ᠲᠡᠳᠭᠦᠭᠴᠢ ᠬᠠᠭᠠᠨ ᠬᠦᠬᠡ ᠬᠤᠳᠠᠨ᠎ᠡ ᠶᠡᠬᠡᠳᠭᠡᠨ ᠪᠠᠶᠢᠭᠤᠯᠤᠭᠰᠡᠨ ︽ᠪᠤᠶᠠᠨ ᠢ ᠲᠡᠯᠭᠡᠷᠡᠭᠦᠯᠦᠭᠴᠢ ᠰᠦᠮ᠎ᠡ︾ ᠳᠤ ᠢᠯᠡᠷᠬᠡᠶᠢᠯᠡᠯ ᠱᠠᠩᠨᠠᠨ᠂ ᠦᠪᠡᠷ ᠤᠨ ᠰᠢᠳᠤᠷᠭᠤ ᠵᠠᠷᠤᠴᠠ ᠵᠠᠩᠵᠤᠨ ᠬᠤᠳᠤᠭᠳᠦ ᠳᠤ ᠮᠤᠩᠭᠤᠯᠴᠤᠳ ᠢ ᠴᠠᠭᠳᠠᠨ ᠲᠠᠩᠨᠠᠬᠤ ᠡᠭᠦᠷᠭᠡ ᠲᠤᠰᠢᠶᠠᠭᠰᠡᠨ᠃ ᠬᠥᠬᠡᠬᠤᠲᠠ ᠶᠢᠨ ᠠᠷᠪᠠᠨ ᠲᠠᠪᠤᠨ ᠬᠦᠷᠢᠶ᠎ᠡ ᠰᠦᠮ᠎ᠡ ᠶᠢᠨ ᠲᠤᠳᠤᠷ᠎ᠡ  ᠠᠴᠠ ᠨᠠᠶᠢᠷᠠᠯᠳᠦ ᠲᠦᠪ ᠬᠠᠭᠠᠨ᠂ ᠲᠡᠭᠷᠢ ᠲᠡᠳᠭᠦᠭᠴᠢ ᠬᠠᠭᠠᠨ ᠤ ᠨᠡᠷ᠎ᠡ ᠱᠠᠩᠨᠠᠭᠰᠠᠨ ︽ᠦᠷᠦᠰᠢᠶᠠᠨ ᠠᠪᠤᠷᠠᠭᠴᠢ ᠰᠦᠮ᠎ᠡ︾ ᠪᠡ ︽ᠪᠤᠶᠠᠨ ᠢ ᠲᠠᠯᠭᠡᠷᠡᠭᠦᠯᠦᠭᠴᠢ ᠰᠦᠮ᠎ᠡ︾ ᠪᠤᠯ ᠤᠯᠤᠰ ᠲᠦᠷᠦ ᠶᠢᠨ ᠤᠨᠴᠠᠭᠠᠢ ᠡᠭᠦᠷᠭᠡ ᠲᠠᠢ ᠶᠤᠮ ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠡ᠂ ᠨᠠᠶᠢᠷᠠᠯᠳᠦ ᠲᠦᠪ ᠪᠠ ᠲᠡᠭᠷᠢ ᠲᠡᠳᠭᠦᠭᠴᠢ ᠶᠢᠨ ᠦᠶ᠎ᠡ ᠳᠤ ᠬᠥᠬᠡᠬᠤᠲᠠ ᠶᠢᠨ ᠪᠦᠭᠦᠳᠠ ᠯᠠᠮᠠ ᠪᠠᠨᠳᠢ ᠨᠠᠷ ᠢ ᠵᠠᠬᠢᠷᠤᠭᠴᠢ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠶᠢᠨ ᠵᠠᠬᠢᠷᠭᠠᠨ ᠲᠤᠤᠷᠡᠬᠢ ᠰᠢᠷ᠎ᠡ ᠮᠦᠷᠡᠨ ᠵᠤᠤ᠂ ᠲᠠᠪᠤᠨ ᠰᠤᠪᠤᠷᠭ᠎ᠠ᠂ ᠲᠠᠶᠢᠬ᠎ᠠ ᠶᠢᠨ ᠰᠦᠮ᠎ᠡ᠂ ᠯᠡᠸ᠋ᠷᠡᠮᠪᠠ ᠶᠢᠨ ᠵᠤᠤ᠂ ᠲᠠᠩᠨᠤᠰᠳᠠᠢ ᠶᠢᠨ ᠰᠦᠮ᠎ᠡ ᠵᠡᠷᠭᠡ ᠲᠠᠪᠤᠨ ᠬᠠᠷᠢᠶᠠᠳᠦ ᠰᠦᠮ᠎ᠡ ᠶᠢ ᠪᠠᠶᠢᠭᠤᠯᠵᠠᠢ᠃ ᠡᠳᠡᠭᠡᠷ ᠤᠨ ᠲᠤᠳᠤᠷ᠎ᠠ ᠠᠴᠠ ᠨᠠᠶᠢᠵᠢ ᠲᠤᠶᠢᠨ ᠤ ᠠᠩᠬᠠᠳᠤᠭᠠᠷ ᠲᠦᠷᠢ  ᠶᠢᠨ ᠪᠢᠰᠢᠯᠭᠠᠯ ᠤᠨ ᠤᠷᠤᠨ ᠮᠠᠭᠠᠳ ᠴᠠᠭᠠᠨ ᠬᠡᠶᠢᠳ ᠤᠨ ᠤᠶᠢᠷᠠᠯᠴᠠᠭ᠎ᠠ ᠪᠠᠭ᠎ᠠ ᠵᠤᠤ ᠶᠢᠨ ᠬᠠᠷᠢᠶᠠᠳᠦ ᠰᠦᠮ᠎ᠡ ᠪᠤᠯᠬᠤ ᠲᠠᠩᠨᠤᠰᠳᠠᠢ ᠶᠢᠨ ᠰᠦᠮ᠎ᠡ ᠶᠢ ᠪᠠᠶᠢᠭᠤᠯᠤᠭᠰᠡᠨ ᠴᠤᠬᠤᠮ ᠴᠠᠭ ᠬᠤᠭᠤᠴᠠᠭ᠎ᠠ ᠨᠢ ᠤᠳᠤᠬᠠᠨ ᠳᠠᠭᠠᠨ ᠲᠤᠳᠤᠷᠬᠠᠢ ᠦᠭᠡᠢ ᠪᠠᠶᠢᠨ᠎ᠡ᠃ ᠡᠳᠡᠭᠡᠷ ᠢ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠳᠠᠬᠢ ᠬᠥᠬᠡᠬᠤᠲᠠ ᠶᠢᠨ ᠰᠦᠮ᠎ᠡ ᠬᠡᠶᠢᠳ ᠢ ᠪᠠᠶᠢᠭᠤᠯᠤᠭᠰᠡᠨ ᠭᠤᠷᠪᠠᠳᠤᠭᠠᠷ ᠤᠳᠠᠭ᠎ᠠ ᠶᠢᠨ᠂ ᠦᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ ᠬᠠᠮᠤᠭ ᠰᠡᠭᠦᠯᠴᠢ ᠶᠢᠨ ᠦᠷᠨᠢᠯᠳᠠ ᠭᠡᠵᠦ ᠬᠡᠯᠡᠵᠦ ᠪᠤᠯᠤᠨ᠎ᠡ᠃ ᠡᠭᠦᠨ ᠠᠴᠠ ᠬᠤᠶᠢᠰᠢ᠂ ᠤᠨᠴᠠᠭᠠᠶᠢᠯᠠᠨ 1840 ᠤᠨ ᠤ ᠬᠠᠷ᠎ᠠ ᠲᠠᠮᠠᠬᠢ ᠶᠢᠨ ᠲᠠᠶᠢᠨ ᠤ ᠲᠠᠷᠠᠭ᠎ᠠ᠂ ᠬᠥᠬᠡᠬᠤᠲᠠ ᠳᠤ ᠰᠢᠨ᠎ᠡ ᠰᠦᠮ᠎ᠡ ᠨᠡᠮᠡᠵᠦ ᠪᠠᠶᠢᠭᠤᠯᠬᠤ ᠪᠠᠶᠢᠳᠤᠭᠠᠢ᠂ ᠦᠩᠭᠡᠷᠡᠭᠰᠡᠨ ᠤ ᠪᠠᠶᠢᠭᠤᠯᠤᠭᠰᠡᠨ ᠰᠦᠮ᠎ᠡ ᠨᠦᠭᠦᠳ ᠨᠢ ᠴᠦ ᠴᠢᠩ ᠤᠯᠤᠰ ᠤᠨ ᠲᠤᠷᠤᠶᠢᠳᠠᠯ ᠪᠠ ᠮᠤᠩᠭᠤᠯ ᠤᠨ ᠤᠯᠠᠨ ᠬᠤᠰᠢᠭᠤ ᠴᠢᠭᠤᠯᠭᠠᠨ ᠤ ᠶᠠᠳᠠᠭᠤᠷᠠᠯ ᠢ ᠲᠠᠭᠠᠯᠳᠤᠨ ᠠᠭᠠᠵᠢᠮ ᠢᠶᠠᠷ ᠲᠤᠷᠤᠶᠢᠳᠠᠯ ᠤᠨ ᠵᠠᠮ ᠳᠠᠭᠠᠨ ᠤᠷᠤᠵᠠᠢ᠃   ᠴᠢᠩ ᠤᠯᠤᠰ ᠤᠨ ᠲᠤᠮᠳᠠᠴᠢ ᠦᠶ᠎ᠡ ᠪᠤᠯᠤᠭᠠᠳ᠂ ᠠᠷᠤ ᠮᠤᠩᠭᠤᠯ ᠤᠨ ᠬᠢᠯᠢ ᠲᠤᠳᠤᠷᠠᠬᠢ ᠲᠤᠯᠢ ᠪᠤᠯᠠᠭ ᠤᠨ ᠦᠷᠦᠰᠢᠶᠠᠨ ᠠᠪᠤᠷᠠᠭᠴᠢ ᠰᠦᠮ᠎ᠡ ᠠᠴᠠ ᠭᠠᠳᠠᠨ᠎ᠡ᠂ ᠬᠥᠬᠡᠬᠤᠲᠠ ᠤᠷᠤᠨ ᠳᠤ ᠪᠠᠶᠢᠭᠤᠯᠤᠭᠰᠡᠨ ᠮᠤᠩᠭᠤᠯ ᠤᠶᠢᠷᠠᠳ ᠬᠤᠶᠠᠷ ᠦᠶ᠎ᠡ ᠶᠢᠨ ᠵᠢᠷᠭᠤᠭᠠᠨ ᠰᠦᠮ᠎ᠡ᠂ ᠴᠢᠩ ᠤᠯᠤᠰ ᠤᠨ ᠡᠶᠡᠪᠡᠷ ᠵᠠᠰᠠᠭᠴᠢ ᠶᠢᠨ ᠭᠤᠷᠪᠠᠨ ᠰᠦᠮ᠎ᠡ ᠂ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠦᠶ᠎ᠡ ᠶᠢᠨ ᠲᠦᠷᠪᠡᠨ ᠰᠦᠮ᠎ᠡ᠂ ᠲᠡᠭᠷᠢ ᠲᠡᠳᠭᠦᠭᠴᠢ ᠶᠢᠨ ᠦᠶ᠎ᠡ ᠶᠢᠨ ᠨᠢᠭᠡ ᠰᠦᠮ᠎ᠡ ᠶᠢ ᠬᠠᠮᠳᠤᠷᠠᠭᠤᠯᠤᠨ ᠬᠥᠬᠡᠬᠤᠲᠠ ᠶᠢᠨ ᠠᠷᠪᠠᠨ ᠲᠦᠷᠪᠡᠨ ᠬᠦᠷᠢᠶ᠎ᠡ ᠰᠦᠮ᠎ᠡ ᠭᠡᠵᠦ ᠬᠡᠯᠡᠬᠦ ᠪᠤᠯᠵᠠᠢ᠃ ᠴᠤᠷᠵᠢ ᠶᠢᠨ ᠵᠤᠤ 1819 ᠤᠨ ᠳᠤ ᠰᠢᠷᠡᠭᠡᠳᠦ ᠵᠤᠤ ᠠᠴᠠ ᠰᠠᠯᠵᠦ ᠲᠤᠰᠭᠠᠷ ᠪᠤᠯᠤᠭᠰᠡᠨ ᠤ ᠬᠤᠶᠢᠨ᠎ᠡ᠂ ᠬᠥᠬᠡᠬᠤᠲᠠ ᠶᠢᠨ ᠠᠷᠪᠡᠨ ᠲᠠᠪᠤᠨ ᠬᠦᠷᠢᠶ᠎ᠡ ᠰᠦᠮ᠎ᠡ ᠭᠡᠵᠦ ᠬᠡᠯᠡᠬᠦ ᠪᠤᠯᠤᠭᠰᠡᠨ ᠪᠠᠶᠢᠨ᠎ᠡ᠃ ᠭᠡᠳᠡᠯ᠎ᠡ᠂ ᠡᠭᠦᠨ ᠢ ᠰᠢᠷᠡᠭᠡᠳᠦ ᠵᠤᠤ ᠶᠡᠷᠦᠨᠢ ᠮᠡᠳᠡᠷᠡᠭᠰᠡᠨ ᠦᠭᠡᠢ᠃ ᠬᠥᠬᠡᠬᠤᠲᠠ ᠶᠢᠨ ᠠᠷᠪᠡᠨ ᠲᠠᠪᠤᠨ ᠬᠦᠷᠢᠶ᠎ᠡ ᠰᠦᠮ᠎ᠡ ᠲᠡᠭᠡᠷ᠎ᠡ ᠲᠡᠳᠡᠭᠡᠷ ᠤᠨ ᠶᠢᠰᠦᠨ ᠬᠠᠷᠢᠶᠠᠳᠦ ᠰᠦᠮ᠎ᠡ ᠪᠤᠯᠤᠨ ᠲᠤᠯᠢ ᠪᠤᠯᠠᠭ ᠤᠨ ᠦᠷᠦᠰᠢᠶᠠᠨ ᠠᠪᠤᠷᠠᠭᠴᠢ ᠰᠦᠮ᠎ᠡ ᠶᠢ ᠨᠡᠮᠡᠪᠡᠯ᠂ ᠬᠥᠬᠡᠬᠤᠲᠠ ᠶᠢᠨ ᠪᠦᠭᠦᠳᠠ ᠯᠠᠮᠠ ᠪᠠᠨᠳᠢ ᠨᠠᠷ ᠢ ᠵᠠᠬᠢᠷᠤᠭᠴᠢ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠶᠢᠨ ᠵᠠᠬᠢᠷᠭᠠᠨ ᠲᠤᠤᠷ᠎ᠠ ᠨᠠᠶᠢᠳᠠ ᠬᠤᠷᠢᠨ ᠲᠠᠪᠤᠨ ᠰᠦᠮ᠎ᠡ ᠪᠠᠶᠢᠭᠰᠡᠨ᠃ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠶᠢᠨ ᠲᠤᠭᠳᠠᠭᠠᠯ ᠢᠶᠠᠷ᠂ ᠬᠥᠬᠡᠬᠤᠲᠠ ᠶᠢᠨ ᠠᠷᠪᠠᠨ ᠲᠠᠪᠤᠨ ᠬᠦᠷᠦᠶ᠎ᠡ ᠰᠦᠮ᠎ᠡ ᠳᠤ ᠲᠤᠰ ᠪᠦᠷᠢ ᠵᠠᠰᠠᠭ ᠯᠠᠮᠠ ᠨᠢᠭᠡ ᠬᠦᠮᠦᠨ ᠪᠤᠶᠤ ᠲᠡᠷᠢᠭᠦᠨ ᠯᠠᠮᠠ ᠨᠢᠭᠡ ᠠᠴᠠ ᠬᠤᠶᠠᠷ ᠬᠦᠮᠦᠨ᠂ ᠶᠢᠰᠦᠨ ᠬᠠᠷᠢᠶᠠᠳᠦ ᠰᠦᠮ᠎ᠡ ᠪᠠ ᠲᠤᠯᠢ ᠪᠤᠯᠠᠭ ᠤᠨ ᠦᠷᠦᠰᠢᠶᠡᠨ ᠠᠪᠤᠷᠠᠭᠴᠢ ᠰᠦᠮ᠎ᠡ ᠳᠤ ᠲᠤᠰ ᠪᠦᠷᠢ ᠲᠡᠷᠢᠭᠦᠨ ᠯᠠᠮᠠ ᠨᠢᠭᠡᠨ ᠬᠦᠮᠦᠨ ᠢ ᠰᠠᠭᠤᠯᠭᠠᠨ ᠵᠠᠬᠢᠷᠤᠭᠤᠯᠳᠠᠭ᠃ ᠡᠭᠦᠨ ᠢ ᠦᠨᠳᠦᠰᠦᠯᠡᠨ᠂ ᠵᠠᠰᠠᠭ ᠲᠡᠷᠢᠭᠦᠨ ᠯᠠᠮᠠ ᠠᠴᠠ ᠵᠠᠬᠢᠷᠬᠤ ᠶᠡᠭᠡ ᠵᠤᠤ᠂ ᠰᠢᠷᠡᠭᠡᠳᠦ ᠵᠤᠤ᠂ ᠪᠠᠭ᠎ᠠ ᠵᠤᠤ᠂ ᠫᠤᠩᠰᠤᠭ ᠵᠤᠤ᠂ ᠷᠠᠪᠵᠠᠢ ᠶᠢᠨ ᠵᠤᠤ ᠂ ᠪᠠᠨᠳᠢᠳᠠ ᠵᠤᠤ᠂ ᠡᠮᠴᠢ ᠶᠢᠨ ᠵᠤᠤ ᠵᠡᠷᠭᠡ ᠶᠢ ᠲᠤᠯᠤᠭᠠᠨ ᠶᠡᠭᠡ ᠵᠤᠤ ᠬᠡᠮᠡᠨ᠂ ᠲᠡᠷᠢᠭᠦᠨ ᠯᠠᠮᠠ ᠠᠴᠠ ᠵᠠᠬᠢᠷᠬᠤ ᠵᠡᠭᠦᠨ ᠯᠠᠮᠠ ᠶᠢᠨ ᠠᠭᠤᠢ᠂ ᠪᠠᠷᠭᠤᠨ ᠯᠠᠮᠠ ᠶᠢᠨ ᠠᠭᠤᠢ᠂ ᠤᠰᠤᠳᠦ ᠶᠢᠨ ᠪᠠᠷᠭᠤᠨ ᠵᠤᠤ᠂ ᠮᠠᠶᠢᠳᠠᠷᠢ ᠵᠤᠤ᠂ ᠲᠠᠶᠢᠪᠤᠩ , ᠵᠤᠤ᠂ ᠨᠠᠰᠤᠳᠠ ᠠᠰᠠᠷᠠᠯᠳᠦ ᠰᠦᠮ᠎ᠡ᠂ ᠪᠤᠶᠠᠨ ᠢ ᠲᠡᠯᠭᠡᠷᠡᠭᠦᠯᠦᠭᠴᠢ ᠰᠦᠮ᠎ᠡ᠂ ᠴᠤᠷᠵᠢ ᠶᠢᠨ ᠵᠤᠤ ᠵᠡᠷᠭᠡ ᠶᠢ ᠨᠠᠶᠢᠮᠠᠨ ᠪᠠᠭ᠎ᠠ ᠵᠤᠤ ᠭᠡᠵᠦ ᠬᠡᠯᠡᠳᠡᠭ᠃ 1819 ᠤᠨ ᠤ ᠬᠦᠮᠦᠨ ᠠᠮᠠ ᠶᠢᠨ ᠲᠤᠭᠠᠨ ᠤ ᠪᠦᠷᠢᠳᠭᠡᠯ ᠢ ᠦᠨᠳᠦᠰᠦᠯᠡᠪᠡᠯ᠂ ᠬᠥᠬᠡᠬᠤᠲᠠ ᠶᠢᠨ ᠪᠦᠭᠦᠳᠠ ᠯᠠᠮᠠ ᠪᠠᠨᠳᠢ ᠨᠡᠷ ᠢ ᠵᠠᠬᠢᠷᠤᠭᠴᠢ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠶᠢᠨ ᠵᠠᠬᠢᠷᠭᠠᠨ ᠳᠠᠬᠢ ᠬᠤᠷᠢᠨ ᠲᠠᠪᠤᠨ ᠰᠦᠮ᠎ᠡ ᠳᠤ ᠨᠡᠶᠢᠳᠠ 2151 ᠯᠠᠮᠠ ᠲᠠᠢ ᠪᠠᠶᠢᠵᠠᠢ᠃   ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠳᠤ᠂ ᠬᠥᠬᠡᠬᠤᠲᠠ ᠶᠢᠨ ᠪᠦᠭᠦᠳᠠ ᠯᠠᠮᠠ ᠪᠠᠨᠳᠢ ᠨᠠᠷ ᠢ ᠵᠠᠬᠢᠷᠤᠭᠴᠢ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠶᠢᠨ ᠲᠠᠮᠠᠭᠠᠨ ᠭᠠᠵᠠᠷ ᠨᠢ ᠶᠡᠭᠡ ᠵᠤᠤ ᠳᠤ ᠪᠠᠶᠢᠪᠠ᠃ ᠨᠡᠨ ᠨᠢ ᠨᠢᠭᠡᠨᠳᠡᠭᠡᠭᠦᠷ ᠮᠤᠩᠭᠤᠯ ᠤᠨ ᠲᠡᠤᠬᠡ  ᠶᠢᠨ ᠤᠯᠠᠮᠵᠢᠯᠠᠯ ᠢ ᠲᠠᠭᠠᠭᠰᠡᠨ ᠪᠤᠯ ᠨᠦᠭᠦᠭᠡᠳᠡᠭᠦᠷ ᠮᠠᠨᠵᠦ ᠶᠢᠨ ᠰᠡᠴᠡᠨ ᠬᠠᠭᠠᠨ ᠬᠥᠬᠡᠬᠤᠲᠠ ᠳᠤ ᠢᠷᠡᠭᠡᠳ ᠶᠡᠭᠡ ᠵᠤᠤ ᠳᠤ ᠪᠠᠭᠤᠭᠰᠡᠨ ᠶᠠᠪᠤᠳᠠᠯ ᠠᠴᠠ ᠪᠤᠯᠤᠭᠰᠡᠨ᠃ ᠲᠡᠷᠡ ᠦᠶ᠎ᠡ ᠶᠢᠨ ᠬᠥᠬᠡᠬᠤᠲᠠ ᠶᠢᠨ ᠪᠦᠭᠦᠳᠠ ᠯᠠᠮᠠ ᠪᠠᠨᠳᠢ ᠨᠠᠷ ᠢ ᠵᠠᠬᠢᠷᠤᠭᠴᠢ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠶᠢᠨ ᠲᠠᠮᠠᠭᠠᠨ ᠤ ᠭᠠᠵᠠᠷ ᠨᠢ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ᠂ ᠵᠠᠰᠠᠭ  ᠤᠨ ᠲᠡᠳ᠋᠊ ᠲᠡᠷᠢᠭᠦᠨ ᠯᠠᠮᠠ᠂ ᠲᠠᠮᠠᠭ᠎ᠠ ᠬᠠᠮᠢᠶᠠᠷᠤᠭᠴᠢ ᠵᠠᠰᠠᠭ ᠯᠠᠮᠠ ᠲᠤᠰᠪᠤᠷᠢ ᠨᠢᠭᠡ ᠬᠦᠮᠦᠨ ᠪᠠ ᠡᠳᠦᠢ ᠲᠡᠳᠦᠢ ᠲᠡᠮᠴᠢ᠂ ᠭᠡᠪᠬᠦᠢ ᠲᠠᠢ ᠪᠠᠶᠢᠵᠠᠢ᠃ ᠬᠥᠬᠡᠬᠤᠲᠠ ᠶᠢᠨ ᠪᠦᠭᠦᠳᠠ ᠯᠠᠮᠠ ᠪᠠᠨᠳᠢ ᠨᠠᠷ ᠢ ᠵᠠᠬᠢᠷᠤᠭᠴᠢ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠨᠢ ᠲᠡᠭᠦᠨ ᠤ ᠠᠷᠪᠡᠨ ᠲᠠᠪᠤᠨ ᠬᠦᠷᠢᠶ᠎ᠡ ᠰᠦᠮ᠎ᠡ ᠶᠢᠨ ᠱᠠᠰᠢᠨ ᠰᠤᠷᠳᠠᠬᠤᠨ᠂ ᠤᠯᠤᠰ ᠲᠦᠷᠦ᠂ ᠵᠠᠰᠠᠭ ᠵᠠᠬᠢᠷᠭᠠᠨ ᠤ ᠶᠡᠭᠡ ᠬᠡᠷᠡᠭ ᠢ ᠰᠡᠶᠢᠳᠪᠦᠷᠢᠯᠡᠬᠦ ᠳᠡᠭᠡᠨ ᠮᠠᠨᠵᠦ ᠶᠢᠨ ᠰᠡᠴᠡᠨ ᠬᠠᠭᠠᠨ ᠤ ᠰᠠᠭᠤᠭᠰᠡᠨ ᠡᠷᠳᠡᠨᠢ  ᠶᠢᠨ ᠰᠢᠷᠡᠭᠡᠨ ᠳᠤ ᠰᠠᠭᠤᠵᠦ ᠪᠤᠯᠳᠠᠭ᠃ ᠨᠡᠨ ᠨᠢ ᠶᠠᠷᠢᠶᠡᠨ ᠦᠭᠡᠢ ᠲᠡᠭᠦᠨ ᠤ ᠨᠡᠷ᠎ᠡ ᠰᠦᠷ ᠢ ᠲᠡᠭᠡᠭᠰᠢᠯᠡᠭᠦᠯᠬᠦ ᠶᠢᠨ ᠲᠦᠯᠦᠭᠡ ᠠᠪᠤᠭᠰᠡᠨ ᠠᠷᠭ᠎ᠠ ᠪᠤᠳᠤᠯᠭ᠎ᠠ ᠪᠤᠯᠤᠨ᠎ᠡ᠃ ᠡᠭᠦᠨ ᠤ ᠵᠡᠷᠭᠡᠴᠡᠭᠡ ᠪᠠᠷ᠂ ᠲᠦᠮᠡᠳ ᠤᠨ ᠠᠯᠳᠠᠨ ᠬᠠᠭᠠᠨ ᠤ ᠦᠶ᠎ᠡ ᠠᠴᠠ ᠤᠯᠠᠮᠵᠢᠯᠠᠵᠦ ᠢᠷᠡᠭᠰᠡᠨ ᠶᠤᠰᠤᠭᠠᠷ᠂ ᠲᠦᠮᠡᠳ ᠤᠨ ᠵᠡᠭᠦᠨ ᠪᠡᠷᠭᠤᠨ ᠬᠤᠶᠠᠷ ᠭᠠᠷ ᠠᠴᠠ ᠰᠠᠷ᠎ᠠ ᠪᠦᠷᠢ ᠠᠷᠪᠠᠨ ᠮᠤᠩᠭᠤᠯ ᠨᠤᠶᠠᠨ ᠴᠡᠷᠢᠭ ᠢ ᠶᠡᠭᠡ ᠵᠤᠤ ᠳᠤ ᠲᠤᠮᠢᠯᠠᠨ ᠢᠷᠡᠭᠦᠯᠵᠦ ᠲᠠᠮᠠᠭᠠᠨ ᠤ ᠭᠠᠵᠠᠷ ᠢ ᠡᠭᠡᠯᠵᠢᠯᠡᠨ ᠬᠠᠮᠠᠭᠠᠯᠠᠬᠤ ᠡᠭᠦᠷᠭᠡ ᠶᠢ ᠡᠭᠦᠷᠭᠡᠯᠡᠭᠦᠯᠳᠡᠭ᠃ ᠭᠡᠳᠡᠯ᠎ᠡ᠂ ᠬᠥᠬᠡᠬᠤᠲᠠ ᠶᠢᠨ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠶᠢ ᠲᠠᠯᠪᠢᠬᠤ ᠳᠤ ᠵᠦᠪᠬᠡᠨ ᠬᠥᠬᠡᠬᠤᠲᠠ ᠳᠠᠬᠢ ᠶᠡᠭᠡ ᠬᠤᠳᠤᠭᠳᠦ ᠬᠤᠪᠢᠯᠭᠠᠳ ᠢᠶᠠᠷ ᠬᠢᠵᠠᠭᠠᠷᠯᠠᠳᠠᠭ ᠪᠢᠰᠢ ᠪᠠᠶᠢᠪᠠ᠃ ᠡᠭᠦᠨ ᠤ ᠲᠤᠬᠠᠢ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ 1708 ᠤᠨ ᠳᠤ ᠲᠤᠰᠬᠠᠶᠢᠯᠠᠨ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠡᠨ ᠨᠢ᠄ ︽ᠬᠥᠬᠡᠬᠤᠲᠠ ᠶᠢᠨ ᠪᠠᠯᠮ᠎ᠠ ᠨᠡᠷ ᠢ ᠵᠠᠬᠢᠷᠬᠤ ᠠᠨᠤ ᠴᠢᠬᠤᠯᠠ ᠶᠢ ᠲᠠᠭᠠᠵᠦ᠂ ᠲᠤᠳᠤᠭᠠᠳᠦ ᠭᠠᠳᠠᠭᠠᠳᠦ ᠶᠡᠬᠡᠬᠡᠨ ᠪᠠᠯᠮ᠎ᠠ ᠨᠠᠷ ᠢ ᠰᠤᠩᠭᠤᠵᠦ ᠠᠶᠢᠯᠠᠳᠬ᠎ᠠ︾ ᠭᠡᠵᠡᠢ᠃ ᠡᠨᠡᠬᠦ ᠵᠠᠷᠯᠢᠭ ᠢ ᠦᠨᠳᠦᠰᠦᠯᠡᠨ᠂ ᠬᠥᠬᠡᠬᠤᠲᠠ ᠶᠢᠨ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠶᠢ ᠲᠠᠯᠪᠢᠬᠤ ᠳᠠᠭᠠᠨ ᠭᠠᠳᠠᠭᠠᠳᠦ ᠮᠤᠩᠭᠤᠯ ᠤᠨ ᠲᠦᠷᠦ ᠶᠢ ᠵᠠᠰᠠᠬᠤ ᠶᠠᠪᠤᠳᠠᠯ ᠤᠨ ᠶᠠᠮᠤᠨ ᠠᠴᠠ ᠪᠡᠭᠡᠵᠢᠩ᠂ ᠮᠦᠭᠳᠡᠨ᠂ ᠬᠠᠯᠠᠭᠤᠨ ᠭᠤᠤᠯ᠂ ᠲᠤᠯᠤᠭᠠᠨ ᠨᠠᠭᠤᠷ ᠵᠡᠷᠭᠡ ᠭᠠᠵᠠᠷ ᠤᠨ ᠶᠡᠭᠡ ᠬᠤᠳᠤᠭᠳᠦ ᠬᠤᠪᠢᠯᠭᠠᠳ  ᠤᠨ ᠲᠤᠳᠤᠷ᠎ᠡ ᠠᠴᠠ ᠵᠤᠬᠢᠰᠳᠠᠢ ᠶᠢ ᠰᠤᠩᠭᠤᠵᠦ᠂ ᠨᠡᠷ᠎ᠡ ᠵᠡᠷᠭᠡ ᠶᠢ ᠨᠢ ᠲᠠᠨᠢᠯᠴᠠᠭᠤᠯᠵᠦ᠂ ᠲᠤᠬᠠᠶᠢᠯᠠᠨ ᠵᠡᠷᠭᠡᠴᠡᠭᠦᠯᠦᠨ ᠮᠡᠳᠡᠭᠦᠯᠦᠭᠡᠳ ᠮᠠᠨᠵᠦ ᠬᠠᠭᠠᠨ ᠢᠶᠠᠷ ᠰᠤᠩᠭᠤᠨ ᠵᠦᠪᠰᠢᠶᠡᠷᠡᠭᠦᠯᠳᠡᠭ᠃ ᠵᠠᠷᠢᠮ ᠳᠠᠭᠠᠨ ᠵᠠᠩᠵᠤᠨ ᠬᠤᠳᠤᠭᠳᠦ ᠠᠴᠠ ᠨᠡᠷ᠎ᠡ ᠮᠡᠳᠡᠭᠦᠯᠵᠦ ᠮᠠᠨᠵᠦ ᠬᠠᠭᠠᠨ ᠢᠶᠠᠷ ᠵᠦᠪᠰᠢᠶᠡᠷᠡᠭᠦᠯᠳᠡᠭ ᠶᠠᠪᠤᠳᠠᠯ ᠴᠦ ᠪᠤᠢ᠃ ᠴᠢᠩ ᠤᠯᠤᠰ  ᠤᠨ ᠰᠡᠭᠦᠯᠴᠢ ᠶᠢᠨ ᠦᠶ᠎ᠡ ᠪᠤᠯᠤᠭᠠᠳ ᠴᠢᠩ ᠤᠯᠤᠰ ᠤᠨ ᠦᠵᠡᠯ ᠰᠠᠨᠠᠭᠠᠨ ᠤ ᠲᠠᠯ᠎ᠠ ᠶᠢᠨ ᠨᠤᠶᠠᠷᠬᠠᠯ ᠲᠤᠷᠤᠶᠢᠳᠠᠭᠰᠡᠨ ᠢᠶᠠᠷ᠂ 1819 ᠤᠨ ᠠᠴᠠ ᠡᠬᠢᠯᠡᠨ ᠬᠥᠬᠡᠬᠤᠲᠠ ᠶᠢᠨ ᠵᠠᠰᠠᠭ ᠤᠨ ᠲᠡᠷᠢᠭᠦᠨ ᠯᠠᠮᠠ ᠶᠢᠨ ᠲᠠᠮᠠᠭᠠᠨ  ᠤ ᠭᠠᠵᠠᠷ ᠢ ᠰᠢᠭᠤᠳ ᠬᠤᠯᠠᠳᠠᠬᠢᠨ ᠢ ᠠᠮᠤᠷᠵᠢᠭᠤᠯᠬᠤ ᠬᠤᠳᠠ ᠶᠢᠨ ᠵᠠᠩᠵᠤᠨ ᠳᠤ ᠲᠤᠰᠢᠶᠠᠨ ᠵᠠᠬᠢᠷᠤᠭᠤᠯᠵᠠᠢ᠃ ᠢᠩᠬᠢᠭᠡᠳ᠂ ᠮᠠᠨᠵᠦ ᠬᠠᠭᠠᠨ ᠠᠴᠠ ᠬᠥᠬᠡᠬᠤᠲᠠ ᠶᠢᠨ ᠠᠷᠪᠠᠨ ᠲᠠᠪᠤᠨ ᠬᠦᠷᠢᠶ᠎ᠡ ᠰᠦᠮ᠎ᠡ ᠪᠤᠯᠤᠨ ᠲᠡᠭᠦᠨ ᠤ ᠬᠤᠳᠤᠭᠳᠦ ᠬᠤᠪᠢᠯᠭᠠᠳ ᠢ ᠪᠦᠷᠢᠮᠦᠰᠦᠨ ᠡᠷᠬᠡᠨ ᠳᠡᠭᠡᠨ ᠤᠷᠤᠭᠤᠯᠤᠭᠰᠡᠨ ᠤ ᠬᠠᠮᠳᠦ᠂ ᠪᠠᠰᠠ ᠵᠤᠷᠢᠭ ᠢᠶᠠᠷ ᠢᠶᠠᠨ ᠠᠰᠢᠭᠯᠠᠨ ᠴᠢᠳᠠᠬᠤ ᠪᠤᠯᠤᠭᠰᠡᠨ ᠪᠠᠶᠢᠨ᠎ᠡ᠃   ᠲᠤᠰ ᠦᠭᠦᠯᠡᠯ ᠢ ᠮᠤᠩᠭᠤᠯ ᠰᠤᠷᠪᠤᠯᠵᠢ ᠪᠢᠴᠢᠭ ᠤᠨ ᠬᠦᠮᠦᠷᠭᠡ ᠪᠤᠯᠬᠤ ︽ᠬᠥᠬᠡᠬᠤᠲᠠ ᠶᠢᠨ ᠰᠦᠮ᠎ᠡ ᠶᠢᠨ ᠲᠡᠤᠬᠡ︾ ᠬᠡᠮᠡᠬᠦ ᠨᠤᠮ ᠠᠴᠠ ᠰᠡᠶᠢᠷᠡᠭᠦᠯᠪᠠᠢ᠃   ᠳᠦᠮᠡᠳ᠂ ᠨᠠᠰᠤᠨᠳᠡᠯᠭᠡᠷᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ
  
ᠢᠷᠡᠯᠲᠡ᠄ ᠲᠣᠰ ᠰᠦᠯᠵᠢᠶ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠯᠠᠱᠠ ᠦᠷᠡᠰ ᠨᠠᠶᠢᠷ ᠤᠨ ᠡᠭᠦᠰᠦᠯᠲᠡ ᠲᠡᠤᠬᠡ
ᠠᠯᠠᠱᠠ ᠣᠷᠴᠢᠭᠤᠯᠭ᠎ᠠ ᠶᠢᠨ ᠰᠤᠷᠭᠠᠭᠤᠯᠢ ᠶᠢᠨ ᠠᠩᠭᠢ ᠪᠠᠶᠢᠭᠤᠯᠪᠠ
ᠠᠯᠠᠱᠠ ᠦᠬᠢᠳ ᠤᠨ ᠰᠤᠷᠭᠠᠭᠤᠯᠢ  ᠶᠢ ᠪᠠᠶᠢᠭᠤᠯᠪᠠ
ᠠᠯᠠᠱᠠ ᠪᠠᠭᠰᠢ ᠶᠢᠨ ᠰᠤᠷᠭᠠᠭᠤᠯᠢ ᠪᠠᠶᠢᠭᠤᠯᠪᠠ
ᠪᠠᠭ᠎ᠠ ᠬᠡᠤᠬᠡᠳ ᠢ ᠯᠠᠮᠠ ᠪᠣᠯᠭᠠᠬᠤ ᠶᠢ ᠬᠤᠷᠢᠭᠯᠠᠭᠰᠠᠨ ᠨᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号