ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠰᠢᠨ᠎ᠡ ᠬᠦᠳᠡᠭᠡ
ᠡᠬᠡ ᠶᠢᠨ ᠴᠠᠭᠠᠨ ᠰᠥ ᠬᠠᠷᠢᠭᠤᠯᠬᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-12-05
ᠡᠩᠬᠡ ᠰᠠᠶᠢᠨ ᠠᠮᠤᠭᠤᠯᠠᠩ ᠪᠤᠯᠳᠤᠭᠠᠢ︕ ᠠᠭᠠᠷᠠᠤ ᠽᠠᠨᠳᠠᠨ ᠮᠤᠳᠤᠨ ᠳᠤᠨᠢ ᠠᠶ᠎ᠠ ᠲᠠᠪᠠ ᠪᠠᠷ ᠢᠶᠠᠨ ᠵᠢᠷᠭᠠᠭᠴᠢ ᠠᠩᠬᠢᠷ ᠬᠡᠭᠴᠢ ᠰᠢᠪᠠᠭᠤᠨ ᠤ ᠠᠩᠭᠠᠬᠠᠢ ᠰᠢᠪᠠᠭᠤ ᠨᠢ ᠪᠤᠯᠪᠠᠴᠤ ᠥᠳᠥ ᠰᠥᠳᠥ ᠨᠢ ᠪᠥᠷᠢᠳᠬᠦ ᠳᠡᠭᠡᠨ ᠡᠬᠦᠷ ᠶᠦᠭᠡᠨ ᠤᠷᠬᠢᠨ ᠠᠭᠠᠷ ᠲᠤ ᠨᠢᠰᠥᠨ ᠤᠳᠬᠤ ᠶᠢᠨ ᠠᠷᠭ᠎ᠠ ᠥᠬᠡᠢ ᠨᠢᠬᠡᠨ ᠴᠠᠭ ᠪᠤᠢ᠃ ᠭᠠᠯᠪᠠᠷᠠᠭᠴᠠ ᠽᠠᠨᠳᠠᠨ ᠮᠤᠳᠤᠨ ᠳᠤᠨᠢ ᠭᠠᠷᠴᠠᠭ᠎ᠠ ᠥᠬᠡᠢ ᠨᠤᠳᠤᠭᠰᠢᠭᠰᠠᠨ ᠭᠠᠷᠤᠳᠢ ᠬᠡᠭᠴᠢ ᠰᠢᠪᠠᠭᠤᠨ ᠤ ᠭᠠᠷᠤᠭᠰᠠᠨ ᠵᠤᠯᠵᠠᠭ᠎ᠠ ᠨᠢ ᠪᠤᠯᠪᠠᠴᠤ ᠭᠠᠩ ᠵᠢᠬᠦᠷ ᠨᠢ ᠪᠥᠷᠢᠳᠬᠦ ᠳᠡᠭᠡᠨ ᠭᠠᠭᠴᠠ ᠡᠬᠡ ᠠᠴᠠ ᠪᠠᠨ ᠰᠠᠯᠤᠭᠠᠳ ᠭᠠᠯᠪᠠ ᠳᠤ ᠨᠢᠰᠤᠨ ᠤᠳᠬᠤ ᠶᠢᠨ ᠭᠠᠶᠢᠬᠠᠮᠰᠢᠭᠳᠤ ᠨᠢᠬᠡ ᠴᠠᠭ ᠪᠤᠢ᠃ ᠬᠥᠮᠥᠨ ᠤ ᠤᠷᠴᠢᠯᠠᠩ ᠳᠤ ᠵᠠᠶᠠᠭᠠᠭᠰᠠᠨ ᠬᠡᠤᠬᠡᠨ ᠥᠷ᠎ᠡ ᠬᠡᠮᠡᠭᠴᠢ ᠬᠥᠨᠳᠥᠳᠥ ᠡᠬᠡ ᠠᠴᠠ ᠪᠠᠨ ᠰᠠᠯᠤᠭᠠᠳ ᠬᠥᠷᠬᠡᠨ ᠳᠤ ᠮᠤᠷᠳᠠᠬᠤ ᠶᠢᠨ ᠤᠴᠢᠷ ᠪᠤᠢ︖ ᠲᠥᠷᠥ ᠬᠥᠷᠥᠨ ᠤ ᠶᠤᠰᠤ ᠪᠠᠷ ᠲᠥᠬᠡᠮᠡᠯ ᠲᠡᠬᠡᠳᠥ ᠬᠠᠤᠯᠢ ᠪᠠᠷ ᠲᠥᠮᠡᠨ ᠤᠯᠠᠨ ᠤ ᠵᠢᠷᠥᠮ ᠢᠶᠠᠷ ᠲᠥᠪ ᠶᠤᠰᠤᠳᠤ ᠲᠥᠷᠢᠮ ᠢᠶᠠᠷ ᠢᠯᠴᠢᠬᠡᠨᠡᠬᠦ ᠴᠡᠬᠡᠵᠢ ᠶᠢ ᠨᠢ ᠪᠤᠷᠬᠢᠯᠤᠭᠤᠯᠤᠨ ᠢᠷᠪᠡᠬᠡᠨᠡᠬᠦ ᠨᠢᠯᠪᠤᠰᠤ ᠶᠢ ᠨᠢ ᠮᠡᠯᠮᠡᠷᠡᠬᠦᠯᠥᠨ ᠢᠯᠪᠡᠯᠵᠡᠬᠦ ᠨᠢᠭᠤᠷ ᠢ ᠨᠢ ᠤᠯᠠᠶᠢᠯᠭᠠᠨ ᠢᠨᠢᠶᠡᠬᠦ ᠴᠢᠷᠠᠢ ᠶᠢ ᠨᠢ ᠲᠤᠮᠪᠤᠯᠵᠠᠭᠤᠯᠤᠨ ᠲᠥᠪ ᠲᠠᠩᠰᠠᠨ ᠳᠤ ᠲᠡᠮᠳᠡᠭᠯᠡᠵᠥ ᠲᠥᠮᠡᠨ ᠤᠯᠠᠨ ᠳ᠋ᠤ᠋‌‍ᠰᠤᠨᠤᠰᠬᠠᠨ ᠰᠠᠮ ᠰᠠᠮ ᠢᠶᠠᠷ ᠪᠡᠯᠡᠳᠬᠡᠵᠥ ᠲᠠᠮ ᠲᠠᠮ ᠢᠶᠠᠷ ᠮᠡᠳᠡᠬᠦᠯᠥᠨ ᠬᠡᠯᠬᠢᠶ᠎ᠡ ᠵᠢᠷᠤᠮ ᠤᠨ ᠤᠴᠢᠷ ᠢ ᠬᠡᠴᠢᠶᠡᠩᠬᠦᠶᠢᠯᠡᠨ ᠬᠥᠢᠴᠡᠳᠬᠡᠬᠦ ᠡᠨᠡ ᠡᠳᠥᠷ ᠡᠪᠳᠤ ᠰᠠᠶᠢᠬᠠᠨ ᠨᠠᠶᠢᠷ ᠢ ᠬᠡᠪᠳᠤ ᠶᠤᠰᠤ ᠪᠠᠷ ᠬᠢᠬᠦ ᠳᠤ ᠡᠨᠡᠷᠢᠯ ᠶᠡᠬᠡᠳᠥ ᠡᠵᠢ ᠶᠢᠨ ᠬᠢᠨᠢ ᠡᠩᠬᠦᠷᠡᠢ ᠬᠤᠩᠭᠤᠷ ᠥᠷ᠎ᠡ ᠪᠠᠨ ᠡᠪᠡᠶᠢᠯᠡᠨ ᠰᠠᠨᠠᠵᠤ ᠥᠰᠬᠡᠭᠰᠡᠨ ᠢ ᠡᠷᠬᠢᠴᠡᠬᠦᠯᠥᠨ ᠪᠤᠳᠤᠵᠤ ᠥᠵᠡᠬᠦᠯ᠎ᠡ ᠠᠷᠢᠭᠤᠨ ᠴᠠᠭᠠᠨ ᠬᠡᠪᠡᠯᠢ ᠳᠡᠭᠡᠨ ᠠᠷᠪᠠᠨ ᠰᠠᠷ᠎ᠠ ᠡᠷᠬᠦᠬᠡᠳ ᠷᠠᠰᠢᠶᠠᠨ ᠲᠤᠩᠭᠠᠯᠠᠭ ᠤᠰᠤ ᠪᠠᠷ ᠠᠷᠢᠭᠤᠳᠬᠠᠨ ᠤᠬᠢᠶᠠᠵᠤ ᠠᠪᠤᠭᠠᠳ ᠨᠢᠬᠡ ᠨᠠᠰᠤ ᠲᠠᠢ ᠪᠠᠶᠢᠬᠤ ᠳᠤᠨᠢ ᠨᠡᠬᠡᠢ ᠠᠷᠠᠰᠤᠨ ᠳᠤ ᠬᠤᠴᠠᠭᠠᠳ ᠨᠡᠮᠥᠬᠦᠨ ᠵᠥᠬᠡᠯᠡᠨ ᠲᠠᠭᠤ ᠪᠠᠷ ᠢᠶᠠᠨ ᠨᠡᠷ᠎ᠡ ᠶᠢ ᠨᠢ ᠲᠠᠭᠤᠳᠠᠵᠤ ᠰᠤᠨᠤᠰᠬᠠᠨ ᠬᠥᠨᠳᠡᠢ ᠰᠠᠶᠢᠬᠠᠨ ᠬᠠᠷᠠᠭ᠎ᠠ ᠲᠠᠢ ᠬᠥᠨᠳᠡᠯᠡᠨ ᠭᠤᠷᠪᠠᠨ ᠤᠶᠠᠭ᠎ᠠ ᠲᠠᠢ ᠬᠥᠪᠥᠩ ᠥᠬᠡᠷ᠎ᠡ ᠥᠬᠡᠢ ᠬᠤᠴᠢᠯᠭ᠎ᠠ ᠲᠠᠢ ᠬᠥᠨᠵᠢᠯᠨ ᠮᠡᠳᠥ ᠶᠢᠨ ᠲᠡᠪᠢᠰᠬᠡᠷ ᠲᠠᠢ ᠥᠯᠵᠡᠶᠢᠳᠡᠶᠢᠬᠡᠨ ᠥᠯᠥᠬᠡᠢ ᠳᠤᠨᠢ ᠡᠳᠥᠷ ᠤᠨ ᠰᠠᠶᠢᠨ ᠳᠤᠨᠢ ᠥᠯᠥᠬᠡᠶᠢᠳᠡᠬᠡᠳ ᠡᠪᠥᠷ ᠤᠨ ᠲᠤᠪᠴᠢ ᠪᠠᠨ ᠲᠠᠶᠢᠯᠤᠨ ᠥᠨᠥᠰᠥᠨ ᠲᠠᠭᠠᠯᠠᠨ ᠬᠥᠬᠦᠬᠦᠯᠥᠭᠰᠡᠨ ᠤᠩᠬᠤᠷ ᠥᠯᠥᠬᠡᠢ ᠳᠤ ᠥᠯᠥᠬᠡᠶᠢᠳᠡᠬᠡᠳ ᠤᠪᠠᠢ ᠪᠥᠢᠪᠠᠢ ᠰᠠᠭᠠᠳᠠᠭᠤᠯᠤᠭᠰᠠᠨ ᠤᠵᠠᠨ ᠲᠤᠪᠴᠢ ᠪᠠᠨ ᠲᠠᠶᠢᠯᠤᠨ ᠤᠭᠤᠷᠠᠭ ᠰᠥ ᠪᠠᠨ‌‍ᠰᠢᠮᠡᠬᠦᠯᠵᠥ ᠤᠷᠤ ᠶᠢᠨ ᠡᠮᠥᠨ᠎ᠡ ᠪᠠᠨ ᠤᠨᠳᠠᠭᠤᠯᠵᠤ ᠤᠬᠢᠯᠠᠬᠤ ᠲᠠᠭᠤ ᠶᠢ ᠨᠢ ᠨᠠᠮᠰᠢᠶᠠᠭᠰᠠᠨ ᠤᠬᠠᠭᠠᠨᠳᠤ ᠪᠤᠭᠤᠷᠤᠯ ᠡᠵᠢ ᠶᠢᠨ ᠬᠢᠨᠢ ᠠᠭᠤᠳᠠᠮ ᠠᠴᠢᠯᠠᠯ ᠢ ᠬᠠᠷᠢᠭᠤᠯᠤᠮᠤ᠃ ᠬᠤᠶᠠᠷ ᠨᠠᠰᠤ ᠶᠢ ᠬᠥᠷᠬᠦ ᠳᠤᠨᠢ ᠬᠤᠷᠭᠤ ᠠᠪᠳᠠᠷ᠎ᠠ ᠶᠢ ᠨᠢ ᠲᠥᠰᠢᠵᠥ ᠬᠤᠶᠢᠭᠤᠷ ᠤᠷᠢᠳᠠᠭᠤᠷ ᠮᠥᠯᠬᠦᠵᠥ ᠬᠤᠭ ᠲᠤᠭᠤᠰᠤ ᠪᠠᠵᠠᠬᠤ ᠳᠤᠨᠢ ᠬᠤᠩᠰᠢᠶᠠᠷ ᠠᠮᠨ ᠶᠢ ᠨᠢ ᠵᠥᠯᠬᠦᠵᠥ ᠬᠤᠩᠭᠤ ᠪᠤᠷᠪᠢ ᠶᠢ ᠨᠢ ᠠᠷᠴᠢᠵᠤ ᠬᠤᠯᠪᠤᠭ᠎ᠠ ᠬᠤᠶᠠᠷ ᠬᠥᠬᠦ ᠪᠠᠨ ᠥᠷᠥᠵᠥ ᠥᠭᠬᠦᠬᠡᠳ ᠰᠢᠮᠡᠬᠦᠯᠥᠭᠰᠡᠨ ᠮᠠᠩᠬ᠎ᠠ ᠰᠢᠷᠥᠢ ᠶᠢ ᠬᠠᠯᠠᠭᠤᠯᠵᠤ ᠮᠠᠨᠴᠤᠢ ᠲᠤᠳᠤᠷ᠎ᠠ ᠨᠢ ᠲᠡᠪᠢᠰᠥᠭᠰᠡᠨ ᠮᠠᠷᠢᠶ᠎ᠠ ᠮᠢᠬ᠎ᠠ ᠶᠢ ᠨᠢ ᠴᠢᠩᠭᠠᠯᠠᠵᠤ ᠮᠠᠭᠠᠳ ᠬᠠᠶᠢᠷᠠᠯᠠᠨ ᠥᠰᠬᠡᠭᠰᠡᠨ ᠡᠷᠪᠡᠩ ᠲᠡᠷᠪᠡᠩ ᠠᠯᠬᠤᠬᠤ ᠳᠤᠨᠢ ᠡᠩᠬᠡ ᠪᠠᠳᠢ ᠡᠮᠥᠰᠬᠡᠭᠰᠡᠨ ᠡᠵᠢ ᠡ ᠠᠪᠤ ᠡ ᠲᠠᠭᠤᠳᠠᠬᠤ ᠳᠤᠨᠢ ᠡᠨᠡᠷᠢᠯ ᠤᠨ ᠰᠥ ᠪᠠᠨ ᠢᠪᠡᠯᠬᠡᠭᠰᠡᠨ ᠲᠠᠪᠤᠤ ᠬᠤᠴᠢᠯᠭ᠎ᠠ ᠳᠤ ᠮᠠᠨᠴᠤᠶᠢᠳᠠᠭᠠᠳ ᠲᠠᠭᠠᠷᠠᠵᠤ ᠬᠠᠯᠠᠬᠤ ᠶᠢ ᠨᠢ ᠬᠢᠴᠢᠶᠡᠭᠰᠡᠨ ᠲᠠᠪᠳᠠᠵᠤ ᠪᠠᠶᠢᠭᠠᠳ ᠤᠨᠳᠠᠭᠤᠯᠤᠭᠰᠠᠨ ᠲᠠᠩᠴᠢ ᠬᠠᠶᠢᠷᠠᠯᠠᠨ ᠥᠰᠬᠡᠭᠰᠡᠨ ᠠᠷᠭᠠᠯ ᠲᠥᠯᠡᠰᠢᠨ ᠳᠤ ᠶᠠᠪᠤᠪᠠᠴᠤ ᠠᠷᠤᠨᠰᠢ ᠪᠠᠨ ᠰᠠᠨᠠᠭᠠᠰᠢᠷᠠᠨ ᠪᠤᠳᠤᠳᠠᠭ ᠤᠰᠤ ᠴᠠᠰᠤᠨ ᠳᠤ ᠶᠠᠪᠤᠪᠠᠴᠤ ᠤᠬᠤᠷᠢᠵᠤ ᠬᠡᠳᠡᠷᠬᠡᠨ ᠰᠠᠨᠠᠳᠠᠭ ᠡᠩᠬᠡᠷ ᠲᠡᠬᠡᠷ᠎ᠡ ᠪᠠᠨ ᠰᠠᠭᠤᠯᠭᠠᠭᠠᠳ ᠡᠯᠢᠬᠡᠨ ᠲᠡᠬᠡᠷ᠎ᠡ ᠪᠠᠨ ᠲᠡᠪᠡᠷᠢᠭᠰᠡᠨ ᠡᠨᠡᠷᠢᠯ ᠵᠤᠵᠠᠭᠠᠨ ᠡᠵᠢ ᠶᠢᠨ ᠢᠶᠠᠨ ᠡᠷᠬᠢᠮ ᠠᠴᠢᠯᠠᠯ ᠢ ᠬᠠᠷᠢᠭᠤᠯᠤᠮᠤ︕ ᠭᠤᠷᠪᠠᠨ ᠨᠠᠰᠤ ᠶᠢ ᠬᠥᠷᠬᠦ ᠳᠤᠨᠢ ᠭᠤᠯᠭᠤᠵᠤ ᠮᠥᠯᠬᠦᠵᠥ ᠨᠠᠭᠠᠳᠬᠤ ᠳᠤᠨᠢ ᠭᠤᠯᠤᠩᠨᠠᠨ ᠱᠤᠯᠤᠩᠨᠠᠨ ᠶᠠᠷᠢᠬᠤ ᠳᠤᠨᠢ ᠭᠤᠶᠢᠪᠤᠩ ᠲᠤᠶᠢᠪᠠᠩ ᠠᠯᠬᠤᠬᠤ ᠳᠤᠨᠢ ᠭᠤᠯᠤᠰᠴᠤ ᠲᠤᠯᠠᠰᠴᠤ ᠶᠠᠪᠤᠬᠤ ᠳᠤᠨᠢ ᠭᠤᠩᠭᠠᠯᠠᠵᠤ ᠭᠠᠩᠭᠠᠯᠠᠵᠤ ᠵᠠᠰᠠᠭᠠᠳ ᠭᠤᠳᠤᠯ ᠪᠤᠶᠢᠪᠠᠭ ᠡᠮᠥᠰᠬᠡᠨ ᠭᠤᠶᠢᠳᠠ ᠬᠠᠶᠢᠷᠠᠯᠠᠨ ᠰᠠᠨᠠᠭᠰᠠᠨ ᠤᠬᠢᠯᠠᠵᠤ ᠨᠢᠬᠡ ᠠᠶᠤᠯᠭᠠᠪᠠᠯ ᠪᠥᠪᠡᠶᠢᠯᠡᠵᠥ ᠨᠢᠬᠡ ᠠᠷᠭᠠᠳᠠᠭᠰᠠᠨ ᠤᠶᠢᠳᠬᠠᠷ ᠰᠡᠷᠬᠦᠬᠡᠬᠦ ᠨᠠᠭᠠᠳᠤᠮ ᠢ ᠤᠷᠠᠨ ᠠᠪᠤ ᠪᠠᠷ ᠨᠢ ᠬᠢᠯᠬᠡᠭᠰᠡᠨ ᠡᠪᠥᠯ ᠤᠨ ᠰᠥᠨᠢ ᠶᠢᠨ ᠥᠨᠳᠥᠷ ᠳᠤᠨᠢ ᠥᠨᠳᠡᠶᠢᠨ ᠥᠨᠳᠡᠶᠢᠨ ᠬᠥᠬᠦᠬᠦᠯᠥᠭᠰᠡᠨ ᠥᠨᠡᠨ ᠬᠠᠶᠢᠷᠠᠳᠠᠢ ᠡᠵᠢ ᠶᠢᠨ ᠬᠢᠨᠢ ᠡᠷᠬᠢᠮ ᠠᠴᠢᠯᠠᠯ ᠢ ᠬᠠᠷᠢᠭᠤᠯᠮᠤ᠃ ᠲᠥᠷᠪᠡ ᠨᠠᠰᠤ ᠶᠢ ᠬᠥᠷᠬᠦ ᠳᠤᠨᠢ ᠲᠥᠢᠪᠡᠬᠡᠵᠥ ᠲᠡᠷᠪᠡᠬᠡᠳ ᠬᠥᠶᠥᠬᠦ ᠳᠤᠨᠢ ᠲᠥᠷᠥᠯ ᠰᠠᠳᠤᠨ ᠨᠢ ᠥᠬᠦᠬᠡᠷᠳᠡᠨ ᠲᠥᠯᠬᠢᠵᠥ ᠲᠠᠳᠠᠭᠠᠳ ᠬᠥᠳᠡᠯᠥᠭᠰᠡᠨ ᠤᠯᠠᠭᠠᠨ ᠭᠠᠯ ᠲᠡᠬᠡᠷ᠎ᠡ ᠤᠨᠠᠬᠤ ᠪᠤᠢ ᠬᠢᠳᠤᠭ᠎ᠠ ᠰᠢᠪᠥᠬᠡᠨ ᠳᠤ ᠠᠳᠡᠬᠦ ᠪᠤᠢ ᠤᠯᠤᠰ ᠤᠨ ᠬᠡᠤᠬᠡᠳ ᠲᠤ ᠬᠤᠤᠷᠯᠠᠭᠳᠠᠬᠤ ᠪᠤᠢ ᠤᠶᠠᠭ᠎ᠠ ᠮᠤᠷᠢᠨ ᠲᠤᠤᠷ᠎ᠠ ᠤᠷᠤᠬᠤ ᠪᠤᠢ ᠠᠭᠤᠷ ᠨᠤᠬᠠᠢ ᠳᠤ ᠬᠠᠵᠠᠭᠳᠠᠴᠢᠬᠠᠬᠤ ᠪᠤᠢ ᠤᠰᠤ ᠰᠢᠪᠠᠷ ᠳᠤ ᠵᠢᠪᠪᠥᠬᠦ ᠪᠤᠢ ᠤᠨᠳᠠᠵᠤ ᠪᠠᠶᠢᠭᠠᠳ ᠰᠤᠴᠢᠬᠤ ᠪᠤᠢ ᠤᠬᠢᠯᠠᠵᠤ ᠪᠠᠶᠢᠭᠠᠳ ᠬᠥᠰᠢᠬᠦ ᠪᠤᠢ ᠬᠡᠵᠤ ᠤᠯᠠᠮ ᠶᠡᠭᠡ ᠪᠠᠷ ᠬᠢᠴᠢᠶᠡᠵᠥ ᠤᠶᠠᠷᠠᠨ ᠵᠤᠪᠠᠵᠤ ᠥᠰᠬᠡᠭᠰᠡᠨ ᠤᠬᠠᠭᠠᠨᠳᠤ ᠪᠤᠭᠤᠷᠤᠯ ᠡᠵᠢ ᠶᠢᠨ ᠬᠢᠨᠢ ᠠᠭᠤᠳᠠᠮ ᠠᠴᠢᠯᠠᠯ ᠢ ᠨᠢ ᠬᠠᠷᠢᠭᠤᠯᠤᠮᠤ᠃ ᠲᠠᠪᠤᠨ ᠨᠠᠰᠤ ᠶᠢ ᠬᠥᠷᠬᠦ ᠳᠤᠨᠢ ᠲᠠᠯ᠎ᠠ ᠶᠢ ᠲᠤᠭᠤᠷᠢᠨ ᠬᠥᠶᠥᠬᠦ ᠳᠤᠨᠢ ᠲᠠᠳᠠᠵᠤ ᠨᠠᠰᠢ ᠨᠢ ᠠᠪᠴᠢᠷᠠᠭᠠᠳ ᠲᠠᠷᠯᠠᠨ ᠲᠤᠭᠤᠯ ᠢ ᠴᠢᠩᠭᠠᠯᠭᠠᠵᠤ ᠲᠠᠨ ᠤ ᠮᠠᠨᠠᠶᠢᠬᠢ ᠶᠢ ᠲᠠᠨᠢᠭᠤᠯᠵᠤ ᠲᠠᠪᠯᠠᠭᠤᠨ ᠰᠠᠶᠢᠬᠠᠨ ᠬᠤᠪᠴᠠᠯᠠᠵᠤ ᠲᠠᠨ᠎ᠠ ᠰᠤᠪᠤᠳ ᠢᠶᠠᠷ ᠴᠢᠮᠡᠭᠯᠡᠵᠥ ᠲᠠᠷᠠᠭ ᠠᠶᠢᠷᠠᠭ ᠢᠶᠠᠷ ᠲᠡᠵᠢᠬᠡᠵᠥ ᠬᠠᠬᠢᠷ ᠬᠥᠢᠳᠡᠨ ᠳᠤ ᠲᠠᠭᠠᠷᠠᠬᠤ ᠪᠤᠢ ᠬᠠᠯᠠᠭᠤᠨ ᠨᠠᠷᠠᠨ ᠳᠤ ᠰᠢᠷᠠᠭᠳᠠᠬᠤ ᠪᠤᠢ ᠬᠠᠷᠠᠩᠭᠤᠢ ᠰᠥᠨᠢ ᠠᠶᠤᠬᠤ ᠪᠤᠢ ᠬᠠᠨᠢᠶᠠᠳᠤ ᠲᠠᠭᠰᠢᠭᠤᠷ ᠬᠥᠷᠬᠦ ᠪᠤᠢ ᠬᠠᠶᠢᠴᠢ ᠰᠢᠪᠥᠬᠡᠨ ᠳᠤ ᠠᠳᠡᠬᠦ ᠪᠤᠢ ᠬᠠᠳᠠ ᠮᠤᠳᠤᠨ ᠳᠤ ᠴᠤ ᠪᠥᠳᠥᠷᠢᠬᠦ ᠪᠤᠢ ᠬᠠᠯᠭᠠᠷᠠᠵᠤ ᠭᠤᠯᠭᠤᠷᠢᠭᠠᠳ ᠤᠶᠢᠴᠠᠴᠢᠬᠠᠬᠤ ᠪᠤᠢ ᠬᠠᠴᠠᠷ ᠨᠢᠭᠤᠷ ᠢᠶᠠᠨ ᠰᠢᠯᠪᠤᠯᠠᠴᠢᠬᠠᠬᠤ ᠪᠤᠢ ᠬᠡᠵᠤ ᠡᠩᠬᠦᠷᠡᠢ ᠬᠤᠩᠭᠤᠷ ᠥᠷ᠎ᠡ ᠶᠢ ᠪᠠᠨ ᠡᠷᠳᠡᠨᠢ ᠮᠡᠳᠥ ᠬᠠᠶᠢᠷᠠᠯᠠᠭᠰᠠᠨ ᠡᠨᠡᠷᠢᠯ ᠶᠡᠬᠡᠳᠥ ᠡᠵᠢ ᠶᠢᠨ ᠬᠢᠨᠢ ᠡᠷᠬᠢᠮ ᠠᠴᠢᠯᠠᠯ ᠢ ᠬᠠᠷᠢᠭᠤᠯᠤᠮᠤ᠃ ᠵᠢᠷᠭᠤᠭᠠᠨ ᠨᠠᠰᠤ ᠶᠢ ᠬᠥᠷᠬᠦ ᠳᠤᠨᠢ ᠵᠤᠯᠵᠠᠭ᠎ᠠ ᠬᠡᠮᠡᠨ ᠪᠤᠶᠢᠵᠠᠭᠤᠯᠤᠭᠰᠠᠨ ᠵᠢᠷᠤᠭ ᠬᠤᠸᠠᠷ ᠢ ᠥᠵᠡᠬᠦᠯᠥᠨ ᠵᠢᠷᠥᠮ ᠶᠤᠰᠤ ᠶᠢ ᠲᠠᠨᠢᠭᠤᠯᠤᠨ ᠪᠤᠭᠤᠷᠤᠯ ᠨᠠᠰᠤᠳᠠᠨ ᠢᠶᠠᠨ ᠬᠥᠨᠳᠥᠯᠡᠬᠦ ᠶᠢ ᠪᠤᠰᠤᠨ ᠪᠤᠰᠤᠨ ᠵᠢᠭᠠᠭᠰᠠᠨ ᠪᠤᠯᠪᠠᠷᠠᠢ ᠲᠡᠬᠦᠥ ᠪᠠᠨ ᠬᠠᠶᠢᠷᠠᠯᠠᠬᠤ ᠶᠢ ᠪᠤᠳᠤᠨ ᠪᠤᠳᠤᠨ ᠵᠢᠭᠠᠭᠰᠠᠨ ᠲᠥᠷᠥᠭᠰᠡᠨ ᠥᠰᠥ ᠶᠢ ᠠᠪᠤᠭᠠᠳ ᠲᠥᠬᠦᠷᠢᠭ ᠬᠡᠵᠢᠬᠡ ᠲᠠᠯᠪᠢᠭᠰᠠᠨ ᠴᠢᠬᠢ ᠶᠢ ᠨᠢ ᠵᠢᠷᠭᠤᠭ᠎ᠠ ᠴᠤᠭᠤᠯᠠᠵᠤ ᠴᠢᠮᠡᠭ ᠵᠡᠬᠦᠯᠬᠡᠬᠦ ᠪᠠᠷ ᠪᠡᠯᠡᠳᠬᠡᠭᠰᠡᠨ ᠵᠡᠬᠦᠨ ᠪᠠᠷᠠᠭᠤᠨ ᠢ ᠮᠡᠳᠡᠬᠦᠯᠵᠥ ᠵᠥᠭ ᠴᠢᠭ ᠢ ᠲᠠᠨᠢᠭᠤᠯᠤᠭᠰᠠᠨ ᠲᠤᠭ᠎ᠠ ᠬᠡᠮᠵᠢᠶ᠎ᠡ ᠶᠢ ᠤᠶᠢᠯᠭᠠᠭᠤᠯᠵᠤ ᠲᠤᠮᠵᠢᠶ᠎ᠠ ᠲᠥᠯᠥᠪ ᠢ ᠤᠯᠭᠤᠭᠰᠠᠨ ᠵᠢᠩ ᠯᠠᠩ ᠴᠡᠬᠡᠵᠢᠯᠡᠬᠦᠯᠵᠥ ᠵᠢᠯ ᠰᠠᠷ᠎ᠠ ᠶᠢ ᠮᠡᠳᠡᠬᠦᠯᠥᠭᠰᠡᠨ ᠵᠢᠩᠬᠢᠨᠢ ᠬᠠᠶᠢᠷᠠᠳᠠᠢ ᠡᠵᠢ ᠶᠢᠨ ᠬᠢᠨᠢ ᠠᠴᠢᠯᠠᠯ ᠢ ᠬᠥᠨᠳᠥᠳᠬᠡᠨ ᠬᠠᠷᠢᠭᠤᠯᠮᠤ᠃ ᠲᠤᠯᠤᠭᠠᠨ ᠨᠠᠰᠤ ᠶᠢ ᠬᠥᠷᠬᠦ ᠳᠤᠨᠢ ᠲᠤᠤᠷᠠᠬᠢ ᠲᠡᠬᠡᠷᠡᠬᠢ ᠶᠢ ᠢᠯᠭᠠᠬᠤ ᠳᠤᠨᠢ ᠲᠤᠪᠴᠢ ᠰᠢᠯᠪᠢ ᠶᠢ ᠡᠮᠵᠢᠬᠦᠯᠥᠨ ᠲᠤᠭᠳᠠᠭᠤᠨ ᠨᠤᠮᠤᠬᠠᠨ ᠰᠤᠷᠭᠠᠭᠰᠠᠨ ᠲᠤᠮᠤᠭᠤ ᠥᠬᠡᠢ ᠪᠢᠳᠡᠬᠡᠢ ᠵᠠᠩᠨᠠᠭᠠᠷᠠᠢ ᠲᠤᠭᠤᠮᠵᠢ ᠥᠬᠡᠢ ᠪᠢᠳᠡᠬᠡᠢ ᠠᠭᠠᠰᠢᠯᠠᠭᠠᠷᠠᠢ ᠬᠡᠵᠤ ᠲᠤᠭᠰᠢᠨ ᠲᠤᠷᠢᠭᠤᠨ ᠬᠡᠯᠡᠪᠡᠴᠤ ᠲᠤᠳᠤᠷ᠎ᠠ ᠪᠠᠨ ᠶᠡᠬᠡᠯ᠎ᠡ ᠬᠠᠶᠢᠷᠠᠯᠠᠵᠤ ᠤᠳᠠᠰᠤᠨ ᠰᠥᠪᠡᠭᠴᠢ ᠭᠠᠷᠭᠠᠬᠤ ᠳᠤ ᠤᠷᠠᠨ ᠰᠡᠨᠵᠢ ᠶᠢ ᠤᠯᠬᠤ ᠳᠤ ᠡᠪ ᠲᠡᠮᠳᠡᠢ ᠪᠠᠶᠢᠬᠤ ᠶᠢ ᠡᠬᠢᠯᠡᠨ ᠴᠢᠩᠭ᠎ᠠ ᠰᠤᠷᠭᠠᠭᠰᠠᠨ ᠭᠠᠩ ᠬᠠᠶᠢᠴᠢᠨ ᠤ ᠪᠠᠷᠢᠭᠤᠯ ᠢ ᠭᠠᠷ ᠳᠤᠨᠢ ᠡᠪ ᠲᠠᠢ ᠠᠳᠬᠤᠭᠤᠯᠤᠭᠰᠠᠨ ᠭᠠᠶᠢᠬᠠᠮ᠎ᠠ ᠤᠷᠠᠨ ᠪᠤᠯᠬᠤ ᠶᠢᠨ ᠭᠠᠷ ᠤᠬᠠᠭᠠᠨ ᠢ ᠲᠠᠰᠬᠠᠭᠰᠠᠨ ᠵᠥᠢᠳᠡᠰᠥ ᠥᠬᠡᠳᠡᠰᠥ ᠨᠡᠶᠢᠯᠡᠬᠦᠯᠬᠦ ᠶᠢᠨ ᠵᠥᠢ ᠶᠢ ᠨᠢ ᠰᠠᠶᠢᠬᠠᠨ ᠮᠡᠳᠡᠬᠦᠯᠥᠭᠰᠡᠨ ᠵᠡᠬᠦᠥ ᠤᠳᠠᠰᠤᠨ ᠤ ᠵᠥᠢᠯ ᠤᠨ ᠵᠥᠭ ᠳᠤᠨᠢ ᠠᠶᠠᠳᠠᠢ ᠤᠷᠤᠭᠤᠯᠤᠭᠰᠠᠨ ᠠᠮᠠᠷᠠᠭ ᠬᠤᠩᠭᠤᠷ ᠥᠷ᠎ᠡ ᠶᠢ ᠪᠠᠨ ᠠᠯᠭᠠᠰᠠᠯ ᠥᠬᠡᠢ ᠰᠠᠨᠠᠨ ᠰᠤᠷᠭᠠᠭᠰᠠᠨ ᠠᠵᠢᠯ ᠵᠢᠷᠤᠮᠳᠥ ᠡᠵᠢ ᠶᠢᠨ ᠬᠢᠨᠢ ᠠᠴᠢᠯᠠᠯ ᠢ ᠬᠥᠨᠳᠥᠳᠬᠡᠨ ᠬᠠᠷᠢᠭᠤᠯᠮᠤ᠃ ᠨᠠᠢᠮᠠᠨ ᠨᠠᠰᠤ ᠶᠢ ᠬᠥᠷᠬᠦ ᠳᠤᠨᠢ ᠨᠠᠷᠢᠨ ᠵᠡᠬᠦᠥ ᠶᠢ ᠪᠠᠷᠢᠬᠤ ᠳᠤᠨᠢ ᠨᠠᠪᠴᠢ ᠴᠡᠴᠡᠭ ᠤᠷᠠᠯᠠᠭᠤᠯᠤᠨ ᠨᠠᠭᠠᠮᠠᠯ ᠤᠭᠠᠯᠵᠨ ᠬᠠᠳᠬᠠᠭᠤᠯᠤᠨ ᠨᠠᠷᠠᠨ ᠰᠠᠷᠠᠨ ᠢ ᠰᠡᠶᠢᠯᠡᠬᠦᠯᠥᠨ ᠨᠠᠴᠢᠨ ᠭᠠᠷᠤᠳᠢ ᠶᠢ ᠵᠢᠷᠤᠭᠤᠯᠤᠨ ᠨᠠᠭᠠᠳᠴᠤ ᠬᠥᠶᠥᠬᠦ ᠶᠢ ᠨᠢ ᠪᠠᠭᠠᠰᠭᠠᠭᠰᠠᠨ ᠨᠠᠮᠤᠭᠤᠨ ᠲᠤᠭᠳᠠᠭᠤᠨ ᠢ ᠰᠤᠷᠭᠠᠭᠰᠠᠨ ᠨᠢᠯᠬ᠎ᠠ ᠪᠠᠭ᠎ᠠ ᠪᠠᠨ ᠬᠠᠶᠢᠷᠠᠯᠠᠬᠤ ᠶᠢ ᠨᠠᠰᠤᠳᠠᠨ ᠶᠡᠬᠡᠰ ᠢᠶᠠᠨ ᠬᠥᠨᠳᠥᠯᠡᠬᠦ ᠶᠢ ᠨᠢᠮᠪᠠᠢ ᠬᠡᠴᠢᠶᠡᠩᠬᠦᠢ ᠪᠠᠶᠢᠬᠤ ᠶᠢ ᠨᠢᠭᠳᠠ ᠰᠤᠷᠭᠠᠨ ᠵᠠᠬᠢᠭᠰᠠᠨ ᠡᠩᠬᠦᠷᠡᠢ ᠬᠤᠩᠭᠤᠷ ᠥᠷ᠎ᠡ ᠶᠢ ᠢᠶᠠᠨ ᠡᠯᠢᠬᠡ ᠮᠡᠳᠡᠷᠢᠮ᠎ᠡ ᠰᠠᠨᠠᠭᠰᠠᠨ ᠡᠨᠡᠷᠢᠯ ᠶᠡᠬᠡᠳᠥ ᠡᠵᠢ ᠶᠢᠨ ᠬᠢᠨᠢ ᠡᠷᠬᠢᠮ ᠠᠴᠢᠯᠠᠯ ᠢ ᠬᠠᠷᠢᠭᠤᠯᠮᠤ᠃ ᠶᠢᠰᠥᠨ ᠨᠠᠰᠤ ᠶᠢ ᠬᠥᠷᠬᠦ ᠳᠤᠨᠢ ᠶᠡᠷᠥᠳᠡ ᠶᠢᠨ ᠶᠤᠰᠤ ᠶᠢ ᠰᠤᠷᠬᠤ ᠳᠤᠨᠢ ᠤᠷᠤᠭᠤ ᠲᠤᠷᠤᠭᠤ ᠤᠶᠤᠭᠤᠯᠵᠤ ᠤᠷᠠᠨ ᠥᠢᠯᠨ ᠶᠢ ᠪᠥᠷᠢᠳᠡᠬᠦᠯᠥᠭᠰᠡᠨ ᠤᠤᠭᠤᠵᠤ ᠢᠳᠡᠬᠦ ᠪᠠᠨ ᠮᠠᠷᠳᠠᠨ ᠤᠨᠳᠠᠬᠤ ᠨᠤᠶᠢᠷ ᠢᠶᠠᠨ ᠬᠠᠶᠠᠨ ᠠᠭᠤᠰᠬᠢ ᠵᠢᠷᠥᠬᠡ ᠪᠠᠨ ᠠᠭᠤᠳᠠᠯᠤᠨ ᠤᠶᠢᠳᠠᠯ ᠥᠬᠡᠢ ᠬᠥᠮᠥᠵᠢᠬᠦᠯᠥᠭᠰᠡᠨ ᠡᠨᠡᠷᠢᠯ ᠵᠤᠵᠠᠭᠠᠨ ᠡᠵᠢ ᠶᠢᠨ ᠬᠢᠨᠢ ᠡᠷᠬᠢᠮ ᠠᠴᠢᠯᠠᠯ ᠢ ᠬᠠᠷᠢᠭᠤᠯᠮᠤ᠃ ᠠᠷᠪᠠᠨ ᠨᠠᠰᠤ ᠶᠢ ᠬᠥᠷᠬᠦ ᠳᠤᠨᠢ ᠠᠯᠢᠶᠠᠷᠬᠠᠵᠤ ᠨᠠᠭᠠᠳᠬᠤ ᠶᠢ ᠴᠥᠬᠡᠴᠢᠯᠡᠵᠥ ᠠᠭᠠᠰᠢ ᠵᠠᠩ ᠢ ᠨᠢ ᠵᠠᠰᠠᠨ ᠠᠵᠢᠯ ᠤᠨ ᠶᠡᠭᠡ ᠶᠢ ᠰᠤᠷᠭᠠᠭᠰᠠᠨ ᠠᠷᠠᠳ ᠤᠨ ᠰᠤᠷᠭᠠᠭᠤᠯᠢ ᠳᠤ ᠤᠷᠤᠭᠤᠯᠵᠤ ᠠᠴᠢᠳᠤ ᠪᠠᠭᠰᠢ ᠳᠤ ᠲᠡᠪᠰᠢᠬᠦᠯᠥᠨ ᠠ ᠡ ᠶᠢ ᠲᠠᠨᠢᠭᠤᠯᠤᠨ ᠠᠯᠳᠠᠨ ᠥᠰᠥᠭ ᠢ ᠰᠤᠷᠭᠠᠭᠰᠠᠨ ᠡᠷᠳᠡᠮ ᠪᠤᠯᠪᠠᠰᠤᠷᠠᠯ ᠳᠤ ᠬᠡᠴᠢᠶᠡᠯᠬᠡᠭᠰᠡᠨ ᠡᠷᠬᠢᠮ ᠥᠢᠯᠡᠰ ᠲᠤ ᠮᠡᠷᠡᠶᠢᠯᠬᠡᠭᠰᠡᠨ ᠡᠨᠡᠷᠢᠯ ᠵᠤᠵᠠᠭᠠᠨ ᠡᠵᠢ ᠶᠢᠨ ᠬᠢᠨᠢ ᠡᠷᠬᠢᠮ ᠠᠴᠢᠯᠠᠯ ᠢ ᠬᠠᠷᠢᠭᠤᠯᠮᠤ᠃ ᠠᠷᠪᠠ ᠬᠡᠳᠥ ᠶᠢ ᠨᠢ ᠥᠩᠬᠡᠷᠡᠬᠡᠳ ᠬᠤᠷᠢᠨ ᠨᠠᠰᠤ ᠶᠢ ᠠᠶᠠᠳᠠᠬᠤ ᠳᠤ ᠠᠯᠢ ᠰᠠᠶᠢᠬᠠᠨ ᠢ ᠡᠮᠥᠰᠥᠬᠦᠯᠥᠨ ᠠᠯᠳᠠ ᠮᠥᠩᠬᠦ ᠶᠢ ᠡᠳ᠋ᠯᠡᠬᠦᠯᠥᠨ ᠵᠠᠩ ᠰᠠᠶᠢᠳᠠᠢ ᠶᠠᠪᠤᠭ ᠡ ᠬᠡᠵᠤ ᠵᠠᠬᠢᠵᠤ ᠤᠯᠠᠨ ᠰᠤᠷᠭᠠᠭᠰᠠᠨ ᠠᠵᠢᠯ ᠰᠠᠶᠢᠳᠠᠢ ᠪᠤᠯᠤᠭ ᠬᠡᠵᠤ ᠠᠩᠬᠠᠷᠴᠤ ᠶᠡᠬᠡᠯ᠎ᠡ ᠬᠥᠮᠥᠵᠢᠬᠦᠯᠥᠭᠰᠡᠨ ᠬᠡᠤᠬᠡᠨ ᠥᠷ᠎ᠡ ᠪᠠᠨ ᠲᠡᠵᠢᠬᠡᠬᠡᠬᠡᠳ ᠬᠥᠮᠥᠨ ᠤ ᠵᠡᠷᠬᠡ ᠳᠤ ᠬᠥᠷᠬᠡᠬᠡᠳ ᠬᠥᠨᠳᠥᠳᠥ ᠶᠤᠰᠤᠨ ᠢ ᠲᠠᠭᠠᠭᠤᠯᠤᠨ ᠬᠥᠷᠬᠡᠨ ᠤ ᠭᠠᠵᠠᠷ ᠮᠤᠷᠳᠠᠭᠤᠯᠬᠤ ᠳᠤ ᠥᠯᠥᠬᠡᠢ ᠲᠠᠢ ᠠᠴᠠ ᠡᠬᠢᠯᠡᠬᠡᠳ ᠥᠪᠡᠷ ᠤᠨ ᠬᠡᠮᠡᠨ ᠰᠠᠨᠠᠭᠰᠠᠨ ᠥᠯᠵᠡᠢ ᠲᠠᠢ ᠴᠠᠭ ᠨᠢ ᠤᠶᠢᠷᠠᠳᠤᠵᠤ ᠥᠰᠥ ᠶᠢ ᠨᠢ ᠵᠠᠳᠠᠯᠠᠬᠤ ᠪᠤᠯᠤᠭᠰᠠᠨ ᠳᠤ ᠲᠡᠭᠰᠢ ᠬᠤᠶᠠᠷ ᠴᠢᠬᠢᠨ ᠳᠤᠨᠢ ᠰᠤᠨᠤᠰᠬᠠᠯ ᠥᠬᠡᠢ ᠨᠢᠭᠤᠨ ᠪᠠᠶᠢᠵᠤ ᠲᠡᠯᠬᠡᠷᠡᠩᠬᠦᠢ ᠬᠤᠶᠠᠷ ᠨᠢᠳᠤᠨ ᠳᠤᠨᠢ ᠥᠵᠡᠬᠦᠯᠥᠯ ᠥᠬᠡᠢ ᠲᠠᠯᠳᠠᠯᠤᠨ ᠪᠠᠶᠢᠵᠤ ᠲᠠᠷᠬᠠᠨ ᠤ ᠰᠠᠶᠢᠨ ᠢ ᠵᠠᠯᠠᠵᠤ ᠲᠠᠪᠳᠠᠮᠠᠯ ᠮᠥᠩᠬᠦ ᠶᠢ ᠲᠠᠪᠳᠠᠭᠤᠯᠤᠨ ᠤᠷᠠᠨ ᠤ ᠰᠠᠶᠢᠨ ᠢ ᠵᠠᠯᠠᠵᠤ ᠤᠭᠠᠯᠵᠠᠨ ᠬᠤᠪᠴᠠᠰᠤ ᠤᠶᠤᠭᠤᠯᠤᠨ ᠡᠭᠰᠢᠭᠳᠦ ᠲᠠᠭᠤᠤ ᠪᠠᠨ ᠡᠷᠬᠦᠯᠴᠡᠨ ᠡᠵᠢ ᠠᠪᠤ ᠨᠢ ᠤᠶᠠᠷᠠᠯᠴᠠᠨ ᠡᠯᠢᠬᠡᠨ ᠰᠠᠳᠤᠨ ᠢ ᠨᠢ ᠴᠤᠭᠯᠠᠭᠤᠯᠤᠨ ᠡᠩ ᠥᠬᠡᠢ ᠨᠠᠶᠢᠷ ᠢ ᠪᠡᠯᠡᠳᠬᠡᠬᠦ ᠳᠤ ᠬᠠᠮᠢᠶᠠᠳᠤᠨ ᠰᠠᠳᠤᠨ ᠢ ᠠᠪᠴᠢᠷᠠᠭᠠᠳ ᠬᠠᠵᠠᠭᠤ ᠲᠠᠯ᠎ᠠ ᠠᠴᠠ ᠨᠢ ᠲᠥᠰᠢᠬᠦᠯᠥᠨ ᠥᠶ᠎ᠡ ᠶᠢᠨ ᠨᠥᠬᠦᠳ ᠢ ᠨᠢ ᠠᠪᠴᠢᠷᠠᠨ ᠡᠮᠥᠨ᠎ᠡ ᠬᠤᠶᠢᠨ᠎ᠠ ᠠᠴᠠ ᠨᠢ ᠲᠠᠯᠳᠠᠯᠠᠭᠤᠯᠤᠯᠠᠨ ᠬᠠᠮᠪᠤ ᠲᠤᠷᠭ᠎ᠠ ᠶᠢ ᠡᠮᠥᠰᠬᠡᠵᠥ ᠬᠠᠮ ᠲᠡᠷᠬᠡᠨ ᠳᠤ ᠰᠠᠭᠤᠯᠭᠠᠵᠤ ᠬᠠᠮᠤᠭ ᠰᠠᠳᠤᠨ ᠢᠶᠠᠷ ᠨᠢ ᠬᠥᠷᠢᠶᠡᠯᠡᠬᠦᠯᠵᠥ ᠬᠠᠷᠢᠯᠠᠭᠰᠠᠨ ᠭᠠᠵᠠᠷ ᠨᠢ ᠬᠥᠷᠬᠡᠭᠰᠡᠨ ᠳᠤ ᠡᠷᠡᠯᠬᠡᠭ ᠮᠤᠩᠭᠤᠯ ᠤᠨ ᠵᠠᠩᠰᠢᠯ ᠢᠶᠠᠷ ᠡᠷᠳᠡᠨ ᠤ ᠰᠠᠶᠢᠬᠠᠨ ᠲᠠᠳᠬᠠᠯ ᠢᠶᠠᠷ ᠡᠴᠢᠬᠡ ᠲᠡᠬᠡᠳᠥᠰ ᠤᠨ ᠥᠶ᠎ᠡ ᠶᠢᠨ ᠡᠷᠬᠢᠮ ᠠᠷᠢᠭᠤᠨ ᠤᠳᠤᠮᠰᠢᠯ ᠢᠶᠠᠷ ᠡᠯᠢᠬᠡᠨ ᠬᠠᠶᠢᠷᠠᠳᠤ ᠥᠷ᠎ᠡ ᠶᠢ ᠢᠶᠠᠨ ᠡᠩᠬᠦᠷᠡᠶᠢᠯᠡᠨ ᠪᠥᠪᠡᠶᠢᠯᠡᠵᠥ ᠥᠰᠬᠡᠭᠰᠡᠨ ᠡᠨᠡᠷᠢᠯ ᠶᠡᠬᠡᠳᠥ ᠡᠵᠢ ᠲᠠᠨ ᠤ ᠡᠬᠡ ᠶᠢᠨ ᠴᠠᠭᠠᠨ ᠰᠥ ᠶᠢ ᠬᠠᠷᠢᠭᠤᠯᠬᠤ ᠨᠢ᠄ ᠠᠯᠳᠠᠨ ᠠᠶᠠᠭᠠᠨ ᠳᠤ ᠮᠡᠯᠮᠡᠯᠵᠡᠬᠦᠯᠥᠭᠰᠡᠨ ᠠᠩᠬᠢᠷ ᠴᠠᠭᠠᠨ ᠰᠥ ᠠᠷᠳᠠᠢ ᠲᠤᠷᠭᠠᠨ ᠲᠡᠬᠡᠷ᠎ᠡ ᠠᠯᠠᠭᠯᠠᠭᠤᠯᠵᠤ ᠨᠡᠬᠡᠬᠡᠭᠰᠡᠨ ᠬᠢᠪᠢᠰ ᠲᠡᠷᠢᠬᠦᠳᠡᠨ ᠢ ᠤᠶᠠᠬᠠᠨ ᠬᠤᠩᠭᠤᠷ ᠥᠷ᠎ᠡ ᠪᠠᠨ ᠤᠭᠳᠤᠨ ᠪᠠᠭᠤᠯᠭᠠᠬᠤ ᠶᠢᠨ ᠤᠴᠢᠷ ᠲᠤ ᠤᠷᠤᠭ ᠬᠤᠳᠠ ᠶᠢᠨ ᠴᠢᠨᠢ ᠭᠠᠵᠠᠷ ᠠᠴᠠ ᠬᠠᠷᠠᠮᠵᠢ ᠪᠤᠯᠭᠠᠨ ᠲᠡᠪᠰᠢᠬᠦᠯᠵᠥ ᠪᠠᠶᠢᠨ᠎ᠠ᠃ ᠪᠤᠯᠪᠷᠠᠢ ᠬᠠᠶᠢᠷᠠᠳᠤ ᠥᠷ᠎ᠡ ᠶᠢ ᠪᠠᠨ ᠪᠤᠭᠴᠢᠯᠠᠨ ᠪᠠᠭᠤᠯᠭᠬᠤ ᠶᠢᠨ ᠤᠴᠢᠷ ᠲᠤ ᠪᠤᠶᠠᠨ ᠢᠪᠡᠬᠡᠯ ᠲᠡᠬᠦᠰ ᠪᠤᠭᠤᠷᠤᠯ ᠡᠵᠢ ᠲᠠᠨ ᠳᠤ ᠬᠠᠷᠢ ᠤᠷᠤᠭ ᠤᠨ ᠴᠢᠨᠢ ᠭᠠᠵᠠᠷ ᠠᠴᠠ ᠬᠠᠷᠠᠮᠵᠢ ᠪᠤᠯᠭᠠᠨ ᠲᠡᠪᠰᠢᠬᠦᠯᠵᠥ ᠪᠠᠶᠢᠨ᠎ᠠ ᠬᠠᠮᠤᠭ ᠰᠠᠶᠢᠨ ᠤᠴᠠᠷᠠᠯ ᠪᠥᠷᠢᠯᠳᠥᠨ ᠬᠠᠮᠳᠤ ᠲᠡᠭᠰᠢᠳᠡ ᠪᠠᠨ ᠵᠢᠷᠭᠠᠬᠤ ᠪᠤᠯᠳᠤᠭᠠᠢ︕
 
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠤᠬᠠᠢ ᠮᠤᠤᠷ ᠦᠰᠢᠶ᠎ᠡ ᠲᠠᠢ ᠪᠤᠯᠤᠭᠰᠠᠨ ᠳᠤᠬᠠᠢ ᠳᠤᠮᠤᠭ
ᠳᠠᠯᠠᠨ ᠬᠤᠳᠠᠯᠴᠢ
ᠤᠢ ᠪᠢᠳᠠᠭᠤ ᠠᠬ᠎ᠠ ᠲᠡᠭᠦᠥ ᠭᠤᠷᠪᠠ ᠤᠬᠠᠭᠠᠨ ᠰᠤᠷᠤᠭᠰᠠᠨ ᠨᠢ
ᠠᠪᠳᠠᠷᠠᠳᠦ ᠶᠢᠨ ᠲᠤᠮᠤᠭ
ᠮᠣᠩᠭᠤᠯᠴᠤᠳ ᠤᠨ ᠠᠷᠪᠠᠨ ᠬᠤᠶᠠᠷ ᠵᠢᠯ ᠤᠨ ᠲᠤᠬᠠᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号