| ᠨᠠᠮᠵᠢᠯ ᠤᠨ ᠮᠥᠩᠬᠡᠪᠠᠶᠠᠷ ︵ᠥᠪᠤᠷ ᠮᠤᠩᠭᠤᠯ ᠤᠨ ᠰᠤᠷᠭᠠᠨ ᠬᠥᠮᠤᠵᠢᠯ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠ︶ | | ᠬᠠᠪᠰᠤᠷᠭᠠ ᠲᠠᠢ ᠬᠠᠪᠤᠷ ᠤᠨ ᠡᠳᠦᠷ ᠤᠳ ᠢ ᠶᠠᠭᠠᠬᠢᠵᠤ ᠴᠦ ᠲᠤᠭᠤᠯᠤᠭᠠ ᠪᠤᠯ᠂ ᠡᠵᠢ ᠮᠢᠨᠢ | ᠬᠠᠶᠢᠷᠠᠲᠠᠢ ᠦᠷᠡ ᠪᠠᠨ ᠰᠠᠨᠠᠭᠠᠳ ᠦᠮᠦᠯᠵᠡᠵᠦ ᠰᠠᠭᠤᠭᠠ ᠪᠤᠯ ᠦᠦ᠂ ᠶᠠᠭᠠᠬᠢᠭᠠ ᠪᠤᠯ | ᠬᠤᠯᠠ ᠶᠢᠨ ᠴᠡᠩᠬᠡᠷ ᠠᠭᠤᠯᠠᠰ ᠤᠨ ᠤᠨᠢᠶᠠᠷ ᠰᠢᠩᠭᠡᠲᠡᠯᠡ ᠪᠠᠷᠠᠯᠠᠵᠤ | ᠬᠤᠨᠤᠬ ᠡᠳᠦᠷ ᠤᠨ ᠡᠭᠡᠯᠵᠢᠨ ᠳᠤ ᠰᠡᠳᠬᠢᠯ ᠢᠶᠠᠨ ᠰᠡᠮᠡᠷᠡᠲᠡᠯᠡ ᠬᠦᠯᠢᠶᠡᠭᠡ ᠪᠤᠯ ᠤᠤ | ᠬᠠᠶᠢᠷᠠ ᠲᠦᠤᠬᠡᠬᠦᠯᠦᠨ ᠦᠷᠡ ᠪᠠᠨ ᠦᠨᠦᠷᠯᠡᠬᠦ ᠡᠵᠢ ᠲᠠᠨ ᠤ ᠪᠠᠨ ᠲᠡᠷᠭᠡᠳᠡ | ᠬᠠᠪᠤᠷ ᠤᠨ ᠬ᠋ᠤᠷᠪᠠᠨ ᠰᠠᠷᠠ ᠪᠠᠷ ᠤᠴᠢᠬᠤ ᠳᠤ ᠪᠠᠨ ᠯᠡ ᠨᠢᠭᠡ ᠤᠴᠢᠨᠡ | ᠬᠦᠯᠢᠶᠡᠭᠰᠡᠨ ᠰᠡᠳᠬᠢᠯ ᠢ ᠲᠠᠨᠢ ᠠᠮᠠᠷᠠᠭᠠᠬᠤ ᠪᠠᠷ ᠬᠦᠦ ᠨᠢ ᠶᠠᠪᠤᠭᠠᠳ ᠤᠴᠢᠨᠡ ᠡ | ᠠᠭᠠᠭᠢᠮᠠ ᠵᠤᠨ ᠤ ᠨᠠᠷᠠᠨ ᠳᠤ ᠰᠢᠷᠠᠭᠳᠠᠵᠤ ᠯᠡ ᠶᠠᠪᠤᠬ᠋ᠠ ᠪᠤᠯ ᠦᠦ᠂ ᠡᠵᠢ ᠮᠢᠨᠢ | ᠠᠯᠠᠭᠬᠠᠨ ᠦᠷᠡ ᠪᠠᠨ ᠬᠦᠯᠢᠶᠡᠭᠡᠳ ᠲᠡᠪᠡᠳᠡᠵᠦ ᠰᠠᠭᠤᠬ᠋ᠠ ᠪᠤᠯ ᠦᠦ᠂ ᠶᠠᠭᠠᠬᠢᠭᠠ ᠪᠤᠯ | ᠠᠯᠤᠰ ᠤᠨ ᠬᠦᠭᠡ ᠵᠡᠷᠭᠡᠯᠭᠡ ᠶᠢ ᠲᠠᠯᠠ ᠳᠤ ᠪᠠᠨ ᠪᠠᠭᠤᠲᠠᠯᠠ ᠬᠠᠷᠠᠵᠤ | ᠤᠷᠲᠤ ᠵᠠᠮ ᠤᠨ ᠦᠵᠦᠭᠦᠷ ᠢ ᠠᠨᠢᠰᠬᠠ ᠪᠠᠨ ᠴᠢᠯᠡᠲᠡᠯᠡ ᠰᠠᠷᠠᠪᠴᠢᠯᠠᠬ᠋ᠠ ᠪᠤᠯ ᠤᠤ | ᠵᠢᠷᠭᠠᠯ ᠲᠦᠬᠡᠬᠡᠨ ᠦᠷᠡ ᠪᠠᠨ ᠲᠡᠪᠡᠷᠢᠬᠦ ᠡᠵᠢ ᠲᠠᠨ ᠤ ᠪᠠᠨ ᠲᠡᠷᠭᠡᠳᠡ | ᠵᠤᠨ ᠤ ᠭᠤᠷᠪᠠᠨ ᠰᠠᠷᠠ ᠪᠠᠷ ᠤᠴᠢᠬᠤ ᠳᠤ ᠪᠠᠨ ᠯᠡ ᠨᠢᠭᠡ ᠤᠴᠢᠨᠠ | ᠵᠠᠭᠠᠯ ᠪᠤᠭᠤᠷᠤᠯ ᠡᠵᠢ ᠪᠠᠷ ᠢᠶᠠᠨ ᠦᠨᠦᠰᠦᠬᠦᠯᠬᠦ ᠪᠠᠷ ᠬᠦᠦ ᠨᠢ ᠤᠴᠢᠨᠠ ᠡ | ᠤᠶᠢᠲᠠᠢ ᠨᠠᠮᠤᠷ ᠤᠨ ᠨᠠᠪᠴᠢᠰ ᠬᠡᠶᠢᠰᠬᠦ ᠪᠠᠷ ᠭᠤᠨᠢᠵᠤ ᠶᠠᠪᠤᠭᠠ ᠪᠤᠯ ᠦᠦ᠂ ᠡᠵᠢ ᠮᠢᠨᠢ | ᠠᠯᠢᠶᠠᠬᠠᠨ ᠬᠦᠦ ᠪᠠᠨ ᠵᠡᠭᠦᠳᠦᠯᠡᠭᠡᠳ ᠭᠡᠭᠡᠯᠵᠡᠵᠦ ᠰᠠᠭᠤᠭᠠ ᠪᠤᠯ ᠤᠤ᠂ ᠶᠠᠭᠠᠬᠢᠭᠠ ᠪᠤᠯ | ᠠᠯᠤᠰᠷᠠᠨ ᠬᠤᠯᠠᠳᠠᠬᠤ ᠲᠡᠭᠷᠢ ᠶᠢᠨ ᠬᠠᠶᠠᠭᠠ ᠶᠢ ᠰᠠᠨᠠᠭᠠ ᠠᠯᠳᠠᠩᠬᠠᠨ ᠰᠢᠷᠲᠠᠵᠤ | ᠠᠶᠠᠨ ᠤ ᠰᠢᠪᠠᠭᠤᠳ ᠤᠨ ᠬᠤᠶᠢᠨᠠ ᠠᠴᠠ ᠰᠦ ᠡᠷᠭᠦᠨ ᠵᠤᠭᠰᠤᠭᠠ ᠪᠤᠯ ᠤᠤ | ᠢᠨᠢᠶᠡᠳᠦ ᠭᠡᠷᠡᠯᠲᠦᠭᠦᠯᠦᠨ ᠦᠷᠡ ᠪᠠᠨ ᠲᠠᠭᠠᠯᠠᠬᠤ ᠡᠵᠢ ᠲᠠᠨ ᠤ ᠪᠠᠨ ᠳᠡᠷᠭᠡᠳᠡ | ᠨᠠᠮᠤᠷ ᠤᠨ ᠭᠤᠷᠪᠠᠨ ᠰᠠᠷᠠ ᠪᠠᠷ ᠤᠴᠢᠬᠤ ᠳᠤ ᠪᠠᠨ ᠯᠡ ᠨᠢᠭᠡ ᠤᠴᠢᠨᠠ | ᠠᠵᠠᠢ ᠪᠤᠭᠤᠷᠤᠯ ᠡᠵᠢ ᠶᠢ ᠪᠠᠨ ᠵᠢᠷᠭᠠᠭᠠᠬᠤ ᠪᠠᠷ ᠬᠦᠦ ᠨᠢ ᠤᠴᠢᠨᠠ ᠡ | ᠬᠠᠶᠢᠷᠭᠤ ᠡᠪᠦᠯ ᠤᠨ ᠬᠦᠢᠳᠡᠨ ᠳᠤ ᠲᠠᠭᠠᠷᠠᠵᠦ ᠯᠠ ᠶᠠᠪᠤᠬ᠋ᠠ ᠪᠤᠯ ᠦᠦ᠂ ᠡᠵᠢ ᠮᠢᠨᠢ | ᠵᠢᠬᠡᠭᠦᠨ ᠰᠦᠨᠢ ᠶᠢᠨ ᠤᠷᠲᠤ ᠳᠤ ᠵᠢᠩᠳᠠᠵᠦ ᠰᠠᠭᠤᠭᠠ ᠪᠤᠯ ᠤᠤ᠂ ᠶᠠᠭᠠᠬᠢᠭᠠ ᠪᠤᠯ | ᠴᠠᠰᠤ ᠲᠠᠢ ᠲᠠᠯᠠ ᠶᠢᠨ ᠢᠶᠠᠨ ᠡᠯᠢᠭᠡᠨ ᠳᠤ ᠴᠠᠩ ᠰᠠᠪᠰᠠᠭᠤᠯᠤᠨ ᠬᠦᠯᠢᠶᠡᠵᠦ | ᠴᠡᠯᠡᠶᠢᠭᠰᠡᠨ ᠬᠦᠳᠦᠯ ᠤᠨ ᠤᠷᠤᠢ ᠪᠠᠷ ᠬᠠᠷᠠᠭᠠ ᠪᠡᠯᠴᠢᠬᠡᠨ ᠵᠤᠭᠰᠤᠭᠠ ᠪᠤᠯ ᠤᠤ | ᠡᠨᠡᠷᠢᠯ ᠬᠠᠯᠭᠢᠭᠤᠯᠤᠨ ᠦᠷᠡ ᠪᠠᠨ ᠤᠭᠳᠤᠬᠤ ᠡᠵᠢ ᠲᠠᠨ ᠤ ᠪᠠᠨ ᠳᠡᠷᠭᠡᠳᠡ | ᠡᠪᠦᠯ ᠤᠨ ᠭᠤᠷᠪᠠᠨ ᠰᠠᠷᠠ ᠪᠠᠷ ᠤᠴᠢᠬᠤ ᠳᠤ ᠪᠠᠨ ᠯᠡ ᠨᠢᠭᠡ ᠤᠴᠢᠨᠠ | ᠦᠷᠦᠰᠢᠶᠡᠯᠲᠦ ᠡᠵᠢ ᠲᠠᠨ ᠳᠤ ᠪᠠᠨ ᠮᠦᠷᠭᠦᠨ ᠵᠤᠯᠭᠠᠬᠤ ᠪᠠᠷ ᠤᠴᠢᠨᠠ ᠡ | ᠲᠤᠩᠭᠤᠢ ᠤᠷᠴᠢᠯᠠᠩ ᠤᠨ ᠲᠡᠩᠭᠡᠯᠢᠭ ᠳᠠᠭᠠᠵᠤ ᠲᠦᠷᠪᠠᠨ ᠴᠠᠬ ᠨᠢ ᠨᠡᠭᠦᠳᠡᠯᠯᠡᠨᠡ | ᠲᠠᠯᠠᠢ ᠶᠡᠭᠡ ᠬᠠᠶᠢᠷᠠ ᠪᠠᠨ ᠢᠪᠢᠯᠦᠭᠦᠯᠵᠦ ᠡᠵᠢ ᠮᠢᠨᠢ ᠨᠠᠮᠠ ᠶᠢ ᠪᠠᠨ ᠬᠦᠯᠢᠶᠡᠨᠡ | ᠬᠠᠮᠢᠭᠠ ᠬᠤᠯᠠ ᠶᠢᠨ ᠲᠡᠭᠷᠢ ᠳᠤᠤᠷᠠ ᠬᠦᠯ ᠢᠶᠠᠨ ᠤᠯᠬᠤ ᠦᠭᠡᠢ ᠡᠭᠦᠷᠲᠦᠭᠡ ᠪᠤᠯ ᠭᠡᠵᠦ | ᠬᠠᠶᠢᠯᠭᠠᠨ ᠰᠡᠳᠬᠢᠯ ᠢᠶᠠᠨ ᠦᠶᠡᠯᠵᠡᠭᠦᠯᠵᠤ ᠳᠤᠷᠠᠰᠤᠨ ᠳᠤᠷᠠᠰᠤᠨ ᠬᠦᠯᠢᠶᠡᠵᠦ ᠪᠠᠶᠢᠬᠤ ᠡ | ᠬᠦᠮᠦᠨ ᠤ ᠨᠤᠲᠤᠭ ᠤᠨ ᠵᠢᠪᠠᠷ ᠲᠤ ᠵᠢᠩᠳᠡᠵᠦ ᠶᠠᠪᠤᠯᠠ᠂ ᠬᠦᠦ ᠴᠢᠨᠢ | ᠬᠡᠵᠢᠶᠡ ᠴᠦ ᠬᠠᠭᠤᠴᠢᠷᠠᠳᠠᠭ ᠦᠭᠡᠢ ᠨᠤᠲᠤᠭ ᠢᠶᠠᠨ ᠵᠤᠷᠢᠭᠠᠳ ᠯᠡ ᠤᠴᠢᠨᠠ᠂ ᠡᠵᠢ ᠡ | ᠬᠦᠯᠢᠶᠡᠵᠦ ᠲᠡᠩᠰᠡᠯᠬᠦ ᠲᠠᠨ ᠳᠤ ᠪᠠᠨ ᠬᠦᠷᠦᠭᠡᠳ ᠯᠡ ᠤᠴᠢᠨᠠ ᠡ᠂ ᠦᠷᠡ ᠴᠢᠨᠢ | | | ᠢᠷᠡᠯᠲᠡ᠄ ᠠᠯᠠᠱᠠ ᠵᠡᠭᠦᠨ ᠬᠤᠰᠢᠭᠤᠨ ᠤ ᠤᠳᠬᠠ ᠤᠷᠠᠯᠢᠭ ᠤᠨ ᠬᠢᠨ ᠤ ᠬᠤᠯᠪᠣᠭᠠ | ᠡ᠊ · ᠪᠤᠯᠠᠭ ᠬᠠᠩᠭᠠᠪᠠ᠃ |