ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠰᠢᠨ᠎ᠡ ᠬᠦᠳᠡᠭᠡ
ᠢᠷᠡᠬᠦ ᠶᠢᠨ ᠰᠢᠯᠥᠭ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-11-20
    ᠤᠬᠠᠶᠢᠯᠠᠬᠤ ᠲᠠᠭᠤ ᠪᠠᠷ ᠢᠶᠠᠨ ᠠᠩᠬ᠎ᠠ ᠪᠢ ᠲᠠᠨᠠᠷ ᠲᠠᠢ ᠪᠠᠨ ᠵᠤᠯᠭᠠᠭᠰᠠᠨ       ᠤᠷᠲᠤ ᠶᠢᠨ ᠲᠠᠭᠤᠤ᠂ ᠡᠷ᠎ᠡ ᠶᠢᠨ ᠭᠤᠷᠪᠠᠨ ᠨᠠᠭᠠᠳᠤᠮ ᠲᠠᠢ ᠨᠤᠲᠤᠭ ᠲᠤ ᠢᠷᠡᠭᠰᠡᠨ       ᠡᠬᠡ ᠠᠴᠠ ᠮᠢᠨᠢ ᠦᠪᠯᠡᠵᠤ ᠦᠭᠭᠦᠭᠰᠡᠨ ᠢᠳᠡᠷᠡᠭᠦᠨ ᠪᠡᠶ᠎ᠡ       ᠡᠴᠢᠭᠡ ᠠᠴᠠ ᠮᠢᠨᠢ ᠰᠤᠷᠭᠠᠨ ᠵᠠᠬᠢᠭᠰᠠᠨ ᠬᠠᠲᠠᠭᠤ ᠵᠠᠬᠢᠶ᠎ᠠ ᠢ ᠡᠪᠦᠷᠯᠡᠭᠡᠳ ᠢᠷᠡᠭᠰᠡᠨ       ᠡᠬᠡ ᠪᠦᠮᠪᠤᠷᠴᠡᠭ ᠤᠨ ᠴᠢᠮᠬᠢ ᠰᠢᠷᠤᠢ ᠲᠠᠢ ᠨᠢ ᠠᠨᠳᠠ ᠪᠤᠯᠤᠶ᠎ᠠ ᠭᠡᠵᠤ ᠢᠷᠡᠭᠰᠡᠨ ᠶᠤᠮ ᠪᠢ                         ᠨᠠᠮᠠᠢ ᠲᠤᠰᠤᠨ ᠬᠦᠯᠢᠶᠡᠭᠰᠡᠨ ᠨᠢ ᠬᠠᠳᠠᠭ‌‍ᠰᠢᠭ᠋ ᠬᠦᠬᠡ ᠲᠡᠭᠷᠢ       ᠲᠦᠷᠦᠬᠦ ᠶᠢᠨ ᠵᠢᠷᠭᠠᠯ ᠢᠶᠠᠷ ᠨᠢᠯᠬ᠎ᠠ ᠶᠢᠨ ᠪᠦᠦᠪᠡᠢ ᠶᠢ ᠤᠷᠤᠯᠠᠭᠰᠠᠨ       ᠲᠠᠯ᠎ᠠ ᠶᠢᠨ ᠴᠡᠴᠡᠭᠡᠰ ᠰᠦᠨᠢ ᠳᠤ ᠪᠠᠨ ᠤᠷᠭᠤᠵᠤ ᠨᠠᠮᠠᠢ ᠰᠤᠴᠢᠭᠠᠭᠰᠠᠨ       ᠠᠮᠢ ᠲᠠᠢ ᠴᠢᠯᠠᠭᠤᠤᠳ ᠳᠤ ᠬᠦᠢ ᠵᠠᠯᠭᠠᠨ ᠵᠢᠵᠢᠭ ᠬᠠᠶᠢᠷᠬᠠᠭ ᠲᠤ ᠪᠦᠳᠦᠷᠢᠭᠰᠡᠨ       ᠲᠦᠷᠦᠮᠡᠭᠴᠡ ᠲᠤᠭᠤᠨᠤ ᠪᠠᠷ ᠮᠢᠨᠢ ᠬᠠᠷᠠᠭᠳᠠᠭᠰᠠᠨ ᠬᠦᠬᠡ ᠲᠡᠭᠷᠢ —— ᠮᠢᠨᠤ ᠲᠡᠯᠡᠬᠡᠢ ᠪᠤᠯᠤᠭᠰᠠᠨ                                                       ᠦᠷᠯᠤᠭᠡ ᠪᠦᠷᠢ ᠪᠢ ᠦᠦᠷ ᠤᠨ ᠲᠤᠶᠠᠭ᠎ᠠ ᠶᠢ ᠤᠭᠲᠤᠵᠤ ᠢᠷᠡᠭᠰᠡᠨ       ᠦᠳᠡᠰᠢ ᠪᠦᠷᠢ ᠪᠢ ᠲᠤᠯᠤᠩ ᠤᠨ ᠲᠤᠶᠠᠭ᠎ᠠ ᠶᠢ ᠦᠳᠡᠵᠤ ᠢᠷᠡᠭᠰᠡᠨ       ᠠᠭᠤᠯᠠ ᠶᠢᠨ ᠴᠠᠰᠤ ᠬᠠᠶᠢᠯᠵᠤ ᠨᠠᠮᠠᠢ ᠬᠤᠯᠠᠭᠠᠢ ᠰᠢᠷᠲᠡᠭᠰᠡᠨ       ᠡᠭᠦᠯᠡᠰ ᠤᠳᠤᠳ ᠢᠶᠠᠨ ᠤᠷᠬᠢᠵᠤ᠂ ᠨᠠᠮᠠᠢ ᠪᠠᠷᠠᠯᠠᠭᠰᠠᠨ       ᠪᠢ ᠲᠤᠯᠤᠭᠠᠨ ᠪᠤᠷᠬᠠᠨ ᠠᠴᠠ ᠴᠠᠬᠢᠭᠤᠷ ᠠᠪᠤᠶ᠎ᠠ ᠭᠡᠵᠤ ᠢᠷᠡᠭᠰᠡᠨ ᠶᠤᠮ         ᠲᠡᠮᠡᠭᠡᠨ ᠪᠦᠬᠦᠨ ᠤ ᠲᠤᠮᠳᠠ ᠠᠴᠠ ᠠᠯᠤᠰ ᠢ ᠬᠠᠷᠠᠬᠤ ᠭᠡᠵᠤ ᠦᠨᠳᠦᠷ ᠲᠤ ᠲᠡᠭᠦᠯᠢᠭᠰᠡᠨ       ᠮᠤᠷᠢᠨ ᠲᠦᠪᠡᠷᠭᠡᠨ ᠤ ᠲᠠᠭᠤ ᠴᠢᠩᠨᠠᠵᠤ ᠨᠤᠲᠤᠭ ᠢᠶᠠᠨ ᠤᠯᠵᠤ ᠢᠷᠡᠭᠰᠡᠨ       ᠠᠩᠬ᠎ᠠ ᠬᠠᠷᠠᠭᠰᠠᠨ ᠮᠢᠨᠤ ᠲᠡᠯᠡᠬᠡᠢ ᠨᠤᠭᠤᠭᠠᠨ ᠪᠠᠶᠢᠭᠰᠠᠨ ᠠᠴᠠ ᠪᠢ ᠨᠠᠪᠴᠢᠨ ᠳᠤ ᠲᠤᠷᠠᠯᠠᠵᠤ ᠢᠷᠡᠭᠰᠡᠨ                                                     ᠠᠩᠬ᠎ᠠ ᠰᠤᠷᠤᠭᠰᠠᠨ ᠬᠡᠯᠡ ᠮᠢᠨᠢ ᠪᠤᠰᠤᠭ᠎ᠠ ᠪᠠᠶᠢᠭᠰᠠᠨ ᠠᠴᠠ ᠪᠢ ᠪᠤᠰᠤᠳ ᠤᠨ ᠡᠮᠤᠨ᠎ᠡ ᠰᠦᠬᠦᠷᠡᠬᠦ ᠦᠭᠡᠢ ᠭᠡᠵᠤ ᠢᠷᠡᠭᠰᠡᠨ                                                                       ᠤᠨᠠᠭᠠᠨ ᠨᠠᠰᠤ ᠪᠠᠨ ᠰᠤᠳᠤᠨ ᠦᠩᠭᠡᠷᠭᠡᠶ᠎ᠡ ᠭᠡᠵᠤ ᠴᠢᠯᠠᠭᠤᠨ ᠲᠤᠭᠯᠠᠭᠠᠮ ᠲᠠᠢ ᠢᠷᠡᠭᠰᠡᠨ         ᠪᠢ ᠮᠤᠩᠭᠤᠯ ᠶᠢᠨ ᠵᠤᠷᠰᠢᠯ ᠢᠶᠠᠷ ᠤᠪᠤᠭ᠎ᠠ ᠢᠶᠠᠨ ᠵᠦᠪ ᠲᠤᠭᠤᠷᠢᠵᠤ ᠢᠷᠡᠭᠰᠡᠨ       ᠪᠢ ᠨᠠᠷᠠᠨ ᠤ ᠢᠯᠴᠢᠨ ᠳᠤ ᠪᠠᠷᠴᠢᠳ ᠢᠶᠠᠨ ᠲᠦᠭᠡᠨᠡᠶ᠎ᠡ ᠭᠡᠵᠤ ᠢᠷᠡᠭᠰᠡᠨ       ᠪᠢ ᠡᠨᠡ ᠭᠡᠷ ᠲᠤ ᠠᠩᠬ᠎ᠠ ᠰᠦᠨ ᠭᠡᠭᠡ ᠲᠠᠲᠠᠭᠤᠯᠵᠤ ᠢᠷᠡᠭᠰᠡᠨ       ᠪᠠᠭᠠᠨ᠎ᠠ ᠨᠢ ᠨᠠᠳᠠ ᠪᠠᠲᠤ ᠪᠠᠬᠢ ᠶᠢ ᠵᠢᠭᠠᠭᠰᠠᠨ       ᠤᠶᠠᠭᠠᠨ ᠤ ᠰᠢᠷᠤᠢ ᠨᠠᠳᠠ ᠡᠬᠡ ᠨᠤᠲᠤᠭ ᠤᠨ ᠮᠢᠨᠢ ᠦᠨᠤᠷ ᠢ ᠠᠪᠴᠤ ᠢᠷᠡᠭᠰᠡᠨ       ᠢᠳᠡᠭᠡ ᠰᠠᠭᠠᠯᠢ ᠲᠤᠨᠢ ᠠᠮᠲᠠᠰᠴᠤ ᠪᠢ ᠦᠯᠥᠨ ᠢᠷᠡᠭᠰᠡᠨ       ᠦᠷᠯᠥᠭᠡ ᠪᠦᠷᠢ ᠡᠷᠤᠬᠡ ᠪᠠᠨ ᠲᠠᠲᠠᠬᠤ ᠳᠤ ᠮᠢᠨᠤ ᠲᠡᠭᠷᠢ ᠰᠡᠬᠦᠭᠳᠡᠳᠡᠭ︕         ᠪᠤᠭᠤᠷᠤᠯᠴᠤᠳ ᠠᠴᠠ ᠨᠢ ᠦᠯᠢᠭᠡᠷ ᠰᠤᠨᠤᠰᠤᠶ᠎ᠠ ᠭᠡᠵᠤ ᠢᠷᠡᠭᠰᠡᠨ       ᠪᠤᠳᠠᠩᠲᠤ ᠭᠤᠪᠢ ᠠᠴᠠ ᠨᠢ ᠵᠢᠷᠤᠭ ᠠᠪᠤᠶ᠎ᠠ ᠭᠡᠵᠤ ᠢᠷᠡᠭᠰᠡᠨ       ᠬᠠᠪᠤᠷ ᠤᠨ ᠰᠢᠭᠤᠷᠭ᠎ᠠ ᠠᠴᠠ ᠨᠢ ᠲᠡᠰᠪᠤᠷᠢ ᠬᠠᠲᠠᠭᠤᠵᠢᠯ ᠰᠤᠷᠤᠶ᠎ᠠ ᠭᠡᠵᠤ ᠢᠷᠡᠭᠰᠡᠨ       ᠬᠠᠩᠪᠤᠨ ᠲᠠᠯ᠎ᠠ ᠪᠠᠷ ᠨᠢ ᠰᠡᠳᠭᠢᠯ ᠢᠶᠠᠨ ᠠᠷᠭᠠᠳᠠᠶ᠎ᠠ ᠭᠡᠵᠤ ᠢᠷᠡᠭᠰᠡᠨ       ᠡᠪᠲᠤ ᠱᠠᠭᠠᠵᠠᠭᠠᠢ ᠪᠠᠷ ᠠᠮᠢᠳᠤᠷᠠᠯ ᠢᠶᠠᠨ ᠵᠠᠮᠨᠠᠭᠤᠯᠤᠶ᠎ᠠ ᠭᠡᠵᠤ ᠪᠢ ᠲᠡᠨᠡᠭ ᠢᠷᠡᠭᠰᠡᠨ         ᠠᠭᠠᠭ ᠲᠠᠢ ᠴᠠᠢ ᠲᠤᠨᠢ ᠪᠤᠤᠪᠤ ᠦᠷᠤᠵᠤ ᠪᠢ ᠢᠷᠡᠭᠰᠡᠨ       ᠠᠶᠠᠨ ᠵᠠᠮ ᠲᠤᠨᠢ ᠵᠤᠭᠤᠭ ᠨᠡᠮᠡᠵᠤ ᠪᠢ ᠢᠷᠡᠭᠰᠡᠨ       ᠠᠲᠠᠷ ᠬᠡᠭᠡᠷ᠎ᠡ ᠪᠠᠷ ᠨᠢ ᠬᠤᠭᠤᠷ ᠬᠦᠭᠯᠡᠶ᠎ᠡ ᠭᠡᠵᠤ ᠢᠷᠡᠭᠰᠡᠨ       ᠠᠮᠢ ᠲᠠᠢ ᠤᠷᠴᠢᠯᠠᠩ ᠳᠤ ᠤᠯᠤᠭᠤᠯᠠ ᠠᠮᠢᠳᠤᠷᠠᠶ᠎ᠠ ᠭᠡᠵᠤ ᠭᠠᠭᠴᠠᠭᠠᠷ ᠢᠷᠡᠭᠰᠡᠨ︕    
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠡᠬᠡ ᠶᠢᠨ ᠴᠠᠭᠠᠨ ᠰᠥ ᠬᠠᠷᠢᠭᠤᠯᠬᠤ
ᠨᠤᠬᠠᠢ ᠮᠤᠤᠷ ᠦᠰᠢᠶ᠎ᠡ ᠲᠠᠢ ᠪᠤᠯᠤᠭᠰᠠᠨ ᠳᠤᠬᠠᠢ ᠳᠤᠮᠤᠭ
ᠳᠠᠯᠠᠨ ᠬᠤᠳᠠᠯᠴᠢ
ᠤᠢ ᠪᠢᠳᠠᠭᠤ ᠠᠬ᠎ᠠ ᠲᠡᠭᠦᠥ ᠭᠤᠷᠪᠠ ᠤᠬᠠᠭᠠᠨ ᠰᠤᠷᠤᠭᠰᠠᠨ ᠨᠢ
ᠠᠪᠳᠠᠷᠠᠳᠦ ᠶᠢᠨ ᠲᠤᠮᠤᠭ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号