ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠰᠢᠨ᠎ᠡ ᠬᠦᠳᠡᠭᠡ
ᠮᠤᠩᠭᠤᠯ ᠮᠤᠷᠢᠨ ᠤ ᠮᠠᠭᠲᠠᠭᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-11-27
              ᠮᠤᠩᠭᠤᠯ ᠮᠤᠷᠢ ᠪᠤᠯ ᠡᠩ ᠵᠢᠷ ᠤᠨ ᠠᠮᠢᠳᠠᠨ᠂ ᠡᠯᠢᠬᠡᠰᠡᠭ ᠲᠤᠳᠤᠨᠤ ᠰᠡᠳᠬᠢᠯᠬᠡ ᠲᠠᠢ ᠠᠮᠢᠳᠠᠨ᠂ ᠬᠦᠮᠦᠨ ᠤᠷᠴᠢᠨ ᠲᠠᠢ ᠪᠠᠨ ᠵᠤᠬᠢᠴᠠᠨ ᠲᠤᠬᠢᠷᠠᠯᠴᠠᠵᠦ ᠴᠢᠳᠠᠳᠠᠭ ᠰᠡᠴᠡᠨ ᠰᠡᠷᠬᠦᠯᠡᠩ᠂ ᠬᠠᠳᠠᠨ ᠳᠠᠭᠠᠭᠠᠮᠠᠭᠠᠢ ᠬᠠᠶᠢᠷᠠᠯᠠᠯᠳᠠᠢ ᠠᠮᠢᠳᠠᠨ ᠰᠠᠨ᠃ ᠬᠡᠷ ᠤᠨ ᠲᠡᠵᠢᠬᠡᠪᠤᠷᠢ ᠬᠡᠬᠡᠷ᠎ᠠ ᠶᠢᠨ ᠠᠷᠢᠶᠠᠳᠠᠨ ᠤ ᠵᠦᠢᠯ ᠬᠡᠳᠦᠢ ᠤᠯᠠᠨ ᠲᠦᠷᠦᠯ ᠪᠠᠶᠢᠪᠠᠴᠤ ᠮᠤᠷᠢ ᠲᠠᠢ ᠠᠳᠠᠯᠢ ᠴᠤᠭ ᠵᠢᠪᠬᠤᠯᠠᠩᠳᠤ  ᠰᠢᠨᠵᠢᠳᠠᠢ᠂ ᠴᠤᠪᠤᠭᠤ ᠳᠡᠭᠵᠢᠨ ᠵᠠᠩ ᠲᠠᠢ᠂ ᠰᠡᠷᠬᠡᠭ ᠠᠪᠢᠶᠠᠰᠤᠳᠠᠢ᠂ ᠰᠦᠷᠯᠢᠭ ᠳᠦᠷᠦᠭᠰᠡᠨ ᠠᠮᠢᠳᠠᠨ ᠬᠡᠵᠦ ᠬᠡᠳᠦ ᠯᠨ ᠪᠠᠶᠢᠬᠤ ᠠᠵᠢ︕         ᠮᠤᠩᠭᠤᠯ ᠮᠤᠷᠢᠨ ᠤ ᠰᠠᠶᠢᠬᠠᠨ ᠢ ᠠᠯᠳᠠᠷᠳᠤ ᠵᠤᠬᠢᠶᠠᠯᠴᠢ ᠠ᠊ · ᠤᠳᠽᠠᠷ ︽ᠮᠤᠩᠭᠤᠯ ᠮᠤᠷᠢ︾ ᠬᠡᠳᠡᠭ ᠨᠠᠶᠢᠷᠠᠭᠤᠯᠤᠯ ᠳᠠᠭᠠᠨ ᠢᠩᠬᠢᠵᠦ ᠳᠦᠷᠰᠦᠯᠠᠵᠠᠢ᠄ ︽ᠮᠤᠷᠢᠨ ᠤ ᠪᠡᠶ᠎ᠡ ᠨᠢ ᠦᠨᠳᠦᠷ᠂ ᠬᠦᠯ ᠨᠢ ᠤᠷᠳᠤ᠂ ᠨᠢᠷᠤᠭᠤ ᠨᠢ ᠰᠤᠪᠤᠭᠤᠬᠠᠨ᠂ ᠬᠡᠳᠡᠰᠤ ᠨᠢ ᠨᠠᠷᠢᠨ᠂ ᠲᠤᠯᠤᠭᠠᠢ ᠨᠢ ᠶᠡᠭᠡ ᠴᠤ ᠪᠢᠰᠢ ᠪᠠᠭ᠎ᠠ ᠴᠤ ᠪᠢᠰᠢ᠂ ᠬᠦᠵᠦᠬᠦᠦ ᠨᠢ ᠤᠷᠳᠤ ᠴᠤ ᠪᠢᠰᠢ ᠤᠬᠤᠷ ᠴᠤ ᠪᠢᠰᠢ ᠶᠠᠭ ᠯᠨ ᠬᠡᠪ ᠲᠡᠭᠡᠨ  ᠵᠤᠬᠢᠴᠠᠬᠰᠠᠨ ᠪᠠᠶᠢᠳᠠᠭ᠃ ᠮᠡᠯᠳᠡᠬᠡᠨᠡᠭᠰᠡᠨ ᠬᠤᠶᠠᠷ ᠨᠢᠳᠤ ᠨᠢ ᠬᠡᠵᠢᠶ᠎ᠡ ᠡᠬᠦᠷᠢᠳᠡ ᠴᠤᠭ ᠪᠠᠳᠠᠷᠠᠨ ᠬᠡᠷᠡᠯᠳᠦᠵᠦ᠂ ᠲᠡᠬᠦᠨ ᠤ ᠰᠡᠷᠬᠡᠭ ᠰᠡᠴᠡᠨ ᠠᠪᠢᠶᠠᠰ ᠢ ᠢᠯᠡᠷᠡᠬᠦᠯᠵᠦ ᠪᠠᠶᠢᠳᠠᠭ᠃ ᠮᠤᠷᠢᠨ ᠤ ᠴᠢᠬᠢ ᠨᠢ ᠤᠬᠤᠷ ᠱᠤᠪᠤᠭᠤᠷ᠂ ᠡᠬᠦᠷᠢᠳᠡ ᠰᠡᠷᠳᠡᠯᠵᠡᠨ ᠬᠦᠳᠡᠯᠵᠦ ᠂ ᠵᠠᠷᠢᠮ ᠳᠠᠭᠠᠨ ᠰᠤᠯᠪᠢᠴᠠᠨ ᠬᠠᠶᠢᠴᠢᠯᠠᠵᠦ᠂ ᠬᠤᠷᠴᠠ ᠰᠡᠷᠬᠦᠯᠡᠩ ᠲᠤᠳᠤᠭᠠᠳᠤ ᠰᠡᠳᠬᠢᠯᠬᠡ ᠪᠠᠨ ᠢᠯᠡᠷᠡᠬᠦᠯᠵᠦ ᠪᠠᠶᠢᠳᠠᠭ᠃ ᠮᠤᠷᠢᠨ ᠤ ᠤᠷᠤᠭᠤᠯ ᠨᠢ ᠨᠢᠮᠬᠡᠨ᠂ ᠰᠢᠳᠤ ᠨᠢ ᠬᠤᠷᠴᠠ ᠲᠤᠯᠨ ᠰᠡᠶᠢᠷᠡᠭ ᠪᠡᠯᠴᠢᠬᠡᠷ ᠨᠠᠷᠢᠨ ᠡᠪᠡᠰᠤ ᠶᠢ ᠪᠦᠷ ᠬᠡᠬᠡᠭᠳᠡᠬᠦᠯᠦᠯ ᠦᠬᠡᠢ ᠲᠡᠬᠦᠵᠦ ᠢᠳᠡᠵᠦ ᠴᠢᠳᠠᠳᠠᠭ᠃ ᠮᠤᠷᠢᠨ ᠤ ᠳᠡᠯ ᠨᠢ ᠵᠤᠵᠠᠭᠠᠨ ᠬᠡᠷᠡᠭᠰᠡᠯ ᠨᠢ ᠤᠯᠠᠨ᠂ ᠵᠠᠷᠢᠮ ᠳᠠᠭᠠᠨ ᠬᠤᠶᠠᠷ ᠲᠠᠯ᠎ᠠ ᠵᠦᠭ ᠢᠶᠠᠨ ᠬᠠᠭᠠᠷᠠᠵᠦ  ᠪᠠᠭᠤᠭᠠᠳ ᠬᠡᠥᠬᠡᠨ ᠬᠥᠮᠦᠨ ᠤ ᠰᠠᠮᠨᠠᠬᠰᠠᠨ ᠬᠡᠵᠢᠬᠡ ᠰᠢᠭ ᠬᠡᠶᠢᠰᠴᠤ ᠪᠠᠶᠢᠳᠠᠭ᠃ ᠳᠡᠯ ᠢ ᠨᠢ ᠬᠢᠷᠭᠠᠵᠦ ᠵᠠᠰᠠᠪᠠᠯ ᠤᠯᠠᠮ ᠰᠠᠶᠢᠬᠠᠨ ᠪᠤᠯᠵᠦ᠂ ᠡᠬᠡᠬᠡ ᠯᠨ ᠰᠠᠶ᠋ᠢᠬᠠᠨ ᠦᠰᠦ ᠪᠠᠨ ᠵᠠᠰᠠᠭᠤᠯᠤᠬᠰᠠᠨ ᠢᠳᠡᠷ ᠵᠠᠯᠠᠭᠤ ᠰᠢᠭ᠋ ᠴᠡᠪᠡᠷ ᠭᠤᠶᠤᠬᠠᠨ ᠬᠠᠷᠠᠬᠳᠠᠳᠠᠭ᠃ ᠰᠡᠬᠦᠯ ᠨᠢ ᠵᠤᠵᠠᠭᠠᠨ ᠪᠦᠬᠡᠳ ᠤᠷᠳᠤ᠂ ᠶᠠᠭ ᠯᠨ ᠬᠥᠮᠦᠨ ᠤ ᠬᠤᠪᠴᠠᠰᠤᠨ ᠤ ᠡᠩᠬᠡᠷ ᠬᠤᠷᠮᠤᠢ ᠠᠳᠠᠯᠢ ᠳᠠᠯᠳᠠᠯᠠᠪᠠᠯ ᠵᠤᠬᠢᠬᠤ ᠭᠠᠵᠠᠷ ᠢᠶᠠᠨ  ᠳᠠᠯᠳᠠᠯᠠᠵᠦ᠂ ᠢᠴᠢᠬᠦᠷᠢ ᠶᠢ ᠮᠡᠳᠡᠬᠦ ᠠᠮᠢᠳᠠᠨ ᠰᠢᠭ᠋ ᠪᠤᠯᠪᠠᠰᠤᠨ ᠶᠤᠰᠤᠷᠬᠠᠭ ᠪᠠᠶᠢᠳᠠᠭ᠃ ᠮᠤᠷᠢᠨ ᠤ ᠳᠠᠭᠤ ᠨᠢ ᠨᠠᠷᠢᠨ᠂ ᠴᠤᠤᠷᠢᠶ᠎ᠠ ᠰᠠᠶᠢᠳᠠᠢ ᠮᠥᠷᠳᠡᠬᠡᠨ ᠳᠠᠭᠤᠴᠢᠨ ᠬᠥᠮᠦᠨ ᠤ ᠬᠤᠭᠤᠯᠠᠢ ᠰᠢᠭ᠋ ᠥ ᠰᠡᠪ ᠦᠬᠡᠢ ᠳᠤᠯᠨ ᠬᠤᠯᠨ ᠬᠡᠭᠴᠢ ᠬᠠᠩᠬᠢᠨᠠᠨ ᠰᠤᠨᠤᠰᠳᠠᠵᠦ᠂ ᠬᠠᠷᠢᠯᠴᠠᠨ ᠴᠢᠮᠡᠭᠡ ᠠᠪᠤᠯᠴᠠᠨ ᠬᠤᠭᠤᠷᠤᠨᠳᠤ ᠪᠠᠨ ᠨᠡᠪᠳᠡᠷᠡᠯᠴᠡᠳᠡᠭ︾ ᠭᠡᠵᠡᠢ᠃        ᠮᠤᠩᠭᠤᠯ ᠮᠤᠷᠢ ᠪᠤᠯ ᠮᠤᠩᠭᠤᠯ ᠬᠥᠮᠦᠨ ᠤ ᠰᠦᠷ ᠰᠦᠯᠳᠡ ᠪᠡ ᠬᠡᠶᠢᠮᠤᠷᠢ ᠶᠢᠨ ᠮᠦᠩᠬᠡ ᠶᠢᠨ ᠳᠡᠬᠡᠳᠦ ᠪᠡᠯᠬᠡ ᠲᠡᠮᠳᠡᠭ ᠪᠤᠯᠤᠨ᠎ᠠ᠃ ᠮᠤᠩᠭᠤᠯ ᠬᠥᠮᠦᠨ ᠪᠤᠯᠤᠨ ᠮᠤᠩᠭᠤᠯ ᠮᠤᠷᠢ ᠬᠤᠭᠤᠷᠤᠨᠳᠤ ᠪᠠᠨ ᠰᠠᠯᠤᠰᠢ ᠦᠬᠡᠢ ᠨᠢᠬᠳᠠ ᠬᠠᠷᠢᠴᠠᠭ᠎ᠠ ᠲᠠᠢ᠃ ᠮᠤᠩᠭᠤᠯ ᠬᠥᠮᠦᠨ ᠡᠷᠳᠡ ᠳᠡᠬᠡᠳᠦ ᠦᠶ᠎ᠡ ᠠᠴᠠ ᠪᠠᠨ ᠮᠤᠩᠭᠤᠯ ᠮᠤᠷᠢ ᠲᠠᠢ ᠪᠠᠨ ᠵᠠᠢ ᠦᠬᠡᠢ ᠬᠠᠨᠢᠰᠴᠤ᠂ ᠮᠤᠷᠢᠨ ᠤ ᠪᠠᠨ ᠭᠠᠶᠢᠬᠠᠯᠳᠠᠢ ᠷᠢᠲᠢ ᠰᠢᠲᠢ ᠳᠤ ᠮᠠᠨᠳᠤᠵᠦ ︽ᠮᠤᠷᠢᠨ ᠨᠢᠷᠤᠭᠤᠨ ᠳᠡᠬᠡᠷᠡᠬᠢ ᠪᠠᠭᠠᠳᠤᠷ ᠦᠨᠳᠦᠰᠦᠳᠡᠨ︾ ᠬᠡᠮᠡᠭᠳᠡᠭᠰᠡᠨ᠃ ᠮᠤᠩᠭᠤᠯ ᠬᠥᠮᠦᠨ ᠡᠷᠢᠶᠠᠨ ᠠᠯᠠᠭ ᠪᠦᠮᠪᠦᠷᠴᠡᠭ ᠤᠨ ᠲᠤᠮᠤᠬᠳᠤ ᠪᠤᠭᠤᠷᠤᠯ ᠥᠨᠳᠦᠷᠯᠢᠭ᠂ ᠳᠡᠯᠬᠡᠷ ᠠᠭᠤᠳᠠᠮ ᠲᠠᠯ᠎ᠠ ᠳᠠᠭᠠᠨ ᠠᠮᠢ ᠨᠠᠰᠤᠨ ᠤ ᠮᠥᠩᠬᠡ ᠶᠢᠨ ᠪᠡᠯᠬᠡᠳᠡᠯ ᠬᠤᠷᠦ᠋ᠢᠯᠠᠵᠦ᠂ ᠮᠤᠩᠭᠤᠯ ᠮᠤᠷᠢ ᠲᠠᠢ ᠪᠠᠨ ᠬᠤᠪᠢ ᠵᠠᠶᠠᠭ᠎ᠠ ᠪᠠᠨ ᠬᠤᠯᠪᠤᠵᠦ ᠶᠠᠪᠤᠬᠰᠠᠨ ᠶᠤᠮ᠃ ᠮᠤᠩᠭᠤᠯ ᠬᠥᠮᠦᠨ ᠮᠤᠷᠢᠨ ᠳᠠᠭᠠᠨ ᠬᠠᠶᠢᠷᠠᠳᠠᠢ ᠪᠠᠶᠢᠳᠠᠭ ᠤᠨ ᠤᠴᠢᠷ ᠮᠤᠷᠢ ᠪᠠᠨ ᠬᠠᠮᠤᠭ ᠤᠨ ᠡᠷᠬᠢᠮ ᠰᠠᠶᠢᠬᠠᠨ ᠤ ᠪᠡᠯᠬᠡᠳᠡᠯ ᠪᠤᠯᠭᠠᠵᠦ᠂ ᠬᠤᠪᠢ ᠵᠠᠶᠠᠭ᠎ᠠ ᠪᠠᠨ ᠮᠤᠷᠢᠨ ᠳᠠᠭᠠᠨ ᠳᠠᠭᠠᠳᠬᠠᠵᠦ ︽ᠬᠡᠶᠢᠮᠤᠷᠢ︾ ᠬᠡᠵᠦ ᠨᠡᠷᠡᠯᠡᠭᠰᠡᠨ ᠶᠤᠮ᠃ ᠮᠤᠩᠭᠤᠯᠴᠤᠳ ᠮᠤᠷᠢ ᠪᠠᠨ ᠬᠠᠶᠢᠷᠠᠯᠠᠨ ᠰᠢᠳᠤᠵᠦ᠂ ᠮᠤᠷᠢ ᠪᠠᠷ ᠢᠶᠠᠨ ᠪᠠᠶᠠᠰᠳᠠᠭ ᠪᠠᠶᠢᠵᠠᠢ᠃ ᠲᠡᠬᠡᠬᠦ ᠳᠡᠭᠡᠨ ᠰᠠᠶᠢᠨ ᠰᠠᠶᠢᠬᠠᠨ ᠪᠦᠬᠦᠨ ᠤ ᠪᠠᠨ ᠵᠦᠭ ᠬᠡᠶᠢᠮᠤᠷᠢ ᠬᠡᠶᠢᠰᠬᠡᠨ ᠦᠯᠵᠡᠶᠢᠳᠠᠢ ᠶᠠᠪᠤᠬᠤ ᠪᠤᠯᠳᠤᠭᠠᠢ ᠬᠡᠵᠦ ᠡᠪᠦᠬᠡᠳ ᠨᠠᠰᠤᠳᠠᠳ ᠮᠠᠨᠢ ᠵᠢᠯ ᠵᠢᠯ ᠤᠨ ᠡᠬᠢᠨ ᠳᠡᠭᠡᠨ ᠪᠡᠯᠬᠡ ᠲᠠᠢ ᠢᠷᠥᠬᠡᠯ ᠬᠠᠶᠢᠷᠠᠯᠠᠳᠠᠭ ᠰᠠᠨ᠃ ᠮᠤᠷᠢ ᠮᠦᠨ ᠬᠥᠮᠦᠨ ᠰᠢᠭ ᠤᠬᠠᠭᠠᠨ ᠮᠡᠳᠡᠯ ᠬᠠᠶᠢᠷ᠎ᠠ ᠰᠡᠳᠬᠢᠯᠬᠡ ᠲᠠᠢ ᠬᠡᠵᠦ ᠳᠡᠬᠡᠳᠦᠰ ᠮᠢᠨᠢ ᠰᠡᠴᠡᠯᠡᠭᠰᠡᠨ ᠪᠠᠶᠢᠳᠠᠭ᠃ ᠲᠠᠶᠢᠮᠤ ᠴᠤ ᠤᠴᠢᠷ ᠠᠴᠠ ᠮᠤᠷᠢ ᠲᠠᠢ ᠪᠠᠨ ᠬᠠᠮᠢᠶ᠎ᠠ ᠲᠠᠢ ᠮᠤᠩᠭᠤᠯ ᠵᠦᠢᠷ ᠰᠡᠴᠡᠨ ᠦᠬᠡ ᠤᠯᠠᠨ ᠪᠠᠶᠢᠳᠠᠭ᠃ ︽ᠬᠦᠯᠦᠭ ᠪᠤᠯᠬᠤ ᠤᠨᠠᠭᠠᠨ ᠠᠴᠠ ᠪᠠᠨ᠂ ᠬᠥᠮᠦᠨ ᠪᠤᠯᠬᠤ ᠪᠠᠭ᠎ᠠ ᠠᠴᠠ ᠪᠠᠨ︾᠂ ︽ᠡᠷ᠎ᠠ ᠬᠦᠮᠦᠨ ᠵᠤᠷᠢᠬᠰᠠᠨ ᠳᠠᠭᠠᠨ᠂ ᠡᠷ᠎ᠠ ᠮᠤᠷᠢ ᠬᠠᠷᠠᠶᠢᠬᠰᠠᠨ ᠳᠠᠭᠠᠨ︾ ᠂ ︽ᠠᠳᠤᠭᠤᠨ ᠤ ᠠᠯᠠᠭ ᠰᠠᠶᠢᠬᠠᠨ᠂ ᠠᠶᠠᠭᠠᠨ ᠤ ᠠᠯᠠᠭ ᠮᠠᠭᠤᠬᠠᠢ︾᠂ ︽ᠰᠦᠳᠦ ᠬᠡᠬᠦᠦ ᠶᠢᠨ ᠤᠨᠠᠭ᠎ᠠ᠂ ᠰᠠᠶᠢᠨ ᠬᠥᠮᠦᠨ ᠤ ᠦᠷ᠎ᠡ︾ ᠬᠡᠬᠦ ᠮᠡᠳᠦ ᠪᠠᠷ ᠥᠷᠬᠡᠨ ᠳᠡᠯᠬᠡᠷ ᠠᠭᠤᠯᠭ᠎ᠠ ᠶᠢ ᠲᠤᠰᠬᠠᠬᠰᠠᠨ ᠮᠥᠷᠳᠡᠬᠡᠨ ᠤᠳᠬ᠎ᠠ ᠰᠠᠨᠠᠭ᠎ᠠ ᠨᠢ ᠮᠠᠰᠢ ᠬᠦᠨ ᠬᠦᠨᠵᠡᠬᠡᠢ ᠪᠠᠶᠢᠳᠠᠭ᠃         ᠮᠤᠩᠭᠤᠯ ᠳᠠᠭᠤᠤ ᠪᠦᠵᠢᠭ ᠤᠨ ᠲᠤᠳᠤᠷ᠎ᠠ ᠮᠤᠩᠭᠤᠯ ᠮᠤᠷᠢ ᠪᠠᠨ ᠬᠠᠶᠢᠷᠠᠯᠠᠬᠤ ᠰᠡᠳᠬᠢᠯ ᠪᠢᠯᠬᠠᠮ᠎ᠠ ᠴᠠᠯᠬᠢᠮ᠎ᠠ ᠪᠢᠯᠡ᠃ ᠮᠤᠩᠭᠤᠯ ᠮᠤᠷᠢ ᠪᠠᠨ ᠬᠠᠶᠢᠷᠠᠯᠠᠨ ᠪᠠᠭ᠋ᠠᠷᠬᠠᠵᠦ ᠮᠠᠬᠳᠠᠨ ᠳᠠᠭᠤᠯᠠᠬᠰᠠᠨ ᠠᠷᠠᠳ ᠤᠨ ᠳᠠᠭᠤᠤ ᠮᠢᠩᠭ᠎ᠠ ᠭᠠᠷᠤᠢ ᠪᠠᠳᠠᠭ ᠪᠠᠶᠢᠳᠠᠭ᠃ ︽ᠡᠬᠦᠯᠡᠨ ᠬᠥᠬᠡ ᠮᠤᠷᠢ︾ ᠬᠡᠳᠡᠭ ᠳᠠᠭᠤᠤ ᠪᠠᠷ ᠵᠢᠱᠢᠶᠡᠯᠡᠬᠦ ᠳᠤ᠄ ︽ᠡᠬᠦᠯᠡᠨ ᠬᠦᠬᠡ ᠮᠤᠷᠢ ᠮᠢᠨᠢ ᠡᠬᠦᠯᠨ ᠲᠡᠳᠠᠮᠠᠷ ᠬᠦᠶᠦᠳᠡᠯ ᠲᠠᠢ ᠦᠪᠦᠷ ᠳᠦᠴᠢ ᠶᠢᠰᠦᠨ ᠬᠤᠰᠢᠭᠤᠨ ᠳᠠᠭᠠᠨ ᠠᠯᠳᠠᠷ ᠭᠠᠷᠤᠬᠰᠠᠨ ᠮᠤᠷᠢ ᠮᠢᠨᠢ  ᠰᠠᠮᠰᠠᠭ᠎ᠠ ᠶᠢᠨ ᠢᠶᠠᠨ ᠳᠤᠮᠳᠠ ᠨᠢ ᠰᠠᠷᠠᠨ ᠪᠢᠨᠳᠤᠷᠢᠶᠠᠨ ᠲᠡᠮᠳᠡᠭ ᠲᠠᠢ ᠰᠠᠯᠠᠭ᠎ᠠ ᠳᠦᠷᠪᠡᠨ ᠳᠤᠭᠤᠷᠠᠢ ᠨᠢ ᠰᠠᠯᠬᠢ ᠲᠠᠳᠠᠮᠠᠷ ᠬᠦᠶᠦᠳᠡᠯ ᠲᠠᠢ︾ ᠭᠡᠵᠦ ᠶᠠᠮᠠᠷ ᠰᠠᠶᠢᠬᠠᠨ ᠤᠶᠠᠩᠭ᠎ᠠ  ᠰᠡᠳᠬᠢᠯᠬᠡ ᠲᠠᠢ ᠮᠠᠬᠳᠠᠨ ᠳᠠᠭᠤᠯᠠᠬᠰᠠᠨ ᠠᠵᠢ᠃ ᠮᠣᠩᠭᠤᠯ ᠠᠷᠠᠳ ᠤᠨ ᠳᠠᠭᠤᠤ ᠳᠤ ᠮᠤᠩᠭᠤᠯ ᠮᠤᠷᠢᠨ ᠤ ᠤᠮᠤᠭ᠂ ᠵᠤᠷᠢᠭ᠂ ᠰᠦᠷ ᠰᠦᠯᠳᠡ ᠶᠢ ᠪᠠᠭ᠋ᠠᠳᠤᠨ ᠵᠤᠷᠢᠬᠵᠢᠳᠠᠯ᠎ᠠ ᠤᠶᠠᠩᠭᠠᠯᠠᠨ ᠳᠠᠭᠤᠯᠠᠬᠰᠠᠨ ᠪᠠᠶᠢᠨ᠎ᠠ᠃ ᠮᠤᠩᠭᠤᠯ ᠪᠦᠵᠢᠭ ᠤᠨ ᠲᠤᠳᠤᠷᠠᠬᠢ ᠮᠠᠰᠢ ᠤᠯᠠᠨ ᠬᠦᠳᠡᠯᠦᠯ ᠨᠢ ᠴᠤ ᠮᠤᠩᠭᠤᠯ ᠮᠤᠷᠢᠨ ᠠᠴᠠ ᠢᠷᠡᠯᠳᠠᠢ ᠪᠠᠶᠢᠳᠠᠭ᠃ ᠮᠤᠩᠭᠤᠯ ᠡᠷᠳᠡᠨ ᠤ ᠰᠤᠩᠭᠤᠳᠠᠭ ᠵᠤᠬᠢᠶᠠᠯ ︽ᠭᠡᠰᠡᠷ︾᠂ ︽ᠵᠠᠩᠭᠠᠷ︾᠎ ᠲᠤ ᠮᠤᠷᠢ ᠶᠢ ᠮᠠᠬᠳᠠᠵᠦ ᠰᠢᠯᠦᠭᠯᠡᠭᠰᠡᠨ ᠨᠢ ᠴᠦᠬᠡᠨ ᠪᠤᠰᠤ ᠬᠠᠭᠤᠳᠠᠰᠤ ᠡᠵᠡᠯᠡᠳᠡᠭ᠃ ᠢᠯᠠᠩᠭᠤᠶ᠎ᠠ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠠᠪᠢᠶᠠᠰᠳᠤ ᠢᠷᠠᠭᠤ ᠨᠠᠶᠢᠷᠠᠬᠴᠢᠳ ᠮᠤᠩᠭᠤᠯ ᠮᠤᠷᠢ ᠪᠠᠨ ᠮᠠᠬᠳᠠᠨ ᠲᠠᠭᠤᠯᠠᠬᠰᠠᠨ ᠭᠠᠶᠢᠬᠠᠮᠰᠢᠬᠳᠤ ᠮᠦᠷ ᠪᠠᠳᠠᠭ ᠤᠳ ᠢ ᠮᠠᠰᠢ ᠤᠯᠠᠨ ᠲᠤᠭᠤᠷᠪᠢᠬᠰᠠᠨ᠃ ︽ᠮᠤᠷᠢ ᠮᠢᠨᠢ︕  ᠮᠣᠩᠭᠤᠯ ᠰᠠᠯᠬᠢ ᠮᠢᠨᠢ︕ ᠮᠥᠩᠭᠡ ᠭᠤᠣᠯ ᠮᠢᠨᠢ︕ ᠴᠢᠮᠠᠢᠢ ᠪᠢᠴᠢᠬᠦ ᠳᠤ ᠤᠰᠤ ᠪᠦᠯᠢᠶᠡᠰᠦᠨ᠎ᠡ  ᠴᠢᠮᠠᠢᠢ ᠤᠩᠰᠢᠬᠤ ᠳᠤ ᠠᠭᠤᠯᠨ ᠳᠣᠸᠠᠯᠠᠰᠬᠢᠨ᠎ᠠ ᠴᠡᠬᠡᠵᠢ ᠪᠠᠨ ᠰᠦᠪᠯᠡᠭᠦᠯᠦᠭᠰᠡᠨ ᠡᠵᠡᠨ ᠢᠶᠠᠨ  ᠦᠰᠢᠶᠡᠲᠡᠨ ᠤ ᠭᠠᠷ ᠲᠤ ᠦᠭᠭᠦᠭᠡ ᠦᠭᠡᠢ ᠴᠢ ᠴᠡᠬᠡᠵᠢ ᠪᠠᠨ ᠬᠠᠭᠤ ᠲᠠᠲᠠᠭᠤᠯᠴᠢᠬᠠᠭᠠᠳ ᠰᠦᠷᠦᠭ ᠴᠢᠨ᠋ᠸ᠎ᠠ ᠠᠴᠠ ᠰᠦᠭᠡᠮ ᠤᠬᠤᠷᠢᠭ᠎ᠠ ᠦᠭᠡᠢ ᠴᠢ ᠴᠢᠬᠢ ᠨᠢᠳᠦ ᠶᠢ ᠨᠢ ᠪᠤᠭᠤᠴᠢᠬᠠᠭᠠᠳ  ᠳᠡᠭᠡᠰᠦ ᠪᠠᠷ ᠬᠦᠲᠦᠯᠦᠭᠡᠳ ᠬᠦᠶᠦᠭᠰᠡᠨ ᠴᠤ ᠲᠦᠮᠡᠨ ᠭᠠᠵᠠᠷ ᠤᠨ ᠬᠤᠯᠨ ᠠᠴᠠ ᠲᠦᠷᠦᠭᠰᠡᠨ ᠨᠤᠲᠤᠭ ᠢᠶᠠᠨ ᠠᠨᠳᠠᠳᠠᠭ ᠦᠭᠡᠢ ᠴᠢ︾᠃ ᠡᠨᠡ ᠪᠣᠯ ᠠᠪᠢᠶᠠᠰᠲᠤ ᠰᠢᠯᠦᠭᠴᠢᠨ ᠠᠷᠲᠠᠢ ᠶᠢᠨ ᠰᠢᠲᠢᠳᠦ ᠪᠢᠷ ᠢᠶᠠᠷ ᠤᠶᠠᠩᠭᠠᠷᠠᠭᠰᠠᠨ ︽ᠮᠣᠷᠢ︾ ᠬᠡᠳᠡᠭ ᠰᠢᠯᠦᠭ᠃ ᠪᠠᠰᠠ ᠨᠢᠭᠡᠨ ᠰᠢᠯᠦᠭᠴᠢ ᠮᠣᠩᠭᠤᠯ ᠮᠣᠷᠢ ᠶᠢ ᠢᠩᠬᠢᠵᠦ ᠰᠢᠯᠦᠭᠯᠡᠵᠡᠢ᠄ ︽ᠨᠠᠷᠠ ᠶᠢ ᠳᠡᠯ ᠳᠡᠭᠡᠷ᠎ᠡ ᠪᠠᠨ ᠮᠠᠨᠳᠤᠭᠤᠯᠤᠨ ᠨᠠᠳᠬᠤᠨ ᠦᠷᠬᠦᠨ ᠵᠢᠷᠢᠯᠵᠡᠲᠡᠯ᠎ᠡ ᠲᠣᠭᠯᠠᠵᠤ ᠨᠠᠪᠴᠢᠲᠤ ᠲᠠᠯ᠎ᠠ ᠶᠢᠨ ᠦᠷᠦᠴᠨ ᠵᠦᠰᠦᠵᠦ ᠨᠠᠭᠠᠳᠤᠨ ᠠᠯᠢᠶᠠᠷᠬᠠᠨ ᠵᠢᠷᠪᠢᠯᠵᠡᠲᠡᠯ᠎ᠡ ᠲᠠᠪᠬᠢᠬᠤ ᠳᠤ ᠲᠣᠭᠤᠰᠤ ᠨᠢ ᠲᠡᠭᠷᠢ ᠪᠦᠷᠬᠦᠨ ᠮᠠᠨᠠᠨᠳᠠᠵᠤ ᠬᠠᠷᠠᠭᠳᠠᠳᠠᠭ ᠰᠢᠭᠤᠷᠭ᠎ᠠ ᠲᠤᠭᠤᠷᠠᠢ ᠨᠢ ᠳᠡᠯᠡᠬᠡᠢ ᠳᠣᠷᠬᠢᠭᠤᠯᠤᠨ  ᠲᠠᠴᠢᠬᠢᠨᠠᠵᠤ ᠰᠣᠨᠣᠰᠳᠠᠳᠠᠭ ᠠᠶᠤᠩᠭ᠎ᠠ︾᠃ ᠡᠳᠡᠭᠡᠷ ᠮᠣᠩᠭᠤᠯ ᠮᠣᠷᠢ ᠪᠠᠨ ᠮᠠᠭᠲᠠᠭᠰᠠᠨ ᠣᠷᠠᠨ ᠭᠤᠶᠢᠲᠠ᠂ ᠬᠠᠶᠢᠷ᠎ᠠ ᠳᠦᠷᠡᠯᠵᠡᠭᠰᠡᠨ ᠤᠶᠠᠩᠭᠠᠳᠤ ᠨᠠᠶᠢᠷᠠᠭ ᠮᠤᠩᠭᠤᠯ ᠬᠥᠮᠦᠨ ᠤ ᠵᠤᠷᠢᠭ ᠬᠦᠰᠡᠯ ᠤᠨ ᠮᠦᠩᠬᠡ ᠶᠢᠨ ᠭᠠᠯ ᠪᠤᠯᠤᠨ ᠠᠰᠠᠵᠦ ᠪᠠᠶᠢᠳᠠᠭ᠃         ᠡᠶᠢᠮᠤ ᠰᠠᠶᠢᠬᠠᠨ ᠮᠤᠩᠭᠤᠯ ᠮᠤᠷᠢᠨ ᠤ ᠪᠠᠨ ᠨᠢᠷᠤᠭᠤᠨ ᠳᠡᠬᠡᠷ᠎ᠡ ᠭᠠᠷᠤᠮᠠᠬᠴᠠ ᠮᠤᠩᠭᠤᠯ ᠬᠥᠮᠦᠨ ᠢᠯᠠᠬᠳᠠᠰᠢ ᠦᠬᠡᠢ ᠬᠦᠴᠦᠨ ᠲᠠᠢ ᠪᠤᠯᠵᠦ ᠠᠯᠢᠪᠠ ᠬᠦᠰᠡᠯ ᠦᠢᠯᠡᠰ ᠤᠨ ᠢᠶᠠᠨ ᠲᠤᠶᠠᠭᠠᠳᠤ ᠤᠷᠬᠢᠯ ᠵᠦᠭ ᠬᠢᠯᠠᠯᠵᠠᠨ ᠳᠡᠬᠦᠯᠢᠳᠡᠭ ᠶᠤᠮᠰᠠᠨ᠃ ᠳᠡᠬᠡᠬᠦ ᠳᠡᠭᠡᠨ ᠡᠪᠦᠭᠡ ᠳᠡᠬᠡᠳᠦᠰ ᠮᠢᠨᠢ ᠮᠤᠷᠢ ᠪᠠᠨ ᠤᠬᠠᠭᠠᠨ ᠰᠡᠳᠬᠢᠯ ᠳᠡᠭᠡᠨ ᠬᠦᠨ ᠰᠢᠩᠬᠡᠬᠡᠵᠦ ᠮᠤᠷᠢᠨ ᠲᠤᠯᠤᠭᠠᠢ ᠶᠢᠨ ᠬᠡᠯᠪᠡᠷᠢᠳᠠᠢ  ᠬᠦᠭᠵᠢᠮ ᠬᠢᠵᠦ ᠮᠤᠷᠢᠨ ᠤ ᠳᠡᠯ ᠰᠡᠬᠦᠯ ᠢᠶᠠᠷ ᠬᠤᠭᠤᠷ ᠤᠨ ᠬᠦᠪᠴᠢ ᠪᠤᠯᠭᠠᠨ ᠂ ᠮᠤᠩᠭᠤᠯ ᠮᠤᠷᠢ ᠪᠠᠨ ᠮᠠᠬᠳᠠᠨ ᠳᠠᠭᠤᠯᠠᠵᠦ ᠬᠢᠯᠭᠠᠰᠤᠨ ᠬᠤᠶᠠᠷ ᠴᠢᠪᠬᠠᠳᠠᠰᠤᠨ ᠤ ᠮᠤᠩᠭᠤᠯ ᠠᠶᠠᠯᠭᠤᠨ ᠳᠤ ᠬᠠᠶᠢᠷ᠎ᠠ ᠰᠡᠳᠬᠢᠯᠬᠡ ᠪᠠᠨ ᠰᠢᠩᠬᠡᠬᠡᠭᠰᠡᠨ ᠪᠠᠶᠢᠳᠠᠭ᠃ ᠮᠤᠩᠭᠤᠯ ᠤᠷᠠᠯᠢᠬᠴᠢᠨ᠂ ᠵᠢᠷᠤᠬᠴᠢᠨ᠂ ᠰᠡᠶᠢᠯᠪᠤᠷᠢᠴᠢᠨ ᠨᠠᠷ ᠮᠤᠩᠭᠤᠯ ᠮᠤᠷᠢ ᠪᠠᠷ ᠰᠡᠳᠦᠪ ᠪᠤᠯᠭᠠᠵᠦ᠂ ᠵᠦᠢᠯ ᠵᠦᠯ ᠤᠨ ᠤᠷᠠᠨ ᠪᠦᠳᠦᠬᠡᠯ  ᠪᠦᠳᠦᠬᠡᠭᠰᠡᠨ ᠢ ᠨᠢ ᠨᠡᠩᠳᠡ ᠲᠤᠭᠠᠯᠠᠬᠤᠶ᠎ᠠ ᠪᠡᠷᠬᠡ ᠪᠢᠯᠨ᠃ ᠡᠳᠡᠬᠡᠷ ᠤᠷᠠᠨ ᠪᠦᠳᠦᠬᠡᠯ ᠨᠢ ᠤᠳᠤ ᠴᠤ ᠭᠡᠰᠡᠨ ᠬᠦᠮᠦᠰ ᠤᠨ ᠳᠤᠷ᠎ᠠ ᠰᠤᠨᠢᠷᠬᠠᠯ ᠢ ᠲᠠᠳᠠᠬᠰᠠᠭᠠᠷ ᠪᠠᠶᠢᠬᠤ ᠶᠢ ᠶᠠᠭᠤᠨ ᠦᠬᠦᠯᠡᠨᠡᠮ᠃ ᠮᠤᠩᠭᠤᠯ ᠮᠤᠷᠢ᠂ ᠮᠤᠩᠭᠤᠯ ᠬᠥᠮᠦᠨ ᠤ ᠳᠤᠳᠤᠨᠤ ᠬᠠᠨᠢ᠂ ᠮᠤᠩᠭᠤᠯ ᠬᠥᠮᠦᠨ ᠤ ᠬᠦᠰᠡᠯ ᠤᠨ ᠵᠢᠬᠦᠷ᠃ ᠮᠤᠩᠭᠤᠯ ᠮᠤᠷᠢ᠂ ᠮᠤᠩᠭᠤᠯ ᠬᠦᠮᠦᠨ ᠤ ᠪᠠᠳᠤ ᠲᠦᠰᠢᠭ᠂ ᠮᠤᠩᠭᠤᠯ ᠬᠥᠮᠦᠨ ᠤ ᠡᠩᠬᠡ ᠶᠢᠨ ᠮᠠᠨᠠᠭ᠎ᠠ᠃ ᠮᠤᠩᠭᠤᠯ ᠮᠤᠷᠢ᠂ ᠮᠤᠩᠭᠤᠯ ᠬᠥᠮᠦᠨ ᠵᠢᠮ᠎ᠠ ᠵᠢᠷᠤᠮ ᠲᠠᠢ ᠵᠤᠬᠢᠴᠠᠯᠳᠤᠳᠠᠭ ᠨᠢ ᠨᠠᠷᠨ᠂ ᠰᠠᠷᠨ ᠤᠷᠴᠢᠯᠳᠦᠨ ᠲᠤᠬᠳᠠᠨᠢᠳᠠᠭ ᠲᠠᠢ ᠠᠳᠠᠯᠢᠬᠠᠨ᠃ ᠮᠤᠩᠭᠤᠯ ᠮᠤᠷᠢ ᠦᠬᠡᠢ ᠪᠤᠯ ᠢᠰᠡᠬᠡᠢ ᠬᠡᠷ ᠮᠢᠨᠢ ᠦᠵᠡᠮᠤᠷᠢ ᠦᠬᠡᠢ ᠬᠠᠷᠠᠬᠳᠠᠨ᠎ᠠ᠃ ᠮᠤᠩᠭᠤᠯ ᠮᠤᠷᠢ ᠦᠬᠡᠢ ᠪᠤᠯ ᠮᠤᠩᠭᠤᠯ ᠬᠥᠮᠦᠨ ᠬᠡᠶᠢᠮᠤᠷᠢ ᠦᠬᠡᠢ ᠰᠠᠨᠠᠬᠳᠠᠨ᠎ᠠ᠃ ᠮᠤᠩᠭᠤᠯ ᠮᠤᠷᠢ ᠦᠬᠡᠢ ᠪᠤᠯ ᠮᠤᠩᠭᠤᠯ ᠤᠨ ᠲᠠᠯ᠎ᠠ ᠨᠤᠳᠤᠭ ᠴᠡᠴᠡᠭᠡᠰ ᠦᠬᠡᠢ ᠠᠳᠠᠯᠢ ᠪᠤᠳᠤᠬᠳᠠᠨ᠎ᠠ᠃         ᠮᠤᠩᠭᠤᠯ ᠮᠤᠷᠢ ᠪᠤᠯ ᠮᠤᠩᠭᠤᠯᠴᠤᠳ ᠤᠨ ᠠᠤᠭ᠎ᠠ ᠳᠡᠥᠬᠡ ᠰᠤᠶᠤᠯ ᠢ ᠪᠦᠳᠦᠬᠡᠭᠰᠡᠨ ᠴᠢᠬᠤᠯᠨ ᠡᠯᠧᠮᠧᠨ᠋ᠲ ᠤᠨ ᠨᠢᠬᠡᠨ ᠮᠦᠨ᠃ ᠮᠦᠨᠴᠤ ᠮᠠᠨ ᠤ ᠥᠪᠥᠷ ᠮᠤᠩᠭᠤᠯ ᠤᠨ ᠦᠨᠳᠦᠰᠦᠳᠡᠨ ᠤ ᠰᠤᠶᠤᠯ ᠤᠨ ᠬᠦᠴᠦᠷᠬᠡᠭ ᠤᠷᠤᠨ ᠢ ᠪᠦᠳᠦᠬᠡᠨ ᠪᠠᠶᠢᠭᠤᠯᠬᠤ ᠶᠢᠨ ᠲᠦᠯᠥᠬᠡᠯᠡᠬᠦ ᠴᠢᠨᠠᠷᠳᠠᠢ ᠳᠦᠷᠢ ᠮᠦᠨ᠃ ᠮᠤᠩᠭᠤᠯ ᠮᠤᠷᠢᠨ ᠤ ᠵᠤᠷᠢᠭ ᠰᠠᠨᠠᠭ᠎ᠠ ᠪᠤᠯ ᠲᠠᠯ᠎ᠠ ᠨᠤᠳᠤᠭ ᠤᠨ ᠰᠤᠶᠤᠯ ᠤᠨ ᠤᠬᠢ ᠰᠤᠳᠤ ᠮᠦᠨ᠃ ᠮᠤᠩᠭᠤᠯ ᠮᠤᠷᠢᠨ ᠤ ᠵᠤᠷᠢᠭ ᠰᠠᠨᠠᠭ᠎ᠠ ᠪᠤᠯ ᠮᠤᠩᠭᠤᠯᠴᠤᠳ ᠤᠨ ᠨᠡᠬᠦᠳᠡᠯ ᠮᠠᠯᠵᠢᠯ ᠤᠨ ᠰᠤᠶᠤᠯ ᠲᠠᠢ ᠰᠠᠯᠤᠰᠢ ᠦᠬᠡᠢ ᠬᠤᠯᠪᠤᠭ᠎ᠠ ᠲᠠᠢ᠃ ᠮᠤᠩᠭᠤᠯ ᠮᠤᠷᠢᠨ ᠤ ᠮᠤᠬᠤᠰᠢ ᠦᠬᠡᠢ ᠬᠦᠴᠦᠨ᠂ ᠰᠢᠨᠳᠠᠷᠠᠰᠢ ᠦᠬᠡᠢ ᠵᠤᠷᠢᠭ᠂ ᠡᠷᠡᠯᠬᠡᠭ ᠪᠠᠭᠠᠳᠤᠷᠯᠢᠭ ᠤᠮᠤᠭ᠂ ᠴᠢᠩ ᠦᠨᠡᠨᠴᠢ ᠰᠡᠳᠬᠢᠯ᠂ ᠰᠡᠴᠡᠨ ᠰᠡᠷᠬᠦᠯᠡᠩ ᠠᠭᠠᠯᠢ᠂ ᠡᠪ ᠪᠦᠯᠬᠦᠮᠳᠡᠯ ᠲᠠᠢ ᠵᠠᠩ᠂ ᠡᠯᠪᠡᠷᠢᠯ ᠵᠢᠷᠤᠮ ᠲᠠᠢ ᠶᠤᠰᠤᠨ ᠰᠤᠷᠳᠠᠯ᠂ ᠡᠯᠢᠬᠡᠨ ᠨᠤᠳᠤᠬᠰᠠᠭ ᠬᠠᠯᠠᠭᠤᠨ ᠬᠠᠶᠢᠷ᠎ᠠ ᠨᠢ ᠴᠦᠮ ᠮᠤᠩᠭᠤᠯ ᠮᠤᠷᠢᠨ ᠤ ᠵᠤᠷᠢᠭ ᠰᠠᠨᠠᠭᠠᠨ ᠤ ᠪᠠᠶᠠᠯᠢᠭ ᠠᠭᠤᠯᠬᠤᠨ ᠳᠤ ᠪᠠᠭᠳᠠᠬᠳᠠᠨ᠎ᠠ᠃         ᠮᠤᠩᠭᠤᠯ ᠮᠤᠷᠢᠨ ᠤ ᠡᠷᠡᠯᠬᠡᠭ ᠪᠠᠭᠠᠳᠤᠷᠯᠢᠭ ᠤᠮᠤᠭ ᠰᠦᠷ ᠭᠡᠵᠦ ᠨᠡᠬᠡᠷᠡᠨ ᠮᠠᠬᠳᠠᠭᠤᠰᠢᠳᠠᠢ᠃ ᠪᠤᠬᠳᠠ ᠴᠢᠩᠬᠢᠰ ᠬᠠᠭᠠᠨ ᠤ ᠦᠶ᠎ᠡ ᠠᠴᠠ ᠠᠪᠤᠭᠠᠳ ᠮᠠᠨ ᠤ ᠡᠪᠦᠭᠡ ᠳᠡᠬᠡᠳᠦᠰ ᠮᠤᠷᠢ ᠲᠠᠢ ᠪᠠᠨ ᠠᠮᠢ ᠨᠠᠰᠤ ᠪᠠᠨ ᠬᠤᠯᠪᠤᠵᠦ ᠠᠯᠳᠠᠨ ᠳᠡᠯᠡᠬᠡᠢ ᠶᠢᠨ ᠲᠡᠥᠬᠡᠨ ᠳᠤ ᠠᠯᠳᠠᠷ ᠨᠡᠷ᠎ᠠ ᠪᠠᠨ ᠮᠠᠨᠳᠤᠭᠤᠯᠵᠦ ᠶᠠᠪᠤᠬᠰᠠᠨ ᠪᠢᠯᠨ᠃ ᠮᠠᠨ ᠤ ᠦᠨᠳᠦᠰᠦᠳᠡᠨ ᠤ ᠠᠯᠳᠠᠷᠳᠤ ᠲᠡᠥᠬᠡ ᠪᠤᠯᠤᠨ ᠪᠠᠭᠠᠳᠤᠷᠯᠢᠭ ᠲᠤᠤᠯᠢ ᠳᠠᠬᠢ ᠡᠷᠡᠯᠬᠡᠭ ᠪᠠᠭᠠᠳᠤᠷᠴᠤᠳ ᠤᠨ ᠬᠡᠨ ᠠᠯᠢᠨ ᠨᠢ ᠴᠤ ᠬᠡᠳ ᠬᠦᠨᠳᠤᠳᠤ ᠭᠠᠪᠢᠶ᠎ᠠ ᠪᠠᠶᠢᠭᠤᠯᠬᠤ ᠳᠠᠭᠠᠨ ᠮᠤᠩᠭᠤᠯ ᠮᠤᠷᠢᠨ ᠠᠴᠠ ᠪᠠᠨ ᠰᠠᠯᠤᠬᠰᠠᠨ ᠤᠳᠠᠭ᠎ᠠ ᠦᠬᠡᠢ᠃ ᠪᠤᠷᠤᠭᠠᠨ ᠮᠥᠨᠳᠤᠷ ᠲᠠᠢ ᠵᠢᠬᠡᠬᠦᠨ ᠰᠦᠨᠢ ᠪᠠᠭᠠᠳᠤᠷ ᠬᠡᠰᠡᠷ ᠡᠷᠳᠡᠨᠢ ᠶᠢᠨ ᠬᠦᠯᠦᠭ ᠲᠠᠢ ᠳᠠᠭᠠᠨ ᠮᠠᠩᠭᠤᠰ ᠤᠨ ᠠᠶᠤᠯ ᠠᠴᠠ ᠮᠡᠨᠳᠦ ᠵᠤᠯᠪᠤᠬᠰᠠᠨ᠃ ᠪᠤᠤᠬᠢᠶ᠎ᠠ ᠬᠤᠤᠬᠢᠶᠠᠨ ᠲᠠᠢ ᠠᠰᠬ᠎ᠠ ᠥᠨᠳᠦᠷ ᠲᠤ ᠳᠡᠮᠤᠵᠢᠨ ᠪᠡᠬᠡᠷᠡᠵᠦ ᠴᠡᠷᠴᠠᠬᠤ ᠳᠠᠭᠠᠨ ᠠᠷᠭᠤᠮᠠᠭ ᠬᠦᠯᠦᠭ ᠤᠨ ᠢᠶᠠᠨ ᠬᠦᠷᠥᠬᠡ ᠶᠢ ᠬᠠᠨᠠᠵᠤ ᠪᠦᠯᠢᠶᠡᠨ ᠴᠢᠰᠤ ᠪᠠᠷ ᠨᠢ ᠪᠡᠶ᠎ᠡ ᠪᠠᠨ ᠲᠤᠯᠠᠭᠠᠴᠡᠨ᠂ ᠳᠠᠶᠠᠩ ᠢ ᠨᠢᠬᠡᠳᠬᠡᠬᠦ ᠪᠠᠷ ᠳᠠᠷᠬᠠᠨ ᠢᠯᠳᠤ ᠪᠠᠨ ᠡᠷᠬᠦᠭᠰᠡᠨ᠃ ᠭᠤᠷᠪᠠᠨ ᠨᠠᠰᠤᠳᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠳᠤᠷ᠂ ᠬᠤᠷᠴᠠ ᠰᠠᠮᠪᠠᠭᠠᠯᠢᠭ ᠤᠬᠠᠭᠠᠨ ᠲᠠᠢ ᠰᠦᠪᠡᠭᠡᠳᠠᠢ᠂ ᠡᠷᠡᠰ ᠲᠠᠰᠤᠷᠬᠠᠢ ᠡᠷ᠎ᠠ ᠴᠡᠷᠢᠭ ᠠᠴᠠ ᠡᠬᠡᠯ ᠵᠢᠷ ᠤᠨ ᠮᠠᠯᠴᠢᠨ ᠠᠷᠠᠳ ᠬᠦᠷᠳᠡᠯ᠎ᠡ ᠠᠮᠢᠳᠤᠷᠠᠯ ᠠᠬᠤᠢ᠂ ᠠᠮᠢ ᠨᠠᠰᠤᠨ ᠳᠤ ᠨᠢ ᠴᠦᠮ ᠮᠤᠷᠢ ᠬᠤᠯᠪᠤᠬᠳᠠᠵᠦ ᠪᠠᠶᠢᠳᠠᠭ᠃ ᠫᠤᠤ ᠶᠢᠨ ᠳᠠᠭᠤᠨ ᠨᠢᠵᠢᠬᠢᠨᠡᠵᠦ ᠳᠠᠷᠢ ᠶᠢᠨ ᠤᠳᠤᠭ᠎ᠠ ᠲᠤᠨᠤᠷᠠᠬᠰᠠᠨ ᠲᠤᠬᠰᠢᠨ ᠰᠢᠷᠦᠬᠦᠨ ᠪᠠᠶᠢᠯᠳᠤᠭᠠᠨ ᠳᠤ ᠴᠤ᠂ ᠭᠠᠰᠢᠭᠤᠨ ᠤᠳᠤᠭ᠎ᠠ ᠮᠠᠨᠠᠷᠠᠵᠦ ᠭᠠᠩᠭ᠎ᠠ ᠡᠷᠬᠢ ᠨᠤᠷᠠᠬᠰᠠᠨ ᠭᠠᠯ ᠤᠰᠤᠨ ᠤ ᠠᠶᠤᠯ ᠳᠤ ᠴᠤ ᠮᠤᠩᠭᠤᠯ ᠮᠤᠷᠢ ᠶᠡᠷᠦ ᠠᠴᠠ ᠠᠶᠤᠵᠦ ᠡᠮᠢᠶᠡᠬᠦ ᠶᠢ ᠮᠡᠳᠡᠳᠡᠭ ᠦᠬᠡᠢ ᠪᠠᠷ ᠤᠷᠤᠬᠰᠢ ᠪᠠᠨ ᠱᠤᠩᠭᠤᠯᠠᠨ ᠤᠷᠤᠵᠦ᠂ ᠦᠬᠦᠵᠦ ᠠᠮᠢᠳᠤᠷᠠᠬᠤ ᠠᠶᠤᠯ ᠵᠤᠪᠠᠯᠠᠩ ᠢ ᠡᠵᠡᠨ ᠲᠠᠢ ᠪᠠᠨ ᠬᠠᠮᠳᠤ ᠲᠤᠭᠤᠯᠵᠤ᠂ ᠦᠷᠯᠦᠭ ᠶᠡᠭᠡ ᠭᠠᠪᠢᠶ᠎ᠠ ᠵᠢᠳᠬᠦᠯ ᠢ ᠡᠵᠡᠨ ᠲᠠᠢ ᠪᠠᠨ ᠬᠠᠮᠳᠤ ᠪᠠᠶᠢᠭᠤᠯᠵᠦ ᠪᠠᠶᠢᠳᠠᠭ᠃ ᠮᠤᠩᠭᠤᠯ ᠮᠤᠷᠢ ᠪᠠᠷ ᠢᠶᠠᠨ ᠮᠤᠩᠭᠤᠯ ᠬᠥᠮᠦᠨ ᠬᠠᠭᠠᠰ ᠪᠦᠮᠪᠦᠷᠴᠡᠭ ᠢ ᠲᠤᠭᠤᠷᠢᠵᠦ ᠢᠷᠠᠭᠤ ᠲᠡᠥᠬᠡ ᠶᠢ ᠵᠢᠷᠤᠵᠦ ᠰᠡᠶᠢᠯᠦᠭᠰᠡᠨ ᠶᠤᠮ᠃ ᠮᠤᠩᠭᠤᠯ ᠮᠤᠷᠢᠨ ᠤ ᠤᠮᠤᠭ ᠳᠡᠬᠦᠯᠳᠡᠷ ᠪᠠᠭᠠᠳᠤᠷᠯᠢᠭ ᠵᠤᠷᠢᠭ ᠢ ᠪᠠᠭ᠋ᠠᠳᠤᠨ ᠳᠠᠭᠤᠯᠠᠭᠠᠳ ᠪᠠᠷᠠᠬᠤ ᠦᠬᠡᠢ ᠶᠤᠮ᠃        ᠮᠤᠩᠭᠤᠯ ᠮᠤᠷᠢᠨ ᠤ ᠮᠤᠬᠤᠰᠢ ᠦᠭᠡᠢ ᠬᠦᠴᠦᠨ᠂ ᠰᠢᠨᠳᠠᠷᠠᠰᠢ ᠦᠬᠡᠢ ᠵᠤᠷᠢᠭ ᠬᠡᠵᠦ ᠮᠦᠨᠴᠤ ᠭᠠᠶᠢᠬᠠᠯᠳᠠᠢ᠃ ᠮᠤᠩᠭᠤᠯ ᠮᠤᠷᠢ ᠮᠡᠷᠡᠶᠢᠨ ᠴᠢᠷᠮᠠᠶᠢᠵᠦ ᠮᠠᠩᠯᠠᠢ ᠳᠤᠨᠢ ᠭᠠᠷᠬᠤ ᠬᠠᠳᠠᠨ ᠵᠤᠷᠢᠭ ᠲᠠᠢ ᠪᠥᠬᠡᠳ ᠲᠦᠢᠯ ᠤᠨ ᠦᠬᠡᠳᠡᠷᠬᠡᠭ ᠵᠠᠩ ᠲᠠᠢ ᠶᠤᠮ᠃ ᠮᠤᠩᠭᠤᠯ ᠮᠤᠷᠢᠨ ᠤ ᠰᠢᠷᠭᠠᠭᠤ ᠬᠠᠳᠠᠭᠤᠵᠢᠯᠳᠠᠢ ᠲᠡᠮᠡᠴᠡᠨ᠂ ᠴᠤᠴᠠᠯᠳᠠ ᠦᠬᠡᠢ ᠤᠷᠤᠬᠰᠢᠯᠠᠬᠤ ᠬᠦᠴᠦᠨ ᠵᠤᠷᠢᠭ ᠪᠤᠯ ᠮᠤᠩᠭᠤᠯ ᠮᠤᠷᠢᠨ ᠤ ᠵᠤᠷᠢᠭ ᠰᠠᠨᠠᠭ᠎ᠠ ᠶᠢᠨ ᠴᠠᠭ ᠦᠶ᠎ᠡ ᠶᠢᠨ ᠥᠷᠳᠡᠭ ᠤᠨ ᠦᠵᠡᠯᠳᠡ ᠶᠢᠨ ᠴᠢᠮᠥᠬᠡ ᠮᠦᠨ᠃ ︽ᠮᠤᠩᠭᠤᠯ ᠮᠤᠷᠢ︾ ᠭᠡᠰᠡᠨ ᠳᠠᠭᠤᠤ ᠳᠤ ︽ᠮᠤᠩᠭᠤᠯ ᠬᠥᠮᠦᠨ ᠤ ᠵᠤᠷᠢᠭ ᠬᠡᠮᠵᠢᠶᠡᠯᠡᠰᠢ ᠦᠬᠡᠢ ᠶᠡᠭᠡ ᠪᠠᠶᠢᠳᠠᠭ ᠮᠤᠩᠭᠤᠯ ᠮᠤᠷᠢᠨ ᠤ ᠴᠢᠳᠠᠯ ᠬᠢᠵᠠᠭᠠᠯᠠᠰᠢ ᠦᠬᠡᠢ ᠶᠡᠭᠡ ᠪᠠᠶᠢᠳᠠᠭ︾ ᠬᠡᠵᠠᠢ᠃ ᠮᠤᠩᠭᠤᠯ ᠮᠤᠷᠢᠨ ᠤ ᠳᠤᠭᠤᠷᠠᠢ ᠨᠢ ᠴᠤᠮᠪᠤᠭᠤᠷ ᠪᠢᠳᠡᠬᠦᠦ᠂ ᠬᠠᠳᠠᠭᠤ ᠬᠤᠷᠴᠠ᠂ ᠲᠡᠶᠢᠮᠤ ᠪᠤᠯᠬᠤᠷ ᠬᠠᠳᠠ ᠴᠢᠯᠠᠭᠤᠨ ᠳᠤ ᠬᠠᠯᠳᠤᠷᠢᠬᠤ ᠦᠬᠡᠢ᠂ ᠬᠤᠯᠨ ᠶᠢᠨ ᠠᠶᠠᠨ ᠳᠤ ᠡᠯᠡᠭᠳᠠᠬᠦ ᠦᠬᠡᠢ᠂ ᠨᠡᠩ ᠢᠯᠠᠩᠭᠤᠶ᠎ᠠ ᠳᠡᠮᠦᠷ ᠢᠶᠠᠷ ᠲᠠᠬᠠᠯᠠᠬᠤ ᠶᠤᠮ ᠪᠤᠯ ᠲᠦᠮᠡᠨ ᠭᠠᠵᠠᠷ ᠤᠨ ᠠᠶᠠᠨ ᠳᠠᠶᠢᠨ ᠳᠤ ᠴᠤ ᠠᠶᠤᠳᠠᠭ ᠦᠭᠡᠢ ᠶᠤᠮᠰᠠᠨ᠂ ᠮᠤᠩᠭᠤᠯ ᠮᠤᠷᠢ ᠪᠡᠷᠬᠡ ᠶᠢᠨ ᠡᠮᠦᠨ᠎ᠡ ᠪᠡᠶ᠎ᠡ ᠪᠦᠬᠦ᠋ᠢᠬᠦ ᠶᠢ ᠮᠡᠳᠡᠳᠡᠭ ᠦᠬᠡᠢ᠂ ᠬᠦᠴᠢᠷ ᠤᠨ ᠡᠮᠦᠨ᠎ᠡ ᠬᠦᠯ ᠨᠤᠭᠤᠷᠠᠬᠤ ᠶᠢ ᠮᠡᠳᠡᠳᠡᠭ ᠦᠬᠡᠢ᠂ ᠲᠦᠮᠡᠨ ᠠᠬᠳᠠ ᠶᠢᠨ ᠤᠷᠤᠯᠳᠤᠭᠠᠨ ᠬᠡᠵᠦ ᠲᠡᠷᠨ ᠶᠡᠷᠦ ᠵᠢᠷᠦᠬᠡᠰᠢᠶᠡᠳᠡᠭ ᠦᠬᠡᠢ᠂ ᠮᠢᠩᠭᠠᠨ ᠭᠠᠵᠠᠷ ᠤᠨ ᠠᠶᠠᠨ ᠬᠡᠵᠦ ᠲᠡᠷᠨ ᠶᠡᠷᠦ ᠤᠬᠤᠷᠢᠳᠠᠭ ᠦᠬᠡᠢ᠃ ᠮᠤᠩᠭᠤᠯ ᠮᠤᠷᠢᠨ ᠤ ᠮᠤᠬᠤᠰᠢ ᠦᠬᠡᠢ ᠬᠦᠴᠦᠨ᠂ ᠰᠢᠨᠳᠠᠷᠠᠰᠢ ᠦᠬᠡᠢ ᠵᠤᠷᠢᠭ ᠢ ᠦᠨᠡᠬᠡᠷ ᠪᠢᠰᠢᠷᠡᠭᠦᠰᠢᠳᠠᠢ ᠶᠤᠮ᠃          ᠮᠤᠩᠭᠤᠯ ᠮᠤᠷᠢ ᠡᠴᠢᠬᠡ ᠡᠬᠡ ᠪᠠᠨ ᠲᠠᠨᠢᠵᠦ᠂ ᠡᠬᠡᠴᠢ ᠳᠡᠬᠦᠦ ᠪᠠᠨ ᠢᠯᠭᠠᠳᠠᠭ ᠪᠤᠯᠪᠠᠰᠤᠨ ᠮᠡᠳᠡᠯ ᠲᠠᠢ᠃ ᠨᠢᠯᠬ᠎ᠠ ᠪᠠᠭ᠎ᠠ ᠦᠶ᠎ᠡ ᠳᠤ ᠨᠢ ᠡᠴᠢᠬᠡ ᠪᠤᠯᠤᠬᠰᠠᠨ ᠠᠵᠢᠷᠭ᠎ᠠ ᠡᠬᠡ ᠪᠤᠯᠤᠬᠰᠠᠨ ᠬᠡᠬᠦᠦ ᠨᠢ ᠥᠪᠡᠷ ᠤᠨ ᠦᠷ᠎ᠡ ᠪᠠᠨ ᠡᠳᠦᠷ ᠰᠦᠨᠢ ᠦᠬᠡᠢ ᠬᠠᠶᠢᠷᠠᠯᠠᠨ ᠭᠠᠮᠨᠠᠵᠦ ᠴᠢᠨ᠋ᠸ᠎ᠠ ᠨᠤᠬᠠᠢ ᠶᠢᠨ ᠠᠶᠤᠯ ᠠᠴᠠ ᠰᠡᠷᠬᠡᠶᠢᠯᠡᠨ ᠬᠠᠮᠠᠭᠠᠯᠠᠳᠠᠭ᠃ ᠤᠨᠠᠭ᠎ᠠ ᠳᠠᠭ᠎ᠠ ᠨᠢ ᠦᠰᠴᠤ ᠪᠤᠶᠢᠵᠢᠭᠠᠳ ᠬᠢᠵᠠᠭᠠᠯᠠᠩ ᠨᠠᠰᠤ ᠬᠦᠷᠬᠦ ᠦᠶᠡᠰ ᠲᠤ ᠡᠴᠢᠬᠡ ᠪᠤᠯᠤᠬᠰᠠᠨ ᠠᠵᠢᠷᠭ᠎ᠠ ᠨᠢ ᠦᠷᠢᠶ᠎ᠠ ᠪᠠᠶᠢᠳᠠᠰᠤ ᠬᠡᠵᠦ ᠢᠯᠭᠠᠯ ᠦᠬᠡᠢ ᠴᠦᠮ ᠥᠪᠡᠷ ᠤᠨ ᠰᠦᠷᠦᠭ ᠠᠴᠠ ᠪᠠᠨ ᠬᠦᠬᠡᠬᠡᠨ ᠭᠠᠷᠭᠠᠨ᠎ᠠ᠃ ᠡᠨᠡ ᠦᠶ᠎ᠡ ᠳᠤ ᠪᠠᠶᠢᠳᠠᠰᠤ ᠨᠢ ᠥᠬᠡᠷ᠎ᠠ ᠠᠵᠢᠷᠭᠠᠨ ᠳᠤ ᠬᠤᠷᠢᠶᠠᠬᠳᠠᠵᠦ ︽ᠬᠦᠷᠬᠡᠨ ᠳᠤ ᠮᠤᠷᠳᠠᠨ᠎ᠠ︾᠂ ᠦᠷᠢᠶ᠎ᠠ ᠨᠢ ᠬᠤᠪᠢ ᠪᠠᠨ ᠬᠦᠬᠡᠬᠡᠵᠦ ︽ᠠᠶᠢᠯ ᠪᠤᠯᠤᠨ᠎ᠠ︾᠃ ᠠᠯᠢ ᠨᠢᠬᠡᠨ ᠠᠵᠢᠷᠭ᠎ᠠ ᠠᠳᠤᠭᠤᠨ ᠤ ᠬᠡᠬᠦᠦ ᠪᠤᠯ  ᠡᠬᠦᠷᠢᠳᠡ ᠲᠡᠷᠨ ᠠᠵᠢᠷᠭᠠᠨ ᠳᠠᠭᠠᠨ ᠬᠤᠷᠢᠶᠠᠬᠳᠠᠵᠦ ᠬᠡᠵᠢᠶ᠎ᠡ ᠴᠤ ᠴᠤᠭ ᠶᠠᠪᠤᠨ᠎ᠠ᠃ ᠬᠡᠷᠪᠡ ᠥᠬᠡᠷ᠎ᠡ ᠨᠢᠬᠡ ᠠᠵᠢᠷᠭ᠎ᠠ ᠢᠷᠡᠵᠦ ᠲᠡᠬᠦᠨ ᠤ ᠬᠡᠬᠦᠦ ᠶᠢ ᠪᠤᠯᠢᠶᠠᠬᠤ ᠳᠤ ᠬᠦᠷᠪᠡᠯ ︽ᠭᠡᠷ ᠤᠨ ᠡᠵᠡᠨ︾ ᠪᠤᠯᠤᠬᠰᠠᠨ ᠠᠵᠢᠷᠭ᠎ᠠ ᠨᠢ ᠠᠮᠢ ᠲᠠᠯᠪᠢᠨ ᠲᠡᠮᠡᠴᠡᠨ ᠨᠤᠴᠤᠯᠳᠤᠵᠦ ᠪᠠᠶᠢᠵᠦ ᠥᠪᠡᠷ ᠤᠨ ︽ᠡᠬᠡᠨᠡᠷ ︾᠎ ᠢᠶᠠᠨ ᠵᠠᠪᠠᠯ ᠪᠤᠯᠢᠶᠠᠨ ᠠᠪᠴᠢᠷᠠᠨ᠎ᠠ᠃ ᠡᠨᠡ ᠮᠡᠳᠦ ︽ᠡᠴᠢᠬᠡ ᠡᠬᠡ ᠪᠠᠨ ᠲᠠᠨᠢᠵᠦ ᠡᠯᠢᠬᠡᠨ  ᠰᠠᠳᠤᠨ ᠢᠶᠠᠨ ᠮᠡᠳᠡᠳᠡᠭ︾ ᠡᠯᠪᠡᠷᠢᠯ ᠵᠢᠷᠤᠮ ᠪᠠ ᠪᠤᠯᠪᠠᠰᠤᠨ ᠮᠡᠳᠡᠯ ᠬᠡᠵᠦ ᠪᠠᠰᠠᠴᠤ ᠭᠠᠶᠢᠬᠠᠯᠳᠠᠢ ᠶᠤᠮ᠃ ᠨᠡᠩᠳᠡ ᠮᠤᠩᠭᠤᠯ ᠮᠤᠷᠢᠨ ᠤ ᠰᠢᠳᠤᠷᠭᠤ ᠨᠤᠮᠤᠬᠠᠨ᠂ ᠪᠤᠷᠤᠬᠵᠢᠭᠤᠨ ᠬᠦᠯᠢᠴᠡᠩᠬᠦᠢ ᠵᠠᠩ ᠴᠢᠨᠠᠷ ᠢ ᠮᠠᠬᠳᠠᠬᠤ ᠦᠬᠡᠢ ᠪᠠᠶᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ ᠪᠢᠯᠨ᠃ ᠮᠤᠩᠭᠤᠯ ᠮᠤᠷᠢ ᠡᠳᠦᠷᠵᠢᠨ ᠰᠦᠨᠢᠵᠢᠨ ᠤᠶᠠᠬᠰᠠᠨ ᠴᠤ ᠦᠯᠦᠰᠦᠯ᠎ᠡ ᠬᠡᠵᠦ ︽ᠳᠤᠤᠭᠠᠷᠬᠤ ᠦᠬᠡᠢ︾᠂ ᠦᠬᠡᠳᠡ ᠤᠷᠤᠭᠤ  ᠳᠠᠪᠬᠢᠭᠤᠯᠤᠬᠰᠠᠨ ᠴᠤ ᠵᠦᠳᠡᠷᠡᠯ᠎ᠡ ᠬᠡᠵᠦ ︽ᠮᠠᠭᠤ ᠴᠢᠷᠠᠶᠢᠯᠠᠬᠤ ᠦᠬᠡᠢ︾᠂ ᠦᠷᠦᠬᠡᠯᠳᠦᠵᠦ ᠲᠤᠱᠠᠵᠦ ᠪᠡᠯᠴᠢᠬᠡᠭᠰᠡᠨ ᠴᠤ ᠲᠠᠯᠪᠢᠬᠤ ᠦᠬᠡᠢ ᠬᠡᠵᠦ ᠭᠤᠮᠤᠳᠠᠬᠤ ᠦᠬᠡᠢ᠂ ᠬᠢᠷᠢ ᠪᠠᠷ ᠢᠶᠠᠨ ᠴᠢᠷᠮᠠᠶᠢᠵᠦ ᠪᠠᠶᠢᠳᠠᠯ᠎ᠠ ᠲᠠᠰᠢᠭᠤᠷᠳᠠᠵᠦ ᠬᠤᠷᠳᠤᠯᠠᠭᠤᠯᠬᠤ ᠳᠤ ᠴᠤ ᠬᠢᠯᠢᠩ ᠠᠭᠤᠷ ᠬᠦᠷᠳᠡᠭ ᠦᠬᠡᠢ ᠂ ᠰᠦᠷᠦᠭ ᠲᠤᠨᠢ ᠲᠠᠯᠪᠢᠬᠤ ᠦᠬᠡᠢ ᠤᠳᠠᠯ᠎ᠠ ᠬᠡᠰᠡᠨ ᠴᠤ ᠭᠤᠮᠤᠳᠠᠯ ᠬᠡᠮᠰᠢᠯ ᠪᠠᠶᠢᠳᠠᠭ ᠦᠬᠡᠢ᠃ ᠶᠠᠭᠤᠳᠠᠢ ᠰᠢᠳᠤᠷᠭᠤ ᠨᠤᠮᠤᠬᠠᠨ ᠬᠦᠯᠢᠴᠡᠩᠬᠦᠢ ᠳᠠᠭᠠᠭᠠᠪᠤᠷᠢ ᠲᠠᠢ ᠰᠠᠶᠢᠨ ᠮᠤᠩᠭᠤᠯ ᠮᠤᠷᠢ ᠠᠵᠢ⁈          ᠤᠷᠭ᠎ᠠ ᠶᠢᠨ ᠮᠤᠷᠢ ᠤᠷᠭ᠎ᠠ ᠶᠢᠨ ᠦᠵᠦᠬᠦᠷ ᠢ ᠠᠯᠳᠠᠯ ᠦᠬᠡᠢ ᠳᠠᠭᠠᠵᠦ᠂ ᠤᠷᠭᠠᠯᠠᠬᠤ ᠮᠤᠷᠢ ᠶᠢ ᠤᠰᠤᠨ ᠲᠤᠳᠤᠷᠠᠬᠢ ᠵᠢᠭᠠᠰᠤ ᠮᠡᠳᠦ ᠰᠤᠮᠤᠳᠡᠨ ᠨᠡᠬᠡᠳᠡᠭ᠃ ᠤᠩᠭᠤᠨ ᠤᠷᠤᠭ᠎ᠠ ᠲᠤᠬᠰᠢᠨ ᠬᠠᠩᠭᠠᠯ ᠢ ᠴᠤ ᠤᠷᠭ᠎ᠠ ᠶᠢᠨ ᠮᠤᠷᠢᠨ ᠤ ᠤᠷᠠᠨ ᠨᠠᠷᠢᠨ ᠴᠢᠳᠠᠯ ᠳᠤ ᠲᠦᠰᠢᠮᠡᠨᠵᠢᠨ ᠰᠠᠶ᠋ᠢ ᠪᠠᠷᠢᠵᠦ ᠳᠡᠶᠢᠯᠳᠡᠭ᠃ ᠮᠤᠩᠭᠤᠯ ᠮᠤᠷᠢ ᠤᠰᠤᠨ ᠤ ᠲᠤᠩᠭᠠᠯᠠᠭ ᠢ ᠤᠤᠭᠤᠵᠦ᠂ ᠡᠪᠡᠰᠦᠨ ᠤ ᠰᠤᠷᠭᠤᠭ ᠢ ᠢᠳᠡᠳᠡᠭ ᠴᠡᠪᠡᠷ ᠠᠷᠢᠭᠤᠨ ᠵᠠᠩ ᠲᠠᠢ᠃ ᠲᠡᠷᠨ ᠦᠬᠡᠷ᠎ᠠ ᠠᠳᠤᠭᠤᠰᠤ ᠠᠮᠢᠳᠠᠨ ᠲᠠᠢ ᠠᠳᠠᠯᠢ ᠰᠢᠪᠠᠷ ᠱᠠᠯᠴᠢᠭ ᠲᠤ ᠤᠷᠤᠵᠦ ᠪᠠᠭᠠᠰᠤ ᠰᠢᠬᠡᠰᠦᠨ ᠳᠡᠬᠡᠷ᠎ᠡ ᠬᠦᠷᠪᠡᠳᠡᠭ ᠦᠬᠡᠢ᠃ ᠮᠤᠩᠭᠤᠯ ᠮᠤᠷᠢ ᠵᠢᠯ ᠤᠨ ᠳᠦᠷᠪᠡᠨ ᠤᠯᠠᠷᠢᠯ ᠳᠤ ᠬᠡᠵᠢᠶ᠎ᠡ ᠴᠤ ᠬᠡᠰᠡᠨ ᠦᠰᠦ ᠨᠤᠤᠰᠦ ᠭᠤᠭᠤᠵᠢᠭᠤᠯᠵᠦ ᠡᠪᠡᠰᠦ ᠰᠢᠷᠤᠢ ᠡᠬᠦᠷᠴᠤ ᠶᠠᠪᠤᠳᠠᠭ ᠦᠬᠡᠢ ᠪᠦᠬᠡᠳ ᠡᠬᠦᠷᠢᠳᠡ ᠦᠰᠦᠨ ᠳᠤᠨᠢ ᠲᠤᠰᠤ ᠳᠦᠷᠬᠢᠭᠰᠡᠨ ᠰᠢᠭ ᠥᠩᠬᠡ ᠭᠠᠷᠤᠨ ᠬᠢᠯᠳᠠᠭᠠᠨᠠᠵᠦ ᠪᠠᠶᠢᠳᠠᠭ᠃ ᠮᠤᠩᠭᠤᠯ ᠮᠤᠷᠢ ᠬᠡᠵᠢᠶᠡᠳᠡ ᠡᠪ ᠪᠦᠯᠬᠦᠮᠳᠡᠯ ᠲᠠᠢ ᠪᠠᠶᠢᠳᠠᠭ ᠨᠢ ᠨᠡᠩᠳᠠ ᠮᠠᠬᠳᠠᠭᠤᠰᠢᠳᠠᠢ᠃ ᠲᠡᠳᠡ ᠶᠡᠷᠦ ᠰᠦᠷᠦᠭᠯᠡᠨ ᠶᠠᠪᠤᠵᠦ ᠪᠡᠯᠴᠢᠬᠦ ᠵᠠᠩᠰᠢᠯ ᠲᠠᠢ᠃ ᠳᠦᠷᠦᠯᠬᠢ ᠪᠡᠶ᠎ᠡ ᠪᠡᠶ᠎ᠡ ᠲᠠᠢ ᠪᠠᠨ ᠡᠶ᠎ᠡ ᠡᠪᠳᠡᠢ ᠠᠮᠢᠳᠤᠷᠠᠳᠠᠭ ᠠᠴᠠ ᠪᠢᠰᠢ᠂ ᠨᠢᠬᠡ ᠨᠢᠬᠡᠨ ᠳᠡᠭᠡᠨ ᠬᠤᠤᠷ ᠬᠥᠨᠥᠬᠡᠯ ᠤᠴᠠᠷᠠᠭᠤᠯᠳᠠᠭ ᠦᠬᠡᠢ᠃ ᠲᠡᠳᠡ ᠪᠤᠯ ᠬᠢᠵᠠᠭᠠᠷ ᠦᠬᠡᠢ ᠪᠠᠶᠠᠯᠢᠭ ᠪᠠᠶᠢᠭᠠᠯᠢ ᠶᠢᠨ ᠪᠡᠯᠴᠢᠭᠡᠷ ᠤᠰᠤ ᠪᠤᠶᠤ ᠬᠥᠮᠦᠨ ᠤ ᠦᠭᠬᠦᠭᠰᠡᠨ ᠡᠪᠡᠰᠤ ᠪᠤᠷᠳᠤᠭ᠎ᠠ ᠪᠠᠷ ᠬᠤᠭᠤᠯᠨ ᠤᠮᠳᠠ ᠪᠠᠨ ᠪᠤᠯᠭᠠᠳᠠᠭ ᠪᠦᠬᠡᠳ ᠤᠯᠠᠢ ᠦᠵᠡᠳᠡᠭ ᠦᠬᠡᠢ ᠲᠤᠯᠨ ᠪᠤᠰᠤᠳ ᠠᠮᠢᠳᠠᠨ ᠢ ᠪᠠᠷᠢᠵᠦ ᠢᠳᠡᠬᠦ ᠶᠢᠨ ᠲᠥᠯᠥᠬᠡ ᠠᠮᠢ ᠨᠠᠰᠤ ᠬᠦᠨᠦᠬᠡᠳᠡᠭ ᠦᠬᠡᠢ᠃ ᠲᠠᠶᠢᠮᠤ ᠪᠤᠯᠬᠤᠷ ᠮᠤᠩᠭᠤᠯ ᠮᠤᠷᠢ ᠪᠤᠯ ᠪᠤᠰᠤᠳ ᠲᠤ ᠬᠤᠤᠷ ᠬᠢᠳᠡᠭ ᠦᠬᠡᠢ᠂ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠲᠤᠳᠤᠷ᠎ᠠ ᠡᠶ᠎ᠡ ᠵᠤᠬᠢᠴᠠᠩᠭᠤᠢ ᠡᠪ ᠪᠦᠯᠬᠦᠮᠳᠡᠯ ᠲᠠᠢ ᠳᠠᠩ ᠰᠡᠴᠡᠭᠤ ᠲᠠᠶᠢᠪᠤᠩ ᠤᠷᠤᠰᠢᠨ ᠠᠮᠢᠳᠤᠷᠠᠳᠠᠭ ᠬᠥᠬᠡᠷᠦᠬᠦᠨ ᠠᠮᠢᠳᠠᠨ ᠪᠢᠯᠨ᠃         ᠮᠤᠩᠭᠤᠯ ᠮᠤᠷᠢᠨ ᠤ ᠡᠵᠡᠨ ᠳᠡᠭᠡᠨ ᠬᠢᠵᠠᠭᠠᠯᠠᠰᠢ ᠦᠬᠡᠢ ᠦᠨᠡᠨᠴᠢ᠂ ᠨᠤᠳᠤᠭ ᠲᠠᠭᠠᠨ ᠬᠡᠮᠵᠢᠶᠡᠯᠡᠰᠢ ᠦᠬᠡᠢ ᠬᠠᠶᠢᠷᠠᠳᠠᠢ ᠪᠠᠶᠢᠳᠠᠭ ᠴᠢᠩ ᠦᠨᠡᠨᠴᠢ ᠰᠡᠳᠬᠢᠯ᠂ ᠨᠤᠳᠤᠬᠰᠠᠭ ᠬᠠᠯᠠᠭᠤᠨ ᠬᠠᠶᠢᠷ᠎ᠠ ᠬᠡᠵᠦ ᠨᠡᠬᠡᠷᠡᠨ ᠳᠠᠭᠤᠯᠠᠭᠤᠰᠢᠳᠠᠢ ᠶᠤᠮᠰᠠᠨ᠃ ︽ᠰᠠᠶᠢᠬᠠᠨ ᠮᠤᠩᠭᠤᠯ ᠮᠤᠷᠢ︾ ᠬᠡᠮᠡᠬᠦ ᠳᠠᠭᠤᠤ ᠮᠤᠩᠭᠤᠯ ᠮᠤᠷᠢᠨ ᠤ ᠡᠵᠡᠨ ᠳᠡᠭᠡᠨ ᠦᠨᠡᠨᠴᠢ ᠨᠤᠳᠤᠭ ᠲᠠᠭᠠᠨ ᠬᠠᠶᠢᠷᠠᠳᠠᠢ ᠪᠠᠶᠢᠳᠠᠭ ᠢ ᠰᠡᠳᠬᠢᠯ ᠵᠢᠷᠥᠬᠡ ᠲᠤᠬᠳᠤᠯᠳᠡᠯ᠎ᠡ ᠢᠷᠡᠭᠤ ᠰᠠᠶᠢᠬᠠᠨ ᠢᠯᠡᠳᠬᠡᠭᠰᠡᠨ ᠶᠤᠮ᠄ ︽ᠤᠭᠤᠨᠤ ᠶᠢᠨ ᠰᠠᠶᠢᠬᠠᠨ ᠵᠤ ᠳᠤᠨᠢ / ᠨᠠᠷᠠᠨ ᠤ ᠲᠤᠶᠠᠭ᠎ᠠ ᠰᠤᠯᠤᠩᠭᠠᠷᠠᠬᠰᠠᠨ / ᠨᠠᠪᠴᠢᠳᠦ ᠰᠠᠶᠢᠬᠠᠨ ᠳᠠᠯ᠎ᠠ ᠳᠠᠭᠠᠨ / ᠰᠠᠯᠬᠢ ᠢᠰᠬᠢᠷᠡᠬᠦᠯᠤᠨ ᠨᠠᠭᠠᠳᠤᠬᠰᠠᠨ / ᠰᠠᠶᠢᠬᠠᠨ ᠮᠤᠩᠭᠤᠯ ᠮᠤᠷᠢ ᠮᠢᠨᠢ / ᠰᠠᠶᠢᠬᠠᠨ ᠮᠤᠩᠭᠤᠯ ᠮᠤᠷᠢ ᠮᠢᠨᠢ / ᠵᠡᠬᠡᠷ᠎ᠠ ᠶᠢ ᠬᠦᠢᠴᠡᠮ᠎ᠠ ᠬᠤᠷᠳᠤ ᠪᠠᠷ / ᠬᠡᠬᠡᠷ᠎ᠠ ᠲᠠᠯ᠎ᠠ ᠶᠢ ᠲᠤᠭᠤᠯᠤᠬᠰᠠᠨ / ᠤᠨᠠᠭᠠᠨ ᠪᠠᠭ᠎ᠠ ᠠᠴᠠ ᠪᠠᠨ ᠬᠤᠯᠠ ᠶᠠᠪᠤᠬᠰᠠᠨ ᠴᠤ / ᠤᠨᠠᠬᠰᠠᠨ ᠨᠤᠳᠤᠭ ᠲᠠᠭᠠᠨ ᠡᠷᠬᠢᠵᠤ ᠢᠷᠡᠳᠡᠭ / ᠰᠠᠶᠢᠬᠠᠨ ᠮᠤᠩᠭᠤᠯ ᠮᠤᠷᠢ ᠮᠢᠨᠢ / ᠰᠠᠶᠢᠬᠠᠨ ᠮᠤᠩᠭᠤᠯ ᠮᠤᠷᠢ ᠮᠢᠨᠢ / ᠲᠠᠶᠢᠨ ᠤ ᠲᠠᠯᠠᠪᠤᠷ ᠲᠤ ᠠᠳᠡᠭᠰᠡᠨ ᠡᠵᠡᠨ ᠢᠶᠠᠨ / ᠳᠠᠶᠢᠰᠦᠨ ᠤ ᠰᠡᠪᠡᠷ ᠲᠤ ᠦᠷᠳᠡᠬᠦᠯᠦᠯ ᠦᠬᠡᠢ / ᠳᠠᠶᠢᠴᠢᠨ ᠨᠦᠬᠦᠷ ᠤᠨ ᠮᠢᠨᠢ ᠬᠡᠬᠦᠷ ᠢ ᠰᠠᠬᠢᠭᠠᠳ / ᠨᠢᠯᠪᠤᠰᠤ ᠪᠦᠮᠪᠦᠷᠢᠬᠦᠯᠦᠨ ᠵᠤᠬᠰᠤᠵᠦ ᠪᠠᠶᠢᠳᠠᠭ / ᠰᠠᠶᠢᠬᠠᠨ ᠮᠤᠩᠭᠤᠯ ᠮᠤᠷᠢ ᠮᠢᠨᠢ / ᠰᠠᠶᠢᠬᠠᠨ ᠮᠤᠩᠭᠤᠯ ᠮᠤᠷᠢ ᠮᠢᠨᠢ︾᠃ ᠤᠶᠠᠷᠠᠭᠤᠨ ᠵᠢᠪᠬᠤᠯᠠᠩᠳᠤ ᠡᠨᠡ ᠰᠠᠶᠢᠬᠠᠨ ᠮᠤᠩᠭᠤᠯ ᠮᠤᠷᠢᠨ ᠤ ᠳᠠᠭᠤᠤ ᠮᠠᠨᠤᠰ ᠤᠨ ᠰᠡᠳᠬᠢᠯ ᠵᠢᠷᠦᠬᠡᠨ ᠳᠤ ᠤᠶᠠᠷᠠᠯ ᠤᠨ ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠵᠦ ᠵᠢᠪᠬᠤᠯᠠᠩ ᠤᠨ ᠠᠶᠠᠯᠭᠤ ᠴᠤᠤᠷᠢᠶᠠᠳᠤᠭᠤᠯᠳᠠᠭ ᠶᠤᠮ᠃    ᠮᠤᠩᠭᠤᠯ ᠮᠤᠷᠢ ᠪᠤᠯ ᠬᠡᠳᠦᠢ ᠬᠤᠯᠨ ᠭᠠᠵᠠᠷ ᠶᠠᠪᠤᠬᠰᠠᠨ ᠴᠤ ᠭᠡᠷ ᠨᠤᠳᠤᠭ ᠢᠶᠠᠨ ᠲᠠᠨᠢᠵᠦ ᠮᠡᠳᠡᠳᠡᠭ ᠭᠠᠵᠠᠷᠴᠢ ᠠᠮᠢᠳᠠᠨ ᠶᠤᠮ᠃ ᠨᠡᠩ ᠢᠯᠠᠩᠭᠤᠶ᠎ᠠ ᠨᠠᠮᠤᠷ ᠤᠨ ᠬᠤᠩᠭᠤᠷ ᠰᠠᠯᠬᠢ ᠬᠦᠳᠡᠯᠬᠦ ᠦᠶᠡᠰ ᠲᠤ ᠮᠤᠩᠭᠤᠯ ᠮᠤᠷᠢ ᠪᠠᠰᠠ ᠬᠤᠯᠨ ᠮᠤᠷᠳᠠᠬᠰᠠᠨ ᠬᠡᠥᠬᠡᠨ ᠰᠢᠭ ᠲᠦᠷᠦᠭᠰᠡᠨ ᠨᠤᠳᠤᠭ ᠡᠴᠢᠬᠡ ᠡᠬᠡ ᠡᠯᠢᠬᠡᠨ ᠰᠠᠳᠤᠨ ᠢᠶᠠᠨ ᠮᠥᠷᠥᠬᠡᠳᠦᠨ ᠰᠠᠨᠠᠵᠦ᠂ ᠳᠡᠰᠴᠤ ᠶᠠᠳᠠᠨ ᠦᠦᠷᠰᠡᠳᠡᠭ ᠶᠤᠮ᠃ ᠮᠤᠩᠭᠤᠯ ᠨᠤᠳᠤᠭ ᠤᠨ ᠰᠠᠷᠠᠭᠤᠯ ᠲᠠᠯ᠎ᠠ ᠳᠤ ᠲᠦᠷᠦᠵᠦ᠂ ᠰᠤᠷᠭᠤᠭ ᠪᠡᠯᠴᠢᠬᠡᠷ ᠢᠶᠠᠨ ᠢᠳᠡᠵᠦ᠂ ᠲᠤᠩᠭᠠᠯᠠᠭ ᠰᠡᠷᠢᠬᠦᠨ ᠪᠤᠯᠠᠭ ᠤᠨ ᠤᠰᠤ ᠪᠠᠨ ᠤᠤᠭᠤᠵᠦ ᠦᠰᠦᠭᠰᠡᠨ ᠮᠤᠩᠭᠤᠯ ᠮᠤᠷᠢ ᠪᠤᠯ ᠨᠤᠳᠤᠭ ᠲᠠᠭᠠᠨ ᠬᠠᠶᠢᠷᠠᠳᠠᠢ ᠡᠵᠡᠨ ᠳᠡᠭᠡᠨ ᠡᠬᠡᠯᠢᠳᠠᠢ ᠠᠳᠤᠭᠤᠰᠤ ᠠᠵᠢ᠃         ᠮᠤᠩᠭᠤᠯ ᠮᠤᠷᠢᠨ ᠤ ᠨᠤᠳᠤᠭ ᠲᠠᠭᠠᠨ ᠬᠠᠶᠢᠷᠠᠳᠠᠢ᠂ ᠡᠵᠡᠨ ᠳᠡᠭᠡᠨ ᠡᠭᠡᠯᠢᠳᠠᠢ ᠪᠠᠶᠢᠳᠠᠭ ᠢ ᠪᠢᠴᠢᠭᠰᠡᠨ ᠵᠤᠬᠢᠶᠠᠯ ᠪᠦᠳᠦᠬᠡᠯ ᠠᠷᠪᠢᠨ ᠪᠤᠢ᠃ ᠠᠩᠭ᠍ᠯᠢ ᠶᠢᠨ ᠨᠡᠷᠡᠳᠤ ᠵᠤᠬᠢᠶᠠᠯᠴᠢ ᠿᠸᠢᠮᠰ · ᠤᠯᠠᠷᠴ ᠤᠨ ᠪᠢᠴᠢᠭᠰᠡᠨ ︽ᠭᠠᠶᠢᠬᠠᠮᠰᠢᠬᠳᠤ ᠮᠤᠩᠭᠤᠯ ᠮᠤᠷᠢ︾᠎ ᠨᠢ ᠬᠥᠮᠦᠨ ᠤ ᠰᠡᠳᠬᠢᠯ ᠢ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ ᠲᠤᠬᠳᠤᠯᠤᠭᠤᠯᠳᠠᠬ᠃ ᠮᠤᠩᠭᠤᠯ ᠤᠨ ᠭᠤᠪᠢ ᠨᠤᠳᠤᠭ ᠤᠨ ᠲᠠᠬᠢ ᠶᠢᠨ ᠵᠡᠷᠯᠢᠭ ᠦᠷᠢᠶ᠎ᠠ ᠶᠢ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠵᠤᠷᠢᠯᠭ᠎ᠠ ᠪᠠᠷ ᠪᠠᠷᠢᠵᠦ ᠠᠪᠠᠴᠢᠭᠠᠳ ᠠᠩᠭ᠍ᠯᠢ ᠶᠢᠨ ᠲᠠᠷᠬᠠᠨ ᠴᠠᠭᠠᠵᠠ ᠲᠠᠢ ᠠᠮᠢᠳᠠᠨ ᠨᠤᠳᠤᠬᠰᠢᠭᠤᠯᠬᠤ ᠭᠠᠵᠠᠷ ᠲᠤ ᠲᠠᠯᠪᠢᠬᠰᠠᠨ ᠪᠤᠯᠪᠠᠴᠤ ᠲᠡᠷᠨ ᠦᠷᠢᠶ᠎ᠠ ᠠᠩᠭ᠍ᠯᠢ ᠨᠤᠳᠤᠭ ᠲᠤ ᠢᠳᠡᠬᠡᠰᠢᠨ ᠲᠤᠬᠳᠠᠬᠤ ᠦᠬᠡᠢ᠂ ᠠᠭᠤᠯᠨ ᠤᠰᠤ ᠤᠤᠭᠠᠯ ᠨᠤᠳᠤᠭ ᠢᠶᠠᠨ ᠡᠷᠡᠮᠡᠯᠵᠡᠨ ᠠᠽᠢᠶ᠎ᠠ ᠡᠸᠦ᠋ᠷᠦᠫᠠ ᠶᠢ ᠰᠢᠪᠳᠤ ᠲᠤᠭᠤᠯᠤᠨ ᠪᠦᠮᠪᠦᠷᠴᠡᠭ ᠤᠨ ᠳᠠᠩ ᠬᠠᠭᠠᠰ ᠢ ᠰᠢᠪᠳᠤᠯᠵᠦ᠂ ᠳᠦᠷᠦᠭᠰᠡᠨ ᠨᠤᠳᠤᠭ ᠮᠤᠩᠭᠤᠯ ᠤᠷᠤᠨ ᠳᠠᠭᠠᠨ ᠳᠠᠪᠬᠢᠵᠦ ᠢᠷᠡᠭᠰᠡᠨ ᠶᠤᠮ᠃ ︽ᠡᠨᠡ ᠮᠤᠩᠭᠤᠯ ᠮᠤᠷᠢᠨ ᠤ ᠨᠤᠳᠤᠬᠴᠢ ᠰᠡᠳᠬᠢᠯ ᠢ ᠨᠡᠬᠡᠷᠡᠨ ᠤᠶᠢᠯᠠᠭᠠᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ︾ ᠬᠡᠵᠦ ᠿᠸᠢᠮᠰ · ᠤᠯᠠᠷᠴ ᠠᠪᠤᠭᠠᠢ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠳᠠᠭ᠃ ᠮᠤᠩᠭᠤᠯ ᠮᠤᠷᠢ ᠡᠵᠡᠨ ᠲᠠᠢ ᠪᠠᠨ ᠠᠳᠠᠯᠢᠬᠠᠨ ᠨᠤᠳᠤᠭ ᠤᠰᠤᠨ ᠳᠠᠭᠠᠨ ᠬᠠᠶᠢᠷᠠᠳᠠᠢ᠃ ᠮᠤᠩᠭᠤᠯ ᠨᠤᠳᠤᠭ ᠪᠤᠯ ᠮᠤᠩᠭᠤᠯ ᠮᠤᠷᠢᠨ ᠤ ᠡᠩᠬᠡ ᠶᠢᠨ ᠦᠯᠦᠬᠡᠢ᠃ ᠮᠤᠩᠭᠤᠯ ᠬᠥᠮᠦᠨ ᠮᠤᠷᠢᠨ ᠳᠠᠭᠠᠨ ᠬᠢᠵᠠᠭᠠᠯᠠᠰᠢ ᠦᠬᠡᠢ ᠬᠠᠶᠢᠷᠠᠳᠠᠢ᠃ ᠮᠤᠩᠭᠤᠯ ᠮᠤᠷᠢ ᠡᠵᠡᠨ ᠳᠡᠭᠡᠨ ᠬᠡᠮᠵᠢᠶᠡᠯᠡᠰᠢ ᠦᠬᠡᠢ ᠦᠨᠡᠨᠴᠢ ᠪᠠᠶᠢᠳᠠᠭ᠃ ᠲᠡᠭᠡᠷ᠎ᠡ ᠶᠠᠷᠢᠬᠰᠠᠨ ᠳᠠᠭᠤᠤ ᠰᠢᠯᠦᠭ᠂ ᠦᠯᠢᠬᠡᠷ ᠵᠤᠬᠢᠶᠠᠯ ᠡᠬᠦᠨ ᠢ ᠪᠦᠷᠢᠨ ᠬᠡᠷᠡᠴᠢᠯᠡᠭᠰᠡᠨ ᠶᠤᠮ᠃         ︽ᠮᠣᠩᠭᠤᠯ ᠮᠣᠷᠢᠨ ᠤ ᠵᠣᠷᠢᠭ ᠰᠠᠨᠠᠭ᠎ᠠ︾ ᠲᠠᠯ᠎ᠠ ᠨᠤᠲᠤᠭ ᠤᠨ ᠰᠣᠶᠣᠯ ᠲᠡᠦᠬᠡ ᠶᠢᠨ ᠤᠷᠲᠤ ᠠᠴᠠ ᠤᠷᠲᠤ ᠤᠷᠤᠰᠬᠠᠯ ᠳᠤᠮᠳᠠ ᠬᠥᠮᠥᠰ ᠤᠨ ᠰᠡᠳᠬᠢᠯ ᠵᠢᠷᠦᠬᠡᠨ ᠳᠤ ᠰᠡᠶᠢᠯᠦᠭᠳᠡᠵᠦ᠂ ᠦᠶ᠎ᠡ ᠶᠢᠨ ᠦᠶ᠎ᠡ ᠳᠤ ᠮᠤᠩᠭᠤᠯ ᠨᠤᠲᠤᠭ ᠤᠨ ᠠᠷᠠᠳ ᠲᠦᠮᠡᠨ ᠢ ᠵᠣᠷᠢᠭᠵᠢᠭᠤᠯᠵᠤ᠂ ᠡᠷᠡᠯᠬᠡᠭᠯᠡᠨ ᠲᠡᠮᠡᠴᠡᠬᠦ ᠬᠦᠴᠦᠨ ᠵᠣᠷᠢᠭ ᠢ ᠨᠢ ᠣᠷᠬᠢᠯᠤᠭᠤᠯᠵᠤ ᠪᠠᠶᠢᠳᠠᠭ ᠰᠠᠨ᠃ ︽ᠮᠣᠩᠭᠤᠯ ᠮᠣᠷᠢᠨ ᠤ ᠵᠣᠷᠢᠭ  ᠰᠠᠨᠠᠭ᠎ᠠ︾ ᠣᠳᠤ ᠨᠢᠭᠡᠨᠲᠡ ᠠᠭᠤᠤ ᠶᠡᠭᠡ ᠦᠨᠳᠦᠰᠦᠲᠡᠨ ᠤ ᠵᠣᠷᠢᠭ ᠰᠠᠨᠠᠭ᠎ᠠ ᠪᠣᠯᠵᠤ ᠬᠤᠪᠢᠷᠠᠭᠠᠳ ᠮᠣᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠣᠷᠤᠰᠢᠨ ᠲᠣᠭᠲᠠᠨᠢᠵᠤ ᠤᠷᠤᠭᠰᠢᠯᠠᠨ ᠳᠠᠪᠰᠢᠬᠤ ᠠᠶᠠᠯᠠᠯ ᠳᠤᠮᠳᠠ ᠪᠡᠶᠡᠯᠡᠯ ᠳᠡᠭᠡᠭᠰᠢᠯᠡᠯ ᠢᠶᠠᠨ ᠣᠯᠵᠤ ᠳᠤᠮᠳᠠᠳᠤ ᠶᠢᠨ ᠦᠨᠳᠦᠰᠦᠲᠡᠨ ᠤ ᠡᠷᠬᠢᠮ ᠳᠡᠭᠡᠳᠦ ᠣᠶᠣᠨ ᠰᠠᠨᠠᠭᠠᠨ ᠤ ᠡᠳ᠋ ᠬᠦᠷᠦᠩᠭᠡ ᠪᠣᠯᠵᠤ ᠪᠢᠯᠡ᠃ ᠣᠳᠤ ︽ᠮᠣᠩᠭᠤᠯ ᠮᠣᠷᠢᠨ ᠤ ᠵᠣᠷᠢᠭ ᠰᠠᠨᠠᠭ᠎ᠠ︾ ᠥᠭᠡᠷᠡᠴᠢᠯᠡᠯᠲᠡ ᠨᠡᠭᠡᠭᠡᠯᠲᠡ ᠶᠢᠨ ᠴᠠᠭ ᠦᠶ᠎ᠡ ᠶᠢᠨ ᠵᠣᠷᠢᠭ ᠰᠠᠨᠠᠭ᠎ᠠ ᠲᠠᠢ ᠨᠢᠬᠲᠠ ᠤᠶᠠᠯᠳᠤᠵᠤ ᠰᠢᠨ᠎ᠡ ᠠᠭᠤᠯᠬᠤᠨ  ᠨᠡᠮᠡᠭᠳᠡᠵᠦ᠂ ᠡᠯ᠎ᠡ ᠦᠨᠳᠦᠰᠦᠲᠡᠨ ᠤ ᠠᠷᠠᠳ ᠲᠦᠮᠡᠨ ᠰᠠᠬᠢᠨ ᠪᠠᠷᠠᠯᠠᠵᠤ ᠬᠠᠷᠢᠯᠴᠠᠨ ᠬᠠᠪᠰᠤᠷᠤᠯᠴᠠᠨ ᠪᠦᠯᠬᠦᠮᠳᠡᠨ ᠨᠢᠬᠲᠠᠷᠠᠵᠤ ᠡᠬᠡ ᠤᠯᠤᠰ ᠤᠨ ᠤᠮᠠᠷᠠᠲᠤ ᠬᠢᠯᠢ ᠶᠢᠨ ᠦᠵᠡᠰᠬᠦᠯᠡᠩᠲᠦ ᠰᠠᠶᠢᠬᠠᠨ ᠦᠵᠡᠮᠵᠢ ᠶᠢᠨ ᠣᠷᠣᠨ ᠢᠶᠠᠨ ᠪᠦᠲᠦᠭᠡᠨ ᠪᠠᠶᠢᠭᠤᠯᠵᠤ᠂ ᠥᠪᠥᠷ ᠮᠣᠩᠭᠤᠯ ᠣᠷᠣᠨ ᠤ ᠬᠥᠭᠵᠢᠯᠲᠡ ᠶᠢᠨ ᠲᠡᠦᠬᠡᠲᠦ ᠴᠢᠨᠠᠷᠲᠠᠢ ᠠᠭᠤᠤ ᠶᠡᠭᠡ ᠬᠤᠪᠢᠷᠠᠯᠲᠠ ᠶᠢ ᠪᠡᠶᠡᠯᠡᠬᠦᠯᠬᠦ ᠳᠤ ᠯᠣᠲᠣ ᠶᠡᠭᠡ ᠣᠶᠤᠨ  ᠰᠠᠨᠠᠭᠠᠨ ᠤ ᠬᠦᠴᠦᠨ ᠪᠣᠯᠣᠭᠰᠠᠨ ᠪᠠᠶᠢᠨ᠎ᠠ᠃          ᠡᠩᠬᠦᠷᠠᠢ ᠬᠠᠶᠢᠷᠠᠳᠤ ᠥᠪᠥᠷ ᠮᠤᠩᠭᠤᠯ ᠤᠨ ᠥᠪᠡᠷᠳᠡᠬᠡᠨ ᠵᠠᠰᠠᠬᠤ ᠤᠷᠤᠨ ᠤ ᠪᠠᠨ ᠮᠡᠨᠳᠦᠯᠡᠭᠰᠡᠨ ᠳᠠᠯᠠᠨ ᠵᠢᠯ ᠤᠨ ᠤᠢ ᠶᠢᠨ ᠪᠠᠶᠠᠷ ᠢᠶᠠᠷ ︽ᠮᠤᠩᠭᠤᠯ ᠮᠤᠷᠢᠨ ᠤ ᠵᠤᠷᠢᠭ ᠰᠠᠨᠠᠭ᠎ᠠ︾᠎ ᠶᠢᠨ ᠮᠠᠬᠳᠠᠭᠤ ᠪᠠᠨ ᠳᠠᠭᠤᠯᠠᠬᠤ ᠳᠠᠭᠠᠨ ᠥᠪᠥᠷ ᠮᠤᠩᠭᠤᠯ ᠤᠨ ᠮᠦᠽᠸᠢ ᠶᠢᠨ ᠤᠷᠤᠢ ᠳᠡᠬᠡᠷ᠎ᠡ ᠤᠯᠠᠭᠠᠨ ᠨᠠᠷᠠᠨ ᠢ ᠤᠬᠳᠤᠨ ᠳᠡᠯ ᠰᠡᠬᠦᠯ ᠢᠶᠠᠨ ᠬᠡᠶᠢᠰᠬᠡᠨ ᠳᠡᠬᠦᠯᠢᠨ ᠨᠢᠰᠴᠤ ᠪᠠᠶᠢᠭ᠎ᠠ ᠰᠠᠷᠠᠯ ᠮᠤᠷᠢ ᠪᠠᠨ ᠰᠠᠨᠠᠵᠦ ᠪᠢᠯᠨ᠃ ᠡᠨᠡ ᠰᠠᠷᠠᠯ ᠮᠤᠷᠢ ᠥᠪᠥᠷ ᠮᠤᠩᠭᠤᠯᠴᠤᠳ ᠤᠨ ᠰᠢᠳᠦᠬᠡᠨ ᠪᠠᠶᠢᠵᠦ᠂ ᠡᠨᠡ ᠮᠤᠩᠭᠤᠯ ᠮᠤᠷᠢ ᠮᠤᠯᠤᠷ ᠡᠷᠳᠡᠨᠢ ᠪᠤᠯᠬᠤ ᠪᠠᠷ ᠪᠠᠷᠠᠬᠤ ᠦᠬᠡᠢ᠂ ᠨᠡᠩ ᠴᠤ ︽ᠰᠠᠬᠢᠭᠤᠯᠰᠤᠨ ᠬᠦᠯᠦᠭ︾ ᠪᠤᠯᠤᠬᠰᠠᠨ ᠪᠠᠶᠢᠨ᠎ᠠ᠃ ᠲᠠᠶᠢᠮᠤ ᠴᠤ ᠪᠤᠯᠬᠤᠷ ᠡᠨᠡ ᠰᠠᠷᠠᠯ ᠮᠤᠷᠢ ᠪᠤᠯ ︽ᠳᠡᠬᠡᠳᠦ ᠲᠡᠭᠷᠢ ︾᠎ ᠠᠴᠠ ᠰᠤᠶᠤᠷᠬᠠᠬᠰᠠᠨ ᠲᠤᠳᠤᠨᠤ ᠡᠯᠴᠢ᠂ ᠲᠠᠯ᠎ᠠ ᠨᠤᠳᠤᠭ ᠤᠨ ᠭᠤᠴᠤ ᠦᠵᠡᠮᠵᠢ ᠶᠢᠨ ᠵᠢᠷᠤᠭ ᠤᠨ ᠠᠮᠢᠳᠤ ᠳᠦᠷᠢ ᠪᠤᠯᠬᠤ ᠨᠢ ᠭᠠᠷᠴᠠᠭ᠎ᠠ ᠦᠬᠡᠢ᠃        ︽ᠮᠤᠩᠭᠤᠯ ᠮᠤᠷᠢᠨ ᠤ ᠵᠤᠷᠢᠭ ᠰᠠᠨᠠᠭ᠎ᠠ︾ ᠰᠢᠨ᠎ᠠ ᠴᠠᠭ ᠦᠶ᠎ᠡ ᠳᠤ ᠨᠡᠩ ᠦᠩᠬᠡ ᠬᠢᠯᠪᠠᠭ᠎ᠠ ᠰᠠᠴᠤᠷᠠᠵᠦ ᠦᠢ ᠳᠦᠮᠡᠨ ᠬᠥᠮᠦᠰ ᠢ ᠵᠤᠷᠢᠬᠵᠢᠭᠤᠯᠤᠨ ᠬᠦᠭᠵᠢᠬᠡᠵᠦ ᠪᠠᠶᠢᠨ᠎ᠠ᠃ ᠲᠠᠯ᠎ᠠ ᠨᠤᠳᠤᠭ ᠤᠨ ᠡᠯ᠎ᠡ ᠦᠨᠳᠦᠰᠦᠳᠡᠨ ᠤ ᠠᠷᠠᠳ ᠲᠦᠮᠡᠨ ᠰᠠᠬᠢᠨ ᠪᠠᠷᠠᠯᠠᠵᠦ ᠬᠠᠷᠢᠯᠴᠠᠨ ᠬᠠᠪᠰᠤᠷᠤᠯᠴᠠᠵᠦ ᠪᠦᠯᠬᠦᠮᠳᠡᠨ ᠨᠢᠬᠳᠠᠷᠠᠵᠦ ᠬᠠᠮᠳᠤᠪᠠᠷ ᠴᠢᠷᠮᠠᠶᠢᠵᠦ᠂ ᠡᠬᠡ ᠤᠯᠤᠰ ᠤᠨ ᠤᠮᠠᠷᠠᠳᠤ ᠬᠢᠯᠢ ᠶᠢᠨ ᠦᠵᠡᠰᠬᠦᠯᠡᠩᠳᠦ ᠰᠠᠶᠢᠬᠠᠨ ᠦᠵᠡᠮᠵᠢ ᠶᠢᠨ ᠤᠷᠤᠨ ᠢᠶᠠᠨ ᠪᠦᠳᠦᠬᠡᠨ ᠪᠠᠶᠢᠭᠤᠯᠵᠦ ᠪᠠᠶᠢᠭ᠎ᠠ ᠴᠠᠭ ᠦᠶ᠎ᠡ ᠳᠤ ︽ᠰᠢᠷᠭᠠᠭᠤ ᠬᠠᠳᠠᠭᠤᠵᠢᠯᠳᠠᠢ ᠲᠡᠮᠡᠴᠡᠨ ᠴᠤᠴᠠᠯᠳᠠ ᠦᠬᠡᠢ ᠤᠷᠤᠬᠰᠢᠯᠠᠬᠤ︾ ᠮᠤᠩᠭᠤᠯ ᠮᠤᠷᠢᠨ ᠤ ᠵᠤᠷᠢᠭ ᠰᠠᠨᠠᠭ᠎ᠠ ᠨᠡᠩᠳᠠ ᠡᠷᠬᠢᠮ ᠨᠠᠨᠳᠢᠨ ᠪᠤᠯᠵᠦ ᠪᠠᠶᠢᠨ᠎ᠠ᠃ ᠪᠢᠳᠡ ︽ᠮᠤᠩᠭᠤᠯ ᠮᠤᠷᠢᠨ ᠤ ᠵᠤᠷᠢᠭ ᠰᠠᠨᠠᠭ᠎ᠠ︾᠎ ᠶᠢ ᠦᠶ᠎ᠠ ᠶᠢᠨ ᠦᠶ᠎ᠠ ᠤᠯᠠᠮᠵᠢᠯᠠᠨ ᠪᠠᠳᠠᠷᠠᠭᠤᠯᠵᠦ᠂ ᠡᠬᠡ ᠤᠯᠤᠰ ᠤᠨ ᠤᠮᠠᠷᠠᠳᠤ ᠬᠢᠯᠢ ᠶᠢᠨ ᠦᠵᠡᠰᠬᠦᠯᠡᠩᠳᠦ ᠰᠠᠶᠢᠬᠠᠨ ᠦᠵᠡᠮᠵᠢ ᠶᠢᠨ ᠤᠷᠤᠨ ᠢᠶᠠᠨ ᠤᠯᠠᠮ ᠦᠩᠬᠡ ᠬᠢᠯᠪᠠᠭ᠎ᠠ ᠰᠠᠴᠤᠷᠠᠳᠠᠯ᠎ᠠ ᠴᠤᠬᠴᠠᠯᠠᠨ ᠪᠠᠶᠢᠭᠤᠯᠰᠤᠭᠠᠢ︕  
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠡᠬᠡ ᠶᠢᠨ ᠴᠠᠭᠠᠨ ᠰᠥ ᠬᠠᠷᠢᠭᠤᠯᠬᠤ
ᠨᠤᠬᠠᠢ ᠮᠤᠤᠷ ᠦᠰᠢᠶ᠎ᠡ ᠲᠠᠢ ᠪᠤᠯᠤᠭᠰᠠᠨ ᠳᠤᠬᠠᠢ ᠳᠤᠮᠤᠭ
ᠳᠠᠯᠠᠨ ᠬᠤᠳᠠᠯᠴᠢ
ᠤᠢ ᠪᠢᠳᠠᠭᠤ ᠠᠬ᠎ᠠ ᠲᠡᠭᠦᠥ ᠭᠤᠷᠪᠠ ᠤᠬᠠᠭᠠᠨ ᠰᠤᠷᠤᠭᠰᠠᠨ ᠨᠢ
ᠠᠪᠳᠠᠷᠠᠳᠦ ᠶᠢᠨ ᠲᠤᠮᠤᠭ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号