| ᠵᠡᠭᠦᠨᠭᠠᠷ ᠪᠤᠶᠠᠨᠪᠠᠲᠤ | | | ᠭᠥᠭᠡ ᠠᠷᠭᠠᠯ ᠤᠨ ᠰᠡᠭᠦᠳᠡᠷ ᠲᠤ | ᠬᠤᠨᠢᠨ ᠭᠥᠷᠪᠡᠯ ᠤᠨ ᠠᠮᠢᠰᠬᠤᠭᠠ ᠰᠢᠳᠠᠨᠠ | ᠬᠤᠪᠬᠠᠢ ᠪᠤᠳᠠᠨ ᠤ ᠰᠡᠵᠢᠭᠦᠷ ᠲᠡᠭᠡᠷᠡ | ᠬᠤᠯᠠᠨ ᠵᠢᠷᠤᠭᠠ ᠶᠢᠨ ︽ᠬᠠᠷᠢᠶᠠᠯ︾ ᠠᠭᠤᠷᠰᠢᠨᠠ | ᠤᠪᠤᠭᠠ ᠪᠠᠨ ᠲᠠᠭᠢᠵᠤ ᠵᠠᠯᠪᠠᠷᠢᠶᠠ | ᠬᠤᠷᠠ ᠬᠠᠶᠢᠷᠠᠯᠠ︕ ᠬᠤᠷᠮᠤᠰᠳᠠ ᠮᠢᠨᠢ | ᠤᠯᠠᠨ ᠢᠶᠠᠷ ᠢᠶᠠᠨ ᠰᠤᠨᠤᠵᠤ ᠮᠥᠷᠭᠦᠶᠡ | ᠬᠤᠷᠠ ᠬᠠᠶᠢᠷᠠᠯᠠ︕ ᠬᠤᠷᠮᠤᠰᠳᠠ ᠮᠢᠨᠢ | ᠲᠠᠯᠠᠢ ᠶᠢᠨ ᠵᠥᠭ ᠠᠴᠠ ︽ᠤᠷᠢᠯᠭᠠ︾ ᠶᠡᠭᠡ ᠲᠠᠯᠪᠢᠯᠠ | ᠲᠠᠩᠴᠤ ᠨᠢᠭᠡ ᠪᠤᠷᠤᠭᠠ ᠲᠤᠰᠤᠭᠰᠠᠨ ᠥᠭᠡᠢ ᠳ᠋ᠠ | ᠲᠠᠭᠠᠭᠠᠮᠠᠭᠠᠢ ᠮᠥᠷᠥᠭᠡᠳᠥᠯ ᠢᠶᠠᠨ ᠤᠳᠤᠭᠠ ᠭᠠᠷᠳᠠᠯᠠ ᠨᠢ ᠭᠥᠯᠢᠶᠡᠯᠡ | ᠲᠠᠩ ᠲᠡᠪᠡᠯ ᠤᠨ ᠴᠢᠨᠡᠭᠡᠨ ᠴᠦ ᠡᠭᠦᠯᠡ ᠤᠷᠭᠤᠭᠰᠠᠨ ᠥᠭᠡᠢ ᠳ᠋ᠠ | ᠡᠷᠭᠦᠯ ᠢᠶᠠᠨ ᠡᠷᠭᠦᠵᠥ ᠰᠢᠪᠰᠢᠶᠡ | ᠬᠤᠷᠠ ᠬᠠᠶᠢᠷᠠᠯᠠ︕ ᠬᠤᠷᠮᠤᠰᠳᠠ ᠮᠢᠨᠢ | ᠢᠷᠥᠭᠡᠯ ᠢᠶᠠᠨ ᠵᠥᠩᠨᠡᠵᠥ ᠲᠠᠭᠠᠳᠬᠠᠶᠠ | ᠬᠤᠷᠠ ᠬᠠᠶᠢᠷᠠᠯᠠ︕ ᠡᠴᠢᠭᠡ ᠮᠢᠨᠢ | ᠪᠠᠳᠠᠭᠠᠨᠠ ᠭᠠᠯᠵᠠᠭᠤᠷᠠᠵᠤ ᠲᠡᠮᠡᠭᠡ ᠥᠳᠥᠵᠥ ᠬᠤᠷᠮᠤᠰᠢ ᠤᠩᠭᠤᠰᠴᠤ ᠪᠠᠶᠢᠨᠠ | ᠵᠡᠷᠭᠡᠯᠭᠡ ᠬᠤᠰᠠᠷᠠᠵᠤ ᠵᠡᠭᠡᠷᠡ ᠭᠠᠰᠠᠯᠵᠤ ᠵᠡᠭᠡᠷᠭᠡᠨᠡ ᠲᠡᠪᠭᠡᠴᠡᠵᠥ ᠪᠠᠶᠢᠨᠠ | ᠬᠤᠳᠳᠤᠭ ᠴᠠᠩᠭᠠᠵᠤ ᠬᠤᠯᠤᠰᠤ ᠨᠤᠶᠢᠷᠮᠤᠭᠯᠠᠵᠤ ᠬᠤᠭᠤᠷ ᠬᠠᠭᠰᠠᠷᠠᠵᠤ ᠪᠠᠶᠢᠨᠠ | ᠠᠭᠤᠯᠠᠰ ᠠᠭᠠᠭᠢᠯᠠᠵᠤ ᠡᠭᠦᠯᠡᠰ ᠬᠤᠯᠵᠢᠵᠤ ᠥᠭᠡᠰ ᠴᠤᠨᠤᠵᠤ ᠪᠠᠶᠢᠨᠠ | ᠰᠠᠩ ᠢᠶᠠᠨ ᠲᠠᠯᠪᠢᠵᠤ ᠰᠢᠷᠢᠭᠯᠡᠶᠡ | ᠬᠤᠷᠠ ᠬᠠᠶᠢᠷᠠᠯᠠ︕ ᠬᠤᠷᠮᠤᠰᠳᠠ ᠮᠢᠨᠢ | ᠰᠠᠯᠭᠢ ᠪᠠᠨ ᠠᠷᠭᠠᠳᠠᠵᠤ ᠲᠠᠷᠨᠢᠳᠠᠶᠠ | ᠬᠤᠷᠠ ᠬᠠᠶᠢᠷᠠᠯᠠ︕ ᠡᠵᠡᠨ ᠮᠢᠨᠢ | ᠠᠭᠠᠰᠢ ᠮᠠᠭᠤᠳᠠᠢ ᠭᠤᠨᠵᠢ ᠮᠡᠳᠤ | ᠢᠪᠢᠯᠵᠥ ᠥᠭᠭᠦ ᠥᠭᠡᠢ ᠶᠤᠮ ᠳ᠋ᠠ᠂ ᠲᠡᠭᠷᠢ ᠮᠢᠨᠢ | ᠠᠷᠠᠭᠠ ᠪᠠᠨ ᠵᠠᠭᠤᠭᠰᠠᠨ ᠬᠠᠳᠠᠭᠤ ᠭᠥᠮᠥᠨ ᠮᠡᠳᠤ | ᠤᠶᠠᠷᠠᠵᠤ ᠥᠭᠭᠦ ᠥᠭᠡᠢ ᠶᠤᠮ ᠳ᠋ᠠ᠂ ᠲᠡᠭᠷᠢ ᠮᠢᠨᠢ | ᠬᠠᠳᠠᠭ ᠢᠶᠠᠨ ᠬᠤᠷᠤᠶᠢᠯᠠᠵᠤ ᠲᠠᠯᠠᠯᠤᠶᠠ | ᠬᠤᠷᠠ ᠬᠠᠶᠢᠷᠠᠯᠠ︕ ᠬᠤᠷᠮᠤᠰᠳᠠ ᠮᠢᠨᠢ | ᠬᠠᠶᠢᠷᠠ ᠪᠠᠨ ᠵᠤᠯᠠᠵᠤ ᠲᠠᠭᠤᠳᠠᠶᠠ | ᠬᠤᠷᠠ ᠬᠠᠶᠢᠷᠠᠯᠠ︕ ᠪᠤᠷᠬᠠᠨ ᠮᠢᠨᠢ | ᠲᠡᠮᠡᠭᠡ ᠨᠢ ᠥᠷᠭᠦᠯᠵᠢ ᠤᠭᠢᠯᠠᠳᠠᠭ ᠠᠳᠠᠯᠠ ᠪᠠᠨ | ᠲᠡᠭᠷᠢ ᠨᠢ ᠶᠡᠷᠥ ᠤᠭᠢᠯᠠᠵᠤ ᠥᠭᠭᠦ ᠥᠭᠡᠢ ᠶᠤᠮ᠂ ᠭᠠᠶᠢᠬᠠᠮᠠᠷ ᠶᠤᠮ | ᠲᠥᠷᠭᠡᠨ ᠠᠷᠠᠨᠰᠢᠨ ᠮᠡᠳᠤ ᠬᠠᠭᠤᠷᠠᠢ ᠭᠡᠳᠤ ︽ᠬᠠᠰᠭᠢᠴᠢᠭᠠᠳ︾ ᠯᠠ | ᠲᠥᠳᠡᠭᠡᠨ ᠭᠱᠠᠨ ᠳᠤ ᠠᠷᠢᠯᠤᠭᠠᠳ ᠤᠳᠬᠤ ᠶᠤᠮ᠂ ᠭᠤᠮᠤᠳᠠᠮᠠᠷ ᠶᠤᠮ | ᠥᠩ ᠲᠠᠩᠰᠤᠭ ᠪᠠᠶᠢᠭᠰᠠᠨ ᠢᠶᠠᠨ ᠲᠤᠷᠠᠰᠴᠤ ᠲᠠᠭᠢᠶᠠ | ᠬᠤᠷᠠ ᠬᠠᠶᠢᠷᠠᠯᠠ︕ ᠬᠤᠷᠮᠤᠰᠳᠠ ᠮᠢᠨᠢ | ᠥᠪᠡᠷ ᠤᠨ ᠨᠢᠭᠦᠯ ᠢᠶᠠᠨ ᠰᠡᠮᠡᠯᠡᠵᠥ ᠰᠥᠭᠦᠷᠡᠶᠡ | ᠬᠤᠷᠠ ᠬᠠᠶᠢᠷᠠᠯᠠ︕ ᠲᠡᠭᠷᠢ ᠮᠢᠨᠢ ᠡ᠃ | | | ᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦ | ᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷ | ᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ |