| | ᠵᠡᠭᠦᠨᠭᠠᠷ ᠪᠤᠶᠠᠨᠪᠠᠲᠤ | | | ᠭᠤᠯᠢᠶᠠ ᠭᠢᠩᠰᠢᠵᠤ ᠵᠡᠷᠭᠡᠯᠭᠡᠨ ᠭᠡᠭᠡᠯᠵᠡᠭᠰᠡᠨ ᠵᠤᠨ ᠴᠠᠭ | ᠭᠤᠶᠤᠤ ᠢᠳᠡᠵᠥ ᠭᠤᠤᠯ ᠬᠠᠷᠠᠯᠠᠭᠰᠠᠨ ᠭᠥᠮᠥᠨ ᠮᠡᠳᠤ | ᠭᠤᠪᠢ ᠶᠢᠨ ᠠᠶᠢᠯ ᠤᠨ ᠭᠠᠳᠠᠭᠠ ᠭᠠᠭᠴᠠ ᠲᠡᠮᠡᠭᠡ | ᠭᠤᠨᠢᠭ ᠤᠨ ᠲᠠᠭᠤᠨ ᠤ ᠰᠡᠭᠦᠯᠴᠢ ᠶᠢᠨ ᠭᠠᠭᠴᠠ ᠪᠠᠳᠠᠭ ᠮᠡᠳᠤ | ᠰᠠᠯᠭᠢ ᠪᠠᠷ ᠴᠢᠬᠤᠯᠳᠠᠭᠰᠠᠨ | ᠰᠢᠷᠭᠠᠯ ᠲᠠᠯᠠᠢ ᠶᠢᠨ ᠤᠮᠤᠭᠤᠯᠳᠤᠭᠰᠠᠨ ᠤᠷᠤᠭᠤᠯ ᠲᠡᠭᠡᠷᠡ | ᠰᠠᠭᠰᠤ ᠮᠡᠳᠤ ᠰᠢᠪᠠᠷ ᠪᠠᠶᠢᠰᠢᠩ ᠥᠨᠥᠴᠢᠨ ᠵᠠᠪᠢ ᠮᠡᠳᠤ | ᠰᠠᠨᠠᠭᠠ ᠠᠯᠳᠠᠬᠤ ᠶᠢᠨ ᠲᠤᠭᠠᠯᠠᠨ ᠢᠶᠠᠷ ᠭᠠᠩᠰᠠ ᠪᠠᠨ ᠫᠤᠭᠰᠢᠭᠰᠠᠨ | ᠰᠠᠶᠢᠷᠳᠤ ᠶᠢᠨ ᠡᠩᠭᠡᠷ ᠤᠨ ᠵᠠᠭ ᠤᠨ ᠬᠤᠵᠤᠤᠯᠠ ᠮᠡᠳᠤ ᠡᠪᠤᠭᠡᠨ | ᠡᠵᠡᠨ ᠥᠭᠡᠢ ᠠᠷᠠᠯ ᠳᠤ ᠴᠥᠯᠡᠭᠳᠡᠭᠰᠡᠨ ᠱᠤᠭᠤᠪᠳᠤᠷ ᠮᠡᠳᠤ | ᠨᠤᠳᠤᠭ ᠬᠤᠳᠳᠤᠭ ᠬᠤᠶᠠᠷ ᠢᠶᠠᠨ ᠪᠠᠷᠠᠳᠠᠵᠤ ᠥᠯᠡᠳᠡᠭᠰᠡᠨ | ᠡᠪᠥᠭᠡᠨ ᠲᠡᠮᠡᠭᠡ ᠬᠤᠶᠠᠷ | ᠨᠢᠭᠡ ᠨᠢᠭᠡ ᠪᠠᠨ ᠨᠢᠯᠪᠤᠰᠤ ᠲᠠᠢ ᠨᠢᠳᠤ ᠪᠠᠷ ᠬᠠᠷᠠᠬᠤ ᠮᠡᠳᠤ | ᠨᠢᠭᠦᠯ ᠢᠶᠠᠨ ᠨᠠᠮᠠᠨᠴᠢᠯᠠᠬᠤ ᠮᠡᠳᠤ ᠠᠵᠢᠨ ᠲᠥᠵᠢᠨ | ᠨᠤᠷᠮᠠ ᠮᠡᠳᠤ ᠡᠯᠡᠰᠥ ᠪᠤᠴᠠᠯᠬᠤ ᠮᠡᠳᠤ ᠤᠪᠤᠯᠵᠠᠵᠤ | ᠨᠢᠭᠤᠴᠠ ᠮᠡᠳᠤ ᠥᠭᠡ ᠨᠠᠷᠠᠨ ᠳᠤ ᠰᠢᠵᠢᠭᠢᠨᠡᠨ ᠠᠭᠤᠷᠰᠢᠬᠤ ᠮᠡᠳᠤ | ᠨᠠᠷᠠᠰᠢᠭᠰᠠᠨ ᠠᠷᠭᠠᠯ ᠲᠡᠭᠡᠷᠡ ᠮᠤᠭᠠᠢ ᠭᠥᠷᠪᠡᠯ ᠴᠤᠩᠨᠤᠶᠢᠨᠠ | ᠲᠡᠭᠷᠢ ᠠᠴᠠ ᠶᠠᠭᠤ ᠨᠢᠭᠡ ᠶᠢ ᠭᠤᠷᠢᠯᠠᠬᠤ ᠮᠡᠳᠤ | ᠨᠠᠷᠠᠨ ᠤ ᠰᠡᠭᠦᠳᠡᠷ ᠬᠤᠮᠢᠵᠤ ᠵᠠᠭ ᠵᠡᠭᠦᠷᠮᠡᠭᠯᠡᠨᠡ | ᠲᠡᠮᠡᠭᠡᠨ ᠠᠴᠠ ᠶᠠᠭᠤ ᠨᠢᠭᠡ ᠶᠢ ᠥᠭᠡᠶᠢᠯᠡᠭᠦ ᠮᠡᠳᠤ | ᠬᠤᠳᠳᠤᠭ ᠤᠨ ᠠᠮᠠᠰᠠᠷ ᠲᠡᠭᠡᠷᠡ ᠭᠥᠭᠰᠢᠨ ᠠᠳᠠ | ᠡᠪᠡᠷ ᠢᠶᠠᠨ ᠭᠥᠯᠢᠶᠡᠭᠦ ᠮᠡᠳᠤ ᠢᠵᠢᠯᠢ ᠪᠠᠨ ᠭᠥᠯᠢᠶᠡᠨᠡ | ᠬᠤᠯᠠᠨ ᠵᠢᠷᠤᠭᠠ ᠭᠥᠯ ᠢᠶᠠᠨ ᠰᠤᠶᠢᠭᠰᠠᠨ ᠬᠠᠭᠤᠴᠢᠨ ᠪᠤᠷᠤ ᠱᠤᠩ | ᠡᠵᠢ ᠪᠠᠨ ᠬᠠᠷᠠᠭᠤᠯᠳᠤᠭᠰᠠᠨ ᠭᠥᠥ ᠮᠡᠳᠤ ᠲᠡᠮᠡᠭᠡᠳ ᠢᠶᠠᠨ ᠭᠥᠯᠢᠶᠡᠨᠡ | ᠵᠡᠷᠭᠡᠯᠭᠡᠨ ᠤ ᠥᠢᠮᠡᠭᠡᠨ ᠳᠤ ᠵᠡᠭᠡᠷᠭᠡᠨᠡ ᠭᠥᠳᠡᠯᠥᠨᠡ | ᠬᠠᠷᠢᠭᠤᠯᠭᠠᠨ ᠤ ᠲᠡᠮᠡᠭᠡᠳ ᠭᠥᠷᠡᠶᠢᠭᠡᠳ ᠭᠠᠷᠤᠭᠠᠳ ᠢᠷᠡᠭᠦ ᠮᠡᠳᠤ | ᠬᠤᠶᠠᠷ ᠴᠢᠭᠢ ᠪᠠᠨ ᠥᠷᠭᠦᠭᠡᠨ ᠠᠯᠳᠠᠵᠤ ᠥᠨᠳᠡᠶᠢᠨᠡ | ᠬᠤᠷᠸᠠ ᠶᠢᠨ ᠬᠠᠭᠤᠷᠮᠠᠴᠢ ᠳᠤ ᠭᠤᠮᠤᠳᠠᠵᠤ ᠨᠢᠯᠪᠤᠰᠤ ᠠᠰᠬᠠᠨᠠ | ᠴᠥᠭᠦᠷᠡᠭᠰᠡᠨ ᠰᠡᠳᠭᠢᠯ ᠮᠡᠳᠤ ᠬᠤᠵᠢᠷ ᠲᠠᠢ ᠨᠢᠯᠪᠤᠰᠤ ᠶᠢ | ᠴᠥᠯ ᠤᠨ ᠬᠠᠭᠤᠷᠠᠢ ᠰᠠᠯᠭᠢ ᠰᠠᠷᠬᠤᠳ ᠮᠡᠳᠤ ᠵᠠᠯᠭᠢᠯᠠᠨᠠ | ᠴᠥᠷᠭᠡ ᠴᠥᠷᠭᠡ ᠪᠠᠷ ᠭᠥᠪᠥᠷᠡᠭᠰᠡᠨ ᠰᠢᠭᠡᠷ ᠮᠡᠳᠤ ᠡᠷᠭᠢᠴᠡᠭᠦᠯᠥᠯ ᠢ | ᠴᠢᠮᠭᠢ ᠴᠢᠮᠭᠢ` ᠪᠠᠷ ᠴᠠᠭ ᠬᠤᠭᠤᠴᠠᠭᠠ ᠴᠥᠭᠡᠪᠤᠷᠢ ᠮᠡᠳᠤ ᠵᠤᠯᠭᠠᠭᠠᠨᠠ | ᠪᠤᠷᠬᠠᠨ ᠴᠠᠭᠠᠨ ᠰᠠᠯᠭᠢᠨ ᠳᠤ | ᠪᠤᠷᠠᠨᠳᠠᠭ ᠤᠨ ᠭᠥᠪᠤᠷᠭᠡᠢ ᠵᠠᠩᠭᠢᠯᠠᠭᠠ ᠲᠠᠶᠢᠯᠤᠷᠠᠵᠤ ᠪᠠᠶᠢᠭᠰᠠᠨ ᠮᠡᠳᠤ ᠰᠠᠨᠠᠭᠳᠠᠨᠠ | ᠪᠤᠶᠢᠳᠤᠭ ᠮᠡᠳᠤ ᠭᠡᠥᠭᠡᠳ ᠠᠭᠤᠯᠠ ᠮᠡᠳᠤ ᠨᠢᠷᠤᠭᠤᠨ ᠳᠤ ᠨᠢ | ᠪᠤᠳᠤᠷᠭᠠᠨᠠ ᠶᠢᠨ ᠪᠤᠷᠠ ᠮᠡᠳᠤ ᠨᠠᠭᠠᠯᠳᠤᠵᠤ ᠲᠠᠭᠤᠯᠠᠵᠤ ᠨᠢᠰᠥᠭᠰᠡᠨ ᠮᠡᠳᠤ ᠪᠤᠳᠤᠭᠳᠠᠨᠠ | ᠵᠢᠭᠢᠵᠤ ᠮᠤᠷᠳᠠᠳᠠᠭ ᠭᠠᠩ ᠲᠥᠷᠥᠭᠡ ᠵᠢᠩ ᠭᠡᠭᠦ ᠰᠢᠭ | ᠵᠢᠷᠭᠠᠯ ᠤᠨ ᠨᠠᠢᠮᠠᠨ ᠭᠠᠨᠵᠤᠭᠠ ᠰᠠᠪᠰᠠᠯᠵᠠᠭᠤᠯᠤᠨ ᠭᠡᠶᠢᠴᠢᠨ ᠲᠤᠪᠳᠤᠯᠤᠭᠠᠳ ᠢᠷᠡᠭᠦ ᠰᠢᠭ | ᠵᠢᠯ ᠴᠠᠭᠠᠨ ᠰᠠᠷᠠ ᠪᠠᠷ ︽ᠠᠷᠢᠭᠢ ᠴᠡᠭᠡᠨ ᠳᠤ ᠪᠠᠨ ᠁︾ ᠭᠡᠳ ᠡᠭᠢᠯᠡᠭᠦ ᠰᠢᠭ | ᠵᠡᠰ ᠤᠨ ᠤᠯᠠᠭᠠᠨ ᠨᠠᠷᠠ ᠲᠤᠯᠢᠶᠠᠵᠤ ᠠᠯᠳᠠᠮᠠᠷ ᠰᠠᠶᠢᠬᠠᠨ ᠡᠵᠡᠨ ᠨᠢ ᠰᠥᠭᠦ ᠭᠡᠭᠦ ᠰᠢᠭ | ᠤᠩᠭᠤᠨ ᠬᠠᠷᠠ ᠪᠤᠤᠷᠠ ᠰᠢᠯᠢ ᠪᠠᠨ ᠬᠠᠨᠳᠠᠷᠠᠭᠠᠳ ᠢᠷᠡᠭᠦ ᠰᠢᠭ | ᠤᠮᠤᠭᠯᠠᠩ ᠤᠯᠠᠭᠠᠨ ᠲᠡᠮᠡᠭᠡᠳ ᠡᠭᠦᠯᠡ ᠵᠠᠶᠢᠮᠤᠷᠠᠭᠤᠯᠤᠨ ᠬᠤᠶᠢᠯᠠᠷᠠᠬᠤ ᠰᠢᠭ᠋ | ᠥᠭᠡᠭᠦ ᠨᠢ ︽ᠬᠠᠳᠬᠤᠵᠤ︾ ᠴᠤᠭᠢᠶᠠ ᠪᠤᠶᠢᠯᠠᠭᠤᠯᠤᠨ ᠲᠠᠭᠰᠢᠬᠤ ᠰᠢᠭ᠋ | ᠡᠪᠤᠯ ᠤᠨ ᠭᠤᠷᠪᠠᠨ ᠶᠢᠰᠥ ᠶᠢ ᠡᠪᠥᠳᠥᠭ ᠲᠤᠤᠷᠠ ᠪᠠᠨ ᠨᠤᠬᠤᠯᠬᠤ ᠰᠢᠭ᠋ ᠁ | ᠭᠡᠪᠢᠭᠦ ᠰᠠᠨᠠᠬᠤ ᠶᠢᠨ ᠡᠷᠭᠡ ᠪᠠᠷ ᠭᠤᠯᠭᠢᠬᠤ ᠳᠤ | ᠭᠡᠷᠢᠶᠡ ᠮᠡᠳᠤ ᠡᠭᠦᠯᠡᠰ ᠲᠡᠭᠷᠢ ᠶᠢᠨ ᠬᠠᠶᠠᠭᠠᠨ ᠠᠴᠠ ᠴᠡᠴᠡᠭᠯᠡᠭᠦ ᠮᠡᠳᠤ | ᠭᠥᠢᠰ ᠭᠥᠢᠰ ᠰᠠᠨᠠᠭᠠ ᠠᠯᠳᠠᠬᠤ ᠳᠤ | ᠭᠥᠷᠡᠩ ᠲᠤᠯᠤᠭᠠᠳ ᠤᠨ ᠪᠤᠳᠠ ᠲᠠᠢ ᠤᠷᠤᠢ ᠡᠮᠳᠡᠷᠡᠭᠦ ᠮᠡᠳᠤ | ᠲᠠᠭᠤᠯᠠᠵᠤ ᠨᠡᠭᠦᠳᠡᠭ ᠭᠤᠪᠢ ᠶᠢᠨ ᠲᠠᠷᠢᠭᠢᠨ ᠠᠴᠠ | ᠪᠤᠶᠢᠯᠠᠵᠤ ᠤᠷᠤᠰᠳᠠᠭ ᠽᠠᠨᠳᠠᠨ ᠮᠥᠷᠡᠨ ᠲᠠᠳᠠᠷᠠᠬᠤ ᠮᠡᠳᠤ | ᠴᠢᠭᠤᠯᠵᠤ ᠠᠶᠢᠯᠰᠠᠳᠠᠭ ᠮᠤᠩᠭᠤᠯ ᠤᠨ ᠰᠤᠪᠢᠩ ᠠᠴᠠ | ᠪᠠᠭᠤᠵᠤ ᠮᠤᠷᠳᠠᠳᠠᠭ ᠪᠤᠶᠠᠨ ᠤ ᠰᠢᠪᠠᠭᠤ ᠵᠤᠯᠠᠷᠠᠬᠤ ᠮᠡᠳᠤ | ᠭᠤᠪᠢ ᠶᠢᠨ ᠠᠶᠢᠯ ᠤᠨ ᠭᠠᠳᠠᠭᠠ ᠭᠠᠭᠴᠠ ᠲᠡᠮᠡᠭᠡ | ᠭᠤᠮᠤᠳᠠᠯ ᠤᠨ ᠨᠢᠯᠪᠤᠰᠤ ᠲᠤᠰᠬᠤ ᠥᠷᠥᠭᠡᠰᠥᠨ ᠤᠯᠠᠭᠠᠨ ᠮᠡᠩᠭᠡ ᠮᠡᠳᠤ | ᠲᠡᠥᠭᠡ ᠴᠤᠮᠤᠨᠠᠭᠰᠠᠨ ᠥᠯᠭᠡ ᠭᠥᠷᠪᠡᠯ ᠤᠨ ᠥᠨᠳᠡᠭᠡ ᠮᠡᠳᠤ ᠭᠤᠪᠢ ᠶᠢᠨ ᠠᠶᠢᠯ | ᠲᠥᠢᠮᠡᠷ ᠠᠪᠤᠭᠰᠠᠨ ᠴᠦ ᠭᠡᠪ ᠢᠶᠠᠷ ᠥᠯᠡᠳᠡᠭᠦ ᠭᠥᠮᠥᠨ ᠴᠢᠯᠠᠭᠤᠨ ᠤ ᠰᠥᠨᠡᠰᠥ ᠮᠡᠳᠤ ᠁ | | | ᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦ | ᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷ | ᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ |