| ︽ᠣᠶᠢᠷᠠᠳ ᠮᠣᠩᠭᠤᠯ ᠤᠨ ᠵᠠᠩ ᠦᠢᠯᠡ ᠶᠢᠨ ᠰᠤᠶᠤᠯ︾ | ----- ᠠᠬᠤᠢ ᠠᠮᠢᠳᠤᠷᠠᠯ ᠤᠨ ᠪᠣᠳᠢ | | ᠭᠡᠷ ᠤᠨ ᠡᠳ᠋ᠯᠡᠯ ᠤᠨ ᠵᠦᠢᠯ — | ᠰᠢᠨᠠᠭᠠ᠂ ᠬᠡᠪᠬᠡᠭᠦᠷ᠄ ᠰᠢᠨᠠᠭᠠ ᠭᠡᠳᠡᠭ ᠨᠢ ᠠᠶᠢᠷᠠᠭ ᠴᠡᠭᠡ᠂ ᠤᠰᠤ ᠰᠦ ᠮᠡᠲᠦ ᠰᠢᠩᠭᠡᠨ ᠪᠡᠶᠡᠲᠦ ᠶᠢ | ᠬᠤᠳᠬᠤᠵᠤ ᠠᠪᠬᠤ ᠳᠤ ᠬᠡᠷᠡᠭᠯᠡᠬᠦ ᠪᠠᠷᠢᠭᠤᠯ ᠡᠰᠢ ᠲᠠᠢ ᠡᠳ᠋ᠯᠡᠮᠤᠰᠢ ᠶᠢ ᠬᠡᠯᠡᠳᠡᠭ᠃ ᠭᠡᠲᠡᠯᠡ ᠶᠡᠭᠡ ᠪᠠᠭᠠ | ᠰᠢᠨᠠᠭᠠ ᠶᠢᠨ ᠪᠠᠭᠲᠠᠭᠠᠮᠵᠢ ᠨᠢ ᠠᠳᠠᠯᠢ ᠦᠭᠡᠢ ᠠᠴᠠ ᠪᠣᠯᠵᠤ ᠪᠠᠭ᠋ᠠᠷ᠂ ᠤᠭᠤᠭᠤᠷ᠂ ᠤᠵᠢᠤ᠂ ᠶᠡᠩᠬᠡ ᠭᠡᠬᠦ ᠮᠡᠲᠦ | ᠣᠯᠠᠨ ᠵᠦᠢᠯ ᠳᠤ ᠬᠤᠪᠢᠶᠠᠭᠳᠠᠭ ᠪᠠᠶᠢᠨᠠ᠃ ᠡᠭᠦᠨ ᠳᠤ ᠵᠠᠷᠢᠮ ᠭᠠᠵᠠᠷ ᠤᠨ ᠤᠯᠤᠰ ᠰᠢᠨᠠᠭᠠ ᠪᠠᠨ ᠤᠭᠤᠭᠤᠷ᠂ | ᠶᠡᠩᠬᠡ ᠭᠡᠵᠦ ᠬᠡᠯᠡᠬᠦ ᠪᠤᠶᠤ ᠵᠠᠷᠢᠮ ᠭᠠᠵᠠᠷ ᠤᠨ ᠬᠦᠮᠦᠰ ᠤᠵᠢᠤ ᠶᠡᠩᠬᠡ ᠪᠠᠨ ᠴᠤ ᠰᠢᠨᠠᠭᠠ ᠭᠡᠵᠦ ᠬᠡᠯᠡᠳᠡᠭ | ᠦᠵᠡᠭᠳᠡᠯ ᠪᠠᠶᠢᠳᠠᠭ ᠪᠠᠶᠢᠨᠠ᠃ ᠬᠠᠷᠢᠨ ᠵᠠᠷᠢᠮ ᠨᠢ ᠨᠢᠭᠡ ᠺᠢᠯᠣᠭ᠍ᠷᠠᠮ ᠪᠠᠭᠲᠠᠭᠠᠮᠵᠢ ᠲᠠᠢ ᠪᠠᠨ ᠰᠢᠨᠠᠭᠠ ᠭᠡᠵᠦ᠂ | ᠬᠡᠳᠦᠨ ᠪᠠᠯᠭᠤ ᠶᠠᠭᠤᠮᠠ ᠰᠠᠪᠠᠯᠠᠬᠤ ᠪᠠᠭᠠ ᠭᠠᠷ ᠤᠨ ᠰᠢᠨᠠᠭᠠ ᠪᠠᠨ ᠤᠵᠢᠤ ᠭᠡᠵᠦ ᠬᠡᠯᠡᠳᠡᠭ᠃ ᠡᠶᠢᠮᠦ ᠠᠴᠠ | ᠨᠤᠲᠤᠭ ᠨᠤᠲᠤᠭ ᠤᠨ ᠣᠶᠢᠯᠠᠭᠠᠮᠵᠢ ᠳᠤ ᠰᠢᠨᠠᠭᠠ᠂ ᠤᠵᠢᠤ᠂ ᠤᠭᠤᠭᠤᠷ᠂ ᠶᠡᠩᠬᠡ ᠭᠡᠳᠡᠭ ᠤᠨ ᠤᠬᠠᠭᠳᠠᠬᠤᠨ | ᠠᠳᠠᠯᠢ ᠦᠭᠡᠢ ᠪᠠᠶᠢᠳᠠᠭ ᠪᠠᠶᠢᠨᠠ᠃ ᠡᠨᠡ ᠡᠳ᠋ᠯᠡᠯ ᠢ ᠢᠷᠦᠭᠡᠯ ᠳᠤ᠄ ︽ᠸᠴᠢᠷ ᠬᠤᠩᠬᠠ ᠶᠢ ᠳᠠᠭᠤᠷᠢᠶᠠᠯᠭᠠᠵᠤ | ᠬᠢᠭᠰᠡᠨ᠂ ᠤᠯᠠᠭᠠᠨ ᠵᠡᠰ ᠢᠶᠠᠷ ᠳᠡᠪᠳᠡᠵᠦ ᠬᠢᠭᠰᠡᠨ᠂ ᠰᠠᠷᠠ ᠨᠠᠷᠠ ᠶᠢ ᠳᠠᠭᠤᠷᠢᠶᠠᠯᠭᠠᠵᠤ ᠬᠢᠭᠰᠡᠨ᠂ ᠰᠢᠷᠠ ᠵᠡᠰ ᠢ | ᠡᠯᠳᠡᠨ ᠬᠢᠭᠰᠡᠨ᠂ ᠣᠯᠠᠨ ᠪᠦᠬᠦᠨ ᠳᠤ ᠲᠦᠭᠡᠭᠡᠯᠲᠡ ᠲᠠᠢ ᠬᠢᠭᠰᠡᠨ᠂ ᠣᠨᠴᠠ ᠶᠡᠭᠡ ᠶᠡᠩᠭᠡ ︵ᠰᠢᠨᠠᠭᠠ︶ ᠨᠢ | ᠦᠯᠵᠡᠶᠢᠲᠡᠢ ᠪᠣᠯᠲᠤᠭᠠᠢ︕︾ ᠭᠡᠵᠦ ᠬᠡᠯᠡᠳᠡᠭ᠃ | ᠦᠩᠭᠡᠷᠡᠭᠰᠡᠨ ᠳᠤ ᠪᠣᠯᠪᠠᠯ ᠡᠳᠡᠭᠡᠷ ᠡᠳ᠋ᠯᠡᠯ ᠢ ᠮᠣᠳᠤ ᠪᠠᠷ ᠬᠢᠳᠡᠭ ᠪᠠᠶᠢᠭᠰᠠᠨ ᠪᠠ ᠰᠢᠭᠤᠳ ᠰᠢᠨᠠᠭᠠ ᠬᠤᠯᠤ ᠶᠢᠨ | ᠨᠢᠭᠡ ᠲᠠᠯᠠ ᠶᠢ ᠨᠢ ᠴᠤᠭᠤᠯᠵᠤ ᠳᠤᠲᠤᠷᠠᠬᠢ ᠦᠷᠡ ᠶᠢ ᠨᠢ ᠠᠪᠴᠤ ᠬᠠᠶᠠᠭᠠᠳ ᠰᠢᠨᠠᠭᠠ ᠶᠢᠨ ᠣᠷᠤᠨ ᠳᠤ ᠵᠠᠷᠤᠳᠠᠭ | ᠪᠠᠶᠢᠵᠡᠢ᠃ ᠰᠡᠭᠦᠯ ᠤᠨ ᠦᠶᠡ ᠪᠣᠯᠵᠤ ᠢᠷᠡᠬᠦ ᠳᠤ ᠮᠣᠳᠤ ᠪᠣᠯᠤᠨ ᠬᠠᠪᠤᠭ ︵ᠬᠤᠯᠤ︶ ᠢᠶᠠᠷ ᠬᠢᠭᠰᠡᠨ ᠰᠢᠨᠠᠭᠠ | ᠠᠮᠢᠳᠤᠷᠠᠯ ᠳᠤᠮᠳᠠ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠵᠤ ᠭᠤᠣᠯᠴᠢᠯᠠᠨ ᠲᠡᠮᠦᠷ᠂ ᠴᠠᠶᠢᠷ᠂ ᠵᠡᠰ᠂ ᠬᠦᠩᠭᠡᠨ ᠴᠠᠭᠠᠨ ᠮᠡᠲᠦ | ᠲᠡᠮᠦᠷᠯᠢᠭ ᠢᠶᠠᠷ ᠬᠢᠭᠰᠡᠨ ᠰᠢᠨᠠᠭᠠ ᠪᠣᠯᠤᠨ ᠬᠤᠪᠠ ᠪᠠᠷ ᠬᠢᠭᠰᠡᠨ ᠰᠢᠨᠠᠭᠠ ᠶᠢ ᠬᠡᠷᠡᠭᠯᠡᠬᠦ ᠵᠠᠩᠰᠢᠯ ᠲᠠᠢ ᠪᠤᠯᠤᠭᠰᠠᠨ | ᠪᠠᠶᠢᠳᠠᠭ᠃ ᠡᠶᠢᠮᠦ ᠠᠴᠠ ᠢᠷᠦᠭᠡᠯ ᠳᠤ᠄ ︽ᠲᠠᠯᠠ ᠲᠠᠢ ᠪᠣᠯᠤᠳ ᠲᠡᠮᠦᠷ ᠢᠶᠠᠷ᠂ ᠳᠠᠪᠳᠠᠨ ᠴᠣᠬᠢᠵᠤ ᠬᠢᠭᠰᠡᠨ᠂ | ᠲᠠᠪᠦᠨ ᠵᠦᠢᠯ ᠤᠨ ᠢᠳᠡᠭᠡᠨ᠂ ᠲᠠᠰᠤᠷᠠᠯᠲᠠ ᠦᠭᠡᠢ ᠳᠤᠲᠤᠷᠠ ᠨᠢ ᠣᠷᠤᠭᠠᠳ ᠪᠠᠶᠢᠳᠠᠭ᠂ ᠲᠠᠲᠠᠨ ᠲᠦᠯᠬᠢᠨ | ᠤᠳᠬᠤᠭᠠᠳ ᠬᠢᠪᠡᠯ ᠲᠠᠪᠤ ᠭᠤᠷᠪᠠ ᠶᠢ ᠲᠠᠭᠠᠷᠠᠭᠤᠯᠤᠭᠠᠳ ᠪᠠᠶᠢᠳᠠᠭ᠂ ᠲᠠᠭᠠᠲᠠᠢ ᠰᠠᠶᠢᠬᠠᠨ ᠰᠢᠨᠠᠭᠠ ᠨᠢ | ᠦᠯᠵᠡᠶᠢᠲᠡᠢ ᠪᠣᠯᠲᠤᠭᠠᠢ︕︾ ᠭᠡᠵᠦ ᠬᠡᠯᠡᠬᠦ ᠪᠣᠯᠤᠭᠰᠠᠨ ᠪᠠᠶᠢᠳᠠᠭ᠃ | ᠬᠡᠪᠬᠡᠭᠦᠷ ᠭᠡᠳᠡᠭ ᠨᠢ ᠰᠠᠪᠠᠨ ᠳᠤᠲᠤᠷᠠ ᠠᠴᠠ ᠦᠳᠬᠡᠨ ᠶᠠᠭᠤᠮᠠ ᠶᠢ ᠰᠢᠭᠦᠵᠦ ᠠᠪᠬᠤ ᠳᠤ ᠬᠡᠷᠡᠭᠯᠡᠳᠡᠭ | ᠰᠢᠭᠦᠭᠦᠷ ᠢ ᠵᠢᠭᠠᠳᠠᠭ᠃ ᠡᠨᠡ ᠬᠦ ᠡᠳ᠋ᠯᠡᠯ ᠨᠢ ᠬᠠᠶᠢᠰᠤ ᠲᠦᠮᠫᠡᠨ ᠵᠡᠷᠭᠡ ᠰᠠᠪᠠ ᠳᠤᠲᠤᠷᠠ ᠠᠴᠠ ᠦᠳᠬᠡᠨ ᠶᠠᠭᠤᠮᠠ | ᠪᠤᠶᠤ ᠰᠢᠩᠭᠡᠨ ᠪᠡᠶᠡᠲᠦ ᠲᠤᠲᠤᠷᠠ ᠠᠴᠠ ᠪᠦᠬᠦᠯᠢ ᠶᠠᠭᠤᠮᠠ ᠶᠢ ᠰᠢᠭᠦᠵᠦ ᠠᠪᠬᠤ ᠳᠤ ᠪᠠ ᠮᠢᠬᠠ ᠱᠦᠯᠦ ᠴᠢᠨᠠᠬᠤ | ᠦᠶᠡ ᠳᠤ ᠳᠡᠭᠡᠷᠡ ᠨᠢ ᠬᠦᠪᠦᠭᠰᠡᠨ ᠬᠦᠭᠡᠰᠦ ᠮᠡᠲᠦ ᠵᠦᠢᠯᠡᠰ ᠢ ᠢᠯᠭᠠᠵᠤ ᠠᠪᠬᠤ ᠳᠤ ᠬᠡᠷᠡᠭᠯᠡᠳᠡᠭ᠃ ᠬᠡᠪᠬᠡᠭᠦᠷ ᠢ | ᠭᠤᠷᠪᠠᠨ ᠵᠦᠢᠯ ᠢᠶᠠᠷ ᠬᠢᠳᠡᠭ᠃ ᠨᠢᠭᠡ ᠨᠢ ᠰᠢᠭᠤᠳ ᠰᠢᠨᠠᠭᠠ ᠶᠢᠨ ᠬᠡᠯᠪᠡᠷᠢ ᠲᠠᠢ ᠵᠦᠢᠯ ᠳᠤ ᠣᠯᠠᠨ ᠰᠡᠭᠡᠷᠬᠡᠢ | ᠨᠦᠬᠡ ᠭᠠᠷᠭᠠᠵᠦ ᠬᠢᠳᠡᠭ᠃ ᠨᠦᠭᠦᠭᠡ ᠨᠢ ᠨᠠᠷᠢᠨ ᠲᠡᠮᠦᠷ ᠤᠲᠠᠰᠦ ᠪᠠᠷ ᠰᠦᠯᠵᠢᠵᠦ᠂ ᠮᠤᠳᠤ ᠪᠠᠷ ᠪᠤᠶᠤ ᠲᠡᠮᠦᠷ ᠤᠨ | ᠪᠡᠶᠡ ᠪᠠᠷ ᠨᠢ ᠡᠰᠢ ᠪᠠᠷᠢᠭᠤᠯ ᠬᠢᠳᠡᠭ᠃ ᠪᠠᠰᠠ ᠨᠢᠭᠡ ᠨᠢ ᠪᠣᠯᠪᠠᠯ ᠨᠠᠷᠢᠨ ᠨᠠᠶᠢᠳᠠᠭ ᠪᠤᠷᠭᠠᠰᠦ ᠪᠠᠷ ᠰᠢᠨᠠᠭᠠ ᠬᠡᠯᠪᠡᠷᠢ | ᠲᠠᠢ ᠰᠦᠯᠵᠢᠨ ᠨᠡᠬᠡᠵᠦ᠂ ᠠᠳᠬᠤ ᠪᠠᠷᠢᠮᠠ ᠮᠣᠳᠤ ᠪᠠᠷ ᠡᠰᠢ ᠪᠠᠷᠢᠭᠤᠯ ᠵᠡᠭᠦᠵᠦ ᠬᠢᠳᠡᠭ᠃ ᠡᠨᠡ ᠬᠡᠷᠡᠭᠯᠡᠭᠦᠷ ᠢ | ᠵᠠᠷᠢᠮ ᠨᠤᠲᠤᠭ ᠤᠨ ᠬᠦᠮᠦᠰ ︽ᠰᠢᠭᠦᠭᠦᠯ︾ ᠭᠡᠵᠦ ᠬᠡᠯᠡᠳᠡᠭ᠃ ᠵᠠᠷᠢᠮ ᠭᠠᠵᠠᠷ ᠤᠨ ᠬᠦᠮᠦᠰ ᠬᠠᠷᠢᠨ ︽ᠵᠤᠤᠯᠢ︾ | ᠭᠡᠬᠦ ᠪᠤᠶᠤ ︽ᠱᠦᠭᠦᠷ︾ ᠭᠡᠵᠦ ᠬᠡᠯᠡᠳᠡᠭ ᠪᠠᠶᠢᠨᠠ᠃ | | ᠪᠡᠯᠡᠳᠬᠡᠭᠰᠡᠨ ᠨᠢ᠄ ᠡᠷᠳᠡᠨᠢᠬᠦᠦ | ᠨᠠᠶᠢᠷᠠᠭᠤᠯᠤᠭᠰᠠᠨ ᠨᠢ᠄ ᠨᠠᠮᠤᠷ | ᠬᠢᠨᠠᠭᠰᠠᠨ ᠨᠢ᠄ ᠤᠷᠢᠬᠠᠨ |